, ,YID DANG KUN GZHI'I RTZA BA'I MCHAN 'GREL BZHUGS SO,
, ,BDE CHEN CHOS SKU'I MKHA' KLONG YANGS PAR MNYAM NYID THUGS RJE'I SPRIN PHUNG 'KHRIGS, ,MI SHES TSA BAS GDUNG BA RNAMS LA ZHI BA BSIL BA'I CHAR RGYUN 'BEBS,, DAD LDAN BLO GSAL GTZUG PHUD CAN LA LEGS BSHAD DBYAR RNGAS KUN DGA' BSKYED, ,SA GSUM BLA MA 'JAM DPAL SNYING POR GUS PAS 'DUD DO BRTZE BAS SKYONGS, ,'JIG RTEN DBANG PHYUG RDOR 'DZIN ZUNG 'BREL GYI, ,GSANG GSUM YON TAN MTHA' DAG GCIG BSDUS PA, ,DAD LDAN SEMS NYID AA DARSHA YI NGOR, ,DUR SMRIG 'DZIN PAR SHAR BA DE LA 'DUD, , BLO GROS ZAB MOS GZHUNG BZANG DON, ,MCHOG TU JI BZHIN GZIGS PA YIS, ,DON GNYIS LHUN GRUB SEMS DPA' CHE, ,BLA MA DE LA GUS BTUD NAS, ,SGYID LUG LE LO'I DBANG
, ,GYUR PA, ,BDAG 'DRA 'GA' LA PHAN PA'I PHYIR, ,YID DANG KUN GZHI'I MCHAN GYI 'GREL, ,BKLAG PAS RTOGS NUS BSHAD PAR BYA, ,DE LA 'DIR YID DANG KUN GZHI'I RTZA BA 'DI 'CHAD PA LA GSUM, BSTAN BCOS RTZOM PA LA 'JUG PA'I YAN LAG ,RTZOM PA DNGOS, DE MTHAR PHYIN PA'I TSUL LO, ,DANG PO LA GNYIS, MCHOD PAR BRJOD PA DANG, RTZOM PAR DAM BCA' BA'O, , DANG PO NI, BDUD BZHI LAS RGYAL BAS NA RGYAL BA DANG SRAS SU 'JOG TSUL LA RIGS DANG, GSUNG LAS SKYES PA DANG, BYANG CHUB KYI SEMS KYI SGO NAS 'JOG TSUL GSUM LAS CI RIGS KYI SGO NAS RGYAL BA'I SRAS SU BZHAG PA'I NYAN RANG BYANG SEMS RNAMS LAM GANG NAS GSHEGS PA'I BGROD BSHUL, ,THEG PA GSUM GYI LAM 'BRAS BU DANG BCAS PA RANG GI BRJOD BYAR BYAS TE LEGS PAR GSUNGS PA'I BKA' SDE SNOD
GSUM DANG, DE'I BRJOD BYA NGES LEGS SU BGROD PA'I LAM JI LTA BA BZHIN THUGS SU CHUD NAS, ,GDUL BYA RNAMS LA NGO BO MA NOR BA DANG KHYAD PAR MA 'DRES PAR YONGS SU RDZOGS PAR STON PAR MDZAD PA'I, , MKHAS PA'I NANG NAS KYANG MKHAS PA'I MCHOG TU GYUR PA CHOS RJE DON GRUB RIN CHEN, RJE RED MDA' BA LA SOGS PA'I RJE RANG GI YONGS 'DZIN DE RNAMS LA MGO BOS PHYAG 'TSAL ZHES SHIN TU GUS PA STON PA'O, ,GNYIS PA NI, RNAM PAR RIG PA TZAM GYI GZHUNG GI DON SHIN TU RTOGS DKA' BA'I SHES BYA'I GNAS, ,NYON YID DANG KUN GZHI'I RNAM BZHAG GZHAN LA GSAL BAR BSTAN PA DANG, ,BDAG NYID KYIS KYANG SNANG TSOD LA SNGAR NGES PA RNAMS BRJED KYIS DOGS PAS PHYIS SU DE'I TSE DRAN PA GSO BAR BYA BA'I PHYIR DU, ,THOGS MED SKU MCHED KYI GZHUNG DANG DON GSANG BSHAD SBYAR SOGS DANG BLA MA'I GSUNG LA BRTEN NAS RTZA BA 'DIR BSHAD PAR BYA'O, , GNYIS PA LA GNYIS, GANG LAS BYUNG BA'I GRUB MTHA' BSHAD PA, DE LAS BYUNG BA'I KUN GZHI DANG NYON YID BSHAD PA'O, ,DANG PO NI, CI KUN GZHI DANG NYON YID 'DOD PA'I GRUB MTHA' SMRA BA DE SU ZHIG YIN, DUS NAM GYI TSE BYUNG ZHE NA, SMRA BA PO PHYI NANG KUN LA YOD MOD KYANG 'KHOR BA PHRA RAGS MTHA' DAG LAS SGROL BYED KYI THABS RANG DBANG DU SMRA BAS NA, RANG RANG GI TSUL LUGS SMRA BA'I PHYI NANG GI STON PA RNAMS LAS KYANG SMRA BA DAM PA SANGS RGYAS BCOM LDAN 'DAS KYIS MDO LANGARKA GSHEGS PA DANG,
, ,'JAM DPAL RTZA RGYUD SOGS NAS THEG PA 'OG MA GNYIS LAS MCHOG TU GYUR PA'I, ,THEG PA CHEN PO'I BSTAN PA 'DZIN PAR LUNG BSTAN PA'I 'PHAGS PA KLU SGRUB KYIS, ,THEG PA MCHOG STE THEG PA CHEN PO'I MDO SHER PHYIN SOGS KLU'I YUL NAS SPYAN DRANGS TE DBU MA PA'I LUGS SU BKRAL ZHING SHING RTA'I SROL PHYES TE DAR ZHING RGYAS PAR MDZAD PA'I RJES SU, ,'JAM DPAL RTZA RGYUD SOGS NAS DRANG NGES 'BYED PAR LUNG BSTAN BRNYES PA'I 'PHAGS PA THOGS MED KYIS, ,RJE BTZUN BYAMS PA BSGRUB PAS ZHAL GZIGS TE DGA' LDAN DU BYON NAS BYAMS CHOS SDE LNGA GSAN, SLAR YANG DZAMBU'I GLING 'DIR BYON NAS SEMS TZAM PA'I SROL BTOD LA DE'I SNGON DU 'PHAGS PA KLU SGRUB KYIS SROL PHYE BA'I DBU MA PA NYID LAS GZHAN PA'I THEG PA CHEN PO'I GRUB MTHA' SMRA BA SU'I GSAL KHA MED DO, ,GNYIS PA NI, 'O NA SEMS TZAM PA'I GRUB MTHA' DE LAS BYUNG BA'I KUN GZHI DANG NYON YID DE RGYU GANG GIS SHES PAR BYA SNYAM NA, MTSAN NYID DANG SGRUB PAR BYED PA DANG, ,RNAM SHES TSOGS DGUR 'DOD PA DGAG PA DANG TSOGS GCIG PUR 'DOD PA DGAG PA STE, ,DON TSAN RNAM PA BZHI YI SGO NAS KUN GZHI DANG; ;NYON MONGS CAN GYI YID SHES PAR BYA'O, ,DANG PO MTSAN NYID LA KUN GZHI DANG, NYON YID KYI MTSAN NYID GNYIS LAS DANG PO KUN GZHI'I MTSAN NYID NI, ,RTEN RNAM SMIN GYI KUN GZHI DANG BRTEN PA
