*,, ,NA MO GU RU MANYDZU GHO sh'A YA, ,RJE BTZUN 'JAM DBYANGS DKAR PO LA BSTOD PA BLO GROS MIG 'BYED KYI THUR MA ZHES BYA BA, MGON PO DE NYID KYI ZHABS LA DUS THAMS CAD DU PHYAG 'TSAL LO, ,MKHYEN PA'I CHA SHAS MA LUS SHES BYA'I KHYON KUN KHYAB, ,THUGS RJES SRID GNAS YANG DAG BKRIR RUNG RING DU 'PHEN, ,
, ,BSIL BA'I BYAMS PAS NAG PHYOGS LA BRTZE'I ME CHEN BCIL, ,NGAG GI DBANG PHYUG DE YIS NAM MKHA'I MTHAR SKYONGS SHIG ,GANG GI YID KYI DANG BA'I CHU GTER DBUS, ,KHYOD KYI YON TAN MA SMAD KUNDA'I GNYEN, ,GSAL BAR SHAR TSE RANGS PA'I BSTOD PA'I TSIG ,SPEL LEGS DBU BA'I 'PHRENG BA 'DI 'KHRIGS SO, ,'BUM PHRAG NYI MA'I BRTZE DAGS DAM BCINGS GSAR PA'I SPRIN DKAR RGYA MTSO CHEN POR MTSAN DPE'I RGYU SKAR DO SHAL DGOD, ,NGO MTSAR ZHAL GYI PADMO LA CHAGS RNAM BKRA LJAGS KYI BUNG BA'I 'PHUR LDING LEGS BSHAD GLU DBYANGS DAG DANG 'GROGS, ,TSOGS GNYIS SHAR GYI BA GAM LA 'DZEGS GDUL BAR BYA BA'I PHYOGS KYI BU MO'I GO SAR MYUL LA STOD GA-YOGS SPANGS, ,MTHO RIS BDAG PO'I COD PAN NOR BUR ZHABS MTHIL TSON GYIS THIG LE BKOD MDZAD 'JAM PA'I DBYANGS GANG DE LA 'DUD, ,TSON BRGYAS PHYE BA'I 'JA' TSON GUR KHYIM DBUS, , MRGAD RI BO'I RTZE MOS ZLA SHEL GYI, ,BLA GOS STUG PO 'DZIN PA JI BZHIN DU, ,SMIN LEGS 'DAB BRGYA MDZES PA'I PAD GNAS PA, ,BDUD RTZI'I 'OD CHAGS GZI MDANGS RGYAS PA'I KHAR, ,DRI YI BZHON PAS BSKUL BA'I PADMO LTAR, ,LDAM LDEM GAR GYIS RNAM ROL BRGYAD ZUNG GI ,LANG TSO'I DPAL 'DZIN GZHON NU DE LA 'DUD, ,BRGYA BYIN GZHU YI RTZE DGA' DANG 'GROGS PA'I, ,'DZUM DKAR RI MO BKRA BA'I NYA RGYAS ZHAL, ,MTHONG BAS 'CHI
MED GZHON MA'I GZUGS GYI DPAL, ,PHAM MDZAD GA-YUL LAS RGYAL LA PHYAG 'TSAL LO, ,ZHAL BZANG 'O MA'I RIN CHEN 'BYUNG GNAS NGOGS, ,TSEMS DKAR NGANG MO'I PHANG PHUNG KHOR YUG CHAGS, ,MCHU SGROS BANDHU DZI KA'I 'DAB PHRENG 'DI, ,RLABS KYI SOR MO'I ROGS LAS 'ONGS SAM SNYAM, ,MKHUR TSOS SA 'DZIN RTZE MO MTHON PO LAS, ,RAB DKAR 'CHAR GA'I 'OD STONG 'GYED PA NA, ,RTA BDUN RGYAL PO SNGON MED NYIN MO'I MGON, ,THON PAR DOGS TE NUB RI'I PHAG TU BROS, ,PAD DKAR 'DAB MA RGYAS 'DRA'I 'DREN BYED ZUNG, ,AUTPAL NAGS TSAL 'PHOS PA JI BZHIN DU, ,ZUR MIG PHYOGS KUN