*, ,BAR DO 'PHRANG SGROL GYI GSOL 'DEBS 'JIGS SGROL GYI DPA' BO'I RNAM BSHAD PAn CHEN DGONGS RGYAN ZHES BYA BA BZHUGS SO, ,
, ,NA MO GU RU W'A GINDRA BADZRNYA YA, SKU GSUM DBANG PHYUG KHYAB BDAG RDO RJE 'CHANG, ,BSLAB GSUM RGYAN LDAN NGUR SMRIG ZLOS GAR MKHAN, ,KHAMS GSUM 'GRO BA'I BLA MA TZONG KHA PA'I, ,GSANG GSUM SHES PAS RNAM KUN SKYONG GYUR CIG ,BLO BZANG CHOS KYI RGYAL MTSAN 'DZIN PA'I ZHABS, ,BDAG SNYING 'DAB BRGYA'I ZE'U 'BRUR BZHUGS SHIG DANG, ,KHYOD KYI RMAD BYUNG LEGS BSHAD DKA' BA'I MDUD, ,RNAM DPYOD SOR MOS DGROL BA BDAG GIS BYA, DE YANG PAn CHEN BLO BZANG CHOS KYI RGYAL MTSAN GYIS MDZAD PA'I BAR DO 'PHRANG SGROL GYI GSOL 'DEBS 'JIGS SGROL GYI DPA' BO ZHES BYA BA 'DI NYID 'CHAD PA LA GSUM, RTZOM PA LA 'JUG PA KLAD KYI DON, BRTZAM PAR
, ,BYA BA GZHUNG GI DON, RTZOM PA MTHAR PHYIN PA MJUG GI DON NO, ,DANG PO NI, NA MO GU RU MANYDZU GHO sh'A YA ZHES PA STE, NA MO PHYAG 'TSAL BA'AM 'DUD PA, GU RU BLA MA, MANYDZU 'JAM, GHO shA DBYANGS, DE LA RNAM DBYE BZHI PA'I GCIG TSIG DE BYIN, KA L'A PA LAS, DE YA'O, ZHES PAS DE YA SROG LDAN DU BSGYUR, AA YIG SGRA LDAN LA RING PO'O, ZHES BAS shA'I SROG GI AA YIG SGRA LDAN YA PHA ROL LA RING POR BSGYUR BAS, GHO sh'A YA STE, DON DU BLA MA 'JAM DBYANGS LA PHYAG 'TSAL LO, ,ZHES MCHOD PAR BRJOD PA'O, ,GNYIS PA BRTZAM PAR BYA BA GZHUNG GI DON LA GNYIS, MDOR BSTAN PA DANG, RGYAS PAR BSHAD PA'O, ,DANG PO NI, DUS GSUM BDE GSHEGS ZHES SOGS TSIGS BCAD GCIG STE, TSIG RKANG DANG POS SKYABS YUL, GNYIS PAS SKYABS SU 'GRO MKHAN, GSUM PAS SKYABS SU 'GRO BA'I DUS, BZHI PAS BSKYAB BYA'I 'JIGS PA STON PAS, 'DAS MA 'ONGS DA LTA'I
DUS GSUM GYI BDE GSHEGS RNAMS NI SANGS RGYAS DKON MCHOG STE, SANGS RGYAS LA BDE GSHEGS ZHES BRJOD PA NI, LAM BDE BA NAS 'BRAS BU BDE BA SPANGS RTOGS KHYAD PAR GSUM LDAN GYI SAR GSHEGS PAS SO, ,CHOS DANG ZHES PA CHOS DKON MCHOG STE, LUNG DANG RTOGS PA'I CHOS GNYIS KA'O, ,TSOGS BCAS ZHES PA DGE 'DUN DKON MCHOG STE NYAN RANG BYANG 'PHAGS SOGS SO, ,SKYABS SU 'GRO MKHAN NI, BDAG DANG NAM MKHA'I MTHA' DANG MNYAM PA'I 'GRO BA RIGS DRUG PAR DO DANG BCAS PA MA LUS PA'O, ,DUS NI THEG CHEN GYI SKYABS 'GRO YIN PAS BYANG CHUB SNYING PO MA THOB KYI BAR DU SKYABS SU MCHI BA STE 'GRO'O, ,BYANG CHUB SNYING PO LA, RTOGS PA BYANG CHUB SNYING PO YE SHES CHOS KYI SKU, LONGS SKU'I GNAS BYANG CHUB SNYING PO 'OG MIN STUG PO BKOD PA, SPRUL SKU'I GNAS BYANG CHUB SNYING PO RGYA GAR RDO RJE GDAN DANG GSUM YOD DO, ,BSKYAB BYA'I 'JIGS PA NI, SKYAB 'DI LA 'JIGS PA DANG, SKYAB PHYI MA RNAMS KYI 'JIGS PA DANG, SRID PA BAR DO'I 'JIGS PA GSUM YIN TE, 'DIR MA 'DUS PA'I BSKYAB BYA'I 'JIGS PA GANG YANG MI SRID PAS 'DI NI 'JIGS PA LAS SGROL BA'I GSOL 'DEBS PHYI MA RNAMS KYI MDOR BSTAN
, ,NO, ,'O NA BAR DOR MA ZAD SKYE BA 'DI PHYI'I 'JIGS PA LAS SGROL BA'I GSOL 'DEBS KYANG 'DUG NA, GZHUNG 'DI LA BAR DO 'PHRAD SGROL GYI GSOL 'DEBS ZHES BRJOD PA CI ZHIG CE NA, SPYIR RAS YUG GI PHYOGS GCIG TSIG PA LA RAS YUG TSIG GI ZHES PA LTAR CHA SHAS LA TSOGS PA DANG TSOGS PA LA CHA SHAS KYI SGRA 'JUG PA DU MA SNANG BAS MI 'GAL LA, KHYAD PAR RIM LNGA BSDUS PA GSAL BA LAS, BAR DO RNAM GSUM BSRE BAR BYA, ZHES PA LTAR, SKYES NAS MA SHI'I BAR LA SKYE 'CHI BAR DO DANG, GNYID DU SONG NAS MA SANG KYI BAR LA RMI LAM BAR DO DANG, SHI NAS SKYE BA MA BLANGS KYI BAR LA SRID PA BAR DO ZHES 'BYUNG BAS, SKYE BA 'DI PHYIR 'JIGS PA THAMS CAD BAR DO'I 'JIGS PAR KHAS BLANGS CHOG GO , GNYIS PA RGYAS PAR BSHAD PA LA, TSE 'DI DANG BAR DO DANG SKYE BA BRGYUD NAS 'TSANG RGYA BA'I TSUL GSUM MAM, TSE 'DI DANG 'CHI GA DANG BAR DO'I NYAMS LEN GSUM DU BSDUS KYANG RUNG MOD, 'ON KYANG 'DI LA GNYIS, TSE GANG GI NYAMS LEN RNYING POR DRIL BA DANG, 'CHI DUS KYI BSRE SKOR NYAMS SU LEN TSUL LO, ,DANG PO LA GNYIS, DON CHEN GYI SNYING PO LAN TSUL
