*, ,DPAL MNGON PAR RTOGS PA'I 'GREL PA KHYAD PAR GSAL BYED LAS ZUR DU PHYUNG BA BZHUGS SO, ,
, ,DE LTAR MAN NGAG JI LTA BA BZHIN DU, ,SGRUB THABS BSHAD NAS SGRUB THABS 'DI KHO NA BSKYED PA DANG, RDZOGS PA'I RIM PAS MAN NGAG JI LTA BA BZHIN DU RNAM PAR 'BYED DE DE LA SHIN TU RNAL 'BYOR GYI MTHA'I BAR NI BSKYED PA'I RIM PA'O, ,RNAL 'BYOR CHEN PO NI RDZOGS PA'I RIM PA STE, BSKYED PA DANG RDZOGS RIM 'DI GNYIS NI, RIGS PAS BSGRUB PA'I LAN LAG DRUG GI GO RIM KHO NAS BSAM GTAN BYA'O, , GZHAN DU NA YANG DAG PA'I SGRUB PA THOB PAR MI 'GYUR RO, ,DE BZHIN DU GSUNGS PA'ANG DPAL GSANG BA 'DUS PA RGYUD PHYI MA LAS, BSNYEN DANG YAN LAG DRUG SBYOR BAS, ,GRUB PA'I MCHOG NI BYAS NAS SU, ,BSGRUB PAR BYA'O GZHAN DU NA, ,GRUB PA'I MCHOG NI MI THOB BO, ,ZHES SO, ,SO SOR SDUD DANG BSAM GTAN DANG, ,SROG RTZOL DE BZHIN 'DZIN PA DANG, ,RJES SU DRAN DANG TING NGE 'DZIN, ,SBYOR BA YAN LAG DRUG TU 'DOD, ,CES BYA BA DE LA MIG LA SOGS PA'I 'BREL PA CAN, RNAM PAR SHES PA LNGA RNAMS GZUGS LA SOGS PA'I YUL RNAMS LAS SO SOR SDUD PA NI BKUG NAS YANG DAG PAR DUL BAR BYED PA GANG DE SO SOR SDUD PA'O, ,
, ,YANG NA LHA NYID KYI TSUL DU YUL BZUNG BA NI SO SOR SDUD PA'O, ,BSAM GTAN SO SOR SDUD PA'I GO RIMS KYIS YID KYI RNAM PAR SHES PA LHA NYID DU SGOM PA'O, ,DE'ANG RNAM PAR RTOG PA RNAM PAR DPYOD PA, DGA' BA BDE BA SEMS RTZE GCIG PA'I DBYE BAS RNAM PA LNGA'O, ,DE LA SNOD DANG BCUD KYI DKYIL 'KHOR DANG BCAS PA, BCOM LDAN 'DAS DPAL SDOM PA'I YONGS SU BRTAG PA NYID NI RNAM PAR RTOG PA STE, DE KHO NA LA BRTAN PA NYID KYIS NGES PA NI RNAM PAR DPYOD PA'O, ,RNAM PAR DPYOD PAS DE DANG DE'I LHA NYID DU DMIGS PAS, YID BDE BA DE NI DGA' BA'O, ,DGA' BAS BSGOMS PA'I LHA LA SIM PA DANG BCAS PA'I SEMS GANG YIN PA DE NI BDE BA'O, ,BDE BA DANG LDAN PA'I SEMS TING NGE 'DZIN DU GYUR PA'I PHYIR, RNAM PA SNA TSOGS PA LOG PA'I KUN RDZOB KYI YUL CAN GYI MI SHES PA'I SKYE BA ZAD PAS 'DOD PA'I LHA KHO NA LA DMIGS PA'I SEMS NI SEMS RTZE GCIG PA NYID DO ZHES BYA BA BSAM GTAN YAN LAG LNGA'O, ,DE LTAR SNGA DRI'I THUN MTSAMS LA JI LTAR GSUNGS PAR GO RIMS KYIS DKYIL 'KHOR 'KHOR LO
