*, (,TA'I SI TU CHOS KYI RIN CHEN LA GDAMS PA,) CHOS KYI RGYAL PO'I BSTAN LA RAB DAD CING, ,RIN CHEN DAL 'BYOR MNGON MTHO'I DPAL GYIS BRJID, ,CHAB SRID DES PAS SKYONG BA'I DPAL YON CAN, ,MI DBANG KHYOD LA CHOS KYI SKYES 'DI 'BUL, , RAB TU BRTAN PA'I LHUN PO'ANG 'JIG 'GYUR NA, ,CHU BUR LTA BU'I LUS LA SMOS CI 'TSAL, ,LHAN CIG SKYES PA'I SHA RUS 'BRAL 'GYUR NA, ,BLO BUR 'DUS PA'I GROGS LA YID BRTAN CI, ,SKYE BA CAN KUN 'CHI BDAG DRUNG DU SNYEG ,NAD MED LANG TSO LDAN RNAMS NA RGAS 'JOMS, ,PHUN TSOGS THAMS CAD RGUD PA'I MTHA' LA BRTEN, ,RTZI SHING LO MA'I TSOGS LA ME DANG NI, ,RGYA MTSO'I SROG CHAGS TSOGS LA CHU SRIN BZHIN, , SKYE BO 'DI KUN GANG GIS 'JOMS BYED PA'I, ,MTHAR BYED DE LA 'BROS PA'I THABS MDZOD CIG ,NOR LDAN PHYUG PO'I NOR GYIS BSLUR MED CING, ,STOBS LDAN DPA' BOS G-YUL NGO SPRAD DU MED, ,GZHON NU MA LA NGOR LTA MI BYED PA'I, ,'CHI BDAG DE LAS 'BROS PA'I THABS MDZOD CIG ,ZIN DANG MA ZIN LAS 'PHRO MI SGUG CING, , @116 RGAN GZHON BAR MA'I RNAM DBYE MI 'BYED PAR, ,'TSO BA'I 'JIG RTEN MA LUS ZA BYED PA'I, ,GSHIN RJE DE LAS 'BROS PA'I THABS MDZOD CIG ,GANG DU GNAS NA 'CHI BDAG MI 'BYUNG BA'I, ,GNAS DE SA 'OG SA STENG SA BLA YI, ,'JIG RTEN GSUM NA MED CES RGYAL BAS GSUNGS, ,STOBS LDAN DE LAS 'BROS PA'I THABS MDZOD CIG ,BSHES GNYEN BZANG PO'I DED DPON LA BSTEN CING, ,THEG CHEN 'GRO MGYOGS BRTZON PA'I SRAB SKYOBS CAN, ,THABS SHES LDAN PA'I BZHON PA LA GNAS TE, ,'CHI MED THAR PA'I GRONG DU BSNYEG PAR RIGS, ,CES PA 'DI NI TA'I SI TU CHOS KYI RIN CHEN LA SH'AKYA'I DGE SLONG KU MA RA MA TIS GANGS BU LE'I DBEN GNAS NAS GDAMS PA'O,, ,,DGE LEGS SU GYUR CIG ,