*, ,DRIL BU RIM LNGA'I KHRID YIG RJE'I GSUNG BZHIN SEMS DPA' CHEN POS MDZAD PA BZHUGS SO, ,
, ,LHA CHOG HE RU KA DANG RJE BTZUN MA, ,DPA' BO DPA' MO'I DBANG PHYUG THAMS CAD DANG, ,RDO RJE 'CHANG DNGOS RJE BTZUN TZONG KHA PA'I, ,ZHABS LA RTAG TU GUS PAS PHYAG 'TSAL LO, ,'DIR RDO RJE DRIL BU BA'I LUGS KYI 'KHOR LO BDE MCHOG GI LAM LA 'KHRID PA LA GSUM, LAM GYI SNGON DU 'GRO BA DANG, LAM DNGOS DANG, LAM BSGOMS PA'I 'BRAS BU'O, ,DANG PO NI, THEG CHEN PA GNYIS KYI THUN MONG BA'I LAM GYIS RGYUD SBYANG PA DANG, LUGS 'DI'I DBANG RDZOGS PAR BSKUR BA DANG, DAM TSIG DANG SDOM PA DAG PAR BYED PA GSUM GTZO BO YIN PAS GZHAN DU BSHAD PA LTAR BYAS LA, BLA MA GONG MA'I PHYAG BZHES LTAR, RDO RJE SEMS DPA'I SGOM BZLAS DANG, BLA MA'I RNAL 'BYOR BSGOMS NAS GSOL BA DRAG TU 'DEBS PA'ANG BYA'O, ,GNYIS PA LA GNYIS, BSKYED RIM LA BSLAB PA DANG, RDZOGS RIM LA BSLAB PA'O, ,DANG PO NI, SGRUB THABS NA YOD PA LTAR LHA'I GSAL SNANG RNYED PA DANG, DE LA RING DU GNAS PA'I SEMS BRTAN PO RNYED PA'I KHRID RIM BYED PA'O, ,GNYIS PA LA GNYIS, GANG LA GNAS NAS BSGOM PA'I RTEN GYI RNAL 'BYOR DANG, DE LA BRTEN NAS BSGOM PA'I TSUL DNGOS SO, ,DANG PO NI, BSKYED RIM LA SEMS BRTAN PO RNYED NA MTSAMS 'DI NAS BSKYED RIM ZHAR BYUNG DU DANG, GTZO BOR RDZOGS RIM BSGOM DE LTA MIN PAR BSKYED RIM LA MANG DU SLOB PA SNGAR SONG BA MA YIN NA THUNG DANG PO LA BSKYED RIM RGYAS PA LAN CIG DANG, THUN GZHAN GSUM GYI DUS SU BSDUS NAS BSGOM
, ,PA'I TSUL GNYIS BYAS TE, LHA'I RNAL 'BYOR THUN 'TSAMS PA RE BSGOM PA SNGON DU BTANG NAS, THUN GYI MTHAR LHA BSDUS PA'I 'OG TU, HE RU KA YAB YUM DU LANGS PA'I LHA'I RNAL 'BYOR GSAL GDAB PAR BYAS LA BSGOM MO, ,GNYIS PA LA GNYIS, BSAM MI KHYAB KYI RIM PA BSKYED PA'I SNGON DU 'GRO BA'I RIM PA DANG, BSAM MI KHYAB KYI RIM PA BSKYED PA'I TSUL DNGOS SO, ,DANG PO LA GNYIS, BYANG SEMS DKAR PO RGYAS PAR BYED PA LA BRTEN PA'I TING NGE 'DZIN BSKYED TSUL DANG, BYANG SEMS DMAR PO RGYAS PAR BYED PA LA BRTEN PA'I TING NGE 'DZIN BSKYED TSUL LO, ,DANG PO LA GSUM, DH'U T'I'I DBUS SNYING GAR GNAD DU BSNUN PA LAS TING NGE 'DZIN BSKYED TSUL BDAG BYIN RLABS KYI RIM PA DANG, DH'U T'I'I YAR SNA MAR SNAR GNAD DU BSNUN PA LAS TING NGE 'DZIN SKYE TSUL SNA TSOGS RDO RJE'I RIM PA DANG, PHYAG RGYA BZHI LA BRTEN NAS TING NGE 'DZIN BSKYED TSUL NOR BU 'GENG BA'I RIM PA'O, ,DANG PO LA GNYIS, SA BON DANG BCAS PA'I RANG BYIN RLABS DANG, SA BON MED PA'I RANG BYIN RLABS SO, ,DANG PO LA GSUM SGOM PA'I SNGAR JI LTAR BYA BA DANG, DE NAS JI LTAR BSGOM PA DANG, BSGOMS PAS JI LTAR SKYE BA'O, ,DANG PO NI, YID DANG MTHUN PA'I BSAM GTAN GYI KHANG PAR STAN BDE BA LA 'KHOD NAS, GNAD BZHI DANG LDAN PAR BYA BA LA, LUS KYI GNAD NI, RDO RJE SKYIL KRUNG NGAM SEMS DPA'I SKYIL KRUNG GANG BDE BCAS LA, SGAL TSIGS DRANG POR BSRANG, MGRIN PA CUNG ZAD DGUG ,MGO MI MTHO MI DMA'
BAR BYA, MIG SNA RTZER BLTA, SNA LTE BA'I THAD SOR 'ONG BA DANG, MCHU DANG SO RANG LUGS PAR BZHAG ,LCE'I RTZE MO CUNG ZAD GYEN DU LDOG ,LAG PA GNYIS MNYAM GZHAG GI PHYAG RGYA BYA'O, ,DUS KYI GNAD SPYIR RGYUN DU BYA BA YIN LA, KHYAD PAR THO RANGS SOGS RIG PA GSAL BA DANG, PHYI DRO ME'I DUS SU BSGOM MO, ,RLUNG GI GNAD NI RLUNG PHYI NANG DU 'BYUNG 'JUG BYED PA HA CANG SGRA CAN DANG, DRAG PAR MI BYA BAR RDAL GYIS RGYU BA'I 'JAM POR BYA'O, ,GANG DU DMIGS PA GTOD PA'I YUL GYI GNAD NI, LUS LA GNAD DU BSNUN PA'I GDAMS PA RNAMS LA, GANG DU DMIGS PA GTOD PA'I GNAD NGOS ZIN NAS, NGER SEMS GTOD PA RNAM PAR DAG PA ZHIG MED NA CI TZAM BSGOMS KYANG, RLUNG DBU MAR THIM PA'I LHAN SKYES KYI BDE CHEN MI SKYE BAS, LUS LA GNAD DU BSNUN SA'I GTZO BO'ANG, DBU MA'I YAR SNA MAR SNA DANG RTZA 'KHOR GYI DBUS SOGS GANG RUNG KHO NA YIN TE, RO RKYANG GI DBUS KYI DBU MAR AAm YIG BSGOMS PAS DBU MA'I NANG GI GTUM MO 'BAR NAS BDE CHEN SBYIN PAR GSUNGS