BSGOMS NAS NI NYI MA'I GUNG THUN LA'ANG SKAD CIG TU DE KHO NA BZHIN DU, DKYIL 'KHOR 'KHOR LO DMIGS NAS SO SOR SDUD PA DANG BSAM GTAN DAG GI JI SRID DU 'DOD PA DE SRID DU MNGON PAR PHYOGS PAR BYED CING BSAM GTAN BYA'O, ,DE'I RJES LA THUN MTSAMS KYI DUS SU DNGOS SU'AM MOS PAS PHYAG RGYA LNGA LA SOGS PAS BRGYAN PA, THOD PA KHA tV'Am GA d'A MA RU 'DZIN PA, SANGS RGYAS THOD PA CAN GYI BRTUL ZHUGS SGRUB PA POS DKYIL 'KHOR KHO NA BSGOM ZHING BSKOR BA DANG, BZA' BA LA SOGS PA'I LAS BYA'O, , YANG GSUNGS PA THUN GSUM DU BYIN GYIS BRLABS PA'I SGOM PA RNAM PAR BSGOM PA NAS LANGS TE LHA'I GZUGS SU BZHAG GO ,DON 'DI KHO NA LA DPAL RDO RJE MKHA' 'GRO'I RGYUD KYI LE'U SO DGU PA LAS, HE RU KA DPAL TSUL GYIS NI, ,KHA tV'Am GA SOGS SGOM RNAMS KYIS, ,THOD PA GA-YON PA'I PHYAG GIS TE, ,BRTUL ZHUGS LDAN PAS SPYOD PA SPYAD, ,CES SO, KHYAD PAR DU LAS KHA TSAR GYI DON DU SHING SDONG LA SOGS PA BTZUGS PA NA TSUL DE KHO NAS GTOR MA SBYIN PA DANG, BSRUNG BA ZHAG RE RE LA BYA'O, ,ZHES PA'I NGAG GIS SGRUB THABS KYI BANG MDZOD CES BYA BA'I t'IKKA LAS KYANG GSUNGS PA, KHA tV'Am GA SOGS SGOM RNAMS KYIS, ,ZHES BYA BA NI, SOGS PA'I SGRAS d'A MA RU'O, ,CHUS BRAN PA LA SOGS PA NI NYE BAR MTSON PA TZAM STE, SKOR BA DANG BZA' BA LA SOGS PA'I LAS THAMS CAD LA TSUL 'DI LTAR BYA'O, ,BYE BRAG TU PHYAG MTSAN GSUM PA'I NANG NAS DAM TSIG GI DBANG GIS GANG NYE BAR SBYOR BA DE 'DOD PA LTAR GZUNG BAR BYA'O, ,'GA' ZHIG TU RDO RJE DANG DRIL BU'ANG BZUNG STE RTAG TU 'DI BZUNG GI NGES
, ,PAR MI BYED, DE LTAR SANGS RGYAS THOD PA'I BRTUL ZHUGS 'DZIN PA, PHYAG BCU GNYIS PA LA SOGS PA'I DPAL SDOM PA LA SOGS PA'I TING NGE 'DZIN DNGOS SU BYA BA'I GO RIM GYIS 'JIG RTEN GSUM GYI KHONGS SU CHUD PA'I SGRUB PA DANG YONGS SU MTHAR THUG PA LA PHYAG RGYA CHEN PO'I SGRUB PA'ANG BSGRUB PAR BYA'O, ,'DI'ANG THOD PA 'CHANG BA'I BRTUL ZHUGS NI, RNAL 'BYOR MA'I RGYUD DU DBANG BSKUR BA'I DUS KHO NAR SBYIN PAR BYA STE, SGRUB PA POS 'DI KHO NA MTSAN SUM CU RTZA GNYIS PA LA SOGS PA'I TSUL GYIS STONG PA NYID LA LDANG ZHES PA 'DI LA THE TSOM MI BYA'O, ,'DI LA'ANG SNGA DRO'I