, ,BDAG CAG GI STON PA SNGON BYANG CHUB SEMS DPA' LHA'I DBANG PO BRGYA BYIN BUM PA CAN DU 'KHRUNGS PA'I RTOGS BRJOD KYI 'GREL PA LEGS BSHAD SGRON ME ZHES BYA BA BZHUGS SO, ,,
, ,NA MO GU RU MU N'I NDRA YA, BDE LDAN ZHING MGON BLO BZANG YE SHES SOGS, ,RGYAL KUN SPYI GZUGS BSHES GNYEN DU MA YIS, ,RJES BZUNG BSTAN PA'I RGYAL MTSAN 'DZIN PA'I GTZO, ,SKYABS GSUM KUN 'DUS YONGS 'DZIN MCHOG LA 'DUD, ,BDAG GI STON PA THOG MAR SEMS BSKYED NAS, ,BSKAL CHEN GRANGS MED SUM CU RTZA GSUM DU, ,RANG GI BDE LA NAM YANG MA CHAGS PAR, ,GCIG TU SEMS CAN DON CHEN BSGRUBS PA LAS, ,'DIR NI 'PHAGS MCHOG SAR GNAS SEMS DPA' CHE, ,BRGYA BYIN BUM PA CAN DU 'KHRUNGS PA YI, , RTOGS BRJOD BLA MA'I GSUNG BZHIN SPEL BA LA, ,BLO GSAL YONGS KYIS DAD CING GUS PAS NYON, DE LA 'DIR DE BZHIN GSHEGS PA SNGON SLOB PA LAM GYI GNAS SKABS SU NGAG
, ,'KHYAL SPANGS PA'I TSUL KHRIMS BSRUNG TSUL RNAM THAR DANG SBYAR TE BSHAD PA LA GSUM LAS DANG PO MTSAMS SBYAR BA NI, CHANG 'THUNG BA NI, NYES PA DU MA 'BYUNG ZHING SHIN TU MA RUNGS PAR 'GYUR PA'I PHYIR DGE BA RNAMS NI GZHAN DAG KYANG 'DI LAS ZLOG PAR BYED NA, BDAG NYID LTA SMOS KYANG CI DGOS, ZHES GSUNGS, DON NI, BDAG CAG GI STON PA BYANG CHUB TU SEMS BSKYED NAS RGYAL SRAS KYI SPYOD PA LA SLOB PA'I TSE NGAG 'KHYAL SOGS NYES SPYOD MANG PO LA DBANG MED DU 'JUG PA'I RGYU CHANG 'THUNG BA SPONG TSUL NI, CHANG 'THUNG BA NI LUS NGAG YID GSUM GYI NYES PAR SPYOD PA DU MA 'BYUNG BA'I RGYU YIN ZHING, CHANG 'THUNGS PA LAS 'DI PHYI GNYIS KAR SHIN TU MA RUNG BAR 'GYUR PA'I PHYIR DGE BA STE SKYES BU DAM PA RNAMS NI GDUL BYA GZHAN
DAG KYANG BAG MED PA'I GNAS CHANG 'THUNG BA 'DI LAS ZLOG PAR BYED NA, BDAG NYID MI 'THUNG BA LTA SMOS KYANG CI DGOS, DE BAS NA STON PA THUGS RJE CAN 'DIS SNGON SLOB PA LAM GYI GNAS SKABS SU NGAG 'KHYAL SOGS BAG MED PA'I GNAS CHANG SPONG BA'I TSUL KHRIMS JI LTAR BSRUNG BAR MDZAD PA DE BZHIN DU BSLAB PAR BYA'O,, GNYIS PA BRGYA BYIN DU 'KHRUNGS PA'I RTOGS BRJOD RGYAS PAR BSHAD PA LA GSUM LAS, DANG PO BSAMS BZHIN DU SKYE BA BZHES PA'I TSUL NI, DE YANG 'DI LTAR BYANG CHUB SEMS DPA' SNYING RJE CHEN PO YONGS SU BSGOMS PA'I BLO CAN GZHAN LA PHAN CING BDE BAR BYED PA LA DGA' BA, SBYIN PA DANG DUL BA DANG ZHI BA LA SOGS PAS BSOD NAMS SPEL BA NYAMS SU LEN PA DE RE ZHIG CIG LHA RNAMS KYI DBANG PO BRGYA BYIN DU GYUR TO ZHES GRAG GO, ZHES GSUNGS, DON NI, STON PA THUGS RJE CAN 'DI NYID SNGON SLOB PA LAM GYI GNAS SKABS SU RGYAL SRAS KYI SPYOD PA LA SLOB PA'I TSE BAG MED PA'I GNAS CHANG SPONG BA'I TSUL KHRIMS RANG GIS BSRUNGS SHING, GDUL BYA GZHAN DAG KYANG CHANG 'THUNG BA LAS BZLOG PAR MDZAD PA'I TSUL DE YANG BLA MA RNAMS KYI ZHAL LAS 'DI LTAR THOS TE, STON PA THUGS RJE CAN 'DI'I SNGON GYI 'KHRUNGS RABS BYANG CHUB SEMS DPA' SEMS DPA' CHEN PO 'GRO BA NYAM THAG PA 'BA' ZHIG THUGS LA BRNAGS NAS BYAMS PA DANG SNYING RJE CHEN PO BSGOMS PA'I BLO CAN TE THUGS BYAMS PA DANG SNYING RJE CHEN PO'I GZHAN DBANG DU SONG BA RANG YAL PAR DOR NAS SEMS CAN
, ,GZHAN RNAMS LA PHUGS SU PHAN ZHING 'PHRAL DU'ANG BDE BAR BYED PA LA DGA' BA'I BSAM PA PHUN TSOGS DANG, SBYOR BA PHUN CHOGS? SBYIN PA DANG, SGO GSUM LEGS PAR DUL BA'I TSUL KHRIMS DANG, GNOD SEMS ZHI BA'I BZOD PA DANG, RNAM G-YENG LA SOGS PA NYE NYON RNAMS ZHI BA'I BSAM GTAN DANG, SOGS PAS BSDUS PA BRTZON 'GRUS DANG, THUN MONG MIN PA'I BSAM GTAN DANG, SHES RAB STE PHAR PHYIN DRUG GIS BSDUS PA'I BSOD NAMS RTAG SBYOR DANG GUS SBYOR GNYIS KYIS SPEL PA NYAMS SU LEN BAR MDZAD PA DE MKHA' KHYAB KYI SEMS CAN RNAMS SMIN CING GROL BAR MDZAD PA LA NAM YANG LHOD PA MED PAR BZHUGS BA LAS, DUS RE ZHIG CIG NA LHA DANG MI'I 'GRO BA MTHA' YAS PA ZHIG 'DUL BAR DGONGS NAS LHA RNAMS KYI DBANG PO BRGYA BYIN DU GYUR TO ZHES GRAG GO, GNYIS PA RTEN DE'I YON TAN SPYIR BSTAN PA LA GNYIS LAS, DANG PO TSIG LHUG PA'I SGO NAS BSNGAGS PA NI, DE LHA'I LONGS SPYOD KYI BDE BA RNAMS PHUN SUM TSOGS KYANG SNYING RJE'I DBANG DU GYUR PAS 'JIG RTEN GYI DON BYA BA LA BRTZON PA LHOD PAR MA GYUR TO,, ZHES GSUNGS, DON NI, BYANG SEMS BDAG NYID CHEN PO DE SEMS CAN GYI DON DU SUM CU RTZA GSUM GYI LHA'I GNAS SU SNYING RJE DANG SMON LAM GYI DBANG GIS LHA'I DBANG PO BRGYA BYIN DU SKYE BA BZHES TE, LHA'I LONGS SPYOD KYI BDE BA PHUN SUM TSOGS PA RNAMS DANG LDAN YANG THUGS SNYING RJE'I DBANG DU GYUR PAS 'JIG TSOGS KYI PHUNG PO
LNGA LA RNAM SHES BRTEN PA LAS KYIS BCINGS PA'I SEMS CAN RNAMS KYI DON BYA BA LA BRTZON PA NAM YANG LHOD PAR MA GYUR TO,, GNYIS PA TSIGS SU BCAD PA'I SGO NAS BSNGAGS PA NI, 'JIG RTEN YONGS KYI PHAL CHER DPAL LDAN NA, ,CHANG GIS MYOS BZHIN BDAG GI DON KYANG 'DOR, ,BAG YOD RNAMS NI GZHAN GYI DON LA YANG, ,LHA DBANG DPAL DANG LDAN YANG DES MI MYOS, ,SDUG BSNGAL MANG POS GDUNGS PA'I SEMS CAN LA, ,GNYEN BSHES SDUG PA RNAMS LA BYAMS PA BZHIN, ,BRTAN ZHING DPAL GYI RANG BZHIN SHES PA NA, ,DE NI GZHAN GYI DON SPYOD YONGS MI BRJED, ZHES GSUNGS, DON NI, 'JIG RTEN 'DI NA SKYE BO PHAL CHER LAS DANG NYON MONGS PAS BCINGS TE SGO GSUM GYI BYA BA CI BYED SLAR RANG NYID 'CHING BA'I RGYU 'BA' ZHIG TU GYUR TE, GNAS DANG LUS DANG LONGS SPYOD PHUN SUM TSOGS PA'I DPAL DANG LDAN PA ZHIG BYUNG NA NI PHUN TSOGS DE NYID LA CHAGS TE CHANG GIS MYOS PA BZHIN DU RANG GI TSE 'DI DANG PHYI MA'I DON RNAMS KYANG 'DOR BAR BYED NA, SKYE BO GZHAN LA PHAN PA'I THABS MI BYED PA LTA CI SMOS, 'BYOR BA PHUN SUM TSOGS PA LA CHAGS PAS 'DI DANG PHYI MA'I DON GNYIS KA 'DOR TE, TSE 'DIR 'BYOR BA YOD NA DE NYID BSRUNG BA DANG SLAR YANG SPEL BA'I PHYIR SDUG BSNGAL BRGYA PHRAG MANG POS GZIR TE 'BYOR BA DE NYID SDUG BSNGAL GYI RGYUR 'GRO BAR BYED LA, 'BYOR BA DE LA CHAGS PA DANG, DE'I PHYIR DU 'THAB PA DANG RTZOD PA LA
, ,SOGS PA ZHE SDANG GIS KUN NAS BSLANGS PA'I LAS NGAN MANG PO BSAGS TE, 'BYOR BA RNAMS 'DIR BZHAG NAS MYUR DU SHI STE NGAN SONG MU MTHA' MED PAR 'KHYAMS NAS SDUG BSNGAL BRGYUD MAR MYONG DGOS PAS NA 'BYOR BA DE NYID KYIS PHYI MAR PHUNG BA'I RGYU BYED DO,, BYANG SEMS BDAG NYID CHEN PO 'DI SOGS SKYES BU DAM PA BAG YOD LA GNAS PA RNAMS NI 'BYOR BA PHUN SUM TSOGS PA'I MCHOG LHA'I DBANG PO BRGYA BYIN GYI DPAL 'BYOR MNGA' THANG DANG LDAN YANG, DPAL 'BYOR DE LA MA CHAGS PAS DES YID MI MYOS PAR BDE BA DE NYID SNGON GYI LAS BZANG PO'I 'BRAS BUR SHES NAS DKON MCHOG MCHOD PA SOGS SLAR YANG DGE BA'I LAS SPEL BA DANG, SRID PA'I PHUN TSOGS THAMS CAD BSLU BA'I RANG BZHIN DU SHES NAS DES SKRAG CING SKYO BA DANG, CHAGS PAS BCINGS PA'I GDUL BYA GZHAN RNAMS KYI DON LA LHAG PAR BRTZON TE, MDOR NA NGES 'BYUNG DANG, BYANG CHUB KYI SEMS DANG, YANG DAG PA'I LTA BA RNAMS RGYUD LA BSKYED PA DANG, SKYES PA RNAMS 'PHEL BA'I RKYEN DU BSGYUR TE 'BYOR BA THOB PA DON YOD PAR MDZAD DO,, BYANG SEMS BDAG NYID CHEN PO DE NI SNGON YUN RING PO NAS THEG PA CHEN PO'I LAM LA GOMS PA RAB KYI MTHAR PHYIN PA YIN PAS GNAS SKABS KUN TU SEMS CAN GYI DON SPYOD PA YONG MI BRJED DO,, BDAG NYID CHEN PO DE SEMS CAN GYI DON 'BA' ZHIG SPYOD PA'I RGYU NI BYAMS PA DANG SNYING RJE GNYIS YIN TE, BDAG NYID CHEN PO
