, ,SKYE RGU'I 'DREN MCHOG DAM PA BRAG G-YAB CHUNG TSANG SPRUL BA'I SKU RIN PO CHE BSKAL BZANG THUB BSTAN DBANG PHYUG GI RNAM THAR DAD PA'I SGO 'BYED CES BYA BA BZHUGS SO, ,
, ,NA MO GU RU MANYDZU GHO sh'A YA, STOBS BCU'I DPAL MNGA' RNAM 'DREN SH'AKYA'I TOG ,RGYAL BA KUN BSKRUN 'PHAGS MCHOG 'JAM PA'I DBYANGS, ,DRI MED NGAG GI 'DOD 'JO TSANGS SRAS MAR, ,GUS PAS 'DUD DO RMONGS PA'I MUN PA SOL, ,DBANG PO'I TOG GI SPYAN SNGAR DAM BCAS BZHIN, ,LNGA BRGYA'I DUS SU ZAB MO'I LTA BA DANG, , GSANG CHEN THEG PA'I LAM BZANG GSAL MDZAD PA, ,SANGS RGYAS KUN DNGOS BLO BZANG GRAGS PAR 'DUD, ,BSKAL MANG BZANG PO'I THUGS BSKYED MNGON PAR GRUB PA'I SHING RTA LA BRTEN NAS; ;YON TAN DKYIL 'KHOR YONGS RDZOGS THUB BSTAN NYIN MOR BYED, ,GDUL BYA'I KUN GSAL 'GOG MED 'PHRIN LAS DBANG PHYUG SKYE DGU'I GNYEN, ,'KHRUNGS RABS PADMA DKAR
, ,BOS NYER MJES SPRUL BA'I SKU MCHOG RGYAL GYUR CIG ,GANG GI RNAM THAR GZHAN LA PHAN PA'I DNGOS, ,THUB BSTAN DPYID DU GYUR PA'I ROL MO YIS, ,SGRA 'DZIN DGA' STON SPEL BA'I NGO MTSAR GTAM, ,BRJOD LA MKHAS PA SU ZHIG BRTZON PA LHOD, ,DE PHYIR KUN BZANG SPYOD MCHOG ROL MTSO LAS, ,NGO MTSAR SNYING PO MDOR BSDUS ZEGS MA TZAM, , RNAM DPYOD KU SHA'I RTZE MOS NYER BLANGS TE, ,DON GNYER RE BA SKONG PHYIR BDAG GIS SBYIN, ,DE YANG LUS CAN MTHA' YAS PA'I RGUD PA MA LUS PA SEL ZHING, PHAN PA DANG BDE BA'I 'BYUNG GNAS SU GYUR BA NI RNAM 'DREN BU RAM SHING PA'I BSTAN PA RIN PO CHE NYID YIN LA, DE NYID KYANG 'KHOR LO GSUM GYI SGO NAS 'DZIN SKYONG SPEL BA'I BSTAN 'DZIN GYI SKYES BU RNAMS LA RAG LAS PA'I PHYIR SANGS RGYAS
BYANG SEMS MTHA' YAS PA MA DAG PA'I ZHING DU BSAMS BZHIN DU SKYE BA BZHES NAS MDZAD 'PHRIN DRI MA MED PA'I ZER GYIS THUB BSTAN PAD MO'I DGA' TSAL CI YANG RGYAS PAR MDZAD DO, ,DE LTAR GANGS RI'I KHROD 'DIR THUB BSTAN 'DZIN BA'I SKYES MCHOG RGYA MTSO'I RDUL LA CO 'DRI PA LTAR BYON PA RNAMS KYI NANG NAS THUGS BSKYED DANG SMON LAM 'GRAN ZLA DANG BRAL ZHING, MDO KHAMS BSTAN PA'I SNANG BYED CHEN PO LUNG DANG MNGON BAR RTOGS PA'I YON TAN MTHA' YAS PA'I BDAG NYID RNGOG LEGS PA'I SHES RAB KYI RNAM 'PHRUL BRAG G-YAB CHUNG TSANG SPRUL BA'I SKU BSKAL BZANG THUB BSTAN DBANG PHYUG DPAL BZANG PO'I RNAM PAR THAR BRGYA MTSO LTA BU LAS NYUNG SHAS GCIG GTAM DU BRJOD PAR BYA'O, ,DE LA GANG DU SKU 'KHRUNGS PA'I GNAS NI BRAG G-YAB KYI SA'I CHA SKYA 'BOM ZHES BYA BAR YAB NI PADMA TSE RING BYA BA BLO GROS GSAL ZHING YI DAM GYI BSNYEN BA MTHAR SON PA ZHIG DANG, YUM NI LAB SGRON BYA BA DAD PA DANG GTONG BA'I RGYAN GYIS MDZES PA ZHIG GO, YAB YUM DE GNYIS KYI SRAS SU RAB BYUNG BCU GNYIS PA'I RNGA CHEN ZHES PA LCAGS MO BYA'I LOR SKU BLTAMS, NGO MTSAR BA'I LTAS BYUNG TSUL YANG YUM SKUN PHRA MO'I DUS GRO MA BRKO SAR PHYIN PAS GSAR GYI BUM PA MDZUB MO'I RTZE TZAM RNYED PA SLAR SPRUL SKU 'KHRUNGS PA'I LTAS YIN NAM SNYAM PA BYUNG, YUM RAB SLONG DU MA SLEB SNGON LHA LDAN PHYOGS SU GNAS MJAL LA 'GRO DUS 'BRAS SPUNGS SNGAGS KHANG GI 'JIGS BYED MJAL SKABS ZHAL NAS 'OD ZER 'PHRO BA BYUNG,
, ,RAB SLONG DU SLEBS RJES YUL PHYOGS MI GSAL YANG BLA MA BLO BZANG BSTAN PA SER SBRENG BCAS PHEBS BYUNG BA RMIS, BLA MA PHUN TSOGS RGYA MTSO'I RMI LAM DU GZIMS KHANG GI LTAG LA BYAMS PA MGON PO MNGON SUM DU BYON PA DANG, YAB KYI RMI LAM DU KHANG PA'I GZHOG GCIG TU MCHOD RTEN GYI NANG DU RJE RIN PO CHE'I SKU 'DRA LEGS PA ZHIG BZHUGS 'DUG PA RMIS, SKU BLTAMS NAS ZLA BA DRUG PA'I THOG YUM GYI BANG DU YOD SKABS JO DAR RLUNG GIS BSKYOD PA GZIGS NAS YI GE DRUG PA'I SGRA SGROG PAR MDZAD PA DER YOD RNAMS KYIS THOS, RNAM SRAS KYI SA BON BEE ZHES PA YANG SKABS SKABS SU GSUNGS, BLA MA GDONG KONG PAS BSOD NAMS NOR BU ZHES MTSAN BTAGS PAR, NGA BLO BZANG BSTAN PA YIN MING GZHAN 'DOGS MI DGOS GSUNG BAS THAMS CAD NGO MTSAR, LO GNYIS GSUM BZHES PA'I TSE 'JAM DBYANGS KHYOD NI 'OD DPAG MED, ,CES DANG, NGA NI RDO RJE 'JIGS BYED YIN, ,NGA NI PHYAG NA RDO RJE YIN, ,NGA NI BYAMS PA MGON PO YIN, ,DGA' LDAN BLA MA 'JAM DBYANGS YIN, ,TZONG KHA PA DANG BLO BZANG GRAGS, ,ZHES RGYUN PAR DBYANGS 'THEN PA'I TSUL DU GSUNG, 'JAM DBYANGS KYI SKU THANG 'BRAL MED DU MDZAD CING SHING GI RAL GRI ZHIG GSAR DU BZOS NAS PHYAG TU BSNAMS SHING 'JAM DBYANGS KYI STANG KA MDZAD, BYAMS MDUN DANG MKHAR GSAR STENG DU 'BYON DGOS ZHES YANG YANG GSUNG, MKHAR GSAR STENG DU GDAN DRANGS SKABS DKA' BCU AA
