*, ,GZHI'I SKU GSUM GYI RNAM GZHAG RAB GSAL SGRON ME ZHES BYA BA BZHUGS SO, , (1)NA MO GU RU MANYDZU GHO sh'A YA, ,SBYANG GZHI SKYE SHI BAR DO LCAGS KYI KHAMS, ,SBYONG BYED ZAB LAM RIM GNYIS GSER 'GYUR RTZI, ,SBYANGS 'BRAS RNAM DAG SKU GSUM RIN CHEN LA, ,DBANG BSGYUR ZUNG 'JUG MGON POR PHYAG 'TSAL LO, ,'DIR BLA MED KHYI LAM GYIS SNYIGS DUS KYI TSE THUNG GCIG LA KHA SBYOR YAN LAG BDUN LDAN GYI ZUNG 'JUG GI SKU MNGON DU BYED PA'I NYE LAM ZAB MO RIM PA GNYIS KYI BGROD TSUL SHES PA LA, SBYANG GZHI GZHI'I SKU GSUM GYI RNAM GZHAG LA GO BA CHAGS PA SHIN TU GAL CHE, DES NA LAM RIM PA GNYIS KYI SBYANG GZHI SKYE SHI BAR DO GSUM GYI RNAM GZHAG BSHAD PA LA GSUM, 'CHI BA'I RIM PA, BAR DO 'GRUB PA'I RIM PA, DES SKYE SRID DU SKYE BA LEN PA'I TSUL BSHAD PA'O, ,DANG PO NI, BSKAL PA DANG PO'I 'DZAM BU GLING PA'I MI RNAMS RDZUS TE SKYES PA DANG, TSE LO DPAG TU MED PA THUB PA, DBANG PO KUN TSANG BA, LUS RANG 'OD KYIS KHYAB PA, MTSAN DPE RJES MTHUN PAS BRGYAN PA, KHA ZAS LA MI LTOS PAR DGA' BA'I ZAS ZA BA, RDZU 'PHRUL GYIS NAM MKHA' LA 'GRO NUS PA SOGS CHOS BDUN LDAN SHA STAG YIN PA LA, KHAM ZAS LA SRED PA'I BAG CHAGS SAD PA'I RKYEN GYIS KHAM ZAS RAGS PA BZOS PAS SNYIGS MA RNAMS BSANG GCIR GYUR TE 'DON (2)PA'I SGO PHO MO'I DBANG PO SOGS DOD DO, ,DER SNGON GYI 'KHRIG PA'I BAG CHAGS LDAN PA GNYIS KYIS GCIG LA GCIG SEMS CHAGS TE LOGS PAR ZHUGS PA LA BRTEN NAS MNGAL DU SEMS CAN CHAGS NAS RIM GYIS MNGAL SKYES SU GYUR CIG ,DE LA SA CU ME RLUNG RTZA THIG LE'I KHAMS TE DRUG GAM, YANG NA PHA LAS THOB PA'I RUS PA RKANG KHU BA GSUM DANG, MA LAS THOB PA'I SHA PAGS PA KHRAG GSUM STE KHAMS DRUG TSANG BA LA 'DZAM BU GLING PA'I MI MNGAL SKYES KHAMS DRUG LDAN ZER, SNGAGS BLA MED KYI LAM GYI THOG MA NAS NYAMS SU BLANGS NAS SNYIGS DUS KYI TSE THUNG GCIG LA 'TSANG RGYA BAR NGES PA'I GANG ZAG YIN NA, DE 'DRA'I 'DZAM BU GLING PA'I MI MNGAL SKYES KHAMS DRUG LDAN YIN PAS KHYAB BO, DE'I LUS LA RTZA STONG PHRAG BDUN CU RTZA GNYIS RO RKYANG DBU MA GSUM DANG BCAS PA YOD LA, MTHAR 'CHI BA'I TSE RTZA STONG PHRAG BDUN CU RTZA GNYIS KYI RLUNG THAMS CAD RO RKYANG GNYIS SU 'DUS SHING, DE GNYIS KYI RLUNG YANG RTZA DBU MA LA THIM, RTZA DBU MA'I STOD SMAD KYI RLUNG RNAMS KYANG MTHAR SNYING GA'I RTZA 'DAB KYI DH'U TI'I NANG GI KHAMS DKAR DMAR GA'U KHA SBYAR GYI TSUL DU YOD PA'I DBUS NA SHIN TU PHRA BA'I RLUNG SEMS NGO BO GCIG PA'I CHAGS SROG 'DZIN GYI RLUNG MI SHIGS PA LA THIM PA'I SGO NAS 'CHI (3)DGOS TE, LUS KYI CHA SHAS GANG YANG RUNG BA ZHIG NA SHIN TU PHRA BA'I RLUNG MA GTOGS PA'I RNAM SHES KYI RTEN BYED PA'I RLUNG CUNG ZAD CIG GNAS NA 'CHI BA MI SRID PAS SO, ,DE YANG PHUNG PO LNGA, KHAMS BZHI, SKYE MCHED DRUG ,YUL LNGA, GZHI DUS KYI YE SHES LNGA STE, RAGS PA NYER LNGA THIM PA'I SGO NAS 'CHI DGOS LA, THIM RIM NI DANG POR GZUGS PHUNG GI RIGS KYI CHOS LNGA NI, GZUGS KYI PHUNG PO, GZHI DUS KYI ME LONG YE SHES, SA'I KHAMS, MIG GI DBANG PO, RANG RGYUD KYIS BSDUS PA'I GZUGS TE LNGA PO DUS MNYAM DU THIM PAR 'GYUR BAS DE RNAMS SO SO'I THIM PA'I RTAGS NI, GZUGS PHUNG THIM PA'I PHYI RTAGS SU YAN LAG RNAMS SNGAR LAS PHRA RU 'GRO ZHING, LUS NYAM CUNG BA DANG, NUS PA MED PAR 'GYUR RO, ,GZHI DUS KYI ME LONG YE SHES NI, ME LONG LA GZUGS BRNYAN SNANG BA BZHIN DU YUL DU MA CIG CAR DU GSAL BAR SNANG BA'I SHES PA ZHIG LA BSHAD LA, DE THIM PA'I PHYI RTAGS SU MIG MI GSAL ZHING RAB RIB TU 'GYUR, SA'I KHAMS THIM PA'I PHYI RTAGS SU LUS SHAS CHER SKAM ZHING YAN LAG RNAMS LHOD LHOD POR 'GRO BA DANG, LUS SA 'OG TU BYING BA LTA BU'I NYAMS 'BYUNG, MIG GI DBANG PO THIM PA'I PHYI RTAGS SU MIG 'BYED 'DZUM MI NUS, RANG RGYUD KYIS BSDUS PA'I GZUGS THIM PA'I PHYI RTAGS SU LUS KYI BKRAG MDANGS YAL ZHING NYAMS STOBS ZAD PAR 'GYUR RO, ,DE RNAMS KYI NANG RTAGS SU SMIG RGYU LTA BU ZHES BYA BA SOS KA'I DUS SU BYE MA LA NYI 'OD PHOG PA NA CHUR SNANG BA LTA BU SNGO MER BA'I SNANG BA 'BYUNG NGO, DE'I RJES SU TSOR PHUNG GI RIGS KYI CHOS LNGA DUS MNYAM DU THIM STE, TSOR PHUNG THIM PA NA PHYI RTAGS SU DBANG SHES 'KHOR GYI TSOR BA BDE SDUG BTANG SNYOMS GSUM LUS SHES KYIS NYAMS SU MI MYONG, GZHI DUS KYI MNYAM NYID YE SHES NI, BDE SDUG BTANG SNYOMS (4)GSUM TSOR BAR RIGS GCIG TU DRAN PA'I SHES PA LA BSHAD CING, DE THIM PA'I PHYI RTAGS SU YID SHES 'KHOR GYI TSOR BA BDE SDUG BTANG SNYOMS GSUM MI DRAN, CHU'I KHAMS THIM PA'I PHYI RTAGS LA, KHA CHU DANG, RDUL DANG, GCIN DANG, KHRAG DANG, KHU BA RNAMS SHAS CHER SKAM, RNA BA'I DBANG PO THIM PA'I PHYI RTAGS SU PHYI NANG GI SGRA MI THOS, RANG RGYUD KYIS BSDUS PA'I SGRA THIM PA'I PHYI RTAGS SU RNA BA'I NANG GI 'UR SGRA MI 'BYUNG NGO, ,DE RNAMS KYI NANG RTAGS SU DU BA LTA BU ZHES BYA BA DU BA 'KHRIGS PA'I DKYIL NAS DUD KHUNG NAS DU BA 'BYUNG BA LTA BU SNGO PHOD YOD PA LTA BU'I SNANG BA 'CHAR RO, ,DE'I RJES SU 'DU SHES KYI PHUNG PO'I RIGS KYI CHOS LNGA DUS MNYAM DU THIM LA, 'DU SHES KYI PHUNG PO THIM PA'I PHYI RTAGS SU PHA MA LA SOGS PA'I NYE DU SOGS KYI DON MI DRAN, GZHI DUS KYI SOR RTOG YE SHES NI NYE DU SOGS KYI MING SO SOR DRAN PA'I SHES PA LA BSHAD CING, DE THIM PA'I PHYI RTAGS SU PHA MA LA SOGS PA'I NYE DU RNAMS KYI MING MI DRAN, ME'I KHAMS THIM PA'I PHYI RTAGS SU LUS KYI ME DROD YAL NAS BZA' BTUNG 'JU BA'I NUS PA NYAMS, SNA'I DBANG PO THIM PA'I PHYI RTAGS SU SNA SGO NAS RLUNG NANG DU SDUD PA ZHAN CING PHYIR DRAG LA RING DU RGYU BA'I DBUGS BRTZEGS MA 'BYUNG, RANG RGYUD KYIS BSDUS PA'I DRI THIM PA'I PHYI RTAGS SU SNAS DRI ZHIM MI ZHIM GANG YANG MI TSOR, DE RNAMS KYI NANG RTAGS SU MKHA' SNANG LTA BU ZHES KYANG BYA, SRIN BU ME KHYER LTA BU ZHES BYA BA DUD KHUNG NAS DU BA SNGO PHOD PA 'BYUNG BA LTA BU'I GSEB NAS ME STAG DMAR TSIG TSIG PA LTA BU 'AM, YOS RDOS PA'I SLA NGA'I RGYAB KYI DREG PA LA ME STAG