@001 *, ,RED MDA' BA GZHON NU BLO GROS KYI RNAM THAR BZHUGS, NA MO GU RU WE, DMIGS MED BRTZE BA'I GTER GYUR SPYAN RAS GZIGS, , DRI MED MKHYEN PA'I DBANG PO 'JAM PA'I DBYANGS, ,GANGS CAN MKHAS PA'I GTZUG RGYAN RED MDA' BA, ,GZHON NU BLO GROS ZHABS LA PHYAG 'TSAL LO, ,DAM PA KHYOD KYIS RMAD BYUNG MDZAD PA'I TSUL, ,NYID KYIS GSUNG LA JI LTAR 'BYUNG BA BZHIN, ,SGRO BKUR MED PAR MDO TZAM BRJOD PAR BYA, ,SKAL BZANG DE DAG DVANG BA'I YID KYIS NYON, , DE LA SDOM NI, RIGS LA GZIGS NAS SKYE BA BZHES TSUL DANG, ,GZHON NU'I DUS KYI RNAM PAR THAR PA DANG, ,DGE SBYONG SPYOD PA'I DRI MED BRTEN TSUL DANG, , DAM PAS BSNGAGS PA'I LTA SPYOD BSTAN TSUL DANG, ,SKYES BU DAM PA GUS PAS BSTEN TSUL DANG, ,THUB PA'I DGONGS PA JI LTAR BTZAL TSUL DANG, ,YANG DAG LTA BA'I GNAD ZAB RNYED TSUL DANG, ,RANG DGA' GZHAN 'GREL RNAM BSHAD MDZAD TSUL DANG, ,'CHAD NYAN MDZAD 'BRAS SLOB MA SPEL TSUL DANG, ,THUGS DAM GYI MTHIL @002 GANG LA MDZAD TSUL DANG, ,LHAG PA'I LHA LA DAM BCA' PHUL TSUL DANG, ,DBEN PA'I GNAS SU YID RAB BZHOL TSUL DANG, ,SKYE SHI MI 'JIGS GDENG RNAMS THOB TSUL DANG, ,PHUL PHYIN MDZAD PA GZHAN YANG MDZAD TSUL DANG, ,GDUL BYA'I DON DU ZHING GZHAN GSHEGS TSUL DANG, ,DAD LDAN MOS PA'I RTEN RNAMS BZHAG TSUL RNAMS, ,MGON PO KHYED KYIS MDZAD PA'I PHYI SDOM YIN, , DE LA SKYE BA BZHES PA'I TSUL NI, SANGS RGYAS KYI BSTAN PA DAR BA'I SA PHYOGS MGON PO 'JAM PA'I DBYANGS KYI RNAM 'PHRUL RGYUD MAR BYON PA'I GDAN SA DPAL LDAN SA SKYA'I BYA 'DABS YUL RED MDA' ZHES BYA BAR, BOD KYI RGYAL PO KHRI SRONG LDE'U BTZAN DANG GDUNG GCIG PA JO BO RED MDA' BA'I BLON PO CHEN PO ZHIG GI SRAS SU 'KHRUNGS TE, LHUMS SU 'JUG PA DANG, BLTAMS PA'I DUS KYI MTSAN LTAS BZANG PO RNAMS LHA MO SGYU 'PHRUL MA LA BYUNG BA DANG TSUL MTSUNGS PAR 'BYUNG 'DUG STE MANG PAS MA BRIS SO, , GZHON NU'I RNAM THAR NI, DGUNG LO BCU PA'I DUS NYID NA TING NGE 'DZIN BZANG PO MNGA' BA YIN TE, YUM GYIS BA TSIGS LA 'TSOR GTANG PAS NYIN GCIG BA SLEB KYANG KHONG MA BYON PAR BLTAR PHYIN PA TSIGS KHA NA SGOM LA 'JAM 'DUG SKAD DE, SNGON GZHON NU DON GRUB ZHING LAS LA GZIGS SU BYON PAS SKYO STE SHING GI BSIL GRIB LA MNYAM PAR BZHAG PAS BSAM GTAN BZHI THOB PA DANG TSUL MTSUNGS SO, , DE NAS BTZUN MO BZHES PAR ZHUS PAS, KHYIM PA RNAMS 'DAM RDZAB @003 'OBS NA G-YOS PA DANG 'DRA LA, RAB TU BYUNG BA NI SKAM PA DANG BSIL KHANG NA GNAS PA DANG 'DRA BAR KHYIM PA DANG RAB BYUNG GI SKYON YON MKHYEN CING, RAB BYUNG GI RTEN MA YIN PA LA CHOS RNAM DAG BYED PA'I SKABS MED PAR RIGS NAS BTZUN MO MA BZHES, DER YAB YUM NI GRONGS, YUL CHAB SRID RNAMS SPANGS, RAB TU BYUNG STE AA NE CIG GI ZHABS TOG BYED KYIN SA SKYAR BZHUGS NAS LAG LEN SLOB KYIN YOD PA, DAM PA 'DI NI RGYAL BU SNYING STOBS CHEN PO DANG 'DRA BAR BLO STOBS DPAG TU MED PA MNGA' BA YIN TE, NYIN GCIG AA NER BYON TE, NGA YANG NA GONG DU PHYIN LA DPON CHEN GYI LAS KA BLANGS LA CHAB SRID CHOS KYIS SKYONG BA GCIG BYED, YANG NA SDE SNOD LA THUGS SBYONG BYAS NAS SANGS RGYAS KYI BSTAN PA DAR ZHING RGYAS PAR BYED DGOS PAR 'DUG GSUNG, AA NES KHYED KYIS DE 'DRA MI YONG, KHYED RANG YANG SKYID NGA LA'ANG PHAN, LAG LEN SLOBS ZHUS PAS MA GSAN PAR DGUNG LO BCO BRGYAD PA LA, NYA DBON GYI ZHABS LA BTUGS TE RIGS PAS BSTAN BCOS RNAMS BSLABS TE DGUNG LO NYER GSUM PA LA SEL PA RTAG PA'I RAB BYED DANG, TSAD MA'I YUL DANG BYED PA BRTAG PA'I RAB BYED SOGS MDZAD DE CHOS KYI GRAGS PA GNYIS PA LTAR 'GYUR TO, , DGE SBYONG GI SPYOD PA DRI MED BSTAN PA'I TSUL NI, NYID KYI GSUNG DGE SBYONG GI TSUL LA GDAMS PA LAS, GANG ZHIG LEGS GSUNG DAM CHOS 'DUL BA LA, , RAB TU BYUNG NAS LEGS PAR MI SDOM ZHING, ,THUB PA'I BKA' LUNG TSUL MIN 'DUS @004 BYED PA'I, ,DGE SBYONG DE DAG BSTAN PA'I CHOM RKUN YIN, ,'KHYOG POR SMRA LA GZHAN DAG RLING POR SEMS, ,NGAG MI BTZUN PA DGE SBYONG TSUL MIN PAS, ,GYA GYU'I SEMS DANG