*, ,SVASTI, BCOM LDAN HE RU KA DANG RJE BTZUN MA, ,DBYER MED BLA MA'I ZHABS LA GUS BTUD NAS, ,GO 'PHANG MCHOG DE SGRUB BYED ZAB MO'I LAM, ,BLO BZANG GDAMS PA JI BZHIN BSHAD PAR BYA, 'DIR BSGRUB PA PO BCOM LDAN 'DAS DPAL 'KHOR LO SDOM PA'I RNAL 'BYOR LA BRTEN NAS, DAL BA'I RTEN LA SNYING PO LEN PA'I THABS RGYAS PA MA LCOGS PA'I TSE MDOR BSDUS TE BYA BA'I TSUL NI, 'DI LTAR, SANGS RGYAS CHOS DANG DGE 'DUN LA, ,RTAG TU BDAG NI SKYABS SU MCHI, ,THEG PA GSUM PO THAMS CAD DANG, ,RNAL 'BYOR GSANG SNGAGS MKHA' 'GRO MA, ,DPA' BO DPA' MO DBANG LHA MO, ,BYANG CHUB SEMS DPA' BDAG NYID CHE, ,KHYAD PAR DU YANG SLOB DPON LA, ,RTAG TU SKYABS SU MCHI BAR BGYI, ,SEMS CAN KUN GYI DON GYI PHYIR, ,BDAG NI HE RU KAR GYUR NAS, ,SEMS CAN THAMS CAD HE RU KA'I, ,GO 'PHANG MCHOG LA DGOD PAR
, ,BGYI ,ZHES PA'I SKYABS 'GRO SEMS BSKYED LAN GSUM DANG, SEMS CAN THAMS CAD SDUG BSNGAL THAMS CAD DANG BRAL BAR GYUR CIG ,SEMS CAN THAMS CAD BDE BA THAMS CAD DANG LDAN PAR GYUR CIG ,SEMS CAN THAMS CAD THOB ZIN PA'I BDE BA BRTAN PAR GYUR CIG ,SEMS CAN THAMS CAD YID DE BZHIN NYID LA RO GCIG TU GNAS PAR GYUR CIG ,CES PA'I TSAD MED BZHI BSGOM PA SNGON DU BTANG NAS, SHR'I HE RU KA, HE NI KUN GYI 'BYUNG GNAS SU GYUR PA'I SEMS TE, RGYU'I BDAG NYID DU BRTAG PAR BYA BAS STONG PA'I CHOS KYI BDAG MED PA DANG, RU NI GANG ZAG GI BDAG TU 'DZIN PA'I RNAM RTOG GI DRA BAS BKOD PA'I BDAG DANG BRAL BA'I GANG ZAG GI BDAG MED PA DANG, KA NI DE KHO NA NYID KYI YUL YUL CAN GNYIS MI MTHUN PAR SO SOR GNYIS SU MI GNAS PA DANG, SHR'I NI YUL STONG PA NYID JI 'DRA BA DE BZHIN DU RJES SU ZHUGS PA'I GNYIS SU MED PA'I YE SHES AE WAm GYI DON NO, ,STONG PA'I NGANG LAS SKAD CIG GIS RANG NYID HE RU KA SNGON PO, ZHAL GCIG PHYAG GNYIS KYIS RDO RJE DANG DRIL BU 'DZIN PA GA-YAS BRKYANGS KYIS BZHUGS PA, YUM RDO RJE PHAG MO DMAR MO ZHAL GCIG PHYAG GNYIS KYIS RDO RJE DANG THOD PA 'DZIN PAS 'KHYUD PAR GYUR, SHR'I HE RU KONYAHAm GSUM, AOm AA A'A, AI A'I, A'A A'U Ri R'i Li L'i AE AEE AO AOO AAm AA: KA KHA
