*, ,DPAL LDAN TSOGS KYI BDAG PO'I GTOR 'BUL GYI DON BSHAD PA BZHUGS,,
, ,NA MO BDZRA P'A nA YE, RJE BTZUN BLA MA MCHOG DANG DBYER MED PA'I, ,GSANG BDAG 'BYUNG PO'I DGRA LA GUS BTUD NAS, ,DE YI ZHAL GDAMS DPAL LDAN TSOGS BDAG GI, GTOR 'BUL MAN NGAG BDAG GIS BSHAD PAR BYA, 'DI LA GSUM, KLAD KYI DON, GZHUNG GI DON, MJUG GI DON NO, ,DANG PO NI, NA MO BDZRA BHEE RA W'A YA, ZHES PA STE, BOD SKAD DU BSGYUR NA RDO RJE 'JIGS BYED LA PHYAG 'TSAL LO, ,ZHES PA'O, ,GNYIS PA GZHUNG GI DON LA GSUM, SNGON 'GRO, DNGOS GZHI, MJUG CHOG GO, ,DANG PO LA GNYIS, BSHAM PA'I SNGON 'GRO DANG, BSGOM PA'I SNGON 'GRO'O, ,DANG PO NI, 'DIR TSOGS BDAG DMAR PO LA GTOR MA 'BUL BAR 'DOD PAS, CHU GNYIS NYER SPYOD ROL MO 'DOD YON DANG BCAS PA DANG, BLA MED KYI GTOR RDZAS LA PHUG LA DU SOGS LHA MCHOG 'DI NYID KYI MCHOD GTOR GYA NOM PA BSHAMS LA, ZHES PA STE, 'DI LA GTOR MA 'BUL BA PO'I GANG ZAG NI, RNAL 'BYOR BLA MED KYI DBANG DANG PHYAG RDOR H'Um BZHI PA'AM RDO RJE MKHA' 'GRO'I 'BYUNG 'DUL DANG TSOGS BDAG DMAR CHEN
, ,PHYAG BCU GNYIS PA'I RJE'I GNANG THOB PA ZHIG DGOS LA, GANG GI TSE 'BUL BA'I DUS NI SPYIR DUS GANG LA PHUL YANG MI RUNG BA MED MOD KYI MCHOG TU SHIS PA NI, RGYAL PHUR 'DZOMS PA'I 'GRUB SBYOR GYI DUS SO, ,GANG DU 'BUL BA'I GNAS KHANG BYI DOR GYIS GTZANG BAR 'BYOR NA MAN NGAG BZHIN DU BRIS BA'I SKU RTEN ZHAL SHAR DU PHYOGS BAR BKRAMS, DE'I MDUN DU PHYE GTZANG LA BLA MED KYI GTOR RDZAS BDUD RTZI RIL BU'I PHYE MA DANG SHA DANG NYA SHA DANG 'KHUR BA DANG 'BRAS CHAN DANG, SRAN MA DANG BTZONG DANG SGOG SKYA DANG CHU DANG CHANG DANG 'O MA SOGS KYIS SBRUS PA LA GTOR MA RIN PO CHE'I DBYIBS CAN KHA DOG DMAR PO DKAR RGYAN DMAR RGYAN GYIS SPRAS PA MTHA' SKOR DU LA PHUG, SGOG PA, DKAR GSUM MNGAR GSUM, 'KHUR BA, BAG PHYE LA DKAR GSUM MNGAR GSUM CHA BA GSUM RNAMS BTAB STE SPRUS PA'I RIL BU MAR KHUR BTZOS PA'I LA DU BCAS KYIS BSKOR BA BSHAM, DE'I BDUN DU MCHOD 'GO BRIS SKU'I GA-YAS NAS BRTZAMS TE, MCHOD YON DANG ZHABS BSIL TE CHU GNYIS, ME TOG BDUG SPOS MAR ME DRI CHAB ZHAL ZAS TE NYER SPYOD LNGA; GZUGS SGRA DRI RO REG BYA STE 'DOD YON LNGA RNAMS DNGOS SAM BCOS MA YAN CHAD DBANG SDUD KYI LAS DANG MTHUN PAR BSHAM, SGRUB PA PO KHA NUB TU PHYOGS PA'I MDUN DU d'A DRIL SOGS ROL MO DANG CHANG BZANG POR BDUD RTZI'I PHYE MA BSRES PA'I NANG MCHOD RNAMS GYA
