*, ,BLA MA MCHOD PA'I CHO GA BZHUGS SO,
, ,RGYA GAR SKAD DU, GU RU P'U DZA SYA KALPA N'A MA, BOD SKAD DU, BLA MA MCHOD PA'I CHO GA ZHES BYA BA, BKA' DRIN MNYAM MED BLA MA DAM PA RNAMS KYI ZHABS LA PHYAG 'TSAL ZHING SKYABS SU MCHI'O, ,BRTZE BA CHEN POS DUS DANG GNAS SKABS THAMS CAD DU RJES SU GZUNG DU GSOL, ,GANG LA BRTEN NA SKU GSUM BDE BA CHE, ,THUN MONG DNGOS GRUB DANG BCAS SKAD CIG LA, ,STZOL MDZAD 'DOD DGU'I MCHOG STZOL YID BZHIN NOR, ,RDO RJE CAN ZHABS PADMOR GUS BTUD NAS, ,SKAL BZANG SLOB MA'I PHAN BDE MA LUS PA, ,SGRUB PA'I THABS MCHOG GNYIS PA DANG BRAL BA, ,MDO RGYUD DAM PA'I MAN NGAG PAD TSAL LAS, ,'ONGS PA'I ME TOG PHRENG MDZES MGUL RGYAN SPEL, ,DE YANG THAR 'DOD RNAMS KYI PHUN SUM TSOGS PA THAMS CAD KYI
, ,GZHI RTEN, LEGS TSOGS MA LUS PA'I 'BYUNG GNAS, MCHOG DANG THUN MONG GI DNGOS GRUB MTHA' YAS PA KUN GYI RTZA BA, THEG PA MCHOG GI RNAL 'BYOR PA RNAMS KYIS NYAMS SU BLANG BAR BYA BA'I MAN NGAG MTHA' DAG GI GNAD BSDUS PA NI, RANG LA LAM PHYIN CI MA LOG PAR STON PA'I DGE BA'I BSHES GNYEN TSUL BZHIN DU BSTEN PA LA RAG LAS PA YIN TE, BE'U BUM SNGON PO LAS, MAN NGAG THAMS CAD BSDUS PA'I MGO NI, ,BSHES GNYEN DAM PA MI BTANG BA YIN, ,DE LAS DAD DANG BYANG CHUB SEMS SOGS, ,YON TAN KUN 'BYUNG KUN GYI GTER YIN, CES GSUNGS SHING, RJE THAMS CAD MKHYEN PAS KYANG, DE NAS 'DI PHYI'I LEGS TSOGS JI SNYED PA'I, ,RTEN 'BREL LEGS PAR 'GRIG PA'I RTZA BA NI, ,LAM STON BSHES GNYEN DAM PA 'BAD PA YIS, ,BSAM DANG SBYOR BAS TSUL BZHIN BSTEN PA RU, ,MTHONG NAS SROG GI PHYIR YANG MI GTONG BAR, ,BKA' BZHIN BSGRUB PA'I MCHOD PAS MNYES PAR BYED, ,RNAL 'BYOR NGAS KYANG NYAMS LEN DE LTAR BYAS, ,THAR 'DOD KHYED KYANG DE
BZHIN BSKYANG 'TSAL LO, ZHES DANG, 'JIG RTEN 'JIG RTEN 'DAS PA'I DGE LEGS KYI, ,YON TAN KUN GYI RTZA BA DRIN CAN RJE, ZHES GSUNGS SHING, BLA MA LNGA BCU PA LAS KYANG, DNGOS GRUB SLOB DPON RJES 'BRANG ZHES, ,RDO RJE 'DZIN PA NYID GSUNG BAR, ,SHES NAS DNGOS PO THAMS CAD KYIS, ,BLA MA YONGS SU MNYES PAR BYA, ZHES DANG, YON TAN RIN PO CHE SDUD PA LAS KYANG, SLOB MA BZANG PO BLA MAR GUS LDAN DE DAG GI, , BLA MA MKHAS PA RNAMS LA RTAG TU BRTEN PAR BYA, ,CI PHYIR ZHE NA MKHAS PA'I YON TAN DE LAS 'BYUNG, ,DE DAG SHES RAB PHA ROL PHYIN PA RJES SU STON, ,SANGS RGYAS CHOS RNAMS DGE BA'I BSHES LA BRTEN TO ZHES, ,YON TAN KUN GYI MCHOG MNGA' RGYAL BA DE SKAD GSUNG, ZHES GSUNGS PA'I PHYIR, DE BAS NA SLOB MA'I TSOGS GSOG PA DANG SGRIB PA SBYONG BA'I ZHING DU SANGS RGYAS THAMS CAD LAS KYANG RDO RJE SLOB DPON LHAG TE, SDOM 'BYUNG LAS, 'DI NI RANG BYUNG BCOM LDAN 'DAS, ,LHAG PA'I LHA NI GCIG PU NYID, ,MAN NGAG RAB TU STER BA'I PHYIR, ,RDO RJE SLOB DPON DE BAS LHAG ,CES GSUNGS SO, ,RGYU MTSAN DE LTAR NA, LAM GYI GNAD TSANG PA'I BLA MA'I RNAL 'BYOR SGOM PA NI DAL 'BYOR LA SNYING PO LEN PA'I THABS MCHOG TU GYUR PA YIN PAS 'DI LTAR NYAMS SU BLANG BAR BYA'O, ,DE YANG DGE SEMS KHYAD PAR CAN GYI NGANG NAS, SKYABS 'GRO