MYUL BAS MDA' 'PHEN PAS, ,SKAL BZANG YID KYI RI DVAGS MA LUS 'DZIN, , RAB YANGS DPRAL BA'I DBYES KYI DO RA RU, ,CHU 'DZIN RUM LAS GLOG PHRENG GA-YO BA LTAR, ,GA-YU YI BU MO ZUNG DAG RTZE BA NA, ,KU MU DA YI MDANGS 'PHROG MDZOD SPU NI, ,CHAGS PAS MYOS PA'I 'DZUM LEGS RNAM PAR 'GYED, , GZHAL MED LHA YI YID BZHIN NOR BU YI, ,YID 'ONG DBU RGYAN PHRENG BA 'DZIN PA'I MTHAR, ,RAB DMAR BUNG BA GZHON NU'I GSHOG RGYANGS KYIS, ,BRGYAN PA'I AUTPAL GDENGS KA RGOD PA CAN, ,ZUR PHUD LNGA LDAN MTHON MTHING RI BO'I RTZER, ,TSON BKRA THUN MTSAMS PHRENG BAS LEGS DKRIS SHING, ,YID 'ONG NOR BUS MTSAN LA PHYAG 'TSAL LO, ,SHEL DKAR 'KHRI SHING BSKYOD 'DRA'I PHYAG GNYIS LA, ,'GRAN 'DOD AINDRA N'I LA'I NA CHUNG ZUNG, ,ME TOG
, ,THOD MDZES LO 'DAB GOS KYIS SPUD, ,SNYING GI CHU SKYES 'DAB MA STONG LDAN DBUS, ,'DAM SKYES LO MA TSAR DU DANG RAB LTA'I, ,NYON MONGS DNGOS 'DZIN SROG 'PHROG GSHED MA DANG, ,MA LUS RGYAL BA'I GSUNG GI DE NYID MCHOG ,GZUGS SU BGYIS PAS MTSAN LA PHYAG 'TSAL LO, ,MTHA' DAG RGYAL BA'I MKHYEN BRTZE'I 'DZIN MA LAS, ,LEGS 'KHRUNGS RNAM BKRA DAR GYI LAG GNYEN GA-YO, ,RIN CHEN RGYAN MANG DU MA'I 'BRAS BUS BRJID, ,RAB MDZES MIG GI DGA' STON KHYOD LA 'DUD, ,YAN LAG DRUG CU'I DBYAR SKYES BZHAD PA'I SGRAS, ,SRID PA GSUM GYI KHYON KUN 'GENGS PA NA, ,MI MJED BDAG PO'I MGRIN PA'I RDZA RNGA YANG, ,LAN BRGYAR SMAD SNYAM SKRAG PAS GDONG PA GAS, ,BYE BA KHRAG KHRIG GRANGS LDAN 'KHOR MANG DBUS, ,SENG GE'I SGRA LA YANG DAG LAM GYI DBYANGS, ,BSKYON NAS RNA BA'I BCUD LEN RGYAS BYED PA, ,MI 'JIGS SMRA BA'I DBANG PO KHYOD LA 'DUD, , RNAM DAG RANG BZHIN CHOS SKU'I ZLA BA LAS, ,MKHYEN PA'I CHA SHAS YONGS RDZOGS RI DVAGS GZUGS, ,DPAG YAS SHES BYA'I MKHA' LA THOGS MED PAS, ,RMONGS PA'I MUN DANG BRAL LA PHYAG 'TSAL LO, ,MA LUS RGYAL BAS BGRANG YAS BSKAL PA'I BAR, ,NYIN BZHIN KHYOD KYI MKHYEN PA JI TZAM ZHES, ,GTING MTHA' DPYAD PAS RNYED PA'I SKABS BCOM STE, ,NGAL NAS CHOS KYI DBYINGS SU GZIMS PAR GYUR, ,GANG GI 'CHING BA'I DRA BA MA LUS PA, ,SHES
