*, ,BYANG CHUB LAM GYI RIM PA'I DMAR KHRID GZHAN PHAN BDUD RTZI'I BUM PA ZHES BYA BA BZHUGS,, @1 #, ,NA MO GU RU MANYDZU GHO sh'A YA, THUB DBANG RDO RJE 'CHANG DBANG BLO BZANG GRAGS, ,CHOS KYI RGYAL MTSAN DGE LEGS RGYA MTSO'I ZHABS, ,BKA' DRIN MNYAM MED NGAG DBANG BYAMS PA LA, , GSOL BA 'DEBS SO THUGS RJE'I LCAGS KYUS ZUDS, ,DE YANG BYANG CHUB LAM GYI RIM PA NYAMS SU LEN TSUL DMAR KHRID KYI RIM PA MDOR BSDUS SHIG 'DRI BAR BYA STE, DE LA LAM GYI RIM PA DE JI LTA BU ZHE NA, BYANG CHUB NI SANGS RGYAS KYI BYANG CHUB DANG, RANG RGYAL GYI BYANG CHUB DANG, NYAN THOS KYI BYANG CHUB STE GSUM YOD LA, 'DIR NI NYAN RANG GI BYANG CHUB GNYIS PO SANGS RGYAS KYI BYANG CHUB TU BGROD PA'I LAM GYI RIM PA'I GROGS SU BYAS TE STON BAS NA, BYANG CHUB LAM GYI RIM PA ZHES BYA'O, ,DE NYAMS SU LEN PA LA, NYAMS SU LEN PA PO'I GANG ZAG GIS BLA MA GSER GLING PA DANG JO BO RJE YAB SRAS KYI PHYAG LEN LAS
, ,'BYUNG BA LTAR, GNAS KHANG BYI DOR BYAS TE SKU GSUNG THUGS KYI RTEN BKRAM, MCHOD PA SEMS G-YO SGYUS MA BSLAD CING CHOS BRGYAD DU MA SONG BA'I BKOD PA MDZES PAR BSHAMS, STAN BDE BA LA LUS 'DUG LUGS BRGYAD DAM SPYOD LAM GANG BDES 'KHOD NAS, RANG RGYUD LA LEGS PAR BRTAGS TE KUN SLONG NGAN PAR MA SONG BAR SEMS CAN THAMS CAD KYI DON DU RDZOGS BYANG THOB 'DOD KYI BLO DRAG POS KUN NAS BSLANGS TE, SKYABS 'GRO JI LTAR RIGS PA ZHIG BYA, DE BYED SKABS MDUN GYI NAM MKHAR RANG GI DRIN CAN RTZA BA'I BLA MA DANG DBYER MI PHYED PA'I THUB DBANG RDO RJE 'CHANG LA SANGS RGYAS DANG BYANG CHUB SEMS DPA'I TSOGS KYIS BSKOR BA GSAL BTAB CING, DE DAG GI SKU LAS BDUD RTZI SNA LNGA'I 'OD ZER DANG BCAS PA'I RGYUN BABS, RANG GI LUS LA ZHUGS PAS SDIG SGRIB DAG ,SKYABS YUL RNAMS KYI SKYABS 'OG TU CHUD PA'I MOS PA DANG, TSAD MED BZHI BSGOMS ZIN RJES TSOGS ZHING RNAMS 'OD DU ZHU NAS, THUB PA'I DBANG PO LA THIM ZHING, THUB PA'I DBANG PO RANG NYID LA THIM PAR BSGOM PAR BYA'O, ,DE NAS, MDUN GYI NAM
MKHA'I DBYINGS SU SENGGE CHEN PO BRGYAD KYIS BTEG PA'I RIN PO CHE'I KHRI MTHO ZHING YANGS PA'I STENG KHAR SNA TSOGS PAD ZLA NYI MA'I DKYIL 'KHOR GYI STENG DU, NGO BO RANG GI DRIN CAN RTZA BA'I BLA MA YIN PA LA RNAM PA THUB DBANG RDO RJE 'CHANG SKU MDOG GSER BTZOM LTA BU DBU GTZUG TOR DANG LDAN PA, ZHAL GCIG PHYAG GNYIS G-YAS SA GNON DANG, G-YON MNYAM GZHAG GI STENG NA BDUD RTZIS GANG BA'I LHUNG BZED BSNAMS PA, SKU LA CHOS GOS DUR SMRIG GI MDOG CAN GSUM MJOS PAR GSOL BA, MTSAN DPES BRGYAN PA'I DVANGS GSAL 'OD KYI RANG BZHIN CAN, SKU LAS SKYES PA'I 'OD KYI PHUNG PO'I DBUS NA ZHABS GNYIS RDO RJE SKYIL KRUNG GIS BZHUGS PA'I SKU'I G-YAS PHYOGS SU BYAMS PA LA RGYA CHEN SBYOD BRGYUD, G-YON PHYOGS SU 'JAM DBYANGS LA ZAB MO LTA BRGYUD, RGYAB PHYOGS SU RGYAL BA RDO RJE 'CHANG LA NYAMS LEN BYIN RLABS BRGYUD, MDUN DU DRIN CAN RTZA BA'I BLA MA LA CHOS 'BREL YONG PA'I BLA MA RNAMS KYIS BSKOR NAS BZHUGS PA'I MTHA' SKOR DU BLA MA YI DAM SANGS RGYAS BYANG SEMS DPA' BO MKHA' 'GRO BSTAN BSRUNG YE SHES PA'I TSOGS KYIS BSKOR BA GSAL BTAB LA, SPYAN 'DREN DANG YAN LAG BDUN PA, LAM RIM GSOL 'DEBS KYI SGO NAS GSOL 'DEBS BDUD RTZI 'BEB SBYANGS DANG BCAS PA, MTHAR TSOGS ZHING RNAMS THUB PA'I DBANG PO LA RIM GYIS BSDUS SHING, THUB PA'I DBANG PO RANG GI SPYI BOR BYON PA'I MOS PA BYED PA RNAMS BYANG CHUB BDE LAM DANG MYUR LAM SOGS LAS 'BYUNG BA LTAR BYAS RJES, RANG GI BLA MA RNAMS KYI SKU'I RNAM PA, GSUNG GI GDANGS, MDZAD
, ,PA'I RNAM PA STON TSUL RNAMS YID LA BYAS TE, BDAG GI BLA MA 'DI RNAMS RDZOGS PA'I SANGS RGYAS DNGOS RANG YIN AANG SNYAM DU BSAM, 'O NA SANGS RGYAS LA SKYON MI MNGA' LA, BLA MA 'DI RNAMS LA SKU CHAS LA SER SNA, CHOS 'CHAD PA LA MI MKHAS PA, PHYOGS ZHEN GYI MDZAD PA LA SOGS PA SKYON 'DI 'DRA 'DUG GO SNYAM NA, G-YA' G-Y'A, KHYOD RE SDUG ,KHVA TAS MI GTZANG ZOS PA'I MCHU, ,SA GTZANG DAG LA 'BAD DE 'PHYID, CES PA'I NGANG TSUL LTAR, KHYOD RANG GI BLO NYON MONGS PAS BSGRIB STE SNANG PA MA DAG PA'I SKYON RNAMS BLA MA LA 'GEBS PA, MIG RAB RIB KYIS BSLAD PA LAS TSES BRGYAD KYI ZLA BA LA GZA' 'DZIN BYUNG BAR SNANG BA DANG 'DRA'O SNYAM DU RANG NYID SUN PHYUNG, BDAG GI BLA MA 'DI RNAMS BDAG LA BKA' DRIN SHIN TU CHE STE, BDAG SNGAR KA KHA TZAM YANG MI SHES PA'I 'BU DANG 'DRA BA LA, BLA MA 'DI RNAMS KYI BKA' DRIN LAS, LHA CHOS DANG MI CHOS 'DI LTA BU SHES SO SNYAM DU BLA MAS BZHUN MTHAR BCAD NAS RANG LA YOD PA'I YON TAN RNAMS DRAN PAR BYAS TE, 'DI THAMS CAD BLA MA 'DI RNAMS KYI BKA' DRIN YIN NO SNYAM DU DAD PA LHANG LHANG BA BSGOMS, YANG DE LTA NA, BDAG GIS BLA MA 'DI RNAMS KYI BKA' DRIN BSAB PAR BYA, DE LA YANG, BLA MA MNYES PAR BYA BA NI, BKA' DRIN BSAB PA'I THABS MCHOG YIN PAS CI NAS KYANG BLA MA'I BKA' BZHIN BSGRUBS TE CHOS YANG DAG PA ZHIG BYED SNYAM PA DANG, BLA MA'I SKU LUS KYI SNYUN G-YOG LA SOGS PA THAMS CAD KYANG BKA' LAS MI 'DA' BAR BSGRUB SNYAM DU BLO SPYONG ZHING, LAG LEN LA 'GEL BA
