*, ,RAB GNAS KYI BSHAD PA KUN MKHYEN CHEN PO 'JAM DBYANGS BZHAD PA'I RDO RJES MDZAD PAR GRAGS PA BZHUGS SO,, @001 #, ,MTSAR SDUG DUR SMRIG GSAR BA'I LANG TSO NYI MA BUM LAS GSAL PA'I SKU, ,DRUG CU'I SGRA DBYANGS SNYAN PA'I CHOS KUN THOGS MED 'CHAD LA ZLA BRAL GSUNG, ,CHA SHAS RI YIS 'GRO 'DI'I KHAMS DANG BSAM PA JI BZHIN GZIGS PA'I THUGS, ,TZONG KHA PA ZHES SNYAN PA'I GRAGS PA SRID 'DIR CHES CHER SGROGS LA 'DUD, ,GANG GIS BSTAN PA RIN CHEN MKHAS MANG SKAL LDAN GZHON NU'I DGA' STON LA, ,'GYED MKHAS GRUB BA'I GOS 'PHANG MTHOR GSHEGS BLO BZANG RGYAL BA'I SHING RTA CHE, ,RGYUD SDE'I NGES GSANG JI BZHIN MKHYEN PA'I YE SHES RAB DANG PHUL GYUR PA,, KHYOD LAS GZHAN MIN NI YI SENG GER GUS PAS PHYAG BGYID DO, ,DE LTAR 'JAM MGON RGYAL BA'I BSTAN BSDER BCAS GNYER GTAD SRUNG MA'I TSOGS, ,BLA MGON DBYER MED PHYAG DRUG MGON DANG YUM
, ,CHEN DANG BCAS GNOD SBYIN BZHI, ,PHYI NANG GSANG BA'I GSHIN RJE LA SOGS BKA' NYAN LAS BYED TSOGS BCAS PAR, ,'DUD NGO RNAM BZHI'I 'PHRIN LAS BSGRUB LA NYIN MTSAN G-YEL MED BYAR MDZOD, ,DE LTAR SHIS PA BRJOD PA DANG 'PHRIN LAS BCOL PA'I SNYAN TSIG GIS SDUN BSUS TE SKABS LA 'JUG PA NI, STON PA MNYAM MANG THUB PA'I DBANG PO DE NYID KYIS BYA DKA' BA 'BUM, PHRAG GIS NYE BAR BSKRUN PA'I SKU GSUM GYI GO 'PHANG MNGON DU MDZAD DE GDUL BYA RNAMS NYID KYIS BRNYES PA'I GTAN BDE'I LAM MCHOG DE NYID LA 'GOD PA'I PHYIR SKU GSUNG THUGS KYI 'PHRIN LAS BA GRANGS LAS 'DAS PA BSTAN PA RNAMS KYI NANG NAS CHES MCHOG TU GYUR PA NI, CHED DU BRJOD PA'I TSOMS LAS, SRID PA'I ZUG RDU GCOD MDZAD PA'I, ,LAM NI KHYOD LA NGAS BSTAN BYA, ,KHYED NYID KYIS NI BSGRUB BYA
STE; ;DE BZHIN GSHEGS PA STON MDZAD DE, ,ZHES DANG, DE'I 'GREL PAR, THUB RNAMS SDIG PA CHU YIS 'KHRU BAR MI MDZAD LA, ,'GRO BA'I SDUG BSNGAL PHYAG GIS KYANG NI SEL BAR MI MDZAD PAR, ,NYID KYI RTOG PA GZHAN LA SBO BAR MDZAD PA MIN, ,CHOS NYID ZHI BA BSTAN PAS GROL BAR MDZAD PA YIN, ,ZHES DANG, RJE BLA MAS KYANG, ,MDZAD PA KUN LAS GSUNG GI NI, ,MDZAD PA MCHOG YIN ZHES GSUNGS PA LTAR, ZHAL GYI BDUD RTZI JI SNYED CIG BKA' BSTZAL PA RNAMS YIN CING, DE LTAR BKA' BSCAL BA LA YANG; DKON MCHOG T'A LA SOGS MDO DANG, LHA MO BZHIS ZHUS SOGS RGYUD DANG, RIM LNGA, SGRON GSAL SOGS BSTAN BCOS NAS CHOS KYI PHUNG PO BRGYAD KHRI BZHI STONG DU GSUNGS PA THAMS CAD BSDUN THEG PA CHE CHUNG GI SDE SNOD GNYIS