*, ,NA MO GU
, ,RU MANYDZU GHO sh'A YA, ZHABS SEN DRAN PA'I 'CHAR GA'I GSER SBYANGS 'OD, ,SNYING MTSOR LHUNG BAS KUN RMONGS MTHAR BYED CING, ,SGRIB BRAL YE SHES LA 'KHU SHES RAB KYI, ,MCHOG STZOL NGAG DBANG LHA MO'I ZHABS BTUD NAS, ,DE NYID BSGRUB PA'I RIN CHEN MIG THUR GYIS, ,MI SHES RAB RIB DRA BA KUN BSAL TE, ,RAB 'BYAMS SHES BYA JI BZHIN RNAM BKRA'I SPYAN, ,SGRUB BYED DAM PA'I ZHAL LUNG GDAMS PA BRI, 'DIR RGYAL BA KUN GYI YUM LHA MO DBYANGS CAN MA BSGRUB PAR 'DOD PAS, SKYABS 'GRO SEMS BSKYED TSAD MED BZHI BSGOM PA SNGON DU BTANG, SKAD CIG GIS RANG NYID LHA MO DBYANGS CAN MAR GYUR, AA MRi TAS BSANGS, SVA BH'A WAS SBYANGS, STONG PA'I NGANG LAS BHRUm LAS RIN PO CHE'I SNOD YANGS SHING RGYA CHE BA RNAMS KYI NANG DU, AOm LAS BYUNG BA'I MCHOD RDZAS RNAMS PHUL DU BYUNG BA'I LHA RDZAS SU GYUR, AOm A'A: H'Um, LAN GSUM GYIS BYIN GYIS BRLABS, DE NAS 'JUG PA BDE BA'I PHYIR, 'DI LTAR, BDAG NYID 'JIG RTEN DBANG PO'I LDANG BYED KYI, ,ZE'U 'BRU LAS 'KHRUNGS THUGS KA'I HR'Im: YIG GI ,'OD KYIS DBANG BSGYUR LHA MO DBYANGS CAN MA, ,SPYAN DRANGS MDUN GYI 'CHI MED LAM DU BZHUGS, ,GANG GI DRIN GYIS BDE CHEN GNAS, ,SKAD CIG NYID LA 'CHAR BA GANG, ,BLA MA RIN CHEN LTA BU'I SKU, ,RDO RJE CAN ZHABS PAD LA 'DUD, ,CES PAS BLA
MA DANG, DUS GSUM RGYAL BA'I YE SHES KYI, ,RANG GZUGS MTSAN DPE'I ME TOG GIS, ,RNAM BKRA ZLA ZHAL AUTPAL MIG ,DBYANGS CAN LHA MO LA PHYAG 'TSAL, ZHES PAS BCOM LDAN MAR PHYAG BYA, AOm SV'A RA SVASTI SA PA RI W'A RA AARGHAm, P'A DYAm, PUshPE, DH'U PE, A'A LO KE, GANDHE, NEE BI DYA, SHAPTA PRA T'ITZTSA H'Um SV'AH'A'I BAR GYIS MCHOD, DKON MCHOG GSUM LA BDAG SKYABS MCHI, ,SDIG PA THAMS CAD SO SOR BSHAGS, , 'GRO BA'I DGE LA RJES YI RANG, ,SANGS RGYAS BYANG CHUB YID KYIS BZUNG, TSOGS ZHING RNAMS RANG GNAS SU GSHEGS PAR GYUR, CES BSOD NAMS KYI TSOGS BSAGS, AOm SH'U N+YA T'A DZNY'A NA BADZRA SVA BH'A WA A'ATMA KO NYA HAm, RANG BZHIN BDE STONG YANGS PA'I YID BZHIN MTSO, ,DAL GYI RLABS PHRENG DBU BA'I 'DZUM DKAR CAN, ,MDZES PA'I ME TOG SNA TSOGS RGYAN 'CHANG BA'I, ,CHU SKYES BLA BRES GA-YOGS PA'I LDING KHANG NA, ,NGANG PA'I BU MO SNYAN PA'I GLU LEN CING, ,BZHAD DKAR 'DAB MA'I GAR BYED MGRIN RNGA BRDUNG, ,KUN DGA' BSKYED PA'I YID BZHIN RGYA MTSO'I NGOGS, ,DRI ZA'I NA CHUNG RTZE BA'I DGA' TSAL NA, GA-YU YI SPU LONG RGYAS PA'I LANG TSO CAN, ,RKANG 'THUNG MDZES MA DAL GYIS GAR BSGYUR ZHING, ,STENG DU SPU SDUG MDZES PA'I GOS GYON PA'I, ,RNAM MANG GNYIS SKYES TSOGS RNAMS 'DAB MA GNYIS, ,GA-YO BA 'PHUR LDING ROL PA'I 'JO SGEG DANG, ,MGRIN PA'I
