The Jewel Lamp which Clarifies the Actual Meaning of the Glorious Wheel of Time (Kalachakra)

@136 *, ,DPAL DUS KYI 'KHOR LO'I NGES DON GSAL BAR BYED PA RIN PO CHE'I SGRON ME ZHES BYA BA BZHUGS SO, , NA MA:SHR'I K'A LA TZAKR'A YA, NYI KHRI CHIG STONG DRUG BRGYA LHAG PA'I 'PHO MED SKAD CIG LAS 'KHRUNGS SHING, ,MI 'GYUR MCHOG GI BDE BA CHE LA SNA TSOGS SGYU MA'I PHYAG RGYAS 'KHYUD, ,SRID GSUM GLO BUR DRI MA SPANGS KYANG SRID GSUM RMI LAM SGYU BZHIN SNANG, ,RNAM BCU DBANG LDAN STONG CHEN YIG LNGA AE WAm YIG GNYIS DE LA 'DUD, ,GANGS RI'I KHROD 'DIR MKHAS RLOM GZHAN DAG GIS, ,DANG PO'I SANGS RGYAS DUS KYI 'KHOR LO'I RGYUD, ,JI BZHIN MA RTOGS BLO NGAN MUN PAS BSLAD, , THAR 'DOD PHAL CHER LOG PA'I LAM LA KHRID, ,BSOD NAMS DMAN GANG LOG PA'I LAM LA MCHOG TU MNGON PAR ZHEN GYUR NAS, ,SANGS RGYAS DGYES PA'I LAM LAS CHES GOL DE DAG RNAMS LA BRTZE BA'I PHYIR, ,'DI DON JI BZHIN KHO BOS BSHAD KYIS BDAG NYID LEGS PAR 'DOD PA RNAMS, ,PHYOGS LHUNG PHRAG DOG DRI MA SPONGS @137 LA GZUR GNAS DAD PA'I YID KYIS NYON, ,'DIR BDE BAR GSHEGS PAS 'GRO BA RNAMS SRID PA'I SDUG BSNGAL LAS BSGRAL BA'I SLAD DU CHOS KYI 'KHOR LO BSKOR BA NI RNAM PA GNYIS TE, MDO SDE DANG, RGYUD SDE'O, , DE LA MDO SDE GANG JI SNYED PA RNAMS NI, BRJOD BYA BDEN PA GNYIS LAS BRTZAMS NAS BSTAN TE, JI SKAD DU, YAB SRAS MJAL BA'I MDO LAS, 'JIG RTEN MKHYEN PAS GZHAN LA MA GSAN PAR, ,BDEN PA 'DI GNYIS KYIS NI STON PAR MDZAD, ,GANG ZHIG KUN RDZOB DE BZHIN DON DAM STE, ,BDEN PA GSUM PA 'GA' YANG MA MCHIS SO, ,ZHES DANG, KLU SGRUB KYI ZHAL SNGA NAS KYANG, SANGS RGYAS RNAMS KYIS CHOS BSTAN PA, ,BDEN PA GNYIS LA YANG DAG BRTEN, ,'JIG RTEN KUN RDZOB BDEN PA DANG, ,DAM PA'I DON GYI BDEN PA'O, ,ZHES GSUNGS SO, , RGYUD SDE RNAMS NI, RIM PA GNYIS LAS BRTZAMS NAS BSTAN TE, GSANG BA 'DUS PA'I RGYUD PHYI MAR, RDO RJE CAN GYIS CHOS BSTAN PA, ,RIM PA GNYIS LA YANG DAG BRTEN, ,BSKYED PA YI NI RIM PA DANG, ,DE BZHIN RDZOGS PA'I RIM NYID DO, ,ZHES DANG, RTZA BA'I RGYUD BRTAG PA GNYIS PAR YANG, RIM GNYIS RNAM PAR GNAS NAS NI; ;RDO RJE CAN GYIS CHOS 'CHAD DO, ,ZHES GSUNGS SO, ,RIM PA GNYIS PO DE YANG, RGYU DANG 'BRAS BU'I DBYE BAS 'KHOR DANG BCAS NA RGYUD GSUM DU 'GYUR TE, 'DI LTAR RGYU'I RGYUD DANG, THABS KYI RGYUD DANG, 'BRAS BU'I RGYUD DO, ,DE LA RGYU'I RGYUD NI, THOS BSAM GYIS SGRO 'DOGS BCAD DE SHES PAR BYA BA'O, ,THABS KYI @138 RGYUD NI, BSGOMS PAS NYAMS SU BLANGS TE BRTEN PAR BYA BA'O, ,'BRAS BU'I RGYUD NI, TSOGS GNYIS KYIS BSGRUBS TE MNGON DU BYA BA'O, ,DE TZAM GYIS RNAL 'BYOR PA RNAMS KYIS PHYAG RGYA CHEN PO MCHOG GI DNGOS GRUB SGRUB PA'I CHA RKYEN MA TSANG BA MED PA'I PHYIR, RGYUD RNAMS KYI BRJOD BYA'I GTZO BO RGYUD GSUM PO DE TZAM DU NGES SO,, DE'I PHYIR, MCHOG GI DANG PO'I SANGS RGYAS KYI RGYUD KYI THOG MAR, STON PA SKU BZHI'I BDAG NYID CAN LA, RGYAL PO ZLA BA BZANG POS RGYUD GSUNG BA LAS BRTZAMS TE GSOL BA BTAB NAS NYE BAR BSDUS PA 'DI LTAR, THAMS CAD MKHYEN PA YE SHES SKU DANG NYIN MOR BYED PA'I SKU STE PAD MA'I 'DAB MA RGYAS PA'I SPYAN, ,SANGS RGYAS SENG GE'I KHRIR BZHUGS LHA YI MCHOG RNAMS KYIS NI BTUD LA RGYAL PO ZLA BA BZANG PO YIS, ,MGO BOS RAB TU PHYAG 'TSAL LAG PA'I PAD MA SBYAR BA YAN LAG MCHOG LA BZHAG NAS ZHUS PA NI, ,ZHES DANG, STONG PA YE SHES KYANG STE THIG LE MCHOG DANG RDO RJE 'DZIN PA SANGS RGYAS LHA DANG LHA MIN YANG, ,PHYI DANG LUS DANG GZHAN LA YANG STE RANG BZHIN RNAMS DANG SKYES BU NYI SHU LNGA PA'I BDAG NYID DANG, ,LUS LA SNA TSOGS TSAD DANG SRID PA GSUM GYI BKOD PA LHA DANG LHA MIN RNAMS KYI LONGS SPYOD DANG, , DKYIL 'KHOR DANG NI DBANG STE SKABS GSUM PA DANG MI YI BLA MAS 'DI RNAMS YANG DAG BSHAD DU GSOL, ,ZHES PA'O, ,DE LA THAMS CAD MKHYEN PA NI SKU BZHI PA DAG PA DANG, NGO BO NYID DANG, LHAN CIG SKYES PA DANG, BDE BA CHEN PO'I SKU'O, , YE SHES SKU NI CHOS KYI SKU'O, ,NYIN MOR BYED PA'I SKU NI LONGS SPYOD RDZOGS PA'I @139 SKU'O, ,PAD MA 'DAB MA RGYAS PA'I SPYAN NI SPRUL PA'I SKU'O, , SANGS RGYAS NI DE DAG DBYER MED PA WAm YIG BDE BA CHEN PO THABS SO, , SENG GE'I KHRI NI RNAM PA THAMS CAD PA'I STONG PA AE YIG NAM MKHA'I KHAMS SHES RAB BO, ,DE LTAR THABS DANG SHES RAB DBYER MED PA SKU BZHI'I BDAG NYID CAN GYI RDO RJE SEMS DPA' NI, GANG LA ZHU BA'I YUL STON PA'O, ,GANG GIS ZHU BA PO RGYAL PO ZLA BA BZANG PO NI, RGYUD THAMS CAD SDUD PA PO PHYAG NA RDO RJE'O, ,DON GANG ZHIG ZHUS PA NI, ,STONG PA YE SHES KYANG STE, ,ZHES SOGS RKANG PA DANG POS 'BRAS BU'I RGYUD LA GSOL BA BTAB STE, DE LA RDO RJE 'DZIN PA ZHES PA YAN CHAD KYIS PHUNG PO DANG KHAMS LA SOGS PA CHOS SUM CU RTZA DRUG SGRIB PA MED PA NYID DANG, RO MNYAM PA NYID DANG, GCIG TU 'DRES PAR 'DZIN PA STONG PA CHEN PO 'GYUR MED LNGA DANG, THIG LE STONG PA YI GE DRUG GI RANG BZHIN RIGS THAMS CAD KYI BDAG PO RDO RJE SEMS DPA' BSTAN LA, SANGS RGYAS LHA DANG LHA MIN YANG ZHES PAS DE'I RIGS CAN DE BZHIN GSHEGS PA DANG, BYANG CHUB SEMS DPA' LA SOGS PA DKYIL 'KHOR PA RNAMS BSTAN TO, ,DE LTA BU'I 'BRAS BU'I RGYUD DE YANG LE'U LNGA PA YE SHES KYI LE'U LAS RGYAS PAR 'CHAD PAR 'GYUR RO, ,PHYI DANG LUS DANG ZHES SOGS RKANG PA GNYIS KYIS NI, PHYI SNOD DANG, NANG BCUD KYI SEMS CAN GYI RANG BZHIN RGYU'I RGYUD LA GSOL BA BTAB PA STE, DE YANG 'JIG RTEN GYI KHAMS KYI LE'U DANG, NANG GI LE'U LAS RGYAS PAR 'CHAD PAR 'GYUR RO, , @140 DKYIL 'KHOR DANG NI DBANG STE ZHES PAS THABS KYI RGYUD LA GSOL BA BTAB PA STE, DE LA DKYIL 'KHOR DANG DBANG YANG 'JIG RTEN DANG 'JIG RTEN LAS 'DAS PA'I DBYE BAS KUN RDZOB DANG DON DAM GNYIS TE, KUN RDZOB KYI DKYIL 'KHOR NI PHYI RDUL TSON GYI DKYIL 'KHOR DANG, NANG LUS KYI DKYIL 'KHOR TE, DE DAG NI DON DAM PA'I DKYIL 'KHOR MTSON BYED DO, , DON DAM PA'I DKYIL 'KHOR NI, PHYAG RGYA CHEN PO RNAM PA THAMS CAD PA'I STONG PA NYID RDO RJE DBYINGS KYI DKYIL 'KHOR CHEN PO STE, 'GREL PAR, MCHOG GI DANG PO'I SANGS RGYAS RDO RJE DBYINGS KYI DKYIL 'KHOR CHEN POR ZHES PA NI, RIS MED PA, SHES PA DANG SHES BYA GCIG TU 'DRES PAR GYUR CING DPYAD DU MED LA, DBYER MED PA RNAM PA THAMS CAD PA DBYINGS KYI MTSAN NYID CAN ME LONG LA PRA PHAB PA DANG MTSUNGS PA STE, ZHES BSHAD PA GANG YIN PA'O, ,DON DAM PA'I DKYIL 'KHOR DE LTA BU NI KUN RDZOB KYI DKYIL 'KHOR GYIS MTSON PAR BYA BA'O, ,KUN RDZOB KYI DBANG NI CHU LA SOGS PA BDUN DANG BUM PA'O, ,DON DAM PA'I DBANG NI, SNOD DU RUNG BAR BYED PA DANG, DON DAM DNGOS GNYIS KYI DANG PO NI GSANG BA DANG, KUN RDZOB KYI SHES RAB YE SHES RNAMS YIN LA, DON DAM PA'I DBANG DNGOS NI, MCHOG TU MI 'GYUR BA'I BDE BA DANG, RNAM PA THAMS CAD PA'I STONG PA ZUNG DU 'JUG PA'I RNAL 'BYOR DON DAM PA'I SHES RAB YE SHES TE, DBANG BZHI PA'O, , DE LA KUN RDZOB KYI DKYIL 'KHOR DANG DBANG GIS BSKYED PA'I RIM PA @141 BSTAN LA, DON DAM NI DKYIL 'KHOR DANG DBANG GIS RDZOGS PA'I RIM PA BSTAN TE; DE LTA BU'I THABS KYI RGYUD RIM PA GNYIS PO DE YANG DBANG GI LE'U DANG SGRUB THABS KYI LE'U LAS RGYAS PAR 'CHAD PAR 'GYUR RO, , DE LTAR NA BRTAG PA'AM LE'U LNGA'I BDAG NYID KYIS DUS KYI 'KHOR LO'I BRJOD PAR BYA BA NI, RGYU DANG, THABS DANG, 'BRAS BU'I RGYUD GSUM DU NGES PA DE'I PHYIR, 'DIR RGYUD GSUM GYI SGO NAS DPAL DUS KYI 'KHOR LO'I NGES DON GYI CHA RNAMS GTAN LA DBAB PAR BYA'O, ,DE YANG THOG MAR RGYU'I RGYUD BSTAN PAR BYA STE, SGRO 'DOGS BCAD PAR BYA BA'I GZHI YIN PA'I PHYIR RO, ,DE LA RGYU'I RGYUD NI THABS KYI RGYUD KYI SBYANG GZHI YIN LA, DE YANG GNYIS TE, KUN RDZOB CHOS CAN GYI CHA DANG, DON DAM CHOS NYID KYI CHA'O, ,DANG PO LA YANG RTEN SNOD KYI 'JIG RTEN DANG, BRTEN PA BCUD KYI SEMS CAN GNYIS TE, BSKYED RIM GYI SBYANG GZHI YIN LA, DE DAG KYANG LE'U DANG PO DANG GNYIS PAS RGYAS PAR 'CHAD PA'I PHYIR 'DIR MA SPROS SO, , DON DAM PA YANG GNYIS TE, KHYAB BYED RDO RJE'I SKU 'JIG RTEN GYI KHAMS DANG, SBYANG GZHI SEMS KYI CHOS NYID RANG BZHIN GYIS 'OD GSAL BA DRI BCAS DE BZHIN NYID DO, ,DANG PO NI, NAM MKHA' LA SOGS PA RTEN DKYIL 'KHOR LNGA DANG, BRTEN PA LHUN PO LA SOGS PA BRTAN PA DANG, GZUGS MED KYI SRID PA'I MTHAR THUG PA G-YO BA'I TSOGS RNAMS SGRIB PA MED CING RO MNYAM PAR 'GYUR PA DE BZHIN NYID RNAM PAR DAG PA'I NGO BO DON DAM PA'I RNAM BCU DBANG LDAN TE, 'DI @142 YANG 'JIG RTEN GYI KHAMS LE LAS SKU DANG YE SHES NAM MKHA' DANG NI ME DANG RLUNG DANG CHU DANG SA DANG BRTAN DANG G-YO BA DANG, ,LHA NI MTHONG BA SKYED MIN DAG DANG SRID PA RNAM BCUR GSUNGS PA RDO RJE YI NI SKU DAG LAS, ,SNGAGS KYI SKYE GNAS DAG NI 'BYUNG BAR 'GYUR ZHING MI YI BDAG PO SLAR YANG 'DI NYID DU GROL TE, , ZHES DANG, MTSAN YANG DAG PAR BRJOD PA LAS KYANG, RNAM PA BCU PO DON BCU'I DON, ,THUB DBANG STOBS BCU KHYAB PA'I BDAG ,KUN GYI DON NI MA LUS BYED, , RNAM BCU DBANG LDAN CHE BA PO, ,THOG MA MED PAR SPROS MED BDAG ,DE BZHIN NYID BDAG DAG PA'I BDAG ,CES SOGS KYIS BSTAN PAR BZHED LA, 'GREL PAR YANG HK??RYA ZHES PA NI, 'JIG RTEN KHAMS KYI TSOGS RDO RJE'I SKU STE, NAM MKHA'I KHAMS LA YA YIG RLUNG GI DKYIL 'KHOR DANG, DE'I STENG DU RA YIG ME'I DKYIL 'KHOR DANG, DE'I STENG DU WA YIG CHU'I DKYIL 'KHOR DANG, DE'I STENG DU LA YIG SA'I DKYIL 'KHOR DANG, DE'I STENG DU MA YIG LHUN PO LNGA PA'O, ,DE'I STENG DU KshA YIG PAD MA'I TSUL GYIS G-YO BA'I TSOGS DANG, DE'I STENG DU GZUGS MED PA'I TSOGS HA YIG GO, HA YIG LAS RNAM PAR BCAD PA NYI MA DANG, THIG LE ZLA BA DANG, N'A DA RDO RJE RTZE GCIG PA'I MTSAN MA STE, DE LTAR RDO RJE'I SKU 'JIG RTEN GYI KHAMS SO, , ZHES BSHAD DO, ,RDO RJE'I SKU 'DI YANG SGRIB BRAL GYI GNAS SKABS YIN PAS SBYANG GZHI MA YIN YANG, 'DI LA RTEN GYI KHAMS 'JIG CHAGS BYED PAR BSHAD PAS SKABS 'DIR BSTAN TE, 'DI LTAR 'GREL PA LAS, DES NA CHAGS PA NI 'BYUNG @143 BA'I DUS KYI DBANG GIS STONG PA RNAMS LAS ZHES PA LA, STONG PA RNAMS NI 'JIG RTEN PA'I THA SNYAD KYIS MIG LA SOGS PA'I DBANG PO RNAMS KYI SPYOD YUL MA YIN PA, RDUL PHRA RAB KYI NGO BOS RNAM PAR GNAS PAS SA DANG CHU DANG ME DANG RLUNG RO'I RDZAS YON TAN LNGA DANG, BZHI DANG GSUM DANG GNYIS DANG GCIG GI RANG BZHIN RNAMS DANG, YON TAN DRUG PA CHOS KYI DBYINGS THAMS CAD DU KHYAB PAR BYED PA NI STONG PA RNAMS SO, ,ZHES SO, ,STONG PA DRUG PA KHYAB BYED CHOS KYI DBYINGS KYI RANG BZHIN RDO RJE'I SKU LA GNAS PA'I SA LA SOGS PA'I RDUL PHRAN LNGA 'DZIN PAR BYED PA DANG, SRUB PA BYED PA DANG DBYIBS BYED PA'I LAS KYI RLUNG GIS BSKUL NAS 'JIG RTEN CHAGS PAR BSHAD CING 'JIG PA NA YANG ME SA LA THIM, SA CHU LA, CHU RLUNG LA, RLUNG NAM MKHA' LA THIM ZHING, SA LA SOGS PA KHAMS LNGA'I RDUL PHRAN RNAMS CHOS KYI DBYINGS LA BRTEN TE GNAS PA'I TSUL GYIS 'JIG RTEN DE NYID LA THIM PAR BSHAD DE, 'GREL PAR, SLAR YANG 'DI NYID DU GROL TE ZHES PA NI, SLAR YANG SDUD PA'I DUS SU 'DI NYID LA GROL BA STE THIM PAR 'GYUR RO ZHES BSHAD DO, , TSUL 'DI YANG MDO RGYUD GZHAN DANG MI MTHUN YANG, RGYUD 'DI'I DGONGS PA LA SNYON MED CING, 'DI YANG GZHAN GYI 'DOD PA LTAR RGYU RKYEN GYIS MA SKYES PA'I RTAG BRTAN MA YIN GYI, TSOGS GNYIS LAS 'KHRUNGS SHING RMI LAM DANG SGYU MA SOGS BZHIN, YOD MED RTAG CHAD SOGS KYI PHYOGS THAMS CAD DANG BRAL BAR 'OG NAS 'CHAD PAR 'GYUR RO, , @144 MU STEGS PA DANG SANGS RGYAS PA'I BSTAN PA'I KHYAD CHOS NI, PHYI NANG GI DNGOS PO KUN RTAG BRTAN DU 'DOD PA DANG, BRTEN DU 'DOD PA DANG, RTEN 'BREL SGYU MA LTA BU YOD MED KYI PHYOGS THAMS CAD DANG BRAL BAR BZHED PA LAS GZHAN CI YANG MED DO, ,DE SKAD DU YANG, MGON PO KLU SGRUB KYI ZHAL SNGA NAS, GANG ZAG PHUNG POR SMRA BA YI, ,'JIG RTEN GRANGS CAN 'UG PHRUG SOGS, ,GOS MED BCAS SOGS GAL TE ZHIG ,YOD MED 'DAS PAR SMRA NA DRIS, ,DE PHYIR SANGS RGYAS RNAMS KYI NI, ,BSTAN PA 'CHI MED YOD MED LAS, ,'DAS PA ZAB MO ZHES BYA BA, ,CHOS KYI KHUD PA YIN ZHES GYIS, ,ZHES GANG GSUNGS PA'O, ,DE'I PHYIR GANG DAG RDO RJE'I SKU BRTAN G-YO KUN LA KHYAB PA'I RTAG BRTAN DU 'DOD PA NI MU STEGS PA GANG DAG RIG BYED KYI GZHUNG LAS TSANGS PA DANG, DBANG PO LA SOGS PA LHA CHEN PO GSUM GYI CHOS SKU RTAG PA RANG BYUNG GI THAMS CAD MKHYEN PA BRTAN G-YO KUN LA KHYAB CING BYED PA POR 'DOD PA DANG KHYAD PAR CI YANG MED PA'I PHYIR, CHES SHIN TU 'KHRUL PA KHO NA YIN NO, ,'DIR SMRAS PA, BLO NGAN LOG PAR STON BYED PA, ,SMAN PA MKHAS PAR RAB GRAGS PA, ,GANG GI LEGS BSHAD 'DI 'DRA NA, ,DE YI NYES BSHAD JI 'DRA ZHIG , SPYI DON GNYIS PA SBYANG GZHI SEMS KYI CHOS NYID DRI BCAS KYI DE BZHIN NYID NI, RDZOGS RIM GYI SBYANG GZHI YIN LA, 'DI LA YANG RANG GI NGO BO DANG, MING GI RNAM