DMAR YAL YAL 'ONG BA LTA BU'I SNANG BA 'BYUNG NGO, DE'I RJES SU 'DU BYED KYI PHUNG PO'I RIGS KYI CHOS LNGA DUS MNYAM DU THIM PAR 'GYUR TE, 'DU BYED KYI PHUNG PO THIM PA'I PHYI RTAGS SU LUS KYI BYA BA BSGUL BSKYOD SOGS (5)MI NUS, GZHI DUS KYI BYA GRUB YE SHES NI 'JIG RTEN PA'I PHYI'I BYA BA DANG DGOS PA SOGS DRAN PA'I SHES PA LA BSHAD CING, DE THIM PA'I PHYI RTAGS SU 'JIG RTEN PA'I PHYI'I BYA BA DANG DGOS PA SOGS GANG YANG MI DRAN, RLUNG GI KHAMS THIM PA'I PHYI RTAGS SU SROG 'DZIN SOGS RLUNG BCU RANG RANG GI GNAS NAS SNYING GAR 'PHO ZHING DBUGS PHYI NANG DU RGYU BA CHAD, LCE'I DBANG PO THIM PA'I PHYI RTAGS LA LCE SBOM ZHING THUNG LA LCE'I RTZA BA SNGON POR 'GYUR, RANG RGYUD KYIS BSDUS PA'I RO THIM PA'I PHYI RTAGS SU LCES RO DRUG GANG YANG MI MYONG, SKABS 'DIR LUS DBANG DANG REG BYA YANG THIM DGOS PAS DE THIM PA'I PHYIR RTAGS LA REG BYA 'JAM RTZUB GANG YANG MI MYONG NGO, ,DE RNAMS KYI NANG RTAGS SU MAR ME 'BAR BA LTA BU ZHES BYA BA MAR ME ZAD KAR RTZE MO TA LA LA 'GRO BA LTA BU'I SNANG BA 'BYUNG NGO, ,DE YANG 'BYUNG BA BZHI SNGA MA PHYI MA LA THIM TSUL NI 'BYUNG BA SNGA MAS RANG RANG GI RNAM SHES KYI RTEN BYED PA'I NUS PA NYAMS NAS PHYI MA'I NUS PA GSAL DU SONG BA LA 'BYUNG BA SNGA MA PHYI MA LA THIM ZHES BSHAD PA YIN GYI, 'BYUNG BA SNGA MA ZHIG PHYI MA'I RANG BZHIN DU SONG BA NI MA YIN TE, SA CHU LA THIM ZHES PAS RLUNG GIS RNAM SHES KYI RTEN BYED PA'I NUS PA NYAMS NAS CHU RLUNG GIS RNAM SHES KYI RTEN BYED PA'I NUS PA GSAL DU SONG BAS NA, SNGA MA'I NUS PA PHYI MA LA 'PHOS PA 'DRA BA ZHIG 'BYUNG BAS SA CHU LA THIM ZHES BSHAD LA, SA RANG DGA' BA ZHIG CHU RANG DGA' BA ZHIG LA THIM PA NI MA YIN NO, ,DES GZHAN RNAMS LA'ANG RIGS 'DRE'O, , 'BYUNG BZHI THIM RJES SU RANG BZHIN BRGYAD CU'I RTOG PA'I SEMS, SNANG BA DKAR LAM PA'I SEMS, MCHED PA DMAR LAM PA'I SEMS, NYER THOB NAG LAM PA'I SEMS, 'CHI BA 'OD GSAL GYI SEMS TE RNAM SHES KYI PHUNG PO'I RIGS KYI CHOS LNGA PO 'DI RNAMS RIM CAN DU 'CHAR (6)DGOS SO, RANG BZHIN BRGYAD CU'I RTOG PA'I SEMS DANG, DE'I BZHON PAR GYUR PA'I RLUNG GNYIS SNANG BA DKAR LAM PA'I SNGA ROL TU THIM DGOS TE, DE DANG SNANG BA'I SEMS GNYIS 'DZIN STANGS MI MTHUN ZHING PHRA RAGS KYI KHYAD PAR CHE BAS SNANG BA RANG DUS SU DE 'DRA'I BLO RAGS PA MED PA'I PHYIR, DES NA RANG BZHIN BRGYAD CU'I KUN RTOG BZHON PA'I RLUNG DANG BCAS PA SNANG BA LA THIM PA'I RTZOM PA'I TSE MAR ME 'BAR BA LTA BU'I SNANG BA 'BYUNG, DE SNANG BA LA THIM PA'I SNANG BA RANG DUS KYI RTAGS NI STON GYI NAM MKHA' GA-YA' DAG PA'I TSE MTSAN MO ZLA BA SHAR BA'I 'OD KYIS KHYAB PA'I NAM MKHA' LTA BU SHIN TU DVANGS SHING STONG SANG NGE BA LA 'OD KYI SNANG BA DKAR PO'I RNAM PA ZHIG 'CHAR LA, DE LTAR 'CHAR BA'I RKYEN NI, SNYING GA YAN CHAD KYI RO RKYANG GI RLUNG THAMS CAD DBU MA'I YAR SNA NAS ZHUGS PA'I STOBS KYIS SPYI BO'I RTZA MDUD GROL BA'I DBUS NA PHA LAS THOB PA'I THIG LE DKAR PO Hm YIG MGO THUR BSTAN GYI RNAM PAR YOD PA CHU'I RANG BZHIN CAN YIN PAS THUR LA 'ONGS TE, SNYING GA'I RO RKYANG GI MDUD PA DRUG SKOR GYI STENG DU SLEB PA'I BAR LA DE 'DRA'I SNANG BA 'BYUNG BA YIN GYI, PHYI ROL NAS ZLA 'OD SOGS KYI SNANG BA SHAR BA MA YIN NO, ,DE LA SNANG BA DANG STONG PA ZHES BYA'O, ,DE'I RJES SU SNANG BA DANG BZHON PA'I RLUNG DANG BCAS PA MCHED PA LA THIM NAS MCHED PA'I SEMS SHAR BA'I TSE STON GNAM GA-YA' DAG PA LA NYI 'OD KYIS KHYAB PA LTA BU SNGAR LAS KYANG CHES DVANGS PA'I STONG SANG NGE BA DMAR PO 'AM DMAR SER GYI SNANG BA 'CHAR LA, DE'I RKYEN NI SNYING GA MAN CHAD KYI RO RKYANG GI RLUNG THAMS CAD DBU MA'I MAR SNA NAS ZHUGS PA'I STOBS KYIS NOR BU'I RTZA 'KHOR GYI MDUD PA DANG LTE BA'I RTZA 'KHOR GYI MDUD PA RNAMS RIM GYIS GROL BAS LTE BA'I RTZA 'KHOR GYI (7)DBUS SU MA LAS THOB PA'I THEG LE DMAR PO AA THUNG SHAD KYI RNAM PAR YOD PA ME'I RANG BZHIN CAN YIN PA YAR 'ONGS TE, SNYING GA'I RO RKYANG GI MDUD PA DRUG SKOR GYI 'OG TU SLEB PA'I BAR LA DE 'DRA'I SNANG BA 'BYUNG BA YIN LA, PHYI ROL NAS NYI 'OD SOGS KYI SNANG BA SHAR BA MA YIN NO, ,DE LA SNANG BA MCHED PA DANG SHIN TU STONG PA ZER RO, ,DE'I RJES SU MCHED PA BZHON PA'I RLUNG DANG BCAS PA NYER THOB PA LA THIM PA'I NYER THOB KYI STOD KYI TSE STON GNAM GA-YA' DAG PA LA MTSAN GYI SMAG 'THUG POS KHYAB PA LTA BU STONG SANG NAG LAM PA'I SNANG BA 'CHAR LA, DE NI DBU MA'I NANG GI YAS RLUNG MAS RLUNG RNAMS SNYING GA'I DBU MA'I NANG DU 'DUS PA'I STOBS KYIS SNYING GA'I RO RKYANG GI MDUD PA DRUG SKOR GROL TE, STENG GI THIG LE DKAR PO MAR BAB, 'OG GI THIG LE DMAR PO YAR 'ONGS TE, SNYING GA'I DH'U T'I'I DBUS NA MI SHIGS PA'I THIG LE DKAR DMAR GA'U KHA SBYAR GYI TSUL DU YOD PA'I DBUS SU CHUD NAS PHRAD PA'I RKYEN GYIS DE 'DRA'I SNANG BA BYUNG BA YIN GYI, PHYI ROL NAS MUN PA SOGS KYI SNANG BA SHAR BA MA YIN NO, ,DE LA NYER THOB DANG STONG PA CHEN PO ZHES BYA'O, ,DE YANG NYER THOB KYI STOD YUL SNANG DANG BCAS PA SKYE LA, NYER THOB KYI SMAD LA YUL SNANG GANG YANG MI DRAN PAR DRAN MED DU BRGYAL BA LTAR NAG 'THOMS KYIS 'GRO ,DE NAS SHIN TU PHRA BA'I RLUNG SEMS LAS GLO BUR DU BYUNG BA'I RLUNG SEMS MTHA' DAG 'GAGS TE, DANG PO NAS GZHI LA YOD PA'I SHIN TU PHRA BA'I RLUNG SEMS KYI DRAN PA MA GSOS PA'I BAR DER NYER THOB KYI SMAD DRAN MED DE 'ONG BA YIN LA, DE'I RJES SU SHIN TU PHRA BA'I RLUNG SEMS KYI DRAN PA GSOS TE 'CHI BA 'OD GSAL 'CHAR RO, ,KUN RTOG GA-YO BA DANG THIM PA'I BAR DU 'BYUNG ZHING STON GNAM GA-YA' DAG LA ZLA 'OD KYIS KHYAB PA LTA BU'I STONG SANG DKAR LAM PA'I (8)SNANG BA 'CHAR GYI, DE LAS GZHAN PA'I GNYIS SNANG RAGS PA GZHAN GANG YANG MI 'CHAR BA'I YID KYI SHES PA NI, SNANG BA DKAR LAM PA'I MTSAN NYID DANG, KUN RTOG GA-YO BA DANG THIM PA'I BAR DU 'BYUNG ZHING STON GNAM GA-YA' DAG PA LA NYI 'OD KYIS KHYAB PA LTA BU'I STONG SANG DMAR