//RGYA// *, ,RNAL 'BYOR GYI DBANG PHYUG L'U AI PA'I LUGS KYI BDE MCHOG GI RDZOGS RIM RNAL 'BYOR CHEN PO'I 'KHRID KYI RIM PA MDOR BSDUS PA BZHUGS SO, ,
, ,DPAL LDAN BLA MA HE RU KA DPAL DANG, ,GRUB CHEN KUN TU DGE BA'I ZHABS PAD LA, ,GUS PA CHEN POS 'DUD PA'I PHYAG BYAS NAS, ,RDZOGS RIM RNAL 'BYOR CHEN PO BSHAD KYIS NYON, ,PHYAG RGYA CHEN PO MCHOG GI DNGOS GRUB BSNYES PA'I GRUB CHEN L'U AI PA, MTSAN GZHAN KUN TU DGE BA ZHES BYA BA'I LUGS KYI DPAL 'KHOR LO BDE MCHOG GI LAM LA 'KHRID PA LA GSUM, LAM GYI SNGON DU 'GRO BA DANG, LAM DNGOS DANG, LAM GYI 'BRAS BU'O, ,DANG PO NI, THEG CHEN PA GNYIS KYI THUN MONG BA'I LAM GYI RIM PAS RGYUD SBYANG BA DANG, LUGS 'DI'I DBANG RDZOGS PAR BSKUR BA DANG, DAM TSIG DANG SDOM PA, DAG PAR BYED PA GSUM NI GZHAN DU BSHAD PA LTAR BYA'O, ,GNYIS PA LA GNYIS, BSKYED PA'I RIM PA LA BSLAB PA DANG, RDZOGS PA'I RIM PA LA BSLAB PA'O, ,DANG PO NI, SGRUB THABS NA YOD PA LTAR LHA'I GSAL SNANG RNYED PA DANG, DE LA RING DU GNAS PA'I SEMS BRTAN PO RNYED PA'I KHRID KYI RIM PA BYED PA'O, ,GNYIS PA LA GNYIS, GANG LA GNAS NAS BSGOM PA'I RTEN GYI RNAL 'BYOR DANG, DE LA BRTEN NAS BSGOM PA'I TSUL DNGOS SO, ,DANG PO NI, BSKYED RIM
, ,LA SEMS BRTAN PO RNYED NA, MTSAMS 'DI NAS BSKYED RIM ZHAR BYUNG DU DANG, GTZO BOR RDZOGS RIM BSGOM, DE LTA MIN PA'I BSKYED RIM LA MANG DU SLOB PA SNGAR SONG BA YIN NA, THUN DANG PO LA BSKYED RIM RGYAS PA LAN CIG DANG, THUN GZHAN GSUM GYI DUS SU BSDUS NAS BSGOM PA'I TSUL GNYIS BYA STE, LHA'I RNAL 'BYOR THUN 'TSAM PA RE BSGOM PA SNGON DU BTANG NAS THUN GYI MTHAR LHA BSDUS PA'I 'OG TU HE RU KA YAB YUM DU LANGS PA'I LHA'I RNAL 'BYOR GSAL GDAB PAR BYAS LA BSGOM MO, ,GNYIS PA LA GSUM, SROG AA BA DH'U T'IR 'DZUD PA'I RNAL 'BYOR DANG, TSUD PA LA BRTEN NAS RDZOGS RIM DNGOS BSGOM TSUL DANG, LUGS 'DI'I LAM RNAMS SBYOR DRUG DANG RIM LNGAR 'JOG TSUL LO, ,DANG PO LA GSUM, LTE BA'I DBUS SU SPRIN GYI SGRA LA SEMS BRTAN PAR BYED TSUL DANG, LTE BA'I SPRIN SGRA LAS LDANG 'JUG GNAS GSUM GYI RDOR BZLAS BYED TSUL DANG, RJES GZHIG GI RIM PA'I BSAM GTAN SGOM TSUL LO, ,DANG PO LA GSUM, SGOM PA'I SNGAR JI LTAR BYA BA DANG, DE NAS JI LTAR BSGOM PA DANG, BSGOM PAS JI LTAR SKYE BA'O, ,DANG
PO NI, YID DANG MTHUN PA'I BSAM GTAN GYI KHANG PAR STAN BDE BA LA 'KHOD NAS, GNAD BZHI DANG LDAN PAR BYA BA LA LUS KYI GNAD NI, RDO RJE SKYIL KRUNG NGAM SEMS DPA'I SKYIL KRUNG GANG BDE BCAS LA, SGAL TSIGS DRANG POR BSRANG, MGRIN PA CUNG ZAD DGUG ,MGO MI MTHO MI DMA' BAR BYA, MIG SNA RTZER BLTA, SNA LTE BA'I THAD SOR 'ONG BA DANG, MCHU DANG SO RANG LUGS PAR BZHAG ,LCE'I RTZE MO CUNG ZAD GYEN DU LDOG ,LAG PA GNYIS MNYAM GZHAG GI PHYAG RGYA BYA'O, ,DUS KYI GNAD NI, SPYIR RGYUN DU BA YIN LA, KHYAD PAR DU THO RANGS SOGS RIG PA GSAL BA DANG, PHYI DRO ME'I DUS SU BSGOM MO, ,RLUNG GI GNAD NI RLUNG PHYI NANG DU 'BYUNG 'JUG BYED PA HA CANG SGRA CAN DANG, DRAG PAR MI BYA BAR DAL GYIS RGYU BA'I 'JAM POR BYA'O, ,GANG DU DMIGS PA GTOD PA'I YUL GYI GNAD NI, LUS LA GNAD DU BSNUN PA'I GDAMS PA RNAMS LA, GANG DU DMIGS PA GTOD SA NGOS ZIN NAS, DER SEMS GTOD PA RNAM PAR DAG PA ZHIG MED NA, JI TZAM BSGOMS KYANG LHAN SKYES KYI YE SHES MI SKYE BAS, YUL GYI GNAD NGOS ZIN PA SHIN TU GAL CHE'O, ,DES NA 'DIR NI MDUN GYI LTE BA'I THAD SO'I RGYAB GZHUNG LA NYE BA NA, SPRUL PA'I 'KHOR LO RIM PA BZHI PA NANG SKOR LA RTZA 'DAB BZHI, DE'I PHYI MA LA BRGYAD, DE'I PHYI MA LA BCU DRUG ,BZHI PA LA RTZA 'DAB RE BZHI PA ZHIG YOD PA'I 'KHOR LO'I DBUS DRANG PO NA, RTZA DBU MA GA-YAS GA-YON GYI RO RKYANG GI MDUD PAS DKRIS PA YOD LA, MDUD PAS BCINGS PA'I THAD SO'I DBU MA'I NANG DU BSGOM MO, ,GNYIS PA NI,
, ,RTZA DBU MA'I GNAS DER NYI ZLA KHA SBYOR GYI THIG LE'I DBUS NA, DKAR LA DMAR PA'I MDANGS CHAGS PA, MU TIG GI RDOG PO LA SINDHU RAS BYUGS PA LTA BU'I H'Um YIG SHIN TU GSAL ZHING 'TSER BA'I THIG LE'I STENG NA, PHRA BA'I N'A DA DKAR LA DMAR BA'I MDANGS CAN 'OD ZER LNGA 'BAR BA LA SEMS GZUNG BAR BYA'O, ,GANG LA DMIGS PA'I RTEN, H'Um YIG NI, YI GE DANG N'A DA SHIN TU PHRA BA LA SEMS GTAD NA RLUNG 'DU SLA BAS DE LTAR BYA, DE LTAR MI NUS NA RE ZHIG CHE BA LA SEMS GTAD LA, DE NAS JE PHRA JE PHRAR BTANG LA SEMS BZUNG, SEMS 'DZIN LUGS NI TSUR NGOS NAS PHAR NGOS NA YOD PA LA SEMS 'DZIN PA LTAR MI BYA BAR, N'A DA'I NANG DU SEMS ZHUGS TE, DE DANG DBYER MED DU SONG BA LTAR BYAS NAS 'DZIN PAR GSUNGS PAS, DE BZHIN DU BYA'O, ,SEMS 'DZIN TSUL NI SEMS KYI GRIMS CHA HA CANG CHES NA RGOD PA SKYES NAS GNAS SU MI BTUB LA, GRIMS CHA BZHAG NA GNAS PA SKYE'ANG BYING BA PHRA MO MI CHOD PAS RLUNG SHIN TU 'DU DKA' BAS, 'DI TZAM ZHIG BSGRIMS NA NGES PAR RGOD PA SKYE BAR 'DUG PA NYAMS KYI STENG NAS SHES PAR BYAS LA, DE TZAM DU MI SGRIM PAR DE'I 'OG NAS RIG PA BSGRIMS TE BZHAG GO ,GANG BYAS KYANG DMIGS RTEN GSAL DU MA 'DOD NA, KHUNGS THUB DU MAS BSHAD PA BZHIN SNGON DU BSKYED RIM GYI TING NGE 'DZIN LAS SU RUNG BA BSKYED NAS DE NAS RDZOGS RIM LA 'JUG PA YIN NA, DMIGS RTEN MI GSAL BA'I DON MED NA'ANG, RIM PA DE LAS BRGAL NAS DA LTA 'JUG PA LTAR BYED NA, DE 'DRA BA'ANG 'ONG BAS DE LA NI, RTZA 'KHOR GYI DBUS
KYI DH'U T'I'I NANG NYID DU 'DZIN PA'I TSUL GYIS SEMS DER BZUNG LA, SEMS GNAS RNYED PA NA, DE NAS DMIGS RTEN GSAL BAR SNANG BA LA BSLABS LA, N'A DA LA SEMS BZUNG NGO, ,DE'ANG LUS KYI KUN SPYOD GLOD PA'I NGANG NAS BYA'I, ,LUS KYI GRIMS CHA CHE BAR MI BYA'O, ,'DI LA BYING RGOD GCOD TSUL DANG, DE LTAR BSKYANGS PA LAS SEMS GNAS SKYE BA'I RIM PA NI GZHAN NAS GSUNGS PA DANG 'DRA BAS THEG PA GNYIS THUN MONG GI LAM RIM DU RGYAS PAR BSHAD ZIN PA LAS SHES PAR BYA'O, ,GSUM PA NI, 'DI LTAR BSKYANGS PAS SEMS RGOD PA PHRA MO DANG YANG BRAL BA'I ME RTOG PA SHIN TU 'THUG PA DANG, BYING BA PHRA MO'ANG CHOD PAS RIG PA NGAR DANG LDAN PA'I GSAL DNGOS CHE BA DANG, LUS DANG SEMS LA BDE BA'I NYAMS CHE BA RNAMS 'BYUNG MOD KYANG, DE 'DRA BA NI CHOS 'DI PA DANG GZHAN PA DANG THEG PA CHE CHUNG GNYIS KA DANG RGYUD SDE GONG 'OG DANG RIM PA GNYIS KA'I THUN MONG BA YIN PAS 'DIR RDZOGS RIM PA'I LUS LA GNAD DU BSNUN PA'I TING NGE 'DZIN SKYE LUGS THUN MONG MIN PA ZHIG DGOS LA, DE'ANG SNGAR LTAR BSGOMS PAS SROG DH'U T'IR SDUD PA'I NYAMS RTAGS KHYAD PAR CAN RNAMS SKYE DGOS SO, ,DE'ANG DMIGS PA 'DI LTAR BYAS NAS BSGOM PA LA NI, SNGAR BSHAD PA'I DMIGS RTEN SHIN TU GSAL BA LA, THUN RE'I BAR DU BYING RGOD PHRA MO DANG BRAL BAR SEMS SHIN TU BRTAN PAR GNAS PA'I THUN 'KHYONGS PA BRTAN PA ZHIG MA BYUNG BAR DU SROG DBU MAR TSUD PA SHIN TU DKA' BAS, DE 'DRA BA ZHIG BYUNG BYUNG BAR DU SGOM DGOS SO, ,'DIR THUN GCIG NI ZHAG GCIG GI DRUG CHA'I, ,THUN 'KHYONGS PA'I BRTAN PA NI, KHAMS MI
