*, ,MAN NGAG GI MTHAR THUG BDAG BYIN RLABS BZHUGS, ,
, ,RJE BTZUN DAM PA DMIGS PA MED PA'I THUGS RJE CHEN PO DANG LDAN PA RNAMS KYI ZHABS LA DUS THAMS CAD DU GUS PAS PHYAG 'TSAL LO, ,RGYAL BA THAMS CAD KYI MKHYEN PA'I YE SHES THAMS CAD GCIG TU BSDUS PA'I NGO BO BCOM LDAN 'DAS 'JAM PA'I DBYANGS DANG, DBANG PHYUG BRGYAD DANG LDAN PA'I RDO RJE 'CHANG CHEN PO MGON PO KLU SGRUB YAB SRAS KYI ZHABS LA GUS PA CHEN POS SKYABS SU MCHI'O, ,MAN NGAG GI MTHAR THUG RANG BYIN GYIS BRLAB PA'I RIM PA LA GSUM, MTSAN GYI DON, GZHUNG GYI DON, MJUG GI DON NO, ,DANG PO NI, SVA NI RANG NGO, ,AA DHIshthA NA NI BYIN GYIS BRLAB PA'O, ,KRA MA NI RIM PA'O, ,'DI LA LAKshM'IS, BDAG NI 'OD GSAL TE DNGOS PO THAMS CAD KYI RANG BZHIN YIN PAS SO, ,DE LAS SGYU MA'I SKU GANG DU 'DZIN PA NI BDAG LA BYIN GYIS BRLAB PA'O, ,YANG NA BDAG NI RDO RJE 'CHANG LA SOGS PA'I SKU'O, ,DE NYID LA BYIN GYIS BRLAB PA NI SGYU MA LA SOGS PA'I DPE DANG SBYAR BA'O, ,ZHES 'CHAD DE, SNGA MA LTAR NA BDAG LA NI BDAG LAS ZHES PA DANG, BYIN GYIS BRLAB PA NI DES BSKYED PA'I DON YIN LA, PHYI MA LTAR NA BDAG LA SGYU MA'I DPE DON SBYAR BA'I DON TO, ,RGYUD GZHAN
, ,LAS KYANG BDAG BYIN GYIS BRLAB PA ZHES MANG DU 'BYUNG LA DE'I DON YANG MANG DU YOD NA'ANG 'DIR NI BDAG CES PA NI NGA'O SNYAM PA'I THA SNYAD 'DOGS PA'I GDAGS GZHIR GYUR PA'I LUS SAM SKU'O, ,DE LA BYIN GYIS BRLAB PA NI YE SHES TZAM GYIS SGYU MA LTA BU'I LHA'I SKUR BSKYED PA YIN TE, SPYOD BSDUS LAS, RANG BYIN GYIS BRLAB PA'I MAN NGAG YE SHES TZAM GYIS YID KYI RANG BZHIN GYI LHA'I SKU RDZOGS PAR 'GYUR BA, ZHES GSUNGS PA'I PHYIR RO, ,GNYIS PA LA BZHI, RTZOM PA LA 'JUG PA'I YAN LAG ,YAN LAG CAN GYI GDAMS PA DNGOS, DE STON PA'I BLA MA MNYES PAR BYA BA, MAN NGAG GI SNOD DANG SNOD MIN PA'I KHYAD PAR BSTAN PA'O, ,DANG PO LA GNYIS, MCHOD PAR BRJOD PA DANG, BRTZAM PAR DAM BCA' BA'O, ,DANG PO NI, PHYAG 'TSAL BA NI 'DUD PA STE KHYAD PAR GYI GZHI'O, ,GANG LA NA, RDO RJE 'CHANG CHEN PO RDO RJE 'CHANG LA'O, ,DE'ANG RDO RJE CAN RNAMS KUN GYI GTZO, ,ZHES 'DON PA LTAR NA, RDO RJE CAN KUN NI DE BZHIN GSHEGS PA LNGA'O, ,DE RNAMS KYI GTZO BO NI DRUG PA'O, ,RDO RJE SEMS DPA' DANG PO'I GTZO, ,ZHES PA LTAR NA, DANG PO'I MGON PO RDO RJE SEMS DPA'O, ,GNYIS PA NI, TE NI LHAG MA 'DREN PA STE PHYAG 'TSAL
