@061 *, ,SKYID SDUG LAM 'KHYER GYI MAN NGAG BZHUGS SO, , 'PHAGS PA SPYAN RAS GZIGS DBANG PHYUG LA PHYAG 'TSAL LO, KHRO PHU LOTZTSA BA LA PHYAG 'TSAL LO, KHA CHE PAn CHEN NA RE (MA BYON PA'I SANGS RGYAS GSUM PAR GRAGS PA'I KHA CHE'I PAndI TA CHEN PO SH'AKYA SHR'I BHA DRA ZHES GRAGS PA DE, KHYED BOD DU SONG ZHIG GZHAN PHAN RGYA CHEN PO 'BYUNG ZHES LUNG BSTAN PA LA BRTEN NAS BOD DU BYON PAR BZHED DE, RGYA GAR SHAR PHYOGS SU BYON PA, CHOS RJE KHRO BU LOTZTSA BAS GSAN PAS GDAN 'DREN DU GRO MA'I GTING, BI DUR CHING PO 'DUS ZHES BYA BA'I BAR DU BYON NAS, PAndI TA PAn CHUNG DGU DANG BCAS PA DANG GZHAN NAD PA LA SOGS PA MANG PO RNAMS, LAM SO DANG 'PHRANG SO RNAMS LA, MDO LE LA BTEGS NAS GDAN DRANGS PA'I TSE PAndI TA'I ZHAL NAS LOTZTSA DPON G-YOG RNAMS SKYID DAM GSUNGS PA LA, SKYID PAR BYUNG LAGS ZHES ZHUS PAS KHA CHE PAn CHEN GYI ZHAL NAS 'DI SKAD GSUNGS,) SKYID SDUG GANG BYUNG YANG LAM DU 'KHYER DGOS PA YIN GSUNG, ('DI SNANG BA GDA' BA,) SKYID NA BDE BA TSOGS SU BSNGO, ,PHAN BDE'I NAM MKHA' GANG BAR SHOG ,SDUG NA KUN GYI SDUG BSNGAL KHUR, ,SDUG BSNGAL RGYA MTSO SKEMS PAR SHOG ,'DI LA SKYID PA LAM DU 'KHYER BA DANG, SDUG PA LAM DU 'KHYER BA GNYIS KYI DANG PO LA YANG, KUN @062 RDZOB BYANG CHUB KYI SEMS KYI SGO NAS SKYID PA LAM DU 'KHYER BA DANG, DON DAM BYANG CHUB SEMS KYI SGO NAS SKYID PA LAM DU 'KHYER BA GNYIS, DANG PO NI, LUS LA NA TSA MED PA, SEMS LA SDUG BSNGAL MED PA MTHUN RKYEN THAMS CAD 'DZOMS TE, DA LTA NGA RANG YANG SKYID PO YIN SNYAM PA BYUNG BA'I TSE, DE LAM DU 'KHYER BA NI, NGA SKYID PA DANG BDE BA DE LA DGA' ZHING 'DOD PA'I SNANG BA GCIG 'DUG STE, NGA BDE SKYID 'DOD PA BZHIN DU SEMS CAN THAMS CAD KYANG BDE SKYID MI 'DOD PA MED, SEMS CAN THAMS CAD KYANG BDAG GI THOG MA MED PA NAS PHA MA BYAS PA'I DRIN CAN SHA STAG KHO NA YIN PAS PHA MA NAM BYAS RES KYIS DA LTA'I PHA MA 'DRA BAR DRIN GYIS BSKYANGS PA KHO NA YIN PAS, BDAG BDE BA DANG SKYID PA BZHIN DU MA RGAN SEMS CAN THAMS CAD KYANG BDE BA DANG SKYID PAR GYUR CIG SNYAM DU ZHE THAG PA NAS BSAM ZHING NGAG TU'ANG BRJOD, DKON MCHOG RIN CHEN RNAM PA GSUM MKHYEN, BDAG BZHIN SEMS CAN THAMS CAD KYANG BDE SKYID LDAN