*, ,NA MO AA'R+YA T'A RE, RGYAL BA'I YUM GCIG 'PHAGS MA SGROL MA YI, ,ZHABS PAD DRI MA MED LA GUS BTUD NAS, ,DE NYID BSGRUB PA'I THABS KYI RIM PA MCHOG ,GO SLA'I NGAG GIS CUNG ZAD SPEL BAR BYA, 'DIR RJE BTZUN MA 'PHAGS MA SGROL MA BSGRUB PAR 'DOD PAS, SKYABS 'GRO SEMS BSKYED TSAD MED BZHI BSGOM PA SNGON DU BTANG NAS,
, ,KHYAD PAR GYI SEMS BSKYED, MA SEMS CAN THAMS CAD KYI DON DU MYUR BA MYUR BAR RDZOGS PA'I SANGS RGYAS KYI GO 'PHANG THOB PAR BYA, DE'I PHYIR DU RJE BTZUN MA 'PHAGS MA SGROL MA BSGRUB PA'I RNAL 'BYOR GYI RIM PA NYAMS SU BLANG BAR BYA'O SNYAM PA GSUM LA SOGS PA BYA, DE NAS, RANG GI MDUN GYI NAM MKHAR SNA TSOGS PADMA 'DAB MA BRGYAD PA'I LTE BAR ZLA BA'I DKYIL 'KHOR DKAR BSIL NYA GANG BA, DE'I STENG DU TAm LAS AUTPA LA TAm GYIS MTSAN PA, DE LAS 'OD ZER 'PHROS, 'PHAGS PA MCHOD, SEMS CAN THAMS CAD KYI SDIG SGRIB SBYANGS, TSUR 'DUS, YONGS SU GYUR PA LAS, RJE BTZUN MA 'PHAGS MA SGROL MA SKU MDOG LJANG GU ,GZHON NU LANG TSO BCU DRUG LON PA'I NYAMS CAN, ZHI ZHING 'DZUM PA, ZHAL GCIG PHYAG GNYIS KYI GA-YAS MCHOG SBYIN GYI PHYAG RGYAS DNGOS GRUB THAMS CAD STZOL BAR MDZAD CING, GA-YON THUGS KAR DKON MCHOG GSUM MTSON GYI PHYAG RGYA DANG BCAS PA'I SKYABS SBYIN GYIS 'JIGS PAS NYEN PA'I 'GRO BA MTHA' DAG DBUGS 'BYIN PAR MDZAD PA, DBU SKRA RAL PA PHYED BCINGS SU BYAS SHING, RIN PO CHE'I DBU RGYAN GSOL BA, RIN PO CHE'I MGUL RGYAN DANG, PHYAG GDUB DANG ZHABS GDUB LA SOGS PA RIN PO CHE'I RGYAN SNA TSOGS PAS SPRAS PA, LHA RDZAS LAS GRUB PA'I DAR BZANG PO'I STOD GA-YOGS DANG SMAD GA-YOGS LEGS PAR
GSOL BA, SKU LAS SKYES PA'I YE SHES KYI 'OD 'BAR BA'I DBUS NA, ZHABS GA-YAS BRKYANGS SHING GA-YON BSKUMS PA'I STABS KYIS BZHUGS PA, DE'I SPYI BOR AOm, MGRIN PAR A'A: THUGS KAR H'Um GIS MTSAN PAR GYUR, THUGS KA'I H'Um LAS 'OD ZER 'PHROS, GA-YU LO BKOD PA'I ZHING KHAMS NAS, 'PHAGS MA SGROL MA LA SANGS RGYAS DANG BYANG CHUB SEMS DPA'I TSOGS KYIS BSKOR BA SPYAN DRANGS PAR BSAMS LA, PO TA LA YI GNAS MCHOG NAS, CES PA NAS, SGROL MA 'KHOR BCAS GSHEGS SU GSOL, ,A'ARYA T'A RE SA PA RI W'A RA AE HYE HI, SA MA YA DZA: DZA: DZA: H'Um BAm HO: GNYIS SU MED PAR GYUR, SLAR YANG THUGS KA'I H'Um GI 'OD ZER GYIS SPYAN DRANGS PA'I DBANG GI LHA RNAMS KYIS DBANG BSKUR, LUS GANG, DRI MA DAG ,CHU LHAG PA SPYI GTZUG TU GNAS PA YONGS SU GYUR PA LAS 'OD DPAG MED KYIS DBU BRGYAN PAR GYUR, DE NAS RJE BTZUN MA DE NYID SKYABS GSUM 'DUS PA'I BDAG NYID DU BSAMS LA, YAN LAG BDUN PA 'DI LTAR DBUL BAR BYA STE, RJE BTZUN 'PHAGS MA SGROL MA DANG, ZHES SOGS KYIS PHYAG DANG, ME TOG BDUG SPOS MAR ME DRI, ZHES SOGS KYIS MCHOD PA DANG, THOG MA MED NAS DA LTA'I BAR, ZHES SOGS KYIS SDIG PA BSHAGS PA DANG, NYAN THOS RANG RGYAL BYANG CHUB SEMS, CES SOGS KYIS RJES SU YI RANG DANG, SEMS CAN RNAMS KYI BSAMS DANG, ZHES