GA GHA NGA, TZA TSA DZA DZHA NYA, tA thA dA DHA nA, TA THA DA DHA NA, PA PHA BA BHA MA, YA RA LA WA, SHA shA SA HA KshA, HUm H'Um PHAt, GSUM, RANG GI LTE BA'I PHYOGS SU SNGAGS PHRENG 'OD ZER LNGA DANG BCAS PA GA-YON BSKOR GYIS LAN GSUM DU BSKOR NAS GNAS PA LAS, 'KHOR LO GSUM GYI LHA TSOGS 'PHROS PA SNA BUG GA-YAS NAS THON TE PHYIR 'PHROS PAS, BGEGS THAMS CAD BSKRAD DE SLAR BYON, RANG GI SNA BUG GA-YON PA NAS ZHUGS TE, LTE BA'I SNGAGS PHRENG LA THIM PAR GYUR, RANG GI MDUN GYI THAD DRANG GI NAM MKHA'I GNAS SU SNA TSOGS PADMA 'DAB MA STONG LDAN GYI LTE BAR, SENG CHEN BRGYAD BTEG RIN CHEN KHRI STENG SNA TSOGS PAD ZLA NYI MA'I DKYIL 'KHOR GYI GDAN LA, NGO BO RANG GI DRIN CAN RTZA BA'I BLA MA YIN PA LA, RNAM PA BCOM LDAN 'DAS DPAL HE RU KA SKU MDOG MTHING GA ZHAL BZHI PA'I RTZA ZHAL NAG ,GA-YON ZHAL LJANG, RGYAL ZHAL DMAR, GA-YAS ZHAL SER BA, ZHAL RE RE YANG SPYAN GSUM PA PHYAG BCU GNYIS PA, DPRAL BAR RDO RJE RTZE LNGA PA'I PHRENG BA 'DZIN PA, ZHABS GA-YAS BRKYANGS PAS 'JIGS BYED NAG PO LAG PA BZHI PA'I DANG PO GNYIS THAL MO SBYAR BA, LHAG MA GA-YAS dA MA RU DANG, GA-YON RAL GRI 'DZIN PA'I MGO BO MNAN PA, GA-YON BSKUMS PAS DUS MTSAN MA DMAR MO LAG PA BZHI PA'I DANG PO GNYIS THAL MO SBYAR BA, LHAG MA GNYIS THOD PA DANG KHA t'Am GA 'DZIN PA'I NU MA MNAN PA, GDAN GNYIS KA'ANG GDONG GCIG PA, MIG
, ,GSUM PA, PHYAG RGYA LNGAS BRGYAN PA, PHYAG DANG PO GNYIS KYIS RDO RJE PHAG MO LA 'KHYUD PA'I GA-YAS PAS RDO RJE RTZE LNGA PA DANG, GA-YON PAS DRIL BU BSNAMS PA, DE'I 'OG MA GNYIS KYIS GLANG PO CHE'I PAGS PA DKAR PO KHRAG DANG BCAS PA'I NA BZA' PHYAG GA-YAS PAS LAG PA GA-YON PA DANG, GA-YON PAS RKANG PA GA-YON PA'I PAGS PA RANG GI RGYAB TU SDIGS MDZUB DANG BCAS PAS BRGYANGS TE 'DZIN PA'I SDIGS MDZUB KYI RTZE GNYIS SMIN MA'I THAD SOR GNAS PA, GA-YAS GSUM PA NA d'A MA RU, BZHI PA NA DGRA STA, LNGA PA NA GRI GUG ,DRUG PA NA MDUNG RTZE GSUM PA BSGRENG BA, GA-YON PA'I PHYAG GSUM PA NA RDO RJES MTSAN PA'I KHA tV'Am GA ,BZHI PA NA KHRAG GIS GANG BA'I THOD PA, LNGA PA NA RDO RJE'I ZHAGS PA, DRUG PA NA TSANGS PA'I MGO BO GDONG BZHI PA BSNAMS SHING, SNA TSOGS RDO RJES MTSAN PA'I RAL PA'I THOR COG CAN, DBU RE RE LA RDO RJE NAG PO'I PHRENG BA STOD SMAD DU GNAS PA GNYIS LA BRGYUS PA'I THOD PA BSKAM PO LNGA LNGA'I PHRENG BAS BRGYAN PA, DBU'I GA-YON DU CUNG ZAD YO BA'I ZLA BA PHYED PA 'CHANG BA, ZHAL RNAM PAR 'GYUR BA, MCHE BA BZHI BZHI GTZIGS SHING 'JIGS SU RUNG BA, SGEG PA DPA' BA MI SDUG PA STE SKU'I NYAMS GSUM DANG, RGOD DANG DRAG SHUL 'JIGS SU RUNG BA STE GSUNG GI NYAMS GSUM DANG, SNYING RJE DANG RNGAMS PA DANG ZHI BA STE, THUGS KYI NYAMS GSUM STE NYAMS DGU DANG LDAN PA,
