, ,RJE THAMS CAD MKHYEN PA'I GSUNG 'BUM THOR BU LAS N'A RO CHOS DRUG GI DMIGS RIM YE SHES MKHA' 'GRO'I ZHAL LUNG ZHES BYA BA BZHUGS SO,,
, ,ZAB LAM N'A RO CHOS DRUG GI DMIGS RIM YE SHES MKHA' 'GRO'I ZHAL LUNG ZHES BYA BA, DPAL RDO RJE SEMS DPA' LA PHYAG 'TSAL LO, ,GANG ZHIG BDE BA CHEN PO'I GNAS LAS NAM YANG MI G-YO DPAL LDAN DE NYID RDO RJE'I GSUNG, ,THUGS GSUNG SKU YI 'KHOR LO KUN LA KHYAB PA'I BDAG NYID RAB MDZES DE NI RDO RJE'I SKU, ,STONG DANG SNYING RJE ZUNG DU 'JUG GANG DPAL LDAN SNYEMS MA'I BDAG PO DE NI RDO RJE'I SEMS, ,DE LTA MOD KYI DUS MTHA'I 'GRO BA LA, ,MGON PO MCHOG DE'I BRTZE BA'I SGYU 'PHRUL LAS, ,GSAL BAR 'ONGS SO BLO BZANG GRAGS PA'I DPAL, ,DBYER MED BLA MA YI DAM ZHABS LA 'DUD, ,BDE CHEN LAM GYI RTOGS PA MTHAR SON PA, ,GRUB PA'I DBANG PHYUG TEE LO N'A RO DANG, ,MAR PA MI LA RGYAL SRAS ZLA BA'I 'OD, ,'GRO BA'I MGON PO PHAG MO GRU PA SOGS, ,PHYAG 'OS RNAMS LA GUS PAS PHYAG BYAS TE, ,ZAB LAM N'A RO'I CHOS DRUG CES
, ,GRAGS PA, ,YID CHES GSUM LDAN LAM GYI RJES 'BRANGS NAS, ,MDO TZAM BSHAD KYIS GUS PAS MNYAN PAR BYOS,, 'DIR ZAB LAM N'A RO'I CHOS DRUG GI DMIGS RIM MDOR BSDUS PA TZAM ZHIG KHRID YIG YID CHES GSUM LDAN GYI RJES SU 'BRANGS NAS BSHAD PAR BYA BA LA GNYIS, SPYI'I RNAM PAR GZHAG PA DANG, LAM GYI NYAMS LEN DNGOS SO,, DANG PO NI, SPYIR BCOM LDAN 'DAS KYI GSUNG RAB THAMS CAD THEG PA CHE CHUNG GNYIS SU 'DUS LA, DE GNYIS KYANG CHED DU BYA BA'I GDUL BYA THEG CHEN GYI RIGS CAN LA GTZO BOR DGONGS TE GSUNGS PA RNAMS NI THEG CHEN GYI GSUNG RAB DANG, CHED DU BYA BA'I GDUL BYA THEG DMAN GYI RIGS CAN LA GTZO BOR GSUNGS PA RNAMS NI THEG DMAN GYI GSUNG RAB TU 'JOG LA, THEG CHEN LA YANG, RGYU PHA ROL TU PHYIN PA DANG, 'BRAS BU RDO RJE THEG PA GNYIS YOD CING, PHA ROL TU PHYIN PA'I THEG PA LA YANG,
MTSAN NYID KYI THEG PA DANG, RGYU'I THEG PA DANG, CHAGS BRAL GYI THEG PA RNAM GRANGS YIN LA, RDO RJE'I THEG PA DANG, GSANG SNGAGS KYI THEG PA DANG, 'BRAS BU'I THEG PA DANG, CHAGS CAN GYI THEG PA RNAMS DON GCIG MING GI RNAM GRANGS SO, ,DE YANG RIM PA LTAR, RDO RJE'I SKAD DOD, BADZRA ZHES PA MI PHYED PA LA 'JUG PAS, THABS SNANG PHYOGS LHA'I 'KHOR LO DANG, STONG PHYOGS DE KHO NA NYID RTOGS PA'I SHES RAB GNYIS BLO GCIG GI STENG DU DUS GCIG TU GRUB PA'I BDE STONG NGO BO DBYER MED PA'I TSUL GYIS 'TSOGS PA NI, SKABS 'DI'I THABS SHES DBYER MED PA'I DON YIN LA, RGYUD SDE BZHI KA'ANG DE LTA BU'I THABS SHES DBYER MED KYI SGO NAS LAM BGROD PA LA KHYAD PAR MED PAS, RDO RJE'I THEG PA 'DIR, 'BRAS BU SANGS RGYAS SA'I GNAS LUS LONGS SPYOD 'PHRIN LAS BZHI YONGS SU DAG PA DANG RNAM PA MTHUN PAR, DA LTA NAS LAM DU BYED PA'I CHA NAS 'BRAS BU'I THEG PA DANG, SNOD MIN LA GSANG ZHING SBAS PA KHO NA LAS DNGOS GRUB SGRUB DGOS PA DANG, YID SDUG BSNGAL LAS SKYOB PA'I DON GYIS GSANG SNGAGS KYI THEG PA DANG, 'DOD YON LA CHAGS PA LAM DU BYED PA'I THEG PA YIN PAS, CHAGS CAN GYIS BGROD PA'I THEG PA ZHES BYA'O, ,RDO RJE THEG PA LA THEG PA'I SGO NAS MI 'DRA BA'I DBYE BA MED KYANG, RGYUD SDE'I DBYE BAS BZHIR YOD PA YIN LA, DE YANG 'DOD YON LA CHAGS PA LAM DU BYED TSUL GYI SGO NAS DBYE NA, LHA PHO MO PHAN TSUN BLTAS PA TZAM LAS BYUNG BA'I CHAGS PA LAM DU BYED NUS SHING, DE LAS RAGS PA'I CHAGS PA LAM DU BYED MI NUS PA'I GDUL BYA LA,
, ,DE TZAM GYI CHAGS PA LAM DU BYED TSUL STON PA BYA BA'I RGYUD DANG, SNGAR GYI DE'I STENG DU LHA PHO MO PHAN TSUN DGOD PA TZAM LAS BYUNG BA'I CHAGS PA LAM DU BYED NUS SHING, DE LAS RAGS PA'I CHAGS PA LAM DU BYED MI NUS PA LA SPYOD PA'I RGYUD DANG, DE GNYIS KYI STENG DU PHAN TSUN LAG PA BCANGS PA TZAM LAS BYUNG BA'I CHAGS PA LAM DU BYED NUS PA'I GDUL BYA LA RNAL 'BYOR RGYUD DANG, DBANG PO GNYIS SBYOR GYI CHAGS PA SHIN TU RAGS PA YANG LAM DU BYED NUS PA'I GDUL BYA LA RNAL 'BYOR BLA MED KYI RGYUD GSUNGS PA YIN TE, SAMBHU tA LAS, LTA DANG DGOD DANG LAG BCANGS DANG, ,GNYIS GNYIS 'KHYUD DANG RNAM PA BZHI, ,SRIN BU'I TSUL GYIS RGYUD BZHIR GNAS, ,ZHES GSUNGS PA LTAR RO, ,CHAGS PA LAM DU BYED PA'I DON YANG, RTZA NYON DRUG GI NANG TSAN GYI 'DOD CHAGS DE NYID LAM DU BYED PA MA YIN GYI, BDE BA LAM DU BYED PA YIN LA, DE YANG THA MAL GANG LA ZHUGS PA NA CHAGS PA LHAG PAR 'PHEL BA'I BYA BA DE LA RNAL 'BYOR PAS ZHUGS KYANG CHAGS PA MI 'PHEL BAR MA ZAD, SHING LAS SKYES PA'I SRIN BUS SHING RTZA BA NAS ZAD PAR BYED PA BZHIN DU, 'DOD YON LA CHAGS PA'I SBYOR BA LAS BYUNG BA'I BDE BAS STONG NYID RTOGS PA'I LAM GYIS CHAGS PA NYID RTZA BA NAS ZAD PAR BYED PA YIN NO, ,DE'I LHAN SKYES KYI BDE BA DANG STONG NYID RTOGS PA NYID YUL YUL CAN DU SBYOR BA, RNAL 'BYOR BLA MED MIN PA GZHAN LA MED KYANG, SPYIR BDE STONG SBYOR BA TZAM NI RGYUD SDE 'OG MA LA'ANG YOD DO, ,GDUL BYA'I SGO NAS KYANG RGYUD SDE BZHIR 'JOG STE, PHYI'I BYA BA GTZANG SBRA DANG KHRUS SOGS
