@035 *, ,GDAMS PA NOR BU'I PHRENG BA BZHUGS SO, , SPYIR CHOS NYAMS LEN GYI GNAD 'KHRUL MA 'KHRUL, LTA BA GRUB MTHA' BZHI, SPYOD PA THEG PA GSUM GANG RUNG DANG MTHUN NA MA 'KHRUL, DE MED NA ZAB ZAB 'DRA YANG 'KHRUL PA YIN, DE LA KHYED KYI SEMS RIG STONG ZUNG 'JUG MTHA' BZHI SPROS PA DANG BRAL BA GZHI, DE NYID KHAS LEN DANG BRAL BA LTA BA DANG MTHUN PAR BLO 'JOG PA SGOM PA'O, ,SGYU MA LTA BUR DKAR NAG LA BLANG DOR BYED PA SPYOD PA, GZHI LAM GCIG DU 'DRES PA GNAS GYUR GYI SEMS 'BRAS BU, ZHES PA 'DI, GRUB MTHA' DANG BSTUN NAS DBANG PO RAB KYIS NYAMS SU BLANGS NA, RNAL 'BYOR SPYOD PA'I DBU MA'I LUGS, 'BRING GIS NYAMS SU BLANGS NA, SEMS TZAM PA, MTHA' MAS LTA BA GZUNG 'DZIN LAS GROL BA'I BDAG SHES RIG GI SKYES BU NGOS ZIN PAS GROL BAR 'DOD PA GNAS GYI LUGS, SGOM PA MTSAN RTOG GYI YID LA BYED PA SHER PHYIN GYI RNAL 'BYOR DU 'DOD PA RGYA NAG HA SHANG GI LUGS SU GOL BA'I NYEN YOD, @036 DE'I PHYIR SNGA RABS KYI PHYAG CHEN PA RNAMS LA YANG, RJE MI LA YAB SRAS RNAL 'BYOR SPYOD PA'I DBU MA PA, DE DAG GI RJES 'JUG KHA CIG SEMS TZAM RNAM RDZUN PA, KHA CIG RNAM GDEN PA'I LTA BAR SNANG, CHOS RJE SA SKYA PAS, BLUN PO PHYAG RGYA CHE BSGOM PA, , PHAL CHER DUD 'GRO'I RGYU RU GSUNGS, ,ZHES PA PHYAG CHEN THA MAL PA LA DGONGS, DE BAS NA BLA MA NYAMS RTOGS THOS PA DANG LDAN PA LA BRDAR SHA DPYOD PA GAL CHE, DENG SANG SEMS GNAS CHA TZAM DANG NYAMS BAN BUN TZAM LA SGOM DU BZUNG NAS SGRO 'DOGS NANG NAS CHOD PA SKAD SMRA BA'I SGOM CHEN MANG PO YOD DE DE RNAMS KYIS SA CI YANG MI CHOD, YANG MNYAM PAR BZHAG DUS, 'DZIN PA RAGS PA GAGS PA'I RIG PA GSAL STONG BDE CHA DANG BCAS PA YOD ZER BA DE, ZHI GNAS KYI NYAMS BZANG PO YIN, LHAG MTHONG GI NGAR 'DON PA LA 'DI MED KHA MED, 'DI KHO NAS MI CHOG 'DI DENG SANG GSAL CHA LHAG MTHONG GNAS CHA ZHI GNAS YIN PAS ZHI LHAG ZUNG 'BREL GYI LAM PHYAG RGYA CHEN PO YIN ZHES YANG DGON SOGS NGO SPROD KYANG, 'DI LA LHAG MTHONG MED, GSAL CHA YIS LHAG MTHONG GI GO MI CHOD, LHAG MTHONG GI RGYUR STONG NYID RTOGS PA'I SGRO 'DOGS CHOD PA'I THOS BSAM GYI LTA BA RNAM DAG GCIG NGES PAR DGOS, LTA BA DE ZHI GNAS KYI RTA BZANG PO LA SKYON NAS, DRAN SHES KYIS RGYUN DU BSKYANG PAS, GNAS LUGS LA MYONG STOBS KYI, SGRO 