, ,RJE BTZUN THAMS CAD MKHYEN PA'I GSUNG 'BUM THOR BU LAS SMON LAM BDUN CU PA'I t'I KA BZHUGS SO,,
, ,SMON LAM BDUN CU PA'I TSIG DON RNAM PAR DBYE BA, MGON PO 'JAM PA'I DBYANGS LA PHYAG 'TSAL LO, ,CHOS DBYINGS NAM MKHAR GZUGS SKU'I DKYIL 'KHOR PHRIN LAS 'OD STONG RTZE DGAS ROL, ,BRJOD DU MED KYANG SNA TSOGS BRJOD PAS 'GRO 'DI ZHI BA'I SHING RTAS 'DREN, ,RIG GROL YON TAN PHUN SUM TSOGS KYANG GCIG TU RNAM DKAR DGE LA 'DUN, ,MCHOG GSUM RIN CHEN COD PAN GANG DE RING MO ZHIG NAS BDAG GIS BLANGS, ,GANG GI MGRIN PA'I PAD RDZING DU, ,DBYANGS CAN NGANG MO'I 'GROS KYIS RTZEN, ,SMRA MKHAS DPA' BO RGYAL BA'I SRAS, ,'DI LTA'I SMON LAM DBYANGS SNYAN SGROG ,DUS KYI MTHAR YANG BYANG PHYOGS 'DIR,, BSTAN DANG 'GRO BA'I PHAN BDE'I KHUR, ,'DZIN MDZAD GCIG PU BLO BZANG NI, ,GRAGS PA'I RNGA SGRA GSAL BA BYUNG, ,DE YI RIGS LAS SKYES PA BDAG ,BCU PHRAG BDUN LDAN SMON LAM GYI, ,RIN CHEN DON GNYER RGYAL
, ,BA'I SRAS, ,'JUG NGOGS GANG DE GSAL BAR BYA,, DE LA DAM PA'I SKYES BU GANG DAG GIS SMON LAM BDUN CU PA'I TSIG DON CUNG ZAD BKROL BA DANG, SA BCAD KYI MTSAMS DBYE BA TZAM ZHIG BYOS SHIG CES NYE BAR BSKUL BA'I NGOR MDO TZAM ZHIG SMRA BA LA ZHUGS SO,, 'DI LA BZHI, MTSAN GYI DON, 'GYUR GYI PHYAG ,GZHUNG GI DON, MJUG GI DON TO,, DANG PO NI RGYA GAR NA SKAD RIGS MI 'DRA BA BZHI YOD PA LAS LEGS SBYAR GYI SKAD DU SMON LAM 'DI'I MTSAN LA PRA nI DH'A NA SOGS DANG, DE BOD SKAD DU BSGYUR NA PRA nI DH'A NA SMON LAM, SAB TYA DA SHA NI BDUN CU PA, N'A MA NI ZHES BYA BA, GA TA NI TSIGS SU BCAD PA STE, SMON LAM 'DI LA SHLOO KA BDUN CU YOD PAS DE SKAD CES BYA'O,, 'GYUR GYI PHYAG NI BYANG CHUB SEMS DPA' KUN TU BZANG PO LA PHYAG 'TSAL LO ZHES PA'O,, GZHUNG GI DON BSHAD PA LA GNYIS, GANG BSNGO BAR BYA BA'I DGE RTZA NYE BAR
BSGRUB PA DANG, DE JI LTAR BSNGO BA'I TSUL LO,, DANG PO NI SPYIR BSNGO BA DANG SMON LAM MI 'GAL TE, BSNGO BA YIN NA SMON LAM YIN DGOS PA'I PHYIR, DE LTA NA YANG SMON LAM YIN NA BSNGO BA YIN MI DGOS TE, DPER NA SANGS RGYAS KYI YON TAN KHYAD PAR CAN MTHONG BA NA DGE RTZA 'DI 'DRA ZHIG GI MTHU LA BRTEN NAS ZHES PA DANG MA 'BREL BAR SPYIR BDAG GIS KYANG 'DI 'DRA THOB NA CI MA RUNG THOB PAR GYUR CIG SNYAM PA LTA BU SMON LAM YIN YANG BSNGO BA MA YIN PA BZHIN NO, ,DES BSNGO BA DANG SMON LAM GYI KHYAD PAR SHES NUS LA, 'DI NI BSNGO BA DANG SMON LAM GNYIS KA'I GZHI MTHUN YIN PAS THOG MAR GANG BSNGO BAR BYA BA'I DGE RTZA YAN LAG BDUN PA'I SGO NAS GSOG PA YIN NO,, 'DI LA GSUM, YUL KHYAD PAR CAN LA PHYAG BTZAL NAS SDIG PA BSHAGS SHING DGE BA LA YI RANG BA'I TSUL, SANGS RGYAS DGYES PA'I MCHOD PA THAMS CAD KYI MCHOG BYANG CHUB TU SEMS BSKYED NAS 'GRO BA BSGRAL BAR DAM BCA' ZHING SMON LAM GDAB PA, BSKUL ZHING GSOL BA BTAB NAS DGE RTZA SEMS CAN THAMS CAD SANGS RGYAS 'THOB PA'I PHYIR BSNGO BA'I TSUL LO,, DANG PO GSUM LAS, PHYAG 'TSAL BA'I YAN LAG LA GANG LA PHYAG 'TSAL BA'I YUL NI THEG CHEN THUN MONG MA YIN PA'I DKON COG GSUM MO, ,DE DAG LAS SANGS RGYAS DKON COG LA PHYAG 'TSAL BA NI, YON TAN RIN CEN SOGS SHLOO KA GCIG STE 'DI LTAR, PHYAG 'TSAL LO, ,GANG LA NA, PHYOGS BCU DUS GSUM DU BZHUGS PA'I BDE BAR GSHEGS PA RNAMS LA'O, ,TSUL NI SGO GSUM MCHOG TU GUS PA'I SGO NAS SO, ,DANG BA'I DAD PA SHUGS CAN
, ,SKYE BA YON TAN MTHONG BA LA RAG LAS PAS DE'I TSUL NI, YON TAN RIN CEN DPAG TU MED PA'I TSOGS MNGA' BAS YON TAN KUN RDZOGS PA DANG, NYON MONGS PA LA SOGS PA'I NYES PA'I DUG GI SDONG PO MTHA' DAG STE MA LUS PAR SLAR MI SKYE BA'I TSUL GYIS DRUNGS NAS PHYUNG BAS SKYON KUN ZAD DU SNYING THAG PA NAS NGES PA RNYED PA'O,, GNYIS PA CHOS DKON COG LA PHYAG 'TSAL BA NI, MI SHES PA YI RAB RIB 'JOMS MDZAD CING, ,ZHES SOGS TE DAM PA'I CHOS DKON COG LA PHYAG 'TSAL LO, ,TSUL JI LTAR NA, MI SHES PA NYON MONGS PA'I RAB RIB 'JOMS PAR MDZAD CING BAG LA NYAL SHES BYA'I SGRIB PAR GYUR PA'I MDA' DUG CAN 'BYIN PA'I THABS BLA NA MED PA 'GRO BA RIGS CAN GSUM PO KUN GYI BLO GROS KYI MIG 'BYED PA'I YON TAN DANG LDAN PAR MTHONG BA'I DAD PA SHUGS DRAG POS SO, ,DGE 'DUN LA PHYAG 'TSAL BA NI, BDE BAR GSHEGS PA'I SRAS PO BYANG CHUB SEMS DPA' PHYIR MI LDOG PA'I DGE 'DUN MA LUS PA LA LAN GCIG TZAM MA YIN PAR RGYUN MI 'CHAD PAR MGO BOS PHYAG 'TSAL LO, ,TSUL JI LTAR NA, 'GRO BA SDUG BSNGAL GYIS MNAR BA LA SHAS MI BZOD PA'I THUGS RJE CHEN POS YID NI RANG DBANG MED PAR DRANGS PA'I YON TAN DANG, DE KHO NA NYID RTOGS PA'I BLO'I SPYAN BYE BAR GYUR PA MKHYEN PA'I YON TAN PHUN SUM TSOGS PA DANG LDAN PAR SNYING NAS MTHONG BA'I DAD PA'I SHUGS DRAG POS SO, ,RGYUN MI 'CHAD PAR MGO BOS PHYAG 'TSAL LO, ,ZHES GSUM GA LA MTSUNGS PAR SBYAR RO, ,GZHUNG GI GO RIM JI LTA BAR DANG POR YON TAN BRJOD NAS, DE
LTA BU'I YON TAN DANG LDAN PA'I DKON COG GSUM LA PHYAG 'TSAL LO ZHES BSHAD KYANG CHOG MOD, SNGAR BSHAD PA NI SKYABS YUL GYI YON TAN DRAN PA'I DAD PA SNGON DU 'GRO BA CAN GYIS PHYAG BYA DGOS ZHES GO BA'I CHED DU STE PHYAG 'TSAL BA'I YAN LAG BSHAD ZIN TO,, GNYIS PA SDIG PA BSHAGS PA NI, 'GRO BA RNAMS SU ZHES SOGS TE, BDAG GIS SKYE BA'I 'GRO BA RNAMS SU MI DGE BA'I LAS GANG RANG GIS CUNG ZAD BGYIS SAM, GZHAN BGYID DU BSTZAL TAM, BGYIS PA LA RJES SU YID RANG BA'I SGO NAS BSAGS PA DE DAG THAMS CAD BSHAGS YUL PHYOGS BCU'I RGYAL BA RNAMS MNGON SUM LTA BUR DMIGS PA LA SNYING THAG PA NAS 'GYOD SEMS DRAG POS BSHAGS NAS NI SLAN CHAD CUNG ZAD KYANG MI BGYID PA'I SDOM PA NOD PAS TE SDOM SEMS BGYID PA'O,, GSUM PA RJES SU YI RANG BA NI, BDE GSHEGS SOGS TE, BDE BAR GSHEGS PA SANGS RGYAS DANG, RANG RGYAL DANG NYAN THOS DANG RGYAL BA'I SRAS KYIS DGE BA GANG BSAGS PA DANG, DE DAG LAS GZHAN 'JIG RTEN PA'I SKYE BO YIS LEGS PAR SBYAR BA RANG DANG GZHAN GYIS BGYIS PA MA LUS PA LA BDAG NI NGOMS PA MED PAR RJES SU YI RANG BA STE SNYING THAG PA NAS DGA' BA SGOM PA'O, ,DE LTAR BSGOMS PA LA DGOS PA YOD DE, SNGON BYAS KYI DGE BA GONG 'PHEL DU 'GYUR BA'I CHED YIN PA'I PHYIR, GNYIS PA NI, SKYE BO NYON MONGS DUG GIS MGO RMONGS PA, ,ZHES PA NAS, CHOS KYI RGYAL SRID CHEN PO'I GNAS THOB SHOG ,CES PA'I BAR TE, SO SO SKYE BO DUG DANG 'DRA BA'I NYON MONGS KYIS MGO RMONGS PA DE DAG RNAMS LA NYON MONGS KYI DBANG GIS MI DGE