TSABS CHEN PO LA MA LTOS PAR NANG GI RNAL 'BYOR TZAM GYIS RTOGS PA 'DREN MI NUS PA'I RIGS CAN GYI GDUL BYA LA BYA BA'I RGYUD DANG, PHYI'I BYA BA DANG NANG GI RNAL 'BYOR CHA MNYAM DU BYED PA LAS, LAM GYI RTOGS PA 'DREN DGOS PA'I RIGS CAN LA SPYOD PA'I RGYUD DANG, PHYI'I BYA BA DANG NANG GI RNAL 'BYOR GNYIS LAS RNAL 'BYOR GTZO BO GYUR PA'I SGO NAS, LAM GYI RTOGS PA 'DREN DGOS PA'I RIGS CAN LA RNAL 'BYOR RGYUD DANG, PHYI'I BYA BA LA MI LTOS PAR NANG GI RNAL 'BYOR KHO NA'I STOBS KYIS LAM BGROD NUS PA'I RIGS CAN LA RNAL 'BYOR BLA MED KYI RGYUD GSUNGS PA YIN NO, ,RGYUD SDE 'OG MA GSUM YANG SMIN BYED DBANG GI RNAM GZHAG NI BYA SPYOD GNYIS LA THUN MONG BA RIG PA'I DBANG LNGA TZAM BSKUR CING, BYANG SEMS KYI SDOM PA MA GTOGS PA'I GSANG SNGAGS KYI SDOM PA LEN PA YANG MED LA, DE'I PHYIR RDO RJE SLOB DPON GYI DBANG YONGS SU RDZOGS PA DANG DBANG GONG MA GSUM BSKUR BA YANG MED CING, RNAL 'BYOR RGYUD LA SNGAGS SDOM 'DZIN PA DANG RDO RJE SLOB DPON GYI DBANG YONGS SU RDZOGS PA BSKUR BA YOD KYANG DBANG GONG MA GSUM BSKUR BA NI MED DO, ,RGYUD SDE 'OG MA GSUM GYI LAM BGROD TSUL LA, MTSAN BCAS DANG MTSAN MED KYI RNAL 'BYOR GNYIS GNYIS KYI SGO NAS LAM BGROD CING, BSKYED RDZOGS KYI THA SNYAD MED LA, 'BRAS BU THUN MONG GI DNGOS GRUB GRUB CHEN BRGYAD TZAM 'GRUB PAR NUS SO, ,RNAL 'BYOR BLA MED KYI RGYUD LA SNGA RABS PA RNAMS, PHA RGYUD MA RGYUD GNYIS MED KYI RGYUD DANG GSUM DU BYED CING, SNGA MA GNYIS THABS SHES PHYOGS RE BA'I RGYUD YIN PAS
, ,DMAN PA DANG, PHYI MA THABS SHES GNYIS MED KYI RGYUD YIN PAS MCHOG DANG, DE YANG DGYES RDOR LA ZHEN CHE BA RNAMS DGYES RDOR GNYIS MED KYI RGYUD DANG, GSANG 'DUS SOGS PHA RGYUD DANG, BDE MCHOG SOGS MA RGYUD DU SMRA BAR BYED LA, DUS 'KHOR LA ZHEN CHE BA DAG DUS KYI 'KHOR LO GNYIS MED DU 'DOD DO, ,RANG LUGS LA, SPYIR THABS SHES KYI 'JOG TSUL YANG DU MAR YOD DE, SBYIN SOGS BSOD NAMS KYI TSOGS LA THABS DANG, DE KHO NA NYID RTOGS PA LA SHES RAB TU BYAS PA DANG, SNANG PHYOGS LHA'I 'KHOR LO LA THABS DANG, STONG PHYOGS DE KHO NA NYID RTOGS PA LA SHES RAB TU BYAS PA DANG, LHAN SKYES KYI BDE BA CHEN PO LA THABS DANG, STONG NYID RTOGS PA LA SHES RAB TU BYAS PA DANG, KUN RDZOB SGYU MA'I SKU LA THABS DANG, DON DAM 'OD GSAL LA SHES RAB TU BYAS TSUL RNAMS LAS, DANG PO NI, SNGAGS MTSAN NYID GNYIS KA'I THUN MONG BA DANG, GNYIS PA NI RGYUD SDE BZHI GA'I THUN MONG BA DANG, GSUM PA NI RDZOGS RIM KHO NA'I THUN MONG MA YIN PA YIN ZHING, 'DI'I SGO NAS BLA MED KYI RGYUD THAMS CAD GNYIS MED DU 'JOG LA, BZHI PA NI, RDZOGS RIM GYI YANG RTOGS PA MTHON PO'I GNAS SKABS KYI 'JOG TSUL DANG, 'DI'I SGO NAS BLA MED KYI RGYUD LA PHA RGYUD DANG, MA RGYUD GNYIS SU 'BYED PA YIN NO, ,MDOR BSDU NA, BLA MED KYI RGYUD THAMS CAD BDE STONG DBYER MED KYI YE SHES SGRUB TSUL BRJOD BYAR RTZAL DU 'DON PA'I CHA NAS GNYIS MED KYI RGYUD DANG, DE LA DBYE NA PHA RGYUD MA RGYUD GNYIS LAS, LONGS SPYOD RDZOGS PA'I SKU'I NYER LEN KUN RDZOB SGYU MA'I SKU
SGRUB TSUL RTZAL DU BTON NAS 'CHAD CING, DE'I TSOD TZAM DU CHOS SKU'I NYER LEN DON DAM 'OD GSAL GYI YE SHES SGRUB TSUL RTZAL DU BTON NAS MI 'CHAD PA NI PHA RGYUD DANG, DE LAS LDOG PA NI MA RGYUD DU 'JOG PA YIN NO, ,'O NA N'A RO CHOS DRUG GI GDAMS NGAG 'DI PHA RGYUD MA RGYUD GANG LA BRTEN PA YIN ZHE NA, SPYIR NI GTUM MO DANG, LAS RGYA DANG, 'PHO BA GRONG 'JUG SOGS GTZO BOR MA RGYUD PHYOGS LA BRTEN PA DANG, SGYU LUS DANG 'OD GSAL GSANG BA 'DUS PA LA BRTEN NAS 'CHAD PA YIN YANG, NGO BO NI MA RGYUD KYI GDAMS NGAG TU GTOGS TE GTUM MO LA RTZAL DU BTON PA'I SGO NAS, BDE STONG DBYER MED KYI DON DAM 'OD GSAL GYI THUGS RGYAL BA'I CHOS SKU NYID SGRUB TSUL GTZO BOR RTZAL DU BTON NAS 'CHAD PA'I PHYIR RO, ,SPYI'I RNAM PAR GZHAG PA LA MDO TZAM ZHIG SMRAS ZIN LA, MTHA' DAG PAR NI RJE BLA MA YAB SRAS KYI GSUNG RAB LAS SHES PAR BYA'O,, GNYIS PA NI, LAM GANG LA BRTEN NAS NYAMS SU LEN PA'I SNGON 'GRO DANG, DE LA BRTEN NAS JI LTAR NYAMS SU LEN PA'I TSUL LO,, DANG PO LA SPYI'I SNGON 'GRO DANG, KHYAD PAR GYI SNGON 'GRO GNYIS, DANG PO NI, MTSAN NYID DANG LDAN PA'I BSHES GNYEN BSAM SBYOR GNYIS KYI SGO NAS BSTEN PA DANG, DAL 'BYOR DON CHE RNYED DKA' BSAMS PA SOGS NAS GZUNG STE, TSE 'DI LA ZHEN PA LOG NAS SNYING THAG PA NAS TSE PHYI MA DON DU GNYER BA'I SKYES BU CHUNG NGU DANG THUN MONG BA'I BSAM PA DANG, 'KHOR BA MTHA' DAG LA ZHEN PA LOG NAS SNYING THAG PA NAS DE LAS THAR BA'I THAR PA DON DU GNYER BA'I SKYES BU 'BRING DANG THUN
