, ,MAN NGAG GI MTHAR THUG MNGON PAR BYANG CHUB PA'I RIM PA'I BSHAD PA RJES MDZAD PA BZHUGS SO,,
, ,RJE BTZUN DAM PA DMIGS PA MED PA'I THUGS RJE CHEN PO DANG LDAN PA RNAMS KYI ZHABS LA DUS THAMS CAD DU GUS PAS PHYAG 'TSAL LO, ,RGYAL BA THAMS CAD KYI MKHYEN PA'I YE SHES THAMS CAD GCIG TU BSDUS PA'I NGO BO BCOM LDAN 'DAS 'JAM PA'I DBYANGS DANG, DBANG PHYUG BRGYAD DANG LDAN PA'I RDO RJE 'CHANG CHEN PO MGON PO KLU SGRUB YAB SRAS KYI ZHABS LA GUS PA CHEN POS SKYABS SU MCHI'O, ,MAN NGAG MTHAR THUG MNGON PAR BYANG CHUB PA'I RIM PA LA GSUM, MTSAN GYI DON, GZHUNG GI DON, MJUG GI DON NO, ,DANG PO NI, AABHI NI MNGON PAR RO, ,SAm NI RDZOGS PA'O, ,BO DHI NI BYANG CHUB PA'O, ,KRA MA NI RIM PA'O, ,DE LA MNGON PAR NI MNGON DU GYUR PA DANG, RDZOGS PA NI MA LUS PA'AM YANG DAG PA DANG, BYANG CHUB PA NI RTOGS PA'O, ,GNYIS PA LA GNYIS, RTZOM PA LA 'JUG PA'I YAN LAG, YAN LAG CAN GYI GDAMS PA'O, ,DANG PO LA GNYIS, PHYAG 'TSAL BA DANG, BRTZAM PAR DAM BCA' BA'O, ,DANG PO NI, THAMS CAD STONG PA 'OD GSAL BA'I DE NYID PHYIN CI MA LOG PAR STON PA PO, RDO RJE SEMS DPA' LA PHYAG 'TSAL LO, ,ZHES GZHUNG 'DI'I SKABS DANG MTHUN PAR
, ,MCHOD PAR BRJOD DO, ,GNYIS PA NI, TE ZHES LHAG MA 'DREN PAS PHYAG BTZAL NAS MNGON PAR BYANG CHUB PA'I RIM PA 'DI BDAG GIS BSHAD PAR BYA'O, ,ZHES BRTZAM PAR DAM BCAS SO, ,BZHI PA NI, RDOR BZLAS DANG, DGONGS PA BLA NA MED PA DANG, BDAG BYIN RLABS KYI RIM PA GSUM LA BLTOS PA'O, ,GNYIS PA LA BZHI, MAN NGAG GI SNOD DU BYA BA DANG, MAN NGAG SBYIN PA DANG, MAN NGAG GI YON DBUL BA DANG, MAN NGAG SGOM PAR GDAMS PA'O, ,DANG PO LA GSUM, BLA MA MNYES PAR BYED PA DANG, BLA MA LA DBANG GI YON DBUL BA DANG, BLA MAS DBANG BSKUR BA'O, ,DANG PO NI, 'DI NI ZHES PA BZHIS GDUL BYA LA BKA' DRIN GYIS SKYOB PA LA BLTOS TE RDO RJE 'CHANG LAS BLA MA LHAG PAR BSTAN NO, ,RGYU MTSAN DES NA MNYES PAR BYA DGOS PA NI DE NI ZHES PA BZHIS BSTAN NO, ,GNYIS PA NI, CI 'BYOR PA ZHES PA BZHIS LEGS PAR BSLABS PA'I PHYAG RGYA DBUL BA DANG, TSOGS KYI DKYIL 'KHOR GYI DBUS SU TSOGS 'KHOR GYI CHO GA BZHIN DU MCHOD PAR BSTAN NO, ,GSUM PA NI, DE NAS 'DOD YON LNGA SPYOD PAS, ,CHEN PO'I RNAL 'BYOR PA MNYES SHING, ,SNYOMS PAR 'JUG PA'I CHO GA YIS, ,SNANG BDAG NI BSKYED PAR BYA, ,ZHES CHAG
GIS BSGYUR BA LTAR BDE'O, ,LAKshM'I'I 'GREL PAR 'JUG PA'I CHO GA NI, SNANG BA DAG NI SKYED DUS BYAS, ,ZHES 'BYUNG ZHING SNANG BA SKYED PA'I DUS MTSAN MO RTZOM PA'I DUS SU SNYOMS PAR 'JUG PAR BYA'O, ,ZHES BSHAD DO, ,GZHUNG GZHAN LAS GSANG DBANG BSKUR BA'I TSE SNGON DU BLA MA RIG MA DANG SNYOMS PAR ZHUGS TE LHAN CIG SKYES PA'I YE SHES BRTAN PAR BYAS NAS SLOB MA LA DBANG BSKUR BAR GSUNGS PA DE DANG 'DRA BAR BYAS NA LEGS SO, ,DE NAS BYANG CHUB SEMS NI RAB 'BAD PAS, ,KA LA SHA SOGS DAG TU BZHAG , SLOB MA RANG LA BLA MA YIS, ,BRTZE BAS NAM PHYED DUS DBANG BSKUR, ,ZHES GSUNGS TE, RANG ZHES PAS GZHAN GYIS DBANG BSKUR BA MIN GYI BLA MA DE NYID KYIS BSKUR BA DANG, SOGS KYIS THOD PA SOGS SU SPROS PA DANG, NAM PHYED NI DE'I DUS SU SROG RTZOL CIG CAR DU RGYU BAS 'OD GSAL DANG MTHUN PA DANG, 'DIS GSANG DBANG BSTAN LA, DBANG BSKUR YANG DAG THOB NAS NI, ,ZHES PAS DBANG GSUM PA THOB PAR LAKshM'IS BSHAD DO, ,CHAG GIS, SLOB MA BZANG LA ZHES DANG BUM PA'I DANG POR NGES BZHAG LA, ZHES BSGYUR PA'I PHYI MA NI SOGS KYI SKAD DOD DANG POR BSGYUR BA YIN KYANG MI 'THAD DE, SPYOD BSDUS LAS, DE NAS SLOB DPON MNYAM GZHAG PAS, ,BYANG CHUB SEMS NI DBAB PAR BYA, ,BUM PA'AM YANG NA DUNG CHOS SU, ,BYANG CHUB SEMS NI GZHAG PAR BYA, ,ZHES GSUNGS SHING, RANG NYID KYIS KYANG DE LTAR BSGYUR BA'I PHYIR, ,GSANG DBANG LA BYANG SEMS PHYUNG NAS DUNG CHOS SU BZHAG STE DRI ZHIM PA'I CHU DANG SBYAR GSAL LAS KYANG, DE LTAR BSHAD NAS ZLA GSANG THIG LE'I
