, ,DPAL LDAN BLA MA DAM PA KUN SPANGS CHEN PO NGAG DBANG BLO BZANG DPAL BZANG PO'I RNAM PAR THAR PA DAD PA'I MYU GU ZHES BYA BA BZHUGS SO, ,
, ,NA MO GU RU MANYDZU GHO sh'A YA, STOBS BCU'I DPAL MNGA' RNAM 'DREN SH'AKYA'I TOG ,RMONGS BA'I MUN SEL RJE BTZUN MKHYEN PA'I GTER, ,BKA' DRIN MNYAM MED RTZA BA'I BLA MA LA, ,BYANG CHUB BAR DU SNYING NAS GUS PAS 'DUD, ,NGAG GI DBANG PHYUG THUGS RJE'I ZER 'PHRENG GIS, ,RMAD BYUNG BLO GROS SDONG PO RGYAS PA'I RTZER, ,KUN BZANG SPYOD PA'I ZE'U 'BRU RAB GSAL BA, , GRUB MCHOG DPAL LDAN BLA MAR SNYING NAS 'DUD, ,GANG GI GSANG GSUM MDZAD PA'I RGYA MTSO LAS, ,CHU THIGS TZAM ZHIG RNAM DPYOD RNGA YAB RTZES, ,BLANGS TE DON GNYER SKYE BO'I TSOGS RNAMS KYI, , GDUNG BA SEL PHYIR CUNG ZAD BRJOD PAR BYA, ,DE LA 'DIR SRID PA'I PHUN TSOGS MTHA' DAG CHU SHING LTAR GZIGS TE DBEN PA'I GNAS SU SGRUB PA SNYING POR MDZAD PA'I DPAL LDAN BLA MA DAM BA GRUB PA'I DBANG
, ,PHYUG NGAG DBANG BLO BZANG ZHES MTSAN YONGS SU GRAGS PA'I GSANG BA GSUM GYI MDZAD PA RGYA MTSO LTA BU LAS SKAL BA DANG LDAN PA RNAMS KYI DON DU MDOR BSDUS PA TZAM ZHIG BRJOD PAR BYA'O, ,DE LA GANG DU SKU 'KHRUNGS PA'I GNAS NI, MDO KHAMS STOD CHAB MDO'I SA'I CHA DBEN PHU MDO THI ZHES PAR BRAG RTZA DPON GYI RIGS LAS YAB NI YI DAM DU MA'I RNAL 'BYOR LA BRTZON PA SNGAGS 'CHAD DBANG 'BUM DANG, YUM NI DKON MCHOG LA DAD PA DANG LDAN ZHING RANG BZHIN DRANG BA 'JANG ZA 'BUM SKYID CES BYA BA'O, ,YAB YUM DE GNYIS KYI SRAS SU RAB BYUNG BCU GNYIS PA'I SGYUR BYED CES PA SA MO PHAG GI LOR HOR ZLA BCU GCIG PA'I TSES BCO LNGA LA NGO MTSAR BA'I LTAS DANG BCAS TE SKU BLTAMS, YAB YUM DE GNYIS LA SRAS MING SRID BRGYAD YOD PA LAS GRUB DBANG 'DI LNGA PA YIN NO, ,CHUNG NGU'I DUS NAS BYIS
PA THA MAL PA'I SPYOD PA LAS RING DU 'DAS SHING, DAM PA'I NGANG TSUL LA GCIG TU GZHOL BA ZHIG GO, DGUNG LO BDUN BZHES PA NA 'BRAS BLO GLING LHO PA TA LA MGO RI KHROD PA DGE SLONG DGE 'DUN BYA BA LA GTZUG PHUD PHUL TE RAB TU BYUNG, YAB YUM GNYIS KLOG LA MKHAS PAS CHED DU MA BSLAB PAR KLOG KYANG RANG SHUGS KYIS MKHYEN PA ZHIG BYUNG, DGUNG LO BCU GNYIS BZHES PA NA RGYAL BA 'PHAGS PA LHAS YUL DBUS PHUR BU LCOG NAS YONGS RDZOGS BSTAN PA'I MNGA' BDAG RJE NGAG DBANG BYAMS PA GDAN DRANGS TE CHAB MDOR BYON PA'I TSE, DE NYID LAS RAB BYUNG DANG TSIGS SNGA MA DGE TSUL GYI SDOM PA MNOS TE MTSAN NGAG DBANG BLO BZANG DU GSOL, DE NAS BZUNG STE DGUNG LO BCU BDUN GYI BAR DU GSANG 'DUS, 'JIGS BYED, BSKANG GSO, CHOS SPYOD SOGS THUGS 'JIN MDZAD NAS SKYOR SBYANGS NAN TAN DU GNANG, DGUNG LO BCO BRGYAD BZHES SKABS YUL PHYOGS DER THAN PA CHEN PO BYUNG STE LO GNYIS TZAM MU GES MNAR BA LA BRTEN DER BZHUGS MA THUB PAR YAB YUM SKU MCHED DANG BCAS TSA BA RONG DU BYON, DER TSAD PA'I NAD ZHIG BYUNG NAS YAB DANG SKU MCHED LNGA GRONGS, DGUNG LO NYI SHU PAS PHO RTA'I LOR YUM DANG SKU MCHED MING SRING GNYIS BCAS SLAR YANG CHAB MDOR PHEBS, CHAB MDO NA GRVA TSANG LNGA LA GSANG 'DUS, 'JIGS BYED; 'KHOR CHEN, DUS 'KHOR, BDE MCHOG, KYEE RDOR, KUN RIG, TSE DPAG MED BCAS CHOG GRVA BRGYAD YOD PA'I GSANG 'DUS KYI CHOG GRVA PA GLING STOD GRVA TSANG DU ZHUGS NAS LO GNYIS KYI RING CHO GA PHYAG LEN LA SBYANGS SHING SGRUB MCHOD
, ,KYANG THUGS NYAMS SU BSTAR, DE SKABS BRAG G-YAB NAS CHU BAR BLA MA DGE 'DUN BKRA SHIS KYIS LA MO CHOS SKYONG DANG, GSANG PHU BSE KHRAB PA GNYIS KYI LUNG PHEBS LTAR, LI THANG MKHAN PO NYAG RI CHOS GRAGS KYI SKU SKYER NGOS BZUNG STE CHU BAR DU GDAN DRANGS NAS BDAG 'DZIN DANG DO DAM MDZAD, RDO RJE G-YU SGRON MA'I GNAS RI RI KHROD YANG DGON DU LO GNYIS BZHUGS PAS, GNAS DER THUGS SPRO ZHING BAG PHEBS PA BYUNG 'DUG STE SKU CHE DU MAR DBEN PA LA GOMS PA'I RTAGS SU MNGON, LAM RIM CHUNG DU LHAG MTHONG MAN THUGS 'DZIN MDZAD NAS BLA MA'I DRUNG DU RGYUGS PHUL, DE NAS RJE RANG NYID LA THUGS BZHED MED KYANG CHU BAR BLA MA DGE 'DUN BKRA SHIS KYIS 'BUL SDUD LA 'GRO DGOS ZHES GSUNG BAS BKA' GCOG MA NUS PAR LI THANG PHYOGS SU BYON, DAD LDAN GYI SKYE BO RNAMS LA DGE BSKUL DANG 'BUL SDUD MDZAD PA'I TSUL NI, GSUNG RTZOM RNAM THAR TSIGS BCAD MA LAS, GROGS NGAN PA'I RKYEN GYIS RAB BSKUL TE, , RJE DGE 'DUN BKRA SHIS THUGS KYOG NAS, ,NOR CUNG ZAD TZAM PHYIR 'BUL SDUD BRDZANG, ,TSE 'DI BA'I MI DANG 'GROGS 'GROGS NAS, ,TSUL YA RABS SPYOD BA KUN DANG BRAL, ,RGYUD DUG GSUM CHER 'KHRUGS 'KHOR GYIS BSKOR, , GNAS GRONG MTHA' KHYI RKUN BZHIN DU NYUL, ,KHA BZA' BTUNG BAG MED DUD 'GRO 'DRA, ,NGAG 'CHAL GTAM MI SNYAN SNA TSOGS SGROGS, ,MA SEMS CAN BRDUNG BRDEG BKOL SPYAD BYAS, ,'JU DKA' BA'I DAD ZAS GSHIN ZAS SOGS, ,
