—

, ,BSTAN PA'I SNYING PO BDAG MED RTOGS PA'I LTA BA'I RIM PA RNAM PAR BSHAD PA THAR LAM GSAL BYED CES BYA BA BZHUGS SO,,

, ,NA MO MANYDZU SHR'I YE, SMRA BA ZLA MED 'DREN PA ZAS GTZANG SRAS, ,BYAMS BRTZE'I GTER CHEN MI PHAM 'JAM PA'I DBYANGS, ,SHING RTA CHEN PO KLU SGRUB THOGS MED SOGS, ,'DZAM GLING RKYAN GYUR MKHAS PA'I TSOGS LA 'DUD, , RGYAL BA'I MKHYEN PA'I RANG GZUGS 'JAM PA'I DBYANGS, ,NGUR SMRIG GAR ROL RJE BTZUN BTZONG KHA PA, ,YAB SRAS BRGYUD PAR BCAS PA'I ZHABS BTUD NAS, ,BDAG MED LTA BA'I RIM PA RAB BSHAD BYA, ,DE LA 'DIR THAR 'DOD KYI SKYES BUS GANG DU 'JUG PAR BYA BA'I GZHI NI, RGYAL BA'I BSTAN PA RIN PO CHE NYID YIN LA, DER 'JUG PA'I SGO LA MI 'DRA BA YOD KYANG BDAG MED RTOGS PA'I LTA BA KHAS LEN MI LEN GYI SGO NAS KYANG BSTAN PA LA ZHUGS MA ZHUGS SU 'JOG PA NI SGO GCIG YIN NO,, BSTAN PA LA'ANG LUNG RTOGS GNYIS YOD PA LAS, RTOGS PA'I BSTAN PA'I GTZO BO NI BDAG MED RTOGS PA'I LTA BA NYID YIN LA, RTOGS BYA'I BDAG MED LA PHRA RAGS KYIS PHYE NA MANG YANG 'BYED PA'I TSE, GRUB MTHA' RNAM PA BZHI'I 'DOD TSUL DANG BSTUN DGOS KYI, DE BZHI PO GANG RUNG DANG MI MTHUN PA'I BDAG MED RTOGS PA'I LTA BA YOD PAR KHAS LEN DU MI RUNG STE, BDAG MED KHAS LEN PA'I TSUL LA NI GRUB MTHA' BZHIR NGES PA'I PHYIR TE, MKHAS GRUB RJES, DE YANG BDE BAR GSHEGS PA'I BSTAN PA LA BDAG MED KHAS LEN PA'I GRUB MTHA' BZHIR NGES KYI, BZHI PO GANG DANG YANG MI MTHUN PA'I BDAG MED PA'I LTA BA DANG DE NYID GOMS PAR BYED PA'I RNAM GZHAG SU ZHIG GIS CI TZAM SMRAS SU ZIN KYANG, RGYAL BA'I BSTAN PA LAS PHYI ROL TU GYUR

, ,PAR BRJOD PAR BYA'I, MKHAS PA DGES PA'I LAM DU BLO GROS DANG LDAN PA DAG GIS YID CHES PAR BYA BA MIN NO,, ZHES GSUNGS PA'I PHYIR RO,, DES NA BDAG MED PHRA RAGS RNAMS GRUB MTHA' BZHI'I 'DOD TSUL GYI RIM PA DANG MTHUN PAR RJE YAB SRAS KYI BZHED PA JI LTA BA BZHIN GTAN LA DBAB PAR BYA'O,, 'DI LA GNYIS, SPYIR BSTAN PA DANG, SO SOR BSHAD PA'O,, DANG PO NI, RANG CAG GI RGYUD KYI BDAG 'DZIN NI 'KHOR BA'I RTZA BA YIN LA, DE DNGOS SU SPONG BA'AM SPONG BA'I BAG CHAGS 'THUG PO 'JOG PA NI BDAG MED RTOGS PA LA RAG LAS PAS DE LA THOS BSAM GYIS 'JUG DGOS SO,, DES NA GRUB MTHA' BZHI POS KYANG BDAG MED RTOGS PA'I LTA BA DE, THAR BAR BGROD PA'I LAM GYI SROG YIN PAR 'DOD PA LA KHYAD PAR MED DE, BDAG MED MA RTOGS PAR THAR PA THOB PA MI SRID CES 'DOD PA LA KHYAD PAR MED PA'I PHYIR RO,, DE LTA NA'ANG BDAG MED 'DOD TSUL LA KHYAD PAR YOD DE, BYE BRAG SMRA BA KHA CIG GANG ZAG RTAG GCIG RANG CAN GYIS STONG BA DE, GANG ZAG GI BDAG MED PHRA MO'I DON DU 'DOD LA, DBU MA RANG RGYUD PA MAN CHAD KYI RANG SDE RNAMS KYIS, GANG ZAG RANG RKYA THUB PA'I RDZAS YOD KYIS STONG BA'I STONG NYID, GANG ZAG GI BDAG MED PHRA MOR 'DOD PA LA KHYAD PAR MED PA'I PHYIR TE, MKHAS GRUB RIN PO CHES, BYE BRAG SMRA BA DANG MDO SDE PA DANG SEMS TZAM PA DANG DBU CHA RANG RGYUD PA DAG GANG ZAG RANG RKYA THUB PA'I RDZAS YOD RNAM PAR BCAD TZAM RTOGS PAS GANG ZAG GI BDAG MED MTSAN NYID RDZOGS PA RTOGS PAR BZHED PA LA 'DRA MOD, ZHES GSUNGS SHING, TSUL DE BZHIN DU RJE'I DRANG NGES RNAM 'BYED DANG, MKHAS GRUB KYI STONG THUN SOGS DU MA LAS BSHAD PA'I PHYIR RO, ,THAL 'GYUR BAS NI DE 'DRA'I BDAG MED DE, GANG ZAG GI BDAG MED RAGS PAR BZHED DO, ,SPYIR NANG SDE THAMS CAD KYIS NI RTAG GCIG RANG DBANG CAN GYI BDAG MED KHAS LEN PAR MTSUNGS PA YIN TE, 'DI LTAR GZHAN SDE PHYI ROL

PA RNAMS KYIS, BDAG DE RANG GI PHUNG PO DANG GCIG GAM THA DAD, RTAG GAM MI RTAG GANG YIN DPYAD PA NA, RGYU MTSAN PHYIN CI LOG LA BRTEN NAS, BDAG DE NYID PHUNG PO DANG DON GZHAN DU KHAS BLANGS PA YIN LA, DE YANG BDAG DE RANG RKYA BAR BLO NGOR SNANG BAS PHUNG PO DANG GCIG TU MI 'THAD PAR MTHONG NAS DE DANG NGO BO THA DAD YIN PAR KHAS BLANGS PA'I PHYIR RO, ,PHUNG PO SKYE 'JIG BYED KYANG BDAG DE NI SKYE 'JIG MI BYED PA'I RTAG DNGOS DANG, CHA SHAS MED PA'I GCIG PU DANG, PHUNG PO SOGS LAM BLTOS PA'I RANG DBANG CAN GYI KHYAD CHOS GSUM DANG LDAN PAR 'DOD PA NI, PHYI ROL PA RNAMS LA KHYAD PAR MED LA, TSAD SOGS KYI KHYAD PAR 'DOD TSUL MI 'DRA BA MANG NGO, ,RANG SDE SANGS RGYAS PA RNAMS KYIS NI BDAG DE RANG GI PHUNG PO DANG GCIG GAM THA DAD RTAG GAM MI RTAG GANG YIN DPYAD PA NA, PHUNG PO MI RTAG PAS BDAG KYANG MI RTAG CING, PHUNG PO LAS DON GZHAN PA'I BDAG YOD PA LA RIGS PAS GNOD PAR MTHONG NAS, PHUNG PO LNGA 'AM LNGA PO GANG RUNG DANG GCIG YIN PA'I BDAG ZHIG NGES PAR YOD DGOS SNYAM STE, BYE BRAG SMRA BA KHA CIG PHUNG PO LNGA RE RE DANG LNGA'I TSOGS PA DANG RGYUN GANG RUNG GANG ZAG TU 'DOD LA, SEMS TZAM PAS KUN GZHI'I RNAM PAR SHES PA DANG, RANG RGYUD PAS MDO SDE PAS YID KYI RNAM SHES NYID GANG ZAG GI MTSAN GZHIR 'DOD DO, ,DE LTA BU LA DGONGS NAS, 'JUG PA LAS, LNGA CHAR YANG 'DOD KHA CIG SEMS GCIG 'DOD, ,ZHES DANG, 'JUG PA'I RNAM BSHAD LAS KYANG, RANG GI SDE PA RNAMS KYIS KYANG PHUNG PO LAS NGO BO THA DAD PA'I BDAG MED DO SNYAM ZHING 'KHRUL BAS PHUNG PO TZAM BDAG TU KHAS BLANGS TE, DE GNYIS GANG RUNG ZHIG TU KHAS BLANGS DGOS SNYAM DU BSAM PA'O,, ZHES GSUNG, THAL 'GYUR BAS NI RANG GI PHUNG PO LAS DON GZHAN PA'I BDAG DANG, PHUNG PO NYID BDAG TU MI 'DOD KYANG PHUNG PO LA BTAGS PA'I NGA TZAM ZHIG BZHED DO, ,DE YANG PHYI ROL PAS BDAG KHAS LEN DGOS SNYAM NAS GANG ZAG GI BDAG KHAS LEN PA YIN LA, NANG PAS NI BDAG TZAM KHAS LEN YANG

, ,GANG ZAG GI BDAG KHAS MI LEN NO, ,DON SMRA SDE GNYIS KYIS CHOS KYI BDAG MED KYI THA SNYAD MI BYED KYANG, CHOS KYI BDAG KHAS LEN PA MIN LA, RANG RGYUD PA MAN CHAD KYI RANG SDES NI, THAR PA TZAM THOB PA LA CHOS KYI BDAG MED RTOGS DGOS PAR MI BZHED DE, GANG ZAG RANG RKYA THUB PA'I RDZAS YOD KYIS STONG PA'I BDAG MED RTOGS SHING GOMS PAR BYAS PA TZAM GYIS THAR PA THOB NUS PAR BZHED PA'I PHYIR RO, ,THAL 'GYUR BAS NI CHOS DANG GANG ZAG GI BDAG MED GNYIS KA MA RTOGS PAR THAR PA THOB NUS PAR MI BZHED DO, ,BYE BRAG SMRA BA KHA CIG GANG ZAG RTAG GCIG RANG DBANG CAN DU 'DZIN PA'I RTOG PA DE, BDAG 'DZIN LHAN SKYES SU 'DOD PA DANG, KHA CIG RANG MDO SDE PA YAN CHAD KYIS DE YIN NA, BDAG 'DZIN KUN BTAGS YIN PAS KHYAB CES BZHED LA, GANG ZAG RANG RKYA THUB PA'I RDZAS YOD DU 'DZIN PA'I RTOG PA LA, BDAG 'DZIN LHAN SKYES KHYAB CHE BAR BZHED DE, STOR THUN CHEN MO LAS, BYE BRAG SMRA BA NAS DBU MA RANG RGYUD PA'I BAR THEG PA CHE CHUNG GI RANG SDE SU'I LUGS LA YANG GANG ZAG RANG RKYA THUB PA'I RDZAS YOD DU 'DZIN PA NYID GANG ZAG GI BDAG 'DZIN LHAN SKYES KYI 'DZIN STANGS YIN PAR 'DOD LA, ZHES DANG, RANG SDE KHA CIG RTAG GCIG RANG DBANG CAN GYI GANG ZAG TU 'DZIN PA GANG ZAG GI BDAG 'DZIN LHAN SKYES SU 'DOD PA DANG, KHA CIG DE KUN BTAGS YIN KYANG, ZHES SOGS GSUNGS PA'I PHYIR RO, ,'O NA, DE 'DRA'I BDAG MED DE, MDO GANG GI DON YIN ZHE NA, DE 'KHOR LO DANG POS BSTAN PA'I BDAG MED KYI DON YIN PAR GRUB MTHA' SMRA BA BZHIS 'DOD LA, THAL 'GYUR BAS NI DE TZAM MIN PAR YANG BZHED DO, ,DE LTAR YIN KYANG, 'JUG PA'I tIKKA LAS, GANG ZAG RANG RKYA THUB PA'I RDZAS YOD DU 'DZIN PA NI, GRUB MTHA' BLO MA BSGYUR BA LA YANG YOD MOD KYANG, GANG ZAG PHUNG PO DANG MTSAN NYID MI MTHUN PAR GZHAN DU YOD

PAR 'DZIN PA NI GRUB MTHAS BLO MA BSGYUR BA LA MED DO, ,ZHES PHYI MA 'DI LA KUN BTAGS KYIS KHYAB PAR BSHAD PA NI THAL 'GYUR BA'I LUGS KYI DBANG DU BYAS PAR GSAL TE, GZHAN DU NA DRANG NGES RNAM 'BYED, STONG THUN, DKA' 'GREL, SDE BDUN MUN SEL SOGS NAS, GANG ZAG RANG GI PHUNG PO DANG MTSAN NYID MI MTHUN PA'I RANG RKYA THUB PA'I RDZAS YOD DU 'DZIN PA'I RTOG PA NYID, RANG RGYUD PA MAN CHAD KYI RANG SDE'I LUGS KYI BDAG 'DZIN LHAN SKYES SU BSHAD PA DANG 'GAL BA'I PHYIR RO, ,MDOR NA THEG PA GSUM KA'I MTHONG SGOM PAR CHAD MED LAM DANG RNAM GROL LAM GYI DNGOS KYI GZHAL BYA GANG YIN LA TSIG TZAM BRJOD PA'I BRGAL BRTAGS KYIS PHAN DKA' BAS, DE DAG GI GZHAL BYA BDAG MED RNAMS 'DIR 'CHAD PA BZHIN RANG GIS NGES PAR BYA DGOS SO, ,GNYIS PA SO SOR BSHAD PA LA BZHI LAS, DANG PO NI, BYE BRAG SMRA BA KHA CIG PHUNG PO DANG GCIG DANG THA DAD GANG DU'ANG BRJOD DU MED PA'I BDAG KHAS LEN LA, KHA GCIG RANG RKYA THUB PA'I BDAG KHAS LEN YANG, DE THAMS CAD KYANG RTAG GCIG RANG DBANG CAN GYI BDAG MED PAR 'DOD PA LA 'DRA'O, ,RTAG GCIG RANG DBANG CAN ZHES PA NI SNGAR BSHAD PA LTAR YIN LA, DE 'GOG PA'I RIGS PA MANG YANG, BSDU NA, GANG ZAG CHOS CAN, RTAG GCIG RANG DBANG MA YIN TE, MI RTAG CING GZHAN DBANG CAN YIN PA'I PHYIR, DPER NA BUM PA BZHIN, KHYAB STE, MI RTAG NA, RTAG GCIG RANG DBANG CAN YIN PAR 'GAL BA'I PHYIR, RTAGS DER THAL, GDAGS GZHI'I PHUNG PO MI RTAG CING GZHAN DBANG CAN YIN PA'I PHYIR, DER THAL, PHUNG PO SKYE ZHING 'JIG PA DANG LAS NYON GYI GZHAN DBANG CAN YIN PA'I PHYIR, SNGA MA LA KHYAB PA YOD DE, GANG ZAG RANG GI PHUNG PO LA BRTEN NAS 'JOG DGOS PA'I PHYIR RO, ,DE LTAR DPYAD PA'I TSE GANG ZAG MI RTAG PAR RTOGS PAS, RTAG GCIG RANG DBANG CAN YIN PAR BLO NGOR KHEGS LA, DE KHEGS PAS GANG ZAG RANG GI PHUNG PO LAS DON