THUN NAS MTSAN MO'I PHYED KYI THUN GYI BAR DU LHA KHO NA BSGOM ZHING GNAS PAR BYA'O, ,DE NAS STONG PA NYID BSGOM PAR BYA STE, DE LA GSUNG RAB LAS GRUB PA'I MAN NGAG 'DI LTA STE, LTE BAR 'KHOR LOR ZLA BA'I DKYIL 'KHOR LA, JI LTAR GSUNGS PA'I H'Um YIG DBUS SU GNAS PA'I A'A LI K'A LI'I SBYOR BA SKAD CIG TU MOS NAS DE DANG DE'I YI GE DANG BCAS PA'I 'OD ZER RNAMS SPRO BAR BYA'O, ,'OD ZER DE'I NGES PAR 'BYED PAS BEE RAM PA LA SOGS PA THAMS CAD SNOD DANG BCUD KYI DKYIL 'KHOR 'OD KYI RANG BZHIN DU BYAS NAS, A'A LI K'A LI'I SBYOR BA DE KHO NA LA RAB TU ZHUGS PAR BYA'O, ,YANG DE BZHIN DU 'OD ZER RNAM PAR SPROS PAS 'OD ZER DE'I NGES BAR 'BYED PAS BCOM LDAN 'DAS MA DANG BCAS PA'I BCOM LDAN 'DAS 'OD ZER GYI RANG BZHIN DU BYAS NAS YANG DE KHO NA BZHIN DU RAB TU 'JUG PAR BYA'O, ,DE KHO NA BZHIN DU YANG 'OD ZER RNAMS SPROS NAS DE'I 'OD ZER GYI NGES PAR 'BYED PAS, ZLA BA'I DKYIL 'KHOR
H'Um YIG DANG A'A LI K'A LI'I SBYOR BA 'OD KYI RANG BZHIN DU BYAS NAS, JI LTAR DBUGS RLUNG ME LONG LA, ,KUN NAS SIM PAR 'GRO BA YI, ,DE BZHIN RNAL 'BYOR YANG DAG MTHAR, ,SKAD CIG RE RER RAB TU 'JUG ,CES 'DI LTAR 'OD GSAL LA MNGON DU PHYOGS PAR BYAS NAS GAL TE NGAL BSO BA'I BLOS NYAL BAR 'DOD NA DE'I TSE 'DI'I DMIGS PA KHO NAS NYAL BAR BYA'O, ,DE NAS MA BCOS PA'I RANG BZHIN KHO NAS SGRUB PA POS 'OD GSAL GYI RNAM PAR DAG PA LAS, MTSAN SUM CU RTZA GNYIS DANG DPE BYAD BRGYAD CU DANG PHYAG RGYA LNGA LA SOGS PAS BRGYAN PAR THOD PA KHA tV'Am GA d'A MA RU BSNAMS PA NYID KYIS RDO RJE THOD LDAN GYI BRTUL ZHUGS 'TSANG BA KHO NA ZHAL GCIG PHYAG GNYIS PA'I DPAL BDE MCHOG GI MOS PA BSAL BA LAS LANGS LA, SNGA DRO'I THUN LA SNGAR BZHIN DU SO SOR SDUD PA'I RIM PAS SGRUB THABS YAN LAG DANG BCAS PA BSGOM PAR BYA'O, ,DE BZHIN DU RIM PAS DAD PA DANG BCAS PA, BAR MA CHAD PAR YUN RING POR SGOM PA DANG MA BRAL BA'I SGRUB PA PO LA DPAL BDE MCHOG LA SOGS PA MKHA' 'GRO DANG MKHA' 'GRO MA RNAMS KYIS RAB TU 'BAD PAS BDAG NYID NYE BAR STON PAR BYED DE, 'DIR YANG MNGON SUM DU MTHONG BA DE RNAMS KYIS KYANG 'DI LA RJES SU 'DZIN TO ZHES BYA BA'I BSKYED PA'I RIM PA'O, ,SROG RTZOL BA LA SOGS PA'I RIM PAS RDZOGS PA'I RIM PA BSGOM PAR BYA STE, DE LA RIM PA 'DI LTA STE, ME LONG LTA BU MNYAM PA NYID SO SOR RTOG PA, BYA BA SGRUB PA, SHIN TU RNAM PAR DAG PA'I CHOS KYI DBYINGS SHES BYA'I YE SHES LNGA'I RGYU NYID YIN PAS YE SHES LNGA'I RANG BZHIN G