SU 'DU ZHING, THEG PA CHEN PO LA YANG RGYU 'BRAS KYI THEG PA GNYIS DANG, 'BRAS BU'I THEG PA LA YANG BZHI YOD PAS, RAB GNAS KYI RGYUD 'DI RGYUD SDE 'OG MAR GTOGS SHING, DE'I DON BZHIN RAB GNAS BYED PA LA GANG LA BYA BA'I GZHI, RAB GNAS BYAS MA BYAS KYI PHAN YON DANG NYES DMIGS, RAB GNAS BYED PA PO'I RTEN GYI GANG ZAG GNAS SKABS GANG LA BYED PA'I DUS KYI KHYAD PAR, YUL GANG NAS BYED PA'I GNAS KYI KHYAD PAR, TSUL JI LTAR BYA BA'I TSE GA'I KHYAD PAR DANG, CHOG LA YANG SBYOR DNGOS RJES GSUM SOGS SPROS NAS 'DA' SBRAD NA MKHAS PA BLO GROS KYI MTHU DANG LDAN PA RNAMS LA DON DU MI 'GYUR BA MA YIN KYANG, LUNG 'DREN SOGS KYI SBROS PA DOR NAS GO BDE 'TSAM PA RE BJOD PA NI CHOS KYI'ANG RTZA BAR 'DUG PAS DE LTAR BRJOD PAR BYA'O, ,'O LAGS SO STON PA YANG DAG BAR
, ,RDZOGS PA'I SANGS RGYAS DE NYID KYIS GZHAN PHAL MO CHE'I SNYING THAG PA NAS RJES SU YI RANG BTZAM YANG BYA DKA' BA'I GNAS BDAG GZHAN MNYAM BRJES BYANG CHUB KYI SEMS GNYIS DANG RGYAL SRAS KYI SPYOD BRLABS CHE BA RNAMS LA BSKAL PA DU MAR GOMS PA LAS MI SLOB PA'I ZUNG 'JUG RDO RJE 'CHANG CHEN PO'I GO 'PHANG MNGON DU MDZAD DE GDUL BYA RNAMS RANG RANG GI SKAL BA DAD 'TSAM PAR THAR PA DANG THAMS CAD MKHYEN PA'I GO 'PHANG LA 'GOD PA'I THABS JI SNYED CIG BKA' BSTZAL PA RNAMS LAS, DA LAM 'DIR NI, RAB GNAS KYI RGYUD DU, SKYE BO RAB TU DAD PA YIS, ,BRJOD PA'I DGE BA SPEL BA'I PHYIR, ,SOGS DANG, SDOM 'BYUNG LAS KYANG, SLOB MA DAD PAS GSOL 'DEBS PA'I, ,BSOD NAMS PHYIR NI BYA BA YIN,, ZHES SOGS RGYA CHER GSUNGS PA LTAR, SBYIN PA'I BDAG PO RNAMS KYI BSOD NAMS GONG NAS GONG DU 'PHEL BA'I PHYIR RAB TU GNAS PA BYA BA'I SKABS YIN CING, DE LTAR RAB GNAS BYED PA LA YANG GZHI GANG LA BYED PA SOGS DU MA YOD PA LAS, DANG PO SANGS RGYAS BYANG SEMS KYI SKU GSUNG THUGS RTEN, DGE 'DUN KYI KUN RVA GTZUG LAG KHANG, PHYAG MTSAN, RGYAN DRUG ,BGRANG 'PHRENG, SKYE BO'I KHANG BZANG, GDUGS RGYAL MTSAN, MTSE 'U, RDZING, KHRON PA, SKYED MO'I TSAL SOGS DU MA YOD PA LAS 'DIR SKU GSUNG THUGS RTEN DANG GTZUG LAG KHANG BCAS YIN LA, DE LTA BU'I RTEN GTZUG LAG KHANG DANG BCAS PA BZHENGS BAS BSOD NAMS DPAG TU MED PA THOB PAR 'GYUR BA YANG, LEGS NYES KYI RGYU DANG 'BRAS BU STON PA'I MDO LAS, DE