, ,BA'I LAS GANG MCHIS PAS TE BSAGS PAS DMYAL BA LA SOGS PA'I SDUG BSNGAL MYONG BAR GYUR PA DE DAG GI SDUG BSNGAL GZHOM PA LA BDAG NYID KHO NA CI NAS KYANG DMYAL BA RNAMS SU SNYING STOBS CHEN POS DGA' BZHIN DU GZHOL ZHING 'JUG PAR BGYI'O, ,DE LTAR ZHUGS PA LA BRTEN NAS 'JIG RTEN GYI SKYE BO RNAMS SDUG BSNGAL RGYU BCAS RAB TU ZHI BA'I BDE BA'I BDUD RTZI YIS TSIMS NAS YID NI DGE BA 'BA' ZHIG BGYID PAR GYUR CIG ,CES SAM, YANG NA, GZHUNG GONG MA LA 'GRO BA RNAMS MI DGE BA'I DBANG GIS NGAN SONG GI SDUG BSNGAL MYONG DGOS PAR MTHONG BA NA DE'I TSAB TU BDAG NYID NGAN SONG DU 'JUG PA DANG, DES GO BCAD NAS 'GRO BA RNAMS BDE DGES TSIM PAR GYUR CIG ,CES BSAM PA SBYANG BAS TE, GANG 'GRIG BRTAG PAR BYA'O, ,'GRO BA RIGS DRUG PO DAG GI SDUG BSNGAL JI SNYED PA DE SNYED NI BDAG GIS DANG DU LEN PA DANG, 'GRO BA 'DI DAG GI YID LA MYUR DU YANG DAG PA'I BYANG CHUB KYI SEMS NYID NI SKYED PAR GYUR CIG ,YID LA BYANG CHUB KYI SEMS NI BSKYED PA DAG KYANG BYANG CHUB KYI TSOGS YANG DAG PAR SGRUB PA DANG, BSGRUB NAS NI BYANG 'PHAGS KYI SA THOB CING SRID PA GSUM GYI MGON PO SANGS RGYAS KYI GDUNG BZUNG BAS NYES PA'I DGRA RNAMS BCOM NAS SA 'OG SA STENG SA BLA'I 'JIG RTEN GSUM PO DAG GI CHOS KYI RGYAL SRID CHEN PO'I BDAG PO SANGS RGYAS KYI GNAS THOB PAR SHOG CIG CES PA'O, ,DE LTAR TSIGS BCAD 'DI DAG LAS GZHAN PA'I 'DIR MCHOD PA'I YAN LAG STON PA MA BYUNG ZHING, SEMS CAN MGU BYA MA GTOGS PA, ,RGYAL BA DGYES PA'I THABS
GZHAN MED, ,CES PA LTAR SANGS RGYAS DGYES PA'I SGRUB PA'I MCHOD PA MCHOD PA THAMS CAD KYI MCHOG TU SNANG BAS DE LTAR BSHAD DE, BLO GROS RGYA MTSOS ZHUS PA'I MDO LAS, BLO GROS RGYA MTSO GSUM PO 'DI NI DE BZHIN GSHEGS PA LA MCHOD PA DANG RIM GRO BLA NA MED PA'O, ,GSUM GANG ZHE NA, GANG BYANG CHUB TU SEMS BSKYED PA DANG, GANG DAM PA'I CHOS YONGS SU 'DZIN PA DANG, SEMS CAN RNAMS LA SNYING RJE CHEN PO SKYED PA'O, ,ZHES GSUNGS PA'I PHYIR RO,, GSUM PA LA GSUM LAS CHOS KYI 'KHOR LO BSKOR BAR BSKUL BA NI, BYANG CHUB SHING DBANG SOGS TE BYANG CHUB KYI SHING DBANG DRUNG DU SANGS RGYAS RANG NYID RNAM PAR SANGS RGYAS NAS NYIN ZHAG JI SNYED GZHES SHING BZHUGS PA DAG LA TSANGS PA DANG BDUD DANG DGE SBYONG DANG BRAM ZE LA SOGS PAS CUNG ZAD KYANG BSKOR BAR MI NUS PA'I DPE MED PA'I CHOS KYI 'KHOR LO 'CHI BA MED PA'I GO 'PHANG BDE BLAG TU STER BA'I BDUD RTZI DANG 'DRA BA'I CHAR 'GRO BA LA DBAB PA'I SLAD DU GSOL BA GDAB PAR BGYI'O, ,SANGS RGYAS CHOS KYI 'KHOR LO BSKOR BA GZHAN GYIS BSKUL BA LA MI BLTOS KYANG, RANG GI NGOS NAS DE LTAR BSKUL BAS TSOGS RLABS PO CHE RDZOGS PA'I DGOS PA YOD DO, ,MYA NGAN LAS 'DA' BAR GSOL BA NI, GZHAN DON SOGS TE, SKU DNGOS KYIS GZHAN GYI DON PHUN SUM TSOGS PA SGRUB PA'I BYA BA RE ZHIG RDZOGS PAR MDZAD ZIN NAS MYA NGAN LAS 'DAS PA'I MCHOG TU GSHEGS TE CHOS KYI SKU'I NGANG DU GZUGS SKU'I SNANG BA BSDU BAR BZHED PA'I BLO BZANG RGYAL BA DE LA'ANG GZHAN LA PHAN PAR MDZAD PA'I SLAD DU CHES YUN RING
, ,DU BZHUGS PA'I GSOL BA GDAB PAR BGYI'O, ,DE YANG SANGS RGYAS LA SKYE 'CHI MTSAN NYID PA MED PA NI RTOGS SLA ZHING, MA RIG BAG CHAGS KYI SA DANG ZAG PA MED PA'I LAS LA BRTEN NAS BLANGS PA'I YID KYI RANG BZHIN GYI LUS 'DOR BAR BYED PA LA BSAM GYIS MI KHYAB PA'I 'CHI 'PHO ZHES BTAGS PA DE YANG SPANGS PAS SKYE 'CHI'I TSUL STON PA TZAM DU ZAD LA, DE YANG SKU DE NYID KYI DNGOS KYI GDUL BYA RNAMS RDZOGS PA DANG, SKU DNGOS SU BLTA BA'I SKAL BA DANG MI LDAN PA RNAMS KYIS SANGS RGYAS KYI SKU MA MTHONG BA NYID LA SANGS RGYAS MYA NGAN LAS 'DAS SO ZHES BTAGS PA TZAM MO, ,DE LTA NA YANG SKU GDUNG RING BSREL SOGS 'BYUNG BA NI, GDUL BYA GDUL BA'I THABS LA MKHAS PA'I DBANG GIS TE, 'DI DAG LA RTOGS DKA' BA'I GNAS MTHA' YAS SO,, GSUM PA DGE RTZA SEMS CAN THAMS CAD KYIS MYANG 'DAS 'THOB PA'I RGYUR BSNGO BA NI, 'JIG RTEN SOGS TE, SDUG BSNGAL NYON MONGS PA'I THIBS POR GYUR PA'I SA 'OG SA STENG SA BLA'I 'JIG RTEN GSUM PO DER LAS NYON GYI DBANG GIS RANG DBANG MED PAR RGYU BA'I SEMS CAN JI SNYED SU DAG MCHIS PA DE DAG THAMS CAD SDUG BSNGAL KUN NYE BAR ZHI BA'I BDE BA BLA NA MED PA YI BDUD RTZI'I LONGS SPYOD LA MGRON DU GNYER TE, DGOD PA'I SLAD DU DGE RTZA RNAMS BSNGO BAR BGYI'O,, ZHES PA STE, GANG BSNGO BAR BYA BA'I DGE RTZA NYE BAR BSGRUB PA BSHAD ZIN TO,, DA NI DE JI LTAR BSNGO BA'I TSUL BRJOD PAR BYA STE, 'DI LA GSUM, MDOR BSTAN, RGYAS BSHAD, DON BSDU BA'O,, DANG PO NI, DE LTAR SOGS TE, BSNGO BAR BGYI'O ZHES
