S05441 · GMLW-004907

—

MNGON PAR RTOGS PA'I RGYAN GYI BSDUS DON RIN PO CHE'I PHRENG BA
נושאיםTopics:the BuddhaRealizationWisdomEnlightenmentthe Wish for Enlightenmentthe Ten Levelsthe Four Truthsthe sixteen aspects of the four truthsGivingJoyous Effort
מחברauthor
05CA
נמצא בfound inPERFECTION OF WISDOM (PRAJNA PARAMITA) (MADHYAMIKA SVATANTRIKA SCHOOL)
מהדורהrecensionnot applicable - a collected works, not a canon edition
פוליוfolios1a–14a
צורהformprose
מצב תרגוםtranslationno English of the text
כיסוי המילון לכותרתdictionary coverage of the title92%
ז'אנרgenreCommentarya BSDUS DON — the meaning of the Ornament gathered under headings, chapter by chapter
פירוש עלa commentary onthe Ornament of Realizations, its eight subjects and seventy topicsthe title says so and the body works through the knowledges in order
הקלאסיקהthe classicthe Ornament of Realizationsthe folder is PHAR PHYIN_PERFECTION OF WISDOM (PRAJNA PARAMITA), general commentaries
מקום החיבורplace of compositionDrok Riwoche Ganden Namgyal Ling'BROG RI BO CHE DGE LDAN RNAM PAR RGYAL BA'I GLING DU SBYAR BA
אנשים ומקומותpeople and places namedGyaltsab Je Darma Rinchen (1364-1432) · Sangye Pel · Rinchen Chogyalthe author, who signs himself one who speaks reasoning and whom the folder names; the Kachu of Tsoton who asked him to make it an easy limb for beginners; and the scribe
רמת קושיleveladvanced scholastic
הכותרת אומתה מול הטקסטtitle verified against the textyesthe head gives the title and ends BZHUGS SO; the record has NO English title, and the author field holds 05CA

הקבציםThe files

S05441_MNGON PAR RTOGS PA'I RGYAN GYI BSDUS DON RIN PO CHE'I PHRENG BA_W29194_05CA.txt/PHAR PHYIN_PERFECTION OF WISDOM (PRAJNA PARAMITA) (MADHYAMIKA SVATANTRIKA SCHOOL)/SPYI_GENERAL COMMENTARIES/RGYAL TSAB RJE DAR MA RIN CHEN (1364-1432)

הטקסטThe text

טיבטיתTibetanS05441_MNGON PAR RTOGS PA'I RGYAN GYI BSDUS DON RIN PO CHE'I PHRENG BA_W29194_05CA.txt36,066 תוויםcharacters
001a

, ,MNGON PAR RTOGS PA'I RGYAN GYI BSDUS DON RIN PO CHE'I PHRENG BA BZHUGS SO,,

001b

RJE BTZUN DAM PA THUGS RJE CHEN PO DANG LDAN PA RNAMS KYI ZHABS LA PHYAG 'TSAL LO, ,BRTZE BAS 'GRO KUN SRID MTSO LAS BSGRAL PHYIR, ,DE NYID ZAB MO THUGS SU CHUD PA YIS, ,SBYIN SOGS PHAR PHYIN SPYOD PA'I GO BSNAMS NAS, ,'GRO BA SKYOB MDZAD BLA MA RNAMS LA 'DUD, ,GSUNG RAB KUN GYI DRANG DANG NGES PA'I DON, ,JI BZHIN GSUNG RAB RGYAL BAS LUNG BSTAN PA, ,RGYAL TSAB DAM PA'I ZHABS DANG 'JAM DBYANGS LA, ,RTZE GCIG GUS PA'I YID KYIS PHYAG 'TSAL LO, ,SKYED MOS TSAL DU TI NI SGOM PA'I TSE, ,THUB PA'I DBANG POS DNGOS SU RJES BZUNG STE, ,LAM MCHOG SHER PHYIN RDZOGS PAR GSAL MDZAD PA, ,RGYAL SRAS BZANG PO'I ZHABS LA GUS PAS 'DUD, ,DUS GSUM SANGS RGYAS KUN GYI BGROD PA'I LAM, ,BYANG CHUB LAM GYI RIM PA'I NGO BO DANG, ,GRANGS DANG GO RIMS JI LTAR NGES PA'I TSUL,,

002a

, ,RGYAS SRAS BZANG PO'I LUGS BZHIN BSHAD PAR BYA, ,DE LA 'DIR BDAG CAG GI STON PA THUGS RJE CAN NYID KYIS GDUL BYA RNAMS KYI DON DU, GSUNG RAB MTHA' YAS PA GSUNGS PA'I NANG NAS SNYING PO'I DON DANG THEG PA GSUM MNGON PAR RTOGS PA'I RIM PA RGYAS PAR STON PA SHER PHYIN GYI MDO NYID YIN, DE LA RGYAS 'BRING BSDUS GSUM, DE RE RE LA GSUM GSUM STE, SDE TSAN DGUR GNAS PA YIN LA, DE RGYAS PA'I RGYAS PA BAM PO LNGA BRGYA PA GCIG YOD PA, RGYA NAG TU 'GYUR PAR KHA CIG LAS BSHAD CING, 'BRING PO BAM PO BZHI BRGYA PA GCIG LO CHEN SOGS BZHUGS PA'I TSE, RGYA GAR NA BZHUGS PAR GRANGS KYANG, BOD DU MA 'GYUR LA, RGYAS PA'I BSDUS PA GZHUNG 'BUM PA 'DI NYID YIN NO, ,YUM BAR MA GSUM NI NYI KHRI DANG, KHRI BRGYAD STONG PA DANG, SHES RAB KHRI PA'O, ,BSDUS PA GSUM NI, BRGYAD STONG PA DANG, YUM CHEN MO BAM PO BCO BRGYAD PA DANG, MDO SDUD PA RNAMS SO, ,DE DAG GI BRJOD BYA SNYING PO'I DON BDEN PAR GRUB PA'I SPROS PA MTHA' DAG DANG BRAL BA DANG, MNGON PAR RTOGS PA BRGYAD DON BCU DANG BCAS PA STON PA LA KHYAD PAR MED CING, DE DAG GI DON BDE BLAG

002b

TU RTOGS PA'I BSTAN BCOS MNGON PAR RTOGS PA'I RGYAN DANG, DE'I DON RTOGS PAR BYED PA'I THABS SLOB DPON 'PHAGS PA DANG, SENGGE BZANG PO'I 'GREL PA LA BRTEN NAS BSHAD PAR BYA'O, ,DE LA GNYIS, GTAN LA DBAB BYA SHER PHYIN DANG, GTAN LA 'BEBS BYED KYI THABS MNGON RTOGS BRGYAD BSHAD PA'O, ,DANG PO LA GSUM, SHES RAB KYI PHA ROL TU PHYIN PA LA MTSAN NYID DANG, SA MTSAMS DANG, DNGOS BTAGS KYI DBYE BA'O, ,DANG PO NI, CHOS BZHIS KHYAD PAR DU BYAS PA'I MTHAR THUG PA'I YE SHES CHOS BZHI NI, RTEN SANGS RGYAS DANG, PHYI ROL DON GYIS STONG PA'I SHES PA DANG, DE YANG YE SHES YIN PA DANG, BDEN STONG SGYU MA LTA BU PA'O, ,DE DAG KYANG RIM BZHIN DU RGYUN MTHA' MAN CHAD KYIS BSDUS PA DANG, MDO SDE PA 'DOD PA LTAR PHYI ROL GYI DON 'DZIN PA'I SHES PA DANG, GZUNG 'DZIN DON GZHAN GYIS STONG YANG SO SKYE'I DBANG SHES SOGS DANG, RNAM RIG PA 'DOD PA LTAR GNYIS STONG GI SHES PA BDEN GRUB TU 'DOD PA BZHI LAS KHYAD PAR DU BYAS PA STE, DE YANG LOG RTOG SEL BA'I MTSAN NYID KYI DBANG DU BYAS PA YIN LA, RIGS MI MTHUN SEL BA'I DBANG DU BYAS NA, SHES BYA JI LTA BA DANG JI SNYED PA MTHA' DAG MNGON SUM DU RTOGS PA MTHAR THUG PA'I YE SHES NI, SHER PHYIN DNGOS KYI MTSAN NYID, GNYIS PA NI, SANGS RGYAS KYI SA KHON NA YOD DO, ,GSUM PA NI, RNAM RDZOGS SBYOR BA LA SOGS LAM SHER PHYIN DANG, GZHUNG SHER PHYIN NI SHER PHYIN BTAGS PA BA'O, ,SHER PHYIN DNGOS LA DBYE NA, ZAG MED KYI YE SHES SDE TSAN NYI SHU RTZA GCIG GO ,BDEN 'DZIN GYIS BCINGS PA DANG, SNYING RJE CHEN PO DANG BRAL BA'I MI RTAG SOGS MNGON SUM DU RTOGS PA'I YE SHES NI, LAM GYI SHER PHYIN

