@023 *, ,RGYUD BLA'I DON BSDUS SAM BDE GSHEGS SNYING PO'I DON GSAL BZHUGS SO, , PHYOGS BCU'I RGYAL BA SRAS DANG BCAS PA RNAMS LA, KUN NAS DANG BA'I YID KYIS PHYAG 'TSAL LO, ,SHIN TU ZAB PA'I BDE GSHEGS SNYING PO'I DON, ,GSAL BAR BSHAD KYIS GZUR GNAS SHES LDAN NYON, ,SEMS CAN LA SANGS RGYAS KYI STOBS SOGS KYI YON TAN YOD PAR, GANG DAG 'GRO KUN MTHA' ZHI YANG DAG RTOGS NAS ZHES SOGS KYIS BSTAN PAR MI RIGS TE, GZHUNG DES SEMS CAN LA SANGS RGYAS KYI CHOS NYID KYI SPYI'I MTSAN NYID RANG BZHIN 'OD GSAL TZAM RJES SU ZHUGS PAR, SA DANG PO NAS MTHONG BAR BSTAN PA TZAM YIN GYI, RNAM PAR DBYE BA MED CHOS PHYIR, ,ZHES PAS KYANG BSTAN PA MA YIN TE, DES KYANG SANGS RGYAS KYI STOBS SOGS KYI YON TAN GYI CHOS NYID RANG GZHAN 'OD GSAL TZAM SO SKYE'I GNAS SKABS NA YANG YOD PA LA DGONGS PA YIN PA'I PHYIR, DE SKAD DU YANG, DE'I 'GREL @024 PAR, DE LA DRI MA MED PA'I SANGS RGYAS KYI YON TAN NI, GCIG TU KUN NAS NYON MONGS PA'I SO SO'I SKYE BO'I SA LA YANG RNAM PAR DBYE BA MED PA'I CHOS NYID SNGA PHYI KHYAD PAR MED PAR YOD PA'I PHYIR, GNAS 'DI NI BSAM GYIS MI KHYAB CES GSUNGS SO; ;DE BZHIN GSHEGS MED GNAS RNAMS LA'ANG, ,SANGS RGYAS SPYAN GYIS RANG (CHOS NYID) GZIGS NAS, ,ZHES PA DANG, NYON MONGS SBUBS BZHIN SEMS CAN YON TAN NI, ,ZHES PA DANG, SANGS RGYAS NYID NI YON TAN DRI MED GTER, ,SEMS CAN KUN LA KHYAD MED RNAM GZIGS NAS, ,ZHES DANG, SHA RI'I BU SEMS CAN GYI KHAMS KYANG GZHAN LA, CHOS KYI SKU YANG GZHAN MA LAGS TE, SEMS CAN GYI KHAMS NYID CHOS KYI SKU'O, ,CHOS KYI SKU NYID SEMS CAN GYI KHAMS TE, 'DI NI DON GYI GNYIS SU MED KYI YI GE THA DAD PA TZAM YIN NO, ,ZHES SOGS KYIS KYANG, SEMS CAN LA SANGS RGYAS KYI CHOS KYI SKU'I SPYI'I MTSAN NYID RANG BZHIN 'OD GSAL TZAM YOD PAR BSTAN GYI, RANG GI MTSAN NYID STOBS SOGS KYI YON TAN DANG LDAN PAR MI STON, MDOR NA ZAG MED DBYINGS LA NI, ,DON GYIS RAB TU DBYE BA BZHI, ,CHOS KYI SKU LA SOGS PA YIN, ,ZHES SOGS DANG, BLA MED CHOS KYIS STONG MA YIN, , ZHES DANG, YON TAN RANG BZHIN NYID LDAN PHYIR, ,ZHES SOGS NI, SHIN TU DRI MED KYI GNAS SKABS STON BYED YIN PAS, SEMS CAN LA SANGS RGYAS KYI !CHOS SKU MTSAN NYID PA DANG, YON TAN MTSAN NYID PA YOD PAR STON BYED KYI SHES BYED DU MI RIGS SO, , DE BZHIN GSHEGS PA'I SNYING PO RTAG PA DANG, BRTAN PA DANG, 'DUS MA BYAS PAR @025 BSHAD PA'I DON YANG, NGO BO GTAN MI 'GYUR BA'I RTAG PA DANG, RGYU RKYEN GYIS 'DUS MA BYAS PA'I 'DUS MA BYAS SU BSTAN PA YIN GYI, SEMS RANG BZHIN 'OD GSAL DE NYID MA DAG PA'I GNAS SKABS SU NYON MONGS PA DANG, LAS DANG SKYE BA'I KUN NAS NYON MONGS PA GSUM GYIS RANG GI NGO BO MI 'GYUR BA DANG, DAG PA DANG MA DAG PA'I GNAS SKABS SU MA RIG BAG CHAGS KYI SA DANG, ZAG PA MED PA'I LAS KYIS SKYES PA'I YID KYI RANG BZHIN GYI LUS DANG, BSAM GYIS MI KHYAB PA'I 'CHI 'PHO DANG, SKYE BA SOGS RANG GI NGO BO MI 'GYUR BA LA BSAMS NAS SEMS CAN GYI KHAMS DANG, DE BZHIN GSHEGS PA'I SNYING PO RTAG PA DANG, BRTAN PA DANG 'DUS MA BYAS PA ZHES BRJOD LA, SHIN TU RNAM PAR DAG PA'I GNAS SKABS SU SEMS KYI RANG BZHIN 'OD GSAL BA DE NYID 'KHOR BA JI SRID MA STONG GI BAR DU SEMS CAN GYI DON BYED PA'I PHRIN LAS GRUB PAS MI ZAD PA'I YON TAN DANG LDAN PA DANG, PHYI MA'I MTHA'I MU DANG MTSUNGS PA LA DGONGS NAS CHOS SKU DE NYID RTAG PA DANG, BRTAN PA DANG, LAS NYON GYIS 'DUS MA BYAS PA ZHES BRJOD DO, ,GNAS SKABS THAMS CAD DU SEMS CAN GYI RANG BZHIN 'OD GSAL LO, ,DE NYID DBANG PO GSAR DU THOB PA'I MTSAN NYID CAN GYI SKYE BA DANG, DBANG PO 'GAG PA'I MTSAN NYID CAN GYI 'JIG PA DANG, SKYES NAS MA SHI'I BAR DU RIGS MTHUN RGYUN MA CHAD PAR 'JUG PA'I GNAS PA DANG, GNAS SKABS GZHAN DU 'GYUR BA'I MTSAN NYID CAN GYI DGA' BA STE, 'DUS BYAS KYI MTSAN NYID BZHI DANG BRAL BA'I PHYIR, 'DUS @026 MA BYAS PA ZHES BRJOD LA, GNAS SKABS THAMS CAD DU RANG BZHIN 'OD GSAL GYI NGO BO LA 'GYUR BA MED PA'I PHYIR RTAG PA ZHES BRJOD DO, ,DES NA RTAG BRTAN SOGS KYI DON GYI SEMS RANG BZHIN 'OD GSAL DE NYID LA GDUL BYA'I LOG RTOG 'GA' ZHIG BSAL BA'I PHYIR, RTAG BRTAN SOGS KYI SGRA RNAMS DRANG BA'I SGO NAS SBYAR BA YIN GYI, SEMS LAS MA GTOGS PA'I DON DAM PAR GRUB PA'I CHOS 'GA' ZHIG DE BZHIN GSHEGS PA'I SNYING POR BSAMS NAS, DE NYID RTAG PA DANG BRTAN PA SOGS SU 'CHAD PA NI DBU SEMS GANG GI YANG LUGS MA YIN ZHING, BDE BAR GSHEGS PA'I SNYING PO STON PA'I MDO SDE DANG, DE'I DGONGS 'GREL DBU MA CHOS DBYINGS BSTOD PA DANG, RGYUD BLA MA SOGS BSTAN BCOS GANG GI'ANG DGONGS PA MA YIN NO, , SPYIR BDE BAR GSHEGS PA'I SNYING PO RNAMS STON PA'I MDO SDE RNAMS LA, SGRAS DNGOS ZIN GYI DON DANG, DGONGS GZHI'I DON GNYIS SHES DGOS TE, MDO SDE DE DAG SGRA JI