, ,BZANG PO SPYOD PA'I SMON TSIG LA 'BRU SMON PA'I SMON LAM BTAB PA BZHUG,
, ,NA MO GU RU, ,SMAD BYUNG SNYING RJES 'GRO KUN NAS YANG MI GTONG GZHAN PHAN 'PHRIN LAS 'OD DKAR GYIS, ,RNAM DAG LAM BZANG GSAL MDZAD SGRIB BRAL MKHYEN PA'I CHA SHAS KUN RDZOGS PA, ,SMRA BA'I ZLA BA THUB DBANG SRAS DANG BCAS LA MCHOG TU DAD PAS PHYAG 'TSAL TE, ,SRAS BCAS RGYAL BA'I MDZAD PA'I CHU KLUNG GCIG BSDUS KUN BZANG SMON PA'I RGYA MTSOR 'JUG ,'DIR RGYAL BA'I SRAS KYI SMON LAM CHEN PO 'BUM PHRAG BCU LA SOGS PA TSAD MED PA'I SMON LAM GYI DON THAMS CAD YONGS SU 'DUS PA SMON LAM GYI RGYAL PO BZANG PO SPYOD PA'I SMON LAM GYI TSIG GI 'BRU GNYER ZHING DON GO SLA BAR BYAS NAS 'DON BDE
, ,BAR RANG GI NYAMS SU BSTAN PAR BYED RGYUR BKOD PA LA, GNAS KHANG BYI DOR BYAS SHING SKU GSUNG THUGS KYI RTEN BKRAM, DE NI SPYAN SNGAR SNGAR MCHOD PA G-YO MED PA BKOD MDZES SU BSHAMS, SKYABS 'GRO GNAD DU 'GRO NGAS BYAS TE DNGOS GZHI TSOGS ZHING GSAL 'DEBS PA'O, MCHOG BDEN RGYAL BA SRAS BCAS (NAS) SPYOD GYUR CIG (,'DI BAR GYIS SA GZHI YO BYAD SOGS BYIN GYIS BRLAB STE TSOGS ZHING SPYAN 'DREN PA GANG BDE BYAS LA,) JI SNYED SU DAG PHYOGS BCU'I 'JIG RTEN GYI KHAMS NA DUS GSUM DU GSHEGS PA MI YI SENGGE SANGS RGYAS BCOM LDAN 'DAS SRAS DANG BCAS PA KUN BDAG GI MA LUS PAR DE
DAG THAMS CAD LA LUS DANG NGAG DANG YID DANG BCAS PAS PHYAG 'TSAL LO, ,DE DAG GI BZANG PO SPYOD PA'I YON TAN LA DAD PA'I STOBS BSKYED PA'I SMON LAM GYI STOBS DAG GIS RGYAL BA THAMS CAD YID KYI YUL DU MNGON SUM DU DMIGS TE ZHING GI RDUL SNYED DU SPRUL PA'I LUS KYI RAB TU BTUD PA YIS RGYAL BA KUN LA RAB TU PHYAG 'TSAL LO, ,RDUL GCIG STENG NA'ANG RDUL SNYED KYI SANGS RGYAS RNAMS SANGS RGYAS KYI SRAS BYANG CHUB SEMS DPA'I 'KHOR GYI DBUS NA BZHUGS PA DAG DANG, DE LTAR CHOS KYI DBYINGS KYI KHAMS RNAMS MA LUS PAR THAMS CAD RGYAL BA DAG GI SKU DANG ZHING GI BKOD PAS GANG BAR BSAM GYIS MI KHYAB PA'I YON TAN LA MCHOG TU DAD PAR BGYI'O, ,DE DAG GI YON TAN GYI BSNGAGS PA MI ZAD PA RGYA MTSO LTA BU RNAMS DBYANGS KYI YAN LAG RGYA MTSO'I SGRA KUN GYIS RGYAL BA SRAS DANG BCAS PA KUN GYI YON TAN RAB TU BRJOD CING BDE BAR GSHEGS PA THAMS CAD BDAG GIS BSTOD PAR BGYI'O, ,ME TOG DAM PA DANG 'PHRENG BA DAM PA DANG SIL SNYAN RNAMS DANG BYUGS PA DANG GDUGS RNAMS KYI MCHOG DANG MAR ME MCHOG DANG BDUG SPOS DAM PA YIS RGYAL BA DE DAG LA NI MCHOD PAR BGYI ZHING, NA BZA' DAM
, ,PA RNAMS DANG DRI RNAMS KYI MCHOG RNAMS DANG PHYE MA PHUR MA DKYIL 'KHOR BRIS PA'I TSON PHYE SPEL BA'I RIM PA RGYA DPANGS RI RAB DANG MNYAM PA DANG BKOD PA SNA TSOGS PAS KHYAD PAR DU 'PHAGS PA MCHOG KUN GYIS RGYAL BA DE DAG LA NI MCHOD PAR BGYI'O, ,MCHOD PA GANG DAG BYANG CHUB SEMS DPA' BDAG NYID CHEN PO RNAMS KYI BLA NA MED PA'I YO BYED KYI KHYAD PAR BZANG DGU SPRUL PA LAS BSAM PA TZAM GYIS GANG ZHIG NYE BAR MKHO BA'I YO BYAD DANG, DAM PA'I CHOS KYI SGRA DANG DBYANGS MTHA' YAS PA SA SANGS RGYAS KYI ZHING RGYAS PAR 'GENG PA'I RGYA CHE BA DE DAG RGYAL BA THAMS CAD LA MOS PAS STOBS CING BZANG PO SPYOD PA'I YON TAN LA DAD PA'I STOBS DAG GIS RGYAL BA KUN LA PHYAG 'TSAL ZHING MCHOD PAR BGYI'O, ,NYON MONGS PA DOD CHAGS DANG ZHE SDANG DANG GTI MUG GSUM GYI DBANG GI LUS DANG NGAG DANG DE BZHIN YID KYI SGO NAS KYANG BSAGS PAS SDIG PA MI DGE PA BDAG GIS BGYIS PA CI MCHIS PA DE DAG THAMS CAD STOBS BZHI TSANG BA'I SGO NAS BDAG GIS SO SOR BSHAGS SO, ,PHYOGS BCU'I RGYAL BA KUN DANG SANGS RGYAS SRAS KYI SRAS BYANG CHUB SEMS DPA' DANG RANG RGYAL RNAMS DANG SLOB
