*, ,RJE RIN PO CHE'I 'JIGS BYED KYI PHYAG MTSAN SOGS KYI BSHAD PA'I ZIN BRIS BZHUGS SO, ,
, ,NA MO BADZRA BHEE RA W'A YA, DPAL RDO RJE 'JIGS BYED KYI MNGON RTOGS SGOM DUS, MGOR RDO RJE SEMS DPA'I SGOM BZLAS BYED PA, BOD KYI BLA MA RNAMS KYI PHYAG LEN LA 'BYUNG BAS GRUB NA'ANG LEGS, MI DGOS KHA MED RANG YANG MIN GSUNG, THOG MAR SNGON 'GRO'I GTOR MA GTONG BA YANG, SPYI GTOR GYIS GTONG BA DANG, PHYOGS SKYONG RKYANG PA'I GTOR CHOG GIS BSNGO BA SOGS BOD NA YOD NA'ANG, DKYIL 'KHOR BA'I LHA TSOGS DANG, PHYOGS SKYONG BCU LA 'BUL, DKYIL 'KHOR PA LA BAR CHAD MI 'BYUNG BAR GSOL BA GDAB PA DANG, PHYOGS SKYONG LA DE'I 'PHRIN LAS BCOL PA LA SOGS PA L'A LI TA'I GZHUNG NA YOD PA LTAR LEGS GSUNG, DE NAS MCHOD PA BYIN RLABS DANG, SKYABS 'GRO SEMS BSKYED DANG, RANG SKAD CIG GIS LHAR GSAL BA'I THUGS KA'I SA BON LAS 'OD ZER 'PHROS PAS TSOGS ZHING SPYAN DRANGS PA RANG NAS BYAS PAS CHOG PA, RGYA GAR BA'I GRUB CHEN MANG PO'I BZHED PA YIN CING, YIG BRGYA'I BSGOM BZLAS NI DAM TSIG NYAMS CHAGS GSO BA DANG, LHAG CHAD KHA SKONG LA MJUG TU BYED PAR BSHAD PAS, DES KHYAB GSUNG, BSRUNG 'KHOR GYI KHRO'O
, ,BCU PO 'DI RNAMS KYI MNGON RTOGS NI L'A LI TA'I GSUNG NA YOD PA LTAR BKOD CING, ZHAL PHYAG MI GSAL BA RNAMS MAN SNYE LAS KHA BSKANGS NAS BSHAD PA YIN GSUNG, GNOD MDZES DANG, RDO RJE SA 'OG GNYIS LA LAR MING GI RNAM GRANGS SU BSHAD KYANG, 'DIR, THA DAD DU BYED PA YIN NO GSUNG NGO, ,RIGS BDAG KYANG DANG PO NAS RANG CHAS SU YOD PAS, RTING LA DBANG BSKUR NAS RIGS BDAG GIS RGYAS 'DEBS MI DGOS, 'DIR, BSRUNG 'KHOR GYI KHRO BO RNAMS BSKYED NAS, YE SHES PA GZHUG PA TZAM MA GTOGS SNGAGS BZLA BA MA BSHAD PA LA SKYON MED DE, BSRUNG 'KHOR RANG GSAL BAR BSGOM PA RANG GIS BGEGS BZLOG PAR BSHAD PAS SO, ,BZLA BAR 'DOD NA, GSANG 'DUS NAS 'BYUNG BA LTAR RAM, BYINGS MI NUS NA GTZO BO'I SNGAGS SUM 'BUM BZLAS PA RANG GIS CHOG CING, DE'ANG KHRO BO THAMS CAD KYI BZLAS PAS CHOG GSUNGS, SO SOR BZLA NA, RDO RJE SA 'OG GI, AOm A'A: BADZRA P'A TA H'Um H'Um, ZHES PA YIN GSUNG, DE NAS DKYIL 'KHOR DNGOS GZHI BSGOM DUS, BSRUNG 'KHOR GYI KHRO BO RNAMS GTZO BO LA BSDU BA'I LUGS LA LA YOD KYANG,
'DIR MI BSRU BA'I LUGS SU BYED, RDO RJE 'JIGS BYED KYI PHYAG GA-YON GYI THOD PA NI, DENG SANG YONGS SU GRAGS PA'I THOD PA KHRAG GIS GANG BA'O, ,THOD TSAL NI, THOD PA LA SKRA DANG BCAS PA'I PAGS PA 'BYAR BA'O, ,BHI DHI P'A LA NI, GZHON NU ZLA BA'I 'GREL PA LAS, LCAGS DBYUG GI RTZE MO LA RMA BYA'I SGRO MDONGS KYI CHUN PO BCINGS PA LA BSHAD DO, ,KA nA YA NI, MDUNG PHYED PA'I RNAM PAR BSHAD PA YOD KYANG, RDO RJE RTZE GCIG PA'I RNAM PA'O, ,RTZA PHYAG GNYIS KYIS GLANG LPAGS 'DZIN PAR L'A LI TA'I GZHUNG LAS BSHAD CING, SHR'I BHA DRA DANG, 'JAM DPAL YE SHES RNAMS KYIS