, ,SEMS BSKYED TSAD MED BZHI BSGOM PA SNGON DU BTANG, BDAG NYID GSANG BDE 'JIGS GSUM SOGS LHAG PA'I LHA GANG RUNG GI RNAL 'BYOR DANG LDAN PA'I SKU LAS 'OD ZER 'PHROS, SNOD BCUD THAMS CAD KYI MA DAG PA SBYANGS, SNOD THAMS CAD GZHAL YAS KHANG DANG, BCUD THAMS CAD LHA DANG LHA MO'I RANG BZHIN GYI DAG PA RAB 'BYAMS 'BA' ZHIG TU BSAM, NANG MCHOD DANG MCHOD RDZAS RNAMS BLA MED KYI CHO GA GANG YANG RUNG BA LTAR BYIN RLABS BYA BA'AM, MDOR BSDU NA AOm A'A: H'Um LAN GSUM BRJOD PAS NGO BO YE SHES LA RNAM PA NANG MCHOD DANG MCHOD RDZAS SO SO'I RNAM PA BYED LAS DBANG PO DRUG GI SPYOD YUL DU BDE STONG GI YE SHES KHYAD PAR CAN BSKYED PAS SA DANG BAR SNANG NAM MKHA'I KHYON THAMS CAD YONGS SU KHYAB PA'I PHYI NANG GSANG BA'I MCHOD SPRIN DAM RDZAS SPYAN GZIGS BSAM GYIS MI KHYAB PAS GANG BAR BSAMS LA, DNGOS GZHI NI TSIGS SU BCAD PA'I SGO NAS BRJOD NA 'JUG PA BDE BAS YID MA YENGS PAR 'DI LTAR 'DON ZHING, DON BSGOMS LA NYAMS SU BLANG BAR BYA'O, ,BDE STONG DBYER MED LHA LAM YANGS PAR KUN BZANG MCHOD SPRIN 'KHRIGS PA'I DBUS, ,LO MA ME TOG 'BRAS BUS YONGS MDZES 'DOD DGU'I DPAG BSAM LJON PA'I RTZER, ,GDONG LNGA 'BAR BA'I RIN CHEN KHRI STENG CHU SKYES NYI ZLA RGYAS PA'I STENG, ,BKA' DRIN GSUM LDAN RTZA BA'I
BLA MA SANGS RGYAS KUN GYI NGO BO NYID, ,RNAM PA NGUR SMRIG 'DZIN PA'I DGE SLONG ZHAL GCIG PHYAG GNYIS 'DZUM DKAR 'PHRO, ,PHYAG GA-YAS CHOS 'CHAD GA-YON PA MNYAM GZHAG BDUD RTZIS GANG BA'I LHUNG BZED BSNAMS, ,GUR KUM MDANGS LDAN CHOS GOS GSUM GSOL GSER MDOG PAn ZHVAS DBU LA MDZES, ,YANG NA SANGS RGYAS KUN GYI NGO BO NYID, CES PA'I MTSAMS NAS, RNAM PA KHYAB BDAG RDO RJE 'CHANG DBANG ZHAL GCIG PHYAG GNYIS SKU MDOG SNGO, ,RDOR DRIL BZUNG NAS DBYINGS PHYUG MAR 'KHYUD LHAN SKYES BDE STONG ROL PAS DGYES, ,RNAM MANG RIN CHEN RGYAN GYIS SPRAS SHING LHA RDZAS DAR GYI NA BZAS BKLUBS, ZHES PA BLO DANG BSTUN NAS SBYOR, DE GNYIS CI BYAS KYANG TSIG GI 'PHRO NAS 'DI LTAR, ,MTSAN DPE'I RGYAN LDAN 'OD ZER STONG 'BAR 'JA' TSON SNA LNGAS BSKOR BA'I DBUS, ,RDO RJE SKYIL KRUNG TSUL GYIS BZHUGS PA'I PHUNG PO RNAM DAG BDE GSHEGS LNGA, ,KHAMS BZHI YUM BZHI SKYE MCHED RTZA RGYUS TSIGS RNAMS BYANG CHUB SEMS DPA' DNGOS, ,BA SPU DGRA BCOM NYI KHRI CHIG STONG YAN LAG KHRO BO'I DBANG PO NYID, ,'OD ZER PHYOGS SKYONG GNOD SBYIN GSANG BA 'JIG RTEN PA RNAMS ZHABS KYI GDAN, ,MTHA' SKOR RIM BZHIN DNGOS RGYUD BLA MA YI DAM DKYIL 'KHOR LHA TSOGS DANG, ,SANGS RGYAS BYANG SEMS DPA' BO MKHA' 'GRO BSTAN SRUNG RGYA MTSOS BSKOR NAS BZHUGS, ,DE DAG SGO GSUM RDO RJE GSUM MTSAN H'Um YIG 'OD ZER LCAGS KYU YIS, ,RANG BZHIN GNAS NAS YE SHES PA RNAMS SPYAN DRANGS
, ,DBYER MED BRTAN PAR GYUR, ,PHUN TSOGS BDE LEGS 'BYUNG GNAS DUS GSUM GYI, ,RTZA RGYUD BLA MA YI DAM DKON MCHOG GSUM, ,DPA' BO MKHA' 'GRO CHOS SKYONG SRUNG TSOGS BCAS, ,THUGS RJE'I DBANG GIS 'DIR GSHEGS BRTAN PAR BZHUGS, DE LTA BU'I TSUL GYIS BLA MA DANG RDO RJE 'CHANG DBYER MED DU LTA BA NI, RGYUD MANG PO'I DGONGS PA LTAR BLA MA LNGA BCU PAR, SLOB DPON DANG NI RDO RJE 'DZIN, ,THA DAD PAR NI MI BRTAG GO ,CES GSUNGS PA LTAR YIN LA, DE'I PHUNG SOGS LNGA RIGS LNGA SOGS SU BSGOM PA NI RGYUD RDO RJE