STAG GI PAGS PA'I SHAM THABS CAN, MI'I RGYU MA LA BRGYUS PA'I MGO BO RLON PA LNGA BCU'I PHRENG BA 'PHYANG BA, PHYAG RGYA DRUG GIS RGYAS BTAB PA, MI RUS KYI THAL BAS LUS THAMS CAD LA BYUGS PA, BCOM LDAN 'DAS LA MNGON DU PHYOGS PAR BCOM LDAN 'DAS MA RDO RJE PHAG MO SKU MDOG DMAR MO, ZHAL GCIG PA, PHYAG GNYIS PA, SPYAN GSUM PA, GCER MO SKYA GROL BA, THOD PA'I DUM BUS BRGYAN PA'I 'OG PAG CAN, PHYAG GA-YON PAS YAB KYI MGUL NAS 'KHYUD PA'I THOD PA NA, BDUD BZHI LA SOGS PA'I KHRAG GIS BKANG BA BSNAMS NAS YAB KYI ZHAL DU STOB PA, GA-YAS PAS PHYOGS BCU'I GDUG PA CAN KUN LA RDO RJE DANG BCAS PA'I SDIGS MDZUB KYIS SDIGS PAR MDZAD PA; 'GRO BA STONG PA NYID DU MNYAM PAR RTOGS PAS BSKAL PA 'JIG PA'I DUS KYI ME LTA BU, SHIN TU DAG PA'I YE SHES KYI SNANG BA DANG LDAN PAS NYI MA'I 'OD CAN GYI GZI BRJID CHE BA, KHRAG LA DGYES SHING KHRAG 'DZAG PA; BYIN PA GNYIS KYIS YAB KYIS BRLA'I STENG DU LEGS PAR 'KHRIL BA, LHAG MTHONG GI RANG GYI BDE BA CHEN POR GNAS KYANG, 'GRO BA'I DON BYED PAS THUGS RJE'I BDAG NYID CAN, PHYAG RGYA LNGAS BRGYAN PA, MI MGO BSKAM PO LNGA'I THOD DANG, BSKAM PO LNGA BCU'I DO SHAL CAN DU GYUR, PHYOGS BZHI'I 'DAB MA LA SHAR DU MKHA' 'GRO MA NAG MO, BYANG DU L'A MA LJANG GU ,NUB TU KHAndA RO HE DMAR MO, LHOR GZUGS CAN MA SER
, ,MO; MTSAMS BZHIR ZLA GDAN LA BDUD RTZI LNGAS GANG BA'I THOD PA BZHI, DE'I MTHA' SKOR GYI 'DAB MA RNAMS LA RIM PA BZHIN THUGS GSUNG SKU DANG DAM TSIG 'KHOR LO'I LHA RNAMS BZHUGS PA, DE'I MTHA' SKOR DU YI DAM SANGS RGYAS BYANG SEMS BSTAN BSRUNG DAM CAN RGYA MTSO'I TSOGS RNAMS KYIS BSKOR NAS BZHUGS PA, STENG DU RGYAL BA RDO RJE 'CHANG LA DNGOS BRGYUD KYI BLA MAS BSKOR NAS BZHUGS PA'I LHA THAMS CAD KYI SPYI BOR ZLA BA LA AOm DKAR PO, MGRIN PAR PADMA LA A'A: DMAR PO, THUGS KAR NYI MA LA H'Um SNGON PO, RANG NYID HE RU KAR GNAS PA'I THUGS KAR PAm SER PO LAS SNA TSOGS PADMAR AAm LAS BYUNG BA'I ZLA BA'I DKYIL 'KHOR LA GNAS PA'I H'Um RDO RJE 'DZIN PA'I RANG BZHIN DBUS SNGO LA MTHA' SKYA BA, YE SHES LNGA'I RANG BZHIN CAN GYI 'OD ZER GYIS RANG GI SPYI BO NAS RKANG PA'I BAR GANG STE, THOG MA MED PA NAS KYI SGO GSUM GYI DRI MA RNAMS SPANGS PAS, LUS SHEL GONG BZHIN DU DAG PAR GYUR TE, BA SPU'I SGO NAS PHYIR 'PHROS PA'I 'OD ZER GYIS, 'OG MIN NAS BLA MA RDO RJE 'CHANG GI RNAM PA CAN DANG, 'KHOR LO SDOM PA'I DKYIL 'KHOR GYI LHA TSOGS DANG, GZHAN YANG SANGS RGYAS DANG BYANG CHUB SEMS DPA' DANG, LHA DANG LHA MO DANG KHRO BOS NAM MKHA'I KHAMS