PA DANG MI SLOB PA'I NYAN THOS KYI DGE 'DUN DANG, 'GRO BA KUN GYI BSOD NAMS KYI PHUNG PO GANG MCHIS PA LA'ANG DE DAG KUN GYI RJES SU YI RANGS NGO, ,GANG SU 'JIG RTEN GYI KHAMS RNAMS NA PHYOGS BCU'I 'JIG RTEN GYI SGRON ME SANGS RGYAS BCOM LDAN 'DAS BYANG CHUB RNAM PAR SANGS RGYAS TE MA CHAGS SHING THOGS PA MED PA'I MKHYEN PA BRNYES PA'I MGON PO DE DAG LA BDAG GIS LUS DE SNYED DU SPRUL NAS THAMS CAD LA CHOS KYI 'KHOR LO BSKOR BAR BSKUL LO, ,MYA NGAN LAS 'DAS PA'I TSUL GANG ZHIG STON PAR BZHED PA'I DE DAG RNAMS LA 'GRO BA KUN LA PHAN ZHING BDE BA'I PHYIR DU BSKAL PA ZHING GI RDUL SNYED KYI GRANGS DANG MNYAM PAR BZHUGS PAR YANG DAG GIS THAL MO RAB TU SBYAR NAS GSOL BAR BGYI'O, ,PHYAG TSAL BA DANG MCHOD CING BSHAGS PA DANG RJES SU YI RANG BA DANG CHOS KYI 'KHOR LO BSKOR BAR BSKUL ZHING MYA NGAN LAS MI 'DA' BAR GSOL BA BTAB PAS MTSON DUS GSUM GYI DGE BA'I RTZA BA CUNG ZAD BDAG GIS CI BSAGS PA THAMS CAD BLA NA MED PA YANG DAG PAR RDZOGS PA'I BYANG CHUB CHEN POR BSNGO BAR BGYI'O, ,BDAG GIS DUS GSUM DU BSAGS PA'I DGE BA'I RTZA BA 'DI DAG 'DAS PA'I SANGS
, ,RGYAS RNAMS DANG DA LTAR PHYOGS BCU'I 'JIG RTEN GYI KHAMS DAG NA GANG BZHUGS PA RNAMS LA PHUL BAS MNYES SHING DE LTAR RTAG TU MCHOD PAR GYUR CIG ,GANG YANG MA BYON PA NA 'TSANG RGYA 'GYUR RNAMS LA GUL BAS RAB TU MYUR BAR 'TSANG RGYA BA'I MTHUN RKYEN MA TSANG BA MED PAS BSAM PA YONGS SU RDZOGS NAS BYANG CHUB RIM PAR SANGS RGYAS KYI SAR 'BYOR PAR GYUR CIG ,PHYOGS BCU GA LE BA'I ZHING RNAMS JI SNYED PA LA BTANG BAS DE DAG GI ,RDO DANG GSEG MA SOGS SKYON RGYA CHE ZHING YONGS SU DAG PAR GYUR NAS MTHA' YAS PA'I 'BYOR BA DAD LDAN PA BDE BA CAN LTAR GYUR TE, ,DE'I DBUS SU BYANG CHUB KYI SHING GI DBANG PO'I DRUNG DU BDE BZHIN GSHEGS PA RGYAL BA RNAMS DANG SANGS RGYAS KYI SRAS KYIS RAB TU GANG BAR SHOG CIG ,PHYOGS BCU'I SEMS CAN GANG RNAMS JI SNYID PA LA BTANG BAS DE DAG RTAG TU NAD MED PA DANG SDUG BSNGAL RGYU DANG BCAS PA BRAL NAS BDE BA PHUN SUM TSOGS PAR GYUR TE, ,'GRO BA DE DAG KUN GYI CHOS MTHUN GYI DON RNAMS NI SGRUB PA'I MTHUN RKYEN YID BZHIN DU 'GRUB PAR GYUR CIG ,SANGS RGYAS KYI GO 'PHANG THOB PA'I RE BA'ANG 'GRUB PAR SHOG CIG ,DE LTAR GZHAN DON
SGRUB PA'I THABS DAM PA SANGS RGYAS KYI RGYU'I GTZO BO BYANG CHUB KYI SEMS SKYE BA DANG 'PHEL BA'I SPYOD PA BZANG PO DAG NI BDAG SPYOD CING, ,LHA LA SOGS PA 'GRO BA KUN TU SKYE BA DE'I TSE SNGON GYI GNAS JI LTA BA BZHIN DU DRAN PO THAB PAR GYUR CING, DE YI MTHUS TSE RABS KUN TU 'CHI 'PHO DANG SKYE BA BRGYUD MAR MYONG BA NA KHYIM GYI NYES DMIGS DANG RAB TU BYUNG BA'I PHAN YON DRAN PA'I SGO NAS RTAG TU BDAG NI RAB TU 'BYUNG BAR SHOG CIG ,TSE RABS THAMS CAD DU SMON 'JUG BYANG CHUB KYI SEMS BZUNG NAS DUS GSUM GYI RGYAL BA KUN GYI RJES SU SLOB PAR GYUR TE KUN TU BZANG PO'I SPYOD PA YONGS SU RDZOGS PAR BYED PA'I GZHI TSUL KHRIMS KYI SPYOD PA RNAM PA GSUM PO NYON MONGS PA'I DRI MA MED PA YONGS SU DAG PAR RANG DON YID BYED KYIS MA NYAMS SHING LTUNG BA'I SKYON GYIS GOS PA MED PAR GYUR CIG ,LHA YI SKAD DANG KLU DANG GNOD SBYIN GYI SKAD DANG GRUL BUM DAG DANG MA YI SKAD SNA TSOGS PA RNAMS DANG 'GRO BA KUN GYI SGRA RNAMS JI TZAM PA DE THAMS CAD KYI SKAD DU BDAG GIS CHOS BSTAN TE THEG PA CHEN PO KUN TU DAR PAR BYED CING, RIGS KYI YON TAN GYI GTZO BO RGYUD NGES SHING PHA ROL TU
