Personal Instruction on the Nine Practices of Mixing

` GNYIS PA NI, RJE BTZUN BLA MA RNAMS LA PHYAG 'TSAL LO, ,'DIR BSRE BA DGU'I GDAMS PA STON PAR BYED PA LA DON GSUM STE, SAD DUS SU SKU GSUM DANG BSRE BA,

GNYID DUS SU SKU GSUM BSRE BA, 'CHI DUS SU SKU GSUM DANG BSRE BA'O, ,DANG PO LA GSUM, SAD DUS KYI 'OD GSAL CHOS SKU DANG BSRE BA, SAD DUS KYI SGYU LUS LONGS SKU DANG BSRE BA, SAD DUS KYI LONGS SKU LAS LANGS PA SPRUL SKU DANG BSRE BA'O, ,DANG PO NI, RDO RJE'I LUS LA GNAD DU BSNUN PA LA BRTEN NAS, RLUNG SNYING GA'I DH'U T'IR ZHUGS GNAS THIM GSUM BYAS PA LAS, SMIG RGYU DANG DU BA LA SOGS PA'I RTAGS RNAMS 'CHAR ZHING, DE'I RJES SU SNANG BA MCHED PA NYER THOB 'OD GSAL RNAMS 'CHAR LA, DE RNAMS KYI DUS SU LTA BA DRAN PAR BYED CING, KHYAD PAR 'OD GSAL GYI DUS SU BDE STONG DBYER MED SBYAR NAS SGOM PAR BYED PA NI, SAD DUS KYI 'OD GSAL CHOS SKU DANG BSRE BAR BYED PA YIN NO, ,GNYIS PA NI, GONG DU BSHAD PA LTAR GYI 'OD GSAL CHOS SKU DANG BSRES PA DE LAS LDANG BAR RTZOM PA NA, SHIN TU PHRA BA'I RLUNG SEMS LAS GRUB PA'I SGYU LUS DE RNAM SMIN GYI PHUNG PO RNYING PA LAS GO SA LOGS SU BYE STE, GSANG 'DUS KYI SKABS SU YIN NA, LONGS SKU DANG PO'I MGON PO 'JA' TSON LTA BU'I SKUR SKAD CIG GIS LDANG BA NI SAD DUS KYI SGYU MA LONGS SKU DANG BSRE BA YIN NO, ,GSUM PA NI, GONG DU BSHAD PA LTAR GYI SGYU MA'I SKU LAS LDANG BAR RTZOM PA NA, RNAM SMIN GYI LUS 'DI SPRUL SKU RDO RJE SEMS DPA'I SKUR LDANG BA GONG DU BSHAD PA LTAR GYI SHIN TU PHRA BA'I RLUNG SEMS TZAM LAS GRUB PA'I LONGS SKU DE SPRUL SKU'I THUGS KAR YE SHES SEMS DPA'I TSUL GYIS BZHUGS PA'I SPRUL SKUR LDANG BA NI, SAD DUS KYI SPRUL SKU DANG BSRE BA STE DE LTAR NA SAD DUS KYI BSRE BA SKOR GSUM MO, ,GNYIS PA

, ,GNYID DUS KYI BSRE BA LA GSUM, GNYID KYI 'OD GSAL CHOS SKU DANG BSRE BA, RMI LAM LONGS SKU DANG BSRE BA, SAD PA SPRUL SKU DANG BSRE BA'O, ,DANG PO NI, SAD DUS KYI SNYING GAR ZHUGS GNAS THIM GSUM BYED PA LA GOMS PA'I GANG ZAG GIS GNYID DU 'GRO KHAR RLUNG SDUD PA'I DMIGS PA BYAS PAS GNYID DU 'GRO BA'I TSE YAN LAG GI RLUNG RNAMS RANG SHUGS KYIS SNYING GAR 'DU BAS 'DU TSABS GZHAN LAS CHE BA ZHIG 'ONG ZHING ,DE'I STOBS KYIS GNYID DU 'GRO BA NA SNANG MCHED THOB GSUM 'OD GSAL DANG BCAS PA YONGS SU RDZOGS PAR 'CHAR LA, DE DAG GI 'OD GSAL GYI DUS SU STONG NYID KYI LTA BA DRAN PAR BYAS NAS DE'I 'OD GSAL LA CI TZAM GNAS KYI BAR 'JOG PA NI, GNYID KYI 'OD GSAL CHOS SKU DANG BSRE BA'O, ,GNYIS PA NI, GONG DU BSHAD PA LTAR GYI GNYID KYI 'OD GSAL LAS LDANG BAR RTZOM PA NA RMI LAM 'CHAR BAS DE'I DUS SU RMI LAM GYI LUS DE RNAM SMIN GYI LUS LAS LOGS SU BYE STE, LONGS SKU DANG PO'I MGON PO 'JA' TSON LTA BU'I SKUR SKAD CIG GIS LANGS TE, JI TZAM GNAS KYI BAR SGYU MA LTA BU'I TING NGE 'DZIN LA MNYAM PAR 'JOG PA NI RMI LAM LONGS SKU DANG BSRE BA'O, ,GSUM PA NI, GONG DU BSHAD PA LTAR GYI SGYU MA LTA BU'I TING NGE 'DZIN LAS LDANG BAR RTZOM PA NA, RNAM SMIN GYI LUS SPRUL SKU RDO RJE SEMS DPA' DANG RDO RJE 'CHANG GANG RUNG GI SKUR BSGOMS LA, DE'I THUGS KAR RMI LAM GYI LONGS SKU DE YE SHES SEMS DPA'I TSUL GYIS BZHUGS PAR BSGOMS PA'I SPRUL SKUR LDANG BA NI, SAD PA SPRUL SKU DANG BSRE BA'O, ,DE LTAR GNYID DUS KYI BSRE BA SKOR GSUM MO, ,

