*, ,'BYUNG BZHI GTOR MA'I BSHAD 'KHRID LEGS BSHAD GSAR PA'I DGA' STON MTHONG BA 'DZUM SHOR ZHES BYA BA BZHUGS SO,,
, ,NA MO GU RU MANYDZU GHO sh'A YA, BKA' DRIN GSUM LDAN RTZA BA'I BLA MA DANG, ,DBYER MED DAM PA RGYA GAR LA BTUNG NAS, ,MGON DE'I BZHED SROL 'BYUNG BZHI'I GTOR MA YI, ,TSIG DON DMIGS 'KHRID CHE LONGS TZAM ZHIG BSHAD, DE YOD RGYA GAR DAM PA SANGS RGYAS KYI BZHED SROL PAn CHEN BLO BZANG CHOS KYI RGYAL MTSAN GYIS GSAL BAR MDZAD PA'I 'BYUNG BZHI'I GTOR MA GTONG TSUL LA GSUM, SNGON 'GRO, DNGOS GZHI, MJUG CHOG GO ,DANG PO LA GNYIS, BSHAM PA DANG, BSGOM PA'O, , DANG PO NI, 'DI LA PHYAG LEN CUNG ZAD MI 'DRA BA MANG DU SNANG YANG GZHUNG GI DGONGS PA JI LTA BA BZHIN BYED NA, PHYE DANG CHU GTZANG LA DRI 'I SNGON 'GRO 'I SNGON 'GRO, LNGA SMAN
, ,LNGA RIN PO CHE LNGA SOGS BTAB STE SBRUS PA'I ZAN LA GTOR MA RNAMS BSHAD TSOD LTAR BSHAMS TE, GTOR SNOD LNGAR BYED NA MDUN DU RANG GI GA-YON PHYOGS NAS BRTZAMS TE, GTOR SNOD DANG POR ZLA GAM, GNYIS PAR GRU GSU, GSUM PAR ZLUM PO, BZHI PAR GRU BZHI, LNGA PAR SPYI 'GRO TZAM LA ZAN RIL BCO BRGYAD DANG, NANG PA'I PHYIR YIN NA DAR PHYE LAS BYAS PA'I GLUNG NANG PA'I GZUGS BRNYAN CAN RNAMS MDUN 'BUL YUL LAM RANG NYID LA BSTAN PA GANG RUNG DANG, GZHUNG DU MI GSAL YANG PHYAG LEN LA 'DUG PA LTAR, ZAN RIL BYED NA GTOR SNOD LNGA GA DANG, GLUD GZUGS BYED NA DANG PO BZHI LA CHU YANG BLUG STE BSHAMS YANG SNOD GCIG TU BYAD NA DBUS SU ZLUM GTONG MDUN DANG NYID LA BSTAN PA DANG, DE'I MTHAR MDUN NAS BRTZAMS TE GA-YAS SKOR DU ZLA KHAM, GRU GSUM, ZLUM PO,
GRU BZHI'I DBYIBS CAN RNAMS 'GOD CING CHU GTZANG YANG BLUG LA BSHAMS, 'DI LA GLUD GZUGS BYED NA SNOD LOGS SU BYED PA BDE BAS SNGAR BZHIN BYA'O, (,GNYIS PA BSGOM PA'I SNGON 'GRO NI,) KUN SLONG BCOS TE MDUN GYI NAM MKHAR SENG KHRI'I STENG DU PADMA 'DAB MA BZHI PA'I LTE BAR BLA MA DAM PA SANGS RGYAS, MDUN GYI PAD 'DAB TU DNGOS BRGYUD KYI BLA MA, GA-YAS KYI PAD 'DAB TU YI DAM SANGS RGYAS, RGYAB KYI PAD 'DAB TU SDE SNOD GSUM DANG RGYUD SNGE BZHI'I CHOS PU TI, GA-YON GYI PAD 'DAB TU BYANG SEMS NYAN RANG MKHA' 'GRO CHOS SKYONG GI DGE 'DUN TE, SKYABS YUL RNAMS LAM GYIS GSAL BTAB NAS, RANG GI MTHA' SKOR DU SEMS CAN SPYI DANG KHYAD PAR 'BYUNG 'KHRUGS KYI ZUG RNGUS NYAN PA RNAMS BSAMS LA, RANG GZHAN SEMS CAN THAMS CAD SPYIR 'KHOR BA, SGOS NGAN SONG, YANG SGOS 'BYUNG 'KHRUGS KYI ZUG RNGUS MNAR BA LA SHIN TU 'JIGS SHING SNYING RJE BA DANG, MDUN GYI SKYABS YUL RNAMS LA 'JIGS PA DE RNAMS LAS SKYOB PA'I NUS MTHU YOD PAR YID CHES TE, BLO BRJID 'GAL GYI SGO NAS SKYABS SU 'GRO BAR MOS NAS, BDAG DANG 'GRO BA NAM
, ,MKHA' DANG MNYAM PA'I SEMS CAN THAMS CAD BLA MA LA SKYABS SU MCHI'O, ,SANGS RGYAS LA SKYABS SU MCHI'O, ,CHOS LA SKYABS SU MCHI'O, ,DGE 'DUN LA SKYABS SU MCHI'O, ,ZHES LAN GSUM BRJOD PAS SKYABS YUL RNAMS LAS BDUD RTZI BABS PAS RANG GZHAN GYI SDIG SGRIB BKRUS NAS SKYABS 'OG TU CHUD PA'I MOS PA BYA'O, ,DE NAS, SANGS RGYAS CHOS DANG TSOGS KYI MCHOG RNAMS LA, ,BYANG CHUB BAR DU BDAG NI SKYABS SU MCHI, ,BDAG GIS SBYIN SOGS BGYIS PA'I TSOGS RNAMS KYIS, ,'GRO LA PHAN PHYIR SANGS RGYAS 'GRUB PAR SHOG ,CES LAN GSUM GYIS SEMS BSKYED PAR BYA STE, 'DI'I TSIG RKANG DANG PO GNYIS KYIS BSKYABS BSTAN KYANG GONG DANG MI ZLOS TE, GONG MA LAM LOG PA LAS KHYAD PAR DU BYED PA'I SKYABS 'GRO TZAM DANG, 'DI LAM DMAN PA LAS KHYAD PAR DU BYED PA'I SEMS BSKYED KYI RTEN DU GYUR PA'I SKYABS 'GRO YIN PA'I PHYIR RO, ,TSIG RKANG GSUM PAS 'JUG PA SEMS BSKYED BSTAN TE, DE NI RGYAL SRAS KYI SPYOD PA LA SLOB PAR DAM BCA' BA YIN LA, 'DIS KYANG SBYIN SOGS PHAR PHYIN DRUG GIS BSDUS PA'I RGYAL