LAM PA'I SNANG BA 'CHAR GYI, DE LAS GZHAN PA'I GNYIS SNANG RAGS PA GZHAN GANG YANG MI 'CHAR BA'I YID KYI SHES PA NI, SNANG BA MCHED PA'I MTSAN NYID, KUN RTOG GA-YO BA DANG THIM PA'I BAR DU BYUNG ZHING STON GNAM GA-YA' DAG PA LA MTSAMS GYI SMAG 'THUG POS KHYAB PA LTA BU'I STONG SANG NAG LAM PA'I SNANG BA 'CHAR GYI, DE LAS GZHAN PA'I GNYIS SNANG RAGS PA GZHAN GANG YANG MI 'CHAR BA'I YID KYI SHES PA NI, SNANG BA NYER THOB KYI MTSAN NYID, NYER THOB 'OD GSAL LA THIM NAS 'OD GSAL SHAR BA'I TSE NYER THOB KYI SMAD DRAN MED DE SANGS NAS GNYIS SNANG RAGS PA CUNG ZAD KYANG MED PAR STON GYI NAM MKHA' GA-YA' DAG PA LA ZLA 'OD NYI 'OD MUN PA STE SLONG BYED KYI RKYEN GSUM DANG BRAL BA'I THO RANGS KYI NAM MKHA'I RANG MDOG JI LTA BA BZHIN STONG SANG SHIN TU DVANGS PA'I SNANG BA STONG NYID MNGON SUM DU RTOGS PA'I MNYAM GZHAG GI SNANG BA 'DRA BA ZHIG 'CHAR RO, ,DE LTAR 'CHAR BA'I RKYEN YANG THIG LE DKAR DMAR GNYIS MI SHIGS PA'I THIG LE DKAR DMAR LA THIM, DBU MA'I NANG GI RLUNG THAMS CAD KYANG SHIN TU PHRA BA'I SROG 'DZIN GYI RLUNG LA THIM PAS DANG PO NAS GZHI LA YOD PA'I SHIN TU PHRA BA'I RLUNG SEMS MNGON DU GYUR BAS NA DE 'DRA'I SNANG BA SHAR BA YIN GYI, PHYI ROL GYI NAM MKHA'I STONG SANG SNANG BA NI MA YIN NO, ,DE LA 'CHI BA 'OD GSAL DANG THAMS CAD STONG PA ZHES BYA STE, 'CHI BA DNGOS DE DE YIN NO, ,DE NI GZHI'I CHOS SKU DANG, STONG SANG DE LA GZHI'I NGO BO NYID (9)SKU DANG, DE YUL DU BYED PA'I BLO DE LA GZHI'I RTOGS PA YE SHES CHOS KYI SKU ZHES KYANG ZER RO, ,DE LA THA MAL PA'I MI RNAMS ZHAG GSUM GYI BAR DU GNAS LA, DE NAS KHAMS DKAR DMAR GYI RTAGS 'ONG NGO, ,NAD KYIS LUS ZUNGS ZAD DRAG PA LA ZHAG JI TZAM SONG YANG KHAMS DKAR DMAR GYI RTAGS MI 'ONG BA'ANG SRID LA, RNAL 'BYOR PA RTOGS PA MTHO DMA'I DBANG GIS 'OD GSAL DE CHOS SKU DANG BSRES NAS 'JOG PA LA ZHAG GRANGS MANG NYUNG NGES PA MED PAR GSUNGS, SNANG MCHED THOB GSUM 'OD GSAL DANG BCAS PA'I THIM TSUL DE YANG SEMS SNGA MA SNGA MA'I NUS PA 'GAGS NAS PHYI MA PHYI MA GSAL DU SONG BA LA SNGA MA PHYI MA LA THIM ZHES BYA'I, SNGA MA PHYI MA'I RANG BZHIN DU SONG BA NI MA YIN NO, ,STON GYI NAM MKHA' DPER BZUNG BA NI DBYAR DUS KYI CHAR GYIS SA'I RDUL BAR SNANG LA LDANG BA LEGS PAR GNAN PA DANG, SPRIN GYI SGRIB BYED DANG BRAL BA GNYIS TSOGS SHIN TU DVANGS PA MANG DU 'BYUNG BA STON GYI DUS YIN PAS STON GYI NAM MKHA' DPER BZUNG BA DANG, NAM MKHA' DE THOGS BCAS RAGS PA BKAG TZAM GYI STONG SANG YIN PA LTAR STONG PA BZHI YANG YID NGOR KUN RTOG RAGS PA'I SNANG BA LOG NAS STONG SANG GI SNANG BA 'CHAR BA GNYIS SNANG TSUL MTSUNGS PAS DPE DON SBYAR BA YIN GYI, GNAS SKABS DE NA NAM MKHA' SOGS KYI SNANG BA SHAR BA MA YIN NO, ,'O NA SNANG BA'I SNGA ROL TU RANG BZHIN BRGYAD CU BZHON PA'I RLUNG DANG BCAS PA THIM ZIN NA, SNANG MCHED THOB GSUM GYI DUS SU THIM RGYU'I RLUNG MED DAM SNYAM NA, SPYIR RLUNG LA PHRA RAGS MANG DU YOD PA'I RAGS PA RNAMS THIM TSAR YANG PHRA BA YOD DO, ,DE NA RLUNG PHRA BA GCIG PUS SHES PA'I RTEN BYED PA'I DUS NI RLUNG SNANG BA LA THIM PA NAS NYER THOB 'OD GSAL LA THIM PA'I BAR DU YIN NO, ,STONG (10)PA BZHI'I SKABS SU SHES PA SNGA MA SNGA MA YUL SNANG DANG BCAS PA LAS PHYI MA PHYI MA RNAMS YUL SNANG DANG BCAS JI PHRA JI PHRAR SONG BA'I STOBS KYIS YID NGOR KUN RDZOB KYI SNANG BA RAGS PA LOG NAS STONG SANG NGE BA ZHIG SHAR BA YIN GYI STONG NYID YUL DU BYED PA NI MA YIN NO, ,DES NA LAM MA BSGOMS PA'I THA MAL PA LA DE DAG GI SKABS SU BDEN GRUB KHO NA LAS BDEN MED KYI SNANG BA MI 'CHAR TE, SKABS 'DI'I STONG PA BZHI PO SEMS CAN 'CHI TSAD THAMS CAD LA 'CHAR BAS 'CHI BA'I SKABS STONG NYID RTOGS NA 'BAD MED DU GROL BAR THAL BA'I PHYIR RO, ,THA MAL PA RNAMS KYIS 'CHI BA 'OD GSAL DE SNANG LA MA NGES PA'I TSUL GYIS MYONG BA YIN GYI, NGES SHES DANG BCAS TE MYONG BA MIN NO, ,DE NI MA'I 'OD GSAL YIN LA, LAM DUS KYI GNYID DANG SAD PA'I SKABS SU BSGOMS STOBS KYIS SHAR BA'I 'OD GSAL LA BU'I 'OD GSAL ZHES BYA, DE GNYIS 'CHI BA 'OD GSAL GYI DUS SU BSRES NAS BSGOMS PA LA 'OD GSAL MA BU 'DRES PA ZHES ZER RO, ,'O NA 'CHI BA 'OD GSAL DE SPYIR 'OD GSAL MTSAN NYID PA YIN NAM ZHE NA, RNAL 'BYOR PAS 'OD GSAL MA BU BSRES TE LTA THOG TU 'JOG PA NI 'OD GSAL MTSAN NYID PA YIN YANG, DE LTAR MA YI PAR THA MAL PA LA RANG SHUGS KYIS SHAR BA'I 'CHI BA 'OD GSAL NI GNYIS SNANG RAGS PA 'GAGS PA TZAM LA 'OD GSAL ZHES BTAGS PA YIN GYI MTSAN NYID PA NI MIN NO, ,SPYIR 'OD GSAL LA GNYIS LAS, STONG NYID PHRA MO YUL GYI 'OD GSAL DANG, DE RTOGS PA'I YE SHES YUL CAN GYI 'OD GSAL DU 'JOG GO ,'CHI BA'I RIM PA 'DI RNAMS SNGAGS BLA MED KYI BSKYED RDZOGS GNYIS KYI 'CHI BA CHOS SKUR 'KHYER BA'I LAM 'KHYER DANG, DPE DANG DON GYI 'OD (11)GSAL RNAMS KYI SBYANG BA BZHI'I GTZO BO YIN PAS 'DI RNAMS LA GO BA LEGS PAR CHAGS PA SHIN TU GAL CHE'O,, ` GNYIS PA BAR DO 'GRUB PA'I RIM PA BSHAD PA NI, DE LTAR 'CHI BA 'OD GSAL GYI SEMS DE GA-YO MED DU JI TZAM GNAS PA'I MTHAR, DE'I NGANG NAS 'DAR 'PHRIG TZAM GYIS CUNG ZAD GA-YO BA ZHIG 'ONG LA, DE BYUNG BA'I TSE 'OD GSAL LAS LDANG BAR RTZOM PA YIN PAS MTSAMS DE NAS SHIN TU PHRA BA'I RLUNG SEMS DE SNYING GA'I KHAMS DKAR DMAR GYI THIG LE KHA BSHAG GI PHYE BA'I NANG NAS PHYI ROL TU RGYANGS TE THON NAS LUS 'DI BOR TE, BAR DO'I LUS GRUB PA YIN, DE DANG DUS MNYAM DU SNYING GA'I KHAMS DKAR PO THUR DU BABS NAS RTAGS KYI RTZE DANG, DMAR PO GYEN DU SONG NAS STENG GI SNA SGO NAS PHYIR 'BYUNG NGO, DE YANG 'CHI BA 'OD GSAL GYI BZHON PAR GYUR BA'I RLUNG 'OD ZER LNGA PA DES BAR DO'I LUS KYI NYER LEN DANG SEMS KYI LHAN CIG BYED RKYEN BYED LA, 'CHI BA 'OD GSAL GYI SEMS DES BAR DO'I LUS KYI LHAN CIG BYED RKYEN DANG SEMS KYI NYER LEN BYAS PA LA BRTEN NAS, GANG DU SKYE 'GYUR GYI MI'I RNAM PA CAN GYI BAR DO RLUNG GI LUS CAN RNAM SMIN GYI PHUNG PO