*, ,DPAL RDO RJE 'JIGS BYED KYI DBANG DRAG GI SBYIN SREG BYA TSUL LAG LEN DU DRIL BA RNAM BSHAD DNGOS GRUB RGYA MTSO LAS PHYUNG BA BZHUGS,,
, ,NA MO GU RU MANYDZU GHO sh'A YA, BLA MA MCHOG DANG 'JAM DPAL GSHIN RJE'I GSHED, ,DBYER MED ZHABS KYI PADMOR PHYAG BYAS TE, ,DBANG DRAG SBYIN SREG RGYUD DANG RGYA GZHUNG GI ,DGONGS DON RJE BTZUN BLA MA'I GSUNG BZHIN BRI, ,'DIR DPAL RDO RJE 'JIGS BYED KYI DBANG DRAG CI RIGS PA'I SBYIN SREG BYA BAR 'DOD PAS, SA SBYANG GZUNG RGYAS PA'AM, RANG NYID 'JIGS BYED ZHAL GCIG PHYAG GNYIS PAR GSAL BAS, RDO RJE DANG BCAS PA'I LAG PA SA LA BZHAG NAS, AOm A'A: H'Um, AOm HA NA HA NA BADZRA KRO DHA H'Um PHAt, RDO RJE KHRO BOS BGEGS BCOM ZHING, RDO RJE GSUM GYIS SA'I NYES SKYON THAMS CAD SBYANGS PAR BSAM, YANG NA, HR'I: shtR'I: BRGYA RTZA BZLAS KYANG RUNG BAR GSUNGS, SA LA SOGS PA SNA
, ,TSOGS PA'I CHOS THAMS CAD STONG PA NYID DANG RO GCIG TU GYUR PAR BSAM STE, DON DAM PA'I SBYANG BA'O, ,BUM BSKYED DANG MA 'BREL NA, BSANG CHU HR'I: shtR'I: BRGYA RTZA BZLAS TE BSGRUB BRKOS PA'I THAB BYED CHE, LTO 'PHYE BRTAG PA YANG NGES PAR BYA, BRKOS PA DANG BRTZIGS THAB CI BYED KYANG, SA GZHI DMAR PO'AM, GZHAN YANG RUNG BA LA, DBANG DANG, DE'I DGUG PA'I THAB BYA STE, DBYIBS ZLA GAM, KHA BDAG NYID LA BLTA BA, RGYA DANG NGES NI RGYAS PA'I THAB DANG 'DRA BAR DGRA NAG LAS BSHAD LA, MU RAN KHA KHYER SOGS KYANG DE DANG 'DRA'O, ,THAB KYI DBUS SU NI PADMA DMAR PO RDO RJES MTSAN PA'O, ,KHA KHYER LA PADMA'I 'PHRENG BAS BSKOR RO, ,PHYI NANG GNYIS KA SA DMAR PO DANG, BDUD RTZIS BRAN PA'I DRI DMAR POS BYUGS LA, ME TOG DMAR PO DGRAM MO, ,DE'I DGUG PA LA NI, DBUS SU PADMA DMAR PO RDO RJE LCAGS KYUS MTSAN PA'O, ` ,SA GZHI GAS PA DANG, TSA SGO CAN DANG, RTZUB PA DANG, RANG BZHIN GYIS GNAG PA LA BSAD PA'I THAB BYA STE, CHOS 'BYUNG GI
RNAM PA LTAR GRU GSUM RTZE MO BYANG DU PHYOGS PA, RGYAR LOGS GSUM LA SOR NYI SHU PA, DPANGS SU SOR BCU PA, MU RAN KHA KHYER MED PA DPAL 'DZIN GYIS BSHAD PA LTAR RAM, YANG NA, AA BHA YAS, MU RAN KHA KHYER SOR GSUM GSUM PA PHYIR GZHOL PA LA KHRO BO'I RDO RJES BSKOR BA BYA BAR BSHAD PA LTAR, CI BDER BYA'O, ,THAB KYI DBUS SU, PADMA NAG PO'I STENG DU, RTZE GSUM LA GNAS PA'I KHRO BO'I RDO RJES MTSAN PA BYED PAR DPAL 'DZIN BZHED PA LTAR BYA ZHING, PHYI NANG