GSAL BAR BSHAD NAS, DE BZHIN DU, PHYAG MTSAN 'DZIN PA'I PHYAG MTSAN NI GA-YAS KYI DANG PO NA GRI GUG CES SOGS YOD GSUNG, GLANG LPAGS 'DZIN PA'I PHYAG GNYIS PO MAS 'GYED KYI DBANG DU BYAS NA, DPYID MGO'I THAD DU GLANG LPAGS 'ONG BAS, DE LTAR NA, BDE MCHOG LTAR, GLANG LPAGS 'DZIN PA'I PHYAG GNYIS KYI SDIGS MDZUB KYI RTZE MO SMIN MTSAMS DANG MNYAM PAR ZHES SMOS PA DANG 'GAL GSUNGS, PHYAG 'GYED PA LA LUGS MANG NA YANG, SOG PA NAS 'GYED PA LEGS GSUNG, SKYE MCHED BYIN RLABS LA, GZHUNG RNAMS LAS, SKYE MCHED BYIN GYIS BRLABS, ZER BA TZAM LAS GSAL KHA MA BYUNG YANG, DZNY'A NA KA RAS MIG SA SNYING SOGS SU SDUD PAS DE YI LUGS SU BYAS, LHAR MI SKYED PAR, YIG 'BRU RNAMS LHAR MOS PA BYED PA'I LUGS KYANG YOD PAS, DE LTAR BYAS PA YIN, DBANG BSKUR NAS, RIGS BDAG GIS
, ,'JAM DPAL GYI SPYI BOR RGYAS 'DEBS PA BOD KYI BLA MA RNAMS BZHED NA'ANG, L'A LI TA'I GZHUNG LAS, MI BSKYOD RTZA BA'I ZHAL LA'O, ,ZHES DANG, RTOG BDUN GYI 'GREL PA GNYIS LAS KYANG DE BZHIN BSHAD PAS, MA HE'I ZHAL GYI MTSOG MA'I STENG, MDUN NGOS SU CUNG ZAD NYE BAR, KHRO ZHAL DMAR PO'I MDUN TZAM, RTZA ZHAL GYI DBU RGYAN GYI BAR DER RGYAS 'DEBS, DE LA MI BSKYOD PA LA RIGS MANG NA'ANG, YONGS GRAGS KYI MI BSKYOD PA, SKU MDOG SNGON PO GA-YAS PA SA GNON, GA-YON TING NGE 'DZIN, RDO RJE SKYIL KRUNG GIS BZHUGS PA DE LA BYED DGOS GSUNG, LHA DAM TSIG PA RTOG PAS BZOS NAS BSGOMS PA LA, YE SHES PA SNGON TSOGS GNYIS KYI 'BRAS BU LAS GRUB PA'I RDZOGS PA'I SANGS RGYAS, RANG 'DRA'I RDO RJE 'JIGS BYED KYI DKYIL 'KHOR SPYAN DRANGS PA DE, SNYING KHA NAS SPROS PA'I SGO BA BZHI'I THO BA GSHIN RJE GSHED KYIS RANG RANG GI SPYI BOR DGUG ,DBYUG PA GSHIN RJE GSHED KYIS GZHUG ,CES PA, LUS KYI NANG DU BCUG NA'ANG CHA MA 'DRES PA'I TSUL DU YOD PA DE PADMA GSHIN RJE GSHED KYIS MI 'BRAL BAR DBYER MED DU BCINGS PAS, DAM TSIG PA MA HE'I ZHAL LA, YE SHES PA'I MA HE'I ZHAL DBYER MED 'DRES PA SOGS, PHYAG MTSAN LA PHYAG MTSAN SOGS NAS RDUL PHRAN GYI BAR DU 'DRES PAR BYAS, RAL GRI GSHIN RJE GSHED KYIS MI DGA' BZHIN DU SDOD DGOS PA MA YIN PAR, DGES BZHIN DU DUS JI SRID PAR BZHUGS PAR BYAS PA YIN GSUNG, 'GA' ZHIG ,
SGO BA BZHI MED PA'I DPA' GCIG LTA BU LA, YE SHES PA GZHUG DUS, DZA: H'Um BAm HO: DANG, SGO BA BZHI YOD PA RNAMS LA, AANGKU SHA DZA: ZHES SOGS DGOS ZER BA RIGS PA MIN NO, ,GSUNG, RLUNG GI DKYIL 'KHOR PADMA'I 'OG NA YOD PA 'DI'I KHYAD CHOS YIN, DE'I DON NI, DUR KHROD RLUNG GI KHAMS YIN PAS, BSAD BSKRAD KYI LAS BYED PA DANG MTHUN PAR, 'DI'ANG KHRO BO'I NANG NAS KYANG SHIN TU DRAG PO YIN PAS, SKU LAS SKYES PA'I 'OD ZER YE SHES KYI MES, BGEGS GDUG PA CAN RNAMS BSREGS TE THAL BAR BYAS PA'I THAL BA YANG RLUNG GIS GTOR BAR BYED PA DANG, RLUNG RANG GIS KYANG BGEGS THAMS CAD PHYOGS