NAS BDAG GIS BSHAD PAR BYA'O, ,ZHES SBYAR RO, ,GANG NA RANG BYIN GYIS BRLAB PA'I RIM PA'O, ,KUN SLONG GANG GIS NA, BRTZE BAS ZHES TE, RIM PA 'DI LA BRTZE BA KHO NA RTZA BA'I RGYU YIN TE, GZHAN DU NA SEMS DMIGS KYI RIM PA LA ZHUGS PAS SLAR YANG LHA'I SKU 'DZIN PA DGOS PA MED PA'I PHYIR RO, ,DGOS PA NI, SEMS CAN GYI DON DANG CHAD PA'I PHYOGS SPANG PA DANG, SNGON GYI SMON LAM 'BRAS BU DANG LDAN PA STE, DE NI BRTZE BAS BSHAD DO ZHES ZER RO, ,DE NI 'GRIG PAR MI SNANG STE, 'DI NI RIM PA 'DI BSHAD PA'I KUN SLONG YIN GYI SGYU MA'I SKUR LDANG BA'I KUN SLONG MIN PA'I PHYIR DANG, SEMS DMIGS TZAM GYIS GROL BA MI THOB PAS RANG DON LA'ANG SGYU MA'I SKU BSGRUB DGOS PA'I PHYIR RO, ,GNYIS PA LA GNYIS, MAN NGAG GI SNOD RUNG DU BYA BA DANG, DE LA MAN NGAG BSHAD PA'O, ,DANG PO LA GNYIS, MTSAN NYID DANG LDAN PAS SLOB MAS BLA MA MNYES PAR BYA BA DANG, MNYES PA LA YON PHUL TE DBANG BSKUR BA ZHU BA'O, ,DANG PO NI, MNYES PAR BYA ZHES DRANG NGO, ,GANG NA RDO RJE BLA MA'O, ,GANG GIS NA MTSAN NYID DANG LDAN PA'I SLOB MAS SO, ,MTSAN NYID DANG LDAN PA NI KHYAD PAR BZHI DANG LDAN PA STE, DANG PO KHO NAR RIM PA DANG PO LA BSLABS PA'I KHYAD PAR NI, BSKYED PA'I RIM PA'I RJES SU 'BRANGS NAS DBANG BSKUR BA THOB CING ZHES PAS STON TE DBANG BSKUR THOB NAS BSKYED RIM GYI RJES SU 'BRANGS PA STE RJES SU ZHUGS ZHES PA'I DON TO, ,RGYUD MANG DU THOS PA'I KHYAD PAR NI, BYA BA'I RGYUD LA SOGS PA'I RGYUD SDE RNAM PA BZHI'I DGONGS PA SHES PA ZHES PAS STON TO, ,'DIS NI DBANG RDZOGS PAR THOB PA SNGON DU BTANG BAR BSTAN NO, ,DBEN PA GSUM LA BSLABS
, ,PA'I KHYAD PAR NI, LUS DANG NGAG DANG YID RNAM PAR DBEN PA'I THOS PA 'DZIN PA ZHES PAS BSTAN TE, DE GSUM GYI MAN NGAG THOB NAS DE'I DON 'DZIN PA'O, ,THUN MONG MA YIN PA'I BDEN PA GNYIS KYI GDAMS NGAG LA MI PHYED PA'I DAD PA DANG LDAN PA'I KHYAD PAR NI, BDEN PA GNYIS LA LHAG PAR MOS PAS BSTAN NO, ,GNYIS PA NI, DE NAS DE MA THAG TU STE MYUR DU RIM PA 'DI'I GDAMS NGAG THOB PAR BYA BA'I CHED DU, RING NAS MNYES PAR BYAS PA'I BLA MA LA TSOGS 'KHOR GYI MCHOD PA CHEN PO BYAS TE, LO BCU DRUG MA PHUL NAS BSTOD PA 'DIS BSTOD PAR BYA'O ZHES SBYAR RO, ,DE YANG 'PHRENG BA NAS RJES GNANG GI BAR GYI DBANG DGU DANG BCAS PA'I GSANG DBANG THOB PA DE NAS BYA'O, ,DE DAG GI DON NI BSHAD ZIN TO, ,YON PHUL BA NI GSANG DBANG GI DON DU'O, , LAKshM'IS GSANG BA LA GSUM LAS NGAG GI GSANG BA NI BYANG CHUB KYI SEMS LA SPYOD PA DANG, YID KYI GSANG BA NI SHES RAB KYI DBANG BSKUR BA DANG, YE SHES KYI GSANG BA NI SHES RAB YE SHES KYI DBANG BSKUR BA'O, ,DE LTAR DBANG BZHI BSKUR BA LA RIM PA 'DI BSTAN GYI GZHAN