DRANG NGO, ,GANG DU BSNGO NA, BLA NA MED PA'I BYANG CHUB TU'O, ,GANG BSNGO NA, SNGAR BSHAD PA DE LTAR YAN LAG BDUN PA'I SGO NAS BSGRUBS PA'I DGE BA GANG DAG DANG, GZHAN YANG DUS GSUM DANG 'BREL BA GZHI GSUM GYIS BSDUS PA'I DGE BA MA LUS PA 'DI'O, ,JI LTAR BSNGO NA, 'KHOR GSUM MI DMIGS PAR RTOGS PA'I SHES RAB KYIS ZIN PA'I SGO NAS YANG DAG PAR BSNGO'O, ,GANG GI CHED DU NA, SEMS CAN THAMS CAD KYI'O, ,BYANG CHUB SEMS DPA' RNAMS KYIS DE LTAR BSNGO BAR MDZAD PA CHOS CAN, DGOS PA YOD DE, DGE RTZA CHUNG NGU 'BRAS BU DMAN PA 'BYIN PA LA YANG 'BRAS BU KHYAD PAR CAN 'BYIN PAR 'GYUR BA DANG, GNAS SKABS SU DGE RTZA'I 'BRAS BU LA JI TZAM LONGS SPYAD KYANG DES ZAD PAR MI 'GYUR BA DANG, DGE RTZA THAMS CAD KYANG MTHAR BYANG CHUB CHEN PO THOB PA'I RGYUR 'GYUR BA SOGS KYI THABS MKHAS BLA NA MED PA YIN PA'I PHYIR RO,, GNYIS PA RGYAS PAR BSHAD PA LA GNYIS, GNAS SKABS SU BYANG CHEN SGRUB PA'I THABS GZHAN DON DU RGYAL SRAS KYI SPYOD PA MTHA' YAS PA LA SLOB PA'I RGYUR BSNGO BA, MTHAR THUG BYANG CHUB BRNYES NAS LHUN GYIS GRUB PA'I PHRIN LAS KYIS SEMS CAN GYI DON SGRUB PA'I RGYUR BSNGO BA'O,, DANG PO LA GSUM, THEG CHEN LAM GYI 'JUG SGO GCIG PU SPYOD PA'I RTEN BYANG CHUB TU SEMS BSKYED PA, SEMS BSKYED KYI DON SGRUB PA'I THABS GROGS SKYES BU DAM PA LA BRTEN PA'I SGO NAS GDAMS NGAG MNYAN ZHING GDAMS DON BSGRUB PAR DAM BCA' BA, DAM BCAS PA'I DON MTHAR PHYIN PA'I THABS RGYAL SRAS KYI SPYOD PO DNGOS NYAMS SU LEN TSUL LO,, DANG
, ,PO SNGAR BSHAD PA LTAR DGE RTZA THAMS CAD GZHAN DON DU RDZOGS BYANG GI RGYUR BSNGO BA DES NA BDAG NI BYANG CHUB MA THOB PAR DU GZHAN DON DU RDZOGS BYANG LA DMIGS PA'I BYANG CHUB KYI SEMS DANG NI SKAD CIG TZAM YANG 'BRAL BAR MA GYUR CIG CES PA STE, RANG NYID THEG CHEN PAR CHUD MI CHUD DANG SANGS RGYAS 'THOB MI 'THOB NI BYANG CHUB KYI SEMS 'DI RGYUD LA YOD MED KYI RJES SU BYED CING, DGE RTZA RNAMS SANGS RGYAS 'THOB PA'I RGYUR 'GRO BA YANG BYANG CHUB KYI SEMS KYIS ZIN PA LA NGES PAR BLTOS PAS SANGS RGYAS DON DU GNYER BA DANG, THEG CHEN GYI LAM LA SLOB 'DOD PA ZHIG YIN NA NI BDAG PAS GZHAN GCES PAR 'DZIN PA'I BYANG CHUB KYI SEMS KHO NA NYAMS LEN GYI MTHIL DU BYA BAR 'OS PA YIN TE, MDO LAS KYANG, BYANG CHUB KYI SEMS NI SANGS RGYAS KYI CHOS RNAMS KYI SA BON LTA BU'O, ,ZHES GSUNGS SHING, 'DIR YANG, DES NA ZHES SMOS PA'I NUS PA NI SNGAR BSHAD PA DER SNANG NGO,, GNYIS PA LA GSUM, LAM STON PA'I STON PA DANG GROGS DANG MI 'BRAL BAR SMON PA; DE DAG LA GDAMS NGAG MNYAN ZHING GDAMS DON BSGRUB PAR DAM BCA' BA, SPYOD PA'I RTEN PHUN SUM TSOGS PA GRUB NAS GDUL BYA GZHAN RJES SU 'DZIN PAR SMON PA'O,, DANG PO NI, JI SRID PHUN SUM TSOGS PA'I GZHIR GYUR PA, ,ZHES SOGS TSIGS BCAD GCIG STE, JI SRID PHUN SUM TSOGS PA MA LUS PA'I GZHIR GYUR PA'I BDE BAR GSHEGS PA'I GO 'PHANG MA MNAN PA STE MA THOB PA DE SRID DU NI LAM STON PA PO THUB PA'I KHYU MCHOG SANGS RGYAS RNAMS DANG, LAM SGRUB PA'I GROGS BYANG CHUB
SEMS DPA' RNAMS DANG NAM DU YANG 'BRAL BAR MA GYUR CIG CES SMON PA STE, BYANG SEMS KYANG 'GA' ZHIG RANG LA 'DOMS PA'I YONGS 'DZIN DANG, 'GA' ZHIG GROGS SU 'GYUR RO,, GNYIS PA NI, RANG LA THEG CHEN GYI LAM NYE BAR 'DOMS PA'I YONGS 'DZIN SANGS RGYAS BYANG SEMS DE DAG KHO NAS MTHA' GCIG TU GZHAN LA SMAN PA STE, PHAN PA YI RGYAL SRAS KYI SPYOD PA TSANG LA MA NOR BA'I LAM DE DAG NYE BAR BSTAN PA YI MTHU LA BRTEN NAS SPYOD PA'I GNAS RNAMS LA SLOB PA LA SKYO BA DANG DUB PA MA MCHIS PAR NI, BLANGS PA LA BRTEN NAS SANGS RGYAS KYI SRAS BYANG CHUB SEMS DPA' RNAMS KYI MOS SPYOD KYI SA DANG, DE NAS RAB DGA' NAS SA BCU PA'I BAR 'PHAGS PA'I SA KUN LA YANG RTOGS PA GONG NAS GONG DU KHYAD ZHUGS PAR SBAR BAR BGYI'O ZHES LAM LA SLOB PAR DAM 'CHA' BA'O,, GSUM PA NI DE LTA BU'I SPYOD PA LA SLOB PA'I BYANG CHUB SEMS DPA' BDAG GI LUS RTEN YANG YAN LAG DANG NYING LAG RNAMS TSANG ZHING, SKYE BO KUN GYIS BSTOD PAR 'OS PA'I DAD PA DANG BLO GROS DANG MANG DU THOS PA DANG SPYAN DANG MNGON SHES SOGS YON TAN GYI PHUNG PO CHEN POR GYUR CING RTAG TU TSE RABS DRAN PA DANG, GZHAN GYIS BKUR BAR 'OS PA'I RGYAL RIGS DANG BRAM ZE'I RIGS SOGS CHO RIGS BTZUN ZHING LUS NI GZHAN GYIS MTHONG BA TZAM GYIS YID 'PHROG PA'I MDZES PA THOB PAR SHOG CIG GO ,DE LTA BU THOB NAS KYANG GZHAN LA PHAN PA 'BA' ZHIG SGRUB PA SPANGS SHING RANG DON LHUR LEN PA'I RANG NYID ZHI BDE DON GNYER GYI BSAM SBYOR THA CHAD PA, RGYAL SRAS KYI SPYOD PA LA BAR DU GCOD
, ,PA DUG DANG 'DRA BAR SPANGS NAS SU SNYING RJE CHEN POS RANG DBANG MED PAR GDUNGS PA'I YID KYIS SKYE BO MA LUS PA KUN GYI DON BYED PA LA MTHA' GCIG TU GZHOL BAS DE DAG RJES SU 'DZIN PAR SHOG CIG PA'O,, GSUM PA LA BZHI, GZHAN DON DU RANG RGYUD SMIN BYED PHAR PHYIN BCU LA SLOB PAR SMON PA, GZHAN DON SGRUB BYED KYI BSAM PA PHUN SUM TSOGS PA TSANGS PA'I GNAS PA BZHI LA SLOB PAR SMON PA, RANG GZHAN GYI DON MYUR DU 'GRUB PA'I RGYU SPYAN DANG MNGON SHES 'GRUB PAR SMON PA, GRUB NAS SKYE 'GRO THAMS CAD KYI RE BA SNA TSOGS YID BZHIN DU SKONG BAR SMON PA'O,, DANG PO LA GNYIS, GZUGS SKU'I NYER LEN BSOD NAMS KYI TSOGS KYIS GTZO BOR BSDUS PA PHAR PHYIN DANG PO LNGA LA BSLAB, CHOS SKU 'GRUB BYED YE SHES KYI TSOGS KYIS GTZO BOR BSDUS PA PHAR PHYIN THA MA LNGA LA BSLAB PA'I TSUL LO,, DANG PO GNYIS, GZUGS SKU'I THUN MONG MA YIN PA'I NYER LEN SBYIN SOGS DANG PO GSUM LA BSLAB, CHOS GZUGS GNYIS KA'I THUN MONG GI RGYU BRTZON 'GRUS DANG BSAM GTAN LA BSLAB TSUL LO,, DANG PO LA GSUM, SBYIN PA, TSUL KHRIMS, BZOD PA LA BSLAB TSUL LO,, DANG PO NI, BDAG GI BDOG PA ZHES SOGS SHLOO KA GSUM STE, DE YANG THOG MAR ZANG ZING GI LONGS SPYOD SBYIN PAR GTONG TSUL NI, BDAG GI BDAG PA'I DNGOS PO THAMS CAD NAM MKHA' DANG MNYAM PA'I SEMS CAN THAMS CAD LA BLOS LING GIS BTANG BA NA DE RNAMS BDAG LA GZHAN GYI BLOS GZHAN GYI NOR YIN PAS BDAG GIS LONGS SPYOD MI RUNG SNYAM DU CUNG ZAD KYANG MI 'DZIN CING RANG GI NOR LA RANG