, ,PHYIN PA DRUG GI SPYOD PA RAB TU SHES NAS MI NYAMS GONG 'PHEL DU BRTZON PAS BYANG CHUB SEMS NI NAM YANG BRJED PA MED PAR GYUR CIG ,SDIG PA GANG ZHIG NAG PO'I CHOS BZHI BSTEN PA LA SOGS PA RNAMS DANG SGRIB PAR GYUR BA GANG DAG THEG PA CHEN PO SPONG BA DANG LOG LTA DANG NGA RGYAL LA SOGS PA LAS DANG NYON MONGS BA DE DAG MA LUS PA YONGS SU BYANG BAR GYUR CIG ,'KHOR BAR 'GEN PA'I RGYU LAS DANG NYON MONGS PA DANG CHOS LA BAR DU GCOD PA'I BDUD KYI LAS RNAMS LAS GROL ZHING, SNYING RJE DANG SMON LAM GYIS 'JIG RTEN KHAMS KYI 'GRO BA RNAMS SU SKYE NA YANG, JI LTAR PADMO CHUS MI CHAGS PA DANG NYI ZLA NAM MKHAR THOGS PA MED PA LTAR SRID PA'I SKYON GYIS MA GOS PA'I SKYE PA YONGS SU 'DZIN PAR GYUR CIG ,NAM MKHA'I MTHAS GTUGS PA'I ZHING GI KHYON DANG PHYOGS RNAMS JI COM PA DE SNYED KYI SEMS CAN RNAMS KYI NGAN SONG GI SDUG BSNGAL GYIS MTSON PAS 'KHOR BA'I SDUG BSNGAL MTHA' DAG TU ZHI BAR BYED PA DANG, MNGON MTHO'I BDE BA DAG LA 'GRO BA KUN 'GOD CING 'GRO BA THAMS CAD LA NI RANG RANG GI SKAL BA DANG 'TSAMS PAR BYANG CHUB CHEN POR BKRI BA'I SGO NAS PHAN PA
SGRUB PA'I SPYAD PA SPYOD PAR GYUR CIG ,BLA NA MED PA'I BYANG CHUB KYI RGYU TSOGS GNYIS KYI SPYOD PA YONGS SU RDZOGS PAR BYED CING SEMS CAN NGAG GI DBANG PO DANG 'TSAMS PAR SPYOD PA STON PA'I SGO NAS THEG PA CHEN POR 'JUG PAR BYED CING, KUN TU BZANG PO'I SPYOD PA'I TSUL THEG PA CHEN PO DAG NI RAB TU STON PAR BYED PA STE SPYOD PA GSUM PO MA 'ONGS PA'I BSKAL PA KUN TU SPYOD PAR GYUR CIG ,BDAG GI BYANG CHUB SEMS DPA'I SPYOD PA DANG MTSUNGS PAR GANG GIS SPYOD PA'I BYANG CHUB SEMS DPA' DE DAG NI RTAG TU 'GROGS PAR GYUR CING LUS DANG NGAG RNAMS DANG NI SEMS KYI KYANG MNYES GSHIN PAS KUN TU BZANG PO'I SPYOD PA DAG DANG SMON LAM LA GCIG TU SPYOD PAR GYUR CIG ,BDAG LA PHAN PAR 'DOD PAS SNYING RJES THEG PA CHEN PO STON PA'I GROGS PO DGE BA'I BSHES GNYEN GANG DAG BZANG PO SPYOD PA RAB TU STON PA RNAMS DE DAG DANG YANG RTAG TU PHRAD PAR GYUR CING PHRAD NAS KYANG DE DAG BDAG GI SA NAM YANG YID SUN MI 'BYUNG BAR THUGS MNYES PA KHO NA SGRUB PAR GYUR CIG ,SANGS RGYAS SRAS KYIS BSKOR PA'I MGON PO PHYOGS BCU'I RGYAL BA RNAMS KYI SPRUL PA'I BKOD PA RNAMS BDAG GI RNAM PAR DAG PA'I MIG GIS
, ,MNGON GYI SPYOD YUL DU RTAG TU GYUR TE BDAG GIS SEMS DANG BAS RGYAL BA SRAS DANG BCAS PA LA BLTA ZHING MA 'ONG PA'I BSKAL PA KUN TU MI SKYO BA'I BRTZON 'GRUS KYIS RGYAL BA DE DAG LA MNGON SUM DANG MNGON SUM MA YIN PA'I MCHOD PA RGYA CHEN POS MNYES PAR BGYID PAR GYUR CIG ,RGYAL BA RNAMS KYI DAM PA'I CHOS JI SNYED PA'I TSIG DANG DON MI BRJED PA'I GZUNGS THOB PA'I SGO NAS 'DZIN CING BLA NA MED PA'I BYANG CHUB KYI SPYOD PAS GZHAN LA KUN TU STON PAS SNANG BAR BYED PA DANG, KUN TU BZANG PO'I SPYOD PA THEG PA CHEN PO'I RTOGS PA'I CHOS MTHA' DAG RANG GZHAN GYI RGYUD LA BSKYED CING, DE'I MI MTHUN PHYOGS RNAM PAR SBYANGS TE DAG PA YANG MA 'ONG PA'I BSKAL PA KUN TU SPYAD PAR BGYI'O, ,SRID PA THAMS CAD DU YANG 'KHOR BAR SKYE BA NA BSOD NAMS DANG YE SHES DAG GI TSOGS NI MI ZAD PA RNYED CING SEMS CAN 'DUL BA'I THABS DANG DE KHO NA NYID LA BZHUGS PA'I SHES RAB DANG YON TAN GYI SGO SGRUB PA'I TING NGE 'DZIN DANG SGYU MA'I RNAM PAR THAR PA SNA TSOGS PAR RTZAL SBYANGS PAS YON TAN KUN GYI MI ZAD PA'I MDZOD THOB PAR GYUR CIG ,RDUL GCIG GI STENG NA RDUL SNYED KYI SANGS RGYAS KYI ZHING RNAMS