, ,GZHAN DU YOD PAR KHEGS NAS, RTAG GCIG RANG DBANG CAN GYI BDAG MED PAR NGES PAR 'GYUR RO, ,DE 'DRA'I BDAG MED NGES SHING BSGOMS NA, BDAG MED PHRA MO BSGOMS PA MA YIN PAS BDAG 'DZIN LHAN SKYES LA DNGOS SU MI GNOD KYANG, BDAG MED RAGS PA BSGOM PA YIN PAS BDAG 'DZIN KUN BTAGS LA NI DNGOS SU GNOD PA YIN NO, ,GNYIS PA LA, RANG RKYA THUB PA'I BDAG MED DE GANG ZAG GI BDAG MED PHRA MO MTSAN NYID RDZOGS PAR RANG RGYUD PA MAN CHAD KYI RANG SDES 'DOD KYANG, MDO SDE PA'I 'DOD PA'I GTZO BO YIN PAS SKABS 'DIR BSHAD NA, RJE'I DRANG NGES RNAM 'BYED LAS, GANG ZAG GI BDAG MED NI, RANG SDE THEG PA CHE CHUNG GI GRUB MTHA' SMRA BA GZHAN GYI LTAR NA, GANG ZAG PHUNG PO DANG MTSAN NYID MI MTHUN PA'I RANG RKYA THUB PA'I RDZAS SU MED PA TZAM LA 'DOD DO, ,DE'I TSUL NI, NGA ZHES 'DZIN PA'I GZHI'I BDAG 'DI PHUNG PO'I RJE BO LTA BU DANG, PHUNG PO RNAMS DE'I KHOL BU LTAR 'DZIN TE, NGA'I GZUGS, NGA'I TSOR BA ZHES SOGS SU 'DZIN PAS PHUNG PO RNAMS BDAG DE'I YIN NO ZHES NGAS DBANG BSGYUR BYAR 'DZIN PA'I PHYIR RO, ,DES NA RJE KHOL LTAR PHUNG PO DANG MTSAN NYID MI MTHUN PAR RANG RKYA THUB PAR SNANG BA DE BZHIN DU YOD PAR ZHEN PA NI RDZAS SU YOD PAR 'DZIN PA'O, ,DE BKAG PA NA GANG ZAG DE PHUNG PO LA BTAGS PA TZAM DU 'GYUR TE, TZAM GYIS NI PHUNG PO LAS DON GZHAN DU YOD PA GCOD DO, ,ZHES DANG, DE BZHIN DU STONG THUN, SDE BDUN MUN SEL SOGS LAS KYANG BSHAD DO, ,DES NA GANG ZAG RANG RKYA THUB PA'I RDZAS YOD DU 'DZIN PA'I RTOG PA DES, GANG ZAG DE RANG GI PHUNG PO LA BTAGS PA'I CHOS SU MI 'DZIN PAR DE PHUNG PO LA PHAR MI BLTOS PA'I DBANG SGYUR BA PO'I RJE PO LTA BU DANG, PHUNG PO RNAMS DE LA TSUR BLTOS PA'I KHOL BU LTA BUR DBANG BSGYUR BYAR 'DZIN PA NI, DE'I 'DZIN TSUL YIN LA, RTOG PA 'DI LA GANG ZAG PHUNG PO DANG NGO BO THA DAD PA'I 'DZIN TSUL YOD KYANG, GANG ZAG PHUNG PO DANG RDZAS

THA DAD DU 'DZIN PA'I THA SNYAD 'JIG RTEN LA MED DE, DRANG NGES RNAM 'BYED LAS, DE LA PHUNG PO DANG MTSAN NYID MI MTHUN PA'I GANG ZAG RANG RKYA THUB PA'I RDZAS YOD DU 'DZIN PA NI GANG ZAG RKANG LAG SOGS KYI CHOS LAS RDZAS GZHAN DU 'DZIN PA YIN PAS, ZHES DANG, RTZA SHE'I RNAM BSHAD LAS, BDAG DANG PHUNG PO RJE KHOL LTAR 'DZIN NA DE GNYIS NGO BO THA DAD PAR 'DZIN PAR MI 'GYUR RAM SNYAM NA, DE GNYIS RDZAS GZHAN DU 'DZIN PA 'JIG RTEN GYI THA SNYAD LA MED DE, ZHES GSUNGS PA'I PHYIR RO, ,GZHAN YANG, RTOG PA DE LA RDZAS THA DAD KYI 'DZIN STANGS YOD DE, RTOG PA DE MNGON GYUR DU RGYUD LA YOD PA'I GANG ZAG GIS, RANG GI LUS NGAN PA 'DI DANG, LHA'I LUS BZANG PO LTA BU BA RJE DBANG BYUNG NA BRJE BA POR MNGON GYUR DU ZHEN PA YOD PA'I PHYIR TE, RNAM 'GREL LAS, MCHOG GZHAN DON DU GNYER PHYIR DANG, ,SKYE 'JIG BLO CAN NYID KYI PHYIR, ,SKYE BO 'DI YIS DBANG SOGS LAS, ,BDAG NI THA DAD SHES PAR 'GYUR, ,ZHES GSUNGS PA'I PHYIR RO, ,GZHAN YANG 'JUG tIK LAS, LUGS DE DAG GIS GANG ZAG RDZAS YOD DU MED PAR RTOGS PAR 'DOD KYANG, RNAM SHES GNYIS PO RDZAS YOD DU MED PAR RTOGS PAR MI 'DOD PAS, GANG ZAG RANG RKYA THUB PA'I RDZAS SU MED PAR SMRA BA NI, GANG ZAG GI RANG GI LDOG PA NAS YIN GYI, GANG ZAG GI MTSAN GZHI RNAM SHES LA DE LTAR 'DOD PA MIN NO, ,ZHES 'BYUNG BA LTAR, KHYAD PAR BYED DGOS TE, RANG RGYUD PA DANG RNAM RIG PA SOGS KYIS GANG ZAG RANG LDOG NAS BTAGS YOD DU 'DOD KYANG, RNAM SHES YIN PA'I GANG ZAG NI RDZAS YOD DU 'DOD PAS SO, ,DE 'DRA'I BDAG MED GTAN LA 'BEB BYED KYI RIGS PA MANG YANG, 'DIR CUNG ZAD BRJOD PA LA GNYIS, RTAGS 'GOD PA DANG, TSUL SGRUB PA'O, ,DANG PO NI, RANG RKYA THUB BAR SNANG BA'I BDAG CHOS CAN, PHUNG PO DANG MTSAN NYID MI MTHUN PA'I RANG RKYA THUB PA'I BDAG TU MED DE, PHUNG PO DANG RANG RKYA THUB PA'I GCIG DANG RANG RKYA THUB PA'I THA DAD GANG RUNG DU MA GRUB PA'I PHYIR, DPER NA, RI BONG GI

, ,RVA BZHIN ZHES PA NI, 'BREL ZLA MA DMIGS PA'I RTAGS SO, ,TSUL SGRUB PA LA GNYIS, KHYAB PA DANG, PHYOGS CHOS SO, ,DANG PO NI, SPYIR GCIG DANG THA DAD GRUNG DU MED NA MED PAR NGES PA'I STOBS KYIS 'GRUB LA, PHYOGS CHOS KYI ZUR DANG PO NI, DE LTAR SNANG BA'I BDAG CHOS CAN, PHUNG PO DANG RANG RKYA THUB PA'I GCIG TU MED DE, PHUNG PO DANG THA DAD DU SNANG BA'I PHYIR, KHYAB STE, PHUNG PO DANG RANG RKYA THUB PA'I GCIG TU YOD NA, DE DANG GCIG YIN DGOS LA, DE DANG GCIG YIN NA THA DAD DU SNANG BA MI 'THAD PA'I PHYIR RO, ,RTAGS SNGA MA SGRUB PA NI, DE CHOS CAN, PHUNG PO DANG THA DAD DU SNANG BA YIN TE, DE DANG RANG RKYA BAR SNANG BA'I PHYIR RO, ,RTAGS RTZOD GZHI'I STENG DU GRUB PO, ,ZUR PHYI MA NI, DE CHOS CAN, PHUNG PO DANG RANG RKYA THUB PA'I THA DAD DU MED DE, PHUNG PO LAS DON GZHAN DU MED PA'I PHYIR, KHYAB STE, RANG RKYA THUB PA'I THA DAD DU YOD NA, PHUNG PO LA MA BLTOS PAR YOD DGOS PA'I PHYIR RO, ,PHYOGS CHOS KYI ZUR SNGA MA'I RTAGS NI, 'GAL ZLA DMIGS PA'I RTAGS YIN LA, PHYI MA 'DI 'BREL ZLA MA DMIGS PA'I RTAGS YIN NO, ,GONG GI RTAGS PHYI MA DE SGRUB PA NI, DE CHOS CAN, PHUNG PO LAS DON GZHAN DU MED DE, PHUNG PO'I STENG DU BTAGS NAS BZHAG PA'I PHYIR RO, ,RANG RGYUD PA MAN CHAD KYI RANG SDES DE 'DRA'I BDAG MED DE RTOGS SHING GOMS PAR BYAS PA NYID KYIS BDAG 'DZIN SPANGS TE THAR PA THOB NUS PAR BZHED CING, SO SKYE'I RGYUD KYI DE 'DRA'I BDAG 'DZIN LHAN SKYES DE 'KHOR BA'I RTZA BAR YANG BZHED DO, ,GSUM PA NI, SEMS TZAM PA'I LUGS KYI GANG ZAG GI BDAG MED NI SNGAR BSHAD ZIN PA LTAR YIN LA, CHOS KYI BDAG MED 'JOG TSUL NI GNYIS TE, NGO BO DANG KHYAD PAR LA KUN BTAGS PA'I KUN BTAGS RANG GI MTSAN NYID KYIS MA GRUB PA DANG, GZUGS SGRA SOGS PHYI DON GYIS STONG PA'O, ,DE GNYIS KA'ANG 'KHOR LO BAR BA'I BSTAN DON YIN PAR 'KHOR LO THA MAS BSGRUB

PAR 'DOD LA, DGONGS 'GREL, BYANG SA, THEG BSDUS, BSDU BA SOGS NAS BSHAD PA'I DON RJE NYID KYIS LEGS BSHAD SNYING PO LAS GTAN LA PHAB PA LTAR, MKHAS GRUB RIN PO CHES STONG THUN NAS RGYAS PAR BSHAD PA'I SNYING PO BSDU NA 'DI LTAR YIN TE, NYAN THOS SDE GNYIS KYIS GZUGS SOGS NGO BO DANG KHYAD PAR DU KUN BTAGS KYI GZHIR RANG GI GNAS LUGS KYI DBANG GIS GRUB PAR 'DOD LA, DE 'DRA'I KUN BTAGS NI, SNGON PO SOGS LA 'DI NI GZUGS SO ZHES BTAGS PA NI NGO BO DANG, 'DI NI GZUGS KYI SKYE BA'O 'GAG PA'O ZHES SOGS SU BTAGS PA NI KHYAD PAR DU BTAGS PA YIN LA, SNGON PO SOGS NGO BO DANG KHYAD PAR DE TZAM DU YOD PAS MI 'GOG CING DER RANG GI MTSAN NYID KYIS GRUB PA 'GOG PA YIN NO, ,DE YANG GZUGS SOGS NGO BO DANG KHYAD PAR GYI THA SNYAD KYI GZHI YIN PA NI, MING BRDAS BZHAG PA TZAM YIN KYANG YOD LA, DER RANG GI MTSAN NYID KYIS GRUB PA NI MED PAS DE LTAR SNANG BA LTAR GRUB PA KHEGS DGOS SO, ,DE LA GZUGS SOGS NGO BO DANG KHYAD PAR GYI THA SNYAD KYI GZHIR RANG GI MTSAN NYID KYIS GRUB PA RTOGS PA LA SNANG BA'I SNANG BA TZAM NI, RANG GI MTSAN NYID KYIS MA GRUB PA'I SGRO BTAGS SU MDO SDE PAS KYANG GRUB CING, RTOG PA DE 'KHRUL SHES SU'ANG DES GRUB PAS SNANG BA DE RANG GI MTSAN NYID KYIS MA GRUB PA TZAM CHOS KYI BDAG MED PHRA MO MIN NO, ,'O NA CI ZHE NA, 'DIR NI MDO SDE PAS BAG CHAGS BRTAN PA LAS BYUNG BA'I MIG GI RNAM SHES SOGS DBANG SHES RNAMS NI RANG GI SNANG YUL LA MA 'KHRUL BAR 'DOD CING, DBANG SHES DE RNAMS LA YUL GZUGS SOGS RNAMS NGO BO DANG KHYAD PAR GYI THA SNYAD BTAGS PA'I GZHIR RANG GI MTSAN NYID KYIS GRUB PAR SNANG ZHING SNANG BA LTAR GRUB PAR 'DOD PAS, DER GRUB PA BKAG NAS BKAG PA DE CHOS KYI BDAG MED DU 'JOG GO ,DE YANG RNAM RIG PA'I SKABS 'DIR BRDA BYANG GI SKYES BUS SNGON PO MTHONG BA'I TSE, MIG SHES DE LA SNGON PO SNGON POR SNANG BA DANG, SNGON

, ,PO PHYI ROL DON DU SNANG BA DANG, SNGON PO 'DI NI GZUGS SO 'DI NI GZUGS KYI SKYE BA'O ZHES SOGS KYI THA SNYAD 'JUG PA'I 'JUG GZHIR GYUR PA'I SNGON POR SNANG BA'I SNANG TSUL GSUM YOD DO, ,DE'I RGYU MTSAN NI, MIG SHES LA SNGON PO TSUL JI LTAR SNANG BA'I SNANG BA DE NYID DRAN PA'I YUL DU BYAS NAS DE LA ZHEN TE 'DI NI SNGON PO'O 'DI SNGON PO'I SKYE BA'O ZHES SOGS KYI THA SNYAD BYED PA'I RTOG PA SNGON 'DZIN MIG SHES DES RANG STOBS KYIS 'DREN CING, SNGON PO'O ZHES BRJOD PA'I DON DE'I NGO BO GANG YIN DRIS NA, SNGON 'DZIN MIG SHES LA SNGON PO JI LTAR SNANG BA'I SNANG BA DE NYID LA ZHEN NAS DE'I NGO BO GZUGS YIN NO ZHES LAN 'DEBS PA'I KUN SLONG GI RTOG PA MIG SHES DE'I STOBS KYIS 'DREN NUS PAS SO, ,DES NA SNGON 'DZIN MIG SHES LA SNGON PO SNGON POR SNANG BA'I TSE MING BRDAS BZHAG TZAM MA YIN PAR RANG GI GNAS TSUL GYI NGOS NAS GRUB PAR SNANG BA'I SNANG TSUL YOD PAR SHES PAS, MIG SHES KYI NGO BOR SNGON PO SNGON PO ZHES PA'I THA SNYAD 'JUG PA'I 'JUG GZHIR RANG GI MTSAN NYID KYIS GRUB PAR SNANG BA'I DON NI DE YIN NO, ,DE LTAR NA'ANG RTOGS DKA' BA'I GNAS YIN PAS BLO NANG DU PHYOGS PA'I RNAM DPYOD CAN DAG GIS RTOGS NUS KYI, GZHAN NI TSIG TZAM LA'ANG 'KHRUL BAR 'GYUR RO, ,DE'I PHYIR RNAM RIG PAS SO SKYE'I RGYUD KYI SNGON 'DZIN DBANG PO'I MNGON SUM YANG RANG GI SNANG YUL LA 'KHRUL BAR 'DOD CING, DES DRANGS NAS SKYES PA'I RTOG PA DE ZHEN YUL LA 'KHRUL PA'I CHOS KYI BDAG 'DZIN DU 'DOD DO,, DON SMRA SDE GNYIS KYIS SNGON PO LA SNGON PO'O ZHES BRJOD PA'I SGRA'I BRJOD BYA'I RANG LDOG RTOG BTAGS YIN PAS RANG GI MTSAN NYID KYIS MA GRUB CES 'DOD KYANG, SNGON PO SNGON PO ZHES PA'I SGRA 'JUG PA'I GZHIR RANG GI MTSAN NYID KYIS GRUB PAR 'DOD PAS RNAM RIG PA DANG MI 'DRA BA'I KHYAD PAR CHE'O,,

DE GNYIS KYI KHYAD PAR SLAR GO BDE BAR BRJOD NA, 'DIR RNAM RIG PA DANG DON SMRA SDE GNYIS KYI 'DOD TSUL LA KHYAD PAR YOD PAR THAL, RNAM RIG PA'I SKABS 'DIR GZUGS SOGS RANG 'DZIN RTOG PA'I ZHEN GZHIR RANG GI MTSAN NYID KYIS MA GRUB PAR 'DOD PA NI RTOG PA'I ZHEN GZHI'I RANG LDOG TZAM LA MI BYED KYI; DE'I GZHI LDOG BAG CHAGS BRTAN BYUNG GI DBANG SHES LA GZUGS SOGS KYI THA SNYAD GANG LA 'JUG PA'I GZHIR SNANG BA'I SNANG TSUL LTAR GYI DON LA 'DOD CING, SNANG BA LTAR RANG GI MTSAN NYID KYIS MA GRUB PAR 'DOD LA, MDO SDE PAS NI SNGON PO LA GZUGS SO ZHES PA'I SGRA'I BRJOD BYA'I CHA LTA BU RANG GIS MTSAN NYID KYIS MA GRUB PAR 'DOD KYANG, BSHAD MA THAG PA'I SNANG TSUL LTAR RANG GIS MTSAN NYID KYIS GRUB PAR 'DOD PA'I PHYIR RO, ,DE'I RGYU MTSAN YANG YOD DE, MDO SDE PAS NI DBANG SHES DON MTHUN LA DE LTAR SHAR BA DE DNGOS PO'I GNAS TSOD KYIS SHAR BAR 'DOD LA, RNAM RIG PAS NI MIG SHES SOGS LA DE LTAR SNANG BA DE RANG GI GNAS TSED KYI DBANG GIS SHAR BA MIN GYI, MA RIG BAG CHAGS KYI DBANG GIS SHAR BAR MA ZAD, THOG MA MED PA NAS 'DI NI GZUGS SO, ,'DI NI GZUGS KYI SKYE BA DANG 'JIG PA'O ZHES SOGS NGO BO DANG KHYAD PAR DU 'DOGS PA'I THA SNYAD YANG YANG GOMS PA'I BAG CHAGS KYI DBANG GIS SHAR BAR 'DOD PA'I PHYIR RO, ,BAG CHAGS DE LA NI MNGON PAR BRJOD PA'I BAG CHAGS ZHES BYA'O, ,DES NA, BAG CHAGS BRTAN BYUNG GI DBANG SHES GCIG LA'ANG SNGON PO SNANG BA'I TSE, SNGON PO SNGON POR SNANG BA DANG, SNGON PO PHYI ROL DON DU SNANG BA DANG, SNGON PO SNGON PO ZHES PA'I THA SNYAD 'JUG PA'I GZHIR RANG GI MTSAN NYID KYIS GRUB PAR SNANG BA GSUM DANG DES DRANGS PA'I RTOG PA'ANG GSUM YOD PA LAS, SNGA MA NI RIGS MTHUN PA'I BAG CHAGS KYIS SNANG BA YIN PAS MI 'GOG CING, PHYI MA GNYIS SU SNANG BA LTAR GRUB PA 'GOG PA YIN TE 'CHAD PAR 'GYUR RO, ,DE YANG, THEG BSDUS LAS, MING