BZHIN GSHEGS PA'I MCHOD RTEN DANG, DRI GTZANG KHANG DANG, GTZUG LAG KHANG BRTZIGS NA MA 'ONGS PA NA GDON MI ZA BAR RGYAL PO BYED CING SKYE BO MANG PO LA DBANG BYED PAR 'GYUR BAS GANG YANG DAG MI NYAN PA MED PAR 'GYUR RO, ,ZHES SOGS DANG, SPYAN RAS GZIGS KYI MDO LAS, 'JIG RTEN MGON PO SKYOBS PA LA, ,PHRENG BA'I KHANG PA BYAS NA NI, ,DE NI G-YOG 'KHOR MI PHYED CING, ,RGYAL PO 'BYOR PA CHEN POR 'GYUR, ZHES DANG, DRAN PA NYER BZHAG LAS KYANG, RTEN DANG BRTEN PAR LEGS BSKRUN DANG, ,DGE 'DUN GNAS MA LA BCA' BA SOGS, ,DGE NAS DGE BAR RTAG TU 'GYUR, ,BSKAL BA BYE BA STONG DU YANG, ,DGE BA YONGS SU CHUD MI ZA, ,ZHES DANG, GSAL RGYAL LA GDAMS PA'I MDO LAS, MI RNAMS GANG DAG RGYAL BA'I GTZANG KHANG BYED, ,DE DAG 'GRO BA RNAMS SU 'KHOR BA NA, ,LHA KHANG GNAS 'DRA'I KHANG KHYIM 'OD 'BAR PA, ,DUS TSIGS KUN TU BDE LDAN THOB PAR 'GYUR, ,THA MAR ZHI BA'I GO 'PHANG THOB PAR 'GYUR, ,ZHES GSUNGS PA SOGS MTHA' KLAS SHING, KHYAD PAR RDZAS LAS BYUNG BA'I BSOD NAMS BDUN 'DU BYAS KYI DGE RTZA'I MTHAR THUG TU GSUNGS TE, MDO LAS, RDZAS LAS BYUNG BA'I BSOD NAMS BDUN DANG, MA BYUNG BA'I BSOD NAMS BDUN DANG LDAN PA'I RIGS KYI BU'AM RIGS KYI BU MO 'DUG KYANG RUNG, RGYU YANG RUNG, GNYID LOG KYANG RUNG, GNYID MA LOG KYANG RUNG, RTAG TU RGYUN MI 'CHAD PAR BSOD NAMS RNAM PAR 'PHEL BAR 'GYUR RO ZHES GSUNGS SHING, RDZAS LAS BYUNG BA'I BSOD NAMS BDUN YANG,
, ,KUN DGA' RAB GTZUG LAG KHANG, ,MAL STAN 'TSO BA NAR MA DANG, ,GLO BUR NAD PA NAD G-YOG DANG, ,YUL NGAN DUS SU SBYIN PA NI, ,RDZAS LAS BYUNG BA'I BSOD NAMS BDUN, ,ZHES PA LTAR YIN, PHAN YON DE LTAR GYI GTZUG LAG KHANG RAB TU GNAS PA BSGRUB PA LA YANG RAB GNAS KYI NGES TSIGS, BYED PA PO'I RTEN, DUS, GNAS, CHO GA'I KHYAD PAR RNAMS LAS, DANG PO NGES TSIGS DAM TSIG PA LA YE SHES PA RAB TU 'AM LHAG PAR GNAS PAR BYED PAS NA RAB GNAS ZHES PA'AM DAM TSIG PA SO SO LA YE SHES PA SO SO GNAS PAR BYED PAS NA RAB GNAS ZHES BRJOD PA SOGS RNAM GRANGS MANG, BYED PA PO'I RTEN NI RAB GNAS KYI RGYUD LAS, SLOB DPON DE NYID BCU SHES SHING, ,MTSAN NYID KUN DANG YANG DAG LDAN, ,PHYAG RGYA SNGAGS DANG CHOG SHES, ,LAS RNAMS KUN LA MKHAS PA'O, ,ZHES DANG, SLOB DPON KUN SNYING GIS KYANG, BRTAN ZHING DUL LA BLO GROS LDAN, ,BZOD LDAN DRANG LA G-YO SGYU MED, ,SNGAGS DANG RGYUD KYI SBYOR BA SHES, ,DKYIL 'KHOR 'BRI BA'I LAS LA MKHAS, ,DE NYID BCU NI YONGS SHES PA, ,'DI NI SLOB DPON YIN ZHES BYA, ,ZHES GSUNGS SHING, DE NYID BCU LA YANG PHYI'I DE NYID BCU DANG, GSANG PA'I DE NYID BCU STE GNYIS YOD PAS, RGYUD SDE 'OG MA'I DBANG BSKUR RAB GNAS SOGS BYED PA LA PHYI'I DE NYID BCU DANG, BLA MED KYI DBANG BSKUR RAB GNAS BYED PA LA GSANG BA'I DE NYID BCU SHES PA DGOS, DE LTA BU'I RDO RJE SLOB DPON LA YANG, BDE MCHOG STOD 'GREL LAS, KHYIM GNAS DGE TSUL DGE