DANG, DON MED KYI RNAM GA-YENG 'GOG TSUL LO, ,DANG PO NI, RNYED DKA' 'JIG PAR ZHES SOGS TSIGS BCAD GCIG STE, RGYU DANG 'BRAS BU'I SGO NAS RNYED PAR DKA' ZHING CHU'I CHU BUR LTAR RKYEN CUNG ZAD KYIS KYANG 'JIG PAR SLA BA'I DAL 'BYOR RDO RJE'I LUS RTEN BZANG PO GNAS SKABS DANG MTHAR THUG GI DGOS PA THAMS CAD BDE BLAG TU SGRUB NUS PA THOB PA'I DUS 'DIR, TSE BLOS BTANG STE CHOS TSUL BZHIN DU BYAS NA SKYE BA GTAN GYI SKYID 'GO TSUGS PA'I KHE DANG, TSE 'DI'I CHED DU SDIG PA BSAGS NA SKYE BA GTAN GYI SDUG 'GO TSUGS PA'I NYEN SHIN TU CHE BA GNYIS GANG BYED RANG LA 'DAM GA YOD PA'I SKABS YIN TE, RJE MI LAS, BSOD NAMS CAN THAR PA 'DOD PA RNAMS KYI DAL 'BYOR LUS KYI GRUB CHEN LAS NGAN CAN SDIG PA GSOG PA RNAMS KYI NGAN 'GROR 'KHRID PA'I SNA 'DREN, YAR 'GRO MAR 'GRO'I SA MTSAMS, MDUN MA GTAN LEGS DANG, GTAN NYES KYI KHYE NYEN SHIN TU CHE BA'I DUS KYEM PA CIG YIN PAR GO ,ZHES DANG, YONGS 'DZIN PAndIT CHEN POS KYANG, YAR 'GRO MAR 'GRO'I MTSAMS 'DIR BSAM BLO THONGS, ,GTAN GYI SKYID SDUG 'DAM GA DA RES BYUNG, ZHES GSUNGS PA'I PHYIR, DES NA DON MED TSE 'DI TZAM GYI CHED DU DGRA 'DUL GNYEN SKYONG TSOD ZHING PHYUGS 'TSO SOGS CHOS BRGYAD DKAR NAG KHRA GSUM GYI BYA BA NGAN PAS MI GA-YENG BAR, DON CHEN RANG
, ,GZHAN GTAN GYI BDE BA BSGRUBS TE DAL 'BYOR THOB PA LA SNYING PO LEN NUS PAR BYIN GYIS RLOBS SHIG ,CES PA STE, SNYING PO JI LTAR BLANG BA NI, RJE RANG NYID KYIS SNYING PO LEN PA'I TSUL YANG BLA MA SANGS RGYAS 'BRAL MED DU BSTEN NAS, DES BSTAN PA'I THEG PA MCHOG GI GDAMS PA'I SNYING PO NYAMS SU BLANGS LA, TSE GCIG NYID LA SANGS RGYAS KYI GO 'PHANG THOB PAR BYA'O, ZHES GSUNGS PA LTAR RO, ,GNYIS PA DON MED KYI RNAM GA-YENG 'GOG TSUL NI, 'DUS PA 'BRAL ZHING ZHES SOGS TSIGS BCAD GCIG STE, DE YANG 'DUL BA LUNG LAS, BSAGS PA KUN GYI MTHA' 'DZAD CING, ,MTHON PO RNAMS KYI MTHA' LTUNG 'GYUR, ,PHRAD PA'I MTHA' NI 'BRAL BA STE, ,GSON PA'I MTHA' NI 'CHI BA YIN, ZHES GSUNGS PA LTAR, GNYEN GROGS LHAN CIG TU 'DUS PA THAMS CAD MTHAR NGES PAR 'BRAL DGOS SHING, ZAS NAR 'BAD RTZOL GYIS BSAGS PA RNAMS MTHAR TIL 'BRU TZAM YANG MA LUS PAR 'DZAD NGES PA DANG, 'KHOR BA'I GOS MTHON PO JI 'DRA ZHIG THOB KYANG MTHA' RGUD PAS SDUD CING, SKYES PA THAMS CAD KYI MTHA' MA 'CHI BA LAS MA 'DAS LA, MTHAR 'CHI DGOS PA TZAM DU MA ZAD NAM GYI TSE 'CHI BA'I CHA RGYUS KYANG MED PAS NA DE RING SANG LTA BUR YANG 'CHI NYAN YOD PAS, TSE 'DI'I
GNYEN NOR GO SA SOGS DON MED KYI BYA BA RNAMS SGRUB LONG MED PAR NAM 'CHI NGES MANG RGYUD LA SKYES TE DA LTA NYID DU 'CHI CHOS DON CHEN GYI SNYING PO LEN PAR BYIN GYIS RLOBS SHIG ,CES PA'O, ,GNYIS PA 'CHI DUS KYI BSRE SKOR NYAMS SU LEN TSUL LA GNYIS, BSRE SKOR NYAMS SU LONGS PA'I THABS BSTAN PA DANG, BSRE SKOR NYAMS SU LEN TSUL DNGOS BSTAN PA'O, ,DANG PO LA GNYIS, BSRE SKOR NYAMS SU LONGS BA'I 'GAL RKYEN 'GOG PA DANG, BSRE SKOR NYAMS SU LONGS PA'I MTHUN RKYEN SGRUB PA'O, ,DANG PO LA GNYIS, GNAD GCOD KYI SDUG BSNGAL 'GOG PA DANG, MI DGE BA'I 'KHRUL SNANG 'GOG PA'O, ,DANG PO NI, GZUNG 'DZIN RNAM RTOG CES SOGS TSIGS BCAD GCIG STE, SO SKYE'I RGYUD KYI GZUGS SGRA SOGS PHYI GZUNG BA'I YUL GYI RNAM RTOG DANG, MIG GI RNAM SHES DANG RNA BA'I RNAM SHES SOGS NANG 'DZIN PA'I SEMS KYI RNAM RTOG GIS BSDUS PA'I CHOS THAMS CAD MA RIG PAS BSLAD PA'I 'KHRUL SNANG SHAS CHE BAS, DE 'DRA'I 'KHRUL BAR SHAR BA'I KHAMS GSUM 'KHOR BA'I GRONG KHYER CHEN PO 'DIR, MI GTZANG BA'I RDZAS SO DRUG DANG 'BYUNG BA BZHI LAS GRUB CING, SNANG YANG BDEN MED SGYU MA'I RTA GLANG DANG 'DRA BA'I GZUGS KYI PHUNG PO DANG, YID KYI RNAM PAR SHES PA GNYIS SO SOR 'BRAL KHA MA'I PHYI NANG GI 'CHI RKYEN SNA TSOGS BAS 'BYUNG BA