, ,KHUNGS DRANGS SO, ,RGYUD PHYI MA'I 'GREL PAR GSANG DBANG BSKUR TSUL GNYIS SU BYAS PA'I DANG PO NI SNGA MA LTAR DANG, PHYI MA NI RDO RJE NAS BYANG SEMS PHYUNG BA NYID SLOB MA'I KHAR STER BA MCHOG GI GSANG DBANG DU BSHAD DO, ,GSANG BA GRUB PAR YANG, KHRAG DANG KHU BA RNAM BSRES PA, ,SLOB DPON MCHOG GIS MCHOD PA'I PHYIR, ,MI YI THOD PAR BLUG NAS NI, ,BSHAD GCI RDO RJE'I CHUR LDAN PA, ,DE NAS SLOB MA BKUG BYAS LA, ,SANGS RGYAS KUN GYIS BYIN BRLABS NAS, ,GNYUG MA'I PHYAG RGYA DANG BCAS PAS, DAM TSIG DE NI SBYIN PAR BYA, ,ZHES GSUNGS LA, SPYOD BSDUS LAS, BYANG CHUB SEMS NI GZHAG PAR BYA, ,ZHES PA'I MJUG TU, DE NAS SLOB MA DE BOS TE, ,SANGS RGYAS KUN GYIS BYIN BRLABS PA, ,GNYUG MA'I PHYAG RGYAR LDAN PA YI, ,DAM TSIG DE NI BSTAN PAR BYA, ,ZHES GSUNGS PA'I RKANG PA BZHI NI GSANG BA GRUB PA BKOD PAR SNANG NGO, ,SPYOD BSDUS 'GYUR RNYING LAS, SANGS RGYAS KUN GYIS BYIN BRLABS LA, ,RGYAL BA'I PHYAG RGYAR BCAS PA YI, ,DAM TSIG DAG NI BSTAN PAR BYA, ,ZHES 'BYUNG ZHING, DPE KHA CIG LAS, RANG GI PHYAG RGYAR BCAS PA YI, ,ZHES 'BYUNG YANG, RKANG PA GNYIS PA DANG GSUM PA 'GYUR SNGA MA LTAR LEGS LA, BZHI PA NI GSANG BA GRUB PA LTAR LEGS SO, ,SLOB MA DE BOS ZHES PA DANG, SLOB MA BKUG CES PA GNYIS KYI DON 'DRA'O, ,BYIN GYIS BRLABS PA NI PHYAG RGYA LA BYA STE, PHYAG RGYA'I GNAS LNGAR RIGS LNGA BKOD NAS BYIN GYIS BRLAB PAR GSUNGS PA'O, ,DAM TSIG DE NI ZHES PA NI GSANG BA'I RDZAS DKAR DMAR GNYIS BDUD RTZI LHAG MA GSUM DANG BSRES PA YIN LA, DE YAB YUM GNYIS KAS
SLOB MA LA STER BA NI BCAS PAS ZHES PA'I DON NO, ,DAM TSIG DAG NI SBYIN PAR BYA, ,ZHES PA'I MJUG TU SPYOD BSDUS LAS, RDO RJE CAN NI GNYIS PA YIS, ,DBANG BSKUR BA NI SBYIN PAR BYA, ,BKRA SHIS SGRA NI BSGRAGS PA DANG, ,ROL MO'I SGRA SKAD SNA TSOGS KYIS, , KHAMS GSUM PA YI DBANG BSKUR BAS, ,SLOB MA 'DUD CING THAL SBYAR BA, ,DER NI RAB TU BSKUR BA YIS, ,RJES SU GNANG BA DE NAS SBYIN, ,ZHES GSUNGS PA'ANG GSANG BA GRUB PA BKOD PA YIN LA, GSANG BA GRUB PAR DAM TSIG DE NI SBYIN PAR BYA ZHES PA'I MJUG TU, DNGOS GRUB KUN GYI GNAS GYUR CING, ,SANGS RGYAS BYIN BRLABS LAS 'GYUR BA, ,RDO RJE SLOB DPON DE NYID RIG ,CHO GAS DE LTAR GTAD BYAS NAS, ,RANG GI PHYAG RGYA DAM TSIG NI, ,BZANG LDAN RGYUD LAS GSUNGS PA NYID, ,SHIN TU BZHIN BZANG MIG YANGS MA, ,RTAG TU BYANG CHUB SEMS LA DGA', ,M'A MA K'I LTAR YONGS DAG PA, ,RAB DGA' BAR CHAGS RNAMS SPANGS MA, ,'DI NI YANG DAG MCHOD BYAS NAS, ,SNGON BZHIN SPYOD PA'I SLOB MA NI, ,RDO RJE 'DZIN PA GNYIS PA LA, ,BKRA SHIS BRJOD PA'I TSIG GIS NI,, DBYANGS NI RNAM PA SNA TSOGS DANG, ,RNGA YAB RGYAL MTSAN GDUGS LA SOGS, ,'PHRENG BA TZAN DAN LA SOGS MCHOD, ,PHYAG RGYA'I DBANG BSKUR RIN CHEN GYI, ,DAM TSIG LA GNAS BSTAN PAR BYA, ,KHAMS GSUM PA YI DBANG BSKUR NAS, ,SLOB MA'I THAL MO SBYAR BYAS PA, ,DE LA RJES GNANG SBYIN BYAS TE, ,RGYUD LAS JI SKAD GSUNGS PA BZHIN, ,PHYOGS KYI 'KHOR LOR GANG 'DOD PA, ,CHOS KYI 'KHOR LO BSKOR BAR GYIS, ,ZHES GSUNGS SO, ,RDO RJE CAN NI GNYIS PA YIS, ,ZHES PA NI, DPE MA DAG PA LAS BSGYUR
, ,BAR GSAL TE, SLOB MA RDO RJE CAN GNYIS PA LA PHYAG RGYA GTAD NAS DBANG BSKUR BA'I DON DU SNANG BA'I PHYIR RO, ,DBANG BSKUR BA NI SBYIN PAR BYA, ,ZHES PA'ANG PHYAG RGYA'I DBANG BSKUR RIN CHEN GYI, ,DAM TSIG LA GNAS BSTAN PAR BYA,, ZHES PA'I DON DU SNANG ZHING, BKRA SHIS SGRA NI ZHES SOGS KYI GO RIM KYANG GSANG BA GRUB PA LTAR BYA'O, ,KHAMS GSUM PA YI DBANG BSKUR NAS, ,ZHES PA GSUM YANG GSANG BA GRUB PA LTAR BYA LA, DER NI RAB TU BSKUR BA YIS, ,ZHES PA LA SPYOD BSDUS KYI DPE KHA CIG LAS, RGYUD LAS RAB TU GSUNGS PA YIS, ,ZHES 'BYUNG BA NI, GSANG BA GRUB PAR, RGYUD LAS JI SKAD GSUNGS PA BZHIN, ,ZHES PA'I DON NO, ,DES NA KHAMS GSUM PA'I MNGA' BDAG TU DBANG BSKUR BA NI SKABS 'DIR DBANG GSUM PA YIN LA, DE LA RJES GNANG SBYIN PA NI CHOS BSHAD PA'I RJES GNANG LA GSUNGS 'DUG PAS, SAm PU tA NAS DBANG BZHI PA'I MTHAR RJES GNANG STER BAR GSUNGS PA DE DANG 'DRA BAS GSUM PA'I RJES LA BZHI PA BSKUR BA'ANG MTSON NO, ,RJES SU GNANG BA DE NAS SBYIN ZHES PA'I MJUG TU SPYOD BSDUS LAS, PHRENG BA CHU DANG RDZOGS SANGS RGYAS, ,RDO RJE DRIL BU ME LONG DANG, ,MING DANG SLOB DPON RJES GNANG STE, ,DBANG BSKUR RIM PA 'DI YIN NO, ,ZHES GSUNGS PA NI, PHRENG BA NAS SLOB DPON GYI DBANG GI BAR SNGON DU 'GRO BA'I GSANG DBANG BSKUR BA'I 'OG TU DBANG GSUM PA DANG BZHI PA BSKUR NAS MTHAR RJES GNANG STER BA'I DON NO, ,'PHAGS PAS BYANG CHUB KYI SEMS PHYUNG NAS DUNG CHOS SOGS SU BZHAG PA TZAM MA GTOGS PA, DES GSANG
