Correspondence Offered to the Dharma Lord Lobsang Drakpa, Including Words about the Joys of Solitude

*, (,CHOS RJE BLO BZANG GRAGS PA LA GNANG BA DBEN PA LA DGA' BA'I GTAM DANG BCAS PA,) AOm BDE LEGS SU GYUR CIG YI GE BKOD PA RNAMS KYI DON GTZO CHE BA RNAMS KHO BO'I BLO LA SNGAR NAS YOD KYANG, NGES PA SKYE BA DANG ZHIB CHA MANG PO LA SHIN TU PHAN CHE BAR BYUNG, KHYAD PAR CHOS KYI GNAD NGES 'BYUNG SOGS GSUM DU BSKUR BA 'DI LAM KYI SROG RTZA NAS BZUNG BA'I NYAMS LEN KYI GNAD YIN SNYAM PA KHO BO LA SNGAR NAS YOD LA, NGES 'BYUNG LA YANG TSOR BA SDUG BSNGAL GYIS YID 'BYUNG BA PHYUNG LA'ANG YOD, 'GYUR BA'I DU:KHAS YID 'BYUNG BA PHYI ROL PA PHAL CHE BA LA YANG YOD, @079 'DU BYED KYI SDUG BSNGAL KYIS YID 'BYUNG BA 'DI SANGS RGYAS KYI BSTAN PA'I KHYAD CHOS YIN, DE YI MYONG BA SNA ZIN GYI TSAD TSANGS PA DANG BRGYA BYIN GYI BDE BA LA'ANG SRED PA RMI LAM DU YANG MI SKYE BA YIN, STONG NYID LA NGES PA THOB PA'I LTA BA GCIG MED NA 'DI'I NGES 'BYUNG YANG RNAL MA SKYE BA DKA', DENG SANG LUS SEMS LA MI 'DOD PA THOG TU BABS PA'I YI MUG LA NGES 'BYUNG DU BYED PAR SNANG STE, DE 'DRA BA'I NGES 'BYUNG PHAG KHYIS BDAS PA'I SKRAG SDANGS DANG 'DRA, CI YANG MI BTUB, BYANG CHUB KYI SEMS LA YANG SANGS RGYAS KYI BSNGAGS PA BRJOD PA NA, DE'I GO 'PHANG TZAM DON GNYER KYI BLO SKYE BA MANG YANG, DES SEMS BSKYED RNAL MA GO CHOD PAR MI SKYE, SEMS BSKYED RNAL MA LA RGYU 'GRO BA MTHA' DAG SGROL 'DOD KYI SNYING PO KHYAD PAR CAN GCIG DGOS TE, STONG NYID RTOGS PA'I SHES RAB MED NA THOB BYA BYANG CHUB KYI RANG BZHIN MI SHES, DE MA SHES NA BYANG CHUB LA YOD MED GANG RUNG GI MTSAN MAR 'DZIN PA'I LOG LTAS BSLAD PAS PHYI ROL PA'I SEMS BSKYED BZHIN DU SEMS SKYED RNAL MAR MI 'GRO, SNYING RJE KHYAD PAR CAN MED NA BYANG CHUB DE GZHAN DON DU DON GNYER MI 'BYUNG BAS, NYAN RANG GI SEMS BSKYED BZHIN DU THEG CHEN GYI LAM DU MI 'GRO , DES NA DBANG RNON CHOS KYI RJES 'BRANG RNAMS NI THOG MAR LUNG RIGS KYI SGO NAS DE KHO NA NYID KYI SHES PA TSOL BA LA BRTZON PAR BYED CING, STONG NYID RTOGS PA'I LTA BA RNYED NAS DE MA RTOGS PA'I SEMS CAN LA SNYING RJE BSKYED NAS, DE