GIS LONGS SPYOD PA LA RUNG MI RUNG SNYAM DU SOM NYI MA MCHIS PA LTAR BAG YANGS TE CI 'DOD DU RANG DANG LHAN CIG TU LEN CING LONGS SPYOD PAR SHOG CIG PA'O, ,'O NA ZANG ZING GI LONGS SPYOD KHO NA SBYIN PAR GTONG NGAM SNYAM NA, DER MA ZAD SEMS CAN GANG BDAG GI LUS KYI SHA ZHIG SLONG BA MCHIS NA YANG ZHUM PA MED PAR DGA' ZHING BROD LA 'DZUM PA'I MIG GIS STZAL BAR BGYI ZHING, BDAG GI RKANG PA LA SOGS PA LAN GCIG TZAM MIN PAR DUS RTAG TU YANG LUS CAN RNAMS KYI DON DU GTONG BAR SHOG CIG CES LUS SBYIN PAR GTONG TSUL GYI SMON LAM MO, ,DE'I DON BSDU BA NI, MDOR NA BDAG NI 'GRO BA YI CI 'DOD PA'I DNGOS PO MTHA' DAG YID BZHIN DU 'GRUB PAR BYED PA YID BZHIN GYI NOR BU DANG 'DRA BA DANG, YID LA RE BA THAMS CAD YONGS SU RDZOGS PAR BYED PA YI DPAG BSAM GYI SHING DANG 'DRA BAR SHOG CIG CES PA STE, SBYIN PA LA SLOB TSUL GYI SMON LAM BSHAD ZIN TO,, GNYIS PA NI, BDAG NI RANG GI NGANG GIS SDIG PA DAG ,CES PA SHLOO KA BZHI STE, RIM PA LTAR BSHAD NA, BDAG NI RGYAL SRAS KYI SPYOD PA LA SLOB PA'I DUS KUN TU RANG GI NGANG GIS SDIG PA'I LAS LAM DAG MI GTZANG BA LTAR RGYANG RING DU SPONG BA DANG, DE'I SGO NAS THUB PA'I SKYES MCHOG GIS BCAS PA'I BSLAB PA'I CHU LON NYES PA'I CHU KLUNG 'GEGS PA'I THABS BLA NA MED PA, BAG MED PA SOGS KYI SGO NAS CUNG ZAD KYANG 'BRAL BAR BGYID PAR MA GYUR CIG RGYAL SRAS KYI SPYOD PA LA SLOB PA YI LAS DANG PO PA'I SKABS SU SGO GSUM NYON MONGS PA LAS BSRUNG BA'I PHYIR GZHAN DON DU LUS DANG SROG LA LTA BA RGYANG
, ,BSRINGS NAS RTAG TU GRONG LAS RGYANG GRAGS KYIS CHOD PA'I DGON PA'I GNAS RNAMS SU GNAS PA LA DGA' BAR BGYI'O, ,DGOS PA NI ZAS GOS SOGS KYI RNYED PA DANG, PHYAG SOGS KYI BKUR STI MTHA' DAG LA TSON PA'I ZAS KYI LHAG GAM BA LANG BZHIN DU SRED PA'I BLO NI BZLOG PAR BGYI BA'I SLAD DU'O, ,SPYIR BYANG CHUB SEMS DPA' RNAMS KYI DBEN PA'I GTZO BO NI SEMS RANG DON YID BYED KYI DRI MAS DBEN PA YIN GYI, LUS 'DU 'DZI LAS DBEN PA GTZO BO MIN YANG BRTAN PA MA THOB PA'I LAS DANG PO BA'I DBANG DU BYAS PA'O, ,GZHAN YANG RGYAL SRAS KYI SPYOD PA LA SLOB PA'I DUS KUN TU RIGS DMAN PA RDOL PA'I PHRU GU BZHIN DU RGYAGS PA DANG RGYAL DANG DREGS PA SPANGS PA'I SGO NAS 'GRO BA RNAMS LA STON PA BZHIN DU GUS PA DANG, RIGS MCHOG TU BTZUN PA'I NYE DU'I TSOGS BZHIN DU MTHA' GCIG TU PHAN PA DANG RJES SU MTHUN PA DAG BSGRUB CING SPYAD PAR BGYI'O, ,ZHES PA STE, RANG DMAN CHA BZUNG BA'I SGO NAS SEMS CAN GYI DON 'BA' ZHIG BSGRUB PAR SMON PA'O, ,MDOR NA STON GYI ZLA BA'I ZER DANG PAD MA'I RTZA BA DRI MA THAMS CAD DANG BRAL ZHING MCHOG TU DKAR BA LTAR PHAS PHAM PA'I LTUNG BAS MA RAL, RANG DON YID BYED DANG MA 'DRES, KHA NA MA THO BA PHRA MO'I NAG NOG MA MCHIS PA NYON MONGS PA DANG SHES BYA'I SGRIB PA MA LUS PA RAB TU ZHI BA'I MYANG 'DAS 'THOB PA'I RGYAN TE THABS SU GYUR PA'I TSUL KHRIMS LA NI BDAG GIS TSUL BZHIN DU SLOB PA LA GOMS PAR BGYI'O ZHES DON BSDUS TE TSUL KHRIMS LA SLOB TSUL GYI SMON LAM BSHAD ZIN TO,, GSUM PA NI, SU DAG NONGS
PA MA MCHIS BDAG GI MGO ,ZHES PA SHLOO KA BZHI STE, RIM PA LTAR THOG MAR GNOD PA LA JI MI SNYAM PA'I BZOD PA LA SLOB TSUL NI, GNOD BYED SU DAG BYANG SEMS BDAG NYID LA NONGS PA STE SKYON MA MCHIS PAR YANG BYANG SEMS BDAG NYID KYI MGO BO SOG LES TSAL PA BRGYAR NI GSHOGS PAR BGYID KYANG DE'I LAN DU KHONG MI KHRO BAR MA ZAD SHIN TU MI RIGS PA BYED PA DE LA'ANG BU GCIG PU'I MA BU LA SHIN TU GCES PAR 'DZIN PA BZHIN DU NI RGYUN MI 'CHAD PAR SEMS LA SHIN TU PHANGS SHING GCES PAR GZUNG BAR BGYI'O, ,GNOD BYED SU ZHIG BYANG SEMS BDAG LA SNYING NAS KHRO BAR GYUR TE DGOS PA MA MCHIS BZHIN DU BDAG GI SROG 'PHROG PAR BYED NA'ANG DE LA'ANG TSE 'DIR GNOD LAN MI 'JAL BAR MA ZAD PHYI MAR YANG SDIG PA'I LAS KYI 'BRAS BU MI BZAD PA CHES LCI BAS MI 'TSAM PA DAG 'BYUNG BAR MA GYUR CIG MDOR NA BDAG LA GZHAN GYIS KHONG KHRO BA DANG, DES KUN NAS BSLANG NAS NGAG GIS GSHE BA DANG, MTSANG 'BRU BA DANG, LUS KYIS BRDEGS PAR GYUR KYANG NAM DU YANG BZOD PA MI GTANG NGO, ,ZHES SO, ,SDUG BSNGAL DANG LEN GYI BZOD PA LA SLOB TSUL NI, GZHAN DON DU RGYAL BA'I SRAS KYI SPYOD PA NYAMS SU LEN PA'I SGO NAS BSGRUB PA'I PHYIR DU LUS SEMS KYI SDUG BSNGAL CI BYUNG YANG MA LUS PA DAG NI DANG DU BLANG NGO, ,CHOS LA NGES SEMS KYI BZOD PA LA SLOB TSUL NI, SNGON CHAD RNYED MA MYONG BA STE RTOGS MA MYONG BA'I THUB PA'I CHOS KYI TSUL NGES DON MTHAR THUG PA STON PAS SHIN TU ZAB CING RIGS PA'I ZAB MO'I DON MCHOG LA'ANG BDAG GI SEMS LA SOM NYI DANG THE TSOM DPYANG
, ,THAG SKAD CIG TZAM YANG G-YO BAR MA GYUR CIG CES PA STE, SNGAR CHOS RNAMS KYI GNAS LUGS PHRA MO LA 'DRIS PAR MA BYAS PA'I STOBS KYIS DANG POR DE GSAR DU RTOGS PA DANG, CHOS THAMS CAD RANG BZHIN GYIS STONG PA SOGS THOS PA NA BLO LA SKRAG PA SKYE BA YIN TE, DE'I PHYIR CHOS NYID DON SPYI'I TSUL GYIS RTOGS PA DANG, MNGON SUM DU GSAR DU MTHONG BA LA SKRAG RIGS PA LAS MI SKRAG PA'I CHA NAS SBYOR LAM DANG MTHONG LAM BZOD PA SOGS KYI SGRA BSHAD PA'O, ,BZOD PA'I NYAMS LEN BSHAD ZIN TO,, GNYIS PA CHOS GZUGS GNYIS KA'I THUN MONG GI RGYU BRTZON 'GRUS DANG BSAM GTAN LA SLOB TSUL LA GNYIS LAS DANG PO BRTZON 'GRUS LA SLOB TSUL NI, BDAG NI SKYE BA TSE RABS TSE RABS SU, ,ZHES SOGS KYI SHLOO KA DRUG STE, RIM PA LTAR BDAG NI SKYE BA 'DI DANG, TSE RABS PHYI MA DANG, DE'I YANG TSE RABS PHYI MA SOGS SU 'GRO BA KUN LA SMAN PA STE PHAN PA 'BA' ZHIG LHUR BLANGS NAS SPYAD KYI, 'GRO BA LA GNAS SKABS DANG MTHAR THUG TU PHAN PA RGYA CHEN PO BGYID PAR MI 'GYUR BA STE MI BGYID PAR NI DUS SKAD CIG MA GCIG GI TSOD TZAM DU GNAS PAR MA GYUR CIG 'O NA 'GRO BA LA PHAN PA JI LTAR BSGRUB SNYAM NA, 'GRO BA THAMS CAD KYI BRAN DANG 'DRA BAR GNAS SKABS DANG MTHAR THUG TU PHAN PA'I THABS BGYI BAR 'OS PA MA LUS PA DAG SGRUB PAR MCHOG TU BRTZON PAR BGYI'O, ,DE LTAR BGYIS PA LAS 'GRO BA KUN GYI BGYI BAR 'OS PA DAG BGYI BA'I KHUR MA LUS PA BDAG GCIG PU LA BLANGS NAS SEMS CAN RNAMS NI DUS RTAG TU BDE BAR GNAS PAR SHOG CIG SEMS
