*, ,RJE'I ZHAL GYI GDAMS PA RIM GNYIS SGOM TSUL STHA BI RA S'A DHU BHYA [*BHA] DRAS ZIN BRIS SU BKOD PA BZHUGS SO,,
, ,RJE BTZUN 'JAM PA'I DBYANGS DANG NGO BO DBYER MA MCHIS PA CHOS KYI RJE DPAL LDAN BLA MA RIN PO CHE'I ZHABS KYI PADMO DRI MA MED PA LA PHYAG 'TSAL LO, ,DUS DANG GNAS SKABS THAMS CAD DU BRTZE BA CHEN POS DGYES BZHIN DU RGYUN CHAD MED PAR RJES SU GZUNG DU GSOL, DE LA SNGAGS DANG PHA ROL TU PHYIN PA'I LAM GYI NGO BO, GO RIM, GRANGS NGES, BYED LAS, SA MTSAMS, SO SO'I MYONG BA 'DON TSUL, MYONG BA YANG DAG DANG LTAR SNANG, RNAM PAR DBYE BA, GEGS BYUNG NA SEL TSUL RNAMS NI, THAMS CAD MKHYEN PA RJE RIN PO CHE'I MDO SNGAGS KYI RNAM GZHAG RGYAS PA RNAMS SU SHES PAR BYA'O, ,'DIR NI ZHAL GYI GDAMS PA 'GA' ZHIG , GSAL SGRON DANG, 'KHRID YIG GNYIS DANG SBYAR TE CUNG ZAD BSHAD PAR BYA STE, DE LA RIM PA DANG PO'I SKABS SU, GANG SNANG LHAR 'CHAR BA LA SLOB DGOS PAS, RTEN DANG BRTEN PA RAGS PA DANG, PHRA BA'I BSKYED RIM MTHAR PHYIN NAS, RDZOGS PA'I RIM PA LA 'JUG PA NA, THOG MAR LUS DBEN NYAMS SU BLANG BA'I TSUL NI, RIM LNGA BSDUS PA LAS, LUS DANG DUS DANG YUL RLUNG GI ,GNAD NI RNAM PA BZHIR SHES BYA, ,ZHES GSUNGS PA LTAR,
, ,GNAD BZHI DANG LDAN PAR BYA STE, RANG NYID GSANG CHEN RDO RJE 'CHANG YAB YUM DU GSAL BA'I NOR BU'I RTZE'I DH'U T'I'I MAR SNA'I NANG NGAM, MAN NGAG SNYE MAR NOR BU'I DBUS NA RTZA 'KHOR 'DAB MA BRGYAD PA CIG BSHAD PAS, DE'I DBUS KYI DH'U T'I'I NANG GANG RUNG DU NYI MA'I DKYIL 'KHOR SRAN MA PHYED TSAL TZAM GYI STENG DU THIG LE KHYAD PAR GSUM LDAN KHA DOG SNGON PO, DBYIBS ZLUM PO, NAS 'BRU'AM YUNGS KAR GYI TSOD TZAM SHIN TU 'TSER BA, YE SHES LNGA'I RANG BZHIN GYI 'OD ZER LNGA 'PHRO BA, RANG GI LHA'I NGO BOR BLTAS LA, DE LA RANG GI SEMS DBYER MED DU ZHUGS PA'I TSUL GYIS BYING RGOD DANG BRAL BAR BYAS TE, TSIG 'GRIL DU BSGOMS PAS, SEMS THIG LE DANG 'DRES PA'I NYAMS SKYES NAS, DBANG PO'I RLUNG NANG DU LDOG PA DANG, DH'U T'I'I NANG GANG RUNG DU ZHUGS GNAS THIM GSUM BYUNG BA'I RTAGS BZHI, RIM PA NGES PA CAN DU SHAR NAS GTUM MO KHYAD PAR CAN DH'U T'I'I NANG NAS 'BAR TE, BYANG SEMS ZHU BAS GANG DU SLEB PAS YAS BABS DANG, MAS BRTAN GYI DGA' BZHI SKYE TSUL NI, RGYUD RDO RJE PHRENG BA LAS, DE RJES LUGS 'BYUNG BSHAD BYA STE, ,BDE CHEN 'KHOR LO SPYI BO LA, ,'DI NI DGA' BAR BSHAD PA YIN, ,LONGS SPYOD 'KHOR LO MCHOG DGA' DANG, ,DGA' BRAL CHOS KYI 'KHOR LOR GNAS, ,SBRUL PA'I 'KHOR LO LHAN CIG SKYES, ,DGA' BA NYAMS SU MYONG BAR BYED, ,CES GSUNGS
TE, SPYI BO NAS MGRIN PA'I BAR LA DGA' BAR 'JOG LA, DES GZHAN GSUM LA SHES PAR BYA'O, ,MAS BRTAN GYI SKYE TSUL YANG, DE NYID LAS, SPRUL PA'I 'KHOR LO DGA' BA DANG, ,MCHOG DGA' CHOS KYI 'KHOR LOR GNAS, ,LONGS SPYOD BRAL BA'I DGA' BA DANG, ,LHAN CIG SKYES DANG DGA' BA CHE, ,LUGS LDOG RIM PA ZHAS NI GSUNGS, ,ZHES TE, 'DI'I GNAS KYANG SNGAR BSHAD PA'I RIM PAS SHES PAR BYA'O, ,'DIR BDE BA CHEN PO NI, LAM GYI SROG YIN LA, DE BRTAN PA NI, MAS BRTAN GYI BDE BA LA RAG LAS PAS, DE SKYED TSUL GAL CHE'O, ,DE YANG MAN SNYE LAS, DE'I 'CHAR SA NI NOR BU NAS BRTZAMS TE, LTE BA JI SRID PA STE, MA 'PHOS PA'I, BYANG CHUB KYI SEMS 'PHEL BZHIN PAS, STENG DU LTE BAR 'GRO, ZHES GSUNGS PA'I TSIG ZIN LTAR NA, NOR BU NAS PHYIR MA 'PHOS NA, RANG LOG BYED PA 'DRA BA CIG 'DUG KYANG, DANG PO'I DUS SU, RANG LOG BYED PA MA YIN PAS, YAR LA 'GRIL NAS SPYI GTZUG PAR 'GRO BA CIG DGOS PA NI, RNAL 'BYOR PAS CHED DU BYA DGOS TE, RGYUD RDO RJE 'PHRENG BA LAS, RLUNG GI DE NYID SNGON SONG NAS, ,DE NYID STENG DU RGYU BA NI, ,RNAL 'BYOR PAS NI SGRUB PAR BYED, ,DE LAS SPRUL PA'I 'KHOR LO NI, ,DGA' BA ZHES BYAR RNAM PAR SHES, ,ZHES GSUNGS PAS, NOR BU'I RTZE NAS SPRUL PA'I 'KHOR LO'I BAR DU DGA' BA, DE NAS CHOS 'KHOR BAR DU MCHOG DGA', DE NAS LONGS SPYOD KYI 'KHOR LO'I BAR DU KHYAD PAR GYI DGA' BA DE NAS BDE CHEN 'KHOR LO'I BAR DU LHAN CIG SKYES PA'I DGA' BA, DE BZHI KA YANG, MAN NGAG SNYE MAR RIM PA