, ,BDE BA SOGS KYI 'GAL RKYEN GLO BUR BA GZHAN MED NA, BYING RGOD DANG BRAL BAR THUN NGES CAN DU 'KHYONGS PA'O, ,'DI YANG SNGAR LUS LA GNAD DU BSNUN PA'I DMIGS PA MA BSKYANGS PAR SEMS MI RTOG PA TZAM BSKYANGS PA'I GNAS CHA BRTAN PO RNYED CING GSAL NYAMS SHAS CHE BAS SNGAR BSHAD PA'I DMIGS PA LA THUN 'KHYONGS PAS MI CHOG PAR SNANG BAS, SNGAR BSHAD PA'I LUS LA GNAD DU BSNUN PA'I DMIGS PA 'DI 'DRA LA RING DU BSKYANGS PAS THUN 'KHYONGS PA DGOS SO, ,'DI 'DRA BA'I SGOM TSUL GYIS RLUNG DH'U T'IR 'DZUD PA NI, SDOM 'BYUNG DANG SAm BHU tA DANG, ZHAL LUNG DANG SHA BA RI DBANG PHYUG SOGS KHUNGS THUB MANG POS BSHAD PA NI, 'DI'I RDZOGS RIM GYI RNAM BSHAD DNGOS GRUB KYI SNYE MAR RGYAS PAR BSHAD PA LAS SHES PAR BYA ZHING, L'U AI PA'I SGRUB THABS KYI 'GREL PA KHYAD PAR GSAL BYED LAS KYANG, YANG NA LTE BA'I PADMA LA GNAS PA'I NYI MA DANG ZLA BA KHA SBYOR BA'I NANG NA YOD PA'I SA BON H'Um LAS BYUNG BA'I PADMA'I RTZA BA LTAR 'OD ZER GYI RI MO LA SEMS BRTAN PAR BYED PA'I SGO NAS RTZA GNYIS LA, SROG GI RGYU BA SPANGS NAS DBU MA LA RAB TU 'JUG PAS, GTUM MO SBAR BA LAS SPYI BO'I ZLA BA ZHU NAS, 'KHOR LOR KHYAB PA'I RIM PAS DGA' BA LA SOGS PA'I DBYE BA'I KHYAD PAR GYIS, LHAN SKYES KYI DGA' BA BYUNG NAS RNAM PAR RTOG PA THAMS CAD SPANGS PAS, ZHES GSUNGS TE, SEMS KYI RJES SU RLUNG 'BRANG BA'I GNAD KYIS DH'U T'I'I NANG DU SEMS 'DZIN PA'I MAN NGAG GI GNAD SHES PAS BSGOMS NA SROG RLUNG RO RKYANG LA RGYU BA LDOG NAS DBU MAR
'DZUD NUS SHING, DE LA BRTEN NAS DBU MA'I NANG GI GTUM MO 'BAR NAS SPYI BO'I HAm YIG GI THIG LE DKAR PO ZHU STE, LAM DE NAS 'KHOR LO BZHI'I DBUS SU RIM PAR BAB PA LAS DGA' BA BZHI SKYE BA YIN NO, ,YANG NA ZHES PA NI SGRUB THABS SU BKOD PA'I RDZOGS RIM GYI GZHUNG GI TSIG DON BSHAD PA'I SKABS SU, DANG POR LTE BAR YE SHES SEMS DPA' YAB YUM BSKOMS NAS SDUD RIM BYAS PA'I SKABS SU, H'Um YIG BSGOM PAR BSHAD PA LTAR RAM, YANG NA DANG PO NAS SNGAR BSHAD PA LTAR LTE BAR H'Um YIG BSGOM PAR BYA ZHES PA'I DON YIN LA, DE'ANG YE SHES SEMS DPA' BSGOM PA'I SDUD RIM GYI DMIGS PA LA 'DOR LEN 'GA' ZHIG BYAS NAS H'Um YIG BSGOM PA TZAM SNGAR BLANGS PA YIN GYI, DER MA BSHAD PA'I DMIGS PA LOGS PA MIN NO, ,'O NA SNGAR BSHAD PA'I SGOM TSUL DE BSGOMS PAS SROG DH'U T'IR ZHUGS PA'I ZHUGS RTAGS MI 'KHRUL BA JI LTA BU 'BYUNG SNYAM NA, 'DI NI SHIN TU GAL CHE ZHING, RTAGS BSHAD PA GZHAN MANG DU SNANG BA RNAMS NI LTAR SNANG 'BA' ZHIG TU 'DUG PAS, YID CHES PA'I RTAGS MYONG BAS NGES THUB PA NI 'DI YIN NO, ,THUN 'KHYONGS PA'I 'OG TU RANG GI SNA BUG GANG RUNG RE RE BAR RGYU BA'I 'PHOS ? MA THAG PA'I SKABS NGOS BZUNG LA, DE NAS LUS GNAD DANG SEMS KYI 'DZIN LUGS SNGAR BZHIN BYAS PA'I MTHUS RING POR MI THOGS PAR SNA SGOR BRTAGS PA NA RLUNG MNYAM RGYUR THENGS PA DANG, DE'ANG LAN RE RE GNYIS GNYIS TZAM LA NGES PA MED KYI 'GAL RKYEN GZHAN MED NA, NGES CAN DU THENGS KYIN 'DUG PA DANG, MNYAM RGYU'ANG GANG RUNG GCIG DRAG LA CIG SHOS GZHAN PA MIN PAR
, ,DRAG ZHAN SHED MTSUNGS SU RGYU BA 'ONG BAR SNANG NA, RNAL 'BYOR DE'I STOBS KYIS SROG DBU MAR 'DZUD NUS PA TZAM DU 'JOG NUS MOD KYANG, LAN CIG TSUD PHYIN CHAD NAS GA-YAS GA-YON RE RE BAR MI 'PHO BA MIN NO, ,DE NI SROG DH'U T'IR ZHUGS PA YIN LA, DH'U T'IR GNAS PA NI MTSAMS 'DI NAS DRIL TE BSGOMS PAS, SNA BUG GI RGYU BA ZHAN DU SONG BA'I MTHAR ZHIB TU BRTAGS PA NA, RGYU BA PHRA MO'ANG LDOG PA ZHIG 'ONG, LDOG TSUL DE NGES DKA' NA LUS DRANG POR GA-YO 'GUL MED PAR BDE MOR GNAS PA'I DUS SU, LTO BA 'GUL MI 'GUL BRTAG ,CUNG ZAD 'GUL BAR SNANG NA, MA LOG PA'I RTAGS YIN, BRTAG PA 'DI KHYAD PAR DU LTE BA MAN CHAD KYI THUR SEL 'OG GI SNA SGOR 'BYUNG 'JUG BYED MI BYED RTOG PA LA GAL CHE BA YIN, SNA BUG GI RGYU BA PHRA MO'ANG LOG PA LA THIM DKA' SLA GNYIS LAS, THIM DKA' NA YUD CIG LA LTO BA RLUNG GIS KHENGS PA 'BYUNG ZHING, DE NAS ZHI BAR 'GYUR LA, ZHI MA THAG LTE BA DANG GSANG GNAS KYI ME GNAS PA'I THAD NAS DROD KHYAD PAR CAN SKYE, DE NAS RIM GYI ZHU BDE 'DREN NA, ,SNA BUG GI RGYU BA PHRA MO'ANG LOG PA 'DI BYING BA PHRA MO MCHOD PAR BSAGS PAS BYING BA SHAS CHE BA ZHIG LA'ANG 'ONG BAS RTZA 'KHOR GYI LTE BAR GNAD DU BSNUN PA LA MI MKHAS PAR BUM PA CAN MANG DU BSGOM PA BYAS SHING SROG DH'U T'IR TSUD PAR NI MI NUS PA'I RLUNG RTZA GNAS GZHAN DU BYER BA LA RLUNG 'BYUNG 'JUG KYANG MI BYED CING NANG DU 'DZIN RGYU'ANG MED PA ZHIG 'ONG YANG, DE NI DH'U T'IR TSUD PA DANG THIM PA GANG YANG MIN PAS KHYAD PAR DE RNAMS LEGS
PAR PHYED PAR BYA'O, ,RLUNG DH'U T'IR THIM PA BYUNG YANG SLAR YANG RLUNG LANGS NAS RTZA RNAMS LA RGYU BA NI DU MA ZHIG 'ONG NGO, ,SKABS 'DIR STONG PA BZHI DANG DGA' BA BZHI SKYE TSUL SOGS KYI RTOG PA SKYE TSUL NI 'OG TU 'CHAD PAR BYA'O, ,GNYIS PA LA GNYIS, RDOR BZLAS JI LTAR BYA BA DANG, DE LTAR BSGOMS PAS NYAMS MYONG SKYE TSUL LO, ,DANG PO NI, SNGAR BSHAD PA'I LTE BA'I N'A DA LA SEMS BRTAN PA'I GNAS PA RNYED PA NA RDOR BZLAS BSGOMS NA GNAD DU 'GRO TSABS CHE BAS DE LTAR BYA'O, ,'DI LA LUS DANG RLUNG DANG DUS KYI GNAD GSUM NI SNGAR DANG 'DRA'O, ,YUL GYI GNAD NI LTE BA'I RTZA 'KHOR GYI DBUS KYI DH'U T'I'I NANG DU ZLA BA DKAR DMAR GYI STENG DU H'Um YIG GAM N'A DA DKAR DMAR BSAMS LA, DE LAS RLUNG PHYIR LDANG BA DANG DER NANG DU 'JUG PA DANG DER GNAS PA BYA'O, ,DE'ANG RLUNG NANG DU 'JUG PA'I DUS SU DH'U T'I'I NANG NAS RLUNG GI GDANGS AOm YIG GI GDANGS SU BYUNG BAR BSAMS LA, LTE BA'I H'Um YIG GI N'A DA LA GZHUG ,DE LAS RLUNG LDANG 'JUG GANG RUNG ZHIG GI YUN CHAD TZAM ZHIG ZHUGS PA DER BZUNG NAS, DE'I RANG GDANGS A'A: YIG GI GDANGS SU BSAM, DE NAS DH'U T'I'I NANG GI H'Um NGAM N'A DA LAS PHYIR 'GRO BA'I TSE'ANG DH'U T'I'I NANG NAS PHYIR 'GRO BAR BSAM ZHING, DE'I TSE RLUNG GI RANG GDANGS H'Um GI GDANGS SU BYUNG BAR BSAMS LA, BSKYED RIM PA'I YID BZLAS KYI RDOR BZLAS SU MA SHAR BAR RLUNG GI GDANGS DANG SNGAGS GSUM GYI GDANGS DBYER MI PHYED PAR GNAS PA LA SEMS GTAD DE RDOR BZLAS BYA'O, ,LDANG 'JUG GNAS GSUM RTZA DBU MA'I NANG NAS MA BYAS PAR SPYIR KHONG PA'I NANG NAS 'GRO 'ONG SOGS BYED PA'I RDOR BZLAS
