*, ,BLA MA DANG LHAG PA'I LHA LA PHYAG 'TSAL ZHING SKYABS SU MCHI'O, ,BRTZE BA CHEN POS RJES SU GZUNG DU GSOL, 'DIR BLA MA LHA RTA MGRIN GYI RNAL 'BYOR GYI SGO NAS DAL 'BYOR LA SNYING PO LEN PA'I TSUL LA GSUM, SNGON DU JI LTAR BYA BA DANG, BAR DU JI LTAR BYA BA DANG, THA MAR JI LTAR BYA BA'I TSUL LO, ,DANG PO NI, YID MTHUN GYI GNAS SU, BDE BA'I STAN LA LEGS PAR 'DUG STE, DGE BA'I SEMS KHYAD PAR CAN GYI NGANG NAS, RANG MDUN THAD DRANG NAM MKHA'I GNAS SU BLA MA DKON MCHOG GSUM NAM MKHA' KHYAB PAR BZHUGS PA DRAN PA'I NGANG NAS SKYABS 'GRO SEMS BSKYED SPYI DANG, KHYAD PAR, MA SEMS CAN THAMS CAD KYI DON DU MYUR BA MYUR BAR RDZOGS PA'I SANGS RGYAS THOB PAR BYA, DE'I PHYIR DU BLA MA LHA RTA MGRIN GYI RNAL 'BYOR GYI SGO NAS ZAB PA DANG RGYA CHE BA'I LAM GYI SNYING PO NYAMS SU BLANG BA LA 'JUG PAR BGYI'O SNYAM PA GSUM MAM BDUN NAM NYER GCIG SOGS BYA'O, ,GNYIS PA LA GSUM, BLA MA LHA SPYI BOR BSGOMS NAS YAN LAG BDUN PA 'BUL BA DANG, GSOL BA BTAB NAS NYAMS SU BLANG BA DANG, RANG DANG THA MI DAD DU BYAS TE SNGAGS BZLA BA'I TSUL LO, ,DANG PO NI, RANG GI SBYI BOR SNA TSOGS PAD ZLA NYI MA'I DKYIL 'KHOR GYI GDAN LA, SKAD CIG GIS BLA MA LHA RTA MGRIN BZHUGS PA MNGON RTOGS BZHIN GSAL BTAB, THUGS KA'I H'Um DANG SKU'I CHA
, ,LAS 'OD ZER PHYOGS BCUR 'PHROS PA, ZHI GRO RAB 'BYAMS GYI SKU LA PHOG PAS RTA MGRIN GYI RNAM PAR SPYAN DRANGS, BLA MA LHA LA THIM PAS, DE NYID SKYABS GNAS KUN 'DUS PA'I BDAG NYID CHEN POR GYUR, DE LTAR GSAL BA'I NGANG NAS YAN LAG BDUN PA DANG, MAndAL DMIGS PA DANG BCAS NAS DBUL BAR BYA'O, ,GNYIS PA NI, BDAG DANG MA NAM MKHA' DANG MNYAM PA'I SEMS CAN THAMS CAD, RGYAL KUN MKHYEN BRTZE GCIG BSDUS SPYAN RAS GZIGS, ,THUGS RJE'I DBANG GIS DRAG PO'I SKUR BSTAN NAS, ,MA RUNGS GDUL DKA' MA LUS 'DUL MDZAD PA, ,BLA MA LHA MCHOG KHYOD LA GSOL BA 'DEBS, ,CES MANG DU BRJOD PA'I MTHAR, RANG GIS RANG MA RIG PAS 'KHOR BAR SKYE BA NAS SPYI DANG BYE BRAG GI SDUG BSNGAL BSAM GYIS MI KHYAB PA ZHIG MYONG 'DUG STE, DA DUNG DE LTA BU'I SDUG BSNGAL GYI GTING DANG MTHA' MNGON PAR DKA' BAR 'DUG ,DES NA LAN CIG RNYED PA'I DAL 'BYOR GYI RTEN KHYAD PAR CAN 'DI NAM 'JIG LA NGES PA YANG YANG MI 'DUG PA DANG, ZHIG PA'I 'OG TU RTEN 'DI 'DRA SHIN TU RNYED DKA' BAR GSUNGS 'DUG ,DES NA DA LTA NYID NAS LAS 'BRAS LA YID CHES KYI DAD PA BSKYED NAS, DGE SDIG GI LAS LA BLANG DOR TSUL BZHIN BSGRUB PAR BYA'O, ,DE LTAR BYIN GYIS BRLAB TU GSOL, DE LTAR BLANG DOR TSUL BZHIN BSGRUBS PAS MNGON