CAN GYI PHAN BDE SGRUB PA'I KHUR BDAG GCIG PUS BLANGS NAS TSUL JI LTAR BSGRUB SNYAM NA, DUS RTAG TU LUS NI GZHAN SEMS CAN THAMS CAD KYI BRAN DU BGYID CING, TSIG SMRA NA'ANG GZHAN LA PHAN PA'I CHOS STON PA 'BA' ZHIG LA DGA' BA DANG, BDAG GI YID KYANG DUS RTAG TU GZHAN DAG LA PHAN PAR SEMS PA 'BA' ZHIG GI DBANG DU BGYID PAR SHOG CIG GAL TE 'O NA GZHAN DON GYI DKA' SPYAD KYI SDUG BSNGAL BSAM GYIS MI KHYAB PA DAG GIS YID KHONG DU CHUD PAR MI 'GYUR RAM SNYAM NA, GNAS MNAR MED LA SOGS PA'I DMYAL BAR DUS BSKAL PA GRANGS MED PA'I BAR DU DGOS PA SEMS CAN GYI DON DU MTHA' GCIG TU SDUG BSNGAL BA 'BA' ZHIG NYAMS SU MYONG NA YANG, 'ON KYANG DE LA'ANG SKYO BA DAG NI CUNG ZAD KYANG MA MCHIS PAR SEMS CAN RNAMS YONGS SU SMIN PAR BGYID PAR SHOG CIG CES PA STE, 'DI YAN GYIS SEMS CAN DON BYED KYI BRTZON 'GRUS DANG, CI NAS SGRUB PA'I RIM PA 'DI NYID KYIS, ,ZHES PA SHLOO KA GCIG GIS GO CHA'I BRTZON 'GRUS, ME'I MDAG MA SOGS KYIS DGE BA CHOS SDUD KYI BRTZON 'GRUS LA SLOB TSUL GYI SMON LAM BSTAN PA YIN NO, ZHES BSHAD KYANG RUNG BA TZAM SNANG NGO, ,CI NAS KYANG GZHAN DON SGRUB PA'I RIM PA 'DI NYID KYIS LUS CAN RNAMS NI 'DUL BAR 'GYUR SLAD DANG, GDUL BYA'I 'GRO BA RIGS CAN GSUM PO YONGS SU SMIN PAR BGYID PA'I GZHAN DON GYI GO CHA 'DI NYID NI CI NAS KYANG BGO BAR BGYI'O, ,DER MA ZAD ME'I MDAG MAS BAR MTSAMS MA MCHIS PAR YONGS SU GANG BA'I ME'I 'OBS RNAMS GANG DAG BRGAL DGOS PA BYUNG YANG, THUB
, ,PAS LEGS PAR GSUNGS PA'I TSIGS SU BCAD PA GCIG TZAM ZHIG MNYAN PA'I CHED DU ZHUM PA NI CUNG ZAD KYANG MA MCHIS SHING CHES SPRO BAS 'JUG PAR BGYID PAR SHOG CIG CES PA STE BRTZON 'GRUS LA SLOB TSUL BSHAD ZIN TO,, GNYIS PA BSAM GTAN LA SLOB TSUL GYI SMON LAM NI, BSAM GTAN GZUGS MED TING 'DZIN MTHA' DAG GI ,ZHES PA SHLOO KA DRUG STE, RIM PA BZHIN BSAM GTAN BZHI DANG GZUGS MED BZHI'I TING NGE 'DZIN MTHA' DAG GI RNAM SMIN GYI 'BRAS BU BSAM GTAN GZUGS MED KYI GNAS RNAMS SU RANG DBANG MED PAR NYING MTSAMS SBYOR BA RNAMS LA DGA' BA SPANGS NAS NI TING NGE 'DZIN DE 'PHEL BA MTHAR PHYIN PAR BSLABS PA'I GNAS PA YIS LUS SEMS SHIN TU DGA' BAR 'GYUR BA DAG TU GOMS PAR BGYI'O ZHES PA STE, RNAM SMIN GYI 'BRAS BU LA MI 'DOD BZHIN DU BSAM GTAN GZUGS MED KYI GNAS SU SKYE DGOS PA'I BSAM GTAN GZUGS MED KYI DNGOS GZHI'I TING NGE 'DZIN MNGON DU MI BYED PA'I DON NO, ,BSAM GTAN GZUGS MED KYI DNGOS GZHI'I TING NGE 'DZIN MNGON DU MDZAD KYANG GNAS DE DAG TU SKYE MI DGOS PA NI BYANG SEMS THABS LA MKHAS PA'I DBANG GIS YIN LA, DE YANG BYANG SEMS GZUGS KHAMS SU BSAMS BZHIN DU SKYE BA LEN PAR MDZAD KYI, GZUGS MED DU SKYE BA LEN PA NI MI SRID DO, ,TING NGE 'DZIN GYI MYONG DROD LA SRED PA'I ZHEN PA MA MCHIS PA ZHI GNAS KYI RTA ZHON NAS, 'DOD PA'I YUL LA G-YO BA'I RANG BZHIN CAN GYI SHIN TU GDUL BAR DKA' BA'I SEMS KYI GLANG PO CHE BZLOG PA STE LOG PA'I LAM DU ZHUGS PA RNAMS NI
GDUL BAR BGYI'O, ,DE LTAR GOMS PA LAS 'DOD PA'I PHUN TSOGS LHA YI DBANG PO BRGYA BYIN DANG, 'KHOR LOS SGRUR BA'I 'BYOR BA DAM PA'I MCHOG RNAMS MCHIS PA'I RANG BZHIN DAG MI GTZANG BA BZHIN DU MTHONG NAS, BDAG GI YID CUNG ZAD KYANG THOB 'DOD KYI RE BA DANG, LTOS PA MA MCHIS PAR SHOG CIG MDOR NA LCAGS KYI KHANG PA ME 'BAR BA 'DRA BA BZOD PAR DKA' BA'I SDUG BSNGAL GYI RANG BZHIN CAN GYI SRID PA 'KHOR BAR LAS DBANG GIS RGYU BAR BDAG NI DGA' BAR CUNG ZAD KYANG MA GYUR CIG RANG 'KHOR BA'I SDUG BSNGAL GYIS DE LTAR NYAM THAG PA LA DPAGS NAS SEMS CAN 'KHOR BA'I SDUG BSNGAL GYIS MNAR BA RNAMS LA SHAS MI BZOD PA'I SNYING RJE CHEN POS YID RANG DBANG MED PAR DRANGS NAS GZHAN LA PHAN PA DANG RJES SU MTHUN PA DAG 'BA' ZHIG BGYI BAR 'DOD PA SKYE BAR SHOG DE LTAR BSAM GTAN GYI PHA ROL TU PHYIN PA LA LEGS PAR BSLABS PAS 'GRO BA'I MGON PO SANGS RGYAS KYI SRAS PO THAMS CAD KYI TING NGE 'DZIN GANG ZHIG LA NI DBANG 'BYOR BA BRNYES PA NA BSAM GYIS MI KHYAB PA'I DPA' BO'I ROL PA SNA TSOGS PA STON PAR MDZAD PA YI TING NGE 'DZIN SENG GE RNAM PAR BSGYINGS PA ZHES BYA BA DAG DANG, DPA' BAR 'GRO BA DAG DANG, NAM MKHA' MDZOD DANG, DRI MA MED PA LA SOGS PA MA LUS PA BDAG GIS THOB PAR BGYIS NAS, 'GRO BA GSUM PO MA LUS PA LA YANG TING NGE 'DZIN DE DAG GI BDE BA GYA NOM PA BDAG GIS BSGRUBS NAS DPA' BO'I ROL PA SNA TSOGS RTZER STZAL BSAN BCOS DE STON DU 'JUG PA'O, ,YANG NA GNAS SKABS KYI BDE BA GYA NOM PA BSGRUBS
, ,NAS BDE BA BLA NA MED PA'I RTZER STZAL TO ZHES KYANG 'GRIG GAM BRTAG GO ,GZHUNG GI TSOGS 'DI DAG MTHONG CHOS LA BDE BAR GNAS PA, NYON MONGS RNAMS SBYONG, SEMS CAN DON BYED KYI TING NGE 'DZIN LA BSLAB TSUL GYI SMON LAM ZHES RIM PA LTAR SBYAR DU RUNG BAR YANG SEMS SO,, 'DIR SMRAS PA, BYANG CHUB SEMS KYI RTZA BA RAB BRTAN GTONG BA'I YAL GA PHYOGS BCUR RGYAS, ,TSUL KHRIMS ME TOG PHON PO G-YO LDAN BZOD PA'I GRIB BSIL SNYOMS PAR 'BAB, ,BSAM GTAN 'BRAS BU'I LCID KYIS DUD PA'I RGYAL SRAS DPAG BSAM RKANG 'THUNG NI, ,KVA YE DBYIG GI BLO GROS MA 'DIR 'GRO BA'I NYER 'TSOR 'ONGS SO KYEE, ,BAR SKABS KYI TSIGS SU BCAD PA'O,, GNYIS PA CHOS SKU'I NYER LEN YE SHES KYI TSOGS KYIS GTZO BOR BSDUS PA PHAR PHYIN THA MA LNGA LA SLOB TSUL LA LNGA LAS DANG PO SHES RAB KYI PHA ROL TU PHYIN PA LA SLOB TSUL GYI SMON LAM NI, BZO DANG BSTAN BCOS RGYU RTZAL RGYA MTSO DAG ,CES SOGS SHLOO KA GSUM STE RIM PA LTAR BZO RIG PA DANG, SGYU RTZAL GYI BSTAN BCOS SOGS THA SNYAD KYI GTZUG LAG DANG, NANG RIG PA'I DGONGS 'GREL GYI BSTAN BCOS RGYA MTSO DAG MCHOG TU TSIG DON THAMS CAD PHA MTHAR PHYIN PAR RTOGS PA DANG, CHES MKHAS PA'I PHUL DU PHYIN PA DANG, SEMS CAN THAMS CAD KYIS NI RANG RANG GI SKAD DU TSIG GANG SMRAS PA'I TSIG DON MA LUS PA DAG RTOGS SHING, DE DAG THAMS CAD LA MKHAS PAR SHOG CIG PA'O, ,GSUNG RAB KYI TSIG DON MA LUS PA JI LTA BA BZHIN DU DPYOD PA'I SHES RAB CHE BA DANG, DRI MA MED PA'I GSAL BA DANG, RNON PO