DU BDUD RTZIS SPAGS PA'I SA NAG PO DANG, RO THAL DANG, BONG BU DANG RNGA MO SOGS KYI SPANGS GANG RNYED KYIS BYUGS TE, DRI NGAN PA'AM, DRI MED PA'I ME TOG SNGO DMAR DANG, 'BRAS BU'I PHUB MA SOGS GTOR LA, ZHUN CHEN GYI MAR ME SOGS DANG LDAN PAR BYA'O, ` ,DBYE BA'I THAB NI, BSAD THAB DANG 'DRA ZHING, BSKRAD THAB DBYIBS GZHU LTA BU, KHA PHYIR BLTA BA, RGYAR KHRU DO, ZABS SU KHRU GANG, MDOG SNGON PO, RDO RJE'I PHRENG BAS BRGYAN PA BYA BAR BSHAD LA, RMONGS RENGS KYI THAB, RGYAS PA 'DRA BA YUNG BAS BYUGS PA'O, ,LAS THAMS CAD PA'I THAB NI, DBYIBS ZHI BA DANG MTSUNGS PA, MU RA NA LA GE SAR DANG, KHA KHYER LA 'DAB MA'I RNAM PA BYA BAR BSHAD DO, ` ,DBANG LA ZANGS KYI SNOD DU, ME TOG DMAR PO, DRI DMAR PO'I CHU, NAS, TIL NAG ,KU SHA, 'BRAS YOS, BDUD RTZI LNGA DANG BCAS PA, 'BRAS BU
, ,SKYUR PO DANG, MNGAR GSUM DANG SBYAR BA'I ZHAL ZAS LA SOGS PA DANG, RDO THAL MED PA'I SO RTZI STA GON BYA'O, ` ,BSAD BSKRAD SOGS LA, RDZA PHOR LA SOGS PA'I DUM BU'I SNOD DU, BONG BU'I CHU KHRAG DANG BCAS PA DANG, DRI NGA BA DANG, DRI MED PA'I ME TOG NAG PO SOGS DANG, RMONGS RENGS LA, DE LTA BU'I ME TOG SER PO BLUG GO ,DRAG PO RNAMS LA THUN MONG DU, SPOS DKAR, GU GUL, SHA CHEN GYI SPOS, MI DANG NYA LA SOGS PA'I ZHAG DANG, YUNGS MAR TSA BA'I MAR ME DANG, TU RUshKA DANG 'OL MA SE LA SOGS PA'I DRI DANG, RO KHA BA DANG, TSA BA DANG, YID DU MI 'ONG BA'I BZA' BA DANG, SHA KHRAG LA SOGS PA'I ZHAL ZAS DANG, RDO THAL DANG BCAS PA'I SO RTZI'O, ` ,DE BZHIN DU BUD SHING YANG, DBANG LA NI SKYON DANG BRAL BA'I SHING DMAR PO DANG, NIM PA DANG, THANG SHING DANG, SHING SKYUR PO ME TOG DANG BCAS PA STE, TSAD SOR LNGA PA'O, ,DBANG GI DGUG PA LA TSER MA LCAGS KYU LTA BU'O, ` ,MNGON SPYOD RNAMS LA NI, RO TSA BA DANG, KHA BA DANG, TSER MA CAN GYI SHING NGAM, RO BSREGS PA'I MGAL DU MA LAS BYUNG BA; BKAS PA, SOR BCU PA, RTZE MO GNYIS RNO BA, YUNGS MAR DANG DUG KHRAG GIS BSKUS PA'O, ,GZHAN YANG, YUNGS KAR DANG, YUNGS MAR TSA BA DANG, SKYE TSE DANG, NIM PA'I LO MA DANG, RO THAL DANG,