DANG ZHING DE DAG TU BSAM GYI MI KHYAB PA'I SANGS RGYAS RNAMS SANGS RGYAS KYI SRAS KYI DBUS NA BZHUGS PA LA BLA NA MED PA'I BYANG CHUB KYI CHED DU SPYOD CING BLTA BAR BGYI'O, ,DE LTAR MA LUS PA'I 'JIG RTEN GYI KHAMS THAMS CAD KYI PHYOGS SU'ANG SGRA RTZE TZAM GYI KHYON LA DUS GSUM GYI TSAD JI SNYED KYI SANGS RGYAS KYI SKU'I BKOD PA RGYA MTSO DANG DE DAG GI ZHING GI BKOD PA RGYA MTSO RNAMS BLTA BA DANG, BSKAL PA RGYA MTSO'I BAR DU BYANG CHUB KYI SPYOD PA SPYOD CING RAB TU 'JUG PAR BGYI'O, LONGS SKU'I GSUNG GI CHA SHAS GCIG KYANG YAN LAG DRUG CU DANG LDAN ZHING RGYA MTSO LTA BU'I SGRA SKAD KYIS 'GRO BA SO SO'I RANG RANG GI SKAD DU STON ZHING THE TSOMS THAMS CAD GCOD PA RGYAL BA KUN GYI GSUNG DBYANGS YAN LAG RNAM PAR DAG 'GRO BA KUN GYI BSAM PA'I RE BA JI BZHIN SKONG BAR MDZAD PA'I DBYANGS SANGS RGYAS KYI GSUNG LA RTAG TU 'JUG PAR BGYI'O, ,DUS GSUM DU GSHEGS PA'I RGYAL BA THAMS CAD KYIS ZAB RGYAS CHOS KYI 'KHOR LO'I TSUL RNAMS RAB TU BSKOR BAR MDZAD PA DE DAG GI YANG GSUNG DBYANGS MI ZAD PA LA BLO YI STOBS KYIS DON RAB TU RTOGS PA'I SGO NAS BDAG BYAD RAB TU 'JUG PAR GYUR CIG ,MA
, ,'ONG BSKAL PA THAMS CAD DU SANGS RGYAS KYI SKU DANG GSUNG GI 'PHRIN LAS RGYA CHEN PO LA 'JUG PA THAMS CAD KYANG SEMS KYI SKAD CIG GI YUN DU BSDUS NAS BDAG KYANG 'JUG PAR BGYI ZHING GANG YANG BSKAL PA DUS GSUM GYI TSAD JI SNYED PA DE DAG SEMS KYI SKAD CIG GCIG GI CHA SHAS SU BSDUS TE YE SHES KYI STOBS KYIS NI ZHUGS PAR SPYAD PAR BGYI'O, ,DUS GSUM GSHEGS PA MI YI SENGGE GANG ZHIG SANGS RGYAS BCOM LDAN 'DAS RNAMS KYI SKU'I BKOD PA 'KHOR GYI TSOGS DANG BCAS PA DE DAG SEMS KYI SKAD CIG GCIG LA DUS GCIG TU BDAG GIS BLTA ZHING RTAG TU DE DAG GI SPYOD YUL TING NGE 'DZIN GYI RNAM PAR 'PHRUL PA DANG BYIN RLABS DANG SGYU MA'I RNAM PAR ROL PA LAS BYUNG BA'I MDZAD PA'I SGO BSAM GYIS MI KHYAB PA LA SGYU MA'I RNAM PAR THAR PA MNGON DU GYUR BA'I STOBS KYIS 'JUG PAR GYUR CIG ,GANG YANG DUS GSUM DAG GI ZHING GI BKOD PA JI SNYED PA DE DAG RDZU 'PHRUL DANG TING NGE 'DZIN GYIS MTHUS RDUL GCIG PA'I STENG DU'ANG MNGON PAR BSGRUB CING DE LTAR MA LUS PA'I PHYOGS RNAMS THAMS CAD DU YANG RGYAL BA DAG GI ZHING RNAMS BKOD PA TSAD MED PA SGRUB PA LA 'JUG PAR GYUR CIG ,GANG YANG MA BYON
PA'I 'JIG RTEN GYI SGRON MA SANGS RGYAS BCOM LDAN 'DAS RNAMS DE DAG GIS DUS GCIG CHAR DU ZHING SO SOR RIM PA 'TSANG RGYA BA DANG CHOS KYI 'KHOR LO BSKOR BA DANG MYA NGAN LAS 'DA' BAR RAB TU ZHI BA'I MTHA' STON PA SOGS MDZAD PA MTHA' YAS PAS ROL BA'I MGON PO KUN GYI DRUNG DU BDAG MCHI BAR GYUR TE MCHOD PA DANG RIM GRO BGYID PAR GYUR CIG ,LAM GYI RTOGS PA GONG MAR BGROD PAR 'OG MA LAS SHIN TU MYUR BA DANG, SKAD CIG SKAD GCIG LA SANGS RGYAS KYI ZHING RAB 'BYAMS SU MCHOD SOGS KYI SLAD DU RDZU 'PHRUL GYIS MYUR BAR BGROD PA DANG, SEMS CAN THAMS CAD KYI SMIN GROL LA 'GOD PA'I MTHU SHIN TU MYUR BA TE KUN TU MYUR BA'I RDZU 'PHRUL GYI STOBS RNAMS DANG, MTHA' YAS PA'I SEMS CAN GYI KHAMS KYI THEGS PA SNA TSOGS KUN NAS SGO YIS SEMS CAN RNAMS THEG PA CHEN POR 'GOD PA'I STOBS RNAMS DANG, RDZU 'PHRUL DANG TING NGE 'DZIN GYIS SGO GSUM GYI BYA BYED MTHA' DAG SEMS CAN LA PHAN PAR SGRUB SA PA KUN TU YON TAN SPYOD PA'I STOBS RNAMS DANG, PHYOGS BCU'I 'JIG RTEN KUN TU KHYAB PAR SPRO BA'I BYAMS PA'I TING NGE 'DZIN GYIS SEMS CAN RNAMS BDE BA DAG GI DPAL LA
, ,BGOD PA'I STOBS DANG, KUN NAS DGE BA'I BSOD NAMS KYI MTHUS LHA LA SOGS PA ZIL GYIS GNON ZHING SKAD CIG RE RE'ANG BSOD NAMS DPAG TU MED PA 'DZIN PA'I STOBS RNAMS DANG, 'JIG RTEN DANG 'JIG RTEN LAS 'DAS PA'I BSLAB PA'I GNAS RNAMS LA SKAD CIG RE RE ZHING MA CHAGS SHING THOGS PA MED PAR GYUR PA'I YE SHES KYI STOBS DANG, SKAD CIG GCIG LA'ANG 'GOG PA YANG DAG PA'I MTHAR SNYOMS PAR 'JUG LDANG BYED PA'I SHES RAB DANG, SHIN TU RAGS PA'I SEMS KYANG ZAG MED KYI NGO BOR BSKYED PA DANG LUS NGAG GING MI DGE BA CHES CHE BA RNAMS KYANG LAM MCHOG TU BSGYUR BA DANG, SEMS SMIN PA'I THABS BSAM GYIS MI KHYAB PA LA MKHAS PA DANG, SKAD CIG RER YANG SHIN TU ZHI BA DANG MA ZHI BA'I SEMS DANG ZAG PA DANG ZAG PA MED PA'I SEMS SPEL BA DANG, DPA' BAR 'GRO BA DANG NAMS MKHA' MDZOD DANG CAN DRI MA MED PA SOGS LA MNGA' BRNYES PA'I TING NGE 'DZIN GYI STOBS DANG, DE DAG GIS BLA NA MED PA'I BYANG CHUB KYI STOBS SANGS RGYAS KYI YON TAN BSAM GYI MI KHYAB PA RNAMS RANG RGYUD LA MYUR DU YANG DAG PAR SGRUBS PAR BYED PAR GYUR CIG ,'KHOR BAS BSDUS
