*, ,AOm SVASTI SIDDHAm, JO MO TSE RING MCHED LNGA BSTAN MA BCU GNYIS DANG BCAS PA LA, MCHOD GTOR 'BUL ZHING 'PHRIN LAS 'CHOL BA, RGYUN GYI RNAL 'BYOR DU BYA BA'I TSUL NI, NANG MCHOD DANG MCHOD GTOR SPYAN GZIGS SOGS PHYAG LEN LTAR BSHAMS, RANG LHAG PA'I LHA'I RNAL 'BYOR DANG LDAN PAS, SNGAGS DRUG DANG PHYAG RGYA DRUG GIS BYIN GYIS BRLABS, ROL MO DBYANGS DANG BCAS PAS 'DI LTAR, AOm MDUN GYI NAM MKHAR 'JA' 'OD 'KHRIGS PA'I KLONG, ,DAM RDZAS SPYAN GZIGS RGYA MTSOS BSKOR BA'I DBUS, ,CHU SKYES 'DAB STONG RGYAS PA'I LTE BAR NI, ,NYI ZLA'I GDAN LA GDONG LNGA 'GYING BA'I STENG, ,JO MO BKRA SHIS TSE RING GANGS RI'I MDOG ,ZHAL GCIG PHYAG GNYIS RDO RJE TSE BUM BSNAMS, ,SNA TSOGS DAR DANG RIN CHEN RGYAN GYIS SPRAS, ,TSE DANG SRID KYI DPAL 'BYOR STZOL ZHING BZHUGS, ,MDUN DU MTHING GI ZHAL
, ,BZANG DBANG SNGON GYI, ,MDANGS CHAGS PHYAG GA-YAS DBANG SDUD BA DAN DANG, ,GA-YON PA SRID GSUM GSAL BA'I ME LONG 'DZIN, ,MNGON SHES MCHOG STZOL RDZU 'PHRUL RKYANG LA CHIBS, , GA-YAS PHYOGS ZAS SOGS 'DOD DGU'I DPAL STER BA'I, ,MI GA-YO BLO BZANG GSER MDOG 'DZUM ZHAL CAN, ,PHYAG GNYIS BDUD RTZI'I GZHONG PA NE'U LES MDZES, ,RIN CHEN RGYAN LDAN DPA' BO STAG LA CHIBS, , RGYAB TU NOR GYI MCHOG STER MDZES MA'I GZUGS, ,COD PAN MGRIN BZANG DBANG GI MDANGS DANG LDAN, ,PHYAG GA-YAS NOR BU GA-YON PAS GTER SGROM 'DZIN, ,SHA YU LA CHIBS DGOS 'DOD CHAR DU 'BEBS, , GA-YON NA RKANG BZHI'I DNGOS GRUB STZOL MDZAD PA'I, ,GTAD DKAR 'GRO BZANG LJANG SNGON MA RGAD MDOG ,DUR SNGON SBRUL ZHAGS GA-YAS GA-YON PHYAG GIS BZUNG, ,MDZES SHING YID 'ONG GA-YU 'BRUG SNGON MO CHIBS, ,DE RNAMS 'KHOR DU BSTAN PA BSRUNG MDZAD CING, ,RNAL 'BYOR BU BZHIN SKYONG BA'I DAM TSIG CAN, ,BSTAN MA BCU GNYIS GNAS GSUM MKHA' 'GRO'I TSOGS, ,DAM CAN CHOS SKYONG BSRUNG MA MTHA' DAG KYANG; ;RANG RANG BKA' NYAN 'KHOR TSOGS RGYA MTSOS BSKOR, ,DREGS PA SDE BRGYAD YUL LHA GZHI BDAG BCAS, ,BAR SNANG NAM MKHA' SA GZHI KHYAB PAR BZHUGS, ,AOm CHOS DBYINGS BDE BA CHEN PO'I PHO BRANG NAS, ,
RIG 'DZIN RTZA BRGYUD BLA MA YI DAM LHA, ,GNAS GSUM MKHA' 'GRO YE SHES d'A KI'I GTZO, ,JO MO BKRA SHIS TSE RING MCHED LNGA DANG, ,BOD KHAMS SKYONG MDZAD BSTAN MA BCU GNYIS BCAS, ,SO SO'I BKA' NYAN 'KHOR TSOGS RGYA MTSO DANG, ,GZHAN YANG DAM CAN CHOS SKYONG BSRUNG MA'I TSOGS, ,DREGS PA SDE BRGYAD DMAG TSOGS MA LUS DANG, ,YUL LHA GZHI BDAG GNYAN PO 'KHOR BCAS RNAMS, ,SNGON TSE KHYAB BDAG HE RU KA DPAL DANG; ;RIG 'DZIN CHEN PO PADMA 'BYUNG GNAS