DE NI SEMS CAN SU MTHONG YANG PHA MA RNAMS RANG GI GNYEN BSHES TE BU SDUG PA RNAMS LA JI LTAR BYAMS PA BZHIN DU, BDAG NYID CHEN PO 'DI YANG MKHA' KHYAB KYI SEMS CAN THAMS CAD LA BU SDUG PA GCES PA BZHIN DU YID 'ONG GI BYAMS PA NAM YANG 'GYUR PA MED PAR BRTAN PO YOD LA, MKHA' KHYAB KYI SEMS CAN RNAMS SDUG BSNGAL RNAM PA MANG POS DUS KUN TU GDUNGS PA'I TSUL LA GZIGS NAS BU GCIG PU ME'I DONG DU LHUNG BA MTHONG BA LTAR BZOD KLAGS MED PA'I SNYING RJE NAM YANG MI 'GYUR BAR BRTAN PAR YOD DO,, BYAMS PA DANG SNYING RJE DE LTAR CHE BA TZAM DU YOD PAR MA ZAD, LHA DBANG GI DPAL SOGS 'KHOR BA'I PHUN TSOGS MTHA' DAG MI RTAG PA, MI BRTAN PA, 'GYUR BA, BSLU BA, BDAG MED PA'I RANG BZHIN CAN DU SHES PAS NA, SRID PA DANG ZHI BA'I MTHA' GANG LA'ANG MI GNAS PAR SA NAS SAR 'PHAR TE RNAM PA THAMS CAD MKHYEN PA'I YE SHES MYUR DU SGRUB PAR BYED DO,, GSUM PA KHYAD PAR SEMS DPA' CHEN PO DES BAG MED PA'I GNAS CHANG SPONG BA'I TSUL KHRIMS BSRUNG TSUL RGYAS PAR BSTAN PA LA LNGA LAS, DANG PO BDAG NYID CHEN PO DES SKYE BO MANG PO CHANG GIS MYOS NAS PHUNG BAR GZIGS PA NI, DE NAS RE SHIG CIG BDAG NYID CHEN PO DE MI'I 'JIG RTEN DU NYUL BA'I TSE, SNYING BRTZE BA DANG BYAMS SHING MTHU CHE BA'I MIG GIS MTHONG BA NI, THAMS CAD KYI MDZA' BO ZHES BYA BA'I RGYAL PO ZHIG MI DGE BA'I BSHES GNYEN LA BRTEN PA'I SKYON GYIS, BLON PO DANG
, ,'BANGS SU BCAS PA CHANG 'THUNG BA LA DGA' BAR GYUR TE, DE LA SKYON DU'ANG MI LTA BAR GYUR BA LA CHANG 'THUNG BA LA'ANG SKYON CHE BAR MTHONG NAS, ZHES GSUNGS, DON NI, DE LTAR SEMS DPA' CHEN PO LHA'I DBANG POR 'KHRUNGS PA DES SUM CU RTZA GSUM DU LHA RNAMS THABS MKHAS KYI SPRUL BAS MTHO RIS DANG THAR PA'I LAM LA 'GOD PAR MDZAD DE, SUM CU RTZA GSUM NA LHA GRANGS MED PA YOD PA DE DAG THAMS CAD KYIS LHA'I DBANG PO BRGYA BYIN RANG RANG GI MDUN NA BZHUGS TE CHOS STON PAR MTHONG ZHING LHA'I DBANG PO'I GZUGS BRNYAN KHANG BZANG RNAM PAR RGYAL BYED KYI NGOS LA SHAR BA PHYOGS KUN NAS MTHONG BAS, LHA PHAL PA RNAMS KYIS LHA'I DBANG PO BRGYA BYIN GANG NA BZHUGS MI SHES PAR PHYOGS THAMS CAD BRGYA BYIN GYI GZUGS KYIS GANG BA LTA BUR SNANG BA DANG, LHA SPYI MTHUN GYI BSOD NAMS KYI LAS DANG BRGYA BYIN SEMS DPA' CHEN PO'I MTHUS LHA RNAMS LA DUS DUS SU NAM MKHA' LAS RNGA'I SGRA LAS MI RTAG PA DANG, SDUG BSNGAL BA DANG, BDAG MED PA DANG, MYA NGAN LAS 'DAS PA 'BA' ZHIG ZHI BA STE CHOS KYI SDOM BZHI'I SGRA BSGRAGS PAS LHA RNAMS CHOS LA BSKUL BAR BYED DO,, DE LTAR SEMS DPA' CHEN PO DE LHA RNAMS KYI DON MDZAD CING BZHUGS PA LAS DUS RE ZHIG CIG NA LHA DBANG BDAG NYID CHEN PO DES 'DZAM BU'I GLING LA SOGS PA'I MI'I 'JIG RTEN DU DAM PA'I CHOS SPYOD PA MCHIS SAM MA MCHIS BLTA BA'I PHYIR MYUL BA'I TSE,
SEMS CAN RNAMS LA SNYING BRTZE BA DANG BU SDUG PA LTAR BYAMS SHING DUS KUN TU SEMS CAN RNAMS KYI DANG TSUL LA GZIGS PAR MDZAD PA NA, MTHU CHE BA STE THOGS PA MED PA'I LHA'I MIG GIS 'DZAM BU'I GLING GI MI RNAMS LA GZIGS PAS JI LTAR MTHONG BA NI THAMS CAD KYI MDZA' BO ZHES BYA BA'I RGYAL PO ZHIG MI DGE BA'I BSHES GNYEN ZHIG LA BRTEN PAS, MI DGE BA'I BSHES GNYEN DES LAM LOG PAR KHRID DE CHANG 'THUNG BA SKYON MED PAR BSTAN PA NA DE'I SKYON GYIS RGYAL PO DE DANG DE'I BLON PO RNAMS DANG 'BANGS SU BCAS PA THAMS CAD CHANG 'THUNG BA LA DGA' BAR GYUR TE, CHANG 'THUNG BA DE LA SKYON DU'ANG MI LTA BAR BAG MED PAR SPYOD PAR GYUR PA MTHONG LA, CHANG 'THUNG BA NI SKYON CHE BAR YANG MTHONG NGO,, GNYIS PA 'DI PHYIR PHUNG BA'I NYES SPYOD DE 'GOG PA'I THABS JI LTAR BYA SNYAM DU DGONGS PA NI, BDAG NYID CHEN PO DE SNYING RJE CHEN POS SNYING MI DGA' BAR GYUR TE BSAMS PA, KYE MA'O 'JIG RTEN 'DI DAG NI RAB TU MA RUNGS PAR GYUR ZHING 'KHOD DO SNYAM NAS, 'THUNGS NA THOG MAR RAB TU ZHIM, ,SKYON DU LTA BA RMONGS PAR 'GYUR, ,LEGS PAR 'GYUR BA MED PAR BYAS, ,LOG PA'I LAM NI BZANG PO BZHIN, DE LA 'DI JI LTAR BYAS NA RUNG SNYAM PA DANG, MTHONG BA DON YOD DO SNYAM NAS, GTZO BOR GYUR PA RNAM PAR GANG SPYOD PA, ,SKYE BO RNAMS KYANG DE YI RJES SU 'JUG ,DE BAS 'DIR NI RGYAL PO NYID BCOS NA, ,'JIG RTEN DAG NA DGE SDIG DE LAS
, ,'BYUNG, ZHES GSUNGS, DON NI, DE LTAR GZIGS PA NA BYANG SEMS BDAG NYID CHEN PO DE SNYING RJE CHEN POS SNYING MI DGA' BAR GYUR TE BSAMS PA, KYE MA'O ZHES MYA NGAN GYI TSIG BRJOD NAS, KHAMS GSUM GYI 'KHOR BA 'DIR SEMS CAN PHAL CHER NGAN SONG DU GNAS NAS BDE 'GRO'I RTEN THOB PA SHIN TU DKON LA, SNGON GYI BSOD NAMS KYI MTHUS BDE 'GRO'I RTEN THOB KYANG NYON MONGS DBANG BTZAN PA DANG GROGS NGAN PA'I MTHUS DAL BA CHUD GSON PAR BYED PA MI'I 'JIG RTEN RGYAL PO BLON 'BANGS DANG BCAS PA 'DI DAG NI RAB TU MA RUNG BAR GYUR CING 'KHOD DO,, GROGS NGAN PA NI LEGS TSOGS THAMS CAD 'JOMS PAR BYED PA'I DGRA MA RUNGS PA STE, 'DI LTAR CHANG NI NYES PA THAMS CAD KYI GZHI, LEGS TSOGS THAMS CAD NYAMS PAR BYED PA'I DUG LTA BU YIN PA LA LOG PA'I LAM NI LAM BZANG PO YIN PA BZHIN DU BYAS TE DE LA DGA' BZHIN DU 'JUG LA, THOG MAR 'THUNGS PA NA RAB TU ZHIM PAR SNANG YANG CHANG 'DI KHONG DU SONG BA NA DES LUS SEMS GNYIS KA BSLAD DE SEMS RMONGS PAR GYUR NAS CHANG DE LA SKYON DU LTA BA BOR TE YON TAN DU LTA BAR 'GYUR TE, RANG LA PHAN PA DANG MI PHAN PA'I BLANG DOR LA CHES RMONGS PA NA RANG LA PHAN PA DANG LEGS PAR 'GYUR BA RNAMS MED PAR BYED DO,, DE LTAR RMONGS PA 'DI DAG LA DUS 'DIR JI LTAR BYAS NA RUNG SNYAM DU DGONGS PA NA, CHANG GIS MYOS PAR GYUR
