*, ,YON TAN MTHA' YAS PAR BSTOD PA'I BSDUS DON BZHUGS SO,, ,,
, ,BSAM SBYOR RNAM PAR DAG PA'I MTHU STOBS KYIS, ,SPANGS RTOGS PA MTHAR PHYIN PA'I SANGS RGYAS LA, ,GUS PAS 'DUD NAS YON TAN MTHA' YAS PAR; ;BSTOD PA'I BSDUS DON CUNG ZAD DBYE BAR BYA, ,'DIR YON TAN MTHA' YAS PAR BSTOD PA'I DON CUNG ZAD BSHAD PA LA GSUM, ,KLAD KYI DON, GZHUNG GI DON, MJUG GI DON NO, , DANG PO NI, RGYA GAR SKAD DU, GU NA AA BARYA NTA STO TRAm, BOD SKAD DU, YON TAN MTHA' YAS PAR BSTOD PA, ,THAMS CAD MKHYEN PA LA PHYAG 'TSAL LO, ,ZHES PA'O, ,GNYIS PA LA GSUM, BSTOD PA'I GLENG BSLANG PA, BSTOD PA DNGOS, DGE BA BSNGO BA'O, ,DANG PO NI, RGYAL BA'I YON TAN MTHA' MI 'TSAL BAS GAL TE KHYOD BSNGAGS MI BRJOD NA, ,'GA' YANG KHYOD BSTOD MI BGYID KHYOD KYI 'BYOR BA 'GRO BAS RTOGS MA MCHIS, ,GANG SLAD 'GRO 'DIS KHYOD LA BSTOD PA BGYIS KYANG NONGS PA MA MCHIS PA, DE SLAD DON 'DIR BDAG NI BLO GROS
, ,RAB TU CHUNG YANG BRTZON PA LAGS, ,ZHES PA'I TSIGS BCAD GCIG GIS YON TAN YONGS SU MI SHES PA DANG, SGRO 'DOGS MED PAR BYA BA DANG, , NGA RGYAL MED PAR BYA BA DANG, 'DOD DON SGRUB PAR BYA BA STE BSDUS DON BZHI'I SGO NAS BSTOD PA'I GLENG BSLANG BA BSTAN TO, ,GNYIS PA LA GSUM, RGYU'I GNAS SKABS KYI SGO NAS BSTOD PA; 'BRAS BU'I GNAS SKABS KYI SGO NAS BSTOD PA, SEMS CAN GYI DON BYED PA'I GNAS SKABS KYI SGO NAS BSTOD PA'O, ,DANG PO LA GSUM, BSAM PA'I GNAS SKABS DANG, SPYOD BA'I GNAS SKABS DANG, DBANG MDZAD PA'I GNAS SKABS KYI SGO NAS BSTOD PA'O, ,DANG PO LA GNYIS, GZHAN DON DON GNYER GYI BLO BSKYED TSUL GYI SGO NAS BSTOD PA, BYANG CHUB DON GNYER GYI BLO BSKYED TSUL GYI SGO NAS BSTOD PA'O, ,DANG PO LA GNYIS, NGO BO'I SGO NAS MDOR BSTAN PA DANG, RGYU'I SGO NAS RGYAS PAR BSHAD PA'O, ,DANG PO NI, SRID GSUM DAG LA
PHAN BRTZON BLO MNGA' NGAN SONG GNAS NA'ANG BSNGAGS PAR 'OS, ,RANG DON SMON PA'I BLO GROS CAN NI MYA NGAN 'DAS KYANG MA LAGS ZHES, ,DE SLAD KHYOD NI 'KHOR BA'I 'JIGS PAS MI LDOG BRTAN ZHING MI G-YO BAS, ,'JIG RTEN SKYE ZHING 'CHI BAS NYAMS THAG YONGS SU BSKYAB PAR BRTZON PA LAGS, ZHES GZHAN DON DON GNYER GYI SKYES BU NI LAS NGAN PA'I DBANG GIS NGAN SONG NA GNAS KYANG BSNGAGS PAR 'OS SHING, RANG DON GTZO BOR DON DU GNYER BA'I SKYES BU NI MYANG 'DAS THOB KYANG BSNGAGS PAR 'OS PA MA YIN PA DE'I PHYIR, KHYOD NI 'KHOR BA'I SDUG BSNGAL GYIS 'JIGS NAS GZHAN DON LAS MI LDOG PAR SKYE BA DANG 'CHI BAS MNAR BA'I 'GRO BA'I DON LA BRTZON PAR BSTAN TO, ,GNYIS PA LA BZHI, SDUG BSNGAL BSKYED PA LA SO SOR RTOG PA DANG, PHAN BTAGS PA LA SO SOR RTOG PA DANG, ,GROGS BYAS PA LA SO SOR RTOG PA DANG, LHAN CIG LONGS SPYAD PA LA SO SOR RTOG PA'I SGO NAS GZHAN DON LA SPRO BA BSKYED PA'O, ,DANG PO NI, SRID PA'I 'GRO BA DAG TU SDUG BSNGAL RNAMS KYIS SMAS PA'I SEMS CAN LA, ,BDAG GI BLO GROS RTZUB POS SDUG BSNGAL RNAM MANG DE DANG DE BSGRUBS PAS, DE PHYIR BDAG GIS DE DAG RNAMS LA BDE BA BSKYED PHYIR BZOD BYA ZHES, ,DE SLAD KHYOD NI 'GRO LA ZHI BA'I BDE BA BSKYED SLAD BRTZON PA LAGS, ZHES BDAG GIS SNGON CHAD NYON MONGS PA'I GDON GYIS BRLAMS PA'I DBANG GIS RMAS NAS RMA DRAG PO BYUNG ZIN PA LA, ,BA TSAL SOGS PA'I 'GYUR BYED 'DEBS PA DANG
, ,'DRA BAR, RANG BZHIN GYIS SDUG BSNGAL BAR GYUR PA RNAMS LA SLAR YANG SDUG BSNGAL SNA TSOGS BSKYED PA DE'I PHYIR, DA LTA BDAG GIS DE DAG LA BDE BA BSKYED PAR BYA'O SNYAM DU BSAM BAS BRTZON PAR BSHAD DO, ,DBU MA SNYING PO LAS, ,GZHAN YANG SNGON CHAD NYON MONGS PA'I, ,GDON GYIS BRLAN PA BDAG GIS NI, ,RMAS LA 'GYUR BYED 'DEBS PA BZHIN, ,SDUG BSNGAL NAD PA GANG SDUG BYAS, ,ZHES PA BZHIN NO, ,GNYIS PA NI, SEMS CAN GANG DAG MA RIG LDONGS PAS BSAM PA RGUD PA'I BLO GROS CAN, ,PHA DANG BUR GYUR RNAMS KYIS BDAG LA GNYEN SNYAM BYAMS PAS PHAN BTAGS PA, ,DE DAG BTANG NAS GCIG BU THAR BAR BYED PA BDAG GI TSUL MIN ZHES, ,DE SLAD KHYOD KYIS 'GRO BA MGON MED NGES THAR BGYID SLAD SMON LAM BTAB, ,CES TSE RABS DU MAR PHA MA LA SOGS PAR GYUR NAS BYAMS PAS PHAN GTAGS PA'I SEMS CAN DE DAG BTANG NAS BDAG GCIG BU THAR BAR BYED PA NI YA RABS KYI LUGS MIN NO SNYAM DU THUGS LA BZHAG NAS 'GRO BA RNAMS 'KHOR BA LAS THAR BAR BYED PA'I DON DU BRTZON PAR BSHAD DE, SLOB SPRINGS LAS, BYIS PA PANG NA BTZA' BA CI YANG MI NUS PAS, ,GANG GI NU ZHO BYAMS PA'I SHUGS KYIS GZAGS 'THUNGS PA, ,NGAL BA MANG BSTEN BYAMS LA BRTEN PA DE DAG 'DIR, ,SHIN TU MA RABS SHIG NA'ANG SPONG BAR SU ZHIG SPRO, ,GANG GI KHONG NA 'DI SKABS RNYED NAS GNAS BYAS SHING, ,GANG GIS BRTZE BA'I SEMS KYIS ZON BCAS
