*, ,RJE RIN PO CHES 'JAM DPAL GSONG LDAN GYI DPYAD BA YONGS SU RDZOGS NAS RJE RANG NYID KYI ZIN BRIS SU GNANG BA BZHUGS SO, ,
, ,GRUB CHEN SGEG RDOR GYIS MDZAD PA'I 'JAM DPAL GYI SGRUB THABS KYI GZHUNG NI GSANG LDAN YIN KYANG DER MI GSAL BA GSAL BA DANG, MNGON RTOGS LA KHA SKONG BA NI, YON TAN KUN 'BYUNG NA YOD PAS DE GNYIS LEGS PAR BSGRIG PA DANG, SNGAGS DON GZIGS PA LAS KYANG 'GA' ZHIG SHES DGOS PA YOD LA, YON TAN KUN 'BYUNG MA BSGRIGS PAR GSANG LDAN GYI DON BSHAD PAS, DE DANG MI MTHUN PA MANG BAR SNANG BAS 'DI BSHAD PAR BYA'O, ,GSANG LDAN LAS, SRUNG 'KHOR GYI SKABS SU BDAG DANG GNAS BSRUNG BA DANG RA BA DANG DRA BA DANG, PHYOGS DANG STENG BCING BA SOGS BYA BAR BSHAD KYANG, RANG LHA 'DIR BSKYED DANG RA BA SOGS 'DIS BYED MA GSUNGS PA LA, KHA CIG RANG ME LTAR 'BAR BAR BSKYED CING GNAS BSRUNG BA'I RA BA SOGS RDO RJE 'BYUNG BA LTAR BYED MOD KYANG, YON TAN KUN 'BYUNG NAS DAG PA GSUM GYI SNGAGS KHRUS BYAS NAS GSHIN RJE GSHED DU BSKYED PA DANG, DE'I THUGS KA'I H'Um LAS SPROS PA'I 'OD KYI RA BA SOGS BYED PAR SLOB DPON NYID KYIS BSHAD PAS DE BZHIN DU BYA'O, ,TSOGS ZHING GI SKABS SU ME LTAR 'BAR BA DANG, DANG
, ,PO'I SANGS RGYAS ZHAL LNGA PHYAG BRGYAD PAR SNGA MA RNAMS 'DOD KYANG, YON TAN KUN 'BYUNG LAS 'JAM DPAL ZHI BA SER PO PHYAG GNYIS PAR BSKYED NAS LCE LAG SOGS BYIN GYIS BRLAB PAR BSHAD PA BZHIN DU BYA'O, ,'DI NI PHRIN LAS KYI 'JAM DPAL DANG, DANG PO'I SANGS RGYAS KYI NGO BOR KUN 'BYUNG NAS BSHAD DO, ,'DI LA PHYAG MTSAN GSAL BAR MA BSHAD KYANG 'GREL BA DANG GSANG LDAN LAS RIN PO CHE'I RIGS KYI YE SHES SEMS DPA' ZHAL GCIG PHYAG GNYIS PA GA-YAS RAL GRI DANG GA-YON RIN PO CHE 'DZIN PAR BSHAD PA BZHIN BYA'O, ,DE NYID BSDUS PAR RIN PO CHE'I RIGS MA GTOGS PA RIGS ZUR DU MA BSHAD PA'I DGONGS PA GANG LAS RIGS DANG DE GNYIS BYED PA PO DANG BYA BA YIN PAS DE GNYIS GCIG TU BSDUS NAS BSHAD PAS PHRIN LAS KYI 'JAM DPAL DU MI 'GAL LO, ,LCE LAG BYIN RLOB KUN SNYING GIS BSRUNG 'KHOR GYI SNGON DU BSHAD PA DANG MA MTHUN KYANG DE 'DRA MANG BAS GO RIM BSGYUR MI DGOS SO, ,TSOGS ZHING SPRUL PA'I PHYAG RGYA 'CHING BA'I SNGON DU SOR MO RNAMS LA YI GE LNGA BKOD PA YON TAN KUN 'BYUNG NAS MA BYUNG YANG GSANG LDAN NA GSAL