LA MIN NO ZHES 'CHAD KYANG, 'PHAGS PA'I DGONGS PA NI RGYUD PHYI MA'I 'GREL PA LAS, DBANG GONG MA GNYIS MA BSKUR YANG GSANG DBANG BSKUR BA LA BDAG BYIN RLABS SBYIN PAR BYA BAR BSHAD PA LTAR YIN NO, ,GNYIS PA LA GSUM, SLOB MAS BSTOD CING GSOL BA GDAB PA, SLOB DPON GYIS MAN NGAG BSTAN PA, MAN NGAG THOB PA DANG MA THOB PA'I SKYON YON BSTAN PA'O, ,DANG PO LA GNYIS LAS BSTOD PA NI, KHONG STONG KHYOD KYI SKU LA MED, ,CES SOGS TSIGS BCAD LNGA STE RNAM
SNANG DANG 'OD DPAG MED DANG RIN 'BYUNG DANG DON YOD GRUB PA DANG MI BSKYOD PA LNGA'I SGO NAS BSTOD PAR 'CHAD DO, ,SNA TSOGS MIN LA SNYOMS 'JUG PA, ,ZHES BSGYUR BAS 'OD GSAL DU 'JUG PA'O, ,GSOL BA GDAB PA NI, KUN MKHYEN YE SHES PHUNG PO CAN, , ZHES PA NAS, 'GRO BA'I BLA MA BKA' DRIN MDZOD, ,CES PA'I BAR TSIGS BCAD GNYIS SO, ,GNYIS PA LA BZHI, RIM PA 'DI BLA MA KHO NA LAS RNYED DGOS PA, BLA MA LAS BTZAL DGOS PA'I RGYU MTSAN, 'OD GSAL GYI SNGON DU RIM PA 'DI STON DGOS PA DANG, BDAG BYIN RLABS KYI RIM PA NYID BSHAD PA'O, ,DANG PO NI, DE LTAR 'JIGS MED GSOL 'DEBS PA'I, ,ZHES PA NAS, DE NI THOB 'GYUR GZHAN GYIS MIN, ,ZHES PA'I BAR GYIS STON NO, ,GNYIS PA NI, RANG BYIN BRLAB PA'I RIM PA NI, ZHES PA BZHIS, RANG BYIN RLABS MA RNYED NA 'TSANG RGYA BA'I PHYIR DU NGAL BA BYAS PA DON MED PA DANG, DE NAS, RANG BYIN BRLAB PA'I RIM THOB PA, ,ZHES PA BZHIS RANG BYIN RLABS THOB NA TSE 'DI NYID LA 'TSANG RGYA BAR GSUNGS TE, RGYU MTSAN DES NA DE'I MAN NGAG NGES PAR BLA MA LAS BTZAL BAR BYA'O, PHAR PHYIN GYI THEG PAS KYANG MTHAR DAG PA'I SGYU MA'I SKU SGRUB DGOS PAS SGYU MA'I SKU MA RNYED NA MDO SDE SOGS LA SLOB PA'I NGAL BA DON MED PAR GSUNGS PA YIN NO, ,GSUM PA NI, RANG BYIN BRLAB PA'I TING 'DZIN DANG, ,ZHES PA BZHIS DE DANG 'OD GSAL GNYIS BDEN GNYIS DANG, DE'ANG RGYU 'BRAS SU BSTAN NO, ,DE NAS BZHIS RIM PA 'DIS 'OD GSAL THOB DGOS PAS SNGON DU 'DI BSTAN DGOS PAR BSTAN TE, 'OD GSAL DU 'JUG PA LA 'DI SNGON DU THOB DGOS ZHES PA'O, ,BZHI PA NI, 'GRO KUN RANG DBANG
, ,MED PA STE, ,ZHES PA BZHIS GZHI DUS KYI 'OD GSAL LAS GZHI DUS KYI SGYU LUS 'GRUB TSUL STON TE, LAM DUS KYI SGYU MA'I SKU SGRUB PA NI SBYANG GZHI JI LTA BA BZHIN DU BSGRUB DGOS PAS DE'I YAN LAG TU STON PA'O, ,'GRO BA KUN 'CHI BA'I 'OD GSAL GYI GZHAN DBANG CAN YIN PAS RANG DBANG DU MI 'BYUNG LA, DE'ANG SHI BA'I 'OD GSAL LAS BAR DO'I LUS GRUB PA'O, ,SEMS GANG GIS NI ZHES PA BZHIS THABS DANG BRAL BA LA DE 'KHOR BA'I BAR DO RANG DGA' BAR 