RNYING PA LAS LOGS SU PHYE BA'I TSUL GYIS DNGOS GNAS LA GRUB PO, DE'I TSE SNANG MCHED THOB GSUM SOGS SNGAR BSHAD PA LAS GO RIM BZLOG STE LUGS LDOG GI NYER THOB NAG LAM PA SHAR BA, 'CHI BA 'OD GSAL 'GAGS PA, BAR DO GRUB PA RNAMS DUS MNYAM YIN TE, MNGON PA GONG 'OG DANG SA SDE SOGS MANG PO NAS 'CHI SRID 'GAGS PA DANG BAR SRID GRUB PA GNYIS SRANG MDA'I MTHO DMAN BZHIN DU DUS MNYAM PAR GSUNGS SHING, BAR SRID PA RDZUS SKYES YIN PAS DBANG PO DANG YAN LAG NYING LAG THAMS CAD (12)CIG CAR DU GRUB PA'I PHYIR RO, ,BAR DO GRUB MA THAG PA'I SEMS NI LUGS LDOG GI NYER THOB YIN LA, DE LAS LUGS LDOG GI MCHED PA DANG, DE LAS SNANG BA DANG, SNANG BA DE LAS RANG BZHIN BRGYAD CU'I KUN RTOG RNAMS SKYES TE BAR DO BA DES SKYE GNAS DANG DRI 'TSOR BA SOGS KYI PHYIR DU MNGON PAR RGYUG PA YIN NO, ,DE DAG GI TSE'ANG SNGAR BSHAD PA'I RIM PA LAS LDOG ,STE NYER THOB NAS SMIG RGYU'I BAR GYI RTAGS RNAMS RIM BZHIN 'BYUNG, SHA KHRAG RDOS BCAS SOGS 'BYUNG LUS RAGS PA SPANGS PA'I RLUNG TZAM LAS GRUB PA'I YID LUS SHIN TU PHRA BA'I BAR DO BA DE LA, GZHI'I LONGS SKU DANG, DRI ZA ZHES BYA'O, ,'O NA DE 'DRA'I BAR DO BA YOD PA'I DPE JI LTA BU YIN ZHE NA, DE LTA RANG CAG RNAMS GNYID DU 'GRO BA NA GNYID KYI SKABS KYI RTAGS BZHI DANG STONG PA BZHI 'CHI DUS DANG 'DRA BA SKYEM TZAM RE SHAR NAS GNYID KYI 'OD GSAL 'CHAR LA, DE LAS LDANG BAR RTZOM PA NA RMI LAM GYI LUS SU LDANG BAR RTZOM ZHING, GNYID KYI 'OD GSAL LAS LANGS PA NA RMI LAM GYI LUS GRUB STE, RMI LAM GYI SKABS KYI BYA BYED SNA TSOGS SHIG BYED CING, GNYID SAD PAR RTZOM PA'I TSE RMI LAM GYI RLUNG LUS DE ME LONG LA HA BTAB PA BZHIN MTHA' NAS YAL TE SNYING GAR 'DUS NAS PHUNG PO RNYING PA'I SNYING GA'I DH'U T'I'I NANG GI SHIN TU PHRA BA'I RLUNG SEMS NGO BO DBYER MED LA THIM NAS GNYID SAD DE, BYA BYED SNA TSOGS LA 'JUG PA BZHIN NO, ,DE LTA BU'I BAR DO'I NGO BO'I KHYAD PAR NI DBANG PO KUN TSANG BA, RDZUS SKYES YIN PAS YAN LAG DANG NYING LAG THAMS CAD CIG CAR DU RDZOGS PA, PHRA BA'I LUS CAN YIN PAS RDO RJE PHA LAM GYIS KYANG GZHIG TU MED PA, MA'I MNGAL LTA BU'I SKYE GNAS MA GTOGS RI RAB SOGS GANG LA'ANG THOGS PA MED PA, LAS KYI RDZU 'PHRUL GYI SHUGS KYIS SKAD CIG (13)LA JI LTAR 'DOD PA BZHIN 'GRO NUS SHING SANGS RGYAS KYIS KYANG DGAG PAR MI NUS PA'O, ,MDZOD LAS, 'GRO BA GANG GI BAR SRID GRUB NA DE LAS 'GRO BA GZHAN DU MI LDOG PAR BSHAD KYANG, KUN BTUS LAS, GANG GI BAR SRID GRUB NA'ANG DER SKYE BA'I NGES PA MED PAR 'GRO BA GZHAN DU LDOG PA YOD PAR GSUNGS, 'ON KYANG MNGON PA GONG 'OG GNYIS GA'I LUGS LA'ANG BAR DO'I RTEN LA DGRA BCOM THOB PA'I BAR 'DA' BA YOD PAS MTHA' GCIG TU SKYE SRID LEN DGOS PAS KHYAB PA KHAS MI LEN NO, ,MING GI RNAM GRANGS NI, YID LAS BYUNG BA DANG, SRID 'TSOL DANG, DRI ZA DANG, SRID PA BAR MA DANG, MNGON PAR 'GRUB PA'I SRID PA ZHES MDZOD LAS BSHAD DO, ,TSE TSAD KYI KHYAD PAR NI RING MTHA' ZHAG BDUN YIN SONG SKYE BA'I RKYEN TSOGS NA BAR SRID GRUB PA'I MDO LA SKYE SRID DU NYING MTSAMS SBYOR BA'ANG YOD PAS NGES PA MED, GAL TE ZHAG BDUN NAS SKYE BA'I RKYEN MA TSOGS NA ZHAG BDUN GYI MTHAR 'CHI CHUNG RE BYAS TE YANG BAR DO DE NYID GRUB STE GNAS SO, ,DE LTAR BYAS TE ZHAG BDUN PHRAG BDUN 'DAS PA NA NGES PAR SKYE BA'I RKYEN TSOGS TE SKYE SRID LEN PAS KHYAB PAR SA'I DNGOS GZHIR GSUNGS SO, ,ZHAG BDUN GYI MTHAR 'CHI CHUNG RE BYED TSUL NI, BAR DO'I RLUNG LUS DE ME LONG LA HA BTAB PA MTHA' NAS SDUD PA BZHIN STON SMAD NAS RIM GYIS SNYING GAR 'DUS TE BAR DO'I GNAS SKABS KYI RANG BZHIN BRGYAD CU'I RTOG PA BZHON PA'I RLUNG DANG BCAS PA THIMS NAS, BAR DO 'CHI BA'I RTAGS BZHI DANG STONG PA BZHI SKYEM TZAM RE MYUR BA'I TSUL GYIS SHAR NAS BAR DO SHI BA'I 'OD GSAL MNGON DU BYAS, DE NAS 'OD GSAL DE'I BZHON PA'I RLUNG GIS NYER LEN BYAS NAS LUGS LDOG TU LANGS PA'I NYER THOB GRUB PA DANG DUS MNYAM DU BAR DO'I RLUNG LUS SNGAR BZHIN GRUB PA YIN NO, ,BAR DO'I RTEN LA 'CHI CHUNG JI TZAM BYAS KYANG BAR SRID RANG LA BSDU LA, BAR DO BA DES RANG GI SNGA MA'I LUS RTEN MTHONG YANG LAS KYI 'BREL PA CHAD (14)PA'I STOBS KYIS LUS RTEN RNYING PA DE NGA'I LUS YIN SNYAM PA DANG DE LA 'JUG 'DOD KYI BLO MI SKYE BAR SA'I DNGOS GZHI LAS GSUNGS, KHA CIG ,BAR DO'I TSE TSAD ZHAG BDUN DU GSUNGS PA DE RIGS DRUG RANG RANG GI ZHAG GI DBANG DU BYAS PA YIN ZER BA MI 'THAD DE, DE LTAR NA DMYAL BA PA DANG KHAMS GONG MA'I LHA RNAMS KYI BAR DO LA 'GRO BA DE DANG DE'I ZHAG BDUN SOGS KYI BAR DU GNAS PA ZHIG YOD DGOS PAS LO BYE BA PHRAG SHIN TU MANG PO'I BAR DU YANG SKYE BA'I RKYEN MI TSOGS PAR BAR DOR GNAS PA ZHIG KHAS LEN DGOS PAS THAL CHE BAR 'GYUR BA'I PHYIR RO, ,SRID PAR 'PHO TSUL GYI KHYAD PAR NI, DMYAL BAR SKYE NA BSHANG LAM NAS 'PHO LA, YI DVAGS SU SKYE NA KHA DANG, DUD 'GROR SKYE NA DRI CHU'I LAM DANG, MIR SKYE NA MIG DANG, 'DOD LHAR SKYE NA LTE BA, GNOD SBYIN DU SKYE NA SNA, GRUB PA'I LHA DANG MI'AM CIG SKYE NA RNA BA, GZUGS KHAMS SU SKYE NA SMIN MTSAMS KYI DBUS, GZUGS MED DU SKYE NA SPYI BO NAS 'PHO BAR RGYUD RTAG PA BRGYAD PA SOGS LAS BSHAD, 'O NA, SA SDE SOGS SU LUS 'DOR BA NA SNYING GA NAS RNAM SHES 'PHO BAR BSHAD PA DANG 'GAL LO ZHE NA, MI 'GAL TE LUS KYI NANG DU RNAM SHES 'PHO BA NA THOG MAR SNYING GA NAS 'PHO BA YIN YANG, DE NAS LUS KYI PHYI ROL TU 'PHO BA NA SGO SO SO NAS 'PHO BAR BSHAD PA BZHIN YIN PA'I PHYIR, YANG MDZOD LAS, RIM GYIS 'CHI NA RKANG PA DANG, LTE BA SNYING GAR YID 'CHI 'PHO, ZHES DANG, 'GREL PAR NGAN SONG DU SKYE NA RKANG PA DANG, MIR SKYE NA LTE BA DANG, LHAR SKYE BA DANG DGRA BCOM PA 'CHI NA SNYING GAR RNAM SHES 'GAG GO , ZHES GSUNGS PA JI LTAR YIN SNYAN NA, DE NI GNAS DE DAG TU YID 'GAG PA'I DON DU 'GREL PA LAS BSHAD PA LTAR, RKANG PA LA SOGS PA'I GNAS DE DAG TU LUS DBANG 'GAGS PA'I STOBS KYIS YID KYI RNAM SHES 'GAG TSUL SO SO BA STON PA TZAM