, ,LA JI TZAM 'BAD KYANG SROG DBU MAR BTZUD PA'I ZHUGS GNAS THIM GSUM LAS LHAN SKYES DNGOS SU BSKYED NUS PA MI SRID PAS, RDOR BZLAS KYI GNAD YE MA RTOGS PA YIN LA, RTZA DBU MA NAS RDOR BZLAS BYED PA NI, GDAMS NGAG GI DAM PA'O, ,'DI LA'ANG RIG PA LA NGAR THON PA DANG MA BRAL BAR BYA DGOS TE, DE MA BYAS PAR RIG PA SHUGS CHUNGS NA BYING BA PHRA MO SKYES PA BSAGS PAS RLUNG SNA BUG TU 'BYUNG 'JUG MI BYED PA'I SEMS GNAS PO BYUNG YANG SROG DH'U T'IR SDUD PA LA SHIN TU GNOD PAS, DER MA SONG BAR RE ZHIG LA THUN CHUNG LA GRANGS MANG BAR BYA'O, ,GNYIS PA NI, RDOR BZLAS BYAS PAS MYONG BA SKYE TSUL NI RE ZHIG RLUNG GI GDANGS LA SNGAGS SU MOS PA TZAM LAS MI 'BYUNG YANG, GOMS PA'I MTHAR PHAR LA MOS PA BYAS PA TZAM MIN PAR TSUR LA RANG GI GDANGS YI GE GSUM GYI GDANGS SU 'CHAR BA'I GSUNG GI NGA RGYAL 'PHOS PA 'BYUNG STE, BSKYED RIM GYI NGA RGYAL DANG 'DRA'O, ,DE'ANG RDOR BZLAS KYI GNAS DANG POR DH'U T'I'I NANG NAS 'BYUNG 'JUG BYED PAR MOS PA TZAM YIN KYANG, GDAMS NGAG GI GNAD LEGS PAR SHES NAS GOMS PA BSRINGS NA RLUNG SEMS 'JUG PA GCIG PA'I GNAD KYIS DH'U T'I'I NANG NAS DNGOS SU 'BYUNG 'JUG BYED PA 'ONG NGO, ,DE'ANG DPER NA RLUNG BYANG BA'I MTSAMS SU SNA BUG GA-YAS RKYANG LA RGYU BA NA GA-YON DU DMIGS PA GTAD NA GA-YAS LA RGYU BA LOG NAS GA-YON DU RGYU BA DANG, GA-YON RKYANG LA RGYU BA'ANG, DMIGS PA GA-YAS SU GTAD NA DER DNGOS SU RGYU BAR BYED NUS PA BZHIN DU RLUNG RTZA GANG LA RGYU'ANG DBU MA NYID NAS RGYU BAR MOS PA'I RDOR BZLAS BYAS NA,
GOMS PA'I MTHAR MOS PA TZAM MIN PAR DBU MA NAS DNGOS SU RGYU BA 'BYUNG NGO, ,'DI LA'ANG DANG POR SNA BUG RE RE BAR RGYU BZHIN PAR, RDOR BZLAS BYAS PA'I MTHUS MYUR POR MNYAM RGYUR NGES CAN DU THENGS PA'I TSUL SNGAR BSHAD PA BZHIN DU 'ONG BAR 'DUG NA RDOR BZLAS KYI RLUNG DH'U T'IR CHUD PA YIN NO, ,DE NAS SROG DH'U T'IR GNAS PA 'ONG LUGS NI 'BYUNG 'JUG GANG RUNG RE'I YUN TSAD KYI GNAS PA NI DANG POR CHED DU BYA DGOS LA, DE GOMS PA YUN BSRINGS NA MTSAMS SHIG NAS CHED DU MA BYAS KYANG RANG GI RANG GIS GNAS PA ZHIG 'ONG, DE BYUNG NA SLAR YANG GOMS PA BSRINGS PAS GNAS PA JE RING JE RING DU 'GRO, DE'I GNAD KYIS LDANG 'JUG GNYIS JE THUNG DU SONG NAS MTHAR 'BYUNG 'JUG GI RGYU BA PHRA MO'ANG LOG NAS GNAS PA 'BA' ZHIG PAR 'GRO'O, , SROG DBU MAR GNAS PA RNYED PA'I TSE LTE BA'I DH'U T'I'I NANG GI YI GE SOGS LA DMIGS PA GTAD NAS SEMS BZUNG BAS MYUR POR RLUNG THIM PAR 'GYUR TE THIM LUGS SNGAR BSHAD PA LTAR RO, ,RDOR BZLAS KYIS DBU MA'I RTZA MDUD 'GROL BA NI, RGYUD RDO RJE PHRENG BA LAS, SGRA DANG THIG LE'I MING DU BYAS, ,RLUNG GNYIS KYIS NI PHYE NAS NI, ,MA RIG MDUD PA 'BYED PAR BYED, ,CES RLUNG 'BYUNG 'JUG GNYIS LA RDOR BZLAS BYAS PAS, SNYING GA'I DH'U T'I LA RO RKYANG GIS DKRIS PA'I MA RIG PA'I MDUD PA 'BYED PAR GSUNGS TE, DPER NA SMYUG MA'I SBUBS 'GAGS PA LA THUR MA RING POS DE'I NANG DU 'BYUNG 'JUG BYAS PAS PHYED PA BZHIN DU, RLUNG 'BYUNG 'JUG GIS KYANG DE BZHIN DU 'BYED DO, ,RGYUD DER SNGAGS KYI DE NYID RDOR BZLAS KYIS DH'U T'I 'BYED PA MANG DU GSUNGS
, ,SO, ,DE LTAR KHUNGS THUB KYI GZHUNG MANG PO LAS GSAL BAR GSUNGS KYANG, BOD KYI GDAMS NGAG LA 'DI'I GNAD THON PA'ANG SHIN TU DKA' BAR BYUNG 'DUG PAS, 'DI RNAMS 'DI'I RDZOGS RIM GYIS BSHAD PA LAS SHES PAR BYA'O, ,'GREL PA GSUM LAS, SNOD BCUD DKYIL 'KHOR SOGS SDUD RIM BYAS TE, 'OD GSAL DU ZHUGS PA LAS LANGS PA'I 'OG TU RDOR BZLAS BYA BAR GSUNGS PA NI, BSKYED RIM GYI SKABS SU, SDUD RIM GYI RDZOGS RIM SGOM PA DANG RIM PA GNYIS KA'I BZLAS PA PHYOGS GCIG TU 'CHAD PA'I DBANG DU BYAS PA YIN LA, 'DIR NI BSKYED RIM BSGOMS ZIN PA'I 'OG TU LOGS SU RDZOGS RIM BSGOM PAR BSHAD PA'I LUGS LTAR BYAS PA YIN PAS MI 'GAL LO, ,GSUM PA NI, DBYANGS GSAL TSAR GCIG NGAG TU BRJOD PA LAS, A'A LI K'A LI'I PHRENG BA 'OD ZER LNGA LDAN 'KHOR LO GSUM GYI LHA TSOGS 'PHRO BA CAN SNA BUG GA-YAS PA'I RLUNG DANG 'GROGS NAS PHYIR 'PHROS PAS 'GRO BA RNAMS 'KHOR LO GSUM GYI LHA'I BDAG NYID DU BYAS TE, THOG MA MED PA NAS GRUB PA'I DPA' BO DANG RNAL 'BYOR MA RNAMS DANG RO MNYAM DU GYUR TE, SNA BUG GA-YON NAS ZHUGS NAS LTE BAR GNAS PAR BSAMS LA, DE YONGS SU GYUR PA LAS ZLA BA'I DKYIL 'KHOR RDZOGS PA DKAR LA DMAR BA'I MDANGS CAN, DBYANGS GSAL GZUGS BRNYAN BZHIN DU SHAR BA BSAM MO, ,ZLA BA'I DBUS SU H'Um YIG DKAR LA DMAR BA'I MDANGS CAN GNAS PAR BSGOMS LA, ZLA BA H'Um YIG DANG BCAS PA RNAMS YONGS SU GYUR PA LAS RANG NYID HE RU
KA SKU MDOG DKAR PO GA-YAS BRKYANG GIS BZHUGS PA, NAM MKHA'I 'JA' TSON LTA BU ZHAL GCIG PHYAG GNYIS KYIS RDOR DRIL BZUNG NAS YUM LA 'KHYUD CING, YUM RDO RJE PHAG MO DMAR MO ZHAL GCIG PHYAG GNYIS KYIS RDO RJE DANG THOD PA 'DZIN PAS 'KHYUD PAR BSAM MO, ,DE NAS SKAD CIG GIS GSANG GNAS GNYIS RDO RJE DANG PADMAR BYIN GYIS BRLAB, RANG NYID BDE MCHOG DNGOS DANG YUM PHAG MO DNGOS YIN PAR NGA RGYAL BRTAN PO BSKYED LA, 'KHYUD PA DANG TZUMBA NA LA SOGS PA'I SBYOR BAS SNYOMS PAR ZHUGS PA'I DGA' BA'I SGRAS BSKYOD PA DANG, BDE BA'I RANG BZHIN GYI 'OD ZER DMAR PO 'PHROS PA PHOG PAS SNOD BCUD THAMS CAD 'OD KYI RNAM PAR BYAS PAR BSAM MO, ,DE NAS SNOD THAMS CAD BCAD LA BSDU, BCUD THAMS CAD DAM TSIG SEMS DPA' YAB YUM LA BSDU, DAM TSIG PA YAB YUM LTE BA'I YE SHES SEMS DPA' YAB YUM LA THIM, DE GNYIS KYANG SNYOMS PAR ZHUGS PAS ZHU STE, ZHU BA DE YONGS SU GYUR PA LAS, LTE BA'I RTZA 'KHOR GYI DBUS KYI DH'U T'I'I NANG DU SINDHU RAS BYUGS PA'I MU TIG LTA BU'I H'Um YIG BDE BA CHEN PO'I RANG BZHIN DU GYUR, DE'I AU NAS N'A DA'I BAR DU SNGA MA PHYI MA LA RIM GYIS BSDUS NAS, N'A DA'ANG SKRA'I RTZE MO BRGYA STONG GI CHA TZAM DU BYAS PA LA SEMS BZUNG NGO, ,SDUD RIM 'DI YID NGOR JI LTA BA BZHIN DU SDUD NUS PAR SNANG NA, RANG GI LTE BA'I SNANG BA MI 'CHAR YANG, DE'I THAD SOR DMIGS NAS SNGAR BZHIN BSGOM, N'A DA TZAM LA DMIGS RTEN MA BYAS NA RLUNG SDUD NUS PA JI BZHIN DU MI 'ONG BAR SNANG NA N'A DA LA DMIGS, DE LA SEMS MA BZUNG YANG SDUD RIM
