*, ,BZHI BRGYA LNGA BCU PA'I SKOR GYI ZIN BRIS GNANG BA BZHUGS SO, ,
, ,DKYIL CHOG BZHI BRGYA LNGA BCU PA'I 'GREL PAR, KUN SANGS RGYAS BDAG BLO MCHOG GIS ZHES PA 'DIS NI RANG BZHIN STON TE, DE'ANG DE KHO NA NYID DU NA BDAG NYID KYI DNGOS PO SHIN TU RNAM PAR DAG PA'I SA DANG, PHA ROL TU PHYIN PA'I RANG BZHIN CAN DU BSGOMS PA DE'I STOBS KYIS SANGS RGYAS THAMS CAD KYI PHA ROL TU PHYIN PA LA SOGS PAS BDAG NYID KYI PHA ROL TU PHYIN PA LA SOGS PA SEMS KYI SKAD CIG MA THAMS CAD LA YONGS SU RDZOGS PAR BYED PA DANG, BDAG DANG GZHAN LA MCHOD PAS KYANG SANGS RGYAS THAMS CAD LA MCHOD PAR 'GYUR BA DANG, DNGOS PO DMAN PA RNAMS KYIS KYANG PHUL DU BYUNG BA'I MCHAD PA BYAD PAS BYANG CHUB RNYED PAR SLA BA YIN PAS, 'DI NI BYANG CHUB KYI LAM GYI RANG BZHIN DU GYUR PA YIN NO, ,DE BAS ZHES BYA BA 'DIS NI SHIN TU MYUR BA KHO NAR BYANG CHUB THOB PAR BYED PA'I KHYAD PAR BSTAN PA YIN TE, RNAL 'BYOR DAG NI 'DI NYID KYIS, ,MYUR DU SANGS RGYAS NYID 'THOB 'GYUR, ,ZHES JI SKAD BSHAD PA LTA BU'O, ,AOm ZHES BYA BA NI GLENG BSLANG PA'O, ,CHOS THAMS CAD KYI RANG BZHIN DANG RGYU DANG 'BRAS BU BRAL BA NI, SH'U N+YA T'A STE STONG PA NYID DE, ,DE'I YE SHES NI DZNY'A NA STE, STONG PA NYID DANG MTSAN MA MED PAR DANG SMON PA MED PAR RO GCIG PA'I SEMS ZHES BYA BA'I DON TO, ,DE NYID NI BADZRA STE MI MTHUN PA'I PHYOGS
, ,RNAMS KYIS ME SHIGS PA'I PHYIR DANG, DE 'JOMS PA'I PHYIR RDO RJE ZHES BYA'O, ,DE'ANG RNAM PAR DAG PA'I MTHAR THUG BAR PHYIN PA YIN PA'I PHYIR, DE NYID DANG POR SVA BH'A BA STE RANG LA YOD CING GNAS PA'O, ,DE'ANG DE BZHIN NYID KYI SKUS RANG BZHIN GYI RNAM PAR DAG PA'I SEMS NI GLO BUR BA'I SGRIB PA DANG BRAL BA'I RANG BZHIN DU GNAS PA ZHES BYA BA'I DON TO, ,DE BZHIN NYID KYI PHYIR RANG BZHIN GYIS RNAM PAR DAG PA NYID YIN PAS BDEN PA'I BDAG NYID CAN GYI RANG GI NGO BO NI A'ATMA KO STE, DE LTA BU GANG YIN PA DE NI BDAG YIN PAS AA Hm STE, DE NI STONG PA NYID KYI YE SHES KYI RDO RJE'I RANG BZHIN GYI BDAG NYID CAN NI BDAG GO ,DE'I PHYIR BYANG CHUB KYI SEMS 'DI STONG PA NYID KYI YE SHES KYI SGRAS RANG GI MTSAN NYID LA LHAG PAR MOS PA YIN LA RDO RJE'I SGRAS NI RANG GI MTHAR THUG PA'I RNAM PAR DAG PA'O, ,RANG BZHIN GYI SGRAS NI MTHAR THUG PA'I RNAM PAR DAG PA'I DUS SU'ANG LHAG MA MED PAR RO, ,BDAG NYID CAN DANG BDAG GI SGRA GNYIS KYIS NI DE BDAG NYID LA RANG BZHIN GYIS GRUB PA NYID YIN PA NYID DU LHAG PAR MOS PA STE, JI LTAR CHOS KYI DBYINGS THOG MA DANG THA MA MED PA YIN PA LTAR, BYANG CHUB KYI SEMS KYANG DE DANG 'DRA STE, DE KHO NA NYID LA DMIGS PA NYID KYIS DE GTZO CHER DE BZHIN NYID KYI RANG BZHIN CAN YIN PA'I PHYIR RO, ,BYIN GYIS BRLABS PA'I SNGAGS