, ,RDZA RNGAS RNA BA'I BCUD LEN 'GYED, ,MA RGAD ZHUN MA 'KHYIL BA PHAM BYED PA'I, ,GSER LDAN DGA' MA ME TOG SNA TSOGS KYI, ,BKOD LEGS DO SHAL RGYAN GYIS BRGYAN PA NI, ,STON GYI MKHA' LA RGYU SKAR GSAL BA BZHIN, ,YAN LAG BDUN LDAN ZLA SHEL RDUL BRTZEGS LA, ,'KHU LDAN THAL KAR MCHE BA DRUG 'DZIN SOGS, ,YID 'ONG SROG CHAGS BRGYA PHRAG MANG PO YANG, ,'JIGS BRAL BAG PHAB RTZED 'JO CI YANG BYED, ,ME TOG THOD MDZES SNGO LJANG LO 'DAB KYI, ,GOS MCHOG GYON PA'I BCUD LDAN 'BRAS BU RNAMS, ,LDONG ROS KYIS BYUGS NAGS KYI DKA' THUB PA, ,MGRON DU GNYER PHYIR GA-YUR GYIS DUD PA BZHIN, ,LHA YI DGA' TSAL BRAN GYI GNAS 'JOG PA'I, ,YID 'ONG RIN CHEN SKYED MOS TSAL GYI DBUS, ,PAD DKAR 'DAB BRGYA RGOD PA'I GE SAR RTZER, ,CHA SHAS RDZOGS PA'I RGYU SKAR RGYAL PO'I STENG, ,HR'Im: YIG DKAR PO'I 'OD ZER STONG 'BAR BAS, ,'GRO BLO'I RMONGS MUN MING GI LHAG MAR BYAS, ,MCHOD PA'I SPRIN GYIS 'PHAGS PA'I TSOGS MCHOD DE, ,DE DAG MKHYEN PA'I YE SHES 'O RGYUN GYI, ,RNAM PAR BKUG NAS HR'Im: YIG THIM PA LAS, ,RANG NYID LHAG PA'I LHA MO DBYANGS CAN MA, ,SKU MDOG DKAR MO 'JIG RTEN GSUM PO YI, ,MDZES PA GCIG BSDUS 'O MAS BKRUS PA YI, ,ZLA BA'I DKYIL 'KHOR DBUS NAS PHYUNG BA
BZHIN, ,ZHAL GYI DKYIL 'KHOR PAD DKAR MDZES PA LA, ,'DREN BYED GA-YON LDAN BUNG BZUNG GIS ROL, ,MCHU SGROS BYU RU'I SKYED TSAL NGOGS DAG TU, ,TSEMS DKAR NGANG MO'I PHRENG BA TSAR DU DNGAR, ,DBYANGS GSAL GRE 'GYUR GLU DBYANGS 'BUM PHRAG GIS, ,SKAL BZANG RNA BA'I DGA' STON MI 'GYED NA, ,'DZUM ZHAL CHU SKYES LO MA'I KHANG BZANG DU, ,BDAG CAG BDE BAR GSOS PA'I DON CI ZHES, ,LJAGS YANGS BUNG BA GZHON NU 'PHUR ZHING LDING, ,SPYAN ZUR KUN TU GA-YO BA'I NYAG PHRAN GYIS, ,RING NAS CHAGS BRAL GNYIS SKYES RGAN PO'I YANG, ,SRA BRTAN SNYING GI GO CHA 'BIGS BYED NA, ,'CHING LDAN SKYE BO GZHAN DAG SMOS CI DGOS, ,MTHON MTHING DBU SKRA'I THOR COG GZHON NU LA, ,ME TOG PHRENG BA'I MDZES MAS 'KHYUD PA'I TSE, ,BDUD RTZI'I 'OD CAN CHAGS PAS YID MYOS TE, ,GZHAL MED YID BZHIN NOR DANG LHAN CIG TU, ,BRGYAN PA'I ZOL GYIS RAL PA'I RTZE MOR 'KHOD, ,YID 'ONG RIN CHEN