, ,'KHRUGS PA'I GNAD GCOD KYI SDUG BSNGAL DRAG PO DE ZHI ZHING MI 'GYUR BAR BYIN GYIS RLOBS SHIG PA STE, MI GTZANG BA'I RDZAS SO DRUG NI, SKRA SPU SO SEN RDUL DRI SHA RUS PAGS, ,RTZA RGYUS SNYING MKHAL MCHIN MCHER RGYU GLO GNYE MA, ,PHO LONG LGANG PA MCHI MA MCHIL SNABS RTUG GCIN ZHAG ,RKANG TSIL BAD MKHRIS RNAG KHRAG CHU SER KLUNG RGYUD PA, ZHES PA LTAR DANG, 'BYUNG BA BZHI NI, MA SHA RUS PA SOGS SRA BAS KHAMS, KHRAG CHU SER SOGS MA GSHER BA CHU KHAMS, STOD SMAD KYI DROD SOGS TSA BA ME KHAMS, SROG THUR SOGS GA-YO BA RLUNG KHAMS SNAMS SO, ,GNAD GCOD CES PA'I GNAD NI, BSHAD RGYUD LAS, GNYAN PA'I GNAD LA SHA TSIL RUS PA DANG, CHU RGYUS DON SNOD RTZA YI GNAD DANG BDUN ZHES GSUNGS PA LTAR, GANG NYAMS NA SROG 'GAG PA'I LUS KYI GNAD SA'AM GNYAN PA DANG, GCOD PA NI, MDZOD LAS, GNAD GCOD PA NI CHU SOGS KYIS, ZHES GSUNGS PA LTAR, BAD KAN SHAS CHE NA CHU KHAMS DANG, MKHRIS PA SHAS CHE NA ME KHAMS DANG, RLUNG SHAS CHE NA RLUNG KHAMS RNAMS 'KHRUGS NAS LUS KYI GNAD SA ZHIG NYAMS PAR BYAS PA'I SGO NAS SROG GCOD PA STE, DE LTA BU'I GNAD GCOD NI LHA DANG DMYAL BA MA GTOGS PA'I SKYE GNAS THAMS CAD LA YOD CING, DGE BA CAN
GNAD GCOD TSABS CHUNG LA SDIG CAN LA GNAD GCOD DRAG PO 'BYUNG BAR LAM RIM CHEN MOR GSUNGS PAS, ,DE 'DRA'I GNAD GCOD KYIS GDUNGS NA BSRE SKOR NYAMS SU LEN PA'I GEGS BYED PAS, DE MED PAR GSOL BA 'DEBS PA'O, ` ,GNYIS PA MI DGE BA'I 'KHRUL SNANG 'GOG PA NI, GCES PAR BSKYANGS PA'I ZHES SOGS TSIGS BCAD GCIG STE, ZAS GOS GNAS MAL SMAN DPYAD RIM GRO SOGS KYI SGO NAS GCES BAR BSKYANGS PA'I RANG GI LUS KYIS DGOS GAL CHE BA'I DUS SU PHAN MA THOGS PAR BSLUS PAR GYUR CING, SPYOD 'JUG LAS, GSHIN RJE'I PHO NYA 'JIGS 'JIGS LTA'I, ,SHA TSUGS CAN GYIS BZUNG GYUR CING, , 'JIGS CHEN NAD KYIS THEBS GYUR PA, ,RAB TU NYAM THAG SMOS CI DGOS, ,ZHES GSUNGS PA LTAR, 'JIGS SU RUNG BA'I CHA BYAD CAN GYI 'CHI BDAG GI GSHIN RJE SROG 'PHROG PA'I DGRA BO MNGON SUM DU 'ONGS BAR GYUR LA, RANG RGYUD KYI NYON MONGS 'DOD CHAGS ZHE SDANG GTI MUG GI DUG GSUM GANG SHAS CHE BA DANG MTHUN PA'I GNAD GCOD PA'I 'BYUNG BA'I MTSON GYIS RANG GI SROG GCOD PAR BYED PA DE'I TSE NA, SDIG CAN RNAMS LA GZUGS MI SDUG PA DU MA RMI LAM BZHIN DU MTHONG NAS SDUG BSNGAL DANG DNGANGS SKRAG 'BYUNG BAR GSUNGS PAS, DE LTA BU'I MI DGE BA'I 'BRAS BU'I 'KHRUL SNANG NGAN PA ZHI BAR BYIN GYIS RLOBS
, ,SHIG PA STE, BSHAD RGYUD LAS, 'DOD CHAGS ZHE SDANG GTI MUG DUG GSUM LAS, ,'BRAS BU RLUNG MKHRIS BAD KAN NYES PA SKYED, ,CES GSUNGS PA LTAR, DUG GSUM GYIS NYES PA GSUM DANG, DE GSUM GYIS RLUNG ME CHU'I GNAD GCOD GSUM SKYED PAS DUG GSUM MTSON GYIS RANG SROG GCOD PAR GSUNGS SO, ,GNYIS PA BSRE SKOR NYAMS SU LONGS PA'I MTHUN RKYEN SGRUB PA LA GNYIS, BLA MA'I GDAMS NGAG DRAN PAR SMON PA DANG, DRAN NAS GDENGS TSED RNYED PAR SMON PA'O, ,DANG PO NI, SMAN PAS BOR ZHING ZHES SOGS TSIGS BCAD GCIG STE, RGYAL MCHOG LNGA BAS, SMAN MO BON RIM GROS MA PHAN PAR, ,ZHAG RE RE SONG GIN JE THUR NA, ,GROGS NYE DU 'KHOR GA-YOG SUN NAS 'BYOL, ,'DI GSHIN RJES 'BOD PA'I PHO NYA YIN, ZHES GSUNGS PA LTAR, SMAN PA RNAMS KYIS MI 'TSO BAR RTOGS NAS THABS KYIS BOR ZHING, RIM GRO JI LTAR BSGRUBS KYANG BZLOG PA'I MTSAN MA MED PA DANG, GNYEN BSHES RNAMS SNGAR GSON DU RE YANG DA RE THAG CHAD NAS GSHIN DGE DANG NGUR GYI GSHOM NGA BYED PA'AM 'GA' ZHIG MYA NGAN GYIS NON CING, KHA CIG SUN PA'I RNAM 'GYUR STON PAR BYED LA, RANG NYID MYA NGAN GYI THAB LA DGRA BOS BCOMS PA LTAR CI BYA GTOL MED DU GYA BAR GYUR PA'I TSE NA, SNGAR BLA