DE YI TSUL SPANGS TE, ,GSONG POR SMRA LA KHO BO RTAG TU BSTEN, ,'DZEM MED SMRA BA GZHAN DAG SPOBS PAR SEMS, ,NGAG MI SDOM PA DGE SBYONG TSUL MIN PAS, ,MU COR SMRA BA SMYON PA'I TSUL SPANGS TE, ,ZHI BA'I TSUL LA KHO BO RTAG TU BSTEN, ,PHYI TSUL 'CHOS PA GZHAN DAG BTZUN POR SEMS, ,G-YO SGYU'I SPYOD PA DGE SBYONG TSUL MIN PAS, ,PHA ROL BRID BYED YON PO'I TSUL SPANGS TE, ,DES PA'I TSUL LA KHO BO RTAG TU BSTEN, ,RANG DGA'I SPYOD PA GZHAN DAG DRANG POR SEMS, ,DBANG PO MI SDOM DGE SBYONG TSUL MIN PAS, ,BAG DANG MI LDAN HRAL PO'I TSUL SPANGS TE, ,BAG YOD TSUL LA KHO BO RTAG DU BSTEN, ,BYA BYED MANG BA GZHAN DAG DRUNG POR SEMS, ,RNAM G-YENG 'DOD PA DGE SBYONG TSUL MIN PAS, ,'DU 'DZI BSREL BA KHYIM PA'I TSUL SPANGS TE, , DON NYUNG TSUL LA KHO BO RTAG TU BSTEN, ,LONGS SPYOD 'BYOR BA GZHAN DAG DPAL DU SEMS, ,'DOD ZHEN CHE BA DGE SBYONG TSUL MIN PAS, ,ZANG ZING DANG BCAS GRONG PA'I TSUL SPANGS TE, ,CHOG SHES TSUL LA KHO BO RTAG TU BSTEN, ,GRONG THABS 'GRIM PA GZHAN DAG GDUL BYAR SEMS, ,RNYED BKUR SGRUB PA DGE SBYONG TSUL MIN PAS, , KHYE SPOGS 'DOD PA TSONG PA'I TSUL SPANGS TE, ,BAS MTHA'I GNAS LA KHO BO RTAG TU BSTEN, ,CES GSUNGS PA LAS SHES SO, , DAM PAS BSNGAGS PA'I LTA SPYOD LDAN PA'I TSUL NI, 'JAM DBYANGS NAM @005 MKHA' RIN CHEN LA SPRING PA LAS, DING SANG 'DI NA MKHAS RLOM MANG NA YANG, , RIGS DANG MI RIGS 'BYED PA'I BLO LDAN NYUNG, ,RI BONG CAL GYI RJES 'BRANG RI DVAGS BZHIN, ,PHAL CHER SGRA YI RJES 'BRANG KHO NAR ZAD, ,MKHAS BTZUN BZANG POR GRAGS PA MANG NA YANG, ,THUB BSTAN GCES PAR 'DZIN PA'I DAM PA DKON, , KHYE SPOGS 'DOD PA'I ZHING PA TSONG PA BZHIN, ,PHAL CHER TSE 'DI'I CHE THABS SGRUB PA MANG, ,'DI NA LA LA NYES BSHAD DUG CHUS MYONG, ,KHA CIG LTA NGAN RI YI SPO LA ZHEN, , GZHAN DAG TSUL 'CHAL 'DOD PA BSOD NYAMS TE, ,MANG PO 'BRAS MED SBUN PA 'PHYAR BAS NGAL, ,RANG GZHAN KHA SGYUR BZHIN DU MI 'CHAL ZHING, ,LCAGS PHYE GSER GYIS G-YOGS PA CI LTA BAR, ,KHONG PA RAB BDUG PHYI ROL 'PHAGS TSUL GYIS, ,CHOS LTAR BCOS PA'I STON PA'ANG SHIN TU MANG, ,DE PHYIR BLO NGAN RNAMS KYIS NYES BSHAD KYIS, ,THUB BSTAN DRI MAR BYAS PA MA BZOD PAR, ,RIGS DANG MI RIGS CUNG ZAD PHYE NA YANG, ,DING SANG 'DI NA BDAG LA BSHE BA MANG, ,'JIG RTEN SKYE BO MA MNYES GYUR KYANG BLA, ,DAM PAS KHREL NA GSON PO SROG SONG YIN, ,DE PHYIR BDAG LA BSTAN PA DANG 'GAL BA'I, ,LTA SPYOD YOD NA DAM PA RNAMS KYIS SMOD, ,KHO BO SANGS RGYAS BSTAN LA RAB BYUNG NAS, ,RIGS DANG MI RIGS 'BYED SHES TSUN CHAD DU, , LUS NGAG YID KYI SPYOD PA CI BYED KYANG, ,RAB TU SGRIMS NAS THUB PA'I GSUNG BZHIN SGRUB, ,THOG MED GOMS PA'I NYON MONGS SHUGS DRAG PAS, ,GAL TE MI RIGS CUNG ZAD BYAS NA YANG, ,DE YI MOD LA DUG ZOS DRAN PA BZHIN, ,'GYOD SEMS LDAN @006 PAS SLAR YANG CHOS BZHIN BYAS, ,GNAS LUGS 'BYED PA'I 'OD ZER STONG LDAN PA'I, ,THUB BSTAN NYI MA'I DKYIL 'KHOR MTHONG BAS NA, ,BLO NGAN MUN PA'I KHROD NA 'OD 'BYIN PA'I, ,GZHAN GZHUNG ME KHYER TSOGS LA BDAG MI GUS, ,GSUNG RAB RIN CHEN GLING LA DBANG BSGYUR BA'I, ,KLU SGRUB KLU DBANG LEGS BSHAD GDENGS KA'I NOR, ,DGOS 'DOD KUN 'BYUNG 'DOD DGUR 'BYOR PAS NA, ,NYES BSHAD 'CHING BU'I TSOGS KYIS BDAG MI MGU, ,MTHA' GNYIS SPANGS PA'I CHU GTER LA GNAS TE, ,GDENGS CAN KLU DBANG KLU SGRUB RING LUGS 'DZIN, ,KHO BO'I LTA ZER 'BAR BA'I GZI BRJID LA, ,PHAS RGOL 'DAB BZANG STONG GIS 'GONG MI NUS, , 'JIG TSOGS LTA RI SPO MTHON 'JOMS BYED PA'I, ,LUNG RIGS RDO RJE'I GNAM LCAGS STONG YOD KYANG, ,RMONGS PA'I GO CHA SRA BRTAN CHER BGOS PA'I, ,SKYE BO 'DI LA BDAG GIS CI BYAR YOD, ,DE PHYIR CHOS DANG LDAN PAR SMRAS NA YANG, ,DING SANG 'DI NA PHAN PAR MA MTHONG NAS, ,TING 'DZIN BDUD RTZI'I RO DE MYANG 'DOD PAS, ,KHO BO'I YID NI DBEN PA'I GNAS SU GZHOL, ,CES GSUNGS SO, , BLA MA DAM PA BSTEN PA'I TSUL NI, SKYE DGU'I GTZUG RGYAN CHOS RJE BSOD RGYAL DANG, ,RGYAL