PA'I PHYIR TE, SDOM 'BYUNG LAS, DE DAG DBUS SU GNAS LHA MO, ,AAm YIG SNA TSOGS GZUGS CAN MA, ,LHA MO SKU BZHI'I BDAG NYID CAN, ,DNGOS GRUB THAMS CAD RAB STZAL MA, ,BDE BA CHEN PO SBYIN, CES DANG, BSHAD RGYUD RDO RJE PHRENG BA LAS, SHES BYA DBUS SU RLUNG RGYU BA, ,ME SAD BYED PAR SHES PAR BYA, ZHES GSUNGS PA'I PHYIR RO, , LHA MO AAm YIG NI, PHAG MO'I AAm YIG BSGOM PA LA BSHAD DE, YI GE GZHAN DANG THIG LE SOGS BSGOM PA LA'ANG MTSON NO, ,GNYIS PA NI, RIM LNGA LAS, SGRA DANG THIG LER LDAN PA'I SEMS, ,SNYING GAR GZHAG BYA ZHES GSUNGS PA LTAR, NU MA
, ,GNYIS KYI DBUS DRANG PO NAS THAD KAR PHYIN PA'I SGAL TSIGS KYI NANG LOGS SU RTZA DBU MA LA RO RKYANG GIS MDUD PA BRGYAB PA'I DBU MA'I NANG DU THIG LE DKAR DMAR KHA SBYAR GYI DBUS SU THIG LE N'A DA ZLA PHYED MGOR LDAN PA'I H'Um YIG DKAR PO YUNGS KAR GYI TSANG TZAM BA MO 'DZAG PA LA SEMS GZUNG BAR BYA'O, ,DMIGS RTEN DBU MA'I NANG DU 'DZIN PA DANG, CHUNG BA'I TSAD DANG BA MO 'DZAG PA NI KHA SBYOR LAS KYANG GSUNGS TE, DE LAS, DE YI NANG GNAS DPA' BO NI, ,YUNGS KAR GYI NI SBOM PHRA TZAM, ,MI SHIGS H'Um GI SA BON NI, ,KHA BA LTA BU 'DZAG PA GNYIS, ,ZHES GSUNGS PA'I PHYIR RO, ,DMIGS RTEN SHIN TU PHRA BA LA SEMS GTAD NA RLUNG 'DU SLA BAS SNGAR LTAR BYA, DE LTAR MI MIN MUS NA RE ZHIG DMIGS RTEN CHE BA LA SEMS GTAD LA, DE NAS RJE PHRA JE PHRAR BTANG LA SEMS BZUNG, SEMS 'DZIN LUGS NI TSUR NGOS NAS PHAR NGOS NA YOD PA LA BLTA BA LTAR MI BYA BAR, H'Um YIG GI NANG DU ZHUGS DE DBYER MED DU SONG BA LTAR BYAS NAS 'DZIN PAR GSUNGS PAS DE BZHIN DU BYA'O, ,SEMS KYI 'DZIN STANGS NI, SEMS KYI GRIMS CHA HA CANG CHES NA RGOD PA SKYES NAS GNAS SU MI BTUB LA GRIMS CHA BZHAG NA GNAS PA SKYE'ANG BYING BA PHRA MO MI CHOD PAS RLUNG SHIN TU 'DU DKA' BAS 'DI TZAM ZHIG SGRIMS NA NGES PAR RGOD PA SKYE BA NYAMS KYI STENG NAS SHES PAR BYAS LA, DE TZAM DU MI SGRIM PAR DE'I 'OG NAS SGRIMS TE BZHAG GO ,GANG BYAS KYANG DMIGS RTEN GSAL DU MA 'DOD NA RTZA 'KHOR GYI DBUS DBU MA'I NANG NYID DU 'DZIN PA'I TSUL GYIS SEMS DER BZUNG LA, SEMS GNAS RNYED PA NA DMIGS RTEN GSAL BAR SNANG
BA LA SLOB BO, ,'DIR DMIGS RTEN LA DRAN PA BRTEN TSUL DANG, BYING RGOD BYUNG NA, GCOD PA'I TSUL NI, DBUS MTHA' LAS, DMIGS PA BRJED PAR MA GYUR DANG, BYING DANG RGOD PA RTOGS PA DANG, ,DE SPONG MNGON PAR 'DU BYED DANG, ,ZHES GSUNGS PA LTAR SHES PAR BYA'O, ,GSUM PA NI, 'DI LTAR BSKYANGS PAS SEMS RGOD PA PHRA MO DANG BRAL BA'I MI RTOG PA SHIN TU 'THUG PO DANG, BYING BA PHRA MO'ANG CHOD PA'I RIG PA DAR DANG LDAN PA'I GSAL DANGS CHE BA DANG LUS SEMS LA BDE BA'I NYAMS CHE BA RNAMS 'BYUNG MOD KYANG, DE 'DRA BA NI CHOS 'DI PA DANG, GZHAN PA DANG, THEG PA CHE CHUNG GNYIS KA DANG, RGYUD SDE GONG 'OG DANG, RIM PA GNYIS KA'I THUN MONG BA YIN PAS, RDZOGS RIM PA'I LUS LA GNAD DU BSNUN PAS TING NGE 'DZIN SKYE LUGS THUN MONG MA YIN PA SROG DH'U T'IR ZHUGS PA SOGS KYI RTAGS MI 'KHRUL BA DGOS LA, DE LA NI SNGAR BSHAD PA'I LUS LA GNAD DU BSNUN PA'I DMIGS PA 'DI 'DRA BA LA RING DU BSKYANG BAS THUN RE'I BAR DU BYING RGOD PHRA MO DANG BRAL BAR SEMS SHIN TU BRTAN PAR GNAS PA'I THUN 'KHYONGS PA DGOS SO, , 'DIR THUN GCIG NI ZHAG GCIG GI DRUG CHA'O, ,'O NA RTAGS MI 'KHRUL PA JI LTAR BU SNYAM NA, THUN 'KHYONGS PA'I 'OG TU RANG GI SNA BUG GANG RUNG RE RE BAR RGYU BA'I RLUNG 'PHOS MA THAG PA'I SKABS NGOS BZUNG LA, DE NAS LUS GNAD DANG SEMS KYI 'DZIN LUGS SNGAR BZHIN BYAS PA'I MTHUS, RING PO MI THOGS PAR SNA SGOR BRTAGS PA NA RLUNG MNYAM RGYUR THENGS PA DANG, DE'ANG LAN RE RE GNYIS GNYIS TZAM LA NGES PA MED KYI, 'GAL RKYEN GZHAN MED NA NGES CAN THENGS KYIN 'DUG PA DANG, MNYAM RGYU'ANG GANG RUNG