DAG GI @080 DON DU BYANG CHUB DON GNYER KYI BLO SKYE BA YIN, DBANG RTUL DAD PA'I RJES 'BRANG RNAMS LA THOG MAR DGE BA'I BSHES GNYEN LA SOGS PAS BSNGAGS PA BRJOD PA LA SOGS PA'I TSIG TZAM LA RTEN NAS BYANG CHUB DON GNYER GYI BLO SKYE LA, DE'I RJES SU THOS SOGS LA BRTEN NAS STONG NYID KYI LTA BA SKYES PA NA SNGAR GYI BYANG CHUB DON GNYER GYI BLO DE NYID STONG NYID KYI SHES RAB KYIS ZIN PAS, STONG NYID SNYING RJE'I SNYING PO CAN GYI BYANG CHUB KYI SEMS RNAL MAR 'GYUR BA YIN, MDOR NA STONG NYID KYI LTA BA MED NA SEMS BSKYED KYANG RNAL MA MI SKYE, SEMS BSKYED RNAL MA SKYES PA'I MYONG BA SNA ZIN PA'I TSAD SEMS TZAM MAN CHAD DNGOS 'DZIN CAN MTHA' DAG LA SNYING RJE BCOS MA MA YIN PA SKYE BA YIN DE, ,DE SHIN TU DKA', MAN NGAG 'DI PA'I LUGS LA NGES 'BYUNG DANG, SEMS BSKYED LA 'KHRID TSUL DANG BOGS 'DON TSUL KHYAD PAR CAN GCIG YOD PA 'DRA STE, YI GER ZHIB TU BKOD NAS RGYA BYAS TE DBUS NAS BRGYUD NAS BSKUR BA BYUNG NA KHYAD CHE, GZHAN 'KHRID NA BLO TSOD DANG MTHUN PAR GO RIMS NGES PA CAN GYIS 'KHRID DGOS PAR SNANG, KHO BO RANG GIS NI CHOS GSUM GO RIM MA 'CHOL BAR NYAMS SU BLANGS TE NYAN TZAM BYUNG, LTA BA'I PHYOGS LA SPYIR PHYI NANG GI GRUB MTHA' THA DAD KYI DBANG GIS LTA BA BZANG NGAN THA DAD PA JI SNYED PA KUN RTOG PA LAS MA 'DAS PA DE'I PHYIR, 'PHAGS PA'I MNYAM GZHAG DANG SANGS RGYAS KYI SA NA LTA BA BZANG NGAN GANG YANG MED DO ZHES KHO BO SMRA'O, ,DE LA PHYI ROL PA'I LTA BA RNAMS 'KHOR BA DANG NGAN SONG KYI RGYU 'BA' ZHIG YIN, RANG GI SDE PA GNYIS KYI GANG ZAG GI @081 BDAG MED PA'I LTA BA THAR LAM DNGOS MIN YANG LAM STEGS TZAM DU 'GYUR, RNAM RIG PA'I LTA BAS DROD RTZE TZAM BGROD PAR SEMS, BZOD PA MI SKYE DE, DE GOMS PAS 'DZIN PA RANG BZHIN MED PA LA GSAL SNANG DON DANG MTHUN PA SKYED MI SRID PA'I PHYIR RO, ,DES NA SEMS TZAM PA'I LTA BA'I RGYUN GOMS PAS BZOD PA MI SKYE LA, DE SKYE BA DBU MA'I LTA BAR NA 'PHAR BA LA GDON MI ZA BAR LTOS DGOS SO, , RANG RGYUD PA'I LTA BA CHOS MCHOG MAN CHAD DU MI 'DOR LA, SA THOB NAS GDON MI ZA BAR 'DOR DGOS TE, DE DAG NI SGYU MA TZAM DU 'DZIN PA YIN LA, 'PHAGS PA RNAMS NI RJES THOB TU