PHRENG BA LAS, RDO RJE SLOB DPON LUS 'DI LA, ,RGYAL BA'I SKU NI RIM BZHIN GNAS, ZHES SOGS GSUNGS PA'I DON YIN PA LTAR, TSOGS ZHING GSAL BTAB, YE SHES PA DGUG GZHUG ,SKYABS GSUM KUN 'DUS PA'I BDAG NYID DU MOS PA DUNG DUNG PA BYA, DE NAS MGON PO KLU SGRUB KYIS RIM LNGAR, MCHOD PA THAMS CAD YONGS SPANGS NAS, ,BLA MA MCHOD PA YANG DAG BRTZAM, ,DE MNYES PAS NI KUN MKHYEN GYI, ,YE SHES MCHOG NI THOB PAR 'GYUR, ZHES SANGS RGYAS BYANG SEMS GZHAN THAMS CAD MCHOD PA LAS, BLA MA MCHOD PA DON CHE BAR GSUNGS PA LA NGES SHES DRANGS NAS, YAN LAG BDUN PA 'BUL BA LA THOG MAR PHYAG 'TSAL BA NI, GANG GI THUGS RJES BDE BA CHEN PO'I DBYINGS, ,SKU GSUM GO 'PHANG MCHOG KYANG SKAD CIG LA, ,STZOL MDZAD BLA MA RIN CHEN LTA BU'I SKU, ,RDO RJE CAN ZHABS
PADMOR PHYAG 'TSAL LO, ,RAB 'BYAMS RGYAL BA KUN GYI YE SHES NI, ,GANG 'DUL CIR YANG 'CHAR BA'I THABS MKHAS MCHOG ,NGUR SMRIG 'DZIN PA'I GAR GYIS RNAM ROL BA, ,SKYABS MGON DAM PA'I ZHABS LA PHYAG 'TSAL LO, ,NYES KUN BAG CHAGS BCAS PA DRUNGS PHYUNG ZHING, ,DPAG MED YON TAN RIN CHEN TSOGS KYI GTER, ,PHAN BDE MA LUS 'BYUNG BA'I SGO GCIG PU, ,RJE BTZUN BLA MA'I ZHABS LA PHYAG 'TSAL LO, ,LHAR BCAS STON PA SANGS RGYAS KUN GYI DNGOS, ,BRGYANG KHRI BZHI STONG DAM CHOS 'BYUNG BA'I GNAS, ,'PHAGS TSOGS KUN GYI DBUS NA LHANG NGE BA, ,DRIN CAN BLA MA RNAMS LA PHYAG 'TSAL LO, ,DUS GSUM PHYOGS BCUR BZHUGS PA'I BLA MA DANG, ,RIN CHEN MCHOG GSUM PHYAG 'OS THAMS CAD LA, ,DAD CING MOS PAS BSTOD DBYANGS RGYA MTSOR BCAS, ,ZHING RDUL MNYAM PA'I LUS SPRUL PHYAG 'TSAL LO, ZHES SGO GSUM GUS PAS PHYAG BYAS NAS, MCHOD PA 'BUL BA NI, MCHOD PA'I 'KHOR GSUM PO RNAM PAR MI RTOG PA BDE STONG DBYER MED KYI BDAG NYID DU RGYAS BTAB NAS 'BUL BA NI, SKYABS MGON RJE BTZUN BLA MA 'KHOR BCAS LA, ,SNA TSOGS MCHOD SPRIN RGYA MTSO 'BUL BA NI, ,BKOD LEGS RIN CHEN 'OD 'BAR SNOD YANGS LAS, , DAG BYED BDUD RTZI'I CHU BZHI DAL GYIS 'BAB, ,SDONG PO SIL MA PHRENG BA SPEL LEGS PA, ,MDZES PA'I ME TOGS DANG BAR SNANG GANG, ,DRI ZHIM SPOS KYI DUD PA BEEd'URYA'I, ,DBYAR SKYES SNGON PO'I SPRIN GYIS LHA LAM 'KHRIGS, ,NYI ZLA NOR
, ,BU RAB 'BAR SGRON ME'I TSOGS, ,STONG GSUM MUN SEL 'OD ZER RTZE DGA' RGOD, ,GA BUR TZAN DAN GUR KUM DRIS BSGOS PA'I, ,SPOS CHU'I MTSO CHEN 'KHOR YUG KUN NAS 'KHYIL, ,RO BRGYA'I BCUD LDAN BZA' BCA' BTUNG BA DANG, ,LHA DANG MI YI ZHAL ZAS LHUN POR SPUNGS, ,SNA TSOGS ROL MO'I BYE BRAG MTHA' YAS LAS, ,BYUNG BA'I GDANGS SNYAN 'GYUR BAS SA GSUM 'GENGS, ,GZUGS SGRA DRI RO REG BYA'I DPAL 'DZIN PA'I PHYI NANG 'DOD YON LHA MOS PHYOGS KUN KHYAB, ,BYE BA PHRAG BRGYA'I GLING BZHI LHUN POR BCAS, ,RIN CHEN BDUN DANG NYE BA'I RIN CHEN SOGS, ,KUN DGA' SKYED PA'I SNOD BCUD PHUN SUM TSOGS, ,LHA MI'I LONGS SPYOD 'DOD DGU'I GTER CHEN PO, ,DANG BA'I SEMS KYIS PHUL BYUNG ZHING GI MCHOG ,SKYABS MGON THUGS RJE'I GTER LA DBUL BAR BGYI, ,DNGOS BSHAMS YID SPRUL YID BZHIN RGYA MTSO'I NGOGS, ,SRID ZHI'I RNAM DKAR LAS 'ONGS MCHOD RDZAS KYI, ,'DAB STONG RGYAS PAS KUN GYI YID 'PHROG CING, ,'JIG RTEN 'JIGS RTEN LAS 'DAS RANG GZHAN GYI, ,SGO GSUM DGE BA'I ME TOG CI YANG BKRA, ,KUN BZANG MCHOD PA'I DRI BSUNG 'BUM 'PHRO ZHING, ,BSLAB GSUM RIM GNYIS LAM LNGA'I 'BRAS LDAN PA'I, ,DGA' TSAL RJE BTZUN BLA MA MNYES PHYIR 'BUL, ,GUR KUM MDANGS LDAN BZANG PO'I DRI NGAD CAN, ,RO BRGYA'I DPAL 'DZIN RGYA JA'I BTUNG BA DANG, ,LCAGS KYU LNGA DANG SGRON MA LNGA LA SOGS, ,