SA BON GYI KUN GZHI'I DBYE BA YIS, ,MTSAN NYID RNAM PA GNYIS SU 'DOD DO, ,DANG PO LA GNYIS, MDOR BSTAN PA DANG, RGYAS PAR BSHAD PA'O, ,DANG PO NI, DE LA RTEN DU GYUR PA RNAM SMIN GYI KUN GZHI NI, ,GANG ZHE NA, DMIGS PA GZUGS SGRA DRI RO REG BYA STE, DON LNGA DANG RANG GI THUN MONG MA YIN PA'I BDAG 'BRAS SU GYUR PA'I SEMS CAN GYI DBANG PO GZUGS CAN PA LNGA DANG, GANG ZAG DANG CHOS KYI BDAG 'DZIN GYI BAG CHAGS GSUM LA DMIGS NAS, RNAM PA DBANG DON GNYIS KA RNAM PAR RIG PA STE SNANG YANG MI RIG PA STE MA NGES PA, NGO BO DGE BA DANG MI DGE BA GANG DU YANG LUNG DU MA BSTAN PA, 'KHOR REG PA LA SOGS PA'I, ,KUN 'GRO LNGA NYID DE KHO NA DANG MTSUNGS PAR LDAN ZHING TSOGS DRUG NYON YID LAS NGO BO THA DAD PA'I RNAM PAR SHES PA SHIN TU PHRA BA RGYUN BRTAN PA, DGE BA DANG MI DGE BA'I BAG CHAGS THAMS CAD BSGO BA'I GZHIR GYUR PA ZHIG GO ,GNYIS PA NI, GAL TE DBANG DON BAG CHAGS GSUM LA DMIGS PAR BSHAD NA, BAG CHAGS DE KUN GZHI'I DMIGS PAR JI LTAR 'GYUR SNYAM NA, BAG CHAGS KYI MING GI RNAM GRANGS SA BON GYI, ,DBANG GIS GNAS TE DBANG RTEN KHOG PA DANG DON TE GZUGS SOGS YUL LNGA DANG LUS SU STE DBANG PO LNGAR NI, ,SNANG BA'I PHYIR NA BAG CHAGS SAM SA BON DE KUN GZHI'I DMIGS PA DAG GI NANG TSAN TU DE'I THA SNYAD BTAGS PAR 'DOD KYI, KHO RANG KUN GZHI LA SNANG BA NI MA YIN NO, ,KUN GZHI'I GZUNG CHA
, ,STE 'DZIN STANGS KYI YUL GZUGS SOGS DON LNGA DAG LA NI, ,MIG SOGS DBANG PO'I RNAM PAR SHES PA LNGA YIS 'DZIN PAR BYED CING, ,DRUG PA YID KYI RNAM PAR SHES PA 'DI NI GZUGS SO, , 'DI NI MIG GO ,ZHES PA'AM, 'DI NI YUL LO, ,'DI NI DBANG PO'O, ,ZHES THA SNYAD 'DOG PAS NA, ,SNGAR JI SKAD BSHAD PA LTAR GYI MTSAN NYID JI LTA BA BZHIN DU TSANG BA'I KUN GZHI'I RNAM PAR SHES PA NI, KHAMS 'OG MA GNYIS KHO NA DAG TU YOD PAR NGES PA STE, ,GAL TE DE LTA MIN NA GZUGS MED PA RNAMS, ,GZUGS KYI 'DU SHES LAS MA 'DAS PAR THAL BA DANG, ,GZUGS CAN GYI SA PA RU THAL BAR 'GYUR TE, ,GANG GI PHYIR NA, KHAMS 'OG MA GNYIS NA'ANG KUN GZHI'I STENG GI DON SNANG GI BAG CHAGS SMIN PA LAS SHES PA LA RANG GI RDZAS TZAM GZUGS SU SNANG BA LAS, ,MA GTOGS PA'I PHYI ROL NA RDUL PHRA RAB BSAGS PA'I BEM PO ZHIG MED PA'I PHYIR RO, ,GANG ZAG DE'I KUN GZHI LA SNANG BA'I DON LNGA NI, DE'I DBANG SHES LA MNGON DU GYUR DGOS PA BSHAD PAS, MIG MED KYI KUN GZHI LA GZUGS MI SNANG BA SOGS SHES PAR BYA'O, ,ZHIB CHA GZHAN YANG MNGAL DU NYING MTSAMS SBYAR MA THAG PA DANG, 'CHI SRID LA GNAS PA'I GANG ZAG GI KUN GZHI LA YUL GANG SNANG DPYAD DGOS SHING, DKA' 'GREL LAS, GZUGS MED KYI KUN GZHI DMIGS BRAL GYI SHES PA LTA BUR GSUNGS MOD KYANG, SHES PA RANG MTSAN PAR 'DOD PHYIN YUL ZHIG MED DU MI RUNG BAR SNANG
DGOS SO, ,GAL TE NAM MKHA' MTHA' YAS SOGS KYI SNYOMS 'JUG LA NAM MKHA' SOGS KYI SNANG BA DE, SA DE DANG DE'I KUN GZHI LA SNANG BAR 'DOD NA'ANG DPYAD PAR BYA STE, SNYOMS 'JUG ZAG BCAS DE DAG RTOG BCAS YIN PAS SNANG BA DE DAG KYANG SGRO BTAGS YIN DGOS NA, DE KUN GZHI LA CI'I PHYIR SNANG SNYAM STE, 'DUS MA BYAS SGRO BTAGS KUN GZHI LA MI SNANG BA 'CHAD PAR 'GYUR BA'I PHYIR RO, ,KHAMS 'OG MA GNYIS NA'ANG RNAM PA GCIG TU SNANG BA'I LUGS 'DOD MKHAN BAL PO DZA HU NA RE, MI'I KUN GZHI LA LHA DANG DMYAL BA SOGS 'JIG RTEN THAMS CAD MI'I 'JIG RTEN LTA BUR SNANG ZER BA DANG, RNAM PA KHRA BOR SNANG BA'I LUGS 'DOD MKHAN MNGON PA BA KHA CIG GIS, MI LTA BU'I SEMS CAN BYE BRAG PA GCIG GI NI, , RGYUD KYI KUN GZHI LA NI 'GRO BA RIGS DRUG GI SNOD DANG BCUD, ,THAMS CAD RANG RANG JI LTA BA BZHIN DU SNANG BAR 'DOD DO, ,DE MI 'THAD DE, DE LTA NA GZUGS KHAMS KYI, ,LHA LA'ANG LCAGS BSREG 'BAR BA SOGS, DMYAL SNANG MTSAN NYID PA 'BYUNG BA DANG, ,DMYAL BA PA RNAMS LA YANG LHA RNAMS KYI, ,LUS LONGS SPYOD PHUN SUM TSOGS PA SOGS SNOD BCUD KYI SNANG BA 'BYUNG BAR THAL BA DANG, ,THA MAL PA RANG RE LTA BU RNAMS LA RANG LA BSKAL DON DU SONG BA YI, ,'OD ZER CAN GYI ZHING KHAMS KYI 'GRO BA'I KHYAD PAR DANG, MDUN GYI SHA ZA DANG, LHA'I BAR SRID PA LTA BU'I YUL SNA TSOGS PA SNANG BAR THAL BAR 'GYUR TE, ,DE DAG GI RGYUD KYI
, ,KUN GZHI LA SNANG BA GANG ZHIG ,KUN GZHI LA SNANG NA KUN GZHI'I STENG GI YUL DE DAG SNANG BA'I BAG CHAGS SMIN PA'I STOBS KYIS, GANG ZAG DE'I RGYUD KYI 'JUG SHES LA SNANG DGOS SHING, DER MA ZAD BDE BA DANG SDUG BSNGAL BSKYED PAS PHAN PA DANG GNOD PAR YANG 'GYUR DGOS PA'I PHYIR RO, ,DE'I PHYIR MNGON PA BA KHA CIG GIS KUN GZHI GCIG LA 'DOD GZUGS GNYIS KA SNANG BAR 'DOD PA DANG, LA LAS BSAM GTAN BZHI PA NI THUN MONG MA YIN PA'I LAS KYIS BSKYED PAS MI SNANG LA; GZHAN THAMS CAD SNANG BAR 'DOD PA DANG, GZHAN DAG GIS, TSAD KYIS BCAD PAR MI NUS PA'I SNOD BCUD THAMS CAD SNANG BAR 'DOD PA MI 'THAD PAR SHES PAR BYA'O, ,'O NA, KHAMS 'OG MA GNYIS KYI KUN GZHI LA CI 'DRA ZHIG SNANG ZHE NA, DNGOS SU RANG RGYUD LA LDAN PA'I GANG ZAG GI DBANG PO LNGA DANG, DE'I YUL DON LNGA SNANG BA YIN NO, ,'O NA KUN GZHI'I YUL DER ZAD DAM ZHE NA, BRGYUD NAS GANG ZAG DE YI RGYUD KYI RNAM SHES TSOGS DRUG GI ,YUL DU SNANG BAR GANG NUS PA, ,PHAL CHER GANG ZAG DE'I RGYUD KYI KUN GZHI'I YUL DU'ANG 'JOG PA YIN TE, ,YUL DRUG GA GANG ZAG DE LA SNANG ZHES PA'I SNANG MKHAN GYI GANG ZAG DE'I BTAGS DON BTZAL NA KUN GZHI LAS MI RNYED PAS SO, ,'ANG SGRAS KUN GZHI'I YUL DBANG DON GNYIS SU MA ZAD PAR STON PA'O, ,'O NA GANG ZAG DE'I TSOGS DRUG GI YUL THAMS CAD KUN GZHI LA SNANG BA YIN NAM SNYAM NA, DBANG PO LNGA DANG, DE'I YUL DON LNGA DANG, KUN GZHI'I STENG GI MNGON PAR BRJOD PA DANG, BDAG TU