YANG KUN RDZOB SGYU MA TZAM DU YANG MI 'DZIN TE, CHOS THAMS CAD MING TZAM BRDA TZAM BTAGS PA TZAM DU KHONG DU CHUD PAS PHYIR RO, , 'ON KYANG RANG RGYUD BA'I LTA PA'I RGYUN GOMS PAS 'PHAGS PA'I YE SHES SKYE BAS 'DIS MTHONG LAM BSKYED PA LTA BA GONG MAR NA 'PHAR BA LA MI LTOS SO, ,THAL 'GYUR BA'I LTA BA SA BCU PA MAN CHAD KYI 'PHAGS PA'I RJES THOB TU RJES SU 'GRO STE, DE DAG GI RJES THOB TU RTEN 'BYUNG GI CHOS RNAMS MING TZAM BRDA TZAM BTAGS PA TZAM DU YONGS SU SPYOD PAS PHYIR RO, ,SANGS RGYAS KYI SAR 'DI YANG 'DOR TE, , SANGS RGYAS RNAMS LA GNAS SKABS THAMS CAD DU MING DON KYI MTSAN MA GANG YANG MI SNANG BAS PHYIR RO, ,DES NA DBU MA THAL RANG GNYIS KA YANG DON DAM BRJOD BRAL DU 'DOD PA MTSUNGS KYANG, RTEN 'BREL SGYU MA TZAM DU 'DZIN PA DANG, ,BTAGS YOD MING RKYANG TZAM DU 'DZIN PA DE GNYIS KYI KHYAD PAR THUN MONG MA YIN PA YIN, SGYU @082 MA TZAM DU 'DZIN PA NA KUN RDZOB TU MYONG RIG SGYU MA TZAM ZHIG KHAS LEN GYI, SPANG BYA DANG GNYEN PO YANG MYONG RIG SGYU MA TZAM DU KHAS LEN TE, RTEN 'BREL BTAGS PA TZAM DU KHAS LEN PA LA NI 'KHRUL PA GZHI NA RTZA BRAL YIN CING, SPANG GNYEN YANG RTOG PAS BTAGS PA TZAM LAS MED DO, , KHO BO LA DBU MA'I RTOGS PA SKYE TSUL RIM PA BZHI BYUNG STE, 'DI LTAR DANG PO CHAD STONG, GNYIS PA SNANG STONG, GSUM PA RTEN 'BREL SGYU MAR GO BA, BZHI PA RTEN 'BREL BTAGS YOD GZHI MED DU GO BA'O, ,DANG PO NI, BUM PA THO BAS BCOM PA LTAR, KUN RDZOB RDZAS SNGAGS RIGS PAS BSHIG PA'I STONG PA NYID DE, ,'DIS KYANG RIGS DPYAD KYI BDEN 'DZIN LDOG CING STONG NYID LA MOS PA'I RGYU TZAM BYED, GNYIS PA NI, SGYU MA LTAR SNANG DUS NYID NAS RANG BZHIN MED PAR RTOGS PA STE, 'DIS PHYI GZUNG BYA LA SGRO SKUR KYI RTOG PA LDOG KYANG NANG MYONG RIG LA BROS PA'I ZHEN PA MI 'DOR BAS SEMS TZAM RNAM RDZUN PA'I LTA BA LAS MA 'DAS, GSUM PA NI, NANG RIG PA DANG PHYI SNANG BA GNYIS KA YANG RGYU RKYEN LA RAG LAS PAS SGYU MA LTAR KUN RDZOB TU YANG SNANG BA TZAM LAS RANG BZHIN CUNG ZAD KYANG MED PAR RTOGS PA STE, 'DI LA YANG MTHAR 'DZIN KYI ZHEN PA CI YANG MED KYANG RTEN 'BREL SGRA RTOG LA MA LTOS PA'I DON CHOS SGYU MA TZAM