PAR BYIN GYIS RLOB DU GSOL, ZHES DKON MCHOG LA GSOL BA GDAB, YANG DA LTA BDE SKYID DANG LDAN PA 'DI SNGON BSOD NAMS BSAGS PA'I MTHU LAS BYUNG BA YIN, DA PHYIN CHAD KYANG 'DI LTA BU'I BDE SKYID 'DOD NA DE'I RGYU RU DGE LA 'BOD PA BYA BA'I BRDA YIN SNYAM PA BYAS NAS, SGO GSUM DGE BA LA 'BAD PAR BYA'O, , GNYIS PA DON DAM BYANG CHUB KYI SEMS KYI SGO NAS SKYID PA LAM DU 'KHYER BA LA GSUM YOD PA'I DANG PO SKYID PA CHOS SKU NGO SPRAD PA NI, DA LTA NGA SKYID DO SNYAM @063 PA 'DUG STE, SKYID NA LUS SKYID DAM SEMS SKYID, DE GNYIS LAS MA GTOGS PA'I SKYID MKHAN NI MI 'DUG SEMS MED NA LUS NI BEMS PO DUR KHROD KYI RO DANG 'DRA BAS SKYID RGYU DANG BDE RGYU CI YANG MED, SEMS 'DI LA DPYAD NA 'DAS PA'I SEMS RNAMS NI 'GAGS NAS MED, MA 'ONGS PA'I SEMS RNAMS NI MA SKYES PAS MED, DA LTAR GYI SEMS 'DI LA BRTAG NA, DANG PO SKYE BA NA GANG NAS KYANG MA SKYES, 'GAG PA NA YANG GANG DU YANG MI 'GAG BAR DU GNAS PA NA YANG LUS KYI SPYI BO'I GTZUG NAS RKANG PA'I BAR GANG DU YANG GNAS PA MI 'DUG KHA DOG DANG DBYIBS LA SOGS PA'I NGO BO CIR YANG MA GRUB 'DUG DE LTAR BRTAGS PA NA, SEMS KYI GSHIS CIR YANG MA GRUB PA DE NYID SKYE MED CHOS SKU BYA BA YIN PAS, DE'I NGANG LA LHOD KLOD DE SEMS MNYAM PAR BZHAG GO ,GNYIS PA SKYID PA LONGS SKUR NGO SPROD PA NI, MNYAM GZHAG DE LAS LANGS NAS, SKYID PAR SNANG BA'I SEMS DE NYID HRI:DKAR PO TSEG DRAG DANG BCAS PA GCIG TU BSAM, DE LAS 'OD ZER 'PHROS PAS SEMS CAN GYI SDIG SGRIB SBYANGS, TSUL 'DUS YONGS SU GYUR PA LAS, PADMA DANG ZLA BA'I GDAN GYI STENG DU, RANG NYID BCOM LDAN 'DAS THUGS RJE CHEN PO ZHAL GCIG PHYAG BZHI PA, PHYAG DANG PO GNYIS THUGS KAR THAL MO SBYAR BA, G-YAS 'OG MAS SHEL GYI PHRENG BA BRGYA RTZA BSNAMS PA, G-YON 'OG MAS ME TOG PADMA DKAR PO BSNAMS PA, RIN PO CHE'I RGYAN DANG LDAN ZHING SKU SMAD LA DAR SNA TSOGS KYI SHAM THABS GSOL BA ZHIG TU BSAM, DE'I THUGS KAR ZLA BA'I DKYIL 'KHOR GYI STENG DU HRI:DKAR PO TSEG DRAG @064 DANG BCAS PA LAS 'OD ZER 'PHROS, PHYI SNOD KYI 'JIG RTEN LA PHOG PAS GZHAL YAS KHANG DU GYUR, NANG BCUD KYI SEMS CAN LA PHOG PAS RANG DANG 'DRA BA'I THUGS RJE CHEN POR GYUR, YANG 'OD ZER 'PHROS PAS PHYOGS BCU'I SANGS RGYAS