, ,BYAS PA NYID KYIS RLUNG SDUD NUS PAR SNANG NA, N'A DA'ANG MI DMIGS PAR BYAS LA LTE BA'I DBUS KYI DH'U T'I'I NANG GI THAD KA TZAM DU DMIGS LA SEMS GA-YO MED DU BZUNG NGO, ,SDUD RIM 'DI YUN HA CANG THUNG BA MIN PAR BAR BAR DU SNANG BA BSDUS PA'I STONG PA'I NGANG LAS, DAM TSIG SEMS DPA' DANG DE'I LTE BA'I YE SHES SEMS DPA' YAB YUM GYI SKUR LANGS NAS, SNGAR LTAR SDUD RIM DANG DE'I MTHAR SEMS 'DZIN PA BYAS NA RLUNG DBU MAR 'DU BA MYUR BA'I KHYAD CHE BA YIN NO, ,'DI LA'ANG RLUNG DBU MAR TSUD PA DANG, DER 'BYUNG 'JUG MI BYED PAR GNAS PA DANG, DE NAS RLUNG THIM PA 'ONG TSUL DANG, SEMS 'DZIN TSUL SOGS NI SNGAR BSHAD PA LTAR SHES PAR BYA'O, ,GNYIS PA RLUNG DH'U T'IR TSUD PA LA BRTEN NAS RDZOGS RIM DNGOS SGOM TSUL LA GSUM, MNYAM GZHAG TU SKYONG TSUL DANG, RJES THOB TU SKYONG TSUL DANG, DE LA BRTEN NAS BSRE BA BYED TSUL LO, ,DANG PO LA GNYIS, STONG PHYOGS KYI RDZOGS RIM SKYONG TSUL DANG, SNANG PHYOGS KYI RDZOGS RIM SKYONG TSUL LO, ,DANG PO NI, LVA BA PAS, DANG PO RI DVAGS SRID BZHIN SNANG BA STE, ,MTSAN MA GNYIS PA DUD KA'I RNAM PA CAN, ,GSUM PA SRIN BU ME KHYER DANG 'DRA BA, ,BZHI PA SGRON ME 'BAR BA LTA BUR GSAL, ,MTSAN MA LNGA PA RNAM PAR MA RTAGS PAR, ,SPRIN BRAL NAM MKHA' LTA BUR SNANG BA YIN, ,DE LTA BU YI MTSAN MA THOB NAS NI, ,PHYAG RGYA CHEN PO THOB PAR 'GYUR BA YIN, ,ZHES LTE BAR SNGAR LTAR SEMS BZUNG BA LAS, RTAGS RNAMS 'CHAR BA'I SKABS SU GSUNGS SO, ,DE LA RI DVAGS SRED NI SMIG RGYU'O, ,RTAGS BZHI PO 'DI SNGA MA LAS PHYI MA GSAL DU
SONG BA LA SMIG RGYU SOGS DANG 'DRA BAR GSUNGS KYI DE RNAMS DANG 'DRA BA'I SNANG BA 'CHAR BA MIN ZHES PA DANG, KHA CIG RTAGS CAN GYI SHES PA BRTAN GA-YO'I TSAD YIN ZHES PA DANG, KHA CIG DU BA SOGS DANG 'DRA BA'I SNANG BA 'CHAR BA LA BZHED PA GSUM BYUNG BA NI PHYI MA NYID LEGS PA YIN NO, ,RLUNG 'DU PHUL CHE CHUNG LA SOGS PA'I GNAD KYIS RGYA CHE CHUNG DANG BRTAN MI BRTAN SOGS SNA TSOGS SHIG 'CHAR BAS MTHA' GCIG TU MA NGES SO, ,DU BA LA SOGS PA 'DI THAMS CAD SROG DBU MAR SDUD PA'I THABS KHYAD PAR CAN GYI SEMS 'DZIN DANG, DE LTA BU MIN PA'I SEMS MI RTOG PAR 'JOG PA BSKYANGS PA RNAMS LA'ANG 'BYUNG BA GNYIS YOD PA'I KHYAD LEGS PAR PHYED DGOS SO, ,THABS SNGA MA LA 'BYUNG BA LA'ANG PHYIN CI LOG GI SA'I RLUNG LA SOGS PA RNAMS LDOG RUNG DU SONG BA DANG, CUNG ZAD LOG PA DANG GTAN NAS LOG PA'I RTAGS GSUM 'ONG BAR SMAN ZHABS KYIS BSHAD PA LTAR, DBANG PO'I SGO RNAMS NAS PHYIR HA CANG GA-YO BA'I RLUNG CUNG ZAD NANG DU LDOG BAR RTZOM PA DANG, CUNG ZAD LOG PA DANG, DBU MAR CUNG ZAD TSUD PA LA SOGS PA'I RTAGS NAS BZUNG STE, LAM MTHON POR SENG BA'I SKABS KYI LDOG PA DANG, LOG RTAGS KHYAD PAR CAN DU GYUR PA'I RIM PA DU MA ZHIG YOD PA LAS, 'DIR NI SROG DBU MAR THIM PAR RTZOM PA'I THIM RIM GYI SKABS YIN TE, SMIG RGYU NAS NAM MKHA' SPRIN MED KYI BAR RNAMS BAR MA CHAD DU 'BYUNG BA'I SKABS SO, ,DE'ANG SA CHU LA THIM PA NA SMIG RGYU DANG, CHU ME LA THIM PA NA DU BA DANG, ME RLUNG LA THIM PA NA ME KHYER DU SNANG BA DANG, KUN RTOG GI BZHON PA'I RLUNG SEMS LA THIM PA'I DUS SU RLUNG MED PA'I MAR ME 'BAR BA LTA BUR
, ,SNANG BA 'BYUNG, DE'I RJES SU MTSAN MA LNGA PA SPRIN DANG BRAL BA'I NAM MKHA' LTA BUR SNANG BA YIN, ZHES GSUNGS PA'I DON LA 'DI'I GTZO BO 'OD GSAL YIN MOD KYANG, STENG PA GZHAN GSUM YANG 'DIS STON NO, ,L'U AI PA'I 'GREL PA JO BOS MDZAD PA LAS KYANG SEMS SNANG BA GSUM DANG, 'OD GSAL GYI YE SHES DANG BZHI RIM GYIS SKYED PAR BYED DO, ,DE'ANG DPER NA STON GYI NAM MKHA' GA-YA' DAG PA LA NYI 'OD DMAR SER GYIS KHYAB PA DANG, SROD KYI SMAG NAG PO'I MUN PAS KHYAB PA DANG, DE SANGS NAS ZLA BA'I 'OD KYIS KHYAB PA'I SKABS GSUM, NAM MKHA'I RANG MDOG JI BZHIN THON PA'I SLOD BYED GSUM PO DE DANG BRAL BA'I THO RANGS DUS KYI NAM MKHA' STE BZHI YOD DO, ,DPE DE BZHIN DU YID NGOR PHYOGS MTSAMS RGYA CHAD PA MED PAR STONG SANG NGE BA LA 'OD ZER DKAR PO SHAR BA'I RNAM PA CAN YUL SNANG GZHAN MI 'CHAR BA NI SEMS SNANG BA DANG PO STE STONG PA ZHES KYANG ZER RO, ,DE NAS SNANG BA DE'ANG BSDUS NAS YUL SNANG GZHAN GANG YANG MED PAR STONG SANG NGE BA LA 'OD DMAR PO'AM DMAR SER SHAR BA'I RNAM PA CAN NI SNANG BA MCHED PA STE SHIN TU STONG PA ZHES KYANG ZER RO, ,DE NAS SNANG BA DE'ANG RIM GYIS BSDUS NAS YUL SNANG GZHAN MED PAR STONG SANG NGE BA LA 'OD NAG POS KHYAB PA 'DRA BA ZHIG 'CHAR BA NI, NYER THOB YIN TE STONG PA CHEN PO ZHES KYANG ZER TE, DE GNYIS KYANG PHYOGS MTSAMS RGYA MA CHAD PAR SNANG BA'O, ,DE'I DUS SU STOD LA DRAN PA MA NYAMS KYANG MTSAMS SHIG NAS RLUNG THIM PHUL CHE BAS DRAN MED DU THOM GYIS 'GRO STE, DE THAMS CAD KYANG BDE BA CHEN PO'I NGO BOR SKYE'O, ,DE
NAS MUN PA LTAR SNANG BA DANG DRAN MED DE SANGS PA NA THO RANGS KYI NAM MKHA' GA-YA' DAG PA KHA DOG SLOD BYED KYI RKYEN DANG BRAL BA BZHIN DU 'OD GSAL MTHA' DBUS MED PA'I TING NGE 'DZIN SKYE STE, THAMS CAD STONG PA ZHES KYANG ZER RO, ,STONG PA BZHI GA'I DUS SU DE KHO NA NYID KYI LTA BA DRAN PAR BYAS NAS BDE STONG SBYOR BA YIN MOD KYANG, GTZO BO NI 'OD GSAL GYI DUS YIN PAS DE SHAR BA NA, JI SRID DU RLUNG GIS BSKYOD NAS, 'OD GSAL LAS MA GA-YOS PA DE SRID DU DE KHO NA NYID KYI LTA BA DRAN PAR BYAS LA, BDE STONG DBYER MED PAR SGOM PAR BYA'O, ,STONG PA BZHI'I RDZOGS RIM SKYE BA'I SKABS 'DIR YAS BABS KYI DGA' BZHI RNAMS SKYE BAS, DER NI MNGON BRJOD LAS, DGA' BA DANG PO YE SHES TE, ,MCHOG TU DGA' BA MNYAM PAR SBYOR, ,BDE BAR DGA' BA GRUB PA CHE, , LHAN CIG SKYES DGA' ZLA MED YIN, ,SBYOR BA DANG NI SHIN TU SBYOR, ,SBYOR BA CHE DANG YE SHES SBYOR, ,DE DAG MCHOG DGA'I RIM PA'O, ,THIG LA GZHUNG GI SBYOR SHES NA, ,PHRA BA'I SBYOR BAS BLTA BAR BYA, ZHES GSUNGS PA'I DGA' BZHI'I RIM PA NI, YAS BABS KYI RIM PA YIN LA, RKANG PA THA MA GNYIS KYI DON NI, THIG LE'I RNAL 'BYOR BSGOM PA'I DON SHES NAS YI GE DANG THIG LE PHRA MO'I SBYOR BA STE, RNAL 'BYOR BSGOMS NAS DGA' BA BZHI JI LTAR SKYE BA BLTA BAR BYA'O ZHES PA'O, ,'GREL PAR RNAL 'BYOR DANG, RJES SU RNAL 'BYOR DANG, SHIN TU RNAL 'BYOR DANG, RNAL 'BYOR CHEN PO'I YE SHES KYI CHO GA'I RIM PA'O, ,ZHES 'CHAD DE DGA' BA BZHI DANG RIM PA BZHIN SBYAR RO, ,YANG BYANG SEMS ZHU BAS GNAS GANG DU SLEB PA NA, YAS BABS KYI DGA'