003a

, ,GYI YANG GZUGS BRNYAN NO, ,GNYIS PA LA GNYIS, MNGON PAR RTOGS PA BRGYAD MDOR BSTAN PA DANG, DE NYID DON BDUN CUR RGYAS PAR BSHAD PA'O, ,DANG PO LA BRGYAD KYI, DANG PO RNAM MKHYEN LA GSUM, MTSAN NYID, DBYE BA, SA MTSAMS SO, ,DANG PO NI, SEMS BSKYED SOGS MTSAN NYID KYI CHOS BCU MNGON SUM DU RTOGS PA MTHAR THUG PA'I YE SHES SO, ,'DI NI DE'I SHES BYA BSHAD PA NYID KYIS THEG PA CHEN PO'I LAM GYI LUS YONGS SU RDZOGS PAR GO NUS PA'I DBANG DU BYAS PA YIN NO, ,GNYIS PA NI, GDUL BYA'I LOG RTOG SEL BA'I DBANG DU BYAS NAS, SPYIR RNAM MKHYEN LA DBYE NA, DGOS PA'I GTZO BO MKHYEN PA'I RNAM MKHYEN DANG, SHES BYA'I RNAM PA THAMS CAD MKHYEN PA'I RNAM MKHYEN NO, ,DE GNYIS GCIG LA CIG SHOS KYIS MA KHYAB PA MIN NO, ,GSUM PA NI, SANGS RGYAS KYI SA KHO NA NA YOD DO, ,GNYIS PA LAM SHES PA GSUM, MTSAN NYID, DBYE BA, SA MTSAMS SO, ,DANG PO NI, RANG RGYUD LDAN GYI GANG ZAG DE'I RGYUD KYI STONG NYID MNGON SUM DU RTOGS PA'I SHES RAB KYIS ZIN PA'I MKHYEN PA GANG ZHIG ,BYANG SEMS 'PHAGS PA'I BZHED DON SGRUB PA'I MNGON RTOGS KYI RIGS SU GNAS PA, GNYIS PA DBYE BA NI, LAM SHES KYIS BSDUS PA'I SHES PAR BYA BA'I MNGON RTOGS DANG, MNGON DU BYA BA'I MNGON RTOGS SE, ,DANG PO NI, MI RTAG SOGS BCU DRUG DANG, GZUGS SOGS PHYI ROL DON DU MA GRUB PAR MNGON SUM DU RTOGS PA'I LAM SHES DANG, GNYIS PA NI, STONG NYID MNGON SUM DU RTOGS PA'I LAM SHES SO, ,GSUM PA SA MTSAMS NI, THEG CHEN GYI MTHONG LAM NAS, SANGS RGYAS KYI SA'I BAR LA YOD DO, ,RNGOG LO CHEN PO'I BZHED

003b

PA LTAR, SANGS RGYAS KYIS NA MKHYEN PA GSUM KA YOD PA 'PHAGS SENG GNYIS KA'I BZHED PA YIN NO, ,TSIG TZAM GYIS SEMS KHENGS PA DAG THEG CHEN 'PHAGS PA LA ZHI SHES YOD PA LA, YUM BAR MA'I MDO GNOD BYED DU 'DREN PA NI, MNGON RTOGS KYI RIGS SO SOR 'BYED PA'I RNAM GZHAG GI RTEN DANG, SKYE BA'I RTEN MA PHYED PA YIN NO, ,'GREL PA DON GSAL LAS, DANG ZHES PA'I SGRAS BSDUS PA'I LAM SHES PA NYID LA SOGS PA SNGAR BSHAD PA DAG KYANG YIN NO ZHES SOGS, ZHI SHES THEG CHEN 'PHAGS PA'I RGYUD LA YOD PA'I SHES BYED DU YANG CI'I PHYIR MI 'DREN, SNGAR LTAR KHAS BLANGS PAR RIGS SO, ,GSUM PA ZHI SHES LA GSUM GYI DANG PO ZHI SHES KYI MTSAN NYID, RANG RGYUD KYI GANG ZAG DE'I RGYUD KYI GANG ZAG GI BDAG MED MNGON SUM DU RTOGS PA'I SHES RAB KYIS ZIN PA'I MKHYEN PA GANG ZHIG ,SDUG KUN NYE BAR ZHI BA'I THAR PA SGRUB PA'I MNGON RTOGS KYI RIGS SU GNAS PA, GNYIS PA DBYE BA NI, MI RTAG SOGS BCU DRUG RTOGS PA DANG, GZUNG 'DZIN RDZAS GZHAN GYIS STONG PAR MNGON SUM DU RTOGS PA'I ZHI SHES SO, ,GSUM PA SA MTSAMS NI, 'PHAGS PA'I GANG ZAG MTHA' DAG LA'O, ,'GOG PA LA MNYAM PAR BZHAG BZHIN PA'I TSE ZHI SHES DANG, THEG CHEN SEMS BSKYED SOGS MED PAR 'DOD PA NI, LDAN TSUL GSUM GYI RNAM DBYE MA PHYED PA'O, ,BZHI PA RNAM RDZOGS SBYOR BA LA GSUM GYI DANG PO MTSAN NYID NI, MKHYEN GSUM GYI SHES PA'I RNAM PA BSGOM PA LA DBANG BSGYUR THOB PA'I CHED DU, BSGOM PA'I SEMS PA'I RNAL 'BYOR GNYIS PA DBYE BA NI, MKHYEN GSUM GYI RNAM PA'I 'DZIN STANGS CAN BRGYA DANG BDUN CU RTZA GSUM MO, ,GSUM PA SA MTSAMS

004a

, ,NI, THEG CHEN GYI TSOGS LAM NAS SA BCU RGYUN MTHA'I BAR RO, ,LNGA PA RTZE MO'I SBYOR BA LA GSUM GYI DANG PO MTSAN NYID NI, STONG NYID LA DMIGS PA'I SGOM BYUNG GI SHES RAB KYIS ZIN PA'I SGO NAS, MKHYEN PA'I RNAM PA BSGOM PA RAB TU GYUR PA'I SEMS DPA'I RNAL 'BYOR, GNYIS PA DBYE BA NI, BSDUS NA SBYOR LAM RTZE SBYOR SOGS BZHI DANG, RGYAS PAR NA BRGYA BDUN CU RTZA GSUM MO, ,GSUM PA SA MTSAMS NI, THEG CHEN GYI SBYOR LAM DROD NAS SA BCU RGYUN MTHA'I BAR RO, ,DRUG PA MTHAR GYIS SBYOR LA GSUM GYI DANG PO MTSAN NYID NI, MKHYEN GSUM GYI RNAM PA GO RIMS NGES CAN DU BSGOM PA LA, BRTAN PA THOB PA'I PHYIR TU SGOM PA'I SEMS DPA'I RNAL 'BYOR, GNYIS PA DBYE BA NI, BRTAN BYED KYI SGO NAS BCU GSUM DANG, RNAM PA'I 'DZIN STANGS KYI SGO NAS BRGYA BDUN CU RTZA GSUM MO, ,GSUM PA SA MTSAMS NI, THEG CHEN GYI TSOGS LAM NAS SA BCU RGYUN MTHA'I SNGA LOGS BAR RO, ,BDUN PA SKAD CIG SBYOR LA GSUM GYI DANG PO MTSAN NYID NI, MTHAR GYIS SBYOR BA'I STOBS LAS BYUNG BA'I SEMS DPA'I RNAL 'BYOR MTHAR THUG GO ,GNYIS PA DBYE BA NI, RNAM SMIN MIN PA'I SKAD CIG SBYOR SOGS BZHI, GSUM PA SA MTSAMS NI, SA BCU RGYUN MTHA' KHO NA NA YOD DO, ,BRGYAD PA CHOS KYI SKU LA GSUM GYI, DANG PO MTSAN NYID NI, MKHYEN GSUM GYI RNAM PA SGOM PA'I STOBS KYIS 'BRAS BU MTHAR THUG GO ,GNYIS PA DBYE BA NI, BSDUS NA SKU BZHI DANG, RGYAS PAR NA ZAG MED KYI YE SHES BRGYA ZHE BZHI SOGS SO, ,GSUM PA SA MTSAMS NI, SANGS RGYAS KYI SA KHO NA NA YOD DO, ,GNYIS PA LA GSUM, MKHYEN PA GSUM GYI