, ,BZHIN, LHAN CIG SKYES DGA' LA CHE CHUNG BAR MA, CHEN PO LA, CHEN PO'I CHEN PO BYED PAR BSHAD DO, ,DE LA YAB BABS KYI LHAN SKYES NYAMS SU MYONG NAS, MAS BRTAN GYI DGA' BZHI RNAL 'BYOR PAS SGRUB PAR BYED TSUL NI, BDE STONG SBYAR NAS BSGOM PA'I MJUG TU RLUNG LDANG BAR BRTZAM PA NA, DMIGS PAS BYANG CHUB KYI SEMS SGRIL TE, DH'U T'I'I NANG NAS RIM GYIS DRANGS TE, SPRUL PA'I 'KHOR LO'I DH'U T'I'I NANG DU ZUG ,DE BZHIN DU CHOS 'KHOR GYI DH'U T'I'I NANG DU DRANGS PAR MOS TE YUN RING BSGOM, DE NAS LONGS SPYOD BDE CHEN GYI 'KHOR LOR RIM PA BZHIN DU DRANGS NAS BDE CHEN GYI DBUS, DH'U T'I'I NANG DU LHAN SKYES KYI DGA' BA DANG, STONG NYID SBYAR TE, YUN RING DU BSGOM, RLUNG LDANG BAR RTZOM PA NA, DMIGS PAS BYANG CHUB KYI SEMS, DH'U T'I'I NANG NAS PHYIR SNGA MA BZHIN BTANGS TE, NOR BU'I RTZER LHAN SKYES DANG, STONG PA SBYAR TE BSGOM, DANG PO'I DUS SU JI LTA BA BZHIN BSGRUB MA NUS PAR RLUNG LANGS NA, YANG NOR BU'I RTZER SNGA MA BZHIN PHRA MO BSGOMS NAS YAS BABS DANG, MAS BRTAN GYI DGA' BZHI BSKYED DO, ,DGA' BA BZHI SKYE BA LA, BYANG CHUB KYI SEMS 'BAB DGOS SO, ,DE LA GTUM MO KHYAD PAR CAN 'BAR DGOS, DE 'BAR BA'I TSAD NI, NANG GI GTUM MO 'BAR BAS BSIL PA'I BYA BA BYED PAR MA ZAD, PHYI NAS TZA BAS BSIL BA'I BYA BA BYED CING, PHYI'I GRANG BA'I REG PAS KYANG DRO BA'I BYA BA BYED PAS LUS SEMS LA, GDUNG BA SKYED PA'I GTUM MO NI, LTAR SNANG DU SHES PAR GYIS SHIG ,YAS BABS DANG,
MAS BRTAN GYI LHAN SKYES GYI NOR BU DANG, BDE CHEN GYI DBUS SU BDE STONG SBYAR TE, BSGOMS PA'I STOBS KYIS RLUNG SNGA MA MA LANGS PA'I STENG DU NANG GI KHYAB BYED KYI RLUNG RAGS PA, 'GA' ZHIG 'DUS NAS ZHUGS GNAS THIM GSUM BYAS PA'I MTHAR, LHAN SKYES GNYIS KYI BDE STONG SBYAR NAS BSGOM PA GAL CHE, DE YANG CHOS NYID PHYAG CHEN GNYIS BSGOMS PAS, LUS SEMS LA BDE BA SKYE YANG, 'DIR NI, DE BSGOMS STOB KYIS ZHUGS GNAS THIM GSUM BYUNG PA'I LHAN SKYES KYI STONG NYID BSGOM PA CIG DGOS, CHOS NYID LA BRTEN NAS BDE BA KHYAD PAR CAN NGES CAN DU 'DREN BA SEMS DBEN GYI SKABS SU 'BYUNG BAS DE NI SNYING KHA'I DH'U T'I DANG, SBREL TE BSHAD PAR BYA'O, ,BSHAD RGYUD RDO RJE 'PHRENG BA LAS, RDO RJE'I RTZA BAR DGA' BA, DBUS SU MCHOG DGA'; MGRIN PAR KHYAD PAR GYI DGA' BA, NOR BU'I RTZER LHAN SKYES KYI DGA' BA BSKYED PAR GSUNGS PA NI, RGYUD DER YAS BABS KYI LHAN SKYE SKYI MGO LTE BA NAS BRTZAMS TE, NOR BU'I RTZER NGO BO RDZOGS PAR GSUNGS PA'I LHAN SKYES LA DGA' BA BZHIR PHYE BAR MNGON NO, ,MAS BRTAN GYI BZHI YAS BABS KYI BZHI LAS BDE BA CHE DGOS PA YIN TE, MAN SNYE LAS MA 'PHOS PA'I BYANG CHUB KYI SEMS 'PHEL BZHIN PAS STENG DU NYE BAR 'GRO ZHES GSUNGS SO, ,MAS BRTAN LAS LANGS PA'I YAS BABS KYI BZHI NI, SNGA MA'I MAS BRTAN LAS BDE BA CHE ZHING, LHAN SKYES SU GZHAG DGOS PA NI, MAN SNYER MAS BRTAN LA BSHAD PA'I RIGS PAS SHES SO, ,MAS BRTAN LAS LANGS PA'I RJES SU PHRA MO BSGOMS STOBS KYIS SKYES PA'I DGA' BZHI NI,
, ,SNGA MA'I MAS BRTAN LAS BDE BA CHE BA DANG, BZHI KA LHAN SKYES YIN PA'I NGES PA MED DO, ,'DIR NI MAS BRTAN SGRUB TSUL DANG, BDE BA CHE CHUNG GI KHYAD PAR LHAN SKYES SU BZHAG PAS CHOG MI CHOG RNAMS KYI SGO TZAM ZHIG BSTAN PAS, RTOG BA SPYAD PAR TE PHRA MO NAS 'JUG LDOG BYA DGOS SO, ,'OG SGO'I PHRA MOS MTSON NAS LUS LA GNAD DU BSNUN BA'I PHYI NANG GI THABS LA BRTEN NAS, DH'U T'I'I NANG DU RLUNG ZHUGS GNAS THIM GSUM BYUNG BA'I MTHAR, SKYES PA'I MYONG BA THAMS CAD KYI SKABS SU DE BZHIN DU THAMS CAD KYI SHES PAR GYIS SHIG ,'DI NAS BZUNG STE RDOR BZLAS MTHAR PHYIN PA'I BAR DU DH'U T'I'I YAR SNA MAR SNA, RTZA 'KHOR SO SO'I DBUS, DH'U T'I'I NANG GANG RUNG DU, RLUNG DANG THIG LE DANG, 'BAR 'DZAG GI RNAL 'BYOR LA BRTEN NAS, DH'U T'I'I NANG DU RLUNG 'DU BA'I THABS GANG DU BYAS PA DER RLUNG 'DU BA NI, DH'U T'I'I NANG GI RLUNG 'DU SLA BA YIN PA DANG, DER 'DU BA'I THABS BYAS PA SNA TSOGS LA BRTEN NAS GONG DU 'DU BA'I THABS BYAS PA'I DH'U T'I'I NANG DU RLUNG 'DUS NAS ZHUGS GNAS THIM GSUM YOD PA YANG, DH'U T'I'I NANG DU 'DU BA'I THABS GANG BYAS PAR MA 'DUS PAR DH'U T'I'I NANG GZHAN DU 'DUS PA 'ONG BA NI, SNYING KHA'I 'KHOR LO'I DBUS DH'U T'I'I NANG DU RLUNG 'DU BA'I THABS LAN MANG DU BYAS KYANG, DER RLUNG 'DU MI THUB PAR DH'U T'I'I NANG GZHAN DU 'DUS NAS, ZHUGS GNAS THIM GSUM LAN MANG DU BYUNG BA'I MTHAR, SNYING KHA'I DH'U T'I'I NANG DU RLUNG 'DU BA CIG 'ONG BAR SHES SO, ,SNYING KHA'I RTZA MDUD
MA GROL GYI BAR DU, DH'U T'I'I NANG NAS GTUM MO KHYAD PAR CAN NI 'BAR YANG, BDE CHEN 'KHOR LO'I BAR DU DH'U T'I'I NANG KHO NA LA 'BAR BA'I NGES PA MED CING, BYANG CHUB KYI SEMS ZHU NAS 'BAB PA YANG, DANG PO DH'U T'I'I NANG NAS, GTUM MO KHYAD PAR CAN 'BAR NAS 'BAB KYANG, BAR SKABS SU RTZA GNAS SO SOR BYER NAS YANG, DH'U T'I'I NANG DU 'DU BA DANG, MI 'DU BA LA SOGS PA RIM PA DU MA 'ONG BA YANG SNGA MA'I RIGS PAS SHES SO, ,YAS BABS DANG, MAS BRTAN GYI LHAN SKYES KYIS STONG NYID NGES PA'I BDE STONG SBYAR TE, MNYAM GZHAG TU JI TZAM NUS PA'I BAR DU BSGOMS NAS, LDANG BAR RTZOM PA NA BDE STONG DBYER MED RLUNG GI BZHON PA DANG BCAS PA LAS LUGS LDOG GI NYER THOB 'GRUB PA'I DUS SU, CHU LAS NYA LDANG BA'I