MTHA' YAS PAR GTOR BA'I MTSON BYED YIN GSUNG, BZLAS PA'I DUS SU THUGS KA'I SA BON GYI MTHAR, SNGAGS 'PHRENG DGOD PA DE NANG SKOR DU NYE BA'I SNYING PO YA M'ANTA KA DANG, BAR SKOR DU HR'I: sht'I: DANG, PHYI SKOR DU YA MA R'A DZA: 'GOD PAR BZHED PA MANG NA'ANG, DKYIL 'KHOR LA SA BON 'GOD PA'I RIM PA BZHIN BYA, BZLAS PA'I RIM PA'ANG, GSUM CHAR BSDEBS NAS BZLA BA'AM, RE RE ZHING BZLA BA GANG BYAS KYANG CHOG NA'ANG, GTZO CHER RTZA SNGAGS BZLA BA MAN NGAG YIN GSUNG, DMIGS PA NI, THUGS KA NAS SNGAGS PHRENG 'PHROS PA'I 'OD ZER GYIS SRING PA GSUM KHYAB PAR BYAS NAS, SEMS CAN DPAG TU MED PA'I DON BYAS, THAMS CAD RDO RJE 'JIGS BYED DU BYAS NAS, SNYING KHA'I SA BON LA THIM ZHING, YANG SNGAR BZHIN SPRO BA SOGS BYED PA'AM, YANG NA,
, ,SNYING GA'I SNGAGS KYI YI GE 'OD ZER 'BAR BA LA SEMS MA YENGS PAR GTAD NAS BZLAS NA, DNGOS GRUB MYUR BA YIN GSUNG, L'A LI TA'I GZHUNG NAS BSHAD, BSNYEN PA'I GRANGS TSAD KYANG GANG ZAG GI LAS 'PHRO LA RAG LAS PAS, GCIG TU MA NGES GSUNG, L'A LI TA'I GZHUNG LAS, HR'I: sht'I: LA LAS SNGAGS SU BYAS PA'ANG YOD GSUNG, TING NGE 'DZIN SEMS DPA'I MTHA' SKOR DU, NYE SNYING, SNYING PO, RTZA SNGAGS RNAMS RIM GYIS NANG NAS RIM PA BZHIN 'GOD DGOS PA'I NGES PA MED DE, DE'I RGYU MTSAN, L'A LI TA'I GZHUNG GI LHA SGRUB THABS KYI DKYIL 'KHOR GYI SA BON 'GOD PA'I SKABS SU, HR'I: sht'I: NANG GI RE MIG DGU LA BKOD NAS, LHA RNAMS LA YA MA R'A DZA DANG, SGO BZHIR YA M'ANTA KA 'BYUNG BA'I PHYIR RO, ,GSUNG NGO, ,YA MA R'A DZA'I MTHAR H'Um GNYIS PHAt GNYIS L'A LI TA'I GZHUNG NA YOD PA LTAR BYA DGOS GSUNG, ZLO BA'I TSE ZHAL DGU GAS ZLO BA'I DMIGS PA BYAS PAS, DGU 'GYUR DU 'GRO STE, KYE RDO RJE LA'ANG, ZHAL BRGYAD DKAR GYIS, ZLO BA YOD PAS SO, ,BZLAS PA'I TSE THUGS KAR SNGAGS 'PHRENG 'GOD LUGS, DKYIL 'KHOR GYI SA BON 'GOD PA'I RIGS 'GROS 'DI SBYAR NA LEGS GSUNG, DBUS KYI MTSAN MA LA RO MGO MED 'GOD MED 'GOD PA NI MI LEGS TE, DBUS KYI 'DI GDAN YIN PAS RO TSANG MA 'GOD DGOS SHING, SHAR GYI MGO DE TSANGS BA'I MGO BO YIN PAS, DBUS KYI RO DE'I MGO BO YIN NA TSANGS PA'I MIN PA'I PHYIR RO, ,LAG PA RGYU MA SOGS KYANG TSANGS PA'I YIN PAR 'GYUR BA'I SKYON MED DE, RGYU
MA SOGS MTSAN MA RNAMS MI'I RGYU MA YIN PAR BSHAD PA DANG 'GAL BA'I PHYIR DANG, RTOG BDUN GYI 'GREL BA GNYIS ZHES PA'I GCIG GZHON NU ZLA BA DANG, GCIG SO NA SHR'IS MDZAD DO, ,DBUS MA'I DKYIL 'KHOR RDO RJE RVA BAR RVA LO BZHED PA BZHIN LEGS NA'ANG, KHENG BAS KYANG, KHRAG ZHAG 'KHRUG PA'I RGYA MTSO BSHAD PAS, DE MA DAG ,DKYIL 'KHOR NANG GI RDO RJE RA BA 'DI, BCOM LDAN 'DAS BZHUGS PA YIN, SKU PHYED TZAM DU SLEB PA BYED, DE'I PHYIR 'BYIN PA'I DBANG DU BYAS NA 'GONGS PA'I TSAD TZAM YIN PA DGOS SO, ,BRI BYA LA RE MIG DAG YOD PA MA GTOGS BSGOM BYA LA