SGAG ZER BAS KHYED KYI ZHABS PHYIR YIN ZHUS PAR, SKU GONG MA'I SKU MDUN PA DKA' BCU KUN DGA' TSE RING LA PHYAG MDZUB GTAD NAS NGA'I ZHABS PHYI 'DI YIN KHYOD MIN GSUNG BAS THAMS CAD YA MTSAN PAR GYUR, MKHAR GSAR STENG DU SPRUL PA'I SKU CHE TSANG BLO BZANG RNAM RGYAL SKU ZHABS NAS GTZUG PHUD BZHES SKABS BLO BZANG BSTAN RGYAS ZHES MTSAN GNANG BAR, DE MIN NGA BLO BZANG BSTAN PA YIN GSUNG BAS, BLO BZANG BSTAN PA DPAL LDAN ZHES MTSAN GSOL, RGYAL DBANG THAMS CAD MKHYEN PA BSKAL BZANG RGYA MTSO'I SKU ZHABS SU GRVA SAR PHEBS PA'I DUS TSOD SNGA PHYI DANG, 'JAM DBYANGS KYI BSNYEN BA GTONG RGYUR DGON PA GANG DU LEGS ZHES ZHUS PAS PHYIR PHEBS SU, BSNYEN PA'I GNAS BYAMS MDUN DU MDZAD PAS 'THUS SHING, GRVA SAR DGUNG LO BCU GSUM PA'I STENG PHEBS RGYU BYUNG NA LEGS ZHES PHEBS PAR BRTEN DGUNG LO BCU GNYIS BZHES SKABS GNAS DER 'JAM DBYANGS KYI BSNYEN PA MDZAD PAS KHONGS PA'I NANG NAS AA RA PA TZA NA'I SGRA GRAGS PA'I SNANG BA DANG 'OD DKAR PO'I GZIGS SNANG BYUNG, MANG DU THOS PA'I BANG MDZOD 'DZIN PA RAB 'BYAMS SMRA PA YE SHES BYAMS PA LAS DBYANGS CAN MA DKAR DMAR, KLU DBANG RGYAL PO GTZO 'KHOR LNGA, RTA MGRIN GSANG SGRUB, MGON CHEN BCU GSUM, BA RI LUGS KYI RNAM 'JOMS, MKHA' LDING GSER MIG 'KHYIL BA, SENG GE'I SGRA SOGS KYI RJES GNANG ZUR BKA' DU MA DANG, RJE BTZUN TZONG KHA BA CHEN PO'I GSUNG 'BUM, RGYAL BA DGE 'DUN RGYA MTSO'I GSUNG BSHAS,
, ,RGYAL BA BLO BZANG DON GRUB KYI BKA' 'BUM, RA POT, LHA BEG GNYIS KYI BE BUM, LHO BRAG SNYAN BRGYUD POT GNYIS, 'JAM DBYANGS BZHAD PA'I RDO RJES MDZAD PA'I ZHI KHRO SPRAGS SGRUB KYI RNAM BSHAD SOGS GSUNG KHA SHAS, BKA' GDAMS CHOS 'BYUNG CHEN MO'I LUNG SOGS ZAB CHOS DU MA SNGA PHYIR GSAN, BLA MA PHUN TSOGS RGYA MTSO'I DRUNG DU TSE DPAG MED LHA DGU'I DBANG, 'JIGS BYED PHYAG GNYIS PA'I RJES GNANG SOGS CHOS BKA' DU MA NOD PAR MDZAD, DGUNG LO BCU GSUM BZHES SKABS PHEBS CHAS RNAMS BSGRIGS TE DBUS SU BYON, DBUS STOD LCANG GLING THANG, MAL GRO GNYIS SU SNGA PHYIR RGYAL DBANG MCHOG NAS BSU MI CHED GTONG GNANG, RI BO DGA' LDAN DU BYON NAS MCHOD MJAL DANG, SKU GDUNG RIN PO CHE'I MDUN DU MCHOD 'BUL SOGS MDZAD, DGA' LDAN TSOGS CHEN DU MANG JA GCIG, GRVA BA DGU RER JA BAG RE'I 'GYED, NYAG RONG GRVA TSANG LA MANG JA GCIG, GRVA BA NYI SHU RTZA LNGA RER JA BAG RE'I 'GYED PHUL, LHA LDAN DU PHEBS SKABS GZHUNG NAS THAB BSU'I THOG MGRON GNYER GYIS GTZOS RTZE DRUNG BRGYAD SHOD DRUNG BRGYAD BCAS KYIS BSUB GNANG, LHA LDAN DU PHEBS NAS NANG RAG GNAS TSANG DU BZHUGS, DE'I PHYI NYIN 'BRAS SPUNGS SU PHEBS NAS RGYAL DBANG THAMS CAD MKHYEN PA DANG MJAL, KHRI GDAN SOGS GZOS SGO SHIN TU CHE BA MDZAD, RGYAL DBANG MCHOG NAS BKA' 'DRI PHEBS PA'I LAN GSAL BAR ZHUS PAS THUGS SHIN TU DGYES,
RGYAL DBANG THAMS CAD MKHYEN PA NYID 'BRAS SPUNGS TSOGS CHEN GYI GRAL DBUR GDAN DRANGS TE DNGUL SRANG SUM CU'I MAndAL, SKU GSUNG THUGS RTEN, NA BZA' NYER SPYAD, GSER SRANG LNGA, DNGUL RDO TSANG BZHI, JA 'KHOR DRUG LNGA BRGYA, RTA BZHI, DRE'U GCIG, MDZO BRGYA DANG BCU SGA STAN DANG BCAS PA, GOS DAR, BAGS RIGS SOGS DNGOS PO BZANG ZHING GYA NOM PA'I MCHOD SPRIN DANG BCAS ZHABS PAD BSKAL BRGYAR BRTAN PA'I GSOL 'DEBS ZHUS, MAndAL GYI LJAGS BSHAD MDZAD PAS KUN GYIS DANG PA 'DREN PA BYUNG, TSOGS SU GRVA BA DGU RER JA BAG RE'I 'GYED DANG, MANG JA BZHI BCAS PHUL, BLO GSAL GLING DU GRVA JA DANG, GRVA BA NYER LNGA RER JA BAG RE'I 'GYED BTANG, GZHAN MA DE MO SPRUL PA'I SKU, BLA MA KHAG, BKA' BLON, RTZE DRUNG CHE KHAG SOGS LA BABS 'OS KYI BDOG PA BSTABS, RVA BA STOD DU MANG JA GCIG DANG, DGE 'DUN DGU RER JA BAG RE'I 'GYED PHUL, NYAG RE KHAM TSAN LA MANG JA DANG, DGE 'DUN NYI SHU RTZA LNGA RER JA BAG RE'I 'GYED BTANG, SE RAR PHEBS NAS TSOGS CHEN DU MANG JA GCIG, GRVA BA DGU RER JA BAG RE'I 'GYED, BYES GRVA TSANG DU MANG JA GCIG, GRVA BA NYI SHU RTZA LNGA RER JA BAG RE'I 'GYED, PHUR BU LCOG DBON SLOB LA 'BUL BA, LCAGS PHO RI, STOD LUNG CHU BZANG, MKHAR RDO, RME RU BZHI SDE, RGYUD STOD SMAD, SA RA RTZE, PHUR BU LCOG RNAMS LA MANG 'GYED BTANG, DE NAS MI RING BAR BKRA SHIS LHUN POR PHEBS, PAn
