@816 SPYI NOR PHUN TSOGS ZHES BYA BA BZHUGS SO, , RNAM KUN MKHYEN PA'I 'OD KYIS RMONGS MUN SEL, ,MTSAN DPE'I RGYAN LDAN SKU YIS 'GRO KUN 'DUL, ,LEGS GSUNG 'PHRIN LAS 'BUM GYIS 'GRO KUN 'DREN, ,SKYABS KUN 'DUS ZHAL BLA MAR SNYING NAS 'DUD, ,KHYOD KYI THUGS RJE LCAGS KYU RNON PO YIS, ,BDAG SOGS 'GRO KUN NAM YANG MI GTONG BAR, , 'KHOR BA'I RGYA MTSO CHE LAS MYUR DRONGS LA, ,THAR BA'I SKAM SA CHE DER BZHUGS SU GSO, ,DAM CHOS 'OD SNANG 'BUM GYI RTZE DGA' YIS, ,RIG PA CHU SKYES GZHON NU 'DZUM PA'I ZHAL, ,RAB TU PHYE BA'I DGA' STON BLA NA MED, ,BLO LDAN SKYE BO'I GZIGS MOR 'GREM PAR BYA, DE YANG DAM CHOS NYI MA'I 'OD KYIS BSIL LDAN LJONGS 'DI MA KHYAB PA'I GONG DU, BCU PHRAG RIG PA'I GNAS ZHES YONGS SU @817 GRAGS PA DE NYID JI BZHIN MED LA, DAM PA'I CHOS MA DAR BA'I SNGON GYI RGYAL RABS RNAMS BON SGRUNG LDE'U GSUM GYIS BSKYANGS ZHES PA'I THA SNYAD TZAM GRAGS PA 'DI LTA STE BON NI LHA MCHOD 'DRE 'DUL, MO RTZIS PHYVA G-YANG 'GUG PA SOGS TE, DPER NA DENG DUS RNGA BA BOD RIGS RANG SKYONG KHUL ZHES BTAGS PA'I MNGA' KHUL WUN KHRON RDZONG GI KHONGS SU YOD PA'I SNGAR RTA DMAG CES 'BOD KYANG DENG DUS SPYANG RIGS SAM CHING RIGS ZHES 'BOD PA'I SA CHA'I LA BONG SOGS KYI YUL DU YI GE MED KYANG RNGA PHYED G-YOGS CAN BRDUNG ZHING LHA 'BOD KLU 'BOD SOGS BYED CING, RIM GRO DANG GRI 'DUL SOGS BYED PA, COG TZE DANG MDA' MDUNG YO BYAD SOGS LA LHA PHAB STE 'GUL SKYOD SOGS BYED 'JUG PA DANG, MAR NAG GDU KHOL NANG DU SNGAGS BTAB NAS LAG PA BCUG KYANG MI SREG PA DANG, LCAGS MES BSREGS TE DMAR SANG DU GYUR PA LA LCES BLDAGS NAS SNGAGS 'DEBS PA SOGS BYED PA'I KHYIM SNGAGS DE DAG NI GNA' DUS BON ZER BA DE YIN PA LAS, DE DUS KYI SKYABS GSUM DANG LAS 'BRAS KHAS LEN PA'I RAB BYUNG YOD PA'I BON DANG GTAN NAS MI 'DRA, KHRI SRONG GIS LHA 'DRE DMAR MCHOD BYED PA'I BON DAG MED PAR BTANG YANG MTHA' KHUL DU CUNG ZAD LUS YOD PA DE LTA BU RED, @818 SGRUNG NI RO LANGS GSER SGRUB KYI SGRUNG DANG, MA SANGS SGRUNG DANG, MCHIL BA'I SGRUNG SOGS MI RNAMS KYI RIG PA JE GSAL DANG, SEMS 'DUL BA'I DON DU NYAN BSHAD BYED PA DE YIN LA, DENG SANG YANG BYIS PA RNAMS PHYOGS 'DUS BYAS NAS, SGRUNG SNA TSOGS BSHAD PA DANG NYAN PA LA SHIN TU DGA' BA LTA BU YIN LA, RGYA NAG GI TA'O JO ZHES PA'I LUGS 'DZIN GYIS KYANG SGRUNG SNA TSOGS NYAN BSHAD BYED LA, BOD RANG LA'ANG LO RGYUS DNGOS DANG LHA SGRUNG SOGS NYAN BSHAD BYED PA, MI RIGS SO SOS SGRUNG LA BRTEN PA'I ZLOS GAR DANG GLOG BRNYAN BZO BA SOGS DENG DUS DAR BA LTA BU'O, ,DE DAG NI RIG PA GSAL BYED DANG, DRAN SGA 'BYED PA DANG, SLOB GSO GTONG BYED YIN PA, DENG SANG YANG DE DAG BED SPYOD BZHIN PA YIN NO, , LDE'U NI KHED 'JOG PA STE, THEM GNYER WA BA CHE (SRANG) CI YIN ZHES 'DRI BA LTA BU'O, ,ZHES GSUNGS LA, MI RNAMS KYI BLO RIG JE RNO LA 'GRO BA'I PHYIR RIG PA 'GRAN PA DANG, TA'O JO BA DAG GIS DE NI YANG DAG PA'I CHOS SU BRTZI BA RED CES ZER RO, , DENG SANG YANG BOD KYI SA CHA RNAMS SU NA GZHON RNAMS KYIS KHED 'JOG RES KYIS RIG PA 'GRAN BSDUR BYED BZHIN PA'O, ,'DI DAG GI SKABS SU 'GA' ZHIG GIS SNGAR LA MI BSTUN PA'I SNGON MED @819 GSAR BTOD YIN ZHES, RANG NYID GRAGS 'DOD KYI KUN SLONG GIS CAL COL SMRAS PA 'GA' MCHIS MOD KHUNGS MED RDOL GTAM 'BA' ZHIG TU MCHIS PAS, DGAG 'OS SU MI CHE, GONG GI 'DI DAG KYANG RIG GNAS KYI GRANGS SU 'GRO MOD, 'ON KYANG YONGS SU GRAGS PA'I RIG GNAS BCU'I GRANGS SU MI 'DREN NO, ,GZHAN YANG, MDA' 'PHONG 'GRAN PA DANG, RTA SOGS BZHON RGYUG GLU DANG GAR BRO SOGS YOD DE, SRONG BTZAN SGAM PO GZHON DUS YI GE MED MOD, MDA' 'PHONG GI RTZAL, MCHONG RGYUG GI RTZAL, GLU DANG GAR GYI RTZAL, ROL MO 'BUD DKROL GYI RTZAL SOGS RIG RTZAL CHE BAR BSHAD, 'ON KYANG DE DAG KYANG BCU PHRAG RIG PA'I GNAS KYI GRANGS SU MI 'DREN NO, ,RIG GNAS DNGOS GZHI DAR BA NI CHOS RGYAL SRONG BTZAN SGAM PO'I DUS YIN TE, DE'I TSE RGYAL SRID RAB TU DAR ZHING RGYAS NAS MTHA' BZHI'I RGYAL BO RGYA GAR DANG RGYA NAG LI DANG BAL SOGS PHAN TSUN BKA' 'PHRIN YANG YANG BYED DGOS BYUNG, DE DAG LA RANG RANG GI YI GE YOD PAS RANG GI YI GE'I STENG NAS 'PHRIN YOD LA BOD RGYAL RANG LA YI GE MED PAS, MI RIGS GZHAN GYI YI GE SHES PA'I DRUNG YIG BZHAG NAS 'PHRIN SOGS 'BRI DGOS, DE'I TSE RGYAL BO SRONG BTZAN GYI THUGS DGONGS LA, MTHA' BZHI'I RGYAL BO RNAMS NI DAM PA'I CHOS DANG YI GE ZUNG DU YOD PAS @820 BKA' 'PHRIN YANG RANG GI YI GE LA RDZONG BA ZHIG NA, RANG CAG LA DE MED PAS DMAN PA'I GRAS SU 'GRO BA DANG, GZHAN DAG GIS KYANG 'PHYA BA'I YUL DU GYUR PAS, DA NI MI LAS LHAR SGRUB PA'I THABS DAM PA'I CHOS DANG, DE NYID RTOGS PAR BYED PA'I THABS SU 'PHRUL GYI YI GE 'TSOL DU GTONG DGOS DGONGS NAS, BLON PO'I MCHOG RIG PA CAN MGAR STONG BTZAN YUL BZUNG G-YOG DANG BCAS TE BTANG BA TA LA WA TI RNAM GSUM DU BYON PA NA G-YOG PHAL CHER NAD KYIS GUM STE SLOB DPON MGAR STONG BTZAN YANG GUM PAR DGONGS TE THE TSOM NAS SLAR LOG GO, ,DE NAS GNYAL THU MI SNANG GRAGS KYI BU AA NU ZHES PA'AM THU MI BU CHUNG YANG ZER BA G-YOG DANG BCAS PA BRDZANGS PA BAL BOR CHU BSNYAMS SHING BSIL SMAN KHYER NAS PHYIN PAS N'A LEN DRAR BGROD DE MA H'A MI tA'I SLOB MA LHA RIG PA'I SENG GE ZHES BYA BA LO BDUN BSTEN NAS YI GE DANG SGRA RIG PA'I BSTAN BCOS SOGS MANG BO BSLABS, GZHAN YANG YIG MKHAN LI BYIN KA RA SOGS PAn dI TA MANG BO BSTEN NAS RIG GZHUNG DANG MDO RGYUD MANG PO BSLABS PAS MKHAS PA CHEN POR GYUR PA LA PAn dI TA RNAMS KYIS SAMBHO tA ZHES BLA THABS SU BTAGS TE BOD YANG DAG PAR ZER RO, ,PHYIR PHEBS NAS SKU MKHAR MA RU DHARA (DENG DUS KYI PHA BONG KHA) LO GSUM LA SKU MTSAMS BCAD DE SAm SKRi TA'I YI @821 GE DPER BLANGS NAS BOD KYI DBYANGS GSAL BSGRIG BZO MDZAD, SAm SKRi TA'I DBYANGS GSAL NAS 'DOR LEN BYAS SHING, YIG GZUGS BZOS, BRDA SPROD PA'I BSTAN BCOS BRGYAD MDZAD, DE NAS THON MIS YI GE 'BRI TSUL DBYANGS GSAL 'GOD SGRIG GSAR SNON BCAS LEGS PAR GRUB PA'I YIG PHUD DU RGYAL BO KHRI SRONG BTZAN LA BYA DKA' BA'I LAM NAS DRANGS PA'I BSTOD PA PHUL BA YONGS SU GRAGS PA LTAR YIN NO, ,DENG DUS 'DI DAG GI SKABS SU KHUNGS MED BYUNG RGYAL DU SMRA BA MANG YANG, TSAD MA RNAM 'GREL LAS, LOG PA'I LAN LA MTHA' MED PHYIR, ,DE DAG 'DI NI SPRO BYA MIN, ,ZHES GSUNGS PA LTAR SPRO BYAR MI 'OS PA'I GNAS SO, , BOD GANGS CAN GYI RIG PA'I GNAS BCU ZHES MKHAS PA RNAMS KYI NGAG TU YONGS SU GRAGS PA NI, LOG SMRA TSAR GCOD PA'I RIG GNAS SGRA DANG TSAD MA GNYIS, BDAG NYID KUN SHES PAR BYED PA'I RIG GNAS NANG DON RIG PA STE LNGA LA RIG GNAS CHE BA LNGA ZHES ZER, SNYAN NGAG MNGON BRJOD, SDEB