*, ,RNAL 'BYOR BZHI'I RIM PA'I t'IKKA BZHUGS SO, ,
, ,NA MO BADZRA BHEE RA W'A YA, RNAL 'BYOR RNAM PA BZHIR BSHAD DE, ZHES PA'I TSIG RKANG GCIG LA, DANG PO DBYIBS KYI RNAL 'BYOR NI, 'DI NYID LAS, RIM PA'AM YANG NA CIG CAR DU, ,SANGS RGYAS RJES DRAN BSGOM BYA STE, ,DE LA RANG NYID SANGS RGYAS DNGOS YIN SNYAM PA'I NGA RGYAL BZUNG BA'I SGO NAS SANGS RGYAS RJES DRAN BSGOM PA LA MNGON BYANG LNGA LAS RIM GYIS BSGRUBS PA'I BSKYED RIM PA'I SKU DANG RLUNG SEMS TZAM LAS CIG CAR DU GRUB PA'I SKU GNYIS LAS 'DIR PHYI MA YIN, SHIN TU PHRA BA'I RLUNG SEMS GNYIS GONG BU STE NGO BO GCIG TU 'DRES PAR GNAS PA'I BDAG NYID KYI LUS 'DI GSHIN RJE GSHED KYI SKUR BZHENGS PA'O, , SGYU MA'I SKU 'DI NI BEMS PO MA YIN PA SHA KHRAG GDOS BCAS KYANG MA YIN NO, ,SHA KHRAG GI LUS LTA BUR SNANG YANG DE RNAMS MA 'DRES PAS RNYOG PA MED, PHUN TSOGS YON TAN MTSAN DPE KUN GYIS BRGYAN PA YIN, , SGYU MA'I SKU 'DI BDAG TU THA SNYAD 'DOGS PA'I NGAR 'DZIN LHAN SKYES KYI DMIGS YUL NGA'I GDAGS GZHI MTHAR THUG PA SHIN TU PHRA BA'I GNYUG MA'I LUS LAS NGO BO THA DAD MIN NO, ,'KHOR BA THOG MED NAS 'DI'I BAR RIGS BRGYUD SKAD CIG KYANG BAR MA CHAD PA'I RIGS 'DRA CUNG ZAD KYANG SPANG DU MED, DE NYID MTSAN DPES SPRAS PA'I SGYU MA'I SKUR BZHENGS PA'I MTSAN DPE'I RIGS 'DRA DE LAS GZHAN PA GZUGS SKU'I RIGS 'DRA'I RGYUR BSTAN DU
, ,MED DO, ,SHIN TU PHRA BA'I GNYUG MA'I LUS DE JI TZAM NAS GRUB CE NA, GDOD MA NAS GRUB PA YIN NO, ,DE NYID RGYUD DON LA MI 'KHRUL BA'I BLA MA'I BKA' DRIN LAS SGYU MA'I SKUR 'GYUR BA YIN NO, , LUS CAN ZHES PA'I RKANG PA GSUM NI SGYU MA'I SKU'I KHYAD CHOS SO, ,SGYU MA'I SKU DE LA SGYU MA LTA BU'I TING NGE 'DZIN ZER RO, ,RMI LAM JI BZHIN GOMS PAR BYED, CES PA 'DIS RMI LAM GYI LUS DANG SGYU MA'I SKU DANG BAR DO GSUM BSRE BA'ANG DON GYIS BSTAN NO, ,RMI LAM GYI LUS ZHES PA RMI LAM GYI KA BA BUM PA LTA BU GANG YIN MA YIN GYI, RMI LAM GYI LUS KHYAD PAR BA ZHIG NGOS ZIN DGOS SO, ,DE GANG YIN PA'I RMI LAM GYI SKABS KYI NGAR 'DZIN GYIS DMIGS YUL NGA'I GDAGS GZHI RLUNG SEMS TZAM LAS GRUB PA'I LUS RMI LAM GYI YUL DU NGA BYA BA 'DI DANG 'DI BYED SNYAM DU RTZOL MED DU RANG GI NGANG GIS 'JUG PA'I DUS DE YIN NO, ,DE LTA BU'I LUS DE YID NGO NA SHA RUS KYI LUS BZHIN DU DNGOS GNAS LA BYA BA BYED PA'I LUS SU SNANG YANG, DNGOS GNAS LA SHA RUS KYI LUS BZHIN BYA BA BYED MI NUS SO, ,DE BZHIN DU SGYU LUS RJES MTHUN PA'I SKU'ANG DPE'I 'OD GSAL GYI MTHAR 'PHEN PA'I DBANG GIS RDO RJE 'CHANG GI SKUR BZHENGS PA NA, YID NGOR YE SHES KYI SKU MTSAN NYID PA LTA BUR SNANG YANG DNGOS GNAS LA YE SHES KYI SKU MTSAN NYID PAR GNAS PA MIN NO, ,'O NA BSKYED RIM PA'I