NOM PA STE PHUN SUM TSOGS PAR BSHAM MO, ,GNYIS PA BSGOM PA'I SNGON 'GRO NI, RANG YI DAM GANG BYED KYI SGRUB THABS KYI GZHUNG LTAR BYIN GYIS RLOB PA'AM, ZHES PA NI, SKABS 'DI'I YI DAM NI RGYUD SDE 'OG MA GSUM GYI LHAS MI CHOG GI RNAL 'BYOR BLA MED KYI LHA ZHIG DGOS LA, DE'I NANG NAS KYANG 'BYUNG 'DUL H'Um BZHI PA LA BYED PA MCHOG TU LEGS SHING, RDO RJE 'JIGS BYED LA BYAS KYANG CHOG PAR GZHUNG 'DI'I MCHOD BRJOD KYI SHES PAR NUS, BSDU NA DMIGS PA DANG BCAS TE, AOm A'A: H'Um; LAN GSUM BRJOD LA, 'JUG PA BDE BA'I PHYIR 'DI LTAR GDON PAR BYA STE, ZHES PA'I DMIGS PA NI, BLA MA DBU MDZAD LAGS KYI ZHAL KHYUN YI GER BKOD PA DE KHAS CHOG PAR SNANG, GNYIS PA DNGOS GZHI NI, MDUN DU BDE STONG DBYER MED LHA LAM LAS, ZHES PA NAS, BSAM PA TZAM GYIS LHUN GYIS 'GRUB PAR MDZOD, CES PA'I BAR TSIGS BCAD LNGA STE, DE YANG TSIGS BCAD DANG POS GTOR MGRON GSAL GDAB PA, GNYIS PAS MCHOD 'BUL, GSUM PAS GTOR 'BUL, BZHI PAS BSTOD PA, LNGA PAS 'PHRIN 'CHOL STON PAS TSIG DON PHAL CHER GO SLA ZHING DKA' GNAS 'GA' ZHIG BRJOD NA, MDUN GYI NAM MKHAR MCHOD PA SNA TSOGS KYIS BSKOR BA'I DBUS SU BEE d'URYA'I RANG BZHIN GYI BRAG RI'I KHRODU PADMA DMAR PO 'DAB MA BRGYAD PA'I LTE BAR NOR BDAG BYI BA SNGON PO KHA NAS RIN PO CHE SNA TSOGS SKYUG PA, MGO PO GA-YON DU BSTAN PA'I GDAN GSAL BTAB TE, RANG YI DAM DU GSAL BA'I THUGS KA'I SA BON GYI 'OD ZER DMAR PO LCAGS KYU LTA BUS SUM CU RTZA GSUM NAS DPAL TSOGS KYI BDAG PO GTER BDAG DANG NOR BDAG LA SOGS PA'I 'KHOR DANG BCAS PA SPYAN DRANGS NAS MDUN GYI GDAN LA BZHUGS PAR BSAM
, ,STE; GTZO BO'I MNGON RTOGS NI, SKU MDOG DMAR PO GLANG PO'I GDONG PA CAN, MCHE BA GTZIGS SHING SPYAN GSUM DANG LDAN PA, DBU SKRA NAG PO SPYI BOR BCINGS PA'I RTZER NOR BUS BRGYAN CING DAR DMAR GYI COD BAN CAN, PHYAG BCU GNYIS KYI GA-YAS PA DRUG NA DGRA STA; MDA' CHEN, LCAGS KYU, RDO RJE; RAL GRI, 'PHANG MDUNG RNAMS 'DZIN CING, GA-YON PA DRUG NA GTUN SHING, GZHU; KHA tV'Am GA ,KHRAG GIS GANG BA'I THOD PA, SHA CHEN GYIS GANG BA'I THOD PA, PHUB DANG LHAN CIG MDUNG LA BA DAN BTAGS PA RNAMS 'DZIN PA, GA-YAS GA-YON GYI BZHI PAS RDO RJE DANG THOD KHRAG THUGS KAR 'DZIN CING, LHAG MA RNAMS 'PHYAR BA, DAR SNA TSOGS KYI SHAM THABS GSOL ZHING, RIN PO CHE'I RGYAN SNA TSOGS KYIS BRGYAN