TIL GYI GANG BU LTAR GANG BA MDUN GYI NAM MKHAR SPYAN DRANGS, 'OD ZER RANG GI SNYING GAR THIM, GANG GI DRIN GYIS BDE CHEN GNAS, ,SKAD CIG GIS NI THOB 'GYUR BA, ,BLA MA RIN CHEN LTA BU YI, ,RDO RJE CAN ZHABS PAD LA 'DUD, ,HE RU KA DPAL DPA' BO CHE, ,RNAM DAG RDO RJE'I DBANG PHYUG DANG, ,RJES CHAGS CHAGS PA CHE RNAMS KYIS, ,RDO RJE PHAG MO DE LA 'DUD, ,GNAS DANG NYE BA'I GNAS DANG ZHING, ,'DU DANG DUR KHROD GNAS PA YI, ,DPA' BO DPA' MO'I DBANG PHYUG MA, ,KUN LA BDAG NI GUS PHYAG 'TSAL, ,RANG GI SNYING GA'I H'Um LAS BYUNG BA'I MCHOD PA'I LHA MO RNAMS KYIS MCHOD PAR GYUR, AOm SHR'I HE RU KA AARGHAm PRA T'I TZTSA SV'AH'A, ZHES PA NAS SHAPTA PRA T'I TZTSA SV'AH'A, AOm BADZRA P'A nI HUm H'Um PHAt, ZHES PA NAS, AOm DHARMA DH'A TU BADZRE HUm H'Um PHAt, AOm HR'I: HA HA HUm H'Um PHAt, AOm A'A: H'Um, ZHES NANG MCHOD PHUL, RANG GI SNYING GA'I H'Um LAS BYUNG BA'I SNYING PO'I RNAL 'BYOR MA DAG DANG SGO MTSAMS PA BRGYAD KYIS THOD PA NA GNAS PA'I BDUD RTZI LNGAS MCHOD, AOm SARBA BADZRA K'A MA NI SARBA BHA KshAm SHO DHA YA GU HYA BADZRA nI SV'AH'A, AOm A'A: H'Um GNAS BZHI DANG GSANG GNAS BYIN GYIS BRLABS PA'I YAB YUM SNYOMS PAR ZHUGS PA'I BYANG SEMS ZHU BA, SPYI BO NAS MGRIN PAR SLEBS PA NA DGA' BA, MGRIN PA NAS SNYING GAR SLEBS PA NA MCHOG DGA', SNYING
, ,GA NAS LTE BAR SLEBS PA NA KHYAD PAR GYI DGA' BA, LTE BA NAS NOR BU'I RTZER SLEBS PA NA LHAN CIG SKYES PA'I DGA' BA NYAMS SU MYONG BAS, DKYIL 'KHOR BA'I LHA THAMS CAD KYIS KYANG LHAN CIG SKYES PA'I DGA' BA NYAMS SU MYONG, BDE BA CHEN PO DANG DE KHO NA NYID DBYER MI PHYED PA'I TING NGE 'DZIN LA SNYOMS PAR ZHUGS PAS DE KHO NA NYID KYI MCHOD PAS MNYES PAR GYUR, CES BRJOD, AOm BCOM LDAN DPA' BO'I DBANG PHYUG LA PHYAG 'TSAL HUm H'Um PHAt, AOm BSKAL PA CHEN PO'I ME DANG MNYAM PA'I 'OD HUm H'Um PHAt, AOm RAL PA'I COD PAN MI BZAD PA DANG LDAN HUm H'Um PHAt, AOm MCHE BA RNAM PAR GTZIGS PA 'JIGS PA'I ZHAL HUm H'Um PHAt, AOm