LTA BA DANG, SRID PA'I YAN LAG GI BAG CHAGS RNAMS LAS GZHAN PA DRUG PA YID KYI RNAM PAR SHES PA KHO NA'I 'DZIN STANGS KYI YUL, ,GSUNG RAB YAN LAG BCU GNYIS KYI GZHUNG TSIG TU GYUR PA'I MING DANG YI GE DU MA 'DUS PA'I MING GI TSOGS DANG, TSIG GI TSOGS LDAN PA MA YIN PA'I 'DU BYED DANG, 'DAS PA DANG, MA 'ONGS PA DANG, NAM MKHA' DANG, 'GOG PA SOGS NI, KUN GZHI'I 'DZIN STANGS KYI YUL DU MI 'GYUR TE, ,GANG GI PHYIR NA DRUG PA YID KYI RNAM PAR SHES PA NI 'DI'O, ,DE'O ZHES THA SNYAD SNA TSOGS PA BTAGS NAS YUL 'DZIN PA'I KHYAD CHOS CAN YIN PA DANG, ,KUN GZHI NI RANG DANG MTSUNGS LDAN GYI BKRA BAR 'DZIN PA'I 'DU SHES KYIS DBEN PA'I PHYIR RO, ,'O NA, KUN GZHI DGE MI DGE LUNG MA BSTAN GSUM LAS GANG YIN SNYAM NA, DGE MI DGE'I BAG CHAGS BSGO GZHI YIN PA'I PHYIR DANG, ,DGE BA DANG MI DGE BA GANG DANG YANG CIG CHAR DU MNGON GYUR DU, , RGYUD GCIG STE GANG ZAG BYE BRAG PA GCIG GI RGYUD LA NI 'JUG PA'I PHYIR NA, ,'CHAD 'GYUR LTAR MA SGRIB LUNG MA BSTAN DU RIGS PAS GRUB BO, ,MA SGRIB LUNG MA BSTAN YIN PAS DGE BA BCU GCIG DANG, RTZA NYON DRUG , NYE NYON NYI SHU 'KHOR DU MI 'BYUNG BA DANG MI GSAL BA STE YUL BYE BRAG TU GSAL BAR GCOD MI NUS PA DANG, DGE BA MA YIN PA'I PHYIR NA, YUL DES LNGA 'KHOR DU MI 'BYUNG NGO, ,GZHAN YANG SEMS PA DANG SHES RAB CI RIGS LA BRTEN NAS DON GYI NGO BO
, ,RAGS PA LA RTOG PA DANG KHYAD PAR DPYOD PA MED PAS, RTOG DPYOD GNYIS MI 'BYUNG BA DANG, SAD MA SAD KYI GNAS SKABS KUN TU 'BYUNG BA DANG, DBANG SHES YUL LA 'JUG PA RANG DBANG MED PAR SDUD PA MED PAS GNYID MI 'BYUNG BA DANG, TSOR BA YID MI BDE DANG MTSUNGS PAR MI LDAN PAS 'GYOD PA MI 'BYUNG BA STE, DE LTAR GZHAN 'GYUR BZHI YANG 'KHOR DU MI 'BYUNG NGO, ,DES NA KUN GZHI'I 'KHOR LA REG PA LA SOGS PA KUN 'GRO LNGAR NGES LA DE'I NANG GI TSOR BA NI, ,BDE SDUG BTANG SNYOMS GSUM LAS GANG ZHE NA, BDE BA DANG SDUG BSNGAL GANG RUNG YIN NA, DGE BAS KYANG RNAM SMIN GYI TSOR BA SDUG BSNGAL 'BYIN PAR 'GYUR BA SOGS KYIS GNOD PAS, BDE SDUG GANG YANG MA YIN PA'I BAR MA'O CI'I PHYIR KUN GZHI ZHES BYA ZHE NA, NYON YID KYIS SEMS CAN KUN RNAM SHES 'DI LA DMIGS NAS GANG ZAG GI BDAG TU NI, ,'DZIN PA LA SBYOR BA'I GZHI YIN PA'I PHYIR NA KUN GZHI ZHES BYA'O, ,KUN GZHI'I RDZAS RGYUN RNAM SMIN GYI'AM LEN PA'I RNAM PAR SHES PA DE THEG DMAN GYI DBANG DU BYAS NA, LHAG MA MED PA'I DGRA BCOM THOB KHA DANG THEG CHEN GYI DBANG DU BYAS NA SGOM LAM RDO RJE LTA BU'I TING NGE 'DZIN GYI SNGA LOG ,BAR DU RGYUN MI 'CHAD DU 'JUG CING, ,DE NAS LDOG STE, DE SRID DU ZAG BCAS ZAG MED KYI BAG CHAGS SAM SA BON CI RIGS 'DZIN LA, DE NAS DE'I STENG GI BAG CHAGS 'GAG DGOS THAM CAD 'GAG ,SAD DGOS PA THAMS
CAD SAD PAR 'GYUR BA'I PHYIR RO, ,GNYIS PA LA GSUM, NGO BO, DBYE BA, 'PHROS DON NO, DANG PO NI, BRTEN PA SA BON GYI KUN GZHI NI, ,GANG ZHE NA, GANG GIS BSGO BAR BYED PA TSOGS BDUN 'KHOR BCAS KYIS GANG LA BSGO BAR BYA BA'I GZHI KUN GZHI'I RNAM SHES LA, ,BSGO BYED RANG NYID 'GAG PA LA MNGON DU PHYOGS PA'I TSE, ,BZHAG PA'I DGE MI DGE LUNG MA BSTAN CI RIGS KYI BAG CHAGS PHYIS SU RKYEN DANG 'PHRAD NAS SMIN PA LAS RIGS 'DRA PHYI MA 'GRUB RUNG GI NUS PA STE, DPER NA, DA LTA GSUNG RAB LA THOS SOGS ZHIB TU BYAS PAS TSE RABS PHYI MA RNAMS SU RTEN BOR BAS BRJED KYANG, YANG THOS SOGS BYAS NA SNGAR LAS TSEGS CHUNG DUS SHES NUS PA LTA BU 'O BSGO GZHI LA NI, ,KHYAD PAR DU DANG LDAN PA DGOS ZHE NA, DPER NA, SNA MA'I ME TOG GI DRI DE RGYUN MI BRTAN PA SGRA DANG RLUNG LTA BU LA BSGOS SU MED LA, BRTAN PA RDO DANG SHING LA SOGS PA LA 'GO BA LTAR 'DIR YANG GNYEN PO MA SKYES KYI BAR DU RGYUN CHAGS SU 'JUG PA'I RGYUN BRTAN PA'I KHYAD PAR DANG, SGOG SKYA DANG TZANDAN LTA BU DRI MI MNYAM PA LA MI 'GO ZHING, MNYAM PA LA 'GO BA BZHIN DU 'DIR YANG DGE MI DGE GANG DU'ANG LUNG DU MA BSTAN PA'I KHYAD PAR DANG, NAM MKHA' LTA BU MA YIN PAR RGYU DANG RKYEN GYIS 'DU BYAS PAS BSGO BAR BYAR RUNG BA'I KHYAD PAR, ,RANG LA BAG CHAGS BSGO BAR BYED PA TSOGS BDUN DANG BSGO GZHI RANG NYID GNYIS GANG ZAG GCIG GI RGYUD LA DUS MTSUNGS SU 'BREL BA'I KHYAD PAR DANG, ,RANG LAS GZHAN PA GANG LA'ANG BAG CHAGS