PA'I ZAG BCAS KYI LAS KYI STOBS RNAMS YONGS SU DAG PAR BYED CING, NYON MONGS PA'I STOBS RNAMS KUN TU 'JOMS PAR BYED PA DANG, PHUNG BO'I BDUD SOGS BDUD KYI STOBS RNAMS STOBS MED PAR RAB TU BYED CING, DE LTAR MI MTHUN PHYOGS KYI GNYEN PO'I STOBS KHYAD PAR CAN SGRUB PA'I SGO NAS BZANG PO SPYOD PA'I STOBS RNAMS NI YONGS SU RDZOGS PAR BGYID PAR GYUR CIG ,RANG NYID GANG DU 'TSANG RGYA BA'I SANGS RGYAS KYI ZHING RNAMS RGYA MTSO BDE BA CAN LTAR SNOD BCUD KYI SKYON RNAM PAR DAG PAR BYED CING, SEMS CAN RGYA MTSO DAG NI CHOR 'PHRUL GSUM GYI SGO NAS SRID ZHI'I 'JIGS PA LAS RNAM PAR GROL BAR BYED PA DANG, LUNG RTOGS KYI BSDUS PA'I CHOS RNAMS RGYA MTSO SHES RAB KYI MIG GIS SO SOR RAB TU MTHONG BAR BYED CING, JI SNYED PA'I RNAM PA MTHA' YAS PA LA GCIG CHAR 'JUG PA'I YE SHES RGYA MTSO RAB TU RTOGS PA MNGON SUM DU BYED PA DANG, BSOD NAMS DANG YE SHES KYIS BSDUS PA'I BYANG CHUB SEMS DPA' SPYOD PA RGYA MTSO DRI MAS MA GOS PAR RNAM PAR DAG PAR BYED CING, BYANG CHUB SEMS DPA'I SMON LAM CHEN PO 'BUM PHRAG GRANGS
, ,MED PA BCU LA SOS PA RGYA MTSO LTA BU RNAMS RAB TU RDZOGS PAR BYED PA DANG, SANGS RGYAS RGYA MTSO RNAMS NI KUN TU BZANG PO'I MCHOD PA'I SPRIN GYIS RAB TU MCHOD PAR BYED CING, LAS BDUN PO DE DAG KYANG BSKAL PA RGYA MTSOR MI SKYO BA'I BTZON 'GRUS KYIS SPYAD PAR BGYID PA SOGS RGYA MTSO LTA BU'I LAS BRGYAD PO RNAMS KYANG SKAD CIG RE RE'I NANG DU TSANG BAR SPYOD PAR GYUR CIG ,GANG YANG DUS GSUM GSHEGS PA'I RGYAL BA JI SNYED PA DE YIS BLA NA MED PA'I BYANG CHUB KYI GYIR SPYAD PA SPYOD PA'I TSE SMON LAM GYI BYE BRAG RGYA MTSO LTA BU BTAB PA RNAMS BDAG GIS BZANG PO SPYOD PA'I SMON LAM GYI STOBS KYIS BYANG CHUB TU MNGON PAR SANGS RGYAS PA'I CHED DU DA LTA NYID NAS DE DAG MA LUS PA BDAG GIS RDZOGS PAR BGYI'O, RGYAL BA KUN GYI SRAS KYI THU BOR GYUR PA GANG GI MING NI KUN TU BZANG PO ZHES BYA BAR PHYOGS BCU'I SANGS RGYAS SRAS DANG BCAS PAS YONGS SU BSGRAGS PA'I MKHAS PA DE DANG MTSUNGS PAR SPYOD PA RLABS PO CHE LA SLOB PA'I PHYIR DGE BA DE DAG THAMS CAD RAB TU BSNGO'O, ,DE DAG RANG GI LUS GANG 'DUL GYI GZUGS SU STON PA DANG, RDUL PHRAN RER YANG SANGS RGYAS KYI
ZHING GI RDUL SNYED KYI LUS STON CING, LUS GCIG GIS SANGS RGYAS KYI ZHING KHAMS 'GENGS PAR STON PA DANG, SANGS RGYAS THAMS CAD KYI DRUNG NAS MI G-YO BAR STON PA SOGS LUS DANG, DBYANGS KYI DKYIL 'KHOR GCIG LAm SKAD THAMS CAD STON PA LTA BU GANG DANG SKAD CIG GCIG LA SPYOD PA RGYA MTSO MNGON DU BYED PAS YID KYANG RNAM PAR DAG PA DANG, PHA ROL TU PHYIN PA DANG, BSAM GTAN DANG, TING NGE 'DZIN GYI SPYOD PA MA LUS PAR DAG PAR BYED CING, DE LA RTEN NAS SANGS RGYAS KYI ZHING RNAMS SNOD BCUD KYI 'BYOR BA RLABS CHE BA SKAD CIG RER YANG YONGS SU DAG PAR BYED PA DE LTA BU'I TSUL GYIS BSNGO BA BZANG PO MKHAS PA KUN TU BZANG PO'I SPYOD TSUL JI LTA BAR DAG KYANG DE DANG MTSUNGS PAR SHOG CIG , KUN NAS MDZES SHING THOG MTHA' BAR DU DGE BA ZAB PA DANG RGYA CHE BA'I SPYOD PA YONGS SU SPYAD PA'I PHYIR 'JAM DPAL GYI NI SMON LAM JI LTAR SPYAD PA DE LTAR SPYAD PAR BGYI ZHING KUN TU BZANG PO DANG 'JAM PA'I DBYANGS KYI SPYOD PA DANG MTSUNGS PAR SMON PA'ANG BAR MA DOR MI LDOG PAR MTHAR PHYIN PA'I PHYIR MA 'ONG PA'I BSKAL PA KUN TU MI SKYO BAR BRTZON PA SHUGS