MTHO'I LUS RTEN KHYAD PAR CAN THOB PAR NUS MOD, DE DANG DES MTSON, 'KHOR BA MTHA' DAG SDUG BSNGAL GYI RANG BZHIN BZOD DKA' BA ME 'OBS LTA BUR MTHONG BA DANG, MTHONG NAS 'KHOR BA LAS GROL BA ZHIG CI NAS KYANG THOB PAR BYA'O, ,DE LTAR BYED NUS PAR BYIN GYIS BRLAB TU GSOL, DE YANG, RANG KHO NA'I SDUG BSNGAL ZHI BA TZAM DON DU GNYER BA RGYAL BA SRAS DANG BCAS PAS SMOD PA'I GNAS SU GSUNGS PAS, BDAG GIS DRIN CAN GYI MA SEMS CAN THAMS CAD SDUG BSNGAL GYIS MNAR ZHING, BDE BAS PHONGS PA LAS BSGRAL BA'I PHYIR DU, 'KHOR BA'I SDUG BSNGAL LAS GROL BA'I GO 'PHANG ZHIG THOB PAR BYA, DE YANG BLA MA LHA RTA MGRIN GYI GO 'PHANG THOB PAR BYA'O, ,DE LTAR BYED NUS PAR BLA MA LHAS BYIN GYIS BRLAB TU GSOL, ZHES BRJOD PAS, SPYI BO NA BZHUGS PA'I BLA MA LHA'I SKU LAS BDUD RTZI'I RGYUN BABS, RANG LA THIM PAS DE DANG DE'I GEGS BYED SBYANGS, DE DANG DER GYUR PAR BSAM PA DANG, KHYAD PAR BLA MAS BYIN GYIS BRLAB TU GSOL, ZHES BRJOD PA'I TSE BLA MA LHA LAS BLA MA LHA GCIG CHAD NAS RANG NYID LA THIM PAR BSAM MO, ,GSUM PA LA GNYIS, SNGAGS BZLA TSUL SPYIR BSTAN PA DANG, LAS BZHI'I SGO NAS SNGAGS BZLA TSUL BYE BRAG TU BSTAN PA'O, ,DANG PO NI, ,BLA MA LHA RTA MGRIN RANG NYID LA THIM PAS, RANG NYID BLA MA LHA DPAL RTA MGRIN SKU MDOG DMAR PO ZHAL GSUM PHYAG DRUG ZHABS
, ,BRGYAD PA, SKU LAS SKYES PA'I YE SHES KYI ME RAB TU 'BAR BA'I DBUS NA SNA TSOGS PAD ZLA NYI MA'I DKYIL 'KHOR GYI GDAN LA KLU CHEN BRGYAD SBRUL GZUGS SU GNAS PA MNAN PA'I TSUL GYIS BZHUGS PAR BSAM, DE LTAR GSAL BA'I THUGS KAR NYI GDAN LA HR'I: DMAR NAG DANG H'Um SNGON PO'I MTHA' SKOR DU SNGAGS KYI PHRENG BAS BSKOR BAR GYUR, THUGS KA'I H'Um HR'I: LAS 'OD ZER PHYOGS BCUR 'PHROS PAS, PHYOGS BCU'I SANGS RGYAS DANG BYANG CHUB SEMS DPA' THAMS CAD RTA MGRIN GYI RNAM PAR SPYAN DRANGS, RANG NYID RTA MGRIN DU GSAL BA LA THIM PAS, SANGS RGYAS BYANG SEMS THAMS CAD DANG, KHYAD PAR RTA MGRIN GYI BYIN RLABS ZHUGS PAR MOS PA'I NGANG NAS, AOm HR'I: PADM'ANTA GRiTA BADZRA KRO DHA HA YA GR'I WA HU LU HU LU H'Um H'Um PHAt PHAt SV'AH'A, ZHES MANG DU BZLA ZHING BSNYEN PA BYA'O, ,GNYIS PA NI, DE LTAR BSNYEN PA MTHAR SON NAS DBANG DU BSDU BAR 'DOD NA, RANG RTA MGRIN DU GSAL BA'I THUGS KA'I H'Um DANG SKU'I CHA LAS BDUD RTZI 'OD ZER DMAR PO 'PHROS, DBANG DU BSDU BAR BYA BA RNAMS LA PHOG PAS, DE RNAMS RANG LA DGYES PA DANG DGA' BA'I SGO NAS 'DUS PAR BSAMS LA, HU LU DANG H'Um GI BAR, CHE GE MO WA SHAm KU RU SBYAR LA SNGAGS BZLA BAR BYA, ZHI BAR 'DOD NA BDUD RTZI 'OD ZER DKAR PO 'PHROS PA'I SNA LAS BDUD RTZI DKAR PO'I RGYUN BABS, ZHI BAR BYA BA DE DANG DE'I LUS LA THIM PAS, NAD GDON SOGS