, ,DE BSGOR MI RUNG BAS NA MTHA' GCIG TU RANG NYID KHO NA BAG CHAGS KYI RTEN DU GYUR PA'I KHYAD PAR TE, ,BSGO GZHI KHYAD PAR LNGA DANG LDAN PA'O, ,GNYIS PA NI, SPYIR SA BON LA NAS DANG AUTPA LA'I RTZA BA LTA BU PHYI'I SA BON DANG KUN GZHI'I STENG GI BAG CHAGS LTA BU NANG GI SA BON DANG KUN NAS NYON MONGS DANG RNAM BYANG GI MI GSAL BA DANG, ,DGE MI DGE GNYIS KYI MI GSAL BA'AM, YANG BSHAD TSUL GCIG LA, KUN BYANG NGAM, DGE MI DGER DPYAD NA DE GANG DU'ANG MI GSAL BA LUNG MA BSTAN GYI SA BON DANG, PHYI NANG GI SA BON GNYIS SAM YANG NA, KUN NYON RGYU 'BRAS DANG, RNAM BYANG RGYU 'BRAS GNYIS KYI SA BON DANG DON DU NANG SHES PA'I RDZAS TZAM YIN YANG THA SNYAD PA'I SHES PA'I NGOR PHYI'I YUL DU SNANG BA THA SNYAD PA'I SA BON NAM, KUN RDZOB PA'I SA BON TE PHYI'I SA BON NYID DANG NI, ,GZHAN DBANG YONGS GRUB GNYIS BDEN PAR GRUB PA NANG SHES PA BDEN PAR GRUB PA LA RAG LAS PAS NA NANG GI SA BON LA DAM PA'I DON GYI SA BON GYI MING BTAGS TE DE DAG KUN, ,BSDUS NA GRANGS KYI SGO NAS SA BON RNAM PA DRUG TU 'DOD DO, ,DBYE BA'I TSUL GZHAN YANG YUL LA THA SNYAD SNA TSOGS PA 'DOGS PAR BYED PA'I SHES PAS BZHAG PA'I MNGON BRJOD KYI BAG CHAGS DANG, 'JIG LTA KUN BTAGS SOGS DRUG PA YID KYI RNAM SHES DANG MTSUNGS LDAN CI RIGS PA'I BDAG 'DZIN DANG, NYON YID 'KHOR BCAS KYIS BZHAG PA'I BDAG LTA'I BAG CHAGS DANG, ,'PHEN BYED KYI LAS DANG,
'JUG SHES DGE MI DGE SOGS KYIS BZHAG PA'I SRID PA'I YAN LAG GI BAG CHAGS GSUM DANG, ,SNOD KYI 'JIG RTEN 'GRUB PA'I THUN MONG GI SA BON DANG, BCUD KYI 'JIG RTEN 'GRUB PA'I THUN MONG MA YIN PA'I SA BON DANG, ,YANG BDE SDUG GI RTEN DU GYUR CING SEMS KYIS ZIN PAS NA BCUD KYI 'JIG RTEN 'GRUB PA'I TSOR BA DANG BCAS PA DANG DES MA ZIN PAS NA SNOD KYI 'JIG RTEN 'GRUB PA'I TSOR BA MED PA'I, ,SA BON TE DBYE TSUL RNAM PA BZHI DANG, YANG GNAS NGAN NI SDIG PA STE, DE LEN PA NI DE KUN NAS SLONG BAR BYED PA STE, NYON MONGS PA RNAMS KYI SA BON DANG, ,SHIN TU SBYANGS PA 'JIG RTEN PA'I CHOS DGE BA'I SA BON DANG SPYAD ZIN PA DGE SDIG GI SA BON RNAM SMIN GYI NGO BOR SMIN ZIN PA DANG, ,SPYAD MA ZIN PA MNGON BRJOD KYI BAG CHAGS TE, DE DANG BCAS PA DRUG TSAN SOGS SU MA ZAD BZHI RU'ANG GSUNGS SO, ,'ON KYANG DE DAG GI NANG NAS SA BON 'GA' ZHIG NI NANG GI BAG CHAGS BSHAD PA'I ZHAR LA BSTAN PAR DON GSANG BSHAD SBYAR GNYIS DANG, RJE'I DKA' 'GREL LAS GSUNGS PAS THAMS CAD BRTEN PA SA BON GYI KUN GZHI'I DBYE BAR MI SEMS SO, ,GSUM PA NI, KUN GZHI RNAM PAR SHES PA'I STENG GI BAG CHAGS DE YANG RTEN DU GYUR PA RNAM SMIN GYI KUN GZHI LAS NI, ,LDOG PAS PHYE BA'I RDZAS GCIG PA BYAS MI RTAG LTA BU DANG, DE LA MA LTOS PA'I RDZAS THA DAD PA KA BA DANG BUM PA LTA BU GANG YANG MIN TE, ,DANG PO LTAR NA, RTEN DU GYUR PA RNAM SMIN GYI KUN GZHI LA DMIGS RNAM YOD PA BZHIN DU,
, ,BAG CHAGS KYI MING GI RNAM GRANGS SA BON DE LA'ANG DMIGS RNAM YOD PAR THAL BA DANG, ,'GRO BA RIGS DRUG GI LHA DANG LHA MA YIN GNYIS GCIG TU BGRANGS TE, DE LNGA YI SA BON RNAMS, , PHAN TSUN 'CHOL BA STE 'DRES PA NYID DU 'GYUR BA DANG, ,'DOD PA LA SOGS PA'I KHAMS GSUM PO NYID KYANG 'CHOL BAR 'GYUR BA'I PHYIR NA LDOG PAS PHYE BA'I RDZAS GCIG NYID MIN LA, ,GNYIS PA LTAR NA, RTEN GYI GANG ZAG BYE BRAG PA GCIG GI RGYUD LA NI RDZAS THA DAD PA'I KUN GZHI'I RNAM SHES GNYIS, ,YOD PAR THAL BAR 'GYUR TE, BAG CHAGS DE GZUGS SU NI DOGS PA MED LA, KHO RDZAS YOD DU KHAS BLANGS PAS LDAN MIN 'DU BYED DU MI RUNG NA, RNAM PAR SHES PA LAS GZHAN DU 'OS MED DO, ,DE BAS NA RTEN DU GYUR PA RNAM SMIN GYI KUN GZHI LAM LTOS PA'I RDZAS SO SO PA'ANG MIN NO, ,RGYU MTSAN DES NA RTEN DU GYUR PA RNAM SMIN GYI KUN GZHI LAS KUN GZHI RNAM SHES DE NYID DU DANG,, DE LA MA LTOS PA'I RDZAS GZHAN PA GANG DU YANG BRJOD DU MED PA STE, ,KUN GZHI RNAM PAR SHES PA DE LA LTOS PA'I BTAGS YOD TZAM DU GNAS PA YIN TE, DPER NA, MTSON BYA DE NGES PA DE'I MTSAN NYID NGES PA LA LTOS DGOS PAS MTSON BYA LA BTAGS YOD CHOS GSUM TSANG BA ZHES BRJOD PA BZHIN YIN PA'I PHYIR RO, ,BAG CHAGS DE 'JOG BYED DGE BA LA SOGS PA GANG YIN KYANG, ,DES BZHAG PA'I BAG CHAGS KYI NGO BO NI MA SGRIB LA LUNG MA BSTAN, ,YIN GYI, KUN
BTUS LAS, DGE BA'I BAG CHAGS RJES 'BREL GYI DGE BAR BSHAD PA'I LUNG DANG, RNAM SMIN GYI RGYU MI BYED PAR THAL BA DANG, RGYU MTHUN GYI 'BRAS BU MI BSKYED PAR THAL BA DANG, SDOM PA THOB NAS MA BTANG GI BAR DU DGE BA RGYUN CHAGS SU MI 'BYUNG BAR THAL BA'I RIGS PAS DGE BA DANG MI DGE BA MTSAN NYID PAR, ,BSGRUB NAS DE LTAR 'DOD PA DAG GI DAM BCA' BA'I DON LA LUNG DANG RIGS PA DE RNAMS SGRUB PAR BYED PA YANG DAG TU SONG BA MED DO, ,TSUL 'DI NI RGYAS PAR DKA' 'GREL LAS SHES PAR BYA'O, ,KUN GZHI'I STENG DU BAG CHAGS 'JOG PA'I TSUL LA LUGS GSUM STE, ,BSGO BYED LA MI LTOS PAR CHOS NYID KYIS GNAS PAR 'DOD PA DANG SNGON MED PA'I BAG CHAGS GSAR DU BSKYED, ,PAR 'DOD PA DANG, BAG CHAGS DE DAG GSAR RNYING GNYIS KAR 'DOD PA'O, ,'DIR BU STON RIN PO CHES LUGS DANG PO BLO BRTAN DANG, GNYIS PA YANG DAG BDEN SMRA, GSUM PA MCHOG GI SDES 'DOD GSUNGS, DBANG LO DANG SA BZANG LO CHEN GYIS, DANG PO ZLA SKYONG DANG YANG DAG BDEN, GNYIS PA DGA' BO DANG MCHOG GI SDE, GSUM PA SLOB DPON CHOS SKYONG SOGS KYIS 'DOD GSUNGS KYANG SHES BYED MA MTHONG ZHES GRUB MTHA' CHEN MO LAS SO, ,RANG LUGS LA BAG CHAGS GSAR RNYING GNYIS KA 'DOD CES DKA' 'GREL DANG, BDAG CAG SKYABS MGON DAM PA RGYAL KUN 'DUS PA'I NGO BO KUN MKHYEN CHEN PO DKON MCHOG 'JIGS MED DBANG PO'I ZHAL SNGA NAS KYIS GSUNGS SO, ,BRTEN PA SA BON GYI KUN GZHI 'DI LA CI'I PHYIR KUN GZHI'I THA SNYAD GDAGS SHE NA, KUN NAS NYON MONGS