BYANG CHUB SEMS DPA' THAMS CAD RANG DANG 'DRA BA'I THUGS RJE CHEN PO'I RNAM PA 'OD ZER GYI RNAM PAR SPYAN DRANGS NAS RANG LA STIM, YANG 'OD ZER 'PHROS PAS BDE BA CAN NAS 'OD DPAG MED SKU MDOG DMAR PO PHYAG GNYIS KYI DBUS NA RIN PO CHE'I BUM PA BDUD RTZIS GANG BA BSNAMS PA GCIG MDUN DU SPYAN DRANGS, DE LA AARGHAm LA SOGS PA'I MCHOD PA PHUL NAS, BDAG LA MNGON PAR DBANG BSKUR DU GSOL, ZHES GSOL BA BTAB PAS BUM PA'I CHUS SPYI BO NAS DBANG BSKUR BAS, THOG MA MED PA'I SDIG SGRIB THAMS CAD DAG CHU LHAG MA YAR YUD PA LAS SPYI BO'I GTZUG TU 'OD DPAG TU MED PAS DBU BRGYAN PAR BSAM, DE NAS RANG GI SNYIG GA'I HRI: DKAR PO DE LA MA nI G-YAS BSKOR DU 'KHOR BA BSAM LA, SEMS CAN THAMS CAD RANG GI RJES SU MA nI BZLO YIN YOD PAR BSGOMS TE, MA nI CI NUS SU BZLA'O, , RJES BSNGO BAS RGYAS 'DAB BO, , GSUM PA SKYID PA SPRUL SKUR NGO SPROD PA NI, SKYID PAR SNANG BA'I SEMS DE SNGO SER DKAR DMAR SOGS MDANGS MA 'GAGS PAR SNA TSOGS SU SNANG BA DE NYID SPRUL BA'I SKU YIN, YANG NA SKYID PAR SNANG BA'I SEMS DE NYID DANG PO GANG NAS KYANG SKYE BA MED PAS SKYE MED CHOS SKU SKYE BA MED PA LA, MTHAR 'GAG PA MED PAS @065 LONGS SKU, SKYE 'GAG MED PA LA BAR DU GNAS PA MED PAS GNAS MED SPRUL SKU, DE GSUM NGO BO DBYER MED PAS DBYER MED NGO BO NYID KYI SKU ZHES KYANG BYA'O, , GNYIS PA SDUG PA LAM DU 'KHYER BA LA YANG, KUN RDZOB BYANG CHUB SEMS KYI SGO NAS SDUG PA LAM DU 'KHYER BA DANG, DON DAM BYANG CHUB SEMS KYI SGO NAS SDUG PA LAM DU 'KHYER BA GNYIS KYI DANG PO (YANG NA, DE LAM DU SLONG BA'I THABS, SPYOD 'JUG LAS, GAL TE BCOS SU YOD NA NI, ,DE LA MI DGA' BYA CI DGOS, ,LAG TE BCOS SU MED NA YANG, ,DE LA MI DGA' BYAS CI PHAN, ,ZHES GSUNG PAS, MI SHI BA DANG NAD SOGS SNA TSOGS LA BCOS SU MED PA LA MI DGA' BA BYAS PAS MI PHAN PAS, DE YI CHOS NYID DRAN PAR BYAS LA BLO BDE BAR GNAS PAR BYA, LUS RMAS PA DANG, KHANG PA ZHIG PA LA SOGS PA RNAMS NI BCOS PAS CHOG PAS, MI DGA' BA BYA MI DGOS PAS DE LTA BU NYAMS SU BLANG NGO,) NI, YANG LUS LA NA TSA, SEMS LA SDUG BSNGAL DRAG PO BYUNG ZHING MTHUN RKYEN MA 'DZOM PA, 'OG NAS 'GRO BA CHU LAS MED PA, DA LTA NGA LAS SDUG PA MED DAM SNYAM PA BYUNG BA'I TSE, NGA YI SDUG