GZHAN DAG LA'ANG BADZRA SVA BH'A WA A'A TMA KO NYA Hm ZHES BYA BA'I SGRA'I DON YANG, 'DI BZHIN DU SHES PAR BYA'O, ,THAR PA MED NA NI SRID PA KHO NAR 'GYUR LA, DE'ANG SDUG BSNGAL GYI RANG BZHIN CAN YIN NA BDE BA CHEN PO DE DAG LA YOD CES RTOG NA, DE'I PHYIR THA MAL ZHES BYA BA LA SOGS PA SMOS TE, THA MAL NI DMAN PA'O, ,RNAM RTOG NI, BTAGS PA STE, KHAMS GSUM PA'I SEMS DANG SEMS LAS BYUNG BA RNAMS SO, ,DE'ANG, YANG DAG MA YIN KUN RTOG NI, ,SEMS DANG SEMS BYUNG KHAMS GSUM PA, ,ZHES SMOS PA'I PHYIR RO, ,KUN TU RTOG PA DE'I 'JUG PA NYID SRID PA'I SDUG BSNGAL YIN GYI, DE LAS GZHAN PA NI MED DE, KHAMS GSUM LAS LOGS SHIG NA SRID PA MED PA'I PHYIR RO, ,'DI ZHES BYA BA NI SRID PA'I SDUG BSNGAL KYI'O, ,DE LTAR ZHES BYA BA NI JI SKAD DU BSHAD PA'I DKYIL 'KHOR GYI RNAM PA CAN GYI YID KYIS MNGON SUM DU 'GAG PAR BYED PA'O, ,CI'I PHYIR ZHE NA, SHES RAB CES BYA BA LA SOGS PA SMOS TE, DNGOS PO THAMS CAD KYI DUS GSUM GYI DUS DANG CHOS GANG MTHA' YAS PA'I RNAM PA CAN PHYOGS BCU NA KHYAB PA GANG YIN PA DE NI DE'I BDAG NYID CAN GYIS BSDUS PAS CHAGS PA MED CING DMIGS SU MED LA GZUNG BA DANG 'DZIN PA'I RTOG PA DANG BRAL BA'I 'KHOR LO GANG YIN PA DE NI SANGS RGYAS KYI CHOS THAMS CAD SHIN TU RNAM PAR DAG PA'I RANG BZHIN CAN RTEN DANG BRTEN PA PO'I DKYIL 'KHOR DER SO SOR SNANG STE, YID DE'I RNAM PAR SNANG BA NA RTAG PA DE SNANG BAR MI 'GYUR LA, DE'I PHYIR 'GAL BA GRUB PA'I SNANG BA DANG MUN PA DANG 'DRA BA YIN NA, ,'GAL BA GRUB PAS NA
, ,YID DE SHIN TU BSLABS PA LAS SRID PA'I SDUG BSNGAL DE LDOG PAR 'GYUR RO, ,'DI GNYIS NI LAN 'GA' ZHIG 'GAL BAR 'GYUR BA YIN PAS DE'I PHYIR NGES PAR LDOG PAR 'GYUR BA MA YIN PA'AM, GAL TE RTAG TU MI MTHUN PA YIN NA RNAM GRANGS GNYIS KAR YANG GNOD PA DANG GNOD BAR BYA BA'I RANG BZHIN DU 'GYUR TE, BUM PA DANG SNAM BU'I RTOG PA DANG 'DRA'O ZHE NA DE'I PHYIR GANG GIS ZHES BYA BA LA SOGS PA SMOS TE, GANG DAG LAN 'GA' ZHIG MI MTHUN PAR 'GYUR BA DE NI RTAG TU'ANG MI MTHUN TE, MUN PA DANG SNANG BA DANG 'DRA'O, ,DE BAS NA JI SKAD BSHAD PA'I