'GYUR LA THABS DANG LDAN NA SGYU MA'I SKUR 'GYUR BAR STON NO, ,SKYE SHI GCIG NAS GCIG TU BRGYUD DE 'KHOR BA'I SEMS CAN NI SEMS DANG RLUNG TZAM GYI GZUGS TE, RANG BZHIN LA GZHAG GI DE LAS LOGS NA SKYE SHI BYED MKHAN MED PAR STON PA NI, 'DIR NI ZHES PA BZHI'O, ,SEMS KYI RANG BZHIN RNAM GNAS PA, ,NYID NI 'KHOR BAR SHES PAR BYA, ,ZHES SBYAR RO, ,SEMS RLUNG GI SBYOR BA STE GA-YO BA'I BYA BAS GA-YOS PA MED PAR RANG BZHIN GYI RTOG PA RNAMS MI SKYE LA, RLUNG SEMS LAS SKYES PA'I RTOG PAS NYON MONGS DANG LAS BSAGS TE 'KHOR BA NI, RLUNG GI SBYOR BA ZHES PA BZHI'O, ,'KHOR BA'I NGANG TSUL DE LTAR GNAS PA DE THABS MKHAS PA LA SGYU MA'I SKUR 'GYUR TSUL NI, RLUNG DANG YANG DAG LDAN PA YI, ,ZHES PA BZHIS STON TE, SNGAR BSHAD PA LTAR SEMS DBEN STONG PA GSUM GYI YE SHES BSKYED PA'I MTHAR LUGS LDOG GI SNANG BA GSUM RLUNG DANG LDAN PA DE, RNAL 'BYOR PAS GSAR DU THOB PA'I LUS SU 'BYUNG BA LA NI SGYU MA'I LUS SAM SGYU MA'I SKU ZHES BRJOD DO, ,SLAR YANG ZHES PA NI RNAL 'BYOR PA DE TSE SNGA MAR SHI BA'I 'OD GSAL
LAS RNAM SHES GSUM RLUNG DANG BCAS PA LAS GRUB PA'I LUS SHIG SNGAR THOB PAR MA ZAD CES PA'I DON NO, ,SEMS DBEN THOB PA'I RNAL 'BYOR PAS NGA'O SNYAM DU THA SNYAD 'DOGS PA'I GDAGS GZHIR GYUR PA'I RANG GI LUS RLUNG SEMS TZAM LA BSGRUB PA DE BAS NA, 'DI LTAR 'GRO BA KUN SGYU MA LTA BUR BLA NA MED PA'I RDO RJE THEG PA 'DIR BSHAD DE, ZHES SEMS CAN RNAMS SGYU MA BZHIN DU THEG PA 'DIR GSUNGS PA'I THUN MONG MA YIN PA'I SGYU MA'I DON NI 'GRO BA RNAMS RLUNG SEMS KYI LUS SU STON PA 'DI YIN ZHES PA'O, ,SGYU MA LTA BU'I TING NGE 'DZIN GRUB PAS NI 'GRO BA THAMS CAD RANG GIS THOB PA'I SGYU MA'I LUS DE DANG 'DRA BAR YANG MTHONG NGO, ,RIM LNGA'I 'GREL BYED KUN GYIS RANG BZHIN MED BZHIN DU SNANG BA SKABS 'DI'I SGYU MA'I DON DU BSHAD PAS NI 'DIR BSHAD PA'I SGYU LUS KYI DON GTAN NAS MI RNYED PAS, SPYOD BSDUS SU'ANG PHAR PHYIN GYI THEG PA'I SGYU MA DANG, BSKYED RIM PAS LHA'I SKU SGYU MA LTA BUR BLTA BA RNAMS KYIS BDAG LA BYIN GYIS BRLAB PA'I DON MI SHES PAR GSUNGS SO, ,DES NA SPYIR 'GRO BA THAMS CAD RLUNG SEMS TZAM LAS GRUB PA'I SGYU MA'I LUS CAN DANG, KHYAD PAR DU RNAL 'BYOR PAS TING NGE 'DZIN GYI STOBS KYIS RLUNG SEMS TZAM LAS GRUB PA'I RANG GI LUS SGYU MA'I SKUR SGRUB LUGS SHES PA NI GNAD KYI DON DU SNANG NGO, ,'O NA 'BYUNG BA DANG 'BYUNG 'GYUR RAGS PA'I LUS CAN GYI LUS 'DI RNAMS RLUNG SEMS TZAM LAS GRUB CES PA JI LTAR YIN ZHE NA, BSHAD PAR BYA STE, 'DI LA SEMS CAN GYI LUS RNAMS RLUNG SEMS TZAM LAS GRUB PA'I ZHES PA'I LUS NI SEMS CAN GYI LUS GANG YIN THAMS CAD LA MI ZER GYI SEMS CAN RNAMS KYI GNYUG MA'I LUS SO, ,