PA DE DAG LA PHAN PA'I THABS MTHONG BA, RDZU 'PHRUL MNGON PAR 'DU BYAS NAS DE DAG GI MDUN DU SONG NAS CHANG GI NYES DMIGS RGYA CHER BSHAD NA, DE DAG LOG PA'I LAM LAS ZLOG PAR BYED NUS PAS NA DE DAG LA PHAN PA'I DON YOD DO SNYAM DU DGONGS TE, DE YANG 'JIG RTEN 'DI NA SKYE BO PHAL CHER RGYAL PO'I RJES SU 'JUG PAS, RGYAL PO SOGS GTZO BOR GYUR PA RNAMS BYA BA GANG DANG GANG RNAM PAR SPYOD PA DE DANG DE'I RJES SU SKYE BO PHAL PA RNAMS 'JUG GO, DE BAS NA RGYAL PO NYID BCOS NA 'BANGS THAMS CAD DBANG MED DU 'CHOS NUS TE, 'JIG RTEN DAG NA DGE SDIG GANG DANG GANG SPYOD PA RGYAL PO JI LTAR SPYOD PA DE DANG DE LAS 'BYUNG PAS SO SNYAM DU DGONGS SO,, GSUM PA RGYAL BLON 'BANGS DANG BCAS PA RDZU 'PHRUL GYIS 'DUN PAR BYAS PA LA BZHI LAS, DANG PO DE DAG 'DUL BAR NUS PA'I GZUGS BSTAN PA NI, DE LTAR RNAM PAR NGES PAR BYAS NAS SEMS DPA' CHEN PO DE GSER BTZO MA'I MDOG LTAR YID DU 'ONG BA, SKRA'I THOR TSUGS CUNG ZAD RTZUB LA 'KHYIL BA CAN SHING GI SHUN LPAGS DANG, RI DVAGS AA DZI NA'I LPAGS PA GYON PA, TSANGS PA'I LUS GZI BRJID DANG LDAN PA ZHIG TU MNGON PAR SPRUL NAS CHANG GIS GANG BA'I BUM PA HA CANG YANG MI CHE BA ZHIG NI LAG PA G-YON PA NA THOGS TE 'ONGS PA DANG, DE NAS THAMS CAD KYI MDZA' BO'I RGYAL PO 'KHOR GYI NANG DU 'DUS TE, CHANG DANG, SBRANG CHANG DANG, BU RAM SHING GI CHANG DANG,
, ,CHANG BCOS MA DANG, RGUN CHANG GI GTAM GYI SKABS GLENG BSLANG BA'I TSE MDUN GYI NAM MKHA' LA BYUNG STE 'DUG PAR GYUR TO,, ZHES GSUNGS, DON NI, SEMS DPA' CHEN PO DES DE LTAR RGYAL PO 'KHOR BCAS 'DUL BA'I DON DU SPRUL BA BSTAN TE CHANG GI NYES DMIGS STON PAR RNAM PAR NGES PAR BYAS NAS LHA'I DBANG PO'I RANG BZHIN GYI LUS MI SNANG BAR BYAS TE, LUS GSER BCO MA'I MDOG LTAR YID DU 'ONG BA RIN PO CHE'I RGYAN MED PAR SKRA'I THOR TSUGS CUNG ZAD RTZUB PA 'KHYIL BA CAN, LHA'I GOS PANYTZA LI KA SOGS MED PAR DRANG SRONG GI CHA LUGS BYAS TE, GOS SU SHING GI SHUN LPAGS DANG RI DVAGS AA DZI NA'I PAGS PA GYON PA, TSANGS PA'I BUR GRAGS PA BRAM ZE'I LUS GZI BRJID DANG LDAN PA ZHIG TU MNGON PAR SPRUL NAS CHANG GIS GANG BA'I BUM PA HA CANG MI CHE BA RGYAN GYIS BRGYAN PA ZHIG LAG PA G-YON PA NA THOGS TE 'ONGS NAS, THAMS CAD KYI MDZA' BO'I RGYAL PO 'KHOR GYI NANG DU 'DUS TE, 'BRU'I CHANG DANG, SBRANG CHANG DANG, BU RAM SHING GI CHANG DANG, BCOS PA'I CHANG DANG, RGUN CHANG RNAMS LAS, CHANG 'DI DANG 'DI NI MNGAR RO,, 'DI DANG 'DI NI ZHIM MO ZHES CHANG GI GTAM RNAM PA MANG PO'I SKABS GLENG LANGS PA'I TSE DE DAG GIS MTHONG BA'I MDUN GYI NAM MKHA' LA BYUNG STE 'DUG PAR GYUR TO,, GNYIS PA RGYAL PO 'BANGS DANG BCAS PA NGO MTSAR NAS GUS PAS BTUD PA NA BUM PA ZHIG BSTAN NAS NYOS SHIG PAR BSKUL BA NI,
DE NAS SKYE BO DE DAG NGO MTSAR CHE ZHING RAB TU GUS PAR LANGS TE THAL MO SBYAR TE RIM GRO BSKYED PA DANG, CHAR SPRIN 'BRUG SGRA ZAB MO'I SGRA 'BYIN PA BZHIN DU BSANG BSTOD DE SMRAS PA, ME TOG PHRENG BA MGUL NA BKOD, ,MGRIN PA MAN CHAD RAB TU GANG, ,BUM PA'I RGYAN GYIS BRGYAN PA YI, ,BUM PA 'DI NI SU NYO 'DOD, ,ME TOG PHRENG BAS GDU BU BTAGS PA BZHIN, ,BUM PA'I KHA RGYAN LDUM BUS BRGYAN PA DAG ,RLUNG GIS BSKYOD PAS RAB TU G-YO BA YI,, BUM PA 'DI NI RIN GYIS SU NYO 'DOD, CES GSUNGS, DON NI, DE LTAR SEMS DPA' CHEN PO DES RGYAL BLON 'BANGS DANG BCAS PA DE DAG GIS MTHONG BA'I LAM DU DRANG SRONG GI CHA LUGS CAN GYI SKU BSTAN PA DE MTHONG NAS, RGYAL BLON 'BANGS DANG BCAS PA'I SKYE BO DE DAG NGO MTSAR CHE ZHING RAB TU GUS PAR GYUR PAS DE MA THAG LANGS TE THAL MO SBYAR NAS STAN BSHAM PA SOGS BKUR STI DANG, RNYED PAS MCHOD PA SOGS RIM GRO CHER BSKYED DO,, DE NAS SEMS DPA' CHEN PO DES SKYE BO DE DAG DAD CING 'DUN PAR GYUR BAR GZIGS NAS, CHAR SPRIN 'BRUG SGRA ZAB MO'I SGRA 'BYIN PA BZHIN DU GSANG GTOD DE SMRAS PA, ME TOG PHRENG BA MGUL NA BKOD CING MGRIN PA MAN CHAD RAB TU GANG LA BUM PA'I RGYAN SHING LO DANG, ME TOG GI PHRENG BA DANG, MGUL CHINGS DAR GSAR PA'I RGYAN GYIS BRGYAN PA'I BUM PA 'DI SU NYO BAR 'DOD CES DRIS SO,, BUM PA RGYAN GYIS BRGYAN TSUL NI LAG PA LA GDU BU BTAGS PA
, ,BZHIN DU MGUL BA ME TOG GI PHRENG BA DANG, DAR GSAR PA SNA TSOGS KYIS BCINGS SHING, BUM PA'I KHA RGYAN LO MA ME TOG 'BRAS BU LDAN PA'I LDUM BUS BRGYAN PA, RLUNG GIS BSKYOD PA NA SHING GI LO MA DANG? MGUL NAS 'PHYANG BA'I DAR LCE RNAMS RAB TU G-YO BA MDZES SHING YID DU 'ONG BA'O,, DE 'DRA BA'I BUM PA DE SKYE BO DE DAG LA BSTAN NAS BUM PA 'DI SU NYO BAR 'DOD, NYO BAR 'DOD PA YOD NA RIN BYIN CIG DAS 'TSONG NGO ZHES BRJOD DO,, GSUM PA RGYAL BLON 'BANGS DANG BCAS PAS BDAG NYID CHEN PO DE LA SU YIN DRIS PA NI, DE NAS DE LA RGYAL PO DE YANG YA MTSAN DANG NGO MTSAR CHER GYUR TE, RAB TU GUS PAR LTA ZHING THAL MO SBYAR TE SMRAS PA, GZI CHEN NYI MA 'CHAR 'DRA MDZES PA ZLA BA BZHIN, ,KHYOD KYI SKU MDZES THUB PA 'GA' ZHIG LAGS PAR GDA', ,DE BAS 'JIG RTEN KUN GYIS 'TSAL BAR GSUNG BA'I RIGS, ,KHYOD KYI YON TAN MTSAR ZHIG MCHIS PAR BDAG CAG RE, ZHES GSUNGS, DON NI, SEMS DPA' CHEN POS DE LTAR GSUNGS PA NA, SEMS DPA' CHEN PO DE LA RGYAL PO BLON 'BANGS DANG BCAS PA DE DAG YA MTSAN DANG NGO MTSAR CHE BAR GYUR TE RAB TU GUS PAR LTA ZHING THAL MO SBYAR NAS SMRAS PA, BDAG NYID CHEN PO KHYOD SU ZHIG LAGS, SKU'I GZI BYIN LA BLTAS NA NYI MA SHAR BA 'DRA LA, MDZES PA LA BLTAS NA ZLA BA BZHIN DU SNANG, KHYOD KYI SKU SHUN LPAGS DANG RI DVAGS KYI PAGS PA GSOL BA
RAB TU MDZES PA LA BLTAS NA BDAG NYID CHEN PO THUB PA ZHIG 'DIR BYON PA LAGS PAR GDA'O,, DE BAS NA BDAG CAG 'JIG RTEN KUN GYIS BDAG NYID CHEN PO KHYOD JI LTAR YIN 'CHAL BAR GSAL POR GSUNG BA'I RIGS SO;; BDAG NYID CHEN PO KHYOD KYI YON TAN NGO MTSAR RMAD DU BYUNG BA ZHIG MCHIS PAR BDAG CAG RNAMS RE BAS GANG ZHUS PA'I DON DE GSAL BAR GSUNG DU GSOL ZHES ZHUS SO,, BZHI PA BYANG SEMS BDAG NYID CHEN POS CHANG GI NYES DMIGS MDOR BSTAN PA NI, BRGYA BYIN GYIS SMRAS PA, NGA NI SU YIN PHYIS KYANG SHES 'GYUR GYI, ,KHYED CAG 'JIG RTEN GZHAN LA MI 'JIGS SHING, ,TSE 'DI LA YANG BRLAG PAS MI 'JIGS NA, ,BUM PA 'DI NI NGA LAS NYO BAR GYIS; ZHES GSUNGS, DON NI, THAMS CAD KYI MDZA' BO ZHES BYA BA'I RGYAL PO DES DE LTAR ZHUS PA NA, BRGYA BYIN SEMS DPA' CHEN POS DE LA LAN SMRAS PA, KHYED CAG NGA SU YIN ZER BA NGA SU YIN PHYIS SHES PAR 'GYUR GYI, KHYED CAG 'JIG RTEN GZHAN TSE PHYI MA NGAN SONG DU LTUNG BA LA MI 'JIGS SHING, TSE 'DI LA YANG RANG GZHAN GNYIS KA'I DON NYAMS TE RLAG PAR 'GYUR BA LA MI 'JIGS NA BUM PA 'DI NGA LAS NYO BAR GYIS SHIG CES GSUNGS TE; DNGOS SU RGYAL PO DE LA BUM PA DE'I NANG NA CHANG YOD CES MA BRJOD KYANG DON DU CHANG GI NYES DMIGS MDOR BSDUS NAS BRJOD PA STE, CHANG 'THUNGS NA TSE 'DIR YANG NANG DANG GDON DANG PHAN TSUN 'THAB RTZOD SOGS BKRA MI SHIS PA
