*, ,GCOD KYI GDAMS PA THAR 'DOD KYI DED DPON ZHES BYA BA BZHUGS,,
, ,NA MO GU RU SARBA d'A K'I YA, GCOD KYI GDAMS PA THAR 'DOD KYI DED DPON ZHES BYA BA, THUB BSTAN KHA BA'I RDUL BRTZEGS LA GNAS GZHUNG LUGS RAL PA'I KHUR GYIS BRJID, ,DRI MED RIGS PA'I SDER KHYIM 'BAR BAS LOG SMRA'I GNYIS 'THUNG KLAD PA 'GEMS, ,DNGOS POR SMRA BA'I WA TSOGS MTHAR BYED STONG NYID GAD RGYANGS MTHON PO CAN, ,SMRA BA'I SENG GE BLO BZANG GRAGS PA DRAN PAS DAD PA'I SPU LONG GA-YOS, ,CHOS BRGYAD SPROS PAS DBEN PA'I DUR KHROD DU, ,LHAN SKYES BDE STONG ROL PA'I GAR BSGYUR ZHING, ,RTEN 'BYUNG SKYE BA MED PA'I PHAt: KYI SGRAS, ,BDAG 'DZIN 'GONG PO'I KLAD PA 'GEMS RNAMS RGYAL, ,GANG ZHIG BSTEN NA PHYI NANG BDUD KYI SDE, ,'THOR BYED DRAG PO'I MDUN SAR CHU 'DZIN BZHIN, ,MA LUS
, ,DRUNG NAS 'BYIN PA ZAB MO'I LAM, ,THABS SHES SNYING PO'I GCOD LAS GZHAN NA GANG, ,DE'I PHYIR BLO LDAN BUNG BA'I TSOGS, ,DGA' BA'I DAR DIR 'BUM SGROGS LA, ,RMAD BYUNG GDAMS PA'I SBRANG RTZI LA, ,RTZE GCIG YID KYIS LONGS SPYOD KYIS, ,DE LA 'DIR SKAL BA DANG LDAN PA SANGS RGYAS KYI SAR BGROD PA'I LAM MCHOG THABS SHES GCOD KYI SNYING PO RNAL 'BYOR DU BYA BAR 'DOD PA'I GANG ZAG GANG GIS NYAMS SU BLANG BYA'I RIM PA 'CHAD PA LA BZHI, GANG DU NYAMS SU LEN PA'I GNAS, GANG GIS NYAMS SU LEN PA'I RTEN, GANG ZHIG NYAMS SU LEN PA'I GDAMS PA, GANG NYAMS SU BLANGS PA LA BRTEN NAS TSAR LHONGS JI LTAR 'BYUNG TSUL LO, ,DANG PO NI, GCOD KYI GZHUNG RGYAS PA RNAMS LAS SHES PAR BYA STE 'DIR YI GES 'JIGS PAS MA SPROS SO, ,GNYIS PA NI, SRID PA'I PHUN TSOGS CHU SHING LTA BUR MTHONG NAS BYAMS PA DANG SNYING RJES BRAN DU BZUNG NAS THAMS CAD MKHYEN PA NYID YID LA GCAGS PAS
'KHOR BA'I SA BON DRUNG NAS 'BYIN PAR 'DOD PAS YIN GYI, RNYED BKUR DANG GRAGS 'DOD KYI BSAM PAS 'JIG RTEN GYI LHA 'DRE LA BSNGO BA DANG, DE'I PHYIR SA GNYAN SLOG CING CHU GNYAN DKRUG PA DANG, SHING GNYAN GCOD PA DAG NI CHOS 'DI'I 'GAL ZLAR SHES PAR GYIS SHIG ,GSUM PA NI, BSTAN PA LA 'JUG PA'I SGO DAM PA SKYABS 'GRO'I RIM PA SKU GNYIS KYI LAG RJES 'JOG BYED TSOGS GNYIS BSAG PA, BSAGS PA'I DGE BA CHUD MI ZA BAR BYA BA'I PHYIR BYANG CHUB CHEN POR BSNGO BA'O, ,DANG PO NI, ` ,MDUN GYI NAM MKHAR SENG GE CHEN PO BRGYAD KYIS BTEG PA'I KHRI MTHO ZHING YANGS PA'I STENG DU, SNA TSOGS PADMA 'DAB MA STONG LDAN GYI LTE BAR PADMA DANG ZLA BA'I GDAN LA, RTZA BA'I BLA MA DANG GNYIS SU MED PA'I MA GCIG LABS KYI SGRON MA, DE'I THUGS KAR YUM CHEN MO, STENG DU RGYAL BA RDO RJE 'CHANG, GA-YAS SU GSHIN RJE'I GSHED KYI LHA TSOGS, GA-YON DU BDE MCHOG GI LHA TSOGS, MDUN DU GSANG BA 'DUS PA'I LHA TSOGS, RGYAB TU KYEE RDO RJE'I LHA TSOGS, DE DAG GI MTHA' SKOR DU DNGOS DANG BRGYUD PA'I BLA MA YI DAM SANGS RGYAS BYANG SEMS, DPA' BO DPA' MO CHOS SKYONG BSRUNG MA'I LHA TSOGS, RANG RANG GI MDUN NA LEGS PAR GSUNGS PA'I CHOS RNAMS PO TI'I RNAM PAR YOD PA, DE DAG
, ,GI PHYI ROL DU SNA TSOGS PA'I SPRUL PAS KUN TU KHYAB PAR GYUR PA'I 'OG TU GNOD BYED KYIS MTSON SEMS CAN THAMS CAD YOD PAR BSAMS LA, NGAG TU, PHAt: SKAL LDAN THAR PAR 'KHRID PA'I DED DPON MCHOG ,RTZA RGYUD BLA MA'I TSOGS LA SKYABS SU MCHI, ,DNGOS GRUB DAM PA MA LUS 'BYUNG BA'I SGO, ,YI DAM LHA TSOGS RNAMS LA SKYABS SU MCHI, ,SPANGS RTOGS MTHAR PHYIN STON PA BLA NA MED, ,YANG DAG RDZOGS SANGS RGYAS LA SKYABS SU MCHI, ,ZHI BA'I DPAL GYUR 'DOD CHAGS BRAL BA'I MCHOG ,SLU MED DAM PA'I CHOS LA SKYABS SU MCHI, ,RTAG TU DGE BA'I 'DREN PA PHUN SUM TSOGS, ,TSOGS MCHOG DGE 'DUN RNAMS LA SKYABS SU MCHI, ,PHUL BYUNG ZHING GI DAM PA KHYED RNAMS LA, ,BYANG CHUB SNYING PO'I BAR DU SKYABS SU MCHI, ,GUS PAS BDAG NI KHYOD LA LEGS 'BUL NA, ,MGON PO THUGS RJE MNGA' BAS BZHES SU GSOL, ,SDUG BSNGAL RGYA MTSOR BYING BA'I 'GRO BA RNAMS, ,BSGRAL PHYIR BYANG CHUB MCHOG TU SEMS BSKYED NAS, ,DUS GSUM BDE GSHEGS SRAS KYI SPYOD PA LA, ,ZHUM MED BSAM PA DAG PAS BSLAB PAR BGYI, ,'JIG RTEN SGRON MA SKYABS KYI MCHOG RNAMS LA, ,LUS NGAG YID RAB DANG BAS PHYAG BGYI'O, ,DNGOS BSHAMS YID SPRUL MCHOD PA MA LUS 'BUL, ,THOG MED