STONG PHRAG PHYAG NI 'BAR BA'I 'OD ZER CAN HUm H'Um PHAt, AOm DGRA STA ZHAGS GDENGS MDUNG DANG KHA tV'Am 'DZIN HUm H'Um PHAt, AOm STAG GI PAGS PA'I NA BZA' 'DZIN PA CAN HUm H'Um PHAt, AOm SKU CHEN DUD KA BGEGS MTHAR MDZAD LA 'DUD HUm H'Um PHAt, BGROD DKA' SRID PA'I RGYA MTSO LAS, ,BDAG GIS 'GRO RNAMS BSGRAL BA'I PHYIR, ,RANG GI BDAG NYID SKAD CIG MA, ,SANGS RGYAS RNAMS LA DBUL BAR BGYI, ZHES PAS BDAG 'BUL, DKON MCHOG GSUM LA BDAG SKYABS MCHI, ,SDIG PA THAMS CAD SO SOR BSHAGS, ,'GRO BA'I DGE LA RJES YI RANG, ,SANGS RGYAS BYANG CHUB YID KYIS BZUNG, ,LAN GSUM GYIS BYANG SDOM DANG,
SNGAGS SDOM YANG BZUNG NGO, ,CHOS GDAN BDAG NYID BSAM MI KHYAB, ,BDAG LA DBANG NI BSKUR BAR MDZOD, CES PAS DBANG GI DON DU GSOL BA BTAB, SGO MTSAMS MA BRGYAD KYIS BGEGS BSKRAD, DPA' BO RNAMS KYIS SHIS PA BRJOD, DPA' MO RNAMS KYIS RDO RJE'I GLU LEN, GTZO BOS DBANG BSKUR BA'I DGONGS PA MDZAD, YUM BZHI PHAG MO DANG LNGAS PHYAG GA-YON PA'I THOD PA CUNG ZAD YO BAR BYAS TE, JI LTAR BLTAMS PA TZAM GYIS NI, ,DE BZHIN GSHEGS KUN KHRUS GSOL LTAR, ,LHA YI CHU NI DAG PA YIS, ,DE BZHIN BDAG GIS KHRUS BGYI'O, ,AOm SARBA TA TH'A GA TA AA BHI shI KA TA SA MA YA SHRI YE H'Um, ZHES GSUNG ZHING BDUD RTZI'I CHU RGYUN GYIS SPYI BO NAS DBANG BSKUR BAS, RANG DANG LHA THAMS CAD BDE BA CHEN PO'I BDAG NYID DU GYUR, SPYI BO NAS SKU LA ZHUGS PA'I CHU'I LHAG MA SPYI GTZUG TU GNAS PA YONGS SU GYUR PA LAS MI BSKYOD PAS DBU BRGYAN, DES BUM PA'I DBANG THOB, DE NAS SNYING PO'I RNAL 'BYOR MA BZHI PHAG MO LA THIM, DE DANG HE RU KA SNYOMS PAS ZHUGS PA'I BYANG SEMS LCE LA BZHAG PA MYANGS PA LAS GSANG BA'I DBANG THOB, ,DE NAS HE RU KAS PHAG MO PHYAG RGYAR GNANG BA LA SNYOMS PAR ZHUGS PAS, RLUNG THIM PA LAS LHAN SKYES KYI BDE BA MYONG BAS SHES RAB YE SHES KYI DBANG THOB, DE NAS HE RU KAS RIGS KYI
, ,BU KHYOD KYIS PHYAG RGYA DANG SBYAR BA LA BRTEN NAS THOB PA'I SNANG BA THOB PA'I YE SHES DE, 'OD GSAL BAR SGOMS SHIG ,'OD GSAL DE NI SNANG MCHED THOB GSUM GYI RNAM SHES RNAM PAR DAG PA SHER PHYIN GYI NGO BO YIN LA, DON DAM PA'I BDEN PA DE NI MTHONG BA GZHAN GYI YUL LAS 'DAS PA STE SHES RAB DANG YE SHES KYI MIG GIS LTOS SHIG ,DE LTAR GZHAN GANG GIS KYANG RANG BZHIN DU MA MTHONG BA DE 'OD GSAL MTHONG BA YIN NO, ,DE'I DON RGYU 'BRAS GANG YANG