*, ,NA MO GU RU MANYDZU GHO sh'A YA, 'DIR YI DAM SANGS RGYAS BYANG SEMS MANG PO LA SBYAR CHOG PA'I RJES GNANG JI LTAR
, ,BYA BA'I TSUL NI, GTOR MA'AM, MAndAL TSOM BU, MCHOD GTOR NAMS BKOD PAS THON PA, KHRUS BUM SOGS STA GON BYAS LA, SLOB DPON RANG NYID KYIS LHA DE DANG DE'I BDAG BSKYED BZLAS PA DANG BCAS PA SNGON DU BTANG, GTOR MA'AM MAndAL BSANGS SBYANGS, LHA GANG DANG GANG BYA BA DE'I MDUN BSKYED MCHOD BSTOD BZLAS PA GTOR 'BUL RNAMS BYAS TE, RGYAS PAR NA RANG NYID KYIS RJES GNANG LEN CING SNANG BA NOD DO, ,DE NAS SLOB MA RNAMS LA BSGRUBS PA'I KHRUS CHUS KHRUS BYAS, MAndAL 'BUL DU GZHUG ,RJES THOGS SU, 'O LAGS SO, SKYES RABS LAS, RAB TU DMA' BA'I STAN LA 'DUG ,DUL BA'I DPAL NI RNAM PAR BSKYED, ,DGA' DANG LDAN PA'I MIG GIS BLTA, ,TSIG GI BDUD RTZI 'THUNG BA BZHIN, ,GUS PA BSKYED DE RTZE GCIG BTUD, ,RAB TU DANG LA DRI MED YID, ,NAD PAS SMAN PA'I TSIG MNYAN BZHIN, , RIM GRO BSKYED DE CHOS NYON CIG ,CES GSUNGS PAS, TSUL BZHIN GSAN PAR MDZOD, GSAN PAR BYA BA'I CHOS NI, LHA 'DI DANG 'DI'I RJES GNANG YIN ZHES RGYAS PAR NA DE DANG DE'I BSNGAGS PA BRJOD, DE NAS DE'I RJES GNANG ZHU BA LA, MDUN DU DUL BAS 'DUG PA DANG, ,GOS SOGS TSUL NI BSDAMS PA DANG, ,PUS BTZUGS THAL MO SBYAR BA YIS, ,NYAN SOGS 'DOD PAS GSOL GSUM GDAB, CES GSUNGS
PA LTAR GSOL BA 'DEBS PA 'DI'I RJES ZLOS MDZOD, KUN MKHYEN YE SHES PHUNG PO CAN, ZHES SOGS SKABS SBYAR LAN GSUM BYA, DE NAS, KHYED RANG RNAMS BSAM PA 'DI LTAR MDZOD, RANG CAG RNAMS KYIS RNYED PAR DKA' BA'I DAL 'BYOR GYI MI LUS THOB, MJAL DKA' BA'I SANGS RGYAS KYI BSTAN PA RIN PO CHE DANG MJAL SKABS 'DIR, TSE 'DI'I BDE BA LA MA CHAGS PAR, TSE PHYI MA PHAN CHAD KYI DON RNAM PAR DAG PA BSGRUB DGOS TE, DE LTAR MA YIN PAR, TSE 'DI DON MED DU BTANG NA RANG GIS RANG BSLUS PA DANG, RMONGS TSABS DE LAS CHE BA MED DE, MGON PO KLU SGRUB KYIS, GANG ZHIG GSER SNOD RIN CHEN SPRAS PA YIS, , NGAN SKYUGS 'PHYAG PAR BYED PA DE BAS NI, ,GANG ZHIG MI RU SKYES NAS SDIG PA DAG ,BGYID PA DE NI CHES RAB BLUN PA LAGS, CES GSUNGS PA'I PHYIR, SKYE BA GTAN GYI 'DUN MA BSGRUB DGOS SHING, DE YANG DA LTA NYID NAS MA BSGRUBS PAR, DING BYA SANG BYA'I NGANG DU LUS PA NA, BSHES PHRIN LAS, TSE 'DI GNOD MANG RLUNG GIS BTAB PA YI, ,CHU YI CHU SBUR BAS KYANG MI RTAG NA, ,DBUGS RNGUB DBUGS 'BYUNG GNYID KYIS LOG PA LAS, ,SANG KHOM GANG LAGS DE NI NGO MTSAR CHE, ZHES GSUNGS PA LTAR NGES PAR 'CHI, NAM 'CHI LA NGES PA MED, SHI NAS KYANG GANG DU SKYE'I NGES PA MED CING, NGAN SONG DU SKYES NA TSA GRANG, BKRES
