*, ,NYAMS MGUR RNAMS PHYOGS GCIG TU BSDEBS PA BZHUGS, @1 #, ,NA MO GU RA BE, ZHING RAB 'BYAMS RGYAL BA KUN GYI DNGOS, ,TSES BRGYAD KHRI BZHI STONG 'BYUNG BA'I GNAS, ,DPAL 'GRAN GYI DO MED KHYAB BDAG RJE, ,MI BDAG GI SNYING DBUS RTAG TU BZHUGS, ,YONGS MI LUS RIN CHEN NYE BAR THOB, ,CHOS ZAB DGU'I SNYING PO RNA BAR THOS, ,SNGAGS ZAB MO'I BZLAS SGOM TSUL LA 'JUG ,RTEN RAB BYUNG PHUN TSOGS RGYAN GYIS BRJID, ,'DI 'DRA BA'I SKAL BZANG THOB BA 'DI, ,KHONG LHA DBANG BRGYA BYIN LAS KYANG LHAG ,'DI BSAMS SHING RJE BTZUN BLA MA'I DRIN, ,DRIN CHE BAR NGES SO BLA MA RJE, ,RJE BLO BZANG RGYAL BA'I MAN NGAG BCUD, ,CHOS GZHAN GYI LUGS LAS KHYAD 'PHAGS PA, ,LAM THUN MONG THUN MONG MIN PA YI, ,GNAD RDZOGS PAR GO BA KHYOD KYI DRIN, ,TSE 'DI DANG PHYI MA'I BDE LEGS KYI, ,RGYU MTHAR THUG BSHES GNYEN DAM PA LA, ,BSAM
, ,SBYOR BAS MNYES PAR BYED PA NYID, ,GO DGOS PAR RTOGS PA KHYOD KYI DRIN, ,DE'I GSUNG LAS 'BYUNG BZHIN RANG NYID KYIS, ,DUS DA LTA THOB PA'I LUS RTEN 'DI, ,DAL 'BYOR PA TSANG BA'I MI LUS MCHOG ,CHES RNYED DKAR RTOGS PA KHYOD KYI DRIN, ,DON DE LA SNYING PO LEN PA LA, ,CHUNG 'BRING DANG CHEN PO'I LAM GSUM GYI, ,GNAD BGROD TSUL LEGS PAR RTOGS PA 'DI, ,RJE KHYED KYI BKA' DRIN NYID DU BAS, ,TSE 'DI LA ZUNG 'JUG RDO RJE 'CHANG, ,SNYING DBUS NAS LDANG BA'I RIM PA GNYIS, ,PHA BLO BZANG GRAGS PA'I GDAMS NGAG BZHIN, ,DPAL KHYOD KYI DRIN LAS BDAG GIS THOS, ,TSUL DE'I PHYIR RGYAL BA THAMS CAD LAS, ,CHES KHYOD NYID BKA' DRIN PHUL BYUNG STE, ,DUS SNYIGS MA'I SEMS CAN DMU RGOD LA, ,MGON GZHAN GYIS BTANG SNYOMS TSUL DU BZHUGS, ,RJE KHYOD KYIS SNYING STOBS CHER BSKYED NAS, ,PHYI DUR SMRIG 'DZIN PA'I DGE SLONG TSUL, ,NANG GSUM LDAN NGO BO RDO RJE 'CHANG, ,CHES NGES GSANG GSUNG DBYANGS LHAD LHAD SGROG ,DON 'DI YIS KHYOD NYID BKA' DRIN CHE, ,TSUL JI BZHIN DRAN
NAS GSOL 'DEBS KYI, ,DUS 'KHOR BA JI SRID RTAG BZHUGS NAS, ,GSUNG MDO SNGAGS BDUD RTZI'I CHU RGYUN GYIS, ,BDAG NYON MONGS BYIN ZA BCIL DU GSOL, ,CHOS KUN GYI GNAS LUGS MA LUS PA, ,DON PHYIN CI MA LOG BAR RTOGS TE, DPAL ZUNG 'JUG BDE CHEN RDO RJE 'CHANG, ,MCHOG MYUR DU THOB PA'I BKRA SHIS STZOL, ,SANGS RGYAS PA'I DGA' STON MYONG BA'I MTHUS, ,GROL 'GYUR BA'I BDUD RTZI'I DGA' STON GYI, ,CHA SHAS PA'I GZEGS MAS 'GRO BA KUN, ,PHUN TSOGS KYI DPAL LA ROL PAR 'GYUR,, CES PA 'DI NI MGRON GNYER BLO BZANG YAR 'PHEL GYIS BSKUL NGOR ^ SH'AKYA'I BTZUN PA BLO BZANG DPAL LDAN YE SHES KYIS SBYAR BA'O,, ` NA MO GU RA WE, DUS GSUM DANG PHYOGS BCU'I RGYAL BA KUN, ,DPAL ZUNG 'JUG KHA SBYOR PHYAG RGYA CHE'I, ,DBYINGS GCIG TU BSDOM PA'I BLA MA LHA, MI KHO BO'I SNYING DBUS RGYAN DU BZHUGS, ,RJE KHYED LA SGRUB PA'I MCHOD PA DANG, ,RANG SKAL MNYAM 'GRO LA PHAN PA DANG, ,SEMS RNAL 'BYOR MCHOG LA GZHOL BA'I PHYIR, ,GLU TSIG GSUM LEN HE SNYAN DU GSON, ,RTEN DAL 'BYOR TSANG BA'I MI LUS 'DI, ,RJE BLA MA KHYED KYI BKA' DRIN LAS, ,CHOS ZAB MO'I GNAD DANG MJAL DUS 'DIR, ,BLO PHYIN CI MA LOG BSGRUB PAR SMON, ,DUS NYIN RE ZLA RE LO RE YIS, ,TSE MI SDOD SKAD CIG 'GRIB PA LA, ,LEGS BSAM STE BTZAN SA ZIN PA'I PHYIR, ,SEMS 'DUL BA'I GNAD LA GZHOL BAR BYA, ,GZHI TSUL KHRIMS RNAM PAR DAG BYAS TE, ,LAM GTZO BO GSUM GYIS RANG RGYUD PHYUG ,BLO G-YENG BA'I GZHI LAS RAB BYOL BAS,,