, ,CHEN THAMS CAD MKHYEN PA BLO BZANG DPAL LDAN YE SHES DANG MJAL, KHRI GDAN GZOS DANG BKA' 'DRI PHEBS PA SOGS DGYES PA BLA NA MED PA MDZAD, PAn CHEN RIN PO CHE TSOGS DBUS SU SPYAN DRANGS TE DNGUL GYI MAndAL, SKU GSUNG THUGS RTEN, NA BZA' NYER SPYAD, GSER SRANG NGO, DNGUL RDO TSAD GSUM, JA 'KHOR DRUG BRGYA DANG LNGA, GOS DAR, PAGS RIGS SOGS GTOS CHE BA DANG BCAS ZHABS BRTAN PHUL, LAM SGRON; BLA MCHOD, SMAN BLA BSDUS PA, LAM RIM BSDUS DON RNAMS KYI LUNG TSOGS CHEN DANG MNYAM DU GSAN, GZIMS CHUNG YID DGA' CHOS 'DZIN DU BDE LAM, BDE MCHOG SGRUB THABS, MKHAS GRUB SANGS RGYAS YE SHES KYI BKA' 'BUM, ZHABS BRTAN BLO GROS DPAG BSAM MA RNAMS KYI LUNG ZHUS, PHYAG MDZOD CHEN MOR YANG DNGOS PO'I BDOG PA GYA NOM PA BSTABS, TSOGS CHEN DU MANG JA GNYIS, GRVA BA DGU RER JA BAG RE'I 'GYED, THOS BSAM GLING DU MANG JA GCIG, GRVA BA NYI SHU RTZA LNGA RER JA BAG RE'I 'GYED, RGYA KHAM TSAN DANG SNGAGS PA GRVA TSANG, SNAR THANG RNAMS LA MANG 'GYED DE MTSUNGS, GTZANG NAS MAR PHEBS SKABS ZHVA LU RI MTHIL, MTSAN SGROG; 'BRONG RTZE CHOS SDE, DPAL 'KHOR CHOS SDE, LCAGS ZAM CHU BO RI'I DGON PA, GYE RE LHA PA'I DGON PA RNAMS LA MANG 'GYED GONG GI DPE 'GRE BTANG, SKYOR MO LUNG DANG DGA' GDONG GNYIS LA'ANG MANG 'GYED STZAL, RGYAL
BA YAB SRAS DANG GONG GSAL GYI DGON KHAG RNAMS LA SPRUL SKU CHE TSANG BLO BZANG RNAM RGYAL ZHI BAR GSHEGS PA'I DGONGS PA RDZOGS THABS SU 'BUL BA DANG MANG 'GYED GYA NOM PA BSTABS, DE NAS RIGS PA'I 'BYUNG GNAS STAG TSANG RVA BA STOD DU 'JANG DGUN CHOS KYI CHOS THOG SKABS ZHUGS TE TSOGS SU MANG JA BRGYAD, GRVA BA BCU RER JA BAG RE'I 'GYED PHUL ZHING BSDUS GRVA'I GSAN SBYONG MDZAD, DE SKABS RGYAL DBANG RIN PO CHE NAS RTZE DRUNG CHED MNGAGS KYI GDONG ZHVA ZLAM SOGS RNA BZA' CHA TSANG GNANG, 'JANG DGUN CHOS GROL NAS PO TA LAR PHEBS, RGYAL DBANG MCHOG DANG MJAL, DGU GTOR GYI 'CHAM GZIGS LA YANG PHEBS, DNGOS PO ZHES PA SHING PHO KHYI'I BGRANG BYA GSAR DU TSES A'I BZHUGS GRAL DU PHEBS, DE MO SPRUL BA'I SKU DAD 'DRA BA'I BKUR GZOS MDZAD, CHO 'PHRUL SMON LAM CHEN MO'I SKABS LHAS BLA BRANG STENG DU GZIMS CHUNG MJAL KHA ZHUS, SMON LAM CHEN MO'I SKABS SU MANG JA GCIG, DGE 'DUN NYI SHU RER JA BAG RE'I 'GYED BCAS PHUL, MDZOD PA GNYIS SOGS ZHABS PHYI PHYIR LOG RNAMS LA GNANG SPYIN DGOS CHA RGYAS PAR STZAL, BRAG G-YAB PA'I AA DRUNG LAG DO SOGS KHAMS PA'I MIR SONG GSHIS SPYOD PA RTZING ZHING KHRO GTUM CHE BAS KHRIMS 'GAL GYI RIGS BYAS PA RNAMS LA YANG GONG NAS GZIGS PA CHEN POS YANG CHA GTONG BA MDZAD, BOD DU BZHUGS RING LO RE BZHIN PHOGS DANG GSOL RAS GYA NOM PA GNANG, ZHU DON GYI RIGS CI YOD NA'ANG ZHUS CHOG CES BKA' YANG YANG PHEBS PAR, BKA' CHOS KYI RIM
, ,PA GANG GNANG RNAMS GSAN CHOG PA ZHIG ZHU 'DOD LAS GZHAN MA ZHU MI DGOS ZHES ZHU DON GYI RIGS MA MDZAD, RGYAL DBANG RIN PO CHE JO MJAL DU PHEBS SKABS, SPRUL PA'I SKU DANG YAB BCAS SKU 'KHOR NANG MA'I GRAS SU KHRID NAS BCU GCIG ZHAL GYI SKU MDUN DU THUGS RJE CHEN PO'I BSTOD PA MNYAM DU GSUNG ZHING, DPAL LHA'I TSOGS 'KHOR LA'ANG PHEBS, SPRUL PA'I SKU CHE TSANG BLO BZANG RNAM RGYAL GYI YANG SRID KYI DOGS GNAS SKOR RGYAL DBANG RIN PO CHER LUNG ZHUS PHUL BAS BKA' LAN PHYIR PHEBS KYANG KHAMS PHYOGS SU GTONG BA MDZAD, SE RE THEG CHEN GLING DU BYON TE ZLA BA DRUG PA'I TSES DRUG LA RGYAL BA BSKAL BZANG RGYA MTSO'I MDUN NAS BAR MA RAB BYUNG DANG TSIGS SDA MA DGE TSUL GYI SDOM PA BZHES, SE RA'I 'DU KHANG CHEN MOR 'JAM DBYANGS DPA' GCIG, LUS DKYIL, GSANG SGRUB, SGROL DKAR RNAMS KYI RJES GNANG BCAS ZHUS, PHUR BU LCOG TU RJE NGAG DBANG BYAMS PA'I MTSAN CAN LAS THUB PA DAM TSIG GSUM BKOD KYI DBANG GSAN, DE NAS RVA BA STOD DU PHEBS NAS SNGAR RGYUN BZHIN THUGS GNYER LA BRTZON PAR MDZAD, ME GLANG ZLA BA DANG PO'I NANG DU SKU GONG MA SOGS KYI THUGS 'BREL LA DGONGS NAS BKA' PHEBS PA LTAR BDAG GIS KYANG LHA LDAN NANG PA RAG PAR PHYIN TE SPRUL PA'I SKU RIN PO CHER THUGS BZHED LTAR GYI CHOS BKA' CI RIGS PHUL, LO DE'I ZLA BA GNYIS PA'I NANG DU SKYE 'GRO RNAMS BSOD NAMS DMAN PA'I DBANG GIS RGYAL DBANG THAMS CAD MKHYEN