TSUL GYIS RDO RJE 'CHANG YAB YUM GYI SKUR THOL GYIS LDANG BAR BYA'O, ,'DI NAS BZUNG STE RIM PA GSUM PA'I SGYU LUS MA GRUB KYI BAR DU SAD DUS KYI STONG PA BZHI GNYID DUS KYI STONG PA BZHI, RMI LAM DUS KYI STONG PA BZHI, 'CHI DUS KYI STONG PA BZHI RNAMS KYI SKABS SU YANG, 'OD GSAL GYI STONG PA BZHI'I RLUNG SEMS TZAM LAS LUGS BZLOG GI NYER THOB 'GRUB PA'I DUS SU CHU LAS NYA BZHIN YID NGOR RDO RJE 'CHANG YAB YUM GYI SKUR LDANG PAR BYA'O, ,'DI LA YANG GNAS SGO NAS LDANG TSUL KHYAD PAR CAN CIG YOD PA DANG, 'DI RNAMS KYI GNAD ZHIB PAR 'OG TU BSHAD PAR BYA, MNYAM GZHAG TU BDE STONG BSGOMS PA'I MTHAR, BDE STONG RLUNG DANG BCAS PA LAS, SNGAR BZHIN RDO RJE 'CHANG GI SKUR LANGS NAS RJES THOB TU BSGOM TSUL NI, RGYUD RDO RJE PHRENG BA LAS, DBANG PO YUL LA
, ,SPYOD PA NI, ,GNAS DE BZHIN NI GDAMS NAS NI, ,STONG NYID GNYIS MED SGYU MA LA, ,SOGS PA KUN RDZOB LHAG CHAD BYA, ,SHES RAB YE SHES DBANG BSKUR SOGS, ,NYAMS SU MYONG BA'I BDE BA YI, ,BDE BA CHEN PO DRAN PA YIS, , DBANG PO RNAMS NI YUL LAS LDOG ,CES SO, ,'DIS NI STONG NYID 'OD GSAL DANG, GNYIS MED ZUNG 'JUG DANG, KUN RDZOB SGYU LUS DANG, SKABS DANG, SOGS KYIS 'DUS PA, DE RNAMS LA 'OG MA'I SKABS SU YANG, YUL RNAMS LHAG PAR DPYAD TSUL BTON PAS NGAG DBEN MAN CHAD DU'ANG, STONG PA BZHI DRANGS PA'I SKABS THAMS CAD DU GANG SHAR LA BDE STONG GI RGYAS 'DEBS TSUL 'DIR BSHAD PA BZHIN SHES PAR BYA'O, ,'DI LTAR DBANG GSUM PA DNGOS DBANG DU BYAS PA'I BDE BA DANG, SOGS KYIS 'DUS PA SNGAR BSHAD PA LTA BU'I BDE BA CHEN PO SNGAR MYONG BA DRAN NAS YUL LONGS SPYOD PA'I CHE DE RGYAS BTAB NAS, DE DANG MI MTHUN PA'I YID BYED BSDAMS TE, YUL SNANG KUN BDE BAR 'CHAR ZHING, DE'I RJES SU BDE BA 'BAR BA'I RKYEN GYIS DBANG PO'I SGO NAS 'JUG PA'I RLUNG RNAMS NANG DU LOG PA NA, DBANG SHES KYANG SDUD PAS, RLUNG THIM NAS SNGAR BZHIN BDE BA RNAMS SKYE'O, ,RIM PA GNYIS PA'I SKABS SU NI, GANG SHAR THAMS CAD BDE BA CHEN PO'I RNAM 'GYUR DU 'CHAR BA CIG DGOS SHING, DE YANG RDZOGS RIM PA'I BDE CHEN LHAN SKYES RNYED PHYIN CHAD NAS YIN PAS, 'DIR LUS DBEN GYI SGO NAS GANG SHAR THAMS CAD BDE CHEN GYI RNAM ROL DU LDANG BAR GSUNGS PA NI, GANG SNANG THAMS CAD BDE BAR
'CHAR BA'I CHED DU'O, ,DE LA NI THOG MAR DNGOS PO KUN GYI RANG BZHIN RNAM DAG GTAN LA PHAB PA'I SGO NAS, CHOS THAMS CAD STONG PA NYID KYI RNAM 'GYUR DU SHES PA DANG, DE NAS BDE STONG SBYOR TSUL GYI SGO NAS BDE BA CHEN PO'I RNAM 'GYUR DU BSGOM PA CIG DGOS SO, ,DE LA BSKYED RIM MTHAR PHYIN NAS, 'OG SGOR PHRA MO BSGOMS PAS DRANGS PA'I, LHAN SKYES KYI MNYAM GZHAG TU STONG NYID BSGOMS NAS LANGS PA'I RJES SU BDE STONG BSGOM PA DE, RIM PA NGES CAN YIN NA, 'JAM DPAL ZHAL LUNG LAS, LAM GYI SNOD RUNG DU SGRUB PA'I SHES RAB KYI DBANG GI DUS SU PHYAG RGYA SROG RTZOL DU SONG BA'I MTHUS LHAN SKYES MTSAN NYID PA NYAMS SU MYONG BA RDZOGS RIM DU BZHAG PA JI LTAR YIN ZHE NA, BSKYED RIM MTHAR MA PHYIN PA'I GANG ZAG GI KHYAD PAR 'GA' ZHIG LA, DBANG DANG, BSKYED RIM GYI DUS SU RLUNG DH'U T'IR ZHUGS GNAS THIM GSUM BYUNG BA'I DBANG GIS LHAN SKYES NYAMS SU MYONG BA CIG SRID KYANG, BSKYED RDZOGS KYI LAM NGO BO YONGS SU RDZOGS PA DANG, KHYAD PAR DU RIM PA LNGA GRUB CHEN GYIS JI LTAR BSHAD PA BZHIN, MTSAN NYID TSANG BA SKYE BA LA GONG DU BSHAD PA'I GO RIM DE MED NA MI 'BYUNG BA'I GO RIM YIN TE, LAM 'DI'I GDUL BYA'I GTZO BO, RIN PO CHE LTA BU'I GANG ZAG GIS KYANG RIM PA DE LTAR BSLAB DGOS NA, DE MAN CHAD KYI GDUL BYA RNAMS KYIS LTA SMOS KYANG CI DGOS ,DE YANG PHYAG NA RDO RJE DBANG BSKUR BA'I RGYUD LAS, 'JAM DPAL GANG DAG BYANG CHUB KYI SEMS BSGOM PA DANG, GANG GI TSE DE DAG GI BYANG CHUB KYI SEMS GRUB PAR GYUR PA DE'I TSE, BYANG CHUB SEMS
, ,DPA'I SPYOD PA GSANG SNGAGS KYI SGOR SPYOD PA'I BYANG CHUB SEMS DPA' DE DAG YE SHES CHEN POR DBANG BSKUR BA'I GZUNG SNGAGS KYI DKYIL 'KHOR DU GZHUG PAR BYA'O, ,ZHES GSUNGS PA DANG, BLA MA LNGA BCU PA LAS KYANG, BSAM PA DAG PA'I SLOB MA NI, ,DKON MCHOG GSUM LA SKYABS SONG LA, ,BLA MA'I RJES SU 'JUG PA 'DI, ,KHA TON BYA BAR SBYIN PAR BYA, ,DE NAS SNGAGS SOGS BYIN PA YIS, ,DAM CHOS SNOD DU BYAS NAS SU, ,ZHES GSUNGS PA DANG, SPYOD BSDUS LAS KYANG, DE'I RIM PA YANG 'DI YIN TE, THOG MA NYID DU NI SANGS RGYAS KYI THEG PA'I BSAM PA LA SLOB BO, ,GANG GI TSE SANGS RGYAS KYI THEG PA'I BSAM PA LA LOBS PAR GYUR PA DE'I TSE THEG PA GSAR PA LA DRAN BA GCIG PA'I TING NGE 'DZIN LA SLOB BO ZHES GSUNGS PA'I PHYIR RO, ,DE LTA MA YIN NA, RJE'I ZHAL SNGA NAS, TSE 'DIR LAM LA GTAN MA SBYANGS PA'I YUL RTEN KHYAD PAR CAN GNYIS SNYOMS PAR ZHUGS PA LA BRTEN NAS SKYES PA'I, DH'U T'I'I MAR SNA DANG, BUD MED KYI RDO RJE'I DBYINGS KYI DBANG PHYUG MA'I RTZA'I MAR SNA GNYIS PHRAD PA'I TSE RTZA GNYIS SAD NAS RO RKYANG GI RLUNG DH'U T'IR ZHUGS TE, BDE BA PHUL CHA NA YUL RTEN GNYIS KAS YUN RING DU NYAMS SU MYONG BA, GZHI'I DUS SU'ANG YOD PA SRID GSUNG BAS DE 'DRAS 'KHRUL GZHI BYAS NAS, LAM LA MA BSLABS PAR GROL BA CIG KHAS BLANG DGOS PAS HA CANG THAL LO, ,BSKYED RIM MTHAR MA PHYIN PA'I DA LTAR GYI GANG ZAG 'GA' ZHIG LA, SNGON GYI RGYU'I KHYAD PAR GYIS