, ,YING RTZE GCIG TING 'DZIN MYUR DU SGRUBS, ,PHYI ZA ZIR 'JIG RTEN SNANG NGO DANG, ,LHA MI YI DPAL 'BYOR DREGS PA'I TSOGS, ,BDUD 'BOD PA'I G-YAB MOR LEGS GO STE, ,GNAS DBEN PA NAGS KYI NANG DU SONG, ,DUG MTHAR THUG DKOR CHU'I SGRIB G-YOGS ZAS, ,MING TZAM YANG MI SDOD RTZA BA DANG, ,SHING BZANG PO'I 'BRAS BUS 'TSO BA NI, ,YID TING 'DZIN NGANG GIS 'PHEL BA'I RGYU, ,DUS DA LTA DGA' STE DA LTA KHROS, ,SEMS MI RTAG BYIS PA'I GROGS PO LAS; ;RGYANG RING PO'I BRAG RI NGOS YANGS NA, ,BYA RI DVAGS RTZED 'JOR BLTA BA BDE, ,RTZVA SNGO LJANG RMA BYA'I MGRIN PA 'DRA, ,NAGS ME TOG PA NYTZA LI LTAR BKRA, ,STEGS RDO LEB CHAGS ZHEN BSKYED MI BYED, ,DE'I STENG NA NANG DU YANG DAG 'JOG ,RJE BLA MA SANGS RGYAS BLTA BA DANG, ,GNAS 'KHOR BA SDUG PA'I TSANG LTAR RIG ,SEMS GZHAN DON CHER BSGOM BYANG SEMS BSKYED, ,DE RES 'JOG NAM ZHIG BSGOM ZHIG GU ,YID THA MAL SNANG BA NGAN PA DANG, ,YUN DUS MTHA'I SKAD CIG MI 'GROGS PAR, ,DPAL BDE CHEN LHA YI 'KHOR LO'I GZUGS, ,DBYINGS NAM MKHA'I 'JA' LTAR NAM ZHIG BKRA ,LUS RDO RJE'I GZHAL YAS GNYIS SPANG DBUS, ,LAS KUN NAS G-YO BA'I DRI BZHON LNGA, ,GNYUG RLUNG SEMS DBYER MED THIG LE'I NANG, ,CHU CHU BZHIN THIM NA SHIN TU MTSAR, ,DON DE YIS BZO BOS BSGRUBS PA'I SKU, ,THABS DBANG PO'I GZHU LTAR BKRA BA'I KHROD, ,SEMS CHOS NYID STONG PA RO GCIG PA, ,DUS NAM ZHIG THOB PA 'GYUR RAM KYE, ,DPAL BDE
CHEN 'GRUB PA'I GTAM SNYAN GLU, ,TSIG BRAG STONG DBYANGS KYI NGA RO 'DI, ,RJE BLA MA MNYES PA'I SGRUB MCHOD DANG, ,RANG NYAMS MYONG GONG DU 'PHEL PHYIR BSDEBS, ,DGE 'DI YIS SKYE BO MA LUS PA, ,SGYU 'OD DANG SBYAR BA'I ZUNG 'JUG KHANG, ,DUS MYUR BA NYID DU ZHUGS NAS KYANG, ,DPAL BDE BA CHE LA SPYOD GYUR CIG, KYEE RDO RJE'I DBYANGS KYI MGUR MA 'DI, ,TSUL 'DI LA SBYOD PA'I SKYE BO DANG, ,YID SEMS KYI KHYI'US BSKUL BA'I NGOR, ,DUS MTHA' YI DGE SLONG ZHIG GIS BRIS, ,SARBA MANGGA LAm,, ,, ZHES PA 'DI NI RAB 'BYAMS PA 'JAM DBYANGS BSAM 'GRUB KYIS BSKUL BA LTAR ^ SH'AKYA'I DGE SLONG RDO RJE 'DZIN PA BLO BZANG DPAL LDAN YE SHES KYIS SBYAR BA'O,, *, ,BLO SBYONG LAM RIM GYI SKOR BZHUGS, @1 #, ,NA MO GU RU, 'DIR LAM GYI SNYING PO CHA TSANG BA NYAMS SU LEN PAR 'DOD PA'I GANG ZAG GIS, ,SBYOR BA'I CHOS DRUG SNGON DU GTONG BA LAM RIM CHEN MO SOGS LAS 'BYUNG BA LTAR BYAS LA; DNGOS GZHI NI SKYABS 'GRO SEMS BSKYED TSAD MED BZHI BSGOM PA SNGON DU BTANG NAS, RANG GI SPYI BOR SENGGE CHEN PO BRGYAD KYIS BTEG PA'I RIN PO CHE'I KHRI MTHO ZHING YANGS PA'I STENG KHAR SNA TSOGS PAD ZLA NYI MA'I DKYIL 'KHOR GYI GDAN LA NGO BO RANG GI DRIN CAN RTZA BA'I BLA MA YIN PA LA RNAM PA THUB DBANG RDO RJE 'CHANG SKU MDOG GSER BTZOM LTA BU DBU GTZUG TOR DANG LDAN PA ZHAL GCIG PHYAG GNYIS G-YAS SA GNON DANG G-YON MNYAM GZHAG GI STENG NA BDUD RTZIS GANG BA'I LHUNG BZED BSNAMS PA, SKU LA CHOS GOS GSUM MDZES PAR GSOL BA, MTSAN DPES BRGYAN PA'I DVANGS GSAL 'OD KYI RANG BZHIN CAN, SKU LAS
, ,SKYES PA'I 'OD KYI PHUNG PO'I DBUS NA ZHABS GNYIS RDO RJE SKYIL MO KRUNG GIS BZHUGS PA, SKYABS GSUM KUN 'DUS KYI BDAG NYID DU GYUR PAR MOS NAS, SKU BZHI'I BDAG NYID BLA MA LHA; ;THUB PA'I DBANG POR GSOL BA 'DEBS, ,LAM GYI RTOGS PA MA LUS PA, ,RGYUD LA SKYE BAR BYIN GYIS RLOB, CES GSOL BA BTAB PAS, SPYI BO'I BLA MA LHA'I SKU'I CHA LAS BDUD RTZI SNA LNGA 'OD ZER DANG BCAS PA'I RGYUN BABS, 'OD ZER SEMS CAN THAMS CAD KYI LUS SEMS LA ZHUGS PAS THOG MED NAS BSAGS PA'I SDIG SGRIB RNAMS DAG ,BSHES GNYEN DAM PA SANGS RGYAS DNGOS SU MTHONG BA, DAL 'BYOR DON CHE ZHING RNYED DKA' BA, 'CHI BA MI RTAG PA DRAN PA, NGAN SONG GSUM GYI SDUG BSNGAL LA 'JIGS NAS DKON MCHOG GSUM LA SKYABS SU 'GRO ZHING LAS 'BRAS LA YID CHES KYI DAD PA BSKYED NAS SPANG BLANG BYED PA, 'KHOR BA MTHA' DAG SDUG BSNGAL GYI RANG BZHIN DU BLTA BA, DE LAS THAR BA'I CHED DU LAM BSLAB PA RIN PO CHE GSUM LA SLOB PA, RGYU 'BRAS MAN NGAG BDUN DANG BDAG GZHAN