SKU DANG KHYAD PAR CI YOD CE NA, BSKYED RIM PA'I SKU NI NGA DE DANG DE'I SKU YIN NO SNYAM PA'I DRAN PA'I 'DZIN STANGS MA SHOR GYI BAR DU YID NGOR SKU DE DANG DER SNANG BA YIN GYI 'DZIN STANGS SHOR NAS MI SNANG NGO, ,'DI NI LUGS LDOG GI MTHAR RANG BZHIN BRGYAD CU'I RTOG PA MA SHAR GYI BAR DU RANG GI NGANG GIS SNANG BA YIN TE, DPER NA RMI LAM GYI LUS BZHIN SBYOR RO, ,GANG DANG SBYOR NA SHIN TU PHRA BA'I GNYUG LUS DANG, JI LTAR SBYOR NA GNYUG LUS DE BAR DO'I SRID PA DANG CHOS MTHUN PAR TSE 'DIR MTSAN DPES BRGYAN PA'I SGYU MA'I SKU RAB TU SBYOR NUS NA TSE 'DI LA RDO RJE 'CHANG THOB PA'O, ,'DIR BSTAN PA BSHAD PA'I RIM PA YIN GYI, NYAMS SU LEN PA'I RIM PA LAS RNAM DAG YE SHES PA 'OD GSAL GYI YE SHES YIN LA, DE LA DPE'I 'OD GSAL GYI YE SHES DANG DON GYI 'OD GSAL GYI YE SHES GNYIS KA YOD PAS DES NA SGYU LUS KYI DNGOS RGYUR 'OD GSAL GYI YE SHES 'GRO DGOS LA, DE'I RGYUR SNGAGS KYI RNAL 'BYOR ZHES PA RDO RJE'I BZLAS PA NANG GI RGYUR 'GO DGOS PHYI'I RKYEN DAM TSIG GI RNAL 'BYOR ZHES PA PHYAG RGYA SROG RTZOL DGOS SO, ,GNYIS PA SNGAGS KYI RNAL 'BYOR NI, LUS CAN KUN GYI RLUNG LA SROG CES ZER BAS RLUNG ZHES BYA BAS RNAM SHES THAMS CAD KYI BZHON PA BYAS TE, PHYED TSUL GYI THABS KYIS MA ZIN PA NA SRID PA DANG, ZIN PA NA RNAM GROL THOB PAR BYED DO, ,THABS JI LTA BUS NA, DAG PAS SBYOR BA DAG BYA STE, ZHES SOGS TSIG RKANG BZHI PO 'DI RLUNG BUM PA CAN LA'ANG CUNG ZAD SBYANG DU RUNG YANG DON GYI GTZO BO NI RDOR BZLAS LA SBYOR TE, DE'I SBYOR
, ,TSUL NI, DGUG PA STE RLUNG NANG DU ZHUGS PA'I SBYOR BAS NANG DU ZHUGS PA DANG, RLUNG GI RGYU BA ZHI BA'I SBYOR BA YIS NI RLUNG ZHI BA STE NANG DU GNAS PA DANG, RENGS PA'I SBYOR BAS MI GA-YO BA STE NANG DU THIM PA DANG, RLUNG THIM PA'I SKAD CIG LA RTAGS LNGA 'CHAR RO, ,SRID DANG RNAM GROL THOB PA'I RGYAS BSHAD NI, RLUNG GI GA-YO BA DE RO RKYANG NAS BRGYUS PAS LAS BSAGS TE 'KHOR BAR 'GYUR, MI GA-YO BA MAN NGAG GIS DBU MAR THIM PA RNAM GROL MI GNAS PA'I MYA NGAN LAS 'DAS PA THOB PAR 'GYUR, THIM PA NI SNYING GA'I CHU SKYES TE AA BA DH'U T'I'I DBUS, DE'ANG RNAL 'BYOR PAS RTZE GCIG TU MNYAM PAR BZHAG PA LAS DUS NI THO RANGS NAS SO, ,BYED TSUL 'JUG GNAS LDANG GSUM GSANG 'DUS NAS GSUNGS PA BZHIN