BSHES GNYEN BSTEN TSUL LA BLO SBYONG BA YIN, GA RE, BLA MA'I BKA' BZHIN BSGRUB PA LA NGA'I LUS RTEN 'DI LA SNYING PO LEN DGOS, DE GANG YIN NA, NGA'I LUS RTEN 'DI LA MI LUS ZER, MI LUS KYI NANG NAS KYANG DAL 'BYOR TSAD BA'I RTEN YIN, 'DI LA RANG GIS NYAMS LEN YAGS PO ZHIG BYAS NA SANGS RGYAS TSE 'DI RANG LA THOB YONG, CHUD ZOS SU SHOR NAS SHIN, SLAR 'DI 'DRA THOB MI THUB, DE GANG LAS SHES NA, SANGS RGYAS BCOM LDAN 'DAS KYIS PHYAG SEN GYI RTZE MOS SA RDUL BZHES NAS, DGE SLONG DAG ,NGAN 'GRO NAS SHI 'PHOS TE BDE 'GROR 'GRO BA DANG, BDE 'GRO NAS SHI 'PHOS TE BDE 'GROR 'GRO BA NI NGA'I SEN MO'I RTZE'I RDUL DANG 'DRA, NGAN 'GRO NAS SHI 'PHOS TE NGAN 'GROR 'GRO BA DANG, BDE 'GRO NAS SHI 'PHOS TE NGAN 'GROR 'GRO BA NI SA CHEN PO'I RDUL DANG 'DRA'O, ZHES DANG, 'JAM MGON CHOS KYI RGYAL POS KYANG, DAL BA'I RTEN 'DI YID BZHIN NOR LAS LHAG ,'DI 'DRA RNYED PA DA RES TZAM ZHIG YIN, ZHES GSUNGS PA'I LUNG LAS SHES SHING, RANG GI NYAMS MYONG GIS KYANG NGES PAR SHES TE, MI LUS 'THOB PA LA, DGE BRGYA CHEN PO BYED PA DANG, DE YANG SDIG DANG MA 'DRES PA ZHIG DGOS PA LA, RANG RE LA DE 'DRA MI 'DUG PA, SNYAM DU THABS SNA TSOGS NAS BSGOM PA DAL 'BYOR RNYED DKA' BSGOM PA LA BLO SBYONG, DE LTAR RNYED DKA' ZHING DON CHE BA'I DAL 'BYOR GYI RTEN DE LA SNYING PO LEN PA LA SKYES BU GSUM GYI LAM GYI RIM PA LA BLO SBYONG BA YIN, DE LA, SKYES BU CHUD DU'I LAM GYI RIM PA LA BLO SBYONG BAR BYED PA LA, 'CHI BA MI RTAG PA DANG, NGAN 'GRO'I SDUG BSNGAL BSAMS PA, SDIG SPOD
, ,DGE BA BSGRUB PA, DKON MCHOG LA SKYABS 'GRO RNAMS BYA ZHING, DE LA MYONG BA THON PA NA, THABS DE DAG LA BRTEN NAS MTHO RIS TZAM THOB KYANG, DE MI BRTAN PAS 'KHOR BA SBYI LA NGES 'BYUNG GI BLO BSKYED DE, LAM BSLAB PA GSUM LA BSLABS NAS MYANG 'DAS KYI GO 'PHANG BSGRUB PA 'BRING DANG, DE LTAR SHES NAS THABS NGES MYUNG 'DAS THOB KYANG, DMAN PA'I MYANG 'DAS NYAN RANG GI LAM YIN PAS, SEMS CAN THAMS CAD SDUG BSNGAL LAS SGROL BA'I PHYIR TU SANGS RGYAS KYI GO 'PHANG THOB PAR BYED PA SKYES BU CHEN PO'I LAM STE, SKYES BU GSUM GYI LAM LA BLO SBYONG BAR BYED DGOS PA YIN, DE LA DANG POR, SPYI BOR BLA MA THUB DBANG BSGOM BZHIN PAS, BDAG NGES PAR 'CHI, NAM 'CHI NI NGES PA MED 'CHI BA'I TSE CHOS MA GTOGS GANG GIS KYANG MI PHAN AANG, SNYAM DU SGOMS, DES PAR 'CHI STE, NGA MI YIN, SO SO SKYE BO'I MI SNGAR MA SHI BA SU YOD, DA SU MI 'CHI BA YIN SNYAM DU BSAMS, DE YANG, NAM 'CHI MI NGES TE, SPYIR 'DZAM BU GLING PA'I TSE LA NGES PA MED, KHYAD PAR DU DA'I LUS 'DI NYID 'CHI RKYEN SHIN TU MANG, JI 'DRA BYAS TE MANG BA YIN NA, LUS 'DI LA RLUNG MKHRIS BAD KAN GYI NAD YOD, NA TSA DE LTA BU DRAG PO ZHIG GLO BUR NGU LANGS TE, DA LTA RANG MI 'CHI BA'I NGES PA GANG LA YOD, DER MA ZAD, GSON RKYEN KUN YANG 'CHI RKYEN YIN TE, KHANG PA RDIB PA'I 'OG TU SHOR NAS 'CHI, RTAS BRDABS NAS 'CHI, LTO MA BZHU BAR NA NAS 'CHI, DE DAG YIN PA GSON RKYEN DU 'BAD RTZOL BYAS NAS BSGRUB PA YIN
MOD, DES NA, JO BO RJES, TSE 'DI LA KHA'I SPUD MA 'DRA, ,RLUNG PO GAR CHE'I RKYEN DBANG YIN, ZHES DANG, KLU SGRUB KYIS, SA DANG LHUN PO RGYA MTSO NYI MA BDUN, ,'BAR BAS BSREGS PA'I LUS CAN 'DI DAG KYANG, ,THAL BA YANG NI LUS PAR MI 'GYUR NA, ,SHIN TU NYAM CHUNG MI LTA SMOS CI 'TSAL, ZHES GSUNGS, SNYAM DU BSGOMS TE, DA LTA RANG 'CHI NYEN YOD SNYAM DU 'JIGS ZHUM PA BSKYED, YANG, SHI TSAR BA'I RJES DER DA GANG BYAS 'GRO SNYAM DU SGOMS, GANG BYED RGYU MED, SKYEB ZHIG BLANG 'GRO ,SKYE SA NGAN 'GRO DANG BDE 'GRO GANG RUNG LAS MA 'DAS, DAN 'GROR SKYES NA NGAN SONG GSUM YOD PAS, DMYAL BAR SKYES NA NGA ME LA BSREGS YOD, SOG LES GSHEGS YONG, MDUNG LA BRGYUS YONG, LCAGS KHANG SGO MED ME 'BAR BAR BCUG YONG, SDUG BSNGAL DE 'DRA MYONG YANG LAS MA ZAD BAR DU MI 'CHI, DER TSE TSAD NI, THUNG SHOS KYI NYIN ZHAG RE LA YANG RGYAL CHEN RIGS BZHI BA'I TSE TSAD RE YOD, MI'I LO LNGA BCU LA RGYAL CHEN RIGS BZHA'I NYIN ZHAG GCIG YIN, DE LTA BUR SKYES NAS LUS NANG NGA GA 'DRA BYED, SNYAM DU KLAD PA TSA KA MA PA MA BYUNG PAR DU BSGOMS, DE BZHIN DU, YI DVAGS KYI BKRES SKOM, DUD 'GRO'I GCIG LA GCIG ZA SOGS KYI SDUG BSNGAL YANG LEGS PAR BSAMS TE, DA NGAN SONG DE 'DRA LA MA SHOR BA ZHIG NGES PAR RAD BYA, DE LA YANG, SKYABS GNAS SHIG LA SKYABS ZHU BA DANG, NGAN SONG DU SKYE BA'I RGYU LAS 'BRAS LA 'DZEM BAG BYED PA GNYIS PO YIN, DE YANG SANGS RGYAS DKON MCHOG NI, SKYABS STON PA LA MI BSLU STE, SANGS RGYAS KYIS GANG
, ,GSUNGS PA BYAS NA 'DI PHYI'I 'DOD DON THAMS CAD 'GRUB, CHOS NI SKYABS DNGOS YIN TE, CHOS TSUL BZHIN DU NYAMS SU BLANGS NA, NGAN SONG DANG 'KHOR BA THAMS CAD LAS GROL BA THAG CHOD, DGE 'DUN NI, DE LTAR BYED PA'I GROGS YIN PAS SANGS RGYAS MA THOB BAR DU SHI GSON SKYID SDUG CI 'DRA ZHIG BYUNG YANG SKYABS KHYED GSUM LA BLO 'GEL, BDAG 'KHOR BA DANG NGAN SONG GI SDUG BSNGAL THAMS CAD LAS BSKYAB TU GSOL, SNYAM DU SKYABS 'GRO DANG, BDAG GIS SDIG PA'I LAS CHUNG DU ZHIG LAS MA BYAS KYANG 'BRAS BU SHIN TU CHE BA'I SDUG BSNGAL DANG, DGE BA CHUNG DU ZHIG LAS MA BYAS KYANG 'BRAS BU SHIN TU CHE BA'I BDE BA 'ONG STE, SNGON DGE SLONG LUS RTZAL YANG BA ZHIG LA RTZED MO'I TSUL DU SPRE'U DANG 'DRA'O, ZHES SMRAS PA LAS CHO RABS LNGA BRGYAR SPRE'UR SKYES PA DANG, KHYIM BDAG DPAL SKYES SHA SBRAD DU SKYES PA'I DUS SU DE BZHIN GSHEGS PA'I MCHOD RTEN GYI MTHA' SKOR LA RTA BTAGS PA'I SBANG GI DRI LA SNOM GYIN PHYIN PAS MCHOD RTEN LA SKOR BA 'KHOR BA'I DGE RTZA LA BRTEN NAS MIR SKYE PA'I LAS BSAGS PA LTA BU LAS GANG BYAS PA LAS 'BRAS BU CHEN PO RE NGES PAR 'OD BA LA YID CHES DUNG DUNG BA DANG, DES NA BDAG GIS MI DGE BA BCU SPANGS TE DGE BA BCU'I LAM LA BLO SBYONG CI NUS SU BYA SNYAM DU SGOMS TE, DE NI SKYES BU CHUNG DU'I LAM LA BLO SBYONG PA YIN, DE NAS, BDAG GIS THABS DE LTA BUS MI DGE BCU SPONG GI LAM LA BSLABS PAS MTHO RIS KYI RTEN LHA MI GANG YANG RUNG BA ZHIG THOB KYANG, DE LA YID BRTAN CUNG ZAD KYANG 'CHA' RGYU MED,