GRANGS DANG, RANG BZHIN GYIS DAG TSUL DANG, DRI MA RNAMS GLO BUR BA YIN @145 TSUL DANG, DE LAM GYIS SBYONG TSUL DANG, MNGON DU BYED PA'I TSUL RNAMS KYIS SHES PAR BYA'O, ,DE LA 'DI'I RANG GI NGO BO NI, SEMS CAN THAMS CAD KYI RGYUD LA THOG MA MED PA NAS RJES SU ZHUGS PA, DGE MI DGE LUNG MA BSTAN LA SOGS PA SEMS KYI GNAS SKABS KUN TU RJES SU 'GRO BA, MYONG RIG GSAL TZAM RMI LAM DANG SGYU MA SOGS BZHIN DU YOD MED KYI PHYOGS THAMS CAD DANG BRAL BA STE, 'DI LA DGONGS NAS RGYUD 'DI NYID DU'ANG, SEMS CAN RNAMS NI SANGS RGYAS YIN TE CHEN PO'I SANGS RGYAS GZHAN NI 'JIG RTEN KHAMS 'DIR YOD MA YIN, ,ZHES DANG, DBANG LE'I 'GREL PAR, 'DIR SEMS CAN THAMS CAD KYI SNYING GI NANG NA GNAS PA NI YE SHES SO, ,DE YANG GZHOM DU MED PA'I SGRA STE, RTAG TU N'A DA'I MTSAN NYID DO, , ZHES DANG, NANG LE'I 'GREL PAR, STONG PA LA NI YE SHES RNAM PAR BSRES PA ZHES PA NI, 'DIR LUS LA KHYAB PAR BYA BA DANG, KHYAB PAR BYED PA'I 'BREL BA KUN RDZOB KYI NGES PAR GNAS PA, SEMS CAN THAMS CAD KYI LUS LA GNAS PA'I YE SHES GANG YIN PA DE NYID NI STONG PA STE, ZHES SOGS KYIS DON 'DI BSTAN LA, GZHAN YANG BRTAG PA GNYIS PAR, LUS LA YE SHES CHEN PO GNAS, ,RTOG PA THAMS CAD RNAM PAR SPANGS, ,DNGOS PO KUN LA KHYAB PA PO, ,ZHES SOGS DANG, RGYUD GZHAN DU YANG, THOG MTHA' MED PA'I SEMS DPA' NI, ,RDO RJE SEMS DPA' BDE BA CHE, ,KUN TU BZANG PO KUN GYI BDAG ,RDO RJE RNYEMS BDAG BDAG PO'I BDAG ,CES SOGS DANG, THEG PA CHEN PO CHOS MNGON PA'I MDOR YANG, THOG MA @146 MED PA'I DUS KYI DBYINGS, ,CHOS RNAMS KUN GYI GNAS YIN TE, ,DE YOD PAS NA 'GRO KUN DANG, ,MYA NGAN 'DAS PA'ANG 'THOB PAR 'GYUR, ,ZHES DANG, RGYUD BLA MA LAS KYANG, GOS HRUL NANG NA RGYAL BA'I SKU DANG NI, ,BUD MED NGAN MA'I LTO NA MI BDAG DANG, ,SA LA RIN CHEN GZUGS YOD JI LTA BAR, ,GLO BUR NYON MONGS DRI MAS BSGRIBS PA YI, ,SEMS CAN RNAMS LA DE BZHIN KHAMS 'DI GNAS, ,ZHES SOGS DANG, CHOS DBYINGS BSTOD PAR YANG, GANG ZHIG KUN TU MA SHES NA, ,SRID PA KUN TU RNAM 'KHOR ZHING, ,SEMS CAN KUN LA NGES GNAS PA'I, ,CHOS KYI DBYINGS LA PHYAG 'TSAL LO, ,ZHES SOGS THEG PA CHEN PO'I MDO RGYUD BSTAN BCOS DE DANG DE LAS DRI MA DANG BCAS PA'I DE BZHIN NYID SEMS RANG BZHIN GYIS 'OD GSAL BA 'DI RGYAS PAR BSTAN TO, ,NANG LER, BUM PA'I NANG DU CHU NI LEN PAR BYED PA NA YANG NAM MKHA' 'GRO BA MIN PA JI LTA BAR, ,MKHA' KHYAB MKHA' YI RDO RJE CAN NI YUL DANG RNAM PAR BRAL BA LUS KYI DBUS SU DE BZHIN NO, ,ZHES PAS NI, SBYANG GZHI DRI BCAS KYI DE BZHIN NYID STON PA MA YIN GYI, SGRIB PA THAMS CAD DANG BRAL BA'I RDO RJE'I SKU LUS CAN KUN LA KHYAB BYED DU BZHUGS PAR STON PA YIN TE, DE'I 'GREL PAR, STONG PA LA SOGS PA'I RNAM PAR THAR PAS RNAM PAR DAG PA'I SEMS NI NAM MKHA'I RDO RJE CAN NO ZHES BSHAD PA'I PHYIR DANG, DRI BCAS KYI DE BZHIN NYID NI RNAM PAR THAR PA RNAMS KYIS RNAM PAR DAG PA MI RIGS PA'I PHYIR RO, ,YANG 'GREL PAR, 'DIR DNGOS PO DANG DNGOS PO MED PAR GCIG TU @147 'DRES PAR GYUR PA RANG BZHIN MED CING RDZAS DANG RNAM PAR RTOG PA DANG BRAL LA PRA PHAB PA DANG MTSUNGS PA SKAD CIG RNAM BRAL TE, ,SKYE BA DANG 'JIG PA DANG BRAL BA'I DNGOS PO NI, SANGS RGYAS RNAMS KYIS CHOS KYI 'KHOR LO BSKOR BA'I DON DU YOD DO, ,ZHES PA NI, GONG DU BSHAD PA'I SBYANG GZHI DRI BCAS DE BZHIN NYID SEMS RANG BZHIN GYIS 'OD GSAL BA LA DGONGS TE SANGS RGYAS RNAMS KYIS CHOS KYI 'KHOR LO BKOR BA NI GDUL BYA RNAMS KYI DRI MA DANG BCAS PA'I SEMS RGYUD RNAM PAR DAG PA'I CHED YIN PA'I PHYIR RO, ,'DIR GZHAN DAG GIS SBYANG GZHI DRI BCAS KYI DE BZHIN NYID DANG, SBYANGS 'BRAS RDO RJE'I SKU KHYAB BYED DU BZHUGS PA'I TSUL MA PHYED PAR DE DAG GCIG TU BZUNG NAS GZHI 'BRAS DBYER MED RTAG BRTAN GCIG TU 'DOD PA NI SHIN TU 'KHRUL TE, RTAG PA NI, GLO BUR DRI MA'I RKYEN GYIS BSLAD PAR YANG MI NUS LA, ,LAM GYIS DRI BCAS DRI MED DU BYED PAR YANG MI NUS PA'I PHYIR TE, RTAG PA NI RNAM PAR 'GYUR BA MED PA'I PHYIR DE SKAD DU YANG 'GREL PAR, GZHAN GYI BDAG RTAG PA 'GOGS PA'I SKABS SU, 'DIR RTAG PA GANG YIN PA DE LA GNAS SKABS GZHAN MED DE, RNAM PAR 'GYUR BA DANG BRAL BA'I PHYIR RO, , ZHES DANG, 'PHAGS PA LHA'I ZHAL NAS KYANG, 'TSE BA MED DANG BDAG RTAG PA, , 'DI LA RGYU NI CI YOD SNYAM, ,RNAM PA KUN TU SHING SRIN LAS, ,RDO RJE BSRUNG BYAR MI 'GYUR RO, ,ZHES RTAG PA LA RKYEN GYIS PHAN GNOD BYAR MED PAR BSHAD DO, , GNYIS PA MING GI RNAM GRANGS NI, RGYU'I RGYUD DANG, RANG BZHIN LHAN SKYES @148 DANG, RANG BZHIN 'OD GSAL DANG, DE BZHIN GSHEGS PA'I SNYING PO DANG, RANG BZHIN GNAS RIGS DANG, SEMS CAN GYI KHAMS DANG, CHOS KYI DBYINGS DANG, SEMS KYI RDO RJE DANG, DRI BCAS DE BZHIN NYID LA SOGS PA MING GI RNAM GRANGS DU MA'I SGO NAS MDO RGYUD BSTAN BCOS RNAMS LAS BSTAN TO,, GSUM PA RANG BZHIN GYIS RNAM PAR DAG PA'I TSUL LA GNYIS TE, RKYEN GYIS BZANG NGAN DU MI 'GYUR BA DANG, RANG GI NGO BO DRI MA'I RANG BZHIN DU MA SKYES PA'O, ,DANG PO NI, DPER NA NYI MA'I 'OD ZER NI NOR BU LA SOGS PA'I DNGOS PO BZANG PO DANG, MI GTZANG BA LA SOGS PA'I DNGOS PO NGAN PA RNAMS LA KHYAB BYED DU 'JUG KYANG, DE DAG GI RKYEN GYIS BZANG NGAN DU MI 'GYUR BA DE LTAR RGYU'I RGYUD BYANG CHUB KYI SEMS KUN TU BZANG PO 'DI YANG LHA LA SOGS PA'I 'GRO BA BZANG PO DANG, KHYI LA SOGS PA'I 'GRO BA NGAN PA RNAMS KYI SKYE GNAS SU YANG 'JUG MOD, 'ON KYANG DE DAG GI RKYEN GYIS BZANG NGAN DU 'GYUR BA MED DE, NYI MA'I 'OD ZER LTAR RANG BZHIN GYIS RNAM PAR DAG PA'I PHYIR RO, , DE SKAD DU YANG BZANG SKYONG GIS ZHUS PA'I MDO LAS, DPER NA NYI MA'I 'OD NI DRI NGA BA DANG, MI GTZANG BA DANG, RO DAG LA YANG 'BAB STE, 'ON KYANG DRI DES GOS PAR MI 'GYUR LA, NYI MA DRI NGA BA BOR TE GZHAN DU YANG MI 'GRO'O, ,DE BZHIN DU RNAM PAR SHES PA'I KHAMS 'DI YANG PHYI SA DANG, SNYAGS SNYIGS ZA BA'I KHYI DANG PHAG GI SKYE GNAS DAG TU YANG SKYE BA YONGS SU 'DZIN TE, 'ON KYANG RNAM PAR @149 SHES PA'I KHAMS LA SPYOD PA NGAN PA DE DAG GIS GOS PA MED DO, ,ZHES GSUNGS SO; ; GNYIS PA DRI MA'I RANG BZHIN DU MA SKYES PA NI, DPER NA GSER G-YA' DANG BCAS PA'I GNAS SKABS NA YANG G-YA'I NGO BOR MA SKYES LA, CHU RNYOG MA DANG BCAS PA'I GNAS SKABS NA YANG, RNYOG MA'I NGO BOR MA SKYES PA LTAR, RANG BZHIN GYIS 'OD GSAL BA'I SEMS KYANG, DRI MA DANG BCAS PA'I GNAS SKABS NA YANG NYON MONGS PA DANG RNAM PAR RTOG PA'I NGO BOR MA SKYES TE, GZHAN DU NA DE LA NYON MONGS PA DANG RNAM PAR RTOG PA GNYEN POS SBYANG DU MI RUNG BA'AM, YANG NA DRI MA RNAMS SPANGS PA NA RANG BZHIN GYIS 'OD GSAL BA'I SEMS KYANG RGYUN CHAD PAR THAL BA'I PHYIR RO, ,DES NA GLO BUR DRI MA'I NGO BOR MA SKYES PA'I PHYIR SEMS NI RANG BZHIN GYIS RNAM PAR DAG PA YIN TE, CHU'I KHAMS DANG, GSER BZHIN DU RANG GI NYE BAR LEN PA'I RGYU LAS RNAM PAR DAG PA'I NGO BOR SKYES SO ZHES BYA BA'I DON TO, , JI SKAD DU, RGYUD BLA MA LAS, SEMS KYI RANG BZHIN 'OD GSAL GANG YIN PA; ;DE NI NAM MKHA' BZHIN DU 'GYUR MED DE, ,YANG DAG MIN RTOG LAS BYUNG 'DOD CHAGS SOGS, ,GLO BUR DRI MAS DE NYON MONGS MI 'GYUR, ,ZHES GSUNGS PA LTAR RO, ,BZHI PA DRI MA RNAMS GLO BUR BA YIN TSUL NI, DPER NA GSER DANG G-YA' LHAN CIG TU GRUB KYANG, GSER NI RANG GI NYE BAR LEN PA'I RGYU LAS RNAM PAR DAG PA'I RANG BZHIN DU SKYES LA, G-YA' NI GSER GYI RGYU LAS GZHAN PA'I @150 RKYEN LAS BYUNG BAS, GSER GYI NGO BO LAS 'BRAL DU RUNG ZHING GLO BUR BA YIN PA DANG, CHU DANG RNYOG MA LHAN CIG TU GRUB KYANG CHU NI RANG GI NYE BAR LEN PA LAS SHIN TU DVANGS PA'I NGO BOR SKYES LA, RNYOG MA NI CHU'I NYE BAR LEN PA LAS GZHAN RDUL LA SOGS PA'I RKYEN LAS BYUNG BAS CHU'I NGO BO LAS 'BRAL DU RUNG ZHING, GLO BUR YIN PA LTAR RANG BZHIN 'OD GSAL GYI SEMS DANG, CHAGS SOGS DRI MA RNAMS THOG MA MED PA NAS LHAN CIG TU GRUB KYANG, RANG BZHIN 'OD GSAL NI RANG GI RIGS 'DRA SNGA MA'I NYER LEN LAS RNAM PAR DAG PA'I NGO BOR SKYES LA, DRI MA RNAMS NI RANG BZHIN 'OD GSAL GYI RGYU LAS TSUL BZHIN MIN PA YID LA BYED PA'I RKYEN LAS 'BYUNG BAS RANG BZHIN 'OD GSAL GYI SEMS LAS 'BRAL TU RUNG ZHING GLO BUR BA YIN NO, , SEMS NI TSUL BZHIN MIN PA YID LA BYED PA'I RKYEN DANG MA 'BREL NA RANG GI NGO BO GZUNG 'DZIN GNYIS KYIS DBEN PA'I RANG RIG CING GSAL BA'I BDAG NYID DU SKYE BA CHOS NYID YIN TE, CHU NI RDUL GYI RKYEN DANG MA 'BREL NA SHIN TU DVANGS PA'I NGO BOR DMIGS PA YIN NO, ,DE LTAR NA YANG TSUL BZHIN MIN PA YID LA BYED PA'I RKYEN GYIS CHAGS SOGS DRI MA DANG LHAN CIG BYUNG BA NA, SEMS KYI RANG BZHIN 'OD GSAL YOD BZHIN DU BYIS PA RNAMS LA MNGON DU MI 'GYUR BA NI, GSER G-YA' YIS BSLAD PA DANG, CHU RNYOG MAS BSLAD PA BZHIN DU, RANG GI NGO BO YOD BZHIN DRI MAS BSGRIBS TE MI MTHONG BA BZHIN YIN NO, ,DE SKAD DU YANG TSAD @151 MA RNAM 'GREL LAS, SEMS KYI RANG BZHIN 'OD GSAL TE, ,DRI MA RNAMS NI GLO BUR BA, ,ZHES DANG, RNAM SHES YUL DU 'DZIN PA'I CHOS, ,JI LTAR YOD DE 'DZIN PA DANG, ,YOD PA YI NI BDAG NYID DE, ,'DI YI BSKYED PAR BYED PA'ANG YIN, , RANG BZHIN 'DI YIN 'DI LAS DE, ,RKYEN GZHAN GYIS NI GOL 'GYUR ZHING, ,LDOG PA LA NI RKYEN LA LTOS, ,ZHES GANG GSUNGS PA LTAR RO, ,'DIR DE LTA BU'I SEMS KYI RANG BZHIN DANG DRI MA RNAMS GLO BUR DU 'BREL BA'I TSUL MI SHES PAR, GANG DAG THA MAL PA'I RGYUD KYI SEMS DANG, SEMS LAS BYUNG BA THAMS CAD SPANG BYA'I DRI MA KHO NAR 'DOD PA NI, MU STEGS DPYOD PA BA RNAMS CHAGS SOGS DRI MA RNAMS SEMS KYI CHOS NYID LA RJES SU ZHUGS PAS SPANG DU MED LA DE'I PHYIR, SKYES BU THAMS CAD CHAGS SOGS NYON MONGS PA DANG LDAN PA'O ZHES SMRA BA DANG, GROS MA BYAS KYANG KHA MTHUN PA YIN NO, , LNGA PA RANG BZHIN 'OD GSAL LAM GYIS SBYONG TSUL NI, DPER NA GSER MES BSREGS PA NA G-YA' DANG BRAL TE RANG GI RANG BZHIN MNGON DU 'GYUR BA DANG, CHU RNYOG MA CAN GYI NANG DU NOR BU DVANGS BYED BCUG PA NA RNYOG MA DANG BRAL TE, SHIN DU DVANGS PA'I CHU'I NGO BOR DMIGS PAR 'GYUR BA BZHIN DU, DRI MA DANG BCAS PA'I RANG BZHIN 'OD GSAL GYI SEMS KYANG MCHOG TU MI 'GYUR BA'I BDE BA RNAM PAR MI RTOG PA'I YE SHES KYIS GLO BUR GYI DRI MA RNAMS SBYANGS PA NA, RANG GI NGO BO RNAM PAR DAG PA JI LTA BA BZHIN DU MNGON DU 'GYUR RO, ,DE SKAD DU YANG MDOR @152 BSDUS DANG PO LAS, JI LTAR RDO DREG SKUD PA'I GOS DAG NI, ,ME YIS BSREGS PA NYID KYIS DAG 'GYUR BA, ,DE BZHIN SKYES BU RNAMS KYIS DAM PA YI, ,SEMS NI SHES RAB YE SHES DAG GIS SO, ,ZHES BSHAD CING, DBUS MTHA' RNAM 'BYED LAS KYANG, CHU KHAMS GSER DANG NAM MKHA' RNAMS, ,DAG PA BZHIN DU DAG PAR 'DOD, ,CES DANG, CHOS DBYINGS BSTOD PAR YANG, STONG PA NYID NI STON PA'I MDO, , RGYAL BAS JI SNYED GSUNGS PA RNAMS, ,DE DAG RNAMS KYIS NYON MONGS LDOG , KHAMS DE NYAMS PAR BYED PA MIN, ,ZHES GANG GSUNGS PA LTAR RO, , DRUG PA RANG BZHIN RNAM DAG DON DAM DU BYED PA'I DUS NA GNYIS TE, RANG BZHIN LHUN GRUB KYI TSUL GYIS MNGON DU BYED PA DANG, TING NGE 'DZIN GYI STOBS KYIS MNGON DU BYED PA'I TSUL LO, ,DE YANG 'DI LTAR JI SRID GLO BUR 'KHRUL RKYEN LAS BYUNG BA'I YUL SNANG GI SEMS MA 'GAGS PA DE SRID DU RANG BZHIN 'OD GSAL MNGON DU MI BYED DO, ,SROG AA WA DH'U T'IR MA TSUD PAR YANG GNYIS SNANG GI SEMS MI 'GAG STE, JI SRID RO RKYANG GNYIS SU RLUNG RGYU BA DE SRID DU YUL SNANG GI SEMS RANG GI NGANG GIS 'BYUNG BA'I PHYIR RO, ,GANG GI TSE RO RKYANG GI RGYU BA 'GAGS TE SROG AA WA DH'U T'IR CHUD PA DE'I TSE YUL SNANG GLO BUR GYI SEMS MA LUS PAR 'GAGS PAS RANG BZHIN 'OD GSAL GYI SEMS MNGON DU 'GYUR TE, DPER NA SPRIN DANG KHUG SNA LA SOGS PA SGRIB BYED THAMS CAD DANG BRAL BA NA, NAM MKHA'I RANG MDOG JI LTA BA BZHIN MNGON DU 'GYUR BA BZHIN NO, , @153 DE LA SROG AA WA DH'U T'IR 'JUG PA'I DUS NI GNYIS TE, LUS CAN RNAMS 'CHI BA'I DUS DANG, RNAL 'BYOR PA'I TING NGE 'DZIN SGOM PA'I DUS SO, ,DE LA DANG PO NI, LUS CAN RNAMS 'CHI BA'I TSE THOG MAR ME'I KHAMS CHU'I KHAMS KYIS NYAMS PAR BYED CING, SA'I KHAMS KYANG CHU LA ZHUGS TE MI SNANG BAR 'GYUR LA, CHU'I KHAMS KYANG RLUNG GIS SKAMS TE RLUNG YANG NAM MKHA' LA RIM GYIS MI SNANG BAR GYUR PA DE'I TSE DBU MA'I MDUD PA RANG GROL NAS RO RKYANG GI RGYU BA 'GAGS TE SROG AA WA DH'U T'IR ZHUGS PA NA, GLO BUR YUL SNANG GI SEMS MA LUS PA 'GAGS NAS RANG BZHIN 'OD GSAL GYI SEMS LA, STONG PA NYID KYI GZUGS PRA PHAB PA LTA BU SNA TSOGS RANG GI NGANG GIS 'CHAR ZHING, DE'I TSE RGYUD 'DI'I LUGS KYI 'CHI BA'I 'OD GSAL MNGON DU BYAS PA ZHES ZER RO, ,DE SKAD DU, SGRUB THABS KYI LE'UR, CHU YIS ME NI RNAM PAR NYAMS PA DANG POR 'DIR NI LUS KYI DBUS SU SDOM BRTZON RNAMS KYIS BYA, ,PHYI NAS 'DZIN MA DAG NI CHU RU 'GYUR TE LAN TSVA BZHIN DU CHU YI DBUS