, ,MONG BA'I BSAM PA DANG, RANG NYID ZHI BDE DON GNYER GYI BLO LOG NAS SNYING THAG PA NAS GZHAN DON DU RDZOGS BYANG 'THOB 'DOD KYI SKYES BU CHEN PO'I BSAM PA LA BLO SBYONG TSUL RNAMS NI, THEG PA CHEN PO SPYI'I LAM GYI GZHUNG SHING YIN PAS 'DIR YANG SNYING THAG PA NAS SLOB DGOS SO, ,DE NAS DKYIL 'KHOR MTSAN NYID DANG LDAN PAR ZHUGS PA'I SGO NAS, RDO RJE SLOB DPON MTSAN NYID DANG LDAN PA LAS, DBANG BZHI YONGS SU RDZOGS PA, DBANG DUS SU SLOB MA'I SHES RGYUD KYI STENG DU SKU BZHI'I SA BON THEBS NGES PA ZHIG NGES PAR DGOS TE, DE GNYIS MA THOB PAR LAM RIM GNYIS SGOM PA SKAD BYAS KYANG, LAM BSGOM PA LA MI DBANG BZHIN DU BSGOMS PAR 'GYUR BA DANG, RGYUD SDE DANG MTHUN PA'I RTOGS PA SKYE BA YANG MI SRID PA'I PHYIR RO, ,DE'I 'OG TU DBANG DUS SU KHAS BLANGS PA'I DAM TSIG DANG SDOM PA LA MIG GI 'BRAS BU LTAR GCES SPRAS SU BYED DGOS TE, TSE 'DI LA RTZA LTUNG GIS MA GOS NA, LAM SGOM PA'I RTZOL BA DANG BRAL YANG SKYE BA BCU DRUG TSUN LA SANGS RGYAS 'GRUB PAR GSUNGS PA'I PHYIR RO, ,DA LTA GANG DAG THEG PA'I YANG RTZER 'DZEG PAR KHAS LEN ZHING, SPYOD PA KHYI PHAG LTAR 'BYOL NYOG TU SPYOD PA NI RANG GZHAN THAMS CAD DMYAL BAR 'KHRID PA'I THABS BLA NA MED PA'O, ,'DI DAG BLA MED KYI LAM SPYI'I SNGON 'GRO GTZO BO DANG, LAM 'DI'I YANG SNGON 'GROR MED MI RUNG YIN PAS SHES LDAN DAG GIS 'BAD PA CHEN POS BSGRUB PAR BYA'O,, GNYIS PA KHYAD PAR GYI SNGON 'GRO LA, LAM GYI RTOGS PA RGYUD LA SKYE BA'I GEGS 'GAL RKYEN SDIG LTUNG BSAL BA'I
PHYIR RDO RJE SEMS DPA'I SGOM BZLAS DANG, MTHUN RKYEN BSOD NAMS KYI TSOGS KYI SGO NAS SHES RGYUD LAS RUNG DU BYA BA DANG, BYIN RLABS KHYAD PAR CAN 'JUG PA'I PHYIR BLA MA'I RNAL 'BYOR BSGOM PA'I TSUL NI GO SLA ZHING, YIG BRGYA BZLA BA'I SKABS SU BDE STONG DBYER MED KYI NGES DON GYI RDO RJE SEMS DPA' RNAM PA BDUD RTZI DKAR DMAR MTHING GSUM DU SHAR BAS RANG GI LUS KYI NANG GANG BA DANG, DE'I MTHUS RANG GI SEMS KYANG BDE STONG DBYER MED KYI NGO BOR PHYUR GYIS SONG BAR MOS DGOS SO;; GNYIS PA LA GNYIS, BSKYED RIM LA SLOB TSUL DANG, RDZOGS RIM LA SLOB TSUL LO,, DANG PO NI, LAM 'DI NYAMS SU LEN PA'I SNGON DU, BDE GSANG GANG RUNG GI BSKYED RIM MA MTHA' LHA LNGA YAN CHAD TZAM, SKU GSUM LAM KHYER GYI GNAD TSANG BA LA NGES PAR SLOB DGOS TE, BSKYED RIM GYI SKU GSUM LAM KHYER GYIS, SGRUB PA PO RANG GI SBYANG GZHI THA MAL GYI SKYE SHI BAR DO GSUM YID NGO TZAM DU SBYANGS NAS, YID NGO'I SKU GSUM DU BSGYUR BA'I SGO NAS RGYUD SMIN PAR MA BYAS PAR, RDZOGS RIM GYI SKU GSUM LAM KHYER GYIS SBYANG GZHI DE GSUM DU BSGYUR BA'I SGO NAS GROL BAR BYED MI NUS PA'I PHYIR RO, ,BSKYED RIM LA SLOB TSUL YANG, THA MAL GYI SNANG BA'I GNYEN POR LHA'I RNAM PA LA SLOB CING, THA MAL GYI ZHEN PA'I GNYEN POR LHA'I NGA RGYAL LA BSLAB PAR BYA'O, ,RJE'I RJES 'BRANG KHA CIG BSKYED RIM LA SLOB TSUL GYI SKABS SU SKU GSUM LAM KHYER GYI GNAD GANG YANG MA TSANG BA'I, BDE MCHOG ZHAL BZHI PHYAG BCU GNYIS PA'I MNGON RTOGS TZAM ZHIG SGOM PAR SNANG BA NI, BLA MA YAB
, ,SRAS KYI BZHED PA LAS PHYI ROL TU GYUR PA'O,, GNYIS PA RDZOGS RIM LA SLOB TSUL LA GSUM, GZHI DNGOS PO'I GNAS TSUL, LAM BGROD PA'I RIM PA, 'BRAS BU MNGON DU BYED PA'I TSUL LO,, DANG PO LA GNYIS, LUS KYI GNAS TSUL DANG, SEMS KYI GNAS TSUL LO,, DANG PO LA YANG GSUM, RAGS PA DANG, PHRA BA DANG, SHIN TU PHRA BA LAS, DANG PO NI, 'BYUNG BA 'BYUNG 'GYUR LAS GRUB PA'I SHA RUS RDOS BCAS KYI LUS 'DI NYID DANG, PHRA BA NI, GNAS PA RTZA G-YO BA RLUNG BKOD PA BYANG CHUB KYI SEMS DKAR DMAR RNAMS YIN LA, SHIN TU PHRA BA NI SNYING GA'I RLUNG SEMS SHIN TU PHRA BA'I YA GYAL GYI SROG 'DZIN GYI RLUNG SHIN TU PHRA BA DE NYID DO,, GNYIS PA SEMS KYI GNAS TSUL LA YANG, RAGS PA PHRA BA SHIN TU PHRA BA DANG GSUM LAS, RAGS PA NI SGO LNGA'I DBANG SHES DANG, PHRA BA NI RANG BZHIN BRGYAD CU'I KUN RTOG DANG, SHIN TU PHRA BA NI SHIN TU PHRA BA'I RLUNG SEMS KYI YA GYAL GYI SEMS SO, ,RDZOGS RIM GYI DMIGS PAS RDO RJE'I LUS LA GNAD DU BSNUN PA LA, DE LA RDO RJE'I LUS KYI GNAS GANG DU DMIGS PA GNAD DU BSNUN PA DANG, TSUL JI LTAR BSNUN PA'I TSUL RNAMS SHES DGOS SHING, DE LA THOG MAR GZHI'I LUS SEMS KYI GNAS TSUL SHES PA SHIN TU GAL CHE BA'I PHYIR RO, ,DE YANG GTUM MO 'BAR BA LA GTZO BOR LTE BA'I RTZA 'KHOR GYI DBUS DANG, GNYID DUS DANG, SAD DUS KYI 'OD GSAL GYI RTOGS PA 'CHAR BA'I GNAS MTHAR THUG PA SNYING GA'I RTZA 'KHOR GYI DBUS DANG, RDO RJE NOR BU'I DBUS YIN LA, RMI LAM GYI GNAS SKABS MGRIN PA'I RTZA 'KHOR GYI
DBUS DANG, SPYI BO DANG GSANG GNAS KYI RTZA 'KHOR GNYIS, GTZO BOR SAD PA'I GNAS SKABS SKYED PA'I THIG LE'I GNAS YIN PAS, DGE SBYOR SKYONG TSUL DE DAG DANG SBYAR LA SHES PAR BYA'O,, GNYIS PA LA, LAM BGROD PA'I RIM PA DNGOS DANG, LAM LA BOGS 'BYIN PA'I SPYOD PA'O,, DANG PO LA GNYIS, LAM GYI DNGOS GZHI JI LTAR NYAMS SU LEN TSUL DANG, LAM GYI YAN LAG 'PHO BA DANG GRONG 'JUG NYAMS SU LEN TSUL LO,, DANG PO LA GNYIS, SROG DBU MAR BTZUD PA LAS DGA' BZHI BSKYED TSUL DANG, DE LA BRTEN NAS SGYU MA DANG 'OD GSAL NYAMS SU LEN TSUL LO,, DANG PO LA GNYIS, NANG GI RKYEN GTUM MO'I RNAL 'BYOR LA BRTEN PA DANG, PHYI'I RKYEN LAS RGYA LA BRTEN PA'I TSUL LO,, DANG PO LA DMIGS PA DNGOS DANG, DE LA BRTEN NAS NYAMS MYONG SKYE BA'I RIM PA BSHAD PA'O, ,DANG PO GNAD BZHI TSANG DGOS PAS SGOM PA'I DUS KYI GNAD NI, SNGA DRO RIG PA DVANGS PA'I DUS SAM, PHYI DRO DROD 'PHEL BA'I DUS LA SOGS PA NAM SGOM SPRO BA'I DUS BSGOM, LUS KYI 'DUG STANGS KYI GNAD NI ME THAB DRUG CHINGS SAM, YANG NA RKANG PA SKYIL KRUNG, LAG PA MNYAM GZHAG ,MIG SNA RTZER PHAB, LCE RKAN LA SBYAR, MCHU DANG SO RANG LUGS SU BZHAG ,MGRIN PA YID TZAM DGUG SGAL TSIGS DRANG POR BSRANG STE, RNAM SNANG GI CHOS BDUN LDAN DU BSGOM MO, ,RLUNG GI GNAD NI, RLUNG DGU PHRUGS SU BUS, RLUNG RO PHYIR BSAL, RLUNG HA CANG MI DRAG HA CANG MI ZHAN PAR DAL BUR RGYU 'JUG PA'O, ,GANG DU DMIGS PA GTOD PA'I YUL GYI GNAD NI, LTE BA'I AA THUNG NYID YIN LA, DE YANG RANG