BA'I SRAS PO THOGS MED BZANG PO DPAL, ,MA TI PAn CHEN PAn CHEN BYANG RTZE DANG, ,MKHAS PA'I DBANG PO NYA DBON KUN DGA' SOGS, ,BKA' DRIN NOD PA'I BLA MA BCU PHRAG GNYIS, ,YUN RING 'BAD DE GUS PA'I GTZUG GIS BSTEN, ,CES GSUNGS SO, ,THUB PA'I DGONGS PA BTZAL BA'I TSUL NI, PHRIN YIG @007 NOR BU'I 'PHRENG BA LAS, GANG GI SHES BYA'I DE NYID KUN, ,MA LUS THUGS SU CHUD GYUR CING, ,GZHAN LA'ANG BRTZE BAS RJES STON PA, ,SANGS RGYAS DE LA BDAG CAG DAD, ,MI SHES MUN PA SEL BA'I SNANG BYED 'CHOS, ,LUNG DANG RTOGS PA'I BDAG NYID DAM CHOS DANG, ,JI LTA JI SNYED GZIGS PA'I SPYAN MNGA' BA, ,'PHAGS MCHOG DGE 'DUN TSOGS LA'ANG BDAG GUS SO, , SANGS RGYAS BSTAN LA CHED CHER MI 'DZIN CING, ,DAM CHOS RIN CHEN 'TSONG PA'I DON MTHUN PA, ,'DOD PA'I KHOL BO SRED PA'I RJES 'BRANG MI, ,MKHAS PAR RLOM GZHAN DE DAG MING TZAM YIN, ,THUB BSTAN 'GRO BA'I MIG BU LTAR MTHONG ZHING, ,GSUNG RAB DE NYID 'BYED LA RTAG TU BRTZON, ,LUNG RIGS BDUD RTZIS BLO GROS LUS RGYAS PA'I, ,BSTAN 'DZIN RNAMS KYI SNYAN DU 'DI SPRING NGO, ,PHAN BDE'I 'BYUNG GNAS THUB BSTAN YID BZHIN NOR, ,SGRO SKUR DRI MA'I 'DAM RDZAB KYIS GOS PA, ,LUNG RIGS RNAM DAG GANGG'A'I CHU RGYUN GYIS, ,RTAG TU BYI DOR BYED LA BRTZON 'TSAL LO, ,ZHES SMROS NAS,, ,, THUB PAS THOG MAR CHOS 'KHOR SKOR BA'I TSUL NI, 'PHAGS PA'I YUL DU THUB PA'I DBANG PO YIS, ,DMAN DANG RGYA CHE'I CHOS LA MOS RNAMS LA, ,BRGYAD KHRI BZHI STONG CHOS KYI 'KHOR LO NI, ,'DOD CHAGS BRAL BA'I GZUGS KYIS THOG MAR SKOR, ,GCIG TU ZAB MO'I CHOS LA MOS RNAMS LA, ,'KHOR LOS SGYUR BA'I GZUGS SU SPRUL NAS KYANG, ,CHAGS CAN SKYES BU 'DUL BA'I DON GYI PHYIR, ,RNAM @008 MANG RGYUD SDE'I CHOS 'KHOR GZHAN DU BSKOR, ,CES GSUNGS SO, , BSDU BA RIM PA GSUM BYUNG TSUL NI, THUB PA NONGS 'OG RGYAL PO'I KHAB NYID DU, ,'OD SRUNG NYE BA 'KHOR DANG KUN DGA' BOS, ,THEG PA DMAN PA'I SDE SNOD RIN CHEN GSUM, ,SGRO BSKUR MED PAR BSDUS ZHES LUNG LAS 'BYUNG, ,DE NAS BRGYA PHRAG GCIG DANG BCU 'DAS TSE, ,YANGS PA CAN GYI GRONG KHYER CHEN PO RU, ,GRAGS PA LA SOGS 'PHAGS PA BDUN BRGYA YIS, ,BSDU BA GNYIS PA BYAS ZHES GSAL BAR THOS, ,DE NAS RIM GYIS BDUD KYI LAS G-YOS TE, ,THUB PA'I BSTAN LA SDE PA BCO BRGYAD GYES, ,KRI KRI'I RMI LAM LUNG BSTAN MDO SDE YI, ,RJES 'BRANG BSDU BA GSUM PA BYAS ZHES GRAG ,SHIN TU RGYAS PA'I MDO SDE RNAM MANG RNAMS, ,BYAMS PA SPYAN RAS GZIGS DANG 'JAM DBYANGS SOGS, ,RGYAL SRAS RNAMS KYIS LEGS PAR BSDUS SO ZHES, ,TSAD LDAN MKHAS PA'I GZHUNG DU GSAL BAR BKOD, ,CES GSUNGS SO,, ,, BKA'I DGONGS 'BREL BYUNG TSUL NI, NYI MA GUNG PA SHA NA'I GOS CAN SOGS, ,NYAN THOS BSTAN PA 'DZIN PAR THUB PAS GSUNGS, ,THEG CHEN BSTAN LA RGYAL BA'I RGYAL TSAB DU, ,KLU SGRUB KLU'I DBANG PO LUNG BSTAN TO, , BSDU BA GNYIS PA'I 'OG TU GSUNG RAB KYI, ,DGONGS 'GREL GRUB MTHA' BZHI YI DBYE BA BYUNG, ,MNGON PA SDE BDUN BYE BRAG BSHAD TSOGS SOGS, ,BYE BRAG SMRA BA'I GZHUNG CHEN THOG MAR DAR, ,DE TSE RIGS PA'I RJES 'BRANG BLO LDAN 'GAS, , BSTAN BCOS DON LA YID BRTAN MA MTHONG NAS, ,MDO SDE'I DON LA RIGS PAS @009 RNAM DPYAD DE, ,DON RNAMS 'JOG PHYIR MDO SDE PA ZHES GRAGS, ,STON PA 'DAS NAS BZHI BRGYA'I LO 'DAS TSE, ,BE TA'I YUL DU LI TZA BYI GZHON NU, ,KLU SGRUB ZHES BYA'I DGE SLONG DU GYUR NAS, ,THUB BSTAN RGYAS PAR MDO SDE'I TSOGS LAS GSUNGS, , KLU YI YUL SOGS 'JIG RTEN GZHAN DAG NAS, ,ZAB CING RGYA CHE BA'I MDO SDE RNAM MANG BLANGS, ,RTAG CHAD MTHAR LTA'I MUN PA STUG PO BCOM, ,MTHA' BRAL DBU MA'I SGRON ME DE YIS SBAR, ,DE 'OG THUB PA'I LUNG BSTAN THOGS MED KYIS, ,MI PHAM MGON LA BKA' DRIN RJES NOD NAS, ,RNAM RIG SMRA BA'I GRUB MTHA' GSAL BYAS ZHES, ,RGYA BOD SHING RTA CHEN PO RNAMS LA GRAGS, ,'DI DAG THEG CHEN SHING RTA'I SROL 'BYED DE, ,THEG CHEN MDO DANG RGYUD SDE'I DGONGS PA RNAMS, ,GNYIS PO 'DI YI LUGS DANG MI MTHUN PA, ,GANG GIS BKRAL DE LOG PA'I LAM DU SHES, ,DE LTAR