SBYOR, SKAR RTZIS, ZLOS GAR LNGA LA RIG GNAS CHUNG BA LNGA ZHES ZER RO, , DE NAS THOG MAR CHOS DAR BA'I STOBS KYIS SGRA RIG PA DAR TSUL NI, DE NAS BZUNG STE YON TAN GYI RTZA BA BOD RANG GI YE GE @822 'BRI BA'I SROL YOD PAR GYUR NAS, YUL KHAMS GZHAN LA YOD PA'I CHOS DANG RIG PA'I GNAS DAG BOD RANG GI SKAD YIG TU SGYUR MGO BRTZAMS SO, ,DE NAS RGYAL BO CHEN PO KHRI SRONG BTZAN GYIS GTZUG LAG KHANG MANG BO BZHENGS NAS, LO TZ'A BA'I THOG MA THON MI SAMBHO tAS SPYAN DRANGS PA'I CHOS DANG RIG PA'I GNAS MTHA' DAG BOD LA SGYUR CIG GSUNGS, DE NAS THON MI SAMBHO tAS RANG GI MCHAN BU SLOB MA MANG BO LA BOD KYI BRDA SPROD PA'I GZHUNG DANG KA TZAN SOGS SGRA GZHUNG MANG BO BSLABS, RGYAL BO KHRI SRONG BTZAN CHOS LA SHIN TU DAD PAS, CHOS BSGYUR BA'I DON DU SKAD GSAR BCAD BYAS PA YIN PAR SGRA'I BSTAN BCOS SMRA BA RGYAN GYI ME TOG NGAG GI DBANG PHYUG GRUB PA LAS BSHAD DO, ,DE'I TSUL NI, DE'I SKABS SU BOD YUL SA RGYA CHE ZHING, 'BROG SDE BKRAM NAS YOD PA SHAS CHE BAS YUL GRU RE LA YUL SKAD RE YOD GSHIS, RE RE'I RJES SU 'BRANG NA MTHA' MI CHOD CING GCIG SDUD MI YONG BA GZHAN YANG CHOS KYI THA SNYAD MANG BO ZHIG GSAR DU THON PA SOGS RKYEN DU MA'I DBANG GIS, YUL DBUS KYI SKAD LA GTZO BOR BRTEN DGOS ZHES PA SOGS SKAD GSAR BCAD DANG BO BYAS PAR GSUNGS SO, , DE NAS RGYA GAR GYI SLOB DPON KU SA RA DANG, BRAM ZE SHANG KA RA, SLOB DPON LI BYIN, BAL BO'I SLOB DPON SH'I LA MANYDZU, @823 KHA CHE'I SLOB DPON TA NU TA DANG, GHA NU TA, RGYA NAG GI SLOB DPON HVA SHANG MA H'A DE WA TSE RNAMS SPYAN DRANGS TE, BOD KYI LO TZ'A BA THON MI SAMBHO tA DANG, DE'I MCHAN BU DHARMA KO SHA AA LO KA YE SHES DPAL SOGS KYIS LO TZ'A BYAS, DE RNAMS LAS RGYA GAR GYI SLOB DPON KU SA RA'I YON BDAG BAL BZA' KHRI BTZUN GYIS BYAS, LO TZ'A BA THON MIS BYAS, BRAM ZE SHANG KA RA'I YON BDAG RGYAL BOS BYAS, LO TZ'A BA DHARMA KO SHAS BYAS, RGYA NAG GI MKHAN PO'I YON BDAG RGYA BZA' KONG JOS BYAS, LO TZ'A BA YANG KONG JO NYID DANG LHA LUNG RDO RJE DPAL GYIS BYAS, BAL BO DANG KHA CHE'I YON BDAG BAL BZA' KHRI BTZUN GYIS BYAS, LO TZ'A BA YANG KHRI BTZUN NYID DANG THON MIS BYAS SO, ,LO PAn DE DAG LA GSER DNGUL GYI 'BUL BA SOGS BSNYEN BKUR BLA NA MED PA ZHUS TE, SDE SNOD GSUM DANG, SPYAN RAS GZIGS KYI MDO RGYUD NYI SHU RTZA GCIG SOGS BOD SKAD DU BSGYUR, DE LTAR RIG GNAS CHE BA LNGA'I YA GYAL SGRA RIG PA'I GZHUNG LUGS GSAR DU DAR BA'I MGO YANG DAM PA'I CHOS BSGYUR BA DANG DAR BA'I DON DANG 'BREL BA YIN NO, , MANG SRONG MANG BTZAN DANG, 'DUS SRONG MANG BO RJE GNYIS KYI DUS SU YANG MES PO SRONG BTZAN GYI DUS BZHIN DU CHOS SRID GNYIS CHAR ZUNG 'BREL DU DAR NAS MTHA' BZHI DBANG DU BSDUS, @824 CHOS DAR BA DANG MNYAM DU SGRA RIG PA YANG SNGAR BZHIN DAR RO, , KHRI LDE GTZUG BRTAN MES AAG TSOM CAN GYI DUS, GANGS TE SE NAS PAn dI TA SANGS RGYAS GSANG BA DANG SANGS RGYAS ZHI BA GNYIS GDAN DRANGS KYANG, GDAN MA DRONGS, 'ON KYANG PHO NYA BAS THEG PA CHEN PO'I MDO SDE LNGA BLO LA BZUNG NAS 'ONGS PAS, GLEGS BAM LNGA BZHENGS TE BZHUGS KHANG DU, BRAG DMAR MGRIN BZANG, BRAG DMAR KE RU, GSANG MKHAR BRAG MCHIMS NAM RAL, MA SA GONG GI LHA KHANG DANG LNGA BZHENGS, RGYA YUL KONG SHI NAS GSER 'OD DAM PA DANG, 'DUL BA LAS RNAM PAR 'BYED PA DANG, SMAN DPYAD KYI RIGS KHA SHAS BSGYUR, LI YUL NAS RAB TU BYUNG BA SPYAN DRANGS NAS GUS MCHOD BSNYEN BKUR MDZAD CING, BOD MI RAB TU BYUNG BA MA BYUNG, 'ON KYANG SAm SKRi TA DANG, LI DANG, RGYA NAG SOGS KYI SKAD YIG DANG, BRDA SPROD PA'I GZHUNG LUGS SBYONG BA NI MANG BO MCHIS STABS SGRA RIG PA DAR BYUNG, DE LTAR SGRA RIG DAR BA YANG CHOS KYI PHYIR YIN GSHIS, DE'I SKABS SGRA RIG DAR BA YANG DAM PA'I CHOS 'BREL TO, , KHRI SRONG LDE BTZAN GYI DUS SU, MKHAN PO ZHI BA 'TSO DANG, SLOB DPON PADMA 'BYUNG GNAS SPYAN DRANGS BSAM YAS KYI GTZUG LAG KHANG CHEN PO BZHENGS, MCHIMS AA NU'I BU SH'AKYA BRA BHA DANG, @825 PA GOR HE 'DOD KYI BU BEE RO TZA NA, SBA KHRI BZHER GYI BU SBA KHRI GZIGS, ZHANG NYANG BZANG GI BU LHA BES BTZAN DANG, SHUD PU KHONG SLEB, 'KHON KLU'I DBANG BO BSRUNG PA, NGAN LAM RGYAL MCHOG GTZANG LEGS GRUB, 'JAM DPAL GO CHA, BRAN KHA MU TIG GLANG KA TA NA, RTZANGS DE WEN DRA, RLANGS KHAMS PA GO CHA, 'KHON NA GEN, RMA RIN CHEN MCHOG LA GSUM RGYAL BA BYANG CHUB, SBA GSAL SNANG, SBA KHRI BZHER, SBRANG RGYANG LEGS GZIGS, SENG GONG LHA LUNG GZIGS, SNA NAM RDO RJE BDUD 'JOMS, SHUD PU DPAL GYI SENG GE, TSANGS SA LE'I BU RIN CHEN LEGS GRUB SOGS LA SGRA RIG PA LEGS SBYAR DANG, RGYA NAG LI, KHA CHE, BAL BO, ZA HOR SOGS KYI SKAD YIG BRDA SPROD SLOB BCUG PAS MANG CHE BA MKHAS PA CHEN POR GYUR NAS LO TZ'A BA MANG BO BYON, DE DAG LAS SAD MI MI BDUN RAB TU BYUNG ZHING, DE RJES RAB BYUNG GI SDE 'PHEL, LO TZ'A BA MKHAS PA RGAN GSUM, 'BRING GSUM GZHON GSUM SOGS LO TZ'A BA MANG BO 'PHEL, BSAM YAS KYI SGRA BSGYUR LO TZ'A GLING DU CHOS BSGYUR, BDUD 'DUL SNGAGS PA GLING DU DBANG BSKUR, RNAM DAG KHRIMS KHANG GLING DU SO THAR GYI SDOM KHRIMS PHOG DGA' LDAN SEMS BSKYED GLING DU BYANG SDOM PHOG MI G-YO BSAM GTAN GLING DU RGYA'I HVA SHANG LA SOGS PAS BSAM @826 GTAN BYED, BRDA SPROD TSANGS PA'I GLING DU BRDA SBYOR, BEE RO TZA NA'I GLING DU CHOS 'CHAD, DKOR MDZOD BE HAR GLING DU NOR BZHAG GO, ,KHAMS YAN CHAD DU CHOS GRVA CHEN PO BCU GNYIS BTZUGS, YER BA DANG MCHIMS PHUR SGOM GRVA BTZUGS, RGYA'I HVA SHANG MA KO LA SPYAN DRANGS NAS SBA RAD NA ZHES PAS SHES RAB 'BUM PA THOG MAR BSGYUR, BRAN KA LEGS, LHA LUNG, KLU GONG, DBUS GONG, CHUNG BO RTZE SOGS KYIS RGYA NAG GI LO TZ'A BYAS SO, ,GZHAN YANG RGYA GAR GYI SLOB DPON BI MA LA MI TRA DANG, SANGS RGYAS GSANG BA DANG, SHAN TA GAR BHA DANG, BI SHUD DHU SING HA LA SOGS PA DANG, BOD KYI LO TZ'A BA SAD MI MI BDUN DANG, CHOS KYI SNANG BA DANG, BAN DE NAM MKHA' DANG, SGRON RIN CHEN SDE, RNAM PAR MI RTOG PA, SH'AKYA 'OD LA SOGS PAS LO TZ'A BYAS TE, RGYA GAR DANG, RGYA NAG KHA CHE ZA HOR LI YUL SOGS NAS BKA' BSTAN BCOS SHIN TU MANG BO BSGYUR, DE LTAR CHOS BSGYUR BA'I STABS KYIS SGRA RIG PA RAB TU DAR TE, MKHAS PA MANG DU BYUNG ZHING RGYAL BLON SOGS KYIS BSTAN BCOS MANG DU BRTZAMS, 'GA' ZHIG DENG SANG BSTAN 'GYUR KHROD DU BZHUGS SO, , DE RJES MU NE BTZAN PO'I DUS SU, DBUL PHYUG LAN GSUM SNYOMS PAR MDZAD, LHA SA, KHRA 'BRUG BSAM YAS RNAMS SU @827 MCHOD PA CHEN PO BTZUGS SHING, PAn dI TA DANG, LO TZ'A BA DANG, DGE 'DUN RNAMS LA BSNYEN BKUR MDZAD, DE LTAR SNGAR YAB MES KYI DUS BZHIN DAM PA'I CHOS SOGS BSGYUR ZHING SPEL BAR MDZAD DE CHOS DANG