DBANG BSKUR TSUL DANG, DBANG GSUM PA MA BSHAD PA DE SPYOD BSDUS KYIS GSANG BA GRUB PA NAS 'BYUNG BA BZHIN DU KHA BKANG BAR 'DUG PA 'DI MA RTOGS PAS, KHA CIG RIM LNGA DANG SPYOD BSDUS LAS 'OD GSAL GYI GDAMS NGAG STON PA LA'ANG GSANG DBANG MA GTOGS PA DBANG GSUM PA BSKUR BA MED CES ZER RO, ,DBANG BSKUR RIM PA 'DI YIN NO, ,ZHES PA'I MJUG TU SPYOD BSDUS LAS, MNGON RDZOGS BYANG CHUB MTSAN NYID NI, ,BLA MA BRGYUD RIM LAS 'ONGS BA, ,GANG TSE MAN NGAG BZHI THOB PA, ,DE NAS DE LA SBYIN PAR BYA, ,ZHES GSUNGS TE, SNGAR LTAR 'OD GSAL GYI MAN NGAG STON PA'I GZHI DBANG GSUM PA THOB PA DE LA DE'I MAN NGAG SBYIN PAR BYA ZHES PA'I DON NO, ,'O NA SPYOD BSDUS LAS DE LTAR GSUNGS PA'I RJES SU PHYI NANG GI BYANG CHUB PA GNYIS KYI SGO NAS MNGON DU BYA RGYU'I THAMS CAD STONG PA DANG DE MNGON DU BYED PA'I RIM PA'AM THABS BSAM GTAN GNYIS BSTAN ZHING, DE'I MING GI RNAM GRANGS BSHAD PA'I MTHAR SLOB MAS NGO MTSAR BA'I CHED BRJOD BYAS PA'I 'OG TU, DE NAS RDO RJE SLOB DPON GYIS SLOB DPON GNYIS PA LTA BUR BLTAS NAS, DNGOS PO THAMS CAD DANG BRAL BA NAS, STONG PA NYID KYI RANG BZHIN NO, ,ZHES BYA BA'I TSIGS SU BCAD PA BRJOD CING, GNYIS SU MED PAR DMIGS TE SHES RAB YE SHES KYI DBANG BSKUR BA SBYIN PAR BYA'O, ,ZHES 'OD GSAL GYI GDAMS NGAG BSTAN PA'I RJES SU SHES RAB YE SHES KYI DBANG BSKUR BAR GSUNGS PA 'DI JI LTAR YIN ZHE NA, SPYOD BSDUS 'GYUR RNYING LAS, SHES RAB DANG YE SHES KYI DBANG BSKUR BA ZHES GSUNGS PA LA, BOD KHA CIG RIG MA LAG TU GTAD PA SHES RAB KYI DBANG DANG, DE DANG SNYOMS PAR ZHUGS PA YE SHES
, ,KYI DBANG DU 'DOD PA DANG, RGYA GAR BA KHA CIG DBANG GSUM PA SHES RAB DANG BZHI PA YE SHES KYI DBANG DU 'DOD PA LA RTZOD PA SNGA MA 'JUG PAS LAN BRJOD DGOS SO, ,BOD KYI BLA MA KHA CIG SNGAR 'OD GSAL BSTAN PA NI TSIG GIS BSTAN PA YIN LA, 'DIR NI PHYAG RGYA LA BRTEN NAS NYAMS MYONG SKYE BA YIN ZHES ZER MOD KYANG, DBANG GSUM PA PHYAG RGYA LA BRTEN NAS 'OD GSAL STON PA'I SNGON DU BSKUR BA SNGAR LTAR GSUNGS PAS MI 'THAD DO, ,'O NA GANG YIN SNYAM NA, RIM PA 'DI NYID DU 'CHAD PAR 'GYUR BA LAS KYANG, BYANG CHUB SEMS NI ZHES SOGS DANG, DNGOS PO THAMS CAD DANG BRAL BA ZHES SOGS KYIS BYANG CHUB KYI SEMS DON DAM PA BLA MA LAS LON PAR GSUNGS LA, DE NYID TSIG PHYI MA RNAMS KYIS STON PAR SPYOD BSDUS LAS GSUNGS PAS, SHES RAB YE SHES KYI DBANG LA DPE DON GNYIS SU YOD PA'I DON GYI LHAN SKYES DON DAM BYANG CHUB KYI SEMS KYI DBANG SLOB MAS LEN PA LA SLOB DPON GYIS BSKUR BA'O, ,BSHAD RGYUD RDOR PHRENG LAS KYANG, BCU GSUM PA NI YANG DAG SBYOR, ,BCU BZHI PA NI DON DAM STE, , ZHES BCU GSUM PA DBANG GSUM PA NI PHYAG RGYA DANG SBYOR BA LAS BYUNG BA'I YE SHES DANG, BCU BZHI PA DBANG BZHI PA NI DON DAM GYI LHAN SKYES LA BSHAD DO, ,DE LTAR NA DNGOS PO THAMS CAD DANG BRAL BA ZHES SOGS SLOB DPON GYIS BRJOD PA NI DE'I DON BSHAD NAS DON GYI LHAN SKYES KYI GO BA SKYED PA'O, ,GNYIS SU MED PAR DMIGS TE ZHES PA NI BDE STONG DBYER MED TZAM MIN GYI GNYIS SU MED PA'I YE SHES ZUNG 'JUG LA NGO SPROD PA'O, ,SLAR YANG ZHES PA NI SNGAR DPE'I SHES RAB YE SHES BSKUR BA'I DUS SU'ANG BDE STONG DBYER MED KYI
LHAN SKYES BSKYED PA YIN LA, DE LA'ANG DON DAM PA BYANG CHUB KYI SEMS ZHES PA'I THA SNYAD BYED DE, SEMS DBEN GYI YE SHES GSUM LA DON DAM BYANG CHUB KYI SEMS ZHES GSUNGS PA BZHIN NO, ,DES NA DE LA BLTOS NAS GSUNGS SO, ,SPYOD BSDUS LAS, DBANG GSUM PA BSKUR BA LA 'OD GSAL GYI SKOR BSHAD PA'I 'OG TU BZHI PA BSKUR BA LTAR BSHAD CING, RIM PA 'DIR YANG 'OD GSAL GYI GDAMS PA BZHI DANG, DE LAS SGYU MA'I SKUR BZHENGS PA'I TSUL BSHAD ZIN PA'I 'OG TU DON DAM BYANG CHUB KYI SEMS KYI DBANG BSKUR BAR BSHAD PA NI, BSHAD PA'I RIM PA TZAM YIN GYI LAG LEN GYI RIM PA NI DBANG GSUM PA BSKUR BA'I MJUG THOGS NYID DU DBANG BZHI PA BSKUR BA YIN NO, ,DE LTA MA YIN NA DBANG BZHI PA MA BSKUR BA'I SNGA ROL TU CHU LAS NYA LDANG BA'I TSUL DU ZUNG 'JUG GI SKUR BZHENGS PA'I TSUL BSHAD PA'I SKYON YOD DO, ,GNYIS PA LA GNYIS, SLOB MAS MCHOD BSTOD GSOL BA GDAB PA DANG, SLOB DPON GYIS MAN NGAG JI LTA BA BZHIN BSHAD PA'O, ,DANG PO LA GNYIS, MCHOD CING BSTOD PA DANG, GSOL BA GDAB PA'O, ,DANG PO NI, DBANG BSKUR YANG DAG THOB NAS NI, ,ZHES PA NAS MNYES PAR BYA ZHES PA'I BAR GYIS MTSAMS SBYAR NAS, KHAMS GSUM LAS NI RNAM GROL ZHING, ZHES PA NAS, ,NAM MKHA' MNYAM PA'I THUGS MNGA' BA, ,DMIGS MED KHYOD LA PHYAG 'TSAL LO, ,ZHES PA'I TSIGS BCAD BZHIS BSTOD PA BSTAN TO, ,LAS DANG ZHES PA BZHIS SKU RDO RJE DANG, PHUNG PO ZHES PA BZHIS GSUNG RDO RJE DANG, JI LTAR ZHES PA BZHIS THUGS RDO RJE'I SGO NAS BSTOD PAR LAKshM'IS BSHAD DE DE'I 'GREL PAR, RNAM BRTAGS MED CING ZHES PA BZHI MED DO, ,GNYIS PA NI, EEEEEM BRTAGS MED CING ZHES PA BZHI MED DO, ,GNYIS PA NI, THAMS