YIN GYI, GNAS DE DAG NAS RNAM SHES PHYI (15)ROL TU 'PHO BAR STON PA MA YIN PAS SNGAR BSHAD PA DANG 'GAL BA MED DO, ,MTHONG TSUL GYI KHYAD PAR NI, BAR DO RIGS MTHUN DANG LHA'I MIG RNAM PAR DAG PAS MTHONG BAR MDZOD LAS BSHAD, DE LA LHA'I MIG SKYES STOBS KYIS THOB PA NI MA DAG PA DANG, BSGOMS STOBS KYIS THOB PA NI LHA'I MIG DAG PA LA 'JOG GO ,BAR DO GONG MA GONG MAS 'OG MA 'OG MA MTHONG BA'I LUGS KYANG MDZOD 'GREL LAS BSHAD, BONG TSOD KYI KHYAD PAR NI, 'DZAM BU GLING PA'I ME'I BAR DO BYIS PA LO LNGA 'AM DRUG LON PA LTA BUR MDZOD 'GREL DU BSHAD KYANG MTHA' GCIG TU NGES PA CAN MA GSUNGS SO, ,RNAM PA'I KHYAD PAR NI, NGAN 'GRO'I BAR DO PHYAR BA NAG PO BRKYANGS PA 'AM MTSAN MO MUN NAG GIS KHYAB PA LTA BU DANG, BDE 'GRO'I BAR SRID SNAM BU DKAR PO BRKYANGS PA 'AM MTSAN MO ZLA 'OD KYIS KHYAB PA LTA BU'I NYAMS 'BYUNG BAR SA'I DNGOS GZHIR GSUNGS, KHA DOG GI KHYAD PAR NI, DMYAL BA'I BAR DO SDONG DUM MES TSIG PA LTA BU DANG, YI DVAGS KYI BAR DO CHU LTA BU, DUD 'GRO'I BAR DO DU BA LTA BU, 'DON PA'I LHA MI'I BAR DO GSER LTA BU, GZUGS KHAMS PA'I BAR DO DKAR POR MNGAL 'JUG GI MDO LAS BSHAD, BYAD GZUGS KYI KHYAD PAR NI, GANG DU SKYE 'GYUR GYI 'GRO BA DE'I SNGON DUS KYI SRID PA'I SHA TSUGS CAN NAM LUS DBYIBS CAN YIN PAR MDZOD LAS GSUNGS SHING, SRID PA BZHI NI, SKYE SRID DU NYING MTSAMS SBYAR BA'I SKAD CIG DANG PO SKYE SRID DANG, DE'I SKAD CIG GNYIS PA NAS 'CHI SRID MA GRUB PA'I BAR GYI SRID PA NI SNGON DUS KYI SRID PA DANG, 'CHI BA'I SKAD CIG THA MA 'AM 'CHI BA 'OD GSAL NYAMS SU MYONG BA'I DUS KYI SRID PA NI 'CHI SRID DANG, 'CHI SRID DANG SKYE SRID GNYIS KYI BAR DU BYUNG BA'I SRID PA NI BAR SRID DO, SNGON DUS KYI SRID PA ZHES PA'I TSIG TZAM LA 'KHRUL NAS BAR DO BA DE SKYE BA SNGA MA'I LUS (16)KYI RNAM PA CAN DU 'DOD PA DANG, YANG PHYI MA'I LUS KYI DBYIBS CAN DU BSHAD PA MTHONG NAS ZHAG PHYED DANG BZHI SKYE BA SNGA MA DANG, PHYED DANG BZHI SKYE BA PHYI MA'I LUS KYI RNAM PA CAN DU 'DOD PA NI KHUNGS RNAM DAG GANG YANG MED PA'I SGRO BTAGS KHO NAR LAM RIM CHEN MOR GSUNGS, DES NA SNGON DUS KYI SRID PA ZHES PA'I SNGON NI TSE PHYI MA'I 'CHI SRID LA LTOS PA'I SNGON YIN GYI BAR DOR LTOS PA'I SNGON DU 'JOG PA MA YIN NO, ,MDZOD LAS KYANG, SNGON DUS SRID 'BYUNG SHA TSUGS CAN, ZHES PA'I 'BYUNG ZHES PA NI MA 'ONGS PA'I TSIG YIN GYI 'DAS TSIG MA YIN PA'I PHYIR RO, ,YANG GANG DU SKYE 'GYUR GYI SEMS CAN DE'I RNAM PA CAN DU BSHAD PA LA, 'GAL ZHIG GIS DE LTAR NA DBANG PO MA TSANG BA'I 'GRO BA DE'I BAR DO BA YANG DBANG PO MA TSANG BAR SMRA BA NI CHES MI 'THAD DE, SKYE GNAS SU SKYE BA'I 'OG TU MIG SOGS DBANG PO MA TSANG BA 'BYUNG GI BAR DO LA DBANG PO MA TSANG BA GANG NAS KYANG MA BSHAD PA'I PHYIR DANG, RANG NYID GANG DU SKYE 'GYUR GYI 'GRO BA'I RNAM PA CAN DU BSHAD PA TZAM GYIS CHA KUN NAS 'DRA DGOS NA HA CANG THAL CHE BAR 'GYUR RO, ,BAR DO'I 'GRO TSUL GYI KHYAD PAR NI, LHA'I BAR DO GYEN DANG, MI'I BAR DO THAD KA DANG, NGAN 'GRO'I BAR DO SPYI BO THUR DU TSUGS NAS 'GRO BAR SA'I DNGOS GZHI LAS GSUNGS, DE YANG 'DOD GZUGS GNYIS SU SKYE BA LA BAR DO BRGYUD DGOS PAS YAR GYI MTSAMS MED KYI LAS DANG MAR GYI MTSAMS MED GNYIS LA BAR DO MED PAR 'DOD PA MI 'THAD PAR LAM RIM CHEN MOR GSUNGS LA, GZUGS MED DU SKYE BA LA BAR DO MED DE GANG DU SHI 'PHOS PA'I GNAS DE NYID DU GZUGS MED KYI MING GZHI'I PHUNG PO GRUB BO, ,DES NA GZUGS MED KHAMS SU SKYE 'GYUR GYI GANG ZAG DES 'CHI BA 'OD GSAL GYI NGANG NAS GZUGS MED KYI TING NGE 'DZIN MNGON DU BYED KYI (17)'CHI BA 'OD GSAL LAS LUGS LDOG TU LANGS PA'I NYER THOB KYI SEMS MI 'CHAR TE, DE 'DRA'I NYER THOB KYI SEMS NI BAR DO'I SEMS YIN PAR PHYIR RO, GZUGS MED LA 'DOD GZUGS GNYIS LAS GZHAN DU GNAS LOGS SU MED DO, ,BAR DO KHYAD PAR BA SKYE BA GCIG GIS THOGS PA'I BYANG SEMS DGA' LDAN NAS 'PHOS NAS YUM GYI LHUMS SU 'JUG PA'I BOR DO DE, GZHON NU MTSAN DPES BRGYAN PA, 'OD KYIS GLING BZHI BYE BA PHRAG BRGYA GSAL BAR BYED PAR MDZOD 'GREL DANG RNAM GZHAG RIM PAR GSUNGS LA, 'O NA BTZUN PA CHOS LDAN RAB 'BYOR GYIS, GLANG PO CHE DKAR PO MCHE BA DAG LDAN GYI RNAM PAS LHUMS SU ZHUGS PAR BSHAD PA DANG 'GAL LO ZHE NA, DES BSHAD PA LTAR KHAS LEN DGOS PA'ANG MIN LA, 'ON KYANG DE NI YUM GYI RMI LAM DANG MTHUN PAR BSTAN PA TZAM YIN GYI, MIR SKYE 'GYUR GYI BAR DO DUD 'GRO'I RNAM PA CAN 'DOD NA BSTAN BCOS TSAD LDAN MANG PO DANG 'GAL BA'I PHYIR, DE NI THEG DMAN GYI LUGS LA SGRA JI BZHI PA DANG, THEG CHEN GYI LUGS LA TSUL BSTAN TZAM DU KHAS LEN NO, ,BAR DO'I RNAM GZHAG 'DI DAG BLA MED KYI BSKYED RIM GYI BAR DO LONGS SKUR 'KHYER BA'I LAM 'KHYER DANG, DAG MA DAG GI SGYU LUS KYI SBYANG GZHI YIN PAS ZHIB TU SHES PA GAL CHE'O,, ` GSUM PA DES SKYE GNAS SU SKYE BA LEN PA'I TSUL NI, DE YANG BAR DO BA DES MA'I MNGAL DU SKYE BA YIN PA LA, GNAS GSUM MNGON DU GYUR CING NYES PA GSUM DANG ? 'DI DAG DGOS TE, MA NANG MED CING ZLA MTSAN GYI KHRAG DANG LDAN PA'I SKABS YIN PA, DRI ZA NYE BAR 'KHOR ZHING 'JUG 'DOD PA, PHO MO GNYIS PHAN TSUN CHAGS SHING PHRAD PA STE GNAS GSUM MNGON DU GYUR MA DANG, MA'I MNGAL PHYE DBU NAS KYI DBYIBS DANG 'BRAS ? DANG, SROG MO NI ? ZHED PA DANG, RNGA MOR GI RI ? LTA (18)BU DANG, RLUNG MKHRIS BAD KAN GSUM GYIS BKAG PA STE MNGAL GYI NYES PA DANG, PHA MA GNYIS GANG RUNG LAS KHU KHRAG MA BYUNG BA 'AM BYUNG YANG SNGA PHYIR 'BAB PA DANG, DUS MNYAM DU BABS KYANG GANG RUNG ZHIG RUL PA STE SA BON GYI NYES PA DANG, DRI ZA DE PHO MO GNYIS KYI BUR SKYE BA'I LAS MA BSAGS PA 'AM, PHO MO GNYIS DE'I PHA MAR 'GYUR BA'I LAS MA BSAGS PA LAS KYI NYES PA STE NYES PA GSUM DANG BRAL BA DGOS PA MANG LA 'JUG GI MDO LAS GSUNGS LA, 'DUL BA LUNG LAS GNAS DRUG MNGON DU 'GYUR DGOS PAR GSUNGS PA DON 'DRA'O, DE LTAR MNGAL DU SKYE BA LEN PA'I MTHUN RKYEN GSUM TSANG ZHING 'GAL RKYEN GSUM DANG BRAL BA