BAS, DE'ANG DGOS SO, ,TSOGS ZHING LA YAN LAG BCU BYED PA LA GSANG LDAN NAS DNGOS SU MCHOD PA DANG, ,YI RANG DANG, BSHAGS PA DANG, GSOL GDAB DANG, PHYAG 'TSAL DANG, LHAG MA SOGS KYIS BSDUS PA MI 'DRA BA 'GA' RE YOD KYANG YON TAN KUN 'BYUNG NAS BSKUL BA DANG, BDAG 'BUL DANG SKYABS 'GRO DANG SEMS BSKYED PA DANG SDOM PA BZUNG BA LNGA BSHAD PA LTAR BYA'O, ,DE NAS TSIGS SU BCAD PA'I GLUS BSTOD CES PA 'DUD NYI SHU LA 'DOD PA YOD KYANG YON TAN KUN 'BYUNG NAS, BDE BA LAS 'KHRUNGS ZHES PA'I TSIGS BCAD PHYED DANG GNYIS GSUNGS PA LA BYA'O, ,DRIS LAN DU BYANG CHUB SEMS DPA' NI ZHES SOGS KYI BSTOD PA NI YON TAN KUN 'BYUNG LAS MTSAN BRGYA RTZA'I BSTOD PAR BSHAD DE, ,DE NAS PHYAG LNGA BYAS PA'I 'OG TU SEMS BSKYED DANG SDOM PA BZUNG BA GSANG LDAN NAS BSHAD PA BZHIN DU YON TAN KUN 'BYUNG LAS KYANG BSHAD PAS 'DIR YANG DE GNYIS BYA'O, ,DE NAS YE SHES LNGA'I MNGON BYANG LNGA SGOM PA DANG, RTEN BSKYED PA DANG, RNAM SNANG DANG, DANG PO'I SANGS RGYAS DANG YE SHES SEMS DPA' SGOM PA SOGS YON TAN KUN 'BYUNG LAS MING TZAM ZHIG LAS MA BSHAD DE, GSANG LDAN DANG 'GREL PA BZHIN BYA'O, ,'O NA DANG PO SBYOR BA'I GTZO BO 'DI LA RIGS SO SO BA DRUG DANG RIGS BSDUS GCIG STE, BDUN BSHAD PA 'DI, 'KHOR GYI DKYIL 'KHOR JI 'DRA BA RE'I DBANG DU BYAS PA YIN ZHE NA, 'DI LA RIGS BSDUS KYI RNAM SNANG DANG, RIGS SO SO BA'I RNAM SNANG DANG, BYANG SEMS RDO RJES GTZO BO BYED NA YE
, ,SHES SEMS DPA' GSUM MI 'DRA'ANG 'KHOR GYI LHA MI BSKYOD PA NAS SGRIB PA RNAM SEL GYI BAR RNAMS 'DRA'O, ,MI BSKYOD PAS GTZO BO BYED NA DE'I GNAS SU RNAM SNANG 'GRO, SGO NYIS SBRAGS LA SHAR DU MI BSKYOD PA NAS SGRIB SEL GYI BAR GYI LHA 'GOD PA 'DI RNAMS RDO RJE DBYINGS KYI DKYIL 'KHOR DANG DE'ANG BYANG SEMS RDO RJE'I DKYIL 'KHOR DU 'GREL PAR GSUNGS KYANG, 'DI RNAMS GTZO BO GZHAN GYI DKYIL 'KHOR DU 'GYUR BA NI MI 'GOG GO ,DES NA GTZO BO GZHAN BZHI GANG RUNG DBUS SU SONG BA NA, 'KHOR GYI DE BZHIN GSHEGS PA'I GNAS LA KHYAD PAR BYUNG YANG LHA GZHAN RNAMS LA 'PHO 'JUG MED DO, ,DE LTAR GSANG LDAN GYI BSNYEN PA'I SKABS DANG DKYIL 'KHOR 'DRI BA'I SGABS GNYIS KA LA SPYIR GTZO BO BDUN YOD KYANG, DA LTA PHYAG LAN LA MDZAD PA NI RIGS BSDUS KYI RNAM SNANG NYID LA GTZO BOR BYED LA DKYIL 'KHOR NI NYIS SBRAGS KHO NA'O, ,YON TAN KUN 'BYUNG LTAR NA RIGS BSDUS LA DKYIL 'KHOR SGO GSUM SBRAGS KYI GTZO BO GANGS CHEN MTSOR BSHAD DE, 'GREL PA DANG GSANG LDAN DANG 