, ,MTHA' DAG 'BYUNG ZHING, TSE DANG BSOD NAMS DANG YON TAN SOGS LEGS TSOGS MTHA' DAG NYAMS PAR 'GYUR LA, CHANG GIS YID MYOS TE LAS NGAN SNA TSOGS BSAGS PAS PHYI MAR NGAN SONG DU LTUNG STE TSE 'DI PHYI GNYIS KAR PHUNG BAR BYED DO ZHES BSTAN PA YIN NO,, BZHI PA CHANG 'THUNG BA'I NYES DMIGS RGYAS PAR BSTAN PA LA GNYIS LAS, DANG PO CHANG GI NYES DMIGS NYAN PAR BSKUL BA NI, RGYAL POS SMRAS PA, AE MA'O KHYOD KYI TSONG ZONG BTZONG BA 'DI NI SNGON MA BYUNG BA ZHIG GO, 'JIG RTEN NA NI BRJOD PA STE,) CHANG 'THUNGS NA TSE 'DIR YANG NANG DANG GDON SKYON NI BCAB PA YIN, ,TSONG ZONG BTZONG BA DE LTAR GRAGS, ,BRDZUN DU SMRA BAS 'JIGS PA RNAMS, ,KHYOD LTA BU YI TSUL 'DZIN TE, ,DGE BA RNAMS NI BDEN PA DAG ,PHONGS PAR GYUR KYANG MI GTONG NA, ,BUM PA 'DI NI CI YIS GANG, ,KHE SPOGS CHEN PO CI YOD NA, ,KHYOD LTA BU YANG NGED LA TSONG, ,BDAG NYID CHEN PO DE SMOS SHIG ,BRGYA BYIN GYIS SMRAS PA, RGYAL PO CHEN PO GSON CIG, 'DI NI CHU DANG ZHO DANG NGAR BA'AM MU STEGS CHU YIS GANG BA MIN, ,GE SAR DRI ZHIM KHU BA'I CHU DANG MAR GYIS GANG BA'ANG MA YIN LA, ,KU MUD? DANG SPRIN MED ZLA 'OD 'DRA BA'I 'O MAS GANG BA'ANG MIN, ,SDIG PA'I RANG BZHIN CAN GYIS GANG BA'I BUM PA 'DI YI YON TAN NYON, CES GSUNGS, DON NI, DE LTAR SEMS DPA' CHEN POS RGYAL PO BLON 'BANGS DANG BCAS PA LA KHYED CAG TSE 'DI PHYI GNYIS KA PHUNG BA LA
MI 'DZEM NA BUM PA 'DI NYO BAR GYIS ZHES GSUNGS PA DE LA, THAMS CAD KYI MDZA' BO ZHES BYA BA'I RGYAL PO DES LAN SMRAS PA, AE MA'O ZHES SNGON MA THOS PA'I TSIG YA MTSAN CAN DE THOS PA LA NGO MTSAR BA'I TSIG BRJOD NAS SEMS DPA' CHEN PO LA BOS TE, KHYOD KYIS TSONG ZONG BTZONG BA'I TSUL 'DI 'DRA BA NI SNGON MA BYUNG BA ZHIG STE, 'JIG RTEN NA ZONG 'TSONG BA RNAMS NI TSONG ZONG DE NGAN YANG YON TAN SGO DU MA NAS BRJOD LA, DE'I NYES SKYON RNAMS BCABS NAS GZHAN GYIS MI SHES PAR BYED PA YIN TE, ZONG 'TSONG BA THAMS CAD KYI LUGS NI DE LTAR YIN PAR GRAGS SO,, BSLAB PA'I GZHI LNGA BLANGS PA SOGS RDZUN SMRA BAS 'JIGS PA RNAMS NI BDAG NYID CHEN PO KHYOD LTA BU'I SPYOD TSUL 'DZIN TE; DGE BA SKYES BU DAM PA RNAMS NI RDZUN NAM YANG MI GSUNG ZHING PHONGS PAR GYUR KYANG BDEN PA MI GTONG BA YIN NA, BDAG NYID CHEN PO KHYOD KYIS DA LA BDEN PA SMRA DGOS PAS BUM PA 'DI CI YIS GANG BA YIN, BUM PA 'DI BTZONGS PA LA KHE SPOGS CHEN PO CI ZHIG YOD NAS BDAG NYID CHEN PO KHYOD LTA BU YANG BUM PA 'DI NGED LA 'TSONG, BDAG NYID CHEN PO ZHES BOS NAS GANG ZHUS PA'I DON DE DAG DRANG POR GSAL BAR SMOS SHIG CES ZHUS SO,, DE LA BRGYA BYIN SEMS DPA' CHEN POS LAN SMRAS PA, RGYAL PO CHEN PO GSON CIG, BUM PA 'DI NI CHUS GANG BA'ANG MIN, ZHOS GANG BA'ANG MIN, PADMA'I GE SAR DRI ZHIM PADMA'I GE SAR DRI ZHIM
, ,PO'I KHU BA'I CHUS GANG BA'ANG MIN, MAR GYIS GANG BA'ANG MA YIN LA, KU MU DA DANG SPRIN MED PA'I ZLA 'OD 'DRA BA'I 'O MAS GANG BA'ANG MA YIN NO,, GANG GIS GANG BA YIN ZHE NA, SDIG PA'I RANG BZHIN CAN GYI CHANG GIS GANG BA YIN NO,, BUM PA 'DI BTZONGS PA LA KHE SPOGS CI YOD ZER BA BUM PA 'DI'I NANG NA YOD PA'I CHANG 'DI'I KHE SPOGS YON TAN GANG YOD NYON CIG ,NGAS BSHAD DO ZHES GSUNGS SO,, 'DI'I GZHAN RNAMS GO SLA LA; MU STEGS CHU ZHES PA NI SNGON GYI DAM PA MANG POS GANG+G'A'I CHU LA BRJOD PA YIN GSUNG STE, GANG+G'A'I CHU LA MU STEGS CHU ZHES BRJOD PA'I RGYU MTSAN MU STEGS PA RNAMS GANG+G'A'I CHUS LUS BKRUS NA SDIG PA 'DAG GO ZER NAS GANG+G'A'I CHUS LUS BKRU BA LA BRTZON PA CHER BYED PAS, CHU DE LA MU STEGS CHU ZHES BSHAD, CHANG GI SKYON BRJOD RGYU LA 'DIR YON TAN NYON CES GSUNGS PA NI 'JIG RTEN NA MI NGAN PA 'GA' ZHIG GI SPYOD PA LA 'DI 'DRA DE KHO'I YON TAN YIN ZHES BRJOD PA LTAR YANG YIN LA, SNGON DU RGYAL PO DES 'DI LA YON TAN CI YOD DRIS PA NA CHANG 'DI LA YON TAN 'DI PHYI GNYIS KAR PHUNG BAR BYED PA 'DI LTA BU YOD DO ZHES BRJOD PA YIN PAS DON DU CHANG GI NYES DMIGS NYON CIG NGAS BSHAD DO ZHES PA YIN NO,, GNYIS PA CHANG 'THUNG BA'I NYES DMIGS BSHAD PA DNGOS LA GSUM, TSE 'DIR 'BYUNG BA'I NYES DMIGS DANG, PHYI MAR 'BYUNG BA'I NYES DMIGS BSHAD PA, NYES DMIGS RGYA CHER
BSHAD PA DE DAG BSAMS NAS CHANG 'THUNG BAR MI RIGS SO ZHES MDOR BSDUS TE GDAMS PA'O,, DANG PO LA GNYIS, RGYAS PAR BSHAD PA DANG, DON BSDUS TE BSTAN PA'O,, DANG PO RGYAS PAR BSHAD PA LA BCU GCIG LAS, DANG PO CHANG 'THUNGS NA LUS NYAMS SHING DRAN PA NYAMS PAR 'GYUR BAR BSTAN PA NI, GANG ZHIG 'THUNGS NA RA RO SLONG NAS GOMS PA'ANG DBANG MED 'DOR ZHING 'GRO, ,YUL PHYOGS MA 'DRIS PAR YANG 'KHYAM ZHING RDEG 'CHOS DRAN PA NYAMS PAR 'GYUR, ,BZA' DANG MI BZA' DPYAD PA MED PAR DE DANG DE DAG ZAR 'GYUR BA, ,DE DANG DE YIS GANG BA'I BUM PA THA SHAL 'DI NYOS SHIG ,CES GSUNGS, DON NI, BRGYA BYIN SEMS DPA' CHEN POS CHANG GI NYES DMIGS GSUNGS PA NI, CHANG GANG ZHIG 'THUNGS NA RA RO SLONG NAS SPYOD LAM LA RANG DBANG MA 'DUS PAR GOM PA GYA TSOM DU DBANG MED 'DOR ZHING 'GRO LA, 'GRO BA'I YUL YANG NGES GZUNG MED PAR SNGAR MA 'DRIS PA'I YUL PHYOGS SU YANG 'KHYAM ZHING GOM PA BRDEG 'CHOS NAS G-YANG DU LHUNG BA DANG, YAN LAG DANG NYING LAG CHAG BA SOGS NYES SKYON MANG DU 'BYUNG ZHING DRAN PA NYAMS PAR 'GYUR LA, BLO GROS NYAMS PAS GANG BZA' BAR BYA BA DANG, GANG MI BZA' BAR BYA BA'I DPYAD PA MED PAR KHA'I SGOR GANG BYUNG BA'I ZAS DE DANG DE DAG ZA BAR 'GYUR BA SOGS NYES SKYON GYI GZHI DE DANG DE YIS RAB TU GANG BA'I BUM PA THA SHAL 'DI NYOS SHIG CES GDAMS SO,, GNYIS PA CHANG 'THUNGS NA DGE
, ,LEGS NYAMS SHING PHYUGS DANG 'DRA BAR 'GYUR BAR BSTAN PA NI, GANG GIS BDAG DI SEMS LA DBANG MED BLO NYAMS RNAM PAR 'KHYAM, ,PHYUGS DANG 'DRA BAR BLUN ZHING DGRA BOS 'PHYAS KYANG BYAS PAR 'GYUR, ,GANG GIS 'DUN SAR GAR BYED 'GYUR ZHING RANG GI KHA RDA BRDUNG, ,DGE BA MED PA BUM PA'I CHANG 'DI KHYOD KYIS NYO BA'I RIGS, ZHES GSUNGS, DON NI, CHANG GI SKYON GZHAN YANG BSHAD PA, CHANG 'THUNGS NA CHANG DE'I MTHUS RANG GI SEMS LA DBANG MED PAR MYOS NAS BLO GROS NYAMS SHING RNAM PAR 'KHYAM PAR 'GYUR LA, BYA BA DANG BYA BA MA YIN PA'I TSUL LA RMONGS PA PHYUGS DANG 'DRA BAR BLUN ZHING, SGO GSUM GYI SPYOD PA SHIN TU NGAN PA BYED PAS RANG LA NYE BA'I GNYEN RNAMS MYA NGAN SKYE ZHING DGRA BO RNAMS DGA' STE 'PHYAS SMOD BYED PAR 'GYUR RO,, GZHAN YANG CHANG GIS MYOS PAS SKYE BO MANG PO TSOGS PA'I MDUN SAR GAR BYED PAR 'GYUR ZHING; RANG GI KHA RNGA BRDUNGS TE GAR MKHAN RNAMS LUS KYIS GAR BYED PA DANG MNYAM DU KHA NAS BZHAD GANG KYI GTAM SNA TSOGS SMRA BA BZHIN DU CHANG GIS MYOS PA DE YANG NGO TSA MED PAR LUS KYIS GAR BYED PA DANG MNYAM DU KHA NAS CI THOD THOD SMRA BAR BYED DO,, DE LTAR DGE LEGS THAMS CAD NYAMS PAR BYED PA'I BUM PA'I CHANG 'DI KHYED KYIS NYO BA'I RIGS SO ZHES GDAMS SO,, GSUM PA CHANG 'THUNGS NA NGO TSA KHREL YOD NYAMS