DU 'DZIN PA YOD PAS, RNAL 'BYOR SPYOD PA'I DBU MA PA LAS MA 'DAS, BZHI PA NI, RTEN 'BREL KYI CHOS RNAMS RIGS PAS TSUL BZHIN DU DPYAD PA NA RANG GI DNGOS PO CUNG ZAD KYANG MI RNYED CING, MA DPYAD PA NA THA SNYAD KYI YUL DU @083 'GYUR BAS, RTOG PAS BTAGS SHING MING GIS THA SNYAD BYAS PA TZAM GYI BTAGS YOD DU RTOGS PA'O, , DE LTA BU'I RTEN 'BREL RTOGS PA'I BLO DE NYID KYIS BLO GZHAN LA LTOS MED DU RGYU 'BRAS PHAN TSUN MI 'KHRUL BA DANG, RTEN 'BREL RTAG CHAD SPROS PA'I MTHA' THAMS CAD DANG BRAL BAR NGES PA 'DRONGS PA GCIG 'ONG BA YIN, GO YUL KYI LTA BA LA 'DI'I GONG NA BOGS DBYUNG RGYU GZHAN YOD PAR MI SEMS, 'DI MA RTOGS BAR LA LTA BA MTHAR THUG PA YANG MA YIN, KHYED KYI DA LTA RTEN 'BREL RTOGS TSUL KYI LTA BA DE SHIN TU BZANG YANG, SGYU MA'I 'DZIN PA CUNG ZAD YOD PAS LTA BA 'DI LA NGES PA RNYED NA DE YANG 'JIG PAS, DA DUNG GSOL BA THOB CIG RANG GIS KYANG DPYOD DANG, RING PO MI THOGS PAR NGES PA RNYED PAR 'GYUR, YI DAM GYIS KYANG RANG GI RGYUD TSOD DANG MTHUN PAR STON PAS THENGS GCIG RTOGS PA LA CHOG TSOD BZUNG MI NYAN, LTA BA 'DI RTOGS PA NA RGYU 'BRAS DANG STONG PA LA YID CHES PA'I NGES PA CIG CAR SKYE, SPANG GNYEN DANG 'KHOR 'DAS GZHI MED RTZA BRAL DU RTOGS PAS DE DAG LA BLO BUR DU 'DZIN PA DANG, RTEN 'BREL SGYU MA TZAM DU 'DZIN PA YANG SPONG BA YIN, KUN RDZOB RTEN 'BREL BTAGS PA TZAM DU RTOGS PA NA DON DAM BRJOD BRAL NAM MKHA' LTAR GO BA'I NGES PA SKYE BA RIGS PA GZHAN LA LTOS MI DGOS TE, BLO DE NYID KYIS DON DAM LA SGRO 'DOGS CHOD PAS SO, , DPER NA SA PHYOGS DAG PA BA RTOGS PA'I BLO DE NYID KYIS BUM MED LA SGRO @084 'DOGS CHOD PA BZHIN NO, ,DE BAS NA RTEN 'BREL BTAGS PA TZAM DU RTOGS PA'I LTA BA DE NYID MNGON DU 'GYUR BA SO SKYE LA MTHAR 'DZIN 'GOG PA'I RIGS PA LA LTOS, 'PHAGS PA LA MNYAM BZHAG GI STOBS KYIS RJES THOB TU 'BAD MED DU MNGON DU 'GYUR, BLO DE NYID RTZE GCIG PA'I ZHI GNAS KYIS BRTAN PAR BYAS NAS DRAN SHES KYI RTOG PA GZHAN GYIS BAR MA CHOD PAR RGYUN DU BSKYANGS PAS GOMS PA MTHAR PHYIN PA NA NAM MKHA' LA 'JA' YAL BA LTAR BLO DE NYID KYANG DON DAM BRJOD BRAL NAM MKHA' LTA BU'I NGANG DU GYUR PA NI 