RE MIG DGU MED CING, PHYOGS MDOG RE MIG DGU YOD PA BZHIN DGOS SHING, GZHAL YAS KHANG DBUS MA'I BYA 'DAB KYI 'BAB CHU, PHYI MA'I THOG STENG DU SLEB PA CIG DGOS SHING, RIN CHEN PHA GU CHA PHRAN GCIG YOD PA DE PHYI NAS DKAR PO'I DBANG DU BYAS PA YIN NA, RTZIG PA DMAR PO'I PHYED NON PA BYAS PAS, PHYI'I PHA GU'I CHA PHRAN BYED 'PHAR BA GCIG 'ONG ZHING, NANG NGOS SU, PHA GUS MA NON PA'I RTZIG PA'I STENG DU, LCAM RTZA BTANG NAS THOG PHUB PAS PHA GU DANG KHA DA CHAD DU 'ONG BA DGOS GSUNG, RTZIG PA DANG PHA GU'I STENG NAS KA THUNG DANG BRE PHUL BYAS NAS, RGYA PHIBS KYI THOG 'DEGS PA YIN TE, 'DI GZHAL YAS KHANG GI RGYAN NAM, THIGS KHANG LTA BU YIN PAS, DON LA THOG GNYIS YOD GSUNG, LHA ZHE DGU BYED NA, DKYIL 'KHOR GYI LHA RNAMS KYI GDAN THAMS CAD KYI 'OG TU RLUNG GI DKYIL 'KHOR BSHAD PA, L'A LI TA'I GZHUNG NA 'DUG NA'ANG, GZHAN BAL CHE BA LA MI 'DUG CING, YOD NA NI SHIN TU LEGS PA'I RIGS DOR 'DUG
, ,GSUNG, 'KHOR MNGON BYANG LNGA SKYED PAR BYED PA'I SKABS SU, RANG RANG GI ZLA GDAN GYI STENG DU MING YIG DANG PO LAS SKYES PA'I PHYAG MTSAN MGO BO SOGS BSAM, DE LA RIGS BZHI, YUM BZHI, LHA SNAM LA GNAS PA'I SEMS DPA' RNAMS DANG, SGO BZHI DANG GRVA BZHI'I RDO RJE LCAGS KYU SOGS BZHI DANG, RDO RJE GNOD MDZES SOGS BSKYED DE, DE RNAMS KYI THUGS KAR AA LAS SKYES PA'I NYI MA'I DKYIL 'KHOR, DE LAS 'OD ZER 'PHROS, SANGS RGYAS SOGS BZHI SPYAN DRANG BA DANG, LHA RANG RANG DANG BCAS PA RANG RANG GI THUGS KA'I NYI MA'I DKYIL 'KHOR LA ZHUGS PAS, RANG RANG GI GDAN GYI STENG DU, NYI MA'I DKYIL 'KHOR GYI 'OD KYIS DPAG TSAD BRGYA STONG KHYAB PAR GYUR, DE NAS NYI MA'I DKYIL 'KHOR DE RNAMS KYI STENG DU, CHU LAS CHU BUR GYI TSUL DU, DBUS KYI LE TSE DGU LA AOm HR'I: sht'I: SOGS DANG, LHA SNAM LA YA MA R'A DZA SOGS DANG, SGO BZHI LA YA M'ANTA KA DANG, GRVA BZHI'I STENG DU H'Um GSUM DANG PHAt GCIG TU GYUR, DE RNAMS LAS 'OD ZER 'PHROS PAS, SANGS RGYAS SOGS BZHI SPYAN DRANGS TE THIM PA LAS, RANG RANG GI PHYAG MTSAN MGO BO SOGS SU GYUR DE LAS 'OD ZER 'PHROS, SANGS RGYAS BZHI SPYAN DRANGS TE THIM PAS, RDO RJE MGO BO SOGS LAS LHA THAMS CAD BSKYED, THAMS CAD ZHAL MA HE'I ZHAL CAN, PHYAG GNYIS POS PHYAG MTSAN RANG MING DANG MTHUN PA PHYAG GNYIS 'DZIN PAR BYED PA, MA HE'I GDAN LA BZHUGS PA, SNGA RABS PA RNAMS BZHED DE MI DGOS GSUNG, PHRA MO'I RNAL