'DOGS CHOD PA'I LHAG MTHONG GI RTOGS PA BZANG PO SKYE BA YIN, ZHI GNAS TZAM GYIS NYON MONGS PA'I MGO GNAN PA TZAM LAS, SA BON MI SPONG BAS THAR PA'I LAM DU MI 'GRO BAS TE, @037 TING NGE 'DZIN RGYAL POR, 'JIG RTEN PA DAG TING 'DZIN BSGOM BYED KYANG, ,DE YIS BDAG DU 'DU SHES ZHIG MI NUS, ,DE YIS NYON MONGS PHYIR YANG RAB TU LDANG, , LHAG SPYOD KYIS NI TING DZIN 'DIR BSGOMS BZHIN, ,ZHES GSUNGS PAS, STONG NYID RTOGS PA'I LHAG MTHONG DANG LDAN PA'I TING NGE 'DZIN LAM DU 'GRO STE, YANG MDO SDE DE NYID LAS, GAL TE CHOS LA BDAG MED SO SOR RTOGS, ,SO SOR DER RTOGS GAL TE BSGOM BYED NA, ,'BRAS BU MYA NGAN 'DAS THOB RGYU DE YIN, ,RGYU GZHAN DAG GIS NYE BAR 'GYUR MA YIN, ,CES DANG, DBU MA RGYAN DU, CHOS LA BDAG MED MKHAS PA YIS, ,RANG BZHIN MED PA SGOMS BYAS NA, ,PHYIN CI LOG LAS BYUNG BA YI, ,NYON MONGS SGRIB PA MED PAR SPONG, ,ZHES GSUNGS, DE BAS NA, ZHI GNAS KYIS SEMS GNAS PA THOB NAS LHAG MTHONG GI YE SHES SKYED PA'I BSGOM PA LA 'BAD DGOS, LHAG MTHONG GI RGYUR GNAS LUGS LA SGRO 'DOGS CHOD PA'I LTA BA RNAM DAG DGOS, DE'I RGYUR BLA MA MKHAS PA LA GTUGS NAS MDO RGYUD ZAB MO LA THOS BSAM GYIS SGRO MDOGS BCAD DGOS PA YIN, YANG RJES THOB DU SNANG GRAGS KYI CHOS THAMS CAD SGYU MA LTA BUR DRAN PAS BSKYANG PA NA, RTZA CHAD DU BUN LONGS RTOGS ZER GYIS 'GRO ZER BA DE LAM DU SHIN TU YANG 'GRO, DE'I TSE SGYU MA LTA BUR DRAN PA DE NYID LHAG MTHONG YIN PAS, DRAN PA DE NYID ZHI GNAS NGAR MA YAL GYI BAR, RTOG PA GZHAN GYIS BAR MA CHOD PAR BYAS NAS RGYUN DU SKYONG BA GAL CHE, DENG SANG ZAB LAM BSGOM PA MANG PO DE 'DRA RTOG SGOM YIN SNYING PO MED ZER TE, LHAG MTHONG GI @038 GNAD MA GO BA YIN, SO SO SKYE BO LA ZHI GNAS RTOG MED DU SKYE YANG, LHAG MTHONG RTOG BCAS SU SKYE BA YIN, LHAG MTHONG RTOG BCAS DE NYID GOMS PAR BYAS PAS, MTHAR 'PHAGS LAM MI RTOG PA'I YE SHES SKYE BA YIN, YANG CHOS RJE SA SKYA PAS, DPE'I PHYAG CHEN DBANG BZHI PA LA MI BZHED, DBANG GSUM PA'I YE SHES DPE'I PHYAG CHEN DANG, BZHI PA'I YE SHES DON GYI PHYAG CHEN DU BZHED, DUS 'KHOR BA RNAM KUN MCHOG LDAN GYI STONG GZUGS BSKYED RIM DANG, 'DUS PA BA KUN RDZOB SGYU MA BSKYED RIM DU MI BZHED, GNYIS KA RDZOGS RIM DU BYED PA YIN NA, YANG THA DAD KYI SPROS PA THAMS CAD