004b

LUS CUNG ZAD BSHAD PA DANG, SBYOR BA BZHI'I LUS BSHAD PA DANG, CHOS SKU'I LUS BSHAD PA'O, ,DANG PO LA GSUM GYI, DANG PO RNAM MKHYEN BSHAD PA LA BCU YOD PA'I DANG PO SEMS BSKYED LA GSUM, MTSAN NYID DANG, DBYE BA DANG, SA MTSAMS SO, ,DANG PO NI, GZHAN GYI DON DU RDZOGS PA'I BYANG CHUB DON GNYER GYI 'DUN PA DANG, MTSUNGS LDAN GYI SEMS SO, ,GNYIS PA NI, 'DUN LDAN SEMS BSKYED SOGS NYER GNYIS SO, ,BSAM PA DANG MTSUNGS LDAN GYI THEG CHEN SEMS BSKYED KYI MTSAN NYID DANG, SBYIN PA GTONG 'DOD SOGS KYIS BSDUS PA'I SEMS CAN LA 'DI PHYIR PHAN PA DANG, BDE BA'I BSAM PA DANG, MTSUNGS LDAN GYI RDZOGS PA'I BYANG CHUB THOB 'DOD KYI SEMS SO, ,DE BZHIN DU GZHAN RNAMS LA'ANG JI LTAR RIGS PAR SBYAR BAR BYA'O, ,GSUM PA NI, 'DIR DNGOS SU BSTAN PA THEG CHEN GYI TSOGS LAM CHUNG NGU NAS SANGS RGYAS KYI SA'I BAR YOD LA, THEG CHEN SEMS BSKYED TZAM NI SGOM STOBS KYI THOB PA'I LAM DU MA ZHUGS PA NAS KYANG YOD DO, ,'DI'I RGYAS BSHAD KYI RTZOD LAN GYI SKABS SU t'IKA BYED KHA CIG GIS DGE BA'I CHOS LA 'DUN PA'I MTSAN NYID DON DU GNYER BA SNGA MA BYANG CHUB DON GNYER 'DUN PA LA BSHAD PA NI, BRGYAD STONG 'GREL CHEN ZHIB TU MA MTHONG BA DANG, LAN DANG PO 'DIS THOG MTHA' BAR GSUM DU GAL CHE BA'I SNYING RJE CHEN PO THEG CHEN SEMS BSKYED KYI RGYU RU SGRUB PA'I CHED DU YIN NA CUNG ZAD KYANG MA RTOGS PA DANG, LAN PHYI MA'I DON GNYER GYI 'DUN PA DANG YANG KHYAD PAR MED PAR 'GYUR BAS, PHA ROL TU PHYIN PA'I LAM GYI RIM PA LA GO BA MA SKYES PAS MKHAS PAS BRTAGS NA BZHAD GAD KYI GNAS

005a

, ,SU SNANG NGO, ,GNYIS PA 'DIR BSTAN THEG CHEN GDAMS NGAG LA GSUM GYI DANG PO MTSAN NYID NI THEG CHEN SEMS BSKYED KYI CHED DU GNYER BYA THOB PA'I THABS MA NOR BAR 'DOMS PA'I RJOD BYED DO, ,GNYIS PA DBYE BA NI, BSGRUB PA RANG GI NGO BO LA 'DOMS PA SOGS BCU'O, ,BSGRUB PA RANG GI NGO BO LA 'DOMS PA'I GDAMS NGAG GI MTSAN NYID, KUN RDZOB DANG DON DAM PA'I BDEN PA LAS MI 'DA' BAR TSOGS GNYIS NYAMS SU LEN PA'I RNAL 'BYOR LA 'DOMS PA'I DAG GO ,DMIGS YUL BDEN BZHI LA 'DOMS PA'I GDAMS NGAG GI MTSAN NYID, 'KHOR BAR 'JUG PHYOGS KYI RGYU 'BRAS DANG, LDOG PHYOGS KYI RGYU 'BRAS BDEN BZHI'I GNAS LUGS BSTAN PA BLANG DOR JI LTA BA BZHIN DU RTOGS LA BSGRUBS SHIG CES 'DOMS PA'I NGAG GO ,DE BZHIN DU GZHAN RNAMS LA'ANG, JI LTAR RIGS PAR SBYAR TE, GDAMS DON DANG, GDAMS NGAG GI KHYAD PAR PHYED PAR BYA'O, ,GSUM PA SA MTSAMS NI, THEG CHEN GYI TSOGS LAM DU MA ZHUGS PA'I SNGA ROL NAS KYANG YOD CING, SANGS RGYAS KYI SA'I BAR NA YOD DO, ,GDAMS DON 'BA' ZHIG LA GDAMS NGAG CES PA NI BRGYAD PA'O, ,GSUM PA THEG CHEN NGES 'BYED CHA MTHUN LA GSUM GYI DANG PO MTSAN NYID NI, RIGS MI MTHUN SEL BA'I DBANG DU BYAS NA THEG CHEN GYI DON MNGON RTOGS SO, ,LOG RTOG SEL BA'I DBANG DU BYAS NAS THEG CHEN THAR PA CHA MTHUN GYI RJES SU SKYES PA'I THEG CHEN GYI MNGON RTOGS GANG ZHIG ,MOS SPYOD KYI SAS KHYAD PAR DU 'PHAGS BYAS PA, GNYIS PA DBYE BA NI, THEG CHEN GYI SBYOR LAM DROD RTZE BZOD MCHOG BZHI'O, ,THEG CHEN SBYOR

005b

LAM DROD KYI DMIGS PA'I MTSAN NYID, DE'I SGRO 'DOGS DPYAD PAR BYA BA'I GZHIR GYUR PA'O, ,DE'I NGO BOR GYUR PA'I RNAM PA'I MTSAN NYID, RANG GI DMIGS PA LA KHYAD CHOS PHYIN CI LOG TU SGRO 'DOGS PA'I GNYEN PO BYED PA'I THEG CHEN SBYOR LAM DROD KYI YE SHES SO, , DE BZHIN DU GZHAN RNAMS LA'ANG JI LTAR RIGS PAR SBYAR BAR BYA'O, ,SA MTSAMS NI GO BAR ZAD DO, ,BZHI PA 'DIR DNGOS SU BSTAN PA'I SGRUB PA'I RTEN RANG BZHIN DU GNAS RIGS LA GSUM GYI DANG PO'I MTSAN NYID NI, SGOM CHUNG GTZO BOR GYUR PA'I SKABS KYI THEG CHEN GYI BSGRUB PA DNGOS SU BSTAN PA'I CHOS DBYINGS SO, ,GNYIS PA DBYE BA NI, RTEN CHOS KYI SGO NAS 'DIR DNGOS SU SMOS PA BCU GSUM DANG, THEG CHEN TSOGS LAM GYI RTEN RNAMS SO, ,GSUM PA SA MTSAMS NI, 'DIR DNGOS SU BSTAN PA DROD NAS DANG, SPYIR TSOGS LAM NAS RGYUN MTHA'I BAR NA YOD DO, ,RANG BZHIN DU GNAS PA'I RIGS TZAM NI, SEMS CAN GYI SEMS BDEN PAS STONG PA DRI MA DANG BCAS PA'I DE BZHIN NYID, BDE BAR GSHEGS PA'I SNYING PO ZHES GRAGS PA DE NYID DO, ,LNGA PA THEG CHEN SGRUB PA'I DMIGS PA LA, GNYIS KYI DANG PO'I MTSAN NYID NI, THEG CHEN SGRUB PA'I SGRO 'DOGS DPYAD PAR BYA BA'I GZHIR GYUR PA, GNYIS PA DBYE BA LA, BSDUS NA BCU GCIG DANG, RGYAS PAR NA CHOS THAMS CAD DO, ,DRUG PA THEG CHEN SBYOR BA'I CHED DU BYA BA LA GSUM GYI DANG PO'I MTSAN NYID NI, GANG GI CHED DU BSGRUB PA LA 'JUG PA'I 'BRAS BU MTHAR THUG, ,GNYIS PA DBYE BA CHEN PO GSUM, SA MTSAMS SANGS RGYAS KYI SA NA'O, ,BDUN PA GO CHA'I SGRUB PA LA GSUM GYI DANG PO MTSAN NYID NI, PHAR PHYIN RE RE'I NANG DU DRUG DRUG TSANG BAR BSDUS NAS, NYAMS SU LEN PA'I BSAM