DGONGS 'GREL SHING RTA'I SROL 'BYED NGA, ,THUB PA'I BSTAN LA 'PHAGS PA'I YUL DU BYUNG, ,LUGS DE DAG DANG MI MTHUN GANG YIN PA, ,DE NI BDE GSHEGS GRUB MTHA'I KHONGS SU MIN, ,DE PHYIR BDAG NYID LEGS PAR 'DOD RNAMS KYIS, ,TSUL 'DI DAG LA LEGS PAR 'DRIS BYAS NAS, ,CHOS LUGS GZHUNG LUGS GRUB PA'I MTHA' RNAMS LA, ,RNAL 'BYOR SPYOD NA MDZES KYI GZHAN DU MIN, ,GANGS RI'I KHROD 'DIR RMONGS RNAMS GTZOR BYED PA'I, ,LOG PA'I GZHUNG DANG CHOS LUGS BSAM MI KHYAB, ,MKHAS PA RNAMS LA TSAD MAR GRAGS PA YI, ,GZHUNG LUGS 'GA' YANG YID BRTAN MED PAR MTHONG, ,ZHES DANG, ,THUB PA'I BSTAN LA NYID KYI DGONGS PA @010 BZHIN, ,'KHRUL MED SMRA BA 'PHAGS PA KLU SGRUB YIN, ,KLU SGRUB DANG NI THOGS MED GNYIS, ,KHYOD LTAR 'DZIN PAR KHYOD KYIS GSUNGS, ,DE DAG GZHUNG GI RJES 'BRANGS NAS, ,BDAG GIS KHYOD KYI DGONGS PA BTZAL, ,ZHES GSUNGS SO,, YANG DAG PA'I LTA BA RNYED PA'I TSUL NI, RGYA GAR BAL BO BOD KYI YUL RNAMS SU; ;MDO DON SMRA BA'I MKHAS PA MANG BYON YANG, ,PHAL CHER RTOG PAS SBYAR BA'I DON RNAMS LA, ,MKHAS PAR ZAD KYI DE NYID DON LA MIN, ,THUB PA'I BSTAN LA NYID KYI DGONGS PA BZHIN, 'KHRUL MED SMRA BA KLU SGRUB CHEN PO YIN, ,DE YI GZHUNG LUGS RAB DKAR KUNDA'I 'TSAL, ,JI BZHIN 'BYED PA DPAL LDAN ZLA BA YIN, ,SLOB DPON DE DAG DGONGS PA 'DI YIN ZHES, ,MKHAS RLOM MANG YANG SU LA CI CHA YOD, , RNAM BKRA TSON GYI RI MO GSAL BA YI, ,RNAM DBYE DMUS LONG DAG LA YOD DAM CI, , LONG BAS RIN CHEN GTER KHA PHYE PA LTAR, ,RNAM DAG 'PHAGS PA'I MIG DANG MI LDAN YANG, ,RGYAL DANG RGYAL BA'I SRAS KYI BYIN BRLABS LA, ,RTEN 'BYUNG ZAB MO'I LAM 'DI KHO BOS RNYED, ,'DAS DANG MA BYON DA LTAR BZHUGS PA YI, ,RGYAL BA SRAS BCAS DGES PA'I LAM 'DI YIN, ,'DI LAS GZHAN DU THAR PA'I LAM YOD CES, ,SMRA BA DE DAG BDAG GIS GYI NAR GTOGS, ,PHYOGS BCUR BZHUGS PA'I RGYAL DANG DE SRAS RNAMS, ,MNGON SUM BYON NAS DBYANGS DANG MGRIN GCIG GIS, ,'DI LAS GZHAN DU THAR PA'I LAM STON KYANG, ,BDAG BLO G-YO BA MED DO GROGS PO DAG ,DE PHYIR BDAG GIS NYAM NGA'I LAM SPANGS NAS, ,BDE GSHEGS DGES PA'I LAM LA @011 'JUG 'DOD NA, ,DKA' DANG 'BAD PA BRGYA PHRAG DAG GIS KYANG, ,KLU SGRUB LUGS BZANG 'DI LA 'JUG PAR RIGS, ,'DI MA RTOGS NA GZHUNG LUGS MANG BSLABS KYANG, ,BDE GSHEGS DGONGS PA RTOGS PA'I THABS GZHAN MED, ,PHAL CHER RTOG PA'I DRVA BA SPEL BA'I PHYIR, ,BLO GROS NGAL BA TZAM ZHIG THOB PAR ZAD, ,DE PHYIR RANG NYID DRAN PA GSO PHYIR DANG, ,SKAL MNYAM GZHAN LA'ANG PHAN PAR BYA PHYIR DANG, , THUB PA'I BSTAN PA YUN RING GNAS BYA'I PHYIR, ,DUS GSUM RGYAL BA'I YUM 'DI BDAG GIS BSHAD, ,CES DANG, KHO BO LA DBU MA'I RTOGS PA SKYE TSUL RIM PA 'BYUNG STE; 'DI LTAR DANG PO DPYAD STONG, GNYIS PA SNANG STONG, GSUM PA RTEN 'BREL SGYU MAR GO BA, BZHI PA RTEN 'BREL BTAGS YOD GZHI MED DU GO BA'O, , DANG PO NI, BUM PA THO BAS BCOM PA LTAR KUN RDZOB RDZAS YOD RIGS PAS BSHIGS PA'I STONG NYID DE, 'DIS KYANG RIGS DPYAD KYIS BDEN 'DZIN LDOG CING, STONG NYID LA MOS PA'I RGYU TZAM BYED, GNYIS PA NI, SNANG BA SGYU MA LTAR SNANG DUS NYID NAS RANG BZHIN MED PAR RTOGS PA STE, 'DIS PHYI GZUNG BYA LA SGRO BKUR GYI RTOG PA MTHA' DAG LDOG KYANG NANG MYONG RIG LA DROD PA'I ZHEN PA MI LDOG PAS SEMS TZAM RNAM RDZUN PA'I LTA BA LAS MA 'DAS, GSUM PA NI, NANG MYONG RIG DANG PHYI GZUNG BA GNYIS KA YANG RGYU RKYEN LA RAG LAS PA SGYU MA LTAR KUN RDZOB TU YANG SNANG BA TZAM LAS RANG BZHIN CUNG ZAD KYANG MED PAR RTOGS PA STE, 'DI LA YANG MTHAR 'DZIN GYI ZHEN PA CI YANG MED KYANG, RTEN 'BREL SGRA RTOG LA MA LTOS PA'I DON CHOS SGYU MA TZAM DU @012 'DZIN PA YOD PAS RNAL 'BYOR SPYOD PA'I DBU MA PA LAS MA 'DAS, BZHI PA NI, RTEN 'BREL GYIS CHOS RNAMS RIGS PAS TSUL BZHIN DU DPYAD PA NA RANG GI NGO BO CUNG ZAD KYANG MI RNYED CING, MA DPYAD PA NA THA SNYAD KYI YUL DU 'GYUR BAS RTOG PAS BTAGS SHING MING GI THA SNYAD BYAS PA TZAM GYIS BTAGS YOD DU RTOGS