, ,CAD STONG PA'I RANG BZHIN CAN, ,MNGON RDZOGS BYANG CHUB LTA 'DOD PA'I, ,SLOB MAS THAL SBYAR BSTOD NAS NI, ,SLAR YANG BLA MA BSKUL BAR BYA, ,ZHES MTSAMS SBYAR RO, ,DE NAS LAS DANG SKYE LAS ZHES PA TSIGS BCAD GSUM GYIS BSTOD DE, MGON PO CHEN PO DANG SLOB DPON CHEN PO DANG RDO RJE CHEN PO GSUM GYIS NI RDO RJE GSUM GYI RANG BZHIN DU SHES PAR BYA'O, ,ZHES 'CHAD DO, ,GNYIS PA LA BZHI, 'OD GSAL GYI GDAMS NGAG BZHI BSTAN PA, 'OD GSAL DU ZHUGS KYANG SEMS CAN GYI DON 'GRUB PA'I TSUL, BYA BA THAMS CAD 'OD GSAL GYI GZHI LA GNAS NAS BYA BA DANG, DON DAM BYANG CHUB KYI SEMS KYI DBANG BLANG BA'O, ,DANG PO LA GSUM, MNGON DU BYA RGYU'I 'OD GSAL GNYIS DANG, 'OD GSAL GYI DE NYID THOB PA'I PHAN YON DANG, 'OD GSAL MNGON DU BYED PA'I BSAM GTAN GNYIS BSTAN PA'O, ,DANG PO LA GNYIS, PHYI'I MNGON PAR BYANG CHUB PA DANG, NANG GI MNGON PAR BYANG CHUB PA'O, ,DANG PO NI, DE LTAR ZHES PA BZHIS MTSAMS SBYAR NAS, MTSAN MO ZHES SOGS GSUNGS SO, ,'DI'I PHYI'I MNGON PAR BYANG CHUB PA NI PHYI'I PHYAG RGYA LA BRTEN NAS BYANG CHUB PA STE, SPYI GTZUG NAS BYANG SEMS 'DZAGS PA'I DUS SU BDE BA MYONG BA NI MTSAN MO SNANG BA'I CHA'O, ,BYANG CHUB KYI SEMS KYIS YAN LAG THAMS CAD KYI TSIGS LA KHYAB PA'I DUS SU DGA' BA NYAMS SU MYONG BA NI SNANG BA MCHED PA STE GSAL BA NYI MA'I 'OD ZER GYI SNANG BA DANG 'DRA BA'I NYIN MO'I RANG BZHIN DU SHES PAR BYA'O, ,DE'I RJES LA RDO RJE'I RTZA BA'AM DBUS SU PHYIN PA NA SNANG BA NYER THOB KYI DGA' BA BYUNG BA NI NYIN MTSAN LAS 'DAS PA'I MUN PAS BRGYAL BA LTA BU'O, ,SKAD CIG
MA GSUM PO DE'ANG RANG RANG GI BAG LA NYAL GYI RANG BZHIN RNAMS KYIS 'GRO BA STE DE DANG LHAN CIG GNAS PA'O, ,RDO RJE NOR BU'I NANG NA GNAS PA'I TSE NI MTSAN MO LA SOGS PA'I SGRAS BSTAN PA'I YE SHES GSUM DANG BRAL BA, BYANG CHUB KYI RANG BZHIN GYI SKAD CIG NI RNAL 'BYOR PA'I YE SHES KYIS RTOGS PAR BYA BA'I YUL BLA MA'I ZHAL NAS THOB CING BSGOM PAR BYA BA'I 'OD GSAL LO, ,DE NYID RGYAS PAR 'CHAD PA NI MTSAN MO ZHES PA GSUM STE RANG BZHIN DANG SNANG BA'I NYON MONGS MED PA'I SKAD CIG MA DER NI SLOB DPON GYIS SLOB MA LA YANG DAG PA'I MTHA' DE BZHIN NYID BSHAD PAR BYA'O, ,SKAD CIG MA DE NI MTSAN MO DANG NYIN MO DANG MTSAMS KYI NGO BO SNANG BA GSUM DANG BRAL BA'I 'OD GSAL SNGA DRO'I MTSAMS SO, ,RIM PA 'DIS PHYI'I MNGON PAR BYANG CHUB PA'I RIM PA SHES PAR BYA'O, ,ZHES LAKshM'IS 'CHAD DO, ,GNYIS PA NI, NANG GI BDE BA RTOG BRAL SANGS RGYAS BYANG CHUB SKAD CIG DAG GIS THOB PAR 'GYUR, ZHES GSUNGS TE NANG GI SANGS RGYAS BYANG CHUB NI 'OD GSAL BA'I SKAD CIG DAG GIS THOB PAR 'GYUR, DE'ANG NYON MONGS PA'I RNYOG PA DANG BRAL BA'I BDE BA CHEN PO'O, ,NANG GI BYANG CHUB CES PA'O NI YE SHES KYI PHYAG RGYA'I RIM PA'AM MTSAN MA LNGA'I GO RIM GYIS PHYAG RGYA CHEN PO'I RIM PA'O ZHES LAKshM'IS BSHAD DO, ,RJE 'GOS KYI BZHED PAS NYIN MO LA SOGS PA PHYI'I DPE'I SGO NAS 'OD GSAL NGES PAR BYED PA NI PHYI'I MNGON BYANG DANG, NANG GI RTAGS KYI SGO NAS NGES PAR BYED PA NI NANG GI MNGON BYANG DU BZHED DO, ,'DIR SPYOD BSDUS LAS, DE LA DANG PO PHYI'I BSTAN PAR BYA STE, THO RANGS KYI THUN MTSAMS NI MA RIG PA MUN PA'I SNANG BA NAS, JI SRID NYI MA GSAL BAR MA GYUR
, ,PA STE DE LA 'OD GSAL BA DRI MA MED PA'I RNAM PA GSAL ZHING, LUS DANG NGAG DANG YID DANG BRAL BA THAMS CAD STONG PA'I MTSAN NYID CAN NO, ,NYI MA SHAR BA LA SNANG BA MCHED PA'O, ,NYI MA NUB PA'I THUN MTSAMS SU MA RIG PA'O, ,ZLA BA SHAR BA LA SNANG BA'O, ,DE LTAR STONG PA NYID RNAM PA BZHI'I PHYI ROL NGES PAR BSTAN PA BSHAD NAS, DA NI NANG GI MNGON PAR BYANG CHUB PA SO SO RANG GIS RIG PAR BYA BA'I MTSAN NYID RIM PA 'DIS BSTAN PAR BYA STE, DE LA RIM PA 'DI'O, ,DANG PO SMIG RGYU LTA BU LA 'OD ZER LNGA'I TSOGS DANG LDAN PAR MTHONG NGO, ,GNYIS PA NI, SNANG BA STE ZLA BA'I 'OD ZER LTA BU'O, ,GSUM PA NI, SNANG BA MCHED PA STE NYI MA'I 'OD ZER LTA BU'O, ,BZHI PA NI, SNANG BA THOB PA STE MUN PA LTA BU'O, ,DE NAS MUN PA DANG BRAL BA'I SKAD CIG LA 'OD GSAL BA STE, SHIN TU GSAL BA RTAG TU SNANG BA'I MTSAN NYID CAN DON DAM PA'I BDEN PA'I RANG GI MTSAN NYID YE SHES KYI MIG GIS MTHONG NGO, ,ZHES PHYI NANG GI MNGON BYANG GI KHYAD PAR GSUNGS TE, MNGON PAR BYANG CHUB PA'I RIM PAR NANG GI MNGON BYANG MI GSAL BA GSAL BAR MDZAD PA'O, ,LUNG DE DAG GIS THO RANGS LA SOGS PA BZHI LA YE SHES DE DAG SKYE BAR STON PA MIN TE, LUGS BZLOG DANG LUGS MTHUN GNYIS GANG GI'ANG SKYE RIM DANG MI MTHUN PAS SO, ,PHYI'I ZHAG GCIG LA DUM BU BZHIR BYAS NAS DE BZHI STONG PA BZHIR STAN PA'ANG MIN TE, THO RANGS KYI DUS MTSAMS LUS NGAG YID GSUM DANG BRAL BAR BSHAD PA MI 'GRIG PA'I PHYIR DANG, DE NI BYANG CHUB SKAD CIG YIN PAR BLA MA MCHOG BSHAD RNAL 'BYOR PA NYID YUL, ZHES BSHAD PA'I MTSAN NYID THO RANGS KYI THUN LA MA TSANG BA'I PHYIR RO, ,'O NA THO RANGS LA SOGS