BZHIN PA MA YIN PA'I DRANG DON DU DBU SEMS GNYIS KAS 'GREL BA'I PHYIR, DE LA SGRA'I DNGOS ZIN GYI DON NI SEMS CAN GYI GNAS SKABS DANG SANGS RGYAS KYI SA GANG DU YANG THA SNYAD TZAM DU YANG MA GRUB TE, MU STEGS KYI BDAG DANG KHYAD PAR MED PA'I PHYIR RO, ,DGONGS GZHI'I DON LA, DBU MA PA DANG, SEMS TZAM PA'I LUGS GNYIS LAS, DANG PO LA KUN RDZOB BDEN PAS BSDUS PA DANG, DON DAM BDEN PAS BSDUS PA GNYIS LAS, DANG PO NI SEMS KYI RANG GI NGO BO @027 RIG CING GSAL BA'I CHA GNAS SKABS THAMS CAD DU SEMS KYI NGO BO LA MI 'KHRUL BA LA, PHA ROL TU PHYIN PA'I THEG PAR SEMS DANG, KUN GZHI'I RNAM SHES DANG, LEN PA'I RNAM SHES DANG, RNAM PAR SMIN PA'I RNAM SHES DANG, BDE BAR GSHEGS PA'I SNYING PO SOGS KYI MING GIS BSTAN LA, RDO RJE THEG PAR, RGYU'I RGYUD, SEMS SNANG BA DANG, SNANG BA MCHED PA DANG, SNANG BA NYER THOB DANG, MKHA' KHYAB MKHA'I RDO RJE ZHES SU MING GZHAN GYIS BSTAN PA RNAMS YIN ZHING, DE NYID PHA ROL TU PHYIN PA'I THEG PA LTAR NA, LAS NYON DANG RNAM RTOG GIS GZHAN DBANG DU GYUR PA'I GNAS SKABS NA 'KHOR BA, RDO RJE THEG PA LTAR NA, RANG BZHIN BRGYAD CU'I RNAM RTOG GAM, GNAS SKABS RIGS BZHI'I SGRIB PA'I GZHAN DBANG DU GYUR PA'I PHYIR 'KHOR BA PA ZHES BRJOD DO, ,SGRIB PA DE DANG DE DAG GIS RNAM PAR DAG PA'I GNAS SKABS NA SANGS RGYAS DANG THAR PA ZHES BRJOD DO, , DON DE NYID DBU MA CHOS DBYINGS BSTOD PA DANG, SEMS KYI RDO RJE LA BSTOD PA SOGS KYIS GSAL BAR BYED, GNYIS PA DON DAM BDEN PAS BSDUS PA'I DGONGS GZHI NI, GONG DU BSHAD PA'I SEMS DE NYID YANG DAG PAR NA, YOD MED LA SOGS PA'I MTHA' GANG DU YANG MI GNAS PA'I GNAS LUGS THA SNYAD DU DON DAM PA'I BDEN PA ZHES MING DU BTAGS PA DE NYID YIN, DE NYID LA DGONGS NAS, DE BZHIN GSHEGS PA'I SNYING PO DANG, KUN GZHI'I RNAM SHES SOGS GSUNGS PA'I TSUL, DBU MA LA 'JUG PAR, KUN GZHI YOD CING GANG ZAG NYID YOD LA, , @028 PHUNG PO 'DI DAG 'BA' ZHING NYID YOD CES, ,GSUNGS PA DE NI DE LTAR CHES ZAB DON, ,RIGS PAR MI 'GYUR GANG YIN DE LA'O, ,ZHES SOGS DANG, 'DI NI DRANG DON NYID DU STON PAS GSUNGS, ,'DI NI DRANG DON NYID DU RIGS PAS 'THAD, , RNAM PA DE LTA'I MDO SDE GZHAN YANG NI, ,DRANG DON NYID DU LUNG 'DIS GSAL BAR BYED, ,CES SOGS RTZA 'GREL GYIS GSAL BAR BSTAN TO, , GNYIS PA SEMS TZAM PA'I LUGS KYI DGONGS GZHI NI, GTZO CHER KUN GZHI'I RNAM SHES KYI GNAS