SDIG RI BO LTA BU'I KHUNG BYIS NON, ,LUS RAB BYUNG GZUGS 'CHANG KHYIM PA'I SEMS, ,LTO GOS PHYIR SROG 'TSONG SDIG DANG SDUG ,THABS DE 'DRA SBYOR BA'I GROGS DANG BSHES, ,DUS NAM YANG 'PHRAD PAR MA GYUR CIG ,CES GSUNGS PA LTAR RO, ,SKABS DER LI THANG CHOS GRVAR ZHUGS NAS MKHAN PO CHOS 'PHAGS KYI DRUNG DU BSDUS GRVA'I RTZI BZHAG GSAN ZHING LO GSUM GYI RING THUGS GNYER MDZAD, MKHAN PO NAS ZHUS NGOR LHO BRAG BKA' 'BUM GYI LUNG DANG, SNYAN BRGYUD KYI RJES GNANG STZAL, CHAB MDO 'PHAGS PA LHA SOGS ZHAL SNGA BKA' BRGYUD KYI RNAM THAR POT GCIG GI DPE YANG MKHAN PO DE NYID LA PHUL, DGUNG LO NYER GSUM PA LA 'BUL SDUD GRUB NAS SLAR YANG CHU BAR DU PHEBS, RTZA BA'I BLA MA DGE 'DUN BKRA SHIS DANG MJAL, 'BUL SDUD KYI DNGOS PO GSER SRANG BDUN, DNGUL SRANG BRGYA DANG DRUG CU, JA 'KHER DRUG BDUN CU RTZA LNGA, RTA BCU, DRE'U BRGYAD, GZHAN YANG GOS RAS SOGS DNGOS PO PHON CHE BA PHUL BAS BLA MA YANG THUGS SHIN TU DGYES, DE NAS LO DE'I DPYING KA BLA MA DGE 'DUN BKRA SHIS SKU GSHEGS PAR DGONGS RDZOGS KYANG BSGRUBS, DGUNG LO NYER BZHI PA CHU PHO KHYI'I LE ZLA BA DGU PA'I NANG DU YUL DBUS SU BYON, SER 'BRAS DGE GSUM RGYUD STOD SMAD SOGS MJAL, DE NAS GDAN SA CHEN PO SER THEG CHEN GLING DU MKHAS GRUB MTHA' YAS PA'I 'BYUNG GNAS BYES MKHAS SNYAN GRVA TSANG GI CHOS GRVAR ZHI BA BZANG PO DANG LCAGS RA SPRUL SKU GNYIS DANG MNYAM DU ZHUGS, MKHAS PA
, ,CHEN PO SGOM SDE BRTZON 'GRUS KYI DRUNG DU BSDUS GRVA'I RTZI BZHAG GSAN NAS RIGS LAM LA SBYANGS, BYES DPON SLOB BA RI NGAG DBANG DON GRUB KYI ZHABS BSTEN NAS LO BCO LNGA'I BAR DU PHAR PHYIN, DBU MA, 'DUL BA SOGS SDE SNOD GSUM GYI GZHUNG LA SBYANGS PA MTHAR PHYIN PA MDZAD DO, ,KHYOD BLO PADMA DKAR PO'I MCHU SGROS NI, ,GZHUNG LUGS RTA BDUN 'OD STONG BCUD 'THUNGS PAS, ,YON TAN 'DAB BRGYA'I LANG CHO 'BAR BA YIS, , DPYOD LDAN RKANG DRUG NA CHUNG BRTAN PA 'PHROG ,DGUNG LO SUM CU BZHES PA'I TSE PHUR BU LCOG TU BYON NAS BSTAN PA'I SROG SHING CHEN PO RJE NGAG DBANG BYAMS PAS MKHAN PO MDZAD DE BSNYEN BAR RDZOGS NAS LHAG PA TSUL KHRIMS KYI BSLAB PA RIN PO CHE MIG GI 'BRAS BU LTAR BSRUNG BAR MDZAD, CHOS GRVAR THUGS GNYER MDZAD SKABS RJE NGAG DBANG BYAMS PA RIN PO CHE'I DRUNG DU LAM RIM 'JAM DPAL ZHAL LUNG GI DMAR KHRID TSAR BRGYAD, BYANG CHUB BDE LAM TSAR BDUN, BDE GSANG 'JIGS GSUM GYI BSKYED RDZOGS KYI KHRID TSAR GSUM GSUM, KUN RIG, MI 'KHRUGS PA LHA BCU GSUM MA, BCU GCIG ZHAL DPAL MO'I LUGS, GDUGS DKAR LHA BCU BDUN MA RNAMS KYI DBANG, GCOD DBANG NAM MKHA' SGO 'BYED, TSE RTA ZUNG 'BREL DANG 'JAM DKAR GYI RJES GNANG, GCOD STAN THOG GCIG MA DANG BLO SBYONG DON BDUN MA, BLA MA MCHOD PA RNAMS KYI KHRID, RJE BLA MA RANG GI GSUNG 'BUM GYI LUNG SOGS CHOS BKA' MTHA' YAS PA'I
BDUD RTZIS THUGS KYI SHEL BUM GANG BAR MDZAD, DGUNG LO SO GCIG BAS MO SBRUL GYI LOR BLA MA ZHIB BZANG PO DANG MNYAM DU ZLA BA DGU PA'I NANG DU GTZANG DU BYON, PAn CHAN THAMS CAD MKHYEN PA BLO BZANG DPAL LDAN YE SHES DANG MJAL, DGE SLONG YE SHES MTHA' YAS LA SGRUB THABS RIN 'BYUNG GI LUNG GNANG, DGE SLONG GI DRUNG NAS BUDDHA P'A LI TA DANG, DGE 'DUN GRUB KYI GSUNG THOR BU'I LUNG GSAN, ZHVA LUR PHEBS NAS 'JAM DPAL CHOS MCHOG GI DRUNG DU BU STON CHOS 'BYUNG, DUS 'KHOR, GSANG 'DUS, BDE MCHOG RNAMS KYI CHOS 'BYUNG, CHOS SPYOD BDE LAM RNAMS KYI LUNG GSAN, BKRA SHIS LHUN POR BLA MA ZHI BA BZANG POS ZHVA LU BA 'JAM DPAL CHOS MCHOG GDAN DRANGS NAS 'GREL CHEN DRI MED 'OD KYI LUNG GSAN SKABS MNYAM DU GSAN, DE NAS SNAR THANG, GANGS CAN, KHRO PHU, DAR LUNG GNYAN GYI PHO BRANG, LHUN PO RTZE, SA SKYA, KHA'U BRAG RDZONG, BYA 'GYUR, BSAM GLING LHA MO, BA RI LO TZ'A BA'I GDAN SA G-YU'I MKHAR MO CHE, 'DAR GRANG MO CHE, 'BROG MI'I GDAN SA MYU GU LUNG, GROM PA RGYANG 'BUM MO CHE, GA YA DHA RA'I BRAG PHUG, LHA RTZE CHOS SDE, 'PHYOS MA SHING GI LHA KHANG, PHUN TSOGS GLING, JO MO NANG, BRAG RAM GYI BEG TZE RANG BYON, DE NAS GTZANG PO BRGAL TE RGYAL SRAS THOGS MED KYI GDAN SA DNGUL CHU CHOS RDZONG, RTA NAG THUB BSTAN RNAM RGYAL RNAMS MJAL TE BKRA SHIS LHUN BOR BYON, DE NAS MAR LAM NYANG GZHUNG BRGYUD MTSAN SGROGS SOGS
, ,MJAL TE DBUS SU BYON, BAR SKABS SHIG BLA MA ZHI BA BZANG PO LA RTA MGRIN YANG GSANG GI DBANG, SGRUB THABS RIN 'BYUNG, MGON CHEN BCU GSUM, RNAM SRAS BKA' BCO LNGA, BEG TZE'I RJES GNANG RNAMS DANG, MGON PO'I BE BUM DANG, BEG TZE'I BE BUM GYI LUNG, RGYAL BA DGE 'DUN RGYA MTSO'I YI DAM SGRUB SKOR LTAR GYI RJES GNANG SOGS GSAN CING PHAR YANG 'GREL PA BUDDHA P'A LI TA DANG RJE DGE 'DUN GRUB KYI GSUNG 'BUM GYI LUNG GNANG, RGYAL BA THAMS CAD MKHYEN CING GZIGS PA CHEN PO BLO BZANG BSKAL BZANG RGYA MTSO'I ZHABS DRUNG DU SNGA PHYIR BYANG CHUB LAM RIM CHEN MO'I BSHAD LUNG, GSANG 'DUS MI BSKYOD RDO RJE DANG, BDE MCHOG L'U AI BA GNYIS KYI DBANG, RDO RJE PHRENG PA DANG KRi YA SBRAGS MA'I DKYIL 'KHOR ZHE LNGA'I DBANG, MI TRA BRGYA RTZA'I NANG GI 'JAM DBYANGS AA RA PA TZA NA LHA LNGA'I DBANG, 'GREL BA BZHI SBRAGS KYI BSHAD LUNG, 'JIGS BYED KYI BSKYED RDZOGS, SMAN BLA BDE GSHEGS BRGYAD KYI RJES GNANG, MDO SDE 'DZANGS BLUN, JO BO'I CHOS CHUNG BRGYA RTZA, RGYAN 'JUG GNYIS, DBU MA RIGS TSOGS DRUG, GSANG 'DUS KYI SGRUB THABS MDO BSRE DANG, MDOR BYAS, RNAM BZHAG RIM PA, BYANGS, MNGON PA KUN BTUS, DE'I DAR tIKA, RJE'I GSUNG 'BUM KHA SHAS, STONG THUN SKAL BZANG MIG 'BYED, RGYAL BA DGE 'DUN RGYA MTSO'I GSUNG 'BUM, RGYAL BA RANG NYID KYI BKA' 'BUM PHAL CHER GYI LUNG, DKA' LDAN LHA BRGYA MA'I KHRID