, ,ME RLUNG DBANG CHEN CHU NAM MKHA'I RANG BZHIN NYID YIN PAS 'BYUNG BA LNGA'I BDAG NYID CAN, SROG RLUNG THUR DU RGYU BAR BYAS NAS YUNGS 'BRU'I TSAD TZAM ZHIG BYANG CHUB KYI SEMS KYI THIG LE 'GRIL BA'I TSUL GYIS RDO RJE'I SNA'I RTZE MOR PHAB NAS GONG DU GSUNGS PA'I SO SOR SDUD PA DANG YAN LAG LNGA'I BSAM GTAN GYI RIM PAS BSAM PAR BYA'O, ,'DI'ANG THIG LE'I SBYOR BA STE, SROG RNAMS PHYI ROL TU 'GRO BA LDOG PA'I DON DU DE BAS NA DE'I RGYU NYID KYIS GSANG BA 'DUS PA PHYI MA'I RGYUD LAS SROG RTZOL ZHES BYA BAR BRJOD DO, ,'DI'ANG NYE BAR MTSON PA TZAM STE, LTE BAR PHRA BA'I A'A LI K'A LI'I SBYOR BA'AM THUGS LA SOGS PA LA THIG LE LA SOGS PA'I SBYOR BA'I BSAM GTAN GANG DE'ANG SROG 'THON PA LDOG PA'I DON NYID KYIS SROG RTZOL ZHES BRJOD DO, ,BYE BRAG TU BSAM GTAN 'DI LTA BU'I STOBS KYIS RO MA DANG RKYANG MA DAG GI RGYU BA LAS LDOG NAS DBU MAR SROG RLUNG GI RTZOL BA NI RAB TU RGYU STE, 'DI'ANG SROG RTZOL ZHES BRJOD DO, ,DE NAS THUGS KAR NYI MA MED PA'I H'Um YIG RKYANG PA BSGOMS NAS DE'I THIG LE LA SROG RAB TU 'JUG PA'I SGO NAS GZUNG BA DANG 'DZIN PA SROG RTZOL DANG BCAS PA NYAMS NA DE KHO NA'I PHYIR STONG PA NYID KHO NAR GNAS PA, SANGS RGYAS THAMS CAD KYI RANG BZHIN ZHI BA SNANG DMIGS YOD PA TZAM PO SEMS RIN PO CHE NAM MKHA' DANG MNYAM PA'I 'OD GSAL NYID DU GYUR BA LAS GANG SROG RLUNG BRTAN PAR GYUR BA DA 'DZIN PA'O, ,'DI'ANG NYE BAR MTSON PA TZAM STE, LTE BA'I RTZA BAR GNAS PA PHRA BA'I A'A LI K'A
LI'I SBYOR BA'AM, RDO RJE'I SNA'I RTZE MO LA SGOM PA'I THIG LE'I SBYOR BA'AM, GTUM MO LA SOGS PA'I SBYOR BA GANG RUNG BA'AM, GSUNGS MA THAG PA'I RIM PAS GANG SROG RLUNG BRTAN PAR GYUR PA DE'ANG 'DZIN PA'O, ,'DZIN PA 'DI'I MJUG THOGS SU BAR MA CHAD PAR SMIG RGYU DU BA SRIN PO ME KHYER MAR ME SPRIN MED PA'I NAM MKHA' LTA BU'I RTAGS LNGA MTHONG BAR 'GYUR RO, ,DE