SLONG NI, ,DMAN PA 'BRING DANG MCHOG YIN NO, ,ZHES DANG, DRI MED 'OD LAS KYANG, GSUM LAS DGE SLONG MCHOG YIN 'BRING, ,DGE TSUL ZHES BYA DE DAG LAS, ,KHYIM NA GNAS PA THA MA'O, ,ZHES GSUNGS PA LTAR, DGE SLONG RDO RJE 'DZIN PA MCHOG, DGE TSUL RDO RJE 'DZIN PA 'BRING, KHYIM PA RDO RJE 'DZIN PA THA MAR GSUNGS PAS NA RTEN SOGS KYI SGO NAS 'GRUB RUNG TZAM YOD LA, DGE 'DUN YANG, GONG NAS GONG GI SNGOM PA NI, ,BU KHYOD KYIS NI BSRUNG BYA STE, ,ZHIS GSUNGS PA LTAR, SO THAR LAS GONG MA BYANG SEMS DANG, DE'I GONG MA GSANG SNGAGS KYI SDOM PA STE GSUM LDAN RDO RJE 'DZIN PA YIN PAS RTEN GYI MTSAN NYID TSANG, DUS KYANG, SPYI RGYUD LAS, DPYID ZLA RAB 'AM DPYID ZLA 'BRING, ,DGUN DANG DPYID KYI THA CHUNG NGAM, ,DBYAR RA DE BZHIN DBYAR 'BRING PO, ,NYI MA BYANG DU GNAS PA YIS, ,ZHES DANG, RAB GNAS RUNG BA'I GZA' YANG, DE NYID LAS, PHUR BU GZA' LHAG PA PA SANGS, ,ZLA BA'I GZA' RNAMS SHES BYAS TE, ,'DI RNAMS LAS BYAS BZANG LDAN TE, ,RAB TU GNAS PA MCHOG TU SHIS, ,ZHES DANG, SKAR MA GANG LA RUNG BA YANG, THAMS CAD DU NI CHU STOD DANG, ,SNAR MGRO ZHUN DE BZHIN DBO, ,LAG PA SNRUB DANG SNRON DANG NI, ,RGYAL DANG CHU SMAD DE BZHIN NO, ,KHRUM SMAD DAG KYANG DE BZHIN TU, ,RGYU SKAR 'DI RNAMS THAMS CAD DU; ;SKYE DGU 'PHEL ZHING DE YIS NI, ,RAB TU GNAS PA MCHOG TU BYED, ,CES SPYIR BTANG NYI MA BYANG BGROD KYI YAR NGO'I DUS DANG, GZA' YANG ZHI GZA' DANG, SKAR MA YANG GONG BZHIN GSUNGS KYANG, DMIGS GSAL GYI DBANG DU BYAS NA, RGYUD
, ,DE NYID LAS, GZA' DANG SKAR MA 'DZOM GYUR NA, ,MAR GYI NGO LA'ANG NYES PA MED, ,CES DANG, GUR LAS KYANG, RTAG TU DKYIL 'KHOR 'BRI PAR BYA, ,RTAG TU SANGS RGYAS RAB GNAS BYA, ,ZIN PA'I DE MA THAG PA RU, ,RAB TU GNAS PA MCHOG TU 'GYUR, ,ZHES DANG, DE BZHIN GSHEGS PA'I RDO RJE'I BDE MCHOG DKYIL CHOG LAS KYANG, RAB GNAS DUS NI THAMS CAD DU, ,SANGS RGYAS BZHUGS SU 'JUG PAR BZHED, ,CES GSUNGS PA LTAR LAS, DA LAM GZA' SKAR GYI 'PHROD SBYOR PHUN SUM TSOGS PA CHE GE'I DUS YIN, GNAS KYANG, DBANG MDOR BSTAN LAS, ,NGA NAS SKYONG CHOS LDAN ZHING, ,GANG ZHIG KHO NAR SKYE DGU