PA DAG PA'I ZHING DU GSHEGS PA'I TSUL BSTAN PAR SPRUL PA'I SKU RIN PO CHE 'DI NYID NAS GDUNG MJAL DANG MCHOD 'BUL SOGS RGYAS PAR ZHUS, MI RING BAR DE MO SPRUL PA'I SKU 'JAM DPAL BDE LEGS RGYA MTSO RGYAL TSAB TU DBANG BSKUR BAR LEGS 'BUL RTEN 'BYUNG GI DNGOS PO RGYA CHER BTEG, LO DE'I DGUN YONGS RDZOGS BSTAN PA'I MNGA' BDAG LCANG SKYA RDO RJE 'CHANG BOD DU PHEBS PA DANG MJAL, THUGS DGYES PAS GZIGS PA BLA NA MED PA MDZAD, DGUNG LO BCU DGU BZHES PAS MO YOS KYI LO ZLA BA BZHI PA'I TSES BCU BZHI'I NYIN LHA SA RVA MO CHE JO BO MI BSKYOD RDO RJE'I MDUN DU YONGS RDZOGS BSTAN PA'I MNGA' BDAG LCANG SKYA RIN PO CHE YE SHES BSTAN PA'I SGRON ME DPAL BZANG POS MKHAN PO, SGO MANG DPON SLOB BSTAN PA YAR 'PHEL GYIS LAS SLOB, BDAG GIS GSANG STON DANG DUS SGO BA BYAS TE, DANG PA'I DGE 'DUN LNGA TSOGS LAS BSNYEN PAR RDZOGS SHING LHAG PA TSUL KHRIMS KYI BSLAB PA MIG GI 'BRAS BU LTAR BSRUNG BAR MDZAD PAS 'DUL BA 'DZIN PA RNAMS KYI KHROD DU NYE BA 'KHER GNYIS PA LTA BUR GYUR, LO DE'I ZLA BA GSUM PA'I NANG DU PO TA LAR PAn CHEN THAMS CAD MKHYEN PA'I ZHABS DRUNG DU DUS KYI 'KHOR LO SKU GSUNG THUGS YONGS SU RDZOGS PA'I DBANG CHEN GSAN, BKA' GDAMS BSTAN PA'I SGRON ME PHUR BU LCOG PA RJE NGAG DBANG BYAMS PA'I ZHABS DRUNG DU LAM RIM BDE LAM GYI KHRID, 'JIGS BYED BSKYED RDZOGS KYI KHRID, LAM GYI GTZO PO RNAM GSUM GYI KHRID, 'PHO BA G-YUL 'JUG MA DANG 'JAG TSUGS MA'I KHRID,
, ,BLO SBYONG DON BDUN MA'I KHRID, SNYING PO DON GSUM GYI KHRID, DMIGS BRTZE MA'I BLA MA'I RNAL 'BYOR GYI KHRID, 'JIGS BYED BCU GSUM MA'I DBANG CHEN SOGS GSAN, BDAG LA YANG CHOS BKA' MANG DU DGOS TSUL BKA' PHEBS PA LTAR RVA BA STOD DU PHYIN NAS SGRUB THABS RGYA MTSO DANG BRGYA RTZA GNYIS KYI RJES GNANG DANG RGYA GZHUNG GI LUNG, MNGON RTOGS RGYAN, 'JUG PA, 'GREL PA DON GSAL, MDZOD RTZA, RNAM 'GREL RNAM NGES; RA POT, MGON PO'I BE BUM, PHRENG BA SKOR GSUM RNAMS KYI LUNG, GROL MCHOG KHRID BRGYA'I LUNG KHRID, LHAG PA'I LHA DU MA DANG CHOS SKYONG DU MA'I RJES GNANG BCAS PHUL, RJE GRUB PA'I DBANG PHYUG KUN SPANGS CHEN PO NGAG DBANG BLO BZANG GI DRUNG DU LAM RIM CHEN MO DANG 'GREL BA BZHI SBRAGS KYI BSHAD LUNG, BKA' GDAMS GZHUNG DRUG SOGS RGYA GZHUNG DU MA'I LUNG, RGYAL BA DGE 'DUN GRUB, DGE 'DUN RGYA MTSO, PAn CHEN BLO BZANG CHOS KYI RGYAL MTSAN, RGYAL BA BSKAL BZANG RGYA MTSO RNAMS KYI GSUNG 'BUM GYI LUNG SOGS CHOS BKA' DU MA GSAN, LCANG SKYA RIN PO CHE BOD DU BZHUGS RING ZAB CHOS DU MA GSAN PA'I TSUL NI, RA MO CHE'I RGYUD KHANG DU GSANG 'DUS MI BSKYOD RDO RJE'I DBANG, BSAM GRUB KHANG GSAR DU BDE MCHOG PHYI DKYIL DANG LUS DKYIL GYI DBANG, DE'I BSKYED RDZOGS KYI KHRID, RDOR SEMS YAB YUM GYI RJES GNANG, THUN DRUG GI RNAL 'BYOR GYI KHRID, BLO SBYONG TSIG BRGYAD
MA'I KHRID, TSEM BU DMAR KHRID, GRUB RGYAL LUGS KYI TSE KHRID, PO TA LAR PHYAG RDOR 'KHOR CHEN GYI DBANG, SE RA SNGAGS PA GRVA TSANG GIS ZHUS NGOR KUN RIG GI DBANG, SMAD GRVA TSANG GIS ZHUS NGOR RJE DRUNG DGE 'DUN BKRA SHIS KYI YIG CHA LTAR SGROL MA NYER GCIG LA TSOM BU SO SOR BKOD DE SPYI CHINGS GCIG GI STENG NAS STABS GCIG TU BSKUR BA'I RJES GNANG, 'JIGS BYED ZHI KHRO SBRAGS SGRUB THUN MONG MA YIN PA'I ZAB KHRID, LCANG SKYA BKA' 'BUM NANG GI LAM RIM BDE LAM GYI BLA MA'I RNAL 'BYOR GYI KHRID ZHAL SHES DANG BCAS PA, AE WAm DU DGA' LDAN BYANG RTZE GRVA TSANG GIS ZHUS NGOR RNAM SNANG MNGON BYANG GI DBANG, RA MO CHER BDE MCHOG L'U AI PA'I DBANG, YANG SA YOS ZLA BA GSUM PA'I TSES NYER LNGA LA BSAM GRUB KHANG GSAR DU BLA MED KYI RDZOGS RIM KHRID CHEN BRGYAD KYI KHRID SOGS CHOS BKA' MTHA' YAS PA GSAN, DGUNG LO NYER GCIG PA LCAGS 'BRUG LOR DBUS PHYOGS SU MTSAN NYID KYI GSAN SBYANGS GRUB NAS BRAG G-YAB TU PHEBS TE BKRA SHIS G-YANG 'KHYIL DU BZHUGS, MNGA' ZHABS KYI SKYA SER TSANG MAS DGA' STON DANG LEGS 'BUL RGYA CHER ZHUS, LO DE'I RJES MAR RANG NYID KYI GDAN SA BYAMS MDUN DU PHEBS PAR, DE PHYOGS KYI SER SKYA TSANG MAS GONG BZHIN LEGS 'BUL BSTABS, SNGON DU GONG MA BDE SKYID RGYAL BOS GSER YIG DANG GSER THAM STZAL BA BAR SKABS SU ME SKYON GYIS CHUD ZOS PAR, SKYABS MGON LCANG SKYA RIN PO CHE NAS GONG MAR ZHU SNA MDZAD DE SNGON LAS LHAG PA'I