, ,GCIG DRAG LA CIG SHES ZHAN PA MA YIN PAR DRAG ZHAN SHED MTSUNGS SU RGYU BA 'ONG BAR SNANG NA, RNAL 'BYOR DE'I STOBS KYIS SROG DBU MAR 'DZUD NUS PA TZAM DU 'JOG NUS MOD KYANG, LAN CIG TSUD NAS GA-YAS GA-YON RE RE BAR MI 'PHO BA MIN NO, ,DE NI SROG DH'U T'IR ZHUGS PA YIN LA, DH'U T'IR GNAS PA NI MTSAMS 'DI NAS DRIL TE BSGOMS PAS SNA BUG GI RGYU BA ZHEN DU SONG BA'I MTHAR ZHIB TU BRTAGS PA NA, RGYU BA PHRA MO'ANG BZLOG PA ZHIG 'ONG, RTOG TSUL DE'ANG DES DKA' NA LUS DRANG POR GA-YO 'GUL MED PAR BDE MOR GNAS PA'I DUS SU LTO BA 'GUL MI 'GUL BRTAG ,CUNG ZAD 'GUL BAR SNANG NA MA LOG PA'I RTAGS YIN, BRTAG PA 'DI KHYAD PAR LTE BA MAN CHAD KYI THUR SEL 'OG GI SNA SGOR 'BYUNG 'JUG BYED MI BYED RTOG BAL GAL CHE BA YIN, SNA BUG GI RGYU BA PHRA MO LOG PA LA THIM DKA' SLA GNYIS LAS, THIM DKA' NA YUD CIG LA LTO BA RLUNG GIS KHENGS PA 'BYUNG ZHING DE NAS ZHI BAR 'GYUR LA, ZHI MA THAG LTE BA DANG GSANG GNAS KYI ME GNAS PA'I THAD NAS DROD ? KHYAD PAR CAN SKYE DE NAS RIM GYIS ZHU BAD 'DREN TE, KHA SBYOR LAS, LAS KYI RLUNG GIS BSKUL BA YIS, ,LTE BA'I DKYIL 'KHOR DU NI 'BAR, ,DPYID THOB PA YI CHOG SHES PAS, ,ZHES DANG, ZHAL LUNG LAS, SDOM BRTZON GZHU DBYIBS GA-YO BA YIS, ,SUM MDOR GRU GSUm ME 'BAR BAS, ,KHAMS BZHUS NAS NI BCU DRUG CHAR, ,ZHES GSUNGS PA'I PHYIR RO, ,SNA BUG GI RGYU BA PHRA MO'ANG LOG PA 'DI BYING BA PHRA MO MA CHOD PAR BSAGS PAS, BYING BA SHAS CHE BA ZHIG LA'ANG 'ONG LA, RTZA 'KHOR GYI LTE BAR GNAD DU BSNUN PA
LA MI MKHAS PAR BUM PA CAN MANG DU BSGOM PAR BYAS SHING, SROG DH'U T'IR 'CHING BAR NI MA NUS PA'I RLUNG RTZA GNAS GZHAN DU BYER PA LA, RLUNG 'BYUNG 'JUG KYANG MI BYED CING NANG DU 'DZIN RGYU'ANG MED PA ZHIG 'ONG YANG, DE NI DH'U T'IR TSUD PA DANG THIM PA GANG YANG MIN PAS, KHYAD PAR DE RNAMS LEGS PAR PHYED PAR BYA'O, ,RLUNG DBU MAR ZHUGS GNAS THIM GSUM BYAS PA LAS BYUNG BA'I DGA' BZHI DANG STONG PA BZHI SKYE BA NI RIM PA LNGA KA'I SKABS SU 'ONG YANG DGA' BZHI SKYE TSUL NI, RIM PA GSUM PA'I SKABS SU 'CHAD CING STONG PA BZHI SKYE BA DANG, BSRE BA GSUM BYED TSUL NI RIM PA LNGA BA'I SKABS SU BSHAD PAR BYA'O, ,GNYIS PA SA BON MED PA'I RANG BYIN RLABS NI, RIM LNGA LAS, NYI MA DANG ZLA BA'I BDAG NYID CAN GYI LAM, STONG PA NYID KYI RANG BZHIN, NAM MKHA'I STONG PA'I NGO BO GANG NAS BAR CHAD MED PAR RLUNG 'JUG PA DANG 'BYUNG BAR 'GYUR BA'I LAM DER RLUNG DANG LHAN CIG SBYAR LA GCIG TU BYAS PA'I SEMS GZUNG BAR BYA'O ZHES GSUNGS PA LTAR BSGOM PA LA, LUS DANG RLUNG DANG DUS KYI GNAD GSUM NI SNGAR DANG 'DRA LA, YUL GYI GNAD NI SNYING GA'I RTZA 'KHOR GYI DBUS KYI DH'U T'I'I NANG DU H'Um YIG DKAR PO BSAM PA LA RLUNG 'JUG GNAS LDANG GSUM BYAS TE, DE'ANG RLUNG 'JUG PA'I DUS SU DH'U T'I'I NANG DU RLUNG GI GDANGS AOm YIG GI GDANGS SU ZHUGS PAR BSAMS LA H'Um LA GZHUG, DE LAS 'JUG LDANG GANG RUNG GI YUN TSAD TZAM ZHIG ZHUGS PA DER BZUNG NAS DE'I RANG GDANGS AA YIG GE GDANGS SU BSAM, DE NAS DH'U T'I'I NANG GI RLUNG LAS PHYIR 'GRO BA'I TSE 'ANG DH'U T'I'I NANG NAS PHYIR 'GRO BAR BSAM ZHING DE'I TSE RLUNG GI RANG GDANGS H'Um GI
, ,GDANGS SU 'BYUNG BAR BSAMS LA BSKYED RIM PA'I YID BZLAS KYIS RDOR BZLAS SUM SHOR BAR RLUNG GI GDANGS DANG SNGAGS GSUM GYI GDANGS DBYER MI PHYED PAR GNAS PA LA SEMS GTAD DE RDOR BZLAS BYA'O, ,RDOR BZLAS BYAS PAS MYONG BA SKYE TSUL NI, RE ZHIG RLUNG GI GDANGS LA SNGAGS SU MOS PA TZAM LAS MI 'ONG YANG GOMS PA'I MTHAR PHAR LA MOS PA BYAS PA TZAM MIN PAR TSUR LA RANG GI GDANGS YI GE GSUM GYI GDANGS SU 'CHAR BA'I GSUNG GI NGA RGYAL 'PHOS PA 'BYUNG LA, DE'ANG DANG POR DH'U T'I'I NANG NAS 'BYUNG 'JUG BYED PAR MOS PA TZAM YIN YANG, GOMS PA BSRANGS NA, DH'U T'I'I NANG NAS DNGOS SU 'BYUNG 'JUG BYED PA 'ONG NGO, ,'DI LA YANG 'DZIN STANGS LA NGAR THON PA DANG BYING DRGOD BYUNG NA GCOD TSUL, RLUNG ZHUGS GNAS THIM GSUM GYI RTOGS 'ONG TSUL NI SNGAR DANG 'DRA'O, ,RLUNG 'BYUNG 'JUG GNYIS LA RDOR BZLAS BYAS PAS SNYING GA'I DH'U T'IL RO RKYANG GIS BKRIS PA'I MA RIG PA'I MDUNG PA 