SGRA RIG PA DAR ZHING RGYAS SO, , KHRI LDE SRONG BTZAN SAD NA LEGS MJING YON GYI DUS BSAM YAS LA ZHIG GSO DANG, BSAM YAS SOGS GTZUG LAG KHANG RNAMS LA MCHOD PA BYED, BAR SKABS SU CHUNG ZAD NYAMS PA SLAR GSOS, SKYID SHOD DU DKAR CHUNG RDO RJE DBYINGS KYI LHA KHANG BZHENGS, PAn dI TA BI MA LA MI TRA, DZNY'A NA SE NA, BAL BO H'Um KA RA, PRADZNY'A DHARMA, SH'AKYA SENG HA, SU REN DRA BO DHI, DZI NA MI TRA, DA NA SHI LA, BUD DHA SING HA SOGS SPYAN DRANGS, SNGAR GYI LO TZ'A BA RNAMS LA BSNYEN BKUR CHEN PO BYAS TE, MTSAN NYID DANG, GSANG SNGAGS KYI BKA' BSTAN BCOS MANG BO BSGYUR, YAB MES KYI DUS BZHIN BYED DGOS PA'I THUGS DAM BZHES TE, DBU SNYUNG BOR NAS BKA' GTZIGS KYI YI GE SNGA PHYI SHOG GU MTHING GA LA GSER GYIS BRIS TE, RIN PO CHE KHRA MEN GYI SGROM DU BCUG NAS BSAM YAS KYI YAB KHRI SRONG GI BKA' GTZIGS CHEN MO'I 'GRAM DU BZHAG GO, ,RGYAL BO 'DI'I DUS SU'ANG CHOS DANG RIG GNAS SHIN TU DAR LA, CHAB SRID KYANG BLA NA MED PAR GYUR, DKAR @828 CHAG 'PHANG THANG MA DANG, DKAR CHAG LDAN DKAR GNYIS KYANG RGYAL BO 'DI'I RING LA BZHENGS PAR GSUNGS SO, , DE RJES KHRI GTZUG LDE BTZAN RAL BA CAN GYI RING LA 'U SHANG RDO'I DPE MED BKRA SHIS DGE 'PHEL GYI GTZUG LAG KHANG BZHENGS, PAn dI TA DANG LO TZ'A BA RNAMS GTZUG LAG KHANG DU BZHUGS NAS, MTSAN NYID DANG SNGAGS KYI BKA' DANG BSTAN BCOS MANG BO BSGYUR CING 'CHAD RTZOM GYIS DUS 'DA' BAR BYAS, SNGAR YAB MES KYI RING LA CHOS DANG RIG GNAS KYI BRDA SKAD BOD LA MA GRAGS PA MANG BO ZHIG BYUNG ZHING, RGYA NAG DANG LI DANG BAL BO RGYA GAR YUL DBUS DANG KHA CHE ZA HOR SOGS YUL DU MA NAS BSGYUR BA'I BRDA MI 'DRA BA DAG MANG BOS MI GO ZHING BSLAB DKA' BAR GZIGS NAS, DRIN CAN LO PAn RNAM GSUM ZHES GRAGS PA DZI NA MI TRA DANG, DA NA SHI LA DANG, ZHANG YE SHES SDE GSUM SOGS LO PAn RNAMS KYIS, SNGAR BSGYUR BA THAMS CAD DAG PAR BYAS SHING SKAD GSAR BCAD KYIS GTAN LA PHAB STE GO BDE BAR BYAS, GZHUNG TSAD RNAMS BAM GRANGS KYIS NGES PAR BYAS TE, DKAR CHAG TU BSNAN NAS, SNGAR GYI DKAR CHAG GSUM GYI ZLA LA BZHAG 'DI LA SKAD GSAR BCAD GNYIS PA ZHES, SMRA BA RGYAN GYI ME TOG NGAG GI DBANG PHYUG GRUB PA LAS BSHAD DO, ,SKAD GSAR BCAD KYI SKABS LO PAn RNAMS @829 KYIS BYE BRAG RTOGS BYED CHE 'BRING CHUNG GSUM MDZAD, DE'I TSUL NI SGRA SBYOR BAM GNYIS KYI SA BCAD GSUM PAR YOD PA, YONGS RDZOGS BDAG GIS BOD DU RIG GNAS DAR TSUL MDOR BSDUS ZHES BYA BA'I NANG DU DRANGS YOD, 'ON KYANG SGRA SBYOR BAM GNYIS SU KHRI LDE SRONG BTZAN ZHES PA YIG NOR YIN TE, KHRI GTZUG LDE BTZAN ZER DGOS SO, ,DE LTAR KHRI GTZUG LDE BTZAN RAL BA CAN GYI DUS SU CHOS SRID GNYIS KA SHIN TU DAR, CHOS DAR BA'I STOBS KYIS SGRA RIG PA SHIN TU DAR BA DE LTAR LAGS TE, SGRA SBYOR BAM GNYIS LAS, CHOS KYI GZHUNG DANG SGRA'I LUGS LAS JI SKAD DU 'BYUNG BA'I GTAN TSIGS DANG, CHOS LA JI SKAD DU GDAGS PA DPYAD DE, ZHES GSUNGS SO, ,DE RJES BLON GDUG PA CAN DBAS STAG SNA CAN SOGS KYIS RGYAL BO DANG, BLON BRAN KA DPAL YON BKRONGS NAS, GLANG DAR MA 'U DUM BTZAN RGYAL SAR BZHAG 'DI NI CHUNG DUS NAS GZUGS BA LANG GI SHA TSUGS DANG 'DRA ZHING, BLO RTUL RGYUD GYONG BAS 'BANGS RNAMS KYIS GLANG DAR MA ZHES BTAGS, MING DNGOS NI 'U DUM BTZAN ZER, RGYA'I LO RGYUS RGYA YIG RGYA'I LO TZ'A BA HU GYANG JU ZER BAS BOD YIG TU BSGYUR BA LAS, RGYAL BO 'DI CHANG LA DGA' ZHING SPYOD PA NGAN PAS, BOD KYI RGYAL KHAMS THAMS CAD 'KHRUGS, SI HA CE'U LA BOD DBANG BA'I RI BRTZIGS YOD PA @830 'GYEL, KLU CHU ZHAG GSUM GYEN LA LOG LTAS NGAN BYUNG ZHING RGYAL KHAMS ZHIG PA YIN NO, ,ZHES BSHAD DO, ,DE NAS GLANG DAR KHO RANG YANG RMONGS SHING YON TAN MED PAR MA ZAD, YON TAN CAN LA SNYING NAS MI DGA' BAS, CHOS BYAS PA BKRA MI SHIS ZER NAS, RMA RIN CHEN MCHOG DANG NYANG TING 'DZIN SOGS LO TZ'A BA MANG BO BKRONGS, PAn dI TA RNAMS SA MTHAR BSKRAD PA DANG RANG RANG SO SO'I YUL DU BROS, RAB TU BYUNG BA LA LA SA MTHAR BROS, MA THAR BA RNAMS KHYIM SAR PHAB, MI NYAN PA RNAMS BSAD, LA LA KHRID NAS RGYAL BLON RNAMS KYIS RTA LA 'BAB 'DZEG GI TSE SGUR DU BCUG NAS STEGS BYAS, LA LA'I LAG TU MDA' GZHU DANG RNGA GSHANG BZHAG STE RNGON PA BYED DU BCUG LHA SA DANG BSAM YAS BSHAS RA BYAS, GTZUG LAG KHANG MANG BO BSHIGS, DPE CHA RNAMS ME LA BSREGS PA DANG CHU LA BSKUR BA DANG SA 'OG TU GNON PA SOGS BYAS, 'BANGS RNAMS 'TSO BA'ANG JE SDUG JE SDUG LA SONG, BOD 'BANGS RNAMS SDUG BSNGAL GYI GNAS SU BCAR TO, ,YON TAN CAN THAMS CAD MED PAR BYAS, BOD RANG GI BRDA SPROD PA DANG SGRA RIG PA'I SKOR GTAN NYAMS BYAS SO, ,'GA' ZHIG GIS MAR LE DNGOS GTZO RTZOD SGRUB KYI RIG PA SMRA BA YIN KHUL GYIS SNA TSOGS SMRA BA DANG, CHOS BSNUBS PA NI DMAG DON GYI 'GRO SONG LAS @831 CHOS KYI 'GRO SONG CHE BA'I STABS KYIS RED ZER BA SOGS BTANG SNYOMS SU BZHAG GO, , GLANG DAR GYI SRAS RTZOD MED 'OD SRUNG SDE DANG, SRAS DOGS PA CAN YUM BRTAN SDE GNYIS RGYAL SAR SU 'JOG BLON PO RNAMS MA MTHUN ZHING PHYOGS GNYIS SU CHAD DE, 'OD SRUNG RGYAL SAR BZHAG KYANG YUM BRTAN GYIS DBU RU BZUNG, 'OD SRUNG GIS G-YO RU BZUNG STE 'KHRUG PA BYAS, GZHAN YANG YAB GLANG DAR GYI DUS 'BANGS GNON BTZIR DANG, KHRAL 'U LAG SOGS DANG, 'BANGS KYI 'TSO BA'ANG JE SDUG JE SDUG SONG STABS BOD 'BANGS YONGS MI DGA' BAR GYUR, SRAS GNYIS KYIS KYANG YAB KYI BYED TSUL NOR BAR SHES NAS, JO BO RNAM GNYIS DANG BYAMS PA CHOS KYI 'KHOR LO GDAN DRANGS NAS KHRI KHAR BZHAG 'ON KYANG RIG GNAS DANG CHOS SLAR GSO BYED MA THUB, 'BANGS GYEN LOG BYUNG STE KHENG LOG THOG MA MDO KHAMS NAS BYUNG, 'OD SRUNG DGUNG LO SO GCIG THOG STAG RTZE GNYAGS KYIS BKRONGS, DE'I SRAS BKRA SHIS BRTZEGS PA DPAL DANG, SKYID LDE NYI MA MGON GNYIS MNGA' RIS SU SONG, DE GNYIS SPYOD PA BZANG ZHING BLO GROS CHE BAS MNGA' RIS KYI RGYAL BOR GYUR, DE DAG GI RGYUD PA MNGA' RIS RGYAL BO RNAMS KYIS STOD KYI SA MTSAMS LEGS PAR BSRUNGS TE, GAR LOG BAL BO, RGYA @832 GAR SOGS BTZAN 'DZUL BKAG NAS STOD KYI SA MTSAMS BRTAN POR BSRUNGS, GZHAN YANG, KHRI BKRA SHIS BRTZEGS PA'I SRAS 'BRING BA 'OD LDE LA SRAS BZHI BYUNG BA'I GNYIS PA KHRI LDE 'BANGS BRA SDE DANG BCAS PA MTSO KHRI SHOR RGYAL MO'I KHAR BYON TE GZHI BZUNG, TZONG KHA'I RGYAL BO ZHES PA'I RGYAL BO STOBS LDAN DU GYUR TE KAN SU'U HRA'AN ZHI YAN CHOD MNGA' 'OG TU BSDUS TE SMAD KYI SA MTSAMS BRTAN POR BSRUNGS, BOD DBUS SIL BUR THOR YANG, STOD SMAD KYI RGYAL BO DE GNYIS KYIS CHOS DANG RIG GNAS SLAR GSO BAR MDZAD, DPER NA, STOD KYI MNGA' RIS RGYAL BO LHA BLA MA YE SHES 'OD KYIS THO LDING GI DPE MED LHUN 'GRUB GTZUG LAG KHANG BZHENGS, RGYA GAR SHAR