, ,GSER YIG DANG GSER THAM GONG NAS LO DER STZAL BA 'BYOR TE TSANG MA DGA' BDE'I DPAL LA SBYOD PAR GYUR, RGYAL DBANG THAMS CAD MKHYEN PA'I MCHOG SPRUL BLO BZANG 'JAM DPAL RGYA MTSO RVA BA STONG DU GSAR DU PHEBS SKABS MI SNA CHED MNGAGS KYI GDONG ZANG ZING GI BDOG PA GYA NOM PA DANG BCAS LEGS SKYES KYI RTEN 'BYUNG 'BUL BA MDZAD, CHU RTA'I LOR DBUS SU BYON TE RGYAL DBANG MCHOG SPRUL RIN PO CHE GSER KHRIR MNGA' GSOL BA'I RTEN 'BYUNG LEGS 'BUL DU SKU GSUNG THUGS RTEN, DNGUL RDO TSAD KHA SHAS, JA 'KHOR DRUG LNGA BRGYA SKOR BCAS MCHOD SBRIN RGYA CHER PHUL BAS GZHUNG SA NAS KYANG DGYES TSOR CHEN PO MDZAD, DE SKABS PAn CHEN THAMS CAD MKHYEN PA BLO BZANG DPAL LDAN YE SHES DBUS SU PHEBS PA DANG MJAL, ZHABS BRTAN 'BUL BA RGYA MI CHUNG TZAM PHUL, SER 'BRAS SO SOR MANG JA DANG JA 'GYED, PHYAG MDZOD AA 'BUM BKRA SHIS LHUN POR CHED GTONG MDZAD NAS MANG 'GYED KYI BSNYEN BKUR ZHUS, SPRUL BA'I SKU RIN PO CHE NYID NAS KLONG RDOL BLA MA'I SKU ZHABS SU ZLA BA GNYIS KYI RING CHOS BKA' DU MA GSAN, RGYUD STONG SMAD KYI DON GNYER BA KHA SHAS LA RJES GNANG DANG LUNG SOGS CHOS BKA' CI RIGS GNANG, CHU LUG LOR DBUS PHYOGS NAS BTEG, PHEBS ZHOR LA RI BO DGA' LDAN DU BYON TE MANG 'GYED KYI BSNYEN BKUR DANG MCHOD MJAL SOGS ZHIB PAR GNANG, DE NAS RIM GYIS BRAG G-YAB KYI GDAN SAR PHEBS SHING SER SKYA MTHA' DAG
NAS LEGS 'BUL SOGS RGYA CHER BSTABS, PHYAG MDZOD BSAM, GRUB KYI SKABS BYAMS CHEN BZHENGS RTZIS KYI ZANGS DANG DNGUL CHED SGRIG LA GZHI BYAS, NANG GZHUNG DANG AA 'BUM SOGS MDZOD PA KHA GNAS ZHAL 'DEBS DANG, DE'I STENG DU SKU SGER NAS DGOS CHA MTHA' DAG STA GON BYAS TE BYAMS CHEN BZHENGS RGYU'I ZHAL BKOD GNANG, CHAB MDO NAS LHA BZO DANG ZANGS BRDUNG KHA SHAS, BRAG G-YAB KYI MGAR BA MKHAS GRAS GANG YONG BSDUS TE LO DER LAS GRVA BTZUGS NAS GSER ZANGS KYI BYAMS CHEN THOG SO GSUM TZAM GYI TSAD MNYAM BZHENGS PA BYON GTZANG LEGS PAR BSGRUBS, DE SKABS MCHOG DMAN MTHA' DAG NAS DAD PAS KHUR BLANGS TE BZO GRVA BA RNAMS LA THOG MTHA' BAR GSUM GYI STON MO DANG, YON KYANG ZANG ZING GI DNGOS PO GYA NOM PA BABS BSTUN GYIS BZO BO RNAMS YID TSIM PAR MDZAD, SHING SPREL LOR SPRUL SKU YAB SRAS LHAN CIG PAR BYAMS MDUN DU PHEBS, DAD LDAN GYI SER SKYA MANG DU 'DUS PA LA MJAL KHA GNANG, KHRI PA BLO BZANG DBANG PHYUG, PHYAG MDZOD DON GRUB RGYAL MTSAN RNAMS KYIS ZANG ZING GI BDOG PA DANG BCAS BRTAN BZHUGS PHUL, LO DE'I RJES MAR MA DGON BKRA SHIS G-YANG 'KHYIL DU PHEBS NAS ZLA BA KHA SHAS KYI RING SKU MTSAMS MDZAD, DGUNG LO NYER DRUG BZHES PA ME KHYI'I LO RANG BYAR ZHAL BZHES GNANG SKABS TSA BA SDE MDA' CHOS MDZAD KYIS GTZOS DAD LDAN RNAMS KYIS GSOL BA BTAB PA LTAR GRVA MANG TSOGS YONGS DANG LHAN DU BDE GSANG 'JIGS GSUM GYI MDON RTOGS,
, ,NAG PO SKOR GSUM GYI BSKANG GSO, CHOS SPYOD SMON LAM SOGS DGE LUGS PHYOGS KYI 'DON CHA RNAMS KYI LUNG GNANG, DBYAR GROL NAS STON MJUG ZLA BA KHA SHAS KYI RING SKU MTSAMS MDZAD, LO DE'I MJUG TU MI NGAN RE GNYIS KYIS 'THAB 'DZINGS LA BRTEN, MNGA' ZHABS NANG PHAN TSUN RIS SU CHAD DE PHYOGS 'DZIN GYI 'KHRUG LONG CHE BA BYUNG NA YANG SPRUL PA'I SKU RIN PO CHE NYID NAS BSRUNG MAR 'PHRIN BCOL DANG, GZHAN PHAN GYI LHAG BSAM RMAD DU BYUNG BA'I DBANG GIS GCOD MTSAMS GANG GNANG LTAR TSANG MAS DANG DU BLANGS TE 'KHON DANG BRAL ZHING SKYE BO DU MA NGAN SONG DU 'GRO BA'I SGO BKAG NAS MTHO RIS KYI LAM LA BKOD DE RTZOD PA CHOS PHYOGS SU ZHI BAR GYUR, SNGON DU DGON PA RNAMS SU 'DUL KHRIMS KYI PHYAG LEN RNAM PAR DAG PA MA TSUGS PAR BRTEN, GRVA BA RNAMS KYIS CHANG 'DZEM MED DU SPYOD BAS MIG LTOS NGAN PA RGYUN 'BYAMS SU YOD PA LA, RJE 'DI NYID NAS BSTAN BA'I GZHI MA 'DUL KHRIMS SU DGONGS TE THUGS KHUR CHE BZHES NGOS DGE TSUL SLONG RNAMS KYIS CHANG 'THUNG MI CHOG PA'I BKOD PA DANG, LHAG PAR DGON PA'I NANG DU CHANG KHYER YONG MI CHOG PA'I CHED SKOR LAM GYI NYE SKOR DU THO BRTZIGS TE CHANG KHRIMS LEGS PAR BSNGAMS SHING, BRTAN PAR GNAS PA'I PHYIR DU BSRUNG MA LA GNYER GTAD 'PHRIN BCOL BCAS GNANG BAS DGE 'DUN RNAMS BAG YOD TSUL MTHUN GYI SPYOD PA LA BKOD, GNANG CHEN GYI SKABS MA GTOGS BUD MED DGON NANG DU