BSGRUB BYA'I RKANG RJES KYI SA DANG, SKRA SOGS DRI MA CI RNYED DANG, BONG BU SOGS KYI SPANGS DANG, KHYIM BYA'I TSIL DANG, TSER MA DANG, RUS PHYI SOGS RDZAS THAMS CAD LA DUG GIS SPAGS PA'O, ,DRAG PO THAMS CAD LA, 'BYOR NA MI'I ZHUN DANG, MA 'BYOR NA, SNUM NAG DUG KHRAG GIS NGAR BLUD PA DANG, DBANG LA, MAR SMUG RTZIS KHA DOG BSGYUR BA'O, ,MDOR NA, DBANG DRAG GI MCHOD GTOR, SREG RDZAS, GANG DU GSHOM TSUL, DGANG GZAR BLUGS 'DZIN TSUL GO LDOG DGOS PA, KHA BLTA PHYOGS DANG, STAN LA JI LTAR 'DUG PA, ME CI 'DRA LA SBAR BA, THAB KYI KHA KHYER LA KU SHA 'GOD LUGS, BSAM PA'I KHYAD PAR JI LTA BUS BYED PA SOGS, ZHIB PA SBYIN SREG RNAM BSHAD DNGOS GRUB RGYA MTSO LAS SHES PAR BYA ZHING, ,'DIR NI, LAS BZHI'I SBYIN SREG THAMS CAD KYI THOG MTHA' BAR GSUM DU JI LTAR BYA BA'I TSUL PHAL CHER 'DRA YANG, LAS SO SO'I DBYE BAS, MI 'DRA BA'I KHYAD PAR CUNG ZAD CUNG ZAD YOD PA RNAMS GSAL BAR BYA'O, ,BDAG BSKYED RDOR DRIL BYIN RLABS NAS, KU SHA DGRAM PA'I BAR SPYI 'GRO LTAR SNGON DU BTANG, THAB BSANGS, SBYANGS, STONG PA'I NGANG LAS, SNA TSOGS PADMA DANG ZLA BA'I STENG DU, SAm DANG RDO RJE LAS, RDO RJE 'DZIN PA DKAR PO, DKAR SNGO DMAR BA'I ZHAL GSUM PHYAG DRUG GI DANG PO GNYIS KYIS RANG 'DRA'I YUM LA 'KHYUD PA, GA-YAS 'OG MA GNYIS RDO RJE DANG RAL GRI, GA-YON 'OG MA GNYIS RIN PO CHE DANG PADMA 'DZIN PA ZHU BA LAS
, ,LAS BYUNG BA'I YE SHES KYI THAB, KHA DOG DMAR ZHING, DBYIBS ZLA GAM, MU RAN KHA KHYER DANG BCAS PA, KHA KHYER LA PADMA'I PHRENG BAS BSKOR BA, GRVA BZHIR ZLA PHYED RDO RJES MTSAN PA, DVANGS SHING THOGS PA MED PA'I NANG DU, RAm LAS SKYES PA'I ME GRU GSUM GYI DBUS SU, SNA TSOGS PADMA'I LTE BAR, RAm LAS BGRANG PHRENG, DE YONGS SU GYUR PA LAS, ME LHA SKU MDOG DMAR PO, DMAR SNGO DKAR BA'I ZHAL GSUM PHYAG DRUG PA, GNYUG MAR GNAS PA'I RIG MA DANG GNYIS SU MED PA'I SKU, PHYAG GA-YAS KYI DANG PO NA BGRANG PHRENG, GNYIS PAS MI 'JIGS PA SBYIN PA, GSUM PA NA GRI GUG ,GA-YON GYI DANG PO NA DBYI GU RTZE GSUM PA, GNYIS PA NA SPYI BLUGS, GSUM PA NA THOD PA BSNAMS PA, GA-YON BRKYANGS PA'I STABS KYIS BZHUGS PA, KHRO BO'I RGYAN RNAMS KYIS BRGYAN PA'I THUGS KAR ME GRU GSUM PA RAm GYIS MTSAN PA, ZHES PA NAS, ME PRA BRTAG PA'I BAR, ME LHA'I LJAGS RDO RJE'I RNAM PA CAN DMAR PO LA, ZHES PA MA GTOGS, SPYI LTAR BYA, DE NAS, 'JIG RTEN PA DANG 'JIG RTEN LAS 'DAS PA'I ME LHA LA BSREG RDZAS DKYUS 'GRO LTAR 'BUL, DE YANG, DNGOS GRUB RGYA MTSO LAS, DBANG DANG DRAG PO'I BSREG RDZAS RNAMS LA, RDZAS SNGAGS SO SO BA MI SNANG BAS, GANG LA 'BUL BA'I LHA'I SNGAGS NYID KYIS BYA'O, ZHES GSUNGS PAS, 'DIR 'JIG RTEN PA'I SKABS SU DE NYID KYI SNGAGS DANG, 'JIG RTEN LAS 'DAS PA'I