SRAS KYI SPYOD PA LA SLOB PAR DON GYIS KHAS 'CHE BA'I PHYIR RO, ,TSIG RKANG THA MAS SMON PA SEMS BSKYED BSTAN TE, DE NI DON GNYER GNYIS DANG LDAN PA'I SEMS YIN LA, 'DIS KYANG 'GRO LA PHAN PHYIR ZHES PAS GZHAN DON DON GNYER DANG, SANGS RGYAS 'GRUB PAR SHOG ,CES PAS BYANG CHUB DON GNYER BSTAN PA'I PHYIR RO, ,DE NAS, SEMS CAN THAMS CAD BDE BA DANG BDE BA'I RGYU DANG LDAN PAR GYUR CIG ,SNYAM DU BYAMS PA TSAD MED BU GCIG PA'I MA LTA BU DANG, SEMS CAN THAMS CAD SDUG BSNGAL DANG SDUG BSNGAL GYI RGYU DANG BRAL BAR GYUR CIG ,SNYAM DU SNYING RJE TSAD MED SMAN PA'I RGYAL PO LTA BU DANG, SEMS CAN THAMS CAD SDUG BSNGAL MED PA'I BDE BA DANG MI 'BRAL BAR GYUR CIG ,SNYAM DU DGA' BA TSAD MED MTHUN PA'I GROGS PO DANG PHRAD PA LTA BU DANG, SEMS CAN THAMS CAD NYE RING CHAGS SDANG DANG BRAL BA'I BTANG SNYOMS LA GNAS PAR GYUR CIG ,SNYAM DU BTANG SNYOMS TSAD MED NAM MKHA'I DKYIL LTA BU BSGOMS NAS, SKYABS YUL RNAMS 'OD DU ZHU NAS RANG GI SMIN MTSAMS SU THIM PAS RGYUD BYIN GYIS BRLABS PAR BSAM MO,, ` (GNYIS PA DNGOS BZHI LA GSUM, BDAG BSKYED DANG GTOR MGRON BSKYED PA, YAN LAG BDUN PA PHUL NAS GSOL BA GDAB BO, GTOR MA BYIN GYIS BRLABS NAS 'BUL BA'O, ,DANG PO NI,
, ,SPYIR BDAG MDUN YANG THA DAD LA 'JUG PA YANG THA DAD DU BYED PA DANG, BDAG MDUN YANG GCIG LA 'JUG PA YANG GCIG TU BYED PA DANG, BDAG MDUN GCIG LA 'JUG PA THA DAD DU BYED PA DANG, BDAG MDUN THA DAD LA 'JUG PA GCIG TU BYED PA STE MU BZHI YOD PA LAS, 'DI PHYI MA LTAR YIN TE, MDUN GYI GTOR MGRON LA NGA'O SNYAM PA'I NGA RGYAL MI BYED CING, BDAG MDUN GNYIS KA TSIG RIS GCIG GIS BSKYED PA YIN PA'I PHYIR RO, ,DE YANG SKYABS YUL THIM PA DANG MNYAM DU SNOD BCUD THAMS CAD KYANG 'OD DU ZHU NAS RANG LA THIM, RANG YANG 'OD DU ZHU NAS SNANG NGOR KUN RDZOB KYI SNANG BA THAMS CAD KYIS STONGS PA'I STONG SANG NAM MKHA' LTA BU DANG, NGES NGOR SVA BH'A WA'I SNGAGS BRJOD PA'I TSE DE'I SNGAGS DON DRAN TE, GZUNG 'DZIN GYIS BSDUS PA'I CHOS THAMS CAD MA BRTAGS PA'I TSE SDOD LUGS KYI NGOS NAS GRUB GRUB 'DRA YANG, RIGS PAS BRTAGS PA'I TSE RANG RANG GI GDAGS GZHI RNAMS DANG GCIG THA DAD GANG DU YANG MA GRUB PAS NA SDOD LUGS KYI NGOS NAS MED PA'I NGES SHES DRANGS TE, DE LTAR NGES MKHAN GYI BLO DE YANG YE SHES CHOS SKU DNGOS YIN PA'I NGA RGYAL DANG BCAS TE BSGOM PAR BYA'O, ,DE NAS NGES NGO'I STONG PA DE LAS MA GA-YOS PA'I RANG NAS SNANG
NGOR DAG PA'I SNANG BA BSKYED PA YIN PAS, YE SHES DE'I GZUNG RNAM SNGAR BDAG NYID KYI MA DAG PA'I PHUNG PO 'OD DU ZHU BA'I GO SA NYID DANG, DE'I MDUN GYI NAM MKHA'I DBYINGS TE DBUS SU SENGGES BTEG PA'I RIN PO CHE'I KHRI'I STENG DU SNA TSOGS PADMA DANG DE'I LTE BAR NYI MA DANG ZLA BA DANG RI DVAGS KRishnA SA RA'I PAGS PA'I GDAN BTINGS PA'I STENG DU, 'DAS MA 'ONGS DA LTA STE DUS GSUM GYI RGYAL BA THAMS CAD KYI YE SHES GCIG TU BSDUS PA'I NGO BO RGYA GAR DAM PA SANGS RGYAS RE RE BSGOM STE, DE YANG RANG DAM PAR SGOM PA LA NI KHRI CHUNG DU ZHIG GIS CHOG CING MTHA' SKOR DU 'KHOR BSGOM MI DGOS PA SKABS STOBS KYIS SHES LA, MDUN BSKYED LA NI KHRI MTHO ZHING YANGS PA'I STENG DU RGYA JE CHANG DANG DPANGS JE MTHOR SONG BA'I PAD RIM LNGA BRTZAGS YOD PA'I STENG MA 'DAB MA BZHI PA'I LTE BAR NYI ZLA PAGS PA'I STENG DU NGO BO DUS GSUM SANGS RGYAS THAMS CAD KYI YE SHES GCIG TU BSDUS PA'I RANG GZUGS RTZA BA'I BLA MA YIN PA LA NAM PA RGYA GAR DAM PA SANGS RGYAS SU BSGOM DGOS SO, ,DE YANG KRshnA SA RA NI, LEGS SBYAR LTA BA'I ME LONG LAS, KRishnA SA RA ZHES BYA BA, ,RI DVAGS NAG PO ZHES PA LA, ,KHRI GNYEN SA LER BLUN POS BTAGS, ZHES PA LTAR KRishnA NAG PO DANG SA RA RI DVAGS TE RI DVAGS NAG PO'AM, ZUR