, ,DRAG POS DE YIS BYA BA SPYOD PA DE DAG GAM, LUS PAR YONGS SU RDZOGS PAR BGYI'O, ,BYANG CHUB SEMS DPA' RNAMS KYI SPYOD PA RLABS PO CHE DAG NI RGYA CHE ZHING MTHAS YAS PAS TSAD YOD PAR MA GYUR CING, SKU GSUNG THUGS KYI GSANG BA BSAM GYI MI KHYAB PA'I YON TAN RNAMS KYANG TSAD BZUNG DU MED PAR SHOG CIG ,DE LTAR BU'I SPYOD PA TSAD MED PA LA GNAS NAS KYANG RGYAL BA SRAS DANG BCAS PA DE DAG GI RNAM PAR PHUL BA THAMS CAD MNGON SUM DU TSAL BAR BGYED PAR GYUR CIG ,NAM MKHA'I MTHA' PHYOGS DANG DUS KYI THUG PAR GYUR BA MED PA'I JI TZAM PA LTAR SEMS CAN MA LUS PA'I MTHA' YAS DE BZHIN DU BZUNG DU MED PA JI TZAM PA'I SEMS CAN RNAMS KYI LAS DANG NYON MONGS PA'I KHAMS KYI MTHA' GYUR PA MED PA LTAR BDAG GIS SNGAR BTAB PA'I SMON LAM DE DAG THAMS CAD RE RE NAS MTHA' YANG DE TZAM MO ZHES DPAG TU MED PAR GYUR CIG ,GANG YANG SKYE BO DAG GIS PHYOGS BCU'I ZHING RNAMS MTHA' YAS PA RIN PO CHE SNA BDUN GYIS BRGYAN TE RGYAL BA RNAMS LA DAD PA'I SEMS KYIS PHUL BA DANG, LHA DANG MI YI BDE BA MCHOG BSKYED PA'I YO BYAD DAM PA RNAMS KYANG ZHING GI RDUL SNYED KYI
BSKAL BAR PHUL PA BAS SKYE BO GANG GIS BSNGO BA'I RGYAL PO 'JI THOS NAS YI RANG PAS TSIG DANG DON DRAN BZHIN PAS SGO NAS BYANG CHUB MCHOG GI RGYU DANG 'BRAS BU'I TSUL LA RJES SU RAB TU MOS SHING, LAN GCIG TZAM YANG DAD PA RAB TU BSKYED PAS NI BSOD RNAMS DAM PA'I MCHOG TU 'DI 'GYUR BA DANG, DAD PA DANG LDAN PA'I SKYE BO GANG GIS DON YID LA DRAN PAS BZANG PO SPYOD PA'I SMON LAM 'DI GSHAR SGOM TZAM BYAS TE SMON LAM BTAB PAS KYANG, DE NAS NGAN SONG GI RGYU THAMS CAD SPANG BAR 'GYUR ZHING, DES NI LOG PAR LTA BA CAN DANG THEG CHEN BZLOG PA'I GROGS PO NGAN PA SPANG BA DANG, SANGS RGYAS SNANG BA MTHA' YAS DE YANG DES MYUR BAR MTHONG ZHING, DE DAG GI RNYED PA RAB THEG CHEN GYI CHOS SPYOD PA'I BSHES GNYEN DANG GROGS DANG GNAS DANG YO BYAD SOGS MTHUN RKYEN THAMS CAD RNYED CING, NANG DANG SDUG BSNGAL LA SOGS PA'I RKYEN NGAN THAMS CAD BYANG CHUB KYI SPYOD PA'I GROGS SU 'GYUR PAS LUS SEMS BDE BAR 'TSO LA MI TSE 'DI RA'ANG RGYAL BA SRAS BCAS KYI BYIN RLABS KYIS 'DI PHYI'I DON THAMS CAD LEGS PAR 'GRUB STE 'ONG BA DANG, BYANG CHUB SEMS DPA' KUN
, ,TU BZANG PO DE YANG SEMS DANG SPYOD DANG YON TAN DANG, BSOD RNAMS CI 'DRA BA GANG DAG DE DAG KYANG RING PO MI THOGS PAR DE BZHIN DU 'GYUR ZHING, MTSAMS MED PA LNGA PO DAG GI SDIG PA GANG DAG GIS MI SHES RMONGS PA'I DBANG GIS BYAS PA DAG KYANG, DE YIS BZANG PO SPYOD PA 'DI DON DRAN BZHIN MOS PAS BRJOD NA MYUR DU MA LUS PAR YONGS SU BYANG BAR 'GYUR BA SOGS MTHONG CHOS KYI YON TAN DANG, PHYI MI TSE RABS RNAMS SU'ANG RIG PA'I GNAS RNAMS LA THOGS PA MED PAR 'JUG PA'I YE SHES DANG, GZUG DANG MTSAN RNAMS DANG, RIGS DANG KHA DOG PHUN SUM TSOGS PA RNAMS DANG LDAN PAR GYUR CIG BYANG CHUB KYI LAM LA BAR DU GCOD PA'I BDUD DANG LOG PAR ZHUGS MU STIGS BYED MANG POS DE'I LAM LA BAR DU GCOD PAR BYED MI THUB PAR, DE DAG BSOD RNAMS DANG YE SHES KYI STOBS KYIS ZIL GYIS GNON ZHING, 'JIG RTEN GSUM PO KUN LA LHA DANG BCAS PA'I 'GRO BA KUN GYIS MCHOD PA DANG PHYAG BYAR 'GYUR BA SOGS RGYU DANG, SHIN TU MYUR BA'I LAM GYI BGROD PA MTHAR THUGS PAS BYANG CHUB KYI SHING GI DBANG PO'I DRUNG DU DE MYUR DU 'GRO ZHING,