SU RAB TU ZHUGS, ,RLUNG NI CHU BO DE DAG BSKAMS NAS NAM MKHA' LA NI SNANG BA MIN PAR MYUR DU 'GRO BAR 'GYUR, ,SEMS NI ME DANG MUN PA'I MTHA' STE YUL DANG RNAM PAR BRAL BA DBUS KYI SA LA BZHAG PAR BYA, ,ZHES DANG, DE'I 'GREL PAR, DE LTAR KHAMS KYI TSOGS MYUR TU RNAM PAR NYAMS TE DE NAS SEMS NI ME DANG MUN PA'I MTHA' STE NAM MKHA'I KHAMS RNAMS RNAM PA THAMS CAD PA'I GZUGS YUL DANG RNAM PAR BRAL BA DBUS KYI SA LA KUN GZHI'I RNAM PAR SHES PA @154 BZHAG PAR BYA'O, ,ZHES BSHAD DO, ,DE'I TSE THA MAL PA GDAMS NGAG MED PA RNAMS NI, 'BYUNG BA BSDUD PA'I TSE BDAG CHAD KYI DOGS PAS 'JIGS TE SKRAG PA SKYE ZHING, DE'I DBANG GIS 'OD GSAL MNGON DU GYUR PA NA YANG PHAN MI THOGS SHING, YUN RING DU MI GNAS PAR MYUR DU BAR DOR 'PHO BAR 'GYUR RO, ,RNAL 'BYOR PA MAN NGAG DANG LDAN PA RNAMS NI 'CHI KHA'I MAN NGAG YID LA BYAS TE, 'BYUNG BA BSDUD PA'I TSE 'CHI BA 'OD GSAL LA YUN RING DU GNAS PAR BYA'O SNYAM DU 'PHEN PA SNGON DU BTANG STE, PHA KHYIM DU BU 'GRO BA'I TSUL GYIS BROD PA DANG BCAS TE 'JUG PA DE'I DBANG GIS 'OD GSAL LA YUN RING DU GNAS SHING, BAR DOR YANG DE'I STOBS KYIS TING NGE 'DZIN MNGON DU 'GYUR LA, PHYI MAR YANG LAM SGRUB TU RUNG BA'I RTEN LHA MI'I 'GRO BA BZANG POR 'GYUR RO, , 'DI TZAM LA DGONGS NAS SROG RTZOL GYI SKABS SU, RNAL 'BYOR PA NI BDE NYAMS 'GRO STE, ZHES SROG RTZOL GYIS GTZUG TOR PHUG STE SHI BA BDE 'GROR 'GRO BA BSTAN PA YIN GYI, RGYUD 'DI'I LUGS KYIS BAR DOR PHYAG RGYA CHEN PO'I DNGOS GRUB THOB PA MED DE, MCHOG GI DNGOS GRUB NI MI 'GYUR BA'I BDE BAS SGRUB DGOS LA, BAR DO YID KYI LUS LA MCHOG TU MI 'GYUR BA'I BDE BA SGRUB MI NUS PA'I PHYIR RO, , 'DIR KHA CIG LAS DANG PO PA'I SOR BSDUD KYI SKABS KYI STONG GZUGS BAN BUN BYUNG BA CHOS SKUR NGO SPRAD NAS, DE TZAM GYIS 'CHI BA 'OD GSAL NGO 'PHROD @155 PA SKAD BYAS TE, DE LA 'PHO BA KHYAD 'PHAGS KYI MING BTAGS NAS, BLUN PO MANG PO MGO BSKOR ZHES GRAGS TE, 'CHI BA'I 'OD GSAL NGO 'PHROD PA NI RNAL 'BYOR PA NYAMS RTOGS DANG LDAN PA'I DBANG DU BYAS PA YIN GYI, SU RUNG RUNG GIS MA YIN NO; ; RNAL 'BYOR PAS TING NGE 'DZIN SGOM PA'I DUS 'OD GSAL MNGON DU BYED PA NI, MDOR BSDUS DANG POR, JI LTAR ME NI SHING LA RTAG GNAS KYANG, ,BCAD DANG DBYE BA'I THABS KYIS MI MTHONG STE, ,GTZUBS SHING GTZUBS STAN LAG PAS BSRUBS PA LAS, ,DE LA GNAS PA YANG NI MTHONG BAR 'GYUR, ,DE BZHIN SEMS KYI 'OD GSAL RTOG PA YIS, ,BSGOM PA'I THABS RNAMS DAG GIS MI MTHONG STE, , DE NYID DU NI RKYANG MA DAG DANG NI, ,RO MA GCIG TU SBYOR BAS MTHONG BAR 'GYUR, , ZHES PAS BSTAN TE, 'DI'I DON 'OG TU RGYAS PAR 'CHAD PAR 'GYUR RO, ,YANG RGYUD 'DI'I LUGS KYI BDEN PA GNYIS KYI RNAM GZHAG 'DI LTAR MA RIG PA'I 'KHRUL RKYEN LAS BYUNG BA'I GLO BUR DRI MA'I CHOS JI SNYED PA RNAMS DE KHO NA NYID MTHONG BA LA SGRIB PA DANG, KUN NAS NYON MONGS PA'I DMIGS PA YIN PA'I PHYIR KUN RDZOB KYI BDEN PA YIN LA, DE YANG YANG DAG PA'I YE SHES KYI YUL DU MA GRUB PA'I PHYIR, RANG STONG DANG, CHAD STONG DANG, BEM PO'I STONG PA NYID DO, ,GNYUG MA SEMS KYI CHOS NYID RANG BZHIN 'OD GSAL GYI CHOS JI SNYED PA RNAMS NI DON DAM PA'I BDEN PA STE, DE YANG RIGS PAS DPYAD BZOD DU GRUB PA'I SGO NAS MIN TE, @156 MNGON PA KUN LAS BTUS LAS, CI'I PHYIR DON DAM PA ZHES BYA ZHE NA, YE SHES DAM PA'I SPYOD YUL YIN PA'I PHYIR RO, ,ZHES GSUNGS PA LTAR, RNAM PAR MI RTOG PA'I SPYOD YUL YIN PA'I PHYIR DON DAM PA YIN LA, GLO BUR DRI MAS DBEN PA'I PHYIR GZHAN STONG DANG, SO SO RANG RIG PA'I TSUL GYIS NYAMS SU MYONG BA'I PHYIR CHAD STONG DANG BEMS STONG MIN NO, ,DE SKAD DU YANG 'JAM DPAL GYI LTA BA'I 'DOD PA MDOR BSTAN PA LAS, PHUNG PO RNAM BCAD STONG PA NYID, ,CHU SHING BZHIN DU SNYING PO MED, ,RNAM PA KUN GYI MCHOG LDAN PA'I, ,STONG NYID DE LTAR 'GYUR BA MIN, , ZHES BSHAD DO, , DE LA RANG STONG NI CHAD PA'I MTHAR LTUNG BA'I PHYIR, DE RTOGS PA NI THAR PA'I LAM YANG DAG PA MA YIN GYI, GZHAN STONG SEMS KYI CHOS NYID 'OD GSAL BSGOMS PA'I STOBS KYIS SO SO RANG RIG PA'I TSUL GYIS MYONG BA'I NANG RIG 'GYUR MED KHO NA YANG DAG PA'I LAM DU BZHED DE, DE SKAD DU YANG YE SHES LE'UR, GANG GI RGYAL BA'I DBANG PO BSKYED CING NYIN ZHAG SO SO'I DBANG LAS GANG GI MNGAL NAS 'BYUNG, ,SKAD CIG GANG GIS 'GYUR BA RNAM PAR BRAL BA 'GRUB CING G-YO BAS G-YO BA MED GYUR PA, ,SANGS RGYAS BYA BA DE NYID SPANGS NAS BDE MNYAM DANG BRAL STONG PA GZHAN DAG SGOM BYED PA, ,DE YIS BSKAL PA BYE BA DU MA RNAMS KYIS SANGS RGYAS NYID DANG LHAN SKYES BDE BA'ANG RING, ,ZHES DANG, NANG LER, YAN LAG DANG BCAS RIG BYED DRAN PA'I GZHUNG DANG BCAS DANG RTOG GE GRUB PA'I @157 MTHA' LDAN 'JIG RTEN DANG, ,SNYAN DNGAGS MKHAN PO RGYAS PA ME LA SOGS PA RNAMS KYIS BYAS PA'I BSTAN BCOS GZHAN YANG RIGS PA MIN, ,RIG PA ZHES PA NANG RIG 'GYUR MED KYANG STE 'JIG RTEN 'DIR NI THUB PA RNAMS KYIS RAB GSUNGS NYID, ,GANG LAS 'JIG RTEN GSUM PO MTHA' DAG TU 'GYUR MI YI BDAG PO SLAR YANG GANG LA THIM PA'O, ,ZHES BSHAD DO, ,DON DAM PA'I BDEN PA DE YANG GSUM STE, GZHI DANG, LAM DANG, 'BRAS BUS BSDUS PA'O, ,DANG PO NI, SBYANG GZHI DRI BCAS KYI DE BZHIN NYID RANG BZHIN 'OD GSAL SNGAR BSHAD PA GANG YIN PA DE'O, , LAM GYIS BSDUS PA NI, SBYOR BA YAN LAG DRUG 'KHOR DANG BCAS PA STE, DE LA YANG 'JIG RTEN DANG, 'JIG RTEN LAS 'DAS PA'I LAM GNYIS TE, 'JIG RTEN PA RNAMS NI DON DAM RJES MTHUN PA YIN LA, 'JIG RTEN LAS 'DAS PA NI DON DAM PA DNGOS YIN NO, ,DE DAG KYANG THABS RGYUD KYI SKABS SU RGYAS PAR 'CHAD PA 'GYUR RO, ,'BRAS BUS BSDUS PA NI, SGRIB PA THAMS CAD DANG BRAL BA'I DE BZHIN NYID RNAM PAR DAG PA, CHOS SKU'I NGO BO NYID DE, DE YANG 'BRAS BU'I SKABS SU RGYAS PAR 'CHAD PAR 'GYUR RO, ,RGYU'I RGYUD RGYAS PAR BSHAD ZIN TO,, DA NI THABS KYI RGYUD BSHAD PAR BYA'O, , DE LA THABS KYI RGYUD NI RNAM PA GNYIS TE, SMIN PAR BYED PA'I LAM DANG, GROL BAR BYED PA'I LAM MO, ,DANG PO LA YANG THUN MONG GI DNGOS GRUB KYIS RGYUD @158 SMIN PAR BYED PA DANG, MCHOG GI DNGOS GRUB KYIS RGYUD SMIN PAR BYED PA'I LAM GNYIS SO, , DE YANG 'DIR RDO RJE SLOB DPON GYIS BSDU BAR BYA BA'I SLOB MA NI GSUM STE, THA MA DANG, 'BRING DANG, MCHOG GO ,DANG PO NI, THEG PA GSUM GANG GIS KYANG RGYUD SMIN PAR MA BYAS PA DBANG PO SMIN PA'O,, GNYIS PA NI THEG PA THUN MONG GI LAM GYIS RGYUD SBYANGS SHING, RDO RJE THEG PA'I LAM LA MOS PA YOD LA, SKYE BA 'DI NYID LA PHYAG RGYA CHEN PO MCHOG GI DNGOS GRUB LA 'DOD PA MED CING, PHRIN LAS BZHI DANG GRUB PA BRGYAD LA SOGS PA THUN MONG GI DNGOS GRUB TZAM DON DU GNYER BA DBANG PO 'BRING POR GYUR PA'O, ,GSUM PA NI THUN MONG GI LAM GYIS RGYUD SBYANGS SHING, RDO RJE THEG PA'I LAM LA BSKYED RIM YAN CHAD MTHAR PHYIN LA THUN MONG GI 'BRAS BU LA 'DOD PA MED CING SKYE BA DE NYID LA PHYAG RGYA CHEN PO MCHOG GI DNGOS GRUB DON DU GNYER BA DBANG PO RAB TU GYUR PA'O,, DE LA SLOB MA DBANG PO DMAN PA LA NI, SLOB DPON GYIS THOG MAR RDO RJE THEG PA'I LAM MI STON GYIS, BRTAG PA GNYIS PAR, DANG POR GSO SBYONG SBYIN PAR BYA, ,DE NAS BSLAB PA'I GNAS BCU SBYIN, ,DE LA BYE BRAG SMRA BA BSTAN, ,MDO SDE PA YANG DE BZHIN TE, ,RNAL 'BYOR SPYOD PA DE LAS PHYIS, ,DE YI RJES SU DBU MA BSTAN, ,ZHES GSUNGS PA LTAR, LTA BA DANG SPYOD PA RIM CAN DU BSTAN PA'I SGO NAS 'KHRID PAR BYED DO, , DBANG PO 'BRING DU GYUR PA'I SLOB MA LA NI, THOG MAR RDUL TSON NAM RAS @159 BRIS SAM, LUGS MA DANG 'BUR MA LA SOGS PA PHYI'I DKYIL 'KHOR GANG YANG RUNG BAR CHU DANG COD PAN LA SOGS DBANG BDUN BSKUR BAS SMIN PAR BYED DO, , DBANG 'DI'I NGO BO NI, DPER NA RGYAL PO RGYAL RIGS SPYI BO NAS DBANG BSKUR BA RGYAL SRID KYI BYA BA LA DBANG BA LTAR, SLOB MA'I PHUNG KHAMS DANG SKYE MCHED LHAG PA'I LHA'I NGO BOR BYIN GYIS BRLABS NAS KHAMS GSUM CHOS KYI RGYAL POR MNGA' GSOL BA YIN TE, DE SKAD DU YANG GSANG BA 'DUS PAR, DBANG BSKUR RDO RJE CHEN PO LA, KHAMS GSUM KUN GYIS PHYAG BYAS PA, ,SANGS RGYAS KUN GYI GSANG GSUM GYI; ;GNAS LAS BYUNG BA NGA YIS BYIN, ,ZHES GANG GSUNGS PA BZHIN NO, ,DGOS PA NI PHUNG PO KHAMS DANG SKYE MCHED THA MAL DU ZHEN PA'I DRI MA BSAL NAS LHAG PA'I LHA'I DKYIL 'KHOR DU BSGOM PA LA DBANG BAR BYED PA'O, ,DE'I 'OG TU BSKYED RIM GYI MAN NGAG YAN LAG DANG BCAS PA STON PAR BYED DO, ,RGYUD 'DI'I LUGS KYI BSKYED RIM NI, RTOG SGOM RJES SU DPAG PA'I LAM YIN PAS, JI LTAR KO tA PA'I SA BON LAS S'A LU'I 'BRAS BU MI 'BYUNG BA LTAR, MCHOG GI DNGOS GRUB RNAM PAR MI RTOG PA'I RGYUR MI 'GYUR GYIS 'JIG RTEN PA'I DNGOS GRUB TZAM GYI RGYUR BZHED DO, ,DE SKAD DU YANG MDOR BSDUS DANG POR, GZUGS LA SOGS PA RTOG PA DKYIL 'KHOR GYI, ,'KHOR LO BSGOM PA GOMS PAR GYUR PA NI, ,GRUB PA 'JIG RTEN PA RNAMS GRUB 'GYUR GYI, ,'DOD PA'I DNGOS GRUB CHEN PO GA LA ZHIG ,CES SOGS BSHAD CING, MCHOG MI 'GYUR GYI THAD DU SGRUB BYED DANG BCAS PA RGYAS PAR @160 'CHAD DO, ,RGYUD GZHAN GYI LTAR NA BSKYED RIM SANGS RGYAS KYI RGYUR SHIN TU YANG 'GYUR MOD, DE'I SGRUB BYED 'DIR MI 'GOD DO, ,RGYUD 'DI'I LUGS KYI'ANG BSKYED RIM LA GTZO BOR 'DZIN PA DGAG PA TZAM YIN GYI, SANGS RGYAS KYI RGYUR GTAN MI 'GYUR BA MA YIN NO, ,DPER NA ZHING PA DAG SNGAR MA BTUL BA'I ZHING SA LA 'BRAS S'A LU 'DEBS PAR 'DOD PA NA, THOG MAR KO tA PA'I SA BON 'DEBS SHING, DE'I 'OG TU S'A LU'I SA BON 'DEBS MOD, KO tA PA'I SA BON LAS S'A LU'I MYU GU 'BRAS BU MI 'BYUNG YANG, KO tA PAS DUL BAR MA BYAS PA'I ZHING LA S'A LU'I 'BRAS BU MI SMIN PA LTAR, BSKYED RIM RTOG PA LAS MI RTOG PA'I SANGS RGYAS MI 'BYUNG YANG, BSKYED RIM GYIS RGYUD MA SBYANGS PAR RDZOGS RIM BSGOM PA'I SNOD DU YANG MI RUNG GI THOG MAR BSKYED RIM MTHAR PHYIN PA NA RDZOGS RIM BSGOM PA'I SNOD DU RUNG BA YIN GYI, DPER NA RIN PO CHE'I CHED DU RGYA MTSO CHEN POR 'JUG PA'I TSONG PA RNAMS THOG MAR MCHING BU DANG DBYIG LA SOGS PA NOR BU PHAL PA YOD PA'I GLING DU PHYIN PA NA, DA NI RIN PO CHE MCHOG GI GLING LA YANG MI RING NGO SNYAM DU BROD PA SKYES TE 'JUG PA LTAR, BSKYED RIM MTHAR PHYIN NAS GRUB CHEN BRGYAD LA SOGS PA THUN MONG GI DNGOS GRUB THOB PA NA RDO RJE THEG PA'I LAM 'DIS SKYE BA 'DI NYID LA PHYAG RGYA CHEN PO MCHOG GI DNGOS GRUB KYANG GDON MI ZA BAR 'THOB PAR 'GYUR RO SNYAM NAS, DE'I RGYU RDZOGS RIM BSGOM PA LA 'JUG PAR 'GYUR BA'I PHYIR RO, ,DE SKAD DU YANG KLU SGRUB KYI ZHAL SNGA NAS, BSKYED PA'I RIM LA LEGS GNAS SHING, ,RDZOGS PA'I @161 RIM PA 'DOD RNAMS LA, ,THABS 'DI RDZOGS PA'I SANGS RGYAS KYIS, ,SKAS KYI RIM PA LTA BUR GSUNGS, ,ZHES BSHAD DO, ,DE'I PHYIR RGYUD 'DIR SANGS RGYAS KYI RGYU MIN ZHES PA'I TSIG TZAM LA BRTEN NAS BSKYED RIM RTOG PA'I SGOM PA'O, ,ZHES NGAN PAR BRTZI BA NI, RDO RJE THEG PA'I LAM GYI GNAD MA GO BA'I 'KHRUL PA CHEN PO'O, ,SLOB MA GSUM PA DBANG PO MCHOG TU GYUR PA LA NI, MCHOG GI DNGOS GRUB KYI RGYUR SMIN PAR BYED PA'I LAM THOG MAR STON TE, DE YANG GSUM STE, BUM PA DANG, GSANG BA DANG, KUN RDZOB SHES RAB YE SHES KYI DBANG NGO, ,SLOB MA RGYUD 'GREL CHA LAG DANG BCAS PA SHES SHING GZHAN RJES SU 'DZIN PAR NUS PA LA NI, RDO RJE SLOB DPON CHEN POR MNGA' GSOL BA BUM PA'I DBANG BSKUR LA, GZHAN RJES SU 'DZIN MI NUS PA'I SLOB MA LA NI MCHOG DBANG GNYIS BSKUR RO, , DE LA GSANG DBANG GI NGO BO NI, BLA MAS BYANG CHUB KYI SEMS LCE THOG TU GNANG BA SLOB MAS ZHI BA'I BTUNG BA BZHIN MYANGS PA LAS BYUNG BA'I YE SHES SO, , DE YANG BLA MA'I SKU'I DKYIL 'KHOR LAS THOB CING, DGOS PA NI, RDZOGS RIM MCHOG TU MI 'GYUR BA'I DNGOS RTEN, BYANG CHUB KYI SEMS LA MI GTZANG BAR 'DZIN PA'I DRI MA BSAL NAS RDZOGS RIM GYI RGYUR BYANG SEMS MI SPANG ZHING BSTEN PA LA DBANG BAR BYED PA'O, , GSANG DBANG BSKUR BA'I TSUL LA GNYIS TE, GROL LAM LA BRTEN PA DANG, CHAGS LAM LA BRTEN PA'O, ,DANG PO NI, SLOB DPON TSANGS SPYOD LA GNAS PA YIN NA, @162 LAG PA'I PAD MA'AM, YE SHES KYI PHYAG RGYA LA BRTEN NAS KHAMS PHAB NAS DBANG BSKUR BAR BYED KYI, LAS KYI PHYAG RGYA LA MI BRTEN TO, ,CHAGS LAM LA BRTEN PA'I GSANG DBANG NI, SLOB DPON KHYIM PA YIN NA SLOB MAS PHUL BA'I LAS KYI PHYAG RGYA DANG SNYOM PAR ZHUGS TE KHAMS PHABS NAS SLOB MA LA DBANG BSKUR BAR BYED DO, , KUN RDZOB SHES RAB YE SHES KYI DBANG NI, PHYAG RGYA LA BRTEN NAS THIG LE YAS BABS KYI DGA' BA BZHI'I MYONG BA SKYES PA STE, DE YANG SPYI BO NAS MGRIN PA'I BAR DGA' BA, MGRIN PA NAS SNYING GA'I BAR MCHOG DGA', SNYING GA NAS LTE BA'I BAR KHYAD PAR GYI DGA' BA, LTE BA NAS RDO RJE NOR BU'I RTZE MO'I BAR DU BYON TE, BDE BA PHUL DU DBYUNG DU MED PA'I GNAS SKABS LA SKYES PA'I YE SHES NI LHAN CIG SKYES PA'I DGA' BA'O, ,DGA' BA BZHI PO 'DI DAG LA