PHYOGS NAS PAn dI TA DHARMA P'A LA DANG, DE'I MKHAN BU S'A DHU P'A LA, GU NA P'A LA, PRADZNY'A P'A LA STE P'A LA RNAM GSUM DU GRAGS PA SPYAN DRANGS CHOS DANG RIG GNAS ZHUS, ZHANG ZHUNG BA RGYAL BA'I SHES RAB KYIS PAn dI TA MANG BO BSTEN TE SGRA DANG SKAD YIG SOGS LA SBYANGS PAS MKHAS PA CHEN POR GYUR, PHYIS SU KHONG NE PA LA STE BAL YUL DU PHEBS NAS 'DUL BA'I LAG LEN SOGS CHOS DANG RIG GNAS DU MA BSLABS, GZHAN YANG LHA BLA MA YE SHES 'OD KYIS RIN CHEN BZANG BO LA SOGS PA'I BYIS PA NYI SHU RTZA GCIG SLOB GNYER LA @833 BTANG BA LAS RIN CHEN BZANG BO DANG, LEGS PA'I SHES RAB, LO CHUNG GRAGS 'BYOR GSUM MA GTOGS GZHAN RNAMS SA MA THUB PAR SHI, LO TZ'A BA RIN CHEN BZANG BO DGUNG LO DGU BCU GO BRGYAD LA BZHUGS, SLOB MA ZHUS CHEN PHER BA'I LO TZ'A BA BCU LHAG BYUNG, KHONG GI SLOB MA RNAMS KYIS RIG GZHUNG MANG BO BSGYUR, LO TZ'A BA CHEN PO BLO LDAN SHES RAB KYIS RIG GZHUNG 'BUM PHRAG MANG BO BSGYUR, DAG YIG BRTZAMS, LHA BLA MA YE SHES 'OD KYI DUS SU, PAn dI TA SMRi TI DANG, PHRA LA RING BA GNYIS BYON, SMRi TIS GZHUNG BSHAD MANG BO DANG GDAN BZHI SOGS BSGYUR, SMRA SGO MTSON CHA BRTZAMS, RGYAL BA 'BROM STON PAS KYANG 'DI BA'I MDUN NAS SGRA BSLABS, DE SKABS 'BROG MI LHO BAL DU LO BCU GSUM LA BZHUGS NAS PAn dI TA MANG BO BSTEN TE SLOB GNYER GNANG, BOD DU PHEBS NAS MDO SNGAGS RIG GNAS DANG BCAS PA 'CHAD SPEL GNANG, MAR BA LO TZ'A BAS 'DI BA'I MDUN NAS SGRA BSLABS, SLOB MA SHIN TU MANG, RNYING MA'I ZUR CHEN DANG, SA SKYA 'DEBS PA BO 'KHON DKON MCHOG RGYAL BO SOGS SO, ,MNGA' RIS KYI LHA BLA MA KHU DBON GYI DUS RGYA GAR SOGS NAS PAn dI TA MANG BO SPYAN DRANGS, KHYAD PAR DU DPAL MNYAM MED JO BO RJE DPAL LDAN AA TI SHA MAR ME MDZAD DPAL YE SHES SPYAN DRANGS PA SOGS SHIN TU @834 GRAGS CHE ZHING PHYAG RJES RLABS CHE, JO BO RJE'I SLOB MA GRAGS CHE BA NI, GTZANG NA 'GAR 'GOS YOL GSUM, DBUS NA KHU RNGOG 'BROM GSUM, GTZO BO 'BROM STON PA RGYAL BA'I 'BYUNG GNAS KYIS RVA SGRENG CHOS SDE BTAG, BSTAN PA'I BDAG POR GYUR, SLOB MA BKA' GDAMS SKU MCHED GSUM SOGS SHIN TU MANG, KHU STON BRTZON 'GRUS G-YUNG DRUNG GIS KYANG THANG BO CHER BZHUGS NAS SLOB MA SHIN TU MANG BO BSKYANGS, RNGOG LEGS PA'I SHES RAB KYIS GSANG PHU NE'U THOG GI DGON PA BTAB, DE'I DBON PO'AM TSA BU NI RNGOG LO BLO LDAN SHES RAB BO, , JO BO'I SLOB MA GTZANG SMAD RTA NAG GI 'GOS LO TZ'A BA 'GOS KHUG PA LHAS BTZAS NI RGYA BAL DU LAN BCU GNYIS BYON LO MANG BOR BZHUGS, PAn dI TA BDUN CU DON GNYIS BSTEN TE GDAMS PA MANG BO GSAN, BOD DU BYON NAS ZHAL GZIGS RI KHROD DU GSANG 'DUS BSGRUBS PAS ZHAL GZIGS SHING, MKHAS GRUB NYIS 'DZOMS KYI 'PHAGS CHEN DU GYUR, 'DUS PA SOGS DAR BAR MDZAD, GSANG 'DUS KYI RGYUD 'GREL CHEN MO SOGS GSUNG RTZOM MANG, SLOB MA MDAR SENG RGYAN SOGS DRUG STOD LUNG GNAM GYI RDZONG KHA BA DANG YOL MCHED GSUM SOGS MANG LA, SA SKYA BA 'KHON DKON MCHOG RGYAL BOS KYANG BLA MAR BSTEN NAS GSANG 'DUS SKOR SOGS GSAN, @835 RDOG RABS KYI GSANG 'DUS GRUB THOB RNAMS KYANG 'DI BA'I SLOB RGYUD YIN, RJE BDAG NYID CHEN POS KYANG RJE RED MDA' BA'I MDUN NAS 'GOS LUGS KYI GSANG 'DUS KYI DBANG SOGS GSAN, SA SKYA PAn CHEN KUN DGA' RGYAL MTSAN GYIS, SGRA 'JUG SGRA NYE BAR BSDU BA, SDEB SBYOR ME TOG CHUN PO, TSIG GTER SOGS BRTZAMS TE SGRA'I SKOR LA'ANG 'CHAD NYAN MANG DU MDZAD, SHONG STON LO TZ'A BA RDO RJE RGYAL MTSAN NI, BAL YUL DU BYON NAS PAn dI TA MA HEN DRA BHA DRA LO LNGAR BSTEN NAS RIG GNAS DU MA BSLABS, KHYAD PAR DU SGRA RIG PA LA SHIN TU MKHAS PAR SBYANGS, RIG GNAS MANG BO 'CHAD SPEL MDZAD PA DANG, GZHUNG MANG BO BSGYUR, CHAG DGRA BCOM DANG DE'I DBON CHAG CHOS RJE DPAL GNYIS KYANG RGYAL GAR DU BYON, PAn dI TA MANG BO BSTEN NAS SLOB GNYER GNANG, GSAR 'GYUR DANG 'GYUR BCOS MANG BO MDZAD, BKA' DRIN CHE BAR BRTZI, SNYAN GRAGS CHE, GZHAN BU STON THAMS CAD MKHYEN PA SOGS SGRA RIG PA'I SKOR LA BKA' DRIN CHE BA'I MKHAS PA CHES SHIN TU MANG BO BYUNG BA RNAMS BRJOD KYIS MI LANG, THAMS CAD KYANG CHOS KYI BLA MA MKHAS SHING GRUB PA BRNYES PA SHA STAG YIN NO, ,BCOM LDAN RIGS RAL GYIS MDZAD PA'I SGRA'I BSTAN BCOS SMRA BA RGYAN GYI ME TOG NGAG GI DBANG @836 PHYUG GRUB PA ZHES BYA BA LAS, BKAS BCAD GSUM PA NI, LHA BLA MA YE SHES 'OD KYI DUS KYI SGRA BSGYUR RIN CHEN BZANG BO NAS BZUNG STE KHO BO'I BLA MA MCHOG LO TZ'A BA DGE SLONG CHOS RJE DPAL YAN CHAD KYIS BYAS PA YIN NO, ,ZHES GSUNGS PA LTAR, SKAD GSAR BCAD GSUM DE LTAR YIN NO, , GZHAN YANG, DPANG LO TZ'A BA BLO GROS BRTAN PA, THAR BA LO TZ'A BA, LO TZ'A BA BYANG CHUB RTZE MO, BLA MA RDO RJE RGYAL MTSAN, SHONG BLO GROS BRTAN PA, YAR LUNG GRAGS PA RGYAL MTSAN, LO TZ'A BA RIN CHEN RNAM RGYAL (SGRA TSAD PA RIN CHEN RNAM RGYAL YANG ZER), SNAR THANG LO TZ'A BA SAm GHA SHRI, ZHA LU LO CHEN CHOS SKYONG BZANG BO (DAG YIG ZA MA TOG RTZOM PA BO), SKYOGS STON LO TZ'A BA NGAG DBANG RIN CHEN BKRA SHIS, 'DI BA'I MTSAN LA SMIN GRUB LO TZ'A BA YANG ZER LA, LI SHI'I GUR KHANG RTZOM PA BO RED, LO CHEN SKYABS MCHOG DPAL, STAG LO SHES RAB RIN CHEN, RJE BDAG NYID CHEN PO BLO BZANG GRAGS PA'I DPAL GYIS, LO TZ'A BA NAM MKHA' BZANG BO LAS SNYAN NGAG BSLABS, BO DONG BA RIN CHEN ZHAM BZANG BA LAS SGRA KA L'A PA DANG, TZAN DRA BA DANG, SDEB SBYOR SOGS BSLABS, SA BZANG MA TI PAn CHEN SOGS LAS KYANG SGRA GSAN TE DAR SPEL MDZAD DO, , @837 JO NANG KUN DGA' GROL MCHOG GI SPRUL SKU RJE T'A RA NA THA STE SGROL BA'I MGON PO MCHOG GIS KYANG 'PHAGS YUL NAS PHEBS PA'I PAn dI TA KHA SHAS BSTEN NAS DBYANGS CAN SGRA MDO RTZA 'GREL BSGYUR RTZOM GNANG BA DE LA T'A RA NA THA'I SGRA t'IKA ZHES GRAGS CHE, KUN GZIGS LNGA BA CHEN POS SGRA'I SLOB DPON SDE BA ZHANG MKHAR BA 'JAM DPAL, RIN PO CHE SMAN LUNG BA, MANG YUL LO TZ'A BA, MON GRO BA YAB SRAS RNAMS BSTEN NAS SGRA RIG PA LA SBYANGS, MON GRO BA LA RIG GNAS RGYA MTSO'I PHRENG BA 'DZIN PA MON GRO BA YAB SRAS ZHES BSNGAGS BRJOD CHER MDZAD, MON GRO BA NI SNGAR JO NANG DGON GYI GRVA BA YIN LA, PHYIS SU DGON PA NAS BUD DE RIG GNAS SOGS LA SBYANGS PAS MKHAS GRAGS CHE, SMIN GLING GTER CHEN GYI GCUNG LO CHEN DHARMA SHR'I BYA BA MKHAS GRAGS CHE LA SDEB SBYOR RIN CHEN 'BYUNG GNAS KYI 'GREL BA RMAD DU BYUNG BA BRTZAMS, KUN GZIGS LNGA BA CHEN PO'I 'PHRIN LA LA BRTEN NAS, 'DAR LO NGAG DBANG PHUN TSOGS LHUN 'GRUB KYIS DBYANGS CAN SGRA MDO RTZA 'GREL BSGYUR BA DANG, PA nI BA'I 'GREL CHEN BRTZAMS, KARMA SI TU CHOS KYI 'BYUNG GNAS KYIS KA TZAN DBYANGS GSUM SOGS RIG GNAS SKOR MANG BO BSGYUR, 'DI BAS BSGYUR BA RNAMS KHONG GI GSUNG 