STE MYUR PO DANG, DPAG TU MED PA'I ZAB MO THOB NAS SHIN TU ZAB CING PHRA BA'I RIGS PA'I MCHOG RNAMS KYIS GSUNG RAB KYI TSIG DON ZHIB TU RNAM PAR PHYE STE SEMS CAN RNAMS LA THUN MONG DU BGO BSHA' SBYIN PAR BGYI'O, ,JI LTA BU SBYIN NA SEMS LA GSAL ZHING BRJED PA MED PA'I YI GER BRIS PA 'DRA BA NI'O, ,GANG NA GSUNG RAB KYI TSIG DON MANG PO DAG GO ,GANG LA NA SANGS RGYAS KYI GSUNG RAB KYI TSIG DON MTHAR PHYIN PA MA RTOGS PA'I SEMS CAN MA LUS PA NI MTHA' DAG LA'O, ,GANG GIS NA BYANG SEMS BDAG GIS SO ZHES PA STE 'DIR NI GTZO BOR JI SNYED PA'I SHES BYA'I DBANG DU BYAS PAR SNANG NGO,, GNYIS PA THABS KYI PHAR PHYIN LA SLOB PA'I TSUL NI, CI NAS 'BRAS BU SOGS TE, CI NAS KYANG DON GNYIS KYI 'BRAS BUR BCAS PA'I STOBS BCU MNGA' BA'I GO 'PHANG LA MNGON PAR 'DZEGS NAS, 'GRO BA'I DON MA LUS PA MA TSANG BA MED PAR BSGRUBS PA'I SGO NAS 'BRAS BU BLA NA MA MCHIS PAR BGYIS PA'I GO 'PHANG DE YANG RGYAL SRAS KYI THABS KYI SPYOD PA KHYAD PAR CAN BSGRUBS PAS 'GRUB PAR BGYI'O,, ` GSUM PA SMON LAM GYI PHAR PHYIN LA SLOB TSUL GYI SMON LAM NI, JI LTA JI LTAR ZHES SOGS TE, JI LTA JI LTAR GNAS SKABS DANG MTHAR THUG TU SEMS CAN LA PHAN PA'I RGYUR GYUR PA'I THUB PA RNAMS KYI SMON LAM MA LUS PA LA DE LTA DE LTAR RGYUN DU BSLABS PA'I SMON LAM GYI PHA ROL TU PHYIN PA DAG NI THOB PAR BGYI'O,, BZHI PA STOBS KYI PHAR PHYIN LA SLOB TSUL GYI SMON LAM NI, YUL GYI SOGS TE, NYON MONGS PA'I YUL GYI DGRA YI TSOGS MI BZAD PA MA LUS PA MOD LA STE
, ,SKAD CIG NYID LA CI DGAR TE CI 'DOD 'DOD DU GNYEN PO'I STOBS KYIS ZIL GYIS MNAN NAS SEMS KYI SPYOD PA RNAMS NI NYON MONGS DANG 'BAD RTZOL GYI RNAM RTOG GIS MI G-YO ZHING, SA'I STENG GI 'GRO BA THAMS CAD LA MTHA' GCIG TU PHAN PA KHO NA SGRUB PAS GNAS PAR BGYI'O, ,ZHES PA SE, RGYUD BLA LAS, STOBS NYID MA RIG SGRIB LA RDO RJE BZHIN, ,ZHES GSUNGS PA LTAR RO,, LNGA PA YE SHES KYI PHAR PHYIN LA SLOB TSUL GYI SMON LAM NI, CHOS RNAMS SOGS TE, PHYI NANG GI CHOS RNAMS DAG NI SGYU MA DANG SMIG RGYU DANG SPRUL PA LTA BUR SNANG YANG SNANG BA LTAR GYI DON RANG NGOS NAS MA GRUB PAR MNGON SUM DU YANG DAG PAR RTOGS PAR BGYIS NAS MTHAR 'DZIN GYI RTOG PA'I DRA BA RNAMS NI SPANGS NAS SU 'JIG RTEN GSUM GYI 'GRO BA LA PHAN PA 'BA' ZHIG LHUR LEN PAR GYUR CIG PA'O, ,'DI NI JI LTA BA RTOGS PA'I SHES RAB KYI DBANG DU BYAS PA STE, CHOS GANG LA YANG RANG MTSAN GYIS GRUB PA RDUL TZAM YANG MED PA DANG, THA SNYAD MA BRTAGS MA DPYAD TZAM RGYU 'BRAS 'KHOR 'DAS SOGS 'JOG SHES SHING DE YANG GZHAN NGO TZAM MA YIN PAR RANG LUGS LA BSNYON MED DU KHAS LEN PA DANG, DE 'DRA'I SNANG PHYOGS DANG STONG PHYOGS GNYIS LA NGES PA DRANGS PAS CIG SHOS KYI NGES PA LA MI GNOD PA'I STENG DU LHAG PAR DU'ANG PHAN 'DOGS PA ZHIG DGOS TE, DE 'DRA ZHIG BYUNG NA RTEN 'BREL GYI GNAS LUGS RTOGS PA DANG DBU MA PA CHEN PO ZHES BYA BA'I GRANGS SU 'GRO BA YIN NO, ,BDAG NYID CHEN PO 'DI YANG MGON PO KLU SGRUB KYI RJES 'BRANG GI GTZO BO GCIG TU SNANG BA ZHAR BYUNG DU CUNG ZAD
SMOS KYI, MTHA' DAG PAR NI RGYAL BA'I DBANG PO BLO BZANG GRAGS PA YAB SRAS KYI GSUNG RAB KHO NA LAS SHES DGOS SO,, SMRAS PA, PHYI NANG CHOS KUN LTA BA'I BLO MIG DANG, ,GNAS LUGS RTOGS PA'I SHES RAB MTSON 'CHANG BA, ,RGYAL SRAS DPA' BO SNGON MED DGRA THABS MKHAN, ,KHYOD KYI SPYOD PA'I RNAM SPRUL KYE MA'O MTSAR, ,RANG RGYUD SMIN BYED PHAR PHYIN BCU LA SLOB TSUL BSHAD ZIN TO,, GZHAN DON 'GRUB BYED KYI BSAM PA PHUN TSOGS TSANGS PA'I GNAS PA BZHI LA SLOB PAR SMON PA LA BZHI LAS DANG PO BYAMS PA LA SLOB TSUL NI, PHA DAG SOGS TE TSAD MED BZHI LAS BYAMS PA TSAD MED LA SLOB TSUL YANG 'JIG RTEN NA PHA DAG YID DU 'ONG BA'I BU GCIG PU LA LHAG PAR GCES PAR 'DZIN PA BZHIN DU CHAGS SDANG GI NAG NOG MA LUS PA DAG SPANGS NAS SU 'GRO BA MTHA' DAG LA DMIGS NAS RGYUN MI 'CHAD PAR BDE BA DANG LDAN 'DOD KYI RNAM PA CAN GYI BYAMS PA SGOM PA DAG GIS YANG DAG PAR GNAS PAR BGYI BA YIN NO,, GNYIS PA SNYING RJE TSAD MED SGOM TSUL YANG DPE JI LTAR MA DAG SNYING BRTZE BA'I GZHAN DBANG DU GYUR PA RNAMS KYI KHUR DU LCI BA'I BU NA BA LA RANG NYID KYANG DE DANG SDUG BSNGAL RJES SU MTHUN PAR SPYOD PA DE BZHIN DU BDAG KYANG SDUG BSNGAL GYIS MNAR BA'I 'GRO BA SEMS CAN RNAMS LA SO SOR DMIGS NAS RNAM PA SDUG BSNGAL DANG BRAL BAR 'DOD PA'I SNYING RJE RGYAS PAR GYUR CIG PA'O,, GSUM PA DGA' BA TSAD MED SGOM TSUL NI, SEMS CAN THAMS CAD ZAG MED KYI BDE BA LAS PHA ROL TU PHYIN PA'I BDE BA'I 'BYOR PA MANG PO MTHONG BA STE THOB NAS NI LHAG PAR DGA'
, ,BA MANG PO SKYES PA NA DE LA DMIGS NAS SU SNYING GI DKYIL DU GCES PA'I BU GCIG PU LA BDE BA SKYES PAR MTHONG BA'I PHA BZHIN DU BDE BA DE LTA BU DANG DUS RTAG TU MI 'BRAL BAR 'DOD PA'I RNAM PA CAN GYI DGA' BA SGOM PA DAG GIS GNAS PAR BGYI'O,, BZHI PA BTANG SNYOMS TSAD MED SGOM TSUL NI, SEMS CAN SOGS TE, SEMS CAN 'GA' ZHIG RNAMS LA NYE BA'I BSAM PAS PHAN 'DOGS PA DANG 'GA' ZHIG LA RING BA'I BSAM PAS GNOD PA BYED PA'I RGYUR GYUR PA'I KHONG KHRO BA DANG RJES SU CHAGS PA SPANGS NAS NI RANG GI BU GCES PA LA PHA MAS PHAN PA'I BGYI BA 'BA' ZHIG SGRUB PA BZHIN DU 'JIG RTEN GSUM PO KUN GYI PHAN PA'I BGYI BA 'BA' ZHIG SGRUB PAR BGYI'O, ,ZHES PA STE, DMIGS PA SEMS CAN LA DMIGS NAS RNAM PA CHAGS SDANG DANG BRAL BA'I BTANG SNYOMS SGRUB PA'I RNAM PA CAN NO, ,TSAD MED BZHI DNGOS NI BSAM GTAN GYI DNGOS GZHI'I SEMS LA BRTEN NAS THOB PA'I BYAMS PA SOGS YIN LA, TSAD MED BZHI PO RE RE LA SEMS CAN DANG CHOS DANG DMIGS PA GSUM GSUM DU BYED CING, TSANGS GNAS SU SKYE BA LA 'DI DAG NGES PAR THOB DGOS PAS TSANGS PA'I GNAS PA ZHES GSUNGS PAS TSAD MED PA BZHI SNGAR RGYUD LA SKYE MA MYONG BA'I SEMS CAN MI SRID CING, TSAD MED DPE YI MU MTHA' NI, ,MED PHYIR PHYOGS RNAMS CHEN PO NYID, ,CES GSUNGS PA LTAR PHAN YON TSAD MED PAS TSAD MED PA ZHES BYA'O, ,TSAD MED BZHI LA SLOB PA'I TSUL GYI SMON LAM BSHAD ZIN TO,, GSUM PA RANG GZHAN GYI DON MYUR DU 'GRUB PA'I RGYU DBANG DANG MNGON SHES 'THOB PAR SMON