MTHA' ZHIG TU NGES PAR ZHIG NAS LAS KYI DBANG 'GA' ZHIG LAS NGAN SONG DU NGES PAR SKYE, DER MA ZAD LHA MI'I RTEN RNAMS KYANG SDUG BSNGAL GYI RANG BZHIN CAN 'BA' ZHIG YIN TE, MDO DRAN PA NYER GZHAG LAS, SEMS CAN DMYAL BA DMYAL MES NYAMS, ,YI DVAGS BKRES SHING SKOM PAS NYAMS, ,DUD 'GRO GCIG LA GCIG ZAS NYAMS, ,MI RNAMS 'TSO BA THUNG BAS NYAMS, ,LHA RNAMS BAG MED PA YIS NYAMS, ,'KHOR BA KHAB KYI RTZE TZAM NA, ,BDE BA NAM YANG YOD MA YIN, ZHES GSUNGS BA'I DON LTAR, 'KHOR BA 'DIR BSDAD PHYIN SDUG BSNGAL 'BA' ZHING LAS MED, DE GANG YIN NA SEMS CAN 'KHOR BA PA THAMS CAD KYI RGYUD LA KHYAB PA 'DU BYED KYI SDUG BSNGAL YOD, DE GANG LA ZER NA, DPER NA ME LCAGS DANG, ME RDO DANG, SPRA BA GSUM 'PHRAD NA ME 'BYIN PA'I NUS PA YOD PA LA BRTEN, DA LTA KHO RANG RNAMS SO SOR BZHAG PA'I DUS ME MI MNGON KYANG, ,THAG CES BRDAB PA'I TSE ME DMAR JING GIS 'BAR BA LTAR, KHYAB PA 'DU BYED KYI SDUG BSNGAL NI SDUG BSNGAL KUN GYIS BON PHRA MO DANG, DE 'KHOR BA PA THAMS CAD KYI LUS NGAG YID GSUM LA KHYAB NAS GNAS SHING, DA LTA MNGON GYUR DU MED KYANG, RKYEN ZHING DANG 'PHRAD PA'I TSE SDUG BSNGAL KAR GYIS LANG BAR BYED, DES NA, DUS RTAG TU SKYID PO ZHIG DGOS RGYU YIN PHYIN, SDUG BSNGAL DE GSUM RTZA BA NAS DRUNGS PHYUNG BA'I MYANG 'DAS SHIG THOB PAR BYED DGOS, DE BYED PA LA 'KHOR BA'I RTZA BA DRUNGS PHYUNG DGOS, DE LA 'KHOR BA'I RTZE BA RIG DGOS, DES NA 'KHOR BA'I RTZA BA NI 'JIG LTA YIN LA, 'JIG LTA DE'I 'DZIN STANGS SUN PHYUNG BA'I SGO NAS 'KHOR BA'I
, ,RTZA BA DRUNGS PHYUD DGOS, DE BYAD PA LA 'JIG LTA NGOS ZIN DGOS, DE NI RANG GI PHUNG PO LNGA PO 'DI 'JIG MKHAN YANG YIN CING, LNGA PO DE TSOGS PA LA BLTOS TE BDAG TU LTA BAS 'JIG TSOGS LA LTA BA ZHES BYA BA YIN, DE'I RTZA BA YANG MA RIG PA KHON LA RAG LUS, GNAS LUGS YANG DAG PA MA RIG PAS PHUNG PO LNGA LA BLTOS TE BDAG TU 'DZIN PAR 'DUG ,DES NA DE'I ZHEN YUL SUN PHYUNG BA'I PHYIR BDAG MED RTOGS PAR BYA, DE'I PHYIR TU LAM BSLAB PA RIN PO CHE GSUM LA SLOB, DE YANG TING NGE 'DZIN YANG DAG PA 'GRUB PA TSUL KHRIMS LA RAG LUS, TING NGE 'DZIN MED NA SHES RAB MI 'BYUNG, SHES RAB MED NA 'JIG LTA DE'I ZHEN YUL SUN PHYUNG MI NUS PAS, DE THAMS CAD KYI RTZA BA TSUL KHRIMS RNAM PAR DAG PAR BYA DGOS, MGON PO KLU SGRUB KYIS, KHRIMS NI RGYU DANG MI RGYU'I SA BZHIN DU, ,YON TAN KUN GYI GZHI RTEN LAGS PAR GSUNGS, ZHES GSUNGS PAS TSUL KHRIMS NI DES PAR YON TAN THAMS CAD KYI RTZA BA YIN, DES NA NGES PAR BDAG GIS RANG RGYUD KYI TSUL KHRIMS RNAM PAR DAG PAR BYA, DE'I PHYIR TU BDAG GIS LTUNG BAS RANG RGYUD MI GOS PA'I THABS LA 'BAD PAR BYA'O, ,SNYAM DU MYANG 'DAS BSGRUB PA'I LAM LA SLOB PA SKYES BU 'BRING DANG, DE LTAR 'KHOR BA'I GNAS LAS BDAG NYID THAR TE; MYANG 'DAS KYI GO 'PHAR THOB KYANG, THEG DMAN GYI MYANG 'DAS YIN PAS GAR YANG MI PHYIN, DES NA BDAG GIS RGYAL BA'I SRAS PO RNAMS KYI SPYOD PA LA BSLAB DGOS, DE LA BYANG CHUB KYI SEMS SKYE DGOS, DE LA SEMS CAN THAMS CAD 'KHOR BA
LAS SGROL 'DOD DGOS, DE LA SEMS CAN THAMS CAD PHA MA DRIN CAN DU SHES DGOS, DE LA BLO BTANG SNYOMS PA BSGRUB DGOS TE, CHOS KYI RGYAL PO TZONG KHA PA CHEN POS, DE LA THOG MAR SEMS CAN KHA CIG LA CHAGS, KHA CIG LA SDANG BA'I PHYOGS RIS SU SPYOD PA BKAG NAS SEMS SNYOMS PA MA BSGRUB NA, BYAMS PA DANG SNYING RJE GANG SKYE BA DE PHYOGS RIS CAN DU SKYE YI, PHYOGS RIS MED PA LA DMIGS NAS MI SKYE BAS BTANG SNYOMS BSGOM PAR BYA'O, ZHES GSUNGS, DES NA SKYE SLA BAS RANG GI MDUN DU RANG LA GNOD PA YANG MA BYAS SHING PHAN YANG MA BTAGS LA, NGO SHES PA'I MI ZHIG GSAL BTAB LA, GA RE, NGA LA 'DIS DON MED DU 'GRAM LCAG CIG RGYAB BYUNG NA GA 'DRA 'ONG, SNYAM DU DMIGS PA GSAL POR BSGOMS, DER TSIG PA ZA KAR TE 'ONG BAS, HA HA RGOD RE BRO, DON MED DU KHONG KHRO LANG BA, KHYOD DON MED KYI LAS KA DE KHA RANG BYED KYIN BSDAD PAS 'DI 'DRA ZHIG LAS MA BYUNG BA 'DUG ,GANG LA TSIG BA ZA, KHOS 'GRAM LCAG GA RU RGYAB BYUNG SNYAM DU RANG GIS RANG SUN PHYUNG STE, KHOS 'GRAM LCAG RGYAB PA'I 'DUN PA NAM BYAS PA'I TSE TSIG PA ZA KAR BA MI SKYE BA ZHIG BYUNG BYUNG BSKYANGS, YANG SKABS 'GAR MI DES RANG LA BSNYEN BKUR DANG GZENGS STOD YAGS PO ZHIG BYAS BYUNG NA GA 'DRA ZHIG 'ONG SNYAM DU LTA, DER BLO DGA' LHANG GIS 'BYUNG BAS, HU HU CHO RE CHUNG GANG DU CHAS KA DANG BSTAD RA STER BYUNG, GANG LA DGA' PA YIN SNYAM DU BRTAG ,DE LTAR BYAS PAS BZANG PO BYAS PA DANG GNOD PA BSKYAL BA'I BSAM MNO GANG BTANG YANG DE'I CHO DGA' SDUG GI RTOG PA MI SKYE BA DE'I TSE MI DE LA BTANG SNYOMS KYI BLO SKYES PA
, ,YIN, DE BYAD NAS RANG SEMS DGA' NGES SHES PA'I MI GCIG GAM, YANG NA 'GA' ZHIG MDUN DU BSGOMS NAS, MI 'DI TSO GA 'DRA YIN SNYAM DU BSGOMS, DE'I TSE 'DI TSO DGA' MO YIN, NGA LA SNGAR PHAN 'DI 'DRA BTAGS, NGA 'DI 'DRA 'DOGS SNYAM DU DGA' LHANG BA RE 'ONG, DER 'O NA, KHYOD LA MI 'DIS GNOD PA BSKYAL TE, NGED RNAMS DANG SNGAR 'PHRAD PA'I TSE NGED TSO'I NANG NAS CHAS KA 'DI 'DRA RE TSANG MA BYUNG, DE GROGS MCHED KYIS KHUR BA RANG NI MIN NAM, ZER BYUNG NA CI 'DRA 'ONG, SNYAM DU BLO GSAL POS BRTAG ,DE LA, AA MA DPE RANG MED DAM STE, DE 'DRA ZER BYUNG NA KHO YAS BA RANG YIN, NGAS KHO LA PHAN NI 'DI TZAM BTAGS SNYAM PA'I BLO ZHIG SHUGS KYIS 'ONG, DE LTAR BYUNG BA'I TSE SLAR BLO BKUG NAS, AA YA MTSAN, DA GI BSAM MNO SNGA MA BTAR DUS DGA' TSOR SKYE, PHYI MA BTANG DUS TSIG PA ZA BA DE 'DRA GANG RED, YANG TIG MI 'DI TSO LA DGA' TSOR BYED DON MI 'DUG ,'DI TSOS GNOD PA BSKYAL NA NI DE MA THAG DGRAR 'DZIN PA 'DUG ,GNOD PA MI BYED ZER THAG CHOD PA'I GDENGS TSAD NI GANG YANG MI 'DUG ,GANG YIN ZER NA, 'DI TSO YAD CHAGS SDANG MA SPANG, NGA RANG YANG CHAGS SDANG MA SPANG, GZHAN YANG CHAGS PA ZER BA 'DI BLO SDUG SHOS RANG ZHIG YIN, SNGON GYI DGRA BCOM SANGS RGYAS KYI NYAN THOS THAMS CAD GSER DANG BONG BA MNYAM PA, NAM MKHA' DANG LAG MTHIL SNYAM PA'I BLO THOB PAS NYON MONGS MA LUS PA SPANGS PA YIN, 'U TSO GSER LA AA 'THAS BYAS, THAL BA LA KHRUG KHRUG BYED KYIN BSDAD KYANG, DKA' TSEGS CHE RU RANG 'GRO GIN MI 'DUG