'BUM KHROD DU BZHUGS, KUN MKHYEN CHEN PO 'JAM DBYANGS @838 BZHAD PA'I RDO RJES KA L'A PA'I 'GREL CHEN NAG PO 'GRO SHES BRTZAMS PA DANG, PA nI BA'I MCHAN 'GREL DANG, MNGON BRJOD 'CHI MED MDZOD 'GYUR BCOS GNANG BA SOGS SGRA'I SKOR KYANG DU MA MDZAD, KUN MKHYEN 'JIGS MED DBANG BOS KYANG SGRA SOGS RIG GNAS SKOR DAR SPEL MDZAD PAR BLA BRANG BKRA SHIS 'KHYIL DU PAn dI TA MANG BO BYUNG STE, RJE SHES RAB RGYA MTSO DANG, BRAG DGON BSTAN PA RAB RGYAS SOGS DGE BSHES MANG BO'I SGRA'I ZIN BRIS YOD LA, KHA SHAS KYI ZIN BRIS PHYOGS BSDUS BYAS PA SGRA MCHAN CHEN MO NI, BDAG GIS SNUM PAR BRGYAB PA LTA BU MANG, BDAG GI SLOB DPON RIN PO CHE AOm 'KHYIL BA 'JAM DBYANGS LEGS BSHAD DPAL BZANG BOS DBYANGS CAN SGRA MDO'I BYINGS SGRUB DANG, SHAN SBYAR K'A LI'I PHRENG SGRIG SOGS BRTZAMS PA YIN LA, BDAG GIS GROS MGO BTON PA BZHIN 'DI GA'I BOD RIGS RANG SKYONG KHUL BOD YIG RTZOM SGYUR CUS KYIS SAm BOD SHAN SBYAR BSGRIGS PAR BYAS SO, ,DE LTAR SNGON GYI MKHAS GRUB RNAMS KYIS SGRA RIGS PA LA SHIN TU DON GNYER BYAS PA LTAR, RANG CAG RNAMS KYIS KYANG RIG GNAS 'DI LA DON GNYER BYED RIGS TE, KONG SPRUL YON TAN RGYA MTSO'I GSUNG LAS, SGRA LA SBYANGS PA MTHAR SON PA NA RIGS LAM SPYI DANG GSUNG RAB DGONGS 'GREL DANG BCAS PA'I DON PHYIN CI MA LOG PAR RTOGS PA YIN TE, @839 SGRA SHES NA DON LA MI RMONGS ZHES BYA BA BOD BLUN RNAMS KYIS PHYI RIG GNAS, NANG MDO RGYUD GANG LA'ANG BOD SKAD RKYANG BA'I STENG NAS GO BA BTZAL TE 'BRU GNYER ZHING RANG NYID KYIS KYANG DON GYI PHYOGS TZAM MA RTOGS PAR SKAD GNYIS SMRA BA'I DANG BO RNAMS LA DGAG SGRUB PHYIN CI LOG TU BYAS NAS RANG GI BLO GROS KYI MTHIL ZANG MAR STON PA'I SNYIGS DUS KYI 'CHAD NYAN DANG THOS BSAM GYI SPYI SROL DE LTAR MA YIN PAR, ZHES GSUNGS PA DANG, YANG DE LAS, DENG SANG GI DUS 'DIR PHAL MO CHES LEGS SBYAR NI CHOS BSGYUR RGYU YOD NA MA GTOGS HA CANG MI MKHO ZER BA'AM, LUNG LA THOS BSAM BYED PA LA SHES BRTZON GYI SBYOR BA GZHAN YOD PAS CHOG GI LEGS SBYAR SHES MA SHES MED ZER BA SOGS MANG DU SNANG BA NI TSONG 'DUS SU RAS PA'I RNAM THAR 'KHRAB PA LTAR PHYUGS DANG MTSUNGS PA'I BLUN PO'I DBUS SU LOG RTOG LA ZHEN PA'I BLUN PO DAG 'DUG STE MIG MA TSANG BA'I NGO GNONG MED PAR LAG PA YOD PA'I MTSANG 'BRU BRJOD PA NA BLUN PO GZHAN RNAMS KYIS KYANG DE DE BZHIN NO ZHES THE TSOM TZAM YANG MED PAR YID CHES PAS SGROGS PA NI SNYIGS DUS KYIS BSLAD PA'I BOD RGAN MANG BO'I RANG RTAGS TE, DPER NA BONG BUS PHUB MA KHO NA ZA BA LA RGYU MTSAN CING YANG MED PA BZHIN NO, ,ZHES GSUNGS PA LTAR, DENG DUS LHAG PAR MTSAN NYID KYI GRVA SA RNAMS @840 SU, MTSAN NYID SHES NA RIG GNAS SHES MA SHES MED ZER BA DANG, SLOB GRVA 'GA' ZHIG GI NANG DU 'GA' ZHIG GIS SGRA SHES MA SHES MED RGYA YIG DANG DBYIN YIG SHES DGOS ZER BA DAG GIS BOD KYI RIG GNAS KYI 'BYUNG KHUNGS DANG, DE'I YON TAN MA SHES PA RED SNYAM MO, , 'DIR SMRAS PA, RMONGS PA'I SMAG CHEN 'THIB PA'I GANGS LJONGS 'DIR, ,SPYAN RAS GZIGS DBANG SRONG BTZAN SGAM PO YIS, ,'PHRIN LAS 'OD DKAR ZEGS MA 'BUM SPROS PAS, , RMONGS MUN LHAG MED BCOM PA'I DGA' STON DAR, ,BRTAN PA'I 'KHOR LO'I YE SHES 'OD RNON LAS, ,'JAM DBYANGS THON MI'I 'OD SNANG 'BUM SHAR TE, ,BOD YUL RMONGS PA'I RGUD PA KUN BSAL NAS, ,CHOS DANG SRID KYI LO 'BRAS G-YUR DU ZA, ,DE LTA'I BYUNG BA BRJOD PA'I GLING BU'I SGRA, ,SKAL MNYAM RGAN PO'I SKYO BA SANGS BYED DU, ,'BUL LO NYAN BYED GTAD NAS NYAN PAR ZHU, ,PHRAG DOG CAN RNAMS CA CO'I DBYANGS MDZOD CIG ,CES PA BAR SKABS KYI TSIGS SU BCAD PA'O, , GNYIS PA GTAN TSIGS RIG PA DAR TSUL NI, SPYIR GTAN TSIGS RIG PA NI, PHYI ROL RIG BYED PA SOGS LA SNGON NAS DAR BA STE, DPER NA RTOG GE'I TSIG DON BCU DRUG STON PA'I GTAN TSIGS @841 RIG PA'I GZHUNG YOD MOD, DE DAG NI DON MED DON LOG DON DANG LDAN, ,THOS RTZOD SGRUB PA LHUR LEN DANG, ,ZHES GSUNGS PA LTAR, BYA ROG SO RTOG GI BSTAN BCOS LTA BU DON MED PA DANG, BDAG SHES RIG GI SKYES BU DANG, SPYI GTZO BO SGRUB PA LTA BU'I DON LOG PA DANG, THOS RGYA CHE BA TZAM GYI CHED DANG, GZHAN LA RTZOD PA TZAM GYI CHED YIN PA LAS LDOG STE, NANG BA SANGS RGYAS PA'I GTAN TSIGS RIG PA NI, SKYE DGU MTHA' DAG SDUG BSNGAL LAS GROL BA'I CHED YIN PAS DON DANG LDAN PA DANG, DE'I DON DU LAM SGRUB PA LHUR LEN PA'I KHYAD PAR GNYIS LDAN LA, DE LTA BU'I KHYAD PAR GNYIS LDAN GYI GTAN TSIGS RIG PA NI THUB PA SANGS RGYAS BCOM LDAN 'DAS KYIS SDE SNOD KYI NANG DU THOR BUR GSUNGS PA, DPER NA MNGON PA'I SDE SNOD KYI NANG DU SDUG BDEN MI RTAG PA DANG SDUG BSNGAL BA'I RIGS SOGS MI RTAG BCU DRUG SGRUB PA'I RIGS PA LTA BU MANG LA, DE BZHIN MGON PO KLU SGRUB YAB SRAS KYI GZHUNG RIG TSOGS KYI SKABS SU CHOS RNAMS KYI CHOS NYID GTAN TSIGS RIG PA'I SGO NAS BSGRUBS PA YIN, RJES 'JUG RNAMS KYIS KYANG DE'I SGO NAS BSGRUBS PA STE, THAL 'GYUR DANG SBYOR NGAG SUN 'BYIN SOGS KYIS DGAG SGRUB BYAS PA LTA BU'O, ,DE BZHIN DU 'PHAGS PA THOGS MED YAB SRAS KYIS GTAN TSIGS RIG PA'I SGO NAS PHYI DON MED PAR @842 GTAN LA PHAB STE, SEMS TZAM PA'I GRUB MTHA'I RKANG BTZUGS PA DANG, BYE MDO GNYIS KYI GRUB MTHA' LA DGAG PA BTANG BA SOGS GTAN TSIGS RIG PA NI RANG RANG GI GRUB MTHA'I DGAG BZHAG GI MTSON CHA LTA BUR BYAS SO, ,'ON KYANG TSAD MA'I GZHUNG LUGS KYI RKANG 'DZUGS MKHAN NI SLOB DPON DBYIG GNYEN LA SLOB MA RANG LAS MKHAS PA BZHI YOD PA'I NANG GI TSAD MA RANG LAS MKHAS PA SLOB DPON PHYOGS KYI GLANG BO DE NYID YIN LA KHONG GIS RIGS SGO SOGS TSAD MA'I GZHUNG BRGYA RTZA GSUNGS SHING PHYIS SU DE RNAMS KYI RIGS LAM PHYOGS GCIG BSDUS PA, TSAD MA KUN 'DUS SAM TSAD MA MDO ZHES BYA BA BRTZAMS, DE RJES PHYOGS LAS RNAM PAR RGYAL BA'I MKHAS PA CHEN PO CHOS KYI GRAGS PAS TSAD MA SDE BDUN ZHES YONGS SU GRAGS PA DE NYID MDZAD, DE DAG NI LO TZ'A BA CHEN PO DGE SLONG DGE BA'I BLO GROS DANG, RNGOG LO TZ'A BA BLO LDAN SHES RAB SOGS LO TZ'A BA MKHAS PA MANG BOS BSGYUR BA'I TSAD MA'I GZHUNG NI, SDE DGE'I BSTAN 'GYUR GYI [CE] BA LA SLOB DPON PHYOGS KYI GLANG BOS MDZAD PA'I TSAD MA KUN LAS BTUS PA SOGS LE TSAN BCU PHRAG LHAG DANG, [CHE] BA LA RNAM 'GREL RANG 'GREL DANG, LHA DBANG BLO'I 'GREL BA GNYIS, [JE NYE] GNYIS LA TSAD MA RNAM 'GREL GYI 'GREL BSHAD DANG, LHA DBANG BLO'I 'GREL BA'I 'GREL BSHAD @843 GNYIS, [TE THE] GNYIS LA TSAD MA RNAM 'GREL GYI LE'U GNYIS PA MAN CHAD KYI 'GREL BA RNAM 'GREL GYI RGYAN ZHES BYA BA, [DE NE] GNYIS LA TSAD MA RNAM 'GREL GYI RGYAN GYI 'GREL BSHAD RGYAL BA CAN GYIS MDZAD PA, [PE] BA LA RNAM 'GREL GYI 'GREL BSHAD BRAM ZE BDE BYED DGA' BAS MDZAD PA DANG LE'U