NAS BSAGS SDIG LTUNG THAMS CAD BSHAGS, ,SKYE 'PHAGS DGE BA RNAMS LA RJES YI RANG, ,'KHOR BA MA STONGS BAR DU LEGS BZHUGS NAS, ,'GRO LA CHOS 'KHOR MA LUS SKOR DU GSOL, ,DGE KUN RDZOGS PA'I BYANG CHUB CHEN POR BSNGO, ZHES DMIGS PA DANG BCAS PA'I SGO NAS BRJOD CING, KHYAD PAR GYI SEMS BSKYED, MA SEMS CAN THAMS CAD KYI DON DU MYUR BA MYUR BAR BLA MA SANGS RGYAS KYI GO 'PHANG THOB PAR BYA, DE'I PHYIR DU LAM ZAB MO GCOD KYI SNYING PO NYAMS SU BLANG BAR BGYI SNYAM PA GSUM MAM BDUN SOGS BYA'O, ,GNYIS PA LA, THUN MONG BA GZUGS SKU'I LAG RJES 'JOG BYED BSOD NAMS KYI TSOGS BSAG PA, THUN MONG MA YIN PA CHOS SKU'I LAG RJES 'JOG BYED RANG BZHIN MED PAR BSGOM PA'O, ,DANG PO LA SEMS CAN PHA MAR BSGOMS NAS BYANG CHUB KYI SEMS BSKYED DE SHA KHRAG STER BA, YI DAM DANG BLA MAR BSGOMS NAS BDUD RTZIS MCHOD DE DNGOS GRUB DANG BYIN RLABS ZHU BA'O, ,DANG PO NI, PHAt: RANG GI SPYI BOR PADMA DANG NYI MA'I GDAN LA NGO BO RANG GI RTZA BA'I BLA MA DANG DBYER MED PA'I MA GCIG LABS KYI SGRON MA YIN PA LA RNAM PA BCOM LDAN 'DAS RDO RJE PHAG MO ZHAL GCIG PHYAG GNYIS MA, PHYAG GA-YAS SDIGS MDZUB DANG BCAS PAS GRI GUG NAM MKHA' LA 'PHYAR ZHING, GA-YON PAS GDUG PA'I KHRAG GIS GANG BA'I THOD PA THUGS KAR 'DZIN
, ,PA'I MCHAN KHUNG NA KHA tV'Am GA BSNAMS PA, KHRO ZHING 'DZUM PA'I MCHE BA CUNG ZAD GTZIGS PA, SPYAN GSUM HUR BAG DANG LDAN ZHING, THOD SKAM LNGA'I DBU RGYAN DANG, BSKAM PO LNGA BCU'I DO SHAL CAN, GCER MO SKRA ZHIG PA, PHYAG RGYA LNGAS BRGYAN CING, NYI MA STONG GI MDANGS LTA BU'I 'OD DANG GZI BRJID 'BAR BA'I DBUS NA ZHABS GA-YAS BRKYANGS SHING, GA-YON BSKUMS PA'I GAR STABS KYIS BZHUGS PA'I SPYI BOR AOm DKAR PO, MGRIN PAR A'A: DMAR PO, THUGS KAR H'Um SNGON PO, LTE BAR SV'A SER PO, GSANG BAR H'A LJANG KHU, 'OD ZER LNGA 'PHRO BA, THUGS KA'I H'Um LAS 'OD ZER 'PHROS PAS, RANG BZHIN GYI GNAS NAS BCOM LDAN 'DAS MA RDO RJE PHAG MO LA BLA MA DKON MCHOG GSUM GYIS BSKOR BA SPYAN DRANGS, PHAt: CHOS DBYINGS DAG PA'I PHO BRANG NAS, ,SGYU 'PHRUL DRA BA'I SKUR STON PA, ,GNAS GSUM MKHA' 'GRO'I DBANG PHYUG MA, ,BRTZE BAR DGONGS LA GNAS 'DIR GSHEGS, ,AOm A'A: GU RU BADZRA SARBA BUDDHA BO DHI SATVA SARBA d'A KI N'I SA PA RI W'A RA BADZRA SA MA YA DZA: DZA: DZA: H'Um BAm HO:, SLAR YANG THUGS KA'I H'Um LAS 'OD 'PHROS, ZHI KHRO RAB 'BYAMS THAMS CAD SPYAN DRANGS, SPYI BO'I BCOM LDAN 'DAS MA LA THIM PAS DE NYID SKYABS GNAS KUN 'DUS PA'I BDAG NYID DU GYUR, SLAR YANG THUGS KA'I H'Um LAS 'OD ZER LCAGS KYU DANG, ZHAGS PA DANG, DRIL BU DANG, LCAGS SGROG GI RNAM PA CAN
DPAG MED 'PHROS, GNOD BYED KYIS GTZO BYAS PA'I RIGS DRUG SEMS CAN THAMS CAD KYI SNYING GA NAS LCAGS KYUS BZUNG, MGRIN PA NAS ZHAGS PAS BCINGS, YAN LAG LCAGS SGROG GIS BSDAMS, DRIL BUS DBANG DU BSDUS NAS RANG GI MTHA' SKOR DU 'KHOD PAR GYUR, BADZRA AAm KU SHA DZA: BADZRA B'A SHA H'Um, BADZRA SBO tA BAm, BADZRA GHAsht'A HO: ZHES BRJOD PAS, SA GZHI THAMS CAD SMUG SHIG STE GANG BAR BSAMS LA, MA RGAN 'DRE GDON RNAMS KYIS MTSON PA'I SEMS CAN RNAMS LA BRTZE BA CHEN POS KUN NAS BSLANGS TE RANG NYID KYIS GTZO BYAS MGRIN GCIG TU YAN LAG BDUN PA 'BUL BAR BSAMS LA, NGAG TU 'DI SKAD DU, PHAt: LHUN GRUB SPROS DANG BRAL BA'I CHOS KYI DBYINGS, ,BDE CHEN LONGS SPYOD RDZOGS PA'I ROL PA LAS, ,SNA TSOGS DU MAR SPRUL PA'I d'A KI MA, ,BCOM LDAN RDO RJE PHAG MO LA PHYAG 'TSAL, ,BDE STONG LHAN CIG SKYES PA NAM MKHA'I GLONG, ,ZAG MED BDE BA BSKYED PA'I MCHOD PA'I SPRIN, ,PHUN TSOGS RNAM 'GYUR STONG GI RNAM ROL CAN, ,MA LUS DGYES PA BSKYED PHYIR KHYED LA 'BUL, ,CHOS KUN RANG BZHIN MKHA' LTAR RNAM DAG KYANG, ,THOG MED MA RIG 'KHRUL BA'I BAG CHAGS KYIS, ,RMI LAM BZHIN DU NONGS PA'I TSOGS MCHIS PA, ,BRJOD BRAL RANG BZHIN DAG PA'I DBYINGS SU BSHAGS, ,SMRA BSAM BRJOD LAS 'DAS PA DAM PA'I DON, ,DGE DANG MI DGE'I MTSAN MA MI MNGA' YANG, ,