SOGS ZAB PA DANG RGYA CHE BA'I CHOS MTHA' YAS PA BUM PA GANG BYO'I TSUL DU GSAN, BAR SKABS SHIG GSANG PHUR BYON TE DKA' BCU'I MTSAN BTAGS KYANG GNANG, DGUNG LO SO BZHI BA CHU PHO SPREL LOR PAn CHEN RIN PO CHE SE RAR PHEBS SKABS DGE SLONG YE SHES MTHA' YAS LA, RGYAL TSAB, MKHAS GRUB, DGE 'DUN GRUB RNAMS KYI GSUNG 'BUM LUNG RGYUN GANG YOD GSAN, PHAR YANG LHO BRAG SNYAN BRGYUD KYI LUNG RJES GNANG RNAMS DANG, BDE MCHOG L'U AI PA'I BSKYED RDZOGS KYI KHRID LUNG GNANG, DGUNG LO SO BRGYAD PA ME BYI'I LOR TRE BO DGE BSHES BSTAN 'PHEL DANG MNYAM DU SHAR 'BUM PA LA SOGS BA'I 'PHAN YUL STOD SMAD, BYANG RVA SGRENG, KLUNG SHOD STABS KA'I 'BUM PA SOGS MJAL NAS DBUS STOD NAS MAL GRO RIN CHEN SGANG BRGYUD, RDZING PHYI, GAR PHUG, BSAM GTAN GLING, RGYA SOG PHU, LHA SDINGS, 'O DE GUNG RGYAL LA GANGS BSKOR BYAS NAS GLANG LA BRGYAB, RGYAL ME TOG THANG DU PHEBS TE MTSO MJAL DANG, GRUB THOB THAR PA'I RGYAL MTSAN GYI GZHUGS GNAS RGYAL LHA THOG RI KHROD MJAL, DVAGS PO PHYI SNYING DVAGS LA SGAM PO MJAL, KLUNG DKAR GYI GRUL BRGYUD DGA' LDAN RAB BRTAN DU PHEBS, GONG MO LA BRGYUD NAS TZA RI'I CHOS ZAM BRGYUD ZHAG BDUN TZA RI'I RTZE BSKOR MDZAD, AE STOD GSER KHA? BRGYUD YAR LHA SHAM PO LA GANGS BSKOR BYAS, G-YA' BZANG DANG KHRA 'BRUG SOGS YAR LUNG GNAS GSUM RTEN GSUM MJAL, RTZE THANG, MNGA' RIS GRVA TSANG, GDAN SA THEL, MA CIG LAB SGRON GYI GDAN SA ZANGS
, ,RI KHANG DMAR BCAS MJAL, BSAM YAS, MCHIM PHU, G-YA' MA LUNG SOGS MJAL NAS RGOD DKAR LA BRGYUD SLAR YANG SE RAR PHEBS, GRVA TSANG BLA MA GSAR BA BYAMS PA SMON LAM GYIS GLING BSRE DKA' BCU'I MTSAN BTAGS GTAD KYANG MA BZHES, MTSAN NYID KYI GSAN SBYONG GRUB NAS DGUNG LO SO DGU PA ME MO GLANG GI LOR RGYUD STOD GRVA TSANG DU CHU BZANG BA NGAG DBANG CHOS GRAGS KYIS BLA MA MDZAD SKABS PHEBS NAS RGYUD 'GREL SOGS SNGAGS PHYOGS LA GSAN SBYONGS DPYIS PHYIN PA MDZAD DO, ,RIG 'DZIN 'DUS PA'I BEE d'URYA GLING NAS, ,BRTZON 'GRUS GLANG CHEN DANG 'GROGS SHING RTA YIS, ,THEG MCHOG GSANG CHEN RIN CHEN PHUNG PO'I MDZOD, ,DRANGS TSE SMIN GROL DGA' STON 'GYED LA DBANG, ,LO DER RGYA NAG NAS RGYAL DBANG RIN PO CHE'I YANG SRID KYI DON DU, YONGS RDZOGS BSTAN PA'I MNGA' BDAG LCANG SKYA ROL PA'I RDO RJE GANGS LJONGS SU PHEBS SKABS ZHABS LA GTUGS TE, BDE MCHOG DRIL BU LUS DKYIL GYI DBANG DANG DE'I BSKYED RDZOGS KYI KHRID, 'JIGS BYED DPA' BO GCIG PA'I DBANG, DE'I BSKYED RIM GYI KHRID, KHRID CHEN BRGYAD, ZHI KHRO SBRAGS SGRUB KYI KHRID, RNAM SNANG MDON BYANG GI DBANG, SPYAN RAS GZIGS TSEM BU DMAR KHRID, GRUB RGYAL LUGS KYI TSE SGRUB SOGS RJE DE NYID BOD DU BZHUGS RING ZAB CHOS GANG GNANG RNAMS 'BAD RTZOL CHEN POS GSAN BAR MDZAD, DGUNG LO ZHE GCIG PA SA MO YOS KYI LOR SANGS RGYAS SNANG BA MTHA' YAS NGUR SMRIG GAR
GYIS RNAM PAR ROL BA PAn CHEN THAMS CAD MKHYEN PA BLO BZANG DPAL LDAN YE SHES YUL DBUS SU BYON SKABS, PO TA LA'I TSOMS CHEN RNYING BAR DUS KYI 'KHOR LO SKU GSUNG THUGS YONGS SU RDZOGS PA'I DBANG CHEN GSAN, LO DE'I NANG DU MDO KHAMS BSTAN PA'I GSAL BYED BRAG G-YAB CHUNG TSANG SPRUL SKU SKAL BZANG THUB BSTAN LA RGYAL BA DGE 'DUN GRUB, RGYAL BA DGE 'DUN RGYA MTSO, PAn CHEN BLO BZANG CHOS RGYAN RNAMS KYI GSUNG 'BUM DANG, 'GREL PA BUDDHA P'A LI TA, BYAMS CHOS SDE LNGA, RIGS TSOGS DRUG, KLU SGRUB KYI BSTOD TSOGS RNAMS KYI LUNG GNANG, LHA LDAN STAG LUNG SHAG TU BSTAN PA'I GSAL BYED STAG PHU SPRUL PA'I SKU BLO BZANG BSTAN PA'I RGYAL MTSAN LA, 'JIGS BYED ZHE DGU MA, RO LANGS BRGYAD SKOR, N'A RO MKHA' SBYONG MA RNAMS KYI BYIN RLABS DANG, RANG NYID KYIS ZHU BA PO MDZAD NAS NYI MA SDINGS DPON SLOB GRUB MCHOG BLO BZANG 'JAM DPAL RGYA MTSO'I GSUNG 'BUM GYI LUNG SOGS GSAN, PHAR YANG SPRUL PA'I SKU LA BRTAG GNYIS tIKA CHEN GYI LUNG PHUL, BDAG GIS KYANG NANG PA RGYAL SRAS PA'I SHAG TU LHO BRAG SNYAN BRGYUD KYI DBANG DANG RJES GNANG RNAMS ZHUS PAS DGYES BZHIN STZAL, RGYUD DU LO GSUM TZAM BZHUGS NAS DGUNG LO ZHE GNYIS PA LCAGS 'BRUG LOR RNYED PA DANG BKUR STI DANG GO SA SOGS TSE 'DI'I 'KHRI BA MTHA' DAG MCHIL MA'I THAL BA BZHIN BOR TE DBEN PA'I GNAS SU SGRUB PA 'BA' ZHIG MDZAD PAR DGONGS NAS SNYE THANG RMOG LCOG TU BYON, DE NAS DGON PA GSUM YOD
, ,PA'I BTZUN PA'I DGON DU KHANG PA ZHIG G-YAR NAS LO GSUM TZAM BZHUGS TE THUN MONG DANG THUN MONG MA YIN PA'I LAM GYI RIM PA'I NYAMS LEN LA BRTZON PAR MJED, DE NAS SDE SRID STAG RTZE BA'I MI BRGYUD RNAM RGYAL GRVA TSANG GI SDE PA DGE 'DUN RGYAL MTSAN GYIS BSKUL MA ZHUS NAS, 'GRO MGON GTZANG PA RGYA RAS KYI GDAN SA KLONG RDOL RI KHROD DU PHEBS NAS LO DGU BZHUGS, GSANG 'DUS KYI LJAGS BSNYEN SOGS SPROS BCAS KYI DGE SBYOR LA CHU BO'I RGYUN LTAR BRTZON PAR MDZAD, DER BZHUGS RING SNYE THANG BDE SKYID GLING PA DANG, SDE PA DGE 'DUN RGYAL MTSAN, AEM CHI BLO BZANG DBANG PHYUG GSUM GYIS SBYIN BDAG GI KHYUR BLANGS TE BSNYEN BKUR YANG DAG ZHUS SHING, KHYAD BAR DU BDE SKYID GLING BAS DE NAS BZUNG DA LTA'I BAR SBYIN BDAG BYAS PAS LO NYER BDUN TZAM SONG 'DUG, DGUNG LO ZHE BZHI PA CHU RTA'I LOR RGYAL BA RIN PO CHE'I MCHOG SPRUL KHRI 'DON GYI CHED DU PAn CHEN THAMS CAD MKHYEN PA YUL DBUS SU BYON SKABS SKYABS MGON DE NYID KYI DRUNG DU, RJE BLO GROS CHOS SKYONG GIS MDZAD PA'I DUS 'KHOR SMON LAM GYI BSHAD LUNG, SHAMBHA LA'I ZHING BKOD PAn CHEN RANG NYID KYIS MDZAD PA'I BSHAD LUNG, BDE MCHOG DRIL BU PA'I RIM GNYIS KYI KHRID, ZAB MO LTA BA'I KHRID BCAS ZAB CHOS DRU MA GSAN, RJE 'DI NYID KYIS TSE BLOS BTANG GI BYA BRAL KHO NA MDZAD PAR SKYABS MGON PAn CHEN RIN PO CHE NAS KYANG THUGS SHIN TU DGYES PA'I GSUNG GIS DBUGS 'BYIN PAR MDZAD CING ZHABS DBANG YANG