YID DE SHIN TU BSLABS PA'I MTSAN NYID CAN GYI RANG GI RGYUD LA GOMS PAR BYAS PA THOB NA RTOG PA SHIN TU LDOG PAR BYED DE, GTZANG SBRA CAN THOD PA CAN DU GYUR PA'I GTZANG SME DANG 'DRA BAR GTZANG SME MED PAR 'GYUR PA'AM, GSER GYI DRI MA YANG DANG YANG DU BSREGS PAS SBYANGS PA DANG 'DRA'O, ,CI STE KUN GZHI RNAM PAR SHES PA NYE BAR MA DMIGS SU ZIN KYANG GZHIR GYUR PA YIN PA'I PHYIR SNANG BA YIN NO; ;GZHAN DU NA GNYID STUG PO LA SOGS PA'I TSE NA'ANG DE LDOG PAR THAL BAR 'GYUR RO, ,KUN GZHI RNAM PAR SHES PA NYID NI KHAMS GSUM PA'I BDAG NYID CAN YIN LA, DE DANG 'BREL BA NI NYON MONGS PA CAN GYI YID DANG, 'JUG PA'I RNAM PAR SHES PA YIN NO, ,DES NA DUS GCIG TU'ANG 'GAG PAR MI 'GYUR LA DE GRUB TU ZIN KYANG SHIN TU BSLABS PA LAS SRID PA 'GAG PAR MI 'GYUR TE, NAM MKHA' MTHA' YAS SKYE MCHED BSGOMS PAS KYANG SRID PA LDOG PAR THAL BAR 'GYUR BA'I PHYIR RO
ZHE NA DE NI BDEN MOD KYI 'ON KYANG 'DI NI GZHAN DU BSHAD PA YIN TE, GANG GI PHYIR 'DIR THA MAL PA'I KUN TU RTOG PA ZHES BYA BA NI BDAG DANG BDAG GI DANG GZUNG BA DANG 'DZIN PA'I RNAM PA CAN GYI YID KYIS BRJOD PA LA BYA BAR BSHAD NA, SRID PA'I BDAG NYID CAN GYI SDUG BSNGAL ZHES BYA BAR NYE BAR GDAGS PAS SRID PA'I BDAG NYID CAN GYI SDUG BSNGAL GYI RGYU'I GTZO BO YIN NA ZHES BYA BA'I THA TSIG GO ,'DI ZHES BYA BA NI THA MAL PA'I RTOG PA'I BDAG NYID CAN GYI SDUG BSNGAL GYI RGYU'O, ,RTOG PA DE SNANG BAR MI 'GYUR LA ZHES BYA BA NI DKYIL 'KHOR GYI RNAM PA CAN GYI SEMS NI MI BDEN PA'I RNAM PAR RTOG PA THAMS CAD BSAL BA LA 'JUG PA YIN PA'I PHYIR RO, ,DE'ANG LHAN CIG MI SNANG BA TZAM GYIS NI MA YIN NO, ,DE BAS NA 'DI GNYIS NI LAN CIG MI MTHUN PAR GRUB NA RTAG TU MI MTHUN PAR 'GRUB PA YIN PAS 'DI'ANG RIGS PA YIN NO, ,RTAG TU DE DANG MI MTHUN PA LA DMIGS PA'I RNAM PA CAN RAN YIN PA'I PHYIR GOMS PA MNGON DU GYUR PA NA SHAN TU LDOG PA NYID YIN PA'I PHYIR RO, ,DE'ANG 'TSE BA MED DANG YANG DAG DON, , NGO BO NYID LA PHYIN LOG GI ,'BAD DU ZIN KYANG GNOD MED DE, ,BLO NI DE PHYOGS 'DZIN PHYIR RO, ,ZHES BYA BA'I TSIGS SU BCAD PAS SO, ,GNYEN PO DANG MI MTHUN PA LDOG PA DANG 'JUG PA YOD PA MA YIN NO, ,NAM MKHA' MTHA' YAS SKYE MCHED LA SOGS PA NI BDAG MED PA'I RNAM PAR 'JUG PA MA YIN TE, DE BDAG TU LTA BA LAS MI LDOG PA'I PHYIR DE'I RGYU CAN SDUG BSNGAL YANG LDOG PA MA YIN NO, ,DE'ANG 'DI NA SKYE BA NAS SKYE BAR BRGYUD PA'I RGA BA DANG 'CHI BA LA SOGS PA NI SDUG BSNGAL GYI BDEN PA'O, ,