MNYAM BRJE'I SGO NAS BYANG CHUB TU SEMS BSKYED DE, PHA ROL TU PHYIN PA DRUG DANG BSDU BA BZHI, ZHI GNAS DANG LHAG MTHONG GNYIS ZUNG 'BREL GYI TING NGE 'DZIN LA SOGS PA'I RTOGS PA RNAMS RGYUD LA SKYE BAR BSGOM ZHING, BSHES GNYEN BSTEN TSUL NAS LHAG MTHONG GI BAR GYI LAM RNAMS RE RE NAS DMIGS PHUR NAS BSGOM BZHIN PAR BDUD RTZI 'BEBS SBYANG SOGS BYA BA NI LAM RIM CHEN MO DANG BDE LAM SOGS NAS 'BYUNG BA LTAR BYA LA, DUS RTAG TU BLA MA LHA'I SNANG BA DANG MA BRAL BAR BYA'O,, ZHES LAM GYI RIM PA'I NYAMS LEN MDOR BSDUS 'DI NI MDO SMAD PA DGE SLONG BLO BZANG YON TAN GYIS 'DI LTA BU ZHIG DGOS ZHES BSKUL NGOR ^ SH'AKYA'I DGE SLONG BLO BZANG DPAL LDAN YE SHES KYIS SBYAR BA'O,, ` BYANG CHUB KYI SEMS RIN PO CHE BSKYED PA'I CHO GA KHYAD PAR CAN MDZAD PA'I DUS SU, THOG MAR TSOGS 'TSOGS MA THAG SHER SNYING LAN GSUM BDEN BA DAR GYI BZLOG PA DANG BCAS PA, DE TSAR MA THAG DED NAS BYANG CHUB KYI SEMS BSKYED DGOS PA'I RGYU MTSAN GYI BSHAD PA MANG TZAM BYAS ZIN PA'I MTHAR KHO BOS BRDA SPROD PA BZHIN YAN LAG BDUN PA BYED DGOS PAS, THOG MAR THUB DBANG LA PHYAG 'TSAL SHO LO KA GCIG ,DE RJES, RGYA CHEN SPYOD PA'I BRGYUD LA PHYAG 'TSAL LO, ,ZAB MO LTA BA'I BRGYUD LA PHYAG 'TSAL LO, ,NYAMS LEN BYIN RLABS BRGYUD LA PHYAG 'TSAL LO, ,BRGYUD PA'I BLA MA RNAMS LA PHYAG 'TSAL LO, ,GANGS CAN SHING RTA'I SROL 'BYED TZONG KHA PA, ,DNGOS STOBS RIGS PA'I DBANG PHYUG RGYAL TSAB RJE, ,MDO SNGAGS BSTAN PA'I BDAG PO MKHAS GRUB RJE, ,RGYAL BA YAB SRAS GSUM LA PHYAG 'TSAL LO, ,RIG
, ,GROL PHUN TSOGS ZHES SOGS DUS BZANG CHOS SPYOD KYI SKABS BZHIN LA GSOL 'DEBS PHYAG 'TSAL DU 'DON PA BSGYUR ZHING, GANG GIS BDAG LA RIG PA BSLAB PA DANG, ZHES SOGS KYI MJUG TU 'PHAGS PA 'JAM DPAL MA RGYAL BA KUN LA PHYAG 'TSAL MCHOD PAR BGYI, ZHES PA'I BAR BYA, DE NAS SPYAN 'DREN MED PA'I KHRUS GSOL MDOR BSDUS SHIG BYAS, MAndAL MA PHUL BAR 'DOD CHAGS ZHE SDANG ZHES SOGS YAN LAG BDUN PA'I 'PHROS RNAMS BYA, DE NAS SKYABS 'GRO KHYAD PAR CAN ZHU BA'I MAndAL PHUL, DE NAS KHO BOS GSOL 'DEBS DANG SKYABS 'GRO'I RJES ZLOS BYED DU BCUG RJES SKYABS 'GRO'I BSLAB BYA BRJOD, DE NAS KHO BOS BRDA SPRAD PA BZHIN YAN LAG BDUN PA PHYAG 'TSAL DANG BCAS PA RGYAS PAR BYA ZHING, KHRUS GSOL KYANG SNGAR BZHIN RGYAS PAR BYA, DE NAS SEMS BSKYED ZHU BA'I PHYIR MAndAL PHUL, ,DE NAS KHO BOS DMIGS RNAM BRDA SPRANG PA LTAR SEMS BSKYED KYI CHO GA'I RJES ZLOS BYAS RJES BSLAB BYA BRJOD,, CES PA 'DI NI LCAGS 'BRUG DBYAR CHOS DUS 'DUS PA RGYA MTSOS SEMS BSKYED MCHOD PA MDZAD SKABS ^ SH'AKYA'I DGE SLONG BLO BZANG DPAL LDAN YE SHES KYIS SMRAS PA'O,, ` BLA MA SPYAN RAS GZIGS LA PHYAG 'TSAL LO, ,LAM GYI SNYING PO NYAMS SU BLANG BA NI, ,THOG MAR MTSAN NYID LDAN PA'I BLA MA LA, ,SANGS RGYAS DNGOS SU MTHONG BA'I 'DU SHES KYI, ,BSAM SBYOR GNYIS KYIS BSTEN PA MAN NGAG YIN, ` ,DE NAS RANG GIS THOB PA'I MI LUS 'DI, ,RNYED DKA' DON CHE'I DAL 'BYOR DU SHES NAS, ,CHUD BZOS MED PAR SNYING PO LEN PA'I PHYIR, ,LHA CHOS BYED PA GNAD KYI DON