LUGS RANG GI NGO BOS RIG CING GSAL BA'I BDAG NYID DE NYID YIN TE, DE NYID GZUNG 'DZIN DU MNGON PAR ZHEN PA'I BAG CHAGS KYIS BSLAD PAS PHYI SNOD KYI 'JIG RTEN DANG NANG BCUD KYI SEMS CAN SOGS KYI RNAM PAR SNANG BA SKYE ZHING, SNANG BA LTAR GZUNG 'DZIN DU MNGON PAR ZHEN PAS, LAS NYON GYIS GZHAN DBANG DU 'GYUR TE, 'GRO BA LNGA'I 'KHOR BAR SKYE BA DANG, 'CHI BA SOGS KYI SDUG BSNGAL MYONG BA'I TSE NA, SEMS CAN ZHES DANG, 'KHOR BA ZHES BRJOD KYI, DE LAS MA GTOGS PA'I 'KHOR BA ZHES BYA BA GZHAN CI YANG MED DO, , DE NYID MTHONG SPANG DANG SGOM SPANG GI SPANG BYA CI RIGS PAS DAG CING, SPANG BYA MA LUS PAS MA DAG PA'I GNAS SKABS NA, BYANG CHUB SEMS DPA' SOGS LAM ZHUGS KYI GANG ZAG GI THA SNYAD 'DOGS KYI DE LAS MA GTOGS PA'I LAM SGRUB PA PO GZHAN CI YANG MED DO, ,DE NYID NYON MONGS PA DANG SHES BYA'I SGRIB PA MTHA' DAG DANG BRAL BAS DAG PA DANG MA DAG PA'I GNYIS SNANG GI NGO BO MA LUS PA DAG @029 CING RANG GI DE BZHIN NYID MED KYI NGO BO LA GNAS SKABS THAMS CAD DU GNAS TE, GDUL BYA LA GZUGS SKU RNAM PA GNYIS KYI SNANG BA BSKYED PA'I SGO NAS, 'KHOR BA JI SRID DU SEMS CAN GYI DON BYED PA'I SA LA BZHUGS PA NI SANGS RGYAS DANG CHOS SKU DANG, NGO BO NYID SKU ZHES SOGS SO, ,DE LTAR YANG 'PHEL BA DANG 'GRIB PA MED PAR BSTAN PA'I MDO LAS, SHA RI'I BU CHOS KYI SKU DE NYID NYON MONGS PA'I SBUBS BYE BA MTHA' YAS PAS BTUMS PA, 'KHOR BA'I RGYUN GYIS KHYER BA, THOG MA DANG THA MA MED PA'I 'KHOR BA'I 'GRO BAR 'CHI BA DANG SKYE BA DAG TU 'KHOR BA'I 'GRO BAR 'CHI BA DANG SKYE BA GANG DU 'KHOR BA NI SEMS CAN GYI KHAMS ZHES BRJOD DO, ,SHA RI'I BU CHOS KYI SKU DE NYID 'KHOR BA'I RGYUN GYIS SDUG BSNGAL LAS SKYO BAR GYUR PAR 'DOD PA DANG, YUL THAMS CAD LA CHAGS PA DANG BRAL BA, PHA ROL TU PHYIN PA BCU'I KHONGS SU GTOGS PA, CHOS KYI PHUNG PO BRGYAD KHRI BZHI STONG GIS BYANG CHUB KYI DON DU SPYAD PA SPYOD PA NI BYANG CHUB SEMS DPA' ZHES BRJOD DO, ,SHA RI'I BU CHOS SKU DE NYID NYON MONGS PA'I SBUBS THAMS CAD LAS YONGS SU GROL BA, SDUG BSNGAL THAMS CAD LAS 'DAS PA NI NYE BA'I NYON MONGS PA'I DRI MA MTHA' DAG DANG BRAL BA, DAG PA RNAM PAR DAG PA MCHOG TU YONGS SU DAG PA'I CHOS NYID LA GNAS PA, SEMS CAN THAMS CAD KYI LTA BAR BYA BA'I SA LA ZHUGS PA, SHES BYA'I CHOS MTHA' DAG LA GNYIS SU MED PA'I SKYES BU'I MTHU THOB