RLUNG DH'U T'I'I NANG DU ZHUGS GNAS THIM GSUM BYAS PA CIG SRID KYANG BSKYED RIM MTHAR MA PHYIN PAR SNYING KHA'I RTZA 'KHOR GYI DBUS, DH'U T'I'I NANG DU MI SHIGS PA'I THIG LE LA RLUNG ZHUGS GNAS THIM GSUM 'ONG BA GTAN MI SRID DO, ,'DI RNAMS LA DPAGS NAS GZHI DANG LAM GYI RNAM GZHAG RJE'I ZHAL SNGA NAS DNGOS SU MA GSUNGS PA, DON GYIS THOB PA'I GAL CHE BA RNAMS KYANG SHES PAR GYIS SHIG ,DE LTAR BSGOMS PAS LUS DBEN MTHAR PHYIN NAS, NGAG RNAM PAR DBEN PA LA 'JUG PA NA, SNA RTZE GSUM DU THIG LE GSUM GYI SROG TZOL GSUM YUN RING DU BSGOMS PAS, SNYING KHA'I RTZA MDUD GROL TE, RDOR BZLAS MTHAR PHYIN PA NA, SEMS DBEN GYI NGO BO TZAM THOB KYANG, SEMS DBEN RDZOGS PAR THOB NAS RIM PA GSUM PA'I SGYU LUS 'GRUB PA LA NI, DA DUNG PHYI NANG GI LUS LA GNAD DU BSNUN PA'I THABS MANG DU BYA DGOS SO, ,DE YANG SNYING KHA'I RTZA MDUD KYI DBUS DH'U T'I'I NANG DU RLUNG 'DU BA'I THABS GSUNGS PA NI GTZO BO YIN TE, STONG PA BZHI 'CHI RIM DANG MTHUN PAR DRANGS PA'I 'OD GSAL LUGS ZLOG GI NYER THOB 'GRUB PA'I DUS SU, RIM PA GSUM PA'I SGYU MA'I SKU 'GRUB PA'I PHYIR RO, ,SNGAR GNAS GZHAN DU RLUNG 'DU PA'I THABS BYAS PA DANG ,DH'U T'I'I NANG DU RLUNG ZHUGS GNAS THIM GSUM BYUNG BA THAMS CAD SNYING KHA'I MI SHIGS PA LA, ZHUGS GNAS THIM GSUM 'CHI RIM DANG MTHUN PAR BYUNG BA'I YAN LAG YIN PAS, SNYING KHA'I RTZA MDUD GROL BA MI SHIGS PA'I THIG LE LA ZHUGS GNAS THIM GSUM BYED PA'I THABS
, ,LA 'BAD DO, ,DE LA NANG GI THABS NI, MI SHIGS PA LA RDOR BZLAS BYED PA DANG, SGRON GSAL LAS RLUNG 'DU BAR GSUNGS PA NI, SKABS 'DI NAS RIL 'DZIN RJES GZHIG GI BSAM GTAN GYIS LUS KYI STOD SMAD NAS RLUNG BYANG SEMS DANG BCAS PA MI SHIGS PA LA BSDUS NAS LUGS 'BYUNG GI STONG PA BZHI SNYING KHAR DRANGS NAS 'OD GSAL GYI STONG NYID YUN RING DU BSGOMS TE, 'OD GSAL BZHON PA'I RLUNG DANG BCAS PA LAS LUGS BZLOG GI NYER THOB 'GRUB PA'I DUS SU, RIM PA GSUM PA'I SGYU MA'I SKUR YID NGOR LDANG BA LAN MANG DU BYA'O, ,SKABS 'DI NAS KHAMS MA SNYOMS PA'I RKYEN MED NA, RLUNG 'DU BA'I THABS BYAS RES KYI STONG PA BZHI 'DREN PA DANG, YID NGOR LHA'I SKUR LDANG BA NGES CAN DU 'ONG, 'ON KYANG DA DUNG NANG GI THABS KYIS SNYING KHA'I DBUS SU, STONG PA BZHI DRANGS PA'I 'OD GSAL GYI CHOS NYID BSGOMS PA'I STOBS KYIS, NANG GI KHYAB BYED KYI RLUNG RAGS RIM GYIS SNYING KHAR BSDUS NAS, MI SHIGS PA LA THIM PA'I, STONG PA BZHI PAS CHOS NYID BSGOMS PA PHAL CHER 'KHOR MAR 'ONG BA'I MTSAMS NAS, SPYOD PA GSUM PO GANG RUNG BYAS PA DANG, NANG GI THABS RNAMS LA BRTEN NAS KHYAB BYED KYI RLUNG SNGAR SDUD MA THUB PA RNAMS KYANG RAGS RIM NAS BSDUS TE, MI SHIGS PA PA LA THIM PA'I STONG PA BZHI PA CHOS NYID BSGOM RES KYI RLUNG LHAG MA SDUD NUS PA NGES CAN DU 'ONG BA'I MTSAMS NAS, CHOS NYID KYI PHYAG RGYA'I BYED PA NUS PA MTHU CAN DU SONG BA YIN, GONG GI RIM PA DES KHYAB BYED KYI LHAG MA MA LUS BAR
BSDUS TE MI SHIGS PA LA THIM PAS RTAGS RIM PA NGES CAN DU SHAR NAS SPRIN MED PA'I STON GYI NAM MKHA' LA ZLA 'OD KYIS KHYAB BA LTA BU'I SNANG BA'I YE SHES SKYE, DES STONG NYID YUN RING DU BSGOMS PAS SNANG BA BZHON PA DANG BCAS PA THIM PA LAS NYI 'OD KYIS KHYAB PA LTA BU'I MCHED PA'I YE SHES SKYE, MCHED PA BZHON PA DANG BCAS PA LA THIM PA LAS, SROD KYI DUS KYI SMAG 'THUG PO LTA BU'I NYER THOB KYI YE SHES SKYE, DE BZHIN PA DANG BCAS PA LA THIM PA LAS, THO RANGS KYI NAM MKHA' SPRIN THAMS CAD STONG PA 'OD GSAL SKYE, DES STONG NYID YUN RING DU BSGOM PA'I BDE STONG BZHON PA'I SROG 'DZIN DANG BCAS PA LAS LUGS ZLOG GI NYER THOB 'GRUB BA'I DUS SU, RIM PA GSUM PA'I SGYU MA'I SKU 'GRUB PAR 'GYUR RO, ,RDOR BZLAS MTHAR PHYIN PA'I MTSAMS NAS LAS KYI PHYAG RGYA DANG SNYOMS PAR 'JUG PA'I DUS SU YAB YUM GYI GSANG BA'I SNA RTZE GNYIS SU, DH'U T'I DANG, RDO RJE DBYINGS KYI DBANG PHYUG MA'I RTZA GNYIS SOG SBUBS GCIG GI NANG DU GCIG BCUG PA BAR MTSAMS MED PA BZHIN DU BSGOMS, 'DI YE SHES KYI PHYAG RGYA DANG SNYOMS PAR 'JUG PA LA YANG SHES PAR BYA'O, ,DE LTAR BYAS PA'I RTZA GNYIS SAD NAS, DANG POR YAB YUM GYI RO RKYANG GI RLUNG DH'U T'IR ZHUGS NAS, YUM LA BDE BA CHEN PO SKYE, YAB KYI RLUNG DH'U T'IR ZHUGS PA'I STENG DU, YUM GYI DH'U T'I'I NANG NAS RLUNG DANG BYANG SEMS YAB KYI DH'U T'I'I NANG DU ZHUGS PAS RO RKYANG GI RLUNG DH'U T'IR ZHUGS PA LAS KYANG, LHAG PA'I BDE BA CHEN PO YAB LA SKYE, DE YANG SNYING KHA'I DH'U T'I'I NANG DU SKYE BA CIG DGOS SO, ,