YONG MI CHOG PA'I NAG KHRIMS KYI SKOR YANG SDOM PAR MDZAD, DGE TSUL SLONG RNAMS NAS KYANG RANG RANG GIS KHAS BLANGS PA'I SDOM PA GCES SPRAS KYI SGO NAS BSRUNG BA DANG, MDO PHYOGS KYI 'CHAD NYAN DANG, BSNYEN MTSAMS GTONG MKHAN GYI MTSAMS GRVA MDO SNGAGS KYI 'DON CHA SO SO'I SKABS BABS GANG YIN 'DZIN SKYOR DANG, RGYUGS SPROD LEN SOGS CHOS SDE CHEN PO'I LUGS SROL DANG MTHUN PA'I BCAS KHRIMS YANG DAG PA GNANG, PHYAG MDZOD KHAG NAS KYANG KHRAL RIGS SNGAR RGYUN GANG RIGS LAS, ZA 'DOD RTOGS SLA'I DBANG GIS MI SER LA BSDABS GSIG 'OS MIN BYAS MI CHOG PA DANG, MNGA' ZHABS KYI MI SER BYINGS NAS KYANG PHAN TSUN 'THAB RTZOD RKU 'PHROG SOGS MI CHOG PA'I BSNGAMS RA DANG, BDAG TU MA BZUNG BA'I BYA DANG RI DVAGS NYA SRAM SOGS SKAM GSHER LA GNAS PA'I SROG CHAGS RNAMS GSOD MI CHOG PA'I MI 'JIGS PA SKYABS KYI SBYIN PA STZAL BAS MTSON SNGON MED PA'I DGE BCU'I BKA' KHRIMS ZLA BA'I ZER GYIS GNAS SKABS DANG MTHAR THUG GI PHAN BDE'I KU MUNG RGYAS PAR MDZAD PA DA LTA'I BAR DU GNAS BZHIN PA DANG, BAR SKABS SHIG MI NGAN RE GNYIS KYI SPYOD NGAN LA BRTEN GONG MA'I KHRIMS 'GAL GYI GZING CHA CHE BAR BYUNG YANG, RJE NYID KYI THUGS DMIGS KYI DBANG GIS 'JAM CHAGS SU GNAS PA BYUNG, CHE TSANG SPRUL SKU RIN PO CHE DPAL LDAN BSTAN PA RGYAL MTSAN DBUS SU PHEBS PA'I GRVA SGRIGS MDZAD MU YIN KYANG RKYEN DBANG GIS CUNG ZAD 'GYANG TZAM BYUNG YANG, KHA MCHU CHOD 'PHRAL LO DE'I DBYAR THOG GSAN
, ,SBYONG GI CHED DU DBUS SU PHEBS PA'I GREGS LDAN YANG DAG MDZAD, LO DE'I STON NAS BZUNG STE SA BYI'I LO MJUG BAR SKU MTSAMS MDZAD, LO DE'I RJES MAR BYAMS MDUN NAS GDAN DRANGS PA LTAR PHEBS, DGON PHAN TSUN GYI DGE 'DUN RNAMS LHAN CIG TU 'TSOGS PA'I THOG, KHRI PA PHYAG MDZOD GNYIS BCAS KYIS ZHABS BRTAN DANG, SER SKYA MCHOG DMAN KUN GYIS DAD PAS KUN NAS BSLANGS TE 'BUL BA YANG RGYA CHER PHUL, 'DU KHANG GI SENG G-YAB CUNG DMA' BA'I STABS RGYU YON SBYAR TE ZHIG GSO DANG, LCAGS STAG LOR MA DGON DU PHEBS, DE NAS BZUNG LCAGS YOS BAR DU SKU MTSAMS RGYUN RING BA MDZAD, DUS MCHOD KYI SKABS LAM GYI GTZO BO RNAM GSUM GYI BSHAD LUNG RGYAS PAR GNANG, CHU SBRUL LOR CHE TSANG SBRUL SKU RIN PO CHE BOD NAS GDAN SAR 'BYON RTZIS MDZAD PA LA, PHEBS BSU'I GRVA SGRIG SOGS KYI KHUR LEN GNANG, LO DER BYAMS MDUN DU PHEBS PAR SNGON NAS SKU 'KHRUGS DANG BAD KAN SMUG PO LTA BU'I RKYEN GYIS GSUNG GLO YANG YANG 'BYUNG BA ZHIG YOD KYANG GNOD TSABS CHER MED PA LA, SHING RTA'I LOR ZLA BA BZHI PA'I NANG DU MGUL CHAM ZHIG GSAR DU BZHES PA'I STABS KYIS SNGA MA'I GSUNG GLO CHER SONG BAS, DKA' BCU NGAG DBANG RGYA MTSOS GTZOS ZHABS 'BRING RNAMS KYIS ZHUS PA LTAR GSOL SMAN 'BUL BA DANG, ZHABS BRTAN SKU RIM SOGS BSGRUBS KYANG PHAN SKYED CHER MA BYUNG ZHING SKU KHAMS RIM ZHAN DU SONG BAR
BRTEN, ZLA BA LNGA PA'I NANG DU BYAMS MDUN DGON MA LAG DANG BCAS PA'I SER 'TSOGS BSDUS TE PHYAG MDZOD SPYI THOG DANG SKU SGER BCAS NAS MANG JA DANG 'GYED PHOGS SNA MANG BA DANG, BRAG G-YAB KYI MA DGON BKRA SHIS G-YANG 'KHYIL DU DBYAR GNAS SKABS GONG BZHIN SPYI SGER NAS MANG JA 'GYED PHOGS KYI BSNYEN BKUR DANG BCAS ZHABS BRTAN SKU RIM RGYA CHE BA DANG, CHAB 'OG GI DGON SDE KHAG NAS KYANG SPRUL PA'I SKU RIN PO CHE 'DI NYID LUGS GNYIS KYI SGO NAS BKA' DRIN CHE GSHIS ZHABS PAD BRTAN PA ZHIG BYUNG NA SNYAM DU THAMS CAD DAD LANGS KYIS ZHABS BRTAN SKU RIM NYIN MTSAN LTOS MED LTA BUR BSGRUBS SHING, DER MA ZAD CHAB MDO DANG SMAR KHAMS KYI DGON KHAG RNAMS SU'ANG MANG 'GYED DANG BCAS ZHABS BRTAN SKU RIM YANG DAG PA