, ,BSKYED RIM NYER BSDU BYAS PA'I HE RU KA ZHAL GCIG PHYAG GNYIS PAR GSAL BA'I NGANG NAS, RTZA'I GTZO BO GSUM GSAL GDAB PA NI, RANG GI LUS KYI DKYIL DRANG PO SGAL TSIGS LA CUNG ZAD NYE BAR RTZA DBU MA SBOM PHRA GRO SOG TZAM YAR SNA TSANGS BUG DANG, MAR SNA LTE 'OG SOR BZHIR BSLEB PA, DE'I G-YAS SU RO MA, G-YON DU RKYANG MA GNYIS KYANG SBOM PHRA DBU MA DANG TSAD MNYAM PA, DBU MA DANG GSHIBS TE LUS KYI SROG SHING GI TSUL DU GNAS PA, YAR SNA TSANGS BUG DANG MAR SNA DH'U T'I'I MAR SNA'I NANG DU ZUG PAR BSGOM MO, ,'KHOR LO BZHI GSAL GDAB PA NI, LTE BAR LTE BA SPRUL PA'I 'KHOR LO RTZA 'DAB DRUG CU RTZA BZHI PA PHYI DBYIBS AE GRU GSUM GYI RNAM PA CAN KHA GYEN DU LTA BA, SNYING GAR SNYING GA CHOS KYI 'KHOR LO RTZA 'DAB BRGYAD PA PHYI DBYIBS WAm YIG ZLUM PO'I RNAM PA CAN, KHA THUR DU LTA BA, MGRIN PAR MGRIN PA LONGS SPYOD KYI 'KHOR LO RTZA 'DAB BCU DRUG PA, PHYI DBYIBS WAm YIG ZLUM PO'I RNAM PA CAN KHA GYEN DU LTA BA, SPYI BOR SPYI BO BDE CHEN GYI 'KHOR LO RTZA 'DAB SO GNYIS PA PHYI DBYIBS AE YIG GRU GSUM GYI RNAM PA CAN KHA THUR DU LTA BA BSGOM MO, ,DE DAG TU YI GE 'GOD TSUL NI, LTE BA SPRUL PA'I 'KHOR LO'I DBUS KYI DH'U T'I'I NANG DU YI GE AA THUNG SHAD KYI RNAM PA CAN KHA DOG DMAR PO, CHE CHUNG YUNGS KAR SBOM PO'I TSAD TZAM GTUM MO'I ME'I RANG BZHIN 'BAR LA KHAD PA, MGO GYEN DU LTA BA, SNYING GA'I RTZA 'KHOR GYI DH'U T'I'I NANG DU ZLA GDAN LA H'Um YIG SNGON PO MGO BO THUR DU LTA BA BYANG SEMS KHA BA LTA BU 'DZAG PA, MGRIN PA'I RTZA 'KHOR GYI DBUS KYI DH'U T'I'I NANG
DU ZLA GDAN LA AOm YIG DMAR PO MGO GYEN DU LTA BA, GTUM MO'I ME'I RANG BZHIN 'BAR LA KHAD PA SPYI BO'I RTZA 'KHOR GYI DH'U T'I'I NANG DU ZLA GDAN LA HAm YIG DKAR PO MGO BO THUR DU LTA BA BYANG SEMS KHA BA LTA BU 'DZAG PA YI GE GSUM GA'ANG CHE CHUNG YUNGS KAR SBOM PO'I TSAD TZAM PA, 'OD SHIN TU 'TSER BA BSGOM MO, ,DE YANG DMIGS RTEN SHIN TU PHRA BA LA SEMS ZIN NA RLUNG 'DU SLA ZHING GEGS NYUNG BA DANG, 'OD SHIN TU 'TSER BA BSGOMS PAS BYING BA GCOD SLA ZHING, BYANG SEMS KHA BA LTA BU 'DZAG PA BSGOMS PAS BDE BA'I NYAMS SKYE SLA BA'I DGOS PA YOD DO, ,DE NAS DMIGS RTEN LA SEMS 'DZIN TSUL NI, THOG MAR LTE BA'I RTZA 'KHOR GYI DH'U T'I'I NANG GI AA THUNG LA RANG GI SEMS ZHUGS PA BZHIN DU, BYING RGOD BRAL BAR 'DZIN PA LA 'BAD DGOS TE; LAM 'DI'I RMANG RDO'AM GZHUNG SHING MTHAR THUG PA NI GTUM MO NYID YIN LA, DE'I DROD SKYE BA LA LTE BAR GNAD DU SNUN PA NYID GAL CHE BA'I PHYIR RO, ,DE'I TSUL YANG MA RGYUD PA THAMS CAD KYIS LHAN SKYES KYI BDE BAS STONG NYID MNGON SUM DU RTOGS PA MTHAR THUG PA'I RGYAL BA'I THUGS CHOS SKU NYID RTZAL DU BTON NAS SGRUB DGOS SHING, DE LA LHAN SKYES KYI BDE BA RGYUD LA SKYE DGOS, DE LA SPYIR DH'U T'I'I NANG GI BYANG SEMS BZHU BA DANG KHYAD PAR SPYI BO'I HAm YIG BZHU BA DGOS SHING, DE LA SPYIR DH'U T'I'I NANG GI GTUM MO 'BAR BA DANG, KHYAD PAR LTE BA'I NANG GI GTUM MO 'BAR BA ZHIG DGOS PA YIN NO, ,DE'I PHYIR LHAN SKYES KYI BDE BAS STONG NYID DON SPYI'I TSUL GYIS RTOGS PA'I 'OD GSAL DANG, MNGON SUM DU RTOGS PA'I DON GYI 'OD GSAL GNYIS
, ,KYI RMANG RDO YANG GTUM MO YIN ZHING, DPE'I 'OD GSAL LAS LUGS LDOG TU MA DAG PA'I SGYU MA'I SKU DANG, DON GYI 'OD GSAL LAS LUGS LDOG TU DAG PA'I SGYU MA'I SKU GRUB DGOS PAS, SGYU LUS KYI RMANG RDO YANG GTUM MO DANG RMI LAM RLUNG STOBS KYIS 'DZIN PA DANG, RLUNG STOBS KYIS 'PHO BAR BYED PA DANG, GRONG 'JUG BYED PA LA YANG SROG DH'U T'IR BSDUS PA'I RTOGS PA ZHIG NGES PAR RNYED DGOS SHING, 'DIR GTUM MO'I RNAL 'BYOR GYI SGO NAS THOG MAR SROG DH'U T'IR SDUD PA YIN PAS DE DAG GI RMANG RDO YANG GTUM MO NYID YIN NO,, GNYIS PA NYAMS MYONG SKYE BA'I RIM PA NI, DE LTAR LTE BA'I AA THUNG LA SEMS ZHUGS PA BZHIN DU BZUNG BAS, BYING RGOD BRAL BAR NYIN ZHAG PHRUGS GCIG LA CHA DRUG TU BTANG BA'I CHA GCIG TZAM GNAS THUB PA'I MTSAMS NAS, ZHUGS GNAS THIM GSUM RNAMS RIM GYIS 'BYUNG LA, DE YANG RLUNG SEMS 'JUG PA GCIG PA'I GNAD KYIS, SEMS BZUNG SA DER RLUNG YANG 'DU BAR 'GYUR BAS, RLUNG DBU MAR ZHUGS PA'I RTAGS SU SNA BUG GNYIS NAS RLUNG MNYAM RGYU BYED PA DANG, DE YANG SHED DRAG ZHAN MTSUNGS PA LAN GCIG TZAM MA YIN PA DANG, DMIGS PA NAM SGOM RES KYIS 'BYUNG BA NGES CAN DU THENGS PA 'BYUNG, GNAS PA'I RTAGS SU STENG GI SNA SGO'I RGYU BA PHRA MO YANG LOG PA 'BYUNG, THIM PA'I RTAGS SU RAGS PA DANG PHRA BA THIM PA GNYIS LAS, DANG PO LA, SA CHU LA THIM PAS SMIG RGYU LTA BU'I NYAMS 'CHAR, CHU ME LA THIM PAS DU BA LTA BU'I NYAMS 'CHAR, ME RLUNG LA THIM PA'I RTAGS SU SRIN BU ME KHYER LTA BU'I NYAMS 'CHAR, RLUNG