'DI BLANGS PA, ,NYON MONGS DE DAG SDUG BSNGAL SKYABS MED 'DIR BOR NAS, ,'GRO BA MA RABS THA SHAL ZHIG NA'ANG SU ZHIG SPRO, ,ZHES PA LTAR RO, ,GSUM PA NI, SNGON CHAD 'KHOR BAR SDUG BSNGAL KUN TU MYONG GYUR TSE NA BDAG LA NI, , GANG DAG YUN RING NGO SHES BYAMS SEMS LDAN PAS LAN BRGYAR GROGS BYAS PA, ,BDE BA THOB TSE DE DAG BKOL NAS JI LTAR YONGS SU SPYAD BYA ZHES, ,DE SLAD KHYOD NI BDUD RTZI'ANG SEMS CAN KUN DANG THUN MONG GSOL BAR BRTZON, ,ZHES TSE RABS GRANGS LAS 'DAS PAR BYAMS PA'I SEMS KYIS LAN DU MAR GROGS BYAS PA'I SEMS CAN DE DAG BKOL TE BOR NAS BDAG GCIG BU ZHI BA'I BDE BA LA LONGS SPYAD PA NI MI RIGS SO SNYAM DU BSAM NAS SEMS CAN RNAMS ZHI BA'I BDE BA LA 'GOD PA'I DON DU BRTZON PAR BSTAN TO, ,BZHI PA NI, MCHOG SBYIN 'GRO BAR SEMS CAN RNAMS DANG LHAN CIG LONGS SBYOD 'DAS DGONGS NAS, ,DE DAG NGES PAR YONGS SU MI GTONG BAS NA KHYOD KYI BSTAN PA NI, , JI LTAR KHYOD NYID NE TZOR 'KHRUNGS TSE LJON SHING GZHON NU LEGS SPYAD PA'I, ,LJON SHING RGAS PAR GYUR KYANG YONGS SU MI GTONG DE LTAR BRTZON PA LAGS, ,ZHES TSE RABS DU MAR SEMS CAN RNAMS DANG LHAN CIG 'KHOR BA'I BDE BA LONGS SPYAD PA RNAMS THUGS LA BZHAG NAS NE TZOR 'KHRUNGS PA'I SKYES RABS SU LJON SHING RGAS PAR GYUR KYANG MI GTONG BAR BSHAD PA LTAR SEMS CAN NAM YANG MI GTONG BAR BSHAD DO, ,BYANG CHUB DON GNYER GYI BLO BSKYED TSUL GYI SGO NAS BSTOD PA LA GNYIS,
, ,NGO BO'I SGO NAS MDOR BSTAN PA DANG, RGYU'I SGO NAS RGYAS PAR BSHAD PA'O, ,DANG PO NI, GANG SLAD 'GRO BA MYA NGAN MI 'DAS MYA NGAN KHYOD 'DA'I BLO MA BYUNG, ,GZHAN GYI BDE GSHEGS GO 'PHANG BRNYES PAR NUS PA MA LAGS DE MI MDZAD, ,DE SLAD KHYOD NI KUN MKHYEN YON TAN GTER DAG BRNYES MDZAD SLAD DU BRTZON, ,STOBS BCU'I YON TAN BDAG GIR MDZAD PA LAS GZHAN KHYOD LA PHRA MI MNGA', ,ZHES GZHAN MYANG 'DAS LA 'GONG PA'I DON DU MA YIN PAR RANG KHO NA'I DON DU MYANG 'DAS THOB 'DOD KYI BLO MI BYUNG ZHING, GZHAN SEMS CAN THAMS CAD SANGS RGYAS LA 'GONG MI NUS ZHES THUGS ZHUM PAR MI MDZAD PA DE'I PHYIR, THAMS CAD MKHYEN PA'I YE SHES BRNYES PA'I CHED DU BRTZON ZHING, STOBS BCU'I YON TAN BDAG GIR MDZAD PA LAS GZHAN THEG DMAN THAR BA THOB 'DOD KYI BLO CUNG ZAD TZAM YANG MI MNGA' BAR BSHAD DO, ,GNYIS PA LA BZHI, SANGS RGYAS KYI RIGS YOD PA DANG, TH4EG CHEN DGE BA'I BSHES GNYEN LA BRTEN PA DANG, SEMS CAN LA SNYING BRTZE BA DANG, SDUG BSNGAL GYIS MI LDOG PA'O, ,DANG PO NI, GANG SU LA LA DAG GIS BDE GSHEGS GO 'PHANG BRNYES PA DE DAG KYANG, ,'DI BAS SHIN TU SMAD PA'I GNAS SKABS DAG TU LHUNG BA BYUNG NGO ZHES, ,DE SLAD KHYOD KYIS NYAM DAR LHUNG BA'I TSE YANG BDAG NYID SMAD MA MDZAD, ,BDAG LA SMOD PA MI RUNG SKYES BU DAR BA ZHUM PAR BGYID PA LAGS, ,ZHES PAS BSTAN TE, GO BAR SLA ZHING SPYOD 'JUG LAS, BDAG GIS BYANG CHUB GA LA ZHES, ,SKYIR LUG
PAR NI MI BYA STE, ,'DI LTAR DE BZHIN GSHEGS PA NI, ,BDEN PA GSUNG BAS BDEN 'DI GSUNGS, ,SBRANG BU SHA SBRANG BUNG BA DANG, ,DE BZHIN SRIN BUR GANG GYUR BA, ,DES KYANG BRTZON PA'I STOBS BSKYED NA, ,BYANG CHUB 'THOB DKA' BLA MED 'THOB, ,BDAG LTA RIGS KYIS MIR SKYES LA, ,PHAN DANG GNOD PA'I NGO SHES PAS, ,BYANG CHUB SPYOD PA MA BTANG NA, ,BDAG GIS BYANG CHUB CIS MI 'THOB, ,CES PA LTAR RO, ,GNYIS PA NI, GONG SLAD GAL TE RANG LA RAG LAS 'BAD PAS BYANG CHUB THOB GYUR NA, ,SANGS RGYAS GO 'PHANG RNYED DKA' MA LAGS SNYAM DU KHYOD KYIS BLO GROS BYUNG, ,DE SLAD KHYOD KYIS NYAM NGA'I DUS SU'ANG KUN MKHYEN SMON LAM BRTAN BZLOG PA, ,DMAN LA DGA' BA RNAMS KYI TSIG DAG KHYOD KYIS KHYAD DU BSAD PAR MDZAD, ,CES BLA MED BYANG CHUB NI GZHAN NAS SLONG BA MIN GYI, RANG GI 'BAD RTZOL LA RAG LAS PA YIN PAS NA SANGS RGYAS KYI GO 'PHANG RNYED PAR DKA' BA MA YIN NO SNYAM DU THUGS LA BZHAG NAS, GZHAN GYIS BLA MED BYANG CHUB LAS LDOG PA'I TSIG SMRAS KYANG DANG DU MA BLANGS PAR BSHAD DE, DNGOS SU SDIG GROGS SPONG TSUL BSTAN NAS SHUGS LA ZHI MTHAR LTUNG BA LAS YONGS SU 'DZIN PA'I THEG CHEN DGE BA'I BSHES GNYEN GYIS ZIN PAR BSTAN TO, ,GSUM PA NI, NYON MONGS CHU BO RAB 'KHRUG DAN 'GRO KHA DOG RTAG TU GDANGS PA DANG, ,SKYE BO'I G-YO DANG SDIG PA'I GROGS PO RTAG PAR RGYUN DU GNAS PA DANG, ,THUB RNAMS RNYED PAR DKA' ZHES DE LTAR SEMS ZHUM 'GRO BA GTONG BA'I RGYU, ,GANG LAGS DE NYID KHYOD KYI
, ,THUGS RJE RTAG TU SKYE BA'I RGYUR YANG GYUR, ,ZHES SO SO'I SKYE BO PHAL CHER NYON MONGS RAB TU 'KHRUG PA'I DBANG GIS MI DGE BA'I LAS STOBS LDAN DPAG TU MED PA BSAGS NAS NGAN 'GRO'I SDUG BSNGAL DRAG CING RTZUB LA TSA ZHING YID DU MI 'ONG BA'I G-YANG SAR LDOG TU MED PAR GZHOL BA DANG, ,PHAL CHER G-YO SGYUS SLAD PA DANG MI DGE BA'I BSHES GNYEN DANG SDIG PA'I GROGS PO'I GZHAN DBANG DU SONG BA YIN PAS, DE DAG NYAM NGA BA DANG BRAL BA'I PHYOGS SU 'KHRID PAR MI NUS SNYAM DU BLO DMAN PA RNAMS SEMS ZHUM STE 'GRO BA GTONG BA'I RGYU GANG YIN PA DE NYID, MKHAS PA KHYOD KYI THUGS RJE 'PHEL BA'I RGYUR GYUR RO ZHES BSTOD DO, ,BZHI PA NI, JI LTAR 'GRO BA RNAMS LA KHYOD BLO SHIN TU BYAMS PA SKYE BA LTAR, 'JIG RTEN 'DI DAG RANG LA'ANG BYAMS PA'I BLO GROS SKYE BAR MI 'GYUR LA, ,'JIG RTEN PHONGS PA'I GNAS SKABS GYUR NA BDAG NYID DAG KYANG GTONG BAR BGYID, ,KHYOD NI SHIN TU NYAM PA'I DUS SU'ANG 'GRO BA GTONG BAR BZHED MA MCHIS, ,ZHES PAS KHYOD 'GRO BA RNAMS LA BYAMS PA SKYE BA'I TSOD JI LTA PA DE LTAR 'GRO BA RNAMS RANG LA'ANG BYAMS PA'I SEMS MI SKYE LA, ,KHYOD SEMS CAN GYI 'PHONGS PA SEL BA'I DON DU RANG GI SROG KYANG GTONG BAR BZHED PAS NA, ,JI TZAM SHIN TU SDUG BSNGAL BAR 'GYUR KYANG 'GOR BA GTONG BAR BZHED PA'I BLO MI SKYES ZHES BSHAD DE, MDO SDE RGYAN LAS, JI LTAR BRTZE BDAG BDE DANG PHAN PHYIR SBYOR, ,SEMS CAN GZHAN LA BYAMS 'DOD DE LTAR NI, ,SKYE BO BDAG LA'ANG BYAMS PAR MI 'DOD NA, ,RAB