BSGRUBS, SMAN PA YANG MKHAS PA GZHAN ZHIG BSTEN NA ZHUS PAR, SMAN PA GZHAN GYIS DGOS PA MED SNGA MAS CHOG GSUNG, SNYUN GZHI LA GNOD DOGS ZAS SPYOD 'DZEM DGOS BYUNG BAS RLUNG SHAS CHE BAR BRTEN, SMAN PAS PHYI DRO'I KHA ZAS GLOD PA DANG, CHANG YANG BZHES NA PHAN ZHES ZHUS PAR, 'DUL BA'I BCAS KHRIMS LA GCES SPRAS CHE BA'I DBANG GIS GSAN PA MA MDZAD, DKA' BCUS GTZOS ZHABS PHYI RNAMS KYIS RTZAM THANG DU CHANG BSRES NAS DRANGS PAS, CHANG GI BRO BA MYONG 'PHRAL MA DGYES PA'I NYAMS KYIS DE PHYIR 'BO BA MDZAD, DE RTING CHANG YOD MED KYI DOGS SEL MA ZHUS PAR THUG PA YANG BZHES PA MA GNANG,
, ,SNYUNG GZHI'I BABS LCI RU SONG NAS SKU GZUGS KYI RKYEN MI THEG PA LTA BUR YOD RUNG, RGYUN GYI THUGS DAM MAndAL, 'JIGS BYED KYI MNGON RTOGS SOGS ZHAL 'DON GYI RIM PA'ANG NYIN MO DANG MTSAN MO'I RING CHAG MED MDZAD, SKYABS MGON RGYAL BA YAB SRAS, LCANG SKYA RDO RJE 'CHANG, CHE TSANG SPRUL SKU, KLONG RDOL BLA MA SOGS CHOS 'BREL MNOS PA'I BLA MA RNAMS KYI MTSAN NAS SMOS TE ZHABS PAD BRTAN BA'I THUGS SMON DANG; RGYAL BA'I BSTAN PA RIN PO CHE DGE 'DUN GYI SDE DANG BCAS PA PHYOGS DUS KUN TU DAR ZHING RGYAS PA'I THUGS SMON YANG YANG GNANG, PHYAG DBANG ZHU MI BYUNG BA RNAMS SKU 'KHRUGS LA GNOD DOGS ZHABS PHYI RNAMS KYIS BKAG PAR DGOS PA MED, RANG RANG GI 'DOD PA LTAR MJAL KHA BTANG BAS CHOG GSUNGS, DKA' BCU SOGS KYIS GDUNG SHUGS DRAG POS ZHABS PAD YUN RING DU BRTAN DGOS PA'I GSOL 'DEBS ZHUS PAR, RGYAL DBANG GI RNAM THAR GYI DPE ZHIG DRANGS NAS TSES MA LCOGS NA YANG KHYED TSOS SMRE SNGAGS DANG LAB GZHI MANG PO BYED PA LA DGOS PA MED GSUNG NAS RGYUN GYI THUGS DAM DANG, KHYAD PAR DMIGS BRTZE MA ZHAL 'DON GYI GTZO BOR MDZAD PAS, NYE GNAS RNAMS KYIS KYANG 'DON ROGS BYAS PAR, NGAS DMIGS BRTZE MA 'DON BA 'DI NAD AE DRAG BSAMS NAS BTON PA MIN, RJE BLA MA LA GSOL BA 'DEBS PA YIN GSUNG, SKABS 'GA' RER GSUNG GI BABS LA DPAGS NA YI DAM GYI LHA DU
MA'I GZIGS SNANG YANG BYUNG YOD PA'I TSOD DU SNANG, DE LTAR SPYI SGER NAS ZHABS PAD YUN RING DU BRTAN PA'I THABS TSUL LA BRTZON PA CHEN POS 'BAD KYANG SKU DNGOS KYI GDUL BYA RDZOGS PA DANG, RTAG 'DZIN CAN RNAMS CHOS LA BSKUL BA'I CHED DU CHU STONG ZLA BA'I TSES BRGYAD KYI NYIN GUNG TZAM LA GZUGS SKU'I SNANG BA BSDUS NAS CHOS KYI SKU DON DAM PA'I BDEN PA MNGON DU MDZAD CING, DE'I TSE SKU'I GZI MDANGS GSAL ZHING RNAM SNANG GI CHOS BDUN LDAN LA GNAS PA'I SGO NAS THUGS DAM LA BZHUGS PA'I TSUL BSTAN TO, ,NANG DU CHOS KYI SKU MNGON DU MDZAD PA'I RTAGS SU NAM MKHA' G-YA' DAG CING 'JA' SPRIN GYI DRA BAS KHEBS PA SOGS NGO MTSAR BA'I LTAS MANG DU BYUNG NGO, ,ZHABS PHYI RNAMS MGON SKYABS DANG BRAL BA'I DBANG GIS YID KYI BUD SHING SDUG BSNGAL GYI ME LCES GDUNG BAR GYUR KYANG, SNGON DU ZHAL BKOD GNANG PA'I DON BZHIN SRAN BTZUGS NAS SMRE SNGAGS 'DON PA SOGS MYA NGAN GYI RNAM PA BOR NAS SKU GDUNG RIL PO ZA MA TOG TU BZHUGS SU BCUG STE BLA MA DAM PA'I THUGS KYI DGONGS PA ZAG MED CHOS DBYINGS SU RDZOGS PA'I CHED DU DGE 'DUN RNAMS KYIS MCHOD 'BUL DANG, DKYIL 'KHOR DU MA'I ZHAL PHYE STE SGRUB MCHOD DANG, BLA MA MCHOD PA GSUNG BA SOGS DGON PHAN TSUN DU MANG 'GYED THOG DGONGS PA RDZOGS THABS KYI RNAM DKAR RGYA CHE BA BSGRUBS, SPRUL PA'I SKU CHE TSANG GRVA SAR BZHUGS YONG THOG MI SNA CHED MNGAGS KYI GDONG ZANG ZING GI BDOG PA DANG BCAS THUGS DAM GSAL 'DEBS ZHUS, LHA SA SMON LAM CHEN
, ,MOR YANG DGE 'DUN NYI KHRI LHAG TZAM LA MANG JA GNYIS DANG 'GYED BAL tA MA RE, RGYUD STOD PAR JA THUG NYIN 'KHYONGS DANG 'GYED PHYED BRGYAD RE, RGYAL DBANG THAMS CAD MKHYEN PA'I SKU ZHABS SU RGYA DNGUL RDO TSAD BCU SOGS 'BUL NOD GYA NOM PA DANG, DE MO SPRUL PA'I SKUR DNGUL RDO TSAD GSUM SOGS TSAN GRANGS DANG, GZHAN YANG YONGS 'DZIN KHRI PA, SPRUL SKU KHAG, KLONG RDOL BLA MA RNAMS KYI SKU ZHABS SU BSNGO RTEN DANG, BKRA SHIS LHUN POR TSOGS CHEN DU MANG JA DANG 'GYED BAL tAM RE, PAn CHEN THAMS CAD MKHYEN PA'I SKU ZHABS SU DNGUL RDO TSAD NYI SHU SOGS DNGOS PO GTOS CHE BA DANG, YONGS 'DZIN, GRVA TSANG KHAG GI SLOB DPON RNAMS LA'ANG BSNGO RTEN GYI BDOG