SKABS SU, SREG RDZAS THAMS CAD, AOm HR'I: shtR'I: WI KRi T'A NAN H'Um PHAt, CHE GE MO WA SHAm KU RU HO:, ZHES SPEL TSIG SBYAR NAS 'BUL, DBANG GI DGUG PA LA NI, CHE GE MO A'A KARshA YA DZA:, ZHES BRJOD DO, ,LAS BCOL GYI DUS SU NI, SANGS RGYAS RNAMS KYI THUGS KA NAS SPROS PA'I 'OD ZER DMAR PO LCAGS KYU LTA BUS, BSGRUB BYA ZLA BA DMAR PO LA GNAS PA BKUG NAS, BDAG NYID LA DAD PA DANG DGA' BAS, RKANG PA'I DRUNG DU 'DUD PA LA SOGS PAR BSGOM MO, MJUG CHAG DKYUS LTAR BYA'O, ` ,DRAG PO LA YANG, SNGON 'GRO'I RIM PA SPYI LAS KHYAD PAR CUNG ZAD BSGYUR DGOS RNAMS, SBYIN SREG RNAM BSHAD CHEN MO LAS 'BYUNG BA LTAR BYA ZHING, THAB BSKYED PAR PHYOGS PA'I BAR DKYUS BZHIN DANG, DE NAS, RANG YI DAM DU GSAL BA'I THUGS KA'I 'OD ZER LCAGS KYU LTA BUS, 'CHI BDAG LAS GSHIN 'KHOR BCAS SPYAN DRANGS, MCHOD BSTOD MDOR BSDUS CIG BYA, SLA NGA 'AM LCAGS SNGAR NANG DU, KHRAG GIS 'BRUB KHUNG GRU GSUM BRIS PA'I NANG DU, DGRA BO'I ZAG RDZAS DANG BAG PHYE LAS BYAS PA'I LINGGA BZHAG ,RGYAS PAR 'DOD NA, THUN MONG MA YIN PA'I DRUG CU PA LTAR, KHA SBYOR DBYE BA DANG, RNAM SHES GONG DU SPOR BA'I BAR BYA ZHING, DE TZAM MI SPRO BAR MDOR BSDU NA, BSAD KHUNG LINGGA DANG BCAS PA HR'I: shtR'I: SA BSANGS, SVA BH'A WAS SBYANGS, STONG PA'I NGANG LAS, BSAD KHUNG 'DI NYID, H'Um NAG PO ZHU BA LAS BYUNG BA'I 'BRUB KHUNG KHA DOG NAG CING
, ,GTING YANGS PA, GSHIN RJE'I BSAD KHUNG, MA MA'I DUR SA, MA RIG PA'I MUN PA 'THIBS PA, NAD KYI BU YUG 'TSUBS SHING 'JIGS PA'I SGRA SGROGS PA, MTSON CHA'I CHAR 'BAB PA'I LCAGS KHANG ME RAB TU 'BAR BA'I NANG DU, nI LAS DGRA DANG, TRI LAS BGEGS BSKYED, GZUGS BRNYAN DANG DBYER MED PA'I DGRA BGEGS RNAMS KYI PHUNG PO DANG, KHAMS DANG, SKYE MCHED DANG, DBANG PO DANG, KHYAD PAR RNAM SHES KYI NGO BO TIL MAR GYI MAR ME LTA BU SNYING GAR GSAL BAR GYUR, NGAG TU, RJE BTZUN RTZA BA DANG BRGYUD PAR BCAS PA'I DPAL LDAN BLA MA DAM PA RNAMS KYI BKA' BDEN PA DANG, SANGS RGYAS KYI x, CHOS KYI x, DGE 'DUN GYI x, KHAMS GSUM ZA BYED DPAL RDO RJE 'JIGS BYED CHEN PO'I x, DPAL MGON DAM PA CHOS SKYONG BA'I BSRUNG MA MTHU RTZAL CAN RNAMS KYI x, SKYE 'GRO'I SROG LA DBANG BA'I 'CHI BDAG GSHIN RJE CHOS KYI RGYAL