'BYOR GYIS STENG 'OG GI SNA RTZER RDO RJE PHRA MO LA SEMS 'DZIN PA 'DI, SH'ANTI PAS MDZAD PA'I 'JIGS BYED KYI LAS TSOGS CHEN MO LAS BSHAD DU GSUNG, 'JIGS BYED KYI MNGON RTOGS 'DI L'A LI TA'I GZHUNG LA GZHI BYAS, DER MI GSAL BA RNAMS GRUB CHEN GZHAN KHUNGS THUB KYI BZHED PAS BRGYAN CING, YANG, SAMBU tA'I DRAN PA BDUN PA'I RAB BYED BZHI PA NAS, RDO RJE 'JIGS BYED BSHAD PA RTOG BDUN JI LTA BA DANG 'DRA BAR YOD PAS, DE'I 'GREL PA AA BHYA YAS MAN NGAG SNYE MAR ZHIB PAR BKRAL BA RNAMS KYIS MI GSAL BA THAMS CAD KHA BSKANGS TE BSHAD PA MA GTOGS, RANG BZO DANG KHUNGS MED PA'I 'DRA BSGRIGS PA SOGS MA YIN PAR RGYUD DANG GRUB CHEN RNAMS KYI BZHED PA JI LTA BA BZHIN BYAS PA YIN GSUNG, SPYIR, DBU MA LA, MGON PO KLU SGRUB TSAD MA'I SKYES BUR 'DZIN PA LTAR, 'JIGS BYED 'DOD PA RNAMS KYIS GRUB CHEN L'A LI TA'I GZHUNG RNAMS LA MA 'GAL BA ZHIG DGOS TE, CHOS TSUL 'DI LA GRUB CHEN 'DI TSAD MA'I SKYES BU YIN PA'I PHYIR, GSUNG, 'DIR MNGON BYANG LNGA'I RIM PA NI, RLUNG GI DKYIL 'KHOR GYI STENG GI ZLA BA'I DKYIL 'KHOR ME LONG YE SHES, RGYU'I 'JAM DPAL GYI THUGS KA'I NYI MA'I DKYIL 'KHOR LA SANGS RGYAS SOGS BZHI DANG, 'JAM DPAL RANG DANG BCAS PA THIM PAS, NYI MA'I DKYIL 'KHOR GYI 'OD KYIS DPAG TSAD BRGYA STONG KHYAB PAR GYUR PA DE MNYAM NYID YE SHES, DE'I STENG DU H'Um YIG NAG PO CHU LAS CHU BUR GYI TSUL GYIS BYUNG BAR BSGOM PA SO SOR RTOG PA'I YE SHES, DE LAS 'OD 'PHROS 'DUS PAS, RDO RJE NAG PO'I GZUGS SU GYUR PA DE BYA SGRUB YE SHES, SKU
, ,YONGS SU RDZOGS PA CHOS DBYINGS YE SHES SBYOR DGOS PAS, DE LA DANG PO RDO RJE GRUB PA'I DUS 'DI MA'I MNGAL DU PHA MA'I KHU KHRAG RNAM SHES GSUM TSOGS PA LAS, BU'I YAN LAG CHA SHAS SOGS RDZOGS PA LA SBYOR LA, DE'I LUS LA RNAM SHES YOD PA MTSON PA'I RDO RJE'I LTE BA LA H'Um YIG 'DOD DO GSUNG, SANGS RGYAS SOGS BZHI SPYAN DRANGS, YANG YANG BSTIM PA'I DGOS PA, BYIS PA THA MAL PA'I LUS LA PHUNG SOGS LNGA DANG, DBANG PO LA SOGS YOD PA SBYANGS GZHI, DE RNAMS LHA'I PHUNG SOGS SU BSGYUR BA'I PHYIR, RNAM SNANG SOGS RGYAL BA RNAMS BCUG PAS, PHUNG PO LNGA RIGS LNGAR 'GYUR ZHING, DES MTSON NAS, SEMS MA RDO RJE MA SOGS KYIS KHAMS RNAMS YUM DANG SEMS DPA' RNAMS KYIS DBANG PO RNAMS SEMS DPA' DANG, KHRO BO RNAMS KYIS LAS DBANG RNAMS KHRO BOR 'GYUR BA'I DGOS PA DANG, SKYE MCHED BYIN GYIS BRLABS PAS, DE BZHIN GSHEGS PA'I RDO RJE'I MIG DANG RNA BA SOGS SU 'GYUR BA'I DGOS PA YOD, NYI MA'I DKYIL 'KHOR SOGS 'OD ZER SPRO BSDU BYED PA 'DI SANGS RGYAS KYIS SEMS CAN GYI DON BYED PA MTSON NA'ANG, DNGOS GZHI, BYIS PA'I LUS SEMS KYI RTZAL RDZOGS NAS DGE MI DGE'I BYA BA SOGS LA 'JUG PA CHOS NYID YIN PAS, DE'I SBYONG BYED YIN GSUNG, MDUN BSKYED KYI MTSAN MA 'GOD PA'I SKABS SU, AA MO GHA'I DKYIL CHOG TU, DBU KYI RO'I STENG DU, GRI GUG BRI BAR BYA'O, ,ZHES BSHAD NA'ANG, DBUS KYI RO'I STENG DU RDO RJE NAG PO