, ,BZHI SKYE TSUL NI, RGYUD RDOR PHRENG LAS, DE RJES LUGS 'BYUNG BSHAD BYA STE, ,BDE CHEN 'KHOR LO SPYI BO LA, ,DE NI DGA' BAR BSHAD PA YIN, ,LONGS SPYOD 'KHOR LOR MCHOG DGA' DANG, ,BRAL DGA' CHOS KYI 'KHOR LOR GNAS, , SPRUL PA'I 'KHOR LO LHAN CIG SKYES, ,DGA' BA NYAMS SU MYONG BAR BYED, ,CES GSUNGS TE, SPYI BO NAS MGRIN PA'I BAR DU SLEB PA NA DGA' BA SKYE LA, DES GZHAN GSUM LA'ANG SHES PAR BYA'O, ,YANG MNGON BRJOD LAS, LTE BA SNYING PAD NU MA'I DBUS, , LCE YI RTZA DANG MGO STENG DU, ,DGA' BA DANG NI MCHOG DGA' NYID, ,DAM PAR DGA' DANG LHAN CIG SKYES, ,DANG PO 'DAB MA DRUG CU BZHI, ,GNYIS PA BRGYAD PA MCHOG YIN TE, ,GSUM PA 'DAB MA BCU DRUG PA, ,BZHI PA SUM CU RTZA GNYIS 'DAB, ,PHAG MO LTE BA'I RTZAR GNAS PA, ,LHAN CIG SKYES DGA' KHRAG 'THUNG MCHOG, CES LTE BAR DGA' BA DANG, SNYING GAR MCHOG DGA' DANG, LCE'I RTZA BA STE MGRIN PAR DAM PA STE KHYAD PAR GYI DGA' BA DANG, MGO'I STENG STE SPYI BOR LHAN SKYES KYI DGA' BA SKYE BAR BSHAD PA NI, MAS BRTAN GYI DGA' BA BZHI'I RIM PA'O, ,SNYING PAD NI SNYING GA'I GA'I RTZA 'KHOR TE, GZHAN GSUM LA'ANG SBYAR RO, ,LTE BA'I RTZA BAR PHAG MO NI, GTUM MO AA THUNG DANG, LHAN SKYES KHRAG 'THUNG DU BSHAD PA NI, MAS BRTAN GYI LHAN SKYES BYANG SEMS GYEN DU LDOG PA SPYI GTZUG TU PHYIN PA NA SKYE BAS SPYI GTZUG GI HAm YIG HE RU KAR BSTAN PA'O, ,MAS BRTAN GYI GNAS KYANG BYANG SEMS NOR BU NAS BRTZAMS TE, LTE BA'I 'KHOR LO'I BAR DU LOG PA NA DGA' BA SKYE STE, DE'I
RIG PA GZHAN GSUM LA'ANG SBYAR RO, ,MAN SNYER MAS BRTAN BZHI KA LHAN SKYES LA CHUNG DU DANG BAR MA DANG, CHEN PO DANG CHEN PO'I CHEN POR PHYE BA BSHAD DE, YAS BABS KYI BDE BA BZHI LAS NI, MAS BRTAN GYI BZHI BDE BA CHE BA ZHIG 'ONG DGOS SO, , MAS BRTAN GYI SGO NAS BYANG SEMS GYEN DU LOG PA, SPYI BOR MA BRTAN BAR DU, BDE BA MI BRTAN LA, SPYI BOR BRTAN NAS BDE BA BRTAN PAR GSUNGS TE, PHYAG CHEN THIG LE LAS, DE NAS SROG GI STENG DU YID, ,DE MI MTHUN PAS 'BAB PAR 'GYUR, , PADMA'I LTE BA'I DBUS GNAS PA, ,GANG DE PHYI NAS BRTAN GYUR PA, ,DE TSE MGON PO 'GRO MI 'GYUR, ,JI LTAR BU GA MED SNOD DU, ,CHU RNAMS ZAD PA MED GNAS LTAR, ,DE TSE BDE BA BRTAN PAR 'GYUR, ,BRTAN PAS LHAN CIG SKYES PA'I DGA', ,DE PHYIR SANGS RGYAS MI ZAD PA, ,RNAL 'BYOR PA YIS NGES PAR 'THOB, CES SO, ,YID NI KHU BA DANG MI MTHUN PA LUGS LDOG DANG, BRTAN PA NI SPYI BOR YIN PAR MAN SNYE LAS GSUNGS SO, ,'DIR BDE BA CHEN PO 'DI LAM GYI SROG YIN LA, DE BRTAN PA NI MAS BRTAN GYI BDE BA LA RAG LAS PAS NA, DE SKYE TSUL GAL CHE'O, ,DE'ANG MAN SNYE LAS, DE'I DGA' BA NI NOR BU NAS BRTZAMS NAS LTE BA JI SRID PA STE, MA 'PHOS PA'I BYANG CHUB KYI SEMS 'PHEL BZHIN PAS STENG DU NYE BAR 'GRO'O, ,ZHES GSUNGS PA'I TSIG ZIN LTAR NA NOR BU NAS PHYIR MA 'PHOS NA RANG LOG BYED PA 'DRA BA ZHIG 'DUG KYANG DE MIN TE, MA 'PHOS KYANG SNGAR GYI LA MA DE NYID NAS MAR 'ONG BA LTAR MI BYED PAR GAR SONG CHA MED DU 'GRO BA DANG, PHYIR LOG KYANG SPYI BO'I BAR DU THAL GYIS 'GRO BA'I NGES PA MED PAR GNAS
, ,DMA' MA NAS GRAM NAS 'GRO BA'ANG 'ONG BAS, DES NA YAR LA 'DRIL NAS SPYI GCUG BAR DU 'GRO BA ZHIG DGOS PA NI RNAL 'BYOR PAS CHED DU BYA DGOS TE, RGYUD RDOR PHRENG LAS, RLUNG GI DE NYID SNGON SONG NAS, ,DE NYID STENG DU RGYU BAR NI, ,RNAL 'BYOR PAS NI SGRUB PAR BYED, ,DE LAS SPRUL PA'I 'KHOR LO NI, ,DGA' BA ZHES BYAR RNAM PAR SHES, ,ZHES GSUNGS SHING, DE NAS CHOS 'KHOR GYI STENG DANG DE NAS LONGS SPYOD KYI 'KHOR LO'I STENG DU 'GRO BA RNAMS RNAL 'BYOR PAS BYED PAR GSUNGS SO, ,RLUNG DBU MAR ZHUGS GNAS THIM GSUM BYAS PA LAS BYUNG BA'I DGA' BZHI NI, PHYAG CHEN THIG LE LAS, GANG PHYIR DGA' BA DE SNANG BA, ,SNANG BA MCHED PA MCHOG TU BSHAD, ,KHYAD DGA' NYE BAR THOB PAR SHES, ,LHAN CIG SKYES TE 'OD GSAL BA'O, ,ZHES DGA' BA BZHI SNANG MCHED THOB GSUM 'OD GSAL DANG BZHIR GSUNGS SO, ,'DI LA NI LUGS LDOG GI SNANG MCHED THOB GSUM 'OD GSAL GYI YE SHES SU MI RUNG YANG, LUGS LDOG GI DGA' BA GZHAN GSUM LHAN SKYES SU 'JOG PA ZHIG BSHAD LA, DE BZHIN DU LUGS MTHUN GYI SNANG MCHED THOB GSUM DANG, DE GSUM DGA' BA GSUM DU BZHAG PA LHAN SKYES KYI DGA' BAR MI 'JOG KYANG, LUGS MTHUN YAS BABS KYI DGA' BA GSUM LHAN SKYES KYI DGA' BAR 'JOG PA'I SKABS SHIG KYANG YOD PAR MNGON NO, ,'ON KYANG RLUNG DBU MAR ZHUGS GNAS THIM GSUM BYAS PA LAS BYUNG BA MIN PA'I DGA' BA GSUM NI LHAN SKYES MTSAN NYID PAR 'JOG TU MI RUNG NGO, ,GNYIS PA NI, RLUNG CHER GA-YOS TE 'OD GSAL LAS
LANGS PA NA, DANG POR NYER THOB DANG, DE NAS MCHED PA DANG, DE NAS SNANG BA SKYE LA, DE NAS MAR ME LTAR 'BAR BA NAS SMIG RGYU'I BAR BZHI LUGS LDOG TU 'BYUNG NGO, ,DE'I 'OG TU KUN RTOG GA-YO BA'I RLUNG GA-YOS NAS, RANG BZHIN GYI RTOG PA RNAMS SKYE'O, , SEMS LA NYER THOB SOGS KYI RIM PA GSUM BYUNG YANG LUS SGYU MA'I SKUR LDANG BA NI, 'OD GSAL LAS LANGS PA DANG DUS MNYAM DU 'BYUNG NGO, ,DE YANG 'OD GSAL GYI SKABS KYI RLUNG SEMS TZAM LAS SGYU LUS RDO RJE 'CHANG GI SKUR 'BYUNG LUS RAGS PA LAS LOGS SU BYE BA'I TSUL GYIS LDANG BA YIN LA, DE NI DE LTAR LDANG PA'I 'PHEN PA BTANG BA'I MTHUS 'BYUNG ZHING, DE NYID SNANG PHYOGS KYI RDZOGS RIM YIN PAS, DER LANGS PA'I SKU DE NYID YUM DANG BCAS PA'I RNAM PA CAN LA RTZE GCIG TU MNYAM PAR GZHAG PAR BYA'O, ,DE LA GNAS MA NUS NA LUS SNGA MA DAM TSIG PA YAB YUM GYI SKUR BSGOMS LA, DE'I SNYING GAR YE SHES SEMS DPA'I TSUL GYIS ZHUGS NAS DER GNAS PAR BYA'O, ,JO BO CHEN PO'I 'GREL PAR DE LAS GZUGS NI THOB PAR 'GYUR, ZHES L'U AI PA'I SGRUB THABS SU GSUNGS PA'I DON 'OD GSAL LAS SGYU MA'I SKUR LANGS PA LA BSHAD DE, ,'DI LA RJES MTHUN PA'I SGYU LUS DANG, SGYU LUS DNGOS DANG, ZUNG 'JUG GI SKU'I SGYU LUS TE GSUM YOD DE, RGYAS PAR NI 'PHAGS SKOR GYI GDAMS NGAG TU BSHAD PA LAS SHES DGOS PAR YOD DO, ,GNYIS PA NI, DE LTAR MNYAM GZHAG TU RDZOGS RIM GNYIS PO BSKYANGS PA'I MTHAR TING NGE 'DZIN DE LA GNAS MA NUS PAR, DE LAS LANGS PA'I RJES THOB TU NI, GZUGS
, ,SGRA LA SOGS PA'I YUL SNANG GANG SHAR THAMS CAD LA, MNYAM GZHAG TU BSKYANGS PA'I BDE STONG GIS RGYAS BTAB STE, THAMS CAD BDE STONG DBYER MED KYI RNAM ROL TU BLTA BA LA SLO BAS NA, DE GOMS PA LA BRTEN NAS YUL SNANG GANG SHAR THAMS CAD BDE BA 'BAR BA'I GROGS SU 'GRO STE, MKHA' 'GRO RGYA MTSO LAS, LAS KYI PHYAG RGYA RAB SBYOR BAS, ,NYI MA RE RE BSGRUB PAR BYA, ,DE YI DUS SU GANG MTHONG BA, ,DNGOS PO KUN LA LTUNG BAR BYA, ,'DOD CHAGS CHEN PO'I TSUL BDAG NYID, ,RTAG TU BDAG NYID LA 'BYUNG 'GYUR, ZHES GSAL BAR GSUNGS SO, ,LAS KYI PHYAG RGYA RAB SBYOR NI MTSON PA TZAM STE, RDOR BZLAS LA SOGS PA'I LUS LA GNAD DU BSNUN PA'I THABS KYIS LHAN SKYES KYI BDE CHEN DRANGS TE MNYAM GZHAG TU BSKYANGS PA'I MTHAR YANG RJES THOB TU SNGAR LTAR BYA'O, ,DE'I DUS SU ZHES PA'I RKANG PA GNYIS KYI DON NI, RANG GIS SNGAR NYAMS SU MYONG BA'I BDE CHEN 'DREN PAR BYAS LA, DES YUL SNANG GI DNGOS PO KUN LA LTUNG BAR BYA BA STE, RGYAS BTAB NAS BSGOM PAR BYA BA'I DON NO, ,'DOD CHAGS CHEN PO'I TSUL RANG LA 'BYUNG BA NI, DE LTAR BYAS PAS BDE CHEN 'BAR BA'I GROGS SU 'GRO BA'O, ,RJES THOB TU DE LTAR BSKYANGS PA'I 'OG TU, SLAR YANG PHYI NANG GI THABS GNYIS GANG RUNG LA BRTEN NAS STONG PHYOGS DANG SNANG PHYOGS KYI RDZOGS RIM TSAN PA GNYIS BSKYED NAS, MNYAM PAR 'JOG PA'I MNYAM RJES SPEL MA RGYUN LDAN DU BYA'O, ,GSUM PA NI, L'U AI PA'I 'GREL PA LVA BA PAS MDZAD PA LAS, 'OD GSAL MNGON DU PHYOGS BAR