PO YAB YUM 'KHOR DANG BCAS PA'I x, CHOS KYI DBYINGS RNAM PAR DAG CING, LAS 'BRAS RTEN 'BREL BSLU BA MED PA'I BDEN PA DANG, BDEN PA CHEN PO'I BYIN GYI RLABS KYIS, KHAMS GSUM CHOS KYI RGYAL PO RGYAL BA TZONG KHA PA CHEN PO'I BSTAN PA BSTAN 'DZIN DANG BCAS PA DANG, KHYAD PAR, RNAL 'BYOR PA BDAG CAG DPON SLOB MI NOR DGON GNAS DANG BCAS PA LA GNOD CING 'TSER BAR BYED PA'I DGRA BGEGS THAMS CAD, SA 'OG ,SA STENG, SA BLA, BSRUNG BA'I GUR KHANG
GANG NA GNAS KYANG, SKAD CIG ,THANG CIG ,YUD TZAM ZHIG LA 'DIR MCHIS PAR GYUR, AOm HR'I: shtR'I: WI KRi T'A NAN H'Um PHAt, AOm K'A LA R'U PA H'Um PHAt, SARBA SHA TR'Um A'A KARshA YA DZA: DZA: H'Um BAm HO: ZHES LAN GSUM BRJOD DE, KHRO BO'I TSOGS KYIS BKUG NAS, LINGGA LA BSTIM PAR BSAM, DE LTAR KHA SBYAR BYAS NAS DBYE BA LA, DANG POR YE SHES PA'I LHA DANG DBYE BA NI, H'Um DGRA BGEGS 'DI YI GROGS MDZAD PA'I, ,YE SHES LHA BSRUNG TSOGS RNAMS GSON, , BSTAN DGRA DAM NYAMS SDIG CAN 'DIS, ,BLA MA DAM PA'I SKU LA BSDOS, ,DKON MCHOG GSUM PO BRNYAS SHING SMAD, ,SANGS RGYAS BSTAN PA'I SPYI DGRA BYAS, ,'PHAGS PA'I DGE 'DUN SO SOR PHYE, ,SKYE 'GRO YONGS LA GNOD CING 'TSE,, MI DGE BCU DANG MTSAMS MED SBYAR, ,BSRUNG MA RNAMS LA SNGO PHOD BTZUGS, ,RNAL 'BYOR BDAG LA GNOD PA BYAS, ,DGE BDUN ZHAL GYI 'DU SGO PHROGS, ,NYES MED SEMS CAN BRLAG PAR BYAS, ,ZHING BCU TSANG BA'I DGRA BO 'DI; ;BSRUNG DANG SKYOB PAR MA MDZAD PAR, ,SMAN PA MKHAS PA'I GTAR BSROG LTAR, 'DI NYID SGROL BA'I GROGS MDZOD CIG ,H'I: shtR'I: DANG K'A LA R'U PA'I MJUG TU, SARBA SHAHR'Um SARBA DZNY'A NA DE WA BI DE shA YA PHAt, CES YE SHES PA DANG PHRAL, DE NAS, 'JIG RTEN PA'I LHA DANG BSRUNG BA DANG PHRAL BA NI, H'Um NYES CAN DGRA BO'I GROGS BYED PA'I, ,'JIG RTEN LHA BSRUNG THAMS CAD KYANG, ,'JIGS PA THAMS CAD 'JIGS BYED PA'I, ,GSHIN RJE'I GSHED PO'I
, ,BKA' NYON LA, ,SDIG LDAN 'DI NYID TSAR CHOD CIG ,GZHAN YANG SRUNG BYED GO CHA SOGS, ,CHOS 'BYUNG NANG DU PHUR BUS GDAB, ,HR'I: shtR'I: DANG K'A LA R'U PA'I MJUG TU, SARBA SHA TR'Um SARBA LO KA DE BAR RAKshA BI DE shA YA PHAt, CES DMIGS PA DANG BCAS PAS BRJOD DE, 'JIG RTEN PA'I LHA BSRUNG DANG PHRAL, DE NAS, H'Um 'CHI BDAG NAG PO LHO PHYOGS KYI, ZHES SOGS KYIS DRAG TU BSKUL TE, RDUL PHRAN TZAM YANG MED PAR MDZOD, , K'A LA R'U PA DGRA BGEGS MA