PA BZHI PO DE STONG PA BZHI'I DPER BSHAD PA YANG GZHUNG GNYIS LAS MI 'DUG PAS STONG PA BZHI DUS MTSAMS BZHIR BSHAD PA JI LTAR YIN SNYAM NA, 'DI NI STONG PA BZHI PHYI ROL GYI DPE'I SGO NAS NGES PAR BYED PA DANG, NANG GI RNAL 'BYOR PA'I TING NGE 'DZIN LA 'CHAR TSUL GYI RTAGS KYI SGO NAS NGES PAR BYED PA LA, PHYI DANG NANG GI MNGON PAR BYANG CHUB PA ZHES GSUNGS PAS NGES BYA'I DON 'OD GSAL LA PHYI NANG GNYIS YOD PA'ANG MIN LA, DBANG DUS KYI STONG PA BZHI NGOS 'DZIN PA'ANG MIN TE, DBANG GSUM PA LA BRTEN NAS DGA' BA BZHI BSKYED ZIN PA'I 'OG TU 'OD GSAL STON PA'I PHYIR GSOL BA BTAB PA LA DE'I MAN NGAG STON PA YIN PA'I PHYIR DANG, DBANG GSUM PA BSKUR BA NI 'DI'I GDAMS NGAG 'CHAD PA'I SNGON 'GRO YIN PA'I PHYIR RO, ,DES NA PHYI'I MNGON BYANG GI STONG PA BZHI DBANG GSUM PA LA BRTEN NAS SKYES PA'I YE SHES LA 'CHAD PA MI 'THAD DO, ,PHYI'I DUS BZHI DANG STONG PA BZHI DPE DON DU SBYOR BA GZHUNG GNYIS LAS SKABS 'DIR MA BSHAD KYANG, SPYOD BSDUS LAS DUS TSIGS GZHAN GSUM GYI DUS KYI NYI 'OD DANG ZLA 'OD DANG SMAG GI MUN PAS KHYAB PA'I NAM MKHA' DANG STONG PA GSUM DPE DON DU SBYOR BA SEMS DBEN GYI SKABS SU BSHAD LA, DES THO RANGS KYI DUS DANG STONG PA BZHI PA DPE DON DU SBYOR BA SHES PAR NUS SO, ,DES NA MTSAN MO SNANG BA'I CHA STE GSAL BA NYI MA'I ZER 'GYED SNANG BA MCHED PA YIN, MTSAMS NI SNANG BA THOB PA RANG GI RANG BZHIN RNAMS KYIS LAN CIG MIN PAR 'GRO, ZHES PAS DUS TSIGS GSUM DANG SNANG BA GSUM SBYAR LA, MTSAN MIN NYIN PAR MA YIN MTSAMS MA YIN, ,ZHES SOGS KYIS NI STONG PA BZHI PA DANG THO RANGS SBYAR BA YIN TE,
, ,MTSAN MO'I MUN PA MA LUS 'DAS SHING MTSAMS KYI SNANG BA GANG DU 'DAS PA DANG, JI SRID NYI MA MA SHAR SKAD CIG ,CES GSUNGS PA'I PHYIR RO, ,DE LA MTSAMS KYI SNANG BA NI NYI 'OD NUB PA'I MTHA' NAS MTSAN MO'I THUN GNYIS PA LA MA SLEBS PA'I BAR MTSAMS KYI MUN PA STE, SNANG MUN GNYIS KYI SNANG BA MIN GYI MIG GI DBANG PO LA SNANG BA TZAM MO, ,MTSAN MO'I MUN NAG NI THUN GNYIS PA NAS THO RANGS KYI THUN LA MA SLEBS TSUN CHAD KYI MUN PA'O, ,DE GNYIS GANG DU ZAD NAS NYI 'OD KYI SNANG BAS MA SLEBS PA'I BAR NI THO RANGS KYI THUN YIN LA, DE NI SPYOD BSDUS LAS THO RANGS KYI DUS NGOS BZUNG BA DANG DON GCIG GO, DE LTA NA NYI 'OD THOG MAR SLEBS NAS MA NUB KYI BAR DANG DE NUB NAS SMAG 'THUG PO MA SANGS KYI BAR DANG, DE SANGS TE ZLA 'OD SHAR NAS DE MA NUB KYI BAR DU NA MKHA' DRI MA MED PA DE NYI 'OD DANG ZLA 'OD SMAG GI MUN PAS NON PA'I DBANG GIS NAM MKHA'I RANG MDOG JI LTA BA BZHIN MI 'CHAR BA DANG 'DRA BA STONG PA GSUM GYI DUS SU SEMS KYI STONG NYID KYI NGANG TSUL JI LTA BA BZHIN MI 'CHAR LA, SNGAR BSHAD PA LTAR GYI THO RANGS KYI DUS MTSAMS LA SNANG BA GSUM PO ZAD PAS NAM MKHA' GA-YA' DAG GI RANG MDOR JI LTA BA BZHIN 'CHAR BA BZHIN DU, SNANG BA GSUM DAG PA'I MTHAR THAMS CAD STONG PA'I SKAD CIG DRI MA MED PA LA'ANG SEMS KYI DE KHO NA NYID JI LTA BA BZHIN 'CHAR BAR 'GYUR RO, ,PHYI'I DPES MTSON PA DE BZHIN DU NANG DU'ANG 'CHAR BA'I TSUL NGES PAR BYED PA NI NANG GI'O, ,DE 'BYUNG BA'I RIM PA NI DANG POR SMIG RGYU LTA BU LA 'OD ZER LNGA'I TSOGS DANG LDAN PAR MTHONG ZHES GSUNGS NAS, DU BA DANG MKHA' SNANG DANG, MAR ME DANG SPRIN
MED PA'I NAM MKHA' LTAR SNANG BA'I RTAGS BZHI LAS MA BSHAD KYANG, RGYUD PHYI MA LAS 'OD GSAL DU 'JUG PA'I RTAGS LNGA GSUNGS PAS RTAGS GZHAN YANG DGOS SO, ,DE'ANG SGRON GSAL LAS, SA CHU LA THIM PA DANG, CHU ME LA THIM PA DANG, ME RLUNG LA THIM PA DANG, RLUNG KUN TU SNANG BA GSUM DU SONG BA DANG, RANG BZHIN RNAMS KUN TU SNANG BA LA THIM PAS RTAGS LNGA 'BYUNG BAR BSHAD DO, ,DE LA RLUNG SNANG BA GSUM DU SONG BA NI RANG BZHIN GA-YO BYED KYI RLUNG LOG NAS SNANG BA'I RLUNG TZAM DU SONG BA'O, ,DE NAS RANG BZHIN SNANG BA LA THIM PA NI, RANG BZHIN BRGYAD CU'I RTOG PA LOG NAS SNANG BA'I YE SHES TZAM DU SONG BA'O, ,SPRIN MED PA'I NAM MKHA' NI NAM MKHA' GA-YA' DAG PA BZHIN DU SNANG BA'I DPE YIN LA, SNANG BA GSUM GA'I DUS SU'ANG NAM MKHA' GA-YA' DAG BZHIN DU SNANG BAR 'DRA'ANG ZLA 'OD LA SOGS PA GSUM GYIS KHYAB PA'I NAM MKHA' GA-YA' DAG BZHIN DU SNANG BAS NA, RTAGS DE 'OD GSAL LA SBYOR MI DGOS SO, ,DE'I PHYIR RTAGS LNGA GA 'OD GSAL SNGON DU 'GYUR BA'I RTAGS SU BYA'O, ,DE LTAR NA ZLA BA'I 'OD ZER LTAR SNANG BA'I YE SHES SKYES PA'I SNGON DU RTAGS BZHI 'CHAR BA YIN LA, DE BZHI SPYOD BSDUS SU SMIG RGYU LTA BU LA ZHES PAS GCIG TU BSDUS NAS GSUNGS SO, ,'DI LTAR SMIG RGYU ZHES PAS NI SA CHU LA THIM PA'I RTAGS DKAR SNGO'I 'OD ZER DANG LDAN PAR MTHONG NGO, ,CHU ME LA THIM PA NA SNGO SKYE DU BA LTA BU'I 'OD ZER DANG LDAN PAR MTHONG NGO, ,ME RLUNG LA THIM PA NA SRIN BU ME KHYER LTA BUR DMAR PO'I 'OD ZER DANG LDAN PAR MTHONG NGO, ,RLUNG THIM PA NA MAR ME LTAR DMAR SER GYI 'OD ZER DANG LDAN PAR MTHONG NGO, ,RTAGS DANG PO GNYIS KYI SKABS SU NAG PO'I 'OD ZER