, ,KUN RDZOB ZLA SHEL LTAR DKAR RTEN 'BREL LA, ,BDAG CAG BSAM PA DAG PAS YI RANG NGO, ,BDEN PAS STONG YANG BRAG CHA'I SGRA SNYAN BZHIN, ,BDAG SOGS 'GRO LA KUN TU BZANG PO'I LAM, , 'DOMS PHYIR JI SRID PHA MTHA' MI MNGON PA'I, ,BGRANG YAS BSKAL PA'I BAR DU BZHUGS SU GSOL, ,DE LTAR SNANG STONG TSOGS PA'I ROL PA LAS, ,'ONGS PA'I BSOD NAMS PHUNG PO JI SNYED PA, ,BDEN MED 'GRO BA MA LUS BSGRAL BA'I PHYIR, ,ZUNG 'JUG RDO RJE 'CHANG GI RGYU RU BSNGO, ,ZHES DMIGS PA DANG BCAS PA'I SGO NAS YAN LAG BDUN PA PHUL BAS, SPYI BO'I BCOM LDAN 'DAS MA'I SKU'I CHA LAS BDUD RTZI'I RGYUN BABS, RANG GZHAN SEMS CAN THAMS CAD KYI LUS SEMS LA ZHUGS PAS, SDIG SGRIB NAD GDON CHAGS SGO THAMS CAD DAG ,LUS SHEL GONG LTAR DAG PA'I DBUS NA YAR RTZA DBU MA DMAR PO YAS SNA SPYI BO LA ZUG PA RGYA MTHONGS LTAR THAL LE YOD PA, MAS SNA LTE 'OG TU ZUG PA'I LTE BA'I RTZA 'KHOR GYI DBUS NA RANG GI RNAM PAR SHES PA'I NGO BO THIG LE COG SGONG TZAM DKAR LA DMAR BA'I MDANGS CHAGS PA 'PHAR LA KHAD, 'PHUR LA KHAD PA ZHIG YOD PA, YAR 'PHO SNYAM PA'I 'DUN PA DRAG POS PHAt: SNYING GAR SLEBS, PHAt: MGRIN PAR SLEBS, PHAt: SPYI BOR SLEBS PA HRIG HRIG YOD PAR BSAM, DE YANG BLA MA'I THUGS KAR 'PHO SNYAM PA'I
'DUN PAS, PHAt: BCOM LDAN 'DAS MA'I THUGS KAR THIM, LUS BEM PO DE LING STE 'GYEL BAR BSAM, DE NAS, PHAt: BLA MA'I THUGS KA NAS RANG GI RNAM PAR SHES PA'I NGO BO MKHA' 'GRO MA GRI GUG DANG THOD PA 'DZIN PA ZHIG RGYANG STE THON, PHAt: LUS BEM PO DE'I SPYI BO NAS SUM PHRAG GI BAR DU GSHAGS, PHAt: SNYING GA NAS LAG PA GA-YAS PA'I RTZE'I BAR DANG, DE BZHIN DU PHAt: RE RE BRJOD CING SNYING GA NAS LAG PA GA-YON PA'I RTZE DANG, SUM PHRAG NAS RKANG PA GA-YAS PA DANG GA-YON PA'I RTZE'I BAR DU GSHAGS, PHAt: PAGS PA DE SBUD DE BSHUS PAR BSAMS LA DMIGS PA DANG BCAS PAS, NGAG TU 'DI SKAD DU, PHAt: PAGS PA RAB MDZES GSER GYI SA GZHI'I STENG, ,KHRAG CHEN BDUD RTZI'I CHU YIS CHAG CHAG BTAB, ,SHA KHRAG ME TOG PHANG PHUNG TSOM BUR GYUR, ,YAN LAG RNAMS LAS GLING CHEN BZHI DANG NI, ,NYID LAG GLING PHRAN BRGYAD DU GYUR PA'I DBUS, ,KHOG PA RIN CHEN RDUL MANG BRTZEGS PA'I RTZER, ,MGO BO RNAM PAR RGYAL BA'I KHANG BZANG MDZES, ,MIG GNYIS MUN SEL NYI MA ZLA BA DANG, ,SNYING NI YID BZHIN NOR BU RIN PO CHE, ,DBANG PO NANG KHROL YONGS SU GYUR PA LAS, ,LHA MI'I 'DOD YON DPAL 'BYOR PHUN SUM TSOGS, ,PHAt: 'DOD DGU'I RGYA MTSO MAndAL BZANG PO 'DI, ,RTZA BRGYUD BLA MA YI DAM LHA TSOGS DANG, ,SANGS RGYAS BYANG SEMS DPA' BO RNAL 'BYOR
, ,MA; ;BSTAN BSRUNG RGYA MTSOR BCAS LA LEGS 'BUL NA, ,THUGS RJES BZHES NAS BYIN RLABS DNGOS GRUB STZOL, ,ZHES YAN LAG BDUN PA MAndAL DANG BCAS PA PHUL, DE NAS SEMS CAN THAMS CAD LA NYE RING MED PA'I BTANG SNYOMS LA GNAS PA'I NGANG NAS 'DI LTAR BSAM STE, 'KHOR BA LA THOG MA MED PAS BDAG GI SKYE BA LA THOG MA MED, SKYE SHI GCIG NAS GCIG TU BRGYUD DE YUL PHYOGS DANG SA PHYOGS 'DIR MA SKYES BYA BA NI MED, SEMS CAN 'DI'I LUS MA BLANGS BYA BA DANG, SEMS CAN 'DIS NGA'I MA MA BYAS BYA BA GCIG KYANG MED, BYAS PA GRANGS KYIS MI CHOD, DA DUNG MANG PO BYED PAR 'GYUR SNYAM DU MAR SHES PA BSGOM, DE YANG MA NAM BYAS RES KYIS TSE 'DI'I MAS JI LTAR DRIN GYIS BSKYANGS PA BZHIN DU SEMS CAN THAMS CAD KYIS DRIN GYIS BSKYANGS TE, MA NAM BYAS RES KYIS MNGAL DU GNAS PA NAS BZUNG STE BRTZE BAS BSKYANGS, MA RANG SROG LA BABS PA'I SDUG BSNGAL BYUNG BA LAS BDAG CUNG ZAD NA BA LA MI BZOD PA CHE BAR BYAS, MDOR NA MA RNAMS RANG GI KHYER 'KHOS DANG BSTUN SDIG SDUG GTAM NGAN SROG LA MA 'DZEMS PAR GNOD PA DANG SDUG BSNGAL THAMS CAD LAS BSKYABS, PHAN BDE THAMS CAD BSGRUBS PAS DRIN SHIN TU CHE SNYAM DU DRIN BSAM, 'DI DAG NI RAGS PA TZAM GYI DBANG DU BYAS PA YIN GYI, ZHIB PAR RJE YAB SRAS KYI GSUNG RAB LAS BLTA BAR BYA'O, ,