LAN GSUM ZHU RGYU BYUNG 'DUG, GRUB DBANG RANG NYID NAS KYANG GSER SRAD GANG, DNGUL RTA RMIG MA GCIG, SNGA PHYIR G-YANG tAM BRGYA PHRAG DRUG, G-YU DKAR YOL GANG BCAS PHUL TE SKYABS MGON PAn CHEN CHOS KYI RGYAL PO MA 'ONGS PA NA RIGS LDAN DRAG PO 'KHOR LO'I SKU'I RNAM PAR ROL PA'I TSE 'KHOR GYI THOG MAR GYUR TE GSUNG GI BDUD RTZIL NGOMS MED DU LONGS SPYAD DE, SKU TSE DE NYID LA ZUNG 'JUG RDO RJE 'CHANG GI GO 'PHANG THOB PA'I GSOL 'DEBS DANG, SKYABS 'JUG LAN CIG TZAM MA YIN PAR YANG YANG ZHUS PAS BKA' BZHES KYANG BZANG PO STZAL, DGA' LDAN MDA' YAB KYI ZHAL 'DEBS LA YANG GSER SRANG DRUG PHUL, DGUNG LO ZHE LNGA PA CHU MO LUG GI LOR SGO MANG DPON SLOB NGAG DBANG DGE LEGS KYIS GDAN DRANGS NAS SGO MANG BLA BRANG DU ZLA BA GCIG DANG ZHAG MA BCU GSUM GYI RING KHONG RANG LA BYANG CHUB LAM RIM CHEN MO'I BSHAD LUNG MTHAR RGYAS SU STZAL, DE NAS BRAG RGYAB TU BYON NAS BRAG RGYAB SNGAGS RAM PA BLO BZANG CHOS 'PHEL LA, RIM LNGA GSAL SGRON; SPAS DON KUN GSAL, GSANG 'DUS BSKYED RIM DNGOS GRUB RGYA MTSO, 'JIGS BYED BSKYED RIM CHEN MO SOGS KYI BSHAD LUNG ZHUS SHING, PHAR YANG PO TO BA'I DBE CHOS, BE BUM SNGON PO'I 'GREL PA, BKA' GDAMS PHA CHOS BU CHOS SOGS CHOS BKA' MANG PO GNANG, DGUNG LO ZHE DRUG BAR MANG DU THOS PA'I BANG MDZOD 'DZIN PA DKA' CHEN THABS MKHAS KYI DRUNG DU BKA' 'GYUR GYI LUNG YONGS SU RDZOGS PA GSAN, DGUNG LO ZHE BRGYAD PA ME KHYI'I LOR RAB 'BYAMS
, ,PA BLO BZANG DAR RGYAS KYIS PHUR BU LCOG TU GDAN DRANGS NAS RJE NGAG DBANG BYAMS PA'I SPRUL SKU BLO BZANG BYAMS PA LA RJE BTZUN TZONG KHA PA CHEN PO'I GSUNG 'BUM, RGYAL BA DGE 'DUN RGYA MTSO'I GSUNG 'BUM, PAn CHEN BLO BZANG CHOS RGYAN GYI GSUNG 'BUM, RGYA GZHUNG SOGS KYI LUNG GNANG, MO PHAG LOR AAKA RU DANG TZAN DAN GYI PHYE MAS BZHENGS PA'I MAR BA, MI LA, YUM BDAG MED MA'I SKU TSAR GSUM, KHA BTAGS STONG LA GRUB THOB BRGYAD CU DANG, BOD KYI GRUB THOB BRGYA LHAG GI SKU BRNYAN BRIS NAS LHO BRAG SRAS MKHAR DGU THOG GI G-YAS G-YON DU PHUL, DGUNG LO LNGA BCU PAS PHO BYI BA'I LOR MDO KHAMS BSTAN PA'I GSAL BYED BRAG G-YAB CHE TSANG SPRUL SKU DPAL LDAN BSTAN PA RGYAL MTSAN, SGO MANG DGE BSHES RTZE THANG MKHAN PO BLO BZANG BSOD NAMS, DGE BSHES BSKAL BZANG DNGOS GRUB, DGE BSHES BLO GROS BSOD NAMS SOGS DON GNYER BA BDUN CU SKOR LA LAM RIM CHEN MO'I BSHAD LUNG ZHAG MA NYI SHU'I RING NYIN RER CHOS THUN GNYIS RE BYAS TI GNANG, DE NAS BZUNG STE LO RE BZHIN LAM RIM CHEN MO SOGS CHOS BKA' MANG DU STZAL, YANG LO DENG BRAG G-YAB CHE TSANG SPRUL PA'I SKU NAS ZHUS NGOR DON GNYER BA SUM CU SKOR LA LAM RIM CHEN MO'I SA BCAD SKYOR DU BCUG NAS BSHAD LUNG YANG LEGS BAR STZAL, DE NAS RVA BA STOD DU BYON NAS BRAG G-YAB CHE TSANG LA RJE TZONG KHA BA, RGYAL TSAB RJE, MKHAS GRUB RJE, 'DUL
'DZIN GRAGS BA RGYAL MTSAN, RGYAL BA DGE 'DUN GRUB, RJE DGE 'DUN RGYA MTSO SOGS RGYAL BA YAB SRAS RNAMS KYI GSUNG 'BUM POTA DRUG CU SKER GYI LJAGS LUNG GNANG, RGYA NAG TU LCANG SKYA RIN PO CHER SKYABS 'JUG ZHU RTEN GSER SRAD GSUM 'BUL BA MDZAD, GNAS DES HA CANG MTHO BAS SKU GZUGS KYI 'PHROD BRTEN GYI CHED SA DMA' SA ZHIG TU PHEBS PAR BZHED PA LA BRAG G-YAB CHE TSANG GI YAB GU RU CHOS GRAGS KYIS BKA' GDAMS PA'I DGON RNYING RIN CHEN GLING DU KHANG PA ZHIG GSAR DU BRGYAB STE PHUL BAR BRTEN DGUNG LO NGA GNYIS PA LCAGS STAG GI LO DER PHEBS NAS BZHUGS TE SGRUB PA SNYING POR MDZAD DO, ,SKYE BO 'DI DAG SHIN TU 'GROL DKA' BA'I, ,RNYED DANG BKUR STI 'DU 'JI'I 'CHING BA KUN, , BCAD DE YID 'ONG DBEN BA'I SMAN LJONGS SU, ,GSHEGS KHYOD RTZOD LDAN DRANG SRONG CHEN POR 'KHUMS, ,DGUNG LO NGA BZHI PA CHU 'BRUG LOR ZLA BA BRGYAD BA'I NANG DU DKA' LDAN DU BYON TE TSOGS CHEN DU MANG JA GCIG, 'GYED BA LA tAM RE NYAG RONG GRVA TSANG LA 'GYED ZHO RE, SKU GDUNG LA BRGYA MCHOD, SKU GDUNG GI BSKOR LAM DU KHA BTAGS SRID ZHI'I BDE SKYID MAR SANGS RGYAS STONG GI SKU BAR BTAB PA DANG, GUR GYI MTHA' BSKOR DU RNAM BCU DBANG LDAN BRGYA DANG BZHI BCU, CHOS 'DON KHA BTAGS BRGYA LA MCHOD PA'I LHA MO BRIS NAS PHUL, YANGS BA CAN GYI SGRUB MCHOD SKABS, BDE GSANG 'JIGS GSUM, DUS 'KHOR, RDOR DBYINGS, KUN RIG, RNAM SNANG MNGON BYANG, TSE DPAG MED LHA
, ,DGU; MI 'KHRUGS PA LHA DGU STE DKYIL 'KHOR DGU'I RAS BRIS DANG DE RNAMS LA YOL BA BLA BRE RE DANG, DKYIL 'KHOR GYI 'DON CHA MED PA ZUR DU TSOGS PA RNAMS LA BLA MA MCHOD PA'I TSOGS ZHING GI SKU THANG BCAS PHUL, KHRI PA BLO BZANG BSTAN PA LA SKYES RABS SO BZHI PA'I LUNG GNANG, RVAB STOD GRVA TSANG DU MANG JA GCIG DANG 'GYED BAL tAM RE BTANG, 'JAM DPAL RDO RJE NO MON HAN GYIS ZHUS PA LTAR GZHUNG NAS RJE BTZUN DAM PA'I DBU BLAR PHEBS DGOS ZHES GSUNG YANG, BKA' BLON THON PA DANG ZHI BA BZANG PO BRGYUD NAN ZHUS BYAS PAS DGONGS PA KHROL, DGUNG LO NGA DRUG PA SHING RTA'I LOR LHO BRAG TU PHEBS, DER LO GNYIS BZHUGS, GRO BO LUNG GI MAR PA'I SKU LA GSER ZANGS KYI DBU RGYAN, NA BZA', BLA BRE SOGS MCHOD SPRIN MTHA' YAS PA DANG, SRAS MKHAR DGU THOG TU, RJE BTZUN MI LA'I RNAM THAR GYI SKU THANG SPUS SHIN TU LEGS PA NYI SHU RTZA LNGA DANG, SRAS MKHAR GYI ZUR BZHI LA CHOS 'DON KHA BTAGS RE LA RGYA BOD KYI GRUB CHEN SUM BRGYA SKOR GYI SKU RE BRIS PA LA, GONG BA, 'JA' DMAR SER YOD PA'I BKRA SHIS KHRA RING BZHI PHUL TE BDAG GZHAN MNYAM BRJE BYANG CHUB KYI SEMS BSGOMS PAS BCOS MIN GYI MYONG BA KHYAD PAR CAN THON NAS THUGS RGYUD LA DGA' BDE KHYAD PAR CAN 'KHRUNGS SHING DE'I 'BRAS RTAGS SU SA G-YO BA'I LHAS KHYAD PAR CAN BYUNG BA'I TSUL NI, GSUNG RTZOM TSIGS BCAD MA LAS, PHA MAR PA YUM BCAS