, ,GI SNGA ROL BLO MED PHYIR, ,MANG BA'I PHYIR DANG MA 'DRES PHYIR, ,DE YI BDAG NYID BDAG MANG DANG, ,BDAG 'DRES 'GAL BAS GRUB PAR 'GYUR, ,ZHES RIGS PA GSUM BSTAN PA'I DANG PO NI, LTO LDIR BA SOGS LA RANG RANG GI MING 'JUG PA DE RANG GI GNAS TSOD KYIS DBANG GIS 'JUG CING 'JUG GZHI DER RANG GI MTSAN NYID KYIS GRUB PA YIN NA, LTO LDIR BA CHOS CAN, KHYOD LA BUM PA ZHES PA'I THA SNYAD 'JUG PA DE BRDA LA MI BLTOS PAR THAL, KHYOD BUM PA'O ZHES BRJOD PA'I THA SNYAD KYI GZHIR DNGOS PO'I GNAS TSOD KYI NGOS NAS RANG GI MTSAN NYID KYIS GRUB PA'I PHYIR, 'DOD NA, LTO LDIR BA LA BUM PA'O SNYAM PA'I BLO SKYE BA DE BRDA LA MI BLTOS PAR SKYE BAR THAL, 'DOD PA DE'I PHYIR, 'DOD NA, LTO LDIR BA LA BUM PA'O, ,ZHES MING MA BTAGS PA'I SNGA ROL NAS LTO LDIR BA MTHONG TZAM NYID NAS KYANG 'DI NI BUM PA'O SNYAM PA'I BLO SKYE BAR THAL LO, ,DES NA, LTO LDIR BA CHOS CAN, KHYOD BUM PA'O ZHES BRJOD PA'I THA SNYAD KYI GZHIR RANG GI MTSAN NYID KYIS MA GRUB STE, KHYOD LA BUM PA'O ZHES MING MA BTAGS PA'I GONG ROL NAS DE'O SNYAM PA'I BLO SKYE BA MED PA'I PHYIR RO, ,RIGS PA GNYIS PA NI, SKYES BU GCIG LA DBANG PO DANG BRGYA BYIN DANG MIG STONG CAN SOGS MING MI 'DRA BA DU MA BTAGS PA'I TSE MING DE DAG SKYES BU DE LA DNGOS PO'I DBANG GIS 'JUG PAR THAL, DON DE MING DE DAG 'JUG PA'I 'JUG GZHIR RANG GI MTSAN NYID KYIS GRUB PA'I PHYIR, 'DOD NA, MING DU MA YIN PA LTAR 'JUG GZHI'I DON YANG DU MA YIN PAR THAL LO, ,DE LTAR THAL BA LAS, DON GCIG MING DU MA'I 'JUG GZHIR RANG GI MTSAN NYID KYIS MA GRUB STE, DON GCIG PO DE DU MAR MI 'GYUR BA'I PHYIR RO, ,RIGS PA GSUM PA NI, SKYES BU MI 'DRA BA GNYIS LA BKRA SHIS ZHES MING 'DRA BA GCIG BTAGS PA'I TSE MING DE DON DE GNYIS LA DNGOS DBANG GIS 'JUG PAR THAL, DON MI

'DRA BA GNYIS PO DE MING GCIG PO 'JUG PA'I 'JUG GZHIR RANG GI GNAS LUGS KYI DBANG GIS GRUB PA'I PHYIR, 'DOD NA, MING GCIG PA LTAR DON GNYIS KYANG GCIG TU THAL LO, ,DE LTAR THAL BA LAS DON GNYIS PO DE CHOS CAN, MING GCIG PO DE 'JUG PA'I 'JUG GZHIR RANG GIS MTSAN NYID KYIS MA GRUB STE, KHYOD MI 'DRA BA'I THA DAD YIN PA'I PHYIR RO, ,'ON KYANG, MDO SDE PA LTAR NA BUM PA ZHES PA'I BRDA'I DNGOS KYI BRJOD BYA RANG GI MTSAN NYID KYIS GRUB NA, BUM PA'O SNYAM PA'I BLO SKYE BA DE BRDA 'BREL BYAS PA LA MI BLTOS PA'I SKYON YOD KYANG, DBANG SHES LA LTO LDIR BA DE BUM PA'I MING 'JUG PA'I GZHIR SNANG TSUL LTAR RANG GIS MTSAN NYID KYIS GRUB PA LA DE LTA BU'I SKYON MED CES SMRA YANG, RNAM RIG PAS DE 'DRA'I KHYAD PAR DBYE MI NUS PAR RIGS PAS 'PHUL NAS 'GOG PA YIN NO, ,BYANG SA DANG BSDU BA GNYIS LAS KYANG DE 'DRA'I RIGS PA BSHAD DE, CHOS GZHAN LA'ANG SBYAR BAR BYA'O, ,'O NA, RIGS PA DE DAG GIS NGO BO DANG KHYAD PAR LA KUN BTAGS PA'I KUN BTAGS RANG GI MTSAN NYID KYIS MA GRUB PA RTOGS NUS KYANG, GZUGS SOGS PHYI ROL DON GYIS STONG PA JI LTAR RTOGS NUS ZHE NA, NUS TE, BSHAD MA THAG PA LTAR GZUGS SOGS RANG 'DZIN RTOG PA'I ZHEN GZHIR RANG GI MTSAN NYID KYIS GRUB PAR KHEGS PA NA, DE'I TSE SNANG BA LTAR ZHEN PA'I RTOG PA DE ZHEN YUL LA 'KHRUL PAR 'GRUB LA, DE GRUB PA'I STOBS KYIS DE LTAR SNANG BA'I DBANG SHES RNAMS KYANG RANG GI SNANG YUL LA 'KHRUL PAR 'GRUB, DE GRUB NA DBANG SHES LA SNGON PO SOGS KYI RNAM PA SHAR BA DE, PHYI ROL DON GYIS RANG 'DRA'I RNAM PA TSUR GTAD NAS SHAR BA MA YIN GYI, RANG SNANG MKHAN GYI DBANG SHES RNAMS SNGO SOGS DE DANG DE'I BDAG NYID DU SKYES PAR RTOGS PAS, SNGO SOGS RANG SNANG MKHAN GYI SHES PA DANG RDZAS GCIG DU

, ,GRUB PO, ,DE GRUB NA, SNGO SOGS RANG SNANG BA'I SHES PA LAS RDZAS THA DAD KYIS STONG BAR 'GRUB PA'I PHYIR NA PHYI ROL GYI DON MED PAR KHONG DU CHUD PAR 'GYUR BA YIN NO, ,GZHAN YANG DBANG SHES LA LTOS PA'I PHYI DON 'GOG PA LA, PHYI ROL GYI DON ZHES PA DE JI LTA BU ZHE NA, 'DI LA THOG MAR DON SMRA SDE GNYIS KYIS PHYI DON 'DOD TSUL CUNG ZAD BRJOD PAR BYA STE, SPYIR DE GNYIS KYIS GZUGS 'DZIN PA'I SKYES BU LA GZUGS RGYANGS CHAD KYI TSUL DU SNANG BA LTAR GRUB PAS PHYI DON YOD CES 'DOD LA, KHYAD PAR BYE BRAG SMRA BAS DE LTAR SNANG BA'I SNGON PO LTA BU MIG DBANG GIS RNAM MED THUG PHRAD DU 'DZIN PAR 'DOD CING, MDO SDE PAS MIG SHES LA DE 'DRA'I RNAM PA SHAR BA'I SGO NAS 'DZIN PAR 'DOD DO, ,DE YANG RDUL PHRAN DBANG SHES KYI YUL MIN PAS, RDUL PHRAN CHA MED BSAGS PA'I RAGS PA DE PHYI ROL GYI DON DU 'DOD DO, ,THAL 'GYUR BAS PHYI DON 'DOD KYANG BSHAD PA THAG PA'I PHYI DON MI 'DOD PAS, PHYI DON 'GOG PA'I RIGS PAS RDUL PHRAN CHA MED BSAGS PA'I RAGS PA PHYI ROL GYI DON YIN PA KHEGS KYANG, SPYIR PHYI DON KHEGS PAR MI BZHED DO, ,MDO SDE PAS SNGON PO DANG SNGON 'DZIN DBANG SHES GNYIS RGYANGS CHAD DU SNANG BA LTAR GRUB PAR 'DOD CING DE LTAR SNANG BA DE, YUL GYI NGOS NAS RANG 'DRA'I RNAM PA TSUR GTAD NAS SHAR BA'I PHYI DON YIN PAR 'DOD DO, ,RANG RGYUD PA DANG SEMS TZAM PA GNYIS KYI LUGS LA PHYI ROL GYI DON MED PAS, DE GNYIS KYIS TSUR MTHONG GI RGYUD KYI SNGON 'DZIN DBANG SHES LA SNGON PO RGYANGS CHAD DU SNANG BA LTAR MA GRUB PAR 'DOD DE, DE'I RGYU MTSAN YANG; SNGON 'DZIN DBANG SHES LA SNGON PO RGYANGS CHAD KYI TSUL DU SNANG BA'I SGO NAS DE'I RNAM PA SHAR BA NI, THOG MA MED PA NAS GOMS PA'I MNGON PAR BRJOD PA'I BAG CHAGS KYI DBANG GIS SHAR BA TZAM YIN GYI, YUL GYIS TSUR BZHAG PA'I RNAM PA MA YIN TE, YIN NA, RIGS PAS GNOD PA'I

PHYIR, GNOD TSUL NI 'CHAD PAR 'GYUR RO, ,SNGON 'DZIN DBANG SHES LA SNGON PO SNANG BA'I TSE SNGON PO DE NANG SHES PA'I BDAG NYID YIN GYI PHYI ROL GYI DON MIN LA, DE RANG 'DZIN SHES PA'I BDAG NYID YIN KYANG SHES PA MIN PAS, PHYI DON MED KYANG GZUGS SGRA DRI SOGS YOD DO, ,TSUL 'DI NGES DKA' BA YIN TE, SNGON GYI RNAM RIG PA'I LUGS 'DZIN PA'I MKHAS PA MANG POS KYANG SEMS TZAM PA'I LUGS LA GZUGS SGRA SOGS RANG 'DZIN SHES PA'I BDAG NYID YIN PA'I PHYIR SHES PA YIN ZHES 'DOD LA, KHA CIG 'DI PA'I LUGS LA GZUGS SGRA SOGS KHAS MI LEN CES ZER BA BYUNG NGO; ;PHYI DON 'GOG TSUL LA RIGS PA MANG YANG, GTZO BO 'GA' ZHIG BRJOD NA, MDO SDE PAS 'DOD PA LTAR GYI PHYI DON MED DE, RDUL PHRAN CHA MED BSAGS PA'I RAGS PA MED PA'I PHYIR, DER THAL, RDUL PHRAN CHA MED MED PA'I PHYIR, DER THAL, RDUL YIN NA, CHA BCAS YIN DGOS PA'I PHYIR, DER THAL, DE YIN NA, PHYOGS CHA YOD DGOS PA'I PHYIR TE, DE YIN NA, GOS MNON NUS SU YOD DGOS LA, DE LTA NA PHYOGS CHA DANG BCAS PAR 'GRUB PA'I PHYIR, CHA MED 'GOG TSUL 'OG TU 'CHAD PAR 'GYUR RO, ,GZHAN YANG, PHYI ROL GYI DON MED DE, SNGON 'DZIN DBANG PO'I MNGON SUM LA SNGON PO RGYANGS CHAD DU SNANG BA LTAR MA GRUB PA'I PHYIR, DER THAL, DE LA SNGON PO'I RNAM PA SHAR BA DE, YUL GYI NGOS NAS TSUR GTAD NAS SHAR BA MA YIN GYI, SHES NGOR BAG CHAGS KYI DBANG GIS SHAR BA YIN PA'I PHYIR, GAL TE YUL GYIS RANG 'DRA'I RNAM PA TSUR GTAD NAS SHAR BA YIN NA, SKYES BU GCIG GI GZUGS LA DGRA GNYEN GNYIS KYIS BLTAS PA'I TSE, SKYES BU DE'I GZUGS YID DU 'ONG MI 'ONG GNYIS KA'I BDAG NYID YIN PAR THAL, DE'I TSE SHES PA GNYIS LA YID DU 'ONG MI 'ONG GI RNAM PA GNYIS SHAR BA GANG ZHIG ,DE YUL RANG NGOS NAS TSUR

, ,GTAD PA'I RNAM PA YIN PA'I PHYIR RO, ,RTAGS PHYI MA KHAS, 'DOD MI NUS SO, ,GZHAN YANG, DGRA'I PHYOGS PHAM MO ZHES PA'I GTAM BRJOD PA DE, DGRA GNYEN BAR MA GSUM GYIS THOS PA'I TSE, GTAM DE 'DOD MI 'DOD BAR MA GSUM KA YIN PAR THAL, DE'I TSE DE GSUM KA LA GTAM DE 'DOD MI 'DOD BAR MA GSUM MAM SNYAN MI SNYAN BAR MA GSUM GYI RNAM PA SO SOR SHAR BA GANG ZHIG ,DA LTAR SHAR BA DE NANG GI BLO'I DBANG GIS BZHAG PA MA YIN PAR YUL GYI RANG NGOS NAS TSUR GTAD PA'I RNAM PA YIN PA'I PHYIR, RTAGS PHYI MA KHAS, DE NI RNAM 'GREL LAS, NGES PA'I BDAG NYID RANG NGO BOS, ,MA YIN DU MA'I BDAG SKYON PHYIR, ,ZHES SOGS GSUNGS PA'I RIGS PA'O, ,GZHAN YANG, MIG SHES LA SNGON PO'I RNAM PA SHAR BA DE PHYI ROL DON GYIS GTAD PA'I RNAM PA MA YIN TE YIN NA, CHU PHOR GANG LA LAS CAN GYI LHA MI YI DVAGS GSUM GYI CIG CAR DU BLTAS PA'I TSE, CHU DE LHA LA BDUD RTZI MI LA CHU YI DVAGS LA RNAG KHRAG TU SNANG BA NA, CHU DE NYID DNGOS PO DE GSUM KA'I GZHI MTHUN YIN PAR THAL, 'DOD PA DE'I PHYIR, DE NI THEG BSDUS LAS, YI DVAGS DUD 'GRO MI RNAMS DANG, ,LHA RNAMS JI LTAR RIGS RIGS SU, ,DNGOS GCIG YID NI THA DAD PHYIR,, DON MA GRUB PAR 'DOD PA YIN, ,ZHES GSUNGS PA'I RIGS PA'O, ,GZHAN YANG, PHYI ROL GYI DON MED DE, GZUGS 'DZIN MIG SHES SOGS LA RANG YUL GYI RNAM PA SNA TSOGS PA DE DANG DER SNANG BA NI, SHES PA RNAMS DE DANG DE'I RNAM PA CAN DU SKYES PA TZAM YIN PA'I PHYIR, DER THAL, LANGKAR GSHEGS PA LAS, PHYI ROL SNANG BA YOD MED DE, ,SEMS NI SNA TSOGS RNAMS SU SNANG, ,ZHES GSUNGS PA'I PHYIR RO, ,GZHAN YANG, PHYI ROL GYI DON MED DE, SNGON 'DZIN MIG GI RNAM SHES DANG, SNGON PO GNYIS RDZAS GZHAN MA YIN PA'I PHYIR, DER THAL, DE GNYIS RDZAS GCIG YIN PA'I PHYIR, DER THAL,