BYAS LA GNYID KYANG 'OD GSAL NYID DU MOS PAR BYAS TE NYAL LO, ,ZHES GNYID KYI 'OD GSAL 'DZIN PAR GSUNGS SHING, SHES RAB SRUNG BA DANG BI BH'U TI TZANDRA'I 'GREL PAR YANG DE BZHIN DU BSHAD PAS, RDZOGS RIM GYI SKABS SU'ANG GNYID KYI 'OD GSAL 'DZIN PA'I TSUL DGOS SO, ,DE'ANG SNGAR BSHAD PA LTAR SROG DH'U T'IR ZHUGS GNAS THIM GSUM BYAS PA LA STONG PA BZHI DANG DGA' BA BZHI 'DREN NUS PA'I MTSAMS NAS BYED DO, ,DE'I TSUL NI BLA MA DANG YI DAM LA GNYID KYI 'OD GSAL 'DZIN NUS PA'I GSOL BA MANG DU BTAB, NYAL BA'I DUS SU GZHOGS GA-YAS PA 'OG TU BCUG PA SOGS SPYI DANG MTHUN PAR BYA, RANG DAM TSIG PA YAB YUM DU GSAL BA'I NGANG NAS, DBYANGS GSAL DAG TU BRJOD NAS YE SHES SEMS DPA' YAB YUM BSKYED PA SOGS SNGAR DANG 'DRA BA LA KHYAD PAR NI SNYING GAR BSGOM MA, ,DE'I SDUD RIM BYAS PA'I MTHAR SNYING GA'I DH'U T'I'I NANG DU DKAR LA DMAR BA'I MDANGS CAN GYI H'Um YIG LA RTZE GCIG TU DMIGS PA GTAD NAS NYAL BAS SNYING GA'I DBU MA'I NANG DU RLUNG ZHUGS GNAS SOGS BYAS PA LAS SMIG RGYU NAS MAR ME LTAR 'BAR GYI BAR GYI RTAGS BZHI DANG DE NAS SNANG MCHED THOB GSUM 'OD GSAL DANG BCAS PA'I STONG PA BZHI SNGAR BSHAD PA LTAR 'CHAR LA, DE'I TSE 'OD GSAL SHAR BA'I DUS SU STONG PA NYID KYI LTA BA DRAN PAR BYAS LA BDE STONG DBYER MED KYI LHAN CIG SKYES DGA'I YE SHES LA CI GNAS GNAS KYI BAR DU BZHAG LA BSKYANG NGO, ,RLUNG GA-YOS PA'I DBANG GIS TING NGE 'DZIN DE LAS LDANG BAR RTZOM PA NA, BDAG GIS GNYID KYI 'OD GSAL
, ,CHOS SKU'I NGANG LAS RMI LAM GYI LUS LONGS SPYOD RDZOGS PA'I SKUR LDANG BAR BYA'O SNYAM PA'I 'PHEN PA BTANG LA 'OD GSAL GYI RLUNG SEMS TZAM LAS CHU DVANGS PA LAS NYA 'PHAR BA'I TSUL DU, RMI LAM GYI LUS RNYING PA LAS LOGS SU BYE BA'I TSUL GYIS LDANG BAR BYA'O, ,DE'ANG RDO RJE 'CHANG HE RU KA DKAR PO YAB YUM GYI SKUR LDANG BA YIN NO, ,DE LTAR LUS LOGS SU BYE BA DE LA DMIGS NAS JI TZAM GNAS KYI BAR MNYAM PAR BZHAG ,DE LA GNAS MA NUS NA, LUS SNGA MA DAM TSIG SEMS DPA' YAB YUM GYI SKUR BLTAS LA, DE'I THUGS KAR ZHUGS TE YE SHES SEMS DPA'I TSUL GYIS GNAS PAR BYA STE, SHIN TU ZAB PA'I BSRE BA GSUM MO, ,YANG LVA BA PA'I 'GREL PA LAS, 'CHI BA'I DUS SU DPAL HE RU KA DANG PHAG MO LA SOGS PA'I DPA' BO DANG, RDO RJE RNAL 'BYOR MA ME TOG DANG BDUG SPOS DANG RGYAL MTSAN DANG BA DAN LA SOGS PA RNAM PA SNA TSOGS PA PHYAG TU THOGS PA RNAMS KYIS 'OD GSAL GYI GO 'PHANG LA 'GOD PAR BYED DO, ,ZHES LAM 'DI BSGOMS PA'I PHAN YON GYI SKABS SU, 'CHI BA'I TSE NA DPA' BO DANG DPA' MO RNAMS KYIS MKHA' SPYOD DU 'KHRID PAR GSUNGS PA'I MKHA' SPYOD LA DRANG NGES GNYIS YOD PA'I NGES DON GYI MKHA' SPYOD 'CHI BA 'OD GSAL ZIN PAR MDZAD PA LA BSHAD CING, 'GREL PA GZHAN GNYIS KYIS KYANG, DE BZHIN DU BSHAD PAS 'CHI BA DANG 'OD GSAL BSRE BA'I GDAMS PA 'DIR SHES DGOS SO, ,'DI LA NI RLUNG DH'U T'IR ZHUGS GNAS THIM GSUM BYAS PA LAS STONG PA DANG DGA' BZHI
'DREN NUS PA DANG, DE LA BRTEN NAS GNYID DANG BSRE BA SOGS NUS PA ZHIG TSE 'DIR BYUNG NA, 'CHI BA DANG 'OD GSAL BSRE BA SOGS JI BZHIN PA 'BYUNG, DE LTAR MI NUS PAS KYANG DA LTA NAS GOMS PAR BYAS NA, 'CHI BA DANG BAR DE'I SKABS SU KHYAD CHE BAS DE GNYIS KAR SBYANG BAR BYA'O, ,DE'I TSUL NI LHA DANG BLA MA LA SKYE SHI BAR DO GSUM CHOS SKU LONGS SKU SPRUL SKU DANG BSRE NUS PA'I GSOL BA MANG DU GDAB PA DANG, KHAS BLANGS PA'I DAM TSIG NYAMS PA RNAMS SLAR SOR GZHUG CING, YONGS SU DAG PAR BYA BA DANG, 'CHI BA DANG BAR DE'I DUS SU DE'I BSRE BA RNAMS MNGON DU BYA'O SNYAM PA'I 'PHEN PA NYIN RE BZHIN MANG DU BTANG, DE NAS 'CHI BA'I TSE SA CHU LA THIM PA LAS SMIG RGYU LTA BU NAS RLUNG RNAM SHES LA THIM PA LAS MAR ME 'BAR BA LTA BU'I RTAGS BZHI 'BYUNG BA'I RIM PA RNAMS YID LA BYA, DE NAS STONG PA BZHI RIM PA BZHIN 'CHAR BA'I TSUL YID LA BYAS LA, DE RE RE'I SKABS SU'ANG LTA BA DRAN PAR BYA, KHYAD PAR DU 'OD GSAL SHAR BA'I SKABS SU LTA BA DRAN PAR BYAS LA, CI NAS KYANG 'OD GSAL LA GNAS PAR BYA'O SNYAM PA'I 'PHEN PA MANG DU BTANG STE, 'DI DA LTA NAS NYI MA RE RE ZHING MANG DU SBYANG NGO, ,DA GZOD 'CHI KHA MA'I SKABS SU SLEB PA NA LHA DANG BLA MA LA GSOL BA GDAB PA DANG, DAM TSIG RNAMS DAG PAR BYA, SA CHU LA THIM PA SOGS KYI RTAGS SHAR BA NA, NGO SHES PAR BYAS LA SNGAR BSHAD PA LTAR 'CHI BA 'OD GSAL GYI BAR RNAMS NGOS ZIN PA DANG, 'CHI BA 'OD GSAL GYI NGANG LAS BAR DO GRUB PA'I TSE, DE'I MTHUS HE RU KA YAB YUM DU LDANG BAR BYA'O SNYAM PA'I 'PHEN PA DRAG TU BTANG
, ,LA, BAR DO'I 'PHEN PA 'DI DA LTA NAS KYANG SBYANG DGOS SO, ,DE NAS TSE 'DIR RDOR BZLAS DANG, SNYING GA'I H'Um YIG LA DMIGS PA GTOD PA GANG BYANG CHA CHE BA ZHIG LA DMIGS NAS RDOR BZLAS SAM YI GE LA SEMS 'DZIN PA GANG RUNG BYA'O, ,RDAR BZLAS BYED NA SKABS 'DIR H'Um YIG LA DMIGS NAS DE NAS LDANG 'JUG GNAS GSUM GYI DMIGS PA BYA'O, ,TSE 'DIR BAR DO LA DER NGO SHES PAR BYA'O SNYAM PA'I 'PHEN PA MANG DU BTANG BA SOGS KYI MTHU LA BRTEN NAS, BAR DO LA BAR DOR NGO SHES PA BYUNG BA NA, RANG NYID HE RU KA YAB YUM GYI SKUR BSGOMS LA LTA BA BSKYANGS, SKYE BA KHYAD PAR CAN BZUNG BA'I DON DU NGAS PAR DO LONGS SKU 'DI LA BRTEN NAS SPRUL SKU'I SKYE BA GZUNG BAR BYA'O SNYAM PA'I 'PHEN PA MANG DU BTANG STE DA LTA NAS DE'I 'DUN PA MANG DU SBYONG, DE LTAR RDZOGS RIM LAS BSHAD PA'I SKABS SU STONG PA BZHI'I YE SHES SKYE BA'I RIM PA RNAMS, 'CHI RIM GYI SKABS BZHIN DU BSKYED PA DANG, DE LAS LHA'I SKUR LDANG BA'I DUS SU 'CHI BA 'OD GSAL LAS BAR DOR LDANG BA JI BZHIN DU BYED PA DANG, SGYU MA'I LUS LOGS SU BYE BA DE RNAM SMIN GYI LUS LA 'JUG PA NA BAR DOS MNGAL DU SKYE BA LEN PA BZHIN DU BYED PA GSUM DANG, DE BZHIN DU GNYID DU SONG NAS RMI LAM MA SHAR BA'I BAR DU STONG PA BZHI BSKYED PA 'CHI RIM BZHIN DANG, DE NAS RMI LAM GYI LUS LONGS SKUR LDANG BA BAR DO BZHIN DANG, DE NAS LUS SNGA MA LA 'JUG PA SKYE BA LEN PA BZHIN DU BYED PA GSUM DANG, DE LTAR BYAS KYANG TSE 'DIR MCHOG MA GRUB NA, 'CHI BA DNGOS DANG 'OD GSAL BSRE BA DANG,