, ,YANG MTHONG BAS 'OD ZER LNGA'O, ,DE NAS RANG BZHIN THIM PA'I DUS SU THOG MAR ZLA 'OD KYIS KHYAB PA'I NAM MKHA' LTAR MTHONG LA, SNANG BA'I SEMS MCHED PA'I SEMS BYUNG LA THIM PA NA NYI 'OD KYIS KHYAB PA'I NAM MKHA' BZHIN DANG, MCHED PA NYER THOB MA RIG PA LA THIM PA'I TSE, SMAG 'THUG POS KHYAB PA'I NAM MKHA' SPRIN MED BZHIN DU SNANG BA 'BYUNG NGO, ,SA CHU LA THIM PA SOGS RJES MTHUN PA NI GZHI DUS KYI PHO MO SBYOR BA DANG GNYID DU 'GRO BA'I DUS DANG BRGYAL BA LA SOGS PA'I SKABS DANG, LAM DUS SU THOG MAR DBANG GSUM PA BSKUR BA DANG, RDOR BZLAS MAN CHAD DU'ANG 'BYUNG MOD KYANG, MTSAN NYID PA NI GZHI DUS KYI 'CHI BA'I DUS DANG, LAM DUS SU SEMS DBEN NAS BRTZAMS TE 'BYUNG BA YIN NO, ,SA CHU LA THIM ZHES SOGS LA 'JAM DPAL ZHAL LUNG LAS, PHYIN CI LOG NI LDOG 'GYUR TE, ,ZHES SOGS KYI SA LOG PA DANG CHU LOG PA SOGS KYI THA SNYAD KYANG MDZAD LA, DE'I DON RANG GI LUS KYI SA'I KHAMS KYIS RNAM SHES KYI RTEN BYED PA'I NUS PA LOG NAS DES RNAM SHES KYI RTEN BYED PA'I NUS PA CHU LA 'PHOS PA LA SA CHU LA THIM PA ZHES GSUNGS TE, ME RLUNG LA THIM PA'I BAR DU'ANG DE BZHIN NO, ,RNAM GZHAG RIM PAR SA THIM PA DANG, CHU THIM PA SOGS KYI THA SNYAD KYANG GSUNGS SO, ,RLUNG THIM ZHES PA'I RLUNG NI LUS KYI RLUNG GANG YIN LA MI BYED KYI SNA BUG DANG MIG LA SOGS PA'I SGOR RGYU BA'I RLUNG RANG BZHIN GYI RTOG PA DNGOS SU GA-YO BAR BYED PA RNAMS KYIS RNAM SHES KYI BZHON PA BYED PA'I NUS PA LOG NAS SNANG BA GSUM GYI BZHON PA'I RLUNG SHIN TU PHRA BA LA DE'I NUS PA 'PHOS PAS RLUNG SNANG BA LA THIM ZHES PA'AM
DER SONG ZHES GSUNGS SO, ,DE LTAR RGYU LOG PAS 'BRAS BU RNAM SHES KYI RTOG PA RNAMS RE ZHIG LOG PA NI RANG BZHIN THIM PA YIN LA, RANG BZHIN SNANG BA LA THIM PA NI, RANG BZHIN GYI RTOG PAS YUL 'DZIN PA'I NUS PA DER SONG BA'O, ,STONG PA BZHI SNGA MA PHYI MA LA THIM PA'ANG DES SHES PAR BYA'O, ,LUS KYI SA LA SOGS PA DANG RNAM SHES KYI RTEN DANG BRTEN PA'I 'BREL PA LDOG PA NI SNGON GYI LAS NYON GYIS 'PHANGS PA'I 'BREL PA YIN GYI RNAM SMIN GYI LUS DE LA SEMS SPYIR BRTEN PA TZAM NI MIN LA, DE'ANG 'BREL PA RAGS PA LDOG PA SEMS DBEN NAS YOD LA, PHRA BA 'GOG PA NI 'OD GSAL GYI SKABS 'DI NAS 'ONG NGO, ,SNGON LAS KYI STOBS KYIS 'PHANGS PA'I RTEN DANG BRTEN PA'I 'BREL PA PHRA BA BKAG KYANG, RNAL 'BYOR PA DE'I RNAM SMIN GYI LUS LA SEMS BRTEN PA TZAM MI 'GAL LO, ,THABS GANG GIS THIM PAR BYED PA LA PHYI'I RKYEN PHYAG RGYA DANG NANG GI RKYEN RDOR BZLAS DANG SEMS DBEN BSGOM PA'I THABS NI DE DAG GI SKABS SU BSHAD ZIN LA, RIM PA 'DIR BSHAD PA'I THABS NI 'CHAD PAR 'GYUR RO, ,DE KHO NA NYID GRUB PAR MIG LA SOGS PA'I DBANG PO RNAMS THIM PA'I DON RANG RANG GI YUL LA 'JUG PA'I BYA BA BYED PA LA LOG PA LA BSHAD CING, RNAM GZHAG RIM PAR YANG DE DAG THIM PA NA RANG RANG GI YUL LA MI 'JUG PAR GSUNGS PAS SA CHU LA THIM PA SOGS KYI DON YANG SNGAR BSHAD PA BZHIN DU SHES PAR BYA'O, , 'DIR SNGA MA RNAMS SKU GSUNG THUGS KYI RDO RJE'I SEMS DPA' GSUM THIM PA'I SGO NAS RTAGS DANG RTAGS CAN GYI RIM PA SPYOD BSDUS DANG MTHUN PAR 'CHAD CING, DE DANG SGRON GSAL GNYIS MI MTHUN PAR 'DOD MOD KYANG MI MTHUN PAR MA MTHONG NGO, ,PHYI NANG GI
, ,DPE DANG RTAGS KYI RIM PA'I SGO NAS NGES PAR BYAS PA'I 'OD GSAL DE NYID KYI KHYAD PAR STON PA NI, THA MAR 'BYUNG DANG ZHES PA BZHIS THOG MTHA' BAR GSUM DU 'BYUNG MI 'BYUNG GNYIS KA GSUNGS TE, THOG MTHA' BAR GSUM NI SNANG BA GSUM YIN LA, DE GSUM DAG PAS NA MI 'BYUNG BA DANG KHYAB BYED KYI DNGOS GNAS 'BYUNG BAR LAKshM'IS BSHAD DO, ,KYEE RDOR LAS, YANG NA KUN GYIS RNAM PAR SPANGS, ,YANG NA THAMS CAD BDAG NYID GNAS, ,ZHES GSUNGS PA DANG DON 'DRA BAS LEGS PA YIN NO, , DBUS MIN 'BYUNG ZHES PA NI DBUS SU MI 'BYUNG BA'O, ,MTHA' MED 'BYUNG BA MTHAR MI 'BYUNG ZHES PA'I DON YIN TE 'GYUR GSAR BDE'O, ,DE NAS GANG LA 'GRO BA DANG NI ZHES PA BZHI'I