NO, , GNAS SKABS KYI PHAN YON GO SLA, 'DI LA SNGAGS KYI RNAL 'BYOR ZHES GSUNGS PAS RLUNG SNGAGS DBYER MED DU SBYOR BA DON GYIS THOB BO, ,THIM PA'I DMIGS YUL NI SNYING GA'I DH'U T'I'I DBUS SU H'Um DKAR PO YUNGS KAR SPOM PO TZAM LA SOGS PA'O, ,YAN LAG GI RLUNG GI RDOR BZLAS KYIS MYANG 'DAS THOB PAR MA ZAD MNGON PAR SHES PA LNGA'ANG 'THOB PO, ,SKABS 'DIR 'PHO PA GSUNGS PAS NI RGYUD NAS BSHAD PA LTAR GYI 'PHO BA LA SNYING KHA'I MI SHIGS PA'I THIG LE LA RLUNG ZHUGS GNAS THIM GSUM MTHAR PHYIN PA DGOS PAR SHES PA'I CHED YIN NO, ,KHAMS GSUM PO NI SGRUB PA PO RANG DANG RIG MA'I LUS NGAG YID GSUM MA LUS PA'O, ,SANGS RGYAS NGO BOR BSGOM PAR BYA, ,ZHES PA NI RIG MA DANG SGRUB PA PO RANG GI LUS NGAG
YID GSUM SKU GSUNG THUGS RDO RJE GSUM GYI NGO BOR BSGOM PA'I RGYU MTHUN LA SOGS RAB DBYE NI DGA' BA BZHI'O, ,GANG TSE CHU YI RI MO LTAR ZHES PA NI, CHU'I RI MO SKAD CIG RE RE LA ZHIG NAS MI GNAS PA LTAR, DE'I TSE RLUNG RNAMS RO RKYANG NAS RGYU BA'I GA-YO BA SKAD CIG RE RE ZHING BKAG STE, DBU MA'I NANG DU GNAS PA, DE'I TSE BDE CHEN LHAN SKYES THOB PAR 'GYUR ZHING, RGYUN MI 'CHAD DO, ,DE DUS DGA' BA LAS SKYES PA'I BDE BA GZHAN CI ZHIG SKYES, BYANG CHUB SEMS NI LHUNG GYUR NAS, ,RNAM PAR SHES PA'I PHUNG PO BRGYAL BA STE, ,DRAN PA NYAMS PA LA, MA SMAD DNGOS GRUB GA LA YOD, ,MKHA' KHAMS NI RDO RJE DBYINGS KYI DBANG PHYUG MA'I RTZA NANG GI SBUBS YIN LA, RDO RJE NI NOR BU'I MAR SNA'I DBU MA DE GNYIS MNYAM PAR SBYOR BA'O, ,DE LTA BU'I REG PA DANG BCAS PA'I RMAD DU BYUNG BA LAS, BDE BA SKYED PAR BYED PA GANG YIN PA DE NI MCHOG DGA' DANG, DE'I BYED PA PO STE DGA' BA DANG DGA' BRAL DANG MCHOG DGA' DANG DGA' BRAL GYI NI DBUS SU SKYES PA'I DGA' BA'I DE NI BRTAN PA STE, DE LA GZHAG PAR BYA'O, ,DE NAS DGA' BA BZHI'I RIM PA LA DANG PO DGA' BA, GNYIS PA MCHOG DGA', GSUM PA LHAN SKYES KYI DGA' BA, BZHI PA DGA' BRAL GYI DGA' BA'O, ,DGA' BRAL GYI DGA' BA ZHES PA NI, SNGAGS KYI LHAN CIG SKYES PA'I DGA' BA MYONG BA DE PHYIS SLAR DRAN PA LA ZER RO, ,PADMA'I NAM MKHA'I LTE BA NI RDO RJE DBYINGS KYI DBANG PHYUG MA'I RTZA'I BU GA'O, ,RDO RJE'I LTE BA NI NOR BU'I DBU MA'I MAR SNA'I BU GA'O, ,MNAN PA NI, RDO RJE DBYINGS KYI DBANG PHYUG MA'I RTZA NOR BU'I DH'U T'I'I MAR SNA'I NANG DU BCUG CING BCINGS PA, RDO RJE SKYIL KRUNG DAG GI ZHES PA NI RO RKYANG GI RLUNG DBU MA'I NANG DU ZHUGS