, ,DE YANG ME'I TSA BA DANG CHU'I GSHER BA NI DE DAG GI GNYUG MA'I MTSAN NYID DAM THA SNYAD PA'I RANG BZHIN ZHES BRJOD PA LTAR, SEMS CAN RNAMS KYI GNYUG MA'I LUS NI RLUNG SEMS TZAM ZHIG YIN GYI RANG DGA' BA'I LUS MIN NO, ,'DI'ANG PHYI ROL GYI DON BKAG NAS SGRUB PA MIN TE, GZUGS DANG SEMS GNYIS BDEN PA GNYIS SU YOD MED MTSUNGS PAS KHYAD PAR DBYE MI NUS PA'I PHYIR RO, ,'ON KYANG GZUGS RAGS PA'I LUS NI GZUGS MED KHAMS SU MED KYANG DE'I SEMS CAN LA LUS GZHAG DGOS PAS 'KHRUL BA'I PHYIR GNYUG MA'I LUS MIN NO, ,GZUGS CAN GYI KHAMS NA'ANG, BYED BZHIN DANG RKANG LAG LA SOGS PA'I RNAM PA CAN GYI LUS KYANG, MER MER PO LA SOGS PA'I SKABS SU MED KYANG, DER SEMS CAN GYI LUS YOD PAS SEMS CAN GYI GNYUG MA'I LUS MIN TE, 'BYUNG BA RAGS PA'I LUS GZHAN YANG BAR SRID LA SOGS PA'I SKABS SU MED PAS GNYUG MA'I LUS MIN PAR SHES PAR BYA'O, ,DES NA 'BYUNG BA 'BYUNG 'GYUR GYI LUS DANG 'GRO BA SO SO'I LUS DANG RGAN GZHON LA SOGS PA'I LUS NI CHU'I TSA BA LTAR RES 'GA' BA YIN GYI GNYUG MA BA MIN PAS GNAS SKABS SU'ANG 'BRAL RUNG YIN LA, RLUNG SEMS TZAM GYI LUS NI CHU'I GSHER BA LTAR DUS NAM YANG SEMS CAN GYI LUS LA MI 'KHRUL BAS GNYUG MA'I LUS SO, ,SHES PA DANG NGO BO DBYER MED DU 'JUG PA'I RLUNG SHIN TU PHRA BA NI MAR LA MAR BZHAG PA BZHIN DU SHES PA DANG 'DRER RUNG BAR SPYOD BSDUS LAS GSUNGS PAS, GZUGS MED NA'ANG YOD DE, DGONGS PA LUNG STON DANG RDO RJE PHRENG BAR KHAMS GSUM
GYI 'GRO BA THAMS CAD RLUNG SEMS KYI BDAG NYID DU LAN DU MAR GSUNGS PA'I PHYIR RO, ,DE NI DBANG PO'I GZUGS KYANG MIN LA DBANG PO LNGA'I SPYOD YUL DU'ANG MI SNANG ZHING, YID RANG DGA' BA'I YUL DU GZUGS SU SNANG BA'ANG MIN PAS GZUGS MED KHAMS GZUGS KYI 'DU SHES LAS 'DAS PAR GSUNGS PA DANG MI 'GAL LO, ,GAL TE RLUNG DE RNAM SHES GA-YOS PA'I BYA BA BYED PA TZAM LA ZER NA NI SEMS BYUNG SEMS PA LA RLUNG GI MING GIS 'DOGS PA ZAD PAS RLUNG MIN LA DE MA GTOGS PA'I RLUNG ZHIG YIN NA NI MTSAN NYID BRJOD DGOS SO ZHE NA, RDOR BZLAS DANG SEMS DBEN MTHAR PHYIN PA'I RNAL 'BYOR PAS 'OD ZER LNGA'I RNAM PA CAN DU MTHONG BAS NA SEMS BYUNG SEMS PA LAS MTSAN NYID THA DAD LA, SNA BUG GI SGO NAS RGYU BA SOGS KYI RAGS PA'I RLUNG THAMS CAD DANG BRAL BA 'OD GSAL GYI RLUNG ZHES GSUNGS PA'O, ,DBANG SHES KYANG RLUNG DANG 'DRES NAS 'JUG MOD KYANG, SEMS