CHOS DANG CHOS LDAN GYI BYA BA'I BAR CHAD THAMS CAD ZHI BAR BSAMS NAS, CHE GE MO'I BAR DU GCOD PA THAMS CAD SH'ANTI KU RU ZHES SBYAR LA BZLA, RGYAS PAR 'DOD NA, 'OD ZER SER PO PHYOGS BCUR 'PHROS PAS, SANGS RGYAS BYANG SEMS RNAMS RTA MGRIN SER PO BDUD RTZI 'OD ZER 'PHRO 'DZAG GI RNAM PAR SPYAN DRANGS NAS RANG NYID LA THIM PAS, TSE DANG BSOD NAMS DANG BSLAB PA GSUM SOGS RGYAS PAR BSAMS LA, MA MA A'A YU: PUshtIm KU RU H'Um H'Um PHAt, CES BRJOD, GZHAN DON DU BYED NA BDUD RTZI 'OD ZER 'PHROS PA'I SNE MO LAS BDUD RTZI SER PO'I RGYUN BABS, RGYAS PAR BYA BA DE DANG DE LA THIM PAS, TSE DANG BSOD NAMS SOGS RGYAS PAR BSAMS LA, CHE GE MO MA MA A'A YU: ZHES SOGS SBYAR TE SNGAGS BGRANG BAR BYA, DRAG PO'I TSUL NI 'OD ZER NAG PO PHYOGS BCUR 'PHROS PA'I SNA LAS BDUD RTZI KHRO CHU LTA BU DANG, ME DPUNG DANG, MTSON CHA'I TSOGS RAB DANG GZHAN CHE GE MO LA GNOD BYED RNAMS KYI LUS LA BABS PA, BSAM SBYOR NGAN PA DANG BCAS PA'I LUS RTEN MED PAR BYAS, RTA MGRIN GYI GO 'PHANG THOB PAR BSAMS LA, GDON GNOD BYED M'A RA YA, ZHES SPEL TSIG SBYAR NAS SNGAGS DRAG TU BZLA BAR BYA'O, ,GSUM PA NI, DGE BA 'DI YIS MYUR DU BDAG ,BLA MA RTA MGRIN 'GRUB GYUR NAS, ,'GRO BA GCIG KYANG MA LUS PA, ,DE YI SA LA 'GOD PAR SHOG ,CES SOGS DANG, GO 'PHANG DE NYID TSE
, ,'DIR MA THOB KYANG, ,'CHI TSE BLA MA LHA MCHOG 'KHOR BCAS KYIS, ,YID 'ONG MCHOD SBYIN SNYAN PA'I ROL MO SOGS, ,NGO MTSAR LTAS BZANG MANG POS BSU BAR SHOG ,DE NAS ZHING KHAMS MCHOG TU LEGS BGROD NAS, ,SKU GSUNG THUGS KYI BYIN RLABS MCHOG THOB STE, ,PHYI NANG BDUD SDE'I GA-YUL LAS RGYAL GYUR NAS, ,BLA MA LHA MCHOG NYID DANG MTSUNGS PAR SHOG ,CES DGE BA'I RTZA BA RNAMS BSNGO BAR BYA'O, ,DE LTAR THUN BZHI 'AM THUN GCIG TZAM ZHIG NYAMS SU BLANGS NA YANG, BLA MA LHAS RJES SU BZUNG NAS BDUD DANG MI MTHUN PA'I PHYOGS LAS RGYAL BA DANG, MTHAR THUG BLA MA LHA RTA MGRIN GYI GO 'PHANG THOB NAS PHYOGS DUS GNAS SKABS THAMS CAD DU BKRA SHIS DANG BDE LEGS KYI DPAL RGYAS PAR BYED PA YIN NO, ,ZHES PA 'DI NI, RJE BTZUN BLA MA SANGS RGYAS YE SHES KYI GSUNG JI LTA BA BZHIN DU, ` CHOS SMRA BA'I BTZUN PA BLO BZANG CHOS KYI RGYAL MTSAN GYIS CHOS GRVA CHEN PO'I GZIMS KHANG DU NYE BAR BKOD PA DGE LEGS 'PHEL,, ,,