'BYED PA YIN TE, BSHAD RGYUD RDO RJE'I PHRENG BA LAS, RLUNG GNYIS KYIS NI PHYED GNAS NI, ,MA RIG MDUD PA 'BYED PAR BYED, ,CES GSUNGS PA'I PHYIR RO, ,GNYIS PA DH'U T'I'I YAR SNA MAR SNAR GNAD DU BSNUN PA LAS TING NGE 'DZIN SKYED TSUL SNA TSOGS RDO RJE'I RIM PA LA GNYIS, SA BON DANG BCAS PA'I SNA TSOGS RDO RJE'I RIM PA DANG, SA BON MED PA'I SNA TSOGS RDO RJE'I RIM PA'O, ,DANG PO NI, RIM LNGA LAS, SNA TSOGS RDO RJE'I GZHIR GNAS PA'I RDO RJE DANG, ,RDO RJE RTZE MOR DANG PO MCHOG GI SPYIR GNAS PA, ,ZLA BA LTA BUR DRI MED LUS CAN THIG LE NI, ,SGOM PAR BYED CES GSUNGS PA LTAR, BSGOM
PA LA GNAD GZHAN GSUM SNGAR DANG 'DRA LA, YUL KYI GNAD NI RANG GI RIG MA'I BHA GA'I NANG DU RANG GI RDO RJE BCUG PA RDO RJE RTZE GCIG PA'I RNAM PA CAN DU BYAS PA'I RTZE MO'I DBU MA'I NANG TZAM DU H'Um DKAR PO MGO GYEN DU BLTA BA STENG GI THIG LE DANG BCAS PA LA SEMS DBYER MED DU BYAS TE GZHAG PAR BYA'O, ,SNA TSOGS RDO RJE ZHES PA DE LTAR BSGOMS PAS YON TAN SNA TSOGS SKYE BA'I CHA NAS MING BTAGS PA'O, ,GNYIS PA NI, RIM LNGA LAS, MDZOD SPUR NYI MA'I GZUGS BKOD PA SEMS KYIS DMIGS SO, , DE'I STENG DU ZLA BA'I GZUGS BKOD LA, DE'I STENG DU SKAR MA'I TSOGS BKOD PA STE, DE LTAR SEMS DMIGS PA MED PA LA BRTAN PAR 'GYUR BA NI ZHES GSUNGS PA LTAR BSGOM PA LA, GNAD GZHAN GSUM SNGAR DANG 'DRA LA, YUL GYI GNAD NI, SMIN MA GNYIS KYI MTSAMS KYI DBU MA'I YAR SNA'I NANG TZAM DU RDO RJE RTZE GCIG PA BSGOMS NAS DE'I RTZER NYI MA'I GZUGS BKOD LA SEMS BZUNG DE LA DMIGS PA BRTAN PA NA NYI MA'I STENG DU ZLA BA'I GZUGS KYI THIG LE BKOD LA SEMS BZUNG, ZLA BA LA DMIGS PA BRTAN PA NA, ZLA BA'I STENG DU SKAR MA'I RNAM PA CAN GYI DBUS SU THIG LE SNGON PO SHAR DU DKAR PO, LHOR SER PO, NUB TU DMAR PO, BYANG DU LJANG GU STE DE BZHIN GSHEGS PA RIGS LNGA'I NGO BOR BSAMS LA DE DANG DBYER MED GCIG TU SEMS GZUNG BAR BYA'O, , GSUM PA PHYAG RGYA BZHI LA BRTAN NAS TING NGE 'DZIN BSKYED TSUL NOR BU 'GENG BA'I RIM PA LA BZHI, DAM TSIG GI PHYAG RGYA LA BRTEN NAS NOR BU 'GENG TSUL DANG, LAS KYI PHYAG RGYA LA BRTEN NAS NOR BU 'GENG TSUL DANG, CHOS KYI PHYAG RGYA LA BRTEN NAS NOR BU
, ,'GENG TSUL DANG, PHYAG RGYA CHEN PO LA BRTEN NAS NOR BU 'GENG TSUL LO, ,DANG PO NI, RIM LNGA LAS, DAM TSIG GI PHYAG RGYA DANG SBYOR BA'I CHO GAS RDO RJE NOR BU'I RTZE MOR BYANG CHUB KYI SEMS SON PA NA, BDE BA JI 'DRA BA ZHIG SKYE BA DE YANG DAG PAR NYE BAR BRTAGS SHING BRTAN PAR BYAS NAS DE'I BDAG NYID DU GYUR PA LA NI ZHES GSUNGS PA LTAR BSGOM PA LA, YE SHES KYI PHYAG RGYA DANG SNYOM PAR 'JUG TSUL BSKYED RIM LTAR BYAS TE SNYOMS PAR ZHUGS PA NOR BU'I RTZER BYANG CHUB KYI SEMS KUN DE SLEB PA NA LHAN SKYES KYI BDE BA SKYE BAR 'DUG PA NGOS ZIN PAR BYAS LA CHOS THAMS CAD BDEN PAR MED SNYAM DU BLTA BA DANG SBYAR TE BSGOM PAR BYA'O, ,YE SHES KYI PHYAG RGYA LA BRTEN PA YIN YANG, RIM PA SNGA MA GNYIS LA NUS PA THON PA YIN NA THABS 'DIS KYANG RLUNG DBU MAR ZHUGS GNAS THIM GSUM BYAS PA LAS RDZOGS RIM PA'I LHAN SKYES KYI BDE BA 'DREN NUS SO, ,PHYAG RGYA GNYIS PA NI, LAS RGYA LA BRTEN RAN PA NA MTSAN NYID TSANG BA'I BUD MED BTZAL NAS DBANG BSKUR TE DAM TSIG DANG SDOM PA TSUL BZHIN DU BSRUNG BA DKYIL 'KHOR GYI 'KHOR LO DANG 'DOD PA'I BSTAN BCOS LA MKHAS PA'I LAS RGYA DANG SNYOMS PAR ZHUGS PA'I BYANG SEMS NOR BU'I RTZER SLEB PA NA BDE BA SKYE BA NGOS 'DZIN PA SNGA MA BZHIN BYAS TE, BDE STONG SBYAR NAS BSGOM PA'O, ,PHYAG RGYA GSUM PA NI, RANG GI RDO RJE NOR BU'I DBUS SU H'Um KHA DOG DMAR SKYA ZHIG BSAMS LA SNGAR GYI PHYAG RGYA GNYIS LA BRTEN PA'I BDE BA NYAMS SU MYONG BA YANG YANG GOMS PA LAS BYUNG BA'I BDE STONG SBYAR TE BSGOM PA'O, ,PHYAG RGYA BZHI PA NI, SNGAR GYI PHYAG