RGYAN PHRENG 'DZIN PA YI, ,SHEL DKAR 'KHRI SHING BRKYANGS 'DRA'I PHYAG ZUNG GIS, ,BEE d'UR SNGON PO'I PHANG 'GRO DKUR BRTEN NAS, ,SOR GDUB BKRA BA GA-YAS PA'I SOR MO YIS, ,BSNUN PA'I DBYAR SKYES DAL GYIS RGOD PA'I SGRAS, ,'JIG RTEN MES PO SKRAG PAS GDONG PA GAS, ,BEE d'UR DKAR PO'I SA 'DZIN BRGYA BYIN GZHUS, ,KLUBS PA JI BZHIN LHA RDZAS NA BZA' DANG, ,SA
, ,GSUM RIN CHEN MTHA' DAG GROS BYAS NAS, ,GANG SKU BRGYAN PHYIR LHAN CIG 'KHOD PA BZHIN, ,CHAGS PA'I NYAMS LDAN 'JO SGEG RNAM 'GYUR GYIS, ,MA LUS YID KYI BRTAN PA CIG CAR 'PHROG ,TSOGS GNYIS TZANDAN DKAR PO LAS BYUNG BA, ,MTSAN DPE GA BUR SAR PA'I THIG LE YIS, ,RNAM MDZES RAB DKAR STON ZLAS 'GOD NUS MIN, ,YID 'ONG BCU DRUG MDZES PA'I LANG TSO CAN, ,ZHABS GNYIS TZOG PUR BZHUGS PA'I GNAS GSUM DU, ,YI GE GSUM MTSAN H'Um GI 'OD ZER GYIS, ,LHO PHYOGS DRI ZA DGA' BA'I SKYED TSAL NAS, ,RGYAL BA BSKRUN MDZAD YE SHES LHA MO NI, ,SPYAN DRANGS DZA: H'Um BAm HO: RO GCIG GYUR, ,SLAR YANG RANG SNYING HR'Im: YIG 'OD ZER NI, ,SNA BUG NAS THON DBYANGS CAN YE SHES PA'I, ,SHANGS BUG NAS ZHUGS THUGS KA'I SHES RAB KYI, ,'KHOR LO SPYAN DRANGS MDUN GYI NAM MKHAR BZHUGS,, AOm BADZRA PUshPE PRA T'I TZTSA A'A: H'Um, ZHES PA NAS, DH'U PE, A'A LO KE, GANDHE, NEE BI DYA, SHAPTA PRA T'I TZTSA A'A: H'Um SV'AH'A, ZHES PAS MCHOD, DZA: H'Um BAm HO: BDAG SNYING SGO NGA LTAR, ,ZLUM PO KHONG STONG NANG DU ZHUGS PA NI, ,PAD DKAR 'DAB BRGYAD ZE'U 'BRU DMAR SER CAN, ,LTE BAR HR'Im: YIG 'DAB MAR DBYANGS BCU DRUG ,SHEL LTAR DVANGS SHING MAR ME LTA BUR GSAL, ,'OD STONG ZER GYIS SRID ZHI'I BKRAG MDANGS DANG, ,KHYAD PAR SRAS BCAS
RGYAL BA'I MKHYEN RAB DANG, ,LNGA RIG BDEN GNYIS RNAM 'BYED SHES RAB SOGS, ,SPYAN DRANGS SHES RAB 'KHOR LOR THIM PA LAS, ,BDUD RTZI'I RGYUN BABS SHES RAB SNANG BA THOB, ,SNYING GA'I HR'Im: YIG MAR ME MCHED PA BZHIN, ,ZHAL NAS THON TE SPRUL PA'I 'KHOR LOR ZHUGS, ,HR'Im: YIG LA THIM DBUGS KYI RGYU BA BZHIN, ,MGAL ME'I 'KHOR LO JI BZHIN 'KHOR BA YI, ,'OD BRGYAS GTI MUG MUN PA SEL BSAMS LA, DBYANGS YIG BRGYA PHRAG SNGON BTANG HR'Im: YIG GI ,DMAN 'BRING MCHOG GI BSNYEN PA CI RIGS PA, ,BSGRUBS PAS SHES RAB YAR NGO'I ZLA LTAR 'PHEL, ,AA A'A, AI A'I, AU A'U, Ri R'i, Li L'i, AE AEE, AO AOO, AAm AA: HR'Im: HR'Im: HR'Im: CES SEMS MA YENGS PAR BSNYEN PA CI 'GRUB BYA'O, ,GAL