*, (,'BRI KHUNG GI CHEN PO SHES RAB DPAL LA GDAMS PA,) BKA' DRIN MNYAM MED DPAL LDAN BLA MA DANG, ,BLA MED DKON MCHOG GSUM LA PHYAG 'TSAL NAS, , @096 MANG DU THOS PA'I DGE SLONG KU MA RAS, ,DAD LDAN SHES RAB DPAL LA 'DI SKAD 'DOMS, ,SHIN TU RNYED DKA'I DAL 'BYOR RIN CHEN 'DI, ,'JIG PAR NGES SO NAM 'JIG NGES PA MED, ,SKYE BAR NGES SO GAR SKYE NGES PA MED, ,DAL 'BYOR DON YOD MDZOD CIG SHES RAB DPAL, ,'DOD DANG MI 'DOD RNAM SMIN 'BRAS BU TE, ,RANG GIS BSAGS PA'I DKAR NAG LAS 'BRAS RNAMS, ,MYONG BAR NGES SO NAM MYONG NGES PA MED, ,SDIG SPONG DGE LA 'BAD CIG SHES RAB DPAL, ,BSAG DANG BSRUNG DANG BRLAG PA'I DU:KHA CAN, ,NGAL BRGYAS BSGRUBS PA'I SGYU MA'I ZAS NOR 'DI, , 'DZAD PAR NGES SO NAM 'DZAD NGES PA MED, ,LONGS SPYOD SNYING PO LONGS SHIG SHES RAB DPAL, ,PHAN BYED BSHES DANG GNOD BYED DGRA BO YANG, ,BLO BUR 'DUS PA'I TSONG 'DUS MGRON PO BZHIN, ,BRAL BAR NGES SO NAM BRAL NGES PA MED, ,CHAGS SDANG ZHEN PA BSKYUNGS SHIG SHES RAB DPAL, , 'JIG RTEN 'DI NAS PHA ROL 'GRO BA'I TSE, ,RANG BSAGS DGE SDIG LAS 'BRAS MA GTOGS PA, ,'KHOR DANG NYE DU LONGS SPYOD RJES MI 'BRANG, ,PHYI MA'I LAM RGYAGS SGRUB SHIG SHES RAB DPAL, ,DA LO 'DI BYA SANG PHOD 'DI BYED CES, , RTAG RTAG 'DRA BA'I PHYI TSE GRABS SHOM RNAMS, ,THOG DU MI 'BAB GROG SKAM NYA RGYA 'DRA, ,RTAG TSAS 'DOD 'DUN BSKYUNGS SHIG SHES RAB DPAL, ,CES PA 'DI 'BRI KHUNG THOL GYI CHEN PO SHES RAB DPAL GYIS CHOS KYI GDAMS PA GCIG 'DOD ZHUS PA LA GDAMS PA'O,, ,,