, ,CHAG GI SKAD DU KHRI GNYAN SA LER GRAGS PA DE'O, ,DAM PA SANGS RGYAS NI, SKU MDOG DMAR SMUG ZHAL GCIG PHYAG GNYIS KYIS GA-YAS SENG LDANG GI d'A MA RU 'KHROL ZHING GA-YON DNGUL DKAR GYI DRIL BU GSIL BA, ZHAL NAS A'A LI K'A LI'I SGRA SGROG CING THUGS LA BKA' BSTAN THAMS CAD KYI DGONGS DON MNGA' BA, SPYAN GNYIS NAM MKHA' LA GZIGS PAS KHAMS GSUM DBANG DU SDUD CING SRID GSUM ZIL GYIS GNON PA, RUS PA'I RGYAN DRUG GIS SPRAS SHING ZHABS GNYIS SEMS DPA'I KYIL KRUNG GIS BZHUGS PA STE 'DI NI BDAG MDUN GNYIS KA LA 'DRA'O, ,DE NAS MDUN BSKYED KYI DAM PA'I STENG GI NAM MKHAR DNGOS BRGYUD KYI BLA MA RNAMS DANG, MDUN GYI PAD 'DAB TU RDO RJE SEMS DPA' LA RDO RJE'I RIGS DANG RNAM SNANG GI RIGS KYI YI DAM MKHA' 'GRO CHOS SPYOD GIS BSKOR BA, GA-YAS KYI PAD 'DAB DU RIN CHEN 'BYUNG LDAN LA RIN PO CHE'I RIGS KYI YI DAM MKHA' 'GRO CHOS SKYONG GIS BSKOR BA, RGYAB KYI PAD 'DAB TU SNANG BA MTHA' YAS LA PAD MA'I RIGS KYI YI DAM MKHA' 'GRO CHOS SKYONG GIS BSKOR BA, GA-YON GYI PAD 'DAB TU DON YOD GRUB PA LA LAS KYI RIGS KYI YI DAM MKHA' 'GRO CHOS SKYONG GIS BSKOR BA, DE RNAMS KYI 'OG GI PAD RI
GNYIS PAR SANGS RGYAS, GSUM PIR BYANG SEMS, BZHI PAR RANG RGYAL, LNGA PAR NYAN THOS RNAMS KYIS BSKOR NAS BZHUGS PA, RANG DANG MDUN BSKYED KYI LHA TSOGS THAMS CAD KYI SPYI BOR AOm DKAR PO, MGRIN PAR A'A: DMAR PO, THUGS KAR H'Um SNGON PO, THUGS KA'I H'Um LAS 'OD ZER 'PHROS PAS RANG BZHIN GYI GNAS NAS BSGOMS PA DANG 'DRA BA'I YE SHES PA SPYAN DRANGS NAS BDAG DANG MDUN BSKYED KYI LHA TSOGS GNYIS KA LA THIM PAS SKYABS GNAS KUN 'DUS KYI NGO BOR BSAM MO, ` ,GNYIS PA YAN LAG BDUN PA PHUL NAS GSOL BA GDAB PA NI, GANG ZHIG LA PHYAG 'TSAL NA, RIN CHEN 'PHRENG BA LAS, SANGS RGYAS RNAMS KYI GZUGS KYI SKU, ,BSOD NAMS TSOGS LAS 'KHRUNGS PA STE, ZHES GSUNGS PA LTAR, BSOD RNAMS KYI MTHU LAS GRUB PA'I SKU, SEMS CAN GANG LA GANG 'DUL DU SPRUL PA LA SOGS PA'I YON TAN RNAM PA DU MA'I TSOGS KYIS RAB TU BRGYAN CING, JI TZAM BLTAS KYANG NGOMS PAR MI 'GYUR BA'I PHYAG ZHABS KYI MTHIL 'KHOR LOS MTSAN PA LA SOGS PA'I MTSAN SUM CU RTZA GNYIS DANG, SEN MO ZANGS MDOG LTAR DMAR BA LA SOGS PA'I DPE BYAD BRGYAD CU'I DPAL DANG LDAN PAS GZI 'OD 'BAR BA CAN, RTZOD MED YONGS GRAGS KYI GRUB THOB DAM PA SANGS RGYAS ZHES BYA BA,
, ,DE'I LHA TSOGS RNAMS KYI SKU'I CHA'I DMA' SHOS ZHABS LA RANG GI LUS KYI CHA MTHO SHOS MGO BOS GTUGS TE GUS PAS 'DUD PA NI PHYAG 'TSAL BA'I YAN LAG DANG, DNGOS SU BSHAMS PA'I MCHOD PA CI YOD DANG, KHYAD PAR RANG NYID DAM PAR GSAL BA'I THUGS KA NAS CHU GNYIS NYER SPYOD ROL MO 'DOD YON SOGS KYI MCHOD RDZAS THOGS PA'I LHA MOS MCHOD PAS TSOGS ZHING RNAMS BDE BAS THUGS RGYUD TSIM PAR BSAM PA NI MCHOD PA 'BUL BA'I YAN LAG DANG, RANG GZHAN GYIS SNGON 'KHOR BA THOG MED NAS DA LTA'I BAR DU SGO GSUM GYIS BSAGS PA'I RNAM SMIN YID DU MI 'ONG BA 'BYIN PA'I SDIG PA DANG, GNAS 'OG MAR LTUNG ZHING YON TAN GONG MA SKYE BA LA GEGS BYED PA'I LTUNG BA THAMS CAD 'GYOD SDOM DRAG POS SBYONG BA NI BSHAGS PA'I YAN LAG DANG, SO SO SKYE BO DANG, NYAN THOS 'PHAGS PA DANG, RANG RGYAL 'PHAGS PA DANG, BYANG SEMS 'PHAGS PA DANG, SANGS RGYAS 'PHAGS PA STE GANG ZAG LNGA'I RGYUD KYI DGE BA RNAMS LA DBUL POS GTAR RNYED PA LTA BU'I DGA' BA SGOM PA NI RJES SU YI RANG BA'I YAN LAG DANG, RDO RJES MTSAN PA'I SENG KHRI RE PHUL TE BSTAN PA DANG SEMS CAN GYI DON DU JI SRID 'KHOR BA MA STONGS KYI BAR DE
SRID DU LEGS PAR BZHUGS PAR GSOL BA BTAB PA LTAR ZHAL GYIS BZHES PAR BSAM PA NI, MYA NGAN LAS MI 'DA' BAR GSOL BA 'DEBS PA'I YAN LAG DANG, GSER GYI 'KHOR LO RE PHUL TE 'GRO BA SEMS CAN RNAMS LA RANG RANG GI BLO DANG 'TSAMS PA'I CHOS STON PAR GSOL BA BTAB PA LTAR ZHAL GYIS BZHES PAR BSAM PA NI CHOS 'KHOR BSKOR BAR BSKUL BA'I YAN LAG DANG, BDAG RANG GZHAN GYIS DUS GSUM DU BSAGS PA'I DGE BA RNAMS SANGS RGYAS KYI BYANG CHUB THOB PA'I RGYUR GYUR CIG SNYAM DU BSGOM PA NI BSNGO BA'I YAN LAG STE DE RNAMS LAS DANG PO PA'I BSAG SBYANG GI GNAD 'GAG GCIG PU BSDUS PA'I BSDOMS LTA BU YIN PAS TSIG BSHAR TZAM DU MA SONG BAR RGYUD DANG 'DRES PAR NYAMS SU LEN NO, ,DE NAS RJE BTZUN DAM PA SANGS RGYAS ZHES MTSAN NYI MA DANG ZLA BA LTAR YONGS SU KRAGS SHING, ,'DZAM BU'I LJON PAS MTSAN PA'I GLING 'DI MDZES PAR BYED PA'I RGYAN NYAG GCIG TU BYUNG BA, BDUD BZHI'I DAG PAS RGYAL BAS NI MI PHAM PAR GRAGS PA'I BYAMS MGON GYI RNAM 'PHRUL KHYAD LA GSOL BA 'DEBS PA STE ZHU BA 'BUL LA, ,GANG ZHU NA BDAG DANG SEMS CAN THAMS CAD LA BYANG CHUB SGRUB PA'I 'GAL RKYEN NAD GDON SDIG SGRIB SOGS