GRUB PA'I GNAS, ,LHO GRO BO LUNG GI DGON PA RU, ,RDO AA MO LI KA'I KHRI STENG NA, ,RJE MAR PA LO TZTSA'I SKU BRNYAN LA, ,BLOS GANG LCOGS MCHOD SPRIN RGYA MTSO PHUL, ,SEMS RTZE GCIG GSOL BA BTAB PA'I MTHUS, ,SDUG TIL 'BRU TZAM YANG MI 'DOD CING, ,BDE RI BO TZAM LA'ANG CHOG SHES MED, ,BDAG GZHAN GNYIS KHYAD PAR MED MTHONG NAS, ,BLO SHUGS DRAG BRTAN PO SKYES PA'I TSE, ,SA LDEM LDEM 'UR ZHING DGA' BDE SKYES, ,LTAS NGO MTSAR CHEN PO YIN NAM SNYAM, ,ZHES GSUNGS PA LTAR RO, ,SHING LUG LOR LHO BRAG DRGU THOG GI GRVA TSANG DU DGE 'DUN DRUG CU RER KHA BTAGS KYI 'GYED TSAR LNGA, DNGUL BAL tAM TE DANG ZHO RE'I 'GYED, 'BRU DANG GI 'GYED BCAS PHUL, DGUNG LO NGA BRGYAD PA ME SPREL LOR LHO BRAG NAS RIN CHEN GLING DU PHEBS, DE NAS PHUR BU LCOG TU BYON PAn CHEN THAMS CAD MKHYEN PA DER PHEBS 'DUG PA'I ZHABS DRUNG DU LAM RIM BDE LAM GYI KHRID MDOR BSDUS ZHIG DANG SEMS BSKYED CHO GAS 'DZIN PA MDZAD, RGYUD STOD PAS ZHUS NGOR PAn CHEN RIN PO CHE NAS YER PAR DBYAR GNAS KYI SKABS GSANG 'DUS KYI DBANG CHEN GNANG BA'I TSE BLA MA NYID KYANG DER BYON NAS DBANG CHEN RDZOGS PAR ZHUS, SLAR YANG RIN CHEN GLING DU PHEBS NAS THUGS DAM LA BRTZON PAR MDZAD, BAR SKABS SHIG 'BRAS SPUNGS SU PHEBS NAS RGYAL DBANG THAMS CAD MKHYEN GZIGS CHEN PO BLO BZANG 'JAM DPAL RGYA MTSO'I ZHABS DRUNG DU MJAL TE SKYABS 'JUG ZHU RTEN GSER SRANG GANG, DNGUL
, ,RTA RMIG MA GCIG PHUL, DGUNG LO DRUG CU BA SA KHYI'I LOR RGYUD SMAD BLA MA DBU MDZAD BLO BZANG BKRA SHIS KYIS GSOL BA BTAB STE RME RU 'DU KHANG DU 'BRAS SPUNGS RGYAL BA BLA MA CO NE PA, KHRI PA DON GRUB RGYA MTSO'I SKU SKYE; DKON MCHOG RDO RJE'I SKU SKYE, THO'U BKVAN ZHABS DRUNG, HAR CHIN WANG GI THO YON MTHU STOBS NYI MA, DVAGS PO DGE BSHES KYI SKU SKYE SOGS DON GNYER BA BRGYA SKOR LA, RJE TZONG KHA PA, 'DUL 'DZIN, RGYAL TSAB, MKHAS GRUB, DGE 'DUN GRUB RNAMS KYI GSUNG 'BUM GYI LUNG RGYUN GANG YOD RNAMS STZAL, DGUNG LO DRUG CU RE GCIG PAS PHAG LOR MU LI SPRUL SKU SOGS DON GNYER BA RNAMS LA NYI MA BCU'I RING 'JIGS BYED BSKYED RDZOGS KYI KHRID DANG LAM RIM CHEN MO'I BSHAD LUNG NYI MA NYI SHU RTZA BDUN GYI RING GNANG, DGUNG LO RE GNYIS PA LCAGS BYI'I LOR ZLA BA BCU GCIG PA'I NANG DU SE RAR PHEBS NAS TSOGS CHEN DU MANG JA GCIG, 'GYED BAL tAM RE; BYES DANG SNGAGS PA GNYIS LA 'GYED PHYED BRGYAD RE, SMAD LA KHA BTAGS BSOD BTAGS RE BTANG, LO DE'I RJES MAR BLA MA RANG NYID PHEBS MA THUB KYANG MI BTANG NAS SER BYES GRVA TSANG LA GRVA JA GCIG DANG 'GYED DNGUL ZHO RE PHUL, LO DER BLO GSAL GLING DPON SLOB SPOM BOR BA BLO BZANG SBYIN PA'I RIGS GRVA'I SKABS SU 'BRAS SPUNGS TSOGS CHEN LA MANG JA GCIG DANG, RDO TSAD BCO BRGYAD KYIS 'GYED BAL tAM RE BTANG, DGUNG LO DRUG CU RE BZHI PA CHU STAG LOR
RIN CHEN GLING DU ZLA BA GSUM BAR RGYUD SMAD BLA MA DBU MDZAD TRE BO BLO BZANG BKRA SHIS, RGYUD SMAD PA'I GRVA PA BZHI BCU SOGS DON GNYER BA LNGA BCU SKOR LA RVA POT DPAL POT GNYIS KYI LUNG, N'A RO CHOS DRUG GI KHRID SOGS DANG, RGYAL BA DGE 'DUN RGYA MTSO, RGYAL BA BSKAL BZANG RGYA MTSO, BLA MA BYAMS PA'I GSUNG 'BUM RNAMS KYI LUNG GNANG, DE NAS ZLA BA BZHI PA'I NANG DU RVA BA STOD DU BYON NAS DUNG DKAR SPRUL SKU, 'DUL BA DPON SLOB CHOS DANG, RVA BA STOD DPON SLOB, RGYUD PA ZHABS DRUNG, HAR CHIN WANG GI THO YON, DGE BSHES BLO BZANG BSTAN PA, GZIMS KHANG CHOS MDZAD, 'OD ZER RGYA MTSO SOGS SER 'BRAS KYI DGE BSHES MANG PO DANG GZHAN YANG DON GNYER BA STONG PHRAG LHAG LA HAR CHIN THO YON NAS ZHUS NGOR LAM RIM CHEN MO MCHAN GSUM SBRAGS PA'I BSHAD LUNG RGYAS PA DANG, BRGYAD STONG PA, BKA' GDAMS GZHUNG DRUG, 'GREL CHEN DRI MED 'OD, BYAMS CHOS SDE LNGA, TSAD MA SDE BDUN, MNGON PA GONG 'OG, 'DUL BA MDO RTZA BA, ME TOG PHRENG BRGYUD, MDO KUN LAS BTUS, BZHI BRGYA PA, NAG PO'I GZHUNG DRUG, PHRENG BSKOR GSUM, DRIL BU'I GZHUNG CHUNG GSUM, L'U AI PA'I RGYA GZHUNG, MDO BSRE, MDOR BYAS, DKYIL CHOG NYI SHU PA, RNAM BZHAG RIM PA, GSANG 'DUS RIM LNGA, SGRUB THABS RGYA MTSO DANG, BA RI BRGYA RTZA'I RGYA GZHUNG, SNAR THANG BRGYA RTZA'I RANG GZHUNG, BKA' GDAMS PHA CHOS BU CHOS, MA nI BKA'