KYIS, ,BKA' BSGOS DAM BCAS JI BZHIN DGONGS MDZOD LA, ,SANGS RGYAS BSTAN PA BSRUNG ZHING SKYONG BA DANG, ,ZHI RGYAS DBANG DANG MNGON SPYOD LA SOGS PA'I, ,RNAL 'BYOR 'PHRIN LAS TSUL BZHIN BSGRUB PA'I PHYIR, ,THOGS PA MED PAR MYUR DU GSHEGS SU GSOL, ZHES SPYAN DRANGS, DAM TSIG PA LA GZHUG ,DE NAS, AOm BDE STONG RANG BZHIN LEGS BRIS DGA' TSAL LAS, , BYUNG BA'I RNAM MANG MCHOD PA'I ME TOG TSOGS, ,TSE RING MCHED LNGA BSTAN MA BCU GNYIS PO, ,'KHOR BCAS DGYES PA BSKYED PHYIR 'BUL BA NI, ,MCHOD YON ME TOG BDUG SPOS SNANG GSAL DRI, ,ZHAL ZAS SNA TSOGS ROL MO RIN CHEN BDUN, ,BKRA SHIS RTAGS BRGYAD 'DOD YON RNAM PA LNGA, ,PHYI NANG SPYAN GZIGS DAM RDZAS RGYA MTSO 'DIS, ,YE SHES d'A KI'I GTZO MO MCHED LNGA DANG, ,BSTAN SKYONG CHEN MO 'KHOR BCAS
, ,THUGS DAM BSKANG, ,RAB BRJID GDONG LNGA'I DBANG PO DPA' BO STAG ,RLUNG LTAR MGYOGS PA'I DRE RTA RKANG GSUM DANG, ,SHA RKYANG 'PHAR BA GA-YU 'BRUG NAM MKHA' LDING, ,RDZU 'PHRUL SHUGS LDAN BZHON PA'I TSOGS RNAMS KYIS, ,YE SHES d'A KI'I GTZO MO MCHED LNGA DANG, ,BSTAN SKYONG CHEN MO 'KHOR BCAS THUGS DAM BSKANG, ,MDZES PA'I RTA MCHOG SNA TSOGS GLOG LTAR 'KHYUG ,GA-YAG ROG ZHOL CHEN RNGAMS PA'I NGAR SGRA 'BYIN, ,SPYI GTZUG ZLA BAS MDZES PA'I LUG NAG DANG, ,RNAM MANG 'DAB CHAGS KHROS PA'I KHYI NAG 'DIS, ,YE SHES d'A KI'I GTZO MO MCHED LNGA DANG, ,BSTAN SKYONG CHEN MO 'KHOR BCAS THUGS DAM BSKANG, ,SRA ZHING NGAR LDAN RDO RJE'I GO MTSON DANG, ,'BRU SNA GSER DNGUL RIN CHEN 'DOD DGU'I MDZOD, ,JA CHANG GSER SKYEMS BTUNG BA RGYA MTSOR 'KHYIL, ,YID 'ONG LHA MI'I LONGS SPYOD PHUN TSOGS KYIS, ,YE SHES d'A KI'I GTZO MO MCHED LNGA DANG, ,BSTAN SKYONG CHEN MO 'KHOR BCAS THUGS DAM BSKANG, ,'CHI MED DPAL STER RIN CHEN BUM BZANG DANG, ,MDA' DAR ME LONG NOR BU'I RGYAN PHRENG SOGS, ,SKU GSUNG THUGS KYI RTEN RDZAS DAM PA DANG, ,ZAG MED BDE CHEN GSANG BA'I MCHOD PA 'DIS, ,YE SHES d'A KI'I GTZO MO MCHED LNGA DANG, ,BSTAN SKYONG CHEN MO 'KHOR BCAS THUGS DAM BSKANG, ,BHRUm
LAS RIN CHEN LAS GRUB SNOD YANGS SU, ,DKAR GSUM MNGAR GSUM RIN CHEN ZAS SNA DANG, ,SHA KHRAG LHUN POR SPUNGS PA'I GTOR MA'I TSOGS, ,'JA' TSON LTAR BKRA'I DAR GYI COD PAN CAN, ,YE SHES BDUD RTZI'I RGYA MTSOR BYIN BRLABS NAS, ,BLA MA YI DAM MKHA' 'GRO'I TSOGS LA 'BUL, ,BLA MA YI DAM MKHA' 'GRO TSE RING MCHED LNGA BSTAN MA BCU GNYIS 'KHOR DANG BCAS PA'I LJAGS 'OD ZER GYI SBU GUS GTOR MA'I BCUD THAMS CAD DRANGS TE GSOL BAR GYUR, AOm PADMA SIDDHI, DE BA PANYTZA d'A KI N'I