PA GYA NOM PA BSTABS, RGYA NAG TU SKYABS MGON LCANG SKYA RIN PO CHER ZANG ZING GI DNGOS PO GYA NOM PA DANG, THUGS DAM GSAL 'DEBS SU DMIGS BDAG LA'ANG GSER SRANG BCU SOGS BCAS BKRA SHIS LHUN PO'I PHYAG MDZOD BRGYUD MDO SMAD DU BSKUR BYUNG ZHING, DES MTSON ZHABS PHYI RNAMS KYIS SKU CHAS KYI DNGOS PO RNAMS CHUD ZOS SU MA BTANG BAR SPRUL PA'I SKU RIN PO CHE ZHI BAR GSHEGS PA'I THUGS DGONGS RDZOGS CHED RNAM DKAR GYI MCHOD SBYIN RGYA CHEN PO BSGRUBS TE YA RABS BSNGAGS 'OS KYI NGANG TSUL LHUR BLANGS PA BYUNG 'DUG GO ,GONG GSAL GYI DGON KHAG RNAMS SU YANG SRID MYUR 'BYON GYI ZHAL 'DON CHOS SPYOD KYI RIM BA'ANG GNAD SMIN BSGRUBS, DE NAS DKA' BCU
NGAG DBANG RGYA MTSO DANG, PHYAG MDZOD DON GRUB RGYAL MTSAN GNYIS KYIS KHUR BLANGS TE SKU GDUNG GI BZHUGS GNAS GTZUG LAG KHANG PHUN SUM TSOGS PA GSAR RGYAG DANG, DE'I NANG DU DNGUL DKAR SRANG LNGA STONG LHAG TZAM DANG, GSER SRANG BCO LNGA LHAG LAS BZHENGS PA'I LHA BABS MCHOD RTEN SA 'DZIN GYI RGYA KHYON LA MTHO BCO LNGA YOD PA, MU TIG DANG G-YU DANG BYU RU DANG SPOS SHEL SOGS RIN PO CHE'I PHRA RGYAN DU MAS MDZES SHING MDO RGYUD LAS GSUNGS PA'I CHAG TSAD PHUN SUM TSOGS PA DANG LDAN PA'I BUM PA'I NANG DU SKU GDUNG RIN PO CHE DANG, RING BSREL RNAM BZHIS BYUR BUR GTAMS PA GSAR DU BSKRUN, DE'I MDUN DU MCHOD RDZAS MTHA' YAS PA PHUL TE CHOS BRGYAD KYI RNYOG PA DANG BRAL BA'I DGE RTZA GSUM GYIS BSDUS PA'I RNAM DKAR GYI RIM PA KUN TU BZANG PO'I MCHOD SPRIN LA 'GRAN BZOD PA BSTAR ZHING SKU GDUNG RIN PO CHE YE SHES SEMS DPA'I NGO BO DANG DBYER MED DU SGRUB PA'I RAB TU GNAS PA'ANG RGYUD SDE NAS BSHAD PA LTAR BGYIS TE BKRA SHIS DGE MTSAN GYI ME TOG CHAR DU BSNYIL BAR BYAS SO, ,DE LTAR MDO KHAMS BSTAN PA'I SNANG BYED CHEN PO SPRUL BA'I SKU RIN PO CHE 'DI NYID MKHYEN RAB MCHOG TU YANGS SHING THUGS RGYUD ZHI ZHING DUL BA, DGE BA'I BSHES GNYEN DU MA'I ZHABS PAD BSTEN NAS DAM PA'I CHOS TSOL BA LA SGRA DBYANGS SRAS PO LTAR NGOMS PA MI MNGA' BA, SKYES RABS SO BZHI PA DANG SPYOD 'JUG SOGS THUGS 'DZIN GNANG NAS RGYUN DU ZHAL 'DON MDZAD, BYAMS SNYING RJE BYANG CHUB GYI SEMS 'BYONGS PA,
, ,SNGOM GSUM RNAM PAR DAG CING GZHAN DON LA SPRO BA BRTAN PA, 'GRO BA DU MA'I 'DREN PAR GYUR KYANG DMAN CHA 'DZIN PA LA DGYES PA, ZAB MO'I TING NGE 'DZIN LA MNGA' BRNYES SHING LHA DANG YI DAM DU MA'I GZIGS SNANG NAR MAR 'BYUNG BA SOGS YON TAN MTHA' YAS PA DANG LDAN PA STE, SA MTHON PO LA GNAS PA'I RGYAL BA'I SRAS PO ZHIG ZHING 'DIR BSAMS BZHIN DU BSTAN PA DANG 'GRO BA'I DON DU BYON PA YIN NO ZHES SKAL BA DANG LDAN PA RNAMS KYIS GUS PA LHUR LEN PAR BYA'O, ,'DIR SMRAS PA, BSKAL BZANG RNAM 'DREN BZHI PA'I DGONGS PA'I BCUD, ,BSHAD SGRUB THUB BSTAN CHOS KYI DGA' STON MCHOG ,'GYED LA MKHYEN RAB DBANG PHYUG MTHU GRUB PA, , GANG 'DI BSTAN 'DZIN RGYA MTSO'I DED DPON YIN, ,ZLA BA DAG PA'I KHAMS BZHIN RNYOG BRAL BA'I, ,KHYOD KYI GSANG GSUM MDZAD BA MA LUS PA, ,DPAL LDAN THUB PA RNAMS KYI NGO MTSAR BZHIN, ,TSUR MTHONG SKYE BO'I BLO YIS DPAG PAR DKA', ,'ON KYANG GANG GI BKA' DRIN GDUGS DKAR GYI, ,GRIB BSIL SNYING LA 'GROGS PA DE DAG GI ,YID KYI 'DOD BA 'JO PHYIR THUN MONG BA'I, ,RNAM THAR RAGS RIM MDOR BSDUS GTAM DU BRJOD, ,DGE BAS SKAL BZANG RAB DKAR BDUD RTZI'I MTSO, ,MOS GUS RLABS 'PHRENG CHAL CHIL G-YO BA'I RTZER, ,RTOGS BRJOD DANG MOS RDZA RNGA BRDUNG BA YIS, ,SRID GSUM RNA BA'I BCUD LEN SPEL GYUR CIG ,LUS CAN SHES RGYUD GSER LDAN DGA'
MA'I LTOR, ,THUB BSTAN AA MRA'I 'KHRI SHING RGYAS BA GNAG, ,PHAN BDE'I 'BRAS BU G-YUR DU ZA BA YIS, ,BYANG GROL DGA' STON CHEN POR SPYOD GYUR CIG, ,,CES MDO KHAMS BSTAN PA'I SNANG BYED CHEN PO RDOG LO TZ'A BA LEGS PA'I SHES RAB KYI RNAM 'PHRUL BRAG G-YAB CHUNG TSANG SPRUL BA'I SKU RIN PO CHE BSKAL BZANG THUB BSTAN DBANG PHYUG GI RNAM BAR THAR PA DAD PA'I SGO 'BYED CES BYA BA 'DI NI, LUGS GNYIS LA BLO GROS KYI 'JUG PA MCHOG TU YANGS PA PHYAG MDZOD DON GRUB RGYAL MTSAN GYIS BSKUL DOR, ^ BTZUN PA 'JAM DBYANGS BZHAD BA DKON MCHOG 'JIGS MED DBANG POS LHA LDAN NOR 'DZIN DGA' TSAL DU SBYAR BA'O,, ,,