PA'O, ,DA LTA'I RTEN 'BREL RTOGS PA'I BLO DE NYID KYIS BLO GZHAN LA LTOS MED DU RGYU 'BRAS MI 'KHRUL BA DANG, RTEN 'BREL RTAG CHAD SPROS PA'I MTHA' THAMS CAD DANG BRAL BAR NGES PA 'DRONGS PA DUS GCIG LA YONG BA YIN, GO YUL GYI LTA BA 'DI'I GONG NA BOGS DBYUNG RGYU YOD PAR MI SEMS, 'DI MA RTOGS BAR LA LTA BA MTHAR THUG PA YANG MA YIN ZHES GSUNGS SO,, ,, BRTZAM CHOS MDZAD PA'I TSUL NI, 'DZAM GLING MKHAS PA'I RGYAN MCHOG BKA' CHEN BZHI, ,RTZA 'JUG BZHI GSUM THEG CHEN RGYUD BLA DANG, ,CHOS MNGON MDZOD DANG DPAL LDAN 'DUS PA SOGS, ,RNAM BSHAD BYAS PA'I GZHUNG LUGS BCU PHRAG GCIG ,GZHAN YANG BOD YUL 'GYUR BA'I BSTAN BCOS DANG, ,MDO DANG RGYUD SDE PHAL CHER LEGS PAR BLTAS, ,RANG GZHAN GRUB MTHA'I DE NYID 'BYED PA LA, , MKHAS PA'I 'DUN SAR 'JIGS MED SPOBS PA THOB, ,CES GSUNGS SO,, ,, SLOB MA SPEL BA'I TSUL NI, KUN MKHYEN SHER 'OD BLO BZANG GRAGS PA SOGS, ,GZHUNG LUGS RAB 'BYAMS SHES PA'I BSHES GNYEN BDUN, (` BDUN LA LNGA NI, CHOS RJE DPAL 'BYOR BA, GO 'JO NYI MA, BKA' BCU PA KUN DGA' DPAL, DAR MA, BSOD SHE,) ,BKA' @013 BZHI LEGS PAR SMRA BA BCU PHRAG GNYIS, ,PHAR TSAD SHES PA'I SLOB MA BRGYA PHRAG RGAL, ,CES GSUNGS SO, , THUGS DAM MTHIL GANG LA MDZAD PA NI, MANG DU THOS SHING LEGS PAR BSAM PA'I DON, ,DBEN PA'I GNAS SU RTZE GCIG LEGS SGOM STE, ,RGYAL BA'I DGONGS PA TSUL BZHIN SKYONG 'DOD KYANG, ,SNGON CHAD RNAM G-YENG LE LO'I DBANG DU GYUR, ,MKHA' MNYAM 'GRO LA DMIGS PA'I SNYING RJE DANG, ,SRID ZHI STONG PAR RTOGS PA'I SHES RAB GNYIS, ,RES 'GA' RES 'JOG RES 'GA' ZUNG 'BREL SGOM, , 'ON KYANG PHAL CHER SNYOMS LAS DBANG DU THAL, ,CES DANG, YANG GSUNGS PA, RGYU 'BRAS BSLU BA MED PA'I YID CHES DANG, ,RTEN 'BREL STONG PAR RTOGS PA'I SHES RAB GNYIS, ,'BRAL MED ZUNG DU CHUD PAR NAM GYUR PA, ,DE TSE MTHA' BRAL DBU MA'I LAM LA ZHUGS, ,JI LTAR SNANG ZHING GRAGS PA'I DNGOS 'DI LA, ,RANG GZHAN GRUB MTHAS BTAGS PA'I KUN BTAGS DANG, ,LHAN SKYES YID KYI DNGOS 'DZIN MUN PA RNAMS, ,RNAM DAG LUNG RIGS ZER GYIS RNAMS BSAL TE, ,SNANG DUS NYID NAS STONG PAR RTOGS PA DANG, ,STONG PA RTOGS TSE SNANG BA MI 'GOG PA'I, ,ZUNG 'JUG TSUL LA NGES PA NAM SKYES PA, ,DE TSE RGYAL BA'I DGONGS PA RTOGS PA YIN, , THOS BSAM RIGS PAS RNAM PAR DPYOD PA'I TSE, ,SNANG BA BKAG NAS STONG PA SGRUB PA DANG, ,STONG PA RTOGS TSE SNANG BA NUB PA DANG, ,KUN RDZOB BSAL NAS DON DAM SGRUB PA RNAMS, ,RTAG CHAD MTHAR LTA'I G-YANG LA LHUNG BA'I PHYIR, ,SANGS RGYAS @014 DGES PA'I LAM LAS RING DU GOL, ,SGOM BYUNG 'PHAGS PA'I YE SHES SHAR BA NA, , SHES DANG SHES BYA'I MTSAN MA SNA TSOGS LA, ,MKHA' LA 'JA' MTSON DENGS LTAR MI SNANG ZHING, ,CHU LA CHU DANG MAR LA MAR BZHAG BZHIN, ,DBYINGS DANG RIG PA DBYER MED 'DRES PA NA, ,MTHONG MED TSUL GYIS DE NYID MTHONG BA DANG, ,GNAS MED TSUL GYIS CHOS SKU LA GNAS DANG, ,MYA NGAN 'DAS DANG 'OD GSAL CHOS KYI SKU, ,SANGS RGYAS SRAS PO BLO BZANG KLU SGRUB BZHED, ,'ON KYANG RAB 'BRING BAR MA'I GDUL BYA LA, ,SNGON BSAGS DGE DANG SMON LAM GRUB PA'I MTHUS, ,RANG RANG BLO DANG 'TSAMS PA'I SPRUL SKU YIS, ,'KHOR BA SRID DU PHRIN LAS NGANG GIS 'JUG ,CES DANG, BLA MA PHYAG NA RDO RJER 'JAM DBYANGS LA ZLA BA BDUN BSNYEN PA MDZAD NA DNGOS SU CHOS GSUNG BAR 'GYUR ZHES LUNG BSTAN PA LA 'KHOR RNAMS KYIS MDZAD PAR ZHUS PAS 'JAM DBYANGS SA BCU'I BYANG SEMS CHEN PO YIN PAS DNGOS SU MJAL NAS PHAN YON DPAG TU YOD MOD, 'ON KYANG ZLA BA BDUN SNGAGS SGRONG BA BAS BYANG CHUB KYI SEMS SGOM PA KHYAD CHE ZHES GSUNG NGO, ,YANG KHO BOS SNGAR ZHI GNAS LA CHED CHER MA BYAS, GTZO CHER LHAG MTHONG KHO NA NYAMS SU BLANGS, DE YANG MNYAM BZHAG TU BDAG GIS BDAG MED DRAN PA NYER GZHAG DANG, KHAMS KYI RAB TU DBYE BA'I SGO NAS NYAMS SU BLANGS, RJES THOB TU YUL SNANG SNA TSOGS LA SPYI DANG BYE BRAG CI RIGS PAR RANG BZHIN MED PAR DPYAD NAS NYAMS SU BLANGS TE, SNGAR CHER MA SGOM KYANG LTA BA'I BOGS 