RGYA GSUM LA NUS PA THON RJES SU LHAN SKYES KYI BDE BAS CHOS THAMS CAD RANG BZHIN GYIS MA GRUB PA'I STONG NYID KYI PHYAG CHEN LA MNYAM PAR BZHAG PA YUN RING DU GOMS PA LAS BYUNG BA'I BDE STONG SBYOR BA'O, ,PHYAG RGYA PHYI MA GSUM LA DA LTA NUS PA THON DKA' BAS GO DON TZAM MA GTOGS LAG LEN LA 'KHRID PA BZHAG GO ,RIM PA LNGA PAR MA ZAD RIM PA DANG PO BZHI YANG, YAS BABS MAS BRTAN GYI DGA' BZHI DANG STONG PA BZHI SKYE BAS MNYAM GZHAG TU BDE BA MA YA LA GYI RING LA CHOS THAMS CAD RANG BZHIN GYIS MA GRUB SNYAM DU BDE STONG SBYAR NAS BSGOM DGOS TE, DO HA LAS, GANG YANG GNYIS PO SBYOR BAR NUS PA DE, ,'KHOR BAR MI GNAS MYA NGAN 'DAS MI GNAS, ,ZHES GSUNGS PA'I PHYIR RO, ,DGA' BZHI NGOS BZUNG NA, PHYAG CHEN THIG LE LAS, GANG PHYIR DGA' BA DE SNANG BA, ,SNANG BA MCHED PA MCHOG TU BSHAD, ,KHYAD DGA' NYE BAR THOB PAR SHES, ,LHAN CIG SKYES DE 'OD GSAL ZHES RLUNG DBU MAR ZHUGS GNAS THIM GSUM BYAS PA LAS BYUNG BA'I YAS BABS KYI DGA' BZHI RIM PA BZHIN SNANG MCHED THOB GSUM 'OD GSAL DANG BZHIR GSUNGS SO, ,BYANG SEMS ZHU BA GNAS GANG DU SLEB PA NA YAS BABS KYI DGA' BZHI SKYE TSUL NI, BSHAD RGYUD RDO RJE PHRENG BA LAS, DE RJES LUGS 'BYUNG BSHAD BYA STE, ,BDE CHEN 'KHOR LO SPYI BO LA, ,DE NI DGA' BAR BSHAD PA YIN, ,LONGS SPYOD 'KHOR LO MCHOG DGA' DANG, ,BRAL DGA' CHOS KYI 'KHOR LOR GNAS, ,SPRUL PA'I 'KHOR LO LHAN CIG SKYES, ,DGA' BA NYAMS SU MYONG BAR BYED, CES GSUNGS PA LTAR SPYI BO NAS MGRIN PA'I BAR DU SLEB PA NA DGA' BA SKYE LA, DES GZHAN GSUM LA'ANG
, ,SHES PAR BYA'O, ,MAS BRTAN GYI DGA' BZHI SKYE TSUL NI, MNGON BRJOD BLA MA LAS, LTE BA SNYING PAD NU MA'I DBUS, ,LCE YI RTZA DANG MGO STENG DU, ,DGA' BA DANG NI MCHOG DGA' NYID, ,DAM PAR DGA' DANG LHAN CIG SKYES ZHES GSUNGS PA LTAR BYANG SEMS NOR BU NAS BRTZAMS TE LTE BA'I 'KHOR LO'I BAR LOG PA NA DGA' BA SKYE LA, DES GZHAN GSUM LA'ANG SHES PAR BYA'O, ,MAN NGAG SNYE MAR, MAS BRTAN GYI DGA' BA BZHI GA LHAN SKYES LA CHUNG NGU DANG BAR MA DANG CHEN PO DANG CHEN PO'I CHEN POR PHYE BAR BSHAD PA RGYUD KYI DON YIN TE, BRTAG GNYIS LAS, RDZOGS PA'I RIM PA'I PHYOGS LA NI, ,'DI LTAR LHAN CIG SKYES RNAM BZHI, ,ZHES GSUNGS PA'I PHYIR RO, ,'DIS NI BSKYED RIM LA DGA' BA GSUM GYI LHAN SKYES SPANGS PA DANG RDZOGS RIM LA DGA' BA GSUM GYI BDAG NYID DU'ANG 'GYUR BA'I LHAN SKYES BSHAD DO, ,DE LTAR BYAS NA, LUGS LDOG GI SNANG MCHED THOB GSUM 'OD GSAL GYI YE SHES SU MI RUNG YANG, LUGS LDOG GI DGA' BA GZHAN GSUM LHAN SKYES SU 'JOG PA ZHIG BSHAD LA, DE BZHIN DU LUGS MTHUN GYI SNANG MCHED THOB GSUM DANG DE GSUM DGA' BA GSUM DU BZHAG GI LHAN SKYES KYI DGA' BAR MI 'JOG GO ,LUGS MTHUN YAS BABS KYI DGA' BA GSUM LHAN SKYES KYI DGA' BAR 'JOG PA'I SKABS SHIG KYANG YOD PAR MNGON GSUNG PA NI, MAS BRTAN GYI DGA' BZHI'I RJES SU YAS BABS KYI DGA' BA GSUM SKYE BA LA DGONGS PA 'DRA'O, ,MNYAM GZHAG TU RDZOGS RIM PA'I BDE STONG BSKYANGS PA'I MTHAR LANGS PA'I RJES THOB TU GZUGS SGRA LA SOGS PA'I YUL SNANG GANG SHAR THAMS CAD LA SNGAR GYI
BDE STONG DRAN NAS DES RGYAS BTAB NAS BSGOMS NA DE GOMS PA LA BRTEN NAS YUL SNANG GANG SHING THAMS CAD BDE BA 'BAR BA'I GROGS SU 'GRO STE, MKHA' 'GRO RGYA MTSO LAS, DE YI DUS SU GANG MTHONG BA, ,DNGOS PO KUN LA BLTA BAR BYA, ,'DOD CHAGS CHEN PO'I TSUL BDAG NYID, ,RTAG TU BDAG NYID LA 'BYUNG 'GYUR, ,ZHES GSUNGS PA'I PHYIR RO, ,RKANG PA SNGA MA GNYIS KYIS RGYAS 'DEBS TSUL DANG, PHYI MA GNYIS KYIS RGYAS BTAB PAS BDE BA 'BAR BA'I GROGS SU 'GRO TSUL BSTAN NO, ,GNYIS PA BYANG SEMS DMAR PO RGYAS PAR BYED PA LA BRTAN PA'I TING NGE 'DZIN BSKYED TSUL NI, RIM LNGA LAS, LTE BA CHU SO'I MTSAMS SU NI, ,'KHOR LO GRU GSUM DKAR DMAR LA, ,MDOG LNGAR LDAN PA'I THIG LE NI, ,SANGS RGYAS LNGA RNAMS KYIS MTSON PA, ,SROG 'GOG DANG LDAN BSGOM BYAS NAS, ZHES GSUNGS PA LTAR BSGOM PA LA, LTE 'OG SOR BZHI'I GSANG GNAS KYI 'KHOR LO'I DBU MA'I NANG DU CHOS 'BYUNG DKAR LA DMAR BA'I MDANGS CHAGS PA'I DBUS SU THIG LE SNGON PO MDUN DU DKAR PO GA-YAS SU SER PO, RGYAB TU DMAR PO, GA-YON DU LJANG GU LNGA SANGS RGYAS RIGS LNGA'I NGO BOR BSAM PA DANG STENG RLUNG MAR LA 'THEN, 'OG RLUNG GYEN DU DRANGS TE SHIN TU PHRA BA'I CHOS 'BYUNG GI DBUS KYI THIG LE LNGA'I SAR RLUNG KHA SBYOR BYED PA'I BUM PA CAN DANG LHAN CIG SBRAGS NAS BYA'O, ,'DI NI THUR SEL LA DMIGS KYIS BKAR NAS THUR SEL GYI GNAS NYID DU DMIGS PA DANG, RLUNG SBYOR GYIS GNAD DU BSNUN PAS DMIGS PA GONG MA RNAMS LAS BYANG SEMS DMAR PO'I GTUM MO LHAG PAR RGYAS PAR BYED PA'O, ,YANG RIM LNGA LAS, BUG GZHAN NAS