, ,'BUM, THAR RTZE BA'I SGRUB THABS RGYA MTSO DANG CHOS SPYOD RAB GSAL GSAR RNYING GNYIS SOGS KYI LUNG GNANG, DE MTSUNGS RVA BSTOD KYI RGYAL BA RIN PO CHE'I GZIMS CHUNG DU 'GREL PA BZHI SBRAGS KYI BSHAD LUNG ZHAG MA NYI SHU SKOR LA STZAL, GZHAN YANG SBAS DON KUN GSAL, RIM LNGA GSAL SGRON, BSKYED RIM DNGOS GRUB RGYA MTSO, 'JIGS BYED BSKYED RIM CHEN MO, 'KHRUL 'KHOR KHAMS GSUM RNAM RGYAL, YIG CHUNG YANG CHUNG SOGS KYI LUNG, MGON PO'I BE BUM, RNAM SRAS BE BUM, BEG TZE'I BE BUM, LHA MO'I LAS GSUM RNAM BZHAG RNAMS KYI LUNG SOGS ZAB PA DANG RGYA CHE BA'I CHOS KYI RNAM GRANGS MTHA' YAS PA STZOL BAR MDZAD DO, ,BLO GROS SPRIN CHEN LTOR BZUNG CHOS KYI CHAR, ,GDUL BYA'I YID MTSOR PHAB PA'I MOD NYID LA, ,PHAN DANG BDE BA'I RLABS 'PHRENG G-YO BA'I RTZER, ,BYANG GROL NGANG MO 'BUM GYIS RTZE DGA' 'DZIN, ,LO DER RGYUD STOD DU DUS 'KHOR GYI DKYIL THANG GCIG, 'GREL BA BZHI SBRAGS, JA THUG GSUM, 'GYENG BAL tAM RE PHUL, DGUNG LO RE LNGA PA CHU MO YOS KYI LOR RVA SGRENG GI BTZUN MA'I DGON PA BSAM GTAN GLING GI BTZUN MA BRGYAD CUR MANG JA GCIG, 'GYED BAL tAM RE, MCHOD KONG SUM CU, RVA SGRENG YANG DGON DANG RTZE NYAG GNYIS LA MANG JA RE DANG 'GYED BAL tAM RE PHUL, DE NAS BSTAN PA'I SNANG BYED CHEN PO RGYAL SRAS SPRUL BA'I SKU BSKAL BZANG THUB BSTAN NAS
SPYAN DRANGS PA LTAR LHE KHA 'ON CHOS SDINGS SU BYON, SPRUL BA'I SKUR BKA' GDAMS GZHUNG DRUG SOGS RGYA GZHUNG LUNG RGYUN GANG YOD RNAMS DANG, 'GREL BA BZHI SBRAGS KYI BSHAD LUNG SOGS CHOS BKA' MANG PO PHUL, DE NAS 'ON BKRA SHIS RDO KHA, 'OL KHA CHOS LUNG, GAR PHUG, BSAM GTAN GLING, RGYA SOG PHU, LHA SDINGS, RGYAL LHA THOG RNAMS SU GNAS MJAL MDZAD, DE RNAMS SU MANG JA RE DANG 'GYED BAL tAM RE, RJE'I SKU BRNYAN RE, MCHOD KONG MTSAN THUB RE 'JOG BA MDZAD, DE NAS TZA RIR NYE GNAS NGAG DBANG SANGS RGYAS BTANG NAS CI GCAR LA MCHOD KONG MTSAN THUB DANG, YUL SMAD ZER BA'I BDE MCHOG GNAS RI LA TING CHE BA BDUN TSAR GCIG PHUL; SLAR YANG 'ON CHOS SDINGS SU BYON, SHING 'BRUG ZLA BA BZHI BA'I NANG DU RIN CHEN GLING DU PHEBS, PAn CHEN THAMS CAD MKHYEN PA'I MCHOG SPRUL BLO BZANG DPAL LDAN BSTAN PA'I NYI MA PHYOGS LAS RNAM RGYAL KHRIR GSAR DU PHEBS NYIN BKRA SHIS LHUN PO'I TSOGS CHEN DU MANG JA GCIG GI THEBS DNGUL SRANG BCO BRGYAD, RDO TSAD BCU BZHIS DGE 'DUN RER 'GYED BAL tAM RE PHUL, LO DER BDAG KYANG MDO SMAD BKRA SHIS 'KHYIL NAS RNAM DKAR SGRUB PA'I CHED DU 'ONGS PA ZLA BA DGU PA'I NANG DU LHA LDAN DU 'BYOR TE, ZLA BA BCU BA'I NYI SHU SKOR LA RIN CHEN GLING NAS DPAL 'BYOR RAB BRTAN DU SPYAN DRANGS TE RJE'I GSUNG 'BUM PO TI BCU LHAG, RGYAL BA DGE 'DUN RGYA MTSO'I GSUNG 'BUM, BKA' GDAMS PHA
, ,CHOS BU CHOS, MA nI BKA' 'BUM, RGYAL BA BSKAL BZANG RGYA MTSO'I GSUNG 'BUM PO TI BZHI LHAG TZAM, MAN NGAG RIN CHEN SPUNGS PA SOGS CHOS BKA' MANG DU ZHUS SHING, ZLA BA BCU GNYIS PA'I NYI SHU SKOR LA CHOS MTSAMS MDZAD DE, BA RI RNYING BAR PHEBS NAS THUGS DAM GONG 'PHEL DU BZHUGS, LO DE'I RJES MAR ZLA BA GNYIS PA'I NANG DU DPAL 'BYOR RAB BRTAN DU GDAN DRANGS NAS ZLA BA GCIG TZAM BZHUGS SHING, MDO KUN BTUS, BU STON CHOS 'BYUNG, RNAM BSHAD SNYING PO RGYAN, RNAM BSHAD THAR LAM GSAL BYED, STONG THUN SKAL BZANG MIG 'BYED SOGS 'DOD CHOS MANG DU ZHUS, LO DE'I ZLA BA BCU GCIG PA'I NANG DU BRAG G-YAB SPRUL PA'I SKU CHE TSANG NAS ZHUS NGOR BSTAN RGYAS GLING DU, BRAG G-YAB SPRUL PA'I SKU RIN PO CHE DANG DUNG DKAR SPRUL SKU, DBON PO DKON MCHOG RDO RJE'I SKU SKYE, RMOG LCOG SPRUL SKU, SA SKYA BKRA SHIS CHOS SDE'I SPRUL SKU SOGS DANG, SER 'BRAS KYI DGE BSHES KHA SHAS DANG BCAS DON GNYER BA BRGYA DANG DRUG CU SKOR LA ZLA BA DE'I NYI SHU BRGYAD NAS MGO BRTZAMS TE BKA' 'GYUR GYI LUNG GNANG BAR ME RTA ZLA BA GNYIS PA NYIS BRTZEGS KYI ZLA BA PHYI MA'I NANG DU RDZOGS PAR GRUB STE RGYAL BA'I GSUNG RAB RIN PO CHE MI NUB PA'I RGYAL MTSAN DU GYUR, SA GA ZLA BA'I NANG DU SER RA PHEBS NAS BYES GRVA TSANG GI 'DU KHANG PHUG TU BLA MA BYAMS PAS BZHENGS PA'I STON PA, RJE TZONG KHA PA, 'OD DPAG MED RNAMS KYI SKU BRNYAN DANG, NYE SRAS BRGYAD,
RTA MGRIN, PHYAG RDOR RNAMS KYI GTZO BO GSUM GYI ZHAL GSER LA GSER SRANG GSUM GSUM DANG, 'KHOR RNAMS KYI ZHAL GSER LA GSER SRANG GANG BCAS GSER SRANG NYI SHU RTZA GCIG GIS ZHAL GSER GSOL, SE RA CHOS SDINGS KYI RGYUD KHANG NANG DU RAS BSE LAS RJE RIN PO CHE'I SNANG BRNYAN MI TSAD TZAM BZHENGS, DBU ZHVA GOS BER DANG BCAS PA PHUL, G-YAS SU GSER DNGUL 'DRES MA LAS BZHENGS PA'I PHAL PO CHE PO TI DRUG, G-YON DU BRGYAD STONG PA DANG YUM GYI DBU DUM BCAS 'JOG PAR MDZAD, ZLA BA LNGA BA'I NANG DU BDAG GIS BRAG G-YAB SPRUL PA'I SKU SOGS LA CHOS BKA' CI RIGS PHUL SKABS LHA LDAN DU BYON NAS SGRUB THABS BRGYA RTZA'I RJES GNANG, KRi YA SA MUTZTSA, DPAG BSAM 'KHRI SHING GI LUNG SOGS GSAN, BDAG GIS KYANG BRGYAD STONG PA, 'DUL t'IKA RIN CHEN PHRENG BA, SKYID SHOD ZHABS DRUNG GI GSUNG 'BUM RNAMS KYI LUNG ZHUS, BDAG LA'ANG GSER SKU CHE CHUNG SUM CU SO GNYIS, BKA' GDAMS MCHOD RTEN LNGA, BYAMS CHEN GSAR BZHENGS KYI ZHAL 'DEBS SU GSER SRANG BCU, G-YU DANG G-YU'I PHRA RGYAN BCAS MANG TZAM GNANG, LO DER LHO BRAG GRO BO LUNG GI MAR PA'I DGU THOG KHANG LA GSER ZANGS KYI DBU RGYAN, BLA BRE, NA BZA', 'DU KHANG GI NANG GI STENG THAMS CAD KHEBS PA'I RAS KHRA'I BLA BRE, MAR PA'I MDUN DU RGYA TING CHE BA BDUN TSAR GCIG GIS MTSON BDUN TSAR LNGA BCAS PHUL, DVAGS PO GRVA TSANG DU MKHAN CHEN NGAG DBANG GRAGS PA'I GSUNG 'BUM PO TA