BAR DE 'GRUB PA'I DUS SU SGYU MA'I SKU 'GRUB PA DANG, DE MA GRUB NAS BAR DO'I LUS LEN DGOS PA BYUNG NA, DE DANG SGYU MA'I SKU BSGOM PA BSRE BA DANG, DE NAS SKYE BA LEN PA SPRUL SKU BZHIN DU BYED PA NI, BSKYED RIM GYI SKABS SU SBYANG GZHI SBYONG TSUL LA, SKYE SHI BAR DE GSUM SKU GSUM DU 'KHYER BA'I LAM 'KHYER GSUM BRTAN PA BYUNG NA, RDZOGS RIM GYI SKABS SU DE'I GNAD LEGS PAR THON DGOS PAS, RIM PA DANG PO'I SKABS SU LAM 'KHYER GSUM BSHAD PA NI, SGRUB THABS KYI t'I GAR YID CHES KYI KHUNGS DANG SBYAR NAS RGYAS PAR BSHAD ZIN TO, ,GSUM PA LUGS 'DI'I LAM RNAMS SBYOR DRUG DANG RIM LNGAR 'JOG TSUL NI, MKHA' 'GRO RGYA MTSO LAS, SO SOR SDUD DANG DE BZHIN DU, ,,BSAM GTAN SROG RTZOL 'DZIN PA DANG, ,RJES SU DRAN DANG TING 'JIG TE, ,SBYOR BA'I MTSAN NYID RNAM DRUG GO ,ZHES DANG RANG GI SKU NI SGYU MA MNYAM, ,BDAG BYIN RLABS 'DI PHRA MO DANG, ,RDO RJE BZLAS PA'I RANG MTSAN NYID, ,RDZOGS PA'I BYANG CHUB SEMS KYI GTER, ,DE LAS LHAG MA ZUNG 'JUG GO ,ZHES SBYOR DRUG DANG RIM LNGA'I THA SNYAD GSAL BAR GSUNGS SO, ,DE LA RANG GI SKU SGYU MA DANG MNYAM PA STE, MTSUNGS PA'I BDAG BYIN RLABS SHIN TU RTOGS DKA' BAS PHRA MOR GYUR PA NI, RIM PA GSUM PA BDAG BYIN RLABS KYI RIM PA SGYU LUS SO, ,RDO RJE BZLAS PA'I RANG GI MTSAN NYID NI, RDO RJE BZLAS PA'I RIM PA STE RIM PA DANG PO'O, ,MNGON PAR RDZOGS PAR BYANG CHUB PA'I RIM PA NI, RIM PA BZHI PA STE MING GZHAN 'OD GSAL GYI RIM PA'O, ,SEMS KYI GTER NI, SEMS DBEN SEMS DMIGS KYI RIM PA STE
, ,RIM PA GNYIS PA'O, ,SNGAR BSHAD PA BZHI LAS LHAG MA NI, ZUNG 'JUG GI RIM PA STE RIM PA LNGA PA'O, ,BDE MCHOG 'BYUNG BA LAS KYANG SEMS DBEN MA GTOGS PA'I RIM PA BZHI GSUNGS SHING, MNGON BRJOD KYI 'GREL PAR YANG, SGYU LUS DANG 'OD GSAL DANG ZUNG 'JUG SOGS YANG YANG BSHAD LA, LO DRIL GYI GZHUNG LAS RIM LNGA'I THA SNYAD MI GSAL YANG DON RNAMS YOD DO, ,'GREL PA KHYAD PAR GSAL BYED LAS, 'DUS PA PHYI MA DRANGS NAS MCHOG 'GRUB PA LA SBYOR BA YAN LAG DRUG GI RIM PAS SGRUB DGOS ZHES BSGRUBS NAS L'U AI PA'I LUGS 'DI LA'ANG YAN LAG DRUG SBYOR BAR BYED DO, ,SBYOR TSUL NI, MIG LA SOGS PA'I SHES PA LNGA GZUGS LA SOGS PA'I YUL LNGA LA 'JUG PA SO SOR SDUD PA STE, 'GUGS PAR BYED PA NI SOR SDUD DANG, DE LTAR BSDUS NAS NANG GI PHUNG KHAMS SKYE MCHED THAMS CAD BDE MCHOG LA SOGS PA'I LHAR SBYOR BA NI BSAM GTAN YIN LA, RTEN BRTEN PA'I DKYIL 'KHOR BA'I NGO BO TZAM DU RTOG PA NI RTOG PA DANG, DMIGS PA DE LA BRTEN PA'I SEMS KYI NGES PA NI DPYOD PA DANG, DE LTAR LHA LA DMIGS PAS YID BDE BA NI DGA' BA DANG, DGA' BAS BSGOMS PA'I LHA LA SIM PA DANG BCAS PA'I SEMS NI BDE BA DANG, BDE BA DANG LDAN PA'I SEMS TING NGE 'DZIN DU 'GYUR BAS RNAM PA SNA TSOGS PA'I THA MAL GYI KUN RDZOB KYI YUL CAN GYI RTOG PA LOG PAS LHA KHO NA LA DMIGS PA'I SEMS NI SEMS RTZE GCIG PA STE, BSAM GTAN GYI YAN LAG LNGA'O, ,SROG RTZOL LA
SOGS PA'I YAN LAG PHYI MA BZHI RDZOGS RIM DU BSHAD CING, 'DI KHO NA RGYUD DANG BRGYUD PA'I RIM PA LAS 'BYUNG ZHING BSHAD PA'O, ,ZHES BSHAD PA DE HE RU KA NAS DPE MED 'TSO LAS BRGYUD PA'I RIM PA LAS KYANG 'BYUNG ZHING RGYUD LAS KYANG BSHAD CES 'CHAD DO, ,DE NI 'JAM DPAL GYI ZHAL GYI LUNG DANG MTHUN ZHING, RGYUD KYI RDO RJE'I TSIG RE RE'ANG DON MI 'DRA BA DU MA LA TSAD LDAN GYI BSHAD PA YOD PAS, BSHAD PA PHYOGS GCIG PA RE LA ZHEN NAS GZHAN SPANG BAR MI BYA'O, ,YANG DE NYID LAS SROG RTZOL 'CHAD PA NA, GSANG GNAS DANG LTE BA DANG SNYING GA DANG SMIN MTSAMS LA SOGS PA GANG YANG RUNG BAR THIG LE DANG YI GE SOG SLA DMIGS PA'I THABS GANG YANG RUNG BAS SROG DH'U T'IR SDUD PA THAMS CAD SROG RTZOL YIN PAS GZHUNG RNAMS LAS LTA BA LA SOGS PA'I RTZA 'KHOR GYI GNAS PHYOGS RE'I SROG RTZOL BSHAD PA NI MTSON PA CEM MO ZHES BSHAD DO, ,DE LTAR SROG RTZOL GYI SGO MI 'DRA BA MANG PO YOD PA BZHIN DU, SGO DE DAG GI RLUNG DBU MAR BTZUD NAS, RLUNG DBU MAR 'BYUNG BA 'JUG MI BYED PAR GNAS PA LA 'DZIN PA'I YAN LAG TU GSUNGS PA'ANG DU MA ZHIG 'ONG NGO, ,KHYAD PAR GSAL BYED LAS, SEMS RIN PO CHE NAM MKHA' DANG MNYAM PA 'DI 'OD GSAL NYID DU GYUR PA LAS, GANG SROG RLUNG GIS BRTAN PAR GYUR PA DE 'DZIN PA'O, ,ZHES RAGS PA'I SROG RLUNG THIM NAS PHRA BA'I SROG RLUNG BRTAN PAS SEMS 'OD GSAL DU ZHUGS PA SBYOR BA YAN LAG DRUG GI 'DZIN PA'I YAN LAG TU BSHAD PA NI, 'DUS PA PHYI MA LAS, RANG DBANG RIN CHEN DGAG PA YI, ,GZUNG BA 'DZIN PA YIN PAR BSHAD, ,SEMS NI 'GOG
, ,BA'I RDO RJER 'GYUR, ,ZHES GSUNGS PA'I DON DU 'DOD DE, SGRON GSAL LAS, RANG NI GZUGS LA SOGS PA'I YUL DANG, DBANG PO NI MIG LA SOGS PA STE, DE GNYIS DGAG PA STE, THIM NAS DE'I 'OG TU RIN CHEN TE SEMS SROG RLUNG DANG BCAS PA BKAG CING, NUB PAR GYUR PA'I GZUNG BA NI 'DZIN PA STE ZHES YANG DAG PA'I MTHA' 'OD GSAL DU BSHAD PA DE DANG MTHUN NO, ,SEMS RLUNG DANG BCAS PA THIM PA NI, SEMS GSUM RIM GYIS THIM PA'O, ,RJES DRAN GYI YAN LAG NI, 'DUS PA PHYI MA LAS, RJES DRAN GANG ZHIG RNAM SGOM PA, ,DE DANG 'DRA BA SPRO BAR BYA, ,RJES SU DRAN PA ZHES BSHAD DO, ,ZHES GSUNGS PA'I DON SGRON GSAL LAS, SNGAR LUGS MTHUN DU 'JUG PA'I DUS SU SMIG RGYU NAS 'OD GSAL GYI PAR DU THOB PA DE DANG 'DRA BAR PHYIS LUGS LDOG TU LANGS PA'I CHE 'OD GSAL LAS NYER THOB NAS SMIG RGYU'I BAR DU BYUNG BA LA BSHAD PA BZHIN DU BYA'O, ,KHYAD PAR GSAL BYED LAS, 'DZIN PA'I MJUG THOGS SU, SNGAR BSGOMS PA'I LHA LA RJES SU DRAN PA 'BYUNG STE, DE'ANG BA SPU'I BU GA RE RE NAS PHUNG PO DANG KHAMS DANG SKYE MCHED DANG LHA 'OD ZER GYI RNAM PAR 'PHRO BA LA RJES DRAN GYI YAN LAG TU BSHAD DO, ,TING NGE 'DZIN GYI YAN LAG NI KHYAD PAR GSAL BYED LAS, 'OD GSAL LAS YE SHES KYI RANG BZHIN GYI SKUR BZHENGS PA DE'ANG TING NGE 'DZIN ZHES BYA BAR BSHAD DO, ,ZHES BSHAD PA NI SGRON GSAL LAS BSHAD PA BZHIN NO, ,DON GYI 'OD GSAL LAS LANGS PA'I MTSAMS SU NI, SLOB PA'I ZUNG 'JUG SGYU MA'I SKU GRUB PA NAS TING NGE 'DZIN GYI YAN LAG MTSAN NYID PAR BZHAG GO ,MTSON BYED