006a

, ,PAS, KHYAD PAR DU BYANG SEMS KYI BYA BA'O, ,GNYIS PA DBYE NA DRUG ,SA MTSAMS NI, THEG CHEN GYI TSOGS LAM NAS SA BCU RGYUN MTHA'I BAR RO, ,BRGYAD PA 'JUG PA'I BSGRUB PA LA GSUM GYI DANG PO MTSAN NYID NI THEG PA CHEN PO'I LAM SBYOR BA GTZO BOR GYUR PA'I SGO NAS NYAMS SU LEN PA'I BYANG SEMS KYI BYA BA'O, ,GNYIS PA DBYE NA DGU ,SA MTSAMS MOS SPYOD KYIS NAS RGYUN MTHA'I BAR RO, ,DGU PA TSOGS SGRUB LA GSUM GYI DANG PO MTSAN NYID NI, BDEN PA GNYIS KYI LAM GYI RIM PA LAS MI 'DA' BAR RANG GI DNGOS 'BRAS BYANG CHEN DNGOS SU 'BYIN PA'I BYANG SEMS KYI BYA BA'O, ,GNYIS PA DBYE BA NI BCU BDUN, SA MTSAMS CHOS MCHOG CHEN PO NAS RGYUN MTHA'I BAR NA'O, ,BCU PA NGES 'BYUNG BSGRUB PA LA GSUM GYI DANG PO MTSAN NYID NI, TSOGS GNYIS KYI STOBS KYIS RNAM MKHYEN DU GDON MI ZA BAR NGES PAR 'BYIN PA'I DAG PA'I RNAL 'BYOR, GNYIS PA DBYE BA BRGYAD, SA MTSAMS DAG PAS GSUM NA'O, ,GNYIS PA LAM SHES BSHAD PA LA GNYIS, LAM SHES KYI YAN LAG DANG, YAN LAG CAN GYI LAM SHES SO, , DANG PO LA GNYIS KYI, DANG PO 'DIR DNGOS SU BSTAN PA'I LAM SHES KYI YAN LAG GI MTSAN NYID, LAM SHES SKYE BA'I GEGS MNGON PA'I NGA RGYAL MNGON GYUR PA DANG BRAL BA SOGS LAM SHES RDZOGS BYED KYI CHA SHAS SU GYUR PA'I SEMS DPA'I RGYUD KYI YON TAN NO, , GNYIS PA DBYE BA NI, 'GAL RKYEN GEGS DANG BRAL BA DANG, LHAN CIG BYED RKYEN SEMS BSKYED DANG, RGYU RIGS DANG, RANG BZHIN DANG, BYED LAS SO, ,GSUM PAS MTSAMS NI, THEG CHEN GYI TSOGS LAM NAS RGYUN MTHA'I BAR RO, ,GNYIS PA LA GSUM GYI DANG PO NYAN THOS

006b

KYI LAM SHES PA'I LAM SHES LA GSUM GYI DANG PO MTSAN NYID NI, BYANG CHUB KYI SEMS KYIS KUN NAS BSLANGS PA'I STONG NYID MNGON SUM DU RTOGS PA'I SHES RAB KYIS ZIN PA DANG, SEMS CAN KUN GYIS SANGS RGYAS THOB PA'I DON DU BSNGO BA DANG, KHYAD CHOS GSUM GYIS KHYAD PAR DU BYAS PA'I MI RTAG SOGS MNGON SUM DU RTOGS PA GANG ZHIG ,NYAN THOS KYI RIGS CAN RJES SU BZUNG BA'I CHED DU SHES PAR BYA BA'I MNGON RTOGS, GNYIS PA DBYE NA, MI RTAG SOGS MNGON SUM DU RTOGS PA BCU DRUG GO ,GSUM PA SA MTSAMS NI, THEG CHEN 'PHAGS PA MTHA' DAG LA YOD DO, ,GNYIS PA RANG SANGS RGYAS KYI LAM SHES PA'I LAM SHES LA GSUM GYI DANG PO MTSAN NYID NI, GZHAN 'DRA BA LA RANG SANGS RGYAS KYI RIGS CAN RJES SU BZUNG BA'I CHED DU BZUNG BYA PHYI ROL DON GYIS DBEN PAR MNGON SUM DU RTOGS PA'I MKHYEN PA'O,, SA MTSAMS THEG CHEN 'PHAGS PA MTHA' DAG GO ,GSUM PA BYANG CHUB SEMS DPA'I LAM SHES LA GNYIS KYI DANG PO PHAN YON CHEN PO CAN GYI THEG CHEN GYI MTHONG LAM LA GSUM GYI DANG PO MTSAN NYID NI, SRID ZHI GNYIS KA'I MTHA' 'GOG BYED KYI BDEN PA MNGON RTOGS SO, , GNYIS PA DBYE NA, SKAD CIG MA BCU DRUG GO ,SA MTSAMS NI, SA DANG PO'I BYA RDZOGS KYI SKAD CIG MA DANG PO NA'O, ,GNYIS PA THEG CHEN GYI SGOM LAM LA GNYIS, SGOM LAM GYI BYED PA DANG, BYED PA CAN GYI SGOM LAM MO, ,DANG PO LA, MTSAN NYID NI, THEG CHEN SGOM LAM SGOM STOBS KYIS THOB PA'I YON TAN NO, ,DBYE NA DRUG GO ,GNYIS PA LA GNYIS KYI DANG PO ZAG BCAS SGOM LAM LA GSUM, MOS PA YID LA BYED PA BLA NA MED PA'I SGOM LAM DANG, BSNGO BA DANG, RJES SU YI RANG BA BLA NA MED PA'I SGOM LAM MO, ,DANG PO LA DNGOS DANG, DE'I PHAN YON NO, ,DANG PO LA

007a

, ,MTSAN NYID NI, YUM DON GSUM GYI 'BYUNG GNAS SU YID CHES PA'I THEG CHEN GYI RJES LA MNGON RTOGS SO, ,DBYE NA NYER BDUN, SA MTSAMS SA DANG PO NAS BCU PA'I BAR RO, ,GNYIS PA NI, 'DIR DNGOS SU BSTAN PA'I SGOM LAM MOS PA'I PHAN YON GYI MTSAN NYID NI, SANGS RGYAS DANG BYANG CHUB SEMS DPA' RNAMS MOS PA GSUM SGOM PA'I BYANG SEMS LA CHA DE NAS THUGS DGYES PA'I CHA DANG, DNGOS GNAS KYI YON TAN BRJOD PA'I CHA GANG RUNG NGO, ,GNYIS PA BSNGO BA YID LA BYED PA BLA NA MED PA'I SGOM LAM LA MTSAN NYID NI, RANG GZHAN GYI DGE BA RDZOGS PA'I BYANG CHUB KYI YAN LAG TU BSGYUR BAR BYED PA'I BYED LAS KYIS KHYAD PAR DU BYAS PA'I ZAG PA DANG BCAS PA'I THEG CHEN GYI RJES LA MNGON RTOGS DBYE NA BCU GNYIS SO, ,SA MTSAMS SNGA MA LTAR RO, ,GSUM PA LA GSUM LAS, MTSAN NYID NI THEG CHEN GYI RJES LA MNGON RTOGS ZAG BCAS GANG ZHIG RANG BZHIN GYI DGE BA LA DGA' BA SGOM PA'I DANG BA'O, ,DBYE BA NI GNYIS SO, ,SA MTSAMS GONG DANG 'DRA'O, ,GNYIS PA ZAG MED SGOM LAM LA GNYIS, BSGRUB PA BSGOM LAM DANG, RNAM DAG SGOM LAM MO, ,DANG PO LA GNYIS, THEG CHEN BSGRUB PA SGOM LAM GYI MTSAN NYID NI, ZAG PA MED PA'I THEG CHEN GYI RJES LA MNGON RTOGS GANG ZHIG RANG 'BRAS RTOGS PA MTHAR THUG PA'I LAG RJES 'JOG BYED KYIS KHYAD PAR DU BYAS PA, DBYE NA LNGA, GNYIS PA RNAM DAG SGOM LAM GYI MTSAN NYID NI, DE GANG ZAG GI SPANGS PA MTHAR THUG PA'I LAG RJES 'JOG PAS KHYAD PAR DU BYAS PA, DBYE NA DGU ,GNYIS KA'I SA MTSAMS SA DANG PO