RAB MTSON CHAS MING TZAM BYAS RJES BRDZUN, ,'GRO LA BU SDUG BZHIN DU GCES 'DZIN PA'I, ,SNYING RJE'I 'CHING BAS KHYOD THUGS DAM DU BCINGS, ,MKHYEN PAS SHES BYA JI SNYED MCHIS PA KUN, ,GSAL DAG SO SOR 'BYED LA MTSAR CI YOD, ,'KHOR 'DAS CHOS KYI RANG BZHIN GCIG DRIL TE, ,KHYOD KYI THUGS DANG 'BRAL BA MED DE MTSAR, ,RMAD BYUNG YON TAN TSOGS KYI KHOR YUG RGYAS, ,'CHAR NUB KUN SPANGS THUGS RJE'I BSIL ZER GYIS, ,GDUL BYA'I 'DZIN MAR PHAN BDE'I GOS DKAR STZOL, ,RGYAL SRAS RGYU SKAR MGON PO RGYAL GYUR CIG ,KHYOD KYI YON TAN MI ZAD 'DAB BRGYA PA, ,BDAG BLO'I PAD MTSO CHEN POR LEGS BZUNG BAS, ,RKANG DRUG LDAN PA KHYOD KYIS RNAM ROL TE; ;SNGON MED LEGS BSHAD CI YANG SGROGS PAR MDZOD, ,KHYAD PAR MGON PO KHYOD LA GSOL BA NI, ,MTHA' MED 'KHOR BA'I NAGS TSAL STUG PO RU, ,BAG MED SEMS KYI GLANG CHEN RGYU BA NA, ,LUS DANG GRIB MA'I RNAM PA JI BZHIN DU, ,RGYAL BA KHYOD KYI ZHABS SEN NOR BU'I 'OD, ,BDAG GI GTZUG TU GTZUG RGYAN LTAR BKOD NAS, ,BLA NA MED PA'I THUGS RJE'I LCAGS KYU YIS, ,RGYAGS BCOM GDOD MA'I RNAL DU GNAS PAR MDZOD, ,KHYOD ZHABS GUS PAS BSTEN PA'I BKA' DRIN GYIS, ,RGYAL BA'I GSUNG RAB KUN GYI TSIG DON RNAMS, ,'DREN BYED LAG MTHIL SKYU RU RA LA BZHIN, ,BLO GROS MIG PO CHE YI YUL DU MDZOD, ,RNAM DPYOD BA GAM BRTZEGS PA'I SHAR RI LAS, ,
, ,LEGS THON LEGS PAR BSHAD PA'I 'OD STONG GIS, ,BLO GSAL KU MUD CI YANG 'BAR BYED PA'I, ,'JIGS MED SPOBS PA'I LUS STOBS RGYAS PAR MDZOD, ,BLO GROS CHU KHUR 'DZIN PA'I GLONG YANGS LAS; ;LUNG BZANG SKABS GSAL DBANG PO'I SKA RAGS CAN, ,DNGOS STOBS RIGS PA'I ME CHAR 'BAR BA YIS, ,PHAS RGOL BRAG RI BSNYIL LA ZLA MED MDZOD, ,LHAG BSAM RNAM PAR DAG PA'I GANGS RI LAS, ,DON DANG TSIG 'BRU BZANG PO GANGG'A'I RGYUN, ,RGYAL BA'I DGONGS ZAB RGYA MTSOR 'JUG 'OS PA, ,SNYAN DNGAGS RTZOM PA'I BLO YANGS RGYAS PAR MDZOD, ,DGE BA 'DI YIS TSE RABS THAMS CAD DU, ,LHAG PA'I LHA MCHOG KHYOD DANG MI 'BRAL ZHING, ,SA GSUM 'GRO BA'I RE BA SKONG BA LA, ,YID BZHIN NOR BU LTA BUR BDAG GYUR CIG ,RAB DKAR DANG BA'I BSER BUS, ,BLO GROS DPAG BSAM LJON PA, ,BSKYOD LAS BSTOD PA'I TSIG GI ,DRI ZHIM 'DI 'DRA BYUNG NGO, , ZHES BLO BZANG CHOS KYI RGYAL MTSAN GYIS SMRAS PA'I DGE BAS 'GRO TSOGS RMONGS PA'I RAB RIB LAS GROL NAS YE SHES KYI MIG THOB PAR GYUR CIG , ,,