RNAM SHES LA THIM PAS MAR ME 'BAR BA LTA BU'I NYAMS 'CHAR, GNYIS PA PHRA BA THIM PA LA, RNAM RTOG GI BZHON PA'I RLUNG SNANG BA LA THIM PA'I SNANG BA'I RANG DUS SU, STON GYI NAM MKHA' G-YA' DAG LA ZLA 'OD KYIS KHYAB PA LTA BU'I NYAMS 'CHAR BA DE NGOS ZIN PAR BYAS TE BDE STONG SBYAR, DE BZHIN DU SNANG BA MCHED PA LA THIM PA'I MCHED PA RANG DUS SU, STON GYI NAM MKHA' LA NYI 'OD KYIS KHYAB PA LTA BU'I DMAR LAM GYI NYAMS 'CHAR, DE NYER THOB LA THIM PA'I NYER THOB RANG DUS SU, STON GYI NAM MKHA' G-YA' DAG PA LA MUN PA 'THUG PO'I SMAG GIS KHYAB PA LTA BU'I NYAMS 'CHAR ZHING, NYER THOB KYI SMAD LA DRAN PA NYAMS TE BRGYAL BAR 'GYUR, DE YAR SANGS PA DANG, STON GYI NAM MKHA' SLOD BYED KYI SKYON GSUM DANG BRAL BA'I STONG SANG GI NYAMS 'CHAR, SKABS DER LTE BA'I GTUM MO KHYAD PAR CAN 'BAR TE, SPYI BO'I BYANG SEMS DH'U T'I'I LAM NAS BZHU BA SPYI BO NAS MGRIN PAR SLEB PA NA DGA' BA, MGRIN PA NAS SNYING GAR SLEB PA NA MCHOG DGA', SNYING GA NAS LTE BAR SLEB PA NA KHYAD DGA', LTE BA NAS NOR BU'I RTZER SLEB PA NA LHAN SKYES KYI BDE BA CHEN PO DRANGS TE, STONG NYID KYI LTA BA PHRA MO DANG SBYAR LA, LHAN SKYES KYI BDE BAS STONG NYID RTOGS PA'I BDE STONG GI YE SHES YUN RING DU BSKYANG, DE LAS LDANG BAR RTZOM PA NA RLUNG SEMS PHRA MO YID NGOR RDO RJE 'CHANG GI SKUR LDANG BAR BYA'O SNYAM PA'I 'PHEN PA'I DBANG GIS, YID NGOR 'OD GSAL LAS LUGS LDOG TU RDO RJE 'CHANG GI LHA'I SKUR LANGS PA DANG DUS MNYAM DU LUGS LDOG GI NYER THOB 'BYUNG, DE LAS MCHED PA, DE LAS SNANG
, ,BA; DE LAS MAR ME LTAR 'BAR BA NAS SMIG RGYU'I BAR 'BYUNG ZHING, DE NAS YID NGO'I RDO RJE 'CHANG GI SKU DE SNGAR GYI PHUNG PO RNYING PA RDO RJE 'CHANG DU BSGOMS PA LA YE SHES SEMS DPA'I TSUL DU ZHUGS, SNA BUG NAS RLUNG RGYUS, YUL SNANG RNAMS SHAR BA NA, GANG SNANG STONG PA, STONG PA BDE BA, BDE BA LHA'I SKUR 'CHAR BA LA SLOB BO, ,DE DAG NI 'OD GSAL CHOS SKU, SGYU MA LONGS SKU, SGYU LUS PHUNG PO RNYING PA LA ZHUGS PA SPRUL SKU STE, SAD DUS KYI BSRE BA SKOR GSUM MO, ,DE 'DRA BA'I RNAL 'BYOR PA DE GNYID DU 'GRO BA NA LTE BA'I AA THUNG LA SEMS SNGAR LTAR BZUNG NAS GNYID LOG PAS, SMIG RGYU NAS MAR ME 'BAR BA LTA BU'I BAR RAGS PA THIM PA'I RTAGS RNAMS DANG, SNANG MCHED THOB GSUM RIM GYIS BRGYUD DE, GNYID KYI 'OD GSAL 'CHAR LA, SKABS DER LTE BA'I GTUM MO 'BAR TE, LUGS LDOG DANG LUGS 'BYUNG GI LHAN SKYES SNGAR LTAR 'DREN, DE NAS RMI LAM 'CHAR BAR RTZOM PA NA 'PHEN PA'I DBANG GIS RMI LAM THA MAL PAR MA SHOR BAR, RLUNG SEMS PHRA MO YID NGO'I RDO RJE 'CHANG GI SKUR LANGS, DE DANG DUS MNYAM DU, LUGS LDOG GI NYER THOB, DE LAS MCHED PA, DE LAS SNANG BA, DE LAS MAR ME 'BAR BA NAS SMIG RGYU'I BAR 'BYUNG, DE NAS YID NGO'I RDO RJE 'CHANG GI SKU DE PHUNG PO RNYING PA RDO RJE 'CHANG DU BSGOMS PA LA ZHUGS, GNYID SAD, SNA BUG NAS RLUNG RGYUS, YUL SNANG RNAMS SHAR BA NA, GANG SNANG STONG PA, STONG PA BDE BA, BDE BA LHA'I SKUR 'CHAR BA LA SLOB BO, ,DE DAG NI, GNYID CHOS SKU, RMI LAM LONGS SKU, SAD PA SPRUL SKU STE, GNYID DUS KYI BSRE
BA SKOR GSUM MO, ,DE 'DRA BA'I RNAL 'BYOR BA DE 'CHI BA NA, LTE BA'I AA THUNG GYEN DU DRANGS, SNYING GA'I H'Um YIG LA BSTIM LA SNGAR LTAR SEMS BZUNG BAS, SMIG RGYU NAS MAR ME 'BAR BA'I BAR RAGS PA THIM PA'I RTAGS DANG, SNANG MCHED THOB GSUM RIM GYIS BRGYUD DE, 'CHI BA 'OD GSAL YID NGO'I LAM GYI 'OD GSAL DU BSGYUR LA BSKYANG, SKABS DER SNYING GA'I KHAMS DKAR DMAR GYI 'DU 'PHROD LA BRTEN PA'I LHAN SKYES KYI BDE CHEN DRANGS LA, STONG PA NYID DANG YUL YUL CAN DU SBYAR LA YUN RING DU BSKYANG, DE LAS RLUNG G-YOS NAS BAR DO 'GRUB PAR RTZOM PA NA, 'PHEN PA'I DBANG GIS SNYING GA'I RLUNG SEMS PHRA MO YID NGOR RDO RJE 'CHANG GI SKUR LANGS, DE DANG DUS MNYAM DU LUGS LDOG GI NYER THOB, DE LAS MCHED PA, DE LAS SNANG BA DE LAS SMIG RGYU'I BAR SNGAR LTAR 'BYUNG ZHING, YID SKU DE SEMS CAN GYI DON DU RAGS PA'I PHUNG PO GZUNG BA DANG, YUL SNANG THAMS CAD BDE STONG GI RNAM ROL TU 'CHAR BA LA SLOB BO, ,DE DAG NI 'CHI BA CHOS SKU, BAR DO LONGS SKU, SKYE BA SPRUL SKU DANG BSRE BA STE, 'CHI DUS KYI BSRE BA SKOR GSUM MO, ,'OG NAS SGYU MA DANG 'OD GSAL SOGS KYI SKABS SU YANG 'DI BZHIN DU DGOS PA DRAN PAR BYA'O, ,GTUM MO'I RNAL 'BYOR BSHAD ZIN TO, ,RGYU MTSAN DES NA, RJE N'A RO PAS RJE BTZUN MAR PA LA GSUNGS PA'I CHOS DRUG RDO RJE'I MGUR LAS, SEMS KYI GNAS THABS LTA BA'I GDENG, ,LUS KYI GNAS THABS SGOM PA'I GDENG, ,PHYI NI SGYU MA LHA YI SKU, ,NANG NA RTZA GSUM 'KHOR LO BZHI, ,'OG NA AA SHAD TZAnd'A L'I, ,STENG NA HAm GI RNAM PA