SBYANGS RTOGS SBAR BA'I BDUD RTZI'I RGYA MTSOS MCHOD, ,YID 'ONG LANG TSO'I DPAL 'DZIN DRUG CU BZHI'I, ,'DOD PA'I SGYU RTZAL LA MKHAS LUS PHRA MA, ,ZHING SKYES SNGAGS SKYES LHAN SKYES PHO NYA'I TSOGS, ,MDZES SDUG SGYU MA'I PHYAG RGYA RNAMS KYANG 'BUL, ,SGRIB BRAL LHAN SKYES BDE BA'I YE SHES CHE, ,CHOS KUN RANG BZHIN SPROS DANG BRAL BA'I DBYINGS, ,DBYER MED LHUN GRUB SMRA BSAM BRJOD LAS 'DAS, ,DON DAM BYANG CHUB SEMS MCHOG KHYOD LA 'BUL, ,NYON MONGS BZHI BRGYA RTZA BZHI'I NAD 'JOMS PA'I, ,BZANG PO'I SMAN GYI BYE BRAG SNA TSOGS DANG, ,KHYOD MNYES BGYID PHYIR BDAG BRAN 'BUL LAGS NA, ,NAM MKHA' JI SRID 'BANGS SU BZUNG DU GSOL, ZHES PHYI NANG GSANG BA DE KHO NA NYID KYI MCHOD PA DANG, SMAN DANG, BDAG NYID BRAN DU 'BUL BA RNAMS DMIGS PA DANG BCAS PA'I SGO NAS BYAS TE, BSHAGS PA LA SOGS PA'I YAN LAG LHAG MA SNGAR GYI 'PHRO NAS 'DI LTAR, THOG MED DUS NAS MI DGE SDIG PA'I LAS,, BGYIS DANG BGYID STZAL YI RANG CI MCHIS PA, ,THUGS RJE CHE LDAN SNGAR 'GYOD SEMS KYIS, ,BSHAGS SHING SLAN CHAD MI BGYID SDOM PA NOD, ,CHOS RNAMS RANG BZHIN MTSAN MA DANG BRAL YANG, ,RMI LAM JI BZHIN SKYE 'PHAGS THAMS CAD KYI, ,BDE DGA' CIR YANG 'CHAR BA'I RNAM DKAR LA, ,BDAG CAG BSAM PA DAG PAS YI RANG NGO, ,PHUL BYUNG MKHYEN BRTZE'I CHU 'DZIN 'BUM DKRIGS TE, ,MTHA' YAS 'GRO 'DI'I PHAN BDE KUN DA'I TSAL, ,
, ,BSKYED DANG YUN DU GNAS DANG SPEL BA'I PHYIR, ,ZAB RGYAS CHOS KYI CHAR PA DBAB TU GSOL, ,RDO RJE'I SKU LA SKYE 'CHI MI MNGA' YANG, ,ZUNG 'JUG DBANG GI RGYAL PO'I ZA MA TOG ,BDAG CAG MOS PA JI BZHIN SRID MTHA'I BAR, ,MYA NGAN MI 'DA' RTAG PAR BZHUGS SU GSOL, ,DE LTAR BSKRUN PA'I RNAM DKAR DGE BA'I TSOGS, ,BKA' DRIN GSUM LDAN RJE BTZUN BLA MA YIS, ,TSE RABS KUN TU 'BRAL MED RJES 'DZIN CING, ,ZUNG 'JUG RDO RJE 'CHANG DBANG THOB PHYIR BSNGO, ZHES YAN LAG BDUN PA 'BUL ZHING, LONG BYUNG TSE BSHAGS PA'I MTSAMS SU SDOM PA GSUM SO SO'I BSHAGS PA DANG, BLA MA RDOR 'DZIN MA DANG, BYANG CHUB LTUNG BSHAGS SOGS BYA'O, ,DE NAS LAG NA RDO RJE DBANG BSKUR BA'I RGYUD LAS, SLOB DPON GYI NI YON TAN BZUNG, ,SKYON NI NAM YANG GZUNG MI BYA, ,YON TAN BZUNG NA DNGOS GRUB 'THOB, ,SKYON RNAMS BZUNG NA DNGOS MI 'GRUB, CES GSUNGS PA LTAR, BLA MA'I SKYON RTOG GI BLO YI MA SHOR BA BYA'O SNYAM DU DRAN SHES YANG YANG BSTEN NAS, BLA MA BSTEN PA'I PHAN YON, MA BSTEN PA'I NYES DMIGS RNAMS MDO RGYUD DAM PA'I GSUNG BGROS BZHIN LEGS PAR BSAM, KHYAD PAR DU, RTZA BA'I BLA MA DE NYID MTSAN THOS PA TZAM GYIS NGAN 'GRO'I 'JIGS PA 'PHROG CING, DRAN PA TZAM GYIS 'KHOR BA'I SDUG BSNGAL SEL BA, GSOL BA BTAB NA DNGOS GRUB THAMS CAD BDE BLAG TU STZOL BAR MDZAD PA'I SKYABS GNAS