MAS BSTAN CING RANG GIS BSAM SGOM BYAS PA'I BSRE BA SKOR GSUM GYI GDAMS NGAG RNAMS DRAN NAS NYAMS SU LONGS BAR BYIN GYIS RLABS SHIG PA'O, ,GNYIS PA DRAN NAS GDENGS TSAD RNYED PAR SMON PA NI, SER SNAS BSAGS PA'I ZHES SOGS TSIGS BCAD GCIG STE, RGYAL SRAS RIN PO CHES, 'TSOL BA'I TSE NA NYON MONGS BRGYA YI RTEN, ,RNYED NAS SPYOD PAR 'DOD TSE SER SNA'I GZHI, ,GAL TE GZHAN GYIS PHROGS NA SME SNGAGS RGYU, ,SHI NAS PHAM PA MED PA'I NOR GYIS CI, ,ZHES GSUNGS PA LTAR, YO BYAD GTOD MI NUS PA'I SER SNAS BSAGS PA'I ZAS DANG NOR YID DU 'OD PA JI TZAM YOD KYANG RANG NYID KYI KHA PHOR TZAM YANG 'KHYER DU MED PAR SHUL DU LUS 'GRO ZHING, RJE NYID KYIS, BRTZE GDUNG DANG LDAN PA'I GROGS DBUS NAS, ,GCIG PU RU 'GRO BA 'DI SHIN TU MTSER, ,ZHES GSUNGS PA LTAR, PHAN TSUN BRTZE ZHING GDUNG BA'I DBANG GIS SKAD CIG KYANG 'BRAL MI PHOD PA LTA BU'I NYE BA'I GNYEN DANG MDZA' BA'I BSHES SU GYUR PA RNAMS DANG SLAR LAN CIG KYANG PHRAD DU MED PAR GTAN BRAL BYAS TE, NYAM NGA BA BAR DO'I 'PHRAD RING BRGAL NAS GROGS MED GCIG PUR 'GRO RES BAB PA DE'I TSE NA, CHOS PA RAB 'CHI BA LA DRONG, 'BRING MI MCHER, THA MA MA 'GYOD CES PA DANG, RAB KYI DROD LUGS KYANG RJE BDAG NYID CHEN
, ,POS, MDOR NA SKYE SHI BAR DO GANG SHAR YANG, ,SNGON CHAD BSGOMS PA'I LAM 'KHYER RNAM GSUM GYI, ,GSAL 'DEBS DGE SBYOR BSKUL MAR RTOGS GYUR NAS, ,'CHI TSE YID LA DGA' BA RGYAS PAR SHOG ,CES DANG, RJE NYID KYIS, THA MAL SKYE SHI DANG BAR DO, ,BLA MA'I MAN NGAG DANG LDAN LA, ,RGYAL BA'I SKU GSUM DU YOD PAS, ,NYAMS DGA'I ROL PA DER SGYUR CIG ,CES GSUNGS PA LTAR 'CHI BA LA BU PHA'I KHYIM DU 'GRO BA LTA BU'I DGA' SPRO DANG SKU GSUM LAM 'KHYER GYI MAN NGAG LA RANG DBANG THOB PA'I BLO'I GDENGS KHYAD PAR CAN DANG LDAN PAR BYIN GYIS RLOBS SHIG PA'O, ,GNYIS PA BSRE SKOR NYAMS SU LEN TSUL DNGOS BSTAN PA LA GSUM, 'CHI BA CHOS SKU'I BSRE SKOR NYAMS SU LEN TSUL, BAR DO LONGS SKU'I BSRE SKOR NYAMS SU LEN TSUL, SKYE BA SPRUL SKU'I BSRE SKOR NYAMS SU LEN TSUL LO, ,DANG PO LA GNYIS, RTAGS BZHI'I DUS SU NYAMS SU LEN TSUL DANG, STONG PA BZHI'I DUS SU NYAMS SU LEN TSUL LO, ,DANG PO LA GNYIS, RTAGS DANG PO GSUM GYI DUS SU NYAMS SU LEN TSUL DANG, RTAGS BZHI PA'I DUS SU NYAMS SU LEN TSUL LO, ,DANG PO LA GNYIS, PHYI RTAGS NGOS ZIN PAS BYANG SEMS BSGOM PAR SMON PA DANG, NANG RTAGS NGOS ZIN NAS STONG NYID BSGOM PAR SMON
PA'O, ,DANG PO NI, SA CHU ME RLUNG ZHES SOGS TSIGS BCAD GCIG STE, 'PHAGS PA LHAS, SA YI KHAMS NI CHU LA THIM, ,CHU NI ME LA THIM PAR 'GYUR, ,ME NI PHRA BA'I KHAMS LA'O, ,ZHES GSUNGS PA LTAR, 'CHI BA'I TSE SA CHU ME RLUNG GI 'BYUNG BA RNAMS SNGA MA PHYI MA LA RIM GYIS THIM PA'I PHYI'I RTAGS NI, SA CHU LA THIM PA NA LUS KYI STOBS SHOR NAS BSGRUL BSKYOD MI NUS SHING, ZUNGS MI THUB PAR LHOD LHOD POR 'GRO ,LUS SA LA BYING BA SNYAM BYED RING 'THEN ZER BA 'BYUNG, CHU ME LA THIM PA NA KHA DANG SNA'I CHU BSKAMS SHING MA MCHU GYEN DU BRDZES PA DANG LCE THUNG DU 'GRO ,ME RLUNG LA THIM PA NA LUS KYI DROD CHUNG DU 'GRO ZHING MTHA' NAS SNYING GAR SDUD PAR 'GYUR PAS, RTAGS DE LTA BU MNGON DU GYUR PA'I TSE DGE SEMS THAMS CAD KYI NANG NAS SHIN TU STOBS DANG LDAN PA DES SEMS CAN THAMS CAD KYI DON DU 'CHI BA CHOS SKU DANG, BAR DO LONGS SKU DANG, SKYE BA SPRUL SKUR BSGYUR TE SKU GSUM GYI GO 'PHANG MNGON DU BYA'O SNYAM PA'I BYANG CHUB KYI SEMS RIN PO CHE SKYE BAR BYIN GYIS RLOBS SHIG PA STE, 'DI'I DBUGS BRTZEGS DAR SGRA 'BYIN, ZHES BRTAGS BZHI PA'I CHA SHAS SU SNANG BAS 'OG TU 'CHAD DO, ,GNYIS PA NANG RTAGS NGOS ZIN NAS STONG NYID BSGOM PAR SMON PA NI, 'JIGS SKRAG 'KHRUL SNANG ZHES SOGS TSIGS BCAD GCIG STE, 'BYUNG
, ,BA THIM PA NA SPYIR SDIG CAN RNAMS LA 'JIGS SKRAG DANG DE'I RGYU 'KHRUL SNANG NGAN PA MA NGES PA SNA TSOGS 'BYUNG BAR GONG DU BSHAD PA LTAR YIN CING, KHYAD PAR DU NANG GI RTAGS NI, LVA BA PAS, DANG PO RI DVAGS SRED BZHIN SNANG BA STE, ,MTSAN MA GNYIS PA DUD KHA'I RNAM PA CAN, ,GSUM PA SRIN BU ME KHYER DANG 'DRA BA, ZHES GSUNGS PA LTAR, SA CHU LA THIM PA NA SMIG RGYU LTA BU CHUR MER RE SANG BA ZHIG 'BYUNG, CHU ME LA THIM PA NA DU BA LTA BU SNGO MER BA ZHIG GIS KHENGS PA 'DRA BA 'BYUNG, ME RLUNG LA THIM PA NA MKHA' SNANG ME KHYER DANG 'DRA BA'I DMAR KHRAM KHRAM PA MANG PO ZHIG