, ,GNAS BYAS PA'O, ,DE DUS RANG GI SEMS NOR BU'I DH'U T'I'I NANG DU GNAS SHING SON PAR BLTA'O, ,YUL STONG PA NYID DANG YUL CAN BDE BA CHEN PO'I YE SHES GANG YIN PA DE NI LHAN CIG SKYES PA'I YE SHES KYI NGO BO ZHES BYA BA STE, DE NI CHAGS PA SNANG BA MA YIN, CHAGS BRAL MCHED PA MA YIN, NYER THOB DBU MAR DMIGS PAR MI 'GYUR RO, ,LHAN SKYES KYI YE SHES DE LA THUN ZHES PA NAS BSKAL PA STONG DU YANG MNYAM PAR 'JOG PA'I MNGON PAR SBYOR BAS GNAS PAR BYA'O, ,BZHI PA NI, LTE BA SPRUL PA'I RTZA 'KHOR LA MKHA' 'GRO'I PHO BRANG ZHES ZER TE, RTZA 'KHOR DE'I DBUS NA NGES DON GYI MKHA' 'GRO MA DANG SHAR MA DANG GTUM MO RDUL GYI ME YOD PAS DER BDE CHEN 'DREN PA'O, ,CHU SKYES DBUS ZHES PA DE'I RTZI 'DAB KYI DBUS SU'O, ,DES NA LTE BA'I DBUS SON ZHES PA LTE BAR SPRUL PA'I RTZA 'KHOR GYI DH'U T'I'I DBUS SU, DPA' BO STE GSHIN RJE GSHED ZHAL GCIG PHYAG GNYIS PA YAB YUM MTSON GANG PA THABS DANG SHES RAB TU SNYOMS PAR 'JUG PA'I SBYOR MTSAMS NAS 'PHROS PA'I 'OD ZER KHAMS GSUM RGYU BA SEMS CAN GYI 'JIG RTEN DANG MI RGYU BA SNOD KYI 'JIG RTEN LA SPRO BA DANG SDUD PA'I SBYOR BA YIS RNAL 'BYOR CHEN PO LHAN CIG SKYES PA'I YE SHES KYI NGO BOR NGAL BSO BYA'O, ,SDUD TSUL JI LTA BU ZHE NA, ME LONG LA HAS BTAB PA MTHA' NAS RIM GYIS SDUD PA LTAR, SNOD BCUD THAMS CAD PHYI'I DUR KHROD LA, DE GZHAL YAS KHANG LA, DE GTZO BO LA, DE RTZA 'KHOR GYI GTZO BO YAB YUM LA, DE RNAMS GANG DU SDUD PA'I GNAS NI LTE BA'I CHU SKYES PADMA'I DBUS H'Um YIG DKAR PO YUNGS KAR TZAM LA
SEMS BRTAN PAR BYA'O, ,DE LAS 'OD GSAL LHAN CIG SKYES PA'I YE SHES 'CHAR BAR 'GYUR RO, ,LHAN CIG SKYES PA'I YE SHES DE'I NGES NGO NAS RTAG CHAD BDAG GZHAN SRID PA MYANG 'DAS THOG MTHA' DPUS RNAMS SPANGS PA STE, YOD PA MA YIN NO, ,'OD GSAL LHAN CIG SKYES PA'I YE SHES DE LAS RDO RJE 'DZIN PA SNGAR BSHAD PA'I SGYU MA'I SKU 'GRUB PAR 'GYUR RO, ,RNAL 'BYOR BZHI'I RIM PA LAS, 'OD GSAL LHAN CIG SKYES PA'I YE SHES GANG SKYES PAR GYUR PA LAS, YE SHES PHYAG RGYA CHEN PO SGYU MA'I SKU 'THOB LA, DE NI THABS DANG SHES RAB KYI RANG BZHIN, DE BZHIN GSHEGS PA DE NYID NGA'O SNYAM PA'I NGA RGYAL 'JOG PA'I GZHIR BRTEN PA'O, ,DE NI ME LONG NANG GI GZUGS BRNYAN BZHIN YAN LAG THAMS CAD DUS GCIG TU RDZOGS PA 'OD KYIS STONG GSUM 'JIG RTEN KHYAB CING GSAL BAR SNANG, BDE BA CHEN PO DANG STONG PA GNYIS STONG NYID SNYING RJE DBYER MED DU GNAS SO, ,DES NI DBANG PHYUG BRGYAD LA SOGS PA'I PHUN SUM TSOGS PA'I 'BYUNG GNAS KYI YE SHES CHEN PO 'GRUB PAR 'GYUR RO,, ,,SARBA MANGGA LAm,,