, ,'BYUNG 'GYUR ZHING, ,MKHA' GZHAN NAS NI MYUR DU 'JUG ,GANG TSE SGOM PA BRTAN GYUR PA, ,ZHES GSUNGS PA LTAR SGOM PA NI, SNGAR BSHAD PA LTAR GSANG GNAS KYI DMIGS PA GNYIS BSGOMS PAS, LTE BA NAS YE SHES KYI ME 'BOR BA RIM GYIS GYEN DU SONG BAS SNYING GAR GNAS PA'I RIGS LNGA'I SA BON BHRUm AAm LA SOGS PA RNAMS BSREGS NAS MDZOD SPUR GNAS PA RANG GI SNA BUG GA-YAS PA'I BU GA NAS THON TE PHYOGS BCU'I SANGS RGYAS RNAMS KYI SHANGS SGO GA-YON NAS ZHUGS PAS DE DAG GI SPYI GTZUG NAS MAR YONGS NAS SNGAR BZHIN THUGS KAR GNAS PA RNAMS BSREGS TE THUGS KA'I CHOS DBYINGS KYI YE SHES KYI BDUD RTZI BLANGS NAS SHANGS SGO GA-YAS NAS 'O MA'I RGYUN LTAR 'ONG ZHING RANG GI SNA SGO GA-YON NAS ZHUGS LONGS SPYOD KYI 'KHOR LOR NGAL BSOS TE SNYING GAR BSREGS PA RNAMS SLAR YANG GSOS PAR BSAM ZHING LTE BA'I 'KHOR LOR GNAS PAR YANG YANG BSGOM MO, ,GZHUNG 'DI NI, SAm BU tA'I DON NAG PO SPYOD PAS BSHAD PA'I GZHUNG LA BRTEN NAS BSHAD PA GTUM MO BSGOM PA LA SANGS RGYAS KYI BYIN RLABS MYUR DU 'JUG PA'I SGO ZAB MO ZHIG GO ,GNYIS PA BSAM MI KHYAB KYI RIM PA BSKYED PA'I TSUL DNGOS LA GNYIS, SPROS PA RNAMS SNYING GA'I THIG LE LA BSDUS NAS 'OD GSAL DU 'JUG TSUL DANG, DE LAS SGYU MA'I SKUR LDANG TSUL LO, ,DANG PO NI, RIM LNGA LAS, GZUGS SOGS RNAMS KYIS DRANGS GYUR TE, ,NGO BO NYID KYIS GANG GA-YO BA'I, ,SEMS NI SNYING GAR BRTAN BYAS NAS, ,BLO DANG LHAN CIG DBANG DU BYA, ,ZHES DANG, SEMS NI STONG NYID LA GZHUG CING, ,ZHES GSUNGS PA'I DON
YIN PAS, 'DI DRIL BU PA'I LHAN SKYES KYI SGRUB THABS LAS BYUNG BA'I TSIG GIS GSAL DU BTANG NA, SGRUB THABS DE LAS, SDUG MA BDAG PO MKHA' NOR BU, ,DE BZHIN GSHEGS PA LNGA YI 'OG ,SKU DANG YAN LAG MCHOG DANG NI, ,ZLA BA THIG LE N'A DA RNAMS, ,'DI RNAMS RIM GYIS MI SNANG GZHUG ,CES GSUNGS PA LTAR, RANG BDE MCHOG YAB YUM DU BSGOMS PA'I YUM YAB LA THIM YAB DAM TSIG SEMS DPA'I THUGS KA'I NYI GDAN GYI STENG GI TING NGE 'DZIN SEMS DPA'I H'Um LA DANG, DE'I ZHABS KYU HA'I LUS LA DANG HA DE'I MGO BO LA DANG, MGO BO ZLA PHYED LA DANG, DE THIG LE LA DANG, DE N'A DA LA THIM ZHING, N'A DA'ANG MI DMIGS PAR YANG YANG BSAM MO, ,DE LTAR BSDUS PAS RLUNG DBU MAR ZHUGS TE RIM GYIS THIM TSUL NI, SA CHU LA THIM PA NA YID NGOR SMIG RGYU LTA BU DANG, CHU ME LA THIM PA NA DU BA LTA BU DANG, ME RLUNG LA THIM PA NA SRIN BU ME KHYER LTA BU DANG, RLUNG SNANG BA LA THIM PA NA RLUNG GIS MA BSKYOD PA'I MAR ME LTA BU'I SNANG BA 'CHAR RO, ,DE NAS STON GYI NAM MKHA' DRI MA MED PA LA ZLA BA'I 'OD KYIS KHYAB PA BZHIN DU SNANG BA'I SNANG BA DANG, DE NAS STON GYI NAM MKHA' DRI MA MED PA LA NYI MA'I 'OD KYIS KHYAB PA BZHIN DU SNANG BA'I SNANG BA MCHED PA DANG, DE NAS STON GYI NAM MKHA' DRI MA MED PA LA SROD KYI SMAG 'THUG POS KHYAB PA BZHIN DU SNANG BA'I SNANG BA NYER THOB RNAMS SNGA MA PHYI MA LA THIM PA'I TSUL GYIS SKYE ZHING MTHAR NYER THOB KYI SEMS KYANG THAMS CAD STONG PA 'OD GSAL DU GZHUG CING THIM PA NA DKAR DMAR NAG GSUM GYI SLOD BYED KYANG MED PA'I THO RANGS KYI NAM MKHA' GA-YA' DAG LTA BU 'CHAR ZHING DE'ANG STONG NYID LA BZHAG PA NI GNYIS SNANG PHRA MO'ANG NUB PA LA BYA