PAR 'GYUR BAR BSTAN PA NI, 'THUNGS NA GANG GIS BDAG GI NGO TSA 'OS PA 'DOR, ,GOS DANG BRAL ZHING GCER BUR BYUNG YANG ZHING; RANG GI KHA RDA BRDUNGS TE GAR MKHAN RNAMS LUS KYIS GAR 'GRO, ,BUM PA 'DIR NI BTZONG BAR 'OS PA DE BLUGS SO,, ZHES GSUNGS, DON NI, CHANG GI NYES DMIGS GZHAN YANG BSHAD PA, CHANG 'THUNGS NA CHANG GANG GIS MYOS NAS RANG GI RGYAN DU 'OS PA'I NGO TSA DANG KHREL YOD GNYIS KA 'DOR RO,, NGO TSA 'DOR NYE CHANG GIS MYOS NAS LUS GOS DANG BRAL ZHING, GCER BUR PHYUNG YANG NGO TSA BA DANG MI DGA' BA GANG YANG MED PAR 'GYUR RO,, KHREL YOD 'DOR TE LUS GCER BUR PHYUNG NAS GSANG BA'I GNAS MI SBA BAR GRONG KHYER GYI SKYE BO MANG PO'I LAM DU YID RTON PAR 'GRO BAR BYED DO,, BUM PA 'DIR NI BTZONG BAR 'OS PA NGO TSA KHREL YOD 'DOR BA'I RGYU CHANG DE BLUGS SO,, KHYED CAG RGYAL BLON 'BANGS DANG BCAS PA RNAMS NGO CHA KHREL YOD NYAMS PA LA MI LTA NA BUM PA'I CHANG 'DI NYOS SHIG CES GDAMS SO,, BTZONG BAR 'OS PA ZHES PA NI, SNGAR THAMS CAD KYI MDZA' BO ZHES BYA BA'I RGYAL PO DES BRGYA BYIN SEMS DPA' CHEN PO LA KHYOD KYI PHYAG NA BSNAMS PA'I BUM PA DE'I NANG NA BTZONG BAR 'OS PA GANG YOD CES DRIS PA DE'I LAN DU GSUNGS PA'O,, BZHI PA CHANG 'THUNGS NA KHYI DANG MTSUNGS PAR 'GYUR BAR BSTAN PA NI, GANG 'THUNGS NA NI SKYUGS PA'I ZAS KYIS GOS 'GYUR ZHING, ,KHYI YIS KHA YANG DOGS PA MED PAR LDAG PAR 'GYUR,,
, ,DRAN PA MED PAR LAM PO CHE NA'ANG NYAL 'GYUR BA, ,BTZONG NA BRIN PA DE NI BUM PA 'DIR BLUGS SO, ,ZHES GSUNGS, DON NI, CHANG GI NYES DMIGS GZHAN YANG BSHAD PA, CHANG GANG BAG MED PAR 'THUNGS NA KHONG PA'I NANG NAS ZAS GZHAN DANG BCAS PA SKYUGS PAS LUS GOS PAR 'GYUR ZHING, DRAN PA NYAMS SHING PHYI ROL TU 'KHYAMS NAS SKYUGS PAS LUS GOS BZHIN DU 'GYEL BA NA, KHYIS LUS LA GOS PA'I SKYUGS PA RNAMS BLDAG CING DE'I KHA YANG DOGS PA MED PAR BLDAG PAR 'GYUR, DRAN PA MED PAR SKYE BO KUN RGYU BA'I LAM PO CHE NA'ANG RO LTAR NYAL BAR 'GYUR RO,, CHANG 'THUNGS PAS MYOS TE LAM PO CHER NYAL BAR 'GYUR BAR BSHAD PA 'DI LA BLA MA GONG MA RNAMS 'PHAGS PA LEGS 'ONGS KYI BYUNG BA SBYAR BAR GSUNG, DE NI LEGS 'ONGS KYI BYUNG BA LAS, NGA LA STON PA'O ZER BA RNAMS KYIS MYOS PAR 'GYUR BA THA NA RTZVA'I RTZE MOS KYANG MI BTUNG BLUD PAR MI BYA'O ZHES BKA' STZAL TO,, TSUL 'DI BSAMS NAS STON PA'I RJES SU SLOB PAR 'DOD PA RNAMS KYIS CHANG SROG GI PHYIR YANG MI BTUNG BA LA BSLAB PAR BYA'O,, DE LTAR CHANG 'THUNG BA NI NYES SKYON MANG PO'I RGYU YIN YANG SKYE BO PHAL CHER CHANG 'THUNG 'DOD BAS BTZONGS NA BRIN PA'I CHANG DE NI BUM PA 'DIR BLUGS SO,, DES NA KHYED CAG KHYI DANG MTSUNGS PAR BYED 'DOD NA BUM PA'I CHANG 'DI NYOS SHIG CES GDAMS SO,, LNGA PA CHANG 'THUNGS NA PHAN BDE THAMS CAD RLAG PAR 'GYUR BAR BSTAN PA
NI; GANG ZHIG 'THUNGS NA MYOS TE DBANG MED PAR, ,PHA MA DAG KYANG SHING LA 'CHID BAR BYED, ,NOR GYI BDAG PO DAG KYANG KHYAD DU GSOD, ,PHAN RLAG DE NI BUM PA 'DIR BLUGS SO, ,ZHES GSUNGS, DON NI, CHANG GI NYES DMIGS GZHAN YANG BSHAD PA, CHANG GANG ZHIG 'THUNGS NA MYOS TE RANG DBANG MED PAR RGYUD 'KHRUGS NAS PHA MA DRIN CAN DAG KYANG SHING LA 'CHID BA DANG, KHYIM NAS 'DON PA DANG, TSIG NGAN MANG POS KHYAD DU GSOD BA SOGS SHIN TU YANG BA'I LAS DAG KYANG BYED LA, RANG LA DRIN CHE BA'I NOR GYI BDAG PO DAG KYANG KHYAD DU GSOD PA SOGS PHAN PA DANG BDE BA THAMS CAD RLAG PAR BYED PA'I CHANG DE NI BUM PA 'DIR BLUGS SO,, KHYED CAG PHAN BDE THAMS CAD BRLAG PAR 'DOD NA BUM PA'I CHANG 'DI NYOS SHIG CES GDAMS SO,, DRUG PA CHANG 'THUNGS PAS DME BYUNG BA SOGS PHUNG KROL CHEN POR GYUR PA'I SNGON GYI BYUNG BA BSTAN PA NI, GANG ZHIG 'THUNGS NA MYOS PAS DRAN BRLAG STE, ,BRishnA AAN DHA DAG KYANG DME BYUNG NAS, ,DBYIG CHEN THOGS TE PHAN TSUN THAL MAR PHYUNG, ,MYOS 'GYUR DE NI BUM PA 'DIR BLUGS SO, ,ZHES GSUNGS, DON NI, CHANG GI NYES DMIGS GZHAN YANG BSHAD PA, CHANG 'THUNGS PAS MYOS TE RANG GI PHA MA DANG PHU NU SOGS NYE 'BREL RNAMS KYANG GSOD PA SOGS 'JIG RTEN KUN GYIS SMAD PA'I GNAS SU 'GYUR BA SNGON GYI BYUNG BAS SHES TE, SNGON BRishnA DANG AAN DHA ZHES BYA BA'I SKYES BU GNYIS SHIN TU MDZA' BAR
, ,GNAS PA LA NAM ZHIG CHANG 'THUNGS PA NA MYOS PAS DRAN PA BRLAG STE PHAN TSUN DGRAR BZUNG NAS DBYIG PA CHEN PO THOGS TE PHAN TSUN 'THAB CING NYE 'BREL MANG PO'ANG BSAD PAS DME BYUNG STE PHAN TSUN GNYIS KA NYE 'BREL DANG BCAS PA THAL MAR PHYUNG STE PHUNG BAR BYAS SO ZHES SNGON GYI GTAM RGYUD LAS 'BYUNG NGO,, DE LTAR PHUNG BAR BYED PA'I MYOS 'GYUR DE NI BUM PA 'DIR BLUGS SO,, KHYED CAG DE LTAR PHUNG BAR 'DOD NA BUM PA'I CHANG 'DI NYOS SHIG CES GDAMS SO,, 'DIR LOG 'DREN GYIS SNGON CHANG 'THUNGS TE SPYOD PA NYAMS PA'I GTAM RGYUD KYANG SBYAR BAR BYA'O,, BDUN PA CHAD 'THUNGS NA NOR DANG RIGS NYAMS PAR 'GYUR BAR BSTAN PA NI, GANG LA CHAGS NA DPAL GYI GZHIR 'GYUR RIGS, ,JE MTHO JE MTHOR 'GYUR BA'ANG BRLAG PAR 'GYUR, ,NOR GYI DBYIG LDAN RIGS KYANG PHUNG 'GYUR BA, ,BTZOD? RGYU DE NI BUM PA 'DI NA 'DUG CES GSUNGS, DON NI, CHANG GI NYES DMIGS GZHAN YANG BSHAD PA, CHANG GANG LA CHAGS NA PHUN SUM TSOGS PA'I DPAL GYI GZHIR GYUR PA'I RIGS JE MTHO JE MTHOR 'GYUR BA'ANG RLAG PAR 'GYUR TE, CHANG GIS MYOS PAS CHES RMONGS TE BYA BA DANG BYA BA MA YIN PA MI DRAN PAR RGYAL RIGS DANG, BRAM ZE'I RIGS DANG, RJE RIGS SOGS RANG RANG GI RIGS DANG MTHUN PA'I BYA BA MI BYED PAR RIGS DMAN PA'I BUD MED GZHAN LA BYI BO BYED PA SOGS SPYOD PA NGAN PA BYAS PAS RIGS 'CHOL BAR GYUR TE, RANG RIGS BZANG PO
NYAMS PAR 'GYUR RO,, NOR GYI DBYIG RNAMS KYANG NYAMS PAR 'GYUR TE, CHANG LA NGOMS PA MED PAR SPYOD 'DOD NAS DE'I RIN DU NOR DBYIG 'DZAD PA DANG, CHANG GIS MYOS NAS LONGS SPYOD SRUNG MA THUB PAS CHUNG 'DZA' BAR 'GYUR BA SOGS SGO KUN NAS ZAD PAR 'GYUR RO,, DES NA CHANG 'THUNG BA NI NOR DANG RIGS THAMS CAD NYAMS TE PHUNG BA'I RGYUR 'GYUR BA YIN LA, DE LTAR PHUNG BAR 'GYUR BA'I BTZOD RGYU DE NI BUM PA 'DI NA 'DUG GO, KHYED CAG NOR DANG RIGS RLAG PAR 'GYUR BAR 'DOD NA BUM PA'I CHANG 'DI NYOS SHIG CES GDAMS SO,, BRGYAD PA CHANG 'THUNGS NA BLO GROS NYAMS SHING GTAM DAN GYI GZHIR 'GYUR BAR BSTAN PA NI, GLO BUR DU ZHING 'DUG LA DGOD? CING MA DES SMRA, ,GDON GYIS ZIN PA BZHIN DU MIG NI MCHI MAS GANG, ,SMAD CING BRNYAS PAR 'GYUR BA'I GNAS SU NGES 'GYUR BA, ,BLO NYAMS 'GYUR BA 'DI NI BUM PA 'DI NA YOD, CES GSUNGS, DON NI, CHANG GI SKYON GZHAN YANG BSHAD PA, CHANG 'THUNGS NA DES SEMS MYOS TE GDON GYIS ZIN PA BZHIN DU GLO BUR DU DU ZHING 'DUG LA, DE MA THAG YANG DGOD CING MIG MCHI MAS GANG LA MA NGES MA 'BREL BA'I GTAM SNA TSOGS SMRA STE, SKYE BO KUN GYIS SMAD CING BRNYAS PAR 'GYUR BA'I GNAS SU NGES PAR 'GYUR RO,, BLO GROS NYAMS PAS GDON GYIS ZIN PA LTA BUR 'GYUR BA'I RGYU CHANG DE NI BUM PA 'DI NA YOD DO,, KHYED CAG GDON GYIS ZIN PA LTA BU'I BYA BA BYED 'DOD NA CHANG 'DI NYOS SHIG CES