, ,SNGAR MED LAS SRUNG ZHING SNGAR YOD LAS SKYOB PAR MDZAD CING, MTHUN RKYEN MCHOG MTHUN MONG GI DNGOS GRUB MA LUS PA STZOL CIG ,CES PA STE, DE'I TSE MGRON RNAMS LAS BDUD RTZI 'OD ZER SNA LNGA'I TSOGS BABS NAS RANG GZHAN GYI 'GAL RKYEN BKRUS SHING BDUD RTZI SA ? LUS KHONGS NAS DNGOS GRUB RGYAS PAR BSAM MO,, ` GSUM PA GTOR MA BYIN GYIS BRLABS NAS 'BUL BA LA GNYIS, BYIN GYIS BRLAB PA DANG, 'BUL BA'O, ,DANG PO NI, GTOR MA RNAMS LA GNAS PA'I BGEGS ZAS SU GTOR MA ZA BA LA SOGS PA RNAMS, AOm BADZRA AA MRi TA KUndA LI HA NA HA NA H'Um PHAt, CES BRJOD LA, RANG GI SNYING GA NAS KHRO BO BDUD RTZI 'KHYIL BA SPROS TE BSANGS, AOm SVA BH'A WA SHUDDHA SARBA DHARMA SVA BH'A WA SHUDDHO NYAHAm, ZHES BRJOD LA, GTOR MA SNOD DANG BCAS PA 'OD DU ZHU NAS GZUNG 'DZIN GYIS BSDUS PA'I CHOS THAMS CAD RANG BZHIN RNAM PAR DAG PA'I STONG NYID KYI LTA BA DRAN TE SBYANGS, STONG PA'I NGANG LAS GTOR SNOD THA DAD DU BYED NA SNOD RE RE'I GO SAR BHR'Um DKAR PO RE RE BYUNG BA 'OD DU ZHU BA LAS RIN PO CHE LAS GRUB PA'I SNOD YANGS SHING RGYA CHE BA RNAMS KYI NANG DU RIM PA LTAR DANG, SNOD GCIG BYED NA DE'I GO SAR BHR'Um DKAR PO ZHIG BYUNG BA YONGS SU GYUR PA LAS RIN PO CHE LAS GRUB PA'I
SNOD YANGS SHING RGYA CHE BA'I MDUN NAS GA-YAS SKOR DU RIM PA LTAR, YAm SNGON PO, RAm DMAR PO, BAm DKAR PO, LAm SER PO RNAMS YONGS SU GYUR PA LAS BYUNG BA'I RLUNG RDZAS SNGON PO ZLA GAM, ME RDZAS DMAR PO GRU GSUM, CHU RDZAS DKAR PO ZLUM PO, SA RDZAS SER PO GRU BZHI STE 'BYUNG BZHI SO SO'I GTOR MA RNAMS KHA DOG MDZES PA, DRI ZHIM PA, RO BDA' BA, NUS PA CHE BA SOGS YON TAN MTHA' YAS PA DANG LDAN PA, ZLA GZUGS GCIG NYID CHU SNOD MANG POR 'CHAR BA LTAR NAM MKHA'I MTHA' DANG MNYAM PAR 'PHRO ZHING, RIGS 'DRA'I RGYUN DUS 'KHOR BA JI SRID MA STONGS KYI BAR DE SRID DU GNAS PA, NGO BO GZUGS SGRA DRI RO REG BYA'I 'DOD YON LNGA DANG LDAN CING, MI MTHUN PHYOGS 'JOMS PA LA BDUD DANG, MTHUN PHYOGS LA PHAN 'DOGS PAS RTZI SMAN DANG 'DRA BAS NA BDUD RTZI, JI TZAM SPYAD KYANG ZAD PA MED PAS NA RGYA MTSO CHEN PO LTAR GYUR PAR BSAM LA, AOm A'A: H'Um, LAN GSUM BRJOD, LAN DANG PO'I TSE, AOm GYIS SNOD DANG, AA: SA ZAS DANG, H'Um GIS CHU'I NYES SKYON SBYONG BA DANG, LAN GNYIS PA'I TSE, AOm GYIS SNOD RIN PO CHE DANG, A'A: SA ZAS RO BRGYA PA DANG, H'Um GIS CHU BDUD RTZIR SGYUR BA DANG, LAN GSUM PA'I TSE, AOm GYIS SNOD STONG GSUM
, ,TZAM DANG, A'A: SA ZAS RI RAB TZAM DANG, H'Um GIS BTUNG BA RGYA MTSO TZAM DU SPEL BAR MOS PA'AM, YANG NA BDAG GI BLA MA'I ZHAL GYI BDUD RTZI LTAR, RANG GI THUGS KA'I H'Um GI THIG LER ZLA GDAN LA RANG GZHAN SEMS CAN SPYI BYE BRAG RNAMS GSAL BTAB NAS, DE RNAMS KYI NAD THAMS CAD BSHAD GCI DANG RNAG KHRAG ,GDON THAMS CAD SDOM SDIG DANG SBAL SPRUL, SDIG SGRIB THAMS CAD SOL KHU DANG DUD KHU'I RNAM PAR BA SPU'I BU GA NAS PHYUNGS TE, GTOR RDZAS RNAMS LA THIM NAS BDUD RTZI'I RANG BZHIN DU GYUR PAR BSAM MO,, ` GNYIS PA 'BUL BA LA GNYIS, SPYI'I DON DANG, GZHUNG GI DON NO, ,DANG PO NI, GTOR SNGAGS SO SO'I DANG POR AOm DANG MTHAR SV'A H'A SBYAR BA LA NI SPRUL GYI GDENGS KA DANG MJUG MA LTAR YOD PAS SBRUL GYI SNGAGS ZHES BYA STE, RDO RJE GTZUG TOR GYI RGYUD LAS, MGO BOR AOm YOD THA MAR NI, ,SV'A H'A DANG YANG YANG DAG LDAN, ,SPRUL TE ZHI BA'I LAS CAN DU, ,SNGAGS STON RNAMS KYIS SHES PAR BYA, ZHES GSUNGS PA'I PHYIR, BAR GYI DBYANGS GSAL 'DI DAG MNGON PA'I LUGS LA MING TSIG YI GE GSUM GYI NANG NAS YI GE KHO NA YIN PAS BOD SKAD LA BSGYUR DU MED DE, SLOB DPON BLO BRTAN GYI PHUNG PO LNGA'I BSHAD PA LAS,