BSLU BA MED PA DKON MCHOG GSUM PO 'DUS PA'I BDAG NYID DU BSAMS LA, RE SA GZHAN NA MED PA'I BLO BLTOS BCAS TE GDUNG SHUGS DRAG POS, DMIGS BRTZE MA SOGS KYIS GSOL BA GANG MANG BTAB PA'I MTHAR YANG 'DI LTAR GSOL BA GDAB PAR BYA'O, ,YON TAN 'BYUNG GNAS TSUL KHRIMS RGYA MTSO CHE, ,MANG THOS NOR BU'I TSOGS KYIS YONGS SU BLTAMS, ,NGUR SMIG 'DZIN PA THUB DBANG GNYIS PA'I RJE, ,GNAS BRTAN 'DUL BA 'DZIN LA GSOL BA 'DEBS, ,GANG DANG LDAN NA BDE BAR GSHEGS PA'I LAM, ,STON PAR 'OS PA'I YON TAN BCU LDAN PA, ,MA LUS RGYAL BA'I GDUNG TSOB CHOS KYI RJE, ,THEG MCHOG DGE BA'I BSHES LA GSOL BA 'DEBS, ,SGO GSUM LEGS BSDAMS BLO CHEN BZOD LDAN DRANG, ,GA-YO DANG SGYU MED SNGAGS DANG RGYUD SHES SHING, ,DE NYID BCU ZAD BRI DANG 'CHAD MKHAS PA'I, ,RDO RJE 'DZIN PA'I GTZO LA GSOL BA 'DEBS, ZHES 'DUL BA DANG THEG CHEN THUN MONG BA DANG, RDO RJE THEG PA'I BLA MA'I MTSAN NYID DANG LDAN PA'I SGO NAS GSOL BA GDAG DE NAS, SANGS RGYAS GRANGS MED BYON PAS MA THUL BA'I, ,MA RUNGS 'DUL DKA'I SNYIGS DUS 'GRO BA LA, ,BDE GSHEGS LAM BZANG JI BZHIN STON PA YI, ,SKYABS MGON THUGS RJE CAN LA GSOL BA 'DEBS, ,THUB PA'I NYI MA DUS KYIS NUB GYUR TE, ,MGON SKYABS MED PA'I 'GRO BA MANG PO LA, ,RGYAL BA'I MDZAD PA NYE BAR SGRUB MDZAD PA'I, ,SKYABS MGON THUGS RJE CAN LA GSOL BA 'DEBS, ,DUS
, ,GSUM PHYOGS BCU'I RGYAL BA THAMS CAD LAS, ,GANG GI BA SPU'I BU GA GCIG TZAM YANG, ,BDAG CAG BSOD NAMS ZHING DU LEGS BSNGAGS PA'I, ,SKYABS MGON THUGS RJE CAN LA GSOL BA 'DEBS, , BDE GSHEGS SKU GSUM RGYAN GYI 'KHOR LO NI, ,THABS MKHAS SGYU 'PHRUL DRA BA'I 'JO SGEG LAS, ,THA MAL TSUL GYIS 'GRO BA 'DREN MDZAD PA'I, ,SKYABS MGON THUGS RJE CAN LA GSOL BA 'DEBS, ,KHYOD KYI PHUNG KHAMS SKYE MCHED YAN LAG RNAMS, ,BDE GSHEGS RIG LNGA YAB YUM SEMS DPA' DANG, ,KHRO BO'I DBANG PO'I RANG BZHIN MCHOG GSUM GYI, ,BDAG NYID BLA MA MCHOG LA GSOL BA 'DEBS, ,KUN MKHYEN YE SHES ROL PA LAS BYUNG BA'I, ,DKYIL 'KHOR 'KHOR LO BYE BA'I BDAG NYID DE, ,RIGS BRGYA'I KHYAB BDAG RDO RJE 'DZIN PA'I GTZO, ,ZUNG 'JUG DANG PO'I MGON LA GSOL BA 'DEBS, ,SGRIB MED LHAN SKYES DGA' BA'I ROL PA DANG, ,DBYER MED BRTAN GA-YO KUN KHYAB KUN GYI BDAG ,THOG MA MTHA' BRAL KUN BZANG DON DAM GYI, ,BYANG CHUB SEMS DNGOS KHYOD LA GSOL BA 'DEBS, ,CES PHYI NANG GSANG BA DE KHO NA NYID KYI YON TAN BRJOD PA'I SGO NAS RTZE GCIG TU GSOL BA 'DEBS SHING KHYAD PAR DU, KHYOD NI BLA MA KHYOD NI YI DAM KHYOD NI MKHA' 'GRO CHOS SKYONG STE, ,DENG NAS BZUNG STE BYANG CHUB BAR DU KHYOD MIN SKYABS GZHAN MI 'TSOL BAS, ,'DI DANG BAR DO PHYI MA'I MTHAR YANG THUGS RJE'I LCAGS KYUS GZUNG MDZOD LA, ,SRID ZHI'I 'JIGS
SGROL DNGOS GRUB KUN STZOL GTAN GYI GROGS MDZOD BAR GCOD SRUNGS, ,DE LTAR LAN GSUM GSOL BA BTAB PA'I MTHUS, ,BLA MA'I SKU GSUNG THUGS KYI GNAS RNAMS LAS, ,BDUD RTZI 'OD ZER DKAR DMAR MTHING KHA GSUM, ,RIM DANG CIG CAR BYUNG NAS BDAG NYID KYI, ,GNAS GSUM RIM DANG CIG CAR THIM PA LAS, ,SGRIB BZHI DAG CING RNAM DAG DBANG BZHI THOB, ,SKU BZHI THOB CING BLA MA GNYIS PA ZHIG ,DGYES BZHIN THIMS PAS BYIN GYIS BRLABS PAR BSAM, DE NAS SLAR YANG BYIN GYIS BRLAB PA'I PHYIR DANG THUGS RJE