007b

NAS BCU PA'I BAR RO, ,GSUM PA ZHI SHES BSHAD PA LA BZHI, 'BRAS YUM LA NYE RING GI RGYU MTSAN DANG, RGYU MTSAN DE BSGRUB PA DANG, MI MTHUN PA DANG, GNYEN PO'I PHYOGS KYI DBYE BA DANG, ZHI SHES KYI SBYOR BA'O, ,DANG PO LA SRID MTHA' 'GOG PAS KHYAD PAR DU BYAS PA'I LAM SHES KYI MTSAN NYID NI, THABS SNYING RJE CHEN POS DNGOS SU ZIN CIG MI RTAG SOGS MNGON SUM DU RTOGS PA'I THEG CHEN 'PHAGS PA'I RGYUD KYI MKHYEN PA'O, ,ZHI MTHA' 'GOG PAS KHYAD PAR DU BYAS PA'I MTSAN NYID, SNYING RJE CHEN PO'I SGO NAS KUN RDZOB LA BLTOS PA'I ZHI MTHA' 'GOG PAS RAB TU PHYE BA'I THEG CHEN 'PHAGS PA'I MNGON RTOGS, SA MTSAMS NI, GNYIS KAS DANG PO YAN CHAD NA YOD DO, ,GNYIS PA NI, 'BRAS YUM LA RING BA'I ZHI SHES DANG, 'BRAS YUM LA NYE BA'I ZHI SHES GNYIS, DANG PO'I MTSAN NYID NI, THABS SNYING RJE CHEN PO DANG BRAL ZHING, BDEN MED MNGON SUM DU RTOGS PA'I SHES RAB KYIS MA ZIN PA'I MKHYEN PA'O, ,SA MTSAMS NYAN RANG GI MTHONG LAM NAS MI SLOB LAM PA'I BAR RO, ,'BRAS YUM LA NYE BA'I ZHI SHES KYI MTSAN NYID, MI RTAG SOGS MNGON SUM DU RTOGS SHING, THABS SHES KHYAD PAR CAN GYIS ZIN PA'I BYANG SEMS 'PHAGS PA'I MKHYEN PA'O, ,SA MTSAMS THEG CHEN GYI MTHONG LAM NAS SA BCU RGYUN MTHA'I BAR LA'O, ,GSUM PA LA MI MTHUN PHYOGS KYI ZHI SHES KYI MTSAN NYID, THABS SHES KHYAD PAR CAN GYIS MA ZIN PA'I MKHYEN PA'O, ,SA MTSAMS THEG DMAN 'PHAGS PA MTHA' DAG LA'O, ,GNYEN PO PHYOGS KYI ZHI SHES KYI MTSAN NYID, MI RTAG SOGS MNGON SUM DU RTOGS PA'I MKHYEN PA GANG

008a

, ,ZHIG ,THABS SHES KHYAD PAR CAN GYIS DNGOS SU ZIN PA'O, ,SA MTSAMS THEG CHEN GYIS MTHONG LAM NAS SO, ,BZHI PA ZHI SHES KYI SBYOR BA DANG, DE'I 'DZIN STANGS DANG, DE'I 'BRAS BU'O, ,DANG PO 'DIR DNGOS BSTAN ZHI SHES KYI SBYOR BA'I MTSAN NYID, GZHI'I KUN RDZOB PA DANG, DON DAM PA'I SDOD LUGS GANG RUNG LA PHYIN CI LOG TU ZHEN PA'I 'GOG PA'I SEMS PA'I RNAL 'BYOR RO, ,DBYE NA BCU, 'DIR KHYAD GZHI'I SGO NAS SBYOR LAM DANG SBYAR YANG, SA BCU PA'I BAR NA YOD DO, ,GNYIS PA LA 'DIR BSTAN ZHI SHES SBYOR BA'I MNYAM NYID KYI MTSAN NYID NI, GZHI'I DBYE BA DANG, MTSAN MTSON DANG, YUL CAN LA PHYIN CI MA LOG TU 'GOG PAS ZHEN PA KHYAD PAR DU BYAS PA'I SEMS DPA'I SBYOR BA'I 'DZIN STANGS SO, , LDOG PAS DBYE NA BZHI YOD, GSUM PA NI, 'DIR BSTAN THEG CHEN MTHONG LAM GYI MTSAN NYID SPROS BRAL MNGON SUM DU RTOGS PA'I THEG CHEN GYI BDEN PA MNGON RTOGS SO, ,SHES MTHONG GIS BLTAS NAS 'DA' BAR BYA BA'I MNGON RTOGS BYANG SEMS KYI MTHONG LAM GYIS BSDUS PA NI, 'DIR SHUGS LA BSTAN PA STE, SNGAR BSHAD ZIN TO, ,GNYIS PA SBYOR BA BZHI BSHAD PA LA, BZHI YOD PA'I DANG PO RNAM RDZOGS SBYOR BA BSHAD PA LA GNYIS, SPYI'I RNAM GZHAG DANG, LAM RGYUD LA SKYE BA'I RIM PA DNGOS SU BSTAN PA'O, ,DANG PO LA BZHI, LAM SHER PHYIN GYI RNAL 'BYOR SGOM PA'I 'DZIN STANGS KYI DBYE BA DANG, SBYOR BA'I DBYE BA DANG, SBYOR BA SGOM PA'I YON TAN DANG, 'GAL RKYEN SKYON BSHAD PA DANG, LAM SHER PHYIN GYI RNAL 'BYOR DU MTSON PA'I MTSAN NYID

008b

DO, ,DANG PO NI, 'DIR DNGOS SU BSTAN PA'I SBYOR BA'I RNAM PA'I MTSAN NYID, SBYOR BA'I YUL LAM 'DZIN STANGS KYI BYE BRAG GO ,DBYE NA BRGYA BDUN CU RTZA GSUM MO, ,DON GZHAN NI RNAM BSHAD DU BSHAD ZIN TO, ,GNYIS PA NI, 'DIR DNGOS SU BSTAN PA'I GTZO BO'I SBYOR BA'I MTSAN NYID, YUL YUL CAN DANG GZHI LAM RNAM GSUM BDEN STONG SPROS BRAL DU RTOGS PA'I ZHI LHAG ZUNG 'BREL GYI SEMS DPA'I RNAL 'BYOR, SA MTSAMS THEG CHEN GYI SBYOR LAM DROD NAS RGYUN MTHA'I BAR RO, ,'DIR DNGOS SU BSTAN PA'I THEG CHEN GYI SBYOR BA TZAM GYI MTSAN NYID, MKHYEN GSUM GYI RNAM PA BSGOM PA LA DBANG THOB PA'I CHED DU BSDUS TE SGOM PA'I SEMS DPA'I RNAL 'BYOR RO, ,DBYE NA SBYOR BA NYI SHU DANG, SA MTSAMS THEG CHEN GYI TSOGS LAM NAS SO, , BCAS KYI SGRAS BSTAN PA, SBYOR BA SGOM PA'I RTEN GANG ZAG GI MTSAN NYID, SANGS RGYAS LA BKUR STI SOGS KYI SGO NAS DGE RTZA SOGS LA MKHAS PA'I SEMS DPA'O, ,SA MTSAMS THEG CHEN GYI TSOGS LAM MA THOB PA'I SNGA LOGS NAS KYANG YOD DO, ,GSUM PA THEG CHEN SBYOR BA'I YON TAN GYI MTSAN NYID, THEG CHEN SBYOR BA SGOM STOBS KYI THOB PA'I PHAN YON NO, ,DBYE NA BCU BZHI'O, ,SBYOR BA'I SKYON GYI MTSAN NYID, SBYOR BA SKYES PA'AM GNAS PA'I GEGS BYED DO, ,DBYE BA ZHE DRUG GO ,SKYON 'DI DAG SHES PAR BYAS NAS DES MA GOS PA'I SGO NAS SBYOR BA BSGOM PA LA MKHAS PAR BYAS NA, DGE BA'I BSHES GNYEN BSTEN TSUL PHYIN CI MA LOG PA SHES PA LA DGONGS NAS, BSHES GNYEN BSTEN TSUL RTZA BA'I DNGOS BSTAN GYI RIM PA LA MA BSDUS PA YIN NO,,

009a

, ,LNGA PA LAM SHER PHYIN GYI RNAL 'BYOR GYI MTSAN NYID, 'BRAS BU'I SHER PHYIN THOB BYED KYI THABS SU GYUR PA'I ZHI LHAG ZUNG 'BREL GYI SEMS DPA'I BYA BA'O, ,DBYE NA MTSAN NYID DGU BCU RTZA GCIG GO ,SA MTSAMS THEG CHEN GYI TSOGS LAM NAS RGYUN MTHA'I BAR RO, ,GNYIS PA LA BZHI, SBYOR BA SKYES PA'I SKABS DANG, SMIN PA'I SKABS DANG, RTEN GYI GANG ZAG DANG, GANG ZAG GI SGOM RIM MO, ,DANG PO'I 'DIR DNGOS SU BSTAN PA'I THEG CHEN THAR PA CHA MTHUN GYI MTSAN NYID BSKAL PA GRANGS MED GSUM DU TSOGS BSAGS NAS, SANGS RGYA BA'I CHED DU RNAM MKHYEN RANG RGYUD LA MA SGRUB PAR MKHAS PA'I SEMS DPA'I RGYUD KYI CHOS MNGON RTOGS SO, ,DBYE BA BSDUS NA LNGA DANG, RGYAS PAR NA ZAG PA MED PA'I YE SHES SDE TSAN NYI SHU RTZA GCIG GI RTOGS PA'I RIGS TSANG BA YOD DO, ,GNYIS PA NI, 'DIR BSTAN THEG CHEN NGES 'BYED CHA MTHUN GYI MTSAN NYID, GTZO BO THABS KYI CHAS KHYAD PAR DU BYAS PA'I SEMS DPA'I DON MNGON RTOGS SO, ,DBYE NA BCU GNYIS SO, ,GSUM PA NI, SLOB PA PHYIR MI LDOG PA'I MTSAN NYID, DKON MCHOG GSUM LA SKYABS GNAS YANG DAG YIN MIN THE TSOM ZA BA'I THE TSOM MNGON GYUR PA DANG, BRAL BA SOGS KYI RTAGS GANG RUNG THOB PA'I SEMS DPA'O, ,DBYE NA GSUM, SA MTSAMS DBANG PA RNON POS THEG CHEN GYI SBYOR LAM DROD YAN CHAD NA YOD DO, ,BZHI PA LA GSUM GYI, DANG PO SRID ZHI MNYAM NYID KYI SBYOR BA'I MTSAN NYID, RJES KYI SKABS SU YANG BDEN 'DZIN MNGON GYUR SKYE BA'I GO SKABS BCOM PA'I DAG SA LA GNAS PA'I