SA PA RI W'A RA AI DAm BA LIm TA KHA KHA KH'A HI KH'A HI ZHES LAN BDUN GYIS BLA MA YI DAM TSE RING MCHED LNGA DANG, AA K'A RO LAN BDUN GYIS BSTAN MA 'KHOR BCAS LA 'BUL, AARGHAm SOGS KYIS MCHOD, SAMBHA RAS GZHI BDAG LA BSNGO, DE NAS BSTOD PA DANG 'PHRIN LAS 'CHOL BA NI, AOm DUS GSUM BDE GSHEGS MA LUS BSKYED PA'I YUM, ,SGRIB BRAL LHAN SKYES BDE BA CHEN PO'I DNGOS, ,DRAN PAS TSE DANG YE SHES STZOL MDZAD PA'I, ,TSE RING MCHED LNGA BSTAN SKYONG TSOGS LA 'DUD, ,RDO RJE 'CHANG DBANG PADMA SAMBHA WAS, ,BKA' BSGOS JI BZHIN SANGS RGYAS BSTAN PA DANG; ;BSTAN 'DZIN BU BZHIN SKYONG BA'I DAM TSIG CAN, ,BKA' BSRUNG CHEN PO 'KHOR DANG BCAS LA BSTOD, ,'JIG RTEN MKHA' 'GRO'I GTZO MO'I TSUL BZUNG NAS, ,SDANG DGRA GNOD BGEGS THAL BAR
, ,BRLAG BYED CING, ,GA-YEL MED RNAL 'BYOR 'PHRIN LAS BSGRUB MDZAD PA, ,BOD KHAMS SKYONG BA'I GTZO MO RNAMS LA BSTOD, ,DENG NAS BZUNG STE BYANG CHUB SNYING PO'I BAR, ,NAD RIMS GDON BGEGS DUS MIN 'CHI BA DANG, ,DGRA JAG CHOM RKUN 'BYUNG BA'I GNOD PA SOGS, ,MA LUS NYE BAR ZHI BA'I 'PHRIN LAS MDZOD, ,TSE DANG BSOD NAMS LUNG RTOGS YON TAN DANG, ,'KHOR DANG LONGS SPYOD MTHU STOBS SNYAN GRAGS DANG, ,PHUN TSOGS DPAL 'BYOR BSTAN PA'I BYA BA SOGS, ,THAMS CAD YAR NGO'I ZLA LTAR RGYAS PAR MDZOD, ,KHAMS GSUM SKYE DGU KUN DANG DE DAG GI ,RIN CHEN NOR 'BRU RTA DANG GLANG PO DANG, ,YUL 'KHOR 'DOD DGU MA LUS RE BA BZHIN, ,MYUR DU DBANG DU 'DU BA'I 'PHRIN LAS MDZOD, ,ZHI RGYAS DBANG GIS 'DUL BAR MI NUS PA, ,BSAM SBYOR LOG PAR LTA BA'I DGRA BGEGS RNAMS, , RMONGS RENGS BCINGS DANG BSAD PA'I 'PHRIN LAS KYIS, ,SKAD CIG TZAM GYIS THAL BAR BRLAG PAR MDZOD,, BHYOO: RTAG TU BSTEN CING BSGRUB PA'I GTZO, ,BSTAN BSRUNG CHEN MO KHYED RNAMS KYIS, ,BDAG CAG DPON SLOB 'KHOR BCAS LA, ,NYIN GSUM RGYANG NAS BYA RA DANG, ,MTSAN GSUM DRUNG NAS MEL TSE DANG, ,GZHIS BYES LAM 'PHRANG THAMS CAD DU, ,BRTZE BA'I MA DANG SRING MO LTAR, ,MGON SKYABS DPUNG GNYEN GROGS
MDZOD CIG ,BDAG CAG DPON GA-YOG 'KHOR BCAS KYI, ,RKYEN NGAN BAR CHAD BZLOG PA DANG, ,BSAMS DON YID BZHIN 'GRUB PA DANG, ,BSHAD SGRUB LONGS SPYOD 'PHEL BAR MDZOD, ,KHYAD PAR BCOM LDAN HE RU KA DPAL LA, ,GSANG BA'I DGYES PA BSKYED MDZAD d'A KI'I TSOGS, ,BSTEN CING MCHOD PA'I RNAM DKAR PHUNG PO'I MTHUS, ,DGE LEGS CHEN POS PHYOGS 'DIR GANG BAR SHOG ,CES BKRA SHIS BRJOD, TSUL 'DI NI THON NAS MI'I DBANG PO GANG GIS NAN TAN DU BSKUL BA'I NGOR, RDO RJE 'DZIN PA BLO BZANG CHOS KYI RGYAL MTSAN GYIS 'PHRAL DU BKOD PA'O,,