BSKUL BA'I PHYIR DANG 'DOD BYA'I DON LA SMON CING, THEG PA CHEN PO'I LAM LA BLO SBYONG BA LHAN CIG TU BYA BA'I TSUL NI 'DI LTAR, ZHING MCHOG DAM PA RJE BTZUN BLA MA LA, ,MCHOD CING GUS PAS GSOL BA BTAB PA'I MTHUS, ,BDE LEGS RTZA BA MGON PO KHYOD NYID KYIS, ,DGYES BZHIN RJES SU 'DZIN PAR BYIN GYIS RLOBS, ,LAN GCIG TZAM ZHIG RNYED PA'I DAL 'BYOR 'DI, ,RNYED DKA' MYUR DU 'JIG PA'I TSUL RTOGS NAS, ,DON MED TSE 'DI'I BYA BAS MI GA-YENG BAR, ,DON LDAN SNYING PO LEN PAR BYIN GYIS RLOBS, ,NGAN SONG SDUG BSNGAL 'BAR BA'I MES 'JIGS NAS, ,SNYING NAS DKON MCHOG GSUM LA SKYABS 'GRO ZHING, ,SDIG SPONG DGE TSOGS MTHA' DAG BSGRUB PA LA, ,BRTZON PA LHUR LEN BYED PAR BYIN GYIS RLOBS, ,LAS DANG NYON MONGS RBA KLONG DRAG TU 'KHRUG ,SDUG BSNGAL GSUM GYI CHU SRIN MANG POS GTZES, ,MTHA' MED 'JIGS RUNG SRID MTSO CHEN PO LAS, ,THAR 'DOD SHUGS
, ,DRAG SKYE BAR BYIN GYIS RLOBS, ,BZOD DKA' BTZON RA 'DRA BA'I 'KHOR BA 'DI, ,DGA' BA'I TSAL LTAR MTHONG BA'I BLO SPANGS NAS, ,BSLAB GSUM 'PHAGS PA'I NOR GYI MDZOD BZUNG STE, ,THAR PA'I RGYAL MTSAN 'DZIN PAR BYIN GYIS RLOBS, ,NYAM THAG 'GRO BA 'DI KUN BDAG GI MA, ,YANG YANG DRIN GYIS BSKYANGS PA'I TSUL BSAMS NAS, ,SDUG PA'I BU LA BRTZE BA'I MA BZHIN DU, ,BCOS MIN SNYING RJE SKYE BAR BYIN GYIS RLOBS, ,SDUG BSNGAL PHRA MO TZAM YANG MI 'DOD CING, ,BDE LA NAM YANG CHOG SHES MED PAR NI, ,BDAG DANG GZHAN LA KHYAD PAR YOD MIN ZHES, ,GZHAN BDE DGA' BA BSKYED PAR BYIN GYIS RLOBS, ,RANG NYID GCES PAR 'DZIN PA'I GCONG NAD 'DI,, MI 'DOD SDUG BSNGAL SKYED PA'I RGYUR MTHONG NAS, ,LE LAN BDAS LA KHON DU BZUNG BYAS TE, ,BDAG 'DZIN GDON CHEN 'JOMS PAR BYIN GYIS RLOBS, ,MA RNAMS GCES BZUNG BDE LA 'GOD PA'I BLO, ,MTHA' YAS YON TAN 'BYUNG BA'I SGOR MTHONG NAS, ,'GRO BA 'DI DAG BDAG GI DGRAR LANGS KYANG, ,SROG LAS GCES PAR 'DZIN PAR BYIN GYIS RLOBS, ,MDOR NA BYIS PA RANG DON KHO NA DANG, ,THUB DBANG GZHAN DON 'BA' ZHIG MDZAD PA YI, , SKYON DANG YON TAN DBYE BA RTOGS PA'I BLOS, ,BDAG GZHAN MNYAM BRJE NUS PAR BYIN GYIS RLOBS, ,RANG NYID GCES 'DZIN RGUD PA KUN GYI SGO, ,MA RNAMS GCES 'DZIN YON TAN KUN GYI GZHI, ,DE PHYIR BDAG GZHAN BRJE BA'I
RNAL 'BYOR LA, ,NYAMS LEN SNYING POR BYED PAR BYIN GYIS RLOBS, ,DES NA RJE BTZUN BLA MA THUGS RJE CAN, ,MA GYUR 'GRO BA'I SDIG SGRIB SDUG BSNGAL KUN, ,MA LUS DA LTA BDAG LA SMIN PA DANG, ,BDAG GI BDE DGE GZHAN LA BTANG BA YIS, ,'GRO KUN BDE DANG LDAN PAR BYIN GYIS RLOBS, ,SNOD BCUD SDIG PA'I 'BRAS BUS YONGS GANG STE, ,MI 'DOD SDUG BSNGAL CHAR LTAR BABS GYUR KYANG, ,LAS NGAN 'BRAS BU ZAD PA'I RGYUR MTHONG NAS, ,RKYEN NGAN LAM DU LONGS PAR BYIN GYIS RLOBS, ,MDOR NA BZANG NGAN SNANG BA CI SHAR YANG, ,CHOS KUN SNYING PO STOBS LNGA'I NYAMS LEN GYIS, ,BYANG CHUB SEMS GNYIS 'PHEL BA'I LAM BSGYUR TE, ,YID BDE 'BA' ZHIG BSGOM PAR BYIN GYIS RLOBS,, SBYOR BA BZHI DANG LDAN PA'I THABS MKHAS KYIS, ,'PHRAL LA GANG THUG SGOM LA SBYOR BA DANG, ,BLO SBYONG DAM TSIG BSLAB BYA'I NYAMS LEN GYIS, ,DAL 'BYOR DON CHEN BYED PAR BYIN GYIS RLOBS, ,GTONG LEN RLUNG LA BSKYON PA'I 'PHRUL 'DEGS CAN, ,BYAMS DANG SNYING RJE LHAG PA'I BSAM PA YIS, ,'GRO RNAMS SRID MTSO CHE LAS SGROL BA'I PHYIR, ,BYANG CHUB SEMS BCAS, ,SEMS CAN RANG BGROD GCIG LAM, ,RNAM DAG RGYAL SRAS SDOM PAS RGYUD BSDAMS SHING, ,THEG MCHOG TSUL KHRIMS GSUM GYI NYAMS LEN LA, ,BRTZON PA LHUR LEN BYED PAR BYIN GYIS RLOBS, ,LUS DANG LONGS SPYOD DUS GSUM DGE TSOGS BCAS, ,SEMS CAN RANG