RTZE DGU PA BRI ZHING, GRI GUG SHAR GYI SNAM BU LA BRIS PAS, LHA RNAMS LA RAL GRI'I MING YOD NA'ANG, RAL GRI'I TSAB LA RDO RJE YOD PAS, GRANGS CHAD PA'I SKYON MED DO, ,'O NA GA-YAS KYI MTSAN MA DANG PO LAS LHA MI BSKYED PAR MI YONG BA'I SKYON YOD DO, ,ZER NA, DE MED DE, GA-YAS KYI MTSAN MA DANG PO LAS LHA MI BSKYED PAR, MTSAN MA GZHAN LAS LHA BSKYED PA SHIN TU'ANG MI YONG GSUNG, 'O NA RAL GRI PHYAG MTSAN LA NI YOD, MTSAN MA 'GOD DUS MI YONG BA'I RGYU MTSAN CI YIN ZER NA, RAL GRI RGYU'I 'JAM DPAL BSKYED PA'I MTSAN MA LA 'ONG BAS 'DIR MA BKOD PAS PHYAG SO BZHI YIN NA'ANG, PHYAG MTSAN SO GSUM 'ONG, GLANG LPAGS GCIG LA PHYAG GNYIS KAS 'DZIN DGOS PAS, MTSAN MA GCIG TU BRTZIS PAS SO GNYIS LAS MED DO GSUNG, ZHE DGU'I DUS KYI RIGS BZHI YUM BZHI MAN CHAD KYI RGYU RDO RJE 'CHANG DE BZHIN GSHAGS PA RNAMS, SKU MDOG PHYAG MTSAN RNAMS L'A LI TA'I GZHUNG NAS BSHAD PA LTAR PHYOGS MDOG DANG, PHYAG MTSAN MGO SOGS 'DZIN CING DE LA'ANG, SNGA RABS KYI BOD RNAMS KYIS, LAG PA GNYIS DANG RKANG PA GNYIS MTSAN MAR 'GOD PAR SNANG STE, DE YI RGYU MTSAN RO DE'I LAG PA DANG RKANG PAR 'DOD PA SNANG STE, SHES BYED DU SGRUB MI NUS, RTOG BDUN LAS, LHOR LAG PA, BYANG DU RKANG PA ZHES PA MA GTOGS GNYIS TSIG MED PAS, RANG LUGS LA RE RES CHOG GSUNG, LHA 'DI PA RNAMS ZHI DRAG DANG RNAM PA YO GA DANG MTHUN PAS, RDOR DBYINGS LTAR RIGS SHING,
, ,RDO RJE LCAGS KYU SOGS BZHI YANG, RDOR DBYINGS LTAR RIGS PA DANG, 'BRAS BU'I DUS SU NI, THAMS CAD RDO RJE 'JIGS BYED ZHAL GCIG PHYAG GNYIS PA, PAD ZLA NYI MA LA GA-YON BRGYAD GIS GNAS PA, PHYAG MTSAN MGO SOGS 'DZIN PA LAS 'OS MED, 'ON KYANG SNGA RABS PA RNAMS KYIS PAD NYI'I STENG DU MA HE NAG PO RE RE BYED KYIN 'DUG STE, 'DI YE NAS MI DGOS GSUNG, BCOM LDAN 'DAS KYI THUGS KAR YE SHES SEMS DPA' 'GOD PA, RGYA GZHUNG RNAMS LAS MKHAS GRUB MANG POS BSHAD NA'ANG, YE SHES SEMS DPA' 'DI LTA BU GCIG 'GOD DGOS ZER BA'I DMIGS BSAL MA BYUNG, SLOB DPON DZNY'A NA AA KA RAS, 'JAM DPAL RGYU RDO RJE 'DZIN PA 'DRA BA 'GOD PAR BSHAD PAS DE YI LUGS SU BYAS, TING NGE 'DZIN SEMS DPA' 'GOD PA DE, 'JAM DPAL GYI THUGS KAR NYI MA'I STENG DU H'Um YIG NAG PO 'GOD PA'AM, YANG NA THUGS KAR NYI MA LA RDO RJE NAG PO RTZE DGU PA DE'I LTE BAR 'GOD PA GANG BYAS NA'ANG 'DRA GSUNG, L'A LI TA'I GZHUNG LAS, RDO RJE MGO SOGS LA DKYIL 'KHOR LA MTSAN MA 'GOD PA'I SKABS SU, SNGAGS RE BSHAD PA YOD DE, BSNYEN PA'I DUS SU RE RE ZHING DGOS PA'I NGES PA MED DE, DE'I RGYU MTSAN LHA THAMS CAD KYI SA BON, SNGAGS TSAN GSUM POS BYAS PA YIN, BZLAS PA BYED DUS RANG RANG GI THUGS KAR NYI MA LA SA BON DE DAG BKOD NAS, SNGAGS BZLAS DUS, RANG BCOM LDAN 'DAS SU GSAL BA'I ZHAL DGU DANG, 'KHOR THAMS CAD KYIS