'PHAGS PA'I YE SHES SKYES PA ZHES PA'I THA SNYAD DU BYED PA YIN, RANG RGYUD PA GCIG DANG DU BRAL GYI RTAGS LA BRTEN NAS SNANG BA BDEN DNGOS KYIS STONG PA'I SGYU MA LTA BUR YONGS SU SPYOD PA'I RJES THOB DE NYID RGYUN DU DRAN SHES KYIS BSKYANGS PAS GOMS PA MTHAR PHYIN PA NA BLO DE'I RGYUN SGRA DON 'DRES 'DZIN GYI DRI MA MTHA' DAG DANG BRAL TE, SNANG BA SGYU MA LTA BU LA MTHA' GANG DU YANG MI RTOG PAR GYUR PA NA 'PHAGS PA'I LAM SKYES PAR 'DOD PAR GDA', LHAG MTHONG GI MYONG BA 'DON TSUL LA, DANG PO ZHI GNAS KYIS SEMS BRTAN PAR BYAS NAS DE'I 'OG TU GANG ZAG GI BDAG MED NAS NYAMS SU LEN PA 'DI SHING RTA CHEN PO THAMS CAD KYI DGONGS PAR SNANG YANG DENG SANG GI MAN NGAG PA RNAMS LA LHAG MTHONG BSGOM TSUL KYI LAG LEN GTAN MI SNANG, DE'I STOBS KYIS RNAM RTOG BKAG PA'I ZHI GNAS TZAM DANG DE LAS SKYES PA'I NYAMS BAN BUN TZAM LA CHED CHER BYED PAR SNANG STE, DE DAG GIS MI TSE STONG ZAD LA BSKYAL SNYAM, GNAS LUGS LA DPYOD @085 PA'I SHES RAB MED PAR MI RTOG PA TZAM KYIS GROL NA MU STEGS KYANG CI'I PHYIR MI GROL, HVA SHANG YANG CI'I PHYIR 'KHRUL, HVA SHANG NI NYAMS LEN GYI TSE SO SOR RTOG PA'I SHES RAB SPANGS PA KHO NAS 'KHRUL PAR KA MA LA SHI LAS GSUNGS SO, , KHO BOS NI SNGAR ZHI GNAS LA CHED CHER MA BYAS, GTZO CHER LHAG MTHONG KHO NA NYAMS SU BLANGS TE, DE YANG MNYAM BZHAG TU GANG ZAG GI BDAG MED DRAN PA NYER BZHAG DANG KHAMS KYI RAB DBYE'I SGO NAS NYAMS SU BLANGS, RJES THOB TU YUL SNANG SNA TSOGS LA SPYI DANG BYE BRAG CI RIGS PAR RANG BZHIN MED PAR DPYAD NAS NYAMS SU BLANGS TE, SNGAR CHER MA BSGOMS KYANG LTA BA'I BOGS 'BYIN PA LA SHIN TU PHAN CHE BAR BYUNG, LTA BA'I GO YUL TZAM YOD KYANG NYAMS LEN MA SHES NA BOGS MI 'BYIN LA, MYONG BA MA THON NA GO YUL TZAM GYIS NYON MONGS DANG RNAM RTOG GI DBAL MI CHOG PAR SNANG, MDOR NA LTA BA'I PHU THAG CHOD, NYAMS LEN KYI GNAD SHES, 'KHOR BA'I NYES DMIGS DANG THAR PA'I PHAN YON LA TSIG TZAM MA YIN PAR NGES PA 'DRONGS, STON PA DANG BSTAN PA'I YON TAN LA YID CHES PA'I DAD PA THOB BZHIN DU BSGRUB PA SNYING POR MI BYED PAR TSE 'DI'I SNANG SHAS LHUR LEN NA KHO BO'I SNYING RUL BA LAS, GZHAN