NAS SROG RTZOL DANG LHAN CIG TU 'OD GSAL BA'I RANG BZHIN NYID KYIS GANG GI TSE SEMS BRTAN PAR GYUR PA DE'I TSE SMON LAM KYIS RAB TU 'BYED PA'I MTHUS DANG PO SGOM PA'I LHA LA RJES SU DRAN PA 'BYUNG BA DE LA'ANG BSGOMS PA'I A'A LI K'A LI LA SOGS PA'I PHRA BA'I SBYOR BA LAS SGOM PA POS 'OD ZER SPRO BAR BYAS PA 'DI NI RJES SU DRAN PA'O, ,'OD DE DANG BCAS PA BA SPU'I BU GA RE RE RNAMS KYIS PHUNG PO KHAMS DANG SKYE MCHED LA SOGS PA, LHA'I RANG BZHIN SPROS PA NI RJES SU DRAN PA ZHES BYA BA NI DGONGS PA CAN YIN NO, ,DE BZHIN DU DPAL GSANG BA 'DUS PA LAS, BRTAN PAS RIN CHEN SPRO BAR BYED, ,MI BRTAN PAS NI SPRO MI BYA, ,RAB MCHOG SPRIN RNAMS KYIS SPRO BYA, ,SANGS RGYAS YE SHES MNYAM 'OD KYIS ZHES BYA'O, ,DE NAS PHUNG PO KHAMS DANG SKYE MCHED LA SOGS PA RANG BZHIN GYIS SPROS PA'I DNGOS PO THAMS CAD KYI RANG BZHIN GYI LHA RNAMS 'OD KYI RANG BZHIN DU BYAS NAS 'OD ZER RNAMS KYANG, GSUNGS PA'I SBYOR BA RNAMS LAS RGYUD THA DAD PA'I PHYIR SGRUB THABS MI GCIG PAS SGOM PA'I GANG YANG RUNG BA'I PHRA BA'I SBYOR BA LA STONG PA DANG, SNYING RJE DBYER MI PHYED PA'I RANG BZHIN LA
, ,'GREL BA'I TSUL DU BSDUS NAS, SKAD CIG GIS RANG RIG PA'I YE SHES 'BYUNG BA NI TING NGE 'DZIN TO, ,'DI KHO NA RGYUD GZHAN NAS 'BYUNG BA DANG, BRGYUD PA'I RIM PA LAS BYUNG BA'I BSHAD PA'O, ,'OD GSAL LAS YIS KYI RANG BZHIN GYI SKU ZHES PA DE'ANG TING NGE 'DZIN CES BYA BA'ANG 'GA' ZHIG TU BSHAD DO, ,DPAL GSANG BA 'DUS PA'I RGYUD PHYI MAR YANG GSUNGS PA, BCU PO DBANG PO RNAMS KYI NI, ,RAB 'JUG GNAS PA THAMS CAD DU, ,SO SOR SDUD PA ZHES BRJOD DE, ,'DOD PA'I BSDUS PA SO SO'O, ,'DOD PA LNGA RNAMS BSDUS PA YI, ,SANGS RGYAS LNGA NI RAB SBYOR BAS, ,BRTAGS PA BSAM GTAN DU BRJOD DE, ,BSAM GTAN RNAM PA LNGAR 'GYUR TO, ,RNAM PAR RTOG DANG RNAM PAR DPYOD, ,DGA' DANG DE BZHIN BDE BA DANG, ,SEMS KYI RTZE GCIG NYID DANG NI, ,LNGA PO 'DI RNAMS BSAM GTAN BSDUS, ,GSANG RGYUD SKU RNAMS THAMS CAD LA, ,RNAM PA SNA TSOGS YONGS SU GROGS, ,GSANG GSUM 'BYUNG BA RTOGS PA YIN, ,RNAM DPYOD YONGS SU DE LONGS SPYOD, ,GSUM PA YID BDE DGA' BA STE, , BZHI PA BDE BAS BSDUS PA'O, ,SEMS