DE NAS DRIN CAN GYI MA RNAMS NYON MONGS PA'I GDON GYIS BRLAMS PAS SHES PA RNAL DU MI GNAS PAR SMYO, BLANG DOR 'BYED PA'I SHES RAB KYI MIG NI GTI MUG GIS BSGRIBS, SKAD CIG RE RE BZHIN NYES SPYOD KYIS DBYEN SPYOS PAS SPYIR 'KHOR BA DANG, KHYAD PAR NGAN SONG GI GA-YANG SA CHEN PO 'JIGS SU RUNG BAR GOM PA BRDEG 'CHA' BA RNAMS BDAG GIS MI SGROL NA SUS SGROL, MA 'DI RNAMS KYANG BDAG LA MI RE NA SU LA RE, DES NA 'DRE GDON LA SOGS PA'I PHA MA 'DI RNAMS KYIS THOG MED NAS DA LTA'I BAR DU KHONG RANG RNAMS YAL BAR DOR NAS BDAG GCES PAR BZUNG BA BZHIN DU, BDAG GIS KYANG RANG YAL BAR DOR NAS 'DI RNAMS GCES PAR BZUNG BAR BYA'O SNYAM DU DRIN GZO DANG YID 'ONG GI BLO BSKYED DO, DE NAS PHA MA 'DRE GDON LA SOGS PA'I SEMS CAN THAMS CAD ZAG BCAS DANG ZAG MED KYI BDE BAS PHONGS TSUL DANG, 'KHOR BA SPYI DANG BYE BRAG GIS SDUG BSNGAL BA'I TSUL BSAMS NAS, BDAG GI MA SEMS CAN 'DI RNAMS BDE BA DANG PHRAD PAR GYUR CIG ,BDE BA DANG PHRAD NA CI MA RUNG, BDE BA DANG PHRAD PAR BYA'O, SDUG BSNGAL DANG BRAL NA CI MA RUNG, SDUG BSNGAL DANG BRAL BAR GYUR CIG ;DE DANG BRAL BAR BYA'O SNYAM PA'I LHAG BSAM 'DREN NUS KYI SNYING RJE BSGOM MO, ,'O NA SUS SDUG BSNGAL DANG BRAL, BDE BA DANG PHRAD PAR BYA ZHE NA, NGAS DE LTAR BYA'O SNYAM PA NI LHAG BSAM MO, ,'O NA KHYOD LA DE LTA BU'I
, ,NUS PA YOD DAM ZHE NA BDEN TE, DA LTA NI DE LTA BU'I NUS PA MI 'DUG ,DE LTAR DAM NI BCAS, SU LA DE LTA BU'I NUS PA YOD NA SPYI BO'I BLA MA LHA LA YOD PAS BDAG GIS KYANG 'DRE GDON LA SOGS PA'I SEMS CAN DE RNAMS KYI DON DU MYUR BA MYUR BAR BLA MA SANGS RGYAS KYI GO 'PHANG THOB PAR BYA'O SNYAM DU BYANG CHUB KYI SEMS BSGOM MO, ,BLO GROS DANG LDAN PA RNAMS KYIS MGON PO ZHI BA LHA DANG DPAL LDAN AA TI SHA'I LUGS BZANG 'DI LTA BU GCES PAR ZUNGS SHIG ,GZHAN DU NA JO BO CHEN POS BYAMS PA DANG SNYING RJE SBYONG MI SHES PA'I BYANG CHUB SEMS DPA' BOD KYIS SHES PA ZHES GSUNGS PA LTAR, BYAMS PA DANG, SNYING RJE DANG, BYANG CHUB KYI SEMS KYI KHYAD PAR MI PHYED PAR SEMS CAN THAMS CAD KYI DON DU SANGS RGYAS THOB PAR BYA'O SNYAM PA'I SGRA SPYI TZAM LA BYANG CHUB KYI SEMS SU 'KHRUL SNANG NGO, ,DE NAS 'DI LTAR BSAM STE, BDAG GIS THOG MED NAS LUS BLANGS PA'I SHA RUS BSAGS NA RI RGYAL BAS KYANG MTHO, KHRAG DANG CHU SER BSAGS NA RGYA MTSO BAS KYANG MANG BA'I LUS BLANGS KYANG 'DRE GDON SOGS PHA MA'I DON DU GYUR PA NI GCIG KYANG MA BYUNG 'DUG ,DA LAN LUS 'DI LA BRTEN NAS GNAS SKABS SU 'DRE GDON LA SOGS PA PHA MA SHA KHRAG GIS TSIM PA DANG, MTHAR THUG SEMS CAN THAMS CAD LA PHAN PA 'GRUB PA ZHIG BYA'O, ,DE LTAR
BLA MA LHAS BYIN GYIS BRLAB TU GSOL SNYAM DU MDUN GYI NAM MKHAR BLA MA LHA'I TSOGS BZHUGS GNAS DANG BCAS PA GSAL BTAB LA, 'DI SKAD CES PHAt: DUS GSUM RGYAL BA BSKYED MDZAD RGYAL BA'I YUM, ,'GRO BA'I 'DREN MCHOG SH'AKYA'I RGYAL PO DANG, ,RGYAL BA'I MKHYEN RAB GCIG BSDUS 'JAM PA'I DBYANGS, ,GSOL BA 'DEBS SO BDAG RGYUD BYIN GYIS RLOBS, ,'GRO KUN SRID MTSO LAS SGROL RJE BTZUN MA, ,ZUNG 'JUG MNGON GYUR SU KA SIDDHI'I ZHABS, ,RGYAL BA'I RGYAL TSAB BYAMS MGON CHOS KYI RJE, ,GSOL BA 'DEBS SO BDAG RGYUD BYIN GYIS RLOBS, ,SA GSUM BRNYES PA 'PHAGS PA THOGS MED DANG, ,KUN MKHYEN GNYIS PAR GRAGS PA'I DBYIG GI GNYEN, ,GNAS LNGA RIG PA'I MTHAR SON 'PHAGS PA LHA, ,GSOL BA x, GRUB PA MCHOG BRNYES DAM PA SANGS RGYAS DANG, ,DE SRAS BSOD NAMS BLA MA GDAMS PA'I GTER, ,MKHA' 'GRO'I DBANG PHYUG LABS KYI SGRON MA LA, ,GSOL BA x, CHOS BRGYAD RANG GROL KHU SGOM CHOS SENG DANG, ,SPROS BRAL DON GZIGS DOL PA ZANG THAL ZHABS, ,BRTUL ZHUGS RNAM ROL RGYA NAG GCER BU LA, ,GSOL BA x, LAM MCHOG GSAL MDZAD SANGS RGYAS RAB STON DANG, ,BSLAB GSUM RNAM DAG SANGS RGYAS DGE SLONG ZHABS, ,BDE DROD MTHAR PHYIN SUM PA RAS PA LA, ,GSOL BA x, 'GRO BA'I MGON PO SANGS RGYAS STON PA DANG, ,GCOD YUL LAM LA
, ,MNGA' BRNYES MKHAS GRUB RJE, ,ZAB MO'I RTOGS PA PHUL BYUNG 'OD RGYAL ZHABS, ,GSOL BA x, PHUN TSOGS BKRA SHIS RGYAL MTSAN KUN DGA' BA'I, ,YE SHES MCHOG BRNYES BSAM GTAN RDO RJE DANG; ;MNYAM MED RGYAL MTSAN DPA' BZANG BSTAN PA'I DPAL, ,GSOL BA x, 'DREN PA MCHOG GIS RJES BZUNG SHES RAB GRUB, ,MKHAS PA'I DPAL GYUR LUNG RIGS RGYA MTSO DANG, ,'GRO BA'I SKYABS GYUR THUB BSTAN RNAM RGYAL LA, ,GSOL BA x, RDO RJE 'CHANG DNGOS BLO BZANG DON GRUB DANG, ,DE SRAS MKHAS GRUB SANGS RGYAS YE SHES ZHABS, ,BSLU MED SKYABS MCHOG RTZA BA'I BLA MA LA, ,GSOL BA x, SKU GSUM GO 'PHANG BDE BA CHEN PO'I GNAS, ,YID