GSUM PA 'CHI BA'I DUS SU SKU GSUM DANG BSRE BA LA GSUM, 'CHI BA'I 'OD GSAL CHOS SKU DANG BSRE BA, BAR DO LONGS SKU DANG BSRE BA, SKYE BA SPRUL SKU DANG BSRE BA'O, ,DANG PO NI, 'DZAM BU GLING PA'I MI KHAMS DRUG LDAN ZHIG RIM GYIS 'CHI BA'I TSE SNYING GAR RANG SHUGS KYIS RLUNG RNAMS 'DU BA'I STOBS KYIS SNANG MCHED THOB GSUM 'OD GSAL DANG BCAS PA YONGS SU RDZOGS PAR 'CHAR ZHING, DUS DER 'CHAR BA'I 'OD GSAL NI MA'I 'OD GSAL YIN LA, SNYING GA LA SOGS PA'I GNAS RNAMS SU GNAD DU BSNUN PA LA BRTEN NAS SNANG MCHED THOB GSUM 'OD GSAL DANG BCAS PA SHAR BA NI BU'I 'OD GSAL YIN CING, 'CHI BA'I TSE RLUNG SDUD PAR RTZOM PA NA SNYING GA'I SDUD RIM LEGS PAR BSGOMS TE 'OD GSAL MA BU LEGS PAR BSRA BA'I 'OD GSAL SHAR BA'I TSE LTA THOG TU LEGS PAR BZHAG STE, DE'I 'OD GSAL JI TZAM GNAS GNAS KYI BAR DU MNYAM PAR 'JOG PA NI, 'CHI BA'I 'OD GSAL CHOS SKU DANG BSRE BA'O, ,GNYIS PA NI, GONG DU BSHAD PA LTAR GYI 'CHI BA'I 'OD GSAL DE LAS LANGS NAS BAR DO 'CHAR BAR RTZOM PA NA, BAR DO'I LUS DE SHIN TU PHRA BA'I RLUNG SEMS TZAM LAS GRUB PA'I LONGS SKU DANG PO'I MGON PO'AM RDO RJE 'CHANG GANG RUNG GI SKU 'JA' TSON LTA BU'I SKUR LDANG BAR BYA'O, ,'DI THA MAL PA LA BAR DO RANG DGA' BA 'ONG BA'I DOD LA SGYU MA'I LONGS SPYOD RDZOGS SKUR LDANG BA YIN PAS, DE NI BAR DO LONGS SKU DANG BSRE BA YIN NO, ,GSUM PA NI, MNGAL DU SKYE BA LEN PAR RTZOM PA NA SKYE BA LEN RGYU'I RNAM SMIN GYI LUS SPRUL SKU RDO RJE SEMS DPA'I SKUR BSGOMS PA'I DBUS SU SHIN TU PHRA BA'I RLUNG SEMS

, ,TZAM LAS GRUB PA'I LONGS SKU DE NYID BZHUGS PAR BSGOM STE, SKYE GNAS SU SKYE BA LEN PA NI SKYE BA SPRUL SKU DANG BSRE BA YIN TE, DE LTAR 'CHI BA'I DUS KYI BSRE BA SKOR GSUM MO, ,DE LTAR BSRE BA RNAMS KYI SKABS SU LONGS SKU DANG PO'I MGON POR LDANG BA'I DGOS PA NI, BSKYED RIM GYI SKABS KYI BAR DO'I SBYONG BYED BAR DO LONGS SKUR 'KHYER BA'I LAM KHYER DANG PO'I MGON PO YIN NO, ,BSKYED RIM GYI SKABS KYI SKYE BA SPRUL SKUR 'KHYER BA'I LAM KHYER DANG, SKYE BA SBYONG BYED SPRUL SKU RDOR SEMS YIN PAS SPRUL SKU DANG BSRE BA'I RDO RJE SEMS DPA'I SKUR LDANG DGOS PA'I RGYU MTSAN DE LTAR YIN PAR SHES PAR BYA'O, ,BSRE BA SKOR DGU'I GDAMS PA 'DI, ,DAM TSIG SDOM PA LDAN PA YI, ,SKAL LDAN SLOB MA MA GTOGS PA, , DE LAS GZHAN DU CUNG ZAD TZAM, ,BSTAN CING SBYIN PAR BYA BA MIN, ,DE BAS SNYING LTAR GCES PAR BZUNG, ,(DE LTAR BSRE BA SKOR DGU'I GDAMS PA'I YIG CHUNG GSAL BAR MKHAS GRUB RJES MDZAD PA'O,,)