TE MA GRUB SPOG CHOG HR'Im: GI MGO ,THUR BSTAN LTE BA NAS THON ZHAL DU ZHUGS, ,RGYUN MI 'CHAD DU 'KHOR DANG DBYANGS YIG RNAMS, ,'KHRAB PAR DMIGS PAS MYUR DU 'GRUB PAR 'GYUR, ,MJUG TU GSHIN RJE'I GSHED SOGS KHRO BO YI, ,RNAM PAR BSGOMS NAS BSNGO BA SMON LAM BYA, ,SKABS SU BAR CHOD BZLOG PHYIR CI RIGS PA'I, ,KHRO BO'I BSNYEN PA GNAS SKABS DBUL SEL BA'I, ,NOR LHA JI LTAR RUNG BA'ANG BSGRUB PAR BYA, ,THUN MTSAMS DKAR GTOR CHAB KYIS BRAN BYAS LA, ,AOm A'A: H'Um GIS BDUD RTZIR BYIN GYIS BRLABS, ,RANG GI THUGS KA'I 'OD KYIS RGYAL BA'I YUM, ,DBYANGS
, ,CAN LHA MO 'KHOR BCAS SPYAN DRANGS TE, ,MDUN DU BZHUGS PA'I LJAGS KYI 'OD ZER GYIS, ,GTOR MA'I BCUD RNAMS DRANGS TE GSOL BAR GYUR, ,AOm SV'A RA SVASTI SA PA RI WA RA BA LIm PRA T'I TZTSA SV'AH'A, GSUM MAM BDUN GYIS PHUL, AARGHAm SOGS KYIS MCHOD, 'JIG RTEN DBANG PO'I ZHAL GYI CHU SKYES LAS, ,LEGS 'ONG NGANG PA'I BU MO AUTPAL MIG ,DRAN PA TZAM GYIS SHES RAB MCHOG STZOL BA, YID 'PHROG DBYANGS CAN LHA MO'I ZHABS LA 'DUD, ,ZLA LTAR BSIL YANG BDUD SDE'I BUD SHING BSREG ,NYON MONGS SPANGS KYANG CHAGS PA'I NYAMS DANG LDAN, ,SPROS DANG BRAL YANG RIN CHEN RGYAN MANG GIS, ,MNGON PAR MDZES PA'I LHA MO KHYOD LA BSTOD, ,MA PHYIS BZHIN DU KHYOD SKU DRI MAS DBEN, ,TSON MA BSKUS PAR DBU SKRA MTHON MTHING GNAG ,MA BSGOS BZHIN DU GA BUR DRI LDANG BA'I, ,YID 'ONG MDZES SDUG LHA MO'I ZHABS LA 'DUD,, 'DI LTAR BSTOD PA'I DGE BAS 'GRO BA KUN, ,RGYAL YUM LHA MOS 'BRAL MED RJES BZUNG NAS, ,RIG GNAS KUN SHES 'CHAD RTZOD RTZOM PA DANG, ,THOS BSAM BSGOM PA'I SHES RAB MTHAR PHYIN SHOG ,CES BSTOD CING 'DOD DON LA GSOL BA GDAB, BZOD PA GSOL TE GSHEGS SU GSOL, BSNGO BA SMON LAM SHIS PAS BRGYAN PAR BYA'O,, SMRAS PA, GANG LA BRTEN NA RNAM DPYOD KYI, ,CHU GTER SRID RTZE'I BAR 'PHYUR BA'I,,
THABS MKHAS ZLA DANG BRAL BA 'DI, ,CHOS KYI RGYAL MTSAN ZHES BYAS BSDEBS, ,DGE BAS 'GRO BA MA LUS PA, ,'PHAGS MAS 'BRAL MED RJES BZUNG STE, ,RMONGS PA'I RGYA LAS RNAM GROL NAS, ,KUN MKHYEN YE SHES THOB PAR SHOG ,CES PA 'DI NI THON MI SAMBHO tA'I GDUNG RIGS DRI MA MED PA MI'I DBANG PO MGON PO BKRA SHIS KYIS NAN TAN DU BSKUL BA'I BYED POS, BLA MA GONG MA RNAMS KYI GDAMS NGAG GI ZHAL SHES DANG BCAS PA 'JUG PA BDE BAR, DGE SLONG BLO BZANG CHOS KYI RGYAL MTSAN GYIS THON GZHIS KAR SUG BRIS SU BGYIS PA'O,, ,,