, ,GDAMS SO,, DGU PA CHANG 'THUNGS NA NGAG 'KHYAL NGES PAR 'BYUNG BAR BSTAN PA NI, RGAS PAR GYUR KYANG GANG GIS SEMS NYAMS SHING, ,BDAG LA PHAN PA'I LAM DU MI 'JUG LA, ,MA BRTAGS MANG DU SMRA BAR NGES 'GYUR BA, ,BTZONG RGYU DE NI BUM PA 'DI NA YOD, CES GSUNGS, DON NI, CHANG GI SKYON GZHAN YANG BSHAD PA, LANG TSO YOL TE RGAS PA NI TSE RANGS PO BYA BA GANG DANG GANG LAS BDE BA DANG SDUG BSNGAL 'BYUNG BA RANG LA NYAMS MYONG YOD PAS RANG LA PHAN MI PHAN SHES DGOS MOD KYANG, CHANG 'THUNGS NA DES SEMS NYAMS SHING MYOS NAS RGAS PAR GYUR KYANG PHAN GNOD LA RMONGS TE RANG LA PHAN PA'I LAM DU MI 'JUG LA, 'DI PHYI GNYIS KAR GNOD PA'I LAM DU ZHUGS TE MA BRTAGS PAR NGAG 'KHYAL MANG DU SMRA BAR NGES PAR 'GYUR RO,, DE LTA BU'I SKYON DANG LDAN PA'I BTZONG RGYU DE NI BUM PA 'DI NA YOD DO,, KHYED CAG RANG LA PHAN PA DOR NAS DGOS MED DU NGAG 'KHYAL SMRA BAR 'DOD NA CHANG 'DI NYOS SHIG CES GDAMS SO,, GZHUNG 'DI DAG GI BTZONG RGYU ZHES PA'I DON NI SNGAR BSHAD ZIN TO,, BCU PA CHANG 'THUNGS PAS LHA'I DPAL LAS NYAMS PA'I SNGON GYI BYUNG BA BSTAN PA NI, GANG GI NYES PAS SNGON GYI LHA RNAMS MYOS, ,LHA YI RGYAL PO'I DPAL NI NYAMS BYAS NAS, ,SKYABS 'DOD PHYIR NI RGYA MTSO'I NANG DU GAB, ,DE YIS GANG BA'I BUM PA 'DI NYOS SHIG ,CES GSUNGS, DON NI, CHANG GI NYES
DMIGS GZHAN YANG BSHAD PA, CHANG 'THUNGS NA DPAL 'BYOR MNGA' THANG THAMS CAD NYAMS PAR 'GYUR BA SNGON GYI LHA'I GTAM RGYUD KYIS SHES TE, SNGON GYI LHA ZHES BYA BA NI LHA MA YIN GYI MING GI RNAM GRANGS SU MNGON BRJOD DAG LAS BSHAD LA, DE'I GTAM RGYUD NI SNGON BSKAL PA CHAGS NAS RING PO MA LON PA'I DUS LHA MA YIN RNAMS RI RAB KYI RTZE NA YOD PA LA, DE DAG GIS CHANG 'THUNGS TE GZHAN LA SKYON BRJOD DANG 'THAB RTZOD SOGS SPYOD PA NGAN PA BYAS PAS LHA RNAMS KYIS BSKRAD DE LHA'I RGYAL PO'I DPAL LAS NYAMS PAR BYAS PA NA, SKYABS 'DOD PA'I PHYIR RGYA MTSO'I NANG DU ZHUGS TE SA'I 'OG TU GAB CES 'BYUNG NGO,, DE LTAR LHA'I DPAL 'BYOR YANG NYAMS PAR BYED PA PHUNG BYED CHANG DE YIS GANG BA'I BUM PA 'DI NYOS SHIG CES GDAMS SO,, BCU GCIG PA CHANG 'THUNGS NA SMYON PA DANG MTSUNGS PAR 'GYUR BAR BSTAN PA NI, MI BDEN PA YANG BDEN PA BZHIN DU NGO MTHONG SMRA, ,MI BYA BA YANG BYA BA BZHIN DU DGA' BZHIN BYED; ;GANG GI LAN GYIS YOD MED PHYIN CI LOG TU SHES, ,DE NI SMOD PA'I LUS BZHIN BUM PA 'DI NA 'DUG CES GSUNGS, DON NI, CHANG GI NYES DMIGS GZHAN YANG BSHAD PA, CHANG 'THUNGS NA SMYO BA BZHIN DU LUS DAG YID GSUM PHYIN CI LOG TU SPYOD LA, DRANG SRONG GI DMOD PA ZUG PA BZHIN DU RANG DBANG MED PAR 'GYUR RO,, CHANG 'THUNGS NA SGO GSUM PHYIN CI LOG TU SPYOD DE, NGAG GI SGO NAS MI BDEN PA YANG BDEN PA BZHIN DU 'DZEM PA MED
, ,PAR NGO MTHON DU SMRA'O,, LUS KYI SGO NAS BYAR MI RUNG BA RNAMS KYANG BYAR RUNG BA BZHIN DU DGA' BZHIN BYED DO,, YID KYI SGO NAS CHANG GIS MYOS PA'I MTHUS RMONGS TE SKYON YOD PA LA SKYON MED PAR SHES, SKYON MED PA LA SKYON YOD PAR PHYIN CI LOG TU SHES SO,, CHANG 'THUNG BA DE NI DRANG SRONG GI DMOD PA ZUG PA'I LUS BZHIN DU MI 'DOD PA MTHA' DAG 'BYUNG BAR 'GYUR RO,, DE LTAR SGO GSUM PHYIN CI LOG TU SPYOD PAR 'GYUR BA'I NYES DMIGS CAN CHANG DE NI BUM PA 'DI NA 'DUG GO, KHYED CAG SMYON PA DANG DMOD PA ZUG PA LTAR DU SGO GSUM PHYIN CI LOG TU SPYOD CING PHUNG BAR 'DOD NA CHANG 'DI NYOS SHIG CES GDAMS SO,, GNYIS PA DON BSDUS TE GDAMS PA LA GNYIS LAS; DANG PO CHANG 'THUNG BA SDIG SDUG GTAM NGAN THAMS CAD 'BYUNG BA'I GZHI YIN PAR BSTAN PA NI, MYOS 'GYUR RIG SNGAGS SDUG BSNGAL RGYUR 'GYUR BA, ,SDIG PA'I MA MO'I BYUR NGAN MNGON SUM BZHIN, ,RTZOD PA'I LAM DANG THA DAD MA YIN PA, ,SNYING GI MUN PA MI BZOD DE NYOS SHIG CES GSUNGS, DON NI, CHANG GI NYES DMIGS RGYAS PAR BSHAD PA DE DAG GI DON BSDU NA, CHANG NI SDIG SDUG GTAM NGAN THAMS CAD 'BYUNG BA'I GZHI YIN TE, CHANG NI SEMS RNAL DU MI GNAS PAR SMYO BAR BYED PA'I RIG SNGAGS KYANG YIN NO,, DE'I PHYIR CHANG LA MYOS 'GYUR ZHES BRJOD DO,, CHANG NI 'DI PHYIR SDUG BSNGAL MA LUS 'BYUNG BA'I RGYU YIN TE, TSE 'DIR SDUG BSNGAL
'BYUNG BA'I RGYUR 'GYUR BA NI SNGAR RGYAS PAR BSHAD ZIN LA, PHYI MA'I SDUG BSNGAL 'BYUNG BA'I RGYUR 'GYUR BA NI 'JIG RTEN PHYI MAR SDUG BSNGAL CI 'BYUNG THAMS CAD SDIG PA'I LAS LAS 'BYUNG LA, CHANG 'THUNG BA NI SDIG PA'I MA MO YIN PAS SO,, CHANG 'THUNG BA NI TSE 'DIR GTAM NGAN DANG MI 'DOD PA THAMS CAD 'BYUNG BA'I RGYU BYUR NGAN MNGON SUM DU 'ONG BA BZHIN NO,, CHANG 'THUNG BA NI RTZOD PA'I LAM DANG THA DAD MA YIN PAR 'KHRUG RTZOD MTHA' DAG 'BYUNG BA'I LAM NYID YIN NO,, SDIG SDUG GTAM NGAN THAMS CAD 'BYUNG YANG DE MI SHES PAR CHANG NYID LA DGA' BA NI SEMS RMONGS PA'I MUN PAS BSGRIBS PA YIN PAS SNYING GI MUN PA MI BZAD PA CHANG DE NYOS SHIG CES GDAMS SO, , GNYIS PA CHANG 'THUNG BA PHUNG KROL KUN GYI GZHI YIN PAR BSTAN PA NI, GANG GIS BLO NI RAB TU NYAMS GYUR NAS, ,PHA MA NYES PA MED PA'ANG GSOD 'GYUR ZHING, ,BDE LA MA CHAGS DKA' THUB CAN YANG GSOD, ,BTZONG BA'I CHE GAS RGYAL LA PHUL BA BZHES, ,MI YI BDAG POS CHANG NI DE 'DRA YANG, ,'JIG RTEN NA NI LHA ZHES RAB TU GRAGS, ,YON TAN LA NI GANG DAG MI DGA' BA, ,DE DAG CHANG 'DI NYO LA 'BAD PAR GYIS, ,ZHES GSUNGS DON NI, CHANG 'THUNG BA NI PHUNG KROL KUN GYI GZHI YIN TE, CHANG GIS MYOS TE LEGS NYES 'BYED PA'I BLO RAB TU NYAMS PAR GYUR NAS MTSAMS MED KYI LAS KYANG BYED DE, RANG GI PHA MA NYES PA MED PA'ANG GSOD PAR
, ,'GYUR ZHING, 'KHOR BA'I BDE LA MA CHAGS PA'I 'PHAGS PA DGRA BCOM PA DKA' THUB CAN YANG GSOD PA SOGS MTSAMS MED KYI LAS GSOG PA'ANG 'BYUNG BAS, DE LTAR DU PHUNG BAR BYED PA'I NYES SKYON CAN CHANG 'DI BTZONG BA'I CHO GAS RGYAL PO KHYOD LA 'BUL GYI, RGYAL PO KHYOD 'DI PHYI GNYIS KAR PHUNG PAR 'DOD NA CHANG PHUL BA 'DI BZHES SHIG, MI'I BDAG PO ZHES RGYAL PO LA BOS NAS, CHANG NI RNAM PA KUN TU PHUNG BAR BYED PA'I NYES SKYON CAN DE 'DRA YIN YANG 'JIG RTEN NA NI LHA ZHES RAB TU GRAGS LA, SKYE BO GANG DAG YON TAN LA MI DGA' ZHING SKYON LA DGA' BA DE DAG CHANG 'DI NYO BA LA 'BAD PAR GYIS SHIG CES CHANG GI NYES SKYON MDOR BSDUS GDAMS SO,, GNYIS PA PHYI MAR 'BYUNG BA'I NYES DMIGS BSHAD PA NI, GANG ZHIG BSTEN NA NGAN PA SPYOD PAR 'GYUR, ,RAB TU 'JIGS PA'I SEMS CAN DMYAL BAR LTUNG, ,DUD 'GRO'I GNAS DANG YI DAGS DBUL 'GYUR BA, ,MTHONG BAR 'DOD PA'ANG DE NI SU ZHIG YOD, ,CHANG DE NYUNG DU 'THUNGS KYANG RNAM PAR SMIN PA NI, ,MI YI GNAS SU SKYES KYANG TSUL KHRIMS LTA BA NYAMS, ,GANG GIS PHYIS KYANG MNAR MED 'BAR BAS BSREGS PAR 'GRO, ,YI DAGS YUL DANG DUD 'GRO DMAN PAR GNAS PAR 'GYUR, ZHES GSUNGS, DON NI, CHANG 'THUNGS PA LAS TSE PHYI MAR RNAM SMIN DANG RGYU MTHUN GYI 'BRAS BU YID DU MI 'ONG BA BZOD