PA, NYE BA'I NYON MONGS PA'I SGRIB PA MED PA'I CHOS CAN CHOS THAMS CAD KYI DBANG PHYUG GI STOBS @030 THOGS PA MED PA THOB PA NI, DE BZHIN GSHEGS PA DGRA BCOM PA YANG DAG PAR RDZOGS PA'I SANGS RGYAS ZHES BRJOD DO, ,ZHES GSUNGS PA YIN TE, DE LTA BU'I RANG BZHIN 'OD GSAL DE, NYI MA DAG PA'I GNAS SKABS DAG PAR BYED PA'I RGYU KHAMS DANG, 'DAS PA DANG DA LTAR GYI SANGS RGYAS KYI THUGS RGYUD LA SNANG BA'I SHIN TU RNAM DAG GI GNAS SKABS DE NYID DAG BYED KYI RKYEN BYANG CHUB DANG PHRIN LAS GSUM DU 'JOG LA, RKYEN DE GSUM GYIS MA DAG PA'I RTZA BA DE NYID RNAM PAR SBYANG BA BYAS PA LAS MA 'ONGS PA NA 'BRAS BU DKON MCHOG GSUM THOB PAR 'GYUR BA'I TSUL THEG PA CHEN PO RGYUD BLA MA'I BSTAN BCOS SU GSAL BAR BSTAN LA 'BEBS SHING, DE NYID KYI PHYIR BSTAN BCOS 'DI'I LUS NI RDO RJE'I GNAS BDUN DU BSTAN TO; ;DE LA KHAMS KYI GNAS SKABS SU SEMS RANG BZHIN GYIS 'OD GSAL BA DE NYID, NGO BO DANG RGYU DANG, 'BRAS BU DANG, LAS DANG, LDAN PA DANG, 'JUG PA'I RAB DBYE DANG, GNAS SKABS KYI MING DANG, GNAS SKABS THAMS CAD DU KUN TU 'GRO BA'I DON DANG, RTAG TU MI 'GYUR BA DANG, YON TAN DBYE BA MED PA RNAMS KYIS GTAN LA PHAB TE, DE LA NGO BO'I DON NI, RANG BZHIN 'OD GSAL DE NYID SHIN TU RNAM DAG GI GNAS SKABS NA, GDUL BYA'I JI LTAR BSAM PA'I DON 'GRUB PA LA SOGS PA MTHU DANG LDAN PAS CHOS KYI SKU DANG, MA DAG PA DANG, DAG PA DANG MA DAG PA'I GNAS SKABS SU SHES RAB DANG SNYING RJE CHEN PO BSKYED PA'I NUS PA DANG LDAN PAS RIGS DANG, GNAS SKABS THAMS CAD DU RANG GI NGO BO RANG BZHIN 'OD @031 GSAL ZHING RNAM PAR DAG PA LAS MI 'GYUR BA'I DE BZHIN NYID DE, GSUM PO DE NI NGO BO'I DON TE, THEG PA CHEN PO'I CHOS LA MOS PA DANG, BDAG MED GNYIS RTOGS PA'I SHES RAB DANG, NAM MKHA' MDZOD LA SOGS PA'I TING NGE 'DZIN BSGOM PA DANG, SNYING RJE CHEN PO RNAMS KYIS KHAMS DE DAG PAR BYED PA'I RGYU'I DON TO, , RGYU BZHI PO DE DAG BSGOMS PAS SEMS RANG BZHIN 'OD GSAL DE NYID, 'DOD CHEN PA RNAMS KYI CHOS LA KHONG KHRO BA DANG, MU STEGS BYED RNAMS KYI BDAG TU LTA BA DANG, NYAN THOS RNAMS KYI 'KHOR BA'I SDUG BSNGAL GYIS 'JIGS PA DANG, RANG RGYAL RNAMS KYI SEMS CAN GYI DON LA MI LTOS PA'I SGRIB PA RNAMS DANG BRAL BAS GTZANG BA DANG, BDAG DANG BDE BA DANG, RTAG PA'I PHA ROL TU PHYIN PA 'BRAS BU'I DON TO, ,SEMS RANG BZHIN 'OD GSAL BA DE NYID 