PO YIN, 2 ,LHA CHOS DE LA GSUM DU YOD PA LAS, ,NGAN SONG 'JIGS NAS SKYABS 'GRO LAS 'BRAS LA, ,'BAD PA 'DON PA SKYES BU CHUNG DU DANG, ,'KHOR BAS 'JIGS NAS LAM BSGOM SKYES BU 'BRING, 3 ,SKYES BU CHEN PO'I LAM GYI GTZO BO NI, ,NGES 'BYUNG BYANG SEMS YANG DAG LTA BA GSUM, ,PHAR PHYIN DRUG DANG ZHI LHAG GI SA BRGYAN TE, ,RDO RJE THEG PA BSNAN NAS NYAMS SU LEN, 4 ,'DI NYID LAM RIM DMAR KHRID SNYING PO YIN, ,LAM GYI GTZO BO RNAM PA GSUM PO'ANG, ,NGES 'BYUNG BYANG SEMS YANG DAG LTA BA STE, ,DE YANG JI LTA BU YI GTZO ZHE NA, PA ,NGES 'BYUNG 'KHOR BA LAS SGROL LAM GYI GTZO, ,LTA BA NYON MONGS 'JOMS PA'I LAM GYI GTZO, ,BYANG SEMS SANGS RGYAS BGROD PA'I LAM GYI GTZO, ,'DI NI LAM GTZO'I SNYING PO BSDUS PA'O, 6 ,MI BRTAN SDUG BSNGAL DON LA BSAM BYAS TE, ,STONG NYID SNYING RJE'I SNYING POS RGYAS BTAB NAS, ,AA YIG SKYE BA MED PA'I MCHOD RTEN LA, ,'PHAGS MCHOG SANGS RGYAS ZHUGS TE BDUD RTZI PHAB, 7 ,MTHA' MAR RANG LUS MCHOD SBYIN DAG TU BYA, ,'CHI BA'I TSE NA STONG NYID TING 'DZIN LA, ,MNYAM PAR BZHAG NAS 'PHAGS MCHOG CHOS KYI SKUR, ,'PHO BAR BYAS TE MNGON PAR RDZOGS SANGS RGYA, 8 ,'DI NI SNYING PO DON GSUM GNAD KYI DON,, ZHES BYA BA 'DI NI DGE TSUL RGANG PO BSTAN PA RGYA MTSO ZHES BYA BA'I KHA 'DON DU DGOS ZHES BSKUL BA LTAR SH'AKYA'I DGE SLONG SNYOMS LAS PA BLO BZANG DPAL LDAN YE SHES KYIS DBEN SA CHOS KYI PHO BRANG DU SBYAR BA'O,, ` NA MO GU RU MANYDZU GHOsh'A YA, 'JAM PA'I DBYANGS DANG RGYAL BA BLO BZANG GRAGS, ,RTZA BA'I BLA MA RNAMS DANG BYANG CHUB SEMS, ,SNYING RJE CHEN PO BDAG MED LTA BA SOGS,,
, ,BYANG CHUB SNYING PO'I BAR DU SPYI BOS MCHOD, ,DANG PO'I LAS CAN YID LA CHOS KYI GNAD, ,GSAL BAR BYED PA'I LDE MIG 'PHRUL GYI DPAL, ,RAB TU LDAN PA'I NGO MTSAR SKAD KYI 'GYUR, ,SGROG PAR BYED 'DI SKYE BO KUN GYI BCUD, ,DE YANG LAS DANG BO PA RNAMS KYI RGYUD LA YON TAN CHE SKYE CHUNG SKYE THAMS CAD KYI GNAD NI DKON MCHOG LA DAD PA DANG, MI RTAG PA'I 'DU SHES BSGOM PA GNYIS MCHOG TU GYUR PA YIN TE, MDO LAS, MTHA' NA SEMS CAN DMYAL BA PA RNAMS LA RLUNG BSIR BU LANGS PA'I BDE BA TSUN CHOD DKON MCHOG GI BYIN RLABS DANG, SANGS RGYAS KYI 'PHRIN LAS SU GSUNGS SHING, ,MYA NGAN LAS 'DAS PA CHEN PO LAS, LOG THAMS CAD KYI NANG NAS STON GYI LOG MCHOG GO, ,RJES THAMS CAD KYI NANG NAS BA GLANG GI RJES MCHOG GO ,'DU SHES THAMS CAD KYI NANG NAS MI RTAG PA'I 'DU SHES MCHOG STE, 'DIS NI KHAMS GSUM GYI NGA RGYAL DANG, RGYAGS PA DANG, DREGS PA THAMS CAD SEL BAR BYED DO, ZHES GSUNGS SO, ,RGYU MTSAN DE'I PHYIR NA, CHOS KYI RGYAL PO TZONG KHA PA CHEN POS KYANG THOG MAR GDAMS NGAG ZAB ZER BA RNAMS BZHAG NAS, NGES 'BYUNG LA MYONG BA THON PAR BYED DGOS ZHES GSUNGS SHING, DES NA DANG POR, TSE 'DI GNOD MANG RLUNG GIS BTAB PA YI, ,CHU YI CHU LPUR BAS KYANG MI RTAG NA, ,DBUGS RDUB DBUGS 'BYUNG GNYID KYIS LOG PA LAS, ,SAD KHOM GANG LAGS DE NI NGO MTSAR CHE, ZHES GSUNGS PA LTAR, DBUGS PHYI NANG DU GYU GYU BA 'DI DA LTA RANG MI CHAD PA'I NGES PA MED SNYAM DU YID 'KHUL NGES PA MI RTAG PA BSGOM PA NYID LA 'BAD
PAR BYA STE, DE LA MYONG BA THON PA TZAM GYIS TSE 'DI'I SNANG SHAS THAMS CAD MGO GNON NUS PA DANG MYONG BA BCOS MAM YIN PA THON NA, SRID PA'I PHUN TSOGS THAMS CAD MI RTAG PA SNYING PO MED PA CHU YI CHU LPUR LTA BUR RIG NAS, MDOR NA TSANGS PA DANG BRGYA BYIN DANG 'KHOR LOS BSGYUR BA'I RGYAL PO'I GO 'PHANG LA SOGS PA LA YANG YID BRTAN CUNG ZAD KYANG MED PA'I NGES PA RNYED NAS, GZHAN DU NA THAR PA DANG THAMS CAD MKHYEN PAN YAG CIG THOB BYA MCHOG TU NGES PAR 'GYUR, ,DES NA SKYES BU'I RTZAL CI YOD KYIS MI RTAG PA'I GNAS TSUL RGYUD LA CI SKYE BSGOM PAR BYA'O, ,DE LA SBYOR BA'I CHOS DRUG SNGON DU GTONG BA DANG, BLA MA'I RNAL 'BYOR LAM GYI SROG TU BYED PA DANG, BDUD RTZI 'BEBS SBYANGS BYED PA SOGS BYANG CHUB BDE LAM DU GSUNGS PA LTAR BYAS NAS, RIGS PA'I DBANG PHYUG GIS, DE