, ,CAN, ,STENG 'OG RLUNG GI 'KHOR LO BSKOR, ,BAR NA BDE STONG GSAL BA'I NYAMS, ,MING NI GTUM MO'I GDAMS NGAG ZER, ,SEMS GNAD DU TSUD DAM LO TZTSA BA, ,ZHES PAS BSTAN TE, RLUNG GI RNAL 'BYOR LA, RNAL 'BYOR BLA MED KYI PHYOGS LA GTZO CHE BA RLUNG 'JUG GNAS LDANG GSUM GYI GDANGS YI GE GSUM GYI GDANGS SU MOS PA BYED PA RDO RJE'I BZLAS PA DANG, BUM PA CAN DANG GNYIS LAS, 'DIR BLA MA SNGA MA RNAMS KYIS BUM PA CAN GYI RNAL 'BYOR BSHAD SNANG BAS, DE'I TSUL NI SROG THUR GNYIS LTE BA'I DH'U T'I'I NANG DU DMIGS PAS KHA SBYAR DU BYAS LA, RANG GI SEMS LTE BA'I AA THUNG LA BZUNG NAS, GTUM MO'I SKABS BZHIN DU ZHUGS GNAS THIM GSUM GYI RTOGS PA 'DREN PA YIN LA, RNGUB PA DANG, DGANG BA DANG, GZHIL BA DANG, MDA' LTAR 'PHANG BA DANG RNAM PA BZHI'O ZHES PA'I TSUL GYIS BUM PA CAN GYI SGOM TSUL NI, RJE NYID KYI KHRID YIG CHEN MO LAS SHES PAR BYA'O, ,GNYIS PA PHYI'I RKYEN LAS RGYA LA BRTEN TSUL NI, TSE 'DIR KHYAB BYED KYI RLUNG PHRA MO YANG MA LUS PAR MI SHIGS PA'I THIG LE LA THIM PA'I DPE'I 'OD GSAL KHYAD PAR CAN 'DREN PA SKABS SU BAB PA NA, LAS KYI PHYAG RGYA RIGS BZHI GANG RUNG LA BRTEN DGOS PA YIN TE, SGYU MA DAG NI THAMS CAD LAS, ,BUD MED SGYU MA KHYAD PAR 'PHAGS, ,SNANG BA GSUM GYI MTSAN NYID NI, ,GSAL BAR 'DI LAS MTSON PAR 'GYUR, ,ZHES GSUNGS PA LTAR RO, ,'DI'I MAN NGAG ZHIB PA DA LTA 'CHAD PAR SKABS SU MA BAB SNANG BAS BTANG SNYOMS SU GZHAG GO, GNYIS PA DE LA BRTEN NAS SGYU MA DANG 'OD GSAL
NYAMS SU LEN TSUL LA GNYIS, SGYU MA NYAMS SU LEN TSUL DANG, 'OD GSAL NYAMS SU LEN TSUL LO,, DANG PO LA GNYIS, SGYU LUS KYI GDAMS PA DNGOS DANG, DE'I YAN LAG GI GDAMS PA BSHAD PA'O,, DANG PO LA, SGYU LUS GANG LAS GRUB PA'I GZHI, GANG DU LDANG BA'I GNAS, JI LTAR LDANG BA'I TSUL, LANGS PA'I SGYU LUS KYI NGO BO BSHAD PA'O,, DANG PO SGYU LUS KYI SGRUB GZHI NI, SNYING GA'I RLUNG SEMS PHRA MO ZHES GRAGS PA'I YA GYAL GYI SROG 'DZIN GYI RLUNG PHRA MO DE NYID YIN TE, BAR DE GANG LAS SGRUB PA'I SGRUB GZHI DE NYID YIN PA GANG ZHIG ,DE GNYIS SGRUB GZHI LA KHYAD PAR MED PA'I PHYIR, GANG DU LDANG BA'I GNAS NI, THOG MAR SNYING GA'I RTZA 'KHOR GYI DBUS SU LDANG STE, BAR DO DER LDANG BA GANG ZHIG, DE GNYIS LDANG BA'I GNAS MTSUNGS PA'I PHYIR, LUGS LDOG GI NYER THOB SHAR BA DANG SGYU LUS GRUB PA DUS MNYAM ZHING, LUGS LDOG GI NYER THOB DE SGYU LUS PA DE'I SEMS DANG PO GANG ZHIG ,NYER THOB SNYING GA'I DBUS SU 'CHAR BA'I PHYIR, JI LTAR LDANG BA'I TSUL NI, RLUNG THAMS CAD 'CHI RIM JI LTA BA BZHIN DU, SNYING GA'I MI SHIGS PA'I THIG LE LA BSDUS NAS THIM PA'I DPE'I 'OD GSAL KHYAD PAR CAN LAS LUGS LDOG TU 'OD GSAL GYI BZHON PAR GYUR PA'I RLUNG 'OD ZER LNGA PAS NYER LEN DANG 'OD GSAL GYI SEMS DE'I LHAN CIG BYED RKYEN BYAS PA LAS LDANG BA YIN TE, GZHI'I 'CHI BA 'OD GSAL LAS LUGS LDOG TU BAR DO'I LUS DE GRUB PA GANG ZHIG ,DE GNYIS JI LTAR LDANG BA'I TSUL 'DRA BA'I PHYIR RO, ,LANGS PA'I SGYU LUS KYI NGO BO NI, DNGOS GNAS PA'I RDO RJE 'CHANG GI LHA'I SKU
, ,MTSAN DANG DPE BYAD KYIS BRGYAN PA ZHIG YIN LA, DE YANG L'U AI PA DANG, DRIL BU PA'I LUGS KYI BDE MCHOG LHA DRUG CU RTZA GNYIS PA LTA BU LA THUGS DAM DU BYED PA YIN NA, LHA DRUG CU RTZA GNYIS KYI RTEN DANG BRTEN PAR BCAS PA'I DKYIL 'KHOR SNYING GA'I RLUNG SEMS PHRA MO LAS GRUB PA ZHIG KRONG GIS 'BYUNG BA YIN NO, ,SGYU LUS LA MTSAN NYID PA DANG RJES MTHUN PA GNYIS YOD CING, RJES MTHUN PA NI DPE'I 'OD GSAL RNAMS LAS YID NGO'I LHA SKUR LANGS PA'I YID NGO'I LHA RNAMS YIN LA; MTSAN NYID PA LA MA DAG PA'I SGYU LUS DANG DAG PA'I SGYU LUS GNYIS YOD LA, DANG PO NI, GSANG BA 'DUS PA'I PHYOGS NAS, RIM PA GSUM PA'I SGYU LUS ZHES BSHAD PA DE YIN ZHING, DAG PA'I SGYU LUS NI, RIM PA LNGA PA'I SGYU LUS YIN NO,, PHYOGS 'DI'I SNGA RABS PA 'GA' ZHIG ,RJES THOB TU SGYU MA LTA BU'I SKYONG TSUL LA, SGYU LUS KYI GDAMS PA BZHED PAR SNANG MOD, DE NI SPYI DON GYI SGYU MA TZAM YIN GYI, SNGAGS BLA MED KYI SBAS DON GYI SGYU LUS KHYAD PAR CAN GYI DRI TZAM YANG MI BRO'O, ,RGYU MTSAN DES NA CHOS DRUG RDO RJE'I MGUR LAS, DUS RMI LAM TZAM GYI 'KHRUL PA LA, ,GNAS MGRIN PA AA YI SA BON CAN, ,PHYI YI SNANG BA SGYU MA TZAM,, NANG NA NYAMS MYONG SMRA MI BTUB, ,NYIN MTSAN SNANG BA SGYU MA'I SKU, ,MING LA'ANG SGYU LUS KYI GDAMS NGAG ZER, ,YID ZHEN PA LOG GAM LO TZTSA BA, ,ZHES PAS BSTAN, DE DANG 'BREL BA'I GDAMS PA LA RMI LAM DANG BAR DO GNYIS LAS, DANG PO NI, RMI LAM RLUNG STOBS KYIS 'DZIN PA DANG, 'DUN STOBS KYIS 'DZIN PA GNYIS LAS, GTZO CHE SHOS SNGA MA
YIN YANG, 'DIR 'DUN STOBS KYIS 'DZIN PA CUNG ZAD BSHAD NA, DE YANG NYIN PAR DRAN PA RGYUN CHAGS KYIS GZUNG BA NI, NYIN MO'I SNANG BA 'DI THAMS CAD LA 'DI RNAMS THAMS CAD RMI LAM GYI SNANG BA'O SNYAM DU YANG YANG GOMS PAR BYAS PAS, DE'I STOBS KYIS RMI LAM GYI SNANG BA SHAR BA NA 'DI RMI LAM GYI SNANG BA'O SNYAM DU NGOS ZIN PAR 'GYUR TE, NYIN MO'I BAG CHAGS GANG GTZO CHE BA DE RMI LAM DU'ANG 'BYUNG BA SHAS CHE BA'I PHYIR RO, ,MTSAN MO MAN NGAG BTZAN THABS KYIS GZUNG BA NI, RANG HE RU KAR GSAL BA'I MGRIN PA'I RTZA 'KHOR GYI DBUS KYI DH'U T'I'I NANG DU, PADMA 'DAB MA BZHI PA'I LTE BAR AOm YIG DMAR LA SHIN TU 'TSER BA LA SEMS ZHUGS PA BZHIN DU GZUNG, RMI LAM SHAR BA NA RMI LAM DU NGO SHES PAR BYA SNYAM DU DRAN 'DUN DRAG PO BYAS LA, DE NAS RMI LAM ZIN PA NA RMI LAM GYI LUS MANG POR SPEL BA DANG, SNA TSOGS SU BSGYUR BA DANG, ZHING MANG POR LTA BAR 'GRO BA SOGS BYA BAR BLA MA SNGA MA RNAMS BZHED DO, ,GTZO BOR RANG HE RU KAR GSAL BA'I SNYING GA'I H'Um GI 'OD ZER GYIS SNOD BCUD KYI SNANG BA RNAMS RANG LA BSDU, RANG SNYING GA'I H'Um LA BSDU, H'Um ZHABS KYU NAS N'A DA'I BAR LA BSDU, MTHAR N'A DA YANG MI DMIGS PAR BSAMS LA LTA BA'I THOG TU GZHAG GO ,RGYU MTSAN DES NA MGUR LAS, GNYID DANG RMI LAM BAR SHED NA, ,GTI MUG CHOS SKU'I NGO BO CAN, ,BRJOD MED 'OD GSAL STONG PA'I NYAMS, ,RJES LA SPYIR SNANG BDE BAR 'CHAR, ,MING YANG 'OD GSAL GYI GDAMS NGAG ZER, ,SEMS SKYE MED DU GO'AM LO TZTSA BA, ,ZHES PAS BSTAN, BAR DO LA, SPYIR BAR