, ,RANG 'DOD PA'I DNGOS BSGYUR TE, ,CHAGS MED GTONG SEMS SPEL BA'I MAN NGAG GIS, ,SBYIN PA'I PHAR PHYIN RDZOGS PAR BYIN GYIS RLOBS, ,SO THAR BYANG SEMS GSANG SNGAGS SDOM PA YI, ,BCAS MTSAMS SROG GI PHYIR YANG MI GTANG ZHING, ,DGE CHOS SDUD DANG SEMS CAN DON SGRUB PA'I, ,TSUL KHRIMS PHAR PHYIN RDZOGS PAR BYIN GYIS RLOBS, ,KHAMS GSUM SKYE DGU MA LUS KHROS GYUR TE, ,GSHE ZHING MTSANG 'BRU BSDIGS SHING SROG GCOD KYANG, ,MI 'KHRUGS GNOD LAN PHAN PA SGRUB BYED PA'I, ,BZOD PA'I PHAR PHYIN RDZOGS PAR BYIN GYIS RLOBS, ,SEMS CAN RE RE'I PHYIR YANG MNAR MED PA'I, ,ME NANG BSKAL PA RGYA MTSOR GNAS DGOS KYANG, ,SNYING RJES MI SKYO BYANG CHUB MCHOG BRTZON PA'I, ,BRTZON 'GRUS PHAR PHYIN RDZOGS PAR BYIN GYIS RLOBS, ,BYING RGOD RNAM PAR GA-YENG BA'I SKYON SPANGS NAS, ,CHOS KUN BDEN PAS STONG PA'I GNAS LUGS LA, ,RTZE GCIG MNYAM PAR 'JOG PA'I TING 'DZIN GYIS,, BSAM GTAN PHAR PHYIN RDZOGS PAR BYIN GYIS RLOBS, ,DE NYID SO SOR RTOG PA'I SHES RAB KYIS, ,DRANGS PA'I SHIN SBYANGS BDE CHEN DANG 'BREL BA, ,DON DAM MNYAM GZHAG NAM MKHA'I RNAL 'BYOR GYIS, ,SHES RAB PHAR PHYIN RDZOGS PAR BYIN GYIS RLOBS, ,PHYI NANG CHOS RNAMS SGYU MA RMI LAM DANG, ,DVANGS PA'I MTSO NANG ZLA GZUGS JI BZHIN DU, ,SNANG YANG BDEN PAR MED PA'I TSUL RTOGS NAS, ,SGYU MA'I TING 'DZIN RDZOGS PAR BYIN GYIS RLOBS, ,'KHOR 'DAS
RANG BZHIN RDUL TZAM MED PA DANG, ,RGYU 'BRAS RTEN 'BREL BSLU BA MED PA GNYIS, ,PHAN TSUN 'GAL MED GROGS SU 'CHAR BA YI, ,KLU SGRUB DGONGS DON RTOGS PAR BYIN GYIS RLOBS, ,DE NAS RDO RJE 'DZIN PA'I DED DPON GYI, ,DRIN LAS RGYUD SDE RGYA MTSO'I MJINGS BRGAL TE, ,DNGOS GRUB RTZA BA DAM TSIG SDOM PA RNAMS, ,SROG LAS GCES PAR 'DZIN PAR BYIN GYIS RLOBS, ,SKYE SHI BAR DO RGYAL BA'I SKU GSUM DU, ,SGYUR BA'I RIM PA DANG PO'I RNAL 'BYOR GYIS, ,THA MAL SNANG ZHEN DRI MA KUN SBYANGS TE, ,GANG SNANG LHA SKUR 'CHAR BAR BYIN GYIS RLOBS, ,SNYING KHA'I 'DAB BRGYAD DH'U T'I'I DBUS DAG TU, ,MGON KHYOD ZHABS SEN BKOD PA LAS BYUNG BA, ,'OD GSAL SGYU LUS ZUNG DU 'JUG PA'I LAM, ,TSE 'DIR MNGON DU 'GYUR BAR BYIN GYIS RLOBS, ,LAM SNA MA ZIN 'CHI BA'I DUS BYED NA, ,BTZAN THABS SANGS RGYAS BLA MA'I 'PHO BA NI, ,STOBS LNGA YANG DAG SBYAR BA'I GDAMS NGAG GIS, ,DAG PA'I ZHING DU BGROD PAR BYIN GYIS RLOBS, ,MDOR NA SKYE ZHING SKYE BA THAMS CAD DU, ,MGON PO KHYOD KYIS 'BRAL MED RJES BZUNG NAS, ,SKU GSUNG THUGS KYI GSANG BA KUN 'DZIN PA'I, ,SRAS KYI THU BOR 'GYUR BAR BYIN GYIS RLOBS, ,MGON KHYOD GANG DU MNGON PAR SANGS RGYAS PA'I, ,'KHOR GYI THOG MA NYID DU BDAG GYUR TE, ,GNAS SKABS MTHAR THUG DGOS 'DOD MA LUS PA, ,'BAD MED LHUN GYIS GRUB PA'I BKRA SHIS STZOL, ,DE LTAR GSOL BA BTAB PAS BLA MA MCHOG ,BYIN GYIS BRLAB PHYIR DGYES BZHIN SPYI BOR BYON, ,