DON GYI NGO BO BRJOD PA MING, ,DE YI KHYAD PAR STON PA TSIG ,GANG YANG MI STON YI GE'O, ZHES GSUNGS PA'I PHYIR, TZA SDE BRJOD PA'I TSE LCE RLUNG LTAR YANG ZHING GA-YO BA'I RNAM PA CAN DANG, tA SDE BRJOD PA'I TSE LCE RTZE ME LCE GYEN DU 'BAR BA'I RNAM PA CAN DANG, PA SDE BRJOD PA'I TSE RLUNG CHU THUR DU 'BAB PA'I RNAM PA CAN DANG, TA SDE BRJOD PA'I TSE LCE SA LTAR SRA ZHING 'THAS 'THAS PO'I RNAM PA CAN DU YOD PAS YI GE DE RNAMS RIM PA LTAR RLUNG ME CHU SA'I KHAMS KYI YI GER BZHAG PA YIN TE, DE LTAR DU SNAR THANG LO TZ'A BA SANGGHA SHR'I'I SNGAGS KLOG GI RANG 'GREL MTHONG BA DON GSAL SOGS LAS BSHAD CING MYONG BAS KYANG GRUB PA'I PHYIR, DE LTAR NA GZHUNG 'DI'I GTOR SNGAGS DANG PO GNYIS GO LDOG PA LTA BUR SNANG BA, CHU BAR NAM MKHA' RGYAL MTSAN LA SOGS PA'I SNGON GYI YIG RNYING SOR GZHAG TU MDZAD PA YIN MOD KYI, ,'BYUNG BA RANG RANG GI KHAMS DANG MTHUN PAR BSGYUR NA LEGS PA YIN TE, SLOB DPON NGAG DBANG RIN CHEN GYI 'BYUNG BZHI GTOR MA DAG 'DON 'KHYER BDER BKOD PA DANG, RJE BTZUN DAM PA NGAG DBANG RDO RJE'I ZHAL SNGA NAS KYI 'BYUNG BZHI GTOR MA LHAN THABS MA GNYIS SU DBYANGS GSAL GNYIS KA RANG RANG GI KHAMS DANG MTHUN PAR BSGYUR CING, RJE LCANG SKYA NGAG DBANG BLO BZANG CHOS LDAN
, ,GYI 'BYUNG BZHI GTOR MA GTONG TSUL LAS KYANG, 'DIR GONG DU BKOD PA'I 'BYUNG BZHI'I GTOR MA BSDU BA'I SNGAGS PA MTSAN THAMS CAD MKHYEN PA'I YIG GE LTAR BKOD PA YIN LA, MKHAS BTZUN YON TAN RGYA MTSO'I GTOR TSOGS LAS, ZLA GAM LA, AOm TZA TSA DZA DZ+HA ? NYA YAm AO AOO SV'A H'A, GRU GSUM PA, AOm tA thA dA dHA SA RAm Ri R'i AE AEE SV'A H'A, ZHES GSAL BYED KYI SNGAGS GNYIS GO LDOG STE 'BYUNG, SNGAGS KLOG RNAMS LAS DBYANGS GSAL 'BYUNG BA SLAR SDUD PA'I TSE, ,AI TZU YE SHE RLUNG GI KHAMS, ,Ri AU BAM ME YI KHAMS, ,ZHES TZA SE RLUNG KHAMS DANG, tA SDE ME KHAMS SU BSHAD PA LTAR NA, SNGA MA YI GE NOR BA YIN NAM SNYAM PAS, BLO GROS DANG LDAN PA RNAMS KYIS DPYAD PAR BYA'O, ,ZHES GSUNGS PA'I PHYIR, 'ON KYANG DBYANGS YIG SNGAGS KLOG RNAMS DANG JI BZHIN MA MTHUN KYANG GZHUNG LTAR BYAS PAS RUNG BAR MNGON TE, SNGA 'GYUR BSDEBS RGYUD KYI DGONGS PAR MDZAD NAS, BEE DKAR LAS, DBYANGS YIG AA A'A Ai AA: MKHA', AI A'I SA YIN AE AEE ME, ,AU A'U CHU LA AO AOO RLUNG, ,Ri R'i MA YIN LA L'i SA, ZHES 'BYUNG BA'I PHYIR RO,, ` GNYIS PA GZHUNG GI DON LA LNGA LAS, DANG PO NI, ,GTOR MA ZLA KHAM DE MGRON SPYI DANG KHYAD PAR MDUN GYI
PAD 'DAB TU BZHUGS PA'I RDO RJE SEMS DPA'I LHA TSOGS RNAMS KYI LJAGS 'OD ZER GYI SBU GUS DRANGS TE GSOL BAS DGYES PAR BSAMS LA, AOm TZA TSA DZA DZNYA NYA YAm, AO AOO SV'A H'A, ZHES LAN GSUM MAM BDUN GYIS BSNGO, RANG GI THUGS KA NAS LHA MO MCHOD RDZAS THOGS PA SPROS TE MCHOD PAR BSAM LA, AOm AARGHAm NAS SHAPTA PRA T'I TZTSA H'Um SV'A H'A'I BAR GYIS MCHOD, SA BON YI LAS BYUNG BA'I RLUNG GI RANG BZHIN GYI RDZAS NOR BU BEEd'URYA SNGON PO'I MDOG CAN, REG BYA YANG ZHING GA-YO BA'I RNAM PA CAN GYI GTOR MA 'DOD PA'I YON TAN LNGA DANG LDAN PA'I BDUD RTZI'I RGYA MTSO CHEN PO 'DI NYID, BLA MA RJE BTZUN DAM PA SANGS RGYAS DANG DE'I STENG GI DNGOS RGYUD KYI BLA MA RNAMS DANG, RDO RJE SEMS DPA' LA SOGS PA'I PHYOGS BZHI'I PAD 'DAB TU BZHUGS PA'I YI DAM MKHA' 'GRO CHOS SKYONG RNAMS DANG, DE RNAMS KYI 'OG GI PAD RIM LA BZHUGS PA'I SANGS RGYAS THUGS RGYUD LA MNGA' BA'I CHOS DANG BCAS PA DANG, TSOGS KYI MCHOG THEG PA GSUM GYI DGE 'DUN DKON MCHOG RNAMS DANG, KHYAD PAR DU MDUN GYI PAD 'DAB TU BZHUGS PA'I SHAR PHYOGS RDO RJE SEMS DPA'I LHA TSOGS 'KHOR DANG BCAS PA RNAMS LA MCHOD PA DAM PAR 'BUL LO, ,THUGS RJES YONGS SU BZHES NAS BDAG CAG MKHA'