PAR DKA' BA 'BYUNG STE, CHANG GANG ZHIG BSTEN NA TSE 'DIR NGAN SONG DU SKYE BA'I RGYU SDIG PA TSABS CHEN PO SPYOD PAR 'GYUR LA, SDIG PA'I LAS DE'I 'BRAS BU TSE PHYI MAR MYONG BAR 'GYUR BA LA GNYIS LAS, RNAM SMIN GYI 'BRAS BU MYONG TSUL NI CHANG 'THUNGS BA LAS TSE PHYI MAR RAB TU 'JIGS PA'I SEMS CAN DMYAL BAR LTUNG, DUD 'GRO'I GNAS SU LTUNG, DBUL ZHING PHONGS PA'I YI DVAGS KYI GNAS SU LTUNG BAR 'GYUR RO,, NGAN SONG GSUM GYI GNAS DE NA SDUG BSNGAL DRAG PA, RTZUB PA, YID DU MI 'ONG BA DPE BYA BAR DKA' BA YOD PAS DER SKYE BA LTA ZHOG, 'JIGS SHING YA NGA BA'I GNAS DE DAG MTHONG BAR 'DOD PA'ANG SU ZHIG YOD, RANG LA PHAN PAR 'DOD PA'I BLO GROS CAN RNAMS KYIS NI NGAN SONG GSUM DU MI LTUNG BA LA SKYES BU'I RTZAL CI YOD KYIS BSGRIM DGOS LA, DE 'ONG BA LA MYOS 'GYUR SPONG DGOS SO,, CHANG 'THUNG BA'I RGYU MTHUN GYI 'BRAS BU NI, CHANG NYUNG DU ZHIG 'THUNGS KYANG RNAM PAR SMIN PA'I 'BRAS BU NGAN SONG DU SKYES NAS SDUG BSNGAL RGYUN RING POR MYONG BAR 'GYUR LA, BRGYA LA DE NAS THAR TE MI'I GNAS SU SKYES KYANG BYED PA RGYU MTHUN DANG MYONG BA RGYU MTHUN GYI 'BRAS BUS CHANG 'THUNG BA LA DGA' BAR 'GYUR, DES SEMS 'KHRUL BAR 'GYUR, NOR GYIS DBUL BAR 'GYUR, SKYE BO KUN GYIS SMAD PA'I GNAS SU 'GYUR, BZHIN MI SDUG PAR 'GYUR, BKRES SHING SKOM PAS GDUNG BAR 'GYUR, SEMS MI BRTAN PAR 'GYUR, DRAN PA
, ,NYAMS PAR 'GYUR, GNYEN BSHES RNAMS KYIS KYANG SPONG BAR 'GYUR, SDOM PA GANG BLANGS PA RNAMS MTHAR MI PHYIN PAR 'GYUR BA SOGS NYES SKYON MTHA' YAS PA 'BYUNG STE, DE LTAR MIR SKYES PA'I TSE NA'ANG BYED PA RGYU MTHUN DANG MYONG BA RGYU MTHUN GYIS TSUL KHRIMS NYAMS PA DANG, LTA BA NYAMS PA DANG, CHO GA NYAMS PA DANG, SPYOD PA NYAMS PAR BYAS PAS PHYIS KYANG MNAR MED DU SKYES NAS ME LCE 'BAR BAS SREGS PAR 'GYUR, YI DVAGS KYI YUL DU SKYES NAS LO BRGYAR BZA' BA DANG BTUNG BA'I MING TZAM YANG MI THOS PAR BKRES SHING SKOM PAS GDUNG BAR 'GYUR, DUD 'GRO DMAN PA'I GNAS SU SKYES TE GLEN ZHING GTI MUG PA DANG, PHAN TSUN GCIG LA GCIG ZA BA SOGS SDUG BSNGAL BRJOD LAS 'DAS PA MYONG BAR 'GYUR RO,, GSUM PA NYES DMIGS RGYA CHER BSHAD PA DE DAG BSAMS NAS CHANG 'THUNG BAR MI RIGS SO ZHES MDOR BSDUS TE GDAMS PA NI, TSUL KHRIMS NYAMS PAR 'GYUR ZHING GTAM NGAN MNGON DU 'BYUNG, ,NGO TSA MED CING BLO GROS DRI MA CAN DU 'GYUR, ,GANG ZHIG 'THUNGS NA YON TAN DE DANG DE DAG NYAMS, ,DE BAS RGYAL PO KHYED KYIS CHANG 'THUNG GA LA RIGS, ZHES GSUNGS, DON NI, BRGYA BYIN SEMS DPA' CHEN POS THAMS CAD KYI MDZA' BO ZHES BYA BA'I RGYAL PO BLON 'BANGS DANG BCAS PA LA THUGS BRTZE BAS CHANG 'THUNG BA'I 'DI PHYI'I NYES DMIGS RGYA CHER BSHAD NAS, MDOR BSDUS TE
GDAMS PA NI, CHANG GANG ZHIG 'THUNGS NA YON TAN THAMS CAD KYI RTZA BA TSUL KHRIMS NYAMS PAR 'GYUR ZHING, SKYE BO KUN GYIS GTAM NGAN BRJOD PA MNGON SUM DU 'BYUNG LA, NGO TSA MED CING KHREL MED PA DANG, LEGS NYES DPYOD PA'I BLO GROS NYAMS TE SEMS DRI MA CAN DU 'GYUR, RGYAL BA SRAS BCAS KYIS BSNGAGS PA'I YON TAN DE DANG DE DAG THAMS CAD NYAMS PAR 'GYUR, MDOR NA LEGS TSOGS THAMS CAD NYAMS SHING TSE 'DI PHYI GNYIS KA LA NYES DMIGS RGYA CHER 'BYUNG BA DE BAS NA RGYAL PO KHYOD KYIS DA PHYIN CHAD CHANG 'THUNG BA GA LA RIGS ZHES GDAMS SO,, LNGA PA RGYAL BLON 'BANGS DANG BCAS PA DAD NAS BKA' BZHIN DU BSGRUBS PA LA GNYIS LAS, DANG PO SEMS DPA' CHEN POS CHOS BSTAN PA DE LA YID CHES RNYED NAS RGYAL POS MCHOD PA PHUL BA NI, DE NAS RGYAL PO DE SNYING LA BAB PA'I TSIG RNAMS KYIS CHANG 'THUNGS PA'I NYES PA KHONG DU CHUD PAR BYAS PA DANG, CHANG 'THUNG BA LA CHAGS SHING ZHEN PA MED PAR GYUR NAS, BRGYA BYIN LA 'DI SKAD CES SMRAS SO,, BYAMS PA'I PHA 'AM 'DUL BAS MNYES BYAS BLA MA BZHIN, ,TSUL DANG TSUL MIN MKHAS PA'I THUB PAS SMRAS PA BZHIN, ,KHYED KYIS BDAG LA PHAN PHYIR LEGS PAR GDAMS PA DE, ,SPYOD PA NYAMS SU BLANGS TE TSUL BZHIN MNYES PAR BGYI'O, ,LEGS PAR SMRAS PA'I LAN DU MCHOD PA 'DI BDAG LAS KHYOD KYIS BZHES PA'I RIGS SO,, YUL GRUB BZANG PO LNGA YANG KHYOD LA
, ,'BUL, ,BRAN MO BRGYA DANG BA BZHON LDA BRGYA 'BUL, ,RTA MCHOG SBYAR BA'I SHING RTA 'DI BCU BZHES, ,BDAG GI BLA MA PHAN PA STON PAR 'GYUR, GZHAN YANG BDAG GIS GANG DANG GANG BGYI BA 'DIR SPRING ZHING SLAN CHAD KYANG BDAG LA SPYAN RAS KYIS BTZA' BAR GSOL, ZHES GSUNGS, DON NI, SEMS DPA' CHEN POS RGYAL BLON 'BANGS DANG BCAS PA DE RNAMS SNYING LA 'BAB PA'I TSIG RNAMS KYIS CHANG 'THUNG BA'I NYES PA KHONG DU CHUD PAR BYAS PA NA, CHANG 'THUNG BA LA CHAGS ZHEN MED PAR GYUR NAS 'DI SKAD CES GSOL TO,, YANG NA DE LTAR LHA DBANG SEMS DPA' CHEN POS CHANG 'THUNG BA'I NYES DMIGS RGYAS PAR BSHAD PA DE DAG THAMS CAD KYI MDZA' BO ZHES BYA BA'I RGYAL PO DE'I SNYING LA 'BAB PAR GYUR NAS SEMS DPA' CHEN PO'I TSIG RNAMS KYIS CHANG 'THUNG BA'I NYES PA KHONG DU CHUD PA NA, RGYAL PO DE CHANG 'THUNG BA LA CHAGS SHING ZHEN PA MED PAR GYUR NAS BRGYA BYIN SEMS DPA' CHEN PO LA 'DI SKAD CES SMRAS SO,, SEMS DPA' CHEN PO KHYOD NI BDAG MI DGE PA'I BSHES GNYEN GYI DBANG DU SONG STE SGO GSUM NYES PAR SPYOD PA DANG, DE'I DBANG GIS 'DI PHYIR PHUNG BAR 'GYUR PA DE THUGS KYIS MA BZOD NAS BDAG RJES SU GZUNG BA'I PHYIR 'DIR BYON PAS BYAMS PA'I PHA LTA BU YIN LA, ZANG ZING LA MI GZIGS PAR 'DUL BAS MNYES PAR MDZAD PA'I BLA MA DANG, TSUL DANG TSUL MA YIN PA LA MKHAS PA'I THUB PA'ANG YIN NO,, DE LTAR CHOS BSTAN PA'I
BKA' DRIN DRAN NAS DGE BA'I BSHES GNYEN 'DI NI BDAG GI CHOS KYI LUS BSKYED PA'I PHA'ANG YIN LA, SGO GSUM GYI NYES SPYOD 'DUL BAS BLA MA'ANG YIN, BLANG DOR GSAL BAR STON PAS SANGS RGYAS KYANG YIN ZHES DAD GUS BCOS MIN RNYED PA'I TSIG GO, BDAG NYID CHEN PO KHYOD KYIS JI LTAR SMRAS PA BZHIN DU BSGRUB PAR BGYI'O,, BDAG NYID CHEN PO KHYOD KYIS BDAG LA LEGS PAR GDAMS PA DE DAG NI BDAG LA PHAN PA'I PHYIR GSUNGS PA KHO NA LAGS PAS, JI LTAR GSUNGS PA DE LTAR SPYOD PAS NYAMS SU BLANGS TE TSUL BZHIN DU SGRUB PAS MNYES PAR BGYI'O,, BDAG NYID CHEN PO KHYOD KYIS CHOS LEGS PAR SMRAS PA'I LAN DU MCHOD PA 'BUL BA 'DI DAG THUGS BRTZE BA'I SLAD DU KHYOD KYIS BZHES SU GSOL, ZANG ZING GI MCHOD PA GANG 'BUL BA NI YUL GRU BZANG PO LNGA DANG, BRAN MO BRGYA DANG, BA BZHON LNGA BRGYA DANG, RTA MCHOG GIS DRANGS PA'I SHING RTA BCU RNAMS 'BUL BAS BZHES SU GSOL, DA PHYIN CHAD BDAG NYID CHEN PO KHYOD NI BDAG GI BLA MA LAGS PAS, BDAG GIS MCHOD PA PHUL BA 'DI DAG BZHES NA BDAG GI TSOGS RDZOGS PAR 'GYUR LA, BDAG LA PHAN PA STON PAR BYED PA NI BDAG NYID CHEN PO KHYOD LAS GZHAN DU MED PAS BKA' BZHIN DU SGRUB PA'I MCHOD PAS MNYES PAR BGYI'O,, JI SRID BYANG CHUB MA THOB BAR DU BDAG LA SPYAN RAS KYIS GZIGS NAS BDAG GIS GANG DANG GANG BGYI DGOS PA