THA MI DAD DU RO GCIG PA'I MYONG BA SKYES NA, ZUNG 'JUG GI NYAMS LEN DU 'GRO'AM ZER BA DE, SPYIR MDO SNGAGS THAMS CAD KYI MTHAR THUG GI SKYEL SA ZUNG 'JUG YIN YANG, DA LTA SO SKYE'I GNAS SKABS SU ZUNG 'JUG DON SPYI'I TSUL GYIS GOMS PAR BYED PA TZAM LAS ZUNG 'JUG GI MYONG BA MTSAN NYID PA MI SKYE, GSANG SNGAGS PA SA THOB NAS, SPYOD PA GSUM GANG RUNG GYI MNYAM RJES SRE BA'I ZUNG 'JUG GI NYAMS LEN GOMS PAR BYAS NAS, TSE 'DI NYID LA ZUNG 'JUG MTHAR PHYIN PA RDO RJE 'CHANG GI GO 'PHANG RDZOGS PAR BYED PA, 'PHAGS PA YAB SRAS KYI BZHED PA YIN, PHAR PHYIN GYI THEG PA BA SA BCU PA'I RJES THOB DU, 'KHOR GSUM MI RTOG PA'I SHES RAB KYIS ZIN PA'I SBYIN SOGS THABS KYI CHA MA LUS PAR SPYOD PA'I RNAM KUN MCHOG LDAN GYI STONG PA NYID LA BSKAL PA GRANGS MED GNYIS LA SOGS PAR GOMS PAR BYAS NAS, SA BCU'I SKYE BA GCIG GIS THOGS PA'I SA LA ZUNG @039 'JUG MTHAR PHYIN PA, DPA' BA 'GRO BA'I TING NGE 'DZIN GYI MDO LAS BSHAD, DA LTA ZHI GNAS KYI NYAMS BZANG DUS, GNYIS 'DZIN THAMS CAD ZHIG PA SNYAM BYED PA BYUNG BA ZHI GNAS KYI MTHU YIN, ZUNG 'JUG GI MYONG BA'I GO MI CHOD, DA LTA ZUNG 'JUG LA GOMS PAR BYED NA, CHOS THAMS CAD SGYU MA LTAR DRAN PA'I NGANG NAS SBYIN SOGS THABS KYI CHA THAMS CAD LA 'JUG PA RNAM KUN MCHOG LDAN GYI STONG PA NYID DU GTZUG NA RIN PO CHE'I MDO LAS BSHAD PA LTAR NYAMS SU BLANG RGYU YIN, GZHAN PHAN SOGS KYIS MA ZIN NA NYAMS RKYANG PA RANG GI MI THUB ZER BA SHIN TU BDEN, DE'I PHYIR 'KHOR BA LA NGES 'BYUNG DANG, BYAMS SNYING RJE BYANG CHUB KYI SEMS BSGOM PA SOGS LA 'BAD DGOS PA LAGS SO, ,SANGS RGYAS 'JIG RTEN 'BYUNG BA BRGYA LAM NA, ,DAL DANG 'BYOR PA SNYED PA SRID PA TZAM, ,TSE YANG MI RTAG G-YO BA'I NGANG TSUL CAN, ,DON CHEN SGRUB LA CI STE BRTZON MI BYED, ,THOG MED LAS KYI 'PHEN PA SHUGS DRAG CING, ,SRID PA'I RGYA MTSO ZAB CING GTING DPOG DKA', ,DAL 'BYOR GRUB CHEN RNYED DUS MA 'BAD NA, ,NGAN 'GRO'I KLONG DU TSUD TSE CI BYAR YOD, ,MNYAM GZHAG SPROS BRAL NAM MKHA'I RNAL 'BYOR DANG, ,RJES THOB RTEN 'BREL SGYU MA'I GRONG KHYER GYI, ,BDEN GNYIS DON LA RGYUN DU GOMS BYAS NAS, ,TSOGS GNYIS MYUR RDZOGS DON GNYIS 'GRUB PAR MDZOD, ,CES PA BLA RTZER BZHUGS DUS NE PO BAS DRI BA ZHUS PA LA GNANG BA'O, ,SHU BHAm,, ,,