, ,PHYOGS KYI CHOS THAMS CAD, ,MDOR BSDU NA, SDUG KUN GNYIS TE, KUN 'BYUNG SDUG BDEN GYI RGYU 'AM SDUG BDEN KUN 'BYUNG GI 'BRAS BU'I NGO BO RU, ,SBYOR BA'I PHYIR RAM YANG NA, RANG NYID KUN NYON PHYOGS KYI CHOS RNAMS KYI RGYU'I NGO BO DANG, CHOS DE DAG KYANG RANG GI 'BRAS BU'I NGO BOR SBYOR BA'AM, SEMS CAN RNAMS RANG GI CHA SHAS BDAG LTA'I BAG CHAGS KYI DBANG GIS GANG ZAG GI BDAG TU 'DZIN PA LA SBYOR BA'I GZHI'AM RGYU YIN PA'I PHYIR NA YANG KUN GZHI ZHES THA SNYAD BTAGS PA 'O, ,SA BON DANG RNAM SMIN GYI CHA GNYIS KA LA KUN GZHI'I THA SNYAD GDAGS RUNG DU 'JOG PAR BYED PA'I RGYU MTSAN GNYIS PO DE'I PHYIR DBANG THOB PA'I BYANG CHUB SEMS DPA' SA BRGYAD PA YAN CHAD DANG, THEG DMAN DGRA BCOM PA'I RGYUD LA, ,KUN GZHI YOD PA MA YIN TE, ,KUN GZHI'I THA SNYAD GDAGS RUNG DU, 'JOG BYED SEMS CAN KUN BDAG TU SBYOR BA NYON YID DANG, KUN NYON GYI CHOS THAMS CAD RGYU 'BRAS KYI NGO BOR SBYOR BA BRTEN PA SA BON GYI KUN GZHI GNYIS PO GANG YANG MED PA'I PHYIR RO, ,GNYIS PA NYON YID LA GNYIS, MTSAN NYID DANG, 'PHROS DON NO, ,DANG PO NYON MONGS CAN GYI YID KYI MTSAN NYID NI, ,DMIGS PA KUN GZHI'I RNAM SMIN GYI CHA NYID DE RTEN DU GYUR PA RNAM SMIN GYI KUN GZHI LA DMIGS NAS, ,RNAM PA GANG ZAG GI BDAG TU LTA BA NGO BO NYON MONGS PA CAN YIN PAS SGRIB PA YIN LA DGE BA DANG MI DGE BA GANG DU'ANG LUNG DU MA BSTAN PA, ,'KHOR REG PA SOGS KUN 'GRO LNGA DANG RNAM G-YENG,
BAG MED, RGOD PA, MA DAD PA, LE LO, RMUG PA DRUG GI STENG DU 'CHAD 'GYUR BZHI BSNAN PAS 'KHOR SEMS BYUNG BCO LNGA YOD KYANG RNAM G-YENG SOGS DRUG NI, 'DOD CHAGS DANG SOGS SGRAS BSDUS PA'I 'JIG LTA, NGA RGYAL, MA RIG PA BZHI CI RIGS KYI CHAR GTOGS PA'I DBANG DU BYAS TE SEMS BYUNG DGU KHO NA DANG MTSUNGS PAR LDAN PA'O, ,'DIR GAL CHE BA'I RTZOD SPONG ZUR TZAM 'GOD PA LA, KHO NA RE, 'DOD NYON DGU PA SPANGS PA'I 'DOD RTEN CAN GYI PHYIR MI 'ONG GI RGYUD KYI NYON YID CHOS CAN, 'DOD PA'I SAS BSDUS YIN PAR THAL, 'DOD KHAMS PA'I RGYUD KYI NYON YID YIN PA'I PHYIR, KHYAB STE, SUM CU PA LAS, GANG DU SKYES PA DE YI'O, ,ZHES GSUNGS PA'I PHYIR, 'DOD NA, PHYIR MI 'ONG DE CHOS CAN, KHYOD KYI RGYUD LA 'DOD NYON YOD PAR THAL, KHYOD KYI RGYUD KYI NYON YID DANG MTSUNGS LDAN GYI 'JIG LTA SOGS DE YIN PA'I PHYIR, 'DOD MI NUS TE, KHYOD KYIS 'DOD NYON SKOR DGU PO SPANG ZIN PA'I PHYIR, ZHE NA, DPYAD GZHI CHE YANG RE ZHIG SKABS 'DIR 'DOD NYON LA 'DOD NYON SKOR DGU GANG RUNG GIS MA KHYAB BAM SNYAM MO, ,GNYIS PA NI, SLOB PA 'GOG SNYOMS PA DANG BDAG MED MNGON SUM DU RTOGS PA'I MNYAM GZHAG GNYIS KYI TSE NA, GNAS SKABS LDOG DUS DANG, ,DBANG THOB PA'I BYANG SEMS SA BRGYAD PA YAN CHAD DANG, THEG DMAN DGRA BCOM PA'I TSE MTHAR THUG STE GTAN NAS LDOG GO ,'ON KYANG MTHAR THUG GI LDOG TSUL 'DI NYON YID SPANG PA LA BYED NA, SA BRGYAD PA BA LA ZHIB CHA DANG, SKYE MI RUNG DU BYAS TZAM LA BYED NA THEG DMAN GYI RDO RJE LTA BU'I TING NGE 'DZIN LA GNAS PA LA ZHIB CHA BYED DGOS PAR YOD DO, ,GAL TE GNAS SKABS DANG GTAN DU BA'I LDOG TSUL DE LTAR YIN NA, DRUG PA YID
, ,SHES KYI BDAG RKYEN NYON YID MED PAS, DE DAG GI RGYUD YA DRUG PA YID KYI RNAM SHES MED PAR THAL BA DANG, DAGS PA DANG, THEG DMAN DGRA BCOM PAS KYANG MNYAM NYID YE SHES THOB PAR 'GYUR RO SNYAM NA, DE DAG GI RGYUD LA NYON YID NYON MONGS CAN DU 'JOG PAR BYED PA'I, ,'JIG LTA SOGS GANG ZAG GI BDAG TU 'DZIN PA RNAMS GNAS SKABS DANG MTHAR THUG CI RIGS KYIS LOG PAR GYUR KYANG, ,'PHAGS PA MNYAM GZHAG PA'I RGYUD LA NYON YID DE YI RIGS TE KHAMS SAM RGYUN TZAM YOD PA'I PHYIR DANG, DAG SA PA DANG, DGRA BCOM PA'I RGYUD LA NYON YID KYIS CHOS KYI BDAG 'DZIN BSKYED PA'I NUS PA MA LOG PA'I PHYIR NA, ,DE DAG GI RGYUD LA DRUG PA YID SHES MED PAR THAL BA DANG DAG SA PA DANG DGRA BCOM PA GNYIS KYIS MNYAM PA NYID KYI YE SHES, ,THOB PAR THAL BA'I SKYON GNYIS RIM PA BZHIN RGYANG RING DU SPANGS PA YIN NO, ,'DIR MNYAM GZHAG ZAG MED KYI TSE NYON YID DE ZAG MED KHO NAR 'JUG PA'I TSUL GCIG DANG, YANG THEG DMAN MNYAM GZHAG GI TSE CHOS KYI BDAG 'DZIN GYI ZAG PA DANG BCAS PA DANG, THEG CHEN GYI DE'I TSE ZAG MED KHO NAR 'JUG PA'I TSUL TE, LUGS GNYIS DKA' 'GREL LAS GSUNGS PA RNAMS LA ZHIB TU DPYAD PAR BYA'O, , GNYIS PA LA GNYIS, LUNG RIGS LA BRTEN NAS LUGS 'DIR KUN GZHI DANG NYON YID YOD PAR SHES DGOS PAR GDAMS PA DANG, SGRUB BYED DNGOS SO, ,DANG PO NI, LANG GSHEGS, DGONGS 'GREL SOGS, YID CHES PA'I LUNG DANG 'CHAD 'GYUR GYI RIGS PA BRGYAD