, ,RNAMS 'DI DANG 'DI LTAR GYIS ZHES SPRING ZHING BSTAN DU GSOL, SLAN CHAD KYANG BDAG RJES SU GZUNG PA'I PHYIR 'DIR BYON NAS SPYAN RAS KYIS BTZA' BAR MDZAD DU GSOL ZHES ZHUS SO,, GNYIS PA SEMS DPA' CHEN POS RGYAL BLON 'BANGS DANG BCAS PA LA SLAR YANG GDAMS PA NI, BRGYA BYIN GYIS SMRAS PA, YUL GRU MCHOG LA SOGS PA'ANG NGA MI 'DOD, ,LHA DBANG NGA YIN RGYAL POS SHES PAR BYOS, ,PHAN PAR SMRA LA MCHOD PA BYA BA NI, ,BSGO BA'I TSIG BZHIN NYAMS SU LEN PA YIN, ,GRAGS DANG DPAL GYI LAM NI 'DI YIN TE, ,TSE RABS GZHAN LA BDE BA DE YANG 'THOB, ,DE BAS CHANG LA CHAGS PA RAB SPANGS LA, ,CHOS LA GNAS PAS NGA YI YUL LA BSTEN, DE SKAD CES SMRAS NAS, BRGYA BYIN DE NYID DU MI SNANG BAR GYUR TO,, RGYAL PO DE YANG BLON PO DANG 'BANGS SU BCAS PA CHANG MI 'THUNG BAR GYUR TO,, ZHES GSUNGS, DON NI, DE LTAR THAMS CAD KYI MDZA' BO ZHES BYA BA'I RGYAL PO DES BRGYA BYIN SEMS DPA' CHEN PO LA CHOS BSTAN PA'I YON DU YUL GRU BZANG PO LNGA LA SOGS PA ZANG ZING GI DNGOS PO TSAD MED PA PHUL BA DE LA BRGYA BYIN SEMS DPA' CHEN POS SMRAS PA RGYAL PO KHYOD CHOS BSTAN PA'I BKA' DRIN DRAN NAS ZANG ZING GI DNGOS PO PHUL PA DE LTAR KHYOD RANG TSOGS RDZOGS PA'I THABS SU 'GYUR MOD, YUL GRU MCHOG LA SOGS PA NGA MI 'DOD DO,, SNGAR RGYAL PO KHYOD KYIS BDAG NYID CHEN
PO KHYOD SU YIN BSHAD DU GSOL ZER BA DE'I LAN NGA NI LHA'I DBANG PO BRGYA BYIN YIN PAR RGYAL PO KHYOD KYIS SHES PAR BYOS SHIG, NGAS KHYOD LA 'DI LTAR PHAN PA'I PHYIR CHOS SMRAS PA DE LA MCHOD PA BYA BAR 'DOD NA NGAS GANG BSGO BA'I TSIG GANG DANG GANG SMRAS PA DE DANG DE BZHIN DU NYAMS SU LONGS SHIG, DE LTAR GANG BSTAN PA'I CHOS DE DAG NYAMS SU BLANGS NA TSE 'DI DANG PHYI MA GNYIS KA LA PHAN PA DANG BDE BA CHEN PO 'THOB PAR 'GYUR TE, TSE 'DIR CHANG 'THUNG BA SPANGS TE DRAN SHES BAG YOD BRTAN POS TSUL KHRIMS BSRUNGS NA SNYAN PA'I GRAGS PA DANG 'KHOR DANG LONGS SPYOD PHUN SUM TSOGS PA'I DPAL 'THOB CING, THOB PA DE YANG MI NYAMS PAR RGYAS PAR 'GYUR RO,, DES NA TSE 'DIR GRAGS PA DANG DPAL 'BYUNG BA'I LAM NI TSUL KHRIMS BSRUNG BA 'DI YIN NO,, TSE RABS GZHAN LA'ANG PHAN PA DANG BDE BA THAMS CAD TSUL KHRIMS LA BRTEN NAS 'THOB STE, TSUL KHRIMS RNAM PAR DAG PA BSRUNGS PA LAS PHYI MAR BDE 'GRO'I RTEN 'THOB CING, RTEN DE LA PHUN SUM TSOGS PA THAMS CAD 'BYUNG BAR 'GYUR RO,, RGYU MTSAN DE BAS NA CHANG LA CHAGS PA RAB TU SPONGS LA TSUL KHRIMS RNAM PAR DAG PA'I CHOS LA GNAS PA DANG, DE LA GNAS NAS NGA'I SPYOD YUL LA BSTEN CIG, SEMS DPA' CHEN PO'I SPYOD YUL NI THEG PA CHEN PO'I LAM 'BRAS BU DANG BCAS PA YIN PAS, TSUL KHRIMS RNAM PAR DAG PA LA GNAS NAS THEG PA CHEN PO'I LAM LA RIM GYIS BSLABS TE SANGS RGYAS KYI
, ,GO 'PHANG THOB PAR GYIS SHIG CES LAM GYI LUS YONGS SU RDZOGS PA LA 'KHRID PAR MDZAD DO,, DE SKAD CES SMRAS NAS BRGYA BYIN SEMS DPA' CHEN PO DE NYID DU MI SNANG BAR GYUR TO,, THAMS CAD KYI MDZA' BO ZHES BYA BA'I RGYAL PO DE YANG BLON PO DANG 'BANGS SU BCAS PA SEMS DPA' CHEN PO'I BKA' BZHIN DU CHANG MI 'THUNG BAR GYUR TO,, GSUM PA DON BSDUS TE GDAMS PA NI, DE LTAR NA CHANG 'THUNG BA NI NYES PA DU MA 'BYUNG ZHING SHIN TU MA RUNGS PAR 'GYUR PA'I PHYIR DGE BA RNAMS NI GZHAN DAG KYANG 'DI LAS ZLOG PAR BYED NA BDAG NYID LTA SMOS KYANG CI DGOS ZHES GSUNGS, DON NI, RTOGS BRJOD 'DIR BRGYA BYIN SEMS DPA' CHEN POS RGYA CHER BSHAD PA DE LTAR CHANG 'THUNG BA NI TSE 'DIR NYES PA DU MA 'BYUNG ZHING, TSE PHYI MAR NGAN SONG DU LTUNG BAS SHIN TU MA RUNG BAR 'GYUR BA'I PHYIR DGE BA SKYES BU DAM PA RNAMS NI GDUL BYA GZHAN DAG KYANG MYOS 'GYUR 'THUNG BA 'DI LAS ZLOG PAR BYED NA, BDAG NYID MI 'THUNG BA LTA SMOS KYANG CI DGOS, DES NA STON PA THUGS RJE CAN DES SDON SLOB PA LAM GYI GNAS SKABS SU JI LTAR MDZAD PA DE RJES SU DRAN TE CHANG SROG GI PHYIR YANG MI BTUNG ZHING, DES MTSON NAS MYOS 'GYUR GYI RIGS MTHA' DAG SPANGS TE TSUL KHRIMS BSRUNG PA LA SKYES BU'I RTZAL CI YOD KYIS 'BAD PAR BYA'O,, 'DIR BRJOD PA, THUB DBANG RDO RJE 'CHANG DNGOS YONGS 'DZIN RJE'I, ,LEGS BSHAD YAN LAG BRGYAD LDAN 'O MTSO LAS, ,CHU THIG TZAM ZHIG 'DUN LDAN 'GA'
ZHIG LA, ,PHAN PA'ANG SRID SNYAM SHOG BYANG NGOS LA BKOD, ,'DI BRIS DGE BAS THOG MA MED PA NAS, ,DRIN GYIS LEGS BSKYANGS YID GCUGS LUS CAN KUN, ,TSE RABS PHRENG BAR SDIG PA'I GROGS NGAN GYI, ,DBANG DU SKAD CIG TZAM YANG MI 'GRO BAR, ,THEG MCHOG LAM STON MTSAN LDAN BSHES GNYEN GYIS, ,DGYES BZHIN RJES GZUNG RGYAL SRAS SPYOD PA YI, ,MTHAR SON NYAM THAG MA RNAMS 'KHOR MTSO LAS, ,'DREN PA'I DED DPON MCHOG TU BDAG GYUR CIG (,CES BDAG CAG GI STON PA SNGON BYANG CHUB SEMS DPA' LHA'I DBANG PO BRGYA BYIN BUM PA CAN DU 'KHRUNGS PA'I RTOGS BRJOD KYI 'GREL PA LEGS BSHAD SGRON ME ZHES BYA BA 'DI NI, LHA BCAS 'GRO BA'I BSOD NAMS KYI ZHING MCHOG DAM CHOS KUN SDUD GLING GI D'A BLA MA CHING JO RIG THU DAR HAN BLO BZANG TSUL KHRIMS SOGS BLA BRANG GI LAS TSAN PA RNAMS DANG, HAL HA NAS MANG THOS NOR BUS RGYUD PHYUG PA NOM CHI GU SHRI NGAG DBANG RGYA MTSO SOGS NAS BSKUL NGOR, DMIGS PA MED PA'I THUGS RJE CHEN PO DANG LDAN PA THUB DBANG RDO RJE 'CHANG ` YONGS 'DZIN PAndI TA CHEN PO YE SHES RGYAL MTSAN DPAL BZANG PO'I ZHABS DRUNG NAS RAB BYUNG BCU GSUM PA'I LCAGS PHAG LO RJE NYID KYI GDAN SA SGRUB SDE TSE MCHOG BKRA SHIS BSAM GTAN GLING DU, SKYES RABS 'GREL CHEN GYI LJAGS BSHAD STZAL BA LAS CHA SHAS TZAM THOS SHING; SNGA PHYIR ZAB RGYAS CHOS KYI BGO SKAL JI SNYED THOB PA'I BKA' DRIN DANG BYIN BRLABS KYIS 'TSO BA, ` ZHVA SER COD PAN 'DZIN PA DGA' LDAN BSTAN PA'I GSAL BYED LCANG LUNG AARYA PAndI TA NGAG GI DBANG PHYUG BLO BZANG BSTAN PA'I RGYAL MTSAN DPAL BZANG POS RNAM 'PHYANG ZHES)
, (,PAS? PHO KHYI LO'I RGYAL ZLA PA'I RDZOGS PA GSUM PA'I TSES DGE BAR RANG GI BSTI GNAS BKRA SHIS BSAM GTAN PHO BRANG GI GAR 'DUG BSHAG CHUNG DU SUG LAS SU BGYIS PA 'DIS KYANG BSTAN PA RIN PO CHE DAR ZHING 'GRO BA'I BDE SKYID 'PHEL BA'I RGYUD GYUR CIG, ,) ` 'JAM MGON BLA MA'I BSTAN PA'I ZHABS 'DEGS SU, ,DMIGS NAS DGE BSHES BLO BZANG BSHES GNYEN NAS, ,CHOS SBYIN 'DZAD MED PAR GYI YON SBYAR TE, ,BSGRUBS PA'I DGE TSOGS THUB BSTAN RGYAS PHYIR BSNGO, ,
[BLANK PAGE]