KYI YANG BA SHES PAR BYA, ,SHES DANG SHES BYA'I SKYE BA NYAMS, ,SANGS RGYAS THAMS CAD RANG BZHIN ZHI, ,THAMS CAD 'DOD PA SO SOR GNAS, ,YE SHES LNGA YI RANG BZHIN DBUGS, ,'BYUNG BA LNGA YI NGO BO NYID, ,'GRIL BA'I TSUL GYIS PHAB NAS SU, ,SNA YI RTZE MOR RAB RTOG BYA, ,KHA DOG LNGA LDAN RIN CHEN CHE, ,SROG RTZOL ZHES BYA DRAN PA YIN, ,RANG SNGAGS SNYING KHAR BSAMS NAS NI, ,SROG NI THIG LER GYUR PAR BZHAG ,RANG DBANG RIN CHEN
DGAG PA YI, ,GZUNG BA 'DZIN PA YIN PAR BSHAD, ,'GOG PA'I RDO RJER GNAS SEMS LA, ,RTAGS KYI 'BYUNG BA RAB TU SKYE, ,DE YI RTAGS KYANG RNAM PA LNGA, ,BYANG CHUB RDO RJE LAS BYUNG BA, ,DANG PO SMIG RGYU'I RNAM PA CAN, ,DU BA'I RNAM PA GNYIS PA STE, ,GSUM PA SRIN BU ME KHYER BZHIN, ,BZHI PA MAR MES GSAL BYED PA, ,LNGA PA RTAG TU GSAL BYED DE, ,SPRIN MED NAM MKHA' LTA BU'O, ,BRTAN PA RDO RJE'I LAM GYIS SU, ,NAM MKHA'I KHAMS LA DGRAM PAR BYA, ,BSGOMS NAS RJES SU DRAN PA GANG, ,DE YI RNAM PA CAN YANG DGRAM, ,RJES SU DRAN ZHES SHES PAR BYA, ,DE LA RAB TU GSAL BAR SKYE, ,SHES RAB THABS DANG SNYOMS 'JUG PAS, ,THAMS CAD DNGOS PO THAMS CAD DU, ,'GRIL BA'I TSUL DU BSDUS NAS NI, ,THIG LE'I DBUS SU RNAM PAR BSGOM, ,SKAD CIG YE SHES RDZOGS PA NI, ,TING NGE 'DZIN CES MING CAN NO, ,TSIG LE'UR BYAS PA 'DI RNAMS LAS RTOGS PAR DKA' BA'I TSIG RNAM PAR BSHAD DE, ,BCU PO ZHES BYA BA NI MIG LA SOGS PA'I DBANG PO LNGA DANG, GZUGS LA SOGS PA'I YUL RNAMS KYI'O, ,DE'I PHYIR 'DI KHO NA GSUNGS TE, DBANG PO RNAMS KYI RANG 'JUG GNAS ZHES PA'O, ,DBANG PO RNAMS NI MIG LA SOGS PA'I DBANG PO RNAMS SO, ,YANG RANG 'JUG PAR GNAS PA NI RANG RANG GI YUL LA 'JUG PA NI RAB TU 'JUG PA STE, RANG GI 'JUG PA LA GNAS PA'I PHYIR RANG 'JUG GNAS PA NI MIG LA SOGS PA'I SHES PA LNGA ZHES BYA BA'I DON TO, ,'DI YANG BSDUS PA SO SO ZHES PA NI, 'DOD PAR BYED PA NI MNGON PAR ZHEN PAR BYED PA'I PHYIR 'DOD PA'I GZUGS DANG SGRA LA SOGS PA'I YUL