DANG PO GNYIS NI 'GRO 'ONG LDANG 'JUG YIN LA, NI'I SGRAS GNAS PA BSTAN ZHING DE MED PAR BSTAN PAS RDOR BZLAS LAS KHYAD PAR DU BYED, DE BZHIN DU GNYIS PAS RANG BZHIN ZAD PA DANG SEMS DBEN GYI YE SHES 'PHEL BA MED CES SEMS DBEN DANG, GSUM PAS NI DNGOS PO KUN RDZOB PA DANG DNGOS MED SGYU MA STE DE GNYIS BKAG PAS SGYU LUS LAS KHYAD PAR DU BSTAN NO, ,BAG CHAGS DANG BCAS PA'I RANG BZHIN THIM PAS NGO MTSAR DANG, ZHI BA'I BDAG NYID YIN PAS NGO MTSAR MIN PA DANG, GNAS PA NI SKYE BA DANG MYUR 'GRO NI 'JIG PA STE DE DAG MED PA'O ZHES LAKshM'IS GSUNG YANG, GNYIS TSAN LNGA PO'I SPROS PA THAMS CAD KYIS STONG PA LA BYA'O, ,DE NAS GANG ZHIG YOD DANG ZHES PA BZHI LA RANG BZHIN RNAMS MED PAS YOD PA DANG BRAL, 'OD GSAL CHOS NYID KYI RANG BZHIN YIN PAS MED PA DANG BRAL, 'OD GSAL LA KUN
BYANG MI DMIGS PAS BSOD NAMS DANG SDIG PA'I GZUGS MIN PA DANG DE GNYIS KA'I NGO BOR MED PAS BSOD NAMS SDIG GI BDAG MIN ZHES 'CHAD DO, ,DANG PO GNYIS KYIS YOD MED KYI SPROS PA'I THA SNYAD DANG BRAL BA DANG, DE NAS GNYIS KYIS LAS GNYIS KYI 'BRAS BU'I NGO BOR MED PA DANG, DE NAS GNYIS KYIS LAS GNYIS KYI BDAG NYID DU MED PAR BSTAN TE, 'KHOR BA RGYU 'BRAS KUN GYIS MA GOS PA'O, ,GNYIS PA NI, DE LTA'I DE NYID THOB PA'I RNAL 'BYOR PA, ,ZHES SOGS TSIGS BCAD GSUM GYIS 'OD GSAL THOB PA'I RNAL 'BYOR PA'I BSNGAGS PA STON NO, ,GSUM PA NI, MAN NGAG THOB PA ZHES GSUNGS TE, SPYOD BSDUS LAS, DE LTAR THAMS CAD STONG PA MNGON DU BYAS NAS RIM PA 'DIS BSAM GTAN RNAM PA GNYIS LA DMIGS PAR BYED DO, ,ZHES GSUNGS PA'I TSIG DANG PO'I DON NI MAN NGAG THOB PA'I RJES THOB LA ZHES PA'I DON YIN PAS THAMS CAD STONG PA'I GDAMS NGAG THOB PA LA DE MNGON DU BYAS ZHES BTAGS PA'O, ,SLOB MAS RNAL 'BYOR RNAM PA GNYIS BSLAB PA NI 'OD GSAL MNGON DU BYED PA'I THABS BSAM GTAN GNYIS YIN PAS, 'DIR DBANG GSUM PA BSKUR NAS 'OD GSAL MNGON DU BYED PAR SMRA BA MIN NO, ,RIL 'DZIN NI MGO BO ZHES PA BZHIS STON TE, LTE BAR RTZIBS BRGYAD PA'I 'KHOR LO'I DBUS SU GNAS PA'I DBYANGS DANG PO LAS 'PHROS PA'I 'OD KYIS, RKANG PA NAS MGO BO'I BAR DU BSREG PA DANG, SLAR YANG LOG NAS SNYING GA'I BAR DU MI SNANG BAR BYAS PA LA LAKshM'IS 'CHAD DO, ,MGO PO NAS NI RKANG PA'I BAR, ,ZHES PAS NI BSDU PAR BYA BA'I LUS KYI YAS MAS KYI MTHA' BSTAN LA, JI SRID SNYING GAR PHYIN GYI BAR, ,ZHES PA NI, MGO NAS SNYING GA DANG, RKANG PA NAS SNYING GAR SDUD PA'I TSUL GYIS
, ,YANG DAG MTHA' LA 'JUG PAR BSHAD NA, SA'I DNGOS GZHIR BSHAD PA'I 'CHI RIM DANG MTHUN NO, ,RIL PO DANG RJES GZHIG GNYIS NI DUS KYI DBANG DU BYAS PA YIN PAS DUS GCIG DANG DUS RIM GYI SGO NAS RANG TZAM DANG RANG GZHAN GNYIS KA SDUD PA'O, ,RJES GZHIG NI, MI RGYU BA DANG ZHES PA BZHI STE, THOG MAR SNOD BCUD GZHAN 'OD GSAL DU BSDUS PA'I RJES SU RANG 'OD GSAL DU 'JUG PA'O, ,'O NA SPYOD BSDUS LAS CHU BO'I LTENG KA'I CHU LA THIGS PA GCIG THIM PA BZHIN DU RIM GYIS RJES SU GZHIG PAR GSUNGS PA JI LTAR YIN SNYAM NA, GANG GZHIG PAR BYA BA DE NANG NAS PHYI LA RIM PA BZHIN 'JIG PA'I DON YIN PAS SKYON MED DO, ,DBUGS KYI RLUNG NI ZHES SOGS KYIS NI RIL 'DZIN GYI 'JIG TSUL STON TE SPYOD BSDUS LAS RIL 'DZIN GYI SDUD TSUL DE LTAR GSUNGS PA'I PHYIR TE, 'DI NI GANG GZHIG BYA DE MTHA' NAS NANG DU SDUD PA'I RIM PA'O, ,BSAM GTAN GNYIS KYIS SDUD PA'I THABS NI, LAKshM'IS 'KHOR LO'I DBUS KYI AA YIG GI 'OD ZER GYIS SDUD PAR BSHAD NA, 'JAM DPAL ZHAL LUNG LAS SNYING GA'I SA BON GYI 'OD KYIS SDUD PAR BSHAD PA LTAR 'DIR YANG BYA'O, ,DE'ANG DAM TSIG SEMS DPA' YE SHES SEMS DPA' LA DANG, YE SHES SEMS DPA' TING NGE 'DZIN SEMS DPA' LA SDUD CING DE RIM GYIS 'OD GSAL DU SDUD PA YIN LA, DE NI MTHAR SNYING GA RU BSDUS NAS 'OD GSAL DU 'JUG PA YIN PAS SNYING GA'I GNAD LEGS PAR SHES NA 'DI 'DRA BA'I GDAMS PA RNAMS LA NGES PA RNYED PA YIN NO, ,GZHUNG GZHAN NAS RJES GZHIG GCIG PU BSHAD LA, 'DIR NI GNYIS GSUNGS PA GDAM NGA CAN YIN PAS GNYIS KA LA