GAM, PHAt, SNYAM DU BSBOMS, GZHAN YANG, BU MO ZLA MCHOG GIS ZHUS PA LAS, BDAG GIS SNGON CHAD KHYED RNAMS THAMS CAD BSAD, ,BDAG KYANG KHYED KYIS SNGON CHAD GSHAGS SHING GTUBS, ,KUN KYANG PHAN TSUN DGRA DANG GSOD PA YIN, ,KHYED CAG JI LTAR 'DOD CHAGS SEMS KYANG SKYE, ZHES GSUNGS PA LTAR, TSE SNGA MA LAS KYANG BSKOR CING BSAMS PA BYAS NAS CHAGS BA BKAG ,CHAGS PA KHEGS BA'I MTSAN MA BRTAN PO BYUNG BA NA, SEMS MI DGA' NGES SHES PA'I DGRA ZHIG MDUN DU BSGOMS NAS, 'DI GANG YIN SNYAM DU BSAMS, 'DI LTA NGAS SHES, SNGAR LA GNOD PA 'DI 'DRA BSKYAL, DA 'DI SKYEL SNYAM DU NA KAR KAR KHONG KHRO LANG YOD ,DE LA, DE 'DRA MA ZER, KHO YANG NI SDUG MI 'DOD, NGA YANG NI SDUG MI 'DOD, KHO KHO RANG GI BLO LA YOD PA LTAR MA BYUNG BAS KHONG KHRO BYED PA BDEN GRAGS, DA RANG LA YANG MNO BSAM THONGS DANG SNYAM DU BSAM STE SDANG BA BKAG, DE LA SEMS BYAD BA NA, SEMS CAN THAMS CAD MDUN DU BSGOMS NAS, 'DI RNAMS SO SO'I NGOS NAS BDE BA 'DOD SDUG BSNGAL MI 'DOD PA 'DRA ZHING, RANG LA NI BAN BTAGS NA GNYEN DANG GNOD PA BSKYAL NA DGRAR 'GYUR ZHING, DE YANG NI MTHA' GCIG TU MA NGES PAS GANG LA YANG CHAGS SDANG MI BYA'O SNYAM DU BLO SBYONG STE, DE NI BTANG SNYOMS TSAD MED SGRUB BAR BYED PA'I THABS DAM PA'O, ,SEMS CAN LA MAR SHES SOGS KYI BLO SBYONG BA'I SNGON DU DGRA GNYEN BAR MA SEMS CAN SBYI RNAMS LA DMIGS NAS BTANG SNYOMS BSGOM PA 'DI NI, CHOS KYI RGYAL PO TZONG KHA PA CHEN POS, DE LTAR BTANG SNYOMS DANG, BYAMS PA DANG, SNYING RJE LA YUL SO SOR PHYE NAS RIM CAN DU BSGOM PA DE NI CHOS MNGON PA'I MDO'I RJES SU 'BRANGS NAS, SLOB DPON KA MA LA SH'I LAS
, ,MDZAD PA YIN LA, DE NI GNANG SHIN TU CHE STE, SO SOR MA PHYE BAR DANG BO NAS SPYI LA DMIGS NAS SBYANGS PA LA SKYE BA LTAR SNANG YANG, RE RE NAS BSAMS NA GANG LA YANG MI SKYE BAR SNANG LA, RE RE NAS YID 'GYUR GYI MYONG BSNGAR BSHAD PA LTAR BTON NAS, JE MANG DU BTANG STE MTHAR SPYI LA DMIGS NAS SBYANGS NA TSOGS PA DANG SO SO BA GANG LA DMIGS KYANG RNAM DAG SKYE BA'I PHYIR RO, ZHES GSUNGS PA'I DON 'DIR YANG BLANG DGOS PA'I DGONGS PA THUN MONG MA YIN PA'O, ,DE LTAR BSGOMS PAS PHAN GNOD PAR MA GANG LA YANG CHAGS SDANG RMONGS GSUM GYI BLO MI SKYE BA'I BTANG SNYOMS YAGS PO ZHIG 'ONG, DE BYUNG NAS, MAR SHES 'DI LTAR BSGOMS TE, SNGAR KYI BAR MA'I SEMS CAN DE MDUN DU GSAL BTAB NAS, 'DI DA LTA SKYE BAS BAR CHOD PAS BTANG SNYOMS YIN PA LTA BU ZHIG LAS MI 'DUG KYANG, 'DIS TSE RABS SNGON MA MANG PO LA BDAG GI MA BYAS PA'I DRIN CAN YIN SNYAM DU BSAMS, DE 'DRA GA 'DRA BYAS TE YIN SNYAM NA, DA SNGAR 'DI 'DRA ZHIG NAS BYUNG BA YIN, LUS RTEN 'DI LTA BU ZHIG RTAG PAR BLANGS PA YIN, DE DUS SEMS CAN 'DI 'DRA ZHIG GIS RANG GI AA MA BYAS PA YIN ZER RGYU AE YOD SNYAM DU BSGOMS PAS, DE 'DRA MI 'DUG BSAM 'ONG, DER 'O NA KHYOD STANG ZHAN, TSE SNGA MA AA MA YOD MED KYANG SHOD RGYU MI 'DUG ,MI YONG BA'I PHER RGYA'I CHAGS SDANG DE ZHOG LA, SANGS RGYAS KYI BKA' LA NYON DANG DE RANG YAGS BA 'ONG, BCOM LDAN 'DAS THUGS RJE CAN GYIS, SEMS CAN 'DI DAG THAMS CAD RANG GI MAR GYUR PAR GSUNGS PA YIN, DE LA CHA ZHOG LA,
MI 'DI MAR THAG CHOD, DE 'DRA MI YONG STE, TSE SNGON MA LA MA BYAS YOD SHAS CHE YANG DES TSE 'PHOS ZIN PAS MA'I GO MI CHOD, AA MA YIN PA LA TSE 'DI'I MA YIN PA ZHIG DGOS SNYAM NA, KHYOD LA SNGAR DPE CHA SLOB PA'I DGE RGAN DA LTA BSLAB PA 'CHAL TE SPRANG PO BYED PA ZHIG YOD PA'I DBANG DU BYAS NAS, DE KHYOD KYI DGE RGAN YIN NAM MIN, KHYOD KYI DGE RGAN MIN NA, KHYOD LA DPE CHA DE TSO SUS BSLAB BYUNG, KHYOD RANG GIS SHES PA AE YIN, DE MIN; DA LAN GYI SPRANG PO DE SNGAR BTZUN PA'I DUS SU BSLAB PA YIN, 'O NA DGE RGAN MIN PAR GA LA 'GRO ,AA KHA BDEN, DGE RGAN YI 'DUG ,DE DANG MI 'DI AA MA YIN MIN LA KHYAD GANG 'DUG SNYAM DU SBYANG ZHING, GZHAN YANG, RIGS PA'I DBANG PHYUG GIS, SKYE BA YONGS SU LEN PA NA, ,'BYUNG RDUB DBANG PO BLO DAG NI, , RANG GI RIGS LA BLTOS MED CAN, ,LUS NYID 'BA' ZHIG LAS SKYE MIN, ZHES SOGS GSUNGS PA'I RIGS PA LTAR BSKYANGS TE, CHAGS PA DANG BCAS PA'I RIG PA TING 'DZIN GYI GNYEN POS MA ZIN PA YIN PHYIN, RANG GI 'BRAS BUR GYUR PA'I RIG PA PHYI MAR MTSAMS SBYOR BA DANG, RIG PA YIN PHYIN, RANG GI RIG PA SNGA MA SNGON DU SONG BA'I TSUL LA BSAM MNO BTANG BAS, 'KHOR BA THOG MA MED PA DANG, 'KHOR BA THOG MA MED PAS SKYE BA THOG MA MED PA DANG, SKYE BA THOG MA MED PAS SKYE BA GRANGS MED PA DANG, GRANGS MED PAS YUL PHYOGS DANG SA PHYOGS 'DIR MA SKYES ZHES PA DANG, SEMS CAN 'DI'I LUS MA BLANG ZHES PA MED PA DANG, DES NA, 'DIS MA MA BYAS ZHES PA MED SNYAM DU YANG YANG BLO SBYANG STE, BAR MA'I SEMS CAN DE AA MAR NGO 'PHROD NGES SHES PA BYA, DE LA BLO BYANG NAS, DGRA DANG DE
, ,NAS GNYEN DANG, DE NAS SEMS CAN THAMS CAD LA BSGOM PAR BYA'O, ,DE DAG THAMS CAD LA MA'I NGES SHES BRTAN PO SKYES PA'I TSE, DRIN DRAN PA BSGOM STE, CHOS KYI RGYAL PO BLO BZANG GRAGS PA'I DPAL GYI MAN NGAG LAS 'BYUNG BA LTAR, RANG GI TSE 'DI'I AA MA DE, MDUN DU RGAS PA'I RNAM PA NAD KYIS CUNG ZAD BTAB PA NYAM THAG PA ZHIG GSAL BTAB NAS, AA MA 'DIS DA LTAR DU MA ZAD 'KHOR BA THOG MA MED PA NAS MA BYED BYED PA ZHIG YIN, MA NAM BYAS RES KYIS TSE 'DI'I AA MA RANG GIS JI LTAR DRIN GYIS BSKYANGS PA LTAR, DRIN GYIS BSKYANGS PA YIN, AA MA'I DRIN KHYER SA MED PA YOD, GZHAN PHAR ZHOG ,NGA MNGAL DU CHAGS PA NAS BZUNGS TE AA MA LA GNOD PA 'BA' ZHIG BSKYAL YANG, AA MAS PHAN 'BA' ZHIG BTAGS PA 'DI GCIG PU'I DRIN GNAS KHYER SNYAM DU BSAMS, DE 'DRA AA MA LA SUS GNOD PA SKYEL SNYAM NA, KHYOD SDOD, NGA RGYUS CHE, SDOD SA DPRAL BAR BYAS THAL BA MIG LA 'DEBS MKHAN KHYOD YIN MOD, KHYOD AA MA LA LAN CHAGS NAS, MNGAL DU SKYES MA THAG TU AA MA LA TSAD PA DANG 'DRES PA'I NA TSA CHEN PO BZOS, RIG PA NYOB DING GIS 'GRO BAR BYAS, LUS CHER SKYES NAS AA MA'I BSAM PAR KHYOD LA GNOD DOGS NAS LTO GRANG MO ZA THEBS MA BYUNG, TSA MO ZA THEBS MA BYUNG, GANG 'DOD DU NYAL THABS MA BYUNG, RGYUG THEBS MA BYUNG, KHYOD KYIS PAR 'GUL TSUR 'GUL BYAS TE AA MA KHOG PA NAS DKRUGS, KHYOR SKYE BA'I DUS SU AA MA'I LUS THAMS CAD BRGYANGS NAS ZUG RDU BZOD GLAGS BRAL BA BZOS, LUS KYI GSHED THAMS CAD PHYUNG NAS MA SHI TZAM BZOS, AA