PHYIR MI RTAG LAS SDUG BSNGAL, ,SDUG BSNGAL LAS NI BDAG MED GSUNG, ZHES GSUNGS PA LTAR, MI RTAG PA BSGOM PA YON TAN THAMS CAD KYI RTZA BAR SHES PA'I DAD PA LHANG LHANG BSKYED NAS, RANG NYID DANG RANG GI LONGS SPYOD LA SOGS PA THAMS CAD SKAD CIG GIS 'GAGS PAR 'GYUR BA'I TSUL LA, THABS SNA TSOGS NAS BSKOR ZHING LHAG PAR DU RANG NYID NGES PAR 'CHI BA, NAM 'CHI NGES PA MED PA, 'CHI BA'I TSE CHOS MA GTOGS GANG GIS KYANG MI PHAN PA RNAMS NAN TAN DU BSGOM MO, ,DE LA NGES PAR 'CHI BA NI TSE LA SNON PA MED CING 'BRID BYED BAR MA CHAD DANG BCAS PA BSGOM STE, SPYOD 'JUG LAS, NYIN MTSAN SDOD PA YOD MED PA, ,TSE 'DI RTAG TU GUD 'GYUR ZHING, ,SNON PA GUD NAS 'ONG MIN NA, ,BDAG LTA 'CHI
, ,BAR CIS MI 'GYUR, ZHES GSUNGS PA LTAR, RANG GI TSE NYIN RE BZHIN YANG SKAD CIG MA RE RE BZHIN NAS 'GAGS NAS ZAD LA, GZHAN NAS SNON KHA 'ONG DU MED BA'I TSUL LA BSAMS NAS, NGES BAR 'CHI BAR GDON MI ZA BAR SHES SHING, DE YANG, DE BZHIN GSHEGS PA DGRA BCOM PA YANG DAG PAR RDZOGS PA'I SANGS RGYAS SH'AKYA THUB PAS, DGE SLONG DAG SHES PA NI 'GRIB, SROG NI CHAD, TSE'I 'DU BYED NI 'DOR, ZHES SHES PA SKAD CIG SNGA MA 'GAG CING, PHYI MA YANG MI SDOD PAR 'GRIB NAS 'GRO BA DANG, DE LA BRTEN NAS SROG GI DBANG PO 'GAG PA'I TSUL BSAMS NAS YID CI 'KHUL DU BYA, NAM 'CHI NGES PA MED PA BSAMS PA NI, RIN CHEN 'PHRENG BA LAS, 'CHI BA'I RKYEN NI MANG BA STE, ,GSON PA'I RKYEN NI NYUNG ZAD CIG , CES GSUNGS PA LTAR, 'CHI RKYEN NI SHIN TU MANG ZHING GSON RKYEN NI NYUNG BA DANG, DER MA ZAD SHES SPRING LAS, SA DANG LHUN PO RGYA MTSO NYI MA BDUN, ,'BAR BAS BSREG PA'I LUS CAN 'DI DAG KYANG, ,THAL BA YANG NI LUS PAR MI 'GYUR NA, ,SHIN TU NYAM CHUNG MI LTA SMOS CI 'TSAL, ZHES GSUNGS PA LTAR, RI'I RGYAL PO RI RAB, RIN PO CHE SNA BDUN SHIN TU SRA ZHING 'THAS PA DANG, RGYA MTSO CHEN PO BZHI SHIN TU STOBS CHE BA DANG, 'JIG RTEN GYI KHAMS RGYA CHE ZHING 'THAS PA RNAMS KYANG, NYI MA BDUN RAB TU 'BAR BA SHAR BA'I TSE, THAL BA YAD MA LUS PA 'GYUR ZHING 'JIG PAR 'GYUR NA, SHIN TU NYAM CHUNG ZHING CHU'I WU BA LTA BU'I MI'I LUS NI 'JIG SLA BA LTA SMOS KYANG CI DGOS SNYAM DU NYAM CHUNG TSUL BSAMS PA'I SGO NAS, DE RING RANG YANG MI
'CHI BA'I NGES PA MI 'DUG SNYAM DU NAM 'CHI NGES MED BSGOM, DE LTAR 'CHI RKYEN SHIN TU MANG ZHING GSON RKYEN NYUNG TSUL DANG, GSON RKYEN GYI RIGS NYUNG ZAD CIG YOD PA LAS DE DAG KYANG 'CHI RKYEN DU 'GYUR BA'I TSUL BSGOMS NAS, 'CHI BA LA NGES PA RNYED PAR BYA, DE LTAR SHI ZIN PA'I RJES MED DE MI 'GRO BAR SKYE BA ZHIG LEN LA, SKYE SA YANG NGAN 'GRO DANG BDE 'GRO GNYIS LAS MED CING, GAL TE NGAN 'GROR SKYES TSE SDUG BSNGAL SNA TSOGS PA MYONG BA DANG, BDE 'GROR SKYES KYANG NGO BO SDUG BSNGAL LAS MA 'DAS SHING, RNAM PA BDE BAR GNAS PA RNAMS KYANG SDUG BSNGAL GYI RGYU 'BA' ZHIG LAS MA 'DAS LA, DE YANG MI RTAG PA'I TSUL BSAMS NAS, 'KHOR BA MTHA' DAG SDUG BSNGAL GYI RANG BZHIN CAN DU SHES PAR BYAS NAS DE LAS THAR PAR BYED PA'I THABS, DKON MCHOG GSUM LA SKYABS SU SONG STE LAS 'BRAS LA YID CHES KYI DAD PA BSGOMS NAS NYAMS SU LEN PA NI MCHOG YIN LA, DE'I NANG NAS KYANG DKON MCHOG GSUM LA DAD PA BSGOM PA NYID MCHOG YIN PAS, SANGS RGYAS KYA SKU GSUNG THUGS KYI YON TAN DANG KHYAD PAR SKYABS STON PA LA MI BSLU BA, CHOS SKYABS DNGOS LA MI BSLU BA, DGE 'DUN SKYABS BSGRUB PA'I ZLA GROGS LA MI BSLU BA'I NGES BA DRANGS TE SNYING THAG PA NAS SKYABS SU 'GRO BA NAN TAN DU YANG YANG BYA, SKYABS 'GRO 'DI BYED PA'I DUS SU SANGS RGYAS DANG CHOS DANG DGE 'DUN RNAMS MDUN GYI NAM MKHAR GSAL BTAB NAS, DE DAG GI SKYABS 'OG TU CHUD PA'I MOS PA BYED, DE LTAR MI RTAG PA DANG DKON MCHOG LA DAD PA'I MYONG BA THON NA, YON TAN RNAMS SKYE