DER SONG NAS KYANG SEMS CAN THAMS CAD LA BLA NA MED PA'I BYANG CHUB KYI PHAN PA SGRUB PA'I PHYIR RDO RJE DKYIL DKRUNG GIS 'DUG STE BLA NA MED PA'I BYANG CHUB SANGS RGYAS KYI GO 'PHANG MNGON DU BYAS CING ZAB RGYAS CHOS KYI 'KHOR LO RAB TU BSKOR BA DANG, RDO RJE LTA BU'I TING NGE 'DZIN GYIS BDUD KYI DMAG BYE BA PHRAG BRGYA RNAMS SDE DANG BCAS PA THAMS CAD TUL BAR BYED PA SOGS SMON LAM YID LA BYAS PA'I PHAN YON RNAMS KYANG GNAS SKABS MTHA' DAG TU THOB PAR GYUR CIG ,GANG YANG BZANG PO SPYOD PA'I SMON LAM GYI GZHUNG 'DI'I TSIG TZAM KHA TON DU BYED PAS 'CHANG BA DANG, GZHAN LA STON TAM GLEG BAM KLOG PA DANG, 'BRI BA LA SOGS PA BYAS NA'ANG DE YI RNAM PAR SMIN PA SANGS RGYAS NYID KYI SPYOD YUL LAS NYAN RANG SOGS KYIS BSAM GYIS MI KHYAB PAS BLA NA MED PA'I BYANG CHUB MCHOG GI THABS 'DI LA SON NYI MED CING, 'JAM DPAL DPA' BOS MI RTOG PA'I SHES RAB KYIS DGE RTZA RNAMS BYANG CHUB TU BSNGO BA'I TSUL JI LTAR MKHYIM PA DANG KUN TU BZANG PO DE YANG DE BZHIN DU YONGS SU BSNGO BA'I TSUL LA MKHAS SHING, GZHAN YANG SPYAN RAS GZIGS SOGS RGYAL SRAS DE DAG KUN
, ,GYIS JI LTAR BSLAB PA'I RJES SU BDAG SLOB PAR BYED CING BZANG PO SPYOD PA 'DON PA SOGS KYI DGE BA 'DI DAG THAMS CAD RAB TU BSNGO BAR BGYI'O, ,DUS GSUM DU GSHEGS PA'I RGYAL BA THAMS CAD KYIS BSNGO BA GANG LA MCHOG TU BSNGAGS PA NAM MKHA'I MTHAS GTUGS PA'I SEMS CAN THAMS CAD LA SRID LA JI SRID GNAS KYI BAR DU BLA NA MED PA'I PHAN BDE SPEL BA'I PHYIR BYANG CHUB KYI RGYU BSNGO BA DE BZHIN DU BDAG GIS SMON LAM BTON PA LA SOGS PA'I DGE BA'I RTZA BA 'DI DAG KUN KYANG, KUN TU BZANG PO'I SPYOD PA'I SGO NAS BYANG CHUB CHEN PO RAB TU BSNGO BAR BGYI'O, DGE BA'I RTZA BA 'DI'I MTHUS BDAG NI 'CHI BA'I DUS BYED PAR GYUR PA NA, LAS DANG NYON MONGS PA DANG RNAM SMIN GYIS SGRIB PA THAMS CAD DAG NI PHYIR BSAL TE, DBANG PO'I MNGON GSUM GYI SPYOD YUL DU SANGS RGYAS SNANG BA MTHA' YAS DE MA THONG ZHING, MTHONG NAS KYANG DE NYID KYI THUGS RJE DANG BDAG GI SMON LAM STOBS KYIS BDE BA CAN GYI ZHING DER THOGS PA MED PAR RAB TU 'GRO ZHING, DER SONG NAS NI, SMON LAM CHEN PO 'BUM PHRAG BCU LA SOGS PA 'DI DAG THAMS CAD KYI DON MNGON DU 'GYUR
BAR SHOG CIG ,DE DAG GI DON MA LUS PA BDAG GIS YONGS SU BSKANGS SHING RDZOGS PAR BYAS NAS 'KHOR BA'I 'JIG RTEN JI SRID MA STONG BDE SRID SEMS CAN THAMS CAD LA GNAS SKABS DANG MTHAR THUG GI PHAN PA SGRUB PAS BGYI'O, RGYAL BA 'OD DPAG TU MED PA'I ZHING DANG 'KHOR GYI DKYIL 'KHOR SMON LAM GYI MTHU LAS GRUB PA SA BZANG ZHING TSOGS GNYIS DANG THEG PA CHEN PO'I CHOS KYI 'BYOR PA RLABS CHE BAS NYAMS DGA' BA DER RIN PO CHE'I PADMO DAM PA 'OD KYI 'PHRENG BAS KUN TU MDZES PA LAS THOGS PA MED PAR RDZUS TE SKYES NAS SNANG BA MTHA' YAS RGYAL BAS MNGON SUM DU BLA NA MED PA'I BYANG CHUB MCHOG TU LUNG BSTAN PA'ANG BDAG GIS DER THOB PAR SHOG CIG ,ZHING DER NI BDAG GIS DE LTA BU'I TSUL GYIS LUNG BSTAN PA THOB NAS KYANG SKAD CIG DE NYID LA SPRUL PA MANG PO'I BYE BA PHRAG BRGYA LA SOGS PA 'GYID PAR BYED CING, SPRUL PA'I LUS DE DAG GIS KYANG THABS DANG SHES RAB KYI BLO GROS KYI STOBS KYIS PHYOGS BCU RNAMS SU'ANG MTHA' YAS PA'I SEMS CAN RNAMS LA BYANG CHUB MCHOG LA 'GOD PA'I PHAN PA SGRUB PA RNAM PAR THAR PA'I SGO MANG POS BGYID