NI DRI ZA DES PHA MA GNYIS NYAL PO BYED PA SGYU MA BZHIN DU MTHONG STE 'KHRIG PA SPYOD 'DOD PA'I DBANG GIS PHOR SKYE NA MA LA CHAGS SHING PHA LA 'BRAL 'DOD PA DANG, MOR SKYE NA PHA LA CHAGS SHING MA LA 'BRAL 'DOD SKYE LA, DE NAS GANG LA CHAGS PA DE LA 'KHYUD PAR RTZOM PA NA, LAS KYI DBANG GIS LUS GZHAN GANG YANG MI SNANG BAR PHO MO GANG YIN DE'I MTSAN MA TZAM SNANG BAS KHONG KHRO SKYES TE CHAGS SDANG GNYIS KYIS 'CHI RKYEN BYAS NAS MNGAL DU 'JUG GO ,DRI ZA DES PHA MA NYAL PO BYED PA MED BZHIN DU KHU KHRAG LA 'KHRUL NAS NYAL PO BYED PA MTHONG BAR SA MANG PO LAS GSUNGS SHING, MDZOD 'GREL DU PHA MA NYAL PO BYED PA MTHONG BAR YANG BSHAD DO, ,DE YANG PHO MO GNYIS SNYOMS 'JUG BYAS PA NA DBANG PO GNYIS BSRUBS PA'I STOBS KYIS THUR SEL GYI RLUNG GYEN DU GA-YOS TE SUM MDO'I GTUM MO PHAL PA RNAMS SBAR BA'I DROD KYIS THIG LE DKAR DMAR ZHU BA RNAMS RTZA STONG PHRAG BDUN CU RTZA GNYIS KYI SBUBS STONG RNAMS NAS BABS PAS LUS SEMS BDE BAS TSIM ZHING SKABS DER CHAGS PA DRAG PO'I SKABS SU BABS PA NA, 'JUG TU KHU (19)BA SKA BA RE 'BYUNG LA, DE'I RJES SU PHA MA GNYIS KA LAS KHU KHRAG GI THIG PA RE NGE PAR 'BYUNG BA DE MA'I SKYE GNAS SU 'DRES NAS 'O MA SKOL BA'I SPRIS MA CHAGS PA LTAR YOD PA'I DBUS SU BAR DO SHI BA'I RNAM SHES 'JUG LA, DE'I TSUL NI THOG MAR BAR DO PHA'I KHA 'AM SPYI BO DANG MA'I SKYE GNAS KYI SGO GSUM PO GANG RUNG NAS ZHUGS, RTZA STONG PHRAG BDUN CU DON GNYIS KYI NANG NAS BABS PA'I THIG LE DANG 'GROGS TE BAR DO'I GNAS SKABS KYI KUN RTOG GA-YO BA'I RLUNG RNAMS THIMS NAS SNANG MCHED THOB GSUM RIM BZHIN SHAR, BAR DO 'CHI BA'I 'OD GSAL RNAMS SNGAR LUS RAGS PA 'DOR BA'I SKABS SU BSHAD PA LAS YUN THUNG BA SKYEM TZAM RE MYUR BA'I TSUL GYIS 'CHAR LA, DE'I TSE SMIG RGYU NAS 'OD GSAL GYI BAR GYI RTAGS RNAMS 'BYUNG ZHING 'OD GSAL DE'I RIGS 'DRA PHYI MA ZHIG GIS KHU KHRAG 'DRES PA'I DBUS SU NYING MTSAMS SBYAR NAS SKYE BA BLANGS PA DANG LUGS LDOG GI NYER THOB GRUB PA DUS MNYAM, NYER THOB KYI SEMS SKAD CIG DANG PO DE NI SKYE BA'I SRID PA ZHES THA SNYAD 'DOGS PA'I GZHI DANG, SKYE GNAS SU DANG POR NYING MTSAMS SBYAR BA'I SEMS YIN LA, DE LAS NYER THOB SKAD CIG GNYIS PA MAN DANG, DE LAS MCHED PA DANG, DE LAS SNANG BA DANG, SNANG BA LAS RANG BZHIN BRGYAD CU'I KUN RTOG RNAMS BZHON PA'I RLUNG DANG BCAS PA SKYE ZHING, SNANG BA'I BZHON PA'I RLUNG LAS RNAM SHES KYI RTEN BYED PA'I NUS PA KHYAD PAR CAN DU GYUR PA'I RLUNG STE, DE LAS DE 'DRA'I NUS PA KHYAD PAR CAN DU GYUR PA'I ME'I KHAMS DANG, DE LAS DE 'DRA'I NUS PA KHYAD PAR CAN DU GYUR PA'I CHU'I KHAMS, DE LAS DE 'DRA'I NUS PA CAN GYI SA'I KHAMS RNAMS RIM GYIS SKYE'O, ,BAR DO SGO GANG NAS MNGAL DU 'JUG PA NI, RNAM BZHAG RIM PAR RNAM SNANG GI SGO SPYI BO NAS 'JUG PAR BSHAD LA, SDOM (20)'BYUNG DANG RDO RJE PHRENG BA GNYIS SU PHA'I KHA NAS 'JUG PAR BSHAD PAS NA, THOG MAR BAR DO PHA'I KHA 'AM SPYI BO NAS ZHUGS TE PHA'I GSANG GNAS NAS THON, MA'I PADMAR ZHUGS NAS MNGAL DU KHU KHRAG GI DBUS SU BAR DO SHI BA'I RNAM SHES NYING MTSAMS SBYOR BA YIN NO, , MDZOD 'GREL LAS, MA'I SKYE GNAS KYI SGO NAS 'JUG PAR BSHAD PAS, DE LTAR NA MA'I SKYE GNAS KYI SGO DANG, PHA'I KHA DANG SPYI BO STE MNGAL DU 'JUG PA'I SGO GSUM YOD PAR SHES PAR BYA'O, ,'DI NI MNGAL SKYES KYI MI'I BAR SRID 'JUG PA'I DBANG DU BYAS KYI, SPYIR BAR SRID PA THOGS MED YIN PAS, 'JUG PA'I SGO LA BU GA MI DGOS TE, LCAGS KYI THO LUM BSHAGS PA'I NANG NAS SRIN BU 'BYUNG BAR GRAG GO ,ZHES MDZOD 'GREL LAS BSHAD PA DANG, SHIN TU SRA BA'I BRAG DANG RDO RIL SER KHA MED PA'I NANG DU'ANG SEMS CAN YOD PA'I PHYIR, MNGAL DU LUS RIM GYIS 'PHEL TSUL NI, MNGAL DE NI MA'I PHO BA'I 'OG LONG GA'I STENG GI BAR DER YOD PAR MNGAL 'JUG LAS BSHAD DO, ,DE LA DANG POR MER MER PO NI, PHYI 'O MA SKOL BA'I SPRIS MA LTA BUS GA-YOGS PA LA NANG SHIN TU SLA BA'O, ,DE NAS BZUNG STE PHUNG PO RAGS PA GRUB PA YIN PAS 'CHI BA LA THUG GI BAR GYI LUS PHRA RAGS RNAMS 'BYUNG BA BZHI'I KHAMS LAS GRUB PA YIN PAS, SA RLUNG GIS 'DZIN PAR BYED, CHU RLUNG GIS SDUD PAR BYED, ME RLUNG GIS MA RUL CING SMIN PAR BYED, RLUNG RLUNG GIS RGYAS PAR BYED DO, ,MER MER POR ZHAG BDUN SONG BA NA RLUNG GSAR BA SKYES STE RLUNG GIS SMIN PAR BYAS PA LAS LTAR LTAR PO NI PHYI NANG GNYIS KA ZHO LTAR SKA LA SHAR MA GYUR BA'O, ,DE ZHAG BDUN SONG BA NA DE LAS YANG RLUNG GSAR PA SKYES STE SMIN PAR BYAS PA LAS GOR GOR PO NI SHAR NI GYUR LA MNAN MI BZOD PA'O, ,DE ZHAG BDUN SONG BA NA RLUNG GSAR BAS SMIN PAR (21)BYAS PA LA MKHRANG 'GYUR DU GYUR PA NI SHA SKA ZHING MNAN BJOD PA'O, ,DE ZHAG BDUN SONG BA NA YANG RLUNG GSAR PAS SMIN PAR BYAS PA LAS RKANG LAG 'GYUS PA NI BRLA GNYIS DANG DBANG PO GNYIS MGO BO'I MTSAN MA STE 'BUR PO GSAL BAR DOD PA STE MNGAL GYI GNAS SKABS SNGAR RNAM GZHAG RIM PAR GSUNGS LA, MDZOD 'GREL DANG, LUNG GI MNGAL 'JUG LAS, NUR NUR PO DANG, MER MER PO DANG, PHYI MA GSUM SNGAR BZHIN DU BSHAD CING, SA'I DNGOS GZHI LAS DE GNYIS LDOG STE BSHAD KYANG MIR 'DOGS KYI RIM PA MI 'DRA BA TZAM MA GTOGS DON LA 'GAL BA MED PAR GSUNGS, BDUN PHRAG BZHI PA'I KHONGS SU THIG LE DKAR DMAR RNAMS DVANGS SNYIGS PHYE NAS, DKAR PO LAS NANG DU KHU BA RKANG RUS PA STE PHA LAS THOB PA'I RDZAS GSUM DANG, THIG LE DMAR PO LAS PHYI RU SHA PAGS PA KHRAG STE MA LAS THOB PA'I RDZAS GSUM 'BYUNG, RNAM SHES THOG MAR GANG DU ZHUGS PA'I KHU KHRAG GI GNAS DE PHYIS SNYING GAR 'GYUR BA'I DER SHIN TU PHRA BA'I RLUNG SEMS GNYIS DANG, KHU KHRAG GI DVANGS MA GNYIS TE BZHI 'DUS PA'I GONG BU YUNGS DKAR SBOM PO'I TSAD TZAM PA DE'I DBUS SU 'THUMS NAS RTZA DBU MA DANG, GA-YAS GA-YON DU RTZA RO RKYANG GNYIS KYIS DBU MA LA LAN GSUM GSUM GYIS DKRIS MA CHAGS, DE NAS GYEN RGYU'I RLUNG YAR SKYE, THUR SEL GYI RLUNG MAR SONG BA'I STOBS KYIS RO RKYANG DBU MA GSUM YAR MAR DU GYES TE, MGO 