, ,SKOM, BKOL SPYAD, GCIG LA GCIG ZA'I SDUG BSNGAL BZOD PAR DKA' BA YOD, GAL TE BDE 'GROR SKYES KYANG, BZHI BRGYA PA LAS, MKHAS PA RNAMS LA MTHO RIS KYANG, ,DMYAL BA DANG MTSUNGS 'JIGS BSKYED 'GYUR, ZHES GSUNGS PA LTAR, BDE BA'I SKABS MED, MDOR NA BSHES PHRIN LAS, 'KHOR BA DE 'DRA LAGS PAS LHA MI DANG, ,DMYAL BA DUD 'GRO YI DVAGS RNAM DAG TU, ,SKYE BA BZANG PO MA LAGS SKYE BA NI, ,GNOD PA DU MA'I SNOD GYUR LAGS MKHYEN MDZOD, CES SOGS GSUNGS PA LTAR, 'KHOR BA MTHA' DAG SDUG BSNGAL GYI RANG BZHIN CAN, RANG NYID SDUG BSNGAL GYIS JI LTAR GDUNGS PA BZHIN, 'KHOR BA'I SEMS CAN THAMS CAD KYANG SDUG BSNGAL GYIS GDUNGS LA, SEMS CAN DE THAMS CAD NI SKYE SHI 'PHOS PAS NGO MA SHES PA TZAM MA GTOGS, THOG MED NAS YANG YANG DRIN GYIS BSKYANGS PA'I DRIN CAN GYI MA SHA STAG YIN, DES NA MAR GYUR SEMS CAN THAMS CAD KYI DON DU MYUR BA MYUR BAR RDZOGS PA'I SANGS RGYAS KYI GO 'PHANG THOB PAR BYA SNYAM PA'I BSAM PA DUNG DUNG BA BSKYED PAR MDZOD, DE'I NGANG NAS GNAS 'DI NYID KYANG DAG PA'I ZHING DNGOS YIN SNYAM PA DANG, GTOR MA'AM TSOM BU 'DI NYID LHA 'DI DANG 'DI ZHES RJES GNANG CI BYED PA'I LHA DE DANG DE'I MNGON RTOGS RGYAS BSDUS
CI RIGS PA BSKYED NAS LHA NGO BSTAN, DE DAG GI STENG DU RTZA BRGYUD KYI BLA MA YI DAM DKON MCHOG GSUM GYI LHA TSOGS BZHUGS PA'I MOS PA MDZOD, DKON MCHOG GSUM LA BDAG SKYABS MCHI, ZHES SOGS LAN GSUM GYIS BYANG SDOM PHOG ,DNGOS GZHI LA SLOB MA RNAMS KYI BGEGS BSANGS, SVA BH'A WAS SBYANGS, STONG PA'I NGANG LAS, LHA ZHI BA YIN NA PAD ZLA, DRAG PO YIN NA PAD NYI'I GDAN LA, CHO GA GSUM BSKYED KYIS LHA DE DANG DER LEGS PAR BSKYED DE, SKU'I RJES GNANG ZHU BA'I PHYIR GSOL BA 'DEBS PA 'DI'I RJES ZLOS MDZOD, SLOB DPON CHEN PO DGONGS SU GSOL, ,SANGS RGYAS KUN GYI SKU YI DNGOS, ,BCOM LDAN 'DAS SAM RJE BTZUN NI, ,LHA MCHOG 'DI ZHES BGYI BA YI, ,SKU YI RJES GNANG STZAL DU GSOL, LAN GSUM BYA, DE NAS, BLA MA'I THUGS KA'I H'Um GI 'OD ZER GYIS MDUN BSKYED KYI LHA'I THUGS RGYUD BSKUL, DE'I THUGS KA'I 'OD ZER LCAGS KYU LTA BUS RANG BZHIN GYI GNAS NAS LHA DE DANG DE'I SKU'I BYIN RLABS THAMS CAD LHA DE DANG DE'I SKU'I RNAM PAR SPYAN DRANGS, KHYED RANG RNAMS KYI LUS LA CHAR CHEN PO BABS PA LTAR THIM PAS, LUS KYI SDIG SGRIB THAMS CAD DAG ,LUS LHA DE DANG DE'I SKU DANG DBYER MED DU BYIN GYIS BRLABS PA'I MOS PA GYIS, CES BRDA' SPRAD, BLA MAS d'A DRIL DANG BCAS, MA LUS SEMS CAN KUN GYI MGON GYUR CING, ZHES