, ,MNYAM GYI SEMS CAN THAMS CAD KYI SHA DANG RUS PA SOGS SRA ZHING 'THAS PAS KHAMS DANG, KHRAG DANG THIG LE SOGS BRLAN ZHING GSHER BA CHU KHAMS DANG, STOD SMAD KYI DROD SOGS TSA ZHING SREG PA ME KHAMS DANG, RTZA DANG BU GA'I RLUNG SOGS YANG ZHING GA-YO BA RLUNG KHAMS TE, NANG GI 'BYUNG BA BZHI CHA SNYOMS PAS LUS BDE BA DANG, PHYI YUL GYI SNANG BA THAMS CAD RTEN 'BREL STONG PA'I RANG BZHIN CAN DU 'CHAR ZHING, STONG NYID RTEN 'BREL SNA TSOGS SU SHAR BA'I SGO NAS, BSTAN PA DANG 'GRO BA'I DON MTHA' YAS PA 'GRUB PAR BYIN GYIS BRLAB TU GSOL, KHYAD PAR DU BDAG DANG MAR GYUR SEMS CAN THAMS CAD KYI RGYUD KYI NYON MONGS PA, SDUG BSNGAL DANG DGRA SOGS LA DMIGS NAS MI BZOD CING GNOD PA BYA BAR 'DOD PA'I ZHE SDANG DANG, CHOS THAMS CAD KYI GNAS LUGS LA RMONGS PA'I GTI MUG BAG CHAGS DANG BCAS PA LHAG MED DU ZHI BA DANG, MGO RLUNG DANG SNYING RLUNG DANG GLO RLUNG LA SOGS PA'I RLUNG GI NAD DANG, DKOR BDAG RGYAL PO'I GDON DANG, THE'U RANG 'GONG PO'I GDON DANG, TSANGS PA SOGS STENG PHYOGS LHA'I GDON DANG, DBANG PO SOGS SHAR PHYOGS DRI ZA'I GDON GYI GNOD PA RNAMS LHAG MED DU ZHI BAR MDZAD DU GSO
ZHES 'PHRIN LAS BCOL BAS, GTOR MGRON GZHAN RNAMS KYI SKU LAS BDUD RTZI ZIM CHAR LTA BU DANG, GTZO BO DANG SHAR GYI LHA TSOGS RNAMS KYI SKU LAS BDUD RTZI DRAG CHAR LTA BUR BABS PAS RANG GZHAN GYI NYON MONGS SOGS SDIG SGRIB DUNG ? KHU DANG SOL KHU, RLUNG SOGS NAD BSHANG GCI DANG RNAG KHRAG ,RGYAL 'GONG SOGS GDON SDOM SDIG DANG SBAL SPRUL GYI RNAM PAR SBYANGS, BDUD RTZIS LUS THAMS CAD MER GYIS KHENGS PAS 'BYUNG BZHI CHA SNYOMS SHING, SNANG STONG ZUNG 'BREL GYI RTOGS PA KHYAD PAR CAN MNGON DU GYUR PAR BSAM MO,, ` (GNYIS PA NI), GTOR MA GRU GSUM DE MGRON SPYI DANG KHYAD PAR GA-YAS KYI PAD 'DAB TU BZHUGS PA'I RIN CHEN 'BYUNG LDAN GYI LHA TSOGS LA, AOm tA THA dA dHA nA RAm, AE AEE Ri R'i SV'AH'A SA BSNGOS NAS SNGAR BZHIN MCHOD LA, SA BON RAm LAS BYUNG BA'I ME'I RANG BZHIN GYI RDZAS LI KHRI DMAR PO'I MDOG CAN, REG BYA TSA ZHING ME LCE 'BAR BA'I RNAM PA CAN GYI GTOR MA, MGRON SPYI DANG KHYAD PAR DU GA-YAS KYI PAD 'DAB TU BZHUGS PA'I LHO PHYOGS RIN CHEN 'BYUNG LDAN GYI LHA TSOGS RNAMS LA PHUL NAS, 'DOD DON SPYI DANG KHYAD PAR DU RANG GZHAN GYI NYON MONGS MTHO DMA' DANG BZANG NGAN LA DMIGS NAS SEMS KHENGS SHING MTHO BA'I RNAM PA CAN GYI NGA RGYAL DANG, RNYED BKUR LA
, ,CHAGS PAS YO BYAD GTONG MI PHOD PAR DAM DU 'DZIN PA'I SER SNA SOGS DANG, SHA SER DANG MIG SER DANG KshA YA NAG PA LA SOGS PA'I MKHRIS PA'I NAD DANG, NAG PA BDUD KYI GDON DANG, DMAR PO BTZAN GYI GDON DANG, PHO GDON DRI PHO DANG, 'CHI BDAG NAG PO SOGS LHO PHYOGS GSHIN RJE'I GDON GYI GNOD PA ZHI BA'I 'PHRIN LAS BCOL NAS BDUD RTZI 'BEBS SBYANGS SNGAR GYI RIGS 'GRE SBYAR LA BYA'O,, ` GSUM PA NI, GTOR MA ZLUM PO DE MGRON SPYI DANG KHYAD PAR RGYAB KYI PAD 'DAB TU BZHUGS PA'I SNANG BA MTHA' YAS KYI LHA TSOGS LA, AOm PA PHA BA BHA MA BAm, AU A'U SV'AH'A SA BSNGOS NAS MCHOD LA, SA BON PAm LAS BYUNG BA'I CHU'I RANG BZHIN GYI RDZAS ZLA BA CHU SHEL DKAR PO'I MDOG CAN, REG BYA BRLAN ZHING GSHER BA'I RNAM PA NAN GYI GTOR MA, MGRON SPYI DANG KHYAD PAR DU RGYAB KYI PAD 'DAB TU BZHUGS PA'I NUB PHYOGS SNANG BA MTHA' YAS KYI LHA TSOGS RNAMS LA PHUL NAS, 'DOD DON SPYI DANG KHYAD PAR DU RANG GZHAN GYI NYON MONGS ZAG BCAS KYI DNGOS PO LA YID 'ONG DU MTHONG NAS DON DU GNYER BA'I 'DOD CHAGS SOGS DANG, GRANG RLUNG DANG GRANG MKHRIS DANG BAD KAN GRANG RKYEN CAN LA SOGS PA'I GRANG BA'I NAD DANG, LTA BA LOG PA