SOGS PHRA ZHIB KYI RIGS PA YIS, ,RNAM SHES TSOGS DRUG LAS NGO BO THA DAD PA'I, ,NYON YID DANG KUN GZHI RNAM PAR SHES PA, ,LUNG GI RJES 'BRANG GI RNAM RIG PA'I SKABS 'DIR, ,YOD PAR KHONG DU CHUD PAR BYA'O, ,GNYIS PA LA GNYIS KUN GZHI DANG, NYON YID SGRUB BYED DO, ,DANG PO LA GNYIS, RIGS PA DANG, LUNG GIS SGRUB BYED DO, ,DANG PO NI, RNAM 'BYOR GYI SA BZHI'I SGO NAS, SPYOD PA NYAMS LEN GTAN LA 'BEBS PA SEMS TZAM PA'I GZHUNG LUGS THEG BSDUS SOGS NAS, ,KUN GZHI DANG NYON YID SGRUB BYED KYI RIGS PA MTHA' YAS PA, ,GSUNGS KYANG KUN GZHI SGRUB BYED KYI GNAD BSDU NA, LUS LEN PA MI RUNG BA DANG DANG POR 'JUG PA MI RUNG BA DANG, GSAL BAR 'JUG PA DANG, DGE MI DGE'I SA BON DANG GCIG CHAR DU LAS DU MA BYED PA DANG LUS LA KHYAB PA'I TSOR BA DANG, ,'GOG PA'I SNYOMS 'JUG DANG 'CHI 'PHO BA MI RUNG BA STE, ,BRGYAD DU 'DUS PHYIR 'DIR BSHAD PAR BYA'O, ,DE'I SGRUB BYED 'DI DAG DKA' 'GREL LAS GSUNGS PA'I TSIG CUNG ZAD GSAL DU BTANG NA, KUN GZHI MED NA LUS LEN PA MI RUNG STE, LUS LEN BYED MED PA'I PHYIR, DER THAL, TSOGS DRUG RGYU MTSAN LNGA'I SGO NAS LUS LEN BYED MI RUNG BA GANG ZHIG ,DE LAS GZHAN MED PA'I PHYIR, TSOGS DRUG DER MI RUNG BA'I RGYU MTSAN GZHAN BZHI NI DKA' 'GREL DU GSAL ZHING, TSIG MDOS SU DOGS PAS 'DIR MI 'GOD LA, BZHI PAS BSHAD TSUL CUNG ZAD GO DKA' BAS DE GO BDE BAR BRJOD NA, TSOGS DRUG CHOS CAN, LUS KYI CHA SHAS THAMS CAD LA KHYAB PAR THAL, LUS LEN BYED KYI SHES PA YIN PA'I PHYIR, 'DOD MI NUS TE, YID SHES SNYING
, ,KHO NAR GNAS, DBANG SHES RNAMS RANG RANG GI DBANG POR GNAS PA'I PHYIR, GONG DU MA KHYAB NA, SHES PAS MA KHYAB PA'I LUS KYI CHA YOD PAR THAL, 'DOD PA'I PHYIR, 'DOD NA, SHES PAS MA ZIN PA'I LUS KYI CHA YOD PAR THAL, 'DOD PA'I PHYIR, 'DOD NA, DE 'DRA'I LUS KYI CHA LA MTSON BSNUN PAS KYANG GANG ZAG DE LA SDUG BSNGAL MI BSKYED PAR THAL, DE SHES PAS MA ZIN PA'I PHYIR, YANG KHO NA RE, LUS DBANG GIS MA ZIN PA'I LUS KYI CHA MED PAS SKYON MED DO SNYAM NA, MI 'THAD DE, GANG LUS SHES KYIS MA KHYAB PA DER LUS DBANG GIS KYANG MA ZIN PA'I PHYIR, /1\ KHO NA RE, KUN GZHI YOD NA 'DZIN STANGS MI GCIG PA'I RNAM SHES GNYIS CIG CHAR DU 'JUG PA ZHIG 'DOD DGOS PAS DE MED DO,, ZHE NA, 'O NA, GANG ZAG GCIG GIS MIG GIS GZUGS LA BLTA 'DOD PA NAS LUS KYIS REG BYA REG PAR 'DOD PA'I YID BYED NUS MTSUNGS RIS MED LNGA BSKYED NA, DE LA BRTEN NAS DBANG SHES LNGA GANG YANG MI SKYE BAR THAL, CIG CHAR DU'ANG MI SKYE, RIM CAN DU'ANG MI SKYE BA'I PHYIR, DANG PO KHAS, GNYIS PA GRUB STE, DE LNGA'I RGYU YID BYED SOGS KYI NUS PA LA KHYAD PAR CUNG ZAD KYANG MED PA'I PHYIR, /2\ GZHAN YANG, DBANG MNGON DANG LHAN CIG TU DE'I YUL SNANG BA'I YID SHES 'JUG PA GSAL BA SKYE MI RUNG BAR THAL, RNAM SHES GNYIS CIG CHAR DU MI SKYE BA'I PHYIR, /3\ GZHAN YANG, DGE MI DGE'I SA BON MED PAR THAL, DE BSGO GZHI'I KUN GZHI MED, TSOGS DRUG BSGO GZHIR MI RUNG BA'I PHYIR TE, RGYUN MI BRTAN PA'I PHYIR, /4\ GZHAN YANG, LAS DU MA CIG CHAR DU MI RUNG BAR THAL, SKYES BU ZHIG MGYOGS PAR 'GRO TSE, SNOD LAM 'PHRANG LA DMIGS PA'I RNAM RIG ,GNAS RKANG PA 'DEG 'JOG LA DMIGS PA'I
RNAM RIG ,NGA'O SNYAM PA'I RNAM RIG ,YUL MDUN GYI SA RDO SOGS LA DMIGS PA'I RNAM RIG DU MA CIG CHAR DU MI 'BYUNG BA'I PHYIR TE, 'DZIN STANGS MI GCIG PA'I RNAM SHES DU MA CIG CHAR MI 'BYUNG BA'I PHYIR, KHO NA RE, RNAM 'GREL LAS, RTOG GNYIS CIG CHAR MTHONG BA MED; ;CES GSUNGS PA DANG 'GAL LO, ,ZHE NA, SKYON MED DE, DE NI SDE BDUN RJES 'BRANG GI SEMS TZAM PA'I 'DOD TSUL YIN PA'I PHYIR TE, DES NA LUGS DES TSOGS BRGYAD KHAS MI LEN PA'I PHYIR, GRUB MTHA' RTZA BA LAS, MA BSHAD RTOG GNYIS CIG CHAR MIN SOGS PHYIR, ,BRGYAD MIN TSOGS DRUG SDE BDUN RJES 'BRANG LUGS, ,ZHES SO, ,/5\ GZHAN YANG, GNAS SKABS KUN TU LUS LA KHYAB PAR SKYES PA'I TSOR BA MED PAR THAL, KUN GZHI MED NA DE MI RUNG BA'I PHYIR, /6\ GZHAN YANG, 'DU SHES MED PA'I DANG 'GOG PA'I SNYOMS 'JUG GNYIS MED PAR THAL, DE GNYIS KYIS DGAG BYA TSOGS DRUG 'GOG DGOS LA, DE LAS GZHAN PA'I RNAM SHES MED PAS LUS BOR TE SHI BA DANG KHYAD MED DU 'GYUR BA'I PHYIR, /7\ GZHAN YANG, 'CHI 'PHO BA MED PAR THAL, LUS THAMS CAD LA KHYAB PA'I KUN GZHI RIM GYIS 'GAG PA DANG, LUS KYI DROD TSOR MTHA' NAS RIM BZHIN SDUD DGOS PA LAS, DE MI RUNG BA'I PHYIR RO, ,/8\ 'DI'I DANG PO, BZHI PA, DRUG PA, BDUN PA, BRGYAD PA RNAMS NI SGRUB BYED DNGOS DANG, LHAG MA GSUM NI RTZOD SPONG DU GSUNGS SO, ,GNYIS PA NI, LUNG GIS KYANG GRUB STE, KUN GZHI RNAM PAR SHES PA DE, ,DKA' 'GREL DU DRANGS PA'I DGONGS 'GREL SOGS THEG CHEN GYI MDO LAS GSUNGS PAR MA ZAD, THEG DMAN GYI GTZUG LAG STE SDE SNOD RNAMS SU YANG,,