, ,TSUL 'DI LAS RGYA LA BRTEN NAS DNGOS SU BYUNG NA, YE SHES KYI PHYAG RGYA LA SEMS BRTAN BRTAN BSGOMS PA'I STOBS KYIS BYED LAS JI LTA BA BZHIN DU MTSUNGS PA 'BYUNG, PHYAG RGYA SROG RTZOL DU 'GRO BA DANG BOGS 'DON DU 'GRO BA YANG TSUL 'DIS SHES SO, ,'DIS LUS DBEN NAS BZUNG STE SLOB PA'I ZUNG 'JUG THOB NAS, SPYOD PA BYED PA'I BAR GYI PHYAG RGYA DANG SNYOMS PAR 'JUG PA'I DUS THAMS CAD DU SHES PAR GYIS SHIG , ,,DA NI BSRE BA'I ZHAL GYI GDAMS PA 'GA' ZHIG BSHAD NA, SPYOD BSDUS LAS, RMI LAM LA BRTEN NAS MTSON BYED DPE'I SGYU LUS SKABS SU GSUNGS PA'I DBANG DU BYAS NA, RMI LAM GYI GDAMS PA RNAMS SGYU LUS KYI SKABS SU 'BREL BA'I GNYID KYI STONG PA RNAMS 'DZIN PA'I GDAMS PA YANG SKABS DER 'BREL LO, ,DON GYI DBANG DU BYAS NA, SAD DUS STONG PA BZHI MA MTHA' GCIG 'DREN NUS PA'I MTSAMS NAS, GNYID KYI STONG PA LA 'JUG CING, DE'I RJES SU, RMI LAM GYI GDAMS PA RNAMS BSGOMS PAS, LUS DBEN DANG, NGAG DBEN, SEMS DBEN GYI SKABS RNAMS SU YANG 'BYUNG NGO, ,'CHI BA DANG BAR DO DNGOS DANG 'BREL BA NI DE DAG GI SKABS YIN LA, DE GNYIS DANG MTHUN PAR BSKYED PA YANG, DE GNYIS DANG BSRE BA'I THA SNYAD BYED PAS DE NI SAD DUS DANG GNYID DUS CI RIGS SU 'BYUNG NGO, ,DE'ANG BSRE BA'I SKOR RNAMS, GANG NAS GSUNGS NA, BSHAD RGYUD DGONGS PA LUNG STON DANG, SPYOD BSDUS SOGS NAS GSUNGS, GANG ZAG GANG GI DBANG DU BYAS NAS GSUNGS NA, TSE 'DIR 'TSANG RGYA BA'I DBANG
DU BYAS NAS GSUNGS, DES MTSON NAS BAR DOR 'TSANG RGYA BA DANG, SKYE BA BRGYUD NAS 'TSANG RGYA BA GNYIS LA YANG SHES PAR BYA'O, ,BSRE BA DNGOS NI, SAD DUS SU, STONG PA BSRE NUS PA'I MTSAMS NAS, 'PHEN PAS BSRE PA SPYOD BSDUS LAS GSUNGS, SNYING KHA'I MI SHIGS PA'I THIG LE LA, RDOR BZLAS BYAS TE BSRE BA LUNG STON LAS GSUNGS SO, ,SNYING KHAR BSRE BA YANG DE'I RIGS PAS SHES SO, ,LAG TU LEN PA'I TSUL NI GNYID LA 'GRO BA'I DUS SU, RDO RJE 'CHANG YAB YUM GYI SKUR LDANG BA SMIG RGYU LA SOGS PA'I RTAGS BZHI RIM PA BZHIN DU SHAR BA'I RJES SU SNANG BA LA SOGS PA'I STONG PA BZHI SHAR BA NGO SHAS PAR BYA STE, THAMS CAD STONG PA 'OD GSAL GYI DUS SU 'OD GSAL GYI STONG PA YUN RING DU BSGOMS LA, DE'I BZHON PA RLUNG DANG BCAS PA LAS LUGS BZLOG GI NYER THOB 'GRUB PA'I DUS SU RANG NYID RDO RJE 'CHANG YAB YUM GYI SKUR LDANG BAR BYA'O, ,SNYAM PA'I 'PHEN PA BTANG NAS SNYING KHA'I MI SHIGS PA LA RDOR BZLAS BYED BZHIN PA'I NGANG NAS GNYID LOG NA 'PHEN PA DANG MTHUN PAR RIM PA DE DAG 'BYUNG PAR 'GYUR RO, ,DANG PO LAN 'GA' YAR MA BYUNG YANG MYUR DU NGES PAR 'ONG, RDOR BZLAS KYIS MTSON PA'I SNYING KHAR MI SHIGS PA LA RLUNG SDUD PA'I GZHAN THAMS CAD KYIS KYANG DE LTAR NUS SO, ,GOMS PA MTHU CAN DU SONG NAS KHAMS MA SNYOMS PA LA SOGS PA'I RKYEN BYUNG NA LAM GYI 'OD GSAL DANG BSRE NUS PA'I TSAD NI, ZHAG MANG RAB KYI BAR DU GNYID CHAG PA'AM, BCAG NAS GNYID SHIN TU GRO BA'I DUS SU 'PHEN PA DANG, RDOR BZLAS SOGS GONG LTAR BYAS TE, GNYID LOG NA RIM PA SNGA MA RNAMS JI LTA BA
, ,BZHIN 'ONG MI 'ONG LAN MANG RAB KYI BAR DU TSAD NAS NGES CAN DU 'ONG BAR SNANG NA SAD DUS KYI STONG PA BZHI DANG GNYID DUS KYI STONG PA BZHI BSGOMS PA'I STOBS KYIS 'CHI BA'I DUS KYIS CHU LA THIM PA NAS BZUNG STE, 'CHI BA'I 'OD GSAL GYI BAR DU JI LTA BA BZHIN DU NGES NAS 'CHI BA'I 'OD GSAL GYI NGO BOR SKYES NAS DES STONG NYID BSGOM PA NGES PAR 'ONG NGO, ,GNYID KYI 'OD GSAL RDO RJE 'CHANG GI SKUR YID NGOR LANGS PA'I RMI LAM GYI DUS SU 'PHEN PA DANG, RDOR BZLAS SOGS KYI MTHUS THABS SNGA MA BZHIN DU BYAS NA, YANG GNYID DU SONG NAS SMIG RGYU NAS GNYID KYI 'OD GSAL GYI BAR SNGA MA BZHIN DU 'CHAR LA, YANG RMI LAM DU 'GRO BAR RTZOM NA 'OD GSAL LAS, RDO RJE 'CHANG GI SKUR LANGS NA'ANG, SNGA MA BZHIN DU STONG PA BZHI 'DREN PA'I THABS BYA'O, ,DE MA NUS PA'I RMI LAM LAS LDANG DGOS PA BYUNG NA, RANG NYID SPRUL SKU RDO RJE 'CHANG YAB YUM GYI SKUR LDANG BAR BYA'O, ,BAR DO DANG BSRE NUS BA'I TSAD NI THABS SNGA MA RNAMS LA BRTEN NAS GNYID KYI 'OD GSAL LAS RDO RJE 'CHANG YAB YUM GYI SKUR LDANG NUS MI NUS BRTAG PA SNGA MA BZHIN BYAS PA'I TSE RDO RJE 'CHANG GI SKUR YID NGOR DES CAN DU LDANG NUS NA SAD DUS DANG GNYID DUS KYI STONG PA BZHI GOMS PA'I MTHUS 'CHI BA'I 'OD GSAL GYI RLUNG SEMS LAS LUGS BZLOG NYER THOB 'GRUB PA'I DUS SU BAR DO'I LUS YID NGOR RDO RJE 'CHANG YAB YUM GYI SKUR NGES PAR LDANG BAR NUS SO, ,'DIS NI 'CHI BA'I SNGON DU 'PHEN PA DANG ,RDOR BZLAS SOGS KYIS THABS BYAS PA'I