DANG DAM SDOM NYAMS PA'I DBANG GIS MI MA YIN GDUG CAN DU SKYES PA'I DAM SRI DANG, MO GDON DRI MO DANG, CHU LHA SOGS NUB PHYOGS KLU'I GDON GYI GNOD PA ZHI BA'I 'PHRIN LAS BCOL NAS BDUD RTZI 'BEBS SBYANGS SNGAR BZHIN BYA'O,, ` (BZHI PA NI,) GTOR MA GRU BZHI DE MGRON SPYI DANG KHYAD PAR GA-YON GYI PAD 'DAB TU BZHUGS PA'I DON YOD GRUB PA'I LHA TSOGS LA, AOm TA THA DA DHA NA LA, Li L'i AI A'I SV'AH'A SA BSNGOS NAS MCHOD LA, SA BON LA LAS BYUNG BA'I SA'I RANG BZHIN GYI RDZAS GSER SBYANGS BTZO MA SER PO'I MDOG CAN, REG BYA SA ZHING 'THAS PA'I RNAM PA CAN GYI GTOR MA, MGRON SPYI DANG KHYAD PAR DU GA-YON GYI PAD 'DAB TU BZHAGS PA'I BYANG PHYOGS DON YOD GRUB PA'I LHA TSOGS RNAMS LA PHUL NAS, 'DOD DON SPYI DANG KHYAD PAR DU RANG GZHAN GYI NYON MONGS RNYED BKUR LA CHAGS PAS GZHAN GYI PHUN TSOGS MI BZOD PAR SEMS 'KHRUG PA'I PHRAG DOG SOGS DANG, SKYE BA DANG SER PO DANG SMUG PO SOGS BAD KAN GYI NAD DANG, SA BDAG LTO 'PHYE CHEN PO'I GDON DANG, LUS NGAN SOGS BYANG PHYOGS GNOD SBYIN GYI GDON GYI GNOD PA ZHI BA'I 'PHRIN LAS BTZAL NAS BDUD RTZI 'BEBS SBYANGS SNGAR BZHIN BYA'O,, ` LNGA PA NI, GTOR MA LNGA PA ZAN RIL LAM, ZLUM GTOR RAM, GLUD GZUGS
, ,GANG YIN KYANG DE NYID 'KHOR 'DAS KYI MGRON SPYI DANG KHYAD PAR LAN CHAGS LA BSNGO TSUL NI, GONG GI YE SHES PA SPYAN 'DREN DANG MNYAM DU DGUG PA'AM, YANG NA 'DIR SKAD CIG GIS SENG KHRI'I 'OG GI SA GZHIR PHYOGS BZHI'I GDON BGEGS SPYI DANG KHYAD PAR LAN CHAGS KYI MGRON RNAMS GSAL BTAB STE, AOm AA K'A RO MU KHAm SARBA DHARM'A n'Am A'ADYA NU TPA NNA TV'ADA, AOm A'A: H'Um PHAt SV'AH'A, ZHES PA LAN GSUM GYIS BYIN GYIS BRLAB CING BSNGO BA YIN TE, SNGAGS 'DI 'BYUNG PO 'KHOR BCAS KYI MGRON THAMS CAD KYI GTOR MA BYIN GYIS RLOB PA'I SNGAGS DANG, GTOR MA BSNGO BA'I SNGAGS SU BRTAG GNYIS RTZA 'GREL LAS BSHAD PA LTAR YIN PAS, GZHUNG 'DIR GTOR MA LNGA PA 'DI LA BYIN RLABS GSAL BAR MI 'BYUNG GA-YANG TSUL 'DI LA DGONGS PAR MNGON NO, , DE YANG SNGAGS 'DI'I DON NI, AOm NI SKU GSUNG THUGS KYI RDO RJE GSUM DBYER MI PHYED PA'I RDO RJE SEMS DPA' MTSON BYED, AA KthA RA NI AA YIG NYID, MU KHAm NI SGO'O, ,SARBA NI THAMS CAD, DHARM'A n'Am NI CHOS RNAMS KYI, A'ADYA NI GDOD MA NAS, NUTPANNA NI SKYE BA MED PA'I, TVAD NI PHYIR, AOm A'A: H'Um NI, RANG DANG MGRON GNYIS KA'I SGO GSUM DANG, GTOR MA RDO RJE GSUM DU BYIN GYIS RLOB BYED, PHAt NI
SKYON SEL BYED, SV'AH'A NI YON TAN SDUD BYED DE, MDOR NA NGES DON GYI RDO RJE SEMS DPA' BDE BA CHEN PO'I YE SHES KYIS GTOR BSNGO'I 'KHOR GSUM SOGS CHOS THAMS CAD KYI GNAS LUGS STONG PA NYID LA MNYAM PAR BZHAG NAS, BDE STONG DE NYID DAG PA'I 'KHOR GSUM RTEN 'BREL SGYU MA LTA BUR SHAR BA'I NGANG NAS GTOR MA 'BUL DGOS PA'I DON TE, BAR GYI SNGAGS DON RNAMS DRIL NA AA YIG NYID GDONG MA NAS SKYE BA MED PA'I PHYIR CHOS THAMS CAD KYI SGO'O, ,ZHES PAR 'GYUR RO, ,DE NAS YANG MGRON RNAMS LA SNGAR BZHIN MCHOD NAS, PHUN SUM TSOGS PA'I 'DOD PA'I YON TAN LNGA DANG LDAN PA'I BDUD RTZI'I RGYA MTSO CHEN PO'I GTOR MA 'DI NYID, SNGON TSE RABS THOG MA MED PA NAS DA LTA LA THUG GI BAR DU, RANG NYID KYIS PHAR GZHAN BSAD PAS SROG GI LAN CHAGS PA DANG, BCINGS SHING BRDEG 'TSOG BYAS PAS NGAN PA'I LAN CHAGS PA DANG, RDZAS MTHUS PHROGS SHING 'JAB BUS BKUS PAS NOR GYI LAN CHAGS PA SOGS, MDOR NA LAN CHAGS SHING SHA 'KHON ZHUGS PAS RANG GI LUS SROG LONGS SPYOD LA GNOD 'TSE BYED PA DON DU GNYER BA'I 'GRO BA RNAMS DANG, RANG LA BU LON CHAGS PA MA GZHAL BAR YOD PA'I SEMS CAN JI SNYED CIG MCHIS PA RNAMS LA BSNGO BAR
, ,BYA'O, ,MCHOD SBYIN GYI GTOR MA GANG LA CI 'DOD DU SPRUL PA 'DI NYID KYIS YID TSIM PAR GYUR NAS PHYIN CHAD LAN CHAGS GNYER BA RNAMS KYI SHA 'KHON 'GRAS ZHUGS MA LUS PA BYANG ZHING DAG CING, BU LON CHAGS PA RNAMS KYANG GTOR MA 'DIS KHYER BAR GYUR NAS, NGAN 'BREL THOGS PA'I SEMS CAN DE DAG THAMS CAD KYIS KYANG MYUR DU RDZOGS PA'I SANGS RGYAS KYI GO 'PHANG DAM PA THOB PAR SHOG CIG ,CES SMON LAM ZHE THAG PA NAS GDAB BO,, ` (GSUM PA MJUG CHOG LA GNYIS, SPYIR BTANG DANG, DMIGS BSAL LO, ,DANG PO NI, RGYUN PAR SHER SNYING 'DON PA'AM, YANG NA, CHOS RNAMS THAMS CAD RGYU LAS 'BYUNG, ZHES PA NAS, CHOS RNAMS DE LTAR SHES PAR GYIS, ZHES PA'I BAR GYIS MAR MGRON RNAMS LA CHOS SBYIN BYAS PAS, THAMS CAD KYIS DON GO NAS RGYUD LA SA LAM GYI YON TAN RNAMS SKYES PAR BSAMS LA, MGRON YE SHES PA RNAMS BDAG NYID LA THIM ZHING, 'JIG RTEN PA RNAMS ZANG ZING GI SBYIN PAS RGYUD SMIN, CHOS KYI SBYIN PAS RGYUD GROL NAS RANG GNAS SU GSHEGS PAR GYUR, CES BSDUS TE, 'DI LTAR BGYIS PA'I BSOD NAMS DANG, ZHES PA NAS, SKU GSUM GLING DU PHYIN GYUR CIG ,CES PA'I BAR GYIS BSNGO BA DANG SMON LAM BYA ZHING,