009b

SEMS DPA'I YE SHES SO, ,SA MTSAMS SA BRGYAD PA NAS SO, ,GNYIS PA ZHING DAG BLA NA MED PA'I SBYOR BA'I MTSAN NYID, RANG GANG DU SANGS RGYA 'GYUR GYI ZHING KHYAD PAR CAN 'GRUB PA'I DGE RTZA NUS PA MTHU CAN DU 'GYUR BA'I DAG SA LA GNAS PA'I SEMS DPA'I YE SHES SO, ,SA MTSAMS SNGA MA LTAR RO, ,GSUM PA THABS MKHAS SBYOR BA'I MTSAN NYID, 'BAD RTZOL RAGS PA ZHI BA'I SGO NAS 'PHRIN LAS LHUN GYIS GRUB PA'I DAG SA LA GNAS PA'I SEMS DPA'I YE SHES SO, ,DBYE NA BCU'O, , SA MTSAMS SNGA MA LTAR RO, ,GNYIS PA GTZO BO'I SBYOR BA BSHAD PA LA BZHI'I DANG PO, SBYOR LAM RTZE SBYOR BSHAD PA LA DROD KYI RTZE SBYOR GYI MTSAN NYID, SAD DUS SU ZHI LHAG ZUNG 'BREL GYI SGO NAS STONG NYID SGOM PA'I STOBS KYIS RMI LAM NA YANG CHOS KUN BDEN STONG SGYU MA LTA BUR RTOGS PA LA SOGS PA'I RTAGS BCU GNYIS GANG RUNG THOB PA'I NGES 'BYED CHA MTHUN DANG PO'O, ,STONG NYID LA DMIGS PA'I BSGOM BYUNG GI STOBS KYIS THOB DGOS YIN GYI, SPYIR RMI LAM NA CHOS KUN RMI LAM LTA BU'O SNYAM DU DRAN PA TZAM NI, SO SKYE THA MAL PA LA'ANG DU MA ZHIG 'BYUNG NGO, ,DBYE NA BCU GNYIS SO, ,RTZE SBYOR RTZE SBYOR GYI MTSAN NYID SHER PHYIN SGOM STOBS KYIS STONG GSUM DANG, MNYAM PA'I SANGS RGYAS MCHOD PA LAS LHAG PA'I BSOD NAMS RNAM PAR 'PHEL BA BCU DRUG THOB PA'I NGAS 'BYED CHA MTHUN GNYIS PA'O, ,DBYE NA LDOG PA'I SGO NAS RNAM 'PHAL BCU DRUG GO ,BZOD PA'I RTZE SBYOR GYI MTSAN NYID, MKHYEN GSUM GYI RTOGS PA'I RIGS RDZOGS PA'I SHES RAB DANG, GZHAN DON LA MI PHYED PA'I BRTAN PA THOB PA'I NGES 'BYED

010a

, ,CHA MTHUN GSUM PA'O, ,DBYE NA THABS DANG SHES RAB LA BRTAN PA THOB PA GNYIS SO, ,CHOS MCHOG RTZE SBYOR GYI MTSAN NYID, MTHONG LAM BSKYED PA'I NUS PA SMIN PAS BYANG SEMS BZHI'I DGE RTZA LA YI RANG BA DANG, TING 'DZIN MTHA' YAS PA LA SEMS BRTAN PA THOB PA'I DES 'BYED CHA MTHUN BZHI PA'O, ,GNYIS PA MTHONG LAM RTZE SBYOR GYI MTSAN NYID, MTHONG SPANGS RTOGS PA'I SA BON GYI MNYEN PO BYED PA'I THEG CHEN GYI BDEN PA MNGON RTOGS SO, ,DBYE NA GZUNG 'DZIN GYI RNAM PAR RTOG PA KUN BRTAGS BZHI'I SA BON GYI GNYEN PO BZHI DANG, RGYAS PAR NA SHES BZOD SKAD CIG MA BCU DRUG GO ,GSUM PA SGOM LAM RTZE SBYOR GYI MTSAN NYID, SGOM SPANGS RTOGS PA'I SA BON GYI GNYEN PO BYED PA'I THEG CHEN GYI RJES LA MNGON RTOGS SO, ,DBYE BA BSDUS NA, SPANG BYA'I SGO NAS BZHI DANG, RGYAS PAR NA, SA DANG PO'I SKAD CIG ,GNYIS PA NAS BCU PA'I BAR RO, ,BZHI PA BAR CHAD MED PA'I RTZE SBYOR LA GNYIS LAS, BAR CHAD MED PA'I TING NGE 'DZIN GYI RTZE SBYOR GYI MTSAN NYID NI, MKHYEN GSUM BSDUS SGOM RAB TU GYUR PA'I RNAL 'BYOR GANG ZHIG ,RNAM MKHYEN DNGOS SU SKYED BYED DO, ,GNYIS PA NI 'DIR BSTAN GSAL BYA LOG SGRUB KYI MTSAN NYID, BDEN GNYIS NGO BO GCIG LA 'DUR MI RUNG BAR 'DZIN PA'I SA BON DANG, MNGON GYUR GANG RUNG NGO, ,DBYE NA BCU DRUG GO ,DMIGS BYA DMIGS BYED SOGS KHAS BLANGS NA, BDEN GRUB TU KHAS LAN DGOS SHING, BDEN STONG DU KHAS BLANGS NA, BYA BYED BZHAG TU MI RUNG BAR 'DZIN PA'I MNGON GYUR DANG, SA BON MTHA' DAG GO ,DE YANG GDUL

010b

BYA LA NYA BA'I BSAM PA LA BLTOS NAS, BAR CHAD MED PA'I RTZE MO BSGRUB PA LA DE DAG SPANG DGOS PAR BSTAN PA YIN GYI, KUN BRTAGS ZAD PAR MTHONG NAS SPANGS SHING, LHAN SKYES MNGON GYUR SA BRGYAD PA THOB NAS 'BYUNG MI SRID DO, ,GSUM PA MTHAR GYIS SBYOR BA BSHAD PA LA MTSAN NYID DANG, ,DBYE BA DANG, RNAM DAG BSHAD PA'O, ,DANG PO BSHAD ZIN LA, GNYIS PA NI, MKHYEN GSUM GYI RNAM PA BRGYA BDUN CU RTZA GSUM BSGOM PA LA BRTAN PA THOB PA'I CHED DU GO RIMS NGES CAN DU SGOM PA'I SKABS KYI SDUG BSNGAL MI RTAG PAR SGOM PA'I SBYOR BA LTA BU YANG MTHAR GYIS SBYOR BA YIN PAS, RGYAS PAR NA BRGYA DANG BDUN CU RTZA GSUM MO, ,BRTAN BYED KYI DBANG DU BYAS NA, BCU GSUM MO, ,SA MTSAMS THEG CHEN GYI TSOGS LAM NAS RGYUN MTHA'I SNGA LOGS PAR NA YOD DO, ,GSUM PA LA NYI KHRI SNANG BAR MTHAR GYIS BGYI BA DANG, MTHAR GYIS BSLAB PA DANG, MTHAR GYIS BSGRUB PA GSUM GSUNGS PA'I DANG PO'I LAS DANG PO PA'I BYANG CHUB SEMS DPA' RIM PA 'DI LTA BUR SLOB PA'I TSUL STON PA YIN TE, RNAM 'GREL LAS, DE PHYIR MI RTAG LAS SDUG BSNGAL, ,SDUG BSNGAL LAS NI BDAG MED GSUNGS, ZHES BSHAD PA LTAR, RAGS PA'I MI RTAG PAS 'CHI BA RJES DRAN BSAM PA SNGON DU BTANG NAS, NGAN 'GRO'I SDUG BSNGAL SEMS PA DANG, DE NAS GANG DU SKYE BA LAS KYI GZHAN DBANG CAN YIN PAS GANG DU SKYE LA RANG DBANG MED PA KHONG DU CHUD NAS, SDIG PA SPONG ZHING DGE BA BSGRUB PA LA 'JUG PA MNGON MTHO RGYU 'BRAS GO RIMS NGES CAN DU BSGOM PA LA, DE NAS