, ,DGOS SO, ,GZHUNG RKANG PA PHYI MA 'DIS, 'JUG RIM GYI PHYOGS GCIG BSTAN PAS GZHAN SNGA MA RNAMS KYANG MTSON NO, ,GNYIS PA NI, RIM LNGA LAS, STONG PA SEMS SU RNAM GZHUG BYA, ,ZHES GSUNGS PA 'DIS, 'OD GSAL LAS LUGS LDOG GI STONG PA GSUM GYI SEMS SU BLTA BAR MA ZAD 'KHOR LO BDE MCHOG GI SKUR YANG LDANG BA'I BYED LUGS BSTAN TE, LHAN SKYES KYI SGRUB THABS LAS, BSAM GYIS MI KHYAB GZUGS RDZOGS PA'I, ,RNAL 'BYOR SANGS RGYAS RNAMS KYIS BSNGAGS, , GANG YANG SKAD CIG SBYOR BA YIS, ,RANG NYID RDO RJE MKHA' 'GROR GYUR, ZHES GSUNGS PA'I PHYIR RO, ,RIM PA LNGA PA'I SKABS 'DIR, 'OD GSAL DU 'JUG PA'I RTEN DU BDE MCHOG YAB YUM BSGOM PA'ANG RDZOGS RIM PA'I YE SHES KYI SKU SGYU MA'I SKU BSGOM PA YIN GYI BSKYED RIM PA'I SGOM TSUL DANG MI 'DRA'O, ,'O NA BSKYED RIM BRTAN NAS BDAG BYIN RLABS SOGS BSGOM PA NA LHA'I BSKYED TSUL JI LTAR YIN SNYAM NA, BSKYED RIM BRTAN PA DES BDAG BYIN RLABS SOGS BSGOMS PAS RLUNG DBU MAR ZHUGS GNAS THIM GSUM BYAS PA LAS BYUNG BA'I DPE'I LHAN SKYES KYI 'OD GSAL MA THOB TSUN CHAD DU, DKYIL 'KHOR GYI 'KHOR LO DANG DPA' BO GCIG PA GANG BSGOM YANG BSKYED RIM PA'I SNGAGS KYI SKU LAS MI 'DA' LA, GANG GI TSE DPE'I LHAN SKYES KYI 'OD GSAL RGYUD LA SKYES PA NAS BZUNG STE SGYU MA'I SKU DNGOS MA THOB KYANG BSKYED RIM LAS 'DAS PA'I SGYU MA'I SKU RJES MTHUN PA ZHIG BSGOM NUS SO, ,DE'ANG RIM PA BZHI PA YAN CHAD DAM, RIM PA LNGA PA'I STOD NAS SGYU MA'I SKU DNGOS 'GRUB PAS LHA BSGOM PA RNAMS YE
SHES KYI SKU DNGOS KYI STENG NAS BSGOM NUS PA YIN NO, ,RIM PA LNGA PA LA, DON GYI 'OD GSAL GYI RIM PA GCIG DANG, DE DANG SGYU MA'I SKU GNYIS DBYER MI PHYED PA'I ZUNG 'JUG GI RIM PA GNYIS YOD DE, RIM LNGA LAS, STONG DANG STONG MIN LA SOGS PA'I, ,KUN RTOG RAB SPANGS MKHA' MNYAM 'GYUR, ,ZHES DANG, DRIL BU PA'I DBANG CHOG LAS, SNANG MED RAB RDZOGS GNAS MED PA, ,DE NYID LNGA PA RDZOGS PA'I RIM, ZHES DANG, LHAN SKYES KYI SGRUB THABS LAS, 'GA' ZHIG TU ZUNG 'JUG CES ZHES GSUNGS PA'I PHYIR RO, ,DE LTAR SNGAR GYI DMIGS PA GTOD SA RNAMS LA GNAD DU BSNUN PAS RLUNG DBU MAR ZHUGS GNAS THIM GSUM BYAS PA LAS BYUNG BA'I STONG PA BZHI DANG DGA' BA BZHI 'DREN NUS PA'I MTSAMS NAS BSRE BA GSUM BYED TSUL LA SAD DUS KYI STONG PA BZHI'I SKABS SU BDE STONG SBYAR NAS BSGOM PA NI SAD DUS KYI CHOS SKU YIN LA, RLUNG GA-YOS PA'I DBANG GIS 'OD GSAL DE LAS LDANG BAR RTZOM PA NA LONGS SPYOD RDZOGS PA'I LHA'I SKU YAB YUM DU LDANG BAR BYA'O SNYAM PA'I 'PHEN PA BTANG NAS RNAM SMIN GYI LUS LAS LOGS SU BYE BA'I LHA'I SKU YAB YUM DU LANGS, DE LA DMIGS NAS JI TZAM GNAS KYI BAR DU MNYAM PAR 'JOG PA NI SAD DUS KYI LONGS SKU YIN ZHING, DE LA GNAS MA NUS NA LUS SNGA MA DAM TSIG SEMS DPA' YAB YUM GYI SKUR BLTAS LA DE'I THUGS KAR 'JUG PA NI SAD DUS KYI SPRUL SKU'O, ,SAD DUS KYI DE DAG LA BRTEN NAS GNYID DUS KYI SKU GSUM BSGOM TSUL NI, RIM LNGA LAS, RNAL 'BYOR GNYID DANG LDAN PA YIS, ,RDZOGS PA'I SANGS RGYAS 'DIR RTOGS MDZAD, ,CES GSUNGS PA DANG, L'U AI PA'I
, ,'GREL PA LVA BA PAS MDZAD PA LAS, 'OD GSAL SNGON DU PHYOGS PAR BYAS LA GNYID KYANG 'OD GSAL NYID DU MOS PAR BYAS TE NYAL LO, ,ZHES GSUNGS PA LTAR GNYID KYI 'OD GSAL BSGOM TSUL NI, BLA MA DANG YI DAM LA GNYID KYI 'OD GSAL 'DZIN NUS PA'I GSOL BA MANG DU BTAB, NYAL BA'I DUS SU GZHOGS GA-YAS 'OG TU 'JUG PA LA SOGS SPYI DANG MTHUN PAR BYAS LA RANG 'KHOR LO BDE MCHOG YAB YUM DU GSAL BA'I THUGS KAR H'Um DKAR PO LA SEMS DBYER MED GCIG TU BYAS NAS DMIGS PA 'DZIN PA 'AM, RDOR BZLAS BYED PA'AM, YUM YAB LA THIM PA NAS N'A DA'I BAR THIM STE N'A DA LA DMIGS PA 'DZIN PA SOGS GANG RUNG BYAS TE GNYID DU 'GRO KHA TSUN CHAD LA DER BZUNG BAS STONG PA BZHI SKYES BYUNG NA STONG NYID DANG SBYAR TE BSGOM PA NI GNYID DUS KYI CHOS SKU YIN LA, RLUNG GA-YOS PA'I DBANG GIS 'OD GSAL DE LAS LDANG BAR RTZOM PA NA LONGS SPYOD RDZOGS PA'I LHA'I SKU YAB YUM DU LDANG BAR BYA'O SNYAM PA'I 'PHAN PA BTANG BAS RNAM SMIN GYI LUS LAS LOGS SU BYE BA'I LHA'I SKU YAB YUM DU LANGS PA NA DE LA DMIGS NAS JI TZAM GNAS KYI BAR DU MNYAM PAR 'JOG PA NI RMI LAM GYI LONGS SKU YIN ZHING, DE LA GNAS MA NUS NA LUS SNGA MA DAM TSIG SEMS DPA' YAB YUM GYI SKUR BLTAS LA DE'I THUGS KAR 'JUG PA NI RMI LAM SAD DUS KYI SPRUL SKU'O, ,'CHI BA SOGS KYI SKU GSUM BSGOM TSUL NI, BDE MCHOG RTZA RGYUD LAS, 'CHI BA ZHES BYA RNAM RTOG STE, ,MKHA' SPYOD GNAS SU 'KHRID PAR BYED, ,CES GSUNGS PA'I MKHA' SPYOD LA DRANG NGES GNYIS YOD PA'I NGES DON GYI MKHA' SPYOD 'CHAD PA NA, LVA BA PAS, 'CHI BA'I DUS SU