, ,BAS GONG DU SMOS PA LTAR LAS DANG PO PA RNAMS KYIS TSUL 'DI KHO NA LA 'BAD PAR BYA'O, ,'DI NI LAS DANG PO PA DAM PA'I CHOS LA THOG MAR 'JUG BA RNAMS LA PHAN PA'I PHYIR BRTZAMS PA STE, MTHO DMAN KUN GYIS THABS 'DI NYID LA RNAM PA KUN TU 'BAD PAR BYA'O, ,KUN NAS NYON MONGS PHYOGS DAG DANG, ,RNAM PAR BYANG BA'I GNAS LUGS LA, ,RMONGS PA'I MUN PA SEL 'DOD PA, ,KUN GYIS THOG MAR 'DI BTZAL BYA, ,YON TAN CHU BO MA LUS PA, ,'DREN PAR BYED PA'I YUR BA NI, , RNAM DPYOD GZONG GIS RAB BRUS PA, ,'DI NYID ZHIG GO MKHAS RNAMS KYE, ,DE PHYIR 'DI LAS 'ONGS PA'I CHU, ,LEGS PAR 'THUNGS PAS NYON MONGS PA'I, ,TSA GDUNG RAB TU ZHI BYAS NAS, ,NGES LEGS SA BON DRUNG PO THOB, ,'DI YI DGE BA'I RTZA BA NI, ,KUN BA LTA BUR RAB DKAR PA, ,GANG DE 'GRO BA KUN GYIS NI, ,LAM BZANG 'DI NYID RTOGS PAR SHOG ,CES PA 'DI NI ZHABS DRUNG RAB 'BYAMS PA NGAG DBANG RGYA MTSO NAS LAS DANG PO BA RNAMS LA PHAN PA 'DI LTA BU ZHIG DGOS ZHES BSKUL BA LTAR ` LAM GTZO GSUM GYI RNAL 'BYOR SBYOD BA ^ SH'AKYA'I DGE SLONG BLO BZANG DPAL LDAN YE SHES KYIS SBYAR BA'I YI GE PA NI DGE TSUL BLO BZANG MKHAS MCHOG GO ,MANGGA LAm,, ` MAR GYUR NAM MKHA'I MTHA' DANG MNYAM PA'I SEMS CAN THAMS CAD KYI DON DU MYUR DU YANG DAG PAR RDZOGS PA'I SANGS RGYAS KYI GO 'PHANG RIN PO CHE CI NAS KYANG THOB PAR BYA, DE'I PHYIR TU THEG PA CHEN PO'I DAM PA'I CHOS ZAB MO GSAN SNYAM PA'I CHOS GSAN PA'I KUN SLONG DANG KUN SBYOD LA SOGS PA THAMS CAD LEGS PAR GSAL BTAB NAS GSAN PAR ZHU, GSAN PAR BYA BA'I CHOS DE YANG GANG ZHE NA,
NAM MKHA'I MTHAS GTUGS PA'I GNAS DE SRID DU CHOS KYI RGYAL MTSAN KUN TU G-YO BA MED PAR 'DZUGS SHING ,SRID RTZE'I MTHA' JI SRID PAR SNYAN PA'I BA DAN KUN TU 'PHYAR ZHING BSGRENG BA, CHOS KYI SGRA DBYANGS BLA NAM MCHIS PAS 'GRO BA THAMS CAD NYON MONGS PA'I GNYID LAS KUN NAS SLONG BA, YON TAN RIN PO CHE THAMS CAD KYI 'BYUNG GNAS SU GYUR PA'I SANGS RGYAS BCOM LDAN 'DAS ZHES 'GRO BA THAMS CAD KYI BLA MAR GYUR BA DE NYID KYIS, JI SKAD DU ^ RJE BDAG NYID CHEN POS, DE TSE BLO DANG LDAN PA YIS, , BRTEN CING 'BREL BAR 'BYUNG BA'I LAM, ,KHYOD KYIS BSTAN PA'I GNAD NYID DU, ,JI LTAR KHONG DU CHUD MI 'GYUR, ZHES GSUNGS PA LTAR, SBYIN PA LA SOGS PA'I PHA ROL TU PHYIN PA LNGA BRTEN CING 'BREL BAR 'BYUNG BA THABS KYI RANG BZHIN DU GNAS PA LA, PHAR PHYIN DRUG PA SHES RAB KYI PHA ROL TU PHYIN PA'I RTEN 'BREL BLA NA MED PA DANG SBYAR BA'I LAM PO CHE MNGON DU MDZAD PA'I PHYIR SLOB PA LAM GYI GNAS SKABS SU BRTEN CING 'BREL BAR 'BYUNG BA DE RNAMS LA SGYU 'PHRUL GYIS KUN NAS ROL PA'I SKYES PA'I RABS KYI 'PHRENG BA NGES PAR BRJOD PA BDAG NYID CHEN PO SLOB DPON DPA' BOS MDZAD PA 'DI NYID YIN LA, 'DI'I TSIG DANG DON GYI CHA RNAMS NI DE BZHIN GSHEGS PA'I GSANG BA BSAM GYIS MI KHYAB PA'I ROL PA DANG, PAndI TA CHEN PO'I NGAG DKYEL CHE BA LHAN CIG TU TSOGS PA'I PHYIR DANG, NGOS CAG NA TSOD PHRA BA'I RANG BZHIN DU GYUR PA BCAS BRJOD CI LA SPOBS KYANG, 'DREN PA BLA NA MED PA DE NYID KYIS MNYAN YOD KYI GRONG KHYER CHEN POR CHO 'PHRUL CHEN PO MNGON PAR 'DU MDZAD DE MU STEGS BYED RNAMS RMEG MED PAR MDZAD