SDUG SKYE BO GZHAN RTEN SMOS CI DGOS, ,ZHES DANG, RGYAL MCHOG BSKAL BZANG RGYA MTSOS, SKYE BO GANG DAG RANG SDUG NYID KYANG RES 'GA' KHOR BA'I DBANG GYUR TE, ,GSOD PAR BRTZAMS MOD KHYOD KYIS 'GRO RNAMS BU DANG 'DRA BAR RTAG DGONGS NAS, GNOD 'GYUR CHA TZAM THUGS KYIS DGONGS PA RING MO ZHIG NAS BTANG BAS NA, ,BDAG 'DRA RANG LA BRTZE BA DES KYANG KHYOD THUGS SNYING RJE'I CHAR MI PHOD, ,CES BA LTAR RO, ,SBYOR BA'I GNAS SKABS KYI SGO NAS BSTOD PA LA GNYIS, ,MOS PAS SBYONG BA DANG, SA THOB PA'I SBYOR BA'O, ,DANG PO LA BCU, SBYIN PA DANG, TSUL KHRIMS DANG, BZOD PA DANG, BRTZON 'GRUS DANG, BSAM GTAN DANG, SHES RAB DANG, THABS DANG, SMON LAM DANG, STOBS DANG, YE SHES KYI PHAR PHYIN LA SLOB TSUL GYI SGO NAS BSTOD PA'O, ,DANG PO NI, GANG ZHIG SKYE BO DMAN DANG PHONGS PA RE BA'I BSAM LDAN MTHONG NA YANG, ,BRTZE MED 'BRAS BU 'DOD PAS SNOD GZHAN YON TAN DAG DANG LDAN TSOL BA, ,BSAM GLAG DE NI SBYIN PA BYED KYANG SLONG BA RNAMS DANG MTSUNGS SO ZHES, ,DE SLAD KHYOD NI THUGS RJES SLONG BA RNAMS LA SBYIN PAR BZHED LA BZHUGS, ,ZHES YO BYAD KYIS PHONGS PA'I SLONG MO BA LA MI STER BAR 'BRAS BU CHEN PO 'BYUNG BAR RE BAS YON TAN DANG LDAN PA'I ZHING TSOL BAR BYED PA NI SBYIN PA BYED KYANG SLONG MO BA DANG MTSUNGS ZHES DGONGS NAS, THUGS BRTZE BA'I DBANG GIS SLONG MO BA YON TAN MED PA LA'ANG SBYIN PA STZAL BAR BSHAD DE, BZHI BRGYA BA LAS, 'DIR BYIN PA YI SBYIN PA
, ,LA; ,'BRAS BU CHEN PO 'BYUNG 'GYUR ZHES, ,LEN DANG YONGS SU GTONG BA NI, ,TSOD SPOGS BZHIN DU SMAD PAR 'GYUR, ,ZHES PA LTAR RO, ,GZHAN DAG GANG 'TSO BA'I CHED DU NOR 'DOD PA'I LUS DE NI BYANG SEMS RNAMS GZHAN LA LAN BRGYA PHRAG MANG PO GTONG BA DANG, BYANG SEMS RNAMS YO BYAD KUN GTONG BAS RANG NYID SEMS DGA' BAR BYED PA LTAR, SLONG MO BA RNAMS YO BYAD KUN BLANGS PAS DE LTAR DGA' BA MI SKYED PA DANG, ,BYANG SEMS RNAMS BDOG PA THAMS CAD GZHAN LA GTONG BAS RANG NYID KHE THOB BAR SEMS PA LTAR, SLONG MO BA RNAMS BDOG PA THAMS CAD BLANGS PAS DE LTAR KHE THOB PAR MI SEMS PA DANG, ,BYANG CHUB SEMS DPA' RNAMS SLONG MO BA LA DRIN CHE BAR SEMS PA LTAR SLONG MO BA RNAMS SBYIN PA PO LA DE LTAR DRIN CHE BAR MI SEMS BA DANG, BYANG CHUB SEMS DPA' RNAMS SLOB MO BAS NOR SLONG BA'I SGRA THOS PAS BDE BA SKYE BA LTAR DGRA BCOM PA DAG ZHI BA'I BDE BA LA SNYOMS PAR 'JUG PAS DE LTAR BDE BA MI SKYE BAR GSUNGS TE, MDO SDE RGYAN LAS, LUS CAN RNAMS NI GANG PHYIR NOR 'DOD PA, ,BRTAN RNAMS DE NYID LUS CAN RNAMS LA GTONG, ,SKYE BO RNAMS NI LUS PHYIR NOR 'DOD DE, ,DE NYID BRTAN RNAMS BRGYA PHRAG RNAMS SU GTONG,, ZHES DANG, JI LTAR BLO LDAN 'DI NI KUN GTONG BAS, ,DON GNYER SKYE BO DGA' BAS DGA' BA LTAR, ,DE LTAR SLONG MO BDAG BLAD BYA BA, ,'DOD DGU THOB PA DAG GIS DGA' MI 'GYUR, ,BLO CAN BDOG DGU GTANG BAS NOR MED PA, ,BDAG
NYID NOR LDAN SEMS PA JI LTA BAR, ,SLONG BA LONGS SBYOD KUN RDZOGS DAG NYID NI, ,DE LTAR NOR DANG LDAN PAR MI SEMS SO, ,JI LTAR BLO LDAN 'DI NI SBYIN PA BZANG POS TSUL BZHIN DU, ,DON GNYER TSIM BYAS DE LA PHAN CHEN 'DOGS PAR SEMS PA LTAR, ,DE BZHIN SLONG MO BA DAG SHIN TU NOR MANG THOB NAS NI, ,SBYIN PA PO LA RNYED PA'I RGYU YIS DRIN DU MI RTZI'O, ,ZHES DANG, DBU MA LA 'JUG PA LAS, JI LTAR BYIN CIG CES SGRA THOS BSAM LAS, ,RGYAL SRAS BDE 'BYUNG DE LTAR THUB RNAMS LA, , ZHI BAR ZHUGS PAS BDE BA BYED MIN NA, ,THAMS CAD BTANG BAS LTA ZHIG SMOS CI DGOS, ,ZHES GSUNGS PA LTAR RO, ,GNYIS PA NI, 'GA' ZHIG RANG NYID MA 'DUL BZHIN DU RIG PAR LDAN PA'I TSIG SMRAS YANG, ,RANG GI TSIG DANG 'GAL BAR SBYOD PAS GZHAN DAG 'DUL BAR MI NUS ZHES, ,KHYOD KYIS DGONGS NAS DE SLAD 'GRO BA MTHA' DAG THUGS LA BZHAG MDZAD NAS, ,RE ZHIG BDAG NYID MA 'DUL BA NYID 'DUL BAR MDZAD PHYIR BRTZON PA LAGS, ,ZHES RANG MA 'DUL BAR GZHAN GDUL BAR MI NUS ZHES DGONGS TE BSAM PA GZHAN DON DANG MA BRAL YANG SBYOR BAS RANG 'DUL BA'I PHYIR DU BRTZON PAR BSHAD DO, ,GSUM PA NI, GANG SLAD MKHAS PA RNAMS KYI MI DGE'I LAS KYANG BDE BAR 'GYUR MOD KYI, ,'ON KYANG 'PHAGS PAS MI DGE BA DAG KUN TU BSTEN 'OS MA YIN ZHES, ,DE SLAD KHYOD NI RTAG TU RANG BZHIN YONGS SU DAG PAS SDIG LAS LOG ,NGAN SONG 'JIGS PAS MA LAGS LHA YI BDE SBYAD BZHED PA'I PHYIR MA LAGS, ,ZHES PAS MI MTHUN