'DRA BAR MNGON NO, ,DKYIL 'KHOR GSUM PA LA LHA SNAM LNGAR BYAS PA LA LHA RIGS GZHAN LNGA'I YE SHES SEMS DPA' SHA STAG TSAN PA LNGAR BYAS NAS 'GOD PAR BSHAD DE, 'DI LA RIGS RE RE LA LHA GRANGS GSAL BAR MA BSHAD PA LA, BLA MA SNGA MA RNAMS LHA NGA GSUM RE YIN ZER, MKHAS PA KHA CIG RIGS SO SO LA LNGA'I MTSAN GYI GRANGS KYIS LNGAR BZHED DO, ,DE LA
RDOR DBYINGS KYI DKYIL 'KHOR LA NGA BDUN YOD CING, MTSAN GYI DRUG TU 'GREL PAR BSHAD PA MTSAN GYIS GRANGS KYI LHA 'GOD PA MIN NO, ,KHOR YUG LA 'GOD PA YIN PAS YANG NA LHA NGA DRUG ,YANG NA NGA GNYIS BYA DGOS PAR MNGON NO, ,RIGS SO SO LA BYANG SEMS RDO RJE'I DKYIL 'KHOR NI, SGO NYIS SNGAGS DANG GZHAN LNGA SGO RKYANG DANG, DE RNAMS KYI THIG YON TAN KUN 'BYUNG LAS BSHAD PA LA DPAGS NA BYANG SEMS RDO RJE'I DKYIL 'KHOR LHA RIGS BSDUS DANG 'DRA, RIGS GZHAN LNGA'I 'KHOR LA BSKAL BZANG BCU DRUG MI 'GOD PA 'DRA BA ZHIG 'DUG STE BRTAG PAR BYA'O, ,SNGA MA RNAMS RIGS SO SO LA BRTEN NAS MTSAN DUM BUR 'DON NA GZHAL YAS KHANG SGO RKYANG GI RIGS LNGA'I GDAN GYI STENG DU CHEN PA LNGA BCAD NAS 'GOD, RIGS BSDUS DANG RIGS SO SO LA BRTEN NAS MTSAN RDZOGS PAR 'DON NA, RDOR DBYINGS KYI DKYIL 'KHOR GNYIS PO'I PHYI RU GZHAL YAS KHANG MED PAR KHOR YUG LNGA LA TSAN PAR 'GOD PAR 'DOD DO, ,YON TAN KUN 'BYUNG LTAR NA, YE SHES SEMS DPA' RIGS LNGA KHOR YUG LA 'GOD NA GTZO BO RIGS BSDUS NYID KYIS BYED PA GSAL TE, GTZO BO RNAMS SNANG ZHAL BZHI PAR GSUNGS PA LA ZHAL GYI MDOG MI GSAL YANG, 'GREL PAR ZHAL BZHI SANGS RGYAS BZHI'I GDAN GYIS SBYOR BAS GNAS PAR GSUNGS PAS BYE MA LUNG PA BZHED PA LTAR PHYOGS BDAG TU BYA LA, PHYAGS RGYAD PA DANG, PHYAG GNYIS PA GNYIS SU BYED PA LA PHYI MA LEGS PAR MNGON NO, ,RIGS BSDUS KYI GTZO BO RNAM SNANG ZHAL BZHI PA DANG, RIGS SO SO BA'I RNAM SNANG ZHAL GCIG PHYAG GNYIS PAR BYED PA LEGS
, ,LA, RIGS GZHAN GTZO BOR SONG BA'I SHUL DU RNAM SNANG 'PHOS BA'ANG ZHAL GCIG PAR BYA'O, ,RIGS GZHAN BZHI 'KHOR DU YOD PA LA DPAGS NA TSIG RKYANG DANG, GTZO BO BYED PA NA SUM RTZEGS SU BYA, ZHAL PHYAG LA KHYAD MED DO, , SGEG RDOR GYI LUGS LA RIGS LNGA'I PHYAG MTSAN GYI BSHAD PA MI GSAL BAS PHYAG MTSAN MI 'DZIN PAR SNGA MA RNAMS BYED KYANG, GSANG LDAN LAS 'KHOR GYI LHA THAMS CAD CHO GA GSUM LAS BSKYED PAR BSHAD PAS RIGS BZHI LA RDO RJE SOGS KYI PHYAG MTSAN 'THAD