DPE'I 'OD GSAL LAS LANGS PA'I MTSAMS SU NI, SGYU LUS DNGOS DANG RJES MTHUN PA GNYIS KYI LDANG TSUL YOD DO, ,RIM LNGAR 'JOG TSUL NI, LUGS 'DI'I RDZOGS RIM LA THOG MAR NUS PA THON PA'I MTSAMS NAS LUS DBEN GYI SKOR CI RIGS PA 'BYUNG LA, RDO RJE BZLAS PA'I RIM PA NI SHIN TU GSAL LO, ,DE DANG THABS GZHAN GYIS RLUNG LA NUS PA THON NAS LTE BA'I DBU MA'I MDUD PA LEGS PAR GROL BA'I DBUS SU RLUNG BSDUS TE THIM PAR MI NUS PA TSUN CHAD NI RDOR BZLAS KYI RIM PAR 'DU ZHING, RTZA MDUD LEGS PAR GREL NAS SGYU LUS DNGOS SU BSKYED MI NUS TSUN CHAD NI SEMS DBEN DU BSDU'O, ,SGYU LUS DNGOS SU BSKYED NUS PA NAS DE LA BYANG BA'I BAR NI BDAG BYIN RLABS KYI RIM PA'O, ,DE NAS DE KHO NA NYID KYI DON MNGON DU GYUR PA DANG DE'I THABS KYI NYE RGYU RNAMS LA NI 'OD GSAL DANG MNGON PAR BYANG CHUB PA'I RIM PA ZHES BYA'O, ,DE'ANG DO HA LAS, DE NYID BSAMS PAS RNAM RTOG RANG BZHIN 'GAG PAR 'GYUR, ,GAL TE SEMS KYIS SEMS NI MTSON DU 'GRO, RNAM RTOG DANG NI YID NI MI GA-YO BRTAN PAR GNAS, ,JI LTAR LAN TSVA CHU LA THIM PA LTAR, ,DE LTAR SEMS NI RANG BZHIN LA THIM 'GYUR, ,ZHES GSUNGS PAS, DE KHO NA NYID KYI DON BSGOMS PAS RANG BZHIN GYI RTOG PA RNAMS THIM STE, LHAN CIG SKYES PA'I BDE CHEN GYI SEMS CHOS RNAMS KYI RANG BZHIN YIN LUGS LA ZHUGS TE, LAN TSVA TSU LA THIM PA LTAR GYUR PA MTSON BYA DON GYI 'OD GSAL GYI YE SHES SO, ,DE LAS ZUNG 'JUG GI RIM PA 'GRUB TSUL NI BSHAD ZIN TO, ,GSUM PA LAM GYI 'BRAS BU 'GRUB TSUL NI, SNGAR BSHAD
, ,PA'I SLOB PA'I ZUNG 'JUG GI TING NGE 'DZIN DANG, RDZOGS RIM PA'I SPYOD PA RNAMS LA GOMS PAR BYAS PAS, MI SLOB PA'I ZUNG 'JUG MCHOG GI DNGOS GRUB 'GRUB LA, DE'ANG MTHAR THUG 'GRUB PAR NYE BA NA, JI LTAR 'ONG BA'I TSUL NI GUR LAS NYI MA GCIG GIS 'GRUB 'GYUR RAM, ,CHO GAS NYI MA GNYIS NA'AM, ,NYIN GSUM RAB TU SPYAR BAS SAM, ,DE BZHIN NYI MA BZHI YIS SAM, ,NYIN LNGA RAB TU SBYAR BA YIS, ,'GRUB 'GYUR 'DI LA THE TSOM MED, ,ME TOG SOGS PAS MCHOD BYAS NAS, ,BSAM GTAN GNAS SU RAB 'DUG STE, ,PHYAG RGYAR LHAN CIG RAB ZHUGS NAS, ,RDO RJE SBYOR BA YANG DAG BRTZAM, ,RDO RJE NYI MA NUB NAS NI, ,SBYOR BA 'DI NI RAB BRTZAMS NA, ,SKYA RENGS 'CHAR BA'I DUS SU NI, ,'GRUB 'GYUR 'DI LA THE TSOM MED, ,CES PA 'DIS STON LA, LUNG DE'I DON MAN SNYER, ZLA BA DRUG TU RIG MA'I BRTUL ZHUGS SPYAD NAS NYI MA SHES SHING, GANG GI TSE NYIN MTSAN DU MAR ME'I 'OD KYI RGYUN SHES SHING, GANG GI TSE NYIN MTSAN DU MAR ME'I 'OD KYI RGYUN BZHIN DU RTAG TU DE KHO NA NYID KYI RNAL 'BYOR LA MNGON DU PHYOGS PAR NUS PA DE'I TSE, LHAN CIG SPYOD PA'I PHYAG RGYA DANG LHAN CIG RDO RJE SEMS DPA' LA SOGS PA RNAMS LAS GANG YANG RUNG BA'I RNAL 'BYOR MNGON DU BYAS TE THO RANGS KYI THUN NAS BRTZAMS LA, RDZOGS PA'I RIM PA'I RNAL 'BYOR ZHES BSHAD PA'I PHYIR, KHAMS GSUM PA THAMS CAD GCIG PA'I RANG BZHIN MNYAM PAR BZHAG PA DANG MNYAM PAR MA BZHAG PA GCIG PA'I NGO BOR LHAG PAR MOS NAS, RDO RJES RGYAS BTAB PA'I PHYAG RGYA
DANG RO MNYAM PA NYAMS SU MYONG ZHING, MAR ME'I 'OD KYI RGYUN LTA BUR RTAG PAR NYIN MTSAN THOG THAG GNAS PAR BYA'O, ,DE NAS RAB KYI MTHAR THUG PAR SON PA'I DGA' BA BZHI'I DE KHO NA NYID MNGON DU BYAS PA LAS SKYA RENGS 'CHAR BA'I DUS SU 'GRUB STE, SGRUB THABS MCHOG RNAMS KYIS ZHES BSHAD PA'I PHYIR, MAN NGAG JI LTA BAR PHYAG RGYA CHEN PO 'GRUB PA'I NYE BA'I NYIN ZHAG LA STE, BYANG CHUB KYI SEMS ZLA BA'I CHA MTHA' DAG YONGS SU RDZOGS PA'I PHYIR, SKYA RENGS 'CHAR BA'I DUS SU SHIN TU YONGS SU DAG PA'I YE SHES KYI BDUD RTZI YONGS SU RDZOGS PAS, PHYAG RGYA CHEN PO GRUB PA RDO RJE 'DZIN PA'O ZHES BSHAD DO, ,RDO RJE NYI MA ZHES PA BZHI 'DUS PA LAS KYANG 'BYUNG LA, DE'I DON NI SGRON GSAL LAS PHYI NANG GI BYANG CHUB PA'I RIM PA GNYIS LA BSHAD PA'I DANG PO NI, RDO RJE NYI MA NI YONGS SU GRAGS PA'I NYI MA NYID DO, ,DE NUB PA NI DMAR THAG CHAD PA'I MTSAMS SU YO BYAD CI RNYED PAS BLA MA MNYES PAR BYA BAR GSUNGS TE TSOGS KYI MCHOD PA'O, ,DE NAS BLA MA'I DRIN GYIS MTSAN PHYED NA PHYAG RGYA LA BRTEN NAS DBANG BSKUR BA THOB NAS SKYA RENGS 'CHAR KA'I DUS SU 'OD GSAL GYI RIM PA'I LUNG PHOG PAS KYANG MCHOG 'GRUB BO, ,NANG GI MNGON BYANG GI RIM PA LTAR BSHAD NA, RDO RJE NYI MA NI THABS KYI YE SHES SNYOMS PAR 'JUG PA'I MTSAN NYID CAN 'BYUNG BA'O, ,NUB PA NI DE 'GAGS PA LA BSHAD DE, THABS KYI YE SHES NI, STON DUS KYI SPRIN MED PA'I NAM MKHA' GA-YA' DAG PA LA, NYI 'OD SHAR BA LTA BU'I SNANG BA MCHED PA'O, ,DES MTSON NAS SHES RAB KYI NGO BO NYID KYI SNANG BA'I YE SHES KYANG NUB CING 'GAGS PA DANG, 'OD
, ,GSAL GYI SNGON DU DE SGRUB PA'I SNANG BA NYER THOB KYI SBYOR BA 'DI NI BRTZAMS PA STE 'BYUNG BAR BYA'O, ,SKYA RENGS 'CHAR BA NI, MA RIG PA NYER THOB DE 'DAS PA'I DUS SU SGRUB PA POS STONG PA BZHI RIM GYIS MNGON DU BYED PAS PHYAG CHEN GYI DNGOS GRUB 'GRUB PAR GSUNGS TE, DE'I TSE 'OD GSAL BSGOMS PAS GNYIS SNANG 'KHRUL PA'I BAG CHAGS SBYANGS NAS THO RANGS CHOS KYI SKU MTHAR THUG PA MNGON DU GYUR PA'I TSE, SLOB PA'I ZUNG 'JUG SGYU MA'I SKU, MI SLOB PA'I ZUNG 'JUG GI SKUR 'GYUR ZHING, 'KHOR BA JI SRID PAR SKU DE NYID LAS MI GA-YO BAR BZHUGS SO, ,DE 'DRA BA'I DAG PA GNYIS LDAN GYI YUL GYI 'OD GSAL NI, 'DUS MA BYAS PA'I CHOS KYI SKU DANG, YUL CAN GYI 'OD GSAL NI YE SHES CHOS KYI SKU DANG, BDE BA CHEN PO'I SKU ZHES KYANG BYA'O, ,DE'I RTEN GZUGS KYI SKU RLUNG SEMS TZAM LAS GRUB PA NI LONGS SKU YIN LA, SKU DE GNYIS NGO BO GCIG LA LDOG PA THA DAD TZAM YIN PAS, GZUGS SKU DE LA GNYIS SU MED PA'I YE SHES KYI SKU ZHES LAN DU MAR GSUNGS PAS, GZUGS SKU SANGS RGYAS KYI SAS MA BSDUS PAR GDUL BYA'I RGYUD KYIS BSDUS PA DANG, SHES PA LAS NGO BO THA DAD PA'I BEM POR 'DOD PA DANG, 'BRAS BU'I SKABS SU YE SHES MED PA SOGS 'PHAGS PA YAB SRAS KYI BZHED PAR SMRA BA NI LEGS PAR SMRA BA MA YIN PAR SHES PAR BYA'O, ,DE 'DRA BA'I ZUNG 'JUG GI SKU DES MCHOG GI SPRUL PA'I SKU LA SOGS PA'I SPRUL PA DU MA ZHIG MDZAD DO, ,'KHRID YIG 'DI NI DMIGS PA'I RIM PA GTZO BOR BYAS NAS SHIN TU BSDUS
PA'I LUGS YIN PAS, 'DI'I BSHAD BA RGYAS PAR NI RDZOGS RIM RNAL 'BYOR CHEN PO'I RNAM BSHAD DNGOS GRUB SNYE MAR RGYAS PAR BSHAD PA LAS NGES PAR SHES DGOS PAR YOD PAS DE LAS SHES PAR BYA'O, ,SHIN TU ZAB PA 'KHOR LO BDE MCHOG GI , RDZOGS RIM GRUB CHEN L'U AI PA YI LUGS, ,DMIGS PA'I RIM PAR SHIN TU BSDUS PA 'DI, ,SBYAR BA'I DGE BAS LAM 'DI RGYAS BYED SHOG, CES RNAL 'BYOR GYI DBANG PHYUG CHEN PO L'U AI PA'I LUGS KYI BDE MCHOG GI RDZOGS RIM RNAL 'BYOR CHEN PO'I 'KHRID PA'I RIM PA MDOR BSDUS PA 'DI DPAL 'KHOR LO SDOM PA'I RNAL 'BYOR PA SHAR TZONG KHA PA BLO BZANG GRAGS PA'I DPAL GYIS 'BROG RI BO CHE DGE LDAN RNAM PAR RGYAL BA'I GLENG DU SBYAR BA'O,, (,,'DIS KYANG BSTAN PA RIN PO CHE PHYOGS THAMS CAD DU RGYAS PAR BYED NUS PAR GYUR CIG,) DZA YANTU,, ,