DU BRTAG TU CI ZHIG YOD, ,DE BAS NA DA NI TSE LHAG GANG YOD PAS MTHA'I GNAS SU MI SKYEL ZHING, TSE DANG BSGRUB PA MI SNYOM PAR GZHAN DON BYED PA LTAR BCOS PA'I THABS KYIS 'KHOR BSDUS NAS SNANG SHAS LHUR BYED DAM, SKYID CHOS DANG SNYOM LAS LHUR BYED NA BSTAN SRUNG RNAMS KYIS KHO BO'I MGO BO AA RDZA KA'I DOG PA @086 BZHIN DU KHOS SHIG GO ,GZHAN YANG YI DAM GYI SPYAN SNGAR DAM BCA' 'DI DAG 'BUL LO, ,GANG GI ZHABS ZUNG PADMO'I GE SAR RDUL, ,TSANGS DANG LHA DBANG KHYAB 'JUG LA SOGS PA, ,'JIG RTEN DREGS LDAN GTZUG GIS GUS BSTEN PA'I, ,SPYAN RAS GZIGS MGON DE LA PHYAG 'TSAL LO, ,MANG DU THOS KYANG TSUL BZHIN SEMS LAS GA-YOL, ,KHRIMS BRGYA NOD KYANG NYES LTUNG DRI MA CAN, ,DGE SBYONG BDAG GI G-YAR DAM 'DI RNAMS LA, ,MKHYEN LDAN THUGS RJE'I LHA KHYOD YUD TZAM DGONGS, , GANG DU GNAS NA SNANG SHAS 'PHEL 'GYUR ZHING, ,RANG RGYUD RNYED BKUR ZHAGS PAS 'CHING BYED LA, ,GZHAN RGYUD PHRAG DOG 'GRAN SEMS KYIS GDUNG BA'I, ,GNAS DER SKAD CIG TZAM YANG MI GNAS SO, , DENG NAS BZUNG STE JI SRID 'TSO'I BAR, ,GANGS DANG RI SUL NAGS KYI KHROD RNAMS SU, ,BSE RU LTA BUR RTAG TU GNAS BYED CING, ,GRONG DANG 'KHOR MANG DBUS SU GNAS MI BGYID, ,CHOS BRGYAD RKYEN GYIS NAM YANG MI G-YO BA'I, , SEMS LA BRTAN PA JI SRID MA THOB BAR, ,GCIG PUR RANG RGYUD 'DUL BA MA GTOGS PA, ,GZHAN DON THABS KYIS RANG DON NYAMS MI BGYID, ,CHOS GOS GSUM DANG LHUNG BZED LA SOGS PA, ,RANG NYID 'TSO BA'I YO BYAD MA GTOGS PA, , GSER DANG DBYIG SOGS LHAG PA'I YO BYAD NI, ,RANG GI DON DU TIL TZAM MI BCANG NGO, , GZHAN GYI NYES PA NAM YANG MI GLENG ZHING, ,DON DANG LDAN ZHING CHOS MTHUN MA GTOGS PA, ,DMAG DANG CHOM RKUN RGYAL PO'I GTAM LA SOGS, ,'KHRUL PA'I @087 BKA' MCHID NAM YANG MI BGYID DO, ,CHOS KYI DON DU DKA' SPYAD BSRAN BZOD CING, ,'JIG RTEN BLOS BTANG RNAL 'BYOR DON DU GNYER, ,'DOD CHUNG CHOG SHES RANG DANG RJES MTHUN PA'I, ,RJES 'BRANG 'KHOR NI BZHI LAS LHAG MI BSTEN, ,GAL TE BDAG GIS G-YAR DAM 'DI RNAMS DANG, ,'GAL BA BGYIS NA RGYAL BA SRAS BCAS DANG, ,THUGS RJE'I MNGA' BDAG SPYAN RAS GZIGS MGON GYIS, ,KHYI PHAG LUG BONG RNAMS DANG BDAG SNYOMS SHIG ,BDAG GIS