, ,DO'I MING DU BTAGS PA SKABS 'DI DAG TU DU MA YOD DE, RMI LAM BAR DO, SRID PA BAR DO, SGYU MA BAR DO DANG GSUM YOD PA'I PHYIR RO, ,DE DAG LAS BAR PA MTSAN NYID PA YIN YANG, THA MA GNYIS NI BTAGS PA'O, ,BAR DO'I DGE SBYOR SKYONG TSUL LA'ANG, THOG MTHA' GNYIS NI BTAGS PA'O, ,BAR DO'I DGE SBYOR SKYONG TSUL YANG, RAB 'BRING THA MA GSUM LAS, RAB NI GZHI'I 'OD GSAL LAM GYI DPE'I 'OD GSAL KHYAD PAR CAN DU BSGYUR, DE LAS LUGS LDOG TU THA MAL PA LA BAR DO 'BYUNG BA'I DOD LA, RIM PA GSUM PA'I SGYU LUS GRUB PA STE, 'DI TSE RABS SNGA MA RNAMS SU SNGAGS LAM LA 'JUG MA MYONG NA, 'BRING BAR DOR 'TSANG RGYA BA ZHES BSHAD PA YIN NO, ,'BRING GI SKYONG TSUL NI, GZHI'I 'CHI BA 'OD GSAL YID NGOR LAM GYI 'OD GSAL DU BSGYUR, DE LAS LUGS LDOG TU BAR DO MTSAN NYID PA YIN YANG, YID NGOR RDO RJE 'CHANG GI LHA'I SKUR LANGS PA ZHIG STE, 'DIS KYANG RDO RJE 'CHANG GI GO 'PHANG MNGON DU BYED DO, ,THA MA'I SKYONG TSUL NI, DANG POR BAR DOR NGO SHES PA'I THABS SNGON DU BTANG NAS BAR DO'I DGE SBYOR SKYONG BA'O, ,RGYU MTSAN DES NA, MGUR LAS, RMI LAM DUS KYI NYAMS MYONG DE, ,BAR DO'I SEMS DANG BSRE DGOS TE, ,LONGS SPYOD RDZOGS SKU'I NGO BO CAN, ,RMI LAM BAR DO BSRE 'PHO'I GNAD,, MING YANG BAR DO'I GDAMS NGAG ZER, ,RMI LAM 'BYONGS SAM LO TZTSA BA, ,ZHES GSUNGS SO,, GSUM PA 'OD GSAL NYAMS SU LEN TSUL LA, SPYIR 'OD GSAL GYI MING BTAGS PA LA DU MA YOD DE, 'CHI BA 'OD GSAL DANG GNYID KYI 'OD
GSAL TE GZHI DUS KYI GNYIS DANG, LAM GYI DPE'I 'OD GSAL DANG DON GYI 'OD GSAL GNYIS SU YOD LA, DPE'I 'OD GSAL NI LHAN SKYES KYI BDE BAS STONG NYID DON SPYI'I TSUL GYI RTOGS PA'I 'OD GSAL RNAMS YIN LA, DON GYI 'OD GSAL NI LHAN SKYES KYI BDE BAS STONG NYID MNGON SUM DU RTOGS PA'I 'OD GSAL RNAMS SO, ,SKABS 'DIR 'OD GSAL NYAMS SU LEN TSUL LA, SAD DUS KYI 'OD GSAL NYAMS SU LEN TSUL DANG, GNYID DUS KYI 'OD GSAL NYAMS SU LEN TSUL GNYIS LAS, DANG PO NI, RANG HE RU KAR GSAL BA'I SNYING GA CHOS KYI 'KHOR LO'I DBUS KYI DH'U T'I'I NANG DU, ZLA GDAN LA H'Um YIG SNGON PA 'OD SHIN TU 'TSER BA, YUNGS KAR SBOM PO'I TSAD TZAM ZHIG BSGOM, DE LAS 'OD ZER 'PHROS, SNOD BCUD THAMS CAD LA PHOG THAMS CAD 'OD DU ZHU RANG LA THIM RANG YANG SPYI GTZUG NAS YAS DANG, RKANG MTHIL NAS MAS RIM GYIS 'OD DU ZHU, THUGS KA'I H'Um LA THIM, H'Um YANG ZHABS KYU NAS N'A DA'I BAR DU THIM ZHING, N'A DA SHIN TU PHRA BA LA SEMS YUN RING DU GZUNG, MTHAR N'A DA YANG MI DMIGS PAR BSAMS NAS SEMS LTA THOG TU GZHAG ,DE LTAR BSGOMS PAS ZHUGS GNAS THIM GSUM GYI RTOGS PA RNAMS KYANG SNGAR BZHIN DU 'DREN, DE NAS 'OD GSAL LAS SGYU LUS LDANG BA DANG, SGYU LUS 'OD GSAL DU 'JUG PA'I TSUL YUN RING DU BSKYANGS SHING, MTHAR PHUNG PO RNYING PA RDO RJE 'CHANG DU BSGOM PA LA 'JUG TSUL SOGS KYANG DES SHES SO, ,GNYID DUS SU 'OD GSAL SKYONG TSUL NI, SAD DUS SU RLUNG DH'U T'IR ZHUGS PA'I RTOGS PA RNYED PA ZHIG GIS BYED PA YIN LA
, ,DE'I TSUL YANG GNYID DU 'GRO KHAR, SAD DUS KYI 'OD GSAL RJES GZHIG GI SDUD RIM DE NYID BSGOM PA DANG, GNYID LOG PA SBRAGS PAS, SNANG MCHED THOB GSUM RIM GYIS SHAR TE, GNYID KYI 'OD GSAL MNGON DU BYED LA, DE LAS RLUNG G-YOS NAS RMI LAM 'CHAR BAR RTZOM PA NA, 'PHEN PA'I DBANG GIS RMI LAM THA MAL BAR MA SHOR BAR, SNYING GA'I RLUNG SEMS PHRA MO RDO RJE 'CHANG GI LHA'I SKUR LANGS PA DANG DUS MNYAM DU NYER THOB, DE LAS SMIG RGYU'I BAR 'BYUNG ZHING, SLAR YANG GNYID KYI 'OD GSAL 'DZIN, MTHAR SAD PA NA RAGS PA'I PHUNG PO RNYING PA RDO RJE 'CHANG GI LHA'I SKUR BSGOM PA LA 'JUG PA DANG GNYID SAD PA SBRAG ,DE NAS YUL SNANG THAMS CAD BDE STONG GI RNAM ROL DU 'CHAR BA LA SLOB PA SOGS SNGAR BZHIN BYA'O,, 'DI'I RMI LAM GYI GDAMS PA'I GTZO BO NI GNYID DUS KYI 'OD GSAL SKYONG TSUL 'DI NYID YIN ZHING, DE YANG RDO RJE 'CHANG CHEN PO MNGA' BDAG MAR PA'I ZHAL NAS, PHA RGYUD GSANG BA 'DUS PA LAS, ,SGYU LUS 'OD GSAL GYI GDAMS PA THOB, ,CES GSUNGS PA LTAR, SGYU LUS DANG 'OD GSAL NI GSANG BA 'DUS PA LA BRTEN PA DANG, KHYAD PAR 'OD GSAL SKYONG TSUL NI, GSANG 'DUS NAS BSHAD PA'I RJES GZHIG GI RIM PA 'DI NYID YIN NO, ,DES NA SNGAR BSHAD PA LTAR RDZOGS RIM GYI LAM RNAMS SKYE SHI BAR DO'I SBYONG BYED DU GTZO BOR SBYANG GZHI DE DAG DANG RNAM PA MTHUN PAR BSGOM PA YIN, BSKYED RIM GYI RTOGS PA SKYE BA'I SMIN BYED DU SBYANG GZHI DE DAG DANG RNAM PA MTHUN PAR BSGOM PA YIN LA, DE LTAR BYAS NA BOD GANGS CAN GYI MIG GCIG