LA DRAN PA TZAM GYIS STZOL MDZAD PA, ,RTZA BA'I BLA MA RJE BTZUN RNAL 'BYOR MAR, ,GSOL BA 'DEBS SO BDAG RGYUD BYIN GYIS RLOBS, ,RTZA RGYUD BLA MA YI DAM LHA TSOGS DANG, ,SKYABS KYI MCHOG GSUM DPA' BO MKHA' 'GRO MA, ,MTHU LDAN BKA' BSRUNG RGYA MTSOR BCAS PA LA, ,GSOL BA x, NYE RGYUD NI, ` ,SKU GSUM MNGON GYUR KHYAB BDAG RDO RJE 'CHANG, ,ZAG MED BDE BA STER MDZAD RJE BTZUN MA,, RGYAL SRAS THU BO RJE BTZUN MKHYEN PA'I GTER, ,GSOL BA x, GRANGS MED RGYAL BA KUN GYI THUGS RJE NI, ,GCIG TU BSDUS PA SKAL BZANG SKYE DGU'I GNYEN, ,DBANG PHYUG BRGYAD LDAN BLO BZANG GRAGS PA'I DPAL, ,GSOL BA
'DEBS SO BDAG RGYUD BYIN GYIS RLOBS, ,KUN MKHYEN GNYIS PA 'JAM DPAL RGYA MTSO DANG, ,GDAMS PA'I MCHOG MNGA' CHOS KYI RGYAL MTSAN ZHABS, ,RDO RJE'I SKU BRNYES CHOS KYI RDO RJE LA, ,GSOL BA x, RDO RJE 'CHANG DNGOS BLO BZANG DON GRUB DANG, ,DE MAN CHAD GONG DANG MTSUNGS, DE NAS, BSHES GNYEN DAM PA TSUL BZHIN BSTEN PA DANG, ,DAL 'BYOR DON CHE RNYED PAR DKA' BA DANG, ,MYUR DU 'JIG PAR SLA BA'I TSUL RTOGS NAS, ,TSE 'DI BLO YIS THONGS PAR BYIN GYIS RLOBS, ,'KHOR BA'I NGANG TSUL ME 'OBS LTAR MTHONG NAS, ,BDAG GZHAN BRJE BA'I BYANG CHUB SEMS MCHOG GIS, ,SGYU MA'I PHUNG PO ZAN DU BSKYUR BA DANG, ,GNYAN SA RI KHROD 'GRIM PAR BYIN GYIS RLOBS, ,BDAG MED GNAS LUGS RTOGS PA'I YE SHES KYIS, ,NYES BRGYA'I RTZA BA DRUNG NAS 'BYIN PA DANG, ,THABS SHES GCOD KYI NYAMS LEN MTHAR PHYIN NAS, ,BDUD BZHI RANG SAR ZHI BAR BYIN GYIS RLOBS, ZHES GDUNG SHUGS DRAG POS DMIGS PA DANG BCAS PA'I SGO NAS GSOL BA BTAB PAS, SPYI BO'I BCOM LDAN 'DAS MA'I SKU'I CHA LAS BDUD RTZI'I RGYUN BABS, ZHES PA NAS, PHAt: PAGS PA DE SBUD DE BSHUS NAS DMAR CHAL TE BKRAMS, PHAt: KLAD PA DANG KHU BA DANG, DVANGS MA RNAMS LAS 'DOD PA'I YON TAN LNGA LA SOGS PA'I MCHOD SPRIN BSAM GYIS MI KHYAB PAR GYUR, AOm A'A: H'Um, LAN GSUM BRJOD NAS BYIN GYIS BRLABS TE 'BUL BA NI, PHAt: RANG BZHIN STONG PA'I
, ,NGANG NYID LAS, ,BYUNG BA'I YID 'ONG MCHOD PA'I TSOGS, ,ZAG MED BDE STER RGYA MTSO 'DI, ,RTZA BRGYUD BLA MA YI DAM LHA, ,SANGS RGYAS BYANG CHUB SEMS DPA'I TSOGS, ,DPA' BO RNAL 'BYOR MA RNAMS DANG, ,BSTAN BSRUNG RGYA MTSOR BCAS RNAMS LA, ,GUS PAS 'BUL LO BRTZE BAS BZHES, ,DE NAS, TSIGS MA DANG SHA KHRAG DANG RUS PAS STONG GSUM GYI KHYON THAMS CAD GANG BAR BSAMS LA, SLAR YANG MGRON 'BOD PA NI, RANG GI RNAM PAR SHES PA'I NGO BO MKHA' 'GRO MA DES GRI GUG GIS GA-YAB CING 'DI SKAD DU, PHAt: MTHO SRID PA'I RTZE MO NAS DMA' DMYAL KHAMS BCO BRGYAD BAR GYI SNANG ZHING SRID PA'I LHA MA SRIN SDE BRGYAD, GNAS GDON, LUS GDON GYIS GTZO BYAS, GTZO BO'I GDON CHEN BCO BRGYAD, BYIS PA'I GDON CHEN BCO LNGA, BGEGS RIGS STONG PHRAG BRGYAD CU, GDON RIGS SUM BRGYA DRUG CU SOGS LHA 'DRE THAMS CAD 'DIR TSOGS SHIG 'DIR 'DUS SHIG ,GONG GSUM NA RGYAG PA, LUNG GSUM NA 'PHYO BA, GNYAN PO KHA BZHI, MGYOGS PA SDE BRGYAD LA SOGS PA'I CHE DGU DANG, GNYAN DGU'I LHA SRIN SDE BRGYAD THAMS CAD 'DIR TSOGS SHIG 'DIR 'DUS SHIG ,DKAR PO LHA'I SDE, DMAR PO BTZAN GYI SDE, NAG PO BDUD KYI SDE, KHRA BO GZA'I SDE, SMUG PO DMU'I SDE, SHA ZA SRIN PO'I SDE, DKOR BDAG RGYAL PO'I SDE, MA MO GSHIN RJE'I SDE,
SA BDAG KLU GNYAN GYI SDE, DE RNAMS KYI SDER GTOGS PA'I LHA 'DRE THAMS CAD 'DIR TSOGS SHIG ,'DIR 'DUS SHIG ,NGA GAR 'GROR BYA NAG BZHIN DU KLAD LA LDING BA, KHYI NAG BZHIN DU RJES SU 'BRANG BA, SBRUL NAG BZHIN DU LUS LA 'KHRIL BA, DANG PO LUS LA NAD KYI SNA 'DREN PA, BAR DU NAD KYI GNAS 'CHA' BA, THA MAR NAD MI PHAN PAR BYED PA'I GNOD BYED GDON BGEGS THAMS CAD 'DIR TSOGS SHIG ,'DIR 'DUS SHIG ,MDOR NAS 'OG ;SA STENG, SA BLA GSUM NA GNAS PA'I LHA 'DRE THAMS CAD 'DIR TSOGS SHIG ,'DIR 'DUS SHIG ,NGA'I SGYU MA LUS KYI PHUNG PO 'DI SPYIR DRIN CAN GYI PHA MA 'DRE GDON LA SOGS PA'I RIGS DRUG SEMS CAN THAMS CAD KYI GLUD DU 'BUL LO, ,SGOS CHOS MDZAD YONGS KYI GLUD DU 'BUL LO, ,YANG SGOS DPAL LDAN BLA MA DAM PA RNAMS KYI GLUD DU 'BUL LO, ,MDOR NA PHA MA 'DRE GDON RNAMS KYIS GTZO BYAS PA'I SEMS CAN RNAMS KYIS SANGS RGYAS THOB PAR BYA BA'I PHYIR DU, DKON MCHOG SRI ZHU'I MGRON LA MCHOD PAR 'BUL, MGON PO YON TAN MGRON LA GTANG RAG TU GTONG, RIGS DRUG SNYING RJE'I MGRON LA SBYIN PAR GTONG, GDON BGEGS LAN CHAGS KYI MGRON LA BU LON 'JAL BA YIN NO, ,PHAt: KHYED RNAMS SHA LA DGA' BA SHA ZO, KHRAG LA DGA' BA KHRAG 'THUNGS, PAGS PA LA DGA' BA PAGS PA, TSE DANG SROG LA DGA' BA TSE DANG SROG ,BKRAG