'KHOR LO BZHI'I RKYEN DANG PHRAD PAS THA NA LOG PA NYID DU NGES PA'I SEMS CAN GZHAN LA YANG 'KHOR BA LA SKYO BA DANG, MYA NGAN LAS 'DAS PA LA DON DU GNYER BA SKYE BA NI LAS KYI DON TO, , LDAN PA'I DON NI GNYIS TE, RGYU DANG LDAN PA DANG, 'BRAS BU DANG LDAN PA'O, ,DANG PO NI SNGAR GYI CHOS LA MOS PA LA SOGS PA RGYU BZHI PO DE NYID KYI, DANG PO NI, CHOS SKU RNAM PAR DAG PA'I RGYU DANG, BAR MA GNYIS NI SANGS RGYAS KYI YE SHES THOB PA'I RGYU DANG, PHYI MA NI DE BZHIN GSHEGS PA'I THUGS RJE CHEN PO 'JUG PA'I RGYU YIN PAS, KHAMS DE LA RGYUR LDAN PA ZHES BRJOD DO, ,SANGS RGYAS KYI SA'I JI SNYED PA MKHYEN PA'I CHAR GYUR PA'I MNGON PAR SHES PA LNGA DANG, JI LTA BA MKHYEN @032 PA'I ZAG PA ZAD PA'I YE SHES DANG, DE GNYIS KA'I RTEN ZAG PA ZAD PA RNAMS NI 'BRAS BU DANG LDAN PA ZHES BRJOD DE, KHAMS SHIN TU RNAM PAR DAG PA'I GNAS SKABS KYI YON TAN YIN PA'I PHYIR, SO SO SKYE BO DANG, 'PHAGS PA DANG, DE BZHIN GSHEGS PA RNAMS KYI DE BZHIN NYID GSUM DBYE BA LA NI 'JUG PA'I DON TO, , GSUM PO DE NYID LA SEMS CAN DANG BYANG CHUB SEMS DPA' DANG SANGS RGYAS ZHES MING GSUM GYIS BTAGS PA NI, GNAS SKABS KYI DON TO, ,RANG BZHIN 'OD GSAL DE NYID GNAS SKABS GSUM PO DE DAG TU RJES SU 'GRO BA NI KUN TU 'GRO BA'I DON TE, RANG BZHIN 'OD GSAL DE NYID MA DAG PA'I GNAS SKABS SU KUN NAS NYON MONGS PA GSUM GYIS RANG GI NGO BO MI 'GYUR ZHING, DAG PA DANG MA DAG PA'I GNAS SKABS SU BSAM GYIS MI KHYAB PAR BSGYUR BA'I 'CHI 'PHO BA SOGS KYIS MI 'GYUR LA, SHIN TU RNAM DAG GI GNAS SKABS SU YON TAN GYI RANG BZHIN SNGAR MED GSAR DU THOB PAR MI 'GYUR BA'I DON TE, SHIN TU RNAM DAG GI SKABS SU RANG BZHIN 'OD GSAL DANG, STOBS SOGS YON TAN RNAMS NOR BU DANG, DE'I MDOG DBYIBS BZHIN DU RNAM PAR DBYE BA MED PA NI RNAM PAR DBYE BA MED PA'I DON TE, RANG BZHIN 'OD GSAL DE NYID LUS CAN KUN LA YOD PAR MTSON PA'I DPE DGU LA, SANGS RGYAS DANG, SBRANG RTZI DANG, SNYING PO'I DPE GSUM GYIS GO RIM BZHIN DU RANG DON PHUN TSOGS RTOGS PA CHOS SKU DANG, GZHAN DON PHUN TSOGS ZAB MO DON DAM PA'I BDEN PA DANG, SNA TSOGS KUN RDZOB KYI BDEN PA STON PA'I CHOS SKU BSTAN TE, 'BRAS @033 BU LA BROD PA BSKYED PA'I PHYIR RO, ,DE'I 'OG TU GSER GYI DPES NI DE BZHIN NYID BSTAN TE, DE DAG GI RANG BZHIN CI SNYAM PA LA GSER BZANG PO LTAR GNAS SKABS THAMS CAD DU MI 