, ,LNGA STE, ,DE RNAMS LAS GZUGS LA SOGS PA'I SHES PA LNGA RIM PA BZHIN DU SDUD PA NI 'GUGS PAR BYED PA'I PHYIR SDUD PA STE, YUL DANG BRAL BA'I YID NI 'DOD PA'I BSDUS PA'O, ,DE LA SO SO ZHES BYA BA NI 'DOD PA'I BSDUS PA THOB NAS ZHES BYA BA'I DON TO, ,RANG 'JUG PA'I GNAS GANG SHES PA LNGA DE KHO NA RIM GYIS RANG 'JUG PA DANG BRAL ZHING SO SOR SDUD PAR BRJOD DO, ,'DOD PA LNGA RNAMS NI YUL LNGA STE, DE RNAMS LA LHA'I TSUL GYIS YONGS SU RTOG PA ZHES NYE BAR MTSON PA TZAM YIN TE, THAMS CAD NANG GI PHUNG PO DANG KHAMS DANG SKYE MCHED RNAMS DPAL BDE MCHOG LA SOGS PA'I LHA NYID KYI RAB TU SBYOR BAS, YONGS SU RTOG PA'ANG BSAM GTAN NO, ,YID KYI DBANG PO DANG DE'I RNAM PAR SHES PA DAG NI, ,SKU GSUNG THUGS KYI GSANG BA'I BDAG NYID LHA RNAMS GSAL BA'I TSUL DU BYUNG BA NI GSANG GSUM BYUNG STE, DE KHO NA RNAM PAR RTOG PA'O, ,SHES DANG SHES BYA'I SKYE BA NYAMS ZHES PA NI, LOG PA'I KUN RDZOB KYI NGANG TSUL CAN SHES PA DANG, SHES BYA'I RNAM PAR RTOG PA'I SKYE BA MED DO, , RIN CHEN CHE BA ZHES BYA BA NI 'BRAS BU'I MCHOG SBYIN PA'I PHYIR RO, ,'GOG PA'I RDO RJE NI 'OD GSAL BA STE, ,DE LA GNAS PA'I SEMS NI DE'I RANG BZHIN DU GYUR BA'O, ,BRTAN PA RDO RJE'I LAM GYIS SU, ,NAM MKHA'I KHAMS LA DGRAM PAR BYA, ,ZHES BYA BA NI, BRTAN ZHING RDO RJE'I LAM GYIS RJES SU DRAN PAS NAM MKHA'I KHAMS RNAMS SU DGRAM PAR BYA STE, PHUNG PO KHAMS DANG SKYE MCHED KYI RANG BZHIN 'OD ZER DANG LDAN PA'I LHA TSOGS RNAMS SO, ,SHES RAB THABS DANG SNYOMS 'JUG PAS, ,THAMS CAD DNGOS PO THAMS
DU, ZHES BYA BA NI SHES RAB DANG THABS SNYOMS PAR 'JUG PA NI, ,STONG NYID DANG SNYING RJE THA MI DAD PA'I TSUL GYIS SO, ,THAMS CAD DNGOS PO ZHES BYA BA NI PHUNG PO KHAMS DANG SKYE MCHED KYI RANG BZHIN 'OD ZER DANG BCAS PA'I LHA NYID KYI TSOGS RNAMS SO, ,'GRIL BA'I TSUL GYIS ZHES PA NI STONG PA NYID DANG SNYING RJE THA MI DAD PA'I TSUL GYIS DE RNAMS RANG GI LUS LA BSGOM PA GANG YANG RUNG BA'I THIG LE'I DBUS SU NYE BAR BSDUS NAS THIG LE DE KHO NA BSGOM PAR BYA'O, ,THIG LE ZHES BYA BA NYE BAR MTSON PA STE, RIM PA 'DI BZHIN DU A'A LI K'A LI'I SBYOR BA LA SOGS PA YANG NGO, ,SKAD CIG YE SHES RDZOGS PA NI, ,ZHES BYA BA SKAD CIG GIS RANG RIG SKYE BAS DE KHO NA NYID MTHONG BA YANG NGO, ,BYE BRAG TU GANG GI TSE'ANG 'DI SMIN MA DAG GI DBUS SU SO SOR SDUD PA'I GO RIM GYIS THIG LE