MTHUS 'CHI BA'I 'OD GSAL RDO RJE 'CHANG GI SKUR LANGS PA'I GNAD KYIS BAR DO'I LUS YID NGOR, RDO RJE 'CHANG DU LANGS PA'I SNYING KHAR SNGA MA BZHIN DU RDOR BZLAS SOGS KYI THABS BYAS PAS, SNGAR BZHIN STONG PA BZHI DRANGS PA'I MTHAR RDO RJE 'CHANG GI SKUR LDANG BA LAN MANG DU BYED PA NI, BAR DO'I DGE SBYOR GYI GTZO BO YIN NO, ,DE NAS 'PHO BA'I RNAL 'BYOR BYAS NAS, SKYE GNAS BSDAMS TE RIG PA 'DZIN PA'I RTEN KHYAD PAR CAN DU SKYE BAS RIG 'DZIN GYI GTZO BOR GYUR TE, SKYE BA GZHAN LEN PA RIM GYIS TSE DE LA PHYAG RGYA CHEN PO THOB PA NI, SKYE BA BRGYUD NAS 'TSANG RGYA BA'I GTZO BO YIN NO, ,RIM PA 'DI RNAMS DA LTAR GYI GANG ZAG GIS RLUNG STOBS KYIS STONG PA BZHI 'DREN NUS PA, RNAMS KYIS 'BAD NAS BSGRUB BO, ,RMI LAM GYI DUS SU SNYING KHAR RLUNG SDUD PA'I THABS BYAS NAS, STONG PA BZHI 'KHOR MAR DRANGS PA'I MTHAR 'OD GSAL LA RDO RJE 'CHANG GI SKUR LDANG BA 'KHOR MAR 'ONG BA NI, RMI LAM GYI DGE SBYOR GYI GNAD MTHAR THUG PA YIN CING, SAD DUS KYI STONG BA BZHI YANG MTHU CAN DU 'GRO LA SHIN TU SPROS MED KYI SPYOD PA'I DUS SU, ZA BA DANG 'CHAG PAR 'GRO BA MA GTOGS GNYID 'BA' ZHIG LOG PAR BSHAD PAS KYANG, 'DI RNAMS LA NGES PA CHEN PO RNYED PAR 'GYUR RO, ,GNYID KYI STONG PA BZHI 'DREN PA'I THABS SNGAR BSHAD PA 'DI RNAMS RMI LAM GYI DUS KYI STONG PA BZHI, 'CHI BA'I DUS KYI STONG PA BZHI DANG BAR DO'I DUS KYI STONG PA BZHI 'DREN PA'I SKABS RNAMS SU YANG KHA SPO BA LEGS PAR SHES PAR GYIS SHIG ,DA NI RMI LAM GYI LUS LHA SKUR
, ,LDANG LUGS KHYAD PAR CAN CIG 'DUG PA DE BLA MAS ZHIB TU BSTAN PAR BYA STE, DE NI RMI LAM GYI GDAMS NGAG GI'ANG SNYING PO YIN LA, KHYAD PAR DU RMI LAM LA BRTEN NAS BAR DO SGYU MA ZIN PA'I YANG THABS BLA NA MED PA YIN NO, ,RMI LAM GYI LUS SGYU MA'I SKUR LDANG BA LA, GNAS RGYU DUS 'BRAS BU'I KHYAD PAR DANG BZHI YOD PA'I DANG PO NI, SNYING KHA'I RTZA MDUD KYI DBUS DH'U T'I'I NANG GI THIG LE DKAR DMAR GA'U KHA SBYOR GYI TSUL DU YOD PA LAS LDANG BAR BYA'O, ,GNYIS PA NI DE'I NANG NA GZHI'I 'OD GSAL SROG GI RLUNG LDANG BA DANG, YID KYI SHES PA SHIN TU PHRA BA GNYIS NGO BO DBYER MED PA LAM GYI 'OD GSAL GYI NGO BOR BSKYED NAS LDANG BA'O, ,GSUM PA NI, STONG PA SNGA MA RNAMS RIM PA BZHIN DU THIM NAS THAMS CAD STONG PA 'OD GSAL GYI YE SHES KYI RJES LA LUGS 'BYUNG GI 'OD GSAL GYI RLUNG SEMS LAS LUGS LDOG GI NYER THOB 'GRUB PA'I DUS SU LDANG BA'O, ,BZHI PA NI, RIM PA GSUM PA'I SGYU LUS MA GRUB TSUN CHAD DU DANG PO'I MGON PO RDO RJE 'CHANG YAB YUM GYI SKUR YID NGOR LDANG BAR BYA'O, ,SAD DUS GNYID RMI LAM GYI STONG PA BZHI DRANGS NAS SGYU LUS MAN CHAD THAMS CAD DU LDANG LUGS KHYAD PAR BZHI DANG LDAN PA 'DI DGOS TE, GZHI LA 'CHI BA'I STONG PA BZHI'I MTHAR BAR DO 'GRUB PA DANG SEMS DBEN GYI THAMS CAD STONG PA'I 'OD GSAL LAS RIM PA GSUM PA'I SGYU LUS 'GRUB PA DANG DON GYI 'OD GSAL LAS RIM PA LNGA BA'I SGYU LUS 'GRUB PA RNAMS LA YID NGOR MA GTOGS KHYAD PAR BZHI LDAN DGOS PA YIN NO, ,'ON KYANG
GZHI LA 'CHI BA'I 'OD GSAL LAM GYI 'OD GSAL GYI NGO BOR SKYES PA YANG MED DO, ,DE DAG NI GTZO BOR RLUNG STOBS KYIS STONG PA BZHI 'DREN NUS PA YAN CHAD KYI DBANG DU BYAS NAS BSHAD PA YIN NO, ,ZHAR LA DA LTAR GYI GANG ZAG RMI LAM 'DUN PAS 'DZIN PA RNAMS KYI BYA BA'I RIM PA NI, SPYIR LAM THUN MONG BA DANG, THUN MONG MA YIN PA'I RNAM GZHAG KHYAD PAR DU BLA MED KYI DBANG DANG BSKYED RDZOGS KYI GO YUL DANG, RIM PA LNGA'I GO RIM SOGS 'DI NAS BSHAD PA'I BSRE BA'I GO YUL LAG TU LEN PA'I RIM PA RNAMS LUS DBEN NAS BZUNG STE MI SLOB PA'I ZUNG 'JUG MA THOB KYI BAR DU GZHI SO SO LA KHA SPO TSUL RNAMS LEGS PAR DMIGS PHYED PAR BYA STE SHAR SGOM YAN CHAD KYIS THUN BZHIR 'BAD PAS BSKYANG BAR BYA'O, ,RMI LAM 'DUN PAS NGES CAN DU ZIN PA'I RIGS YIN NA, SAD DUS SU RLUNG STOBS KYIS STONG PA BZHI 'DREN NUS PAS KYANG RMI LAM ZIN MA THAG GONG DU BSHAD PA'I 'PHEN PA RNAMS BTANG NAS RDOR BZLAS SOGS KYI SNYING KHA'I MI SHIGS PA'I THIG LE LA GNAD DU BSNUN BA'I THABS LAN MANG DU BYAS NA, DANG PO'I DUS SU RLUNGS ZHUGS GNAS THIM GSUM BYUNG BA'I STONG PA BZHI 'DREN MA NUS KYANG, MYUR DU STONG PA BZHI 'DREN NUS PA CIG 'ONG BA YIN NO, ,RMI LAM GYI DUS SU RLUNG RAGS PA 'GA' ZHIG 'DUS YOD PA'I STOBS KYIS RNGOR BZLAS KYI RLUNG SDUD PA YANG SAD DUS LAS CHES SLA BA'I PHYIR RO, ,DE LTAR RMI LAM GYI DUS SU RDOR BZLAS SOGS KYI THABS LA BRTEN NAS DH'U T'IR ZHUGS GNAS THIM GSUM BYUNG BAS DRANGS PA'I STONG PA BZHI LAN