DE GNYIS LHAN CIG DMIGS DES YIN PA'I PHYIR, DER THAL, LHAN CIG DMIGS NGES DE, SNGON PO DANG SNGON 'DZIN TSAD MA RDZAS GZHAN MA YIN PAR SGRUB PA'I RTAGS YANG DAG YIN PA'I PHYIR, DE YANG SNGON PO CHOS CAN, SNGON 'DZIN TSAD MA DANG RDZAS GZHAN MA YIN TE, DE DANG LHAN CIG DMIGS NGES YIN PA'I PHYIR, DPER NA, BYAS PA DANG MI RTAG PA BZHIN ZHES PA STE, RTAGS DE'I DON NGES DKA' BAS BZHED PA MI MTHUN PA MANG DU SNANG YANG, MKHAS GRUB RIN PO CHES BSHAD PA LTAR, 'DIR LHAN CIG NI YUL DUS GCIG PA DANG, DMIGS PA NI TSAD MAS DMIGS PA DANG, NGES PA NI KHYAB PA'I DON YIN NO, , DES NA SKABS 'DIR NI SNGON 'DZIN TSAD MAS SNGON PO NAM DMIGS PA'I TSE, SNGON 'DZIN TSAD MA YANG RANG MYONG BA'I RANG RIG GIS DMIGS PAS KHYAB LA, SNGON 'DZIN TSAD MA DE RANG MYONG BA'I RANG RIG GIS NAM DMIGS PA'I TSE SNGON PO YANG SNGON 'DZIN TSAD MAS DMIGS PAS KHYAB PA'O, ,DE'I TSE DE GNYIS RDZAS GCIG YIN LA, SNGON 'DZIN TSAD MA LA SNGON PO RGYANGS CHAD KYI TSUL DU SNANG BA LTAR GRUB NA, DE GNYIS RDZAS THA DAD YIN PAR 'GYUR BAS LHAN CIG DMIGS MA YIN PAR 'GYUR RO, ,PHYI DON MED NA, 'O NA, RANG CAG RNAMS KYI DBANG PO'I MNGON SUM LA GZUGS SGRA SOGS RGYANGS CHAD KYI TSUL GYIS GZUGS 'DZIN RDZAS THA DAD PAR PHYI ROL DON DU SNANG BA 'DI CI YIN ZHE NA, RNAM RIG PAS DE NI, KUN GZHI'I RNAM SHES KYI STENG DU PHYI ROL DON SNANG GI BAG CHAGS BZHAG PA SMIN PA'I SNANG BA YIN ZHES BZHED LA, DE YANG THOG MED NAS GOMS PA'I BAG CHAGS KYI DBANG GIS KUN RTOG LA DE LTAR DU SNANG BA YIN TE, MDO SDE RGYAN LAS, JI LTAR TSUL BZHIN BRIS PA'I RI MO LA, ,MTHO DMAN MED KYANG SNANG BA'I TSUL DE LTAR, ,YANG DAG MA YIN RTOG LA RNAM KUN TU, ,GNYIS PO MED KYANG RTAG TU

, ,SNANG BAR 'GYUR, ,ZHES GSUNGS PA LTAR YIN PA'I PHYIR RO, ,'DIR PHYI DON MED KYANG BYA BYED 'THAD TSUL RGYAS PAR 'CHAD DGOS LA YOD NA'ANG MANG DU 'GYUR DOGS PAS, RNAM RIG PA'I LUGS RTOGS NUS PA'I SHES RAB CAN YIN NA, SNGAR BSHAD PA DE DAG GI DON LEGS PAR SHES PAR BYA'O, ,SEMS TZAM PAS RIGS PAS BSGRUBS PA'I PHYI ROL DON GYIS STONG PA'I STONG NYID DE, THAL RANG GNYIS DANG SNGAGS KYI SKABS SU'ANG KHAS LEN DGOS PAR RJE YAB SRAS KYIS BSHAD DO, ,BLA MED KYI SKABS SU YANG KHAS LEN PA YIN TE, GSANG 'DUS RTZA RGYUD LAS, GZUNG DANG 'DZIN PA RNAM SPANGS PA, ,ZHES PA'I SKABS SU BSHAD CING, RIM LNGA GSAL SGRON LAS KYANG, BDE STONG SBYOR BA LA THA NA'ANG RNAM PAR RIG PA TZAM GYI LUGS KYI GZUNG 'DZIN RDZAS THA DAD KYIS STONG PA'I STONG NYID TZAM ZHIG LA NGES PA LEGS PAR RNYED DGOS TE, ZHES GSUNGS PA'I PHYIR RO,, ` BZHI PA LA GNYIS, DBU MA RANG RGYUD PA DANG, THAL 'GYUR PA'I LUGS SO, ,DANG PO LA, 'DI PA'I LUGS KYI GANG ZAG GI BDAG MED JI LTAR YIN PA NI SNGAR BSHAD ZIN LA, CHOS KYI BDAG MED 'JOG TSUL LA, THOG MAR DGAG BYA DANG DE 'DZIN PA'I BDEN 'DZIN DNGOS GZUNG BAR BYA STE, DE YANG THAL 'GYUR BAS NI SO SKYE'I RGYUD KYI GZUGS SGRA SOGS 'DZIN PA'I GNOD MED KYI BLO DON MTHUN RNAMS LA NI, YUL GZUGS SGRA SOGS RANG GI MTSAN NYID KYIS GRUB BAR SNANG YANG SNANG BA LTAR MA GRUB PAS, DE RNAMS SNANG YUL LA 'KHRUL BAR 'DOD LA, RANG RGYUD PAS NI, BLO DE RNAMS LA DE LTAR SNANG ZHING SNANG BA LTAR GRUB PAR 'DOD PAS, SNANG YUL LAM 'KHRUL BAR BZHED DE, THAL RANG GNYIS KYI DGAG BYA LA PHRA RAGS KYI KHYAD PAR CHE'O, ,DES NA 'DI

PA'I LUGS LA CHOS THAMS CAD BLO DON MTHUN NAM GNOD MED LA SNANG BA'I DBANG GIS BZHAG PA TZAM DU BZHED PAS, BLO GNOD MED LA SNANG BA'I DBANG GIS BZHAG PA TZAM MIN PAR YUL RANG GI SDOD LUGS KYIS NGOS NAS GRUB PA NI RTAGS KYI DGAG BYA YIN LA, DE LTAR GRUB PA ZHIG BYUNG NA; BDEN PAR GRUB PA DON DAM PAR GRUB PA SOGS SU 'GYUR BA YIN PAS, DE LTAR GRUB PAR 'DZIN PA NI BDEN 'DZIN LHAN SKYES SU 'DOD CING, BDEN 'DZIN LA SHES SGRIB KYIS KHYAB PAR BZHED DO, ,THAL 'GYUR BAS NI, CHOS THAMS CAD MING DANG THA SNYAD 'DOGS PA'I BLO'I DBANG TZAM GYIS 'JOG NUS PAR 'DOD LA, 'DI PAS DE TZAM GYIS MI NUS KYI, 'PHRAL GYI 'KHRUL RGYU'I GNOD PA MED PA'I DBANG PO'I SHES PA SOGS LA SNANG BA'I DBANG GIS 'JOG DGOS PAR 'DOD PAS 'JOG TSUL KHYAD PAR CHE'O, ,BLO LA SNANG BA'I DBANG GIS 'JOG TSUL 'JUG tIK, DRANG NGES RNAM 'BYED, STONG THUN GSUM GYI DGONGS PA BSDUS TE DPE'I STENG NAS BSHAD NA, DPER NA, SGYU MA MKHAN GYIS RDE'U DANG SHING BU SOGS RTA GLANG SOGS SU SPRUL PA'I TSE NA, SNANG TSUL GSUM 'BYUNG BA YOD DE, SGYU MA MKHAN RANG NYID LA GZHI DE RTA GLANG DU SNANG BA YOD KYANG ZHEN PA MED, SNGAGS DANG RDZAS KYIS MIG BSLAD PA'I LTAD MO BA LA DE RTA GLANG DU SNANG ZHEN GNYIS KA YOD, MIG MA BSLAD PA'I LTAD MO BA PHYIS SLEB PA LA DER SNANG ZHEN GNYIS KA MED DO,, DE'I TSE SPRUL GZHI DE RTA GLANG SOGS SU SNANG BA YOD KYANG, SNANG BA DE SGYU MA MKHAN LTAR NA YUL RANG GI SDOD LUGS KYI NGOS NAS MA YIN GYI, SNGAGS RDZAS KYIS BSLAD PA'I BLO'I DBANG GIS YIN LA, MIG BSLAD PA'I LTAD MO BA LTAR NA BLO LA SNANG BA'I DBANG GIS BZHAG PA MA YIN PAR YUL RANG NGOS NAS RTA GLANG GI SDOD LUGS SU YOD PAR 'DZIN NO,, DPE DE DON LA SBYAR NA, MIG BSLAD PA'I LTAD MO BA LA

, ,SGYU MA'I RTA GLANG JI LTAR SNANG BA DE BZHIN DU, MA RIG PAS BSLAD PA'I THA MAL BA'I SEMS CAN RNAMS LA CHOS 'DI DAG SNANG BA NA BLO LA SNANG BA'I DBANG GIS BZHAG PA MA YIN PAR RANG GI SDOD LUGS KYI NGOS NAS GRUB PAR SNANG NGO,, NA MA DE LTAR DU SNANG BA'I SDOD TSUL DE RIGS PAS KHEGS PA NA, SGYU MA MKHAN LA RTA GLANG JI LTAR SNANG BA LTAR PHYI NANG GI CHOS RNAMS BLO LA SNANG BA'I DBANG GIS BZHAG PA TZAM DU SHES NAS, DE'I DBANG GIS MA BZHAG PA'I SDOD LUGS SU YOD PAR MI 'DZIN NO,, MYU GU SKYE BA NI BLO'I DBANG GIS BZHAG PA YIN KYANG, SPYIR MYU GU RANG GI NGOS NAS SA BON LAS SKYE BA NI, DE'I CHO SPRUL GZHI'I NGOS NAS RTA GLANG DU SNANG BA DANG 'DRA'O,, 'JOG PA'I BLO NI GNOD MED ZHIG DGOS KYI, ZHEN YUL LA 'KHRUL BA'I BLO LA SNANG BA TZAM GYIS 'JOG NUS PAR MI 'DOD DO,, GZUGS SGRA SOGS NI DE DAG 'DZIN PA'I DBANG PO'I SHES PA LA SNANG BA'I SGO NAS 'JOG LA, DE BZHIN DU CHOS THAMS CAD KYANG RANG NYID RTOGS PA'I BLO DE DANG DE LA SNANG BA'I SGO NAS 'JOG GO, MIG MA BSLAD PA LA RTA GLANG DU SNANG ZHEN GNYIS KA MED PA LTAR, JI LTA BA MNGON SUM DU RTOGS PA'I 'PHAGS PA'I YE SHES KYI GZIGS NGOR BDEN GRUB KYI SNANG ZHEN GNYIS KA MED DO,, ` DGAG BYA DE 'GOG PA'I GCIG DU BRAL GYI RIGS PA 'CHAD PA LA GNYIS, RTAGS 'GOD PA DANG, TSUL SGRUB PA'O,, DANG PO NI, MYU GU CHOS CAN, BDEN PAR MED DE, BDEN GRUB KYI GCIG DANG BDEN GRUB KYI DU MA GANG RUNG DU MA GRUB PA'I PHYIR, DPER NA GZUGS BRNYAN BZHIN, GNYIS PA LA GNYIS, KHYAB PA DANG PHYOGS CHOS SGRUB PA'O,, DANG PO NI, BDEN GRUB KYI GCIG DANG DE'I DU MA GANG RUNG DU MA GRUB NA, BDEN PAR MED PAS KHYAB STE, BDEN GRUB TU YOD NA, DE GNYIS GANG RUNG DU YOD DGOS PA'I PHYIR RO,, GNYIS PA PHYOGS CHOS SGRUB PA

LA GNYIS LAS DANG PO NI, MYU GU CHOS CAN, BDEN GRUB KYI GCIG TU MED DE, CHA BCAS YIN PA'I PHYIR, KHYAB STE, BDEN GRUB KYI GCIG YIN NA, CHA MED KYI GCIG YIN DGOS PA'I PHYIR, DER THAL, CHA SHAS KYI DBYE BA YOD NA, PHAN TSUN BLTOS NAS GRUB PAS BDEN GRUB YIN PAR 'GAL BA'I PHYIR, GONG GI RTAGS DER THAL, YOD PA GANG ZHIG ,CHA MED SHES BYA LA MI SRID PA'I PHYIR, PHYI MA DER THAL, 'DUS BYAS LA'ANG MED, 'DUS MA BYAS LA'ANG DE MED PA'I PHYIR, DANG PO DER THAL, GZUGS LA'ANG MED, LDAN MIN 'DU BYED LA'ANG MED, SHES PA LA'ANG MED PA'I PHYIR, DANG PO DER THAL, GZUGS RAGS PA LA'ANG MED, PHRA BA LA'ANG MED PA'I PHYIR, DANG PO DER THAL, BUM PA LTA BU RAGS PA'I GZUGS RNAMS NI PHYOGS CHA DANG BCAS PAR MNGON SUM GYIS DMIGS PA'I PHYIR, GAL TE RDUL PHRA RAB DE CHA MED YIN NO, ,ZHE NA, 'O NA RDUL PHRAN GCIG LA DE DRUG GIS BSKOR BA'I TSE NA SHAR RDUL GYIS DBUS RDUL LA REG PA'I NGOS DER NUB RDUL GYIS REG GAM, MA REG, REG NA, DBUS RDUL DE'I GO SA NA SHAR RDUL YOD PAR THAL, DAM BCA' 'THAD PA'I PHYIR, 'DOD NA, GO SA DER RDUL PHRAN GZHAN LNGA YANG YOD PAR THAL, 'DOD PA DE'I PHYIR, 'DOD NA, RDUL PHRAN CI TZAM BSAGS KYANG GONG BU CHEN POR 'GYUR MI SRID PAR THAL LO,, MA REG NA, DBUS RDUL DE LA SHAR RDUL GYIS REG MA REG GI CHA GNYIS YOD PAR THAL, DE LA SHAR RDUL GYIS REG CING NUB RDUL GYIS MA REG PA'I CHA ZHIG YOD PA'I PHYIR, 'DOD NA, CHA BCAS SU GRUB PO,, DE NI THOGS MED KYIS, NYI SHU PA LAS DRUG GIS CIG CAR SBYAR BA NA, ,PHRA RAB RDUL PHRA CHA DRUG 'GYUR, ,DRUG PO DAG KYANG GO GCIG NA, ,GONG BU'ANG RDUL PHRAN TZAM DU 'GYUR, ,NYES GSUNGS PA'I RIGS

, ,PA'O,, LDAN MIN 'DU BYED LA CHA MED MI SRID DE, GANG ZAG GAM, DUS SOGS LA'ANG MI SRID PA'I PHYIR, DANG PO DER THAL, GANG ZAG LA 'DUG 'GRENG STOD SMAD YAN LAG SOGS KYI CHA DANG BCAS PA'I PHYIR, DUS LA MI SRID DE, LO NI ZLA BA, ZLA BA NI ZHAG, ZHAG NI DUS, DUS NI SNGA PHYI SOGS KYI CHA DANG BCAS PA'I PHYIR, DUS MTHA'I SKAD CIG MA DE CHA MED YIN NAM SNYAM NA, DE YANG MI 'THAD DE, DE RANG GI SKAD CIG SNGA MA DANG 'BREL BA'I CHA DANG BCAS PA'I PHYIR, DER THAL, RANG GI SKAD CIG SNGA MA MED PAR 'BYUNG MI SRID PA'I PHYIR RO,, SHES PA LA CHA MED MI SRID DE, SHES PA SPYI LA SKYE 'PHAGS KYI SHES PA DANG, DON MTHUN DANG DON MI MTHUN SOGS KYI DBYE BA'I CHA YOD LA, GANG ZAG GCIG GI RGYUD KYI SHES PA LA'ANG GSAL MI GSAL DANG DUS KYI RIM PA'I CHA DU MA DANG, SHES PA SKAD CIG THA MA YANG RANG GI SKAD CIG SNGA MA DANG 'BREL BA'I CHA DANG BCAS PA'I PHYIR RO,, 'DUS MA BYAS LA CHA MED MI SRID DE, NAM MKHA', 'GOG BDEN, CHOS NYID LA'ANG MI SRID PA'I PHYIR, DANG PO DER THAL, NAM MKHA' LA THOGS BCAS KYI GZUGS RAGS PA DANG 'BREL MA 'BREL GYI CHA DANG, SHAR NUB KYI DBYE BAS BZHAG PA'I CHA DANG, SHAR GYI BUM PA'I KHONG STONG DU KHYAB CING NUB KYI BUM PA'I KHONG STONG LA MA KHYAB PA'I CHA SOGS YOD PA'I PHYIR, 'GOG BDEN LA DE MI SRID DE, DE LA SPANG BYA MI 'DRA BA SPANGS PA'I CHA THA DAD PA MANG BA'I PHYIR, CHOS NYID LA DE MI SRID DE, DE LA STONG GZHI CHOS CAN THA DAD KYI DBYE BAS BZHAG PA DANG GANG ZAG SO SOS RTOGS MA RTOGS KYI CHA SOGS DANG BCAS PA'I PHYIR, GNYIS PA BDEN PA'I DU BRAL NI, MYU GU CHOS CAN, BDEN GRUB KYI DU MAR MED DE, BDEN GRUB KYI GCIG MED PA'I PHYIR, KHYAB STE, DU MA YOD NA GCIG KYANG YOD