, ,PHYOGS SPANGS PA'I SGO NAS BZOD PA'I PHAR PHYIN BSTAN TE, TSIG DON GZHAN RNAMS GO SLA ZHING, 'DIR MKHAS PA RNAMS KYI MI DGE BA'I LAS KYANG BDE BAR 'GYUR BAR GSUNGS PA NI, LUS NGAG GI BDUN GNANG YUL GYI BYANG SEMS DE SROG GCOD SOGS BYED PAS TSOGS MTHA' YAS BA GSOG PA YOD PAR GSUNGS PA DE'AM, YANG NA BYANG SEMS RNAMS RNAM SMIN 'BYIN PAR MA NGES PA'I MI DGE BA'I LAS DE CHED DU DRANGS TE DUR 'GROR SKYES NAS RANG GI BZHED DON BSGRUBS PAR 'OG NAS 'CHAD PA DE LA DGONGS SAM DPYAD PAR BYA'O, ,BZHI PA NI, GANG DAG 'GRO LA MI LTA BDAG NYID ZHI BAR BGYI SLAD SPYOD BGYID PA, ,DES KYANG CI STE BRTZON PA MA BSTEN SLAN CHAD BSAM RDZOGS MI 'GYUR NA, ,GANG GIS 'GRO BA MA LUS BSGRAL PHYIR BRTZON PA BRTZAMS PAS CI SMOS ZHES, ,DE SLAD KHYOD KYIS RANG GI BDE LA MA GZIGS BYANG CHUB SLAD DU BRTZON, ,ZHES DGRA BCOM THOB PA LA YANG BRTZON PA MA BSTEN PAR MI RUNG NA SANGS RGYAS THOB PA LA LTA CI SMOS ZHES DGONGS TE BLA MED BYANG CHUB THOB PA'I PHYIR TU RANG GI BDE BA LA MA GZIGS PAR BRTZON PAR BSHAD DO, ,LNGA PA NI, KHYOD KYIS 'BYOR BA CHUNG BA'I TSE YANG SBYIN PAR BZHED PA MA SPANGS LA, ,BDOG PA CHUNG YANG SLONG BA RNAMS LA ZHUM MI MDA' BA'I THUGS KYIS STZAL, ,DBANG PHYUG CHEN PO MNGA' YANG TSUL DANG 'GAL BA'I THA SNYAD MI MNGA' LA, ,NA TSOD LANG TSOR GYUR KYANG 'DOD PA RNAMS LA THUGS NI CHAGS MI MNGA', ,ZHES PAS MI MTHUN PHYOGS SPANGS PA'I SGO NAS BSAM GTAN GYI PHAR
PHYIN BSTAN TE, 'BYOR BA CHUNG YANG SLONG MO BA MI SPONG ZHING, DBANG CHE YANG TSUL DANG 'GAL BAR MI MDZAD PA DANG, LANG TSOR GYUR KYANG 'DOD PA LA MA CHAGS BAR BSHAD DO, ,MNGON RTOGS RGYAN LAS, BSLANGS NA MI ZHUM BDOG PA KUN, , BTANG YANG MI DGA' MED PA DANG, ,DBUL YANG SLONG BA MI SPONG BAS, ,SA NI DRUG PA YANG DAG 'THOB, ,CES PA LTAR GYI YON TAN GYI RIGS BYANG SEMS SO SKYE LA'ANG YOD KYANG STOBS CHE CHUNG GI KHYAD PA MED PA MA YIN NO, ,YANG NAS THOB NAS YO BYAD KYIS PHONGS PA MI SRID PAS SO SKYE'I SKABS SU DE LTAR BYAS PA'I LAG RJE SU SA DRUG PA THOB CES BSHAD KYANG RUNG STE, BLO NGAN DANG NI ZHES PA'I SKABS SU LOG LTA SOGS SPANGS PAS SA LNGA BA THOB PAR BSHAD PA BZHIN NO, ,DRUG PA NI, KHYOD KYIS THOS DANG BLO GROS CHE BA'I TSE NA'ANG BDAG BSTOD MA MDZAD LA, ,'GRO BA YON TAN CHUNG BA GZHAN RNAMS KYANG NI MTHON POR BKUR BAR GYUR, ,YON TAN TSOGS LA GNAS TSE NYID KYI SPYOD PA NYES PA CHUNG NGU'ANG BZUNG, ,'GRO BA DMU RGOD RNAMS LA RTZOL BA MI MNGA' BDE BAR GNAS PAS BZHUGS, ,ZHES BA 'DIS MI MTHUN PHYOGS SPANGS PA'I SGO NAS SHES RAB KYI PHAR PHYIN BSTAN TE, GZHAN RNAMS GO BAR SLA ZHING, RKANG PA THA MAS MI BZOD PA DANG BZOD PA'I SKYON YON SHES RAB KYIS RTOGS NAS SEMS BTUL BAS DMU RGOD RNAMS KYIS LOG SGRUB LA SEMS MA 'KHRUG BAR BDE BAR GNAS PAR GSUNGS SO, ,SLOB DPON DPA' BOS, SHES RAB LDAN PA RNAMS LA GNOD PA DAG ,BZOD PA'I YON TAN YOD PAS GNOD MI
, ,'GYUR; ;SHIN TU DUL BA'I GLANG PO'I MCHOG RNAMS LA, ,LAS KYI KHYAD PAR RNAM MANG BZOD PA BZHIN, ZHES GSUNGS PA BZHIN NO, ,BDUN PA NI, KHYOD KYI THUGS NI SRID DANG NYON MONGS SKYO BAS ZHI LA DGYES GYUR KYANG,, THUGS RJE NYID KYIS MDZAD PA'I YON TAN SKYE BO RNAMS DAD RJES SU MTHUN, ,BYED PA MA GTOGS GZHAN GYIS 'BRAS BU MI MYONG BAR NI KHYOD MKHYEN KYANG, ,'ON KYANG SEMS CAN RNAMS KYI 'BYOR BA BSKYED SLAD BSOD NAMS GTER RNAMS BDAR, ,KHYOD LA SHES RAB LA SOGS YON TAN GANG DAG RTAG TU MNGA' GYUR BA, ,DE DAG KHYOD KYIS 'GRO BA DAG GI DON RNAMS NYID DU NYE BAR SPYAD, ,DE LAS KHYOD KYIS BSOD NAMS 'BRAS BU GZHAN DU MCHIS PA MA LAGS LA, ,DE DAG 'GRO BA'I 'BYOR SLAD YONGS SU BSNGOS KYANG DON MA MCHIS MA LAGS, ,ZHES PA'I TSIGS SU BCAD PA GNYIS KYIS BRGAL LAN GYI SGO NAS THABS KYI PHAR PHYIN BSTAN TE, SRID ZHI'I SKYON YON SHES KYANG GZHAN DON DU 'KHOR BAR GNAS PA DANG, LAS MA BYAS PA DANG MA PHRAD PAR MKHYEN KYANG GZHAN DON DU TSOGS BSAGS PA DANG, GZHAN DON DU BSOD NAMS BSAGS KYANG 'BRAS BU GZHAN DU MI G-YO BA DANG, DGE BA RTZA GZHAN DON DU BSNGOS PA DE GZHAN LA MA SMIN KYANG 'BRAS BU MTHA' YAS BA 'BYUNG BAS DON MED PA MA YIN PAR BSHAD DO,, BRGYAD PA NI, KHYOD LA GZHAN LA SMAN PA'I THABS DANG BRAL BA'I DUS 'GA'ANG BYUNG MA GYUR, ,THABS CHUNG MA GYUR 'BRAS BU MA MCHIS MA LAGS 'BRAS BU CHUNG MA LAGS, ,BSOD NAMS CHUNG DU RTZOM PA DAG LA KHYOD NI MNGON DGYES MA LAGS LA,