GNYIS PA'I 'GREL BA NYI MA SBAS PAS MDZAD PA GNYIS, [PHE BE] GNYIS LA TSAD MA RNAM 'GREL GYI 'GREL BA LAS, LE'U GSUM PA'I BSHAD PA NYI MA SBAS PAS MDZAD PA, TSAD MA RNAM 'GREL GYI RGYAN GYI 'GREL BSHAD MKHAS PA DZA M'A RIS MDZAD PA GNYIS, [ME] BA LA TSAD MA RNAM 'GREL GYI MNGON GSUM LE'U'I 'GREL BA DZA M'A RIS MDZAD PA, [TZE] BA LA RNAM 'GREL GYI RGYAN GYI LE'U BZHI BA'I 'GREL BA DZA M'A RIS MDZAD PA, [TSE] BA LA SLOB DPON CHOS MCHOG GIS MDZAD PA'I TSAD MA RNAM NGES KYI 'GREL BA 'THAD LDAN ZHES BYA BA DANG, TSAD MA RNAM NGES KYI 'GREL BSHAD SLOB DPON YE SHES BZANG BOS MDZAD PA DANG GNYIS, [DZE] BA LA CHOS MCHOG GIS MDZAD PA'I TSAD MA RNAM NGES KYI t'I KA'I 'GREL BSHAD LE'U GNYIS PA'I 'GREL BA 'GYUR BYANG MED PA, [WE] BA LA RIGS THIGS KYI RGYA CHER 'GREL SLOB DPON DUL BA LHAS MDZAD PA DANG, RIGS THIGS RGYA CHER 'GREL SLOB DPON CHOS MCHOG GIS MDZAD PA, RIGS THIGS KYI PHYOGS SNGA MDOR BSDUS @844 SLOB DPON KA MA LA SH'I LAS MDZAD PA, RIGS THIGS KYI DON BSDUS MKHAN PO DZI NA MI TRAS MDZAD PA, GTAN TSIGS THIGS PA'I RGYA CHER 'GREL DUL BA LHAS MDZAD PA RNAMS SO, ,[ZHE] BA LA 'BREL BA BRTAG PA'I RGYA CHER BSHAD PA SLOB DPON DUL BA LHAS MDZAD PA DANG, 'BREL BA BRTAG PA'I RJES 'BRANG ZHES BYA BA BRAM ZE SHADKA R'A NANDAS MDZAD PA, RGYUD GZHAN GRUB PA'I 'GREL BSHAD SLOB DPON DUL BA LHAS MDZAD PA, RTZOD PA'I RIGS PA'I 'GREL BA DON RNAM PAR 'BYED PA SLOB DPON CHEN PO SH'ANTA RAKshI TAS MDZAD PA, RTZOD PA'I RIGS PA'I 'GREL BA SLOB DPON DUL BA LHAS MDZAD PA GSHAM MA TSANG BA GCIG DMIGS PA BRTAG PA'I RGYA CHER BSHAD PA SLOB DPON CHEN PO DUL BA LHAS MDZAD PA, RIGS PA GRUB PA'I SGRON MA ZHES BYA BA SLOB DPON TZANDRA GO MIS MDZAD PA, THAMS CAD MKHYEN PA GRUB PA'I TSIG LE'UR BYAS PA DANG, PHYI ROL GYI DON GRUB PA ZHES BYA BA'I TSIG LE'UR BYAS PA SLOB DPON DGE SRUNGS KYIS MDZAD PA, THOS PA BRTAG PA'I TSIG LE'UR BYAS PA DANG, GZHAN SEL BRTAG PA'I TSIG LE'UR BYAS PA, DBANG PHYUG 'JIG PA'I TSIG LE'UR BYAS PA RNAMS SLOB DPON DGE SRUNGS KYIS MDZAD PA, TSAD MA BRTAG PA CHE CHUNG SLOB DPON CHOS MCHOG GIS MDZAD PA, GZHAN SEL ZHES BYA BA'I RAB BYED CHOS MCHOG GIS @845 MDZAD PA, 'JIG RTEN PHA ROL GRUB PA SLOB DPON CHOS MCHOG GIS MDZAD PA, GLEGS BAM BKLAG PA'I THABS PAn dI TA D'A NA SH'I LAS RANG 'GYUR MDZAD PA, SKAD CIG MA 'JIG PAR GRUB PA SLOB DPON CHOS MCHOG GIS MDZAD PA, SKAD CIG MA 'JIG PAR GRUB PA'I RNAM PAR 'GREL BA SLOB DPON BRAM ZE MU TIG BUM PAS MDZAD PA, LHAN CIG DMIGS PA NGES PAR GRUB PA YE SHES 'BYUNG GNAS SBAS PAS MDZAD PA, SEL BA GRUB PA ZHES BYA BA DGE BSNYEN DAM PA MKHAS PA CHEN PO BRAM ZE SHADKA R'A NANDAS MDZAD PA, 'GREL BA GRUB PA ZHES BYA BA SLOB DPON CHEN PO SHADKA R'A NANDAS MDZAD PA, RGYU DANG 'BRAS BU'I NGO BO GRUB PA DZNY'A NA SHR'I MI TRAS MDZAD PA, RNAM PAR RIG PA NYID DU GRUB PA RIN CHEN 'BYUNG GNAS ZHI BAS MDZAD PA, NANG GI KHYAB PA RIN CHEN 'BYUNG GNAS ZHI BAS MDZAD PA, GTAN TSIGS KYI DE KHO NA NYID BSTAN PA DZEE T'A RIS MDZAD PA, CHOS DANG CHOS CAN GTAN LA PHAB PA DZEE T'A RIS MDZAD PA, BYIS PA 'JUG PA'I RTOG GE DGRA LAS RGYAL BAS MDZAD PA, RTOG GE'I SKAD DGE SLONG THAR BA'I 'BYUNG GNAS SBAS PAS MDZAD PA, RIGS PA'I SBYOR BA KHA CHE'I GRUB BRNYES SLOB DPON CHEN PO RIN CHEN RDO RJES MDZAD PA RNAMS SO, , [ZE 'E] GNYIS LA DE KHO NA NYID BSDUS PA'I TSIG LE'UR BYAS PA SLOB DPON ZHI 'TSOS MDZAD PA, DE KHO NA NYID BSDUS PA'I DKA' 'GREL @846 SLOB DPON CHEN PO KA MA LA SH'I LAS MDZAD PA GNYIS SO, ,[YE] BA LA YANGS PA DANG DRI MA MED PA DANG LDAN PA ZHES BYA BA'I TSAD MA KUN LAS BTUS KYI 'GREL BSHAD SLOB DPON RGYAL BA'I DBANG BO BLON PO'I ZHABS KYIS MDZAD PA'O, ,DE LTAR TSAD MA RIG PA'I SKOR LA BOD CHEN PO NYI SHU LE TSAN BRGYA PHRAG LONGS PA RNAMS PAndI TA DANG LO TZ'A BA SKU DRIN CAN RNAMS KYIS BSGYUR CING GTAN LA PHAB NAS BOD KYI MKHAS PA RNAMS KYIS, DE DAG LA SBYANGS PA MTHAR PHYIN PAR MDZAD PAR MA ZAD DGONGS 'GREL GYI GZHUNG MANG BO BRTZAMS SO, , SA SKYA'I GDAN SAR SA SKYA PAn CHEN GYIS RIGS GTER GSUNGS, DE LA SBYANGS PA'I MKHAS PA MANG BO BYUNG BA YIN LA, DPAL SA SKYA'I CHOS GRVA CHEN PO NAS TSAD MA SOGS MDO SNGAGS KYI GZHUNG CHEN CHES MANG BO LA MKHAS PA'I MKHAS PA PAndI TA MANG BO BYUNG STE, DKAR BO RNAM GSUM, DMAR BO RNAM GNYIS, G-YAG GZHON RNAM GNYIS, RJE YAB SRAS GSUM SOGS BYUNG BA DANG, GTZANG BDE GUNG GSUM, DGA' SKYOR ZIL GSUM SOGS KYI GRVA SA RNAMS SU TSAD MA SOGS SHIN TU DAR TE, CHA BA CHOS KYI SENGGE GTZANG NE'U THOG GI GDAN SAR LO BCO BRGYAD DU BZHUGS NAS TSAD MA SOGS SHIN TU DAR BAR BYAS TE, TSAD MA'I RIGS PA PHYOGS BSDUS KYI BSDUS GRVA'I SROL BTOD, SLOB MA RIGS PA'I SENG CHEN BRGYAD @847 DANG, JO SRAS BZHI SOGS MANG BO 'BYUNG, DPAL MNYAM MED RI BO DGE LUGS PA'I BSTAN PA DAR NAS SE 'BRAS DGE GSUM SOGS SU SHIN TU DAR, RJE BDAG NYID CHEN POS SDE BDUN YID KYI MUN SEL DANG, RGYAL TSAB RJES THAR LAM GSAL BYED, MKHAS GRUB RJES t'IKA CHEN RIGS PA'I RGYA MTSO DANG SPYI DON SDE BDUN YID KYI MUN SEL, RJE DGE 'DUN GRUB KYIS SPYI DON RIGS RGYAN, STAG TSANG RA BA STOD PA'I DGE BSHES DAG GIS RA STOD BSDUS GRVA, KUN MKHYEN 'JAM DBYANGS BZHAD PAS BSDUS GRVA'I RTZA TSIG DANG, BSDUS GZHUNG CHE CHUNG RNAM 'GREL LE'U GSUM GYI MTHA' DPYOD, BSVE NGAG DBANG BKRA SHIS KYI BSVE BSDUS GRVA DANG RTAGS RIGS RANG LUGS SOGS, MKHAN CHEN DGE 'DUN RGYA MTSOS BSDUS GZHUNG CHEN MO BRTZAMS PA SOGS THAMS CAD BRJOD KYIS MI LANG NGO, ,PHYIS SU MDO STOD SMAD DU NANG BSTAN DAR NAS BZUNG TSAD MA RIG PA'I GZHUNG MANG BO DAR TE, DPER NA, BLA BRANG BKRA SHIS 'KHYIL DU MDO SNGAGS RIG GNAS KUN DAR NAS BSDUS GRVA SOGS RTZOM MKHAN MANG BO BYUNG, DE LTAR MTSAN NYID KYI GRVA SA RNAMS SU TSAD MA RIG PA'I 'CHAD NYAN SHIN TU DAR TE, DE LTAR DAM PA CHOS KYI DGON SDE RNAMS MED NA, RIG GNAS CHE BA LNGA'I YA GYAL TSAD MA 'DI YOD THABS MED DO, , @848 'DIR SMRAS PA, DE LTAR MKHAS DBANG GSER GYI RI BO YIS, , RIGS PA'I RANG MDANGS 'BUM GYI 'OD SPROS TE, ,LOG SMRA 'BYUNG BO'I BYA RNAMS LONG BAR BYAS, ,SHES BYA'I GNAS LUGS GSAL LER MTHONG BAR BYAS, ,GANGS LJONGS RIGS PA SMRA BA 'BUM PHRAG GI, ,BLO GROS NYI MA 'BUM GYI 'OD SHAR TSE, ,RIG GZHUNG CHU SKYES GZHON NU'I 'DZUM MDANGS RGYAS, ,BDE SKYID SBRANG RTZI'I DGA' STON LHUG PAR STZOL, ,ZHES PA'ANG BAR SKABS KYI TSIGS SU BCAD PA'O, , GZHAN RJES SU 'DZIN PA'I RIG GNAS GNYIS KYI DANG BO BZO RIG PA NI, SPYIR BZO RIG PA KHANG BZO SHING BZO SOGS DKYUS MA TZAM ZHIG SANGS RGYAS KYI BSTAN PA MA DAR BA'I