, ,'GA' YAR NYAMS SU MYONG NA SAD DUS SU YANG, RDOR BZLAS SOGS KYI THABS LA BRTEN NAS DH'U T'IR ZHUGS GNAS THIM PA'I STONG PA BZHI MYUR DU 'DREN NUS SO, ,'DI NI DA LTAR GYI GANG ZAG BRTZON 'GRUS DANG LDAN PA RNAMS KYIS 'BAD NAS NYAMS SU BLANG NA DAL BA DON DANG LDAN PA BYAR YOD DO, ,DE LTAR MI NUS PA'I DA LTAR GYI GANG ZAG RNAMS KYIS RDZOGS RIM LAM RNAM DAG DMIGS PHYED PA'I STENG DU GONG DU BSHAD PA'I SKOR RNAMS ZHIB TU NGES PAR BYAS NAS, THOG MAR LAM 'DI RNAMS RGYUD LA SKYE BA'I PHYIR DU BLA MA DANG YI DAM DBYER MED DU BYAS NAS, GSOL BA GDAB SGO GSUM GYI DGE BA GANG BYED THAMS CAD LAM 'DI RNAMS RGYUD LA SKYE BA'I PHYIR LAM GYI NGO BO DANG YAN LAG BSRE BA'I SKOR RNAMS SHAR SGOM GYIS THUN BZHIR 'BAD NAS NYAMS LEN RDOR BZLAS SOGS LA 'BAD, DE LTAR BYAS NA SGRUB PA PO GSANG SNGAGS RGYA CHE BA 'GA' ZHIG GIS 'CHI BA 'OD GSAL DANG BAR DO SGYU LUS DANG BSRE NUS PA PHAL CHER 'ONG BAS, TSUL DER 'BAD PAR BYA'O, ,DA NI DA LTAR GYI GANG ZAG RNAMS KYIS LAM THUN MONG DANG KHYAD PAR DU SNGAGS BLA MED KYI LAM GYI GO YUL DANG, NYAMS SNANG GI RId KYI NUS PA 'JOG PA'I TSUL MDO TZAM BRJOD PAR BYA'O, ,DE LA MDO SNGAGS KYI LAM GYI THUN MONG BA DANG, THUN MONG MA YIN PA'I GO RIM, GRANGS NGES, BYED LAS, SA MTSAMS SO SO'I MYONG BA 'DON TSUL, PHUN SUM TSOGS PA'I YAN LAG TU MED MI RUNG GI YAN LAG GNYIS LAS, BLOS LCOGS NA PHUN SUM TSOGS PA'I YAN LAG
RNAMS MTHA' DAG PAR KHONG DU CHUD PAR BYA, MA LCOGS NA, MED MI RUNG GI YAN LAG THUN MONG BA BDAG SOGS NAM MKHA' DANG MNYAM PA'I SEMS CAN THAMS CAD 'KHOR BA THOG MA MED PA NAS 'KHOR BA SDUG BSNGAL GYI RGYA MTSO CHEN POR YUN RING DU 'KHYAMS PAS YID SKYO BA DANG, DA DUNG GTING NAS MA THON PAS SHIN TU 'JIGS PAS NGES 'BYUNG GI BLO BSKYED PA DANG, MGON PO KLU SGRUB YAB SRAS KYI RIGS PA'I LAM NAS DRANGS PA'I GANG ZAG DANG CHOS LA BDAG MED PA'I LTA BA PHU THAG CHOD PA BCOL NAS, MNYAM GZHAG NAM MKHA' LTA BU'I STONG NYID DANG, KUN RDZOB SGYU MA LTA BU'I STONG NYID SBYOR BA DANG, RANG GZHAN SDUG BSNGAL DANG BRAL BA DANG BDE BA DANG LDAN PA'I PHYIR DU SMON SEMS CHOGS GZUNG NAS BSLAB BYA RNAMS LA SLOB CING BYANG CHUB SEMS DPA'I SPYOD PA LA SLOB 'DOD SBYONG RAGS PA NYAMS 'OG TU TSUD PA DANG, 'JUG SDOM GZUNG NAS LAS DANG PO PA'I SPYOD PA RNAMS LA SLOB, THUN MONG MIN PA SNGAGS BLA MED KYI RGYUD SDE KHUNGS THUB NAS BSHAD PA'I DBANG BZHI RNAM PAR DAG PA CIG GIS RANG GI RGYUD BSKYED RDZOGS GNYIS KYI SNOD RUNG DU BSGRUB, DE'I DUS SU KHAS BLANGS PA'I RTZA BA'I LTUNG BA RNAMS SROG BSDOS BYAS NAS BSRUNG ZHING YAN LAG GI LTUNG BAS MA GOS PA LA 'BAD, GAL TE LTUNG BA BYUNG NA PHYIR BCOS KYI CHOGS DAG PAR BYAS LA, PHYIN CHAD SDOM, DPAL GSANG BA 'DUS PA DANG, DPAL 'KHOR LO BDE MCHOG GNYIS LA SOGS PAS, BLA MED KYI BSKYED RDZOGS GZHI LAM GYI RNAM GZHAG
, ,MA LUS PAR GSAL BA RJE RIN PO CHES MDZED PA'I BSKYED RDZOGS KYI GO YUL DMIGS PHYED PA BTZAL LA, LAM DE RNAMS KYI MYONG BA RGYUD LA SKYE BA'I 'DUN PA SHUGS DRAG LA RGYUN RING BA LAN MANG DU SBYANG, KHYAD PAR GDAMS NGAG GI LUS YONGS SU RDZOGS PAR STON PA'I BLA MA DE LA RANG DANG CHOS KYIS 'BREL BA'I BLA MA THAMS CAD DANG, GZHAN YANG BRGYUD PA'I BLA MA, SANGS RGYAS BYANG SEMS, YI DAM CHOS SKYONG MA LUS PA SPYAN DRANGS LA BSTIM, RANG GI LHAG PA'I LHA GANG YIN DANG, NGO BO DBYER MED DU BYAS TE, DE RNAMS RNAM PA LHAG PA'I LTAR SNANG YANG, NGO BO BLA MA YIN PAR MOS NAS, LAM THUN MONG DANG THUN MONG MIN PA'I GO YUL DANG, MYONG BA RNAMS DA NAS BZUNG STE, SANGS RGYAS MA THOB KYI BAR DU RGYUN CHAD MED PAR SKYE BA'I GSOL BA 'DEBS, 'DUN PA DRAG POS THUN GYI THOG MTHAR LAN NYER GCIG RE BYA, BLA MA DANG YI DAM CHOS SKYONG RNAMS LA BLO LINGS SKYUR BYAS PA'I RE LTOS CHEN PO BYAS PA'I MOS GUS CHEN PO SPYOD LAM THAMS CAD DU BYA, LAM GYI KHYAD PAR GONG MA RGYUD LA SKYE BA LA, BRTZON 'GRUS KHYAD PAR CAN DGOS PAS, GONG DU BSHAD PA'I GO YUL DANG, MYONG BA RNAMS BSKYED PA'I GUS SBYOR DANG, RTAG SBYOR GYI BRTZON 'GRUS PHUN SUM TSOGS PA SKYE BA'I GSOL BA DRAG TU GDAB CING, 'DUN PA MANG DU SBYANG, TSE GCIG LA RDO RJE 'CHANG GI GO 'PHANG MYUR DU THOB PA'I GROGS KYI GTZO BO PHYAG RGYA MTSAN NYID THAMS CAD YONGS SU RDZOGS PA DANG, DBANG PO GNYIS MNYAM PAR SBYOR BA DANG, LUS LA GNAD DU BSNUN PA'I THABS GNYIS LA BRTEN