RNAMS, ,BDER GNAS SA 'DZIN RTZOD MED PA'I, ,GNAS DER RNAL 'BYOR BRTZAM PAR BYA, , ZHES DANG, BRTAG GNYIS LAS KYANG, TSAL DANG SKYE BO MED GNAS DANG, ,BYANG CHUB SEMS DPA'I KHYAM DANG NI, ,DKYIL 'KHOR KHANG BA'I NANG DU YANG, ,ZHES DANG, DUS 'KHOR LAS KYANG, 'PHAGS YUL BOD LI RGYA GAR DANG, ,KEE LA SHA DANG GANGS CAN CHE; ;ZHES DANG, BDE MCHOG LAS KYANG, BOD KYI YUL DANG DE BZHIN DU, ,M'A LA YA DANG PU LI SOGS, ,ZHES DANG, DPAL GSANG BA 'DUS PAR YANG, YANG THOG DANG NI MCHOD RTEN SOGS, ,KHYIM DANG LHA YI GNAS RNAMS SU, ,SANGS RGYAS LA SOGS RAB GNAS NI, ,CHOG DAG DANG LDAN PAS BYA, ,ZHES GSUNGS PA LTAR GYI BOD KYI YUL DANG, DE YANG BKA' GDAMS GLEG BAM GYI MKHA' 'GRO MA RNAMS KYI RDO RJE'I GLUR, SHAR RDO RJE GDAN GYI BYANG PHYOGS NA, ,GNAS PUR RGYAL BOD CES BYA BA YOD, ,RI MTHON PO
GNAM GYI KA BA YOD, ,MTSOD M'A MO G-YU YI MAndAL YOD, GANGS DKAR PO SHEL GYI MCHOD RTEN YOD, ,SPANG SER PO GSER GYI LHUN PO YOD, ,DRI ZHIM PO SMAN GYI BDUG SPOS YOD, ,STON BKRA BA GSER GYI ME TOG YOD, ,CES GSUNGS PA LTAR KHYAD PAR DU 'PHAGS SHING, DE'I NANG TSAN MKHA' 'GRO MA GSANG PA YE SHES KYIS, SA PADMA 'DAB BRGYAD YUL GYI DBUS, ,GNAM 'KHOR LO RTZIBS BRGYAD PHUGS PA'I 'OG ,PHYOGS BKRA SHIS RTAGS BRGYAD YOD PA'I SA, ,GNAS PHUN SUM TSOGS PA DAM PA'I YUL, , MI KHYOD KYI ZHING KHAMS DAM PA YIN, ,GNAS DE RU LAS CAN DPAG MED 'DU, ,ZHES GSUNGS PA LTAR GYI BKRA SHIS PA'I DGE MTSAN DU MAS MNGON PAR SPUNG PA'I SKYID SHOD DBUS RU'I CHA DANG, DE'I YANG NANG TSAN 'JAM DBYANGS BLA MA TZONG KHA BA CHEN POS CHOS SDINGS SU DBU MA RTZA BA SHES RAB KYI RNAM BSHAD RIGS PA'I RGYA MTSO LJAGS BRTZOMS SKABS NAM MKHA' NAS GSER GYI YI GE'I 'PHRENG BA GSAL BAR GZIGS PAS SA CHEN PO LA SBYONG BA'I SKYE 'GRO THAMS CAD KYI ZHING SA THEG CHEN GLING 'DI NYID 'BYUNG BAR GSANG BA'I ME LONG DU LUNG BSTAN PA'I DON BZHIN PAn CHEN SH'AKYA YE SHES LA 'DUS SDE 'DI NYID TSUGS SHIG PA'I BKA' GNANG PA SPYI BOR BLANGS TE SA PHAG LO 'DEBS PA GNANG BA'I BSHAD SGRUB KYI SDE CHEN PO 'DIR SANGS RGYAS DANG BYANG CHUB SEMS DPA' SA LA SPYOD PA DU MA YANG GOD SMOS KYI GNAS PHUN SUM TSOGS PA'I MTSAN NYID KYANG LEGS PAR TSANG, CHO GA'I KHYAD PAR LA YANG, SDOM 'BYUNG GUR SOGS MA RGYUD DANG, RDO RJE 'PHRENG BA SOGS RGYUD GZHAN 'GREL PA DANG BCAS PA NAS 'BYUNG BA DANG,