LA, RNAM SNANG LA LUGS GZHAN NAS 'BYUNG BA LTAR RDO RJE'AM YANG NA RNAM SNANG GI RIGS KYI YE SHES SEMS DPA' 'KHOR LO 'DZIN PAR BSHAD PA'I RIGS PA SBYAR RO, ,DE LTAR NA GTZO BO RNAM SNANG YANG CHO GA GSUM LAS BSKYED PA'I LUGS LTAR BYA'O, ,'KHOR LO NANG MA RTZIBS BRGYAD PA NI GSANG LDAN DANG, 'GREL PA NAS BSHAD LA, DKYIL CHOG NAS RTZIBS BZHI PAR BSHAD PA NI TSUL SO SO BA'O, ,DE'ANG SGO SUM SBRAGS KYI, RIGS BSDUS KYI KHYAD CHOS SO, ,DKYIL 'KHOR RGYAL MCHOG GI SKABS SU PHRENG SNGAGS BRJOD NAS LHA RNAMS GSAL BAR SGOM PAR GSUNGS PA NI, YE SHES SEMS DPA'I THUGS KA'I AA LAS SPRO BA'I DUS YIN LA, CHO GA GSUM LAS SKU RDZOGS PAR BSHAD PA NI, RANG RANG GI GDAN GYI STENG DU BSKYED PA'I SKABS SO, ,DKYIL CHOG LAS RANG RANG GI GDAN GYI STENG DU MTSAN GYI SNGAGS DANG, YI GE LAS BSKYED CES PA'I PHYI MA NI AA LA SOGS PA'O, ,DANG PO NI DKYIL 'KHOR GSUM PA'I KHYAMS KYI YE SHES SEMS DPA' RNAMS RIGS SO SO'I MTSAN
SNGAGS LAS BSKYED PA YIN GYI 'PHRENG SNGAGS LAS BSKYED PA MIN TE, DE'ANG SGO SUM SBRAGS KYI RIGS BSDUS KYI BSNYEN PA DANG, DKYIL 'KHOR SGRUB PA'I SKABS YIN NO, ,RDOR SEMS LA SOGS PA'I KHA DOG DKYIL CHOG DANG GSANG LDAN GNYIS MI MTHUN PA NI SGO NYIS SBRAGS DANG SUM SBRAGS KYI RIGS BSDUS DANG, BYANG SEMS RDO RJE'I DKYIL 'KHOR GYI KHYAD DO, ,LAS RGYAL MCHOG GI LHA SO SO LAS RANG 'DRA SPROS NAS RANG RANG GI MDZAD PA MDZAD, SLAR BSDUS PA LA BYAD PA GSANG LDAN GYI DGONGS PA YIN TE, NAM MKHA' DRI MED CHUNG BA DANG YANG MTHUN NO, ,DE NAS YE SHES PA SPYAN 'DREN PA SOGS DANG, RGYAS BTAB DANG DBANG BSKUR BA NAS PHYAG GI BAR DANG, DE NAS TING NGE 'DZIN GNYIS LA GNAS PA DANG, SKYON BZLAS PA BYA BA DANG, DE'I MTHAR RIM PA'I TING NGE 'DZIN LA GNAS PA RNAMS NI DKYIL CHOG NAS SHES DGOS SO, ,BZLAS PA'I SNGAGS PHRANG SNGAGS YIN PAR GSANG LDAN LAS BSHAD DE, MTHAR BSDUS TE DE LA GNAS PA LA RIM PA'I TING NGE 'DZIN ZER LA, DE NI GSANG LDAN NAS MDOR BSDUS SHIG BSHAD LA, DON NI GONG MA RNAMS GSUNG BA LTAR BYA'O, ,BSNYAN PA GSUM GSUNGS PA'I DANG PO NI, NAM MKHA' DRI MED LTAR YIN LA, PHYI MA GNYIS MI GSAL BAS GZHAN DANG BSTUN NO, ,RJE THAMS CAD MKHYEN PA TZONG KHA PA CHEN POS 'JAM DPAL GSANG LDAN GYI DPYAD PA YONGS SU RDZOGS NAS MDZAD PA'I ZIN BRIS RJE RANG NYID KYI PHYAG BRIS MDZAD PA'I STENG NAS BRIS SO,, MANGGA LAm,,