JI SKAD SMRAS 'DI KHYED KYIS KYANG, ,YID LA CHONGS LA TSUL BZHIN NYAMS SU LONGS, ,SHI YANG 'DI LAS GZHAN PA'I KHA CHEMS MED, ,'PHRAD KYANG SMRA RU GZHAN PA MA MCHIS SO, ,KHO BO DBEN PA BSTEN PA'I RGYU MTSAN YANG, ,'KHOR DANG GROGS KYIS YID SUN PHYUNG BA'AM, ,RNYED BKUR GRAGS 'DOD PAS NI MA YIN GYI, ,GZHAN DU 'KHOR BA'I DU:KHA ME 'OBS LTAR, ,SHIN TU BRNAG PAR DKA' BA MTHONG PHYIR DANG, ,BCOM LDAN 'DAS KYIS RNAM GRANGS DU MA RU, ,BSNGAGS PA'I DBEN GNAS PADMA'I TSAL BAS KYANG, ,SHIN TU YID DU 'ONG BA MTHONG BA'I PHYIR, ,DE YANG 'DI LTAR, GANG LA NYES PA RDUL TZAM MI MNGA' ZHING, ,RMAD BYUNG YON TAN DPAL GYIS RAB BRJID PA, ,SNYAN PA'I BA DAN 'JIG RTEN GSUM NA GA-YO, ,THUB DBANG LHA YI LHA LA PHYAG 'TSAL LO, ,KVA YE GSAN CIG SHES LDAN GROGS PO DAG ,BSTAN PA'I NYIN BYED NUB RI'I RTZE LA SON, ,LUS SROG G-YO BA 'BAB CHU'I RGYUN DANG MTSUNGS, ,THAR 'DOD RNAMS KYIS BAG YOD BSTEN PAR RIGS, ,RIN CHEN BDUN LDAN GLING CHEN BZHI LA DBANG, ,DPAG MED @088 TSOR GNAS DGE BCU'I DPAL LA SPYOD, ,PHUN TSOGS MNGON MTHO'I BDE LA ROL BYED PA'I, ,'KHOR LOS SGYUR RGYAL DPAL DE'ANG CHU SHING 'DRA, ,LHUN PO'I SPO LA YUN RING GNAS BCAS TE, ,YONGS 'DU'I TSAL DU DGA' BDE'I DPAL LA ROL, ,'CHI MED NYE DBANG TSOGS KYIS GUS BTUD PA'I, ,'PHROG BYED MIG STONG LDAN DE'ANG SRID PA'I BRAN, ,LUS SEMS ZUG RNGU'I GDUNG BA RING DU SPANGS, ,TING 'DZIN BDE BAS BSKAL MANG 'DA' BYED PA'I, ,'JIG RTEN MES PO GSER GYI MNGAL LDAN YANG, , 'CHI MED GO 'PHANG LAS RING GYI NAR 'KHOR, ,GANG GIS REG NA RAB BRTAN LHUN PO YANG, ,SKAD CIG TZAM GYIS THAL BAR RLOG BYED PA'I, ,ME LCE'I PHRENG BA LUS LA RAB 'BAR BA, ,DMYAL BA'I ZUG RNGU SU YIS GNAG PAR NUS, ,BLTAS PA TZAM GYIS KLUNG CHEN RGYUN SKEM ZHING, ,LJONG SHING 'BRAS BU MED PAR BYED PA YI, ,TA LA'I YA THOD BSKAMS 'DRA'I YI DVAGS GZUGS, ,GANG ZHIG MTHONG NA 'JIGS RUNG SKYI YANG GA-YA', ,BLANG DOR RMONGS PA'I GTI MUG SMAG RUM 'THIBS, ,GCIG LA GCIG ZA RDO RJE'I ME STAG DANG, BKOL SPYOD CHAR RGYUN LUS LA RTAG 'BAB PA'I, ,RNAM MANG DUD 'GRO'I GDUNG BA SU YIS BZOD, ,SRID PA'I PHUN TSOGS DE LTAR MNOG CHUNG ZHING, ,RAB MANG