PA NI, DBANG DANG MNGON SHES SOGS SHLOO KA GCIG STE, TSE DANG YO BYAD LA DBANG BA SOGS DBANG BCU DANG, LHA'I MIG GI MNGON SHES SOGS MNGON PAR SHES PA DANG, SO SO YANG DAG PAR RIG PA BZHI DANG, GZUNGS KYI SGO RNAMS DANG, RNAM PAR THAR PA'I SGO RNAMS TE RANG GZHAN GYI DON 'GRUB PA'I NYE RGYU'I YON TAN GONG MA RNAMS RTOGS SHING THOB PAR BGYIS NAS DPAG TU MA MCHIS PA'I 'JIG RTEN GYI KHAMS RNAMS LA RTAG TU MCHIS PA STE GNAS PA YI SEMS CAN THAMS CAD RNAMS LA GNAS SKABS DANG MTHAR THUG TU PHAN PA MA LUS PA BSGRUB PAR BGYI'O,, BZHI PA GRUB NAS SKYE 'GRO THAMS CAD KYI RE BA SNA TSOGS YID BZHIN DU SKONG BAR SMON PA LA GSUM, SANGS RGYAS KYI MDZAD PA NYE BAR BSGRUBS PAS SEMS CAN GYI DON SGRUB, MDZA' BSHES SU GYUR PA DANG MING TZAM GYIS KYANG SEMS CAN GYI DON SGRUB, 'GRO BA'I MKHO DGU SNA TSOGS SU GYUR PAS SEMS CAN GYI DON SGRUB PA'O,, DANG PO LA GSUM, SANGS RGYAS KYI SGRA MA THOS PA'I 'JIG RTEN DU SANGS RGYAS KYI MDZAD PA NYE BAR SGRUB, SANGS RGYAS MA BYON PA'I 'JIG RTEN DU SANGS RGYAS KYI MDZAD PA NYE BAR SGRUB, SANGS RGYAS MANG POS 'DUL BAR DKA' BA'I SEMS CAN GDUL BAS SANGS RGYAS KYI MDZAD PA NYE BAR SGRUB PA'O,, DANG PO NI, SANGS RGYAS ZHES BYA'I SOGS TE, SANGS RGYAS ZHES BYA BA'I SGRA NI RNA BA'I LAM DU CUNG ZAD KYANG THOS MA MYONG BA'I SEMS CAN GYI YUL KHAMS GANG LAGS PA DER NI GDUL BYA 'DUL BA'I THABS KYI SPYOD PA SNA TSOGS KYIS SEMS CAN 'DUL BA LA YANG DAG PAR RDZOGS PA'I SANGS RGYAS KYI MDZAD PA DANG
, ,MTHUN PAR BSGRUB PAR BGYI'O,, GNYIS PA NI, DUS NAM ZHIG SEMS CAN GYI 'JIG RTEN 'DIR SA GSUM GYI BLA MA SANGS RGYAS KYI NYI MA SHAR BAR MA GYUR PA DE SRID DU BDAG GIS RGYAL BA'I NYI MA JI LTA BA BZHIN DU LUS CAN RNAMS KYI RMONGS PA'I RAB RIB MA LUS PA BSAL BAR BGYI'O,, GSUM PA NI, BDE GSHEGS RAB TU MANG POS SPANGS PA STE DE DAG GIS 'DUL BAR MA NUS PA YI YID DAG SDIG PAS YONGS SU SBAGS PA GANG LAGS PA'I 'GRO BA DE DAG NI BDAG GI TSIG DANG DE DAG GI SPYOD TSUL TZAM LA BRTEN NAS KYANG 'DUL NUS PAR SHOG CIG PA'O, ,YANG NA SDIG PAS SBAGS PA'I YI DVAGS BZHIN DU GDUL BAR DKA' BA'I 'GRO BA DE DAG TSIG TZAM GYIS 'DUL BAR SHOG CES BSHAD KYANG RUNG BAR SNANG BAS 'GYUR MI 'DRA BA GNYIS 'DUG GO, GNYIS PA LA MDZA' BSHES SU GYUR PA'I SGO NAS SEMS CAN GYI DON SGRUB, MING TZAM GYIS KYANG SEMS CAN GYI DON SGRUB PA'O,, DANG PO NI, BDAG NI 'JIG RTEN SOGS TE, BDAG NI 'JIG RTEN GYI SKYE BO MA LUS PA DAG GI BSNYEN BKUR DAG BGYID PA LA DE DAG GI NYE DU DANG YID GCUGS PA'I MDZA' BSHES DANG BYAMS PA'I MA BZHIN DU SGRUB PA DANG, PHA BZHIN DU PHAN PA'I GDAMS NGAG 'DOMS PAR SHOG CIG PA'O,, GNYIS PA NI, BDAG GI MING NI SOGS TE, BDAG GI MING NI DRAN PA TZAM GYIS KYANG 'GRO BA MA LUS PA DAG 'JIGS PA THAMS CAD LAS MDO LA STE DE MA THAG TU SKYOB PAR GYUR CIG DE BZHIN DU SRID PA GSUM GYI SDUG BSNGAL MA LUS PA DAG KYANG BDAG GI MING THOS MA THAG TU SPANGS TE BRAL BAR SHOG CIG GSUM
PA 'GRO BA'I MKHO DGU SNA TSOGS SU GYUR PAS SEMS CAN GYI DON SGRUB PA LA GSUM, BDAG NYID 'GRO BA'I MKHO DGU SNA TSOGS SU GYUR PAS SEMS CAN GYI DON SGRUB PA, BDAG NYID DRAN PA TZAM GYIS 'GRO BA LA MKHO DGU SNA TSOGS 'BYUNG BAR SMON PA, BDAG NYID KYI MING DRAN PAS 'GRO BA LA MKHO DGU SNA TSOGS 'BYUNG BAR SMON PA'O,, DANG PO NI, PHONGS PA BRGYA PHRAG SOGS TE, PHONGS PA BRGYA PHRAG DAG BSTEN PA STE LDAN PA'I MI DAG LA 'DOD RGU STER BA'I BUM PA BZANG PO DANG, NAD PA'I NAD SEL BA'I SMAN DANG, YI DVAGS KYI TSOGS LA YANG RGYUN MI 'CHAD PAR BDUD RTZI'I CHAB KYIS GANG BA'I RDZING BU BZANG POR BDAG NYID 'GYUR BAR SHOG CIG PA'O, ,DE BZHIN DU BDAG NI GRANG BA'I DMYAL BAR DRO BA'I REG BYA DANG, TSA BA'I DMYAL BAR SHIN TU BSIL BA'I RDZI CHAR DANG BCAS PA'I CHAR 'BEBS SHING, GZHAN YANG SHIN TU SMAD PA NGAN 'GRO DAG GI SDUG BSNGAL GYI SNAG GNOD MA LUS PA ZHI BAR BGYID PAR SHOG CIG PA'O,, GNYIS PA NI, 'GRO BAS BDAG NI DRAN PA TZAM GYIS KYANG PHONGS PA MNGON DU GYUR PA DAG LA SDUG BSNGAL SEL BA'I MDZA' BSHES DANG, G-YUL NGOR ZHUGS PAS MDA' LA SOGS PA'I MTSON CHA'I CHAR 'BAB PAS NYAM THAG PA LA GO CHA MCHOG TU SRA BA DANG, MYA NGAN GYIS SEMS GDUNGS PA LA DE SEL BA'I BSIL BA'I CHAR DU GYUR CIG PA'O, ,DE BZHIN DU 'GRO BA DAG GI DRAN PA NYON MONGS PA'I DUG GI CHUS MYOS PA'I GNYEN POR GYUR CIG SRID PA GSUM GYI NYON MONGS PA'I CHU BO DAG LAS BRGAL BA'I THABS SU GYUR PA'I ZAM PA BRTAN PO DANG, NGAN SONG RNAMS KYI SGO
, ,GCOD PA'I SGO GTAN BGYID PAR SHOG CIG PA'O,, GSUM PA NI, SEMS CAN GANG DAG BDAG GI MING TZAM ZHIG DRAN PA'ANG BDAG LA DNGOS SU 'JUS PA BZHIN DU 'GRO BA MA LUS SRID PA 'KHOR BA'I G-YANG SA DAG TU LAS NYON GYI DBANG GIS LHUNG BA ZHI BA MYA NGAN LAS 'DAS PA'I RTZE MO STE MI GNAS PA'I MYANG 'DAS LA 'DZEG PAR 'GYUR BA'I THEM SKAS KYI GZHIR GYUR CIG PA'O, ,DAD CING GUS PAS BDAG GI MING DRAN PAR MA ZAD SKAD CIG TZAM YANG BDAG LA KHRO ZHING BDAG GI MING BLO LA DRAN PA TZAM ZHIG BGYID NA YANG NGAN SONG RNAMS SU LTUNG BAR MI 'GYUR ZHING NGES PAR YANG DAG PAR RDZOGS PA'I BYANG CHUB SGRUB PAR SHOG CIG PA'O, ,DE DAG GI DON BSDU BA NI, MDOR NA BDAG GI YON TAN GYIS ZLA BA'I ZER DRI MA MED PAS GDUNGS BA SEL ZHING BDE BA STER BA LTAR 'JIG RTEN MA LUS PA LA BDE BA STER BAR GYUR CIG THA NA DBUGS PHYIR 'BYUNG BA RNAMS KYANG PHA ROL SEMS CAN LA BDE BA DPAG MED SKYED PAR BGYID PA'I RGYU 'BA' ZHIG TU GYUR CIG CES PA STE, BYANG SEMS SNYING STOBS CHEN PO RNAMS KYIS RGYAS SRAS KYI SPYOD PA LA SLOB PA DANG, SEMS CAN GYI DON SGRUB PA'I TSUL NI CHES BSAM GYIS MI KHYAB BO, ,DE'I PHYIR BDAG CAG RNAMS KYANG 'DI LTA BU LA BSLAB PA'I 'DUN PA YANG DAG PAR SPYOD PA LA 'BAD PA DANG, MCHOG TU SPRO ZHING GUS PAR BYA'O,, 'DIR SMRAS PA, TSAD MED BZHI YI SKYED TSAL NYAMS DGA' BAR, ,RMAD BYUNG YON TAN LANG TSO GSAR PA CAN, ,RGYAL SRAS GZHON NU MTHA' DAG 'GRO BA LA, ,'DOD RGU'I CHAR 'BEBS ROL PA CI YANG STON, ,DE LTAR NA