, ,MDANGS LA DGA' BA BKRAG MDANGS, GZI BRJID LA DGA' BA GZI BRJID LA SOGS PA CI 'DOD PA KHYER ZHIG ,RINGS PA RNAMS KYIS RJEN PAR ZO, MI RINGS PA NAMS KYIS TSOS LA ZO, BSREGS LA ZO, CI BDE BAR ZO ZHIG ,PHAt: PHAt: PAGS PA DUM BUR GTUBS PA 'JIG RTEN DANG 'JIG RTEN LAS 'DAS PA'I CI 'DOD KYI DNGOS POR GYUR, PHAt: RANG RANG JI LTAR 'DOD PA'I 'DOD DGU'I 'BYOR PA PHUN SUM TSOGS PA KHYER LA NAM MKHA'I MTHONGS DANG, SA GZHI'I GTING DANG, RI GSUM GYI RTZE DANG, LUNG GSUM GYI NANG DANG, CHU BO'I GZHUNG DANG, RGYA MTSO'I GTING DANG, BRAG DKAR DANG BRAG DMAR DANG, RTZI SHING NAGS TSAL GYI GSEB DANG, TSONG 'DUS KYI DBUS DANG, LHA KHANG DANG, DKOR KHANG LA SOGS PA MDOR NA RANG RANG SO SO'I GNAS SU KHYER LA SONGS SHIG PHAt: CES BRJOD DE MI DMIGS PAS RGYAS BTAB LA LTA THOG TU BZHAG CING, DE LAS LANGS NAS GNAS SKABS DANG MTHAR THUG TU DGE BA'I BSNGO BA DANG SMON LAM RNAM PAR DAG PA GDAB BO, ,RGYAL BA'I GSUNG RAB LHA YI LAM LAS 'ONGS, ,DAM PA'I MAN NGAG 'OD BRGYA'I DRA BA CAN, ,RAB 'BYAMS MKHAS PA'I PAD TSAL BZHAD PA'I DPAL, ,LEGS BSHAD NAM MKHA'I NOR BU 'DI NA KVA, ,BAR SKABS KYI TSIGS BCAD DO, ,GNYIS PA LA GNYIS LAS, YI DAM DU BSGOMS NAS BDUD RTZIS MCHOD DE DNGOS GRUB ZHU BA NI GCOD
GZHUNG PHAL CHER DU GRAGS PA'I DKAR 'GYED DANG DON GCIG PAR 'DUG PAS DON GCIG TU BSHAD PAR BYA'O, ,'DI LA YANG THOG MAR SKYABS 'GRO SEMS BSKYED SOGS BSHAD ZIN LTAR NYAMS SU BLANG BAR BYA'O, ,DE NAS, RANG GI SPYI BOR PADMA DANG ZLA BA'I GDAN LA, NGO BO RANG GI RTZA BA'I BLA MA DANG DBYER MED PA'I MA GCIG LA BAS KYI SGRON MA RNAM PA SANGS RGYAS RIGS KYI MKHA' 'GRO MA SKU MDOG DKAR LA DMAR BA'I MDANGS CHAGS PA, ZHAL GCIG PHYAG GNYIS MA, PHYAG GA-YAS SENG LDENG GI d'A MA RU KHROL LO LO 'KHROL ZHING, GA-YON DNGUL DKAR GYI DRIL BU GSIL BA, DAR DKAR GYIS DBU SKRA PHYED BCINGS SU BYAS SHING, LHAG MAS SKU STOD KHEBS PA; 'DZUM ZHING SGEG PA'I NYAMS DANG LDAN PA, LHA RDZAS LAS GRUB PA'I BAR GYI NA BZAS BRGYAN CING, NYI MA STONG GI MDANGS LTA BU'I 'OD DANG GZI BRJID 'BAR BA'I DBUS NA, ZHES PA NAS, BDUD BZHI RANG SAR ZHI BAR BYIN GYIS RLOBS, ZHES PA'I BAR SNGAR LTAR BYA, DE NAS GDUNG SHUGS DRAG POS DMIGS PA DANG BCAS PA'I SGO NAS GSOL BA BTAB PAS, SPYI BO'I BCOM LDAN 'DAS MA'I SKU'I CHA LAS BDUD RTZI'I RGYUN BABS, PHAt: BLA MA'I THUGS KA NAS RANG GI RNAM PAR SHES PA'I NGO BO MKHA' 'GRO MA GRI GUG DANG THOD PA 'DZIN PA ZHIG RGYANG STE THON PAR BSAM ZHING, SNOD THAMS CAD GZHAL YAS KHANG DANG, 'DRE GDON SOGS BCUD THAMS
, ,CAD LHA DANG LHA MO'I RANG BZHIN DU BSGOMS NAS YE SHES PA BCUG ,DE NAS, RANG GI PHUNG PO DE DKAR ZHING CHE LA TSO BA SNUM PA ZHIG TU BSGOMS PA'I MDUN DU YAm LAS RLUNG, RAm LAS ME, A'A: LAS MI MGO'I SGYED BU RI RAB TZAM PA GSUM GRUB PAR GYUR, RANG GI RNAM SHES KYI NGO BO MKHA' 'GRO MAS GRI GUG PHUNG PO RNYING PA'I SMIN PHRAG TU BTZUGS TE THOD PA LING GIS BKAG NAS SGYED BU'I STENG DU DMAR TZAR GYIS FBKAL BA RGYA STONG GSUM DANG MNYAM PA LTA BU'I NANG DU PHUNG PO DE BCUG NAS GRI GUG GIS DUM BUR GTUBS, 'OG GI RLUNG GA-YOS, ME SBAR BAS RDZAS RNAMS ZHU BA'I RLANGS PAS DE BZHIN GSHEGS PA'I YE SHES KYI BDUD RTZI BKUG NAS THOD PAR BABS PAS, ,DRI MA THAMS CAD SBYANGS, KHA DOG DRI RO PHUN SUM TSOGS PA, NA BA MED PA SMAN GYI BDUD RTZI, 'CHI BA MED PA TSE'I BDUD RTZI, ZAG PA MED PA YE SHES KYI BDUD RTZI'I RGYA MTSOR GYUR, AOm A'A: H'Um MGRON RNAMS KYI LJAGS RDO RJE'I 'OD ZER GYI SBU GUS DRANGS TE GSOL BAR BSAMS LA, RGYAS PAR SPRO NA TSOGS MCHOD BYA'O, ,DE NAS MGRON RNAMS KYI RGYUD LA ZAG MED KYI BDE BA DANG, BDE BA DES STONG NYID NGES PA'I BDE STONG DBYER MED KYI YE SHES BSKYED PAS DGYES TE, 'DRE GDON SOGS YI DAM DU BYAS PA'I GNAS LNGA LAS BDUD RTZI SNA LNGA'I RGYUN BABS PA, RANG GI GNAS LNGAR THIM PAS, SGO GSUM THA MAL