'GYUR BA DE BZHIN NYID KYI RANG BZHIN YIN NO ZHES SHES PAR BYA BA'I PHYIR DU'O, ,DE'O 'OG TU DPE GZHAN LNGAS NI 'BRAS BU PHUN TSOGS DE'I RGYU BSTAN TE, 'BRAS BU DE NYID GDUL BYA YIS JI LTAR THOB SNYAM PA LA, DE'I RGYU YOD PAS DE THOB PAR BYA BA'I PHYIR DU LAM LA 'BAD PA SHES PAR BYA BA'I PHYIR DU'O, , DE LA GTER DANG LJON SHING GI DPE GNYIS KYIS NI RANG BZHIN DU GNAS PA DANG, RGYAS 'GYUR GYI NGO BOR BSTAN LA, RGYU DE GNYIS LAS 'BRAS BU SKU GSUM JI LTAR THOB SNYAM NA, RIN CHEN DANG, 'KHOR LOS SGYUR BA DANG, GSER GYI GZUGS KYI DPE GSUM GYIS NI RIGS DE GNYIS KYI 'BRAS BU SKU GSUM PO'I NUS PA BSTAN TE, DE LTAR NA DPE DGU'I GRANGS DANG GO RIM NGES PA YANG NGES PAR GRUB BO, , DE LTA BU'I BDE BAR GSHEGS PA'I SNYING PO LDEM PO'I NGAG GIS BSTAN PA'I DGOS PA NI GNYIS TE, SGRA JI BZHIN PA'I DGOS PA DANG, DGONGS GZHI'I DGOS PA'O, ,DANG PO NI, MU STEGS BDAG TU SMRA BA LA MNGON PAR ZHEN PA RNAMS, BDAG MED PA'I 'JIG PA SPANGS TE SANGS RGYAS KYI BSTAN PA LA 'JUG PA'O, , GNYIS PA NI, THEG CHEN GYI RIGS CAN LAS DANG PO PA RNAMS KYIS SEMS ZHUM PA LA SOGS PA'I NYES PA LNGA SPANGS NAS YON TAN LNGA SKYES LA DE NAS MYUR DU BLA NA MED PA'I BYANG CHUB THOB BO, ,MDOR NA SANGS RGYAS KYI BSTAN PA LA MA ZHUGS @034 PA 'JUG PA DANG, ZHUGS PA LEGS PAR MTHAR PHYIN PAR BYED PA NI, 'DI'I DGOS PA YIN NO, ,SHIN TU ZAB PA'I MDO SDE RNAM MANG LAS, ,GSUNGS PA'I DGONGS ZAB BDE GSHEGS SNYING PO'I DON, ,SHING RTA CHE RNAMS JI LTAR BZHED PA'I TSUL, , LUNG DANG RIGS PAS PHYE STE GSAL BAR BSHAD, ,'DI LA GZHAN DU GZHAN GYIS BSHAD PA RNAMS, ,'GRIG 'GRIG 'DRA YANG RMONGS PA MTSAR BSKYED YIN, ,YIN NAM MA YIN MDO SDE'I ME LONG LA, ,GZUR GNAS BLO MIG LDAN PA RNAMS KYIS LTOS, , 'DIR 'BAD DGE BA 'OD STONG LDAN PA DES, ,MKHA' MNYAM MI SHES MUN PA KUN BSAL NAS, ,JI LTA JI SNYED GZIGS PA'I SPYAN MNGA' BA'I, ,KUN MKHYEN RGYAL BA'I GO 'PHANG MYUR THOB SHOG ,CES PA SH'AKYA'I DGE SLONG GZHON NU BLO GROS KYIS SBYAR BA'O, (,DPAL NGAM RINGS KYI CHOS GRVA CHEN POR, 'JAM DBYANGS NAM MKHA' RIN CHEN SKU MCHED KYIS SBYIN BDAG MDZAD NAS, G-YAS RU BYANG NA BZHUGS PA'I SDE SNOD 'DZIN PA RAGS RIM BSAGS PA'I DUS SU, DRUNG BDAG PO 'JAM DBYANGS PA DANG SDE SNOD 'DZIN PA RNAMS KYIS RGYUD BLA'I DON RAGS PA TSANG BA'I YIG RIGS GCIG ZHUS PA LA GNANG BA'O, ,)