SNGON NAS YOD MOD, BZO LAS CHER DAR BA NI, SANGS RGYAS KYI BSTAN PA DAR BA NAS YIN TE, CHOS RGYAL SRONG BTZAN SGAM PO'I DUS NAS BZUNG STE RIM BZHIN DAR BA YIN TE, DE NAS LHA'I THIG RTZA, MCHOD RTEN GYI THIG RTZA, DKYIL 'KHOR GYI THIG RTZA, YI GE'I THIG RTZA SOGS DAR BA YIN, DPER NA RA SA 'PHRUL SNANG GI GTZUG LAG KHANG DANG, MTHA' 'DUL YANG 'DUL GYI GTZUG LAG KHANG SOGS KYI BZO LAS KYI LAG RTZAL DAR BA DANG, DE DAG GI NANG RTEN SKU GZUGS DANG MCHOD RTEN SOGS BZHENGS PA'I LAG RTZAL GYI BZO LAS DAR BA DANG, BAL @849 BZA' KHRI BTZUN GYIS DMAR BO'I RIR PHO BRANG DGU THOG LCAGS RI DANG BCAS PA BZHENGS PA LTA BU DAR RGYAS CHE BA BYUNG, LHA KHANG DAG LA GSER ZANGS KYI RGYA PHIBS BZO BA'I BZO LAS DAR BAR BRTEN, GSER DNGUL ZANGS LCAGS KYI BZO LAS DAR BA DANG, LHA KHANG DAG LA SHING BRKOS RDO BRKOS MDZES RGYAN DAR BAR BRTEN SHING BRKOS DANG RDO BRKOS KYI LAG RTZAL CHES LEGS PAR DAR BA DANG, MKHAS PA PAndI TA RNAMS KYI GSUNG RTZOM DANG, BKA' BSTAN 'GYUR SOGS KYI SHING PAR RKO BA'I RIG PA PHUN SUM TSOGS PA DAR ZHING RGYAS, DE LTAR MKHAS PA PAndI TA RNAMS KYIS RGYA DKAR NAG LI DANG BAL BO KHA CHE SOGS KYI BZO LAS KYI RIGS MANG BO BSGYUR NAS DAR BAR BYAS TE, DPER NA, BSTAN 'GYUR GYI [NGO] POD KYI NANG DU DNGUL CHU GRUB PA'I BSTAN BCOS DANG, GSER 'GYUR GYI BSTAN BCOS, MCHOD RTEN GYI MTSAN NYID, SPOS SBYOR GYI BSTAN BCOS SOGS LE TSAN NYI SHU RTZA GNYIS YOD DE, BZO RIG BSTAN BCOS PHYOGS MTHUN BCAS PA'I GZHUNG, ,BCU PHRAG GNYIS LA GNYIS KYIS BRGYAN PAR BZHUGS, ,ZHES GSUNGS PA LTAR RO, ,LHA BZO BA'I THIG RTZA DANG LAG RTZAL NI, DBUS THANG DANG, KARMA SGAR BRIS DANG, REB GONG GI LHA RIS GSER RTZI DANG TSON 'DUL BA'I GDAMS PA KHYAD 'PHAGS DANG, GOS SKU BZHENGS DRUB SOGS DA LTA'ANG DAR @850 RGYAS SU YOD, RGYAL RONG YUL GYI LHA RIS PA DANG DNGUL BZO SOGS KYI RGYUN DA LTA'ANG YOD, DAD LDAN DAG GIS LHA KHANG GTZUG LAG KHANG MANG BO BZHENGS PA'I STABS KYIS, PHYI'I RTZIG PA RDO RTZIG DANG, NANG GI SHING GI KA GDUNG RGYAN BCAS BZOS STABS RIM GYIS DE DAG GI LAG RTZAL DAR ZHING RGYAS PAR GYUR, DER BRTEN MI SER MI DMANGS KYI 'TSO BA'I DGOS MKHO'I RIGS BZO BA'I RIG PA YANG DAR TE SNAM PHRUG THER RAS, SA GDAN PHYING GDAN PAGS TSAR, KO RTZID SOGS KYI LAG SHES BZO LAS DAR TE, DENG SANG YANG RAS GOS RIGS MA GTOGS, GTZO CHER LAG SHES BZO LAS DE DAG LA BRTEN PA YIN, DAM PA'I CHOS DAR SAR BZO LAS KYANG DAR ZHING RGYAS PAR YOD DO, , GNYIS PA GSO BA RIG PA NI, SNGAR LHA THO THO RI'I DUS SU RGYA GAR GYI SMAN PA BI BYI DGA' BYED DANG, BI LHA DGA' MDZES GNYIS BOD DU BYON NAS GSO DPYAD SMAN GYI RIG PA SPEL MOD, DE SKABS BOD RANG SKAD KYI YI GE 'BRI BA'I SROL MA BYUNG GSHIS, LEGS SBYAR GYI YI GE DANG, MI RIGS GZHAN GYI YI GE'I STENG NAS SPEL MOD, BOD RANG GI YI GE 'BRI BA'I SROL YOD PA'I DUS RIM BZHIN DAR KHYAB CHEN PO MA BYUNG BAR MNGON, KHRI SRONG LDE BTZAN GYI DUS SU MKHAN SLOB CHOS GSUM GYIS DAM PA'I CHOS RAB TU DAR BAR @851 MDZAD, DER BRTEN SAD MI MI BDUN SOGS DGE SLONG MKHAS PA MANG DU BYON NAS, RGYA GAR BAL BO SOGS SU PHEBS TE CHOS MANG BO BSGYUR BA DANG, DE'I ZHOR LA SMAN RTZIS SOGS KYI GZHUNG MANG BO BSGYUR, BSTAN PA SNGA DAR LA LO TZ'A BA BEE RO TZA NA SOGS DANG, KA COG ZHANG GSUM SOGS DANG PHYI DAR GYI LO TZ'A BA RIN CHEN BZANG BO SOGS KYIS BYANG CHUB KYI SEMS KYIS KUN NAS BSLANGS TE, GSO RIG GI GZHUNG SMAN DPYAD YAN LAG BRGYAD PA SOGS SMAN GZHUNG MANG BO BOD SKAD DU BSGYUR TE, BSTAN 'GYUR DU BZHUGS PA SDE DGE'I BSTAN 'GYUR GYI [HE] BA'I NANG DU SBYOR BA BRGYA BA SOGS SMAN GZHUNG LNGA DANG, [AE] BA'I NANG DU YAN LAG BRGYAD PA'I RANG 'GREL DU GRAGS PA'I YAN LAG BRGYAD PA'I SNYING BO ZHES BYA BA'I GZHUNG CHEN MO DANG, [KO] [KHO] [GO] STE POD GSUM GYI NANG DU YAN LAG BRGYAD PA'I SNYING BO RNAM PAR 'GREL BA TSIG GI DON GYI ZLA ZER ZHES BYA BA SOGS SMAN GYI SKOR LA POD CHEN PO LNGA DANG GZHUNG TSAN BDUN YOD PA RNAMS KYANG CHOS LUGS LA MKHAS SHING SBYANGS PA'I DGE SLONG PAndI TA RNAMS KYIS BSGYUR BA YIN NO, ,KHYAD PAR DU SDE SNOD GSUM DANG GSANG SNGAGS ZAB MO SBYANGS SHING BSGRUBS PAS GRUB PA THOB PA'I G-YU THOG YON TAN MGON PO MTSAN YONGS SU GRAGS PA DE NYID KYIS, SMAN DANG RTZIS KYI GZHUNG DU MA BRTZAMS @852 SHING, SLOB MA STONG PHRAG MANG BO SKYED BSRINGS TE BOD YUL SOGS SU NAD KYIS NYEN PA 'BUM PHRAG MANG BO NAD LAS THAR BAR BYAS PA DANG MNYAM DU DAM PA'I CHOS KYIS 'GRO BA RNAMS RNAM GROL THAR BA'I LAM LA BKOD DO, ,SMAN GZHUNG CHEN MO RGYUD BZHI CHA LAG DANG BCAS PA BRTZAMS PA, DENG SANG SMAN PA RNAMS GZHUNG 'DI KHO NA LA BRTEN PAR SNANG, BSTAN PA PHYI DAR GYI SKABS SU G-YU THOG YON TAN MGON PO GSAR MA ZHES BYA BA BYUNG NAS, GSANG SNGAGS GSAR RNYING LA SBYANGS SHING GRUB PA THOB STE G-YU THOG YON TAN MGON POS RNYING MA'I CHOS RGYUN BSKYANGS TE, SMAN RTZIS KYI GZHUNG MANG BO BRTZAMS, SMAN GZHUNG RGYUD BZHI CHA LAG DANG BCAS PA DAR SPEL GNANG STE GSO RIG DAR ZHING RGYAS PAR MDZAD, G-YU THOG GSAR RNYING GI RNAM THAR BDAG GIS LOGS SU BRIS YOD PAS 'DIR MI SPRO'O, ,SMAN PA MKHAS PA DE DAG GI RJES 'BRANGS MKHAS PA MANG DU 'BYUNG BA LAS SHIN TU GRAGS CHE BA NI BYANG BDAG RNAM RGYAL GRAGS BZANG DANG, ZUR MKHAR BA MNYAM NYID RDO RJE GNYIS LA BYANG ZUR RNAM GNYIS ZHES GRAGS, SMAN GZHUNG MANG BO BRTZAMS, DE GNYIS KYI RGYUD 'DZIN MKHAS PA MANG DU BYUNG, KUN GZIGS LNGA BA CHEN PO'I DUS, DAR MO SMAN RAMS PAS RGYUD KYI 'GREL BA DANG, SMAN NGAG BKA' RGYA @853 MA SOGS BRTZAMS, SDE SRID SANGS RGYAS RGYA MTSOS BEE SNGON DANG, MAN NGAG LHAN THABS SMAN GYI KHOG DBUG BRTZAMS PA SOGS SHIN TU MANG BAS BRJOD KYIS MI LANG, GZHAN YANG LCAGS PO RIR SMAN PA GRVA TSANG YOD PA DANG, SKU 'BUM BYAMS PA GLING DANG, BLA BRANG BKRA SHIS 'KHYIL SOGS SU'ANG SMAN PA GRVA TSANG YOD PA SOGS SMAN DPYAD DAR ZHING RGYAS PA'ANG CHOS LUGS DANG 'BREL BA KHO NA'O, , RIG GNAS CHE BA LNGA'I YA GYAL BDAG NYID KUN SHES PAR BYED PA'I NANG DON RIG PA NI, SANGS RGYAS BCOM LDAN 'DAS KYIS GSUNGS PA'I CHOS PHUNG BRGYAD KHRI BZHI STONG, DE TSUR BSDUS NA GSUNG RAB YAN LAG BCU GNYIS, DE TSUR BSDUS NA SDE SNOD GSUM GYI NANG DU 'DU BAS, DE DAG GI DGONGS PA 'PHAGS YUL GYI RGYAN DRUG MCHOG GNYIS SOGS PAn GRUB RNAMS KYIS LEGS PAR GTAN LA PHAB PA BZHIN, BOD 'DIR BKA' POD CHEN PO LNGA'I NANG DU BSDUS NAS MDO PHYOGS LA SBYANGS PA MTHAR PHYIN NAS SNGAGS PHYOGS LA SBYANG BAR BYED PA'I SROL DA LTA'I BAR DU GRVA SA CHEN PO RNAMS SU YOD PA 'DI LAGS SO, , RIG GNAS CHUNG BA LNGA'I DANG BO SNYAN