011a

, ,PHRA BA'I MI RTAG PA DANG, 'KHOR BA SPYI'I NYES DMIGS KHYAB PA 'DU BYED KYI SDUG BSNGAL SEMS PA DANG, GANG ZAG GI BDAG MED PAR SEMS PA SOGS KYI SGO NAS SNYING RJE CHEN PO SNGON DU BTANG STE, BYANG CHUB MCHOG TU SEMS BSKYED SBYIN SOGS PHAR PHYIN RNAMS GO RIMS NGES CAN DU SGOM TSOGS LAM GYI SKABS KYI MTHAR GYIS PA BSGOM TSUL GTZO BOR BSTAN PA YIN LA, DPER NA TSOGS LAM GYI SKABS SU SBYIN PA'I PHAR PHYIN GYI MTHAR GYIS SBYOR BA SGOM TSUL NI, RANG GI LUS DANG, LONGS SPYOD DANG, DGE BA'I RTZA BA RNAMS SEMS CAN GYI DON DU GTONG BA'I SEMS PA GO RIMS NGES CAN DU BSGOM PA LTA BU STE, DE BZHIN DU PHAR PHYIN LHAG MA YANG SHES PAR BYA'O, ,DE DAG KYANG DKON MCHOG GSUM RJES SU DRAN PA DANG, KHYAD PAR DU'ANG RANG GI LHAG PA'I LHA RJES SU DRAN PA DANG, TSUL KHRIMS KYI MI MTHUN PHYOGS LA SDOM SEMS GTONG BA DANG, SBYIN PA GTONG BA DANG, DE DAG KYANG STONG NYID RTOGS PA'I SHES RAB KYIS ZIN PA'I SGO NAS BSGOM PA RNAMS NI, MTHAR GYIS PA BRTAN BYED KYI YAN LAG YIN LA, GTZO BO NI SKABS DANG PO GSUM GYI SKABS MKHYEN GSUM GYI RNAM PA SO SOR BSTAN PA DANG, RNAM KUN GYI SKABS SU MKHYEN GSUM GYI RNAM PA BSDUS NAS BSTAN PA RNAMS JI LTAR SKYE BA'I RIM PA LTAR GO RIMS NGES CAN DU SGOM PA'I DON YIN LA, SPYIR RNAM RDZOGS SBYOR BA'I BSGOM TSUL LA NI, LAM GANG STOBS ZHAN PA LA DANG POR BSGOM PA SOGS GO RIMS 'CHOL PA YANG BSGOM MO, ,GNYIS PA MTHAR GYIS BSLAB PA NI, STONG NYID DON SPYI'I TSUL GYIS

011b

RTOGS PA'I SGOM BYUNG GI YE SHES KYIS ZIN PA'I SGO NAS MKHYEN GSUM GYI RNAM PA RIM CAN SGOM PA'I SBYOR LAM GZHAN GYIS SKABS KYIS BSDUS PA RNAMS SO, ,GSUM PA MTHAR GYIS BSGRUB PA NI, STONG NYID MNGON SUM DU RTOGS PA'I SHES RAB KYIS ZIN PA'I SGO NAS, MKHYEN GSUM GYI RNAM PA GO RIMS NGES CAN DU BSGOM PA SA DANG PO NAS RGYUN MTHA'I SNGA LOGS TSUN CHAD DU BSGOM PA RNAMS SO, ,DE LA SBYIN PA'I MTHAR GYIS SBYOR GYI MTSAN NYID, GZHAN GYI DON DU LUS LONGS SPYOD DGE RTZA GTONG BA'I SEMS DPA' RIM CAN DU SGOM PA'I SEMS DPA'I RNAL 'BYOR RO, ,SBYIN PA LA DBYE NA CHOS DANG, ZANG ZING DANG, MI 'JIGS PA'I SBYIN PA DANG GSUM MO, ,TSUL KHRIMS KYI MTHAR GYIS SBYOR GYI MTSAN NYID, 'CHAL TSUL SOGS SDOM PA'I SGO NAS TSUL KHRIMS RIM CAN DU SGOM PA'I SEMS DPA'I RNAL 'BYOR RO, ,TSUL KHRIMS LA DBYE NA, SDOM PA'I TSUL KHRIMS DANG, DGE BA'I CHOS SDUD PA DANG, SEMS CAN GYI DON BYED PA'I TSUL KHRIMS SO, ,BZOD PA'I MTHAR GYIS SBYOR GYI MTSAN NYID, GZHAN GYIS GNOD PA BYED PA LA JI MI SNYAM PA SOGS BZOD PA RIM GYIS SGOM PA'I SEMS DPA'I RNAL 'BYOR RO, ,DBYE NA SDUG BSNGAL DANG DU LEN PA DANG, GNOD PA LA JI MI SNYAM PA DANG, CHOS LA NGES PAR SEMS DPA'I BZOD PA'O,, BRTZON 'GRUS KYI MTHAR GYIS SBYOR GYI MTSAN NYID, BRTZON 'GRUS RIM CAN DU RTZOM PA'I SEMS DPA'I RNAL 'BYOR RO, ,BRTZON 'GRUS LA DBYE NA, GO CHA'I BRTZON 'GRUS DANG, SBYOR BA'I BRTZON 'GRUS DANG, MA ZHUM PA DANG, MI 'KHRUGS PA DANG,

012a

, ,CHOG MI SHES PA'I BRTZON 'GRUS SO, ,BSDUS NA GO CHA'I BRTZON 'GRUS DANG, DGE BA CHOS SDUD PA'I BRTZON 'GRUS DANG, SEMS CAN DON BYED PA'I BRTZON 'GRUS SO, ,BSAM GTAN GYI MTHAR GYIS SBYOR GYI MTSAN NYID, BSAM GTAN RIMS CAN DU SGOM PA'I SEMS DPA'I RNAL 'BYOR RO, ,BSAM GTAN LA DBYE NA, TSE 'DI LA LUS SEMS BDE BAR GNAS PAR BYED PA'I BSAM GTAN DANG, YON TAN MNGON PAR SGRUB PA'I BSAM GTAN DANG, SEMS CAN DON BYED KYI BSAM GTAN NO, ,SHES RAB KYI MTHAR GYIS SBYOR GYI MTSAN NYID, JI LTA BA'AM JI SNYED PA RTOGS PA'I SHES RAB RIM GYIS SGOM PA'I SEMS DPA'I RNAL 'BYOR RO, ,SHES RAB LA DBYE NA, KUN RDZOB RTOGS PA DANG, DON DAM RTOGS PA DANG, SEMS CAN GYI DON BYA BAR RTOGS PA'I SHES RAB PO, ,SANGS RGYAS RJES SU DRAN PA'I MTHAR GYIS SBYOR GYI MTSAN NYID, SANGS RGYAS KYI YON TAN DON DAM PAR MI DMIGS SHING, KUN RDZOB TU PHYIN CI MA LOG PAR RIM CAN DU DRAN PA'I SEMS DPA'I RNAL 'BYOR RO, ,CHOS RJES DRAN GYI MTHAR GYIS SBYOR GYI MTSAN NYID DANG, DGE 'DUN SDES DRAN GYI MTHAR GYIS PA GNYIS LA SANGS RGYAS KYI YON TAN ZHES PA'I GNAS SU, CHOS DKON MCHOG GAM, DGE MI DGE LUNG DU MA BSTAN GYI CHOS ZHES PA DANG, SLOB PA PHYIR MI LDOG PA'I TSOGS ZHES SBYAR BA MA GTOGS GZHAN 'DRA'O, ,TSUL KHRIMS RJES DRAN GYI MTHAR GYIS SBYOR GYI MTSAN NYID, SDOM PA GSUM RIM CAN DU DRAN PA'I SEMS DPA'I RNAL 'BYOR RO, ,GTONG BA RJES