MAR SENG GRAGS PA MIN PA, KHYOD DNGUL CHU RIL BU ZHIG ZOS NAS BSHIG NA GANG BYED RGYU YIN, KHYOD RANG GZAN CHANG BU ZHIG MA BZHU BA LA 'JU SMAN GA TZAM ZA YI YOD, MNO BSAM THONGS, KHYOD CHUNG CHUNG GI DUS LTOGS 'KHYAGS SKOM GSUM CUNG ZAD TZAM BYUNG BA LA SDUG SKAD GTZAM RGYAB, PHAR TSAD NAS NYAN MKHAN TSO YANG SUN DU BCUG ,AA MAS DA DUNG DGA' TSOR DANG SNYING RJE BYAS TE, GANG DRAG ,GANG DRAG ,BU CHUNG, BU CHUNG, SHOG SHOG ,MA DU, MA DU, G-YA', G-YA', 'DI ZO, 'DI 'THUNG, NGA'I 'DI MA DU CIG ,ZER GA TZAM BYAS, KHYOD RANG DA LTA AA MA NANG LA YOD NAS ZHAG 'GA' ZHIG 'GOR BA DANG, MGRON PO LAB LAB MANG BA RE NANG DU ZHAG POR BSDAD KYANG SUN SNANG GA 'DRA 'DUG ,MGO 'THOMS PA KHYOD 'DRA 'ONG BA, KHYOD DA LTA MI ZHIG GI LUD PA RANG GI LHA MA LA GOS PA MTHONG NA YANG, AA KHA KHA, SKYUG DRON 'DI 'DRA GOS 'DUG ZER, KHA GNYER GYIN SGO RGYAB TU PHYIN NAS THAL PHUNG ZHIG LA PHYIS 'GRO ,AA MAS KHYOD KYI SNA BUG 'GAGS NAS LUS DOGS SNABS LUD KHAS PHYIS, MI GTZANG BA LAG PAS PHYIS, GA 'DRA BYAS, BSAM MNO THONGS SHIG ,DRANG PO YIN, AA MAS KHYOD LA BSTOD RA BTANG, DE LA GZHAN GYIS ZHE SUN BYAS NAS AA MA KHONG KHRO GTZAM LANG YOD, NA TSOD YAR TZAM LONGS NAS KHYOD 'GANG CHEN DPE MI SRID PA ZHIG BZO 'DOD DE; BZHUN MTHAR GCOD PA LA DKA' TSEGS GA 'DRA BYAS, KHYOD GLO KHOG KHOG PA NAD DU MNGON PAR BYUNG NA NGO NAG TING GIS 'GRO ,KHA 'DZUM PA RE BYUNG NA DGA' TSOR GYIS 'GRO ,DRIN KHYER SA 'DUG GAM SNYAM DU BSAM, DE LTAR SEMS BLONG BLONG BA MA BYUNG
, ,BAR DU BSGOMS, DE LA YID 'GYUR BA NA, PHA LA SOGS PA'I GNYEN DANG, BAR MA'I SEMS CAN RNAMS DANG DGRA RNAMS DANG, MTHAR SEMS CAN THAMS CAD MDUN DU BSGOMS NAS, 'DI THAMS CAD KYANG SNGAR BSGRUB PA LTAR AA MA YIN, AA MA NAM BYAS DUS PHAN 'DOGS LUGS TSE 'DI'I AA MA DANG 'DRA SNYAM DU BSAMS, DE LA MYONG BA THON PA NA, DRIN GZO BSGOMS TE, DRIN CHE BA BDEN 'DUG KYANG, DA GANG BYED DGOS RGYU YIN SNYAM NA, GZHAN GANG BYED RGYU YOD, DRIN LAN GSOB, AA MA 'DI 'KHOR BA NA BSDAD 'DUG ,SEMS RGYUD NI SDIG BAS GANG 'DUG ,SDIG 'BRAS NI DMYAL BA SOGS NGAN SONG GSUM LAS MED, AA MA DMYAL BAR SKYES NAS ME LA BSREGS NAG 'DRA BYED, KHYOD RANG DANG SEMS SHIN TU NYE BA'I MI ZHIG ME'I DKYIL LA SHOR SONG NA, KHYOD GA 'DRA'I CHA DRAG 'ONG, DE LA DE 'DRA NA AA MA BSKAL PA'I BAR ME LA BSREGS PA BZOD 'DUG GAM, CHOS KYI RGYAL PO TZONG KHA PA CHEN POS, DES NA DE LTA BU'I DRIN CAN 'DOR BA NI MA RABS RNAMS LA'ANG MI RIGS NA BDAG GI TSUL DANG GA LA MTHUN SNYAM DU BSAMS NAS, DRIN LAN BSKOR BA'I KHUR BZUNG NGO, ZHES PA'I BKA' RDO RJE'I RI BO LTA BU 'DI LA YANG BSAM MNO BTANG PAS SHES SNYAM DU BSGOM ZHING DON BSAMS, DE LTAR DRIN GZO RNAM DAG RGYUD LA SKYES NAS DRIN LAN GZHAL BAR BYED PA LA, BYAMS PA DANG SNYING RJE LEGS PAR SBYANGS PA'I LHAG BSAM GYIS SNA DRANGS TE, BYANG CHUB KYI SEMS BSGOM DGOS PAS, DE LA BYAMS PA LA BLO 'DI LTAR SBYONG STE, RANG GI
MDUN DU AAM NAS SEMS CAN THAMS CAD KYI BAR RIM BZHIN GSAL BTAB CING, 'DI RNAMS DA LTA BDE BA 'DOD, SDUG BSNGAL MI 'DOD PA YIN KYANG, BLANG DOR GYI GNAS LA KUN NAS 'THOMS PA'I BLOS YIN LUGS MIN LUGS MI SHES PAR, BDE BA BSGRUB RGYU YIN SNYAM DU SDEG RE BSAGS, DES 'BRAS BU SDUG BSNGAL RE MYONG BAR 'DUG ,'DI BDE BA DANG LDAN NA CI MA RUNG, SDUG GE 'DI RNAMS KYIS BDAG DRIN GYIS DE TZAM ZHIG BSKYANGS PA YIN, BDAG GIS DRIN LAN DU 'DI RNAMS ZAG MED KYI BDE BA DANG 'PHRAD PAR BYA'O SNYAM PA DANG, SNYING RJE NI, MA SOGS MDUN DU RIM PA BZHIN BSGOM PA LA, PHA'U; 'DI TSO SDIG PA BSAGS PA'I 'BRAS BU SDUG BSNGAL CHEN PO DMYAL BA'I MES BSREGS PA LA SOGS PA MYONG NA GA 'DRA BYED, MYONG NI THAG CHOD; GZHAN PHAR ZHOG ,NGAG 'KHYAL SMRAS PA'I 'BRAS BU LA YANG DMYAL BAR SKYE BAR GSUNGS, 'DI RNAMS KYIS NYI MA RE RE LA YANG DAG 'KHYAL NI BSAM GYIS MI KHYAB PA ZER, SDIG PA SNA GCIG PO DE LA RANG YANG DE 'DRAN DA GANG DRAG ,'DI RNAMS SDUG BSNGAL DANG BRAL NA CI MA RUNG, NGA LA DRIN NI DE TZAM YIN, BDAG GIS SDUG BSNGAL DANG BRAL BAR BYA'O SNYAM PA DANG, DA NI CI BYED, BYA BZHAG GZHAN RNAMS SKYUR LA THONGS, KHYOD PHO RGOD KYI RAB CIG GYIS, AA MA GRANGS MED PA SDUG BSNGAL DU BCUG NAS GANG BYED, 'DI RNAMS SDUG BSNGAL LAS SGROL BA'I KHUR DE NGA RANG LA BABS, DES NA THABS GANG LA BRTEN NAS 'DI RNAMS ASDUG BSNGAL LAS SGROL NUS PAR 'DUG KYANG, DKA' TSEGS LAM BLTOS PAR BDAG GIS BYED SAM PA'I LHAG BSAM RNAMS
, ,LA BLO SBYONG, DE RNAMS LA MYONG BA THON NAS BYANG CHUB KYI SEMS LA BLO SBYONG STE, DANG POR DA G-YA', KHYOD KYIS SEMS CAN GYI DON BYED RGYU YIN NA, SEMS CAN 'DI TSO 'KHOR BA 'DI NAS JI 'DRA BYAS TE 'DREN RGYU YIN, ZER NA, DA LTA NUS PA MED; 'O NA GA 'DRA BYED RGYU YIN NA, SEMS CAN 'DI RNAMS LA PHAN PA'I PHYIR, SANGS RGYAS THOB PA ZHIG BYED DGOS, DE THOB NA SEMS CAN GYI DON THAMS CAD JI LTA BA BZHIN DU BYED NUS PAS GZHAN GYI DON PHUL DU PHYIN, RANG YANG SDUG THAMS CAD ZAD SKYID THAMS CAD RDZOGS PAS RANG DON YANG MTHAR PHYIN PA YIN PAS, DAM RGAN 'DI TSO'I DON DU SANGS RGYAS KYI GO 'PHANG THOB PAR BYED DGOS, DES NA BDAG GIS SEMS CAN THAMS CAD KYI DON DU BLA NA MED PA YANG DAG PAR RDZOGS PA'I SANGS RGYAS KYI GO 'PHANG RIN PO CHE CI NAS KYANG THOB PAR BYA'O SNYAM PA'I BYANG CHUB TU SEMS BSKYED PA'I SMON SEMS DANG, SEMS CAN THAMS CAD KYI DON DU RDZOGS PA'I SANGS RGYAS KYI GO 'PHANG RIN PO CHE CI NAS KYANG THOB PAR BYA, DE'I PHYIR TU BDAG GIS RGYAL BA'I SRAS KYI SPYOD PA THAMS CAD LA BSLAB PAR BYA'O SNYAM DU 'JUG SDOM STE SMON 'JUG GI SEMS GNYIS BSKYED, 'DI NI JO BO RJE'I LUGS KYI BYANG SEMS SPYOD LUGS YIN, ZHI BA LHA'I LUGS NI BDAG GZHAN MNYAM BA RJE YIN TE, SPYOD 'JUG LAS, GANG ZHIG BDAG DANG GZHAN RNAMS NI, ,MYUR DU SKYOB PAR 'DOD PA DES, ,BDAG DANG GZHAN DU BRJE BYA BA, ,GSANG BA'I DAM PA SPYAD PAR BYA, ZHES DANG, 'JIG RTEN BDE BA JI SNYED PA, ,DE KUN GZHAN BDE 'DOD LAS BYUNG, ,'JIG RTEN SDUG BSNGAL JI SNYED PA, ,DE KUN BDAG BDE