BSOD NAMS CHU BO DAG GIS NGOMS PAR MA GYUR CHAB KYIS RGYA MTSO BZHIN, ,ZHES PA 'DIS SMON LAM GYI PHAR PHYIN BSTAN TE, GZHAN LA PHAN 'DOGS PA'I THABS DANG BRAL BA'AM ZABS CHUD DUR GYUR BA DANG, GZHAN DON GYI SPYOD PA 'BRAS BU MED PA'AM 'BRAS BU CHUNG BAR GYUR BA GANG YANG MED CING, GSONG NAMS CHUNG DUS CHOG PAR MI 'DZIN PA DANG, BSOD NAMS CHEN POS KYANG NGOMS PAR MI GYUR BAR BSHAD DO, ,DGU PA NI, MTSAN MO STON KA'I ZLA BA NYA BA'I MDANGS KYIS NYAMS DGAR GYUR BA DANG, ,RDZING BU AUTPAL RGYAS PA GNYID BRAL MIG LA RDOM BRJID BYED RNAMS DANG, ,RI BO LJON SHING ME TOG RGYAS BA BRGYA YIS RTZE MO DKRIGS RNAMS KYIS, ,GZHAN LA GCIG TU SMAN DGYES KHYOD KYI BLO GROS PHROGS PAR RDO MI THOG ,CES PA 'DIS STOBS KYI PHAR PHYIN BSTAN TE, ZLA ZER PHOG PA'I KU MU DA'I TSAL DANG, RDZING BU AUTPAL RGYAS PA DANG, NYI MA'I 'OD ZER GYIS KHA PHYE BA'I PADMA'I TSOGS DANG, RIN PO CHE'I RI BO LJON SHING ME TOG RGYAS PA BRGYA PHRAG MANG POS RGYAN PA RNAMS KYI MDZES PAS KYANG, KHYOD KYI LHAG BSAM GYI MDZES PA PHROGS PAR MI NUS PAR BSHAD DO, ,BCU PA NI, 'JIG RTEN SDUG BSNGAL DAG GIS SMAD TSE KHYOD NI NYID LA BYAMS PA YIS, ,YUL GYI DGA' BSTEN NYAMS SU BLANG BYA MIN ZHES THUGS RJE'I BLOS MKHYEN NAS,, GLING BZHI'I DBANG PHYUG MNGA' YANG YUL RNAMS KYIS NI THUGS KYANG MI PHROGS PA, ,KHYOD KYIS GZHAN SMAN LHUR BZHES MDZAD PAS DUS DAG SHIN TU 'DAS BAR BGYIS, ,ZHES PAS YE SHES KYI PHAR PHYIN BSTAN TE, SEMS CAN SDUG BSNGAL BA
, ,LA LHAG PAR BRTZE BA'I GZHAN DBANG DU SONG BAS, YUL GYI DGA' STON LA THUGS MA CHAGS PAR GZHAN PHAN 'BA' ZHIG LHUR LEN PAS DUS 'DAS PAR BSHAD DO, ,SA THOB PA'I SBYOR BA LA BDUN, SBYIN PA DANG, TSUL KHRIMS DANG, BZOD PA DANG, BRTZON 'GRUS DANG, BSAM GTAN DANG, SHES RAB DANG, THABS KYI PHAR PHYIN GYI SGO NAS BSTOD PA'O, ,DANG PO LA BZHI, BSAM PA PHUN TSOGS, SBYOR BA PHUN TSOGS, LEN PA PO PHUN TSOGS, SBYIN PAR BYA BA PHUN TSOGS BSHAD PA'O, ,DANG PO NI, PHYUG CING 'BYOR BA SLONG BA RNAMS KYIS LEGS PAR SBYAD PAR MA BYAS DANG, DUR KHROD LJON SHING ME TOG RGYAS PA'I LJID KYIS G-YUR ZA MTSUNGS SO ZHES, DE SLAD BSOD NAMS DMAN PA'I 'BYOR PA DAG LA SLONG RNAMS MI SBYOD PAS, ,KHYOD KYIS DKOR NOR SLONG BA MA MCHIS PA NA THUGS LA GCAGS PAR GYUR, ,ZHES SLONG MO BAS MI SPYOD PA'I 'BYOR BA NI DUR KHROD KYI LJON SHING DANG MTSUNGS PAR DGONGS NAS SLONG MO BA MI 'ONGS PA NA BDAG BSOD NAMS DMAN PA'O ZHES THUGS ZHUM PAR BSHAD DO, ,GNYIS PA NI, GANG ZHIG BRTZE MED SRID PAS TSONG BA BZHIN DU 'BRAS BU'I PHYIR STZAL NAS, ,DE NI 'BRAS BU YANG NI SLONG BA RNAMS LA SBYIN PAR SPRO MA MCHIS, ,GANG GI SLAD DU KHYOD KYI GTONG BA RTAG TU GZHAN LA SMAN GYUR BA, ,DE SLANG DE YI 'BRAS BU'ANG SLONG BA RNAMS KYIS RANG GI LAGS PAR BZUNG, ,ZHES BRTZE BA MED PAR 'BRAS BU'I PHYIR DU SBYIN PA GTONG BA NI SBYIN PA'I 'BRAS BU GZHAN LA GTONG BAR MI SPRO
YANG, KHYOD NI 'BRAS BU'I CHED DU MA YIN PAR SLONG MO BA LA BRTZE BA'I DBANG GIS RTZAL BA YIN PAS SBYIN PA'I 'BRAS BU YANG GZHAN LA GTONG BAR BZHED PAR BSHAD DO, ,GSUM PA NI, RI NGOS LJON SHING 'BRAS BU SMIN PA DAG TU BYA RNAMS LTA BU DANG, ,DGON PA'I RDZING BU BSKYED SHING BZANG POS BSKOR BA DAG TU DAL RNAMS LTAR, ,'DZEM MED SLONG BAS DGYIS PA KHYOD LA BAG PHEBS 'BYOR BA 'TSAL BA YI, ,SLONG MO BDAG KUN NAS MYUR BAR MNGON DU LHAGS NAS SDOD CING MCHIS,, ZHES PAS BSTAN TE, LJON SHING 'BRAS BU SMIN PA LA BYA MANG BO DANG, BSKYED SHING BZANG POS BSKOR BA'I RDZING BU LA DAL BA RNAMS LHAG NAS SDOD BA LTAR, 'DZEM PA MED PAR SLONG BAS DGYES PA KHYOD LA BAG PHEBS PA'I 'BYOR BA DON DU GNYER BA'I SLONG MO BA RNAMS MYUR BAR LHAG NAS SDOD BAR BSHAD DO, ,BZHI PA NI, DPAL 'BYOR 'BANGS DANG BTZUN MO RANG GI SHA DANG SROG KYANG GTONG BA DANG, ,KHYOD KYIS SRAS GZHON RAB SDUG STON ZLA TSES BA DRI MED GZUGS LDAN PA'ANG, ,SLONG BA RNAMS LA GTONG BAR MDZAD LA BRTZON PAR GYUR BA JI LTA BA, ,DE LTAR GTONG LA GOMS PA KHYOD KYI THUGS LA BRTAN PA NYID KYANG BYUNG, ,ZHES GTONG SEMS LA GOMS PA BRTAN PAS RANG GI LUS SROG DANG BTZUN MO SDUG PA DANG SRAS GZHON PA SOGS KYANG GTONG BAR BSHAD DO, ,GNYIS PA NI, GANG ZHIG THOS PAR GYUR NA'ANG 'JIG RTEN 'DI LA GNOD PA SKYE 'GYUR DANG, ,GANG YANG KHYOD NYID KYIS KYANG YUN RING SKU NYAMS BZHES PAR MI SPYONG PA'I, ,SPYOD PA DE DAG KHYOD LA GOMS PAS DUS SU RANG
, ,GI RANG NYID GYUR, ,DE SLAD YON TAN DAG NI YONGS GOMS MA BGYIS SPEL BAR DKA' BA LAGS, ZHES PA 'DIS RANG BZHIN GYIS YONGS SU DAG PA'I TSUL KHRIMS KYI PHAR PHYIN BSTAN TE, BLO DMAN PA RNAMS THOS PA TZAM GYIS 'JIGS SKRAG SKYE BA DANG, KHYOD KYIS KYANG DANG PO NAS NYAMS SU BZHES MI NUS PA'I SBYOR BA SHIN TU BYA DKA' BA RNAMS LA YUN RING POR BLO SBYONG BA'I MTHUS, PHYIS NAS 'BAD PA LA MI BLTOS PAR RANG GI RANG GIS 'JUG PA 'ONG BAS GOMS PA SHIN TU GAL CHE BAR BSHAD DO, ,GSUM PA NI, JI LTAR SMAN PA GDON GYIS ZIN LA GDON RNAMS BSAL BAR BGYID SLAD DU, ,BRDIG CING TSIG RTZUB SMRA BA SPYOD KYANG ZIN PA NYID LA BRDIG MA BGYID, ,DE LTAR KHYOD KYANG NYON MONGS NYID LA BRTZE DANG BRAL BAS SPYOD MDZAD KYI, ,'GRO BA NYON MONGS GYUR BA LA NI KHYOD NYID THUGS RJE MDZAD PA LAGS, ,ZHES PAS RNAM RTOG DANG BRAL BA'I BZOD PA'I PHAR PHYIN BSTAN TE, GDON GYIS ZIN PAS TSUR GNOD PA BYAS KYANG SMAN PAS GNOD LAN MA BYAS PAR GDON DANG BRAL BA'I THABS LA BRTZON PA LTAR, NYON MONGS KYI GZHAN DBANG DU SONG BA'I SEMS CAN GYIS TSUR GNOD PA BYAS KYANG KHYOD KYIS GNOD LAN MA BYAS PAR THUGS BRTZE BAS NYON MONGS DANG BRAL BA'I THABS LA BRTZON BAR BSHAD DO, ,BZHI PA NI, KHYOD KYIS RTAG TU YON TAN NOR LHAG RNAMS LA GUS PAS BSAGS PA MDZAD, ,MNYAM PA RNAMS LA YON TAN GOMS PAR BGYI SLAD BYAMS PA'I THUGS KYIS SBYANG, ,