012b

SU DRAN PA'I MTHAR GYIS SBYOR GYI MTSAN NYID, SBYIN PA GSUM RIM GYIS DRAN PA'I SEMS DPA'I RNAL 'BYOR RO, ,LHA RJES SU DRAN PA'I MTHAR GYIS SBYOR GYI MTSAN NYID, LHAR SKYES PA'I 'PHAGS PA SOGS DBANG PO'I CHUL GYIS RJES SU DRAN PA'I SEMS DPA'I RNAL 'BYOR, DAG BYED KYI YAN LAG DNGOS MED NGO BO NYID DU SHES PA'I MTHAR GYIS SBYOR GYI MTSAN NYID, GNAS LUGS KYI DON RIM CAN DU SGOM PA'I SEMS DPA'I RNAL 'BYOR RO, ,BZHI PA SKAD CIG SBYOR BSHAD PA LA MTSAN NYID NI BSTAN ZIN LA, DBYE NA BZHI, RNAM PAR SMIN PA MA YIN PA'I SKAD CIG SBYOR GYI MTSAN NYID, 'BAD RTZOL RAGS PA DANG BCAS PA'I SKAD CIG SBYOR GYI SKABS SU THOB PA'I ZAG PA MED PA'I YE SHES KYI RIGS RNAMS MNGON DU GYUR PA'I RGYUN MTHA'I RNAL 'BYOR RO, ,RNAM PAR SMIN PA'I SKAD CIG SBYOR GYI MTSAN NYID, 'BAD RTZOL RAGS PA NYE BAR ZHI BA'I SKABS SU THOB PA'I ZAG PA MED PA'I YE SHES KYI RIGS RNAMS DNGOS SU GYUR PA'I RGYUN MTHA'I RNAL 'BYOR RO, ,MTSAN NYID MED PA'I SKAD CIG SBYOR GYI MTSAN NYID, CHOS RNAMS THAMS CAD MTSAN NYID BDEN PAR GRUB PA DANG BRAL BAR MNGON SUM DU RTOGS PA KHYAD PAR DU BYAS PA'I RGYUN MTHA'I RNAL 'BYOR RO, ,GNYIS SU MED PA'I SKAD CIG SBYOR GYI MTSAN NYID, GZUNG 'DZIN RDZAS THA DAD KYIS STONG PAR MNGON SUM DU RTOGS PA'I RGYUN MTHA'I RNAL 'BYOR RO, ,YUL CAN YE SHES MNGON DU GYUR PA'I LDOG PA NAS GNYIS DANG, YUL DON DAM PHRA RAGS KYI SGO NAS GNYIS RNAM PAR DAG GO ,SA MTSAMS RGYUN

013a

, ,MTHA' NA'O, ,MTHAR GYIS PA DANG GNYIS KYI SGOM TSUL NI, GZHAN DU BSHAD ZIN TO, ,GSUM PA CHOS SKU'I LUS BSHAD PA LA, CHOS SKU'I MTSAN NYID NI, SPANGS PA DANG RTOGS PA MTHAR THUG PAS KHYAD PAR DU BYAS PA'I YON TAN MTHAR THUG GO ,DBYE NA BZHI, SANGS RGYAS KYI NGO BO NYID KYI SKU'I MTSAN NYID, DBYINGS RANG BZHIN GYIS RNAM PAR DAG PA LA, GLO BUR GYI DRI MA MTHA' DAG DANG BRAL BAS, KHYAD PAR DU BYAS PA'I 'DUS MA BYAS KYIS BSDUS PA'I YON TAN MTHAR THUG GO ,RTOGS PA YE SHES CHOS KYI SKU'I MTSAN NYID, SHES BYA JI LTA BA DANG JI SNYED PA MTHA' DAG MNGON SUM DU GZIGS PA MTHAR THUG PA'I YE SHES SO, ,DBYE BA NI BSDUS PA'I DBANG DU BYAS NA YE SHES BZHI DANG, RGYAS PAR NA SDE TSAN NYER GCIG GO ,RTOGS PA YE SHES CHOS KYI SKU, BYA BA SGRUB PA'I YE SHES 'GAL BAR 'DOD PA NI, LOG PAR SHES PAR BYA'O, ,RDZOGS PA'I SANGS RGYAS KYI LONGS SPYOD RDZOGS SKU'I MTSAN NYID, NGES PA LNGA DANG LDAN PAS KHYAD PAR DU BYAS PA'I SANGS RGYAS KYI GZUGS KYI SKU'O, ,SANGS RGYAS KYI SPRUL PA'I SKU'I MTSAN NYID, NGES PA LNGAS KHYAD PAR DU BYAS PA MIN PA'I SANGS RGYAS KYI GZUGS KYI SKU'O, ,YE SHES LAS NGO BO THA DAD PA'I GZUGS SKU 'DOD PA NI, NYAN THOS SDE PA KHA CIG 'DOD PA YIN GYI LUGS 'DI LAS PHYI ROL TU GYUR PAR SHES PAR BYA'O, ,CHOS SKU'I MDZAD PA 'PHRIN LAS KYI MTSAN NYID, CHOS SKU'I BDAG RKYEN THOB PA'I RNAM DKAR GYI YON TAN NO, ,DE LA DBYE NA, MNGON MTHO LA 'GOD PA NAS, MI GNAS PA'I MYANG 'DAS LA 'GOD PA'I BAR, NYER BDUN NO, ,

013b

'GRO RNAMS ZHI BA'I LAS DANG NI, ZHES PA LAM GYI RTEN MNGON MTHO LA 'GOD PA'I 'PHRIN LAS KHO NA LA 'CHAD PA DON MA YIN TE, 'KHOR BA'I BDEN PA 'BA' ZHIG GIS DON GNYER BKAG NAS THAR PA DON GNYER GYI BLO BSKYED PA'ANG STON PA'I PHYIR RO, ,SKU GSUM DANG SKU BZHIR DBYE BA NI, DBYE BSDU TZAM YIN GYI SKU GSUM DU 'DUS PA SLOB DPON GYI'ANG BZHED PA YIN NO, ,SANGS RGYAS RANG RGYUD KYIS BSDUS PA'I YE SHES MED PAR 'DOD PA DANG, SANGS RGYAS KYI GZUGS SKU GNYIS SANGS RGYAS MTSAN NYID PA MIN PAR 'DOD PA SOGS SDIG PA'I PHUL DU PHYIN PA RDZOGS PA CHEN POR MING BTAGS PA KHA CIG DANG, MU STEGS SPYOD PA PA'I GZHUNG BZLAS PAR MI BYA'O, ,'PHRIN LAS LA YANG BYED PA PO LA YOD PA DANG, BYA BA LAS LA YOD PA GNYIS NI RTOGS PAR SLA'O, ,MNGON PAR RTOGS PA'I LAM GYI RIMS PA DANG, ,GSUNG RAB MTHA' YAS BLTA BA'I MIG GCIG PU, ,MTHA' BRAL DBU MA'I DE NYID STON PA LA, ,GSUNG RAB KUN GYI MTHAR THUG SHER PHYIN MDO'I, ,SDUD PA PO LA LAN GNYIS LAN GSUM DU, ,RGYAL BA'I BKA' YIS LEGS PAR GTAD PA YI, ,DGOS PA CUNG ZAD RTOGS NAS BSTAN BCOS 'DI, ,YUN RINGS GNAS NA SNYAM NAS BSDUS DON SBYAR, ,RNAM DPYOD DON GNYER LDAN PA'I SKYE BO YIS, ,'DI TZAM GYIS KYANG MA LUS MTHAR PHYIN 'GYUR, ,LAM SHES JI LTAR NYAMS SU LEN TSUL DANG, ,TSIG DON RGYAS PA GZHAN DU GSAL BAR BSHAD, ,'PHAGS PA'I DGONGS PA SHIN TU DPAG PAR DKA', ,BDAG NI BLO DMAN SBYANGS PA'I STOBS CHUNG BAS, ,GAL TE 'DI LA NONGS PA'I TSOGS MCHIS NA, ,BLA MA LHAR BCAS RNAMS

014a

, ,KYIS BZOD PAR MDZOD, ,'DIR 'BAD DGE BA RAB DKAR CI YOD DES, ,LAM BZANG 'DI DANG NAM YANG MI 'BRAL ZHING, ,NAM MKHA'I MTHAS GTUGS GYUR PA'I 'GRO BA RNAMS, ,THEG MCHOG BGROD PA'I THEM SKAS 'DZEG GYUR CIG ,MNGON PAR RTOGS PA'I RGYAN GYI BSDUS DON, RIN CHEN PHRENG BA ZHES BYA BA 'DI NI, MDO SNGAGS KYI GZHUNG MANG DU MKHYEN PA'I SDOM BRTZON DU MAS BSKUL ZHING, KHYAD PAR DU YANG, MTSO STON DKA' BZHI PA SANGS RGYAS 'PHEL GYIS LAS DANG PO LA 'JUG PA BDE BA'I YAN LAG TU GYIS ZHES BSKUL BA LA BRTEN NAS, RIGS PAR SMRA BA DAR MA RIN CHEN GYIS 'BROG RI BO CHE DGE LDAN RNAM PAR RGYAL BA'I GLING DU SBYAR BA'I YI GE PA NI SDOM BRTZON SDE SNOD 'DZIN PA RIN CHEN CHOS RGYAL LO, ,'DIS KYANG BSTAN PA RIN PO CHE SGO THAMS CAD NAS PHYOGS THAMS CAD DU DAR ZHING RGYAS LA YUN RING DU GNAS PAR BYED NUS PAR GYUR CIG, ,, ` AOm SVASTI, PHAN BDE'I 'BYUNG GNAS RGYAL BSTAN YONGS 'DU'I LJON, ,RAB RGYAS 'GRO KUN THAR MCHOG 'BRAS BZANG LA, ,SPYOD PHYIR BKRA SHIS LHUN GRUB CHOS GRVA CHER, ,CHOS SBYIN 'DZAD MED DAL 'GRO'I RGYUN 'DI SPEL,, ,,SARBA MANGGA LAm,, ,,