, ,BSTAN TE, DE BZHIN GSHEGS PA 'BYUNG BA'I PHAN YON RNAM BZHI'I MDO LAS, SKYE DGU KUN GZHI LA DGA' BA, ZHES DANG, PHAL CHEN SDE PA'I LUNG LAS, RTZA BA'I RNAM PAR SHES PA ZHES DANG, ,GNAS BRTAN PA'I LUNG LAS, SRID PA'I YAN LAG LTA BA DANG, ZHES SOGS DANG, SA STON SDE PA'I LUNG LAS, 'KHOR BA JI SRID PA'I, ,PHUNG PO RNAM PA ZHES, MING GI RNAM GRANGS GZHAN DANG GZHAN DAG GIS BSTAN PAS NA LUNG GIS GRUB PO, ,'O NA, DE LTAR THEG DMAN GYI SDE SNOD NAS, GSUNGS PA'I SKYE DGU KUN GZHI LA DGA' BA ZHES SOGS KYI MDO TSIG GI DON, NYAN THOS SDE PAS JI LTAR 'GREL ZHE NA, DE LA BTZUN PA DBYIG BSHES DANG MI 'U THUNG DANG DBYANGS SGROG GSUM GYIS, ,RIM PA BZHIN DU PHUNG PO DANG TSOR BA BDE BA DANG, ,'JIG LTA GSUM LA DGONGS TE, DE DAG SKYE DGU RNAMS DGA' BAR 'GYUR BA'I GZHI YIN PA'I PHYIR, ZHES 'DOD DO, ,THEG PA 'OG MA PA DAG KUN GZHI STON PA'I SNOD MIN PAS DE'I LUGS LA NI, SLOB DPON DE GSUM GYI 'DOD TSUL DE LA MI RUNG BA CHER MED MOD KYI, ,'ON KYANG THEG CHEN PA RNAMS KYIS LUNG DE'I DON, ,KUN GZHI RNAM PAR SHES PA RU, ,'DOD PA CHES CHER BZANG BA STE, ,GANG GI PHYIR NA DBYIG BSHES SOGS BTZUN PA DE GSUM KYIS NI, ,BKRAL BA DE NYER LEN GYI PHUNG PO LNGA NI DMYAL BA PA SOGS KYI MI DGA' BA'I GZHI DANG, TSOR BA BDE BA NI BSAM GTAN BZHI PA YAN CHAD KYI MI DGA' BA'I GZHI DANG, 'JIG LTA NI CHOS THAMS CAD BDAG
MED PA LA MOS PA'I RANG SDE RNAMS KYI MI DGA' BA'I GZHI YIN PAS NA, SKYON DANG LDAN PA'I PHYIR RO, ,GNYIS PA NI, NYON MONGS CAN GYI YID MED NA, ,MA 'DRES PA YI MA RIG PA MED PAR THAL BA DANG, ,DRUG PA YID SHES DE 'JUG SHES YIN PA DBANG SHES LNGA PO DAG DANG 'DRA BA MA YIN PAR THAL BA DANG, ,'DU SHES MED PA'I SNYOMS 'JUG DANG, 'GOG PA'I SNYOMS PAR 'JUG PA'I BYE BRAG STE KHYAD PAR MED PAR THAL BA DANG, ,LANGS GSHEGS SOGS LAS, NGAR SEMS PA NI YID YIN NO, , ZHES PA'I NGES TSIG STE, MING GI RGYU MTSAN MED PA'I SKYON DU 'GYUR ZHING, ,GZHAN YANG, 'DU SHES MED PAS SKYES PA'I LHA LA DUS RGYUN DU, ,NGAR 'DZIN MED PAR THAL BA'I SKYON DU 'GYUR LA, SO SO SKYE BO LA NGAR 'DZIN PA'I 'JIG LTA DANG MTSUNGS PAR LDAN PA'I BLO NI, ,RNAM PA KUN TU 'BYUNG BA MI 'THAD DGOS PA'I PHYIR NA, ,NYON YID YOD PAR SHES PAR BYA'O, ,NYON YID MI 'DOD PA'I LUGS LA DE DAG MI RUNG BA'I TSUL NI, MA 'DRES PA'I MA RIG PA MED PAR THAL, DE 'PHAGS LAM MA THOB BAR DU RGYUN MI 'CHAD DU 'JUG PAS 'JUG SHES KYI 'KHOR DU MI 'BYUNG, NYON YID KYI 'KHOR DU 'BYUNG TSUL MED PA'I PHYIR, /1\ GZHAN YANG, DRUG PA YID SHES DANG DBANG SHES 'JUG SHES YIN TSUL MI 'DRA BAR THAL, DBANG SHES LA 'DAS PA'I RTEN YID GCIG DANG, LHAN CIG PA'I RTEN DBANG PO GCIG STE GNYIS YOD PA BZHIN DU, DRUG PA YID SHES LA DE GNYIS MED PA'I PHYIR TE, DE LA LHAN CIG PA'I RTEN NYON YID MED PA'I PHYIR, /2\ GZHAN YANG, 'DU SHES MED PA'I SNYOMS 'JUG DANG 'GOG PA'I SNYOMS 'JUG
, ,GNYIS KYI KHYAD PAR MED PAR THAL, DE NYON YID MNGON GYUR DU YOD MED KYI SGO NAS KHYAD PAR MI 'BYED PA'I PHYIR, /3\ GZHAN YANG, 'DU SHES MED PA BA'I RGYUD LA MA SHI BAR DU NGAR 'DZIN RGYUN CHAGS SU MI 'JUG PAR THAL, DE'I RGYUD LA TSOGS DRUG NI 'GAG ,NYON YID MED PA'I PHYIR, /4\ GZHAN YANG, MDO LAS, NGAR SEMS PA'I PHYIR YID DO, ,ZHES PA'I NGES TSIG MED PAR THAL, DBANG SHES LA NGAR SEMS PA MED, DRUG PA YID SHES LA RTAG TU NGAR SEMS PA MED PA'I PHYIR, /5\ GZHAN YANG, SO SKYE'I RGYUD LA DUS RTAG TU 'BYUNG BA'I NGAR 'DZIN ZHIG MED PAR THAL, TSOGS DRUG LA DE MED, NYON YID MED PA'I PHYIR RO,, /6\ KUN GZHI DANG NYON YID KYI SGRUB BYED 'DI NI PHYOGS TZAM MTSON PA STE, RGYAS PAR DKA' 'GREL LAS SHES PAR BYA'O, ,GSUM PA LA GNYIS, PHYOGS SNGA MA BRJOD PA DANG, DE DGAG PA'O, ,DANG PO NI, YONGS GRAGS KYI RNAM SHES TSOGS DRUG GI STENG DU BDUN PA NI LEN PA'I RNAM SHES ZHES BYA BA STE, RNAM SHES BRGYAD PA LA DMIGS PA'I GANG ZAG GI BDAG 'DZIN ZHIG DANG, ,BRGYAD PA KUN GZHI RNAM SHES LA YANG NGO BO NYID KYI KUN GZHI ZHES SANGS RGYAS 'GRUB PA'I DON DANG LDAN PA ZHIG DANG, RNAM SMIN GYI KUN GZHI ZHES KHAMS BCO BRGYAD LA DMIGS PA ZHIG DANG, KUN NAS NYON MONGS PA'I KUN GZHI ZHES CHOS KYI BDAG 'DZIN ZHIG STE, GSUM DU 'CHAD PA DANG, ,DGU PA NI DE BZHIN NYID KYI BDAG NYID GCIG PU LA DMIGS BYA YUL DE BZHIN NYID YANG DAG MTHA' SOGS DANG DMIGS BYED SHES PA DRI MED RNAM SHES SAM GZOD MA NAS RIG PA ZHES GNYIS SU, ,