SLOB DPON RNAMS KYI BZHED PA'I KHYAD PAR MI 'DRA BA DU MA YOD KYANG MA SPROS TE, RGYUD 'DI'I DGONGS PA GANG YIN PA DE TZAM ZHIG BZHAG GO, ,DBANG 'DI YANG PHYAG RGYA'I BHA GA'I DKYIL 'KHOR LAS THOB LA, DGOS PA NI, 'DOD CHAGS SPANG BYA DANG DMAN PAR 'DZIN PA'I DRI MA BSAL NAS, RDZOGS RIM MCHOG TU MI 'GYUR BA'I BDE BA'I RGYUR PHYAG RGYA MI SPANG ZHING BSTEN PA LA DBANG BAR BYED PA'O, , DBANG GSUM PA 'DI LA YANG, SNGAR LTAR DBANG BSKUR BA'I TSUL LA GNYIS TE, GROL LAM DANG CHAGS LAM LA BRTEN PA'O, ,DANG PO NI, SLOB MA TSANGS SPYOD LA GNAS PA YIN NA, LAG PA'I PAD MA'AM, YE SHES KYI PHYAG RGYA LA BRTEN @163 NAS DGA' BA BZHI'I MYONG BA BSKYED DE NGO SPROS PAR BYED KYI, LAS KYI PHYAG RGYA LA MI BRTEN NO, ,GNYIS PA CHAGS LAM LA BRTEN PA NI, SLOB MA KHYIM PA YIN NA BLA MAS GNANG BA'I LAS KYI PHYAG RGYA DANG SNYOMS PAR ZHUGS TE DGA' BA BZHI'I MYONG BA BSKYED NAS BLA MA'I MAN NGAG GIS BRDA SPRAD DE DBANG BSKUR BAR BYED DO, ,RGYUD 'DIR RGAN PO SBYOR MI NUS PA DANG, DGE SLONG LA DBANG GSUM PA TSIG GIS STER BAR BSHAD NA'ANG, BDE MCHOG LAS, GANG ZHIG DGE SLONG DNGOS GNAS DANG, , GANG ZHIG RGAN POR GYUR PA DANG, ,GANG ZHIG RTOG LA DGA' BA'I MI, ,DE LA RIN CHEN SBYIN MI BYA, ,ZHES DGA' BA BZHI'I MYONG BA SKYED MI NUS PA DANG, MI 'DOD PA DAG LA DBANG BSKUR MI SBYIN PAR BSHAD PAS, DE'I PHYIR DBANG GI DON NI MNGON SUM GYI LAM YIN PA'I PHYIR, MCHOG DBANG GNYIS PO 'DI LA YANG TSIG TZAM GYIS DBANG BSKUR BAR MI 'GYUR GYI GONG DU JI SKAD BSTAN PA'I CHO GAS SLOB MA'I RGYUD LA MNGON SUM GYI MYONG BA BSKYED DGOS SO, , MCHOG DBANG BZHI PA DON DAM SHES RAB YE SHES NI, MCHOG TU MI 'GYUR BA'I BDE BA DANG, RNAM PA THAMS CAD PA'I STONG PA NYID ZUNG DU CHUD PA'I RNAL 'BYOR 'JIG RTEN LAS 'DAS PA'I YE SHES YIN NO, , MDOR BSDUS DANG POR, MCHOG TU MI 'GYUR BZHI PA DE NYID NI, ,SANGS RGYAS RNAMS KYI SHES RAB YE SHES TE, ,GANG ZHIG DE NI SLAR YANG DE BZHIN 'DIS, , GANG GI PHYAG RGYA CHEN MOR RGYAL BAS GSUNGS, ,ZHES BSHAD PA'I PHYIR RO, ,DE BAS @164 NA 'DI NI BSGOMS PA'I STOBS LAS 'BYUNG GI CHO GA LAS KYANG MI BSKYED PA'I PHYIR RO; ;DBANG BZHI PO'I CHO GA RGYUD 'DI RU MA GSUNGS SO, ,DE BAS NA GSANG BA DANG, KUN RDZOB SHES RAB YE SHES KYI DBANG GNYIS NI, BZHI PA'I LAM SGOM PA'I SNOD DU RUNG BAR BYED PA YIN LA, SO SOR BSDUD PA LA SOGS PA YAN LAG DANG PO LNGA NI, DBANG BZHI PA SKYED PAR BYED PA'I RGYU YIN NO, , SPYI DON GNYIS PA GROL BA'I LAM BSHAD PAR BYA STE, DE YANG 'DUS PA'I RGYUD PHYI MA LAS, THA MAL MCHOG GI DBYE BA YIS, ,BSNYEN PA RNAM PA GNYIS SU 'DOD, ,THA MAL PA NI RDO RJE BZHIS, ,MCHOG GI YAN LAG DRUG GIS SO, ,ZHES THA MAL PA'I DNGOS GRUB KYI BSNYEN PA RDO RJE BZHI'AM, BSNYEN SGRUB YAN LAG BZHI DANG, MCHOG GI DNGOS GRUB KYI BSNYEN PA YAN LAG DRUG TU GSUNGS PAS, DE'I PHYIR GROL BA'I LAM NI SBYOR BA YAN LAG DRUG GO ,'DI BSHAD PA LA GNYIS TE, MDOR BSTAN PA DANG, RGYAS PAR BSHAD PA'O, ,DANG PO NI, 'DUS PA'I RGYUD PHYI MAR GSUNGS PA 'GREL PAR DRANGS PA, SO SOR BSDUD DANG BSAM GTAN DANG, ,SROG RTZOL DE BZHIN 'DZIN PA DANG, ,RJES SU DRAN DANG TING 'DZIN TE, ,SBYOR BA YAN LAG DRUG TU 'DOD, ,CES GSUNGS PA'O, ,RGYAS PAR BSHAD PA LA GNYIS, SO SOR BSHAD PA DANG, THUN MONG DU GTAN LA DBAB PA'O, ,DANG PO LA SKU RDO RJE DANG, GSUNG RDO RJE DANG, THUGS RDO RJE'I RNAL 'BYOR GYI DANG PO LA YANG RGYU'I RNAL 'BYOR DANG, 'BRAS BU'I RNAL 'BYOR GNYIS KYI DANG PO SKU RDO RJE'I RGYU'I RNAL 'BYOR NI SO @165 SOR BSDUD PA STE, DE YANG SGOM TSUL DANG, NGO BO DANG, SGRA DON DANG, MTHAR PHYIN PA'I TSAD DANG, DE'I PHAN YON RNAMS KYIS SHES PAR BYA'O, ,DANG PO SGOM TSUL NI, MAN NGAG JI LTA BA BZHIN DU LUS KYI 'PHRUL 'KHOR BCA' ZHING, GTZUG TOR GYI LTA STANGS KYIS BYED PA BCINGS TE, MTSAN MO BUG PA MED PA'I MUN PA DANG, NYIN MO SPRIN MED PA'I NAM MKHA' LA SEMS RTZE GCIG PA'I TSUL GYIS SGOM PAR BYED DO,, DE SKAD DU YANG, SGRUB LER, BSNYEN PA LA NI DANG PO'I RNAL 'BYOR RNAM BCU MKHA' LA 'KHOR LO CAN GYI KHRO BO'I LTA BAS SO, ,ZHES DANG, 'GREL PAR YANG, MTSAN MO'I DUS SU MTSAN MO'I RNAL 'BYOR DANG, NYIN MO'I DUS SU NYIN MO'I RNAL 'BYOR GYIS SHES RAB KYI PHA ROL TU PHYIN PA LA RNAL 'BYOR LTA BA GANG YIN PA DE NI, MTSAN MO NAM MKHA' LA BLTA ZHING, NYIN MO BLA GAB MED PA LA BLTA'O, ,ZHES BSHAD DO, , GNYIS PA NGO BO NI, TSUL DE LTAR RTZE GCIG TU BSGOMS NAS SROG DBU MAR CUNG ZAD ZHUGS PA'I MTHU LAS, MIG LA SOGS PA'I THA MAL PA'I DBANG PO LNGA GZUGS LA SOGS PA'I YUL LNGA LA MI 'JUG CING, DU BA LA SOGS PA'I RTAGS BCU RDZOGS PA'AM, CI RIGS PA MTHONG STE, STONG PA NYID KYI GZUGS LA SEMS RTZE GCIG PA'I TING NGE 'DZIN NO, ,YE LER, NAM MKHA' KUN NAS ZHEN PA'I SEMS DANG MIG NI MI 'DZUB RDO RJE'I LAM DU RAB TU ZHUGS PA YIS, ,STONG PA LA NI DU BA SMIG RGYU RAB BSAL DRI MA MED PA'I MKHA' SNANG NYID DANG MAR ME DANG,, @166 'BAR BA DANG NI ZLA BA NYI MA RDO RJE RNAMS DANG MCHOG GI CHA DANG THIG LE MTHONG BAR 'GYUR, ,ZHES BSHAD DO, ,RTAGS BCU NI, DU BA DANG, SMIG RGYU DANG, ME KHYER DANG, MAR ME 'BAR BA DANG BZHI NI MTSAN MO'I RNAL 'BYOR GYI RTAGS TE, DE DAG KYANG 'DUS PA'I RGYUD PHYI MA LAS, MTSAN MO'I KHAMS GYI RNAM PA LTAR, ,BYANG CHUB RDO RJES GSUNGS PA DE, ,SMIG RGYU 'DRA BA DANG PO STE, ,GNYIS PA DU BA LTA BA'O,, GSUM PA ME KHYER 'DRA BA STE, ,BZHI PA MAR ME 'BAR LTA BU'O, ,ZHES PAS BSTAN CING, SPRIN MED NAM MKHA' LTA BU STE, ,RTAG TU SNANG BA LNGA PA'O, ,ZHES LNGA PA SPRIN MED PA'I NAM MKHA' LTA BU NI RTAGS CAN 'OD GSAL DNGOS YIN PAS 'DIR RTAGS SU MA BSDUS SO, ,NYIN MO'I RNAL 'BYOR GYI RTAGS DRUG NI, 'BAR BA DANG, ZLA BA DANG, NYI MA DANG, SGRA GCAN DANG, CHA SHAS DANG, THIG LE MTHONG BA RNAMS TE; DE DAG KYANG MTSAN YANG DAG PAR BRJOD PA LAS, NAM MKHA' LAS BYUNG RANG BYUNG BA, ,SHES RAB YE SHES ME BO CHE, ,'OD CHEN RNAM PAR SNANG BAR BYED, ,YE SHES SNANG BA LAM ME BA, ,'GRO BA'I MAR ME YE SHES SGRON, ,GZI BRJID CHEN PO 'OD GSAL BA, ,SNGAGS MCHOG SNGAGS BDAG RIG SNGAGS RGYAL, ,ZHES SOGS KYIS BSTAN PAR BZHED DO, ,RTAGS LA SOGS PA STONG PA NYID KYI GZUGS 'DI DAG CHOS SKU DNGOS DANG, DON DAM PA'I CHOS NYID MNGON SUM DU MTHONG BAR NGO SPROD PA NI MI RIGS TE, STONG PAR RTZE GCIG YID BYAS NAS, ,NYI MA GCIG NI YONGS SU BRTAG ,GAL TE RTAGS NI MA BYUNG NA, ,DE TSE NGA YI BRDZUN TSIG YIN, , @167 ZHES BCOM LDAN 'DAS KYIS BSHAD PAR GSUNGS PA'I PHYIR 'DI DAG NI, RDZOGS RIM MCHOG TU MI 'GYUR BA'I BDE BA MYUR DU MNGON DU 'GYUR BA'I RTAGS TZAM DU BSHAD PA YIN GYI, CHOS SKU DNGOS MIN TE, JI SRID RNAL 'BYOR PA'I RGYUD SGRIB PA DANG BCAS PA DE SRID DU, CHOS SKU MTSAN NYID PA MNGON DU MI 'GYUR TE, CHOS KYI SKU NI GNAS SKABS RIGS BZHI'I SGRIB PA THAMS CAD DANG BRAL BA'I DBYINGS RNAM PAR DAG PA'I NGO BO NYID YIN PA'I PHYIR RO, , MDOR BSDUS DANG PO LAS KYANG, 'KHOR BA SNYING PO MED PA ZAD GYUR PA, , DE LAS SKYES PA'I SANGS RGYAS NYID 'BRAS TE, ,CHU SHING GI NI 'BRAS BU SMIN PA RNAMS, ,CHU SHING NYAMS PAS 'BYUNG BA 'GYUR BA BZHIN, ,ZHES PAS GLO BUR GYI DRI MA MTHA' DAG MA ZAD PAR CHOS SKU MNGON DU MI 'GYUR BAR BSHAD DO, ,YANG JI SRID MCHOG TU MI 'GYUR BA'I BDE BA MA THOB PA DE SRID DU DON DAM PA'I CHOS NYID MNGON SUM DU MTHONG BA MIN TE, RJES DRAN MAN CHAD KYI TING NGE 'DZIN GZUNG BA DANG 'DZIN PA GNYIS SU SNANG BA YOD PAS 'JIG RTEN PA'I LAM YIN LA, DE'I PHYIR DE DAG DON DAM RJES MTHUN PA YIN GYI, DON DAM DNGOS MIN NO, ,DE BAS NA GANG DAG LAS DANG PO PA'I NYAMS SNANG RNAMS CHOS SKUR NGO SPROD PA NI, RIN PO CHE RTOG PA LA MI MKHAS PA DAG MCHING BU LA NOR BU DANG, RA GAN LA GSER DU 'KHRUL TE, RANG GZHAN SLU BAR BYED PA DANG 'DRA'O, , GSUM PA SGRA DON NI, TING NGE 'DZIN GYI STOBS KYIS THA MAL BA'I MIG LA @168 SOGS PA'I DBANG PO LNGA, GZUGS SOGS YUL LNGA LA SO SOR 'JUG PA BSDUD PA'AM, SPONG BAR BYED PAS NA SO SOR BSDUD PA ZHES PA'O, ,DE SKAD DU SGRUB LER, SO SOR BSDUD PA LUS LA YUL DANG YUL CAN BCU PO RNAMS NI RAB TU 'JUG PA MED PA'O, ,ZHES BSHAD DO, ,BZHI PA MTHAR PHYIR PA'I TSAD NI, RTAGS BCU, GCIG TU 'DRES PA'I STONG PA NYID KYI GZUGS LA RNAL 'BYOR PA'I SEMS 'BAD PA MED PAR RANG GI NGANG GIS 'JUG PA'O, ,LNGA PA PHAN YON NI, DE'I RNAL 'BYOR PAS DUG ZHI BA LA SOGS PA BDEN PA'I TSIG 'GRUB PAR 'GYUR BA STE, JI SKAD DU, SO SOR BSDUD PAS RNAL 'BYOR PA NI YUL DANG RNAM PAR BRAL BA SNGAGS RNAMS KUN GYIS BYIN GYIS BRLOB, ,CES BSHAD DO, ,SPYI DON GNYIS PA SKU RDO RJE'I 'BRAS BU'I RNAL 'BYOR NI, BSAM GTAN TE, DE YANG SO SOR BSDUD PA'I 'BRAS BU YIN PAS SOR BSDUD MTHAR PHYIN NAS BSGOM MO, ,SGOM TSUL NI, YUL DANG, DUS DANG, GNAS DANG, BYED PA BCING BA LA SOGS PA SOR BSDUD DANG 'DRA'O, ,NGO BO NI, DE LTAR BSGOMS PAS GLO BUR GYI YUL SNANG MA LUS PA 'GAG TE RNAL 'BYOR PA'I SEMS RNAM PA THAMS CAD KYI GZUGS LA RANG GI NGANG GIS 'JUG PA'I SEMS RTZE GCIG PA'O, ,DE YANG YAN LAG LNGA DANG LDAN TE, SHES RAB DANG, RTOG PA DANG, DPYOD PA DANG, DGA' BA DANG, G-YO BA MED PA'I BDE BA RTZE GCIG PA'I SEMS SO, ,DE LA DANG PO STONG PA NYID KYI GZUGS LA BLTA BA NI SHES RAB BO,, DE'I 'OG TU GZUGS KYI NGO BO TZAM NGES PA NI RTOG PA'O, ,DE'I 'OG TU GZUGS DE @169 NYID RANG GI SEMS NYID 'OD GSAL BA'I SNANG BA ME LONG LA PRA PHAB PA LTA BUR RANG BZHIN MED PAR NGES PA NI DPYOD PA'O, ,BSGOMS PA'I STOBS LAS BYUNG BA'I YID TSIM PAR BYED PA'I TSOR BA BDE BA NI DGA' BA'O, ,SHIN TU SBYANGS PA'I BDE BA LUS THAMS CAD LA KHYAB PA LAS BYUNG BA, LUS SIM PAR BYED PA'I BDE BA DANG LHAN CIG STONG PA NYID KYI GZUGS LA G-YO BA MED PAR RTZE GCIG TU 'JUG PA'I SEMS NI G-YO BA MED PA'I BDE BA RTZE GCIG PA'I SEMS SO, , YAN LAG DANG PO GSUM NI, GNYEN PO'I YAN LAG LHAG MTHONG GI NGO BO YIN LA, DGA' BA DANG BDE BA PHAN YON GYI YAN LAG YIN ZHING, G-YO BA MED PA'I SEMS RTZE GCIG PA NI ZHI GNAS KYI NGO BO YIN NO, ,DE'I PHYIR BSAM GTAN NI ZHI LHAG ZUNG 'BREL GYI TING NGE 'DZIN NO, ,DE SKAD DU YANG SGRUB LER, BSAM GTAN DAG KYANG SHES RAB RTOG DANG DPYOD PA DGA' DANG G-YO SEMS RTZE GCIG SEMS PA'O, ,ZHES BSHAD DO, ,SGRA DON NI, ZHI LHAG ZUNG DU 'BREL BA'I TING NGE 'DZIN YIN PA'I PHYIR BSAM GTAN YIN NO, ,MTHAR PHYIN PA'I TSAD NI, MTSAN MO'I RNAL 'BYOR GYI DUS SU THIG LE'I DBUS SU MTSAN DPES BRGYAN PA'I DE BZHIN GSHEGS PA'I SKU GZUGS DU MA MTHONG BA DANG, DE DAG GI GSUNG GZHOM DU MED PA'I SGRA THOS PA DANG, NYIN MO'I RNAL 'BYOR GYI DUS SU, DUS KYI RTZAL THIG LE'I DBUS SU RE KHA NAG PO SKRA'I TSAD TZAM 'OD ZER 'PHRO BA MTHONG BA'O, ,DE SKAD DU YANG YE SHES LE'UR, DE YI DBUS SU SANGS RGYAS GZUGS NI YUL DANG RNAM PAR BRAL BA DU MA @170 LONGS SPYOD RDZOGS PA'I SKU, ,NAM MKHA' CHU 'DZIN BRAL BA DAG LA RNAL 'BYOR PA YIS BGRAD PA'I MIG GIS BLTA BAR BYA BA STE, ,RE KHA NAG PO DRI MED 'OD ZER 'PHRO BA DUS KYI RTZAL MTHONG BAR 'GYUR GYI BAR DU'O, ,ZHES BSHAD DO, ,PHAN YON NI; DE'I TSE RNAL 'BYOR PAS MNGON PAR SHES PA LNGA THOB PAR 'GYUR TE, 'DI LTAR LHA DANG MI'I YUL NA GNAS PA'I GZUGS PHRA RAGS THAMS CAD LAG MTHIL NA BZHAG PA'I SKYU RU RA MTHONG BA BZHIN DU GSAL POR MTHONG BA LHA'I MIG DANG, SGRA PHRA RAGS THAMS CAD RNA BA'I DRUNG NA GRAGS PA BZHIN DU THOS PA LHA'I RNA BA DANG, GZHAN GYI SEMS KYI RGYU BA JI LTA BA BZHIN DU SHES PA GZHAN GYI SEMS SHES PA DANG, RANG DANG GZHAN GYI TSE RABS SNGA MA DU MA ZHAG GSUM LON PA BZHIN DU DRAN PA SNGON GYI GNAS RJES SU DRAN PA DANG, 'GRO BA LNGA'I SKYE BA SNGA MA NAS PHYI MAR 'JUG PA'I BAR DO'I SRID PA JI LTA BA BZHIN DU MTHONG BA 'CHI 'PHO BA DANG SKYE BA SHES PA STE, MNGON SHES LNGA PO DE DAG 'THOB PAR 'GYUR RO, ,DE SKAD DU YANG SGRUB LER, MNGON PAR SHES PA LNGA NI 'THOB PAR 'GYUR TE MI YI BDAG PO BSAM GTAN SBYOR BAS DAG PA'O, ,ZHES BSHAD DO, , CI'I PHYIR SOR BSDUD BSAM GTAN GNYIS LA SKU RDO RJE'I RNAL 'BYOR ZHES BSHAD CE NA, DE DAG NI RNAM PAR THAMS CAD KYI STONG PA NYID KYI GZUGS SGRUB BYED KYI RNAL 'BYOR YIN LA, LAM DUS SU 'DI DAG BSGOMS PA'I STOBS KYIS 'BRAS BU'I DUS SU MTSAN DPES BRGYAN PA'I RNAM PA THAMS CAD KYI MCHOG @171 DANG LDAN PAS GZUGS KYI SKU ME LONG LA PRA PHAB PA LTA BU 'GRUB PAR 'GYUR BAS DE'I PHYIR 'DI DAG LA SKU RDO RJE'I RNAL 'BYOR ZHES BYA'O, , SPYI DON GNYIS PA GSUNG RDO RJE'I RNAL 'BYOR LA GNYIS TE, RGYU'I RNAL 'BYOR DANG, 'BRAS BU'I RNAL 'BYOR RO, ,DE LA GSUNG RDO RJE'I RGYU'I RNAL 'BYOR NI SROG RTZOL YIN LA, DE YANG SGOM PA'I DUS NI BSAM GTAN MTHAR PHYIN NAS BSGOMS TE, SOR BSAM GNYIS KYI DUS SU DBU MA SBYANGS PA NA, SROG