, ,KHYAD PAR DUS ZHABS CHE CHUNG GNYIS SOGS DUS 'KHOR GYI RAB GNAS KYI RIGS DANG, SNANG BYED ZLA BA SOGS KYIS MDZAD PA'I GSANG 'DUS KYI RAB GNAS KYI RIGS DANG, KUN SNYING DANG, PRADZNY'A WA LI TAS MDZAD PA'I RNAL 'BYOR RGYUD KYI RAB GNAS SOGS 'PHAGS YUL GYI RAB GNAS PHAL CHE BA'I DON 'GREL BAR LO CHEN RIN CHEN BZANG PO'I SDOM TSIG TU BYAS PA 'DI BOD GANGS CAN GYI RAB GNAS THAMS CAD KYI PHYI MO LTA BU YIN CING, RJE BTZUN CHEN PO GRAGS RGYAL GYIS SDOM TSIGS DE'I 'GREL PA DON GSANG MDZAD CING, BU STON THAMS CAD MKHYEN PA'I RAB GNAS BKRA SHIS RAB RGYAS DANG, RJE BTZUN TZONG KHA PA CHEN PO'I PHYAG LEN BZHIN RJE 'DUL BA 'DZIN PA'I RAB GNAS RGYAS 'BRING BSDUS GSUM DANG, DBYANGS CAN BZHAD PA DGE 'DUN RGYA MTSO'I BKRA SHIS SNYE MA, PAn CHEN THAMS CAD MKHYEN PA'I RAB GNAS DGE LEGS RGYA MTSO, RGYAL DBANG LNGA PA CHEN PO'I RAB GNAS BKRA SHIS 'BUN PHRAG GSAR NGOMS SOGS KYI DGONGS PA GCIG PAR SBYOR DNGOS RJES GSUM GYI SGO NAS RAB GNAS BGYID PA'I PHYAG SROL LTAR, ? LAM YANG SBYOR DNGOS GNYIS DANG MJUG GI YANG PHAL CHE BA'I SGO NAS LEGS PAR GRUB ZIN PA SBYIN BDAG BSGO BA'I SKABS LAGS PAS, DES NA KHYED KYI DED LA GANG GSOL PA'I, ZHES GSUNGS PA LTAR RAB TU GNAS PA DE BDAG CAG RNAMS KYIS LEGS PAR BSGRUB ZIN PA'I SKU GSUNG THUGS RTEN GTZUG LAG KHANG DANG BCAS PA LA SEMS DANG PAS SPYIR RGYUN DU MCHOD PA DANG KHYAD PAR ZHAG BDUN PAR DU MCHOD PA RGYUN MI 'CHAD PAR BYA RIGS TE, DE
LTAR BYAS PAS GNAS SKABS DANG MTHAR THUG GI DON GNYIS BDE LEGS SU 'GRUB PAR 'GYUR BA'I PHYIR TE, GSAL RGYAL LA GDAMS PA'I MDO LAS, MI RNAMS GANG DAG SANGS RGYAS MCHOD RTEN NAM, ,SKU GZUGS DAG LA MGOS GTUGS GUS PHYAG 'TSAL, ,DE DAG LHA RNAMS DANG NI MI RNAMS KYIS, ,CHER YANG CHE BAR BKUR BA'I GNAS SU 'GYUR, ,ZHES DANG, DPA' BO'I ZA MA TOG LTA BU'I GDAMS LAS, MAndAL ME TOG BCAS BYED PA, ,'GRO BA'I BDAG PO TSE RING BZHIN, ,SNA TSOGS NAD KYI 'JIGS LAS GROL, ,GANG YIN DE YIS SKAD CIG 'THOB, ,CES DANG, SPYAN RAS GZIGS KYI MDO LAS, DE BZHIN GSHEGS PA LA SU ZHIG ,ME TOG DANG, PHRENG BA DANG, SPOS DANG, GDUGS DANG, RGYAL MTSAN DANG, PA DAN DANG, ROL MO'I SGRA DANG, BYUGS PA RNAMS KYIS BSTI STANG BYED PA DE'I BSOD NAMS KYI PHUNG PO'I MTHA' RTOGS PAR MI NUS TE DE'I MTHA' NI THEG PA GSUM PO LAS THEG PA GANG YANG RUNG BA'I MYA NGAN LAS 'DAS PA'I MTHAR THUG PA MA GTOGS PAR BSOD NAMS KYI PHUNG PO DE'I PHYI MA'I MTHAR YANG ZAD PAR MI NUS