DMAN PA RNAMS LA THUGS RJES BRTZON PA MCHOG GIS YON TAN RNAMS BSKRUN TE, ,'GRO BA RNAMS LA KHYOD KYIS JI LTAR RIGS PAR LEGS PAR MDZAD PAR ZHUGS ,ZHES PA 'DIS THABS KYIS RGYAS PA'I BRTZON 'GRUS KYI PHAR PHYIN BSTAN TE, YON TAN LHAG PA LA PHRAG DOG MED PAR GUS PAS SNYEN BKUR BA DANG, YON TAN MNYAM PA LA 'GRAN SEMS MED PAR MTHUN PAR SPYOD PA DANG, YON TAN DMAN PA LA BRNYAS SEMS MED PAR BYAMS BRTZES SBYAR BAR BSHAD DO, ,LNGA PA NI, JI LTAR MA MA RANG LUS SNA TSOGS THABS TSUL MANG POS 'DZIN BGYID KYANG, ,GZHON NU'I NAD BSAL CHED LAGS DGA' BSKYED MA LAGS LUS PHYIR MA LAGS PA, ,DE LTAR KHYOD KYANG BRTZON PA CHEN POS YON TAN BDAG NYID BSKRUN MDZAD PA, ,'GRO BAS LONGS SPYOD CHED LAGS GRAGS DANG GZHAN DAG ZIL MNAN CHED MA LAGS, ,ZHES PA 'DIS SKYE BAS STONG PA'I BSAM GTAN GYI PHAR PHYIN BSTAN TE, BU GSO MKHAN GYI MA MA NI NU ZHO 'BYUNG BA'I DON DU RANG LUS THABS SNA TSOGS KYIS BCES PAR 'DZIN KYANG GZHON NU'I BKRES SGOM GYI NAD BSAL BA'I CHED DU YIN GYI, SEMS DGA' BA DANG LUS RGYAS PA'I PHYIR MA YIN PA LTAR, KHYOD KYIS YON TAN KHYAD PAR CAN BSKRUN PAR MDZAD PA YANG 'GRO BA'I DON DU YIN GYI GRAGS PA LA SOGS PA'I CHED DU MA YIN PAR BSHAD DO, ,DRUG PA NI, KHYOD KYI BLO GROS GZHAN LA SMAN PA'I THABS MKHYEN MDZAD SLAD ZHUGS GYUR BA, ,'DI LTAR KHYOD NYID THUGS
, ,RJES RNAM PA DE DAG NYID LA ZHUGS LAGS GDA', ,KHYOD NI BRTZON 'GRUS 'PHAGS PAS BTZAL BA CHE YANG MNYEL BAR MA GYUR BA, ,DE GSUM DAG GIS KHYOD KYIS GZHAN SMAN MA BSGRUBS CUNG ZAD BYUNG MA GYUR, , ZHES PAS THABS DANG BCAS PA'I BRTZON PAS YANG DAG PA JI LTA BA BZHIN DU THUGS SU CHUD PA'I SHES RAB KYI PHAR PHYIN BSTAN TE, GZHAN DON BYED TSUL LA MKHAS PA'I SHES RAB DANG, GZHAN DON LA THUGS G-YO ZHING BSKUL BAR BYED PA'I SNYING RJE DANG, GZHAN DON GYI BYA BA LA YONGS SU MI DAL PA'I BRTZON 'GRUS GSUM GYIS GZHAN LA SMAN PA'I THABS SGRUB MI NUS PA CUNG ZAD KYANG MED PAR BSHAD DO, ,BDUN PA NI, KHYOD NI 'BAD RTZOL CHEN PO CAN GYI PHRIN LAS MDA' BAR MI BZHED LA; ,SPYOD PA SHIN TU RMAD DU BYUNG BA GCIG TU BSAM YAS 'DI YANG BYUNG, ,GANG SLAD KHYOD KYIS SEMS CAN MA MCHIS PA YANG THUGS SU CHUD GYUR KYANG, ,'DI LTAR SEMS CAN DON GYI SLAD DU GRANGS MED DUS SU'ANG SRID PAR BZHUGS, , GANG SLAD SHES RAB DON DAM BSTEN CING SNYING RJE KUN RDZOB BSTEN MDZAD PA, ,DE SLAD DON BZHIN DGONGS MDZAD KHYOD LA SEMS CAN MCHIS PA MA LAGS KYANG, ,GANG TSE KHYOD NI STOBS BCU BSKYED PA'I THUGS RJE DAG DANG LDAN GYUR PA, ,DE TSE 'GROL NYAMS THAG RNAMS LA KHYOD BYAMS BU LA PHA BYAMS BZHIN, ,ZHES PA'I TSIGS BCAD GNYIS KYIS BRGAL LAN GYI SGO NAS THABS KYI PHAR PHYIN BSTAN TE, 'BAD RTZOL RAGS PA NYE BAR ZHI YANG SBYOD PA RMAD DU BYUNG BA MTHA' YAS PA BYUNG
PA DANG, DON DAM PAR SEMS CAN MED PAR THUGS SU CHUD KYANG GZHAN DON DU 'KHOR BAR DUS YUN RING POR GNAS PA SOGS SU BSHAD DO, ,DBANG MDZAD PA'I GNAS SKABS KYI SGO NAS BSTOD PA LA LNGA, NYON MONGS PA DANG, SKYE BA DANG, LAS DANG, THABS DANG, SEMS CAN SMIN BAR BYA BA LA DBANG MDZAD PA'O, ,DANG PO LA GNYIS, NYON MONGS PA LA DBANG MDZAD PA DNGOS DANG, DE'I DGOS PA BSTAN PA'O, ,DANG PO NI, 'GRO BA GTUGS DANG NYON MONGS BSAM PAS BYANG CHUB MCHOG THOB MA MCHIS LA, ,NYON MONGS PHYOGS PAS RANG LA SMAN PAR BGYID PA'ANG THOB 'GYUR MA LAGS PAS, ,DE SLAD KHYOD KYIS BYANG CHUB BRNYES SLAD BRTZON 'GRUS BRTAN PA MDZAD PA NA, ,NYON MONGS NGES PAR MA BSREGS RAN GYI DUM BU BZHIN DU YANG PAR MDZAD, ,CES PAS GSANG SNGAGS KYIS BTUL BA'I DUG BZHIN DU NYON MONGS PA MA SPANGS PAR BTUL ZHING YANG BAR MDZAD PAR BSHAD DO, ,GNYIS PA NI, ,KHYOD KYIS NYON MONGS DRAN DANG MKHYEN PAS BZUNG BAS YON TAN SNA TSOGS 'GRUB, , NYON MONGS YANG BAR GYUR BA BYANG CHUB RGYUR YANG NYE BAR 'GYUR LAGS TE, ,'DI LTAR DE YIS KHYOD BLO SHUL GOL YUL CAN DU YANG MA BGYIS LA, ,'GRO BA RNAMS SU SKYE BA BRGYUD PA'ANG YON TAN RNAMS KYI ZHING DU MDZAD, ,CES NYON MONGS THUL BA DES YON TAN SNA TSOGS DANG BYANG CHUB 'GRUB PA'I GROGS BYED PA DANG, SEMS NYON MONGS PA'I GZHAN DBANG DU MA SONG BAR CHED DU DRANGS TE 'GRO BA MTHO DMAN SNA TSOGS SU SKYES NAS YON TAN KYI ZHING DU MDZAD PAR BSHAD DO, ,