RTZOL GYIS TSEGS MED PAR SROG DBU MAR GZHUG PAR NUS KYI, GZHAN DU BTZAN THABS KYIS SROG DBU MAR BCUG NA GEGS SU 'GYUR BA'I PHYIR RO, ,DE'I PHYIR SROG RTZOL GYI DGOS PA NI BRTAG PA GNYIS PAR, LTE BAR GTUM MO 'BAR BA YIS, ,DE BZHIN GSHEGS PA LNGA BSREG CING, ,SPYAN LA SOGS PA YANG BSREGS NAS, ,BSREGS PAS RI BONG CAN HAm 'DZAG ,CES GSUNGS PA LTAR LTE BA NAS GTZUG TOR GYI BAR GYI DBU MA'I MDUD PA RNAMS GROL NAS LTE BA NA GNAS PA'I GTUM MO'I MES SPYI BO'I HAm ZHU NAS BYANG CHUB KYI SEMS 'BAB PAR BYA BA'I PHYIR, SROG RTZOL BSGOM PA YIN NO, ,DE LA RTZA DBU MA'I GNAS LUGS NI, LUS KYI DBUS NA GTZUG TOR NAS NOR BU'I BAR LA RTZA DBU MA CHU SHING GI SNYING SDONG PO LTAR DRANG BA, PAD MA'I SKUD PA LTAR PHRA BA, RGYA SKYEGS KYI ME TOG LTAR DMAR BA, TIL GYI MAR ME LTAR GSAL BAR GNAS ZHES MKHAS PA GZHAN DAG GIS BSHAD LA, RTZA DBU MA DE LTAR GNAS PA LA RO RKYANG GNYIS KYIS GTZUG TOR NAS GSANG GNAS KYI BAR LA LAN BCO LNGAR G-YAS @172 G-YON GNYIS NAS LCAGS SGROG BSGRIL BA LTAR LU GU BRGYUD DU 'KHYUD NAS GNAS ZHES RGYUD 'DIR BSHAD DO, ,YE SHES LE'UR, N'A DA THIG LE CHA DANG YE SHES BDUD RTZI'I GNAS SU SON PA LU GU BRGYUD DU BCINGS PA'I RTZA,, ZHES BSHAD PA'O, ,RO RKYANG GNYIS DBU MA LA 'KHYUD PA'I MTSAMS LA DBU MA'I MDUD PA ZHES BYA LA, DE LTA BU BCO LNGA YOD DE GTZUG TOR NAS SMIN MTSAMS DANG, DE NAS MGRIN PA DANG, DE NAS SNYING KHA DANG, DE NAS LTE BA DANG, DE NAS GSANG GNAS KYI BAR LA LAN GSUM GSUM GYI BAR DU RO RKYANG GNYIS KYIS DBU MA LA 'KHYUD NAS YOD PAR BSHAD PA'I PHYIR RO, , DE LA THA MAL PA'I DUS SU NYIN ZHAG GCIG LA DBUG NYI KHRI CHIG STONG DRUG BRGYA RGYU BA NA, LNGA BCU RTZA DRUG RKANG BCAS GCIG DBU MAR BAB KYANG STOBS CHUNG ZHING, G-YAS G-YON GNYIS NAS RLUNG SHAS CHER RGYU BAS, RO RKYANG GNYIS RGYU MA PHUS BTAB PA LTAR STOBS CHE BAS DBU MA'I MDUD PA MI GROL LA, SOR BSDUD BSAM GTAN GYI DUS SU, DBU MAR RLUNG SHAS CHER RGYU YANG SROG THUR LA MA 'DRES PAS GTUM MO MI 'BAR ZHING DBU MA'I MDUD PA RNAMS GROL BAR MI NUS SO, , SROG RTZOL BSGOMS PAS GTUM MO 'BAR ZHING DBU MA'I MDUD PA RNAMS GROL BAR 'GYUR TE, DE LA BSGOM TSUL NI, MAN NGAG JI LTA BA BZHIN DU DBYUNG BA DANG, DGANG BA DANG, BUM PA CAN LA SOGS PA'I SBYOR BAS SGOM PAR BYED DO, ,NGO BO NI, DE LTAR BSGOMS PAS G-YAS G-YON NYI ZLA'I RGYU BA MA LUS PAR 'GAGS NAS @173 DKYIL 'KHOR BCU'I SROG DANG THUR SEL GYI RLUNG LTE BA'I GNAS GCIG TU 'DRES TE, DBU MAR ZHUGS PAS DBU MA'I MDUD PA RNAMS GTZUG TOR GYI BAR DU GROL BA'O, , MTHAR PHYIN PA'I TSAD NI, MNYAM PAR BZHAG PA'I DUS SU RANG GI LUS LA STONG GZUGS KYI 'OD ZER GYIS 'KHOR BAR MTHONG BA STE; YE SHES LE'UR, GZUGS NI MTHONG BAR GYUR NA NYIN ZHAG SO SO'I DUS SU SROG GI RLUNG NI 'GAG PA RAB BCAS TE, ,'OD ZER 'KHOR LO RANG GI LUS LA BSKOR ZHING 'KHOR BAR BYED PA MTHONG GI BAR DU'O, ,ZHES BSHAD DO, , ZLA BA DRUG TU BRTZON 'GRUS DRAG POS BAR MA CHAD DU BSGOMS NA SROG RTZOL MTHAR PHYIN PAR 'GYUR TE, DE NYID LAS, ZLA BA DRUG GIS SDOM BRTZON RNAMS NI REG BYAS DMAN PA'I BDE BA MNYAM PA LAM GYI SEMS SU 'GYUR, ,ZHES BSHAD DO; ; SGRA DON NI, RLUNG NANG DU 'JUG PA SROG DANG, PHYIR 'BYUNG BA RTZOL BA'AM, G-YON PA'I RLUNG SROG DANG, G-YAS PA'I RLUNG RTZOL BA STE, DE LTA BU'I SROG DANG RTZOL BA 'GOG PA'I PHYIR SROG RTZOL ZHES BYA'O, ,PHAN YON NI, SROG RTZOL MTHAR PHYIN PA'I RNAL 'BYOR PA LA, SA THOB PA'I BYANG CHUB SEMS DPA' RNAMS KYIS BSNGAGS PA BRJOD PA DANG, MCHOD PA BYED PAR 'GYUR TE, DE SKAD DU SGRUB LER, SROG RTZOL GYIS NI DAG PA RI BONG CAN DANG NYI MA DANG BRAL BYANG CHUB SEMS DPA' @174 RNAMS KYIS MCHOD, ,CES BSHAD DO, , SPYI DON GNYIS PA GSUNG RDO RJE'I 'BRAS BU'I RNAL 'BYOR NI 'DZIN PA YIN LA; DE YANG SGOM PA'I DUS NI, SROG RTZOL MTHAR PHYIN NAS BSGOMS SHING SGOM TSUL YANG SROG RTZOL DANG 'DRA LA, NGO BO NI, 'BAD PA MED PAR SROG DBU MAR GZHUG NUS SHING, LTE BA NAS GTZUG TOR GYI BAR GYI 'KHOR LO'I LTE BA RNAMS SU RLUNG 'GRO 'ONG MED PAR JI TZAM 'DOD PAR 'DZIN NUS PA'O, ,DE SKAD DU YANG SGRUB LER, THIG LER SROG NI RAB TU BZHUGS SHING GNYIS KA'I BGROD PA BCOM STE RTZE GCIG SEMS LA 'DZIN PA'O, ,ZHES BSHAD DO, ,MTHAR PHYIN PA'I TSAD KYANG DE TZAM MO, , SGRA DON NI, 'KHOR LO'I LTE BAR RLUNG JI TZAM 'DOD PA 'DZIN NUS PAS SAM, BYANG SEMS MI LTUNG BAR 'DZIN NUS PAS NA 'DZIN PA ZHES BYA'O, ,PHAN YON NI, DE'I TSE RNAL 'BYOR PA LA THIG LE 'DZAG PA LA SOGS PA BDUD KYI BAR CHAD NYAMS SHING STOBS BCU'I LAM MCHOG TU MI 'GYUR BA'I BDE BA LA MYUR DU 'JUG PAR 'GYUR RO; ;DE SKAD DU SGRUB LER, BDUD DANG NYON MONGS PA LA SOGS PA NYAMS SHING STOBS BCU LA NI 'JUG PAR 'GYUR TE 'DZIN PA'I STOBS KYIS SO, ,ZHES BSHAD DO; ; CI'I PHYIR SROG RTZOL DANG 'DZIN PA LA GSUNG RDO RJE'I RNAL 'BYOR ZHES BYA ZHE NA, RNAL 'BYOR 'DI GNYIS KYIS THA MAL PA'I NGAG GI RGYU G-YAS G-YON NAS RGYU BA'I SROG DBU MAR BCUG NAS G-YO MED DU GNAS PA'I YE SHES KYI RLUNG SGRUB PA'I @175 PHYIR DANG, LAM DUS SU YE SHES KYI RLUNG BSGOMS PA MTHAR PHYIN PA LAS 'BRAS BU'I DUS SU SGRIB PA THAMS CAD DANG BRAL BA'I G-YO BA MED PA'I YE SHES KYI RLUNG 'BYUNG LA, DE LA SEMS CAN GYI BSAM PA JI LTA BA BZHIN DU CHOS STON PA GZHOM DU MED PA'I SGRA SANGS RGYAS KYI GSUNG RNAM PA THAMS CAD KYI SGRA BRNYAN DANG 'DRA BA 'BYUNG BAS DE'I PHYIR SROG RTZOL DANG 'DZIN PA DAG LA GSUNG RDO RJE'I RNAL 'BYOR ZHES BYA'O, , SPYI DON GSUM PA THUGS RDO RJE'I RNAL 'BYOR LA YANG, RGYU'I RNAL 'BYOR DANG, 'BRAS BU'I RNAL 'BYOR GNYIS KYI DANG PO RGYU'I RNAL 'BYOR NI, RJES DRAN TE, DE YANG BSGOM PA'I DUS NI YE SHES LE'UR, DBU MAR SROG NI RAB ZHUGS NYI MA DANG BCAS RI BONG CAN GYI BGROD PA G-YAS DANG G-YON LA BCING, ,PHYAG RGYA RAB TU 'GROGS LA SEMS DANG MCHOG GI BDE BA LA GNAS RDO RJE YANG DAG BSLANG BA YANG, ,ZHES BSHAD PA LTAR 'DZIN PA MTHAR PHYIN NAS BSGOMS TE, RJES DRAN GYI SKABS DU PHYAG RGYA LA BRTEN NAS SPYI BO'I HAm LAS BYANG SEMS DBAB DGOS LA, 'DZIN PA MA THOB NA KHAMS 'DZIN MI NUS PA'I PHYIR RO, ,SGOM TSUL NI, SGRUB LER, 'DI RNAMS DMAN PA LA SOGS DBYE BA RNAMS KYIS SNA TSOGS GTZO BO'I SGRUB THABS RNAM PA GSUM DU 'GYUR, ,PHYAG RGYA GSUM DANG GNAS SKABS GSUM NI RNAM GSUM BGROD PA'I DBANG GIS LAS DANG KUN RTOG MCHOG RNAMS SO, ,ZHES BSHAD PA LTAR RNAL 'BYOR DBANG PO DMAN 'BRING MCHOG GSUM DANG KHAMS SRA SNYI 'BRING @176 GSUM GYI DBYE BAS PHYAG RGYA GSUM LA BRTEN NAS BSGOMS TE 'DI LTAR, RNAL 'BYOR PA DBANG PO RNO ZHING KHAMS SHIN TU LCI BA YIN NA, PHYAG RGYA CHEN PO RNAM PA THAMS CAD KYI GZUGS LA RTZE GCIG TU DMIGS TE BSGOMS PAS GTUM MO 'BAR TE SPYI BO'I HAm ZHU NAS, BDE STONG GI TING NGE 'DZIN SKYE BAR 'GYUR RO, , DBANG PO DANG KHAMS SRA SNYI 'BRING DU GYUR PA NI, RNAM PA THAMS CAD KYI GZUGS YE SHES KYI LHA MO'I RNAM PAR 'GYUR TE, DE LA 'KHYUD TE BSGOMS PA LAS KHAMS 'JU BAR 'GYUR RO, ,DBANG PO DMAN PA KHAMS SRA BA NI, PHYAG RGYA GNYIS PO DE TZAM GYIS KHAMS 'JU BAR MI NUS PAS, LAS KYI PHYAG RGYA LA BRTEN DGOS TE, YE SHES LE'UR, RGYAL BA'I LHAN SKYES BDE BA 'DI NI 'PHEL BA'I DON SLAD DANG POR LAS KYI PHYAG RGYA BSTEN PAR BYA, ,ZHES BSHAD PAS SO, ,DE YANG THOG MAR MTSAN NYID DANG LDAN PA'I PHYAG RGYA DBANG BSKUR BA LA SOGS PAS RGYUD SBYANGS TE, DBEN PA'I GNAS SU 'DU SHES GSUM LDAN GYIS SNYOMS PAR ZHUGS PA LAS GTUM MO'I ME CHER 'BAR TE, SPYI BO'I HAm ZHU NAS BDE BA LA MI RTOG PAS BRGYAN PA'I TING NGE 'DZIN SKYE BAR 'GYUR RO, ,DE SKAD DU YANG, YE SHES LE'UR, 'GYUR BA MED PA'I BDE BA'I 'BRAS STER PHYAG RGYA BZHI PO 'DI RNAMS GRONG DANG 'BROG DGON DUR KHROD DANG, ,MI GTZANG BA DANG GTZANG BA'I GNAS DANG KHYIM DANG LHA YI KHANG PA THAMS CAD DU NI DUS KUN TU, ,SHIN TU DGA' BA'I DGA' BA LA GNAS 'JIG RTEN LAM LAS RAB GROL RIGS DANG RIGS MIN MNGON SPYOD CING, ,LUS STOBS @177 BDE STER BZA' BA BTUNG BA LA SOGS LONGS SPYOD DANG LDAN RNAL 'BYOR RNAMS KYIS BSGOM PAR BYA, ,ZHES BSHAD DO, ,PHYAG RGYA MA RNYED NA LAG PA'I PAD MO LA BRTEN NAS KHAMS 'BEBS PAR BSHAD DE, YANG DE NYID LAS, PAD MAR RDO RJE'I SGRA'AM RANG GI LAG PA'I CHU SKYES DAG GIS GSOR BA BDE BA'I SLAD DU STE, ,ZHES BSHAD DO, ,NGO BO NI, DE LTAR GONG DU BSHAD PA'I PHYAG RGYA GSUM LA BRTEN NAS BSGOMS PAS GTUM MO'I MES SPYI BO'I HAm ZHU BA LAS BDE STONG GI TING NGE 'DZIN RNAM PAR RTOG PA THAMS CAD DANG BRAL BA'O, ,DE SKAD DU SGRUB LER, GTUM MO'I SNANG BAR GANG ZHIG 'GYUR BA NGES PAR LUS DANG NAM MKHA' LA YANG RJES SU DRAN PAR 'GYUR ZHES DANG, YE LER YANG, RLUNG NI YANG DAG PHRAD PA RNAMS KYIS GLOG GI ME YI RTZE MOS SPYI BO'I ZLA BA ZHU BAR BYED, ,THIG LE GANG GANG ZHU BA 'DI LAS MGRIN PA SNYING KHA LA SON LTE BA GSANG BA RNAMS LA 'GOG ,CES BSHAD DO, ,SOR BSDUD BSAM GTAN GNYIS NI G-YAS G-YON GYI RGYU BA MA 'GAGS PAS RTOG DPYOD DANG BCAS PA'I TING NGE 'DZIN YIN LA, SROG RTZOL 'DZIN PA GNYIS NI G-YAS G-YON GYI RGYU BA 'GAGS PAS RTOG PA MED KYANG, SPYI BO'I HAm MA ZHU BAS BDE BA MED LA, DE'I PHYIR GSAL LA MI RTOG PA'I TING NGE 'DZIN YIN NO, ,RJES DRAN NI BDE BA LA MI RTOG PAS BRGYAN PA'I TING NGE 'DZIN RNAM PAR RTOG PA THAMS CAD DANG BRAL BA YIN KYANG, GZUNG 'DZIN GNYIS SU SNANG BA MA 'GAGS PA'I PHYIR 'JIG RTEN PA ZHES BYA'O, ,SGRA DON NI, DE'I TSE KHAMS CHES CHER 'PHEL BAS, BSAM PA @178 DANG 'DOD PA LA SOGS PA 'DOD PA'I GNAS SKABS BCU'I SGO NAS RNAL 'BYOR PA LA PHYAG RGYA DRAN PA 'BYUNG BAS, DE'I PHYIR RJES SU DRAN PA ZHES BYA'O, ,DE YANG LO GSUM PHYOGS GSUM BSGOMS PAS RJES DRAN RDZOGS PAR 'GYUR TE, SGRUB LER, DE NAS PHYAG RGYA'I SBYOR BAS NYIN ZHAG 'GA' ZHIG RNAMS KYI 'GYUR BA MED PA NYID DU RAB TU 'GYUR, ,ZHES DANG, DE'I 'GREL PAR, DE NAS PHYAG RGYA'I SBYOR BAS ZHES PA NI, SO SOR BSDUD PA DANG, BSAM GTAN DANG, SROG RTZOL DANG, 'DZIN PA'I STOBS KYIS RANG SEMS BRTAN PA SKYES PAR 'GYUR BA NA, DE NAS PHYAG RGYA'I SBYOR BAS NYIN ZHAG 'GA' ZHIG RNAMS KYIS ZHES PA NI, DUS KYI 'KHOR LO NYIN ZHAG NYI SHU RTZA LNGA LHAG PA'I BRGYA PHRAG GCIG GIS SO, ,ZHES PA NGES PA STE, NYIN ZHAG 'DI RNAMS KYIS BYANG CHUB KYI SEMS 'GYUR BA MED PA NYID DU RAB TU 'GYUR TE, DRI MA MED PA NYID DU 'GYUR RO ZHES 'GREL LO, ,ZHES BSHAD DO, , MTHAR PHYIN PA'I TSAD NI, RJES DRAN RDZOGS PA NA, LUS KYI RTZA SBUBS THAMS CAD KHAMS BYANG SEMS DVANGS MAS KHENGS PAS RNAL 'BYOR PA'I LUS DRI MA MED PA'I 'OD KYI DKYIL 'KHOR DU SNANG BA DANG, BA SPU'I BU GA THAMS CAD NAS 'OD ZER LNGA 'PHRO BA 'BYUNG STE, GRUB LER, RJES SU DRAN PA LEGS PAR DAG PA DRI MED 'OD KYI DKYIL 'KHOR DAG KYANG YE SHES GZUGS LAS SO, ,ZHES BSHAD DO, , PHAN YON NI, MCHOG TU MI 'GYUR BA'I BDE BA MYUR DU THOB PAR 'GYUR BA'O, , GNYIS PA THUGS RDO RJE'I 'BRAS BU'I RNAL 'BYOR NI TING NGE 'DZIN TE, DE YANG SGOM @179 PA'I DUS NI RJES DRAN RDZOGS NAS BSGOMS TE, SAm PU tI LAS, BYANG SEMS SUM CU RTZA GNYIS KYIS, ,GANG TSE YONGS SU GANG GYUR PA, ,PHUNG PO DBANG PO 'BYUNG BA YI, , SANGS RGYAS DE YI DE MA THAG CES, YE SHES KYI RIM PAS LUS KYI RTZA SBUBS RNAMS KHAMS KYI DVANGS MAS KHENGS PA NA, GSANG RIM PHYAG RGYA LA BRTEN PA'I NYE RGYU BSGOMS PAS, PHUNG PO KHAMS DANG SKYE MCHED SGRIB BRAL DU GYUR PA'I PHYAG RGYA CHEN PO'I DNGOS GRUB THOB PAR BSHAD PA LTAR, 'DI YANG RJES DRAN GYI RNAL 'BYOR PA'I LUS KYI RTZA SBUBS THAMS CAD BYANG CHUB KYI SEMS DVANGS MAS KHENGS PA NA, KHAMS 'CHING BYED LAS KYI PHYAG RGYA LA BRTEN NAS TING NGE 'DZIN BSGOMS PAS MCHOG TU MI 'GYUR BA'I BDE BA THOB PAR 'GYUR BA'I PHYIR RO, ,SGOM TSUL NI, 'DIR LAS KYI PHYAG RGYA LA BRTEN NAS BSGOM STE, PHAG RGYA GZHAN GYIS LUS LA KHAMS 'CHING MI NUS PA'I PHYIR DANG, MA BCINGS PAR YANG KHAMS KYIS LUS 'BIGS PAR MI NUS LA, LUS MA PHUG PAR YANG MCHOG TU MI 'GYUR BA'I BDE BA MI BSKYED PA'I PHYIR RO, , DPER NA GSER 'GYUR GYIS LCAGS GSER DU SGYUR BAR BYED PA NA MES DNGUL CHU LCAGS LA MA BCING PAR YANG LCAGS LA 'BIGS PAR MI NUS LA, LCAGS DNGUL CHUS MA PHUG PAR YANG GSER DU MI 'GYUR BA BZHIN NO, ,DE SKAD DU YANG SGRUB LE LAS, ME NI DNGUL CHU'I SGRA NYID YIN TE ME DANG RNAM PAR BRAL NA NAM YANG DNGUL CHUS 'CHING BA MED, ,MA BCINGS NA NI GSER BYED MED DE GSER DANG BRAL NA SMRA PO RNAMS LA LONGS SPYOD MED PA NYID, ,DE BZHIN BUD MED SBYOR BA BRAL @180 NA RTAG TU RNAL 'BYOR PA RNAMS SEMS NI 'CHING MI 'GYUR, ,BCINGS PA MED NA LUS 'BIGS MED DE MA PHUG LUS KYIS 'DIR NI LHAN SKYES BDE BA STER BA MIN, , ZHES BSHAD DO, ,DE BAS JI LTAR MES DNGUL CHU BCINGS PAS LCAGS KYI DRI MA RNAMS ZOS NAS GSER DU BYED PA BZHIN