'BYIN PA LA SHIN TU PHAN PAR BYUNG, LTA BA'I GO @015 YUL TZAM YOD KYANG NYAMS SU LEN MA SHES NA BOGS MI 'BYIN LA, MYONG BA 'THON NA GO YUL TZAM GYIS KYANG NYON MONGS PA DANG RNAM RTOG GI DBAL MI CHOG PAR SNANG ZHES GSUNGS SO, , DAM BCA' PHUL BA'I TSUL NI, MDOR NA LTA BA'I PHU THAG CHOD, NYAMS LEN GYI GNAD SHES, 'KHOR BA'I NYES DMIGS DANG THAR PA'I SA BON LA TSIG TZAM MA YIN PAR NGES PA 'DRONGS, STON PA DANG BSTAN PA'I YON TAN LA YID CHES PA'I DAD PA THOB BZHIN DU, SGRUB PA SNYING POR MI BYED PAR TSE 'DI'I SNANG SHAS LHUR LEN NA KHO BO'I SNYING RUL BA LAS GZHAN DU BRTAG TU CI ZHIG YOD, DE BAS NA TSE LHAG GANG YOD BAS MTHA'I GNAS MI SKYEL ZHING, TSE DANG SGRUB PA MI SNYOMS PAR, GZHAN DON BYED PA LTAR BCOS PA'I THABS KYIS 'KHOR BSDUS NAS SNANG SHAS LHUR BYED DAM, SKYID CHOS DANG SNYOMS LAS LHUR BYED NA BSTAN BSRUNG RNAMS KYIS KHO BO'I MGO BO AAR RDZA KA'I DOG PA BZHIN DU KHOS SHIG GZHAN YANG YID DAM GYI LHA'I SPYAN SNGAR DAM BCA' 'DI DAG DBUL LO, ,GANG GIS ZHABS ZUNG PAD MO GE SAR RDUL, , TSANGS DANG LHA DBANG KHYAB 'JUG LA SOGS PA, ,'JIG RTEN DREGS LDAN GTZUG GIS GUS BSTEN PA'I, ,SPYAN RAS GZIGS MGON DE 'TSAL LO, ,MANG DU THOS KYANG TSUL GZHAN SEMS LA GA-YEL, ,KHRIMS BRGYA NOD KYANG NYES LTUNG DRI MA CAN, ,DGE SBYONG BDAG GI G-YAR DAM 'DI RNAMS LA, ,MKHYEN LDAN THUGS RJE LHA KHYOD YUD TZAM DGONGS, ,GANG DU GNAS NA SNANG SHAS 'PHEL GYUR ZHING, ,RANG RGYUD RNYED BKUR @016 ZHAGS PAS 'CHING BYED LA, ,GZHAN RGYUD PHRAG DOG 'GRAN SEMS KYIS RDUNGS PA'I, , GNAS DER SKAD CIG TZAM YANG MI GNAS SO, , DENG NAS BZUNG STE JI SRID 'TSO BAR DU, ,GANGS DANG RI SUL NAGS KYI KHROD RNAMS SU, ,BSE RU LTA BUR RTAG TU GNAS BYED CING, ,GRONG DANG 'KHOR MANG DBUS SU GNAS MI BGYI, ,CHOS BRGYAD RKYEN GYIS NAM YANG MI G-YO BA'O, ,SEMS LA BRTAN PA JI SRID MA THOB BAR, ,GCIG TU RANG BRGYUD 'DUL BA MA GTOGS PA, , GZHAN DON THABS KYIS RANG DON NYAMS MI BGYI, ,CHOS GOS GSUM DANG LHUNG BZED MA GTOGS PA, ,RANG NYID 'TSO BA'I YO BYAD MA GTOGS PA, ,GSER DANG DBYIG SOGS LHAG PA'I YO BYAD NI, ,RANG GI DON DU TIL TZAM MI 'CHANG NGO, ,GZHAN GYI NYES PA NAM YANG MI GLENG SHING, ,DON DANG LDAN ZHING CHOS MTHUN MA GTOGS PA, , DMAG DANG CHOM RKUN RGYAL BA'I GTAM LA SOGS, ,'KHRUL PA'I BKA' 'CHID NAM YANG MI BGYID DO, ,CHOS KYI DON DU BKA' SPYAD SRAN BZOD CING, ,'JIG RTEN BLOS BTANG RNAM GROL DON DU GNYER, ,'DOD CHUNG CHOG SHES RANG DANG RJES MTHUN PA'I, , RJES 'BRANG 'KHOR NI BZHI BAS LHAG MI BSTEN, ,GAL TE BDAG GI G-YAR DAM 'DI RNAMS LA, ,'GAL BA BGYIS NA RGYAL BA SRAS BCAS DANG, ,THUGS RJE'I MNGA' BDAG SPYAN RAS GZIGS MGON GYIS, ,KHYI PHAG LUG BONG RNAMS DANG BDAG SNYOMS SHIG ,BDAG GIS JI SKAD SMRA 'DI KHYOD KYIS KYANG, ,YID LA CHONGS LA TSUL BZHIN NYAMS SU LONGS, ,SHI YANG 'DI LAS GZHAN GYIS KHA CHEMS MED, ,PHRAD KYANG @017 SMRA RGYU GZHAN 'GA' MA MCHIS SO, ,ZHES GSUNGS SO,, ,, DBEN PA LA THUGS GZHOL BA'I TSUL NI, KHO BO DBEN PA BSTEN PA'I RGYU MTSAN YANG 'KHOR DANG GROGS KYIS YID SUN PHYUNG BA'AM, RNYED BKUR DANG GRAGS PA 'DOD PA MA YIN GYIS, GZHAN DU NA 'KHOR BA'I SDUG BSNGAL ME 'OB LTAR SHIN TU BRNAG DKA' BAR MTHONG BA'I PHYIR DANG, BCOM LDAN 'DAS KYIS RNAM GRANGS DU MAR BSNGAGS PA'I DBEN PA'I GNAS PAD MO'I TSAL BAS KYANG, SHIN TU YID DU 'ONG BAR MTHONG BA'I PHYIR RO, , DE YANG 'DI LTAR, GANG LA NYES PA RDUL TZAM MI MNGA' ZHING, ,RMAD BYUNG YON TAN DPAL GYIS RAB BRJID PAS, ,SNYAN PA'I BA DAN 'JIG RTEN GSUM NA GA-YO, ,THUB DBANG LHA YI LHA LA PHYAG 'TSAL LO, ,KA YE NYON CIG SHES LDAN GROGS PO DAG ,BSTAN PA'I NYIN BYED NUB RI'I RTZE LA SON, ,LUS SROG G-YO BA 'BAB CHU'I RGYUN DANG MTSUNGS, ,THAR 'DOD RNAMS KYIS BAG YOD BSTEN PAR RIGS, ,RIN CHEN BDUN LDAN GLING CHEN BZHI LA DBANG, ,DPAG MED TSE GNAS DGE BCU'I DPAL LA SPYOD, ,PHUN TSOGS MNGON MTHO'I BDE LA ROL BYED