DGOS PA'I PHYIR RO,, RTAGS NI CHA MED BKAG PAS 'GRUB PO,, DE LTAR CHOS THAMS CAD CHA BCAS SU GRUB NA CHOS RE RE LA'ANG CHA DANG CHA CAN GNYIS RE YOD PAR 'GRUB BO,, CHA DANG CHA CAN GNYIS NGO BO GCIG TU GNAS KYANG BLO LA SNANG BA'I TSE NGO BO THA DAD DU SNANG BA NI BSNYON DU MED PAS SNANG TSUL DANG GNAS TSUL MI 'DRA STE, DE GNYIS GNAS TSUL NGO BO GCIG TU GNAS KYANG SNANG TSUL NGO BO THA DAD DU SNANG BA'I PHYIR RO,, DE 'DRA BA DE NYID BLO LA SNANG BA'I DBANG BA'I BZHAG PA'I BRDZUN PA'I SDOD LUGS YIN GYI, BDEN PAR GRUB PA'I SDOD LUGS NI MA YIN TE, BDEN PAR GRUB NA SNANG TSUL DANG GNAS TSUL MTHUN DGOS PA'I PHYIR TE, MI MTHUN NA BDEN PAR GRUB PA'I DON MA TSANG BA'I PHYIR RO,, CHA DANG CHA CAN GNYIS SNANG TSUL DANG GNAS TSUL MI MTHUN TE, MTSON NA BUM PA DE RANG GI CHA SHAS RNAMS DANG GNAS TSUL NGO BO GCIG TU YOD KYANG, BLO LA SNANG BA'I TSE NGO BO THA DAD DU SNANG BA'I PHYIR, PHYI MA GRUB STE, BUM 'DZIN DBANG SHES LA NI BUM PA'I MCHU ZHABS DANG LTO BA MGRIN PA SOGS KYI CHA RNAMS SO SOR SNANG BA GANG ZHIG, BUM PA DE NYID CHA CAN GCIG TU GNAS PA'I PHYIR, BUM 'DZIN RTOG PA LA'ANG DE BZHIN DU SBYOR, CHA DANG CHA CAN GNYIS NGO BO GCIG YIN TE, CHA SHAS RNAMS CHA CAN DE DANG BDAG GCIG TU 'BREL BA YIN PA'I PHYIR, BUM PA'I MCHU ZHABS SOGS BUM PA DANG BDAG GCIG TU 'BREL BA BZHIN NO,, DE LTAR SHES NA NI DER SNANG DANG DES STONG TSOGS PA'I BRDZUN PA YIN PAR NGES NUS PAS SGYU MA BZHIN DU'ANG NGES NUS SO,, GCIG DU BRAL GYI RTAGS 'DI KHYAB BYED MA DMIGS PA'I RTAGS YIN LA, CHA BCAS DANG RTEN 'BREL GYI RTAGS GNYIS NI, MYU GU BDEN MED DU SGRUB PA'I 'GAL ZLA DMIGS PA'I RTAGS YANG DAG YIN NO,, RANG RGYUD PA'I SKABS 'DIR YANG RTEN 'BREL GYI RTAGS DANG

, ,RDO RJE GZIGS MA'I GTAN TSIGS SOGS YOD KYANG MANG DU DOGS PAS, DE'I KHYAD PAR MDOR BSDUS ZHIG THAL 'GYUR BA'I SKABS SU 'CHAD PAR 'GYUR RO, ,MTHUN DPE GZUGS BRNYAN LA BRTEN NAS BDEN MED NGES TSUL NI, BYAD BZHIN GYI GZUGS BRNYAN DE BYAD BZHIN DU SNANG YANG SNANG BA LTAR MA GRUB PA DES SLA BAS, DE NGES ZIN NAS DPE DE BZHIN DU, MYU GU LTA BU YANG RANG RE'I BLO NGOR BDEN PAR SNANG YANG SNANG BA LTAR MA GRUB PA'O ZHES NGES PAR BYED PA YIN NO, ,DE LTAR RANG RGYUD PA'I LUGS KYI CHOS KYI BDAG MED NGES BA ZHIG BYUNG NA'ANG MCHOG YIN PAR BSHAD PAS, SGOM PAR BYED PA LTA CI SMROS, DE LTA NA DBU MA RANG RGYUD PA'I LUGS KYI LTA BA SHES SNYAM PA'I KHENGS PA YOD NA NI GONG DU BSHAD PA'I DON DE RNAMS TSIG TZAM DU MA SONG BAR NGES PAR GYIS SHIG DANG YIN NO,, ` GNYIS PA THAL 'GYUR BA'I LUGS LA GNYIS, DE'I LTA BA GTAN LA DBAB PA DANG, GOL MA GCOD TSUL BSHAD PA'O, ,DANG PO NI, 'DI PA'I LUGS LA CHOS RNAMS RTOG PA'I DBANG GIS 'JOG TSUL SHES DGOS TE, DE SHES NA, CHOS RNAMS RTOG PAS BTAGS TZAM DU 'GRUB LA, DE GRUB NA RTOG PAS BTAGS TZAM MA YIN PA'I CHOS MED PAR GO BAS SO, ,DE LTAR NA, RTOG PAS BTAGS TZAM MA YIN PA'I SDOD LUGS SU GRUB PA NI, RTAGS KYI DGAG BYA'I TSAD MTHAR THUG PA YIN LA, DE DANG BRTEN NAS BZHAG PA MA YIN PA'I YOD PA DANG, RANG BZHIN GYIS GRUB PA, RANG NGOS NAS GRUB PA, RANG GI MTSAN NYID KYIS GRUB PA, BDEN PAR GRUB PA RNAMS DON 'DRA'O, ,RTOG PAS 'JOG TSUL NI; ZLA BAS BZHI BRGYA BA'I 'GREL BA LAS, RTOG PA YOD PA KHO NAS YOD PA NYID DANG, RTOG PAS MED PAR YOD PA NYID MED PA DE DAG NI GOR MA CHAG PAR THAG PA BSDOGS PA LA BTAGS PA'I SPRUL LTAR RANG GI NGO BOS GRUB PAR NGES SO, ,ZHES GSUNGS PA LTAR CHOS THAMS CAD RTOG PAS BTAGS

TZAM DU 'JOG GO ,DE YANG KHRA BO'I KHA DOG DANG DBYIBS 'KHYIL LUGS SPRUL DANG 'DRA ZHING YUL MI GSAL BA NA GNAS PA'I TSE THAG PA LA 'DI SPRUL LO SNYAM PA'I RTOG PA 'BYUNG NGO, ,DE'I TSE THAG PA DE'I KHA DOG DANG DBYIBS DANG CHA SHAS DANG TSOGS RGYUN GANG YANG SPRUL GYI MTSAN GZHIR GZUNG RGYU MED KYANG, RTOG PAS SPRUL DU BTAGS PA TZAM ZHIG NI YOD DO, ,DE BZHIN DU RANG GI PHUNG PO'I STENG DU NGA'O SNYAM PA'I BLO SKYE BA NA PHUNG PO'I TSOGS RGYUN DANG CHA SHAS DANG DBYIBS SOGS GANG YANG NGAR 'JOG TU MI RUNG YANG, RTOG PAS BTAGS PA'I NGA TZAM ZHIG NI THA SNYAD DU YOD DO, ,DE NI 'PHAGS PAS RIN CHEN 'PHRENG BA LAS, SKYES BU SA MIN CHU MA YIN, ,ME MIN RLUNG MIN NAM MKHA' MIN, ,RNAM SHES MA YIN KUN MIN NA, ,DE LAS GZHAN PA'I SKYES BU GANG, ,ZHES PAS KYANG BSTAN TE, DE YANG SA MIN NAS RNAM SHES MIN ZHES PA'I BAR GYIS SKYES BU'I KHAMS DRUG SO SO NAS BDAG TU 'JOG PA BKAG LA, KUN MIN ZHES PAS KHAMS DRUG GI TSOGS PA DANG, DE LAS GZHAN NA SKYES BU GANG ZHES PAS KHAMS DRUG LAS NGO BO THA DAD PA'I GANG ZAG 'JOG PA BKAG NAS, SKYES BU KHAMS DRUG 'DUS PA'I PHYIR, ,ZHES PAS, KHAMS KYI TSOGS RGYUN LA BRTEN NAS BTAGS PA TZAM GYI GANG ZAG 'JOG PA YANG BSHAD DO, ,TSUL DE NI CHOS THAMS CAD LA 'DRA STE, SDUD PA LAS, BDAG JI 'DRA BA DE 'DRAR SEMS CAN THAMS CAD SHES, ,SEMS CAN THAMS CAD JI 'DRA DE 'DRAR CHOS KUN SHES, ,ZHES GSUNGS PAS SO, ,NGA ZHES THA SNYAD BTAGS PA'I DON JI 'DRA ZHIG TU GRUB BTZAL NA MI RNYED KYANG, MA BTAGS MA DPYAD PA'I TSE RTOG PAS BTAGS TZAM DU YOD PA DE BZHIN DU, BUM SOMS KYI CHOS THAMS CAD LA 'DRA BA YIN MOD, SKYES BU DANG BUM SOGS RNAMS RTOG PAS BTAGS PA'I YOD PA YIN TSUL DANG, THAG PA LA SPRUL DU BTAGS KYANG DER SPRUL MED PA'I KHYAD PAR

, ,RNAMS LEGS PAR BYED DGOS SO, ,'DIR 'JUG PA'I RNAM BSHAD LAS RJES DBU MA'I LTA BA MTHAR THUG PA'I DKA' SA YANG 'DI NYID DO ZHES BSHAD PA LTAR DKA' BA'I GNAS YIN PAS RANG BZHIN MED PA LA BYA BYED 'THAD TSUL RGYAS PAR 'CHAD DGOS NA'ANG MANG DU DOGS LA, YANG DE NYID LAS, LUGS DAM PA 'DIS NI YAN LAG TSOGS PA TZAM DANG DE'I YA GYAL SOGS GANG YANG YAN LAG CAN LA SOGS PA'I MTSAN GZHIR MI RUNG YANG, YAN LAG CAN LA SOGS PA MING DU BTAGS PA TZAM LA BYA BYED LEGS PAR 'JOG NUS PA GSUNG RAB KYI DON DU 'GREL BA THUB PA'I DGONGS PA THUN MONG MA YIN PA YIN PAS DGONGS PA 'GREL LUGS 'DI LA SBYANG BAR BYA'O, ,ZHES GSUNGS PA LTAR YIN PAS SHES DGOS SO, ,DE LTAR NA CHOS THAMS CAD BTAGS DON MA BTZAL BAR MING GIS THA SNYAD KYI DBANG GIS 'JOG PAR GO NUS LA; MING GI THA SNYAD KYIS DBANG TZAM GYIS BZHAG PA MIN PA'I YOD PAR 'DZIN PA NI, RANG BZHIN GYIS GRUB PA DANG, BDEN PAR GRUB PA'I 'DZIN TSUL YIN PAS, DE LTAR 'DZIN PA'I RTOG PA RNAMS BDEN 'DZIN YIN LA, DES BZUNG BA LTAR GRUB PA NI BRTAG PA MTHA' BZUNG GI BDEN TSAD DO, , 'DI PA'I LUGS LA BDEN 'DZIN YIN NA, NYON MONGS YIN PAS KHYAB PA'I PHYIR RANG RGYUD PA SOGS DANG MI 'DRA'O, ,CHOS RNAMS MING GI THA SNYAD TZAM GYIS 'JOG TSUL NI MTSON NA, LTO LDIR BA LA 'DI NI BUM PA'O ZHES MING DU BTAGS PA DE TZAM GYIS BUM PA DE 'JOG NUS PA YIN TE, DE TZAM GYIS TSIM NAS BTAGS DON GANG YIN MA DPYAD PAR BLANG DOR LA ZHUGS NA KUN RDZOB TU BYA BYED MI BSLU BA YIN GYI, NGES MA TSIM PAR DA DUNG BTAGS DON BUM PA DE, LTO LDIR BA DE'I LTO BA DANG MCHU DANG MGRIN PA DANG ZHABS SOGS CHA GANG YIN BTZAL BA NA BUM PA MI RNYED PAS BLANG DOR BYA RGYU

MED PAR 'GYUR BA'I PHYIR RO, ,DE BZHIN DU CHOS THAMS CAD LA'ANG SBYAR BAR BYA'O, ,'DI DAG NI TSIG GIS BRJOD SHES PA TZAM GYIS MI CHOG GI ,RANG RGYUD KYI BLO'I STENG NAS DON LA NGES SHES 'DREN NUS PA ZHIG DGOS TE, THA SNYAD DU BRTEN NAS BZHAG PA NYID KYIS BTAGS YOD DANG, BTAGS YOD YIN PA NYID KYIS, RANG GI NGO BOS GRUB PA MED PA'I TSUL SNYING THAG PA NAS MA GO PHYIN CHAD RANG BZHIN GYIS MED, BDEN PAR MED CES CI TZAM SMRAS KYANG DON GTING NAS GO BA MA YIN PA'I PHYIR RO, ,DE LTAR MING DANG BRDAS BZHAG TZAM MA YIN PA'I RANG BZHIN DE LA DGAG BYA'I BDAG CES BYA LA, DE NYID GZHI GANG ZAG GI STENG DU BKAG PA NI GANG ZAG GI BDAG MED DANG, MIG RNA SOGS CHOS KYI STENG DU BKAG PA NI CHOS KYI BDAG MED DO, ,DES NA DGAG BYA'I BDAG DANG THA SNYAD PA'I BDAG GNYIS KYI KHYAD PAR DANG, NGA'O SNYAM PA'I BLO LHAN SKYES DANG NGAR 'DZIN LHAN SKYES KYI KHYAD PAR RNAMS PHYED PAR BYA'O, , ` BDAG MED RIGS PAS SGRUB TSUL MDOR BSDUS BSHAD PA LA GNYIS, GANG ZAG GI BDAG MED DANG, CHOS KYI BDAG MED RIGS PAS SGRUB PA'O, ,DANG PO LA GNYIS, GCIG DU BRAL GYI RIGS PA DANG, RNAM BDUN GYI RIGS PA'O, ,DANG PO LA, GNAD BZHI STE, DGAG BYA DANG KHYAB PA DANG BDEN PA'I GCIG BRAL DANG BDEN PA'I DU BRAL NGES PA'I GNAS DANG BZHI YOD PAS SO, ,DANG PO NI, NGAR 'DZIN LHAN SKYES 'DIS PHUNG PO LNGA'I STENG DU DE LA MA BLTOS PA'I NGA TSANG BA ZHIG GAM, NGA DE RANG GI PHUNG PO'I STENG DU BTAGS PA TZAM MA YIN PAR PHUNG PO'I STENG DU GDOD MA NAS GRUB GRUB PA ZHIG TU 'DZIN TSUL YOD PAS DE NGES PAR BYA, GNYIS PA NI, SPYIR YOD NA, GCIG DANG DU MA GANG RUNG DU YOD DGOS PA'I KHYAB PA NGES PA LA BRTEN NAS 'GRUB BO, ,GSUM PA NI, DE PHUNG PO DANG GCIG YIN PA LA RIGS PA'I GNOD PA 'BAB TSUL DANG, BZHI PA NI, DE DANG THA DAD DAM NGO BO THA DAD YIN NA RIGS PAS GNOD

, ,TSUL LO, ,'DIR CHOS CAN DU 'DZIN TSUL GNYIS LAS, DANG PO NI, NGA CHOS CAN, RANG GI PHUNG PO'I STENG DU RANG BZHIN GYIS MA GRUB TE, DE'I STENG DU DE DANG RANG BZHIN GYIS GCIG DANG RANG BZHIN GYIS THA DAD GANG DU'ANG MA GRUB PA'I PHYIR, DPER NA, GZUGS BRNYAN BZHIN NO,, KHYAB STE, RANG BZHIN GYIS GRUB NA, RANG BZHIN GYIS GCIG DANG THA DAD GANG RUNG DU GRUB DGOS PA'I PHYIR TE, YOD NA GCIG DANG DU MA GANG RUNG DU YOD DGOS PA'I PHYIR TE, GCIG DANG DU MA GNYIS DNGOS 'GAL YIN PA'I PHYIR, PHYOGS CHOS SGRUB PA LA GNYIS KYI, DANG PO NI, NGA CHOS CAN, PHUNG PO'I STENG DU DE DANG RANG BZHIN GYIS GCIG TU MA GRUB STE, DE DANG CHA MED KYI GCIG TU MA GRUB PA'I PHYIR, DER THAL, CHA BCAS YIN PA'I PHYIR, RTAGS SNGAR BZHIN BSGRUB BO, ,GNYIS PA NI, DE CHOS CAN, PHUNG PO'I STENG DU DE DANG RANG BZHIN GYIS THA DAD DU MA GRUB STE, RANG BZHIN GYIS GCIG TU GRUB PA MED PA'I PHYIR, KHYAB PA YOD DE, DU MA GCIG BSAGS PA LA BRTEN NAS 'JOG DGOS PA'I PHYIR, GZHAN YANG, NGA CHOS CAN, PHUNG PO'I STENG DU RANG BZHIN GYIS THA DAD DU MED DE, PHUNG PO DANG 'BREL MED DON GZHAN DU MED PA'I PHYIR, KHYAB STE, RANG BZHIN GYIS GRUB NA, PHUNG PO DANG MA 'BREL BAR LOGS SU BZUNG DU YOD DGOS PA'I PHYIR TE, PHUNG PO LA BLTOS PA'I RAG LAS PA YIN NA, RANG BZHIN GYIS MED PAR GRUB PA'I PHYIR RO, ,GNYIS PA NI, NGAR 'DZIN LHAN SKYES KYIS BZUNG BA LTAR GRUB PA'I BDAG DE CHOS CAN, PHUNG PO'I STENG DU MED DE, PHUNG PO'I STENG DU DE DANG GCIG DANG DU MA GANG RUNG DU MA GRUB PA'I PHYIR, KHYAB PA SGRUB TSUL NI SNGAR LTAR RO, ,RTAGS SGRUB PA LA GNYIS KYI DANG PO NI, DE 'DRA'I BDAG DE PHUNG PO'I STENG DU DE DANG GCIG TU MA GRUB STE, GRUB NA RIGS PA GSUM GYIS GNOD PA'I PHYIR TE, BDAG KHAS LEN PA DON MED DU THAL BA DANG, BDAG GCIG NYID