, ,GSUM DRIS NAS 'JOG PA GNANG, DGE 'DUN SUM BRGYA DANG SUM CU SKOR LA MANG JA NYI MA GNYIS DANG 'GYED BAL tAM RE, NYI MTHAR GRVA TSANG DU 'JAM DBYANGS SHES RAB SBYIN PA'I MTSAN NYID KYI PO TI GSUM BRIS NAS BZHAG STE DGE 'DUN BRGYA DANG BRGYAD CUR MANG JA GSUM DANG 'GYED BAL tAM RE BTANG, RGYAL RONG NAM MKHA' LHUN GRUB KYI GSUNG 'BUM POTA GCIG BRIS PA SER SMAD RGYAL RONG KHAM TSAN DU BZHAG NAS 'GYED BAL tAM RE PHUL, PHUR BU LCOG SPRUL SKU'I SMON LAM MTSAN BTAGS KYI ZHAL 'DEBS SU RGYA DNGUL RTA RMIG MA GCIG, JA 'KHOR DRUG BZHI, 'BRAS LTANG GCIG BCAS 'BUL BA MDZAD, ZLA BA BDUN PA'I NANG DU RGYUD SMAD LA JA THUG NYIN 'KHYONGS, 'GYED BAL tAM RE, SGO MANG DPON SLOB BSKAL BZANG DNGOS GRUB KYI RIGS GRVA'I SKABS SU MANG JA GNYIS, RDO TSANG DGUS 'GYED PHYED BRGYAD RE PHUL, GONG DU MA SMOS SHING LO TSIGS SNGA PHYI MI GSAL BA'I RTEN BZHENGS DANG GTONG SGO SOGS JI LTAR MDZAD PA'I TSUL NI, 'BRAS SPUNGS TSOGS CHEN LA MANG JA SNGA PHYIR BDUN, PHUR BU LCOG TU SNGA PHYIR BAL tAM RE'I 'GYED TSAR GNYIS, RI BO DGE 'PHEL DU BAL tAM RE, SER 'BRAS DGE GSUM GYI LHO BA KHAM TSAN DANG NYAG RE KHAM TSAN RNAMS LA BAL tAM RE'I 'GYED LAN BZHI, CHAB MDO LA SNGA PHYIR SGRUB MCHOD PA RGYANG LA KA RGYAN CHA RE, BDE MCHOG, GSANG 'DUS, DUS 'KHOR, 'KHOR CHEN BZHI LA DNGUL
SRANG SUM CU RE ZIN PA'I BLA BRE RE PHUL, CHAB MDO'I DGON PA DGE LUGS PA BZHI, SA SKYA BA GCIG DANG BCAS PA LA, RIGS GSUM MGON PO, DON YOD ZHAGS PA RNAMS KYI SKU KHA BTAGS LA BAR BTAB PA 'DOM BCU GNYIS RE YOD PA, CHAB MDO'I LHA CHEN BDUN LA 'DOM DGU RE YONG PA'I SNYAN SHAL RE, RTZA BA SHES RAB, MNGON RTOGS RGYAN, RGYUD BLA MA GSUM GYI GZHUNG 'DON PA LA 'GYED THEBS SU DNGUL RTA RMIG MA GCIG, BRAG G-YAB BYAMS MDUN DANG, DBYEN BZLUMS DGON GNYIS LA RGYAL MTSAN CHE BA RE, DGON PA SNGA MA LA GRVA BA DGU BRGYA DANG, PHYI MA LA STONG LHAG YOD PAR MANG JA RE DANG KHA BTAGS RE'I 'GYED, BYAMS MDUN GYI LHA CHEN DANG, DBYEN BZLUMS KYI SKU GDUNG MCHOD RTEN GNYIS LA SNYAN SHAL DAR MTSON SNA LNGA RE PHUL, GSER BTUL MA SRANG LNGA BCU THAM PA DANG, BRAG G-YAB SPRUL SKU CHE TSAD NAS DNGUL BTUL MA SRANG BRGYA THAM PAS, RJE RIN PO CHE, RGYAL TSAB, MKHAS GRUB; 'DUL 'DZIN, DGE 'DUN GRUB RNAMS KYI GSUNG 'BUM BZHENGS NAS GRUB 'PHRAL BRAG G-YAB DBYEN BZLUMS DGON DU 'JOG RGYU'I ZHAL BKOD MDZAD, 'BRAS KLU 'BUM, CHAS PA, BLO GLING PO KHANG, SE RA RGYAL RONG, BKRAS LHUN PA SO KHAM TSAN, RGYAL MTSAN MTHON PO RNYING BA, DGA' LDAN BRA NYE, DGA' LDAN SOG PA, KHRI GLING YAG PA'I SGRUB PHUG RNAMS LA RJE'I SKUN BZA' DANG BCAS PA RE RE PHUL, KHYUNG BO DKAR NAG SER GSUM, NAGS
, ,SHOD; DKAR SHONG, MNGA' RIS DPE THUB, KHRIG SE DGON, SHEL DKAR, MTSO 'GRAM GLING, RGYAL SHOD BCAS KYI DGE LUGS PA'I DGON PA RNAMS SU KHA BTAGS NYIS STONG LNGA BRGYA LHAG TZAM LA RIGS GSUM MGON PO'I SKU PAR BTAB NAS PHUL, GZHAN YANG GNAS BRTAN BCU DRUG, GRUB THOB BRGYAD CU, RGYAN DRUG MCHOG GNYIS, BDE BA CAN GYI ZHING BKOD KYI PAR BTAB PA BCAS GONG GSAL DANG KHYON BSDOMS KHA BTAGS KHRI PHRAG GCIG LHAG TZAM SONG BAS MTSON BLOR MI SHONG BA'I RNAM DKAR RLABS PO CHE SGRUB PAR MDZAD DO, ,PHAL PA'I 'GRO RNAMS SDUG BSNGAL RANG BZHIN DU, ,SBYOR BA'I ZANG ZING BDOG PA'I DNGOS PO GANG, , KHYOD LA DON GNYIS LHUN GRUB BDE BA MCHOG ,SGRUB PA'I THABS SU GYUR 'DI AEM MTSAR, ,MNAL LTAS BYUNG BA'I TSUL NI, KLONG RDOL DU BZHUGS SKABS MNAL LAM DU, BLA MA BYAMS PA RIN PO CHE SPANG RI ME TOG CAN ZHIG GI STENG DU BZHUGS 'DUG PA'I ZHAL NAS, KHYED RANG YAR SHOG DANG KHYED KYI SKYE BA SNGA MA NGAS BSHAD PAR BYA GSUNG BA LTAR MDUN DU PHYIN PAS RGYA GAR GYI GRONG KHYER LHAS BRTAN DANG, SH'AKYA LEGS PAR RAB SAD KHYED KYIS AE SHES ZHES GSUNG BAR SHES ZHUS PAS, KHYED RANG DE'I BU MO BUM CHUNG BYA BA'I BU YIN, BU MO DE DA LTA NGA'I MA BKRA SHIS MTSO'I SKYE BA SNGON MA YIN, DE'I SKABS SU 'BREL BA'I DBANG GIS DA LTA KHYED KYIS NGA LA CHOS NYAN RGYU BYUNG BA YIN GSUNG
ZHIG RMIS, YANG GNAS DER MTSAN MO ZHIG ZE'U LHA KHANG CHEN PO ZHIG GI NANG STENG DU PAn CHEN BLO BZANG DPAL LDAN YE SHES DANG, DE'I 'OG GI BANG RIM ZHIG TU BLA MA RANG NYID KYANG BZHUGS 'DUG PAR, PAn CHEN RIN PO CHE NAS DGYES PA'I NYAMS MDZAD PA RMIS, DE NAS BZUNG STE DGE SBYOR LA THUGS SPRO BA CHEN PO BYUNG, RIN CHEN GLING DU BZHUGS SKABS MNAL LAM DU, DKYIL 'KHOR CHEN PO GCIG GIS NAM MKHA'I KHAMS THAMS CAD KHYAB 'DUG PAR PHYOGS GZHAN RNAMS GSAL YANG, BYANG NGOS MI GSAL BAR YOD PA LA, DKYIL 'KHOR DE'I DBUS SU PADMA SAm BHA WA, G-YAS SU RGYAL TSAB RJE, G-YON DU MKHAS GRUB RJE BZHUGS 'DUG, RGYAL TSAB RJE'I DBU ZHVA THAD DRANG DU MNABS SHING, MKHAS GRUB RJE'I DBU ZHVA LEB 'JOG MDZAD NAS MNABS YOD PA ZHIG RMIS, YANG LHO BRAG SRAS MKHAR DGU THOG GI NANG DU ZHAG GSUM BZHUGS PA'I NUB CIG MNAL LAM DU SPANG RI ZHIG GI STENG NA RGYAL BA BSKAL BZANG RGYA MTSO BZHUGS 'DUG BA'I ZHAL NAS, KHYED RANG GIS LO GSUM PHYOGS GSUM THONGS LA PHYAG CHEN SGOMS SHIG CES BKA' PHEBS PA ZHIG RMIS, DE'I DON BZHIN DU RIN CHEN GLING DU LO GSUM PHYOGS GSUM GNANG, NGES MTSON GSANG BA'I RNAM PAR THAR PA NGO MTSAR BA CHES MANG BAR YOD PA'I TSOD DU SNANG YANG, GRUB DBANG RANG NYID YON TAN MTHA' DAG BUM NANG GI MAR ME LTAR SBED PAR MDZAD PAS MA 'TSAL ZHING 'DIR MDOR BSDUS TZAM SMOS PA YIN