NYES PA'I TSOGS DANG LDAN RIG NAS, ,RANG GZHAN SRID PA'I MTSO LAS BSGRAL BYA'I PHYIR, ,MANG THOS BDAG NI DBEN PA'I NAGS SU 'GRO, ,CHAR 'DOD BYE'US 'BRUG SGRA THOS PA LTAR, ,DBEN PA'I GTAM 'DI KHO BO'I SNYING LA 'BAB, ,THOS PA'I DON RNAMS DON YOD BYA BA'I PHYIR, ,GZHON NU BLO GROS DBEN @089 PA'I NAGS SU 'GRO, ,NGANG PA'I TSOGS KYIS PAD MA'I MTSO MTHONG LTAR, ,BAS MTHA'I GNAS LA KHO BO SEMS RAB GA-YO, ,DAL 'BYOR LUS LA SNYING PO BLANG BA'I PHYIR, ,GZHON NU BLO GROS DBEN PA'I NAGS SU 'GRO, ,BUNG BA BZHON NUS 'DAB BRGYA'I TSAL MTHONG LTAR, ,KHO BO'I YID NI DBEN PA'I RO LA CHAGS, ,TING 'DZIN BDUD RTZI'I RO DE MYANG BYA'I PHYIR, ,GZHON NU BLO GROS DBEN PA'I NAGS SU 'GRO, , DPYID DUS BSIL BA'I MA LA YA RLUNG LTAR, ,NAGS KYI SMAN LJONGS KHO BO'I YID LA 'BAB, ,NYON MONGS BDUD KYI SDE DE GZHOM BYA'I PHYIR, ,GZHON NU BLO GROS DBEN PA'I NAGS SU 'GRO, ,DBEN PA LA DGA' BA'I GTAM BRJOD PA'O, , DE BAS NA KHYED KYANG DGE SBYOR LA BLO THAG CHOD PA DE SHIN TU LEGS, THOS PA'I GTING DPOGS NAS TSE 'DI BLOS BTANG GI SGRUB PA SNYING POR BYED PA LAS, RGYAL BA SRAS BCAS MNYES PAR BYED PA'I MCHOD PA GZHAN MED, DE'I THAD NA DENG SANG GI 'CHAD NYAN 'DRA BA GZHAN DON GYI NA LTAR SNANG BA YIN, RNYED BKUR LHUR LEN GYI THABS DBANG BSKUR DANG, LUNG KHRID SOGS 'KHOR SDUD PA'I GZHAN DON LTAR SNANG BYED PA RNAMS LA SNYING PO MA MTHONG ZHING, DE BAS NA 'CHAD NYAN BYED PA BSTAN PA'I RGYUN LA PHAN PAR BSAMS NAS, KHYED LA YANG SNGAR RE SHIG 'CHAD NYAN LA BLO SNA BSRINGS BA 'THAD ZER BA BYAS PA YIN, DA TSE 'DI BLOS BTANG THAR PA DON GNYER MA GTOGS PA'I 'KHOR MA BSTEN, GNAS GCIG TU YUN MA RING, PHYI NAS KYANG DGON PA'I GZHI GDING BA SOGS KYI RTZOL BA MA BYED, RI KHROD DU MI TSE MTHAR @090 SKYEL BA'I DAM BCA' MTHAR PHYIN PA MDZOD, KHAMS BZANG NA LO GSUM GYI NANG DU DPON SLOB 'PHRAD PA'I RTEN 'BREL BSGRIG DE GONG DU 'PHROD NGES LA NGED 'DI NA YOD 'DI LTAR BYED KYI YIG GE SA SKYAR SRING SA BYUNG NA BSRINGS, NGED KYI RGYU MTSAN DGE BSHES GNYIS LA GSAL, ZLA BA BZHI PA'I TSES GCIG LA GDAN SA CHEN PO DPAL LDAN SA SKYA NAS DGE LEGS SU GYUR CIG ,,SHU BHAm,, ,,