DU 'DZIN PA'I DRI MA BAG CHAGS DANG BCAS PA SBYANGS, RDO RJE GSUM GYI BDAG NYID MNGON DU BYAS PAR BSAM PA'O, ,'DI DAG NI GCOD KYI GZHUNG PHAL MO CHER YANG DAG DANG LTAR SNANG GI DE NYID SLONG MO BA'I PHYE LTAR RNAM PAR 'DRES PAR BYAS PA LAS, BLO GROS DANG LDAN PA RNAMS LA RNAM PAR DPYOD PA'I SGO TZAM ZHIG BSTAN PA YIN NO, ,GNYIS PA NI, RANG NYID LHAR GSAL BA'I SPYI BOR RIGS BDAG GI TSUL DU 'DRE GDON RNAMS RTZA BA'I BLA MA DANG, DE'I MTHA' SKOR DU SEMS CAN THAMS CAD DNGOS BRGYUD KYI BLA MA DANG DBYER MED DU BSGOMS NAS, YE SHES PA BCUG ,YAN LAG BDUN PA MAndALA DANG BCAS PA PHUL, GSOL BA BTAB, BDUD RTZI'I RGYA MTSOS MCHOD PA DANG, TING NGE 'DZIN GYI DBANG BZHI LEN PA DANG, ,MJUG RANG BZHIN MED PAS RGYAS 'DEBS SHING DGE BA RNAMS RDZOGS BYANG DU BSNGO BA SOGS SNGAR LTAR SHES PAR BYA'O, ,GNYIS PA NI, DE LTAR RANG GZHAN 'KHOR 'DAS KYIS BSDUS PA'I CHOS SPYI DANG, KHYAD PAR MCHOD SBYIN GYI 'KHOR GSUM PO RANG BZHIN GYIS STONGS PA'I SNANG STONG TSOGS PA SGYU MA LTA BU'I NYAMS LEN SKABS THAMS CAD DU SHES PAR BYA ZHING, MJUG RNAMS SU SNANG BA THAMS CAD 'OD KYI RNAM PAR RANG GI SNYING GAR BSDUS PA'I MI DMIGS PA'I STONG NYAMS NAM MKHA' LTA BU DANG, DES NGOR RANG BZHIN MED PAR 'DZIN PA'I 'DZIN STANGS DAM SBRING NGE BA GNYIS TSOGS KYI MNYAM GZHAG ,
, ,NAM MKHA' LTA BU'I RNAL 'BYOR LA BRTZON PAR BYA'O, ,BZHI PA NI, SEMS DPA' CHEN PO BLO GROS SBAS PA LA SOGS PAS MDZAD PA'I TSAD LDAN GYI GCOD KYI GDAMS PA RNAMS LAS SHES PAR BYA STE, 'DIR MANGS PAS MA BRIS SO, ` ,SMRAS PA, LNGA BRGYA'I GTZUG RGYAN JO BO YAB SRAS DANG, ,RGYAL BA GNYIS PA'I GDAMS PA LAS 'ONGS PA'I, ,THABS SHES GCOD KYI SNYING PO'I NYAMS LEN LA, ,BRTZON PA'I RNAL 'BYOR MCHOG DE SKAL BA BZANG, ,DENG DUS KHA BA CAN GYI GCOD YUL PA, ,PHAL CHER 'DOD PA'I SPRIN NAG RAB BSDUS NAS, ,ZHE SDANG ME CHAR 'BAB PA'I SBYOR BA YIS, ,DGE LEGS LO TOG 'JOMS PAR BYED PA MTHONG, ,KYE MA BSTAN PA NYAMS PA'I GANGS RI'I KHROD, ,RGYAL DANG RGYAL SRAS 'PHAGS PA'I TSOGS RNAMS KYANG, ,DAG PA'I ZHING DU GSHEGS NAS BTANG SNYOMS MDZAD, ,BSHES GNYEN GZUGS KYI RI MOS RNAM ROL BA'I, ,LUS MED GNYEN GYUR GZU LUMS SPYOD PAS KHYAB, ,RGYAL BA'I GDUNG 'TSO BA PHAN BDE'I DPAL STER BA, ,NYIN MO'I DBANG PHYUG SHAR TSE RGYU SKAR BZHIN, ,'DI NA LUG LTAR LKUGS PA'I BLO CAN 'GA', ,NGUR SMRIG RGYAL MTSAN ZOL LA SKYABS BCAS NAS, ,'JIGS RUNG DAM PAS SMAD PA'I LAS RNAMS LA, ,'DZEM MED CI DGAR 'JUG PA MTHONG BAS SKYO, ,SKYE BO PHAL CHER MI DGE'I SDIG LA SPYOD, ,RGYAL PO PHAL CHER DGON GNAS
YUL 'KHOR 'JOMS, ,TSUL 'DI BSAMS TSE KHO BO YID RAB 'PHYO, ,TSE 'DI MI RTAG GA-YO BA GLOG GI GAR, ,LANG TSO MI RTAG GA-YO BA NAM MKHA'I 'JA', ,MDZA' BSHES MI RTAG GA-YO BA SGYU MA'I GNYEN, ,LONGS SPYOD MI RTAG GA-YO BA RMI LAM DPAL, ,DE'I SLAD TSE 'DI'I MDUN MA RGYANG BSRINGS NAS, ,RGYAL BA GNYIS PA'I LEGS BSHAD BDUD RTZI'I RGYUN, ,SNYING GI BUM PA'I DBUS SU BSKYANG BA'I PHYIR, ,MI GRAL NAS BUD RI DVAGS RMAS MA BZHIN, , GCIG PUR DBEN PA BSTEN PA NAM YOD NA, ,STOD SMAD LA SOGS CHOS BRGYAD MING YANG MED, ,DGRA DANG GNYEN SOGS CHAGS SDANG SKYE BA'I YUL, ,'DI NANG PHUN TSOGS DANG BCAS RING DOR NAS, ,RGYAL BA'I SRAS PO THOS PA DGA' LA SOGS, ,SNGON GYI RJE BTZUN GONG MA'I RNAM THAR BZHIN, ,MCHOG TU MI 'GYUR BDE BA CHEN PO'I DPAL, ,TSE 'DI NYID LA BSGRUBS NA MI LEGS SAM, ,DE PHYIR BDAG NI SNGON GYI BSOD NAMS DMAN, ,CUNG ZAD THOS KYANG NE'U TZO'I 'DON PA LTAR, ,RANG NYID NYAMS LEN MED PAR GZHAN LA 'DOMS, ,YE SHES SPYAN LDAN DRUNG DU NGO YANG TSA, ,'ON KYANG BDE BAR GSHEGS PA'I BSTAN PA NI, ,LUNG TZAM GYIS KYANG DON DANG LDAN NO ZHES, ,ZLA MED STON PA DE YIS BSNGAGS PAS NA, ,DE SLAD 'DIR NI BSOD NAMS CI BSAGS PA, ,DE YIS MYUR DU MA PHAM MGON PO'I DRUNG, ,SKYES NAS RGYAL TSAB MGON PO DRI MA MED, ,'JAM DPAL SNYING POR BCAS PA'I