DU PHYAG RGYA DANG SNYOMS PAR ZHUGS PA LAS KHAMS LUS LA 'CHING BAR BYED LA, BCINGS PA LAS LUS KYI DRI MA RNAMS KHAMS KYIS PHUG NAS SHA RUS CHU RGYUS LA SOGS PA LUS KYI CHA THAMS CAD LA KHAMS KYI DVANGS MAS KHYAB NAS MCHOG TU MI 'GYUR BA'I BDE BA SKYED PAR 'GYUR RO, ,DE SKAD DU YANG 'GREL PAR, JI LTAR MES DNGUL CHU BCINGS PAS LCAGS THAMS CAD GSER DU BYED DO, ,DE BZHIN DU CHOS 'BYUNG GI SBYOR BAS BYANG CHUB KYI SEMS BCINGS PAS PHUNG PO DANG KHAMS DANG SKYE MCHED LA SOGS PA SGRIB PA MED PAR BYED DO, ,DE'I PHYIR DNGUL CHU DANG BYANG CHUB KYI SEMS DAG GI MTHU NI BRTAG PAR BYA BA MA YIN TE, RMONGS PA RNAMS KYIS RNAM PAR DPYAD PAR BYA BAR MI NUS SO, ,DE'I PHYIR BYANG CHUB KYI SEMS BRTAN PAR BYED PA'I DON DU LAS KYI PHYAG RGYA'I SBYOR BA LA YANG LHA'I DMIGS PA RAB TU GSUNGS PA NI, DNGUL CHU'I BDUG PA DANG, BKOL BA LA SOGS PA LTA BU STE, PHYUGS KYI LAS SAD PAR RAB TU BZHUGS PA'I BYANG CHUB KYI SEMS BZA' BA NI DE BZHIN GSHEGS PAS GSUNGS PA MA YIN NO, ,ZHES BSHAD DO; ;DE BAS NA RJES DRAN GYI SKABS SU PHYAG RGYA BSTEN PA NI KHAMS SPYI BO NAS 'BEBS PA'I DON DU YIN LA, TING NGE 'DZIN GYI SKABS SU NI KHAMS 'CHING BA'I DON DU PHYAG @181 RGYA BSTEN PA YIN NO, ,JI SRID MCHOG TU MI 'GYUR BA'I BDE BA MA THOB PA DE SRID DU NI TING NGE 'DZIN STOBS CHUNG BA'I PHYIR RO, ,STONG PA NYID KYI GZUGS LA DMIGS TE BSGOMS PAS KHAMS 'CHING MI NUS LA, GANG GI TSE MCHOG TU MI 'GYUR BA'I BDE BA THOB PA'I PHYIR TING NGE 'DZIN STOBS DANG LDAN PAS PHYAG RGYA CHEN PO LA DMIGS TE BSGOMS PA NYID KYIS KHAMS 'CHING MI NUS PA'I PHYIR, LAS KYI PHYAG RGYA SPANGS TE, BYANG CHUB KYI MTHAR THUG PAR PHYAG RGYA CHEN PO 'BA' ZHIG BSGOM PAR BSHAD DE, MCHOG MI 'GYUR GYI 'GREL PAR, BCOM LDAN 'DAS KYIS NGES PA 'DI'I PHYIR, DBANG PO GNYIS KYI SNYOMS PAR 'JUG PAS KYANG PHYI ROL GYI DBANG PO LAS SKYES PAR 'GYUR BA'I BDE BA RNAM PAR SPANGS NAS, BYANG CHUB KYI SEMS MTHAR THUG PA'I BAR DU PHYAG RGYA CHEN PO RANG GI SEMS KYI SNANG BA TZAM 'DI RNAL 'BYOR PAS BSGOM PAR BYA'O, ,ZHES BSHAD DO, , TING NGE 'DZIN GYI NGO BO NI, GONG DU BSHAD PA'I TSUL DE LTAR BSGOMS PAS LUS LA BCINGS PA'I KHAMS KYI DVANGS MAS LUS PHUG STE, TSOR BA SDUG BSNGAL BSKYED PA'I LUS KYI DRI MA RNAMS ZAD PA LAS BYUNG BA MCHOG TU MI 'GYUR BA'I BDE BA LAS SKYES PA'I TING NGE 'DZIN RNAM PA THAMS CAD KYI GZUGS PRA PHAB PA'I RNAM PA CAN GYI GZUNG BA'I SEMS DANG DER SNANG BA'I 'DZIN PA'I SEMS GNYIS SU SNANG BA MED PA DBYER MED GCIG TU 'DRES PA GNYIS SU MED PA'I YE SHES NI TING NGE 'DZIN GYI NGO BO YIN NO, ,DE SKAD DU SGRUB LER, SHES RAB THABS KYI BDAG NYID @182 KYIS NI 'GYUR MED BDE BA'I DBANG GIS YE SHES GZUGS LA TING NGE 'DZIN, , ZHES BSHAD DO, ,'DIR KHAMS DANG MI 'GYUR BA'I BDE BA DANG DE LAS SKYES PA'I TING NGE 'DZIN RNAMS NI NGO BO DANG BYED LAS THA DAD PA YIN TE LUS LA BCINGS PA'I KHAMS KYI DVANGS MAS RLUNG MKHRIS BAD KAN LA SOGS PA SDUG BSNGAL BSKYED PA'I LUS KYI DRI MA RNAMS BSAL NAS LUS KYI GNAS SKABS TSOR BA BDE BA 'BA' ZHIG SKYED BYED DU RO GCIG PAR BYED DO; ;DE LAS SKYES PA'I LUS KYI TSOR BA BDE BA NI MCHOG TU MI 'GYUR BA'I BDE BA ZHES BYA STE, DE NI GONG DU BSHAD PA'I TING NGE 'DZIN GYI NGO BO SKYED BYED YIN NO, ,DE LAS SKYES PA'I TING NGE 'DZIN GNYIS SU MED PA'I YE SHES NI, RGYU'I MING GIS 'BRAS BU LA BTAGS NAS MCHOG TU MI 'GYUR BA'I BDE BA ZHES BYA LA, DE NYID NI SGRIB PA MA LUS PAR SPONG BYED KYI DNGOS GNYEN YIN TE, DE SKAD DU YANG, YE SHES LE'U LAS, SEMS KYI SNANG BA TZAM STE RANG GI YID LA SKYES PAS ME LONG GI NI GZUGS BRNYAN LTA BU NYID, ,GANG ZHIG MTHA' DAG RGYAL BA'I SRAS DANG SANGS RGYAS RNAMS KYIS BSTEN PA RNAL 'BYOR DBANG POS BSTEN BYA STE, ,YE SHES ME LCE RAB TU RGYAS PA DE NI BDUD DPUNG YUL DANG BCAS PA MTHA' DAG SREG BYED CING, ,LUS LA CHAGS PA LA SOGS SPANGS STE RNAL 'BYOR RNAMS LA LO YI SBYOR BAS BDE MNYAM STER BAR BYED, ,CES BSHAD DO, , DE NI SHES RAB KYI PHA ROL TU PHYIN PA DANG PHYAG RGYA CHEN PO DANG DON DAM SHES RAB YE SHES DANG DBANG BZHI PA ZHES KYANG BYA'O, ,DE NYID PHUNG PO KHAMS DANG @183 SKYE MCHED SGRIB PA MED PAR BYED PA'I GNYEN PO YIN GYI LUS LA BCINGS PA'I KHAMS KYI DVANGS MA NI, JI SKAD BSHAD PA'I TSUL GYIS LUS KYI DRI MA SEL BA DANG, MI 'GYUR BA'I BDE BA SKYED BYED TZAM YIN GYI, LUS KYI BEM PO'I KHAMS MED PAR BYED PA DANG, SEMS KYI DRI MA SEL BAR BYED PA MA YI TE, DPER NA GSER 'GYUR GYI DNGUL CHUS LCAGS KYI DRI MA BSAL NAS GSER DU BYED KYI, BEM PO'I KHAMS MED PAR BYED PA MA YIN PA BZHIN NO, , DE BAS NA GANG DAG KHAMS LUS LA BCINGS PAS LUS THOGS PA MED PA'I SGYU LUS DANG, SEMS SGRIB BRAL DU BYED PAR 'DOD PA NI MI RIGS TE, BEM POS SEMS KYI SGRIB PA SPONG BA MI SRID PA'I PHYIR RO, ,SGRA DON NI, GNYIS SU MED PA'I DE KHO NA NYID LA RTZE GCIG TU GNAS PA'I PHYIR TING NGE 'DZIN ZHES BYA'O, ,THOB PA'I DUS NI, GANG GI TSE RDO RJE NOR BU'I RTZE MOR KHAMS KYI DVANGS MA MCHING STE, RLUNG NYI KHRI CHIG STONG DRUG BRGYA LAS GCIG 'GAGS SHING MCHOG DU MI 'GYUR BA'I BDE BA SKAD CIG MA GCIG THOB PA'O, ,MTHAR PHYIN PA'I TSAD NI, RLUNG NYI KHRI CHIG STONG DRUG BRGYA 'GAGS TE, MCHOG TU MI 'GYUR BA'I BDE BA SKAD CIG DE SNYED CIG THOB PA'O, ,PHAN YON NI, TING NGE 'DZIN THOB NAS BRTZON 'GRUS DRAG POS BAR MA CHAD DU LO GSUM PHYOGS GSUM DU BSGOMS NA DBANG BCU LA SOGS PA'I YON TAN DANG LDAN PA'I PHYIR MI LDOG PA'I SA LA GNAS PA'I BYANG CHUB SEMS DPAR 'GYUR TE; SGRUB LER, DE NAS TING NGE 'DZIN GYIS DAG PA NYIN ZHAG 'GA' ZHIG RNAMS KYI @184 YE SHES SKU NI 'GRUB PAR 'GYUR, ,ZHES DANG, DE'I 'GREL PAR, DE'I PHYIR TING NGE 'DZIN GYIS DAG PA DRI MA MED PAR GYUR PA NI NYIN ZHAG 'GA' ZHIG RNAMS KYI STE, , LO GSUM DANG PHYOGS GSUM GYI NYIN ZHAG RNAMS KYIS YE SHES SKU NI 'GRUB PAR 'GYUR, ,ZHES PA DBANG BCU LA SOGS PA THOB PA'I BYANG CHUB SEMS DPAR 'GYUR TE ZHES BSHAD DO, ,CI'I PHYIR RJES DRAN DANG TING NGE 'DZIN LA THUGS RDO RJE'I RNAL 'BYOR ZHES BYA ZHE NA, RNAL 'BYOR 'DI GNYIS NI MCHOG TU MI 'GYUR BA'I BDE BA'I YE SHES SGRUB BYED YIN, LAM GYI DUS SU YE SHES DE NYID GOMS PA MTHAR PHYIN PA LAS SEMS SGRIB PA MA LUS PAR SPANGS PAS 'BRAS BU'I DUS SU SGRIB PA THAMS CAD BRAL BA'I BDE BA CHEN PO'I RANG BZHIN THUGS RDO RJE MNGON DU BYED PA'I PHYIR, RJES DRAN DANG TING NGE 'DZIN LA THUGS RDO RJE'I RNAL 'BYOR ZHES BYA'O, ,SBYOR BA YAN LAG DRUG PO 'DI DAG KYANG 'JIG RTEN DANG 'JIG RTEN LAS 'DAS PA'I LAM GYI NGO BO NYID KYI LAM BDEN GYIS 'DUS PA YIN LA, DE'I PHYIR 'BRAS BU'I DUS SU 'DI DAG GI YON TAN YAR LDAN DU YOD KYANG RDZAS MA LUS PA 'GOG MOD, DE LTAR NA'ANG MI MKHAS PA KHA CIG YAN LAG DRUG PO 'DI DAG KYANG RTAG BRTAN DU 'DOD CES GRAGS TE GNAS MA YIN PA LA YANG LOG PAR RTOG PA 'CHA' BAR BYED PA'I RMONGS PA DE LTA BU NI MKHAS PA'I DGAG SGRUB KYI YUL MA YIN NO, , 'DIR SMRAS PA, GANG GIS BYIS PA BYIS NYID RIG ,DES NA BYIS PA MKHAS PA YIN, ,BYIS PA MKHAS PAR MNGON RLOM PA, ,DE NI SHIN TU BYIS PA NYID, , @185 SPYI DON GNYIS PA THUN MONG DU GTAN LA DBAB PA LA GNYIS, DBYE BA DANG, BSDU BA'O, ,DANG PO LA GSUM, LAM LNGAR DBYE BA DANG, SPYAN LNGAR DBYE BA DANG, SA BCU GNYIS SU DBYE BA'O, ,DANG PO NI, RDO RJE THEG PAR ZHUGS PA'I RNAL 'BYOR PAS THUN MONG GI LAM GYIS RGYUD SBYANGS PA NAS BZUNG STE, BSKYED RIM MTHAR PHYIN PA'I BAR GYI SGO GSUM GYI DGE BA RNAMS NI BSOD NAMS KYI TSOGS KYI NGO BO RGYUD SMIN BYED YIN PAS TSOGS KYI LAM MO, ,DE'I 'OG TU GROL LAM YAN LAG DRUG GI YAN LAG DANG PO LNGA NI, 'JIG RTEN LAS 'DAS PA'I LAM MCHOG TU MI 'GYUR BA'I BDE BA THOB PA'I PHYIR ZHUGS PA'I LAM YIN PAS SBYOR BA'I LAM MO, ,DE LA YANG SOR BSDUD NI DROD KYI NGO BO YIN TE, RANG BZHIN 'OD GSAL GYI DE KHO NA NYID LA GSAL SNANG DANG POR THOB PA'I TING NGE 'DZIN YIN PA'I PHYIR RO, ,BSAM GTAN NI RTZE MO'I NGO BO YIN TE, 'OD GSAL GYI TING NGE 'DZIN LA SNANG BA MCHED PA'I TING NGE 'DZIN YIN PA'I PHYIR RO, ,SROG RTZOL DANG 'DZIN PA NI BZOD PA'I NGO BO YIN TE, NGAN 'GROR 'PHEN BYED MI DGE BA'I RNAM PAR RTOG PA'I RGYU G-YAS G-YON GYI SROG RLUNG MA LUS PA 'GOG PAS NGAN 'GRO MED PA'I CHOS MCHOG CHEN PO LA BZOD PA'I LAM YIN PA'I PHYIR RO, ,RJES DRAN NI, CHOS MCHOG GI NGO BO YIN TE, MTHONG LAM MCHOG TU MI 'GYUR BA'I BDE BA SKAD CIG MA DANG PO'I NYE RGYU BAR CHAD MED PA'I LAM YIN PA'I PHYIR RO, ,DE'I 'OG TU YAN LAG DRUG PA TING NGE 'DZIN GYI NGO BO NI, 'JIG RTEN LAS 'DAS PA'I LAM DNGOS MCHOG TU MI 'GYUR BA'I BDE BA NYI KHRI @186 CHIG STONG DRUG BRGYA'I NGO BO YIN LA, DE LA MTHONG BA DANG, BSGOM PA'I LAM GNYIS SU DBYE STE, GANG GI TSE MCHOG TU MI 'GYUR BA'I BDE BA SKAD CIG MA DANG PO THOB PA'I MNYAM GZHAG SKAD CIG MA DANG PO DE NI MTHONG LAM YIN TE, DON DAM PA'I BDEN PA GNYIS SU MED PA'I DE KHO NA NYID RANG RIG PA'I TSUL GYIS SNGAR MA MTHONG BA GSAR DU MTHONG BA'I PHYIR RO, ,RJES DRAN MAN CHAD DU GNYIS MED KYI DON DAM PA'I BDEN PA MNGON SUM DU MTHONG BA MA YIN TE, GZUNG 'DZIN GNYIS SU SNANG BA YOD PA'I PHYIR RO, ,MTHONG LAM GYI 'OG TU 'BYUNG BA'I MCHOG TU MI 'GYUR BA'I BDE BA'I SKAD CIG MA JI SNYED PA RNAMS NI SGOM PA'I LAM YIN TE, DON DAM GNYIS MED KYI DE KHO NA NYID MTHONG ZIN GOMS PAR BYED PA'I PHYIR RO, , GNAS SKABS 'DI DAG TU YANG PHYAG RGYA CHEN MO RNAM PA THAMS CAD KYI GZUGS PRA PHAB PA LTA BU'I SNANG BA YOD MOD, SNANG MKHAN MCHOG TU MI 'GYUR BA'I TING NGE 'DZIN DANG DBYER MED PAR SNANG BA'I PHYIR GNYIS SU MED PA'I YE SHES ZHES BYA'O, ,LAM DUS KYI MCHOG TU MI 'GYUR BA'I BDE BA MTHAR PHYIN PA LAS BYUNG BA 'BRAS DUS KYI MCHOG TU MI 'GYUR BA'I BDE BA NI, SLOB PA MTHAR PHYIN PA'I PHYIR MI SLOB PA'I LAM YANG YIN LA, SGRIB PA THAMS CAD DANG BRAL BA'I DBYINGS RNAM PAR DAG PA'I NGO BO YIN PAS 'GOG BDEN YANG YIN PA'I PHYIR 'GOG LAM DBYER MED PA YIN, GNYIS PA SPYAN LNGAR DBYE BA NI, SOR BSDUD KYI SKABS SU MNGON SHES MED PA RNAM PA THAMS CAD KYI STONG PA NYID KYI GZUGS SHA'I MIG GIS MTHONG @187 BA'I PHYIR, SO SOR BSDUD PA NI SHA'I SPYAN NO, ,BSAM GTAN DANG SROG RTZOL 'DZIN PA RJES DRAN RNAMS KYI SKABS SU MNGON SHES THOB PAS LHA'I MIG GIS MTHONG BA'I PHYIR BZHI PO DE NI LHA'I SPYAN NO, ,TING NGE 'DZIN GYI SKABS SU MCHOG TU MI 'GYUR BA'I BDE BA THOB STE 'DZAG BDE'I CHAGS PA DANG BRAL BA'I PHYIR SANGS RGYAS KYI SPYAN GYIS GZIGS PA'I PHYIR SANGS RGYAS KYI SPYAN NO, ,SA BRGYAD PA YAN CHAD DU DBANG BCU LA SOGS PA'I PHYIR MI LDOG PA'I BYANG SEMS KYI YON TAN DANG LDAN PA 'I PHYIR SHES RAB KYI SPYAN GYIS GZIGS PAS SHES RAB KYI SPYAN NO, ,SANGS RGYAS KYI SAR YE SHES KYI SPYAN GYIS GZIGS PAS YE SHES KYI SPYAN NO, ,DE LTAR YANG SGRUB LE'I 'GREL PAR, 'DIR DANG POR LAS DANG PO PA'I RNAL 'BYOR PAS MNGON SHES MED PAR SHA'I MIG GIS SNA TSOGS MTHONG NGO, ,DE NAS MNGON PAR SHES PA'I MTSAMS KYI DBANG GIS LHA'I MIG GIS MTHONG NGO, ,DE NAS CHAGS PA DANG BRAL BA'I MTSAMS KYI DBANG GIS SANGS RGYAS KYI SPYAN GYIS GZIGS SO, ,DE NAS BYANG CHUB SEMS DPA'I MTSAMS KYI DBANG GIS SHES RAB KYI SPYAN GYIS GZIGS SO, ,DE NAS YANG DAG PAR RDZOGS PA'I SANGS RGYAS KYI MTSAMS KYI THUGS KYI DBANG GIS YE SHES KYI SPYAN GYIS GZIGS TE LHAG MA KUN LAS RNAM GROL ZHING, ZHES BSHAD DO, ,GSUM PA SA BCU GNYIS SU DBYE BA NI, TSOGS LAM LAS DANG PO'I SA DANG, SBYOR LAM MOS SPYOD KYI SA GNYIS NI, 'JIG RTEN PA'I LAM YIN PA'I PHYIR 'DIR MA BSDUS LA; 'JIG RTEN LAS 'DAS PA'I LAM LA SA BCU GNYIS SU DBYE BA NI, GANG GI TSE @188 NOR BU'I RTZE MO NAS GSANG GNAS KYI PHYED KYI BAR KHAMS KYI DVANGS MAS KHENGS SHING RLUNG STONG BRGYAD BRGYA 'GAGS, MCHOG TU MI 'GYUR BA'I BDE BA SKAD CIG DE SNYED CIG THOB PA NA SA DANG PO KUN TU 'OD NYI MA'I DKYIL 'KHOR CHEN PO MDZES PA'I SA THOB, DE'I 'OG TU GSANG NAS MAN CHAD KHAMS DVANGS MAS KHENGS SHING RLUNG DE SNYED CIG 'GAGS, MI 'GYUR BA'I BDE BA DE SNYED CIG THOB PA NA SA GNYIS PA BDUD RTZI'I 'OD ZLA BA CHEN PO 'OD GSAL BA'I SA THOB, DE'I 'OG TU LTE BA'I PHYED MAN CHAD DVANGS MAS KHENGS, RLUNG DE SNYED CIG 'GAGS, MI 'GYUR BA'I BDE BA DE SNYED CIG THOB PA NA SA GSUM PA NAM MKHA'I 'OD NAM MKHA' LTAR RAB TU GNAS PA'I SA THOB, DE'I 'OG TU LTE BA MAN CHAD DVANGS MAS KHENGS RLUNG DE SNYED CIG 'GAGS, MI 'GYUR BA'I BDE BA DE SNYED CIG THOB PA NA, SA BZHI PA RDO RJE'I 'OD YID DGA' BA'I SA THOB, DE'I 'OG TU SNYING KHA MAN CHAD DVANGS MAS KHENGS SHING RLUNG DE SNYED CIG 'GAGS, MI 'GYUR BA'I BDE BA DE SNYED CIG THOB PA NA SA LNGA PA RIN CHEN 'OD MNGON PAR DBANG BSKUR BA LA GNAS