? DU MAR DBYE RIGS PAR THAL BA DANG, DE 'DRA'I NGA DE SKYE 'JIG BYED PAR THAL BA'I RIGS PA GSUM GYIS GNOD PA'I PHYIR, GNOD BYED DANG PO YOD DE, SPYIR BDAG NI PHUNG PO'I NYE BAR LEN PA PO DANG, PHUNG PO NI DE'I NYE BAR BLANG BYA YIN PA LA, DE 'DRA'I BDAG DE PHUNG PO'I STENG DU DE DANG GCIG TU GRUB NA , DBYER MED KYI GCIG TU 'GYUR BAS, DE'I TSE GANG GIS NYE BAR LEN PA PO DANG, GANG NYE BAR BLANG BAR BYA BA'I RNAM GZHAG MI 'THAD PA'I PHYIR TE, DE LTA NA NGA PHUNG PO DANG PHUNG PO YANG NGA YIN PAR THAL BAS, 'DIR MA SHI BAR PHUNG PO DANG BCAS BZHIN DU SKYE BA LEN PA'AM, YANG NA PHUNG PO 'DI NYID SKYE BA MI LEN PA DE BZHIN DU BDAG KYANG SKYE BA MI LEN PAR 'GYUR BA'I PHYIR RO, ,SKYON GNYIS PA YOD DE, SPYIR GANG ZAG GCIG LA SKYE BA SNGA PHYI DANG DUS KYI RIM PAS BDAG DU MA YOD PA LA SKYON MED KYANG, DE 'DRA'I NGA DE PHUN PO DANG GCIG YIN NA, PHUNG PO LNGA YOD PA LTAR BDAG KYANG MI 'DRA BA LNGA YOD PA'AM, YANG NA NGA GCIG YIN PA DE BZHIN DU PHUNG PO LNGA YANG GCIG TU 'GYUR BA'I PHYIR RO, ,SKYON GSUM PA YOD DE, SPYIR NGA TZAM SKYE 'JIG BYED PA LA SKYON MED MOD, DE 'DRA'I NGA DE SKYE 'JIG BYED NA SKYON BZHI YOD KYANG BSDU NA BDEN GRUB KYI SKYE 'JIG BYED PAR SONG BA'I PHYIR SKYE BA LEN PA'I TSE NGO BO 'GYUR DU MI RUNG BAS 'GRO BA RIGS DRUG GI GZHI MTHUN PA YOD PAR 'GYUR RO, ,RTAGS GNYIS PA NI, DE 'DRA'I BDAG DE PHUNG PO'I STENG DU DE DANG THA DAD DU MA GRUB STE, DE LTAR GRUB NA PHUNG PO LA BLTOS MED DU GRUB DGOS PAS, PHUNG PO LAS YAN GAR LOGS SU YOD DGOS PA LAS DE MED PA'I PHYIR, DANG PO DER THAL, RANG GZHAN GYIS GRUB NA, GZHAN LA RAG MA LAS PAR GRUB DGOS PA'I PHYIR RO, ,DES NA DE 'DRA'I BDAG MED MED SNYAM DU BSAM MO, ,DE LTAR LEGS PAR DPYAD PA NA BDAG MED RTOGS PA'I LTA BA RNYED PAR 'GYUR TE, DE RNYED PA'I TSAD NI RJE'I RTZA SHE'I RNAM BSHAD LAS, DE LTAR BDAG RANG GI NGO BOS

, ,GRUB NA BDAG PHUNG PO DANG RANG GI MTSAN NYID KYIS GRUB PA'I GCIG DANG THA DAD GANG RUNG DU GRUB DGOS PA DANG, DE GNYIS KA LA'ANG RIGS PAS GNOD PAR MTHONG BA NA BDAG NI RANG GI NGO BOS GRUB PA CUNG ZAD KYANG MED DO SNYAM DU NGES PA RNYED PA NI, 'JIG LTA LHAN SKYES KYI NGAR 'DZIN PA'I YUL RANG BZHIN MED PAR RTOGS PA'I LTA BA RNYED PA YIN NO, ,ZHES DANG, MKHAS GRUB NOR BZANG RGYA MTSOS KYANG, GCIG DU BRAL GYI RIGS PAS DE LTAR DPYAD PA LAS DPYAD DON LA NGES SHES TSAD MA SKYES PA DE'I TSE, DE'I DUS SU MYU GU SOGS RTEN 'BYUNG GI CHOS RNAMS RANG BZHIN GYIS MA GRUB PAR RTOGS PA YIN, ZHES GSUNGS PA'I PHYIR RO,, ` GNYIS PA NI, 'JUG PA LAS, SHING RTA RANG YAN LAG LAS GZHAN 'DOD MIN, ,GZHAN MIN MA YIN DE LDAN SANG MIN ZHING, ,YAN LAG LA MIN YAN LAG DAG DER MIN, ,'DUS PA TZAM MIN DBYIBS MIN JI BZHIN NO, ,ZHES SHING RTA RNAM BDUN GYI RIGS PAS BTZAL NA MI RNYED PA LTAR, BDAG KYANG DE DANG DPE DON SBYAR NAS GSUNGS PA BZHIN BRJOD NA, SHING RTA DE RANG GI YAN LAG RNAMS DANG RANG BZHIN GYIS GCIG DANG THA DAD SOGS BDUN PO GANG DU YANG MA GRUB STE , SHING RTA CHOS CAN, RANG GI YAN LAG RNAMS DANG RANG BZHIN GYIS GCIG MIN TE, YIN NA, YAN LAG RNAMS DU MA YIN PA BZHIN NU KHYOD KYANG DU MAR THAL BA DANG, YANG NA KHYOD GCIG YIN PA DE BZHIN DU YAN LAG RNAMS KYANG GCIG TU 'GYUR BA'I PHYIR RO, ,DE CHOS CAN, RANG GI YAN LAG RNAMS DANG DNGOS GRUB PA'I SO SO BA MA YIN TE, YIN NA BUM PA DANG SNAM BU BZHIN DU KHYOD RANG GI YAN LAG LAS YAN GAR DU SO SOR DMIGS DGOS PA LAS DE MA MTHONG BA'I PHYIR RO, ,DE CHOS CAN, KHYOD RANG GI YAN LAG GI RTEN DU RANG BZHIN GYIS MED DE, MKHAR GZHONG ZHO'I RTEN DU YOD

PA LTAR RANG GI YAN LAG RNAMS KYI RTEN DU NGO BO NYID KYIS THA DAD DU MED PA'I PHYIR, DE CHOS CAN, KHYOD RANG GI YAN LAG LA RANG BZHIN GYIS BRTEN NAS KYANG MED DE, RE LDE LA LHAS BYIN 'DUG PA LTAR RANG GI YAN LAG LA BRTEN NAS NGO BO NYID KYIS THA DAD DU MED PA'I PHYIR, DE CHOS CAN, RANG GI YAN LAG DANG NGO BO NYID KYIS LDAN BA'ANG YIN TE, LHAS BYIN PA YANG DANG LDAN PA LTAR DE DANG NGO BO THA DAD PA'I TSUL DU'ANG MI LDAN LA, LHAS BYIN RNA BA DANG LDAN PA LTAR DE DANG NGO BO GCIG TU RANG BZHIN GYIS MI LDAN PA'I PHYIR RO, ,GAL TE SHING RTA'I YAN LAG TSOGS PA DANG DBYIBS SHING RTA YIN NO SNYAM NA, DANG PO MI 'THAD DE, DE LTA NA YAN LAG MA BSGRIGS PA'I TSOGS PA LA'ANG SHING RTA YOD PAR 'GYUR BA'I PHYIR RO, ,PHYI MA YANG MI RIGS TE, YAN LAG RE RE BA DANG TSOGS PA'I DBYIBS GANG YANG SHING RTAR MI RUNG BA'I PHYIR RO, ,DE LTAR BTZAL BA'I TSE MI RNYED KYANG SHING RTA THA SNYAD DU YOD DE, 'JUG PA LAS, DE NI DE NYID DU'AM 'JIG RTEN DU, ,RNAM PA BDUN GYIS 'GRUB 'GYUR MIN MOD KYI, ,RNAM DPYAD MED PAR 'JIG RTEN NYID LAS 'DI, ,RANG GI YAN LAG BRTEN NAS 'DOGS PA YIN, ,ZHES GSUNGS PA'I PHYIR RO, ,SHING RTA RANG GI YAN LAG DANG THA SNYAD DU THA DAD YIN LA RTEN BRTEN PA DANG NGO BO GCIG TU LDAN PA YANG YIN PAS, DE DAG 'GOG PA LA DGAG BYA'I KHYAD PAR NGES PAR SBYAR DGOS SO, ,DE DON LA SBYOR BA LA, SHING RTA DE RNAM BDUN GYI RIGS PAS BTZAL NA MI RNYED PA DE BZHIN DU GANG ZAG LA'ANG 'GRE STE, 'DI LTAR, GANG ZAG CHOS CAN, RANG GI PHUNG PO'I STENG DU RANG BZHIN GYIS MED DE, RANG GI PHUNG PO'I STENG DU DE DANG RANG BZHIN GYIS GCIG TU'ANG MED, DE DANG RANG BZHIN GYIS THA DAD DU'ANG MED, PHUNG PO'I RTEN DU'ANG RANG BZHIN GYIS MED, PHUNG PO LA BRTEN NAS KYANG RANG BZHIN GYIS MED, PHUNG PO'I TSOGS PA KHYOD MA YIN, PHUNG PO'I DBYIBS KYANG KHYOD MA YIN PA'I PHYIR, RTAGS SNGA MA LNGA'I SGRUB BYED NI,

, ,SHING RTA LA BSHAD PA BZHIN BSGRUB PAR BYA ZHING, DER MA ZAD, GCIG DANG THA DAD KYI PHYOGS GNYIS SNGAR GCIG DU BRAL LA BSHAD PA BZHIN RIGS 'GRE SBYOR, RTAGS PHYI MA LA, PHUNG PO'I TSOGS PA CHOS CAN, BDAG MA YIN PAR THAL, GANG ZAG GI GDAGS GZHI YIN PA'I PHYIR , KHYAB STE, GDAGS GZHI NI DE'I BTAGS CHOS SU MI 'THAD PA'I PHYIR RO, ,PHUNG PO'I DBYIBS CHOS CAN, BDAG TU MI 'THAD PAR THAL, GZUGS YIN PA'I PHYIR, KHYAB STE, GANG ZAG NI GZUGS SU MI 'THAD PA'I PHYIR TE, DE LDAN MIN 'DU BYED YIN PA'I PHYIR RO, ,DE LTAR SHING RTA'I DPES GANG ZAG RANG BZHIN MED PAR NGES NUS PA YIN TE, LAM RIM CHEN MO LAS, SHING RTA'I DPYAD PA DE 'DRA BA DES NI, DE KHO NA NYID RANG BZHIN MED PA'I DON GYI GTER MYUR DU ? 'KHOR GSUNGS PAS 'DI NI SHIN TU GNAD CHE BAR SNANG NGO, ,ZHES DANG, RJE NOR BZANG RGYA MTSOS KYANG DE SHING RTA RANG BZHIN GYIS YOD NA BRTAGS DON RNAM PA BDUN DU BTZAL NA RNYED DGOS PA'I KHYAB PA NGES PAR BYAS PA'I RJES SU, RNAM PA BDUN DU BTZAL BAS MA RNYED PA DE'I TSE SHING RTA RANG BZHIN GYIS MED PAR NGES PA YIN TE, ZHES GSUNGS PA LTAR GANG ZAG LA YANG MTSUNGS PA'I PHYIR RO, ,DE LTAR GANG ZAG RNAM BDUN GYI RIGS PAS BTAGS DON BTZAL BA'I TSE MI RNYED PAS GANG ZAG RANG BZHIN GYIS MED KYANG THA SNYAD DU YOD PA DANG, DE LA BRTEN NAS CHOS THAMS CAD KYANG DE BZHIN DU SHES DGOS TE, LEGS PAR SHES NA NI RGYAL BA'I DGONGS PA JI BZHIN SHES PA'I GRANGS SU 'GRO BA'I PHYIR TE, RJE'I 'JUG GSAL, BCOM LDAN 'DAS KYI DGONGS PA SHIN TU BYA BA'I GNAS RNAMS RJEN CHER DU STON PA'I MKHAS PA'I DBANG PO'I BZHED PA THUN MONG MA YIN PA 'DI RNAMS LEGS PAR SHES PA LA 'BAD PHAN GYIS SHIG ,CES GSUNGS PA'I PHYIR RO,, ` GNYIS PA CHOS KYI BDAG MED ? LAS SGRUB TSUL LA,

GCIG DU BRAL GYI GTAN TSIGS, RDO RJE GZIGS MA, YOD MED SKYE 'GOG ,MU BZHI SKYE 'GOG ,RTEN 'BREL GYI GTAN TSIGS DANG LNGA YOD PA LAS, DANG PO NI SNGAR BSHAD ZIN LA, 'ON KYANG 'DIR CUNG ZAD BSHAD NA, DPER NA, ME LONG DU SHAR BA'I BYAD BZHIN GYI GZUGS BRNYAN DE, BYAD BZHIN GYIS STONG YANG SNANG BA'I TSE CHA THAMS CAD NAS BYANG BZHIN DU SNANG BA LTAR, GZUGS SOGS RANG BZHIN GYIS STONG YANG MA RIG PAS BSLAD PA'I SO SKYE'I DBANG PO'I SHES PA LNGA LA GZUGS SOGS SNANG BA NA RANG GI MTSAN NYID KYIS GRUB PAR SNANG BA MA GTOGS, SNANG TSUL GZHAN MI 'BYUNG BAS, THAL 'GYUR BA'I SKABS 'DIR RANG CAG SO SKYE'I SHES NGOR GZUGS SGRA SOGS SNANG BA NI YOD MOD, SNANG TSUL LTAR GRUB PA 'DI KA RANG RTAGS KYI DGAG BYA YIN ZHES BZHED PAR SNANG BAS, 'DI 'GOG PA'I TSE, BUM PA LA MTSON NA, DE CHOS CAN, SO SKYE'I SHES NGOR SNANG BA LTAR MA GRUB STE, SNANG BA LTAR GCIG DANG SNANG BA LTAR THA DAD GANG RUNG DU MA GRUB PA'I PHYIR, KHYAB PA SNGAR LTAR BSGRUB, DE CHOS CAN, SNANG BA LTAR GCIG TU MA GRUB STE, RANG GI GDAGS GZHI LA BTAGS PA'I BTAGS CHOS TZAM YIN PA'I PHYIR, KHYAB STE, SO SKYE'I SHES NGOR BUM SOGS RANG GI GDAGS GZHI LA BTAGS PA'I BTAGS CHOS TZAM DU MI SNANG BAR GDAGS GZHI DANG BTAGS CHOS GNYIS MI PHYED PA'I TSUL GYIS RANG NGOS NAS GRUB PAR SNANG BA'I PHYIR, GZHAN YANG, BYA BYED THAMS CAD GCIG DU THAL PA'ANG 'PHEN NO, ,RTAGS SNGA MA DER THAL, BUM SOGS KYI CHOS THAMS CAD KYANG RANG RANG GI GDAGS GZHI'I STENG DU MING BRDAS BZHAG TZAM YIN PA'I PHYIR, DER THAL, CHOS THAMS CAD GDAGS GZHI RANG LDOG MIN PA GZHAN ZHIG GI STENG NAS 'JOG DGOS PA'I PHYIR, DER THAL, CHOS THAMS CAD GDAGS GZHI CHA SHAS GZHAN LA BRTEN NAS BZHAG PA'I RTEN 'BYUNG YIN PA'I PHYIR, DE CHOS CAN, SO SKYE'I SHES NGOR SNANG BA LTAR THA