PA'I, ,'KHOR LOS SGYUR RGYAL DE YANG CHU SHING 'DRA, ,LHUN PO'I SPO LA YUN RING GNAS BCAS TE, ,YONGS 'DU'I TSAL DU DGA' BDE'I DPAL GYIS ROL, ,'CHI MED NYES DBANG TSOGS KYIS GUS BTUD PA'I, ,'PHROG BYED MIG STONG LDAN DE'ANG SRID PA'I BRAN, ,LUS SEMS ZUG RNGU'I BRDUNG BA RING DU SPANGS, ,TING 'DZIN BDE BAS BSKAL MANG 'DA' BYED @018 PA'I, ,'JIG RTEN MES PO GSER GYI RNGA LDAN YANG, ,'CHI MED GO 'PHANG LAS RING GYI NAR 'KHOR, ,GANG GIS REG NA RAB BRTAN LHUN PO YANG, ,SKAD CIG TZAM GYIS THAL BAR RLOG BYED PA'I, ,ME LCE'I PHRENG BA LUS RAB 'BAR BA LA, ,DMYAL BA'I ZUG NGU SU YIS BRNAG PAR NUS, ,BLTAS PA TZAM GYIS RLUNG CHEN RGYUN SKEMS SHING, , LJON SHING 'BRAS BU MED PAR BYED PA YI, ,TA LA'I YA THOG SKAM LTA'I YI DVAGS GZUGS, ,GANG ZHIG MTHONG NA 'JIGS RUNG GI YANG GA-YA', ,BLANG DOR RMONGS PA'I GTI MUG DMAG RUM 'THIBS, ,GCIG LA GCIG ZA RDO YI ME STAG DANG, ,BKOL BTZOG CHAR RGYUN LUS LA RTAG 'BAB PA'I, ,RNAM MANG DUD 'GRO'I GDUNG BA SU YIS BZOD, ,SRID PA'I PHUN TSOGS DE LTAR GNOG CHUNG SHING, ,RAB MANG NYES PA'I TSOGS DANG LDAN RIGS NAS, ,RANG GZHAN SRID PA'I MTSO LAS BSGRAL BYA'I PHYIR, , MANG THOS BDAG NI DBEN PA'I GNAS SU 'GRO, ,CHAR SDOD BYE 'U 'BRUG SGRA THOS PA LTAR, ,DBEN PA'I GNAS SU GTAM 'DI KHO BO'I SNYING LA BAB, ,THOS PA'I DON RNAMS DON YOD BYA BA'I PHYIR, ,GZHON NU BLO GROS DBEN PA'I GNAS SU 'GRO, ,NGANG PA'I TSOGS KYIS PADMA'I MTSO MTHONG LTAR, ,BAS MTHA'I GNAS LA MKHO BO SEMS RAB GA-YO, ,DAL 'BYOR LUS LA SNYING PO BLANG BA'I PHYIR, ,GZHON NU BLO GROS DBEN PA'I GNAS SU 'GRO, ,BUNG BA GZHON NUS 'DAB RGYA'I TSAL MTHONG LTAR, ,KHO BO'I YID NI DBEN PA'I RO LA CHAGS, ,TING 'DZIN BDUD RTZI RO MYANG BYA BA'I PHYIR, , GZHON NU BLO GROS DBEN PA'I GNAS SU 'GRO, ,DPYID DUS BSIL BA'I MA LA YA @019 RLUNG LTAR, ,NAGS KYIS SMAN LJONGS KHO BO'I YID LA 'BAB, ,NYON MONGS BDUD KYI SDE DE GZHOM BYA'I PHYIR, ,GZHON NU BLO GROS DBEN PA'I NAGS SU 'GRO, ,ZHES GSUNGS SO, , MI 'JIGS PA'I GDENG THOB TSUL NI, NA MO GU RU, GANG LA SKYABS NA BSLU MED DKON MCHOG GSUM, ,'BRAL MED SPYI GTZUG RGYAN DU RTAG BZHUGS GSOL, , SNANG STONG SGYU MA'I RNAL 'BYOR RI KHROD PA, ,SEMS GNONG MED KYI GLU SKAD 'DI BZHIN LEN, ,SHUL NA 'PHRENGS PA'I ZAS NOR LUS PA MED, ,GDONG NA MTSER BA'I LAS NGAN BSAGS PA MED, ,THEG CHEN BSLAB PA'I BSAM SBYOR NYAMS PA MED, ,DA SGYU MA'I LUS SEMS 'BRAL YANG 'GYOD PA MED, ,TSE 'DI'I RNYED BKUR CHE THABS SGRUB MA MYONG, ,'DOD YON SRED PA'I RJES PHYIR 'BRANG MA MYONG, ,DON MED BYA BAS TSE 'DI YENGS MA MYONG, ,DA SGYU MA'I LUS SEMS 'BRAL YANG 'GYOD PA MED, ,CIR SNANG SGYU MAR RTOGS PA'I SHES RAB YOD, ,'GRO DRUG PHA MAR SHES PA'I LHAG BSAM YOD, , THABS SHES ZUNG DU 'BREL PA'I NYAMS LEN YOD, ,DA SGYU MA'I LUS SEMS 'BRAL YANG 'GYOD PA MED, ,THOG MAR GSUNG RAB DGONGS DON TSUL LA SBYANGS, ,BAR DU BLO GSAL GDUL BYA'I TSOGS LA BSHAD, ,THA MAR 'DRIS PA'I DON LA RTZE GCIG BSGOMS, ,DA SGYU MA'I LUS SEMS 'BRAL YANG 'GYOD PA MED, ,RGYAL BA'I BSTAN PA SROG PAS GCES PAR BZUNG, ,RIGS DANG MI RIGS TSUL BZHIN RNAM PAR PHYES, , 'CHAD RTZOD RTZOM PAS DAL 'BYOR DON YOD BYAS, ,DA SGYU MA'I LUS SEMS 'BRAL YANG @020 'GYOD PA MED, ,'GYOD MED GDENG DRUG GI MGUR MA 'DI, ,GANGS BU LE'I MGUL DU BLANGS PA YIN, ,MI KHO BO'I RJES 'JUG DAD LDAN RNAMS, ,MING BZHIN BYED NA 'DI BZHIN MDZOD, ,TSOGS GNYIS ZUNG DU 'JUG PAS RGYUD SBYANGS TE, ,BDEN NYIS ZUNG DU 'JUG PA'I DON RTOGS SHING, ,RIM GNYIS ZUNG 'JUG RDO RJE'I LAM SGRUB NAS, ,'JA' LUS RDO RJE'I SKU RU BDAG GYUR CIG ,CES GSUNGS SO, , PHUL DU BYUNG BA'I MDZAD PA GZHAN YANG MDZAD TSUL NI, KHYOD NYID GZHAN DON GSHEGS PA'I DUS MKHYEN TSE, ,GZHAN GYIS GSOL MANG BTAB KYANG 'DI SKAD DU, ,SANGS RGYAS BSTAN LA TSUL BZHIN BYA BYAS ZIN, ,RING MI GNAS KYANG 'DI MA GRUB SNYAM DANG, ,GNAS MIN BYA BA 'DI BYAS SNYAM 'GYOD MED, ,DE PHYIR