'DOD LAS BYUNG, ,MANG DU BSHAD LTA SMOS CI DGOS, ,BYIS PA RANG GI DON BYED DANG, ,THUB PA GZHAN GYI DON MDZAD PA, ,'DI GNYIS KYI NI KHYAD PAR LTOS, ,BDAG BDE GZHAN GYI SDUG BSNGAL DAG ,YANG DAG BRJE BAR MA BYAS NA, ,SANGS RGYAS NYID DU MI 'GRUB CING, ,'KHOR BA NA YANG BDE BA MED, CES GSUNGS PA LTAR, BDAG GCES 'DZIN LA DGRAR BLTAS TE, DE LA 'BUR 'JOMS BYED DGOS PA YIN PAS, DE'I TSUL NI, RANG GI MDUN DU TSE 'DI'I MA LA SOGS PA'I SKYE BO MANG PO GSAL BTAB STE, 'DI RNAMS LA RGYU GZER GYI RIMS NAD PHOG PA TZAM GYIS ZUG RDU DRAG PO DANG BCAS TE RTAG TU 'KHRU ZHING, ZHAG GSUM NAS 'CHI BA ZHIG BYUNG ZHING, DE LA PHAN PA'I THABS NI RANG GIS SHES LA, 'OG BA NI SHIN TU SLA BA ZHIG YOD NA JI 'DRA ZHIG 'ONG, SNYAM DU BLO GSAL POS BRTAG ,DER 'RDZI, DE 'DRA 'GOS NA NGA BRLAG 'GRO BAS BROS 'GRO SNYAM PA ZHIG 'ONG, PHAt, KHYOD KYIS AA MA SDUG BSNGAL DU BCUG NAS KHYOD BROS, NGO TSA MI SHES PA, KHYOD 'DI KHA RANG BYED KYIN BSDAD PAS SKYID PA DANG GTAN BRAL BYAS 'DUG ,SNGA MO ZHIG NAS, AA MA RNAMS KYI SDUG BSNGAL SEL THABS LA BRTZON PAR BYAS NAD TZAM GSHIN RJE CHOS RGYAL DANG, TSANGS PA DANG, BRGYA BYIN RNAMS KYIS PHYAG BYAS CHOG PA'I RNAM DPYOD CAN YOD RGYU LA ,KHYOD KHYOD RANG SKYID 'DOD KYIS BSDAD PAS NAG THOM ME 'DI RU LUS 'DUG ,BCOM LDAN 'DAS KYIS, STAG MO LTOGS PA DANG, GNOD SBYIN LTOGS PA DANG, SKYE BO LTOGS PA RNAMS LA RANG GI SKU LUS BYIN 'DUG ,KHYOD SHIG GIS ZAS KYANG CHUNG BA LA RGYANG BSKYUR DANG, CHE BA LA SEN BCAR GYI GNOD PA BYED
, ,'DUG ,SANGS RGYAS YAR THAL, KHYOD 'DI RU LUS PA 'DI KHA GANG LA THUG 'DUG ,MGO MJUG NGO MI SHES PA KHYOD 'DRA, NGAS SHES, MI LAN, DGU LAN, MI BYED DGU BYED THAMS CAD KHYOD SKYID 'DOD 'DI RANG LA THUG SONG DA SHES, NYI MA DE RING NAS BZUNGS TE, KHYOD YAL BAR DOR, SEMS CAN RNAMS GCES PAR 'DZIN RGYU YIN, KHYOD SEMS CAN RNAMS KYI G-YOG POR CI BDER MA BYIN NA, KHYOD KYIS NGA DMYAL BAR BSKYUR THAG CHOD, DA SEMS CAN RNAMS GCES PAR BZUNG, RANG YAL BAR 'DOR BAR BYA'O SNYAM DU BSAMS NAS, SNA BUG G-YAS NAS RLUNG PHYIR 'BYUNG BA DANG SNYAM DU 'OD ZER ZHIG SONG BA, SEMS CAN RNAMS KYI SNA BUG G-YON NAS ZHUGS, SEMS CAN RNAMS KYI SNYING LA GZUGS, RANG GIS TSE 'KHOR BA THOG MA MED PA NAS BSAGS PA'I DGE BA DANG DE'I 'BRAS BU BDE BA MYONG RGYU THAMS CAD BDUD RTZI DKAR PO'I RNAM PAR 'OD DE LA 'KHRIL NAS, SEMS CAN RNAMS KYI SNYING KHAR THIM PAS BDE BA GANG YOD SEMS CAN RNAMS LA THOB PAS SEMS CAN RNAMS SKYID SANGS KYIS SONG, 'OD TSUR 'ONG BA DANG MNYAM DU SEMS CAN DE DAG GIS TSE 'KHOR BA THOG MA MED PA NAS BSAGS PA'I SDIG LTUNG GI PHUNG PO JI SNYED PA DANG, DE'I 'BRAS BU SDUG BSNGAL GYI TSOGS JI SNYED PA THAMS CAD DUD KHU NAG CING DRI RUL BYING NGA BA'I RNAM PAR BKUG ,SEMS CAN GYI SNA BUG G-YAS NAS THON, RANG GI SNA BUG G-YON PA NAS ZHUGS TE, ,SNYING KHAR NGA NGA SNAM PA'I BLO DE'I MGO LA RGYAB PAS SDUG BSNGAL THAMS CAD RANG GI THOG TU BYUNG
BAR BSGOM ZHING, KHYOD SNYING TSIM, DA GYIS, DA DUNG 'DI LAS KYANG CHE BA'I SDUG BSNGAL 'ONG BAR GYUR CIG SNYAM DU DBUGS 'BYUNG RNGUB DANG BCAS TE BLO SBYANGS, DE'I TSE RANG GI MTHA' SKOR DU DMYAL BA, YI DVAGS, DUD 'GRO ,LHA MI LHA MA YIN LA SOGS PA THAMS CAD BSGOMS TE, DE THAMS CAD KYI SDUG BSNGAL LEN PA'I DMIGS PA BYA STE, DPER NA BYI'U LA KHRA'I 'JIGS PA DANG, BYI BA LA BYI LA'I 'J PA YOD PA LA SOGS PA RNAMS KYANG BDAG GI STENG DU LEN PAR BYA BA LTA BU YIN CING, BDAG GIS RANG YAL BAR DOR NAS GZHAN GCES PAR BZUNGS TE SEMS CAN GYI DON DU DKA' BA JI SNYED PA THAMS CAD BZOD PAR BYAS NAS SANGS RGYAS THOB PAR BYA'O SNYAM DU BLO SBYANGS, DE LTAR BLO LEGS PAR 'BYONGS NAS SAM SKABS GANG YANG RUNG BAR SMON 'JUG GI SEMS CHOGS BSKYED PA LAM RIM BDE LAM LAS 'BYUNG BA BZHIN BYA, DE NAS BDAG GIS RGYAL BA'I SRAS KYI MDZAD PA DANG MTHUN PAR BLO SBYANGS TE, GTONG BA'I SEMS RGYA CHER SPEL NAS, BCOM LDAN 'DAS RGYAL BU SNYING STOBS CHEN PO DANG, NAM MKHA' DANG, NYA'I RGYAL PO SOGS SU 'KHRUNGS PA'I DUS LTAR, SBYIN PA'I PHAR PHYIN LA SLOB SNYAM PA DANG, 'PHAGS PA RTA THUL DANG NYE BA 'KHOR DANG, SNGON GYI DGE SLONG GZHON NU CHU SROG CHAGS MED BA MA 'BYOR BAR SHI BA DANG, BUM PA CAN GYI SKYES RABS LTAR TSUL KHRIMS KYI PHAR PHYIN LA SLOB SNYAM PA DANG, DRANG SRONG BZOD PA SMRA BA DANG, SPRE'U'I RGYAL PO DANG, SENGGE YI DAM BRTAN PA DANG, DGE DON DU 'KHRUNGS PA'I DUS LA SOGS PA JI LTA BAR BZOD PA'I PHA ROL TU PHYIN PA LA SLOB SNYAM