, ,PA'I DUS KHYAD PAR CAN DANG, ^ KHAMS GSUM CHOS KYI RGYAL PO TZONG KHA PA CHEN POS DUS KHYAD PAR CAN DE DANG BSTUN PHYI NANG GSANG BA DE KHO NA NYID KYI MCHOD PA'I SPRIN DPAG TU MED PA SPRO BAR MDZAD PA'I DUS KHYAD CAN GNYIS DBYER MED MNGON DU GYUR BA'I THOG ,SPRUL PA'I SKU RGYAL BA DNGOS DANG KHYAD PAR MA MCHIS PA SH'AKYA MU NE'I MDUN SAR CHOS KYI SGO MO BRGYA STONG PHRAG DU MAR 'BYED PA'I RTEN 'BREL GYI SGO THOG MAR DBYE BA'I PHYIR CUNG ZAD BRJOD NA, 'DI NYID 'PHAGS YUL NAS 'GYUR BA MTSON PA'I PHYIR RGYA SKAD DANG BOD SKAD KYI SHAN SBYOR THOG MAR GNAS SHING, LOTZTSA BA RNAMS KYI MDZAD PA DON LDAN DU MDZAD PA'I PHYIR GSUNG GI MNGA' BDAG 'JAM DPAL LA PHYAG 'TSAL BAR MDZAD DE, DE DAG NI CUNG ZAD RTOGS SLA LA, SLOB DPON DPA' BO NYID KYIS BSTAN BCOS 'DI RTZOM PA'I THOG MAR, TSOGS GNYIS KYI DPAL DANG LDAN PA'I SANGS RGYAS KYI YON TAN DAM PA MDZAD PA KUN LA KHYAB CING BKRA SHIS KYI MCHOG CHOS GZUGS KYI YON TAN RNAMS 'BYUNG BA DANG; DE BRJOD PA DANG DE'I SNYAN PA'I GZHIR GYUR PA LAM DUS KYI MDZAD PA DE BZHIN GSHEGS PA THOB PAR 'DOD PA RNAMS KYI YID 'PHROG PA, THUB PA SANGS RGYAS BCOM LDAN 'DAS DE'I SKU TSE 'DI'I MNGON PAR BYANG CHUB PA'I YON TAN RNAMS 'BYUNG BAR BYED PA'I GZHI SKU TSE SNGA MA'I MDZAD PA RMAD DU BYUNG BA DANG BCAS PA LEGS PAR SBYAR BA'I TSIG DON GYI SNYAN NGAG PHUN SUM TSOGS PAS MCHOD CING SKYES RABS RDZOGS PAR BYAS MA ZIN GYI BAR DU MCHOD LA, RGYU MTSAN DE RNAMS MTHONG BA LA BRTEN NAS
DE BZHIN GSHEGS PA LA MA DAD PA RNAMS DAD PAR 'GYUR BA DANG PA RNAMS CHOS KYI GTAM DRI MA MED PAS DAD PA GONG DU SPEL ZHING SPRO BA DANG, SNYAN NGAG GI GZHUNG LUGS LA KUN TU DREGS PA'I BRAM ZE LA SOGS PA RNAMS KYANG TSIG DANG DON GYI SBYOR BAS DAD PAR 'GYUR BA DANG, NYAN THOS DANG RANG SANGS RGYAS KYI LAM LAS GONG DU GYUR PA'I THAMS CAD MKHYEN PA'I GO 'PHANG DE NI CHOS DANG DGE 'DUN KUN GYI 'BYUNG GNAS MCHOD 'OS SU GYUR BAR BSTAN NAS, BCOM LDAN 'DAS THUGS RJE CAN DE NYID KYI SA TSE SNGA MA'I MDZAD PA BRJOD PA'I PHYIR SLAR YANG NAN TAN DU GSUNGS PA NI 'DI LTA STE, RGYA GAR SKAD DU NAS, SEMS RAB TU DVANG BAR BYA'O ZHES PA'I BAR, GSUNG CHOS GNANG THENG GNYIS PA'I SKABS, DE YANG SEMS CAN THAMS CAD BLA NA MED PA'I BDE BA SANGS RGYAS BCOM LDAN 'DAS KYI GO 'PHANG LA 'GOD PAR BYA, DE'I PHYIR TU SANGS RGYAS KYI GO 'PHANG BSGRUB PA'I PHYIR CHOS GSAN SNYAM PA'I 'DUN PA DANG LDAN PAS GSAN PAR ZHU, GSAN PAR BYA BA'I CHOS LA, KHA SANG SNGON DU ZHUS PA'I SKYES RABS KYI MU NAS BRJOD PAR BYA STE, DE BZHIN GSHEGS PA MGON PO ZLA MED PA DE NYID KYIS SNGON SLOB PA LAM GYI GNAS SKABS SU SBYIN PA'I PHA ROL TU PHYIN PA LA BSLABS TSUL JI LTA BU ZHE NA, SBYIR BRJOD PA'I MTHA' LAS 'DAS KYANG, BDAG NYID CHEN PO DPA' BOS BCU TSAN GYI SDOMS SU MDZAD PAR, STAG MO SHI PI KO SA'I BDAG ,TSONG DPON GNYIS DANG RI BONG DANG, ,AA KASTA DANG SHA BYIN DANG, ,THAMS CAD SGROL DANG MCHOD SBYIN BYED, CES GSUNGS PA LTAR, DANG PO STAG MOR SKU
, ,LUS BYIN PA'I SKYES PA'I RABS LA, STON PA THUGS RJE CHEN PO DANG LDAN PA DE NYID KYIS BRTZE BA SNYING RJE CHEN POS KUN NAS BSLANGS TE, 'DZAM BU'I GLING DU GRONG KHYER CHEN PO 'BYOR ZHING RGYAS LA RMAD DU BYUNG BA ZHIG TU, BRAM ZE'I RIGS RIG BYED DANG NGES BRJOD LA SOGS PA'I RANG RIGS KYI YON TAN DANG, GTONG BA LA SOGS PA YA RABS KYI YON TAN DANG, SNYING RJE DANG NGES 'BYUNG DANG BYANG CHUB KYI SEMS LA SOGS PA SKYES BU DAM PA'I YON TAN GYIS THUGS KUN TU PHYUG PAR GYUR TE, SKU'I NA TSOD YA TSAD DU 'PHAGS PA'I TSE BRAM ZE'I TSOGS MANG PO RANG GI SPYOD TSUL DANG RJES SU MTHUN PA'I TSIG DANG DON GYI YON TAN MANG POS RANG DANG RJES SU MTHUN PA'I SPYOD PA DANG MKHAS PA'I GNAS LA BKOD CING, 'JIG RTEN PHAL BA'I SKYE BO RNAMS