RA YA PHAt, CES BRJOD DE, LINGGA'I RKANG PA NAS GTUBS LA, DUM BU RNAMS SREG RDZAS LA DGRAM MO, ,DE NAS, THAB BSANGS, SBYANGS, STONG PA'I NGANG LAS, SAm DANG RDO RJE LAS, RDO RJE 'DZIN PA BSKYED PA, LAS BZHI THAMS CAD 'DRA ZHING, RDO RJE 'DZIN PA ZHU BA LAS BYUNG BA'I YE SHES KYI THAB, KHA DOG GNAG CING, DBYIBS GRU GSUM PA, GRU BZHIR ZLA PHYED RDO RJES MTSAN PA, DVANGS SHING THOGS PA MED PA'I NANG DU, RA LAS SKYES PA'I ME GRU GSUM PA'I DBUS SU, SNA TSOGS PADMA'I LTE BAR, RAm LAS BGRANG PHRENG, DE YONGS SU GYUR PA LAS, ME LHA SKU MDOG NAG PO, NAG DKAR DMAR BA'I ZHAL GSUM PHYAG DRUG PA, GNYUG MAR GNAS PA'I RIG MA DANG GNYIS SU MED PA'I SKU, PHYAG GA-YAS KYI DANG PO NA BGRANG PHRENG, GNYIS PAS MI 'JIGS PA SBYIN PA, GSUM PA NA GRI GUG ,GA-YON GYI DANG PO NA DBYI GU RTZE GSUM PA, GNYIS PA NA SPYI
BLUGS, GSUM PA NA THOD PA BSNAMS PA, GA-YON BRKYANGS PA'I STABS KYIS BZHUGS PA, KHRO BO'I RGYAN RNAMS KYIS BRGYAN PA'I THUGS KAR ME GRU GSUM PA RAm GYIS MTSAN PA, ZHES PA NAS ME LHA'I LJAGS RDO RJE'I RNAM PA CAN NAG PO LA RAm YIG DANG ZHES SOGS MA GTOGS, GZHUNG SPYI LTAR BYA, DBANG DRAG GNYIS LA YANG, RDZAS CHEN BCU GNYIS PHUL YANG 'GAL BA MED PAS, 'BUL NA, YAM SHING RNAMS BYANG CHUB KYI SHING GI RANG BZHIN DU GYUR, CES BRJOD NAS, ME LHA'I SNGAGS KYI MJUG TU, AOm BO DHI BRiKshA YA, BDAG CAG DPON SLOB 'KHOR DANG BCAS PA'I GZI BRJID PHUN SUM TSOGS PA LA BAR DU GCOD PA'I DGRA BGEGS THAMS CAD MA RA YA PHAt, CES GHASMA RI'I BAR DU SO SO'I SKABS DANG BSTAN PA'I SPEL TSIG SBYAR NAS 'BUL ZHING, DE NAS DRAG PO'I RDZAS RNAMS 'BUL, GAL TE RDZAS CHEN BCU GNYIS 'BUL MI SPRO NA, SREG RDZAS RNAMS BDUD RTZI'I RANG BZHIN DU GYUR PAR BSAMS LA, ME LHA'I SNGAGS LA SPEL TSIG SBYAR TE 'BUL LO, ,DE NAS, DKYIL 'KHOR SGRUB MCHOD DANG 'BREL MA 'BREL GYI DBYE BAS, 'JIG RTEN PA'I ME LHA'I THUGS KAR, 'JIG RTEN LAS 'DAS PA'I ME LHA BSKYED, RDZAS CHEN BCU GNYIS 'BUL MI 'BUL SKABS DANG BSTUN, 'JIG RTEN LAS 'DAS PA'I ME LHA GTZO 'KHOR GYI GRANGS KYI SNYING PO NYE SNYING CI RIGS KYI MJUG TU SPEL TSIG SBYAR BA 'BA' ZHIG GIS 'BUL TE,