GI SNANG BA SHAR 'ONG ZHING SKABS DER, CHAGS BRAL GSUM DANG MYA NGAN GSUM, ,ZHI PA RNAM RTOG 'JIGS PA GSUM, ,SRED PA GSUM DANG NYER LEN DANG, ,MI DGE BKRES SKOM TSOR BA GSUM, ,RIG PO RIG BYED RIG BYA'I LAS, ,SOR RTOG NGO TSA SNYING RJE DANG, ,BRTZE BA GSUM DANG DOGS PA DANG, ,BSAGS DANG PHRAG DOG SUM CU GSUM, ZHES PA LTAR GYI SNANG BA'I RANG BZHIN GYI KUN RTOG SO GSUM, CHAGS DANG ZHAN DANG DGA' BA GSUM, ,RANGS DANG MGU DANG NGO MTSAR RGOD, ,TSIM DANG 'KHYUD DANG 'O BYED 'JIG ,BRTAN BRTZON NGA RGYAL BYA DANG BROG ,STOBS DANG SPRO DANG DKA' SBYOR GSUM, ,DRAG DANG RNAM SGEG ZHE 'GRAS DANG, ,DGE
DANG TSIG GSAL BDEN MI BDEN, ,NGES DANG NYE BAR MI LEN DANG, ,SBYIN PO BSKUL BA DPA' BO DANG, ,NGO TSA MED DANG SGYU DANG GDUG ,MI SRUN GYA GYU BZHI BCU STE, ,ZHES PA LTAR GYI MCHED PA'I RANG BZHIN GYI KUN RTOG BZHI BCU, CHAGS PA BAR MA BRJED NGAS DANG, ,'KHRUL DANG MI SMA SKYO BA DANG, ,LE LO THE TSOM BDUN YIN NO, ,ZHES PA LTAR GYI NYER THOB KYI RANG BZHIN GYI KUN RTOG BDUN TE, RANG BZHIN BRGYAD CU'I KUN RTOG GI BZHON PAR GYUR PA'I RLUNG RNAMS 'GAG PA LA MNGON DU PHYOGS PA'I TSE, 'CHI BA ZHES PA RTOG PAS BTAGS PA TZAM LAS BDEN PAR GRUB PA MED PA'I GNAS LUGS STONG PA NYID RTOGS PAR BYIN GYIS RLOBS SHIG PA'O, ,GNYIS PA RTAGS BZHI GA'I DUS SU NYAMS SU LEN TSUL NI, RLUNG KHAMS RNAM SHES ZHES SOGS TSIGS BCAD GCIG STE, 'PHAGS PA LHAS, RLUNG NI SEMS LA THIM PAR 'GYUR, ZHES DANG, LVA BA PAS, BZHI PA SGRON ME 'BAR BA LTA BUR GSAL, ,ZHES GSUNGS PA LTAR, KUN RTOG GA-YO BA'I RLUNG KHAMS RNAM PAR SHES PA SNANG BA LA THIM PA'I 'GO RTZOM PA NI, PHYI RTAGS NI, DBUGS BRTZEGS PA STE PHYIR RING DU RGYU ZHING RANG RANG GI SGRA 'BYIN, NANG DU SDUD MA SHES SHING CUNG ZAD SDUD KYANG THUNG LA RTZUB PAR SDUD, MTHAR PHYI DBUGS 'GRO 'ONG GI RGYUN CHAD PAR 'GYUR LA, DE'I NANG RTAGS NI, GZUNG 'DZIN GNYIS SNANG GI RNAM RTOG
, ,RAGS PA GZHAN THAMS CAD THIM NAS RLUNG GIS MA BSKYOD PA'I MAR ME TA LA LA THAL 'BAR BA DANG 'DRA BA'I SNANG BA SHAR BAR GYUR PA'I TSE STONG NYID MA BRJED PA'I DRAN PA DANG, YENGS MA YENGS LTA BA'I SHES BZHIN SHUGS DRAG SKYE BAR BYIN GYIS RLOBS SHIG PA'O, ,RTAGS BZHI DANG STONG PA BZHI SNGA MA PHYI MA LA THIM PA'I DON NI, RIM LNGA YANG GSAL SGRON ME LAS, SNGA MA'I NUS PA BSDUS NAS MI GSAL DU SONG BA NA, PHYI MA LA NUS PA 'PHOS PA 'DRA BA ZHIG BYUNG BA LA, PHYI MA LA SNGA MA THIM PA ZHES BTAGS PA YIN NO, ,ZHES GSUNGS PA LTAR RO, ,GNYIS PA STONG PA BZHI'I DUS SU NYAMS SU LEN TSUL LA GNYIS, 'CHI BA DANG PO GSUM GYI DUS SU NYAMS SU LEN TSUL DANG, STONG PA BZHI PA'I DUS SU NYAMS SU LEN TSUL LO, ,DANG PO NI, SNANG MCHED THOB GSUM ZHES SOGS TSIGS BCAD GCIG STE, 'PHAGS PA LTAS, SEMS NI SEMS LAS BYUNG LA THIM, ,SEMS LAS BYUNG BA MA RIG PAR, ZHES GSUNGS PA LTAR, SNANG BA DANG MCHED PA DANG NYER THOB GSUM SNGA MA PHYI MA LA THIM NAS ZLA BA DANG NYI MA DANG MUN PA GSUM GYIS STON GNAM KHYAB PA DANG 'PHRA BA'I NYAMS SNANG 'CHAR TSUL NI, RLUNG KHAMS RNAM SHES LA RDZOGS PAR THIM ZIN PA'I SNANG BA RANG DUS NA STON GNAM GA-YA' DAG PA LA ZLA 'OD SHIN TU
DVANGS SHING GSAL BAS BAR MTSAMS MED PAR KHYAB PA DANG 'DRA BA'I DKAR LAM ME BA DANG, SNANG BA MCHED PA LA THIM PA'I MCHED PA RANG DUS NA STON GNAM GA-YA' DAG PA LA NYI 'OD KYIS KHYAB PA DANG 'DRA BA'I DMAR LAM ME PA'AM DMAR SER DU SNANG BA DANG, MCHED PA NYER THOB LA THIM PA'I NYER THOB KYI STOD NA STON GNAM GA-YA' DAG BA LA SROD KYI MUN PAS KHYAB PA DANG 'DRA BA'I NAG MUN NE BA DANG, SMAD KYI MTSAMS SHIG NAS DRAN MED DU NAG THOM TE SANG BA RGYAL 'GRO YANG BA RGYAL PHUL JI TZAM CHE BA LTAR 'OG GI 'OD GSAL BRTAN PAR 'GYUR BAS SKYON MIN GSUNG, DE LTA BU'I NYAMS RNAMS SHAR BA'I TSE SRID PA 'KHOR BA DANG ZHI BA MYANG 'DAS KYIS BSDUS PA'I CHOS THAMS CAD BDEN PAS STONGS PAR RTOGS PA'I STONG NYID NAM MKHA'I RNAL 'BYOR LA GOMS PA'I MTHUS, RJE LCANG SKYAS, TSOL DGOS MI 'DUG STE 'TSOL MKHAN RANG YIN, ZHES GSUNGS PA LTAR, SNANG BA THAMS CAD RANG SEMS KYIS BTAGS PA TZAM DANG RANG GI SEMS DE YANG STONG PA NYID DU RANG GIS SHES PAR BYIN GYIS RLOBS SHIG PA STE, SKABS 'DI'I RGAD POS THA GU STOR BA'I DPES KYANG BSTAN NO, ` ,GNYIS PA STONG PA BZHI PA'I DUS SU NYAMS SU LEN TSUL LA GNYIS, THAMS CAD STONG PA 'OD GSAL 'CHAR TSUL DANG, DE LHAN SKYES KYI BDE BA DANG SBYOR TSUL LO, ,DANG PO NI,