BSTAN DANG BDAG LA GCES 'DZIN RNAMS, ,RGYAL BA SKYED BYED YUM LAS 'DI SKAD DU, ,THABS KYI RING BSREL RNAM GNYIS BZHAG PA LAS, ,SHES RAB PHA ROL PHYIN 'DI LEN JI BZHIN, ,ZUR GNAS BLO MIG DAD LDAN RNAMS KYIS KYANG, ,KHO BO'I RNAM BSHAD BSTAN DON BZHAG 'DI YANG, ,LEN PAR RIGS MOD BLO MIG LDONGS RNAMS KYIS, , YOD PA'I LEGS BSHAD PHRAG DOG MUN PAS SGRIB, ,MED PA'I NYES BSHAD BLO NGAN MIG GIS MTHONG, ,DE PHYIR BLO NGAN LOG LAM LA GOMS SHING, ,BSHES GNYEN NGAN PA'I DUG CHUS BSLAD RNAMS KYIS, ,RLONGS PA'I GO CHA SRA BRTAN CHER GYON LA, ,LUNG RIGS RNAMS LCAGS STONG GIS MI LDOG RNAMS, ,KYE MA 'DI LA BDAG GIS CI BYAR YOD, ,CES PA'I SMRE BSNGAGS YANG YANG NYID GSUNG ZHING, ,BLO BZANG KLU SGRUB LUGS @021 'DI 'ANG RMA MED PA, ,SUS KYANG JI BZHIN RTOGS SNYAM MI 'TSAL LO, ,'DI LAS GZHAN DU THAR LAM MED PAR YANG, ,NYID GZHUNG DAG LAS GSAL BAR MNGON PA YIN, ,DE PHYIR BDAG GIS 'DI DON GSUNG RAB LAS, ,LEGS PAR RTZAL ZHING LEGS PAR GCES PAR BZUNG, ,THAR 'DOD BLO GROS DMAN PA DAG LA YANG, ,THAR PA PHYOGS MTHONG TZAM GYIS SA BON NI, ,BSKRUN PAR BYAS 'DI'ANG BDAG GI KHUR KHUR LEGS, ,ZHES GSUNG 'DUS PA'I MAN NGAG GSUNG DUS TSE, ,YANG DAG MTHA' LA ZHUGS PA'I TSUL LUGS LA, ,RGYUD DANG RGYA BOD SHING RTA CHE BZHED TSUL, ,'DI DON 'KHRUL MED 'DI LTAR YIN ZHES GSUNGS, ,MGON KHYOD THEG PA MCHOG LA RAB BZHUGS TSE, ,NYIN DANG MTSAN GYI THUN SKABS MA PHYE BAR, ,'DUS PA DGES RDOR BDE MCHOG LA SOGS KYI, ,MTHA' DRUG TSUL BZHIS RGYAS BTAB RDO RJE'I TSIG ,JI BZHIN LEGS PAR RTOGS NAS RIM GNYIS KYI, ,TING 'DZIN ZAB MO'I BDE LA ROL BAS NA, ,RDO RJE 'DZIN PA ZHES PA'I SGRA DE YANG, ,MGON PO KHYOD LA DON DANG BCAS PA LAGS,, GZHAN YANG, BLA MA PHYAG NA RDO RJES DAM PA NYID LA SANGS RGYAS SNANG BA MTHA' YAS KYI SKU 'KHRU GANG PA GCIG BZHENGS NAS BZANG SPYOD SMON LAM BTAB NA 'DI'I PHYI MA LA BDE BA CAN DU 'KHRUNGS, DE LTAR MA BYAS NA, RGYA GAR NUB PHYOGS KHA CHE'I YUL DU PAndI TA GCIG TU 'KHRUNGS TE, PAn CHUNG LNGA BRGYA TZAM DANG BYAS BSTAN PA LA BYA BA BYAS, DE NAS BDE BA CAN DU 'KHRUNGS ZHES LUNG BSTAN LA, 'KHOR RNAMS @022 KYIS SKU BZHENGS PAR ZHUS PAS NYID KYI GSUNG NAS, DAG PA'I ZHING DON DU GNYER BA BYANG CHUB SEMS DPA' BLO DMAN GYI LUGS YIN, KHO BO GZHAN DU GYUR NA DMYAL BAR SKYE YANG SKYO BA MED, CES GSUNGS, , ZHI BAR GSHEGS PA'I TSUL NI, GDUL BYA'I DON DU ZHING GZHAN GSHEGS PA'I TSE, ,LTA BA RNAM DAG NAM MKHA' DAG PA DANG, ,SNGAR MA TSOR BA'I SPOS DANG ROL MO'I SGRA, ,'JA' 'OD SNA TSOGS SA G-YO'I LTAS BZANG DANG, ,SKU GSUNG THUGS KYI RNAM 'KHRUL BSAM YAS KYIS, ,BKOD PA SPROS ZHING GCIG BSDUS BDAG POR GYUR, ,GSHEGS BYON KUN LA DBANG 'BYOR LTA BUR BSTAN, ,DAD LDAN MOS PA'I RTEN BZHAG PA'I TSUL NI, NYID KYIS GDUNG LA 'DUS PA'I LHA SKU DANG, ,CHOS SKU MNGON MDZAD RING BSREL BSAM MI KHYAB, ,TSUL KHRIMS RNAM DAG BDUNG LOG LA SOGS PA, ,DAD LDAN RTEN DU BZHAG STE SMIN GROL MDZAD, ,DE LTAR MDZAD PA'I TSUL LA DGOS PA DAG ,MKHAS LA CI SKYE BLUN PO GANG RTOGS PA, ,BZHIN DU NYI ZLA SA LA LTUNG KYANG SRID, ,BDE GSHEGS BKA' NI GZHAN DU MI 'GYUR TE, ,JI LTAR SH'AKYA SENG GE SKYOB PA YIS, ,BYANG CHUB TSUL LA SA YI LHA MO YIS, ,DPANG PO JI BZHIN MDZAD TSUL 'DI LA YANG, ,G-YO MED BDEN SMRA KHYOD KYI GSUNGS 'DI DANG, ,RGYAL BA SRAS DANG BCAS RNAMS DPANG PO LAGS, ,MGON PO KHYOD KYI RMAD BYUNG MDZAD PA RNAMS, , BDEN PA RAB STON NYID KYI GSUNG RAB LA, ,MTHA' GNYIS SPANGS TE JI LTAR GNAS PA'I DON, ,PHYOGS MTSON TZAM ZHIG RED NAS BKOD PA LA, ,NYES PA MCHIS NA DAM @023 PAS BZOD MDZAD CING, ,DGE BAS 'GRO KUN BLA MAS RJE 'DZIN SHOG , CES PA 'DI YANG, BLA MA 'DI NYID LA DAD PA CUNG ZAD THOB PA RATNA SAm BHA WA ZHES BYA BAS DE NYID KYI GSUNG RAB THOR BU BA RNAMS LEGS PAR BLTAS PA DANG RTZOM PAR 'DOD PA'I BLO SKYES TE CUNG ZAD BSTOD PA STAG LO'I GDAN SA DPE DMAR DU SBYAR BA'O,, ,,DGE'O,, ,,