, ,GNYIS PA LA GNYIS, SKYE BA LA DBANG MDZAD PA DNGOS DANG, DE'I DGOS PA'O, ,DANG PO NI, 'GRO BA NYON MONGS GYUR DANG SDUG BSNGAL BRGYA DAG BYUNG BAS BCOM PA YIS, ,RTZOL DANG BRAL ZHING MGON MA MCHIS PAS GANG DANG GANG DU SPYOD BGYID PA, ,'GRO BA DE NI NYON MONGS DGRA THUL KHYOD KYI THUGS RJES SPYOD PA NA, ,SRID PA LEN DANG GTONG DANG GNAS PA DAG LA MNGA' DBANG MCHIS PA LAGS, ,ZHES KHYOD NYID THUGS BRTZE BA'I DBANG GIS 'DUL BYA GANG NA YOD PA DER SKYE BA BZHES DGOS PAS SRID PA LAN GTONG GNAS GSUM LA DBANG THOB PAR BSHAD DO, ,GNYIS PA NI, CI YANG MED PA'I SKYE MCHED KYI NI YUL CAN PHRA RGYAS RNAMS BCOM NAS, ,DE DAG SPANGS PA'I THABS TSUL GANG LAGS DAM PA'I TSEGS LA YUN RING BSHAD, ,SA GSUM SMAN PA'I THABS MKHAS MNGA' BA KHYOD KYIS PHYIR YANG DRANGS NAS NI, ,DUD 'GRO DAG TU'ANG SMON PA MDZAD NAS SKYE BA BRGYA PHRAG RNAMS KYANG MDZAD, ,CES BSAM GZUGS BRGYAD THOB KYANG DE'I DBANG GIS GONG MAR MI SKYE BAR DUD 'GRO SOGS SU SKYE BA BRGYA PHRAG MANG PO BZHES PAR BSHAD DO, ,GSUM PA LA GNYIS, LAS LA DBANG MDZAD PA DNGOS DANG, DE'I DGOS PA'O, ,DANG PO NI, SNGON GYI MI DGE'I PHRIN LAS RNAM PAR SMIN PAR MA NGES GANG LAGS PA, ,DE DAG DUD 'GRO'I 'GRO BAR GSHEGS LA GZHOL BA KHYOD LA MNGA' MCHIS PAS, ,KHYOD KYIS RNAM SMIN CHED DU DRANGS TE THUGS LA DGONGS PA'I DON BSGRUBS PA,
DRANG SRONG GIS BSHAD GSANG SNGAGS ZHI BAS DUG GI SHUGS DAG BZLOG PA BZHIN, ,ZHES RNAM SMIN 'BYIN PAR MA NGES PA'I MI DGE BA'I LAS CHED DU DRANGS TE NGAN SONG DU SKYES NAS 'GRO DON MDZAD PAR BSHAD DO, ,GNYIS PA NI, KHYOD KYIS RTAG TU MI DGE'I CHOS DANG G-YUL DAG SPRAD PAR GYUR BA NA, ,'GRO BA DAR MDZAD MKHAS PA KHYOD KYIS 'GRO BA DE DANG DER SPYOD PA'I, ,TSUL KHRIMS MA 'BAD BRTUL ZHUGS LDAN PA BZHIN DU GYUR BA JI LTA BA, ,DE LTAR DAM PA'I SPYOD LUGS BYANG CHUB SGRUB PA DAG LA GOMS PAR MDZAD, ,CES PAS BSTAN TE, DUD 'GRO'I RTEN LA YANG BDE 'GRO DANG 'DRA BAR NYES SPYOD SDOM PA'I TSUL KHRIMS BSRUNG BAR MDZAD PAS SPONG SEMS KYI RTZAL SKYONG BA'I CHED DU YIN NAM SNYAM MO, ,BZHI PA LA GNYIS, THABS LA DBANG MDZAD PA DNGOS DANG, DE'I DGOS PA'O, ,DANG PO NI, MA BZHIN RES 'GA' THUGS RJE DAG DANG MA BRAL MGON MA MCHIS RNAMS KYI, ,SDUG BSNGAL DE DANG DE DAG BSAL SLAD 'GRO BA SDUG BSNGAL CAN DAG TU; ;BSNYENGS DANG BRAL BAR SPYOD PA MDZAD PA KHYOD KYI THABS LA MKHAS PA NI, ,BSGRUB PAR DKA' DANG BRNYES PAR DKA' BA 'GA' YANG BYUNG BA MA GYUR LAGS, ,ZHES GZHAN LA PHAN NA DMYAL PA'I SDUG BSNGAL LA'ANG MI 'JIGS PAS NA BSGRUB PAR DKA' BA CI YANG MED PAR BSHAD DO, ,GNYIS PA NI, GANG SLAD SNA TSOGS THABS KYIS 'GRO BA SDIG PA BYING 'DUL KHYOD LA NI, ,DUD 'GRO'I 'GRO BA DAG KYANG BDE 'GRO BZHIN DU DON CHEN KHO NAR GYUR, ,NGAN SONG DAG DU 'KHRUBS NA'ANG
, ,LEGS PAR SPYOD PA NYAMS PA MI MNGA' BA, ,DE SLAD KHYOD KYI SDIG PA'ANG YON TAN 'GYUR BAR DGE BA NYID DANG MTSUNGS, ,ZHES DUNG 'GRO'I RTEN YANG BDE 'GRO DANG MTSUNGS PAR DON CHEN DU GYUR BAS NA MI DGE BA YANG DGE BA DANG MTSUNGS PAR YON TAN GYI GROGS SU 'GYUR BAR BSHAD DO, ,LNGA BA LA GSUM, SEMS CAN SMIN PAR BYA BA LA DBANG MDZAD PA DNGOS DANG, DE'I DGOS PA DANG, RGYU YONGS SU RDZOGS PA'O, ,DANG PO NI, KHYOD LA LEGS BRTEN KHA CIG BYANG CHUB GSUM LA BLO GROS CI RIGS ZHUGS, ,DE BZHIN GZHAN DAG BSAM GTAN GZUGS MED DAG LA GO 'PHANG BZHAG PA MDZAD, ,DE BZHIN KHA CIG GTONG PAR ZHUGS SHING NGAS TSUL MCHID KYIS 'TSAL GYUR BAS, KHYOD KYIS 'JIG RTEN DAG LA SMAN YON MA BTAGS PA NI 'GA' MA MCHIS, ,ZHES 'DUL BYA'I SKAL BA DANG 'TSAM PAR THEG PA GSUM DANG RGYU SNYOMS 'JUG DANG MNGON MTHO'I RGYU SBYIN PA DANG TSUL KHRIMS SOGS LA BKOD PAR MDZAD PAS SEMS CAN SMIN PAR MDZAD PA LA MNGA' BRNYES PAR BSTAN TO, ,GNYIS PA NI, KHYOD KYIS 'JIG RTEN DAG NA 'GRO BA GANG RNAMS NGES PAR THAR 'TSAL BA, ,BDE 'GROR NYE BAR DRANGS SHING DGE BA YONGS SU SMIN PA NYID DU MDZAD, ,KHYOD KYIS 'GRO BA ZHI MDZAD SLAD DU 'GRO BA RNAMS SU SPYOD PA NA, ,DRANG SRONG CHEN PO GZHAN DAG DUS BZHIN BYUNG BAS ZHI BAR MDZAD PA BZHIN, ,ZHES PAS BSTAN TE, SEMS CAN SMIN PAR BYA BA YANG DE DAG GI SDUG KUN PHRA RAGS NYE BAR ZHI BAR BYA BA'I DON DU YIN LA, DE YANG DRANG
SRONG CHEN PO SANGS RGYAS KYIS SEMS CAN RNAM PAR SMIN ZIN PA DAG DUS LAS SKAD CIG KYANG G-YOL BA MED PAR GROL LAM LA 'GOD PAR MDZAD PA BZHIN DU KHYOD KYIS KYANG DE LTAR MDZAD CES PA YIN NAM SNYAM STE DPYAD DGOS SO, ,GSUM PA NI, GANG SLAD KHYOD NI 'GRO BA'I SKYE DANG RDZOGS SANGS RGYAS MDZAD MA GTOGS PAR, ,GZHAN GYIS SKYE BA ZHI BAR MI 'GYUR SNYAM DU BLO GROS NGES GYUR BA, ,DE SLAD BYANG CHUB GZHOL BA'I THUGS MNGA' KHYOD KYIS SRID RTZE MAN CHAD KYI, ,LAM RNAMS TSUL BZHIN STON PAR MDZAD PAS DUS DAG 'DAS PAR GYUR BA LAGS, ,ZHES PAS BSTAN TE, SANGS RGYAS MA GTOGS PA GZHAN GYIS SEMS CAN THAMS CAD SANGS RGYAS KYIS LA 'GOD MI NUS PAR GZIGS NAS BLA MED BYANG CHUB THOB PHYIR DU BRTZON ZHING, SEMS CAN SMIN GROL LA 'GOD PA LA YANG CHOS GSUNGS PA GTZO CHE BAS KHAMS GSUM LAS THAR BAR BYED PA'I LAM STON PAR MDZAD PAS DUS 'DAS PAR BSHAD DO, ,'BRAS BU'I GNAS SKABS KYI SGO NAS BSTOD PA LA GSUM, STONG PA NYID KYI RTOGS PA MTHAR THUG BRNYES TSUL DANG, SGRIB GNYIS ZAD PA'I SPANGS PA MTHAR THUG BRNYES TSUL DANG, YON TAN MTHA' YAS PA GZHAN BRNYES TSUL GYI SGO NAS BSTOD PA'O, ,DANG PO NI, GANG ZHIG RTOGS PAR MA GYUR PA YIS 'JIG RTEN MA RIG LDONGS GYUR LA, ,'GRO BA SDUG BSNGAL MANG POR RGYU ZHING 'CHI BDAG MTSAMS LAS MI 'DA' BA'I, ,'PHAGS LAM 'JIGS MED SNGON GYI DRANG SRONG CHE RNAMS RJES GSHEGS GANG LAGS PA, ,DE NI KHYOD KYIS 'GRO BA'I SDUG BSNGAL