CAN GYI GNYUG MA'I LUS SU BSHAD PA'I SEMS NI YID KYI SHES PA NYID YIN TE, DBANG SHES NI GNYID 'THUG LA SOGS PA'I SKABS DU MAR LOG KYANG SEMS CAN GYI LUS MI LDOG PAS, GZUGS CAN RAGS PA'I LUS DANG 'DRA'O, ,DES NA 'BYUNG BA SHIN TU RAGS PA'I LUS DANG LDAN PA'I SKABS SU'ANG SEMS CAN DE'I GNYUG MA'I LUS NI RLUNG DANG YID KYI SHES PA DBYER MED DU 'JUG PA'I RLUNG SEMS TZAM YIN LA, DE DANG RAGS PA'I LUS GNYIS RTEN BRTEN PA'I 'BREL PA'ANG GNAS SKABS 'GA' ZHIG TZAM YIN GYI GNYUG MA PA MIN NO, ,GZHAN YANG RNAM SHES GZHAN GYI GRONG DU 'JUG PA'I NUS PA THOB PAS
, ,TING NGE 'DZIN TZAM GYI STOBS KYIS DE GNYIS KYI RTEN DANG BRTEN PA'I 'BREL PA GZHIG NUS LA, BSAD GSO NUS PA'I RNAL 'BYOR PAS KYANG DE GNYIS TING NGE 'DZIN GYI STOBS KYIS DPRAL BAR NUS KYANG RLUNG SEMS TZAM GYI LUS NI MI LDOG GO ,SEMS DBEN MTHAR PHYIN PA'I RNAL 'BYOR PAS KYANG, RNAM SMIN GYI LUS DANG SEMS GNYIS RTEN DANG BRTEN PAR SNGON GYI LAS KYIS 'PHANGS PA'I 'BREL PA RAGS PA TING NGE 'DZIN GYI STOBS KYIS 'GOG NUS TE, 'CHI BA'I DUS KYI THIM RIM BZHIN DUS CHU LA THIM PA SOGS KYI THIM RIM GYI SGO NAS STONG PA GSUM MNGON DU BYED NUS PA'I PHYIR DANG, DE LTAR THIM PA'I RIM PA NI RNAM SHES KYI RTEN BYED PA'I NUS PA RAGS PA LDOG PA YIN PA'I PHYIR RO, ,DE'I PHYIR SHI BA'I 'OD GSAL GYI MTHAR RNAM SMIN GYI LUS LAS LOGS SU BAR DO'I LUS 'GRUB PA BZHIN DU, STONG PA GSUM GYI MTHAR RNAM SMIN GYI LUS LAS LOGS SU RLUNG SEMS TZAM LAS GRUB PA'I SGYU MA'I SKU 'GRUB PA YIN NO, ,GAL TE 'BAD PA DE DAG GIS SEMS CAN RNAMS KYI GNYUG MA'I LUS RLUNG SEMS TZAM LAS GRUB TU CHUG KYANG DE LA SGYU MA ZHES ZER BA'I SGYU MA DANG 'DRA BA'I 'DRA LUGS GANG YIN ZER NA, DE LA RANG BZHIN GYIS GRUB PAS STONG BZHIN DU DER SNANG BA'I LHA SKU SGYU MA LTA BU'I DON LA NGES PA BRTAN PA NI, RIM PA DANG PO'I SKABS RNYED ZIN PAS 'DIR YANG DE GZHIR BZHAG TU YOD MOD KYANG SGYU LUS KYI SGYU MA'I DON MIN NO, ,'O NA GANG ZHE NA, SGYU MA'I SKU'I ZHAL PHYAG LA SOGS PA THOGS BCAS KYI LUS SU MA GRUB BZHIN DU, THOGS BCAS KYI LUS SU GRUB PA LTAR SNANG BA'I
RLUNG SEMS TZAM GYI LUS YIN PAS SGYU MA'I LUS ZHES BYA'O, ,DA LTA RAGS PA'I GZUGS SEMS KYI LUS DANG LDAN MOD KYANG, BLOS GNYUG MA'I LUS KYI PHYOGS BZUNG NAS 'GRO BA THAMS CAD DE'I NGO BOR BLTA ZHING, DE'ANG RLUNG 'OD ZER LNGA LAS GRUB PA'I 'JA' TSON LTA BU'I RDO RJE 'CHANG GI SKUR BLTA BA'O, ,YID LA BYED TSUL GTAM TZAM YANG RNYED DKA' BA'I DON 'DI SGYU LUS MA GRUB KYANG 'DI'I