, ,DE'I RGYUR GYUR PA BDAG TU LTA BA LA SOGS PA NI KUN 'BYUNG GI BDEN PA'O, ,DE'I GNYEN POR GYUR PA DKYIL 'KHOR GYI 'KHOR LO NI LAM GYI BDEN PA'O, ,SDUG BSNGAL 'BYUNG BA SHIN TU MED PAR BYA BA'I PHYIR SEMS KYI RGYUN GYI MTSAN NYID CAN GNAS YONGS SU GYUR PA NI 'GOG PA'I BDEN PA STE 'DI NI 'DIR DON DAM PA'O, ,LAM 'DI NI THAR BA 'BA' ZHIG TZAM GYI MA YIN GYI GZHAN DU NA SANGS RGYAS KYI BDAG NYID CHE BA'ANG YIN TE, SANGS RGYAS KYI CHOS THAMS CAD DANG DE LAS GZHAN PA'I DNGOS PO THAMS CAD KYANG CHOS BDAG MED PA'I MNYAM PA NYID KYI DKYIL 'KHOR GYI 'KHOR LO'I TSUL DU NGES PAR RTOGS PA'I PHYIR RO, ,'DIS BYANG CHUB PAR NI 'GYUR NA DE'ANG BSKAL PA DU ZHIG GIS 'GYUR ZHE NA BRJOD PAR BYA STE, DE'I PHYIR CHOS KUN ZHES BYA BA LA SOGS PA SMOS PA STE, SANGS RGYAS KYI CHOS THAMS CAD KYI RANG BZHIN CAN GYI 'KHOR LO GANG YIN PA DANG 'GRO BA STE SEMS CAN DANG SNOD KYI 'JIG RTEN DE GNYIS KYI YONGS SU DAG PA NI RNAM PA THAMS CAD DU YANG DAG PA DE LA 'JUG PA MNGON SUM DU GYUR CING SGOM PA YONGS SU RDZOGS PA THOB PA GANG YIN PA'O, ,DE BAS NA MNGON SUM GYI RGYU NYID LAS SKAD CIG MA NYID KYIS BYANG CHUB PAR 'GYUR TE, MNGON SUM GYI RGYU'I 'BRAS DU NI GZHAN GYIS BAR MA BCAD PA'I PHYIR RO, ,'ON TE MNGON SUM DU BYED PA'I 'JUG PA DE BSKAL BA DUS 'GYUR ZHES BYA BA NI DRIS PA'I DON TO, ,DE'ANG JI SRID NA BSGOM PA YONGS SU RDZOGS PAR GYUR PA'I DUS DE SRID KYIS 'GYUR RO, ,DE LTA BAS NA
MNGON DU BYED PA 'DI LA BSKAL PA LA BLTOS PA NI 'BRAS BU MED DO, ,'BRAS BU MED PA MA YIN TE, DE'ANG GANG GI PHYIR RGYU NI 'BRAS BU DANG RJES SU MTHUN PAR 'GYUR BA YIN PAS, DE'I PHYIR BSKAL PA GRANGS MED PA GSUM GYIS BYANG CHUB THAB BAR PHA ROL TU PHYIN PA'I TSUL LAS GSUNGS PA DE NI LEGS PAR BSHAD PA YIN LA, GANG YANG RGYUD 'DI LAS SKAD CIG THANG CIG YUD TZAM NYID KYIS SANGS RGYAS KYI BYANG CHUB RDZOGS PAR 'GYUR BAR GSUNGS PA DE NI MI RIGS SO, ,YANG NA NI KHYAD PAR ZHIG BRJOD DGOS SO ZHE NA, DE'I PHYIR KHYAD PAR BSHAD PA NI RIM GYIS ZHES BYA BA LA SOGS PA SMOS TE, RIM GYIS SBYIN PA LA SOGS PA GANG YIN PA DE NI SBYIN PAR BYA BA DANG, TSUL KHRIMS LA SOGS PA MI DMIGS SU ZIN KYANG ZAB PA NYID DU 'GYUR GYI RGYA CHE BAR NI MI 'GYUR TE, THA MAL PA NYID MA SPANGS PA'I PHYIR RO, ,DE BAS NA DAR DE TZAM GYI DUS NYID KYIS