PA'I SA THOB, DE'I 'OG TU SNYING KHA MAN CHAD DVANGS MAS KHENGS SHING RLUNG DE SNYED CIG 'GAGS, MI 'GYUR BA'I BDE BA DE SNYED CIG THOB PA NA SA DRUG PA PAD MA'I 'OD ZER RANG BZHIN GYIS DAG PA'I CHOS DRI MA MED PA YONGS SU 'DZIN PA'I SA THOB, DE'I 'OG TU MGRIN PA'I PHYED MAN CHAD DVANGS MAS KHENGS SHING RLUNG DE SNYED CIG 'GAGS, MI 'GYUR BA'I BDE BA DE SNYED CIG THOB PA NA, SA BDUN PA SANGS RGYAS KYI LAS BYED PA'I SA @189 THOB, DE'I 'OG TU MGRIN PA MAN CHAD DVANGS MAS KHENGS SHING RLUNG DE SNYED CIG 'GAGS, MI 'GYUR BA'I BDE BA DE SNYED CIG THOB PA NA SA BRGYAD PA DPE MED PA'I SA THOB, DE'I 'OG TU SMIN MTSAMS MAN CHAD DVANGS MAS KHENGS SHING RLUNG DE SNYED CIG 'GAGS, MI 'GYUR BA'I BDE BA DE SNYED CIG THOB PA NA SA DGU PA DPE THAMS CAD KYI DPE RAB RTOGS PA'I SA THOB, DE'I 'OG TU SMIN MTSAMS MAN CHAD DVANGS MAS KHENGS SHING RLUNG DE SNYED CIG 'GAGS, MI 'GYUR BA'I BDE BA DE SNYED CIG THOB PA NA SA BCU PA SHES RAB KYI 'OD BLA NA MED PA'I SA THOB, DE'I 'OG TU GTZUG TOR GYI PHYED MAN CHAD DVANGS MAS KHENGS SHING RLUNG DE SNYED CIG 'GAGS, MI 'GYUR BA'I BDE BA DE SNYED CIG THOB PA NA SA BCU GCIG PA THAMS CAD MKHYEN PA NYID 'OD GSAL BA CHEN PO'I SA THOB, DE'I 'OG TU GTZUG TOR MAN CHAD DVANGS MAS KHENGS SHING RLUNG DE SNYED CIG 'GAGS, MI 'GYUR BA'I BDE BA DE SNYED CIG THOB PA NA, SA BCU GNYIS PA SO SO'I BDAG NYID RIG PA RNAL 'BYOR PA'I YE SHES RDZOGS PAR BYED PA'I SA THOB BO, ,DE SKAD DU YANG, 'GREL PA'I SKABS GZHAN DU, GSANG GNAS DANG, LTE BA DANG, SNYING KHA DANG, MGRIN PA DANG, SMIN MTSAMS DANG, GTZUG TOR GYI 'KHOR LO RNAMS DVANGS MAS RIM GYIS GANG BA NA, GO RIM BZHIN DU SA GNYIS DANG, BZHI DANG, DRUG DANG, BRGYAD DANG, BCU DANG, BCU GNYIS RNAMS THOB PAR BSHAD CING, MCHOG MI 'GYUR GYI 'GREL PAR YANG SHES RAB KYI CHAGS PA LAS BYUNG BA MI 'GYUR BA'I BDE BA CHEN PO'I SKAD CIG RNAMS KYIS DE @190 BZHIN GSHEGS PA'I SA 'DI RNAMS THOB STE, MI 'PHO BA'I SKAD CIG BRGYA PHRAG BCO BRGYAD THOB PAS SA DANG PO THOB BO, ,GRANGS 'DI SA BCU GNYIS KYI MTHAR THUG PA'O, ,MI 'GYUR BA'I SKAD CIG NYI KHRI CHIG STONG DRUG BRGYA RNAMS KYIS SA BCU GNYIS THOB STE, YAN LAG BCU GNYIS 'GAGS 'GYUR RO, ,ZHES BSHAD CING, SA BCU GNYIS PO 'DI RNAMS KYI MING GI THA SNYAD, RDO RJE SNYING PO RGYAN GYI RGYUD LAS, DE NYID BCOM LDAN RNAL 'BYOR STE, ,BYANG CHUB SEMS NI 'OD GSAL BA, ,KUN TU 'OD KYI SA CHEN PO, ,NYI MA'I DKYIL 'KHOR GZI BRJID LTAR, ,GNYIS PA BDUD RTZI 'OD CES PA, ,SHIN TU 'OD BZANG ZLA BA 'DRA, ,GSUM PA NAM MKHA' 'OD CES PA, , MKHA' BZHIN LEGS PAR RAB TU GNAS, ,SA BZHI PA NI GANG YIN DE, ,RDO RJE 'OD MTHA' YID DU 'ONG, ,BSAM PA BRTAN PA'I SBYOR BA YIS, ,RDO RJE ZHES NI RAB TU GRAGS, ,LNGA PA RIN CHEN 'OD CES BYA, ,DBANG BSKUR BA LA RAB TU GNAS, ,DRUG PA PAD MO 'CHANG ZHES BYA, ,PAD BZHIN RAB TU RNAM PAR SNANG, ,RANG BZHIN DAG PA'I CHOS NYID DE, ,DRI MA MED CING YONGS BZUNG MED, ,BDUN PA LAS KYI 'OD CES BYA, ,SANGS RGYAS PHRIN LAS BYED PAR 'DOD, ,BRGYAD PA DPE MED PA ZHES BYA, , 'DI LA DPE NI YOD MA YIN, ,DGU PA DPE BRAL ZHES BYA STE, ,THAMS CAD DPE NI SO SOR RTOGS, ,BCU PA SHES RAB 'OD CES BYA, ,SANGS RGYAS SA NI BLA NA MED, , BCU GCIG THAMS CAD MKHYEN ZHES BYA, ,SA CHEN PO NI 'OD GSAL BA, ,BCU GNYIS SO SO'I BDAG NYID RIG ,RNAL 'BYOR YE SHES RAB RDZOGS PA, ,SA CHEN PO @191 NI 'DI DAG LDAN, ,SANGS RGYAS RNAMS NI DON DAM LAS, ,SANGS RGYAS RNAMS DANG SANGS RGYAS CHOS, ,RNAL 'BYOR PA DANG YE SHES SPYOD, ,CES GSUNGS PA DANG MTHUN PAR 'GREL PAR YANG BSHAD DO, ,'DIR DVANGS MAS LUS KHENGS ZHES PA'I DON NI DPER NA GSER 'GYUR GYI DNGUL CHU LCAGS LA BSKUS TE DANG POR MES BSREGS TE MI G-YO BAR BCINGS, DE'I 'OG TU LCAGS BSKOL BA NA LCAGS DANG DNGUL CHU DBYER MED DU 'DRES TE LCAGS KYI DRI MA DANG DNGUL CHU'I SNGAR GYI GNAS SKABS GNYIS KA 'GAGS TE GSER DU 'GYUR BA LTAR, PHYAG RGYA LA BSTEN NAS KHAMS LUS LA BCINGS PA NA DVANGS MA DANG LUS KYI SHA RUS SOGS DBYER MED DU 'DRES NAS SDUG BSNGAL BSKYED PA'I SNGAR GYI LUS KYI GNAS SKABS DANG, DVANGS MA'I GNAS SKABS GNYIS KA 'GAGS NAS TSOR BA BDE BA'I RGYUR RO GCIG PA TZAM YIN GYI, SANGS RGYAS KYI SA MA THOB KYI BAR DU BEM PO'I KHAMS MED PAR 'GYUR BA NI MA YIN NO, ,DE SKAD DU YANG, MCHOG MI 'GYUR GYI 'GREL PAR, GANG GI TSE LCAGS BSKOL BA RNAMS DNGUL CHU DANG LHAN CIG TU GYUR PA DE'I TSE, DNGUL CHUS PHUG PA'I LCAGS RNAMS DRI MA MED PAR 'GYUR GYI BEM PO'I KHAMS MED PA NI MA YIN PA BZHIN NO, ,PHAN TSUN YANG DAG PAR LDAN PA DE'I PHYIR, KHAMS RNAMS NI KHAMS NYID DU MED CING, DNGUL CHU YANG DNGUL CHU NYID DU MED DE, SNGAR GYI RANG BZHIN YONGS SU BTANG BA'I PHYIR RO, ,DE BZHIN DU SEMS DANG LHAN CIG GCIG TU GYUR PA'I LUS KYI KHAMS RNAMS LA KHAMS NYID MED CING SEMS LA SEMS NYID @192 MED DE, SNGAR GYI 'KHOR BA'I BAG CHAGS MED PA'I PHYIR RO ZHES BSHAD DO, , SPYI DON GNYIS PA BSDU BA LA GNYIS KYI, SKU RDO RJE LA SOGS PA'I SGRUB THOB KYI DBANG DU BYAS TE RDO RJE GSUM DU BSDU BA NI SOR SDUD BSAM GTAN NI SKU RDO RJE SGRUB BYED KYI RNAL 'BYOR YIN PA'I PHYIR SKU RDO RJE'O, ,SROG RTZOL 'DZIN PA GNYIS NI, GSUNG RDO RJE SGRUB BYED KYI RNAL 'BYOR YIN PA'I PHYIR GSUNG RDO RJE'O, ,RJES DRAN DANG TING NGE 'DZIN GNYIS NI, THUGS RDO RJE SGRUB BYED KYI RNAL 'BYOR YIN PA'I PHYIR THUGS RDO RJE'O, ,YE SHES KYI SKU SGRUB THABS KYI DBANG DU BYAS NA BSNYEN SGRUB BZHIR DBYE BA NI, SOR SDUD BSAM GTAN GNYIS NI BSNYEN PA'I YAN LAG GO ,SROG RTZOL 'DZIN PA GNYIS NI NYE BAR SGRUB PA CHEN PO'O, ,DE SKAD DU YANG SGRUB LER, BSNYEN PA LA NI DANG PO'I RNAL 'BYOR RNAM BCU MKHA' LA 'KHOR LO CAN GYI KHRO BO'I LTA BAS SO; ;BGEGS MTHAR BYED PA'I LTA BA BDUD RTZI'I LAM DU SON PA YIS KYANG NYE BA'I SGRUB PA YAN LAG DRUG ,SHES RAB LA SPROS ZLA BA THIG LE RDO RJE NOR BUR GNAS PA'I 'GYUR MED GSUM NI SGRUB PA LA, ,BDE BA MA NYAMS GCIG PU ZHI BA LHAN SKYES YE SHES RNAL 'BYOR 'DI NI SGRUB PA CHEN PO LA, ,ZHES BSHAD DO, ,THABS KYI RGYUD BSHAD ZIN TO, , DA NI 'BRAS BU'I RGYUD BSHAD PAR BYA'O, ,'BRAS BU'I RGYUD NI SGRIB PA THAMS CAD DANG BRAL BA'I RDO RJE'I SKU YIN LA, DE YANG GANG LA BRTEN NAS THOB PA'I RGYU @193 DANG, GANG GI TSE THOB PA'I DUS DANG, THOB PA'I NGO BO GANG YIN PA DANG, SKU DANG YON TAN GYI DBYE BA DANG, DUS JI SRID DU BZHUGS TSUL RNAMS KYIS SHES PAR BYA'O, ,DE LA GANG LA BRTEN NAS THOB PA'I RGYU NI, BSOD NAMS DANG YE SHES KYI TSOGS GNYIS YIN TE, MCHOG MI 'GYUR GYI 'GREL PAR, BSOD NAMS LDAN PA BSOD NAMS TSOGS, ,YE SHES YE SHES 'BYUNG GNAS CHE, ,YE SHES LDAN PA YOD MI SHES, ,TSOGS GNYIS TSOGS NI BSAG PA PO, ,ZHES PA STE, BCOM LDAN 'DAS KYIS GSUNGS PA DE'I PHYIR, BSOD NAMS DANG YE SHES KYIS DMAN PA NI, RNAM PAR RTOG PA'I GZUGS BSGOM PA GOMS PA'I DBANG GIS SANGS RGYAS SU MI 'GYUR RO, ,ZHES TSOGS GNYIS KYIS DMAN PAS SANGS RGYAS MI 'GRUB PAR BSHAD PA'I PHYIR RO, ,TSOGS GNYIS NI, SEMS CAN LA PHAN PA LAS MA GTOGS PA'I BSOD NAMS KYI TSOGS DANG, MCHOG TU MI 'GYUR BA'I BDE BA LAS MA GTOGS PA'I YE SHES KYI TSOGS MED DO, ,ZHES 'GREL PA'I SKABS GZHAN DU BSHAD PA'I PHYIR, BSOD NAMS KYI TSOGS NI BSAM PA PHUN TSOGS TSAD MED BZHI DANG, SBYOR BA PHUN TSOGS THUN MONG BA BSDU BA'I DNGOS PO BZHI DANG, THUN MONG MA YIN PA PHRIN LAS BZHI DANG, GRUB PA BRGYAD KYI SGO NAS SEMS CAN LA PHAN 'DOGS PA'O, ,YE SHES KYI TSOGS NI MCHOG TU MI 'GYUR BA'I BDE BA NYI KHRI CHIG STONG DRUG BRGYA YONGS SU RDZOGS PA'O, ,DE LTA BU'I TSOGS GNYIS LAS RDO RJE'I SKU 'KHRUNGS PA YIN GYI, RGYU RKYEN GYIS MA BSKYED PA'I RTAG PA RANG BYUNG GI SANGS RGYAS KYANG MA YIN LA, BSKYED @194 RIM SOGS BSOD NAMS KYI TSOGS KYI SPROS PA DOR NAS, RDZOGS RIM MI RTOG PA 'BA' ZHIG BSGOMS PA LAS BYUNG BA YANG MA YIN NO, ,'DIR PHYAG RGYA CHEN PO RNAM PA THAMS CAD KYI STONG PA NYID KYI GZUGS DANG, RDO RJE'I SKU SKYE 'JIGS MED PAR SKABS 'GAR BSHAD PA NI, LAM GYI SKABS SU STONG PA NYID KYI GZUGS RMI LAM DANG SGYU MA LA SOGS PA LTAR RANG BZHIN MED PAS, RANG GI MTSAN NYID KYIS GRUB PA'I SKYE 'JIG BDEN PA MED PA LA DGONGS SHING, 'BRAS BU'I SKABS SU RDO RJE'I SKU DE NYID 'KHOR BA JI SRID MA STONGS KYI BAR DU BZHUGS NAS 'KHOR BA'I GNAS LTAR RNAM PAR CHAD PA'I 'CHI 'PHO DANG, SKYE BA'I MTSAN NYID CAN GYI SKYE 'JIG MED PA DANG, SKYE BA DANG 'JIG PA'I RNAM PAR RTOG PA MA LUS PA SPANGS PA LA DGONGS NAS, SKYE 'JIG MED PAR BSTAN GYI, MU STEGS KYI BDAG LTAR RGYU RKYEN LAS MA SKYES PA'I RTAG BRTAN DU STON PA NI MA YIN NO, ,GANG GI TSE THOB PA'I DUS LA GNYIS TE, NANG GI DUS DANG, PHYI ROL GYI DUS SO, ,DE LA NANG GI DUS NI, GANG GI TSE GTZUG TOR MAN CHAD KHAMS KYI DVANGS MAS KHENGS SHING, RLUNG NYI KHRI CHIG STONG DRUG BRGYA MA LUS PAR 'GAGS, MCHOG TU MI 'GYUR BA'I BDE BA DE SNYED CIG YONGS SU RDZOGS PAR GYUR PA DE'I TSE RNAL 'BYOR PA SKAD CIG GCIG GIS MNGON PAR BYANG CHUB PA DANG, RNAM PAR NYI SHUS MNGON PAR BYANG CHUB PA DANG, SGYU 'PHRUL DRA BAS MNGON PAR BYANG CHUB PA STE, YE SHES LE'UR, ZLA BA NYI MA'I RGYU BA NYAMS SHING LAM NI GNYI KA YI YANG SROG GI RLUNG NI CHEN POR 'GAGS, ,CHU SKYES RDO RJE @195 RAB TU SAD CING RI BONG CAN ZHU NYI MA'I GZUGS CHEN LA NI RAB TU ZHUGS, ,DNGOS DANG DNGOS MED GCIG 'GYUR RNAM GSUM SRID PAR GNAS PA'I GZHOM MED LAGS PAR RAB TU RTOGS GYUR PA, ,DE YI DUS SU RNAL 'BYOR PA DE GANG LA GNYIS NI CUNG ZAD MED PA MCHOG GI GO 'PHANG 'GRO, ,ZHES BSHAD DO, , PHYI ROL GYI DUS NI, GANG GI TSE ZLA BA'I DKAR PHYOGS KYI TSES BCO LNGA RDZOGS SHING, NAG PHYOGS KYI TSES GCIG LA MA ZHUGS PA'I ZLA BA CHA BCU DRUG PA'I DUS THO RANGS SAM, NAM PHYED NI MCHOG THOB PA'I DUS YIN LA, DE'I TSE RIGS LNGA DANG YUM BZHI DANG, BYANG CHUB SEMS DPA' BRGYAD DANG, KHRO BO BCU LA SOGS PAS NAM MKHA'I KHAMS YONGS SU GANG STE, RNAL 'BYOR PA'I YON TAN GYI BSNGAGS PA BRJOD PA DANG, SA GZHI LA'ANG RIN PO CHE DANG ME TOG LA SOGS PA'I CHAR 'BAB PAR 'GYUR TE, YANG DE NYID LAS, KHRO BO SANGS RGYAS DANG BCAS NGES PAR RO YI RDO RJE RNAMS DANG SA YI SNYING PO SOGS, ,RAB TU DGA' BA'I THUGS RNAMS RNAL 'BYOR PA LA GRUB PA'I DUS SU NAM MKHA' LA NI MNGON SUM 'GYUR, ,DE YI 'DOD PA'I DNGOS GRUB RI BONG CAN GYI ZHAG GI THO RANGS DANG NI MTSAN MO PHYED LA 'GYUR, ,RIN PO CHE'AM ME TOG CHAR NI MCHOG GYUR DUS KYI SBYOR BAS SA YI STENG DU 'BAB PAR 'GYUR, ,ZHES BSHAD DO, , GSUM PA THOB PA'I NGO BO GANG YIN PA NI, GANG GI TSE RLUNG MA LUS PAR 'GAGS SHING MCHOG TU MI 'GYUR BA'I BDE BA MA LUS PA YONGS SU RDZOGS PA DE'I TSE, @196 RTEN 'BREL YAN LAG BCU GNYIS KYI RTZA BA, MA RIG PA'I NGO BO 'PHO BA'I BAG CHAGS DANG, GNAS SKABS RIGS BZHI'I SGRIB PA THAMS CAD SPANGS PAS GLO BUR DRI MAS BSDUS PA'I PHUNG PO KHAMS DANG SKYE MCHED MA LUS PA 'GAG SHING DRI MA DANG BCAS PA'I DE BZHIN NYID CHOS KYI DBYINGS SHIN TU RNAM PAR DAG PA'I NGO BOR GNAS GYUR PA RDO RJE DBYINGS KYI DKYIL 'KHOR CHEN PO NI, 'BRAS BU'I RGYUD RDO RJE'I SKU'I NGO BO YIN NO, ,DE LTAR YANG MCHOG MI 'GYUR GYI 'GREL PAR, 'DIR CHAGS PA NI SKYE BA'I DUS DANG, 'PHO BA NI 'GAG PA'I DUS TE, DE DAG SNYOMS PAR ZHUGS PA NI MI 'GYUR BA'I DUS SO, ,DE'I 'KHOR LO NI RDO RJE DBYINGS KYI DKYIL 'KHOR CHEN PO STE; PHUNG PO KHAMS DANG SKYE MCHED SGRIB PA MED PA NI RDO RJE DBYINGS KYI DKYIL 'KHOR CHEN PO ZHES BRJOD DO, ,ZHES BSHAD DO, ,RDO RJE'I SKU 'DI YANG KHYAD PAR GSUM DANG LDAN TE, SKU DANG GSUNG DANG THUGS KYI KHYAD PAR RO, ,DE LA SKU'I KHYAD PAR NI, SAD PA'I GNAS SKABS KYI SGRIB PA MA LUS PAR SPANGS PAS RDUL PHRA RAB KYI CHOS NYAMS SHING NAM MKHA' LTAR DVANGS SHING THOGS PA MED PA ME LONG LA PRA PHAB PA LTA BU'I MTSAN DANG DPE BYAD KYIS BRGYAN PA'I SKU MNGA' BA'O, ,GSUNG GI KHYAD PAR NI, RMI LAM GYI GNAS SKABS KYI SGRIB PA MA LUS PAR SPANGS PAS GDUL BYA'I BSAM PA JI LTA BA BZHIN DU RANG RANG GI SKAD KYIS CHOS STON PA GZHOM DU MED PA'I SGRA, SGRA BRNYAN LTA BU SANGS RGYAS KYI GSUNG RNAM PA THAMS CAD PA'O, ,THUGS KYI KHYAD PAR NI GNYIS TE, SHES BYA'I RNAM PA JI LTA BA MKHYEN PA DANG, ZAG PA MED @197 PA'I BDE BAS RGYUD YONGS SU GANG BA'O, ,DANG PO NI, SHIN TU GNYID LOG PA'I GNAS SKABS KYI SGRIB PA MA LUS PA SPANGS PAS, GLO BUR GYI DRI MAS BSDUS PA'I DUS GSUM DANG SRID PA GSUM 'GAGS KYANG DE DAG DANG CHA 'DRA BA'I SGRIB BRAL GYI DUS GSUM DANG SRID PA GSUM GYI SHES BYA'I RNAM PA ME LONG LA PRA PHAB PA LTA BU DANG, RMI LAM DANG SGYU MA LTA BU CIG CHAR MKHYEN PA'O, ,ZAG PA MED PA'I BDE BAS RGYUD GANG BA NI, BZHI PA'I GNAS SKABS