'JUG GNYIS PHRA LA DBUS SBOM PA NYA'I DBYIBS LTA BU 'BYUNG, DE NAS RIM GYIS 'BUR BU LNGA DANG, DE RJES YAN LAG LNGA DANG, DE'I 'OG TU SKRA DANG SEN MO DANG BA SPU LA SOGS PA DANG DBANG PO GZUGS CAN PA RNAMS DANG, PHO MO'I MTSAN MA DANG, KHA NAS RGYU BA'I DBUGS RLUNG DANG, BYED PA LCE RKAN LA SOGS PA'I NGAG GI GNAS BRGYAD, YID SHES YUL LA GA-YO BA'I DRAN PA RDZOGS LA RNAMS RIM (22)BZHIN 'BYUNG BAR 'GYUR RO, ,DE LTAR MNGAL CHAGS NAS BU YIN NA MA'I GLO GA-YAS SU KHA RGYAB NGOS SGAL GZHUNG LA PHYOGS TE TZOG BU DANG, BU MO YIN NA MA'I GLO GA-YON DU KHA MDUN NGOS SU PHYOGS TE TZOG BUR GNAS, MNGAL DU YUN TSAD KYANG DGA' BO MNGAL 'JUG GI MDO LAS, ZHAG BDUN PHRAG SO BRGYAD RDZOGS NAS BTZA' BAR GSUNGS PAS, ZHAG NYIS BRGYA RE DRUG DANG, SA'I DNGOS GZHIR DE'I STENG DU ZHAG BZHI BSNAN NAS ZHAG NYES BRGYA BDUN CU RDZOGS NAS BTZA' BAR GSUNGS, SDOM 'BYUNG LAS ZLA BA BCU PA LA PHYIR 'BYUNG BA'I SEMS DANG LDAN PAR GSUNGS TE, DE GSUM GA ZLA BA RIL PO DGU DANG NGO BCUR BYED PA LA MTHUN TE, MNGAL 'JUG DANG SA'I DNGOS GZHI LAS GSUNGS PA'I ZHAG NI NYIN ZHAG DANG ZLA BA NI TSES ZLA'I DBANG DU BYED DO, ,DE YANG BDUN PHRAG SO LNGA PA LA PHUNG KHAMS SKYE MCHED YAN LAG DANG NYING LAG ,SKRA SEN SOGS LUS DANG, NGAG SMRA BA'I GNAS LCE RKAN DANG, YID SHES YUL LA 'JUG PA'I DRAN PA RNAMS RDZOGS TE BDUN PHRAG SO DRUG PA LA MNGAL DU MI DGA' ZHING PHYIR 'BYUNG 'DOD SKYE, SO BDUN PA LA MNGAL DU DRING BA DANG MI GTZANG BA'I 'DU SHES SKYE, MTHAR NYIN ZHAG BDUN PHRAG SO BRGYAD PA LA SNGON GYI LAS LAS SKYES PA'I YAN LAG CES BYA BA'I RLUNG LANGS NAS MNGAL GYI SEMS CAN DE'I LUS MGO MJUG BSGYUR TE, LAG PA GNYIS BCUM STE MA'I RUM NAS MNGAL GYI SGOR PHYOGS PAR BYED DO, ,DE NAS YANG SNGON GYI LAS LAS SKYES PA'I KHA THUR DU LTA BA ZHES BYA BA'I RLUNG LANGS NAS, MNGAL GYI SEMS CAN MGO THUR DANG RKANG PA GYEN DU BSTAN PA DRI CHU'I LAM DU 'PHUL PAR BYED DE BDUN PHRAG SO BRGYAD PA'I MTHAR PHYIR THON NAS THA MAL PA'I MIG LAM DU GYUR TE, BYIS PA, GZHON NU, DAR BAB, DAR YOL, RGAS PA STE BCOS PA'I GNAS SKABS LNGA PO RIM GYIS 'BYUNG BA YIN NO, ,DE YANG RTZA RLUNG THIG LE CHAGS TSUL (23)NI, THOG MAR SNYING GA'I RO RKYANG DBU MA GSUM DANG, SHAR GYI SUM SKOR MA, LHO'I 'DOD MA STE RTZA LNGA DUS MNYAM DU CHAGS, DE RJES DBU MA DANG LHAN CIG TU GNAS PA'I 'DUD BRAL MA DANG, NUB KYI KHYIM MA, BYANG GI GTUM MO GSUM DUS MNYAM DU CHAGS PA LA SNYING GAR THOG MAR CHAGS PA'I RTZA BRGYAD CES BYA'O, ,DE NAS PHYOGS KYI RTZA BZHI LAS GNYIS GNYIS SU GYES TE MTSAMS KYI RTZA 'DAB BZHI DANG, SNYING GA'I RTZA 'DAB BRGYAD KYI RGYUN GSUM GSUM DU GYES NAS GNAS NYER BZHI'I RTZA NYER BZHI CHAGS, NYER BZHI PO RE RE LAS GSUM GSUM DU GYES PAS BDUN CU RTZA GNYIS DANG, DE RE RE LAS STONG STONG DU GYES TE LUS LA RTZA BDUN KHRI NYIS STONG CHAGS PA YIN NO, ,RLUNG CHAGS TSUL NI, DANG POR MNGAL DU NYING MTSAMS SBYAR NAS ZLA BA DANG PO LA SROG 'DZIN GYI RLUNG PHRA BA LAS SROG 'DZIN RAGS PA SKYE, DE'I TSE SEMS CAN DE'I LUS KYI DBYIBS NYA'I RNAM PA LTA BUR YOD, ZLA BA GNYIS PA LA SROG 'DZIN GYI RLUNG DE LAS THUR SEL SKYE, DE'I TSE SEMS CAN DE'I LUS 'BUR PO LNGA 'DOD PA RUS SBAL LTA BUR YOD, ZLA BA GSUM PA LA THUR SEL LAS MNYAM GNAS SKYE, DE'I TSE SEMS CAN DE'I LUS STOD CUNG ZAD SGRUR BA PHAG RGOD KYI RNAM PAR YOD, ZLA BA BZHI PA LA MNYAM GNAS LAS GYEN RGYU SKYE, DE'I TSE LUS STOD CUNG ZAD RGYAS PA SENG GE'I RNAM PAR YOD, ZLA BA LNGA PA LA GYEN RGYU LAS KHYAB BYED SKYE, DE'I TSE SEMS CAN DE'I LUS MI'U THUNG GI DBYIBS SU YOD PAR BSHAD, ZLA BA DRUG PA LA MIG GI SGOR RGYU BA'I RLUNG RGYU BA ZHES BYA BA DANG, 'BYUNG BAS SKYE, ZLA BA BDUN PA LA RNA BA'I SGOR RGYU BA'I RNAM PAR RGYU BA DANG 'BYUNG BA CHU SKYE, ZLA BA BRGYAD PA LA SNA'I SGOR RGYU BA'I RLUNG YAN DAG PAR RGYU BA DANG 'BYUNG BA ME SKYE, ZLA BA DGU PA LA LCE'I SGOR RGYU BA'I RLUNG RAB TU RGYU BA DANG 'BYUNG BA RLUNG SKYE, ZLA BA BCU PA LA LUS KYI SGOR (24)RGYU BA'I RLUNG NGES PAR RGYU BA ZHES BYA BA DANG 'BYUNG BA NAM MKHA'I KHAMS SKYE, DE'I TSE LUS KYI SBUBS STONG RNAMS 'BYUNG NGO, ,MNGAL DU RLUNG BCU CHAGS KYANG DER SNA SGO NAS 'BYUNG 'JUG MI BYED LA, PHYIR BTZAS MA THAG TU SNA SGO NAS 'BYUNG 'JUG BYED PAR GSUNGS SO, , THIG LE CHAGS TSUL NI, KHAMS DKAR DMAR GYI DVANGS MA DANG SHIN TU PHRA BA'I RLUNG SEMS 'DUS PA'I GONG BU YUNGS DKAR SBOM PO'I TSAD TZAM PA SNYING GA'I DH'U TI'I DBUS KYI SBUBS STOD CUNG ZAD YOD PA'I NANG DU GNAS PA DE LA MI SHIGS PA'I THIG LE ZHES BYA LA, DE NAS THIG LE DKAR PO DE LAS CHA SHAS GCIG SPYI BO'I RTZA 'KHOR GYI NANG DU SONG STE GNAS PA LA Hm YIG CES BYA, DES LUS KYI GNAS GZHAN GYI THIG LE DKAR PO RNAMS DNGOS SAM BRGYUD PA'I SGO NAS 'PHEL BAR BYED, SNYING GA'I THIG LE DMAR PO LAS CHA SHAS GCIG LTE BA'I RTZA 'KHOR GYI NANG DU SONG STE GNAS PA LA GTUM MO ZHES BYA STE, DES LUS KYI GNAS GZHAN RNAMS KYI KHAMS DMAR PO RNAMS DNGOS BRGYUD CI RIGS PA'I SGO NAS 'PHEL BAR BYED DO, ,RTZA 'KHOR RE RE NA THIG LE CHA SHAS RE GNAS KYANG, SPYI BO'I RTZA 'KHOR NI KHAMS DKAR PO 'PHEL BA'I GNAS KYI GTZO BO YIN, ,LTE BA'I RTZA 'KHOR NI KHAMS DMAR PO 'PHEL BA'I GNAS KYI GTZO BO YIN LA, SNYING GA'I RTZA 'KHOR NI KHAMS DKAR DMAR CHA MNYAM DU 'PHEL BA'I GNAS YIN NO, ,KHAMS DKAR DMAR DE YANG NAM DGOS PA'I TSE SKYE BA YIN GYI SNOD DU CHU BLUG PA LTAR YOD PA MIN GSUNGS, SKYE GNAS SU NYING MTSAMS SBYAR NAS RAGS PA'I LUS SKYE BA BLANGS PA DE LA GZHI'I SPRUL SKU ZHES BYA'O, ,DA LTAR BAR DO BA MNGAL DU NYING MTSAMS SBYAR NAS SKYE BA LEN PA'I RNAM GZHAG 'DI DAG NI, BSKYED RIM PA'I SKYE BA SPRUL SKUR 'KHYER BA'I (25)LAM 'KHYER DANG, RDZOGS RIM PA'I DAG MA DAG GI SGYU LUS RNAMS RAGS PA'I SPRUL SKU 'DZIN PA 'AM PHUNG PO RNYING PA LA ZHUGS TE THA MAL PA'I MIG LAM DU GYUR PA DANG RNAM PA MTHUN