RGYA CHE BA YONGS SU RDZOGS PAR 'GYUR BAS PHA ROL TU PHYIN PA'I TSUL LA BSKAL PA GRANGS MED PA GSUM GYIS ZHES DUS KYI TSAD GZUNG BA NI RIGS PA YIN NO, ,DE LA JI LTAR NA THA MAL PA SPONG BAR 'GYUR ZHE NA, DE'I PHYIR RANG GI ZHES BYA BA LA SOGS PA SMOS TE, 'DI TZAM GYIS ZHES BYA BAS PHYOGS DANG DUS YONGS SU BCAD PA MED PA GANG YIN PA DE NI CHEN PO YIN PAS RGYA CHE BA YIN LA, GANG RANG GI YUL DANG DUS KYI RNAM PA NGES PA'I BDAG NYID CAN DE NI CHUNG BA NYID YIN PA'I PHYIR THA MAL PA ZHES BSHAD DO, ,DE LTA BU'I SBYIN PA LA SOGS PA NI LA LAR LAN 'GA' ZHIG GIS
, ,RNAM PA GANG YANG RUNG BAS SBYIN PA LA SOGS PA SGRIB PA YIN NO, ,DE LTA NA RGYUD 'DI JI LTAR RGYA CHE BA YIN, GANG GIS SKAD CIG GIS BYANG CHUB PAR 'GYUR ZHE NA, DE'I PHYIR 'GRO BA ZHES BYA BA LA SOGS PA SMOS TE, 'GRO BA SEMS CAN YANG DAG PAR RDZOGS PA'I BYANG CHUB PA'I RANG BZHIN CAN GYI 'KHOR LO GANG YIN PA RGYUD 'DIR RNAL 'BYOR PA NI DE'I BDAG NYID CAN YIN PAS DE NI TSE 'DI NYID LA JI SKAD DU BSHAD PA'I MNGON DU GYUR PA 'THOB PAS BYANG CHUB MNGON PAR RTOGS PAR 'GYUR BA MI RIGS PA YIN NO, ,DE'ANG 'DIR PHYOGS BCU DUS GSUM DU GTOGS PA'I SANGS RGYAS DANG BYANG CHUB SEMS DPA' MA LUS PA'I YON TAN GYIS 'BYOR BA THAMS CAD DE RNAMS NYID KYIS BLA NA MED CING DON YOD PA'I DAM TSIG GI BDAG NYID CAN NYID DANG, BLA NA MED PA'I MCHOD PA'I BDAG NYID CAN DANG, BDE BA CHEN PO'I RANG BZHIN CAN DANG, YID DU 'ONG BA'I RNAM PA CAN GYI DKYIL 'KHOR GYI 'KHOR LO LTA BUR SPRO BA DANG BSDU BA DANG LDAN PAS MDOR BSDUS TE SEMS CAN THAMS CAD DANG BDAG NYID LA BSKYED NAS MNYAM PAR BZHAG PAS GOMS PAR BYED LA, DE LTA BU NYID KYANG KUN TU SPYOD PA RNAMS DANG, BZLAS PA LA SOGS PAS RJES SU 'JUG CING RTOGS PAR BYED DO, ,DE BAS NA SBYIN PA DANG TSUL KHRIMS LA SOGS PA THAMS CAD KYANG MCHOG TU RMAD DU BYUNG ZHING RGYA CHE BA YIN LA, DE KHO NA NYID KYI RANG BZHIN CAN DU THAMS CAD RTAG TU MTHONG BAS ZAB PA'ANG 'DIR MCHOG TU GYUR PA YIN TE, DMIGS PA YID DU 'ONG BA YIN PA'I PHYIR RO, ,DAM TSIG GI MTHU DANG