, ,NYER THOB THAMS CAD CES SOGS TSIGS BCAD GCIG STE, 'PHAGS PA LHAS, DE YANG 'OD GSAL BAR 'GRO'O, ,ZHES GSUNGS PA LTAR, NYER THOB KYI SMAD CHA'I DRAN MED SANGS NAS THAMS CAD STONG PA SHAR BA LA NYER THOB DE THAMS CAD STONG PA 'OD GSAL DU THIM PA'I THA SNYAD BYAS PA YIN PAS DE'I TSE NA 'OD GSAL JI BZHIN 'CHAR BA LA SGRIB PA'I KUN RTOG GI SPROS PA PHRA RAGS KUN LHAG MED DU ZHI NAS ZLA 'OD NYI 'OD SROD KYI MUN PA STE NAM MKHA'I RANG MDOG MTHONG BA LA SGRIB PA'I SLOD BYED KYI RKYEN GSUM DANG BRAL BA'I STON DUS KYI GNAM STE THO RANGS KYI NAM MKHA' GA-YA' DAG PA LTA BU'I NYAMS SNANG SHAR BA'I TSE SNGAR GOMS PA'I LTA BA RNAM DAG DANG SBYAR NAS 'OD GSAL MA BU NGO 'PHROD PAR BYIN GYIS RLOBS SHIG PA STE, 'CHI BA'I TSE RANG SHUGS KYIS SHAR BA'I STON GNAM GA-YA' DAG LTA BU'I STONG SANG DE LA GZHI'I 'OD GSAL DANG MA'I 'OD GSAL ZER BA YIN LA, SNGAR TSE 'DIR RLUNG SDUD THABS RNAMS KYIS THAMS CAD STONG PA 'ONG GSAL MOS PA YID BYED YAN CHAD KYIS BSKYED NAS LTA BA RNAM DAG BTZAL BA DANG BDE STONG SBYAR TE SGOM PA LA LAM GYI 'OD GSAL DANG BU'I 'OD GSAL ZER BAS DE GNYIS MA BU 'PHROD PA LA, RJE MI LAS, 'CHI BA'I 'OD GSAL CHOS KYI SKU YIN TE, DE YIN PA LA
YIN PAR NGO SHES DGOS, DE NGO SHES PAR BYED PA LA DE LTAR BLA MA DAM PAS NGO SPRAD PA DANG, GNAS LUGS LTA BA'I DON GO BA DANG, MTSON BYED LAM GYI 'OD GSAL SBYANG 'TSAL LO, ,ZHES GSUNGS PA LTA BU'I NYAMS RTOGS DGOS SO, ,GNYIS PA DE LHAN SKYES KYI BDE BA DANG SBYOR TSUL NI, STONG BZHI'I DUS SU ZHES SOGS TSIGS BCAD GCIG STE, SAMBU tA LAS, GLOG GI ZER DANG MNYAM PA'I 'OD, CES DANG, TSANGS PA'I ME NI SUM MDOR GNAS, ,ZHES DANG, BRTAG GNYIS LAS, BSREGS PAS RI BONG CAN TE 'DZAG ,CES GSUNGS PA LTAR, STONG PA BZHI PA THAMS CAD STONG PA 'OD GSAL DE'I DUS SU GLOG GI RJES SU 'GRO BA STE GLOG GI 'OD ZER DANG MNYAM ZHING 'DRA BA'I LTA GSANG NA GNAS PA'I TSANGS PA'I ME STE GTUM MO RDUL GYI NGO BO BYANG SEMS DMAR PO TSA BA ME'I RANG BZHIN CAN DE GYEN DU 'BAR BAS SPYI BO NA GNAS PA'I RI BONG CAN ZLA BA'I MING GIS BTAGS PA'I BYANG SEMS DKAR PO BZHUS TE SNYING GA'I MI SHIGS PA'I THIG LE LA KHAMS DKAR DMAR 'DU RIM GYIS DGA' BA DANG MCHOG DGA' DANG KHYAD DGA' DANG LHAN SKYES KYI DGA' BA RNAMS SKYE BAS, MYONG YUL DU LHAN SKYES KYI BDE BA, SNANG YUL DU THAMS CAD STONG PA 'OD GSAL, 'DZIN STANGS KYI YUL DU CHOS THAMS CAD RANG BZHIN MED PA'I STONG NYID DE, DE LTA BU'I BDE STONG SBYAR BA
, ,YE SHES CHOS KYI SKU LA DPAL 'DZIN GYIS, THUN NAM YANG NA NYIN GCIG GAM, ,ZLA PHYED ZLA BA LO DANG NI, ,BSKAL PA BSKAL PA STONG DU YANG, ,YE SHES MNGON SBYOR GYIS GNAS BYA, ZHES GSUNGS PA LTAR, YID RTZE GCIG TU MNYAM PAR 'JOG NUS PAR BYIN GYIS RLOBS SHIG PA'O, ,GNYIS PA BAR DO LONGS SKU'I BSRE SKOR NYAMS SU LEN TSUL LA GSUM, RAB RLUNG STOBS KYIS BSRE TSUL, 'BRING 'DUN STOBS KYIS BSRE TSUL, THA MAS PHYI NANG GSANG BSGYUR BYA TSUL LO, ,DANG PO NI, DE LAS LANGS TSE ZHES SOGS TSIGS BCAD GCIG STE, RJE THAMS CAD MKHYEN PAS, RIM PA DE YIS DPE YI LHAN SKYES LAS, ,CHU KLUNG SHIN TU DVANGS LA NYA BZHIN DU, ,SGYU 'PHRUL DRA BA'I SKUR NI LANGS GYUR TE, ,SGYU MA LTA BU'I TING 'DZIN RDZOGS PAR SHOG ,CES GSUNGS PA LTAR, GONG DU BSHAD PA'I MNYAM GZHAG DE LAS GA-YO BA'I MTSAN MA BYUNG NAS LANGS PA'I TSE SNGAR 'CHI BA 'OD GSAL DU BSGYUR BA'I 'OD GSAL DU BSGYUR BA'I 'OD GSAL GYI BZHON PA'I RLUNG SROG 'DZIN SHIN TU PHRA BAS NYER LEN GYI RGYU DANG, 'OD GSAL GYI SEMS KYIS LHAN CIG BYED RKYEN BYAS TE, GZHAN LA BAR DO 'OD RGYU'I DOD DU MTSAN BZANG PO SUM CU RTZA GNYIS DANG, DPE BYAD BZANG PO BRGYAD CU'I DPAL DANG GZI 'OD 'BAR BA'I LONGS SPYOD RDZOGS PA'I SKUR BZHENGS PAR