, ,PA DANG, STON PAS SNGON BYANG CHUB KYI SPYAD PA SPYOD PA'I TSE CHOS TSIGS SU BCAD PA RE RE'I PHYIR TU SKU LUS LA LCAGS GZER STONG BTAB PA DANG, SEMS CAN GYI DBUL PHONGS SEL BA'I PHYIR RGYA MTSO LAS NOR BU BZHES PA'I DUS SU NOR BU CHUR SHOR BA LEN PA'I PHYIR RGYA MTSO SKEM PAR CHAS PA LTA BUR BRTZON 'GRUS KYI PHA ROL TU PHYIN PA LA SLOB SNYAM PA DANG, SRING MO THE TSOM SEL BA LTA BUR BSAM GTAN GYI PHA ROL TU PHYIN PA LA SLOB SNYAM PA DANG, SHES RAB KYI PHA ROL TU PHYIN PA LA 'JAM PA'I DBYANGS LTA BU BYED SNYAM DU BSLAB PA DANG, GZHAN LA THOG MAR ZANG ZING GI SGO NAS PHAN BTAGS TE, 'KHOR DU BSDUS NAS CHOS KYI SBYIN PAS TSIM PAR BYA ZHING SNYAN PA'I TSIG GIS CHOS SLOB PA DANG, RANG GIS KYANG GZHAN LA BSTAN PA LTAR NYAMS SU LEN PAR BYA'O, ,SNYAM DU BSDU BZHI LA BLO SBYONG, KHYAD PAR DU PHAR PHYIN MTHA' MA ZHI GNAS DANG LHAG MTHONG GNYIS LA BLO SBYONG STE, ZHI GNAS THOB PA NI TING NGE 'DZIN GYI BSLAB PA LA SLOB PA DANG, LHAG MTHONG NI SHES RAB KYI BSLAB PA LA SLOB PA'O, ,DES NA, DANG POR ZHI GNAS DANG RJES SU MTHUN PA'I GNAS SU 'KHOD NAS, LUS 'DUG LUGS BRGYAD KYIS 'KHOD NAS SPYI BO'I BLA MA THUB PA'I DBANG PO'I THUGS KA NAS BLA MA THUB PA'I DBANG PO'I SKU RGYA SRAN TZAM ZHIG SPROS TE, RANG GI LTE BA'I THAD KYI NAM MKHA' LA BZHAG NAS, DE LA SEMS BYING RGOD DANG BRAL BAR GZUNG, DE LA NYES PA LNGA SPONG BA'I GNYEN POR 'DU BYED BRGYAD BSTEN NAS BSGRUB PAS THOG MAR DMIGS PA LA MI GNAS SHING CHER MI GSAL BA DANG, DE NAS CUNG DMIGS PA LA RGYANG TZAM RGYANG TZAM GNAS
SHING GSAL, YANG YANG BAR CHAD PA DANG, DE NAS RGYUN CHAGS SU 'GRO ZHING CUNG ZAD CHAD PA DANG, DE NAS RTZOL BA DANG BCAS TE RGYUN CHAGS SU 'GRO BA DANG, DE NAS RTZOL BA MED PAR RGYUN CHAGS SU TING NGE 'DZIN LA DMIGS PA KHYUR GYIS 'GRO BA 'BYUNG ZHING; DE'I RJES LA KLAD PA LCI BEM PA ZHIG DANG, SHA LPAGS KYI MTSAMS LA RLUNG KHYAD PAR CAN RGYUGS TE, DGA' BDES SEMS MI ZIN LA KHYAD PA 'BYUNG STE, DE'I RJES SU GNAS NGAN LEN GYI RLUNG RNAMS 'GAGS NAS, LUS SEMS SHIN SBYANGS DANG BCAS PA'I ZHI GNAS 'GRUB PAR 'GYUR RO, ,'DI NI RGYAL BA GNYIS PA TZONG KHA PA CHEN POS, YID LA BYED PA NI SKABS 'DIR ZHI GNAS SO, ,SGOM RIM LAS KYANG, DE LTAR ZHI GNAS GOMS PAR BYAS PA DE LUS DANG SEMS GANG GI TSE SHIN TU SBYANGS PAR GYUR PA DANG, JI LTAR 'DOD PA BZHIN DU DMIGS PA LA SEMS DBANG DU GYUR PA DE'I TSE ZHI GNAS 'GRUB PA YIN PAR RIG PAR BYA'O, ZHES GSAL BAR GSUNGS SO, ZHES GSUNGS PA'I DGONGS PA DAM PA YIN, DE LTAR ZHI GNAS BSGRUBS NAS, BSAG SBYANGS LA 'BAD PA DANG, GZHUNG CHEN MO LA BLTA BA DANG BLA MA DANG LHAG PA'I LHA DBYAR MED DU BYAS NAS GSOL BA 'DEBS PA'I LHAG MTHONG GI TSOGS BSTEN NAS, SPYI BOR BLA MA LHA BSGOM BZHIN PA NAS, NGA LHAG MTHONG BSGOM GYI YOD SNYAM DU LHANG BA ZHIG BSKYED LA; BLO DES GZUNG BA LTAR GYING DE RANG GI PHUNG PO LNGA DANG GCIG GAM THA DAD GANG DU 'DUG BRTAG PAR BYA'O, ,DE LA, DE PHUNG PO LNGA DANG GCIG TU 'DUG GO SNYAM NA, GSER GYI THUR MA LNGA DANG LCAGS KYI THUR MA GCIG 'DRES YANG MA 'DRES LA, GCIG
, ,TU YANG YONG BZHIG YONG AE SHES, MI SHES NA DE DANG 'DRA, NGA DE PHUNG PO LNGA DANG GCIG TU YOD NA, YONG LUGS DE 'DRA ZHIG RANG DGOS, PHUNG PO LNGA NI SO SO YIN, NGA DE YANG NI DE LNGA LAS SO SO YIN, DE JI LTAR YIN NA, GZUGS KYI PHUNG PO NI, DA'I GZUGS KYI PHUNG PO YIN, TSOR BA'I PHUNG PO NI NGA'I TSOR BA'I PHUNG PO YIN, 'DU SHES KYI PHUNG PO NI, NGA'I 'DU SHES KYI PHUNG PO YIN, 'DU BYED KYI PHUNG PO NI, NGA'I 'DU BYED KYI PHUNG PO YIN, RNAM PAR SHES PA NI, NGA'I SEMS YIN, G-YA', DA CI ZER, NGA PHUNG PO LNGA DANG GCIG YIN ZER BA DANG, NGA PHOR PA DANG GCIG YIN ZER BA LA KHYAD GANG 'DUG ,CES BRTAG ,YANG BDEN BDEN, DA PHUNG PO LNGA DANG THA DAD YIN NO, SNYAM NA, 'O NA PHUNG PO LNGA SO SOR PHRAL BA'I RJES SU NGA RNYED DGOS TE, DBER NA GSER THUR LNGA BSAL BA'I RJES SU LCAGS THUR RNYED PA BZHIN NO, ,DE LTAR BTZAL BAS NGA GA NA 'DUG ,KHYER SHOG ,MDZUB MO TSUGS, DE LTAR BLTAS PAS NGA RNYED RGYU MI YOD, AA KHA DA MED PA 'DRA SNYAM NA, NGA YOD DE, NGA LHAG MTHONG BSGOM GYIN YOD MOD, CHANG GIS ZI MA BYUNG NGAM, GNYID 'CHAL BZHIN NI MIN NAM, 'ON DA GI'I LAB LAB DE TSO GANG RED, ZER NA, HO HO, 'DI 'DRA YIN TE, NGA RANG TSO'I BLO LA SNANG BA LTAR GYI DA DE NI RTZA BA NAS MED DE, RIGS PA YANG NGAG GIS DA GI DPYAD PA DE'I TSE ZHIG SONG MOD, PHUNG PO LNGA TSOGS PA 'DI'I STENG DU NGA ZHES THA SNYAD SBYAR BA'I NGA TZAM PA DE NI YOD DE, DE LHAG MTHONG BSGOM MKHAN DE YIN, DES NA NGANG TSUL DE NI, NGA RANG BZHIN GYIS GRUB PA'AM, BDEN PAR
GRUB PA MED PA'I DON YIN SNYAM DU BRTAGS SHING DPYAD PAS, RANG RE'I BLO LANG BDEN BDEN MOR SNANG BA DE KHEGS PA'I STONG SANGS 'BYUNG STE, STONG SANGS DE LA MNYAM PAR BZHAG NAS SLAR YANG MNYAM GZHAG DE'I STOBS KYIS DRANGS PA'I ZHI GNAS 'BYUNG BA NI ZHI LHAG ZUNG 'BREL GYI TING NGE 'DZIN TO, ,'DI LA GNAD ZUNG ZAD CIG PHYEN, KHAMS GSUM 'GRO BA'I BLA MA TZONG KHA PA CHEN POS, LAM GTZOR, SNANG BRTAN 'BREL BSLU BA MED PA DANG, ,STONG PA KHAS LEN BRAL BA'I GO BA GNYIS, ,JI SRID SO SOR SNANG BA DE SRID DU, ,DA DUNG THUB PA'I DGONGS PA RTOGS PA MED, ,NAM ZHIG RES 'JIG MED PA CIG CAR DU, ,RTEN 'BREL MI BSLUR MTHONG BA TZAM NYID NAS, ,NGES SHES YUL GYI 'DZIN STANGS KUN 'JIG NA, ,DE TSE LTA BA'I DPYAD PA RDZOGS PA LAGS, ZHES GSUNGS PA'I DGONGS PA STONG PA RTEN 'BYUNG GI DON DU 'GRO LUGS 'DI SHES PA SHIN TU GNANG CHE BAS, BZHI BRGYA PA LAS, GANG LA BRTEN NAS 'BYUNG YOD PA, ,DE NI RANG DBANG MI 'GYUR RO, ZHES GSUNGS, DA GI NGA DE RANG TSUGS THUB NAS RANG GI BLO LA SNANG BA LTAR YOD NA, NGAS LAS BSAGS TE 'BRAS BU MYONG BA MI SRID DE, KHO RANG RANG DBANG 'DUS PA'I TSUGS THUB CING, ,DE LAS GNAS SKABS GZHAN DU MI 'GYUR LA, GNAS SKABS GZHAN DU MA GYUR NA LAS JI LTAR MYONG, ,DES NA PHUNG PO LNGA TSOGS TZAM PA LA BRTEN PAS GZHI BYAS TE, BLOS BTAGS NAS BZHAG PA'I DBANG GIS DA DE KUN RDZOB TU YOD LA, DON DAM PAR MA RNYED PA DE YIN, DE LTAR BLO LA SHAR NA RANG TSUGS MA THUB PA'I STONG BA NGES NA, TSOGS TZAM GYI KUN RDZOB RTEN 'BREL LA