PHYE STE 'DOD PA NI SLOB DPON YANG DAG BDEN PA'I LUGS SO, ,GNYIS PA NI, TSUL DE NI MI 'THAD DE, RNAM SHES BDUN PA LEN PA'I RNAM SHES SU MDO DANG SHING RTA CHEN PO GANG GIS KYANG MA BSHAD, KUN GZHI LA GSUM DU BYED PA YANG MI RIGS, RNAM SHES TSOGS BRGYAD DAG LAS LOGS PA STE GZHAN PA YI, ,KHYOD KYIS 'DOD PA'I GTZO BO RNAM SHES DGU PA DE 'DRA YOD PAR GYUR NA, ,RTAG PA YIN PA'I DNGOS PO YOD PAR 'GYUR TE, DE BZHIN NYID KYI NGO BOR GYUR PA'I RNAM SHES YOD PA'I PHYIR RO, DES NA TSOGS DGUR 'DOD PA LA LUNG RIGS KYIS SGRUB BYED MED DO, ,BZHI PA LA GNYIS, PHYOGS SNGA MA BKOD PA DANG, DE DGAG PA DNGOS SO, ,DANG PO NI, BYANG SEMS GCIG PUR SMRA BA NA RE, YID KYI RNAM PAR SHES PA GCIG PU NYID MIG SOGS DBANG PO DRUG GI ,RTEN LA SO SOR RGYU ZHING YUL DRUG 'DZIN PA'I TSE, ,'JUG SHES DRUG PO SO SO'I MING DU BTAGS PA TZAM YIN GYI, ,YID KYI RNAM SHES LAS NGO BO THA DAD PA'I DBANG SHES MED DO, ,DE LTAR YANG, BRAM ZE'I TSOMS DANG SKYE MCHED NI,, BCU GNYIS STON PA'I MDO LAS KYANG, ,RIM PA BZHIN DU SNGA MAS, RING DU 'GRO LA GCIG PUR RGYU ZHES GSUNGS PA DANG PHYI MAS RNAM PAR SHES PA'I TSOGS DRUG NI, ,YID KYI SKYE MCHED YIN NO ZHES GSUNGS PA'I PHYIR NA, ,SHES PA KUN YID KYI RNAM SHES GCIG PU'I RDZAS RGYUN DANG RANG BZHIN YIN NO, ,LO ZHES MA RANGS PAR BSTAN NO, ,GNYIS PA NI, DE MI 'THAD DE, LUNG SNGA MA'I DON NI DBANG SHES LNGA LAS GZHAN DU 'AM LOGS SU YID KYI RNAM SHES GCIG PUS DBANG SHES KYI YUL
, ,GZUGS SOGS KYIS MTSON PA'I CHOS THAMS CAD 'DZIN NUS PA LA DGONGS PA'I PHYIR DANG, LUNG PHYI MAS RNAM SHES TSOGS DRUG GA SKYE MCHED BCU GNYIS KYI NANG NAS YID KYI SKYE MCHED DU GSUNGS PAS, YID KYI SKYE MCHED DANG YID GNYIS DON GCIG PA'I PHYIR, DE YIN NA YID SHES YIN MI DGOS PAS SO, ,DE LTA MIN NA, DBANG SHES KYIS KYANG YID SHES BZHIN DU DU LDAN GYI LA PHAR RGYAB KYI ME LTA BU'I LKOG 'GYUR DU BA LTA BU'I RTAGS KYIS DPOG PAR THAL BA DANG, ,RANG DUS NA 'DAS ZIN DRAN PAR THAL BA DANG MA 'ONGS PA 'BYUNG 'GYUR GYI CHOS 'DZIN PAR THAL BAR 'GYUR BA'I PHYIR TE, ,YID SHES DANG NGO BO GCIG PA GANG ZHIG ,YID SHES KYIS DE DAG NUS PA'I PHYIR RO, ,DES NA RNAM SHES TSOGS GCIG TU 'DOD PA NI MUN SPRUL LO STE RTOG BZO'O, ,'DI SEMS BYUNG MI 'DOD PA LA SLOB DPON THOGS MED KYIS DGAG PA MDZAD DO, ,RTZA BA'I SA BCAD GSUM PA RTZOM PA MTHAR PHYIN PA'I TSUL LA GNYIS, LUGS 'DIR RNAM SHES TSOGS BRGYAD DU 'DOD RIGS PAR GDAMS PA DANG, MDZAD PA PO NGOS BZUNG ZHING BRTZAM PA'I DGE BA BSNGO BA'O, ,DANG PO NI, SNGAR BSHAD PA LTAR RNAM SHES TSOGS BRGYAD 'DOD PA LA LUNG RIGS KYIS SGRUB BYED DANG, DE LAS GZHAN DU 'DOD PA LA GNOD PA YOD PA DE'I PHYIR RNAM RIG PA'I MKHAS PAS JI SKAD BSHAD PA LTAR, YID CHES LUNG RIGS KYIS, ,LEGS PAR GRUB PA NI RNAM SHES TSOGS BRGYAD NYID YIN PA'I PHYIR NA, ,RNAM RIG PA'I GRUB MTHA'I GSANG BA STE LKOG TU GYUR PA'AM RTOGS DKA' BA'I GNAS
ZAB MO KUN GZHI DANG, GNYIS STONG GI DE KHO NA NYID LA MI ZHUM PA'I, ,MKHAS PAS LUGS DER RNAM SHES TSOGS BRGYAD NYID 'DOD PAR BYA'O, ,GNYIS PA NI, NYON YID DANG KUN GZHI'I DKA' BA'I GNAS, ,GSAL BAR STON PA'I BSTAN BCOS 'DI RNAM RIG SMRA BA'I MKHAS MCHOG RNAMS KYIS, ,JI LTAR BZHED PA BZHIN BLA MA YI, ,GSUNG LA BRTEN NAS RGYAL KHAMS PA, ,BLO BZANG GRAGS PAS SBYAR BA YI, ,DGE BA DES THUB PA'I BSTAN PA PHYOGS DUS KUN TU RGYAS PAR GYUR CIG ,'DIR SMRAS PA, BLO BZANG RNAM RIG BANG MDZOD SGO LCAGS KHA, ,MKHAS RMONGS SUS KYANG BDE BLAG 'BYED NUS PA'I, ,RMAD BYUNG MCHAN 'GREL GSER GYI LDE MIG 'DI, ,KHO BOS BCAD BRDAR BSREGS PA'I BLO YIS BSKRUN, ,'DIR 'BAD LEGS BYAS 'O MA'I MDANGS 'DZIN DES, ,DRI MED RNAM DPYOD PIR GYIS LEGS BRIS PA'I, ,MTHA' YAS RIG GNAS GYA GYU'I RI MO YIS, ,SNYING GI ME LONG NGOS KUN KHYAB GYUR CIG ,BKA' DRIN MTSUNGS MED RJE BTZUN BLA MA LA, ,'GYUR LDOG MED PA'I DAD PA SKYE BA DANG, ,TSANGS PA MTSUNGS PAR SPYOD PA'I GROGS DAG LA, ,PHYOGS ZHEN MED PA'I DAG SNANG SKYE BAR SHOG , CES CHOS 'DI LA SLOB GNYER BYED SKABS SEMS DPA' CHEN PO ^ BLO BZANG MCHOG GRUB KYI BKA' DRIN LAS RANG GIS GO TSUL BLO BZANG 'JIGS MED KYIS BRJED GSO'I TSUL DU YI GER BKOD PA'O,, *, ,STENG 'OG PHYOGS MTSAMS BZHUGS
, ,PA'I SANGS RGYAS LA, ,PHYAG 'TSAL SKYABS MCHIS BDAG CAG GAR 'GRO YANG, ,DGRA JAG CHOM RKUN ME CHU GCAN GZAN SOGS, ,'JIGS PA KUN SKYOBS BSAM DON LHUN GRUB MDZOD, ,PAn CHEN RIN PO CHES MDZAD PA'I PHYOGS BCU MUN SEL BZHUGS SO,, ,,AOm SVA STI, YID DANG KUN GZHIS 'GREL BA 'DI, ,AA BA GA YI WANG SHOG GI ,DGE SLONG DPAL DAN RGYA MTSO YIS, ,CHOS SDE SKU 'BUM BYAMS GLING DU, ,MTHUN RKYEN SBYAR TE PAR DU BSGRUBS, ,DGE 'DIS MA RGAN 'GRO BA RNAMS, ,DKA' BA'I DON LA NGES RNYED NAS, ,SA LAM BGROD PA MTHAR PHYIN SHOG, ,,AOm MA nI PAD ME H'Um, AOm A'A:RA PA TZA NA DH'I, AOm BADZRA P'A NI H'Um PHAt,, RJE BLO BZANG 'JIGS MED KYIS MDZAD PA'I BSTAN BCOS 'DI'I DPE RGYUN DENG DUS SHIN TU DKON PAS RGYUN CHUD ZOS SU MI 'GRO BA'I PHYIR, SGO MANG SKAL BZANG THABS MKHAS KYIS BOD RGYAL LO 2101 AOB SED tA'I 'PHRUL PAR THOG DPE GRANGS BRGYA THAM PA PAR BSKRUN BGYIS PA'O, ,DGE LEGS 'PHEL,, ,,