, ,MTHAR GTUGS SLAD DU NYID GYIS MKHYEN, ,ZHES GAR ZHIG MNGON SUM DU MA RTOGS NA 'KHOR BAR 'KHYAMS SHING, RTOGS NA DE LAS 'GROL BAR 'GYUR BA'I BDAG MED PA MNGON SUM DU RTOGS PA'I 'PHAGS LAM MTHAR PHYIN PAR BSHAD DO, ,GNYIS PA NI, JI LTAR DUS MTHA'I TSEN NYI MA DU MAS CHAB BSKAMS 'JIG RTEN 'DI, ,ZHUGS CHEN MCHED PA KHROS PA LTA BUS THAL PA DAG KYANG SREG BGYID PA, ,DE LTAR DREGS BRAL KHYOD KYIS NYON MONGS BSRABS PAR GYUR BA'I BAG CHAGS KYANG, ,YE SHES ZHUGS CHEN 'BAR BA DAG GIS NGES PAR BSREGS PAR GYUR PA LAGS, ,ZHES DUS MTHA'I MES 'JIG RTEN 'DI DAG THAL BA TZAL YANG MED PAR BYED PA LTAR, YE SHES KYI MES NYON MONGS PA RNAMS BAG CHAGS TZAM YANG MED PAR BGYID PAR BSHAD DO, ,GSUM PA NI, ,GANG DAG SA GSUM BLA MA RNAMS LA NGES PAR GNAS PAR 'TSAL BA DAG ,MUN PA CHUNG DU DANG YANG LHAN CIG GNAS PAR 'GAL BA GANG LAGS PA'I, ,YON TAN MTHA' YAS DE DAG MNGON PAR SANGS RGYAS CHON DUS GCIG TU, ,SHING LA BYA RNAMS GNAS 'CHA' BZHIN DU GYUR BKHYOD KYIS GANG LAGS BRNYES, ,ZHES SPANG BYA CHUNG DU TZAM DANG YANG LHAN CIG MI GNAS PA NGES PAR SANGS RGYAS KHO NA LA YOD PA'I YON TAN MTHA' YAS PA RNAMS MNGON PAR RDZOGS PAR SANGS RGYAS PA'I TSE DUS GCIG TU BRNYES PAR BSHAD DO, ,SEMS CAN GYI DON BYED PA'I GNAS SKABS KYI SGO NAS BSTOD PA LA GSUM, CHOS 'KHOR BSKOR BA DANG, DE'I RANG BZHIN DANG, BSTAN PA YUN RING DU GNAS
PA'I SGO NAS BSTOD PA'O, ,DANG PO NI, NYI MA 'OD ZER GSAL BA STONG LDAN ZLA BA SPRIN DANG BRAL GYUR BA, ,LHAG PAR DGA' BAR BGYID PA NAM MKHA'I DKYIL NA NGES PAR GNAS GYUR KYANG, ,GANG GIS KHEBS PA'I 'GRO BA SRID PA'I DGON PA THIBS POR 'BYAMS BGYID PA'I, ,MA RIG MUN NAG DE DAG RAB TU ZHI BA'I THABS TSUL KHYOD KYIS BSTAN, ,ZHES NYI ZLA'I 'OD ZER GYIS SEL MI NUS PA'I MA RIG PA'I MUN PA DE CHOS 'KHOR BSKOR BA'I 'OD KYIS SEL PAR GSUNGS SO, ,GNYIS PA NI, SDUG BSNGAL KHYAB PA 'DI YIN DER BA SKYE BAR 'GYUR BA'I KUN 'BYUNG 'DI, ,DE MTHAR GTUGS PA 'DI YON DE RTOGS GYUR LA GZHOL BA'I THABS 'DI ZHES, ,DE LTAR TSANGS PA KHYOD KYIS DAG PA ZLA 'OD GTZANG MDAG KYANG BSTAN, ,DE DAG RTOGS BGYID SKYE BA DMAN YANG TSANGS PA'I GO 'PHANGS THOB PAR 'GYUR, ,ZHES BDEN PA BZHI LA RIM PA LTAR SHES SPANGS MNGON GOMS BYA BAR BSTAN PA NI DE'I RANG BZHIN YIN LA, DE LTAR RTOGS NAS GOMS PAR BYED PA NI THAR BA 'THOB PAR BSTAN TO, ,GSUM PA NI, JI SRID NYI MA'I SNANG BA GANG LAGS DE NI NUB KYI RI DBANG GIS, ,NYI MA NUB PAR MA BGYIS DE SRID RAB RIB RAB TU ZHI BAR BGYID, ,KHYOD KYIS SKYE SHI MTHAR GTUGS BGYI SLAD THABS TSUL BSTAN PA GANG LAGS PA; ;DE NI KHYOD NYID ZHI BAR GSHEGS KYANG SNYING GI MUN NAG ZHI MDZAD LAGS, ,ZHES JI SRID DU NYI MA NUB RI'I PHA ROL TU MA SONG BA DE SRID DU GLING 'DI'I MUN PA SEL BA LTAR, JI SRID DU KHYOD KYI BSTAN PA GNAS PA DE SRID DU 'DUL BYA'I BLO MUN
, ,SEL BAR BSTAN TO, ,GSUM PA DGE BA BSNGO BA NI, DE LTAR TSANGS PA'I GTZO BO LHA YI BLA MAR GYUR BA TSANGS GTER GYIS, ,BSTOD BGYIS BSTOD PAR 'OS PA BDE GSHEGS MNGON SUM BZHUGS BZHIN BSTOD BGYIS PAS, , BDAG GIS BSOD NAMS GTER DAG BSAGS PA GANG LAGS DE YIS 'GRO BA RNAMS, ,DRANG SRONG CHEN PO RNAMS KYIS DGONGS PA'I LEGS PA GANG LAGS DIR GYUR CIG, CES DE LTAR BGYIS PA'I DGE BA SEMS CAN THAMS CAD KYI DON DU BSNGO BAR MDZAD DO; ;GSUM PA MDUG GI DON NI, YON TAN MTHA' YAS PAR BSTOD PA SLOB DPON DKON MCHOG 'BANGS KYIS MDZAD PA RDZOGS SO,, ,,RGYA GAR GYI MKHAN PO SARBA DZ'A RI BA DANG, LO TZTSA BA BANDE RIN CHEN MCHOG GIS BSGYUR, ZHU CHEN GYI LO TZ'A BA PANDE DPAL BRTZEGS KYIS ZHUS TE GTAN LA PHAB PA'O, ,ZHES PAS BSTAN TO, ,SLOB DPON DKON MCHOG 'BANGS KYIS BRTZAMS PA'I GZHUNG, ,DE BZHIN GSHEGS PA'I YON TAN MTHA' YAS PAR, ,BSTOD PA'I BSDUS DON BGYIS PA'I DGE TSOGS KYIS, , 'GRO KUN YON TAN MTHA' YAS THOB GYUR CIG ,CES PA 'DI NI, SPONG BA BA'I GZUGS BRNYAN ^ SBRANG GTZUN NGAG DBANG DPAL LDAN GYIS, RAB BYUNG BCU BZHI PA'I BGRANG BYA BZHI BCU RTZA BZHI PA THUN MONG ZHES PA LCAGS PHO KHYI LOR, KHU KHEN HU THOG THU'I LU RE DAM CHOS 'GYUR MED GLING DU MTSAMS BCAD SKABS SU SBYAR BA 'DIS KYANG RANG GZHAN LA PHAN THOGS PAR GYUR CIG, DGE'O,, ,,
[BLANK PAGE]