, ,ZHAL MTHONG NAS, ,ZAB DANG RGYA CHE'I GDAMS PA MANG MNOS TE, ,MI SKYE'I CHOS LA BZOD PA THOB PA DANG, ,NAM ZHIG MI MDZED ZHING 'DIR MA PHAM MGON, ,RGYAL BA'I MDZAD PAS RNAM PAR ROL PA'I CHE, ,'KHOR GYI THOG MA NYID DU SKYES NAS KYANG, ,MTHA' YAS 'GRO BA 'DREN PA'I DPAL GYUR CIG ,CES GCOD KYI GDAMS PA THAR 'DOD KYI DED DPON ZHES BYA BA 'DI NI, BSLAB GSUM GYIS THUGS KYI BANG MDZOD YONGS SU GTAMS PA'I SDE SNOD 'DZIN PA RGYAL BAS BSNGAGS PA'I BSAM GTAN PA CHEN PO RJE DRUNG LEGS TSOGS LHUN GRUB KYIS NAN CHER BSKUL BA LA BRTEN NAS, RGYAL BA'I SRAS PO BLO GROS SBAS PA DANG, PAn CHEN LUNG RIGS RGYA MTSO LA SOGS PA'I DAM PA DU MA'I GCOD KYI GDAMS PA RNAMS LAS LEGS PA'I CHA RNAMS BLANGS TE, NGAG 'DON GYI RIM PAR BSGRIGS NAS, SH'AKYA'I DGE SLONG BLO BZANG CHOS KYI RGYAL MTSAN GYIS BLO BZANG MDUN SA DBEN SA CHOS KYI PHO BRANG GI GTZUG LAG KHANG DU SBYAR BA'O,, ` ,,BDAG 'DZIN DANG BDUD KYI GCOD YUL ZHES PA DANG, THABS SHES KYI SPYOD YUL ZHES GDAMS PA 'DI NYID LA MTSAN GCIG STENG NAS YI GE DANG DON SO SO BA GNYIS KYI RNAM GZHAG KYANG BYED DGOS PA YIN NO,, ` ,,NA MO GU RU DE WA d'A KI NI, BLA MA YE SHES MKHA' 'GRO'I ZHABS BTUD NAS, ,GCOD KYI NYAMS LEN SNYING POR DRIL TE BSHAD, ,
PHAt: RANG GI SPYI BOR RTZA BA'I BLA MA DANG, ,DBYER MED RJE BTZUN RDO RJE RNAL 'BYOR MA, ,SKU MDOG DMAR MO ZHAL GCIG PHYAG GNYIS MA, ,PHYAG GA-YAS GRI GUG GA-YON PA THOD KHRAG 'DZIN, ,MCHAN KHUNG KHA tV'Am GA YIS MDZES PAR BRGYAN, ,KHRO CHAGS SPYAN GSUM MCHE BA CUNG ZAD GTZIGS, ,SKRA GROL GCER MO RUS PA'I RGYAN DRUG GSOL, ,BRKYANGS BSKUMS GAR GYIS PAD NYI RO GDAN BZHUGS, ,RANG LUS DBUS SU DBU MA MDA' SMYUG TZAM, ,LTE 'OG NAS BZUNG SPYI BOR THAL GYIS ZUG ,SNYING DBUS DH'U T'IR RANG SEMS THIG LE'I GZUGS, ,DKAR 'TSER 'OD KYI PHUNG PO RGYA SRAN TZAM, ,PHAt: SNYING GA NAS THON SKAR MDA' 'PHANGS PA BZHIN, ,RJE BTZUN RNAL 'BYOR MA YI THUGS KAR THIM, ,RANG LUS BEM PO SHING SDONG BCAD PA BZHIN, ,LING GIS 'GYEL BAS STONG GSUM KHYON GANG ZHING, ,DKAR ZHING TSO LA SNUM ZHING MDZES PAR BSAM, ,SLAR YANG RANG SEMS BLA MA'I THUGS KA NAS, ,MKHA' 'GRO GRI GUG 'DZIN PA'I RNAM PAR THAN, ,AOm A'A: H'Um LAS MI MGO'I SGYED BU NI, ,RI RGYAL LHUN PO LTA BU GSUM GYI STENG, ,GRI GUG 'BAR BAS THOD PA BKOG NAS BKAL, ,PHUNG PO RNYING PA DE YI NANG BCUG STE, ,GRI GUG GIS GTUBS GA-YAS BSKOR GSUM DKRUGS SHING, ,'BRU GSUM BRJOD NAS ZAG MED YE SHES KYI, ,BDUD RTZI'I RGYA MTSO CHEN POR LEGS BSAMS TE, ,SRID ZHI'I MGRON RNAMS MNYES SHING TSIM PAR BSAM, ,MI DMIGS RGYAS BTAB DGE BA RDZOGS
, ,BYANG BSNGO, ,DKAR 'GYED DO,, ` ,,DMAR 'GYED SNGAR BZHIN BEM RIG BRAL BA'I MTHAR, ,RANG SEMS GRI GUG THOGS PA'I MKHA' 'GRO MAS, ,PHUNG PO RNYING PA'I SMIN MTSAMS SUM PHRAG DANG, , RKANG LAG BZHI RTZER RGYA GRAM GSHAGS BYAS TE, ,PAGS PA BSHUS NAS SA STENG DMAR CHAL BKRAM, ,SHA KHRAG GTOR MAS SRID GSUM BKANG MOS NAS, ,DKON MCHOG SRI ZHU'I MGRON LA MCHOD PA 'BUL, ,MGON PO YON TAN MGRON LA GTANG RAG GTONG, ,RIGS DRUG SNYING RJE'I MGRON LA SBYIN PA DANG, ,GDON BGEGS LAN CHAGS MGRON LA BU LON 'JAL, ,RANG RANG JI LTAR 'DOD PA'I DAM RDZAS KYIS, ,SKYE 'PHAGS MA LUS MNYES SHING TSIM PAR BSAM, ,MCHOD SBYIN 'KHOR GSUM RMI LAM SGYU MA DANG, ,CHU ZLA BZHIN DU SNANG YANG BDEN PAS STONG, ,PHAt: BDEN MED SPROS BRAL NAM MKHA' LTA BU'I NGANG, ,DBYINGS RIG DBYER MED RTZE GCIG MNYAM PAR GZHOG ,MJUG TU DGE TSOGS BYANG CHUB CHEN POR BSNGO, ,DE LTAR GCOD GZHUNG 'O MA'I RGYA MTSO, ,LEGS BSRUBS MAR GYI SNYING PO 'DRA 'DI, ,DGE SLONG LHA BZOS YANG YANG BSKUL TSE, ,MDO RGYUD DAM PA'I MAN NGAG 'DZIN PA, ,RNAL 'BYOR SPYOD PA'I DGE SLONG BLO BZANG, ,CHOS KYI RGYAL MTSAN ZHES BYAS BKOD PA'I, ,DGE BAS MA GYUR NYAM THAG 'GRO KUN, ,BDAG 'DZIN BDUD BZHI'I DGRA LAS RGYAL GYUR,, ,,
` AOm SVA STI, PHAN BDE'I 'BYUNG GNAS RGYAL BSTAN YONGS 'DU'I LJON, ,RAB RGYAS 'GRO KUN THAR MCHOG 'BRAS BZANG LA, ,SPYOD PHYIR BKRA SHIS LHUN GRUB CHOS GRVA CHER, ,CHOS SBYIN 'DZAD MED DAL 'GRO'I RGYUN 'DI SPEL, , SARBA DZA GA TAm,, ,,