, ,NO; ;RJE 'DI NYID LA CHOS KYI BKA' DRIN ZHUS PA'I SLOB MA'ANG, BA SO RJE DRUNG SPRUL PA'I SKU YE SHES BSTAN PA'I MGON PO, BRAG G-YAB CHE TSANG SPRUL SKU DPAL LDAN BSTAN PA RGYAL MTSAN, CHUNG TSANG SPRUL SKU BSKAL BZANG THUB BSTAN, RGYAL SRAS SPRUL SKU BSKAL BZANG THUB BSTAN 'JIGS MED RGYA MTSO, PHUR BU LCOG GI SPRUL SKU BLO BZANG BYAMS PA, STONG 'KHOR SPRUL SKU, KHRI CHEN DGE 'DUN PHUN TSOGS KYI SPRUL SKU DKON MCHOG BSTAN PA'I SGRON MA, KHRI CHEN DPAL LDAN GRAGS PA'I SPRUL SKU, STAG PHU SPRUL SKU, MU LI SPRUL SKU, STAG LUNG SPRUL SKU, SMAR KHAMS 'OD ZER SPRUL SKU, DUS 'KHOR PAndI TA'I SPRUL SKU, KLU SGRUB SPRUL SKU, 'BA' LA KHA SPRUL SKU, HAR CHIN THO YON, KON TUNG ZHABS DRUNG, THO'U BKVAN ZHABS DRUNG, HAR CHIN ZHABS DRUNG SOGS 'GRO 'DREN DU GYUR PA'I SPRUL SKU SKU SKYE SOGS DANG, RGYUD SMAD MKHAN PO BLO BZANG BKRA SHIS, SGO MANG DPON SLOB NGAG DBANG DGE LEGS DANG BSKAL BZANG DNGOS GRUB GNYIS, BLO GLING DPON SLOB LHO PA MTHA' YAS, SE RA BYES DPON SLOB SGOM SDE LHA DBANG RGYA MTSO DANG BLO BZANG 'JAM DBYANGS GNYIS, SE RA SMAD DPON SLOB RGYAL THANG BLO BZANG THUGS RJE, SHAG SKOR DPON SLOB LHUN GRUB RGYA MTSO, RGYAL BA DPON SLOB CO NE PA BSTAN 'DZIN CHOS BZANG DANG BSTAN SKYONG GNYIS, 'DUL BA DPON SLOB CHOS DANG, SNGAGS
PA DPON SLOB BSKAL BZANG KLU SGRUB, RME RU DPON SLOB SOGS GRVA TSANG KHAG GI DPON SLOB RNAMS DANG, RTZE THANG MKHAN PO BLO BZANG BSOD NAMS, RGYAL MKHAN PO RGYAL MTSAN SENG GE, SNYE MO RGYAL BYED TSAL MKHAN PO SOGS MKHAN PO RNAMS DANG, RVA BA STOD DGE BSHES YAR 'PHEL, MNGA' RIS DGE BSHES THOGS MED, DGE BSHES 'OD ZER RGYA MTSO, DGE BSHES GZIMS KHANG CHOS MDZAD SOGS DGE BSHES MANG BA DANG, GZHAN YANG SER 'BRAS DGE GSUM, RGYUD STOD SMAD, RVA BA STOD, RME RU BZHI SDE SOGS KYI BLA MA SKU SKYE, DBON CHOS MDZAD SOGS THAR PA DON GNYER BA'I TSOGS BGRANG DU YAS PA MCHIS SO, ,RJE 'DI NYID DMAN CHA BZUNG ZHING 'JIG RTEN GYI NGO 'DZIN SOGS MI MDZAD PA DANG, RNYED BKUR SOGS LA GTAN NAS MI DGYES PA'I DBANG GIS DRAG ZHAN THAMS CAD KYIS GUS 'DUD LHUR BLANGS PA'I TSUL NI, GONG MA BDAG PO CHEN PO'I SKU TSAB AA LI HA LI'U AAM BAN GYIS DAD PA DANG GUS PAS ZHABS TOG BSNYEN BKUR MDZAD CING, BOD KYI MI CHEN YANG BKA' BZHI GUNG PAndI TA YAB SRAS, BKA' BLON THON PA YANG SRAS, BKA' BLON JA SAG BLA MA SKAL BZANG RNAM RGYAL, SKU MDUN DAR HAN MKHAN PO SKAL BZANG YON TAN, RGYAL MCHOG GONG MA'I SKU TSA RJE DRUNG SKAL BZANG BSTAN 'DZIN RNAM RGYAL, RGYAL MCHOG DAM PA'I AA KHU AA CHI THU MKHAN PO BLO BZANG PHUN TSOGS, SKU MCHED RJE DRUNG RNAM GNYIS, SKU MDUN DAR HAN
, ,MKHAN PO BLO BZANG DGE LEGS, MCHOD DPON SDE DRUG MKHAN PO BLO BZANG RNAM RGYAL, RGYAL YUM BLO BZANG SGROL MA, SHANGS BKRA SHIS RTZE'I SDE PA TSE DBANG, KHAMS BRAG G-YAB PHYAG MDZOD BSOD NAMS DON GRUB, SNYE THANG BDE SKYID GLING PA DNGOS GRUB RAB BRTAN SOGS MI DRAG GI RIGS DANG, GZHAN YANG PO TA LA'I RTZE DRUNG SHOD DRUNG, LHA LDAN GYI SKYE BO PHO MO MTHA' YAS PAS GUS 'DUD LHUR BLANGS TE ZHABS TOG DANG BSNYEN BKUR TSUL BZHIN DU SGRUB PAR MDZAD DO, ,DE DAG NI CHE LONG TZAM BRJOD PA STE, NGO MTSAR BA'I RNAM PAR THAR PA MTHA' YAS PA NI BRJOD PAR MI NUS PAS 'DIR MA BRIS SO, ,DE LTAR GRUB PA'I DBANG PHYUG 'DI NYID DA LTA YANG BKA' GDAMS PA'I DGE BA'I BSHES GNYEN RNAMS KYI RNAM PAR THAR PA LHUR LEN PA'I SGO NAS BSHAD SGRUB ZUNG 'BREL GYI MDZAD PA RMAD DU BYUNG BAS RGYAL BA'I BSTAN PA RIN PO CHE GSAL BAR MDZAD BZHIN DBEN GNAS RIN CHEN GLING DU ZHABS PAD BRTAN PAR 'TSO ZHING GZHES PA 'DI LAGS SO, ,SMRAS PA, SPANGS DANG RTOGS PA'I DBANG PHYUG NYID GYUR PA'I, ,SAR GNAS SNYING STOBS LDAN PA'I RGYAL SRAS ZHIG ,DUS MTHAR BSTAN LA DGE LEGS SBYIN PA'I PHYIR, ,BSHES GNYEN TSUL GYIS ROL GANG AE MA BSNGAGS, ,NGES 'BYUNG BSAM PA'I RAL GRI GDENGS PA YIS, ,MI BZAD 'DOD YON 'CHING BA KUN BCAD DE, ,GTAN BDE'I GO 'PHANG SGRUB LA RAB DGYES PA, ,KHYOD
KYI GSANG GSUM MDZAD PA'I NGO MTSAR GTAM, ,MGRIN PA'I PAD MTSO DBYANGS CAN NGANG MO DANG, ,RTAG TU 'GROGS PA'I RTZE DGA' LHUR LEN RNAMS, ,JI BZHIN BRJOD PAR NUS MIN 'ON KYANG NI, ,DAD LDAN RJES SU BZUNG PHYIR NGAS 'DI BRTZAMS, ,BLA MA MCHOG GI BKA' DRIN PHUNG PO'I KHUR, ,MOS GUS PHRAG PAR LCI BA'I DON GNYER RNAMS, ,PAD DKAR TSAL DU RKANG DRUG GZHON NU BZHIN, ,SPRO BA CHEN POS TSUL 'DIR 'JUG PAR GYIS, ,DGE BAS LUS CAN YID KYI RDZING BU GANG, ,SKYON RTOG RDUL GYI RNYOG PA MI 'DZIN CING, ,YON TAN GZA' SKAR GZUGS BRNYAN GSAL BA YIS, ,BYANG CHEN DGA' STON MCHOG LA ROL GYUR CIG, ,,CES LUNG DANG RTOGS PA'I YON TAN MTHA' YAS PA LA MNGA' BRNYES SHING DBEN PA'I GNAS SU SGRUB PA SNYING POR MDZAD PA'I DPAL LDAN BLA MA DAM PA KUN SPANGS CHEN PO NGAG DBANG BLO BZANG DPAL BZANG PO'I RNAM PAR THAR PA DAD PA'I MYU GU ZHES BYA BA 'DI NI, RNAM DKAR GYI LAM LA SNYING STOBS KYI 'JUG PA YANGS PA'I SNYE BAD BDE SKYID GLING PA GONG DKAR RDZONG DPON DNGOS GRUB RAB BRTAN GYIS BSKUL NGOR, ^ 'JAM DBYANGS BZHAD PA DKON MCHOG 'JIGS MED DBANG POS LHA LDAN NOR 'DZIN DGA' TSAL DU GUS PA CHEN POS SBYAR BA'I YI GE PA NI RAB 'BYAMS PA 'JIGS MED DPAL 'BYOR RO,, ,,