PU DPAL BZHAD PA RDO RJES, SNANG BA SKYE SHI BAR DO RU, ,RIG PA SEMS KYI RTZA SBYANG PHYIR, ,LAM BSKYED RDZOGS GNYIS LA 'BAD KYANG 'TSAL,, ZHES GSUNGS PA YANG CHES LEGS PAR BSHAD PAR 'GYUR RO, ,RGYU MTSAN DES NA, RANG LUS DUS KYI TSAD PA PHEBS, ,GZHAN LUS MTSAN LDAN YUL GYI GNAD, ,BAR NA YIG 'BRU RLUNG GI RTA, ,RANG LUS KHANG STONG BZHIN DU SKYUR, ,GZHAN LUS SPRUL SKU'I NGO BO NYID, ,MING YANG GRONG 'JUG GDAMS NGAG ZER, ,RLUNG LAS SU RUNG NGAM LO TZTSA BA, ,ZHES GSUNGS SO,, GNYIS PA LAM GYI YAN LAG 'PHO BA GRONG 'JUG LA GNYIS LAS, 'PHO BA LA, BOD KYI BLA MA RNAMS KYI PHYAG LEN LA 'DI LTAR GNANG STE, RANG HE RU KAR GSAL BTAB, LTE BA'I DBUS SU STENG 'OG GI RLUNG GNYIS KHA SBYAR DU BZUNG, LTE BA'I DH'U T'I'I NANG DU YI GE A'A: DMAR PO, SNYING GAR H'Um MTHING KHA, SPYI BOR KshA YIG SER PO, MDUN GYI NAM MKHAR RTZA BA'I BLA MA'AM RDO RJE RNAL 'BYOR MA LTA BU GSAL BTAB, MKHA' SPYOD DU 'KHRID PA'I GSOL BA MANG DU BTAB, DE NAS 'OG RLUNG 'THEN ZHING HIKKA BRJOD PAS, LTE BA'I RLUNG GIS A'A YIG GYEN DU 'PHUL, DES RANG GI SEMS SNYING GA'I H'Um YIG DANG GCIG TU 'DRES PA GYEN DU PHUL NAS, SPYI BOR SON PAS SPYI BO'I KshA YIG GYEN DU 'PHEL TE, YI GE GSUM GCIG TU 'DRES PA BLA MA YI DAM GYI THUGS KAR RGYANGS KYIS 'PHOS PAR MOS PA YIN GYI SBYONG BA'I SKABS SU SPYI BO NAS THON PAR MI BSAM LA, 'PHO BA BYED PA'I DUS NI, PHYI NANG GI 'CHI LTAS RNAMS KYIS ZIN CING, 'CHI BSLU BYAS KYANG MA LHOGS (BZLOG) NA DE'I TSE BYED PA YIN NO,,
, ,SNGAGS BLA MED KYI 'PHO BA MTHAR THUG PA NI, RJE NYID KYI 'PHO BA'I RNAM BSHAD CHEN MO SOGS SU SHES PAR BYA ZHING, GRONG 'JUG KYANG GZHAN DU SHES PAR BYA'O, ,LAM GYI NYAMS LEN DNGOS BSHAD ZIN TO,, GNYIS PA LAM LA BOGS 'BYIN PA'I SPYOD PA LA, SPROS BCAS SPROS MED SHIN TU SPROS MED GSUM DU YOD CING, SPYOD PA BYED PA'I DUS KYANG BSKYED RIM PA SPYOD PA BYED PA'I DUS GCIG DANG, RDZOGS RIM PA SPYOD PA BYED PA'I DUS GSUM YOD LA, DANG PO NI BSKYED RIM PHRA RAGS MTHAR PHYIN NAS, THUN MONG GI DNGOS GRUB GRUB PA CHEN PO BRGYAD LA SOGS PA'I DON DU YIN LA, RDZOGS RIM PAS SPYOD PA BYED PA'I DUS GSUM GYI DANG PO NI, RIM PA GSUM PA'I SGYU LUS KYI DON DANG, RIM PA BZHI PA'I DON GYI 'OD GSAL GYI DON DANG, GSUM PA NI SLOB PA'I ZUNG 'JUG GI DON DU BYED PA YIN NO,, GSUM PA 'BRAS BU MNGON DU BYED TSUL SNGAR BSHAD PA LTAR, LAM THUN MONG BAS RGYUD SBYANGS DBANG LEGS PAR ZHUGS DAM TSIG DANG SDOM PA LA GCES SPRAS SU BYAS, BSKYED RIM PHRA RAGS LA LEGS PAR BSLAB NAS, RDZOGS RIM ZAB MO'I DMIGS PA RNAMS BSGOMS PAS, RAB TSE 'DI 'BRANG BAR DO THA MA SKYE BA BRGYUD NAS RDO RJE 'CHANG GI GO 'PHANG MNGON DU BYAS TE, JI SRID NAM MKHA' MA STONGS KYI BAR DU LHUN GYIS GRUB PA DANG, RGYUN MI 'CHAD PA'I 'PHRIN LAS SEMS CAN THAMS CAD RANG NYID KYIS BRNYES PA'I GO 'PHANG DAM PA DE NYID LA BDE BLAG TU 'GOD PAR MDZAD PA YIN NO, ,SLAR YANG SMRAS PA, SPRUL PA'I 'KHOR LO'I DBUS SU TZAndA L'I, ,SHIN TU TSA BA'I NGAR LDAN
SGRA GCAN GYI, ,LAM NAS 'GRO ZHING 'ONG BA'I 'BAR 'DZAG GIS, ,DMIGS MED SNYING RJE YID LA 'GROGS PAR BYA, ,'KHOR BA MYA NGAN 'DAS PA KUN GYI GZHI, ,GNYUG MA'I RLUNG SEMS CHOS KYI 'KHOR LO'I DBUS, ,SGYU 'PHRUL DRA BA'I SKU RU RDZOGS PA NA; ;DE TSE SKYE 'CHI'I 'PHRANG LAS GROL BAR 'GYUR, ,RMI LAM BAR DO 'PHRUL PA'I NYAM NGA THANG, ,SGYU MA LTA BU'I TING 'DZIN GYIS BDAS NAS, ,RNAM KUN MCHOG LDAN LONGS SPYOD KUN RDZOGS PA'I, ,ZUNG 'JUG RGYAL BA'I KHANG BZANG RTZE LA 'DZEGS, ,CHOS DBYINGS KUN GSAL BU MO'I LANG TSO LA, ,'KHYUD PA'I BDE BA CHEN PO'I 'OD STONG GIS, ,BRTAN G-YO'I DNGOS KUN CIG CAR GSAL BYED PA, ,DPE DANG DON GYI 'OD GSAL PHYAG RGYA CHE, ,DE LTA'I LAM BZANG BDE BLAG MA RNYED NA, ,RIG 'DZIN DAG PA'I GNAS SU 'PHO BYA ZHING, ,RDO RJE LAM GYI GNAD DU BSNUN GZOD PA'I, ,PHUNG PO'I GRONG DU'ANG BDAG NYID 'JUG PAR BYA, ,KHYAB BDAG RDO RJE 'CHANG DBANG THUGS KYI BCUD, ,GRUB PA'I DBANG PO BYE BAS BGROD PA'I LAM, ,GANG DER 'BAD PA LAS BYUNG DGE BA DES, ,'GRO KUN RDO RJE SEMS DPA' NYID GYUR CIG ,BDAG KYANG DENG NAS TSE RABS THAMS CAD DU, ,DON MED 'JIG RTEN BYA BAS MI G-YENG BAR, ,SANGS RGYAS LAS KYANG DKON PA'I LAM BZANG PO, ,RTZE GCIG BSGOMS PAS MYUR DU MTHAR PHYIN SHOG, CES ZAB LAM N'A RO'I CHOS DRUG GI DMIGS RIM YE SHES MKHA' 'GRO'I ZHAL LUNG ZHES BYA BA 'DI NI RNAM PAR DKAR BA'I BLO GROS DANG BSOD NAMS MCHOG GI SKAL BA CAN SKYA RGYAL DBANG PO'I GSUNG GIS BSKUL BA LA BRTEN NAS, RGYAL BA THAMS CAD KYI BDAG PO RDO RJE 'CHANG DANG THA MI DAD CING,
, ,RGYAL BA KUN LAS LHAG PA'I THUGS RJE CHEN PO DANG LDAN PA MNYAM MED RGYAL BA'I DBANG PO TZONG KHA PA CHEN PO'I KHRID YIG YID CHES GSUM LDAN GYI DGONGS PA BZHIN DU, BTZUN PA DGE 'DUN RGYA MTSO DPAL BZANG POS 'PHYOS RGYAL MTSAN RTZE'I DBEN NAS SU SBYAR BA 'DIS KYANG RDO RJE THEG PA'I BSTAN PA PHYOGS THAMS CAD DU DAR ZHING RGYAS PAR BYED NUS PAR GYUR CIG, ,,BKRA SHIS,,