GDAMS NGAG PHYIN CI MA LOG PA RNYED NA, DA LTA NAS GOMS PAS NAM ZHIG NA SGYU MA'I SKU 'JA' LUS RDO RJE SEMS DPA'I GO 'PHANG 'GRUB PA'I BAG CHAGS THUN MONG MA YIN PA 'JOG BYED DU SNANG BAS, SHIN TU NGO MTSAR BA'I GNAS SO, ,YID LA BYED TSUL 'DI NYID RNAL 'BYOR MA'I RGYUD NAS LHAN SKYES KYI DGA' BA SKYES PA'I 'OG TU GANG SNANG THAMS CAD LA RO MNYAM GYI DE NYID BSGOM PAR GSUNGS PA DANG SPREL SHES NA CHES SHIN TU NGO MTSAR BA'I GNAS SO, ,GANG LA LHAN CIG SKYES PA'I BDE BA CHE, ,SKYES PA DE YI SKU LA PHYAG 'TSAL TE, ,GANG LA SGYU MA LTA BU'I TING NGE 'DZIN, ,SKYES PA DE LA SNYING NAS SKYABS SU MCHI, ,SPYOD PA BSDUS PA DPAL MCHOG SRUB SHING GIS, ,RIM GSUM SBAS CHU'I RGYA MTSO BSGRUBS PA LAS, ,BYUNG BA'I GDAMS DAG BDUD RTZI'I BUM PA 'DIS, ,'JIG RTEN MTHA' DAG 'CHI MED NYER THOB SHOG ,GZUGS DANG ZHES PA NAS, THAMS CAD SGYU MA LAS GZHAN MIN, ,ZHES PA'I BAR GYIS NI, PHUNG PO LNGA DANG KHAMS BZHI DANG, DBANG PO DANG YUL RNAMS SGYU MA LAS GZHAN MIN PAR BSTAN TO, ,'DIR 'GYUR RNYING LAS, SHES PA LNGA PO 'DI DAG STE, ,PHYI DANG NANG DU RNAM PHYE BA, ,ZHES BSGYUR BA LEGS SO, ,SHES PA LNGA NI DBANG SHES LNGA LA BYA BA'AM YANG NA YE
, ,SHES LNGA ZHES PA LTAR RO, ,SNGAR RLUNG SEMS GNYIS RNAL 'BYOR PA'I LUS SU BYUNG BA LA SGYU MA'I SKUR BSTAN ZHING, DE RGYU MTSAN DU BYAS NAS 'GO BA KUN SGYU MA LTA BUR THEG PA 'DIR GSUNGS SO ZHES BSHAD PAS, BCUD KYI 'JIG RTEN GYI DBANG DU BYAS NA DE RNAMS KYI GNYUG MA'I LUS RLUNG SEMS TZAM ZHIG YIN PA SGYU MA'I LUS KYI DON DU BYA LA, SNOD BCUD THUN MONG BA'I DBANG DU BYAS NA RLUNG SEMS GNYIS TZAM GYI RNAM 'PHRUL DU GYUR PA SGYU MA'I DON DU BYA'O, ,ME LONG NANG GI ZHES PA GNYIS KYIS NI SGYU MA'I SKU'I YAN LAG DANG NYING LAG RNAMS YONGS SU RDZOGS PA SOGS DPE DES SHES PAR BYED LA, DE NAS GCIG GIS NI SKU DE'I KHA DOG RNAMS 'JA' BZHIN DU DANG, DE NAS GCIG GIS NI SKU DE'I SNANG BA GDUL BYA LA GANG 'DUL GYIS STON PA CHU'I ZLA BA BZHIN DU BSTAN TE DPE'I GTZO BO GSUM MO, ,DPE DANG PO RGYAS PAR 'CHAD PA NI, ME LONG DRI MA MED PA LA, ZHES PA BRGYAD KYIS NI, RDO RJE 'CHANG GI SKU'I GZUGS BRNYAN ME LONG LA SHAR BA SLOB MA LA BSTAN NAS DE'I STENG NAS RANG BYIN GYIS BRLAB PA NGES PAR BYED PA'O, ,'DI LA CHAG GIS, DNGOS DANG DNGOS MIN LAS GROL BA'I, ,RDO RJE SEMS DPA' LEGS BRIS PA, ,RNAM PA KUN GYI MCHOG LDAN ZHING, ,SKU NI LTA BAS MI NGOMS PA'I, ,GZUGS BRNYAN GSAL BAR SNANG BA NI, ,SLOB MA BZANG PO DE LA BSTAN, ,ZHES BSGYUR BA BDE'O, ,RKANG PA DANG POS SKU DE RTAG CHAD GNYIS LAS GROL BA DANG, GSUM PAS MTSAN GYI CHA THAMS CAD RDZOGS PA SHES PAR BYED DE, SHA DANG RUS PA SOGS MED PA'ANG SHES PAR BYA'O, ,SKU 'DI DPE GZHAN GYIS NGES PAR BYED PA LA'ANG CHU ZLA SHAR BA'I SAR KHRID NAS STON PA DANG, 'JA'