BSNGAL 'DI LA MI 'DOD CING BRAL NA DGA' BA'I SNANG BA GCIG 'DUG STE, NGA SDUG BSNGAL MI 'DOD PA BZHIN DU, SEMS CAN THAMS CAD KYANG SDUG BSNGAL 'DOD PA GCIG KYANG MED, NGA'I SDUG BSNGAL 'DI 'DRA BA MIN PA NGAN SONG GSUM NA DMYAL BA LA TSA GRANG, YI DVAGS LA BKRES SKOM, DUD 'GRO LA GCIG LA GCIG ZA BA'I SDUG BSNGAL BSAM GYIS MI KHYAB PA YOD CING, MI LA YANG DGRA MI SDUG PA DANG PHRAD PA DANG, GNYEN SDUG PA DANG BRAL BA LA SOGS SDUG BSNGAL DRAG PO THOG TU 'BAB PA BSAM GYIS MI KHYAB PA ZHIG YOD CING, @066 SEMS CAN DE DAG THAMS CAD KYANG THOG MA MED PA NAS PHA MA BYAS PA'I DRIN CAN SHA STAG YIN TE, LAS NGAN BSAGS PA'I DBANG GIS BDAG BZHIN DU MI 'DOD BZHIN DU LAS NGAN THOG TU BAB PA SNYING RE RJE SNYAM DU SNYING RJE DRAG PO BSGOM ZHING, SEMS CAN THAMS CAD KYI SDUG BSNGAL DANG SDUG BSNGAL GYI RGYU THAMS CAD BDAG LA 'BAB CING, DE DAG THAMS CAD SDUG BSNGAL DANG SDUG BSNGAL GYI RGYU THAMS CAD DANG BRAL BAR GYUR CIG SNYAM DU SEMS LA BSAM ZHING NGAG TU'ANG BRJOD, DKON MCHOG RIN CHEN RNAM PA GSUM PO MKHYEN, MA RGAN SEMS CAN THAMS CAD KYI SDUG BSNGAL GYI RGYU THAMS CAD BDAG LA BAB NAS SEMS CAN THAMS CAD SDUG BSNGAL GYI RGYU THAMS CAD DANG BRAL BAR BYIN GYIS BRLAB DU GSOL, ZHES GSOL BA ZHE THAG PA NAS GDAB, YANG BDAG GI SDUG BSNGAL 'DI SNGON MI DGE BA BSAGS PA'I RNAM SMIN YIN, DA PHYIN CHAD KYANG 'DI LTA BU'I SDUG BSNGAL MI 'DOD NA, DE'I RGYU SDIG PA SPONGS ZER BA'I BRDA YIN SNYAM PA BYAS NAS THOG MA MED PA NAS BSAGS PA'I SDIG PA MI DRAN PA RNAMS DANG, TSE 'DIR BYAS PA'I SDIG PA DRAN PA RNAMS LA DUG BZOS PA LTA BU'I 'GYOD PA DRAG PO BYAS NAS BLA MA DANG DKON MCHOG GI DRUNG DU SDIG BSHAGS YANG YANG BYA, DA PHYIN CHAD SROG LA BAB KYANG SDIG PA MI BYED PA'I DAM BCA' ZHE THAG PA NAS BYA, SNGAR GYI SDIG PA SBYANG BA'I PHYIR SGO GSUM DGE BA LA 'BAD PAR BYA'O, , GNYIS PA DON DAM BYANG CHUB SEMS KYI SGO NAS SDUG BSNGAL LAM DU 'KHYER @067 BA LA GSUM GYI, DANG PO CHOS SKUR NGO SPROD PA NI, DA LTA SDUG GO SNYAM PA 'DUG STE, SDUG NA RANG LUS SDUG GAM, SEMS SDUG LUS NI BEMS PO RO DANG 'DRA BAS, DE LA SDUG RGYU CI YANG MI 'DUG GO ,SEMS NI 'DAS PA NI 'GAGS, MA 'ONGS PA NI MA SKYES, DA LTAR