MOS NAS DNGOS GNAS LA SGYU MA LTA BU'I TING NGE 'DZIN TE RIM PA GSUM PA'I SGYU LUS GRUB STE RTEN DE LA LAM LHAG MA'I BGROD PA YONGS SU RDZOGS PAR BYIN GYIS RLOBS SHIG PA STE, 'DI LA SGYU LUS DNGOS DANG RJES MTHUN PA GNYIS YOD CING, DNGOS GRUB NI RTEN DE LA 'BRAS BU MNGON DU BYA NUS LA, RJES MTHUN LAS MA GRUB NA SKYE BA SPRUL SKU'I BSRE SKOR LA SLOB DGOS SO, ,GNYIS PA 'BRING 'DUN STOBS KYIS BSRE TSUL NI, GAL TE LAS KYIS ZHES SOGS TSIGS BCAD GCIG STE, GAL TE SGYU LUS SU LDANG MA NUS PAR ZAG BCAS KYI LAS DBANG GIS RIGS DRUG GANG RUNG GI BAR DO GRUB PAR GYUR NA GRUB 'PHRAL DE MA THAG TU RIGS PA YANG DAG GIS BRTAGS SHING DPYAD PAS, MDZOD LAS, 'DIR GANG 'CHI DANG SKYE BA YI, ,SRID PA'I GANG DU 'BYUNG DE'O, ,ZHES GSUNGS PA LTAR, SKYE SRID DANG 'CHI SRID GNYIS KYI BAR DU 'BYUNG BA'I SRID PA BAR DO'I 'JIGS SKRAG DANG SDUG BSNGAL RNAMS BDEN PAR GRUB PA RDUL TZAM YANG MED PA'I TSUL RTOGS NAS SNOD BCUD KYI 'KHRUL SNANG GANG SHAR THAMS CAD DAG PA LHA DANG GZHAL YAS KHANG DANG, LHA SKU SGYU MA DANG, SGYU MA BDE STONG GI RANG BZHIN CAN DU 'CHAR BAR BYIN GYIS RLOBS SHIG PA'O, ,GSUM PA THA MAS PHYI NANG GSANG BSGYUR BYA TSUL NI, 'BYUNG BA LOG PA'I ZHES SOGS TSIGS BCAD
, ,GCIG STE, SA CHU ME RLUNG GI 'BYUNG BA BZHI SNGAR LUGS 'BYUNG DU THIM PA DE LUGS LDOG TU SKYES PA'I TSE DUS KYI 'THOR RLUNG GA-YOS PA DANG, NAGS TSAL MES TSIG PA DANG, RGYA MTSO'I RBA RLABS 'KHRUGS PA DANG, RI BO RAL ZHING NYIL BA LTA BU'I 'JIGS PA'I SGRA BZHI DANG, ZHE SDANG CHE NA NAG PO, 'DOD CHAGS CHEN DMAR PO, GTI MUG CHE NA DKAR PO STE YANG BA'I GA-YANG SA GSUM DU LHUNG LA KHANG PA'I 'JIGS SNANG GSUM DANG, GNAS MA NGES PA, ZAS MA NGES PA GOS MA NGES PA, SPYOD LAM MA NGES PA, YID SNANG MA NGES PA, GROGS MA NGES PA STE MA NGES PA'I RTAGS DRUG LA SOGS PA'I 'KHRUL SNANG SNA TSOGS SHAR BA'I TSE NA RTAGS DE DAG LA BRTEN NAS BAR DO NGOS ZIN TE, RJE MI TRA DZO KIS, PHYI NANG GSANG BA BSGYUR BYA ZHING, ZHES GSUNGS PA LTAR, PHYI SNOD KYI SNANG BA DAG PA'I ZHING, NANG BCUD KYI SNANG BA YI DAM GYI LHA, GSANG BA DAG PA'I SNOD BCUD RNAMS KYANG BDE STONG GI RNAM ROL DU BSGYUR PA'I RNAL 'BYOR GYI MTHUS, DGA' LDAN DANG BDE BA CAN SOGS SRID PA'I SKYON GYIS RNAM PAR DAG PA'I SANGS RGYAS KYI ZHING KHAMS SU SKYE BAR BYIN GYIS RLABS SHIG PA'O, ,GSUM PA SKYE BA SPRUL SKU'I BSRE SKOR NYAMS SU LEN TSUL NI, MKHA' SPYOD RIG PA ZHES SOGS TSIGS BCAD
GCIG STE, ZHAL LUNG LAS, GAL TE SKU GSUM MA GRUB NA, RIG PA 'DZIN PA'I GTZO BOR 'GYUR, ,RIM GYIS PHYAG RGYA CHEN PO 'GRUB, CES GSUNGS PA LTAR, GSANG SNGAGS NYAMS SU LEN PA'I LUS RTEN LA, SA 'OG LA SPYOD PA DANG, SA LA SPYOD PA DANG, MKHA' LA SPYOD PA STE GSUM YOD PA'I MKHA' LA SPYOD PA NI, SBAS DON KUN GSAL LAS, SNGAGS SPYOD PA'I RTEN KHYAD PAR CAN GYI MKHA' 'GRO DANG, MKHA' 'GRO MA RNAMS NAM MKHA'I DBYINGS KYI GNAS KHYAD PAR CAN DU BZHUGS NAS GSANGS SNGAGS MCHOG RNAMS SPYOD PA'I GNAS NI MKHA' SPYOD KYI GNAS YIN LA, ZHES GSUNGS PA LTAR TE, DE 'DRA BA'I MKHA' SPYOD LA'ANG RIM PA DU MA ZHIG YOD PA'I NANG NAS RIG PA 'DZIN PA'I MCHOG TU GYUR PA ZHIG GAM, YANG NA 'DZAM BU GLING GI YUL DBUS MA LTA BUR TSANGS PAR SPYOD PA'I RTEN MCHOG TU GYUR PA DGE SLONG PHA MA LTA BU TSUL KHRIMS TING NGE 'DZIN, SHES RAB STE LAM BSLAB GSUM RNAM DAG DANG LDAN PAR 'GYUR PA'I MI'I LUS NYID BSAM BZHIN DU DAG PA'I SNANG ZHEN DANG BCAS NAS BZUNG STE, RTEN DE LA MDO SNGAGS SUM BSKYED RDZOGS KYI LAM RIM PA GNYIS KYI NYAMS DANG RTOGS PA MTHAR PHYIN NAS 'BRAS BU CHOS LONGS SPRUL BA'I SKU GSUM SKYE BA GCIG GNYIS LAS MA 'GYANGS PAR MYUR DU THOB PAR BYIN GYIS RLOBS SHIG PA STE, SKYE BA SPRUL SKU'I