, ,SOGS SHLO KA GCIG GI MJUG TU, AE H+YE HI, BADZRA SA MA YA DZA: DZA: DZA: H'Um BAm HO: ZHES BSTIM, SKU'I RJES SU GNANG BA'O, ,DE NAS GSUNG GI RJES GNANG ZHU BA'I DON DU, SKU'I GSOL 'DEBS GSUNG DU 'DON PA BSGYUR, LHA DE DANG DE'I THUGS KAR, LA ZHI BA LA ZLA BA, DRAG PO LA NYI MA'I DBUS SU RANG RANG GI SA BON GYI MTHAR BKOD PA'I SNGAGS PHRENG LAS SNGAGS PHRENG GNYIS PA BYUNG, ZHAL NAS THON, KHYED RANG RNAMS LHAR GSAL BA'I ZHAL DU ZHUGS SNYING GAR 'KHOD PA'I 'OD ZER GYIS NGAG GI SGO NAS BSAGS PA'I SDIG SGRIB SBYANGS, GSUNG GI BYIN RLABS NGAG LA ZHUGS, NGAG NUS PA DANG LDAN PAR BYIN GYIS BRLABS PA'I MOS PA MDZOD LA, 'DI'I RJES ZLOS GYIS CES SO SO'I SNYING PO DANG NYE SNYING CI RIGS LAN GSUM BRJOD, ME TOG SPYI BOR BZHAG ,BCOM LDAN 'DI LA STZAL LAGS KYI, ZHES SOGS BRJOD, GSUNG GI RJES SU GNANG BA'O,, DE NAS THUGS KYI RJES GNANG ZHU BA'I DON DU, GSUNG GI GSOL 'DEBS THUGS SU 'DON PA BSGYUR LA GSOL BA GDAB, DE NAS, BLA MA'I THUGS KA'I H'Um GI 'OD ZER DANG, MDUN BSKYED KYI LHA DE DANG DE'I THUGS KA'I H'Um GI 'OD ZER GYIS PHYOGS BCU'I SANGS RGYAS BYANG SEMS THAMS CAD DANG, KHYAD PAR LHA DE DANG DE'I THUGS KYI BYIN RLABS THAMS CAD PHYAG MTSAN DANG SA BON GYI RNAM PAR SPYAN DRANGS,
KHYED RANG RNAMS KYI LUS DANG NYE BA'I CHAR BDUD RTZI SNA LNGA'I RNAM PAR ZHU BA LUS LA SIB SIB THIM PAS YID KYI SDIG SGRIB DANG, NAD GDON BAR DU GCOD PA THAMS CAD SBYANGS, THUGS KYI BYIN RLABS THOB PA'I MOS PA MDZOD, CES BRDA' SPRAD NAS, LHA DE DANG DE'I SNYING PO NYE SNYING RTZA SNGAGS CI RIGS BRJOD, d'A DRIL SOGS ROL MO'I SGRA BYA'O, ,THUGS KYI RJES SU GNANG BA'O, ,LHA BSTIM PA'I RJES GNANG NI, BLA MA'I THUGS KA'I H'Um GI 'OD ZER GYIS MDUN GYI LHA GANG YIN DE SPYAN DRANGS, KHYED RANG RNAMS KYI SPYI BOR BZHUGS PA'I MOS PA MDZOD, DE NYID LA NGAS GSOL BA BTAB CING THUGS RJE BSKUL BAS SKU'I CHA LAS 'OD ZER 'PHROS, KHYED RANG RNAMS KYI SDIG SGRIB NAD GDON BAR GCOD THAMS CAD SBYANGS, TSE DANG BSOD NAMS LA SOGS PA'I YON TAN THAMS CAD 