GYI SEMS NI LUS KYI PHYI NANG GANG NA YANG MI GNAS, KHA DOG DANG DBYIBS KYI NGO BO CIR YANG MA GRUB 'DUG PAS SDUG RGYU CI YANG MI 'DUG PA LA, DA LTA SDUG GO SNYAM PA 'DI, RMI LAM DU MES TSIG PA DANG, CHUS 'KHYER BA'I SDUG BSNGAL BYUNG BA BZHIN DU 'KHRUL PA'I SNANG BA LA BDEN PAR BZUNG BAS LAN PAR 'DUG DA NI SEMS KYI NGO BO SKYE MED DU SHES PAR BYAS NAS, GSHIS SKYE MED KYI NGANG LA SEMS MNYAM PAR BZHAG PAR BYA'O, , GNYIS PA SDUG PA LONGS SKUR NGO SPROD PA NI, YANG MNYAM GZHAG DE LAS LANGS NAS, SDUG PAR SNANG BA'I SEMS 'DI NYID, HRI:DKAR PO TSEG DRAG DANG BCAS PAR BSAM NAS SNGAR BZHIN DU SPYAN RAS GZIGS KYI BSGOM BZLAS (YANG NA SDUG BSNGAL DU GNANG BA 'DI NYID, JO BO THUGS RJE CHEN PO ZHAL GCIG PHYAG BZHI PAR SKRONGS KYIS BSGOM, SNOD KYI 'JIG RTEN GZHAL YAS KHANG, BCUD KYI SEMS CAN THUGS RJE CHEN PO, SGRA CI GRAGS PA THAMS CAD MA nI PAD ME'I SGRAR BSGOM ZHING, AOm MA nI PAD ME H'Um ZHES PA MANG DU BGRANG PA NI, SDUG BSNGAL LONGS SKUR NGO SPROD PA'O,) ,BYA'O, ,GSUM PA SDUG BSNGAL SPRUL SKUR NGO SPROD PA NI, SDUG PAR SNANG BA'I SEMS 'DI NYID GDANGS MA 'GAGS PA SNA TSOGS SU SNANG BAS SPRUL SKUR BZHAG GO ,YANG SEMS SKYE BA MED PAS CHOS SKU, 'GAGS PA MED PAS LONGS SKU, @068 GNAS PA MED PAS SPRUL SKU, DE GSUM SEMS KYI STENG NA DBYER MED PA NGO BO NYID KYI SKU ZHES ZER RO, ,'DIR SKYED SDUG LAM 'KHYER ZHES KYANG BYA, BLO SBYONG THUN GCIG MA ZHES KYANG ZER, SKU BZHI NGO SPROD KYI GDAMS PA ZHES KYANG ZER RO, (,'DI TSIG NYUNG LA DON ZAB PA'I CHOS GCIG GDA' GSUNGS, MANG YUL SKYID GRONG GI SENG GE MKHAR DU DON GNYER BA 'GA' ZHIG GIS ZHUS PA LA GNANG BA LAGS SO, ,) ` 'DI'I BRGYUD PA NI, PAn CHEN SH'AKYA SHR'I, KHRO PHU LOTZTSA BA, BO DONG RIN PO CHE, RIN PO CHE SHER 'BUM, RGYAL BA'I SRAS PO THOGS MED, DES GZHON NU BLO GROS BDAG LA'O, ,YANG LOTZTSA BAS, MKHAN PO BYANG CHUB DPAL, DES MKHAN PO BDE BA DPAL, DES MKHAN PO BKA' BZHI PA GRAGS PA GZHON NU LA, DES MKHAN PO BSOD NAMS GRAGS PA LA, DES RGYAL BA'I SRAS PO THOGS MED BZANG PO DPAL LA, DES DPAL RED MDA' BA GZHON NU BLO GROS ZHES GRAGS PA LA, DES MKHAN CHEN RIN PO CHE RJE BKA' LNGA PA DPAL 'BYOR SHES RAB PA LA'O, ,DGE'O,, ,,