SEMS KYI DMIGS PA YIN PAS DKA' BA MED PA'ANG YIN NO, ,DE BAS NA TSE 'DI NYID LA SKAD CIG TZAM GYIS 'DIR BYANG CHUB RTOGS PAR 'GYUR RE ZHES BYA BA NI RIGS PA NYID YIN NO, ,'DIR TSIGS SU BCAD PA NI, YON TAN TSOGS KUN RANG BZHIN GYIS LEGS BSLABS, ,RGYAL BA RNAMS KYI DAM TSIG GROGS GYUR CING, ,DE BZHIN KUN SPYOD GZHAN YANG BZLAS LA SOGS, ,THAMS CAD SEMS BYUNG DE PHYIR MYUR BYANG CHUB, ,CES 'BYUNG BA YIN NO, ,SBYIN PA LA SOGS PA LA 'DI LTA BU'I RGYA CHE BA NI PHA ROL TU PHYIN PA'I TSUL LA'ANG YOD DE, SHES RAB KYI PHA ROL TU PHYIN PAS YONGS SU ZIN PA'I PHYIR RO, ,ZHES 'GA' ZHIG RTOG NA, DE'I PHYIR SBYIN BYA ZHES BYA BA LA SOGS PA SMOS TE, SBYIN PAR BYA BA LA SOGS PA MI DMIGS SU ZIN KYANG SBYIN PA LA SOGS PA DE DAG THA MAL PA'I BDAG NYID CAN YIN TE, YUL DANG DUS GYI RNAM PA YONGS SU GCOD PA'I PHYIR BDAG MED PAS TSAD CAN 'JOMS PAR MI BYED KYANG, 'KHOR LO'I MCHOG STE DAM PA LA NI DE YOD PA MA YIN NO ZHES SNGAR BSHAD PA YIN NO, ,DE BAS ZHES BYA BA LA SOGS PA NI NYE BAR SDUD PAR BYED PA'I TSIGS SU BCAD PA YIN NO, ,KUN TU RTOG PA NI THA MAL PA'I BAG CHAGS THAMS CAD DO, ,KUN NAS 'PHRO BA NI 'GRO BA THAMS CAD KYI DON RNAM PA THAMS CAD DU BYED PA'I SANGS RGYAS KYI SPRUL PAS 'GRO BA THAMS CAD KHYAB PA'I 'OD GANG LA MNGA' BA DE NI KUN NAS 'OD ZER RAB 'PHRO BA ZHES BYA'O, ,KUN TU BZANG PO ZHES BYA BA NI DGE BA THAMS CAD KYI RGYUD DKYIL 'KHOR GYI 'KHOR LO CAN ZHES BYA BA'I THA TSIG GO ,BSGOMS PA NYID KYIS ZHES BYA BA NI BSGOM PA LA MNGON PAR BRTZON PA RTZOM PA'I TSE SKYE BA NYID DAM, DE'I LO
, ,PHYED NYID DAM, DE'I NYIN MO NYID LA BSKAL PA JI LTA BAR DAL 'BYOR THOB PA NA BYANG CHUB THOB PAR 'GYUR RO, ,RATN'A KA RA SH'ANTI PA'I BZHI BRGYA LNGA BCU PA'I 'GREL PA'O,, ,,DKYIL CHOG BZHI BRGYA LNGA BCU PA'I 'GREL PAR, GAL TE SEMS TZAM DU BSGOMS NA RNAM SHES MTHA' YAS SKYE MCHED DANG 'DRA BAR 'JIG RTEN PA'I TING NGE 'DZIN TZAM THOB PAR 'GYUR LA, 'ON TE STONG PA NYID KHYAD PAR DU BSGOMS NA NI DE'ANG YONGS SU MYA NGAN LAS 'DA' BA TZAM DU 'GYUR TE, SANGS RGYAS KYI CHOS RNAMS SBYANGS PA'I LAS RDZOGS PAR BYED PA'I PHYIR RO, ,YANG NA LHA'I BDAG NYID CAN 'BA' ZHIG TZAM BSGOMS NA DE LTAR NA NI DE TZAM GYIS 'TSANG RGYA BA NYID DU MI 'GYUR TE, LAS RDZOGS PA MA TSANG BA'I PHYIR RO, ,YANG NA LHA RNAMS KYI DE KHO NA NYID BSGOM GYI LHA RNAMS MA YIN NA NI DE LTA NA'ANG BSKAL PA GRANGS MED PA MANG POS SANGS RGYAS NYID 'THOB PAR 'GYUR GYI MYUR DU NI MA YIN NO, ,DE BAS NA GNYIS KA BSGOM PA NI SHIN TU YID DU 'ONG BA YIN PA'I PHYIR DANG, BYIN GYIS BRLABS GYI KHYAD PAR GYI MCHOG TU MYUR BAR BLA NA MED PA YANG DAG PAR RDZOGS PA'I BYANG CHUB 'THOB PAR 'GYUR RO ZHES SO,, SARBA MANGGA Lm,