, ,NGES PA 'DREN ZHING, KUN RDZOB TSOGS TZAM DU YOD PA LA NGES PA RNYED PA NA RTEN 'BYUNG YIN PAS DON DAM DU MED PA LA NGES PA 'DREN THUB PAS LAS 'BRAS MI BSLU BAR MTHOD BA TZAM GYIS RANG BZHIN GYIS MA GRUB PA LA NGAS PA RNYED PA 'ONG BA YIN, DE LTA BU'I TING NGE 'DZIN DE'I RTZE GCIG PA'I MNYAM GZHAG BYED PA NI DA LTA'I BLO LA SNANG BA LTAR GYI MA RNYED PA'I STONG SANGS DE'O, ,MNYAM GZHAG TU DE LTAR BSKYANGS NAS, RJE THOB KYI DUS SU YANG SNANG BA THAMS CAD SGYU MA MKHAN GYIS SPRUL PA'I RTA GLANG LTA BUR BLTA'O, ,DE LTAR LAM GYI RIM PA LA BLO SBYONG BA'I DUS SU, DMIGS RNAM SO SO'I BAR DU SPYI BO'I BLA MA LHA LAS BDUD RTZI 'BEB SBYANG SOGS BYA BA LA RIM BDE LAM LTAR BYA'O, ,DA LTAR BLO SBYANGS ZIN PA'I RJES SU RDO RJE THEG PA LA ZHUGS NAS, SNYIGS DUS KYI TSE THUNG 'DI NYID LA ZUNG 'JUG GI LAM MNGON DU BYA'O, ,DE LTAR NYAMS SU BLANGS PA'I 'BRAS BU LA SANGS RGYAS BCOM LDAN 'DAS KYI GO 'PHANG MDON DU 'GYUR BA YIN CING, ZHIB CHA'I GNAD RNAMS NI RJE RGYAL BA GNYIS PA'I LAM RIM CHE CHUNG GNYIS DANG NYAMS MGUR, DBEN SA PA'I GSUNG LE TSAN, PAn CHEN GONG 'OG DANG RGYAL DBANG THAMS CAD MKHYEN PA'I GSUNG RNAMS LAS SHES PAR BYA'O, ,SANGS RGYAS KHANG BZANG NYAMS DGA' BAR, ,BGROD PA'I BDE LAM ZAB MO 'DI; ;'GRO KUN RGYAL BA'I PHO BRANG DU, ,'KHRID PA'I THEM SKAS MCHOG GYUR CIG, CES BYANG CHUB LAM GYI RIM PA'I DMAR KHRID GZHAN PHAN BDUD RTZI'I BUM PA ZHAS BYA BA 'DI NI SOG PO'I YUL GRU AU RAD NAS, DGE SLONG SHES RAB KYIS LAM RIM GYI KHRID CHIG DON GO BDE BA ZHIG DGOS ZHES BSKUL BA LTAR
LAM 'DI'I RNAL 'BYOR SPYOD PA'I DGE SLONG BLO BZANG DPAL LDAN YE SHES KYIS BKA' DRIN MTSUNGS PA MED PA ^ RJE BLA MA NGAG DBANG BYAMS PA RIN PO CHE'I ZHAL GYI BDUD RTZI LAS 'BYUNG BA BZHIN NYAMS MYONG GI STENG NAS BRIS PA'I DGE BA LA BRTEN NAS SEMS CAN THAMS CAD KYIS LAM 'DI MNGON DU BYED NUS PAR GYUR CIG, MANGGA LAm,, ` NA MO GU RU MANYDZU GHO sh'A YA, THEG PA CHEN PO'I LAM LA BLO SBYONG BAR 'DOD PA'I GANG ZAG GIS, BYI DOR BYAS PA'I GNAS KHANG DU SKU GSUNG THUGS KYI RTEN BKRAM NAS MCHOD PA LEGS PAR BSHAMS, STAN BDE BA LA LUS 'DUG LUGS BRGYAD DAM SPYOD LAM GANG BDER 'KHOD NAS SKYABS 'GRO SEMS BSKYED TSAD MED BZHI BSBOMS PA SNGON DU BTANG NAS SEMS MNAL DU PHAB STE, 'DI LTAR BSGOM PAR BYA'O, ,BDAG GIS THOB PA'I LUS RTEN 'DI NI DAL 'BYOR TSAD BA'I RTEN YIN, 'DI DON MED DU MI BTANG BAR SNYING PO ZHIG BLANG DGOS, DE YANG RANG GCIG PU'I DON DU SNYING PO BLANGS KYANG DON CHEN PO MI 'GRUB PAS SEMS CAN THAMS CAD KYI DON DU SNYING PO LEN DGOS PAS, DE'I PHYIR TU BDAG GIS BYANG CHUB KYI SEMS BSGOM SNYAM PA DUNG DUNG BA BYA, DNGOS GZHI NI, RANG GI MDUN DU SEMS CAN THAMS CAD BSGOMS NAS, 'DI RNAMS TSO 'KHOR BA THOG MA MED PA NAS LAN CIG MIN PAR LEGS PAR BSKYANGS PA'I DRIN CAN GYI MA SHA STAG YIN, 'DI RNAMS 'KHOR BA'I GNAS SU SDUG BSNGAL DU BCUG PA NA BDAG KHREL DANG NGO TSA CUNG ZAD KYANG MED PAR 'GYUR BAS, DES NA BDAG GIS SEMS CAN THAMS CAD KYI DON DU RDZOGS PA'I SANGS RGYAS KYI GO 'PHANG THOB PAR BYA, DE'I PHYIR TU BDAG GIS RGYAL
, ,SRAS KYI SDOM PA BLANGS LA TSUL BZHIN DU SLOB SNYAM PA BYAS LA, SANGS RGYAS BYANG CHUB SEMS DPA' KUN, ,BDAG LA DGONGS PAR MDZAD DU GSOL, ,JI LTAR SNGON GYI BDE GSHEGS KYIS, ,BYANG CHUB THUGS NI BSKYED PA DANG, ,BYANG CHUB SEMS DPA'I BSLAB PA LA, ,RIM PA BZHIN DU BSLAB PA LTAR, ,BDAG KYANG 'GRO LA PHAN DON DU, ,BYANG CHUB SEMS NI BSKYED BGYI ZHING, ,BYANG CHUB SEMS DPA'I BSLAB PA LA, ,RIM PA BZHIN DU BSLAB PAR BGYI, ZHES LAN GSUM GYIS BYANG CHUB TU SEMS BSKYED DE, BYANG CHUB SEMS DPA'I BSLAB PA LA BSLAB PAR BYA'O,, ZHES BLO SBYONG MDOR BSDUS 'DI NI, DKA' BCU ZLA BAS BSKUL BA LA BRTEN NAS ` SH'AKYA'I BTZUN PA BLO BZANG DPAL LDAN YE SHES KYIS SBYAR BA'O,, ~ NA MO MA H'A MU DR'A YA, DUS GSUM GYI BDE GSHEGS MA LUS PA, ,YONGS GCIG TU BSDUS PA'I YE SHES SKU, ,DPAL BLA MED RDO RJE 'CHAD DBANG MGON, ,MI BDAG GI SNYING DBUS RTAG TU ROL, ,YUL MANG POS BSKAL BA'I SA PHYOGS NAS, ,YID RTZE GCIG SDUD 'DOD GANG ZAG GIS, DON SNYING PO LEN PHYIR 'DRI BA LA, ,CHIG 'DI DAG GTAM DU GLENG BAR BYA, ,RANG THOB PA'I LUS 'DI DAL 'BYOR ZER, ,RTEN YID BZHIN NOR BU BAS KYANG LHAG ,'DI SHIN TU RNYED DKA' DA RES TZAM, ,DON DE'I PHYIR SNYING PO LEN PA GCES, ,LAR MI RTAG BCOS MAN MA DRAN NA, ,SEMS KHUG GO KHUG GI BYAS NA YANG, ,RKYEN 'PHRAD TSE DUG GSUM ZHAGS PA YIS, ,YID KHYI'U RANG DBANG MED PAR 'CHING, ,SEMS 'DOD CHAGS ZHE SDANG GTI MUG GSUM, ,'PHRAL DGA' DGA' 'DRA BA'I 'JO
SGEG LA, ,BLTA 'DOD PA'I SRED PA MA BOR BAR, ,NYAM NGA BA'I 'CHI BDAG SBAR MO 'DEBS, ,DE SHES NAS LE LO PHAR BSKYUR ZHING, ,BRTZON 'GRUS PA'I LCAG GIS RGYUD BSKUL NAS, ,BLO DKON MCHOG GSUM LA 'GEL BA DANG, ,LAS 'BRAS BU'I SPANG BLANG BYED PA GCES, ,DE KUN DANG KHYAD PAR LAS 'BRAS LA, ,YID SHIN TU BSGRIMS NAS BRTAG BYAS TE, ,DGE CHUNG DU'ANG NYAMS SU LEN PA DANG, ,SDIG CHUNG DU'ANG SPOD LA 'BAD PA GCES, ,DE THAMS CAD BYANG CHUB SEMS MCHOG GIS ZIN DE NAS CHU THIGS BYIN TSUN CHAD, ,RDZOGS SANGS RGYAS GO 'PHANG RGYUR 'GYUR BA'I, ,DE BSKYED PA'I THABS LA 'BAD PA GCES, ,DE SGOM TSUL JI LTA BU ZHE NA, ,SEMS SNYING RJE'I CHU YIS RAB BRLAN TE, ,'GRO 'DI DAG DRIN LAN GZHAL BA'I PHYIR,, BDAG SANGS RGYAS THOB 'DOD 'BAD PAS BSKYED, ,DE PHYIN DRUG RTA PHO LA BSKYON NAS, ,CHOS KUN GYI GNAS LUGS STONG PA DANG, ,RAB MNYAM PAR SBYAR BA'I ZHI LHAG GIS, ,LAM BGROD PA MTHA' RU PHYIN PAR BYA, ,THABS NYE LAM ZAB MO'I GRU GZINGS LA, ,DON DE NYID ZUNG DU 'BREL BA YIS, ,DPAL RDO RJE 'CHANG GI GO 'PHANG DE, ,DUS MYUR BA NYID DU THOB PAR GYIS,, ZHES LAM GYI GTZO BO RNAM GSUM GYI NYAMS MGUR 'DI LTA BU ZHIG DGOS ZHES CHA KVAN ZHABS DRUNG BSKAL BZANG DGE LEGS KYIS BSKUL BA LTAR ` SH'AKYA'I DGE SLONG BLO BZANG DPAL LDAN YE SHES KYIS BGYIS PA'O, ,BKRA SHIS,,