NYIN MO BDE LEGS MTSAN BDE LEGS, ,NYI MA'I GUNG YANG BDE LEGS SHING, ,NYIN MTSAN RTAG TU BDE LEGS PA'I, ,DKON MCHOG GSUM GYI BKRA SHIS SHOG ,CES BKRA SHIS KYIS MTHA' BRGYAN PAR BYA'O, , (GNYIS PA DMIGS BSAL NI,) NAD PA'I PHYIR GLUNG RDZONG BYED NA, LAN CHAGS GTOR MA RDZOGS PA'I MJUG DANG, KYEE ZHES BSNGO YUL RNAMS LA BOS NAS, RUS PA'I GLUNG DANG SHA'I GLUNG GNYIS SA KHAMS SU GCIG PAS DE GNYIS DANG GTOR MA GRU BZHI RDO DANG SA LA DANG, KHRAG GI GLUD DANG GTOR MA ZLUM PO CHU DANG, DROD KYI GLUD DANG GTOR MA GRU GSUM ME DANG, DBUGS KYI GLUD DANG GTOR MA ZLA KHAM RLUNG DANG, SEMS KYI GLUNG DANG ZLUM GTOR NAM MKHA' LA GTOR BA YIN PAS GLUD GTOR 'DI RNAMS NI PHYI RAGS PA LTAR BLTAS NA NI, TZAN DAN DKAR DMAR DZ'A TI GA PUR GUR KUM STE DRI LNGA DANG, SLE HRES KAndA KA RI DBANG LAG RGYA MTSO LBU BA SHU DAG DKAR PO STE SMAN LNGA'I RANG BZHIN DANG, NANG PHRA BA LTAR BLTAS NA NI GSER DNGUL MU TIG BYUR MU MAN TE RIN PO CHE SNA LNGA'I RANG BZHIN DANG, GSANG BA GNAS LUGS LTAR BLTAS NA NI SANGS RGYAS, MKHA' 'GRO, RDO RJE, MKHA' 'GRO, RIN CHEN, MKHA' 'GRO, PADMA, MKHA' 'GRO, LAS KYI MKHA' 'GRO, STE YE SHES KYI MKHA' 'GRO SDE LNGA'I RANG BZHIN CAN YIN PAS, RGYU SBYOR BA'I SBYIN
, ,BDAG DANG SGRUB PA PO BDAG CAG 'KHOR DANG BCAS PA'I LUS SROG GI GLUD DANG GTOR MA KHYAD PAR CAN 'DI RNAMS KHYED 'BYUNG BA LNGA LA GNAS PA'I LHA 'DRE RNAMS KYIS LONG LA, BDAG CAG RNAMS LA BSAM PAS 'KHON 'GRAS DANG, SBYOR BAS GNOD 'TSE MA BYED PAR RANG RANG SO SO'I GNAS SU SONGS SHIG CES PA DANG, GATZTSA GDON BGEGS LAN CHAGS 'BYUNG PO'I TSOGS RNAMS RANG GNAS SU GSHEGS PAR GYUR, AOm BADZRA SA M'A DZA: MGRON YE SHES PA RNAMS BDAG NYID LA THIM PAR GYUR, CES BSDUS LA, BSNGO BA SMON LAM DANG BKRA SHIS SNGAR BZHIN BYAS TE, ZLUM GTOR GLUD DANG BCAS PA NAM MKHAR 'THOR BA'AM SA GTZANG SAR, GRU BZHI BYANG, ZLUM PO NUB, GRU GSUM LHO, ZLA KHAM SHAR PHYOGS SU BSKYAL LO, SMRAS PA, SNYIGS MA'I LANG TSO DAR BA'I SNGO BSANGS MAR, ,NAG PO'I LAS KYI CHU 'DZIN CHER 'KHRUGS TE, ,NAD GDON ME CHAR 'BEBS LAS SKYOB PA'I GO ,'BYUNG BZHI GTOR MA'I MA NGA NA 'DIR BAS, ,DE PHYIR KVA YE GZUR GNAS BLO LDAN DAG , BSHAD 'KHRID SGEG MO'I ME LONG 'DIR LTOS DANG, ,TSIG DON DMIGS GNAD MDZES PA'I BZHIN RAS NI, ,MNGON DU GYUR NAS SPRO DGA' CIS MI 'PHEL, ,MAN NGAG BDUD RTZIS RNA BA'I SNOD BKANGS SHING
MIG DBANG DAM PA'I GZHUNG MANG KUN LA BKOD, ,SEMS NYID RTOG DPYOD KHUR GYIS DUB BYAS NAS, ,BGYIS SO SNOD LDAN MCHIS NA CI DGAR SPYOD, ,'ON TE SA LE SBRAM DANG GSEG MA'I PHYE, ,RIN THANG MNYAM POR 'DEGS PA DENG GI DUS, ,DPYAD GSUM YONGS DAG LEGS BSHAD SMRA BA YANG, ,TZU TA'I YUL DU RKANG GNYIS SGRUB PA 'DRA, ,RAB DKAR LHAG BSAM 'O MA'I RDZING BU LAS, ,'KHRUNGS PA'I LEGS BYAS DPAG BSAM LJON PA'I RTZER, ,RNAM MKHYEN 'BRAS BU'I GA-YUR ZA LDEM PA'I RO, ,MKHA' MNYAM YID CAN KUN GYIS MYONG GYUR CIG ,(CES 'BYUNG BZHI GTOR MA'I BSHAD 'KHRID LEGS BSHAD GSAR PA'I DGA' STON MTHONG BA 'DZUM SHOR ZHES BYA BA 'DI NI, SHEL DKAR LEGS BSHAD GLING GI RAB 'BYAMS SMRA BA BLO BZANG YE SHES ZHES BYA BAS RJE SMAN KHANG PA'I RNAM MGUR GLEGS BAM GYI SKYES DANG BCAS GSUNG 'PHRIN GYI LAM NAS BSKUL MA MDZAD NGOR DGE SLONG SNYOM LAS PA DHARMA BHA DRAS BLA MA'I MAN NGAG DANG 'DI SKOR GYI YIG CHA CI RNYED LA LEGS PAR BRTAGS TE DBANG PHYUG GI LO'I SA GA ZLA BA'I DMAR PHYOGS KYI DGA' BA DANG PO'I TSES LA BZHAD DNGUL CHU'I RI PHUG TU SBYAR BA'O, ,'DIS KYANG BSTAN 'GRO LA PHAN PAR GYUR CIG , *, SDE DGE'I PAR RKOS TSE RING DBANG RGYAL GYIS PAR TU BSGRUBS PA DGE'O,, SARBA DZAG TAm,, ,,