KYANG SNGAGS GANG ZLOS DE 'BRUG GI SGRA LTAR DIR RI RI BZLAS PA'I DMIGS PA BYAS NA, LHA THAMS CAD KYI BSNYEN PA BYAS PAR 'GRO BAS SHIN TU LEGS GSUNG, MTSAN MA 'GOD DUS, LHO'I LAG PA'I YU BA DE NANG DU BSTAN, BYANG GI RKANG PA'I MGO DE'ANG NANG DU BSTAN PAS YONGS GSUNG, BHI DHI P'A LA SNGA RABS PA RNAMS KYIS PHUR PA'I RTZE MO LTA BU BYAS, DE'I MGO LA RMA BYA'I SGRO MDONGS BCINGS PA BYAS 'ONG GIN 'DUG STE, 'DI MA LEGS SHING, LCAGS DBYUG GI RNAM PA BA ZHES BSHAD YOD PAS, MDUNG PHYED PA LTA BU'I RTZE MO LA RMA BYA'I SGRO MDONGS BCINGS PA LTA BU BYAS NA LEGS GSUNG, KA NA YA NI MDUNG PHYED PA STE MDUNG YIN ZHING, MAN SNYER, MDUNG THUNG LA THAG PA BTAGS YOD PA MDUNG GSOR NAS 'PHANGS TE, THAG PA NAS TSUR 'THEN PA CIG YOD PA SKAD DO GSUNG, GTOR MA BYIN RLABS KYI SKABS SU, GO LAS BA LANG GI SHA GOS MTSAN PA ZER BA MI 'THAD DE, THA MAL PA'I SA BON LAS, THA MAL PA'I SHA BSKYED NAS SA BON DES MTSAN PA, ZHES PA, THA MAL GYI SA BON LAS SHA THA MAL BSKYED NA, BUm ME LONG YE SHES KYI NGO BOS MTSAN PA, ZHES PA RIGS PA DANG, YANG BUm LAS SHA BSKYED NAS DE LA THA MAL PA'I SHA'I SA BON GO YIS MTSAN PA BYED PA YIN CING, DE'I STENG DU CI RIGS PAS BUm LAS ME LONG LTA BU'I YE SHES ZER BA 'DUG STE, DE YANG, BUm ME LONG LTA BU'I YE SHES ZER DGOS PA YIN, BUm LAS SKYES PA'I ME LONG YE SHES GZUGS BRNYAN CAN MI SRID PA'I PHYIR, BUm DE NYID ME LONG YI SHES SU MED PA BYED
, ,DGOS GSUNG, YANG PHYOGS BZHI DBUS DANG LNGAR SHA LNGA BKOD NA MTSAMS BZHIR BDUD RTZI BZHI BKOD NAS DBUS SU MI 'GOD DE, SHAS BDUD RTZI GCIG GI GO CHOD PA LA DGONGS PA YIN, DE NAS GTOR MA'I DUS, 'JIG RTEN LAS 'DAS PA LA DBUL BA L'A LI TA'I GZHUNG CHUNG BA NA GSAL ZHING, 'JIG RTEN PA LA DBUL BA GZHUNG CHE BA NA GSAL LA, DE LA PHYOGS SKYONG GI SNGAGS DANG, HR'Am: sht'I: SPEL BA DMAR NAG GI GZHUNG GZHAN DU GSAL NA'ANG, HR'I: DANG SPEL PA MA GTOGS, AOm NAS SPEL BA MI 'DUG ,'DIR YA M'ANTA KA DANG SPEL BAL, AOm BH'U TZA RA NAm, ZHES PA'I, TZA RA ZHES PA'I SKABS SU, LA LAR, TZARYA ZHES 'BYUNG BA'I GZHUNG GCIG DANG, TZA RA ZHES PA YANG MTHONG STE, GANG BYUNG NA'ANG, DON LA, SA BLA LA SPYOD PA'AM, MKHA' SPYOD CES PA'I DON YIN TE, TZA RA DANG TZA RYA GNYIS KA SPYOD PA LA 'JUG PAS SO, ,YA PA TA LA TZA RA YA ZHES PA'I PA TA SA 'OG LA 'JUG CING, TZA RA SPYOD PA YIN PAS, SA SPYOD DAM SA 'OG SPYOD PA, M'A NA KHE TZA RA YA ZHES PA SA STENG SPYOD, TA B'UR PA MDUN NAM, SHAR LA 'JUG, KA DAKshI nA DI GA YA, GA-YAS SAM LHO, H'Um PA SHTZI NA NAm, ZHES PA'I BAm SHTZI NUB BAM RGYAB, PHAt AU TA RA TI GA YA ZHES PA, AU TA RA GA-YON NAM, BYANG GI PHYOGS RNAMS NGES PAR BYAS NAS, HR'I: shtA'I: DANG SPEL BA LA, AOm AI, ZHES PA AINDRA STE DBANG PO'I MING YIG GI DANG PO, HR'I: YA, ZHES PA'I YA, GSHIN RJE'I MING YIG DANG PO'O, ,shtA'I:
BA, ZHES PA RU NA CHU LHA'I MING YIN PAS DE YI MING YIG DANG PO'O, ,WI KshI ZHES PA 'DI LA, GNOD SBYIN GYI MING YIG DANG PO YOD RGYUR RIGS PAS, YAKshA ZHES PAS, GNOD SBYIN DE'I MING YIG DANG PO YA YONG RGYU YIN NA'ANG MA BYUNG ZHING, KshA ZHES PA GNOD SBYIN GYI SA BON DANG, DE MAN CHAD RNAMS LA, 'DI DANG 'DI'I SA BON DU SBYOR SHES PA MI SNANG NA'ANG, GTOR SNGAGS DE RNAMS BRJOD PAS, PHYOGS SKYONG BCO LNGA SOGS KYIS GTZO BYAS, SRID PA GSUM GYI 'BYUNG PO THAMS CAD LA 'BUL BA'I SNGAGS THUN MONG PAR BYAS PAS CHOG GSUNG, BCOM LDAN CHOS RJE 'JAM DBYANGS SPYAN LAM DU, ZHES PA 'DI, SLOB DPON ZHI BA YE SHES KYIS MDZAD DO, ,MGRON GYIS GTOR MA GSOL DUS LJAGS LAS MTHUN KHA DOG CAN DU BSKYED DGOS SHING, 'PHRIN LAS ZHUS PAS MDZAD PA'I ZHAL BZHES MDZAD PAR MOS PA MA BRJED PAR BYED DGOS, LAS GSHIN LA MA HE'I GDOD CAN DANG, RDO RJE NAG PO RTZE MO LNGA PAS DBU BRGYAN PAR BSGOM PA RNAMS BLA MA RVA LO'I MAN NGAG YIN, TZA MUndIL DUNG 'GRO'I PAGS PA GYON PA RGYA GZHUNG NAS BYUNG YANG, DUD 'GRO GANG YIN MI GSAL BA LA, KHA CIG STAG LPAGS BYED PA BYUNG NA'ANG, 'DI GLANG LPAGS YIN PAR BZHED PA MANG BAS DE YI LUGS SU BYAS PA YIN GSUNG, LAS GSHIN YAB YUM GNYIS KYI MNGON RTOGS LAS 'DIR MA BSHAD KYANG, DMIGS PA LA, YAB LA GSHIN RJE PHO BRGYAD, YUM LA MO BRGYAD KYIS BSKOR BA'I DMIGS PA BYED DGOS, MO BRGYAD NI, GSHIN RJE BRTAN
, ,MA SOGS, BDE MCHOG GI MCHIS ? MA RNAMS KYI MTSAN SNGAGS DANG 'DRA BA'I MING 'DZIN PA'I GSHIN RJE MO BZHI DANG, GSHIN RJE SREG MA NAG MO SOGS BZHI STE, BRGYAD KYIS BSKOR BA'I DMIGS PA BYED DGOS GSUNG, PHRENG BA BYIN RLABS KYI RDO RJE 'JIGS BYED BSKYED DUS, RGYU RDO RJE 'DZIN PA MI DGOS, BDAG BSKYED KYI PHYAG GNYIS PA, PHYAG BZHI PA, ZHAL GSUM PHYAG DRUG PA LTA BU YIN NA RGYU RDO RJE 'DZIN PA DGOS PAR SLOB DPON 'JAM PA'I DBYANGS KYIS BSHAD GZHAL YAS KHANG GI GZHI LA PA TRA BRIS PA 'DI LA, BSHAD TSOD MI 'DUG PAS, RANG RES, RTZE MO NAS, RIN PO CHE'I ME TOG BKRAM NAS GDA' GSUNG BA BZHIN, GZHAL YAS KHANG GI GZHI LA ME TOG BKRAM PA BYAS PA YIN GSUNG, GTOR MA BSDUS PA 'BUL DGOS BYUNG NA'ANG RGYU RDO RJE 'DZIN PA MI DGOS PAR, 'JIGS BYED RANG DKRONGS KYIS BSKYED PAR L'A LI TAS BSHAD GSUNG, BGEGS DANG LOG PAR 'DREN PA RNAMS, ,GDUL DKA' 'DUL BYED DPA' BO NI, ,SHIN TU GTUM PA'I KHRO GZUGS KYIS, ,MA RUNGS PA RNAMS TSAR GCOD SHOG ,SRID PA GSUM POR SKU NI RJES CHAGS DUL BAR LDAN, ,'OD ZER SNGON PO STONG LDAN NYI MA BRGYA STONG LDAN, ,RNAM MANG SKU DANG CHA LUGS RJES CHAGS SEMS PAR LDAN, ,HE RU KA DPAL DE DANG LHAN CIG GAR BYED SHOG ,CES PA DI, SLOB DPON CHEN PO RNAL 'BYOR GYI DBANG PHYUG NAG PO SPYOD PAS, BAR DOR MCHOG GRUB PA'I TSE SMON LAM YIN ZHES KYANG ZER RO, ,'DI RNAMS RJE RIN PO CHE'I GSUNG NGAG ZIN BRIS SU BTAB PA YIN NO,, ,,
'JIGS BYED KYI ZHABS 'OG GI BYA CHEN PO NI, SNYE MA BDUN PA'I RAB BYED BZHI PA NAS, BYA CHEN PO NI, MGO BO DKAR LA LUS PO NAG PA, DING SANG GI 'OL BAR GRAGS PA 'DI'O, ,ZHES PA TZAM 'BYUNG BA LA, DING SANG 'GA' ZHIG GO BOR 'DOD PA YANG YOD,, MANGGA LAm,, ,