SO, ,ZHES GSUNGS PA SOGS MTHA' KLAS PA'I PHYIR, DES NA DE LTA BU'I MCHOD PA 'BUL DGOS PA'I MTSON BYED DU SPYIN BDAG GI MDUN DU MCHOD PA BSHAMS BYIN GYIS BRLABS STE 'BUL DU 'JUG PA'I PHYAG LEN GDA' BAS DED RNAMS KYIS MCHOD PA BYIN GYIS RLABS PA NA CHO GA'I TSIG RIS BZHIN MCHOD RDZAS RNAMS BDE STONG DBYER MED KYI RANG BZHIN CAN BDE BA KHYAD PAR CAN BSKYED PA'I NUS LDAN DU GYUR SONG SNYAM PA DANG, MCHOD PA 'BUL PA'I TSE DED CAG GI SNGAGS TSIG GIS 'BUL BA NA KHYED
, ,RANG GIS DNGOS SU PHUL BA'I STANG KA BYAS TE PHUL BAS MCHOD YUL RNAMS KYI THUGS RGYUD LA ZAG MED KYI THUGS RGYUD LA ZAG MED KYI BDE BA CHES 'PHUL DU BYUNG BA SKYES SONG SNYAM PA GNANG NAS 'BUL BAR ZHU ZHES BRJOD LA MCHOD PA'I BYIN RLABS SOGS LA 'JUG PAR BYA'O, ,DE LAS SPROS TE BYA 'DOD NA, STON PAS THUGS BSKYED TSUL DANG TSOGS BSAGS TSUL, SANGS RGYAS TSUL DANG CHOS 'KHOR BSKOR TSUL SOGS MI 'DRA BA MANG DU 'BYUNG BA'I RIM PA DANG, CHOS LA YANG MDO SNGAGS GNYIS SU MED TSUL MDO SNGAGS LA MCHOG DMAN YOD PA'I RGYU MTSAN, SNGAGS GYI YANG RGYUD SDE 'OG MA 'OG MA LAS GONG MA GONG MA KHYAD PAR 'PHAGS TSUL DANG, RAB GNAS LA YANG SKU GZUGS KYI CHAGS TSAD DE BSGRUB TSUL, DE NAS KHRUS BYAS TE RING BSREL SNYING PO CAN DU BYA BA SOGS LO CHEN GYI SDOM TSIG LTA BU'I TSIG DRANGS TE SBYOR DNGOS RJES GSUM GYI SGO NAS RAB GNAS BYA TSUL, ZHI RGYAS KYI SBYIN SREG DANG, CHOS SKYONG BSGO TSUL SOGS KYI BAR YANG BRJOD PA'I PHYAG SROL YOD PA LTAR BYAS PAS CHOG GO ,THA MA LA DNGOS PO RAB GNAS GSER 'GYUR RTZIS, ,PHAN BDE'I ZHING SA MCHOG TU BSGYUR BYED PA'I, ,SKYE DGU'I RE SKONG DBAG BSAM LJON PA CHE, ,BKRA SHIS BYE BA'I GZI 'OD 'DI SPROS PA'I, ,DGE BA KHA BA'I RDUL BRTZEGS LHUN PO YIS, ,SRID 'DI'I NYON MONGS TSA GDUNGS RAB BSIL TE, ,ZAG MED BDE BA'I KHA ZAS RO BRGYA PAR, ,LONGS SU SPYOD PA'I SKAL BZANG THOB PAR SHOG ,'DIS KYANG BLO BZANG GRAGS SNYAN BSTAN PA'I GDUGS, ,SRID RTZE'I YUL SAR BSGRENG BA'I GRIB BSIL LA, ,MTHA' YAS 'GRO BAS
YUN RING NGAL GSOS TE, ,SKU GSUM RDZOGS LDAN DPAL LA SPYOD PAR SHOG ,BDAG KYANG BLO BZANG RGYAL BSTAN RGYA MTSO CHE, ,THOS BSAM SGOM PA'I RDZING GIS LEGS BRGAL TE, ,SKU GSUM 'DOD PA 'JO BA'I YID BZHIN DBANG, ,PHUL BYUNG DGA' BDE'I DPAL LA SPYOD PAR SHOG ,CES BKRA SHIS BYE BA'I GZI 'OD PHYOGS BRGYAR 'BAR BA 'DI NI GYIN BA ZHIG GIS CI THON THON DU SMRAS PA'O, ,MANGA LAm,