GNAS SKABS BYANG CHUB SGRUB PA'I THABS RGYAL SRAS KYI SPYOD PA MTHA' YAS PA LA SLOB TSUL BSHAD ZIN TO,, GNYIS PA MTHAR THUG BRNYES NAS LHUN GYIS GRUB PA'I PHRIN LAS KYIS SEMS CAN GYI DON SGRUB PA'I RGYUR BSNGO BA LA MDOR BSTAN, RGYAS PAR BSHAD PA'O,, DANG PO NI, SHIN TU PHUN SUM TSOGS SHING MA LUS PA, ,ZHES SOGS TE, DE LTAR RGYAL SRAS KYI SPYOD PA LA BSLABS PAS SHIN TU PHUN SUM TSOGS SHING PHUN SUM TSOGS PA'I YON TAN MA LUS PA PHA MTHAR PHYIN PA'I SANGS RGYAS KYI GO 'PHANG NYID THOB NAS RANG NYID KYIS BRNYES PA'I GO 'PHANG DAM PA RDZOGS PA'I SANGS RGYAS KYI GO 'PHANG DE NYID KHO NA LA 'GRO BA MA LUS PA YANG SBYAR BAR BGYI'O,, GNYIS PA LA BZHI, SANGS RGYAS NAS GDUL BAR BYA BA'I 'KHOR PHUN SUM TSOGS PA 'GRUB PAR SMON PA, GANG DU SANGS RGYAS KYI MDZAD PA STON PA'I ZHING PHUN SUM TSOGS PA 'GRUB PAR SMON PA, GDUL BYA 'DUL BA'I PHRIN LAS PHUN TSOGS 'GRUB PAR SMON PA, SANGS RGYAS PA'I TSE CHOS STON PA PHUN SUM TSOGS PA 'GRUB PA'I RGYUR BSNGO BA'O,, DANG PO NI, DE YI TSE NA SOGS TE, BDAG SANGS RGYAS PA DE'I TSE NA GDUL BYA'I SKYE BO SU'I SEMS LA YANG NYES BYAS PHRAN TSEGS TZAM YANG MI 'BYUNG ZHING RANG GI SANGS RGYAS KYI ZHING DE'I GDUL BYA DE DAG THAMS CAD SKYE BO GZHAN LA PHAN PA 'BA' ZHIG RGYUN DU BGYID CING, DGE BA BCU'I LAM LA RTAG TU GNAS PAR SHOG CIG PA'O,, GNYIS PA NI, DE'I TSE NA ZHING DE'I GDUL BYA SU YANG RUNG STE, NGAN SONG GI GNAS RNAMS NI RMI LAM NA YANG MTHONG BAR MI 'GYUR ZHING, NGAN 'GRO THAMS CAD KYI GNAS NI
, ,MTHA' DAG KYANG LHA'I 'JIG RTEN BZHIN DU RIN PO CHE'I RANG BZHIN SHIN TU NYAMS DGA' BAR SHOG CIG PA'O, ,'DI NI ZHING YONGS SU DAG PA'I SMON LAM YIN TE, ZHING DER SKYES PHYIN CHAD NGAN SONG DU SKYE MI SRID PA NI ZHING GI YON TAN YIN NO,, GSUM PA NI, JI SRID SOGS TE, NAM MKHA' JI SRID DU SEMS CAN GYI DON 'BAD MED LHUN GRUB TU RGYUN MI 'CHAD PAR MDZAD PA'I SMON LAM NI, JI SRID SA 'OG SA STENG SA BLA'I 'JIG RTEN GSUM GYI MI DGE BA'I MTSO KLUNG NYAM NGA BA'I DBUS SU SEMS CAN 'GA' ZHIG CHUD PAR GYUR NA YANG SANGS RGYAS KYI BGYI BA SEMS CAN GYI DON SGRUB PA'I BYA BA YONGS SU MTHAR PHYIN PAR BYAS ZIN KYANG SEMS CAN 'GA' ZHIG PO DE'I CHED DU DE RNAMS 'KHOR BA LAS MA GROL BA DE SRID DU SNYING RJE CHEN POS BSDAD PAR BGYI'O,, BZHI PA NI, DE LTAR SKU DNGOS KYIS GDUL BAR BYA BA'I DON MDZAD ZIN NAS BDAG NI MYA NGAN LAS 'DAS PAR GROL BA'I TSUL STON PA NA BDAG GI GSUNG RAB RNAMS NI 'KHRUG PAR MI 'GYUR ZHING, GSUNG RAB KYI DON DE LA GDUL BYA 'GA' YANG SOM NYI DANG THE TSOM GYI DPYANG THAG LA SKAD CIG TZAM YANG 'JU BAR MA GYUR CIG CES SO,, SMRAS PA, ,CHOS DBYINGS MAL DU BSAM GTAN DGA' MA LA, ,RTAG TU 'DOD RGUR SPYOD PA'I MTHU LDAN YANG, ,TSON BRGYA NYE BA'I DAG PA'I SHES BZHIN DU, ,SNA TSOGS THABS KYIS ROL PA'I ZLOS GAR RMAD, ,BAR SKABS KYI TSIGS SU BCAD PA'O, ,GSUM PA DON BSDU BA NI SNGAR BSHAD PA DE LTAR RGYAL BA'I SRAS KYI SPYOD TSUL GYI RNAM 'PHRUL LA CHES MNGON PAR DGA' BA'I GZHAN DBANG DU GYUR
PAS BDAG GIS DGE BA BSGRUBS PA GANG YIN PA DE NI MA LUS PAR NI 'GRO BA MA LUS PA 'DI DAG GI THUN MONG DU 'GYUR BAR SHOG CIG CES PA STE DGE BA'I RTZA BA SEMS CAN THAMS CAD LA THUN MONG DU BSNGO STE, DE LTAR NA DE JI LTAR BSNGO BA'I TSUL BSHAD ZIN TO,, BZHI PA 'JUG GI DON LA SLOB DPON GANG GIS MDZAD PA NI SLOB DPON BTZUN PA GZHAN LA PHAN PA'I BSAM PA CAN RTA DBYANGS DGON PA BA ZHES BYA BA, MTSAN GZHAN DPAL LDAN DPA' BO, BDE BAR GSHEGS PA'I GSUNG RAB MTHA' DAG CHUB PAR BYAS PA, STAG GIS RANG LA BSKYON TE NAGS KYI KHUNG DU PHYIN PA NA SNYING RJES GDUNGS PA'I YID KYIS 'GRO BA'I DON DU MDZAD PA'O, ,LO TZTSA BA GANG ZHIG GIS BSGYUR BA NI RGYA GAR GYI MKHAN PO SOGS TE GO SLA'O, ,DE LTAR GONG DU BSHAD PAR DAM BCAS PA LTAR SMON LAM 'DI LA RGYA GAR DANG BOD KYI MKHAS PAS SBYAR BA'I 'GREL PA GZHAN MA MTHONG YANG RTZA BA'I TSIG TZAM LA BRTEN NAS TSIG DON BKROL BA TZAM ZHIG LEGS PAR BYAS SO,, 'DIR SMRAS PA, RNAM DPYOD BZHIN RAS LTA BAS MI NGOMS SHING, ,RTAG TU LHAG BSAM BDUD RTZI'I 'DZUM DKAR CAN, ,LEGS BSHAD ZUR MIG G-YO BAS BLO GSAL GYI, ,GZHON NU'I YID 'PHROG GNYIS PA GZHAN NA GANG, ,GZHAN MED PHAN DANG BDE BA'I RIN CEN GYIS, ,YONGS GANG RGYAL SRAS SPYOD TSUL YID BZHIN MTSO, ,MTHONG TSE DAD DANG GUS DANG DGA' BA YI, ,CHU BOS NYIN BZHIN BDAG RGYUD GTAMS SO KYEE, ,DE SLAD BCU PHRAG BDUN GYI 'DAB PHRENG CAN, ,SPYOD TSUL DRI BZANG RDZOGS PA'I CHU SKYES TSAL, ,RNAM DPYOD NYI MA'I 'OD ZER GYIS PHYE BAS,,
, ,SKAL BZANG BUNG BA'I TSOGS RNAMS MNGON DGAR BYOS, ,DE YI DGE BA DUNG DANG KUN DA DANG, ,ZLA BA'I ZER LTAR DKAR BA GANG THOB DES, ,'GRO BA KUN KYANG RGYAL SRAS SPYOD TSUL LA, ,BRTZON PA DRAG POS RTAG TU SLOB GYUR CIG ,BDAG KYANG SPYAN RAS GZIGS DANG 'JAM DBYANGS LTAR, ,RGYAL SRAS KUN GYI RGYAN DU 'GYUR BA DANG, ,'GRO BA MA LUS SANGS RGYAS GO 'PHANG LA, ,SKAD CIG NYID LA BDE BLAG 'GOD GYUR CIG ,CES SMON LAM BDUN CU PA'I TSIG DON BSHAD PA RGYAL SRAS KYI 'JUG NGOGS ZHES BYA BA 'DI NI, SKYES MCHOG BLO GROS TSUL KHRIMS PAS NYE BAR BSKUL BA LA BRTEN NAS, RGYAL SRAS KYI SPYOD PA LA DAD PA'I BSAM PA CAN DGE 'DUN RGYA MTSO'I DPAL GYIS RI BO CHOS RDZONG DU NYE BAR SBYAR BA'O,, ,,MANGGA LAm,,