ZHING DE DAG GI SBYANG GZHI YIN TE, DE YANG BSKYED RDZOGS GNYIS KYI SBYANG GZHI LA KHYAD PAR MED PAS BSKYED RIM NI, GZHI'I 'CHI BA DANG, BAR DO DANG, SKYE BA GSUM SBYANGS GZHIR BYAS NAS SBYOR BYED LA DE GSUM DANG RIM BZHIN RNAM PA MTHUN PAR 'CHI 'CHI BA CHOS SKUR 'KHYER BA'I LAM 'KHYER DANG, BAR DO LONGS SKUR 'KHYER BA'I LAM 'KHYER DANG, SKYE BA SPRUL SKUR 'KHYER BA'I LAM 'KHYER GSUM YAN LAG DANG BCAS PA BSGOMS TE BRGYUD NAS THA MAL GYI 'CHI BA, BAR DO, SKYE BA GSUM SBYANGS NAS, DE GSUM DANG RNAM PA JI LTAR BA BZHIN MTHUN PA'I SKU GSUM MNGON DU BYED PA YIN LA, RDZOGS RIM NI GZHI'I CHOS GSUM PO DE DANG RNAM PA JI LTAR BA BZHIN MTHUN PA'I LAM GYIS DE GSUM DNGOS SU SBYONG BYED YIN TE, DE YANG 'CHI BA 'OD GSAL DANG RNAM PA JI LTA BA BZHIN MTHUN PA NI, LUS DBEN, NGAG DBEN, SEMS DBEN, SGYU LUS, SLOB PA'I ZUNG 'JUG RNAMS KYI GNAS SKABS KYI SNANG MCHED THOB GSUM 'OD GSAL DANG BCAS PA YIN LA, BAR DO DANG RNAM PA JI LTA BA BZHIN MTHUN PA NI, RIM PA GSUM PA'I MA DAG PA'I SGYU LUS DANG, SLOB PA'I ZUNG 'JUG GI DAG PA'I SGYU LUS YIN ZHING, SKYE BA DANG RNAM PA JI LTA BA BZHIN MTHUN PA NI, DAG MA DAG GI SGYU LUS RNAMS PHUNG PO RNYING PA LA ZHUGS TE THA MAL PA'I MIG LAM DU GYUR PA DE YIN NO, ,RDZOGS RIM GYI LAM DE RNAMS KYIS SKYE SHI BAR DO GSUM SBYONG TSUL DNGOS NI, RDZOGS RIM GYI RNAL 'BYOR PAS RANG RGYUD KYI SHIN TU PHRA BA'I RLUNG SEMS NGO BO DBYER MED KYI YA GYAL SHIN TU PHRA BA'I SEMS DE RIGS 'DRA GCIG TU BRGYUD DE 'CHI BA RANG GA BA'I 'OD GSAL (26)DU 'GYUR BA DE TING NGE 'DZIN GYI MTHUS BKAG NAS, DE DANG RNAM PA JI LTA BA BZHIN MTHUN PA'I LAM DUS SU DPE DANG DON GYI 'OD GSAL DANG, 'BRAS BU'I 'OD GSAL CHOS KYI SKUR BSGYUR BA NI 'CHI BA SBYONG TSUL DANG, RDZOGS RIM GYI RNAL 'BYOR PAS DE 'DRA'I SHIN TU PHRA BA'I RLUNG DE RIGS 'DRA GCIG NAS GCIG TU BRGYUD DE 'CHI BA 'OD GSAL RANG GA BA'I GZHON PA BYAS NAS BAR DO'I LUS SU LDANG BA DE TING NGE 'DZIN GYI MTHUS BKAG NAS, BAR DO DANG RNAM PA JI LTAR BA BZHIN MTHUN PA'I MA DAG PA'I SGYU LUS DANG, SLOB MI SLOB KYI ZUNG 'JUG GI DAG PA'I SKU MA'I SKUR BSGYUR BA NI BAR DO SBYONG TSUL YIN LA, DE LTA BU'I SGYU LUS GRUB PA NA BAR DO GTAN NAS KHEGS SHING DE'I MTHUS LAS NYON GYIS MNGAL DU SKYE BA 'DZIN PA'I SKYE BA'ANG KHEGS NAS BAR DO MA'I MNGAL DU SKYE BA LEN PA DANG RNAM PA MTHUN PAR SGYU LUS PHUNG PO RNYING PA LA ZHUGS TE CHOS 'CHAD BA DANG, LAM GONG MA SGRUB PA'I RTZOL BA BYED PA NI SKYE BA SBYONG TSUL YIN NO, ,DES SKYE SHI BAR DO GSUM DNGOS SU 'GOG PAR BYED PA'I RTZA BA NI SGYU LUS KYI DNGOS RGYUR GYUR PA'I SEMS DBEN MTHAR THUG GI DPE'I 'OD GSAL NYID YIN TE, DES 'CHI BA DNGOS SU KHEGS PA'I STOBS KYIS BAR DO DANG SKYE BA RANG SHUGS KYIS KHEGS PA'I PHYIR RO, ,DE 'DRA'I DPE'I 'OD GSAL LAS SGYU LUS GRUB PA'I TSE BAR DO GTAN NAS KHEGS PA YIN TE, BAR DO'I LUS SU LDANG BA'I SHIN TU PHRA BA'I RLUNG DE SGYU MA'I SKUR GYUR ZIN PA'I PHYIR, BAR DO GTAN NAS KHEGS NA LAS NYON GYIS SKYE BA MI LEN PA'I RGYU MTSAN GYIS, SGYU LUS THOB NA TSE DE LA 'TSANG RGYA BAS KHYAB PO, ,GONG DU BSHAD PA DE RNAMS KYI SHES BYED KYI LUNG 'DREN RNAMS MANG GIS DOGS NAS MA BRIS PAS, RJE YAB SRAS KYI LEGS BSHAD DANG, RJES 'BRANGS MKHAS GRUB DAM PA RNAMS KYI GSUNG LAS SHES (27)PAR BYA'O,, ` SMRAS PA, TSUL 'DI RGYAL BA GNYIS PA YAB SRAS DANG, ,RJES 'BRANGS MKHAS PA'I GSUNG BA BZHIN BRIS MOD KYANG, ,DAM PA'I DGONGS PA MA LON NONGS PA'I TSOGS, ,CI MCHIS BLA MA LHA DANG MKHAS PA BSHAGS, ,'DIS MTSON DGE BAS BDAG GZHAN 'GRO BA KUN, ,ZAB LAM RIM PA GNYIS KYI RNAL 'BYOR GYIS, ,MA DAG SKYE SHI BAR DO SKU GSUM DU, ,SGYUR MDZAD LAM BZANG MYUR DU MTHAR PHYIN SHOG ,(CES PA 'DI NI GYI NA PA DBYANGS CAN DGA' BA'I BLO GROS KYIS DAM PA'I GSUNG LAS BTUS TE RANG GI BRJED BYANG DU BRIS PA'O,, ,,) *, ,MTHON PO'I SGANG LA CHU BO MI CHAGS PAS, ,DMAN SA BZUNG STE GUS PA'I BRTUL ZHUGS KYIS, ,CHOS MTHUN BLO KHA MTHO BA THAMS CAD LAS, ,BLO SKYED GANG LON BRE SOG PHUL SOG GIS, ,SGRO 'DOGS 'PHRAL DANG 'PHRAL DU CHOD CIG AANG, ,SNYIGS DUS BLO DANG BSOD NAMS DMAN PA'I PHYIR, ,LHAG PA'I LHA DANG YI DAM CHOS SRUNG LA, ,RTZE GCIG GSOL 'DEBS PHYAG MCHOD PAndAL SOGS, ,TSOGS BSAGS SGRIB SBYONG 'BAD PA DRAG PO YIS, ,ZHING GI MTHU LA RGYAB BRTEN GYIS SHIG AANG, ,MTHUN MONG LAM SBYANGS SNGON DU MA SONG ZHING, ,GZHUNG DON LTA BA'I BLO MIG MA PHYE BAR, ,CHO GA'I NGAG 'DON BYANG BA TZAM ZHIG GIS, ,GSANG SNGAGS 'CHANG BA'I GRAL DU MI TSUD PAS, ,BSTAN LA RIM PA BZHIN DU SLOBS SHIG AANG, ,GSANG CHEN RGYUD KYI RGYAL PO'I SMAN HROG RNAMS, , SBYOR BAR BSDEBS PA BSKYED RDZOGS RIM PA SOGS, ,YIN PHYIR GZHUNG LUGS CHE RNAMS YAL POR NAS, ,MAN NGAG KHO NAR DGA' BA GNAS MIN PAS, ,RTZA BSHAD SBYAR TE RGYUD DON TSOL CIG AANG, ,GSANG SNGAGS DE YANG 'PHRAL GYI RKYEN SEL LAM, ,TSE DANG NOR (28)SGRUB DBANG SDUD MNGON SBYONG SOGS, ,TSE 'DI'I LAG CHA KHO NAR 'KHYER BA NI, ,SA MCHOG TZAN DAN SOL BAR BYAS 'DRA BAS, ,CHOS KYIS NGAN SONG BSGRUB PAR MA BYED AANG, ,SNGAGS GZHUNG THOS BSAM BYAS PA'I NYING DGOS SU, ,RGYAL KUN DGONGS PA GCIG GYUR RTAG PA'I BKA', ,DNGOS GRUB RTZA BA DAM TSIG BSRUNG BA 'DIR, ,'BAB PA'I TSUL LA GO BA GTING TSUGS PAS, ,GTAN MDUN 'CHUG PA MED PAR GYIS SHIG AANG, ,(CES PA 'DI YANG RJE GUNG THANG PA DKON MCHOG BSTAN PA'I SGRON ME'I GSUNG LAS BRIS,, ,,) (*, ,RDO RJE 'CHANG CHEN LAM RIM GSANG MDZOD NAS, ,GZHI YI SKU GSUM RNAM GZHAG RIM PA 'DI, ,PAR DU BSKRUN PA'I DGE BA BSTAN DANG 'GROR, ,PHAN BDE DPAG MED 'BYUNG BA'I RGYUR GYUR CIG ,DE LAS BYUNG BA'I RAB DKAR DGE BA'I TSIGS, ,RGYU SBYOR 'BREL THOGS KYIS MTSON MKHA') (MNYAM 'GRO ,LAM GYI SKU GSUM NYAMS LEN MTHAR PHYIN NAS, ,'BRAS BU'I SKU GSUM BDE BLAG THOB PHYIR BSNGO,, ,,PAR 'DI LHA RTZE MDZES PA RI KHROD NA BZHUGS,, ,,SARBA MANGGA Lm,, ,,)