SGOM PA DE'I TSE'ANG SROG RTZOL DANG 'DZIN PA DANG RJES SU DRAN PA DANG TING NGE 'DZIN PHUN SUM TSOGS PA 'BYUNG NGO, ,YANG GSUNGS PA RTZA BA'I RGYUD LAS, SMIN MA'I DBUS SU AA WA DH'U T'I'I GNAS BZHAG PAR BYA'O, ,ZHES BYA'I 'DI KHO NA GSUNGS PA RI GI AA RA LI'I RGYUD LAS DE BZHIN DU'ANG, AA RA LIS ZHUS LHA MO LA, ,YE SHES MCHOG KYANG JI LTA BU, ,GANG ZHIG RNAM PAR SHES TZAM GYIS, ,SGRUB PA PO YIS DNGOS GRUB 'THOB, ,LHA MO RIGS KYIS YANG DAG GSUNGS, ,YE SHES CHEN PO BDE BA MCHOG ,KUN MKHYEN YE SHES LAS BYUNG BA, ,BSRUB BYA SRUB BYED LAS BYUNG BA, ,BSAM PA THAMS CAD YONGS SPANGS TE, ,DBANG PO THAMS CAD DES BKAG NAS, ,SKYE 'GRO MED PA'I DBEN PHYOGS SU, ,GNYIS PA THAMS CAD DANG BRAL BA'I, ,MIG GNYIS MA PHYE MA BTZUM PAR, ,SMIN MA'I MTSAMS SU SEMS GTOD NA, ,MUN
, ,BA MI BZAD TSUL YANG NI, ,SGRUB PA PO YIS DANG POR MTHONG, ,DE NAS GA-YON PA'I RNA BA NI, ,DAL BU DAL BUS GA-YO BAR BYED, ,SHES RAB MA YI BDE BA GANG, ,DE BZHIN PHYAG RGYA CHEN PO'I BDE, ,NYAMS PA'I RANG BZHIN MI PHYAG RGYA, ,DE PHYIR SHES PA'ANG NYAMS PA YIN, ,DE PHYIR YE SHES PHYAG RGYA BSGOM, ,BDE BA CHEN PO BSGRUB BYA'I PHYIR, ,YE SHES CHEN PO 'DI KHO NA, ,RANG GI RIG BYA'I RANG BZHIN TE, ,GZHAN LA BSTAN PAR MI NUS PA, ,GZHON NU MA YIS BDE MYONG BZHIN, ,SBYOR BA 'DI DANG BCAS PA YIS, ,SEMS CAN MGU BYED SEMS KYIS SU, ,SNYING RJES SEMS CAN THAMS CAD LA, ,SBYOR BA 'DI NI BDE BAR BYED, ,'DI LA GOMS PA'I SBYOR BA YIS, ,MKHA' DANG MNYAM PA'I SEMS KYIS SU, ,SNYING RJE CHEN PO'I RDZU 'PHRUL CAN, , RNAL 'BYOR GRUB 'GYUR THE TSOM MED, ,DANG POR MUN PA BYED PA MTHONG, ,GNYIS PA DKAR PO DU BA BZHIN, ,GSUM PA SRIN PO ME KHYER MTSUNGS, ,BZHI PA DZA BA'I ME TOG LTAR, ,LNGA PA SPRIN MED NAM MKHA' STE, ,BDAG DANG GZHAN GYI TSOR BA BRAL, ,THAMS CAD MKHYEN PA'I RGYU DE YANG, ,SPRIN MED NAM MKHA'I DPE DANG LDAN, ,RGYUN DU GOMS PA'I SBYOR BA YI, ,RTZE GCIG SEMS PA 'DI LTAR BYOS, ,RTAG TU YE SHES BDUD RTZI YI, ,BTUNG BAS BKRES PA'I DGAG BYA MED, ,RGA DANG NAD KYI GDUNG BA MED, , THABS KYI SBYOR BA 'DI YIS NI, ,RI GI THAMS CAD MKHYEN PAR 'GYUR, ,ZHES SO, ,MANGGA LAm, ,,