NI DGE BA BCU'I KHRIMS LA BKOD NAS, MTHO RIS LHA MI'I GO 'PHANG DU BGROD PA'I LAM DANG, THAR PA MYANG 'DAS KYI SAR BGROD PAR BYA BA'I LAM RNAMS LAM PO CHE BZHIN DU YANGS PAR BYAS NAS DBEN PA'I GNAS SU GNAS PA LA THUGS GZHOL BAS, SLOB MA'I TSOGS RNAMS RANG RANG GI GNAS SU BKYE STE, RANG DANG NGES PAR RJES SU MTHUN PA'I SLOB MA MA PHAM PA ZHES BYA BA'I BRAM ZE'I KHYI'U DANG LHAN CIG NAGS KYI KHROD SMAN SNA TSOGS SKYE BA'I LJONGS, RI'I SUL DBEN ZHING NYAMS DGA' BA ZHIG TU RTZE GCIG PA'I BSAM GTAN LA SPYOD CING BZHUGS PA NA, BDAG NYID CHEN PO DE SNYING RJE'I MTHU'I DPAL PHUN SUM TSOGS PA LA BRTEN NAS GANG DU BZHUGS PA'I SA PHYOGS DE RNAMS BKRA SHIS KYI YON TAN DU MAS KUN NAS GANG
ZHING BZHUGS TE DER SBYIN PA'I PHA ROL TU PHYIN PA LA RAB TU BSKUL BA'I PHYIR MNGON PAR SPRUL PA LTA BUR RI KHROD KYI GNAS DE NYID DU STAG MO BU SKYES MA THAG PA BKRES PAS KUN NAS GDUNGS PA ZHIG GZIGS TE SBYIN PA LA THUGS NYE BAR GZHOL ZHING 'KHOR BA LAS THUGS PHYUNG BAR GYUR PAS DON DE DAG SLOB MA LA GDAMS SHING RANG GI BZHED PA DON YOD PAR BYA BA'I PHYIR SLOB MA DE GZHAN DU BTANG ZHES GRAGS TE, DE LA SLOB DPON DPA' BOS DE YANG BDAG CAG GI BLA MA ZHES PA NAS, ZAS 'TSOL BA LA 'BAD PAR GYUR TO ZHES PA'I BAR, GSUM PA'I SKABS, BDE LEGS THAMS CAD KYI 'BYUNG GNAS DAM PA'I CHOS RIN PO CHE GSAN SNYAM PA'I SGO NAS GSAN PAR ZHU, GSAN PAR BYA BA'I CHOS LA SDON DU ZHU BA'I 'PHROS NI, DE LTAR BDAG NYID CHEN PO DES GCAN GZAN MO BKRES PA'I RNAM 'GYUR CAN RANG GI BU RNAMS BAG YANGS SU NU ZHO LEN PA'I PHYIR LHAGS PA LA YANG KHRO BA'I DBANG GIS BZA' BAR RTZOM PA'I DANG TSUL CAN DE LA DGONGS NAS, GCAN GZAN MO DE LTOGS PA LAS BSKYAB PAR BYA BA'I PHYIR SKU LUS GTONG BZANG ZING GI SBYIN PA'I MCHOG DANG, STAG MO NYID LTOGS PA'I 'JIGS PA LAS SKYOB CING PHRUG GU RNAMS BZA' BA'I 'JIGS PA LAS SKYOB BA MI 'JIGS PA'I SBYIN PA, SBYIN BA DE RNAMS NI SBYIR GRAGS PA 'DOD PA TZAM DANG, TSANGS DBANG 'KHOR BSGYUR SOGS THOB PAR BYA BA'I PHYIR RAM, NYAN RANG GI GO 'PHANG TZAM GYI PHYIR TU'ANG MIN PAR BLA NA MED PA'I GO 'PHANG GZHAN GYI DON BSGRUB PA'I PHYIR TU MDZAD BA CHOS KYI SBYIN PA, SEMS CAN THAMS CAD BDE BA DANG LDAN
, ,PAR BYA BA'I PHYIR TU RTZOM PA BYAMS PA'I SBYIN PA STE, ZANG ZING MI 'JIGS CHOS DANG BYAMS, ZHES PA'I SBYIN PA'I KHYAD PAR TSANG BA DANG, GZHAN YANG SEMS CAN 'JIGS PA LAS SKYOB PA'I PHYIR RANG GZHAN GYI GZHAN GNONG GZHI BCAS SPONG BA LA NAN TAN DU BYED PA'I TSUL KHRIMS, BDAG NYID KYI LUS ZOS PA'I 'JIGS PA LA JI MI SNYAM PA SDUG BSNGAL LA DANG LEN GYI BZOD PA, RGYAL SRAS KYI BYA DKA' BA'I SPYOD PA LA MOS PA'I CHOS LA NGES SEMS KYI BZOD PA, BYA DKA' BA LA NAN TAR 'JUG PA'I BRTZON 'GRUS DANG, SEMS DANG TSUL DE LAS MI 'PHROG PA'I RTZE GCIG PA DANG, SBYIN YUL GYI GCAN GZAN DANG, SBYIN BYA'I LUS DANG, SBYIN PA PO'I GANG ZAG RNAMS SGYU MA LTA BUR LTA BA'I SHES RAB STE PHAR PHYIN LHAG MA RNAMS KYANG TSANG BAR BYAS TE PHANGS PA MED PAR SKU LUS BOR BAS GCAN GZAN MO RAB TU TSIMS SHING THUGS BSKYED PA'I DON GZHAN DU MI 'GYUR BA'I RGYU MTSAN GYIS SA CHEN PO G-YO ZHING LHAS ME TOG GI CHAR 'BEBS PA LA SOGS PA MNGON DU GYUR PA DANG SLOB MA DE YANG PHYIR 'ONGS NAS CHED DU BRJOD PA'I BSTOD DBYANGS BSGRAGS TE, RMAD DU BYUNG BA'I RGYU MTSAN NGES NA SANGS RGYAS KYI BZHES PA DON DANG LDAN ZHING BSTAN PA'I CHOS 'KHOR RGYUN MI CHAD DE, DE'I PHYIR SLOB DPON GYIS, DE NAS BYANG CHUB SEMS DPAS ZHES PA NAS, TSIG TU SMRAS NA LEGS TE ZHES PA'I BAR,
[BLANK PAGE]