, ,DAD DU MA GRUB STE, RANG GI GDAGS GZHI LA BLTOS NAS GRUB PA'I PHYIR, KHYAB STE, SNANG BA LTAR THA DAD DU GRUB NA, RANG GI GDAGS GZHI LA MA BLTOS PAR GRUB DGOS PA'I PHYIR RO, ,GZHAN YANG, SO SKYE'I DBANG PO'I SHES PA LA GZUGS SGRA SOGS SNANG TSUL LTAR MA GRUB PAR THAL, DE'I NGOR KUN RDZOB KYI CHOS RNAMS SNANG BA LTAR MA GRUB PA'I PHYIR, DER THAL, RANG RGYUD PA'I LUGS LA SNANG BA LTAR GRUB PA'I KUN RDZOB YOD PAS YANG DAG KUN RDZOB YOD CES 'DOD KYANG, THAL 'GYUR BA'I SKABS 'DIR SNANG BA LTAR GRUB PA'I KUN RDZOB MED PAS YANG DAG KUN RDZOB MI BZHED PA'I PHYIR , PHYI MA DER THAL, KUN RDZOB YIN NA, SNANG TSUL DANG GNAS TSUL MI MTHUN PAS KHYAB PAR BZHED PA'I PHYIR, DER THAL, DE YIN NO, SNANG TSUL BDEN PAR SNANG YANG GNAS TSUL BDEN BAR MED PAS KHYAB PAR BZHED PA'I PHYIR RO, ,'DI GNAD CHE BAS RGYAS PAR 'CHAD DGOS NA'ANG MANG DU DOGS LA, SO SKYE'I SHES DON SNANG BA LTAR MA GRUB CES PA 'DI DGAG BYA 'GOG TSUL SHIN TU PHRA BAS RANG CAG LTA BU'I BLO KHOG TU CHUD DKA' BA'I GNAS YIN TE ZHIB CHA 'BYED DGOS PA YOD DO,, GNYIS PA RDO RJE GZIGS MA'I GTAN TSIGS LA PHYOGS SNGA'I 'DOD TSUL NI, GRANGS CAN GYIS SPYIR SKYE BA ZHIG YIN NA, YOD DGOS PAS MYU GU YANG RANG GI RGYU DUS SU MED NA MI SKYE BAS DE'I DUS SU MI GSAL BA'I TSUL GYIS YOD PA NYID, SLAR GSAL BAR SKYE BAS BDAG SKYE YOD DO, ,ZHES 'DOD, RANG RGYUD PA SOGS KYIS MYU GU LTA BU RANG GIS MTSAN NYID KYIS GRUB PA'I RGYU GZHAN LAS SKYE BAS GZHAN SKYE YOD ZHES 'DOD GCER BU BAS RDZA BUM LTA BU 'DZIN PA'I BDAG NYID LAS SKYE BAS BDAG SKYE YOD LA, RDZA MKHAN GYIS BYED PAS GZHAN SKYE YANG YOD CES 'DOD, RGYANG 'PHEN PAS, RMA BYA'I MDONGS KYI KHA DOG DANG, TSOR MA'I RNO BA DANG, SRAN MA'I ZLUM PA LTA BU GANG ZAG GIS KYANG MA BYAS PAS RGYU MED LAS SKYE'O ZHES 'DOD CING ,

THAMS CAD KYANG SKYE NA RANG NGOS NAS SKYE BAR 'DOD PA LA 'DRA'O, ,'DIR 'GOG TSUL GO BDE BA'I DBANG DU BYAS NA, DE LA MYU GU CHOS CAN, RANG NGOS NAS MI SKYE STE, BDAG LAS MI SKYE, GZHAN LAS KYANG MI SKYE, GNYIS KA LAS KYANG MI SKYE, RGYU MED LAS KYANG MI SKYE BA'I PHYIR, DANG PO GRUB STE, RANG GI RGYU'I DUS NAS GRUB ZIN MI SKYE BA'I PHYIR, DER THAL, DE'I DUS SU GRUB ZIN NA NI, SLAR YANG SKYE BA LA DGOS PA MED PA'I PHYIR, DER THAL, DGOS PA YOD NA, YANG YANG SKYE DGOS PAS THUG MED DU SKYE BAR 'GYUR BA'I PHYIR RO, ,GZHAN YANG, BDAG SKYE MED PAR THAL, RANG GI RGYU'I DUS SU GRUB ZIN 'GYUR MED DU SKYE BA MED PA'I PHYIR, DER THAL, SA BON RNAM PAR MA 'GYUR BZHIN DU 'BRAS BU SKYE BA MED PA'I PHYIR RO, ,GZHAN YANG, BDAG SKYE MED PAR THAL, DE YOD NA, TSE 'DI'I MING SKYE BA LEN PA'I TSE SKYE BA SNGA MA'I BDAG NYID BZHIN DU SKYE DGOS PAS 'GRO BA RIGS DRUG GI GZHI MTHUN YOD PAR THAL BA DANG, RGAN PO'I LUS 'DI BZHIN DU'ANG MA'I MNGAL NA YOD PAR 'GYUR BA'I PHYIR RO,, GNYIS PA NI, MYU GU CHOS CAN, GZHAN LAS MI SKYE STE, RANG GI MTSAN NYID KYIS GRUB PA'I RGYU GZHAN LAS MI SKYE BA'I PHYIR, DER THAL, RANG GI RGYU DANG MA 'BREL BAR SKYE BA MED PA'I PHYIR, DER THAL, RANG GI RGYU LA MA BLTOS PAR SKYE BA MED PA'I PHYIR, DE YOD NA, RGYU YIN MIN THAMS CAD LAS 'BRAS BU YIN MIN THAMS CAD SKYE BAR 'GYUR RO, ,'DI'I RIGS PA'I 'PHUL 'TSAMS SHES PA NAD CHE'O,, GSUM PA GNYIS KA LAS SKYE BA NI, SNGAR GYI RIGS PA DES KHEGS, BZHI PA NI, DE CHOS CAN, RGYU MED LAS MI SKYE BAR THAL, RANG GI RGYU RKYEN LAS SKYES PA'I PHYIR, DER THAL, RANG GI SA BON LAS SKYES PA'I PHYIR, GZHAN YANG, RGYU MED LAS SKYE BA MED PA THAL, DE YOD NA, BYA ROG SOGS LAS KYANG RMA BYA'I MDONGS SKYE BA SOGS SU 'GYUR BA'I PHYIR RO, ,GZHAN YANG, RMA BYA'I MDONGS DE RANG GI RGYU LAS SKYES PAR THAL, DE RMA BYA'I THUN MONG MA YIN PA'I LAS DANG RANG GI NYER LEN SNGA MA LAS SKYES PA'I PHYIR,

, ,TSER MA'I RNO BA DANG SRAN MA'I ZLUM PA DE RANG GI RGYU LAS SKYES PAR THAL, DE RANG GI SA BON RNAM PAR 'GYUR BA'I RKYEN LAS BYUNG BA'I PHYIR, GZHAN YANG, RGYU MED LAS SKYE BA MED PAR THAL, DE YOD NA RTAG TU SKYE BA'AM, YANG NA NAM YANG MI SKYE BAR 'GYUR BA'I PHYIR RO,, GSUM PA YOD MED SKYE 'GOG NI, MYU GU CHOS CAN, RANG NGOS NAS MI SKYE STE, RANG GI RGYU'I DUS SU YOD PAR YANG MI SKYE, DE'I DUS SU MED PAR YANG RANG NGOS NAS MI SKYE, DE'I DUS SU YOD MED GNYIS KA'I RANG BZHIN DU YANG MI SKYE, DE'I DUS SU DE GNYIS GANG RUNG MA YIN PA'I RANG BZHIN DU YANG MI SKYE BA'I PHYIR, DANG PO NI SNGAR LTAR 'GOG ,GNYIS PA LA, DE CHOS CAN, GTAN MED PAR SKYE BAR THAL, RANG GI RGYU'I DUS SU MED PAR RANG NGOS NAS SKYE BA'I PHYIR, KHYAB STE, RANG NGOS NAS GRUB NA, DUS GCIG GI TSE MED NA GTAN NAS MED DGOS PA'I PHYIR, DER THAL, RANG NGOS NAS GRUB NA GZHAN DU 'GYUR BA MI 'THAD PA'I PHYIR RO,, RANG LUGS LA MYU GU DE RANG GI RGYU'I DUS SU MED KYANG, RGYUN DE'I DUS SU YOD PA'I TSUL GYIS SKYE BAS MI 'GAL LO,, GSUM PA DANG BZHI PA SLA'O, ,BZHI PA MU BZHI SKYE 'GOG NI, 'BRAS BU RNAMS RANG NGOS NAS MI SKYE STE, RGYU GCIG KHO NA LAS 'BRAS BU GCIG KHO NA YANG MI SKYE, RGYU DU MA KHO NA LAS 'BRAS BU DU MA KHO NA YANG MI SKYE, RGYU DU MAS 'BRAS BU GCIG KHO NA YANG MI BSKYED, RGYU GCIG GIS 'BRAS BU DU MA KHO NA YANG MI BSKYED PA'I PHYIR, SGRUB TSUL GZHAN DU SHES, LNGA PA RTEN 'BREL GYI GTAN TSIGS NI, MYU GU CHOS CAN, RANG BZHIN GYIS MI SKYE STE, RTEN 'BREL YIN PA'I PHYIR , DPER NA, GZUGS BRNYAN BZHIN, RTEN 'BREL LA THUN MONG BA DANG THUN MONG MA YIN PA GNYIS LAS, DANG PO NI, CHOS THAMS CAD KYANG, RANG GI CHA SHAS DANG, CHA SHAS RNAMS KYANG RANG RANG GI CHA SHAS DANG BCAS PA YIN TSUL GONG GI CHA MED 'GOG PA'I RIGS PAS SHES DGOS LA, THUN MONG MA YIN PA NI,

THAL 'GYUR BA'I LUGS KYI RTOG PAS BTAGS TZAM DU GRUB PA'I TSUL SHES DGOS TE, SNGAR GYI RIGS PA DE DAG THAMS CAD KYANG MTHAR GTUGS NA RTEN 'BREL GYI RIGS PA LA THUG PAS SO, ,GZHAN YANG, CHOS THAMS CAD RANG BZHIN GYIS MA GRUB STE, SHES BYA, RTAG PA, DNGOS PO, BUM PA SOGS SPYI YIN PA RNAMS NI, RANG BZHIN GYIS MED, SPYI MA YIN PA'I CHOS BYE BRAG RNAMS KYANG RANG BZHIN GYIS MED PA'I PHYIR, DANG PO DER THAL, SHES BYA DE CHOS THAMS CAD KYI STENG NAS MING TZAM GYIS BZHAG, RTAG PA DE, RTAG PA'I RIGS BYE BRAG PA'I STENG NAS MING TZAM GYIS BZHAG ,DNGOS PO DANG, BUM PA YANG DNGOS PO'I RIGS DANG BUM PA'I RIGS BYE BRAG PA'I STENG NAS MING BRDAS BZHAG PA YIN GYI, BYE BRAG LAS DON GZHAN PA'I SPYI YIN PA CI YANG MED PA'I PHYIR, DE BZHIN DU SPYI GZHAN THAMS CAD LA SBYAR BAR BYA STE, DPYOD SHES NA SPYI YIN PA RNAMS NI, RANG BZHIN GYIS MED PAR NGES CUNG SLA'O, ,SPYI MA YIN PA'I BYE BRAG RNAMS KYANG RANG BZHIN GYIS MED DE, 'DUS BYAS LA YANG MED, 'DUS MA BYAS LA'ANG MED PA'I PHYIR, 'DUS BYAS LA MED DE, GZUGS SHES LDAN MIN 'DU BYED GSUM PO GANG RUNG LA MED PA'I PHYIR, SPYI MA YIN PA'I GZUGS RANG BZHIN GYIS GRUB PA MED DE, MDUN NA MNGON SUM DU YOD PA'I BUM PA GCIG LTA BU NI, RANG GI MCHU ZHABS SOGS LA BTAGS, RANG GI LUS LTA BU NI, YAN LAG GI STENG DU BTAGS, RI GCIG LTA BU NI SA RDO SOGS TSOGS PA'I STENG NAS BTAGS PA'I PHYIR, SPYI MA YIN PA'I SHES PA NI RANG BZHIN GYIS GRUB PA MED DE, DA LTA SKYE MA THAG PA'I RANG GI SHES RAB LTA BU NI SHES PA GZHAN LAS RAGS LAS PA'I PHYIR, DER THAL, SHES PA GZHAN GYI CHA SHAS YIN PA'I PHYIR, SPYI MA YIN PA'I LDAN MIN 'DU BYED RNAMS RANG BZHIN GYIS MED DE, GANG ZAG RANG NYID GCIG LTA BU NI, RANG GI PHUNG PO LA BRTEN NAS BZHAG ,DE'I STENG GI MI RTAG PA LTA BU NI, GANG ZAG DE NYID LA BLTOS TE BZHAG PA'I PHYIR RO,,

, ,'DUS MA BYAS LA'ANG SNGAR BZHIN RIGS PA SBYOR, MDOR NA, RANG GI CHA SHAS DANG SGRA RTOG GIS BZHAG PA LA MA BLTOS PAR RANG DBANG DU GRUB PA'I CHOS MED PAS RANG BZHIN GYIS GRUB PA'I CHOS MED PA YIN TE, BZHI BRGYA PA LAS, 'DI KUN RANG DBANG MED PA STE, ,DES NA BDAG NI YOD MA YIN, ,ZHES GSUNGS PA'I PHYIR RO, ,'O NA DE LTAR RIGS PAS DPYAD PA'I DPYAD MTHAR SGOM TSUL JI LTAR YIN ZHE NA, 'DI LA BZHED PA MI 'DRA BA YOD KYANG, MKHAS GRUB NOR BZANG RGYA MTSO'I BZHED PA BZHIN BSHAD NA, DE'I GSUNG 'BUM THOR BU LAS, DE YANG ZHI GNAS MA THOB PA'I GONG ROL DU LAS DANG PO BAS LTA BA SKYONG TSUL MDOR BSDUS TE BRJOD NA, DANG POR GONG DU BSHAD PA LTAR GCIG DU BRAL SOGS DE KHO NA NYID LA DPYOD PA'I RIGS PA RNAMS KYIS DPYAD DE BYANG BAR BYAS NAS, LTA BA DNGOS GZHI SKYONG BA'I TSE, RANG BZHIN GYIS GRUB PA LTA BU'I DGAG BYA DE YOD NA, RANG BZHIN GYIS GRUB PA'I GCIG DANG THA DAD GANG RUNG LAS MA 'DAS PA'I NGES PA BSKYED DE, DE NAS NGA LTA BU RANG BZHIN GYIS GRUB PA'I GCIG DANG DU MA GANG RUNG DU GRUB MA GRUB DPYAD PAS GANG DU YANG MA GRUB PA'I NGES PA RNYED PA NA, RGYU MTSAN DE NYID KYIS NA, NGA RANG BZHIN GYIS GRUB PA LTA BU'I DGAG BYA ZHE PHUG LA BZHAG NAS MED MED SNYAM PA'I MED DGAG GI 'DZIN STANGS NYID SKYONG BA YIN NO, ,ZHES GSUNGS PA LTAR BYA'O, ,'DZIN STANGS ZHEN DU SONG NA, RIGS PA DRAN TZAM BYAS TE, SNANG TSUL DE LTAR DU GRUB PA MED MED SNYAM DU BSAM ZHING SKYUR NAS BSGOM PAR BYA LA, RJES THOB TU GZUGS SOGS BDEN GRUB TU LAM LAM 'CHAR BA NA, 'DI RNAMS DE LTAR DU GRUB PA MED MOD SNANG STONG TSOGS PA'I SGYU MA LTA BU STE AE MA NGO MTSAR CHE'O, ,SNYAM DU BLTA BAR BYA'O, ,BRGAL BRTAG MANG DU BYED SHES KYANG, 'DI 'DRA'I DON LA BSHAR SGOM TZAM YANG MED NA DGOS DON GYI SNYING PO STOR BA YIN PAS 'BAD