NAS RLUNG DH'U T'IR ZHUGS GNAS THIM GSUM 'BYUNG BA'I LHAN SKYES KYI STONG NYID SGOM PA DANG, SNGAR BSHAD PA LTAR KHYAD PAR BZHI LDAN GYIS LANGS PA'I SGYU MA'I SKU DANG, BDE STONG DBYER MED GNYIS KYI GTAM THOS PA TZAM GYIS LUS KYI BA SPU LDANG MIG NAS MCHI MA 'BYUNG, NANG DU DGA' BA YANG DANG YANG DU SKYE ZHING DES LUS KYANG BDE BA GCIG GI BAR DU SBYANG, RANG RGYUN DU GSOL BA 'DEBS PA'I BLA MA YI DAM CHOS SKYONG RNAMS KYIS THOG DRANGS PA'I SANGS RGYAS BYANG SEMS LHAN SKYES, ZHING SKYES SNGAGS SKYES KYI PHYAG RGYA RNAMS SPRIN GYI PHUNG PO BZHIN DU 'DUS NAS GONG DU BSHAD PA'I GO BA DANG, MYONG BA RNAMS RGYUD LA MYUR DU SKYE BA'I BAR DU RGYUD BYIN GYIS RLOB, PHYAG RGYA GSUM GYIS, BDE BA CHEN PO RGYUN CHAD MED PAR RGYUD LA SKYE BA'I, GROGS RMI LAM, NYAMS SNANG, MNGON SUM THAMS CAD DU MDZAD PA'I GSOL BA DRAG TU GDAB CING 'DUN PA MANG DU SBYANG, BLA MED KYI LAM GYI GTZO BO BDE STONG DBYER MED SGYU MA'I SKU GNYIS YIN PA 'DI DPAL DUS KYI 'KHOR LO MA GTOGS, BLA MED KYI RGYUD SDE THAMS CAD KYI SNYING PO YIN PAS, 'DI GNYIS LA NAN TAN BSKYED, BDE STONG SBYOR BA DUS 'KHOR GYI'ANG GTZO BO CIG YIN NO, ,DPAL DUS KYI 'KHOR LO SGRUB PA'I THABS RDZOGS PA'I RIM PA, SBYOR BA YAN LAG DRUG LA RIM PA GSUM PA'I SGYU LUS KYI DOD THUB, TSE GCIG LA MCHOG GI DNGOS GRUB 'GRUB PA'I THABS KHYAD PAR CAN CIG YOD PA 'DI SHES NAS 'DUN PA SBYONG BA GAL CHE, DE YANG SOR BSAM GNYIS NAS CHA MTHUN PA 'ONG YANG, KHYAD PAR CAN MI 'ONG, SROG 'DZIN
, ,GNYIS KYI MTHAR RJES DRAN GYI SKABS SU YONG BAS TSUL DE SHES DGOS, DE MAN CHAD DU BSGRUB TSUL KHYAD PAR CAN CIG YOD PA BYAS NA BRTAN PA 'ONG, DE'I TSUL CUNG ZAD BSHAD NA, RGYUD 'GREL GNYIS NAS, KHYIM PA NYIN RE BZHIN 'KHRIG PA BRTEN PA DANG, RAB BYUNG RMI LAM DU BYANG SEMS DBANG PO'I SGO NAS PHYIR 'PHOS NA, BAB PA'I DGOS PA MI 'GRUB PAS MI 'PHO BA'I THABS LA RANG STOBS KYIS MI 'PHO BA CIG DANG, GZHAN STOBS KYIS MI 'PHO BA GNYIS YOD PA LAS, RLUNG DANG PHYAG RGYA MA GNYIS KYIS MI 'PHO BA NI 'DIR GTZO BO MA YIN ZHING, RANG STOBS KYIS, MI 'PHO BA CIG DGOS PA DE NI, STONG GZUGS PHYAG RGYA CHEN PO KHO NAS NUS KYI, GZHAN GYIS MI NUS PA'I PHYIR RO, ,DE LA STONG PA NYID KYI GZUGS RANG GI SEMS MA BRTAGS PAR DPAL DUS KYI 'KHOR LO YAB YUM DU SNANG BA CIG DGOS, DE YANG SROG 'DZIN MAN CHAD DU BSGRUB TSUL KHYAD PAR CAN GYIS SGRUB NA MA GTOGS NAM 'DOD DU MI 'ONG BA RJES DRAN DU 'ONG BAS, RANG GI SEMS MA BRTAGS PAR DUS KYI 'KHOR LO YAB YUM DU SNANG BA'I STONG GZUGS, YAB YUM GNYIS SNYOMS PAR ZHUGS PA'I BYANG CHUB KYI SEMS RIM GYIS BAB NAS, NOR BU'I RTZER BRTAN PAR BYAS, PHYIN CHAD MI 'GYUR BA'I BDE BA SKAD CIG MA NYI KHRI CHIG STONG DRUG BRGYA RIM BZHIN DU SKYE LA, MI 'GYUR BA'I BDE BA SKYES RES KYI BDE BA DES STONG NYID NGES PA'I BDE STONG DBYER MED YUN RING DU BSGOM DGOS SHING, DE LA STONG GZUGS PHYAG RGYA CHEN
PO LA BRTEN NAS, BYANG SEMS NOR BU NAS GTZUG TOR GYI BAR DU LUS THAMS CAD BYANG CHUB KYI SEMS KYIS GANG BA NA, GSER 'GYUR RTZIS LCAGS LA SOGS PA'I KHAMS RNAMS ZOS PA NA GSER 'GYUR GYI RTZI YANG MED LA, LCAGS LA SOGS PA'I KHAMS KYANG MED PAR, GSER GYI KHAMS SU 'GYUR BA BZHIN DU BYANG CHUB KYI SEMS KYIS THA MAL GYI PHUNG KHAMS SKYE MCHED RNAMS ZOS PA NA, BYANG SEMS KYANG MED LA, PHUNG KHAMS SKYE MCHED KYANG MED PAR SGRIB PA THAMS CAD ZAD PA'I YE SHES KYI KHAMS SU 'GYUR RO, ,DE'I PHYIR SBYOR BA YAN LAG DRUG GI SGO NAS MCHOG BSGRUB PAR 'DOD PAS, BYANG SEMS MI NYAMS PA LA, RNAM PA THAMS CAD DU 'BAD, BLA MED KYI RDZOGS RIM GZHAN GYI SGO NAS MCHOG BSGRUB PA'I SGRUB PA PO RGYUD TSOD MNYAM PA RNAMS KYANG, BYANG SEMS RNAMS MA NYAMS KYI CHA NAS, BDE STONG GI TING NGE 'DZIN SKYA DKA' LA, SKYES PA LA YANG, STOBS CHE CHUNG, MCHOG 'GRUB PA MYUR BUL GYI KHYAD PAR SHIN TU CHE BAS BYANG SEMS MA NYAMS PA LA 'BAD, LAN 'GA' YAR NYAMS KYANG SGYU LUS BSGRUB TSUL GYI GNAD KYIS CHE DE LA MCHOG GTAN MI 'GRUB PA MIN NO, ,TSUL 'DI RNAMS JI LTA BA BZHIN DU KHONG DU CHUD PAR BYAS NAS, GSANG SNGAGS BLA MED KYI RIGS KYI NUS PA CHES CHER RGYAS PAR BYA'O, ,LHA DANG BCAS PA'I 'JIG RTEN THAMS CAD KYI SKYABS GNAS BDE BAR GSHEGS PA'I RING LUGS PA CHEN PO RJE BTZUN DAM PA BLO BZANG GRAGS PA'I DPAL ZHES SA GSUM NA GRAGS PA
, ,DE'I ZHAL GYI GDAMS PA 'GA' ZHIG GSAL SGRON DANG, KHRID YIG GNYIS DANG SBYAR TE, SPONG BA PA SA DHU BHA DRAS, GDAN SA CHEN PO DGE LDAN PHYOGS THAMS CAD LAS RNAM PAR RGYAL BA'I GLING DU BRIS BA, DGE LEGS 'PHEL BOR GYUR CIG ,'DIS KYANG BSTAN PA DANG SEMS CAN LA PHAN PA RGYA CHEN PO 'BYUNG BAR GYUR CIG , ,,MAm GA LA SHU BHAm,,