, ,LAM 'KHYER SGEM PA PO NI, SGYU LUS RJES MTHUN PA GRUB PA DANG, BAR DO 'DUN STOBS KYIS ZIN PA GNYIS SO, ,GSUM PA RTZOM PA MTHAR PHYIN PA MJUG GI DON LA GSUM, SBYAR BYANG SMOS PA, GSANG BAR GDAMS PA, NYAMS LEN GYI GNAD BSTAN PA'O, ,DANG PO NI, ZHES BAR DO 'PHRANG SGROL GYI GSOL 'DEBS 'JIGS SGROL GYI DPA' BO ZHES BYA BA 'DI YANG, DON GNYER BA 'GA' ZHIG GIS BSKUL BA'I DON DU, MDO RGYUD DAM PA'I MAN NGAG BZHIN DU SH'AKYA'I BTZUN PA BLO BZANG CHOS KYI RGYAL MTSAN GYIS, CHOS GRVA CHEN PO DPAL LDAN 'BRAS SPUNGS KYI GZIMS KHANG DU SBYAR BA, ZHES BSTAN BCOS DANG BSKUL BA PO DANG MDZAD TSUL DANG MDZAD PA PO DANG, GNAS RNAMS STON TE GO SLA'O, ,GNYIS PA GSANG BAR GDAMS PA NI, 'DI NYID SNOD MIN DANG SNGAGS BLA MED KYI DBANG MA THOB PA RNAMS LA GSANG BAR BYA BA KHO NA YIN CING, ZHES PA STE, 'DI NYID RDZOGS RIM GYI ZAB GNAD YIN PAS BLA MED KYI DBANG MA THOB PA LA BSGRAGS NA, BHA WAm LAS, YONGS SU MA SMIN SEMS CAN LA, ,GSANG BA SGROG PA BDUN PA YIN, ZHES PA'I RTZA LTUNG DU 'GYUR ZHING, DBANG THOB KYANG SNGAGS LA DAD PA MED PA LA BSGRAGS NA, KLU SGRUB KYIS, DAD PA MED LA CHOS STON PA, ,ZHES PA'I SBOM POR 'GYUR BAS, SGROG MKHAN
DANG NYAN MKHAN GNYIS KA LA GNOD DE, BSHAD RGYUD RDO RJE 'PHRENG BA LAS, YANG DAG DBANG BSKUR GYIS DBEN NO, ,SGRUB POS RGYUD KYI DOM SHES KYANG, ,SLOB DPON SLOB MA MTSUNGS PAR NI, ,MI ZAD DMYAL BA CHEN POR 'GRO ZHES GSUNGS PAS SO, ,GSUM PA NYAMS LEN GYI GNAD BSTAN PA NI, RANG NYID YI DAM GANG LA BYED PA DE'I GSOL 'DEBS KYI MJUG TU SBYAR BAS CHOG CING, TSIG DON DRAN BZHIN PAS NYAMS SU BLANGS NA 'CHI KHA'I GDAMS PA'I RGYAL POR 'GYUR RO, ,ZHES PA STE, YI DAM NI GSANG 'JIGS BDE DGYES LTA BU BLA MED ZHIG DGOS LA, GSOL 'DEBS NA RDZOGS RIM GYI SNGON 'GRO BLA MA'I RNAL 'BYOR GYI GSOL 'DEBS LA DGONGS SHING, 'CHI KHA'I GDAMS PA LA ZAB MDOG KHAB MANG DU SNANG YANG 'DI NYID MCHOG TU 'GYUR TSUL BLO GROS YOD NA TSIG DON LA DPYAD PAS SHES SO, ,SMRAS PA, SKYE SHI BAR DO'I JAG 'PHRANG 'JIGS RUNG LAS, SGROL BA'I GSOL 'DEBS 'JIGS MED DPA' PO'I DPUNG, ,GROGS SU 'GUGS BYED RNAM BSHAD LUS PHRA'I GLUS, ,DRI ZA'I GLING BU STONG LA CO YANG 'DRI, ,'DI NA DON BRAL TSIG GI NA YAM LA, ,RO 'DZIN ZLOS GAR 'DAB CHAGS BYAS KYANG SGYUR, ,SNGON MED LEGS BSHAD SMRA BA'I 'BAB STEGS CAN, ,'OD STONG LDAN PA'I MKHA' LA RGYU SKAR BZHIN, ,MDO RGYUD MAN NGAG ZAB MO'I SPRIN KLONG NAS, ,DON DANG TSIG 'BRU BZANG PO'I
, ,DBYAR GYI RDA, ,DAL BUR SGROG LA DPYOD LDAN 'DAB BRGYA PA, ,RANGS PA'I RNAM 'GYUR ZLOS GAR NGA SGYUR CIG ,'ON TE MKHAS PA'I LEGS BSHAD MTSO BZHIN ZAB, ,TSUR MTHONG BYIS PA'I BLO MIG RGYANG THUNG PAS, ,MA RTOGS LOG RTOG 'KHRUL DRI MCHIS SO 'TSAL, ,SRAS BCAS RNAM PAR 'DREN PA YONGS LA BSHAGS, ,DGE TSOGS DAM BCA' GSUM DANG LDAN PA'I MDAS, ,SGRIB GNYIS BDEN BRAL BDAG PO'I SROG BCAD DE, ,GTAN MDUN SI TAR 'GROGS PA'I DGA' BDE'I RLABS, ,CHAL CHIL RNAM PA KUN TU GA-YO GYUR CIG ,CES BAR DO 'PHRANG SGROL GYI GSOL 'DEBS 'JIGS SGROL GYI DPA' BO'I RNAM BSHAD PAn CHEN DGONGS RGYAN ZHES BYA BA 'DI YANG, STONG NYID NAM MKHA'I RNAL 'BYOR BA BRIS PA DBU MDZAD YE SHES TSUL KHRIMS LAGS KYIS BSKUL MA MDZAD DOR, 'DI KHA'I 'GREL PA BLO BZANG MING CAN GYIS MDZAD PA, SHEL DKAR BA SKAL LDAN RGYA MTSOS MDZAD PA, MDZAD BYANG MED PA GCIG RNAMS NAS LEGS CHA BLANGS SHING BLA MA'I MAN NGAG LA GZHI BYAS TE SNYOM LAS PA DHA RMA BHA DRAS, ,KHYU MCHOG GI LO'I NAG PA ZLA BA'I YAR TSES BZANG PO LA BZHAD DNGUL CHU'I RI PHUG TU SBYAR BA'O, ,'DIS KYANG BSTAN 'GRO LA PHAN PAR GYUR CIG ,SARBA DZA GA TAm,, ,, *, ,SDE DGE'I PAR RKOS BSTAN PA DAR RGYAS KYIS SOR MES SPRUL PA'O,, ,,