, ,DPA' BO GCIG PA LTA BU LA, AOm HR'I: shtR'I: WI KRi T'A NAN H'Um PHAt, KHAMS GSUM CHOS KYI RGYAL PO RGYAL BA TZONG KHA PA CHEN PO'I BSTAN PA BSTAN 'DZIN DANG BCAS PA LA SDANG ZHING LOG PAR 'KHU BA'I SEMS DANG LDAN PA RNAMS DANG, KHYAD PAR RNAL 'BYOR PA BDAG CAG YON MCHOD MI NOR DGON GNAS DANG BCAS PA RNAMS LA GNOD CING 'TSO BAR BYED PA'I DGRA BGEGS THAMS CAD M'A RA YA PHAt, CES BDUN NAM NYER GCIG GAM BRGYA STONG SOGS CI RIGS 'BUL LO, ,BSKRAD PA LA, CHE GE MO AATZTSA tA YA H'Um PHAt, DBYE BA LA, CHE GE MO DANG CHE GE MO BI DE shA YA PHAt, RENGS PA LA, CHE GE MO STAm BHA YA LAm, RMONGS PA LA, CHE GE MO MO H'A YA PHAt, CES DRAG PO SO SO'I SKABS DANG BSTUN NAS GDAGS SO, ,'PHRIN LAS 'CHOL BA'I SKABS SU, DNGOS GRUB RGYA MTSOR, KHA SBYOR DBYE BA'I SGO NAS BYA BAR GSUNGS PA RGYAS BSDUS SKABS DANG SBYAR ZHING, LHAG PAR BSDU NA, LHA RNAMS KYI THUGS KA NAS, SHIN TU KHROS SHING 'JIGS PA, DGRA BGEGS KYI SHA KHRAG SROG DBUGS LA RNGAMS PA'I KHRO BO'I TSOGS DPAG TU MED PA SPROS, KHAMS GSUM CHOS KYI RGYAL PO RGYAL BA TZONG KHA PA CHEN PO'I BSTAN PA BSTAN 'DZIN DANG BCAS PA LA SDANG ZHING LOG PAR 'KHU BA'I SEMS DANG LDAN PA RNAMS DANG, KHYAD PAR, RNAL 'BYOR PA BDAG CAG DPON SLOB YON MCHOD MI NOR DGON GNAS DANG BCAS PA RNAMS
LA GNOD CING 'TSE BAR BYED PA'I DGRA BGEGS THAMS CAD DRAG PO'I CHAD PAS TSAR BCAD PAR GYUR, CES BRJOD CING BSAM PAR BYA'O, ,MJUG GI BYA BA PHAL CHER MTHUN ZHING GO SLA BAS, SPYI 'GRO LTAR BYA'O, ,'DIR NI SBYIN SREG RNAM BSHAD CHEN MO DANG BSTUN, RDO RJE 'JIGS BYED DANG SBYAR BA YIN LA, DPAL 'DUS PA SOGS YI DAM GZHAN LA SBYOR NA, 'JIG RTEN LAS 'DAS MA 'DAS KYI ME LHA'I SKU MDOG PHYAG MTSAN SNGAGS SOGS BSGYUR BA MA GTOGS, RIGS BSGRES NAS SHES PAR BYA'O, ,'DI LTAR BSGRUBS PA'I LEGS BYAS 'O MA'I MTSO, ,ZLA ZER BYE BAS BYUGS 'DRA CI MCHIS PA, ,'GRO KUN SRID ZHI'I DGRA LAS RNAM RGYAL TE, ,THAMS CAD GZIGS PA'I GO 'PHANG THOB PHYIR BSNGO, ,TSUL 'DI YANG, BKRA SHIS LHUN PO'I RGYUD PA GRVA TSANG DPON SLOB RNAMS KYIS, DBANG DANG DRAG PO'I SBYIN SREG JI LTAR BYA BA'I TSUL SBYIN SREG RNAM BSHAD CHEN MO LAS BYUNG BA'I LAG LEN DU DRIL BA ZHIG GYIS ZHES NAN GYIS BSKUL BA LA BRTEN NAS, GSHIN RJE'I GSHED KYI RNAL 'BYOR PA, SH'AKYA'I DGE SLONG BLO BZANG CHOS KYI RGYAL MTSAN GYIS, CHOS GRVA CHEN PO BKRA SHIS LHUN PO'I GZIMS CHUNG YID DGA' CHOS 'DZIN DU BRIS PA'I YI GE PA NI, SH'AKYA'I DGE TSUL RNAM DPYOD DANG LDAN PA BLO BZANG DBANG GI RGYAL PO'O,, ,,BKRA SHIS,, ,,