, ,PAR GYUR CIG ,BZANG PO SPYOD PA'I SMON LAM GYI DON SEMS PA DANG GZHUNG DON PA SOGS KYIS BTAB PA YIS DGE BA CUNG ZAD BDAG GIS CI BSAGS PA DE NI; PHYOGS BCU'I 'GRO BA RNAMS KYIS DKAR BA'I PHYOGS DANG MTHUN PA'I SMON LAM GYI DGE BA JI SNYED DE RNAMS SKAD CIG GIS THAMS CAD 'BYOR BAR SHOG CIG ,KUN TU BZANG PO SPYOD PA'I SMON LAM 'DON PA DANG SEMS PA'I DGE RTZA BYANG CHUB TU BSNGOS PA 'DI YIS BSOD NAMS DAM PA MTHA' YAS PO GANG THOB PA DES, 'GRO BA SDUG BSNGAL CHU BOR BYING BA RNAMS MYUR DU THAR TE 'OD DPAG MED PA'I GNAS RAB ZHING KHAMS MCHOG TU SKYE BA 'DZIN PA SOGS YON TAN GYI TSOGS RGYA MTSO LTA BU THOB PAR SHOG CIG ,BZANG PO SPYOD PA'I SMON LAM GYI RGYAL PO 'DI DAG SMON LAM THAMS CAD KYI NANG NAS MCHOG GI GTZO BOR GYUR PAS, GZHUNG DON PA DANG, DON SEMS PA DANG, 'TSANG PA SOGS KYI SGO NAS MTHA' YAS PA'I 'GRO BA KUN LA PHAN PAR BYED CING, KUN TU BZANG PO SPYOD PAS YONGS SU BRGYAN PA'I GZHUNG YONGS SU GRUB NAS, NGAN SONG LA SOGS PA 'KHOR BA'I RGYUD RNAMS MA LUS PA STONGS PAR GYUR TE BLA NA MED PA'I
BYANG CHUB KYI BDE BAS SEMS CAN KUN GYI RE BA SKONG BAR GYUR CIG, (CES BLO YANG YUNG DU MA SONG BAR SEMS RTZE GCIG PAS BTON TE SMON LAM BTAB NA,) GONG GI TSIG DANG DON YID LA BYAS PA'I PHAN YON MTHA' DAG GDON MI ZA BAR THOB PAS 'BAD PAR BYAS LA, TSOGS ZHING RNAMS KYIS KYANG SMON LAM GYI DBANG PO MDZAD DE DE LTAR 'GRUB PAR BYIN GYIS BRLAB PAR BSAM TE RANG LA BSTIM PA'AM MI DMIGS PAR SBYANGS PAS CHOG PAR SEMS SO,, 'DIR SMRAS PA, DAM PA'I BSHES GNYEN DED DPON LA RTEN NAS, ,RMAD BYUNG BYANG CHUB SEMS KYI GRU GZING GI ,KUN BZANG SPYOD PA'I RGYA MTSO RABS RGAL TE, ,RNAM MKHYEN THAR PA'I GLING DU MYUR SON SHOG ,DER MA SON PA'I TSE RABS 'PHRENG BAR YANG, ,THEG MCHOG DGE BA'I BSHES KYI RJES BZUNG STE, ,RGYAL SRAS KUN BZANG RJES SU SLOB PA LA, ,ZHUM PA MED PAR BRTZON PA BSKYED PAR SHOG ,NYAM NGA'I SRID PAR 'PHYAN PA'I 'GRO RNAMS KYANG, ,BLA MED ZHI BA MCHOG GI GO 'PHANG LA, ,RING MIN BDE BLAG NYID DU 'GOD PA YIS, ,SDUG BSNGAL RGYA MTSO MYUR DU SKEM GYUR CIG (,CES BZANG PO SPYOD PA'I SMON LAM GYI TSIG RNAMS BYIN BRLAB KYI 'KHYAD PAR DU SEMS TE SER GZHAG TU BKOD NAS BAR BAR GSAL BYED YIG 'BRU LA SHAS RE BSNAN NAS TSIG DON MNGON PAR GO BAR BYAS PA 'DI'ANG,
, ,SMRA BA'I DBANG PHYUG ZHABS DRUNG NGAG DBANG RGYA MTSO NAS DNGOS SKYES DANG BCAS BSKUL BA'I G-YAR DOM LDOG PAR ^ GYIN PA 'JIG MED 'PHRIN LAS RGYA MTSO RANG GI YID SKYOR GYI GSOS SU'ANG DMIGS TE MDO SMAD BSTAN PA'I 'BYUNG GNAS DPAL LDAN BKRIS 'KHYIL NAS SBYAR BA DGE LEGS 'PHEL,, ,,AOm SVA STI, SKYABS MGON BZHI BA'I THUGS RJE'I 'OD STONG GIS, ,DUS MTHAR RGYAL BSTAN 'DAB BRGYA BZHAD PA'I TSAL, ,CHOS GRVA BKRA SHIS CHOS 'BYOR GLING MCHOG NAS, ,SPAR GYI CHOS SBYIN SPRAD RTZA'I DGA' STON 'PHEL, ,SARBA MANGGA LAm,, ,, ~ , BZANG SPYOD SMON LAM SGER DU 'DON TSUL NI, DMIGS BRTZE MA 3 DUS 'KHOR LTAR, PHYOGS BCU DUS GSUM GYI X 'PHRO LA PHYAG 'TSAL LO, ,DBUS PA LTAR, MCHOG BDEN RGYAL BA GNAS SMON LTAR, MCHOD SPRIN GYI GZUNGS 3 ROL SGRA, DKON MCHOG GSUM GYI; BLANG DOR GNAS RNAMS X PHONGS PA'I GNYEN GCIG STON PA SH'AKYA THUB, ,NYE BA'I SRAS BRGYAD GZHON NU NOR BZANG SOGS,, 'KHOR DANG X 'DIR GSHEGS SHIG ,MI MJED ZHING NAS LTAR, BZANG SPYOD 'BRU SNON MA 1 DE NGA RGYAL BA LTAR, BZANG SPYOD SMON LAM 1 SER BYAS LTAR, YANG TSAR GCIG ,SDUR BTON, TSUL DE LTA BU'I BZANG SPYOD
BCAD LHUG SPEL NAS TSAR GSUM MAM BDUN NAM NYER GCIG GOGS GANG MOS RE 'DON CING, ZHING KHAMS 'BUL BAR ZHU, MDZAD DU GSOL, DENG NAS BYANG CHUB CHOS LTAR, AI DAm GU RU, YON TAN ZHIR GYUR MA, BKA' CHOS LTAR, MYUR MDZAD MA, RGYUD GRVA LTAR, TSOGS ZHING RNAMS SMON LAM GYI DBANG PO MDZAD DE, 'OD KYI RNAM PAR RANG LA THIM PAS JI LTAR SMON PA LTAR MYUR DU 'GRUB PAR BYIN GYIS BRLABS PAR GYUR, BSTAN 'BAR MA, PHUN SUM TSOGS PA MA, DMIGS BRTZE MA 3 GSUM KA CHOS GRVA LTAR RO,, ,,