SLOB PA'O, ,'DIR 'CHI RIM BZHIN DU SPROS PA SDUD PA'I THABS DANG PO NI RDO RJE'I BZLAS PA YIN LA, DE NAS PHYAG RGYA LAS YE SHES GSUM MTSON PA'ANG PHYI'I THABS DANG, MTSON PA'I YE SHES LA GOMS PAR BYED PAS KYANG RLUNG DBU MAR SDUD PAS SPROS PA SDUD PA'I THABS SO, ,DE RNAMS SNGON DU 'BYONGS PA'I RGYU MTSAN GYIS SKABS 'DIR NI, BSAM GTAN GNYIS KYI DMIGS PA NYID KYIS YANG DANG YANG DU BSDUS PA GOMS PAR BYED PA'O, ,DE LTAR GOMS PA LAS SA CHU LA THIM PA SOGS KYI RTAGS RNAMS 'CHAR RO, ,'OD GSAL LHAN CIG SKYES PA'I YE SHES LA BSNGAGS PA DANG, DE NYID LA GTZO BOR GOMS PAR BYA DGOS PA'I TSUL RNAMS GZHUNG GZHAN NAS MANG DU BSHAD KYANG, SA CHU LA THIM PA SOGS KYI THIM RIM GYI SGO NAS SPROS PA BSDUS TE 'OD GSAL DU 'JUG PA DANG, DE'I SNGA ROL GYI RTAGS 'CHAR TSUL DANG, PHYI'I DPES NGES PAR BYA TSUL DANG, SNANG BA GSUM DAG DGOS LUGS DANG, DE LTAR SDUD PA'I THABS RTZA BA RDOR BZLAS KYI GNAD RNAMS RDZOGS SHING GSAL BA DANG, THIM RIM GYI SGO NAS STONG PA GSUM LA ZHUGS PA'I MTHAR SGYU MA'I SKU SGRUB LUGS DANG, STONG PA BZHI PA'I MTHAR ZUNG 'JUG GI SKU SGRUB LUGS NI, 'PHAGS SKOR GYI GZHUNG LAS GZHAN DU CHES CHER MI GSAL BAS, LUGS MCHOG TU GYUR PA 'DI SHES PA LA RAG LAS PA YIN NO, ,'GRO DANG ZHES PA BZHIS NI BSAM GTAN NAM RNAL 'BYOR DE NYID 'GRO 'CHAG SOGS KYI SKABS SU'ANG BYA BAR BSTAN NO, ,GNYIS PA NI, RANG BZHIN BCAS 'OD DE DANG DE, ,ZHES PA BZHIS NI 'OD GSAL LAS LDANG TSUL SGYU LUS DANG 'DRA BAR SEMS CAN GYI DON DU LDANG BAR BYA BAR BSTAN LA, JI LTAR CHU KLUNG ZHES PA BZHIS NI 'OD GSAL LAS LDANG BA'I DPE BSTAN TO, ,RIGS LNGA'I
, ,SANGS RGYAS LA BLTOS PA ZHES PA NI, DE LAS LANGS PA'I SKU'I DBYE BA BSTAN TO, ,'O NA 'DI ZUNG 'JUG GI SKABS SU BSHAD PAR BYA RGYU MA YIN NAM SKABS 'DIR 'CHAD PA JI LTAR RIGS SHE NA, BDEN MOD KYANG, 'DIR 'OD GSAL GYI MNYAM RJES GNYIS KA 'CHAD PA YIN LA, DE LA 'OD GSAL LAS LDANG TSUL SHES DGOS PAS DE'I PHYIR DU BSTAN NO, ,SPYOD BSDUS LAS MNYAM GZHAG GI 'OD GSAL NYID BSHAD LA, SKABS 'DIR LDANG TSUL MA BSHAD PAR ZUNG 'JUG GI SKABS SU BSHAD PA YIN NO, ,GSUM PA NI, PHYAG RGYA 'CHING BAR BYED PA'AM, ,ZHES PA BZHIS PHYAG RGYA 'CHING ZHING SNGAGS ZLO BA DANG, GANG DE LAS GZHAN PA'I LAS TSOGS THAMS CAD KYANG, THAMS CAD STONG PA'I TING NGE 'DZIN LA GNAS NAS BYED PAR BSTAN TE, 'OD GSAL LAS LANGS PA DES BYED TSUL LO, ,THAMS CAD ZA ZHING KUN LA BLTA, ,ZHES PA BZHIS NI 'OD GSAL GYI TING NGE 'DZIN LA GNAS PA DES THAMS CAD ZA BA SOGS SU BSTAN TO, ,THAMS CAD BYED PA NI 'JIG RTEN DANG 'GAL MI 'GAL GYI SPYOD PA THAMS CAD DO, ,MTSAN MA KUN NI MGO REG LA SOGS PA LA 'CHAD DO, ,THAMS CAD STONG PA'I YE SHES LA GNAS PA NYID KYI DNGOS GRUB THAMS CAD 'GRUB BO, ,'DI NI RNAL 'BYOR MA'I RGYUD NAS, LHAN CIG SKYES PA'I YE SHES LA GNAS PAS DE LTAR 'GRUB PAR GSUNGS PA DANG DON GCIG GO ,'PHAGS SKOR LNGA'I GZHUNG RNAMS SU 'BAR 'DZAG GIS BSGRUBS PA'I LHAN CIG SKYES PA'I BDE BA'I PHYOGS MANG DU MA BSHAD PAR 'OD GSAL GYI THA SNYAD KYIS BSHAD PA LA LUGS 'DIR NI GZHUNG GZHAN NAS BSHAD PA LTAR BDE BA GTZO BOR LAM DU BYED
PA MA YIN NO SNYAM DU MI GZUNG STE, SNGAR BSHAD PA LTAR RLUNG GI DE NYID RDOR BZLAS KYIS GTUM MO'I ME SAD PAR BYED CING DE LAS BYANG CHUB KYI SEMS ZHU BA'I BDE BAS LAM BGROD PAR RDO RJE PHRENG BA LAS GSUNGS PA'I PHYIR DANG, DPAL MGON PO BDE BA CHEN POS KYANG, LHAN CIG SKYES PA'I BDE STONG DBYER MED KYI LAM DE NYID MNGON PAR BYANG CHUB PA'I LAM YIN PA 'DUS PA'I DON DU SHIN TU RGYAS PAR GSANG BA GRUB PA LAS BKRAL BA'I PHYIR DANG, DE NYID LA 'PHAGS PA LHAS KYANG TSAD MAR MDZAD PAR SNANG BA'I PHYIR RO, ,BZHI PA NI, BYANG CHUB SEMS NI DON DAM ZHES BYA BA, ,SKAL BZANG SLOB MA BZANG POS MAN NGAG THOB, ,THAL MO SBYAR NAS ME TOG 'DZIN PA YIS, ,BLA MA LAS NI SLAR YANG BLANG BAR BYA, ,DE NAS DNGOS PO KUN DANG RNAM BRAL ZHES PA NAS, STONG PA NYID KYI RANG BZHIN NO, ,ZHES GSUNGS TE PHYI MA 'DI 'DUS PA'I LE'U GNYIS PA LAS BYUNG BA'I BYANG CHUB KYI SEMS STON PA'O, ,'DI'I DON NI LAKshM'IS BLA MAS TSIGS BCAD DE BRJOD PA'I RJES ZLOS BYAS NAS, BYANG CHUB KYI SEMS 'DI LTA BU BDAG GIS GZUNG BAR BYA'O, ,ZHES BRJOD NAS, DON DAM PA'I BYANG CHUB KYI SEMS 'DZIN PAR BSHAD CING, BOD KYI BLA MA KHA CIG TSIGS BCAD 'DI BLA MAS BRJOD NAS SLOB MA LA PHYAG RGYA GTAD PA SHES RAB KYI DBANG DU 'DOD DO, ,RANG GI LUGS NI SPYOD BSDUS DANG BSTUN NAS BRJOD ZIN TO, ,GSUM PA NI, DE NAS RJES SU MTHUN PA'I YON, ZHES PA TSIGS BCAD GNYIS KYIS YON DBUL BA BSTAN TE, SBYIN PA DANG SBYIN PA CHEN PO DANG, SHIN TU BA'I SBYIN PA GSUM MO, ,BZHI PA NI, SLOB DPON LAS NI DRIN THOB CES PA RKANG PA BZHI STE, DANG PO GSUM GYIS DE KHO NA NYID KYI MAN NGAG BLA MA LAS THOB PA DE
, ,BSGOMS PA DANG, BZHI PAS DE LTAR BSGOMS PA'I PHAN YON BSTAN TO, ,GSUM PA MJUG GI DON NI, MNGON PAR BYANG CHUB PA'I RIM PA ZHES SOGS KYIS BSTAN NO, ,'DI NI GTZO CHER BSHAD RGYUD RDO RJE PHRENG BA LA BRTEN NAS MDZAD PA'O, ,MANGG'A LAm,, ,,