MED MOD KYI, 'ON KYANG KUN RDZOB TU RLUNG SEMS TZAM LAS GRUB PA'I LHA SO BDUN GZUGS BRNYAN LTAR GSAL LA RDZOGS PA, 'JA' TSON LTAR KHA DOG MA 'DRES PAR SO SOR SNANG BA, CHU ZLA LTAR SGRO SKUR DANG BRAL BAR LTOS SHIG ,DE 'DRA BA'I KUN RDZOB DANG DON DAM 'OD GSAL GNYIS DBYER MI PHYED PAR ZUNG DU 'JUG PA NI, BYANG CHUB KYI SEMS CHEN PO STE DBANG BZHI PA'O, ,ZHES PAS DBANG BZHI BLANGS, DE NAS MTHA' SKOR GYI ZHI KHRO RAB 'BYAMS THAMS CAD BCOM LDAN 'DAS YAB YUM LA THIM, BCOM LDAN 'DAS YAB YUM RANG GI SPYI BO'I GTZUG TU BADZRA SA MA YA DZA: ZHES BRJOD CING BSGOMS NAS SKYABS GSUM KUN 'DUS KYI NGO BO BLA MA 'KHOR LO BDE MCHOG LA PHYAG 'TSAL ZHING GSOL BA 'DEBS SO, ,ZHES DMIGS PA DANG BCAS NAS BRGYA STONG KHRI
'BUM SOGS GSOL BA 'DEBS SO, ,MTHAR BCOM LDAN 'DAS YAB YUM RANG GI SPYI BO NAS DBU MA'I LAM BRGYUD DE, SNYING GA CHOS KYI 'KHOR LO RTZA 'DAB BRGYAD PA'I DBUS SU, MI SHIGS PA'I THIG LE DKAR DMAR DANG NGO BO DBYER MED DU GYUR PAR BSAM LA MNYAM PAR 'JOG ,SKYE BAR GYUR NA SGRUB THABS BZHIN BZLAS PA'I RNAL 'BYOR BYA'O, ,MJUG TU, SRID PA GSUM 'BAR SKU NI RJES CHAGS DUL BAR LDAN, 'OD ZER SNGON PO STONG LDAN NYI MA BRGYA STONG LDAN, ,RNAM MANG SKU DANG CHA LUGS RJES CHAGS SEMS DPAR LDAN, ,HE RU KA DPAL DE DANG LHAN CIG GAR BYED SHOG ,CES BRJOD DE, DE LAS BYUNG BA'I DGE BA RNAMS RANG GZHAN GYI SMON GNAS RNAMS SU 'DUN PA DRAG POS BSNGO'O, ,THUN MTSAMS SU GTOR MA YANG SGRUB THABS BZHIN DU BYA'O, ,'DI'I SHES BYED DANG KHUNGS RNAMS SGRUB THABS BDE CHEN GSAL BA NYID LAS SHES DGOS SHING, LONG SKABS BYUNG NA SGRUB THABS RGYAS PA NYID BSGOM PA LEGS SO, ,'DI YI DGE BAS BDAG GZHAN MA LUS PA, ,TSE YI MTHAR NI DPA' BO RNAL 'BYOR MAS, ,ME TOG RGYAL MTSAN GLU DANG ROL MO'I SGRAS, ,DGA' LDAN MKHA' SPYOD GNAS SU 'DREN PAR SHOG ,TSE RABS KUN TU BCOM LDAN YAB YUM GYIS, ,MA LTAR BRTZE BAS RTAG TU RJES BZUNG STE, ,RIM GNYIS LAM GYI RTOGS PA MTHAR SON
, ,NAS, ,BDE CHEN GNAS LA 'DOD DGUR SPYOD PAR SHOG ,GANG TSE LUS DANG SROG LA MI BLTA BAR, ,ZAB LAM RIM GNYIS RTZE GCIG BSGRUB PA'I TSE, ,MTHU LDAN TSOGS KYIS RTAG TU GROGS BYED CING, ,LHAG BSAM 'BRAS BU'I KHUR GYIS MDZES PAR SHOG ,CES DPAL 'KHOR LO SDOM PA'I RNAL 'BYOR PA BLO BZANG CHOS KYI RGYAL MTSAN GYIS BKRA SHIS LHUN PO'I GLING DU SBYAR BA'O,, ,,