DPAL HE RU KA DANG PHAG MO LA SOGS PA'I DPA' BO DANG RDO RJE RNAL 'BYOR MA ME TOG DANG BDUG SPOS DANG RGYAL MTSAN DANG BA DAN LA SOGS PA RNAM PA SNA TSOGS PHYAG TU THOGS PA RNAMS KYIS 'OD GSAL GYI GO 'PHANG LA DGOD PAR BYED DO ZHES GSUNGS PAS, SAD DUS DANG GNYID DUS KYI STONG PA SOGS 'DZIN NUS NA 'CHI DUS KYI STONG PA SOGS JI LTA BA BZHIN 'DZIN NUS LA DE LTAR MI NUS PAS KYANG DA LTA NAS MOS PA'I DBANG GIS GOMS PAR BYAS NA, 'CHI BA DANG BAR DO 'DUN PA'I DBANG GIS ZIN PA 'ONG BAS GANG ZAG DE GNYIS KAS SBYOR BAR BYA'O, ,DE'I TSUL NI, GANG ZAG SNGA MAS LHA DANG BLA MA LA SKYE SHI BAR DO GSUM CHOS SKU LONGS SKU SPRUL SKU GSUM DANG BSRE NUS PA'I GSOL BA MANG DU GDAB PA DANG, KHAS BLANGS PA'I DAM TSIG DANG SDOM PA NYAMS PA RNAMS SLAR GSOR GZHUG CING DAG PAR BYA BA DANG, 'CHI BA DANG BAR DO'I DUS KYI BSRE BA RNAMS SNGON DU BYA'O SNYAM PA'I 'PHEN PA NYI NA RE BZHIN MANG DU BTANG, DE NAS 'CHI BA'I DUS SU 'ONG RGYU'I 'BYUNG BA THIM RIM GYI RTAGS BZHI DANG STONG PA BZHI 'CHAR BA'I TSUL YID LA BYAS TE DE DAG RE RE'I SKABS SU STONG PA NYID DANG SBYAR NAS BSGOM PA DA LTA NYID NAS NYI MA RE RE ZHING MANG DU BYAS LA DA GZOD 'CHI KHA MA'I SKABS SU SLEB PA NA LHA DANG BLA MA LA GSOL BA GDAB PA DANG, DAM TSIG DAG PAR BYA BA DANG, SA CHU LA THIM PA NAS 'OD GSAL GYI BAR RNAMS NGOS ZIN PAR BYAS NAS DE LA CI NUS SU MNYAM PAR 'JOG PA NI 'CHI BA CHOS SKU YIN LA, RLUNG GA-YOS PA'I DBANG GIS 'OD GSAL DE LAS LDANG BAR RTZOM PA NA BAR DO'I LUS HE RU KA YAB YUM GYI SKUR LDANG BAR BYA'O SNYAM PA'I 'PHEN PA BTANG BAS DER LANGS NA DE LA MNYAM
, ,PAR BZHAG CING SKYE BA KHYAD PAR CAN BZUNG BA'I DON DU NGAS PAR DO LONGS SKU 'DI LA BRTEN NAS SPRUL PA'I SKU'I SKYE BA GZUNG BAR BYA'O SNYAM PA'I 'PHEN PA BTANG BAS SKYE BA'I GNAS LHA YAB YUM GYI SKUR BLTAS LA DE'I THUGS KAR 'JUG PA NI BAR DOR SKYE BA LEN PA'I SPRUL SKU'O, ,BSRE ZHES PA'I DON LA, 'OD GSAL CHOS SKU GSUM GYI BSRE TSUL NI, SAD DUS KYI STONG PA BZHI SKYONG NUS PA ZHIG GIS GNYID DUS KYI STONG PA BZHI ZIN NA, DE LA SAD DUS BZHIN RTZE GCIG TU 'JOG PA DANG, 'CHI DUS KYI STONG PA BZHI ZIN NA DE LA SNGA MA GNYIS BZHIN RTZE GCIG TU 'JOG PA'O, ,DES SGYU MA LONGS SKU GSUM GYI BSRE TSUL DANG, SNA TSOGS SPRUL SKU GSUM GYI BSRE TSUL YANG 'GRE'O, ,GANG ZAG GNYIS PAS KYANG SNGAGS KYI DMIGS PA DE DAG LA MOS PA'I DBANG GIS GOMS PAR BYAS PAS 'CHI BA DANG BAR DE ZIN PA BYUNG NA DE GNYIS KYI DMIGS PA SNGAR BZHIN THUB PA DAM TSIG DANG SDOM PA GTZANG BA DANG, ,BSKYED RDZOGS MA CHAG PAR GOMS NA 'ONG BA SNGAR GYI GZHUNG RTZA 'GREL DRANGS PA LAS SHES SO, ,GSUM PA LAM BSGOMS PA'I 'BRAS BU NI, SNGAR RIM PA LNGA PA'I SKABS SU BSHAD PA LTAR SLOB PA'I ZUNG 'JUG THOB NA DE LA GOMS PAR BYAS PAS MI SLOB PA'I ZUNG 'JUG GI SKUR 'GYUR ZHING, 'KHOR BA JI SRID PAR CHOS SKU DANG LONGS SKU GNYIS LAS MI GA-YO BAR BZHUGS SO,, ,, 'KHOR LO SDOM PAR SBAS PA'I RDZOGS RIM GNAD, ,RIM LNGAR BSDUS PA GRUB CHEN DRIL BU'I GZHUNG, ,JI BZHIN BKRAL BA BLA MA'I RNAM BSHAD DON, ,LAG LEN NYAMS SU BLANG TSUL BKOD PA LA, ,GNAS GSUM MKHA' 'GRO'I TSOGS KYIS BZOD MDZED CING
'DI BKOD DGE BAS HE RU KA DPAL DANG, ,DRIL BU PA DANG RJE BTZUN TZONG KHA PAS, ,SKYE BA KUN TU RJES SU 'DZIN PAR SHOG ,CES PA 'DI NI DPAL 'KHOR LO SDOM PA'I RNAL 'BYOR PA LCE STON KUN DGA' BZANG POS SBYAR BA'O,, MANGGLAm