KYI SGRUB PA MA LUS PAR SPANGS PAS, RANG GI PHYAG RGYA CHEN MO SGYU MA LTA BUS 'KHYUD PA LAS BYUNG BA'I MCHOG TU MI 'GYUR BA'I BDE BA CHEN PO LAS NAM YANG G-YO BA MED PA'O, ,DE SKAD DU'ANG YE SHES LE'UR, LUS NI DVANGS SHING RDUL PHRAN NYAMS PA NAM MKHA' DANG MTSUNGS MTSAN LA SOGS PA RNAMS KYIS RAB RDZOGS 'GYUR, ,SNA TSOGS 'JIG RTEN GSUM PA NYID NI DVANGS SHING SGRIB PA RNAM PAR BRAL BA RMI LAM BZHIN DU SNANG, ,SKAD NI KUN NAS CHAD PA MED CING DU MA'I SKAD GZHAN DAG GIS GZHAN GYI SNYING LA 'JUG PA STE, , SEMS NI DAM PA'I BDE BAS GANG ZHING MI G-YO THAMS CAD DUS SU LHAN CIG SKYES PAS 'KHYUD PA'O, ,ZHES BSHAD DO, ,BZHI PA SKU DANG YON TAN GYI DBYE BA LA GNYIS, SKU'I DBYE BA DANG, YON TAN GYI DBYE BA'O, ,DANG PO LA YANG GNYIS, RANG SNANG DON DAM PA'I SKU DANG, GZHAN SNANG KUN RDZOB BRDA'I SKU'O, ,DANG PO NI, GONG DU BSHAD PA'I RDO RJE'I SKU DE NYID LDOG PA'I CHAR PHYE NA SKU BZHIR 'GYUR TE, LHAN CIG SKYES PA'I SKU DANG, CHOS KYI SKU DANG, SPRUL PA'I SKU DANG, LONGS SPYOD RDZOGS PA'I SKU'O, , @198 DE DAG KYANG DANG PO NI, RANG DON PHUN SUM TSOGS PA YIN LA, PHYI MA GSUM NI GZHAN DON PHUN TSOGS SO, ,DE LA RANG DON LHAN CIG SKYES PA'I SKU NI, LTE BAR BZHI PA'I GNAS SKABS ZAD PA LAS BYUNG BA RGYU MTHUN GYI 'BRAS BU WAm YIG MCHOG TU MI 'GYUR BA'I BDE BA CHEN PO DANG, AE YIG RNAM PA THAMS CAD KYI STONG PA ZUNG DU CHUD PA'I RDO RJE SEMS DPA'O, ,GZHAN DON PHUN SUM TSOGS PA LA YANG GSUM STE, GANG GIS GZHAN DON BYED PA PO'I CHOS KYI SKU NI, DE YANG SNYING KHAR SHIN TU GNYID LOG PA'I GNAS SKABS ZAD PA LAS BYUNG BA RNAM SMIN GYI 'BRAS BU SHES BYA'I RNAM PA JI LTA BA DANG, JI SNYED PA MNGON SUM DU MKHYEN PA'I YE SHES SO, , GANG LA BRTEN NAS GZHAN DON BYED PA'I RTEN NI SPRUL PA'I SKU STE, DE YANG DPRAL BAR SAD PA'I GNAS SKABS LAS BYUNG BA DRI MA MED PA'I 'BRAS BU MTSAN BZANG PO SUM CU RTZA GNYIS DANG, DPE BYAD BZANG PO BRGYAD CUS BRGYAN PA'I SKU SNANG LA RANG BZHIN MED PA ME LONG GI NANG DU PRA PHAB PA LTA BU PHYIR MI LDOG PA'I BYANG CHUB SEMS DPA' RNAMS KYI LHA'I MIG KHO NA'I SPYOD YUL DU GYUR PA'O, ,THABS GANG GIS GZHAN DON BYED PA'I THABS NI, LONGS SPYOD RDZOGS PA'I SKU STE, DE YANG MGRIN PAR RMI LAM GYI GNAS SKABS ZAD PA LAS BYUNG BA SKYES BU BYED PA'I 'BRAS BU GDUL BYA'I BSAM PA DANG MTHUN PAR CHOS STON PA'I SANGS RGYAS KYI GSUNG RNAM PA THAMS CAD GZHOM DU MED PA'I SGRA BRNYAN LTA BU PHYIR MI LDOG PA'I BYANG CHUB SEMS DPA' RNAMS KYI LHA'I RNA BA KHO NA'I SPYOD YUL DU GYUR PA'O, ,DE DAG KYANG YE @199 SHES LE'UR, SHES RAB MA YIN THABS KYANG MIN PA 'DI NI LHAN CIG SKYES PA'I SKU STE CHOS KYI SKUR GYUR PA, ,SHES RAB THABS KYI RANG BZHIN NGES PAR MUN PA DANG BRAL YE SHES DANG NI RNAM SHES DBYE BA LAS, ,'DI NI LONGS SPYOD RDZOGS PA'I SKU STE SGRA BRNYAN LTA BU SEMS CAN DU MA'I DON NI BYED PA PO, ,SEMS CAN RNAMS NI SMIN PA'I SLAD DU SLAR YANG 'DI NI SANGS RGYAS RNAMS KYI SPRUL PA'I SKU RU 'GYUR, , ZHES BSHAD DO, , DE LA SKU DANG PO GNYIS NI, SANGS RGYAS RNAMS KYI SO SO RANG RIG PA'I SPYOD YUL YIN PAS, MTHAR PHYIN PA'I BYANG CHUB SEMS DPA' RNAMS KYI YANG SPYOD YUL YIN NO, ,SKU THA MA GNYIS NI, PHYIR MI LDOG PA'I BYANG CHUB SEMS DPA' RNAMS LA GZHAN RIG GI TSUL DU SNANG BA, SA BDUN PA MAN CHAD KYI GDUL BYA RNAMS KYI RNAM PA THAMS CAD DU SPYOD YUL YIN NO, ,DE LTA BU'I SKU BZHI'I BDAG NYID CAN GYI RDO RJE'I SKU DE YANG YE SHES DAM PA'I SPYOD YUL YIN PA'I PHYIR DON DAM PA YIN YANG, YOD PA DANG MED PA DANG RTAG PA DANG CHAD PA LA SOGS PA'I MTHA' THAMS CAD DANG BRAL BA YIN TE, DE SKAD DU YANG 'GREL PAR, YOD MIN MED MIN YOD MED MIN, ,GNYIS KA'I BDAG NYID MIN PA'ANG MIN, ,MTHA' BZHI LAS NI RNAM GROL BA, ,BDE BA SKU LA PHYAG 'TSAL LO, ,ZHES DANG, PHYAG RGYA CHEN PO MI 'GYUR BDE, ,GZUNG DANG 'DZIN PA DBYIBS DAG DANG, ,RTOG DANG BRJOD PA RNAM PAR SPANGS, ,DRI ZA'I GRONG KHYER RNAM PA DANG, ,PRA PHAB PA YI RANG BZHIN CAN, , @200 SHES RAB THABS KYI BDAG NYID SBYOR, ,AE WAm YI GE DE LA 'DUD,, PHRA RAB RDUL GYI CHOS NYID 'DAS, ,PRA PHAB PA YI RANG BZHIN CAN, ,RNAM PA KUN GYI MCHOG LDAN MA, , PHYAG RGYA CHEN MO DE LA 'DUD, ,CES SOGS KYIS LAN CIG MA YIN PAR RMI LAM DANG SGYU MA DANG DRI ZA'I GRONG KHYER DANG PRA PHAB PA LTA BUR RANG BZHIN MED PAR BSTAN PA'I PHYIR RO, ,DE LTA NA YANG GANG DAG DPE DE DAG GIS BSTAN PA'I RDO RJE'I SKU LA YANG, DON DAM PAR YOD PA DANG RTAG PA LA SOGS PA'I MTHAR ZHEN NAS RANG GZHAN LTA BA NGAN PA'I LCAGS SGROG GIS 'CHING BAR BYED PA NI; BYIS PA BRDA LA MA BYANG PA GZUGS BRNYAN LA MNGON PAR ZHEN PA LTAR SHIN TU BLUN PA STE, SGYU MA DANG RMI LAM DANG DRI ZA'I GRONG KHYER LA SOGS PA RNAMS NI, 'JIG RTEN GYI SKYE BO GNAG RDZI'I BAR LA YANG RANG BZHIN MED PA DANG, BRDZUN PA'I DPER CHES SHIN TU GRAGS PA'I PHYIR RO, ,'DIR SMRAS PA, THAR PA'I SA BON DGE LEGS KUN GYI GZHI, ,YANG DAG LTA BA'I NOR MCHOG 'PHROG BYED CING, ,THAR PA'I SROG RTZA GCOD PAR BYED PA YI, , LTA NGAN LAS LHAG 'PHUNG BYED DGRA GZHAN MED, ,GZHAN SNANG KUN RDZOB BRDA'I SKU NI; SA BDUN PA MAN CHAD KYI BYANG CHUB SEMS DPA' DANG, NYAN RANG SO SO SKYE BO LAS DAG PA RNAMS LA SANGS RGYAS KYI SKU DANG GSUNG GI RNAM PAR SNANG ZHING, SKU DANG GSUNG GI PHRIN LAS MDZAD PA STE, DE DAG KYANG 'DUL BYA'I SEMS SNANG YIN GYI YANG DAG PA MA YIN PA'I PHYIR, KUN RDZOB BRDA'I SKU ZHES BYA'O, , DE LA YANG GNYIS TE SPRUL PA'I SKU DANG LONGS SPYOD RDZOGS PA'I SKU'O, , @201 DANG PO NI, DPER NA NAM MKHAR ZLA BA SHAR BA'I DBANG GIS CHU DVANGS PAR ZLA BA'I GZUGS BRNYAN 'CHAR BA LTAR DON DAM PA'I SPRUL SKU'I DBANG GIS GDUL BYA LAS DAG PA RNAMS LA MTSAN DANG DPE BYAD KYIS BRGYAN PA'I SANGS RGYAS KYI SKUR SNANG BA'O, ,DE LA YANG SPRUL SKU MCHOG DANG MCHOG MA YIN PA GNYIS KYI DANG PO NI, RDO RJE THEG PAS 'DUL BA'I GDUL BYA RNAMS LA, HE RU KA DANG RNAM PAR SNANG MDZAD LA SOGS PA RIGS LNGA'I RNAM PAR SNANG BA STE, YE SHES LE'UR, RDO RJE SEMS DPA' GCIG PU 'DI NI DUS MTHA'I SPRIN DANG MTSUNGS PA HE RU KAR NI 'BYUNG BAR 'GYUR, , GDUG PA RNAMS NI SMIN PA'I DON TE DE YANG DAM TSIG RGYAL BA RMONGS PA RNAMS NI BDE BA'I DON, ,RIN CHEN DBANG PO SDUG BSNGAL LDAN PA RNAMS KYI DE YANG PAD 'DZIN CHAGS CAN RNAMS KYI CHAGS PA'I SLAD,, BGEGS RNAMS DAG NI GZHOM PA'I DON DU PHYAG NA PAD MA RAL GRI DON YOD GRUB PA 'BYUNG BAR 'GYUR, ,ZHES BSHAD DO, ,SPRUL SKU MCHOG MA YIN PA NI, MDZAD PA BCU GNYIS KYI SGO NAS CHAGS BRAL GYI 'DUL BYA RNAMS KYI DON MDZAD PA BCOM LDAN 'DAS SH'AKYA THUB PA LTA BU STE, YANG DE NYID LAS, SANGS RGYAS RNAMS KYI'ANG RTOGS BYA MIN PA DPAG MED YON TAN DANG LDAN SANGS RGYAS SPRUL PA SGYU MA NI, ,SRID PA GSUM GYI GNAS SU BDAG NYID STON PAR BYED DE BRGYA BYIN GZHU NI JI BZHIN NYID DU'O, ,SNA TSOGS DNGOS RNAMS KYIS PHYE RGYAL BA DANG BCAS LHA MI RANG RANG SEMS LA RAB ZHUGS PA, ,'DI NI MA SKYES CHOS TE CHU LA NAM MKHA' BZHIN DU 'DIR NI SKYE BAR 'KHRUL PA STER BA'O, , @202 ZHES BSHAD DO, ,LONGS SPYOD RDZOGS PA'I SKU NI, DON DAM PA'I LONGS SKU'I DBANG GIS LHA LA SOGS PA'I 'GRO BA RNAMS LA, RANG RANG GI SKAD KYIS KHAMS DANG BSAM PA DANG BAG LA NYAL JI LTA BA BZHIN DU CHOS STON PA'I SANGS RGYAS KYI GSUNG RNAM PA THAMS CAD PA'O, ,YANG DE NYID LAS, DUD 'GRO YI DVAGS LHA MI RNAMS DANG LTO 'PHYE LHA DANG MI NI 'PHAGS PA BOD LA SOGS RNAMS LA, ,BYUNG DANG 'BYUNG 'GYUR DA LTA BYUNG BA RNAM PA GSUM DANG RTAG TU BDEN PA'I CHOS NI GSUNG BYED CING, ,RANG RANG SKAD GZHAN DAG GI SRID PA GSUM PO MA TSANG MED PA LAM LA YANG DAG 'GOD BYED PA, ,'DI NI BDE MNYAM 'BRAS BU STER BA THAMS CAD MKHYEN PA'I GSUNG STE LHA YI SKAD KYANG MA YIN NO, ,ZHES BSHAD DO, , LONGS SKU DE LTA BU LA YANG MCHOG DANG MCHOG MA YIN PA GNYIS KYI DANG PO NI; RDO RJE THEG PA'I CHOS KYI 'KHOR LO'O, ,GNYIS PA NI, THEG PA THUN MONG GI CHOS KYI 'KHOR LO'O, ,YON TAN GYI DBYE BA LA YANG GSUM STE, CHOS SKU DANG SPRUL SKU DANG, LONGS SKU'I YON TAN NO, ,DE LA CHOS SKU'I YON TAN NI, STOBS BCU DANG, MI 'JIGS PA BZHI DANG, SANGS RGYAS KYI CHOS MA 'DRES PA BCO BRGYAD LA SOGS PA ZHI GNAS DANG LHAG MTHONG GIS BSDUS PA'I RTOGS PA'I YON TAN JI SNYED PA RNAMS SO, ,DE DAG GI LUNG NI 'DIR MA BRIS SO, ,SPRUL SKU'I YON TAN NI, MTSAN BZANG PO SUM CU RTZA GNYIS DANG, DPE BYAD BZANG PO BRGYAD CU RNAMS TE, DE YANG 'GREL PAR, GZUGS KYI RANG BZHIN SANGS RGYAS KYI SKU GZUGS SPRUL PA'I SKU STE SKYES BU CHEN @203 PO'I MTSAN SUM CU RTZA GNYIS LDAN PA'O, ,ZHES SOGS KYIS MTSAN RNAMS RGYAS PAR BSHAD NAS DE LTAR ZHABS KYI MTHIL NAS BRTZAMS NAS GTZUG TOR GYI MTHAR THUG PA SKYES BU CHEN PO'I MTSAN SUM CU RTZA GNYIS NI, CHOS YANG DAG PAR BSDUD PA'I MDO LAS GSUNGS TE, ZHES BSHAD DO, ,MTSAN DPE 'DI RNAMS DON DAM PA'I SPRUL SKU LA DNGOS SU LDAN LA, KUN RDZOB KYI SPRUL SKU LA GZUGS BRNYAN KYI TSUL DU LDAN NO, ,LONGS SKU'I YON TAN NI, GSUNG DBYANGS YAN LAG DRUG CU YIN LA, DE DAG KYANG DON DAM PA'I LONGS SKU LA DNGOS SU LDAN ZHING, KUN RDZOB KYI LONGS SKU LA GZUGS BRNYAN GYI TSUL DU LDAN NO, ,RDO RJE'I SKU DUS JI SRID DU BZHUGS PA'I DUS NI, GANG GI TSE 'JIG RTEN GYI KHAMS 'JIG PA'I TSE SA'I KHAMS RAGS PA RNAMS PHYE NAS RDUL PHRAN RNAMS CHU'I KHAMS LA 'JUG TSUL DES CHU'I KHAMS KYANG ME DANG, ME'I KHAMS KYANG RLUNG DANG, RLUNG GI KHAMS STONG PA LA ZHUGS NAS SNOD KYI 'JIG RTEN ZHIG PA NA, BCUD KYI SEMS CAN GZHAN RNAMS LAS KYI RLUNG GIS BSKUL BAS 'JIG RTEN GYI KHAMS GZHAN DU 'PHO ZHING RDO RJE'I SKU NI NAM MKHA'I KHAMS LA YE SHES RANG SNANG LAS SGRUB PA'I GZHAL MED KHANG RGYA DANG KHYON TSAD LAS 'DAS SHING BSAM GYIS MI KHYAB PA'I GNAS SU, DAG PA'I 'KHOR PHYIR MI LDOG PA'I BYANG CHUB SEMS DPA' SHA STAG GIS YONGS SU BSKOR TE, LHA DANG MI'I BDE BA LAS 'DAS SHING MU STEGS DANG NYAN THOS DANG, RANG SANGS RGYAS RNAMS KYI SNYOMS PAR 'JUG PA'I BDE BA LAS KYANG CHES PHUL DU BYUNG BA'I ZAG PA MED PA'I BDE BA @204 LA LONGS SPYOD PA'I TSUL GYIS 'KHOR BA JI SRID MA STONGS KYI BAR DU BZHUGS SO, , DE SKAD DU YANG YE SHES LE'UR, SA LAS CHU DANG RTZE MO CAN DANG RLUNG GI RDUL PHRAN PHYE NAS CHU YI KHAMS LA 'JUG PAR BYED, ,CHU LAS SA ME RLUNG PHYE RTZE MO CAN LA SA DANG CHU DANG ME RLUNG PHYE STE RLUNG LA'O, ,RLUNG LA SA DANG CHU DANG RTZE MO CAN DAG PHYE NAS LAS KYI RLUNG YANG STONG PA DAG LA'O, ,RNAM GSUM SRID PA'I DBANG GIS GANG ZHIG LAS KYI RLUNG GIS BSNUN PA GZHAN RNAMS ZHING GZHAN DAG TU 'GRO, , SANGS RGYAS ZHING NI MA LUS LAS CAN MIN PAR SRID GSUM BSKYED PAR MDZAD PAS RNAM PAR GZIGS NAS NI, ,GNYIS KA RO MNYAM DAG PA'I RDUL LA SANGS RGYAS THAMS CAD BYANG CHUB SEMS DPA' RNAMS KYIS BSKOR BA STE, ,SO SO RE RE'I RO YI RDUL LA GNYIS KA'I RIGS KYI DBANG GIS RDO RJE'I SRAS PO RNAMS KYIS BSKOR, ,SA LA SOGS PA'I RDUL LA MA LUS RIGS LA GNAS PA MTHA' YAS MI G-YO SOGS LA RAB ZHUGS RNAMS, ,DE DAG RNAMS DANG THABS CIG RDO RJE SEMS DPA' CHAGS PA'I DUS KYI BAR DU MKHA' LA RNAM PAR ZHUGS, ,ZHES BSHAD DO, , 'BRAS BU'I RGYUD BSHAD ZIN TO, ,DE LTAR RGYU DANG THABS DANG 'BRAS BU STE, RGYUD GSUM GYI SGO NAS DPAL DUS KYI 'KHOR LO'I NGES DON GYI CHA RNAMS TSANG LA MA NOR BAR LEGS PAR BSHAD ZIN TO, ,'DI DON 'GREL BYED MKHAS PA GZHAN RNAMS KYIS, ,SNYING PO DOR NAS SPUN PA YANG YANG 'PHYAR, ,RGYA MTSO BSRUBS LAS BDUD RTZI JI BZHIN DU, ,YANG DAG DON GYI SNYING PO KHO BOS BLANGS, ,'DAB BRGYA'I TSAL @205 NAS SBRANG RTZI BUNG BAS LEN, ,CHU DANG 'O MA NGANG PAS SO SOR 'BYED, ,NOR BU 'CHING BU DED DPON MKHAS PAS SHES, ,LEGS BSHAD NYES BSHAD MKHAS PA'I BLO YIS RTOGS, ,YOD PA'I LEGS BSHAD PHRAG DOG MUN PAS BSGRIBS, ,MED PA'I SKYON RNAMS BLO NGAN MIG GIS MTHONG,, GDUG PA'I SBRUL GYIS 'O MA 'THUNG BA BZHIN, ,LEGS BSHAD BDUD RTZIS NYON MONGS DUG 'PHEL BA'I, ,LOG PA'I RGYUN PHYOGS GZHOL BA'I BLO NGAN RNAMS, ,LEGS BSHAD CHU LON STONG GIS MI BZLOGS MOD, ,GZUR GNAS BLO LDAN 'GA' YIS 'DI MTHONG NA, ,YID LA 'BAB 'GYUR SNYAM PAS NGAS 'DI SBYAR, ,DE LAS BYUNG BA'I DGE BAS 'GRO BA RNAMS, ,LTA NGAN LOG PA'I LAM RNAMS RAB SPANGS NAS, ,'PHAGS RNAMS DGYES PA'I LAM LA RAB ZHUGS TE, ,RANG GZHAN SRID PA'I MTSO LAS SGROL BAR SHOG (,DPAL DUS KYI 'KHOR LO'I NGES DON GSAL BAR BYED PA RIN PO CHE'I SGRON MA ZHES BYA BA 'DI NI, MANG DU THOS PA SH'AKYA'I DGE SLONG RED MDA' BA GZHON NU BLO GROS KYIS GANGS BU LE'I MGUL DU SBYAR BA'O, ,'DIS KYANG RGYAL BA'I BSTAN PA RIN PO CHE PHYOGS DUS GNAS SKABS THAMS CAD DU RGYAS PAR BYED NUS PAR GYUR CIG ,DGE'O,, ,,)