PAR BYA'O, ,'O NA, THAL RANG GNYIS KA'I LUGS KYI BDAG MED RTOGS PA'I LTA BA DE MDO GANG GI DON YIN ZHE NA, DE NI TING 'DZIN RGYAL PO LA SOGS PA'I MDO GZHAN GYI DON YANG YIN MOD, GTZO BO NI YUM GSUM LA SOGS PA 'KHOR LO BAR PA'I DON YIN PAR GNYIS KAS 'DOD DO, ,GNYIS PA GOL SA GCOD TSUL LA, SNGA RABS PA KHA CIG NA RE, NAM MKHA' LA MTHA' DBUS BZUNG DU MED PA DE BZHIN DU, BLOS GANG DU MI 'DZIN CING CI YANG YID LA MI BYED PA DE, GNAS LUGS SGOM TSUL YIN NO ZHES ZER BA YANG MI 'THAD DE, DE HVA SHANG GI LTA BA SGOM TSUL YIN PA'I PHYIR RO, ,KHA CIG ,CHOS GANG LA'ANG 'DI YIN 'DI MIN NGOS BZUNG DU MED PAR SGOM PA DE, GNAS LUGS SGOM PA YIN NO ZER BA YANG MI 'THAD DE, DE LTAR NA SANGS RGYAS YIN PA DANG SEMS CAN YIN PA SOGS GANG YANG MED PAR 'GYUR BA'I PHYIR RO, ,KHA CIG ,DA DE LUS KYI PHYI NANG STOD SMAD BAR GSUM DU BTZAL NA MI RNYED PAS BZHES BYA BA CUNG ZAD KYANG MED DO SNYAM DU SGOM PA DE, GNAS LUGS SGOM PA'O ZER BA YANG MI 'THAD DE, ,DE SKUR 'DEBS KYI LTA BA YIN PA'I PHYIR, DER THAL, DE LTAR BTZAL BA'I TSE NGA MI RNYED KYANG NGA YOD PA'I PHYIR RO, ,KHA CIG ,BDE KHA DOG DANG DBYIBS GANG DU'ANG BZUNG DU MED PAS RANG BZHIN GYIS MA GRUB PA'O SNYAM DU SGOM PA DE, GNAS LUGS SGOM PA'O ZER BA YANG MI 'THAD DE, NGA'I KHA DOG DANG DBYIBS NI YOD PAS MI RIGS LA, NGA KHA DOG DANG DBYIBS SU MA GRUB PAR RTOGS PA NYID KYIS, NGA RANG BZHIN MED PAR RTOGS MI NUS PA'I PHYIR, PHYI MA DER THAL, NGA GZUGS MIN PAR RTOGS PA TZAM GYIS, NGA RANG BZHIN MED PAR RTOGS MI NUS PA'I PHYIR, KHA CIG ,SEMS KHA DOG DANG DBYIBS SU MA GRUB PAS, SEMS CI YANG MED DO SNYAM PA DANG, SEMS RANG BZHIN GYIS MED DO SNYAM DU SGOM PA DE, GNAS LUGS SGOM PA'O ZER BA YANG MI 'THAD DE, DE'I SNGA MA NI SKUR 'DEBS YIN LA, PHYI MA YANG CUNG MI 'THAD PA'I PHYIR,

, ,DER THAL, SEMS SHES PA YIN PAS, KHA DOG DANG DBYIBS SU MA GRUB PA SHIN TU NGES SLA BAS, DE TZAM GYIS NI SEMS RANG BZHIN GYIS MED PAR NGES MI NUS PA'I PHYIR, YANG KHA CIG, SEMS DANG POR KHYI TSANG GI NANG NAS 'BYUNG BA LTAR KANG NAS KYANG MA 'ONGS, BAR DU RGYAL PO GDAN LA BZHUGS PA LTAR GANG DU'ANG MI GNAS, MTHAR BYI BA KHUNG DU 'DZUL BA LTAR GANG DU'ANG MI 'GRO BA'I GZHI MED RTZA BRAL DU RTOGS NAS RANG BZHIN GYIS GRUB PA MED DO SNYAM DU SGOM PA DE, SEMS KYI GNAS LUGS SGOM PA'O ZER BA YANG CUNG MI 'THAD DE, DE NI SEMS GZUGS CAN BZHIN DU YOD PA'I 'TSOL LUGS YIN PAS, RANG BZHIN GYIS MED ZHES BRJOD KYANG DE LA NGES PA 'DREN MI NUS PA'I PHYIR, DER THAL, TSUL DES SEMS GZUGS CAN DU GRUB PA'I SKYE 'GAG GNAS GSUM DANG BRAL BAR RTOGS KYANG, SEMS RANG BZHIN MED PA RTOGS MI NUS PA'I PHYIR, NUS NA DNGOS SMRA BA RNAMS KYIS KYANG DE RTOGS NUS PAR 'GYUR RO, ,GZHAN YANG, DE MI 'THAD DE, SKYE 'GAG GNAS GSUM RANG BZHIN GYIS GRUB PA MED PA'I 'TSOL TSUL DE LTAR MA YIN PA'I PHYIR, DER THAL, DE 'TSOL TSUL NI, SEMS SNGAR MED GSAR DU RANG BZHIN GYIS MI SKYE BA DANG, RANG DUS SU RANG BZHIN GYIS MI GNAS PA DANG, RANG GRUB PA'I DUS SKAD CIG GNYIS PAR RANG BZHIN GYIS MI 'GAG PAR DPYOD DGOS PA'I PHYIR, KHA CIG ,SEMS GRUB TZAM NAS GSAL BA'I NGO BOR SKYES SHING, GSAL TZAM DE LA BRTAGS SHING DPYAD NA, KHA DOG DANG DBYIBS GANG DU'ANG MI RNYED PAS, GSAL BA'I DUS NA STONG PA STONG PA'I DUS NA GSAL BAS GSAL STONG DBYER MED DU SGOM PA DE, GNAS LUGS SGOM PA'O ZER BA YANG MI 'THAD DE, DE NI SEMS KYI KUN RDZOB PA'I NGO BO MTHONG BA TZAM YIN PAS GNAS LUGS SGOM PA MA YIN PA'I PHYIR, YIN NA, GSAL ZHING REG PAR RTOGS PA TZAM YANG GNAS LUGS SGOM

PAR THAL BAR 'GYUR RO, ,KHA CIG, RTOG PA SKAD CIG SNGA PHYI SKYES MA THAG PA'I NGO BO LA CER GYIS BLTAS PA'I TSE, RANG YAL DU 'GRO BA SGOM PA NI, GNAS LUGS SGOM PA'O ZER BA YANG MI 'THAD DE, DE RTOG PA SKAD CIG SNGA PHYI RNAMS RANG GI DUS SKAD CIG GNYIS PAR MI SDOD PAR BSAM PA TZAM YIN GYI, GNAS LUGS KYI DON MTHONG BA MA YIN PA'I PHYIR, YIN NA, SKAD CIG MA MTHONG BAS KYANG GNAS LUGS MTHONG BA'I GO CHOD PAR THAL LO, ,KHA CIG, DE LTAR BLTAS PA'I TSE RTOG PA RANG YAL DU SONG BA'I STONG SANG MTHONG BA DE, SEMS KYI GNAS LUGS DANG CHOS SKU'I RANG ZHAL MTHONG BA'O ZER BA YANG MI 'THAD DE, RIGS PA SNGA MA DES KHEGS PA'I PHYIR RO, ,KHA CIG, SEMS G-YO MED DU BZHAG NAS RTOG PA'I NGO BO LA CER GYIS BLTAS PA'I TSE, SEMS NAM MKHA' LTAR STONG SANG DU 'CHAR BA DE NYID SGOM PA GNAS LUGS SGOM PA'O ZER BA YANG MI 'THAD DE, DE NI SEMS THOGS BCAS KYI RIG PA DANG BRAL BAR MTHONG BA DANG, SEMS RANG GI DUS SKAD CIG GNYIS PAR MI SDOD PAR MTHONG BA GANG RUNG ZHIG YIN PAS GNAS LUGS KYI DON MTHONG BA MA YIN PA'I PHYIR, KHA CIG, RNAM RTOG SKYE BA 'GOG MI DGOS KYI, RTOG PA GANG SKYES THAMS CAD YE SHES CHOS SKUR BSGOMS PA NI, RTOG PA BZANG NGAN THAMS CAD LAM DU 'KHYER YIN LA, 'KHOR 'DAS THAMS CAD RNAM RTOG LAS MA 'DAS PAS; RNAM RTOG THAMS CAD CHOS SKUR RO SNYOMS DU SGOM DGOS PA YIN NO ZER BA YANG MI 'THAD DE, RTOG PA YE SHES CHOS SKU MA YIN PA'I PHYIR DANG, RO SNYOMS KYI DON DE MI 'THAD PA'I PHYIR, DER THAL, 'THAD NA BZANG NGAN THAMS CAD KYANG RO SNYOMS DU 'GYUR BAS BZANG NGAN 'BRING GSUM MED PAR THAL BA'I PHYIR RO, ,KHA CIG THOG MAR NAM MKHA' STONG SANG DE NGES PAR BYAS RJES, DE DANG RANG GI SEMS BSRES NAS SGOM PA DE, GNAS LUGS SGOM PA'O ZER BA YANG MI 'THAD DE, DE NI NAM MKHA' THOGS BCAS KYI REG BYAS STONG PA LTAR SEMS KYANG DES STONG PA TZAM SGOM PA YIN PA'I PHYIR RO, ,'O NA, MDO LAS NAM MKHA' DPER MDZAD PA DE CI YIN ZHE

, ,NA; DE NI KHYOD 'DOD PA LTAR MIN GYI, NAM MKHA' DE THOGS BCAS KYI REG BYA BKAG TZAM YIN PA DE BZHIN DU SEMS LA SOGS PA'I CHOS THAMS CAD KYI CHOS NYID DE, DGAG BYA BDEN GRUB BKAG TZAM LA 'JOG ZHES PA'I DON YIN PAS SO, ,YANG GNAS LUGS SGOM PA LA BLO KHA PHYOGS PA KHA CIG NA RE, BDAG MED RTOGS PA'I LTA BA RNYED PHYIN CHAD NAS, RIGS PAS DPYAD PA TSAR GCIG BYAS RJES MI RTOG PAR BZHAG PA THAMS CAD KYANG, GNAS LUGS KYI DON SGOM PA'O ZER BA YANG MI 'THAD DE, DE LTA NA DE'I RJES SU GNYID 'THUG PO LOG PA DANG, BRGYAL BA'I TSE YANG GNAS LUGS SGOM PAR THAL BA'I PHYIR RO, ,KHA CIG ,DE RNYED PHYIN CHAD, BDEN PAR MED, RANG BZHIN GYIS MED SNYAM PA TZAM GYIS GNAS LUGS SGOM PA'O ZER BA YANG MI 'THAD DE, DE NI BDEN MED KYI SGRA SPYI YID BZLAS BYAS PA TZAM DU SONG GI, BDEN MED KYI DON NGES NA SGOM PA MA YIN PA'I PHYIR RO, ,KHA CIG, BDEN MED KYI DON DES ZIN NAS SLAR SGOM PA'I TSE, 'JOG SGOM KHO NA BYED ZER BA DANG, KHA CIG, DNGOS GZHI'I SKABS SU YANG YANG DPYAD KYI NA SGOM DGOS ZER BA YANG CUNG MI 'THAD DE, LAS DANG PO BAS ZHI GNAS MA THOB TSUL LTA BA DNGOS GZHI'I TSE BAR BAR DU CUNG ZAD RE DPYAD NAS 'JOG SGOM BYED PA YIN GYI, 'JOG SGOM KHO NAS LHAG MTHONG MI 'GRUB LA, DPYAD PA HA CANG MANG NA, RGOD PA SKYE BAS ZHI GNAS MI 'GRUB PA'I PHYIR RO, ,RANG LUGS KYI SGOM TSUL NI SNGAR BSHAD ZIN TO, ,GONG DU BSHAD PA'I LTA BA DE RNAMS NI SNGA MA SNGA MA LAS PHYI MA PHYI MA MCHOG YIN LA, 'ON KYANG GANG BSGOMS NA'ANG THAR PA'I SA BON 'JOG NUS SO, ,LTA BA DE DAG BSGOMS NA PHAN YON CHEN PO 'BYUNG BAR MA ZAD, THOS BSAM TZAM BYAS NA'ANG PHAN YON GZHAN DANG MI 'DRA BAR BSHAD DE, LUNG MANG DU DOGS NAS MA BRIS SO, ,DGOS PA MTSON TZAM ZHIG BSTAN NA, SPYOD

'JUG LAS, YAN LAG 'DI DAG THAMS CAD NI, ,THUB PAS SHES RAB DON DU GSUNGS, ,DE YI PHYIR NA SDUG BSNGAL DAG ,ZHI BAR 'DOD PAS SHES RAB BSKYED, ,ZHES DANG, BYAMS PAS KYANG, SHES RAB LAS GZHAN 'DI DAG GI ,SPONG RGYU GZHAN MED DE YI PHYIR, ,SHES RAB MCHOG YIN DE GZHI NI, ,THOS PA DE PHYIR THOS PA MCHOG ,ZHES DANG, TING 'DZIN RGYAL PO LAS KYANG, GAL TE BDAG MED CHOS LA SO SOR RTOG ,SO SOR DE BRTAGS GAL TE SGOM BYED NA, ,DE NI MYA NGAN 'DAS THOB 'BRAS BU'I RGYU, ,RGYU GZHAN GANG YIN DES NI ZHIR MI 'GYUR, ,ZHES GSUNGS PA LTAR RO, , BDAG MED KYI DON LA THOS BSAM SGOM GSUM BYED PA'I RIM PA JI LTAR ZHE NA, YOD DE, LAM RIM CHEN MO LAS, DES NA GANG NYAMS SU BLANG RGYU DE DANG POR GZHAN LA THOS NAS GZHAN STOBS KYIS NGES PAR BYED, DE NAS THOS PA'I DON DE RANG GIS LUNG DANG RIGS PAS TSUL BZHIN DU BSAMS TE RANG STOBS KYIS NGES PAR BYED, DE LTAR THOS BSAM GYIS NGES PAR BYAS TE THE TSOM DANG BRAL BA NA YANG YANG DU 'DIS PA LA BSGOMS PA ZHES ZER BAS, ZHES GSUNGS PA LTAR BYA DGOS PA'I PHYIR RO, ,THOS BSAM BSGOMS GSUM MANG NYUNG GIS NYAMS LEN KYANG MANG NYUNG 'ONG BAR GSUNGS TE, LAM RIM CHEN MO LAS, DES NA THOS PA JI TZAM MANG BA TZAM DU DE LAS BYUNG BA'I SHES RAB MANG LA, DE MANG BA TZAM DU BSAM PA MANG BA DANG DE MANG BA TZAM DU DE LAS BYUNG BA'I SHES RAB MANG BA DANG, DE JI TZAM MANG BA BZHIN DU BSGOM PAS NYAMS SU LEN PA MANG LA, ZHES GSUNGS PA'I PHYIR RO, ,'ON KYANG THOS PA KHA PHYIR BLTAS KHO NAR MA SONG BA ZHIG DGOS PAR MNGON NO, ,DES NA THOS PA'I SHES RAB DANG DE LAS BYUNG BA'I SHES RAB, BSAM PA DANG DE LAS BYUNG BA'I SHES RAB, BSGOM PA DANG DE LAS BYUNG BA'I SHES RAB KYI KHYAD PAR YANG SHES DGOS SO,, SMRAS PA, BSTAN PA'I SNYING

, ,PO BDAG MED LTA BA NYID, ,GRUB MTHA' RNAM BZHI'I DBYE BA DANG 'BREL BAR, ,RJE BTZUN CHOS KYI RGYAL PO BTZONG KHA PA'I, ,DGONGS PA JI BZHIN MDOR BSDUS BDAG GIS BSHAD, ,TSUL 'DI LTO GOS TZAM ZHIG DON GNYER LA, ,NYE BAR MKHO BA 'GA' YANG YOD MIN KYANG, , DAM CHOS BDUD RTZI'I RO MCHOG MYONG 'DOD PA'I, ,BLO LDAN DAG LA PHAN SRID SNYAM NAS BRIS, ,TSUL 'DIR 'BAD LAS RAB DKAR DGE BA NI, ,GANGS RI'I TOG 'DRA JI SNYED THOB PA DE, ,BSTAN PA'I SNYING PO YUN RING GNAS PA DANG, ,MTHAR YANG SANGS RGYAS THOB PA'I RGYUR BSNGO'O, (,CES GRUB MTHA' BZHI DANG 'BREL BAR LTA BA'I RIM PA RNAM PAR BSHAD PA THAR LAM GSAL BYED CES BYA BA 'DI NI, DAD PA DANG RNAM DPYOD ZUNG DU 'BREL BA'I RGYA THANG DKA' BCU PA 'JAM DBYANGS SBYIN PAS, JI SKAD DU RJE'I ZHAL NAS, BSTAN PA'I SNYING PO STONG PA NYID, CES BSHAD PA LTAR, BDAG MED RTOGS PA'I LTA BA NYID CHOS KYI SNYING POR MTHONG NAS, RANG GZHAN 'GA' LA PHAN PAR 'GYUR SNYAM DU BSAMS TE, 'DI LTA BU ZHIG GYIS DANG KHO BOS BAR DU BRKO BAR BYA'O ZHES BSKUL BA LA BRTEN NAS RIGS PA'I TSUL LA BLO GROS KYI SNANG BA CUNG ZAD THOB PA SH'AKYA'I DGE SLONG GRAGS PA BSHAD SGRUB KYIS, SHING SGRUB DAG PA RNA BA'I YAR CHOS LA SBYAR BA STE, 'DIS KYANG RJE BLA MA'I BSTAN PA LA PHAN THOGS PAR GYUR CIG, ,,BKRA SHIS, ,)

[BLANK PAGE]