'PHEL ZHING RGYAS PAR MDZAD, MTHAR RTZA BRGYUD KYI BLA MA DANG SANGS RGYAS BYANG SEMS THAMS CAD KYANG SPYI BO'I LHAG PA'I LHA LA THIM, DE NYID KYANG KHYED RANG RNAMS KYI LUS LA THIM PAS, KHYED RANG RNAMS KYI SGO GSUM LHAG PA'I LHA'I SKU GSUNG THUGS RDO RJE GSUM GYI NGO BOR GYUR PA'I MOS PA MDZOD, CES BRDA' SPRAD NAS GTOR MA SLOB MA'I SPYI BOR BZHAG LA, RJE BTZUN RTZA BA DANG BRGYUD PAR BCAS PA'I DPAL LDAN BLA MA DAM PA RNAMS KYIS BYIN GYIS RLOBS SHIG ,SANGS RGYAS DANG BYANG CHUB SEMS DPA' RNAMS KYIS, YI DAM DKYIL 'KHOR GYI LHA
, ,TSOGS RNAMS KYIS, DPA' BO DANG RNAL 'BYOR MA'I TSOGS RNAMS KYIS, CHOS SKYONG BA'I BSRUNG MA RNAMS KYIS, KHYAD PAR LHA DE DANG DE'I MTSAN NAS SMOS TE, KHYED RNAMS LA MKHYEN PA'I YE SHES, BRTZE BA'I THUGS RJE, SKYOB PA'I NUS PA BSAM GYIS MI KHYAB PA MNGA' BAS, SKAL LDAN RIGS KYI BU 'DI RNAMS KYI LUS KYI NA TSA, SEMS KYI SDUG BSNGAL SOGS 'GAL RKYEN PHYI NANG GI BAR GCOD THAMS CAD ZHI BA DANG MTHUN RKYEN TSE DANG BSOD NAMS DPAL DANG 'BYOR PA PHUN SUM TSOGS PA 'PHEL ZHING RGYAS PA DANG, MCHOG DANG THUN MONG GI DNGOS GRUB THAMS CAD MYUR DU 'GRUB PAR BYIN GYIS BRLAB TU GSOL, ZHES GSOL BA BTAB PAS LHA DE DANG LHA DE NYID DGYES BZHIN DU SLOB MA'I LUS LA THIM PAS BYIN GYIS BRLABS PAR BSAMS, DZA: H'Um BAm HO: ZHES BKA' BSGO RGYAS BSDUS CI RIGS BYA, LHAG PA'I LHA ZHU BAR MOS PA'I GTOR ZAN NAM, NANG MCHOD BYIN LA, DAM RDZAS 'CHI MED BDUD RTZI'I ZAS, ,ZO ZHIG BU KHYOD RIGS SU SKYE, ,NGA YIS BSGO BA'I NGAG MA BCAG ,BSGRUB LA NAN TAN GCES SU GYIS, CES BRJOD, SHIS PA BRJOD CING SLOB DPON GYIS LHA DE DANG DE LA GTANG RAG GI MCHOD PA BYAS LA BZOD PAR GSOL, YE SHES PA GSHEGS SU GSOL BA SOGS MJUG CHOG RGYAS BSDUS SKABS DANG SBYAR BAR BYA'O, ,YI DAM SANGS
RGYAS BYANG SEMS MANG PO LA, ,SO SOR SBYAR CHOG RJES GNANG BYA BA'I TSUL, ,LHA DBANG PHYOGS LAS RNAM RGYAL SPRUL SKU YI, ,BKA' BZHIN CHOS KYI RGYAL MTSAN ZHES BYAS BKOD, ,'DI LTAR BSKRUN PA'I RNAM DKAR DGE BA'I MTHUS, ,'DI BZHIN RJES GNANG BSTZAL BA'I 'GRO KUN GYIS, ,SKU GSUM BDE BA CHEN PO THOB PA DANG, ,THUB BSTAN DAR ZHING YUN RING GNAS GYUR CIG ,CES BTZUN PA BLO BZANG CHOS KYI RGYAL MTSAN GYIS CHOS GRVA CHEN PO BKRA SHIS LHUN PO'I GZIMS KHANG RGYAL MTSAN MTHON PO'I GZIMS CHUNG YID DGA' CHOS 'DZIN DU BRIS PA DGE BAR GYUR CIG , ,,