, ,SOGS KYIS CHOS 'KHOR BSKUL BA DANG, 'KHOR BA JI SRID MA STONGS BAR, ZHES SOGS KYIS MYA NGAN LAS MI 'DA' BAR GSOL BA GDAB PA DANG, BDAG GIS DGE BA CI BSAGS PA, ZHES SOGS KYIS DGE RTZA RNAMS BLA MED BYANG CHUB TU BSNGO BAR BYA'O, ,DE NAS MDUN GYI GNAS NA BZHUGS PA'I RJE BTZUN MA DE NYID SKYABS GSUM KUN 'DUS PA'I BDAG NYID DU BSAMS NAS, GDUNG SHUGS DRAG POS RJE BTZUN MA DE NYID KYI ZHABS BRKYANGS PA'I MTHE BONG LA 'JUS PAR BSAMS LA, AOm RJE BTZUN MA 'PHAGS MA SGROL MA LA PHYAG 'TSAL LO, ZHES PA NAS, PHYAG 'TSAL BA NI NYI SHU RTZA GCIG ,CES LAN GSUM MAM, BDUN NAM, NYER GCIG GI BAR DU BRJOD PAR BYA'O, ,DE NAS MDUN GYI RJE BTZUN MA LAS RJE BTZUN MA GNYIS PA ZHIG CHAD NAS RANG NYID LA THIM PAS, RANG NYID RJE BTZUN MAR GYUR PAR BSAM, RANG RJE BTZUN MAR GSAL BA'I THUGS KAR ZLA BA'I STENG DU, TAm LJANG GU'I STENG DU H'Um SNGON POS MTSAN PA'I MTHA' SKOR DU MDUN NAS BRTZAMS TE GA-YAS BSKOR GYIS, AOm T'A RE TU TT'A RE TU RE SV'AH'A, ZHES PA'I SNGAGS PHRENG KHA DOG LJANG GU MARGAD KYI PHRENG BA BSGRIGS PA LTA BUS BSKOR BA'I 'OD ZER GYIS, PHYOGS BCU'I SANGS RGYAS DANG BYANG CHUB SEMS DPA' THAMS CAD RJE BTZUN MA'I RNAM PAR SPYAN DRANGS NAS RANG NYID LA THIM PAS, THOG MA MED PA NAS BSAGS PA'I
SDIG SGRIB BAG CHAGS DANG BCAS PA DANG, TSE DANG BSOD NAMS RGYAS PA LA BAR DU GCOD BYED THAMS CAD SBYANGS NAS, TSE DANG BSOD NAMS DANG, LUNG RTOGS KYI YON TAN RNAMS 'PHEL KHYAD PAR RJE BTZUN MA'I SKU GSUNG THUGS KYI BYIN RLABS THAMS CAD ZHUGS PAR BSAMS, SLAR YANG 'OD ZER BA SPU'I SGO NAS PHYIR 'PHROS PAS, SEMS CAN THAMS CAD KYI SDIG SGRIB SBYANGS NAS RJE BTZUN MA'I GO 'PHANG LA BKOD, 'OD ZER TSUR 'DUS, RANG GI SNGAGS PHRENG LA THIM PAR BSAMS LA, SNGAGS DE NYID MANG DU BRJOD PAR BYA'O, ,MJUG TU, DGE BA 'DI YIS MYUR DU BDAG ,'PHAGS MA SGROL MA 'GRUB GYUR NAS, ,'GRO BA GCIG KYANG MA LUS PA, ,DE YI SA LA 'GOD PAR SHOG ,CES SOGS KYIS, DE LAS BYUNG BA'I DGE BA RNAMS GNAS SKABS DANG MTHAR THUG GI SMON GNAS RNAMS SU 'DUN PA DRAG POS BSNGO BAR BYA'O, ,DE LTA BU'I SGO NAS NYIN RE BZHIN NYAMS SU BLANGS NA PHAN YON CHEN PO DPAG TU MED PA THOB PAR 'GYUR RO, ,TSUL 'DI NI DAD PA DANG GTONG BA SOGS DAM PA'I YON TAN RMAD DU BYUNG BA'I RGYAN GYIS MDZES PA'I BRAG TI NANG SO DPAL LDAN BKRA SHIS BZANG GIS GSOL BA BTAB PA'I NGOR, SH'AKYA'I DGE SLONG BLO BZANG CHOS KYI RGYAL MTSAN GYIS BLA MA GONG MA RNAMS KYI GSUNG BZHIN YI GER BKOD PA'O,, ,,