, ,SLAR YANG SNYING KHA'I PADMA'I ZE'U 'BRU LA, ,ZHABS SEN 'OD CHAGS BRTAN PAR BZHUGS SU GSOL, ,DE LTA BU'I TSUL GYIS BLA MA DANG LHAG PA'I LHA DANG RANG GI SEMS GSUM NGO BO DBYER MED DU BYAS TE, SPYOD LAM THAMS CAD DU GANG SNANG BDE STONG GI RANG BZHIN LHA DANG LHA MO'I RNAM ROL TU BLTA BA SOGS BSKYED RDZOGS ZUNG 'BREL GYI RNAL 'BYOR DANG, LAM GYI RIM PA'AM THEG PA CHEN PO BLO SBYONG GI GNAD YONGS SU RDZOGS PA LA BLO SBYONG BA RNAMS YA MA BRAL BA'I NYAMS LEN LA BRTZON PAR BYA ZHING, MJUG TU DGE BA RNAMS BZANG PO SPYOD PA LA SOGS PA SMON LAM GYI RGYAS 'DEBS SHING, ,MDOR BSDU NA, 'DI LTAR BGYIS PA'I RNAM DKAR DGE BA YANG, ,DUS GSUM BDE GSHEGS SRAS BCAS THAMS CAD KYI, ,MDZAD PA SMON LAM MA LUS BSGRUB PA DANG, ,LUNG RTOGS DAM CHOS 'DZIN PA'I RGYU RU BSNGO, ,DE YI MTHU LAS TSE RABS KUN TU BDAG ,THEG MCHOG 'KHOR LO BZHI DANG MI 'BRAL ZHING, ,NGES 'BYUNG BYANG SEMS YANG DAG LTA BA DANG, ,RIM GNYIS LAM GYI BGROD PA MTHAR PHYIN SHOG ,CES BA SNGO BA DANG SMON LAM BYA ZHING, MAN NGAG GI GNAD 'GA' ZHIG ZHAL LAS KYANG SHES PAR BYA'O, ,DE LTAR ZHAG RE BZHIN RGYUN GYI RNAL 'BYOR DU BYAS NA MDO SNGAGS THAMS CAD KYI SNYING PO NYAMS SU BLANGS PAR 'GYUR ZHING, 'DI PHYI'I LEGS TSOGS THAMS CAD KYI RTZA BA BRTAN PAR 'GYUR BA YIN NO, ,SMRAS PA, MDO RGYUD DAM PA'I MAN NGAG 'O MA'I MTSO, ,RNAM DPYOD SA 'DZIN DBANG
POS BSRUBS PA LAS, ,SNGON MED LEGS BSHAD BDUD RTZI'I KE LA SHA, SKAL BZANG LEGS BRIS TSOGS KYI NYER 'TSOR GRUB, ,GANG 'DI GUS LDAN SLOB MA MTHA' DAG GI ,SNYING MUN MA LUS SEL BA'I SGRON ME DANG, ,'JIG RTEN 'JIG RTEN 'DAS PA'I DGE LEGS NI, ,MTHA' DAG MYUR DU 'GUGS PA'I LCAGS KYU'ANG YIN, ,TSUL 'DIR 'BAD LAS BYUNG BA'I DGE BA'I TSOGS, ,ZLA LTAR DKAR BA GANG ZHIG THOB PA DE, ,DGE LEGS RTZA BA DAM PA'I MGON RNAMS KYIS, ,'GRO KUN RJES SU 'DZIN PA'I RGYU RU BSNGO, ,ZHES BLA MA MCHOD PA'I CHO GA 'DI NI 'DUL BA 'DZIN PA CHOS KYI GRAGS PA DANG, BLO BZANG PHUN TSOGS GNYIS KYIS 'DI LTA BU ZHIG DGOS CES YANG YANG BSKUL BA LA BRTEN NAS, SH'AKYA'I DGE SLONG BLO BZANG CHOS KYI RGYAL MTSAN GYIS GRUB CHEN GLING GIS MDZAD PA'I BLA MA MCHOD PA DANG, DPANG LO CHEN POS MDZAD PA'I BLA MA MCHOD PA DANG, SA SKYA BA'I DGE BA'I BSHES GNYEN CHEN PO DU MAS MDZAD PA'I BLA MA MCHOD PA DANG, THAMS CAD MKHYEN PA DGE 'DUN RGYA MTSOS MDZAD PA'I BLA MA MCHOD PA DANG, MKHAS GRUB CHEN PO MKHAN PO RIN PO CHE SANGS RGYAS YE SHES KYIS MDZAD PA'I BLA MA MCHOD PA DANG, GZHAN YANG GRUB MTHA' SO SO'I BLA MA MCHOG DMAN DU MAS MDZAD PA'I BLA MA MCHOD PA MANG PO ZHIG MTHONG ZHING, BRJOD BYA'I DON RNAMS KHONG DU CHUD PAR BYAS TE LEGS PA'I CHA THAMS CAD LEGS PAR BSDUS NAS, MDO RGYUD DAM PA'I MAN NGAG JI LTA BA BZHIN DU TSIG SBYOR SPANGS
, ,TE GO BDE BAR, CHOS GRVA CHEN PO BKRA SHIS LHUN PO'I GZIMS KHANG RGYAL MTSAN MTHON PO'I YANG THOG TU SBYAR BA'O,, ,,'DI DANG PHYAG CHEN 'GREL PA YANG, RAB 'BYAMS SMRA BA CHOS GRAGS KYIS BSGRUBS PA'I DGE BAS PHA MA GNYIS MYUR DU SANGS RGYAS THOB PAR SHOG ,