NGAG NI, GRONG TSIG GI GLU DANG, 'BOL RTZOM TZAM RE GNA' DUS NAS YOD MOD, SNYAN NGAG GI MTSAN NYID, RNAM GRANGS, DPER BRJOD BCAS KYI YAN LAG @854 CHA TSANG BA NI PHYIS SU DAR BA YIN TE, LO TZ'A BA CHEN PO SHONG STON RDO RJE RGYAL MTSAN GYIS SNYAN NGAG GI RTZA BA ME LONG MA BSGYUR BA DANG, SNYAN NGAG CHEN PO DPAG BSAM 'KHRI SHING DANG, SKYES RABS SO BZHI BA SOGS DU MA BSGYUR, DPANG LO TZ'A BA BLO GROS BRTAN PAS KYANG 'GYUR BCOS DANG 'GREL BA BRTZAMS PA SOGS SNYAN NGAG GI LAM 'DI NI RGYAS PAR BYAS, DER BRTEN BOD KYI DGE BA'I BSHES GNYEN RNAMS KYI 'GREL BA DANG MCHAN 'GREL DPER BRJOD SOGS BRTZAMS PA SHIN TU MANG, DPER NA RIN SPUNGS 'JIG RTEN DBANG PHYUG GRAGS PA'I SENGGE'I NGA RO'I RGYUD DANG, KUN GZIGS LNGA BA'I DBYANGS CAN DGYES GLU, BOD MKHAS PA MI PHAM DGE LEGS KYI DAndI'I DGONGS RGYAN, KUN MKHYEN 'JAM DBYANGS BZHAD PAS DBYANGS CAN DGYES GLU'I DON 'GREL SOGS BRTZAMS, GZHAN YANG DGE BSHES RNAMS KYIS MDO DANG SNGAGS KYI YIG CHA MANG BO'I MCHOD BRJOD DANG BAR SKABS TSIGS BCAD SOGS SNYAN NGAG GIS BCINGS PA DANG 'PHRIN YIG CHAB SHOG DANG, GSUNG MGUR SOGS SNYAN NGAG GIS BRGYAN PA, DPER NA RGYAL DBANG BSKAL BZANG RGYA MTSO DANG KUN MKHYEN 'JIGS MED DBANG BO'I CHAB SHOG KHYAD PAR DU 'PHAGS PA SOGS SNYAN NGAG MKHAS PA MANG CHE BA BLA MA DGE BA'I BSHES GNYEN RNAMS YIN NO, , @855 GNYIS PA MNGON BRJOD NI, MNGON BRJOD 'CHI MED MDZOD YAR LUNG GRAGS PA RGYAL MTSAN GYIS BSGYUR BA DANG, DE'I RGYA CHER 'GREL ZHA LU LO TZ'A BA DGE SLONG CHOS SKYONG BZANG BO'I 'GYUR DANG, BOD RANG GI MKHAS PAS BRTZAMS PA MNGON BRJOD MKHAS PA'I RNA RGYAN DANG, MKHAS PA'I RNA CHA SOGS YOD LA MNGON BRJOD 'DI NI SHIN TU MKHO CHE BA'I RIG GNAS SHIG GO, , GSUM PA SDEB SBYOR NI, SDEB SBYOR RIN CHEN 'BYUNG GNAS NI, LO TZ'A BA CHEN PO BYANG CHUB RTZE MOS BSGYUR BA SOGS MANG BO YOD PA DAG GI KHRID RGYUN KYANG DA LTA MA NYAMS PAR YOD DO, ,SDE DGE'I BSTAN 'GYUR DKAR CHAG LAS, RANG BZHIN RKYEN DANG RNAM 'GYUR LEGS SBYAR NAS, ,DON LA BRDA SPROD GZHUNG GI BSTAN BCOS DANG, ,DE YI YAN LAG MNGON BRJOD SNYAN NGAG SOGS, , STON PA'I BSTAN BCOS SUM CU RTZA DGU BZHUGS, ,ZHES GSUNGS PA LTAR RO, , BZHI BA SKAR RTZIS NI, DUS 'KHOR RTZA RGYUD DANG, DUS 'KHOR BSDUS RGYUD LAS GSUNGS PA'I RTZIS KYI SKOR, BOD KYI MKHAS PA DAG GIS GTAN LA PHAB STE DAR BAR BYAS, DPER NA, BU STON THAMS CAD MKHYEN PA'I MKHAS PA DGA' BYED DANG, MKHAS GRUB THAMS CAD MKHYEN PA'I DUS 'KHOR t'IKA CHEN DANG, RGYA MTSO RNAM @856 GSUM GYIS PAD DKAR ZHAL LUNG MA BU SOGS DANG, SDE SRID KYIS BEE DKAR, SUM PAS DGE LDAN RTZIS GSAR, THU'U BKVAN GYIS MKHAS PA'I SNYING NOR, BRAG DGON PA'I RIGS LDAN MCHOD PA'I 'OD SNANG BRTZAMS PA SOGS DANG, SDE BA TSANG GI 'ON PO AA KHU THUB BSTAN GYIS RGYA NAG NAS BRGYUD PA'I RTZIS GZHUNG BRTZAMS PA SOGS DA LTA'I BAR DU DAR ZHING RGYAS PA NI CHOS PA RNAMS KYI DRIN NO, , LNGA BA ZLOS GAR NI, DGE SLONG LO TZ'A BA DAG GIS, 'JIG RTEN KUN TU DGA' BA'I ZLOS GAR DANG, KLU KUN TU DGA' BA'I ZLOS GAR SOGS BSGYUR, BOD RANG GI MKHAS PA DAG GIS, 'DUL BA LUNG GI NOR BZANG GI SKYES RABS LA BRTEN NAS, CHOS RGYAL NOR BZANG GI ZLOS GAR BZOS PA DANG, MA nI BKA' 'BUM GYI SPYAN RAS GZIGS KYI SKYES RABS SHIG LA BRTEN NAS DRI MED KUN LDAN GYI ZLOS GAR BZOS PA DANG, PAn CHEN BLO BZANG YE SHES SKU GZHON NU'I DUS SU SKYES RABS DRAN TSUL GSUNGS PA LA BRTEN NAS DON YOD DANG DON GRUB KYI ZLOS GAR DANG, STAG PHU GAR GYI DBANG PHYUG GIS SKU GZHON NU'I DUS SU SKYES RABS DRAN TSUL GSUNGS PAR BRTEN BYA MGRIN SNGON ZLA BA'I ZLOS GAR BZOS PA DANG, KA CHEN KA KHOL MA DANG MA nI BKA' 'BUM LA BRTEN NAS SRONG BTZAN SGAM PO'I ZLOS GAR BZOS PA SOGS DA LTA YANG 'PHEL BZHIN @857 YOD PA 'DI LAGS LA, 'BAB LEB GYON ZHING SMAD DU THA GU'I DO SHAL CAN LHA MO'I ZLOS GAR ZHES PA GRUB CHEN THANG STONG RGYAL BOS SROL BTOD PAR GRAGS SO, ,DE LTAR RIG GNAS CHE BA LNGA DANG, CHUNG BA LNGA STE BCU PHRAG RIG PA'I GNAS ZHES GRAGS PA 'DI DAG NI, SANGS RGYAS KYI BSTAN PA RIN PO CHE 'DZIN CING SPEL BA'I SKYES CHEN DAM PA SHA STAG GIS MI NYAMS GONG 'PHEL DU BTANG BA YIN LA, MKHAS PA PAn dI TA DE DAG GIS DKA' SPYAD DPAG TU MED PA GNANG NAS RANG RGYUD 'DUL PHYIR THOS BSAM SGOM GSUM YA MA BRAL BAR GNANG STE, GRUB PA'I GO 'PHANG MTHON POR SLEBS PA NA, BSTAN PA DANG SEMS CAN GYI DON DU, GZHUNG LUGS CHES SHIN TU MANG BO SAm SKRi TA SOGS GZHAN GYI SKAD YIG GI THOG NAS, BOD RANG SKAD DU BSGYUR BA DANG, RANG GIS BRTAGS SHING DPYAD NAS DGONGS 'GREL GYI BSTAN BCOS PO TI BCU PHRAG DU MA BRTZAMS PA LA BRTEN NAS, GANGS LJONGS BOD KYI RIG GNAS ZHES BYA BA'I SPYI NOR PHUN SUM TSOGS PA 'DI YOD PA YIN NO, ,SNGON GYI MKHAS PA RNAMS KYIS DKA' SPYAD SDUG RUS KYIS DENG DUS SU 'JIG RTEN GYI KHAMS 'DIR DAR BA'I RIG PA'I GNAS DU MA BOD GANGS CAN GYI MI'I RIGS LA YOD PAR BYAS PA DE BZHIN DU DENG DUS GSAR SKYES GZHON NU RNAMS KYIS, SNGAR GYI RIG GNAS YID BZHIN GYI NOR BU DAG LAG NAS MA @858 SHOR BA GZHIR BZHAG GI STENG NAS, GSAR DAR GYI RIG PA MTHA' DAG BSLABS SHING SBYANGS NAS, RANG GI SKAD YIG THOG TU BSGYUR CING BLANGS TE GZHAN LA 'GRAM CHU LDANG MI DGOS PAR BYAS NAS, BOD MI RIGS 'DI SNGAR MI GRANGS NYUNG RUNG 'BUR DU THON PA ZHIG YIN PA LTAR, PHYIN CHAD KYANG DE LTAR 'GYUR BAR BYED PA LA BRTZON DGOS SO, , 'DIR SMRAS PA, PHYAG NA PADMO'I 'OD DKAR THIGS PHRENG GIS, ,BSIL LDAN YUL GYI MUN STUG LHAG MED BCOM, ,RIG PA KUN DA GSAR BA'I MDZES ZHAL NGOM, ,CHOS DANG SRID KYI SNANG BA DKAR BOS KHYAB, ,DE LTA'I YUL GYI DGE MTSAN 'BUM, , BDEN GSUNG DAM PA BUD DHA YIS, ,'JAM DPAL RTZA BA'I RGYUD LAS NI, ,'GYUR MED GSUNG GI SGRA DBYANGS BSGRAGS, ,GNA' DUS MES PO 'BUM PHRAG GI, ,MKHYEN RAB 'JAM DPAL DBYANGS LA ZA, ,DPA' BO 'BUM GYI SNYING STOBS CHE, ,LAG NA RDO RJE'I DPAL LA 'KHU, ,THABS DANG SHES RAB 'GRAN PA LA, ,MES POS GDONG BZHI SPRUL NAS LTA, ,RIG PA'I ME TOG RAB RGYAS PAR, ,KO KI LA YI DBYANGS KYIS BSTOD, ,CHOS SRID DPAL GYI MDZA' NA MO, , BSOD LDAN BSIL LJONGS 'GRO BAS THOB, ,DGE BCU'I DPAL GYI MNGAL KHUR BZUNG, ,MNGON MTHO NGES LEGS GZHON NU BTZAS, , @859 DE YIS BYANG CHUB LJON SHING BTZUGS, ,BYANG CHUB SPYOD PA'I LO 'DAB RGYAS, ,SKU BZHI'I 'BRAS BU G-YUR ZA BAR, ,BSOD LDAN SKYES BU YONGS KYIS SPYOD, ,CES SPYI NOR PHUN TSOGS ZHES BYA BA 'DI NI, CHEN PO 'GA' ZHIG GI BKAS BSKUL BA BZHIN BSAM GTAN RGYA MTSO MI 'JIGS DBYANGS CAN DGA' BA'I BLO GROS SU 'BOD PAS RAB GNAS LCAGS RTA LO'I HOR ZLA DANG BO'I DKAR PHYOGS KYI RDZOGS PA DANG BOR SBYAR BA'O, ,