PA, ZHABS GA-YON BRKYANGS PA'I SKYIL KRUNG PHYED PA'I GAR STABS KYIS 'OD ZER DMAR PO 'KHRUG PA'I DBUS NA BZHUGS PA'O; ;MCHOD GTOR 'BUL BA'I TSE RANG GI THUGS KA NAS SPROS PA'I MCHOD PA'I LHA MO RNAMS KYIS SNGAR BYIN GYIS BRLABS PA'I MCHOD GTOR RNAMS PHUL BAS DGYES BZHIN DU BZHES PA'I MOS PA DANG, LHAG PAR GTOR MA DANG NANG MCHOD GNYIS LJAGS RDO RJE DMAR PO RTZE GCIG PA 'OD KYI SPU GU CAN GYIS DRANGS TE GSOL BAS THUGS RGYUD LA BDE STONG SKYES TE DGYES PAR BSAM MO, ,BDE SKYONG SNOD NI THOD PA'I SNOD YIN TE THOD PA'I SKAD DOD KA P'A LA ZHES PA'I KA LA RJES SUNG RO BSNAN PA'I KAm ZHES PA BDE BA DANG P'A LA SKYONG BA LA 'JUG PAS SO, ,LAS BZHI NI ZHI RGYAS DBANG DRAG BZHI'O, ,'DOD RGU DANG MKHO RGU ZHES PA'I RGU NI MANG TSIG GO, ,'PHRIN 'CHOL GYI TSE TSOGS BDAG GI THUGS GA NAS 'OD ZER DMAR PO LCAGS KYU LTA BU 'PHROS PAS 'KHOR GTER BDAG DANG NOR BDAG LA SOGS PA RNAMS KYI THUGS RGYUD BSKUL NAS, DE RNAMS KYIS SKYE 'GRO
BSOD NAMS CAN RNAMS KYI LUNG DANG RTOGS PA'I YON TAN DANG, TSE DANG BSOD NAMS DANG DPAL DANG 'BYOR PA DANG, NOR DANG 'BRU DANG PHYA DANG GA-YANG DANG, BKRAG MDANGS DANG, GZI BRJID DANG, 'BYUNG BA BZHI'I BCUD THAMS CAD BSDUS NAS RANG LA BYIN ZHING, TSOGS BDAG GI ZHABS GA-YON PA'I RTING PAS ZHABS 'OG GI BYI BA LA BRDABS PAS DES MA BZOD DE DANG 'DRA'I SPRUL PA DPAG TU MED PA SPROS TE 'JIG RTEN KHAMS KYI ZAS NOR THAMS CAD BSDUS NAS RANG LA PHUL BA DANG, ZHABS 'OG GI BYI BA'I KHA NAS KYANG RIN PO CHE SOGS MKHO RGU'I YO BYAD SNA TSOGS SKYUGS PAS RANG NYID KYI BANG MDZOD DANG GNAS KHANG DANG YUL PHYOGS THAMS CAD KHENGS TE LONGS SPYOD 'DOD RGU PHUN SUM TSOGS PA LA DBANG BAR BYAS BYUNG SNYAM DU MOS PA BRTAN PO BYA BA NI GNAD KYI DON NO, ,GSUM PA MJUG CHOG NI, TSOGS BDAG BRIS SKU YOD NA BRTAN BZHUGS DANG, MED NA RANG GNAS SU GSHEGS GSOL BYAS NAS BSNGO SMON SHIS BRJOD BYA BA STE GZHUNG DU MI GSAL YANG SPYI'I RIGS 'GRES SHES SO, ,GSUM PA MJUG GI DON NI, ZHES PA 'DI YANG BZHAD GNYER PA ZUR KHANG RJE DRUNG NAS BSKUL BA'I NGOR BSTAN 'DZIN MING CAN GYIS SBYAR BA'O, ,ZHES PA STE SHIN TU GO SLA'O, ,SMRAS PA, DMAR CHEN BGEGS KYI RGYAL PO'I GTOR 'BUL DON, ,BRGYUD LDAN BLA MA'I NGAG GIS BRGYAN PA 'DI, ,MI RJE DAM PA'I BZHED PA BSGRUB PA'I PHYIR, ,DHARMA BHA DRAS BRIS PA DGE LEGS 'PHEL,, ,,