SHAR BA'I SAR KHRID NAS STON MI DGOS KYI BLA MAS DE DAG DPER BZHAG NAS TSIG GIS BSHAD PAS CHOG PA BZHIN DU, GZUGS BRNYAN GYI DPES STON PA LA'ANG SPYOD BSDUS LAS, JI LTAR RAS RIS ME LONG GI NANG DU NYE BAR SNANG BA BZHIN DU, ZHES GSUNGS PA LTAR 'CHAD PA'I TSE DPE DON SBYOR BA TZAM YIN GYI, BRIS SKU'I GZUGS BRNYAN ME LONG LA SHAR BA MTHONG BA'I SAR BZHAG PAR BLTAS NAS MA BSGOMS NA 'DI'I GDAMS NGAG CHAD PA'I SKYON MED DO, ,GANG ZAG KHA CIG LA DE LTAR MA BYAS NA RDO RJE 'CHANG GI SKU BSGOM PA MI GSAL BAS DE GSAL BA'I PHYIR DU DE LTAR BSGOM PA YIN NA'ANG, GZHUNG GI LUGS KYIS BSKYED RIM PHRA THIG GI RNAL 'BYOR MTHAR PHYIN NAS DBEN GSUM 'BYENGS PA ZHIG GIS MAN NGAG 'DI BSGOM PA YIN PAS, DE LA NI LHA SKU CHE CHUNG GANG BSGOM YANG MI GSAL BA'ANG MED LA, LHA SKU SNANG LA RANG BZHIN MED PA TZAM NI RIM PA DANG PO NAS RNYED ZIN PAS DE STON PA MIN NO, ,'DI YANG SGYU LUS KYI GNAD THUN MONG MA YIN PA MA RNYID PA'I SKYON NO, ,'GREL PA RNAMS NAS KYANG DPE DON SBYOR BA TZAM GYI DON DU BSHAD PAS DPE GZHAN RNAMS DANG 'DRA'O, ,DE NAS SGYU MAR BSTAN PA'I MTSAN NYID KYIS, 'DI NYID NGES PAR MTSON PA STE, ,KUN RDZOB BDEN PA SGYU MA NYID, ,LONGS SPYOD RDZOGS PA'I SKU YANG DE, ,DE NYID DRI ZA'I SEMS CAN GYUR, ,RDO RJE'I SKU YANG DE NYID YIN, ,ZHES GSUNGS TE, SGYU MA DANG GZUGS BRNYAN LA SOGS PA'I DPE DU MAS MTSON PA'I SGYU MA'I SKU NI, SNANG MCHED THOB GSUM GYI YE SHES KYI MTHAR RLUNG SEMS TZAM LAS RDO RJE 'CHANG GI SKUR BSKYED PA 'DI NYID YIN LA, DE LA NI SKABS 'DIR KUN RDZOB KYI BDEN PA DANG, LONGS SKU DANG BAR DO'I SEMS CAN DANG RDO RJE'I SKU ZHES
, ,PA'I RNAM GRANGS KYIS GSUNGS PA YIN NO, ,'DI NI SEMS DBEN DANG 'OD GSAL GYI RDZOGS RIM GYIS 'CHI BA'I RIM PA BZHIN DU SPROS PA SDUD PA'I RIM PA SHES NA, DE GNYIS KYI MTHAR RLUNG SEMS TZAM GYI SKUR LANGS PA DE BAR DO JI LTA BA BZHIN DU 'DUG SNYAM DU SHES NAS DE LA DRI ZA'I SEMS CAN ZER BA'I RGYU MTSAN SHES LA, 'CHI BA CHOS SKUR 'CHAR BA SHES PA'I RGYU MTSAN GYIS SKU DE LA LONGS SKUR BSHAD PA'I DON YANG SHES SHING, 'CHI RIM BZHIN DU SPROS PA BSDUS PA'I 'OD GSAL DON DAM DU SHES PAS SKU DE KUN RDZOB KYI BDEN PAR YANG SHES NAS, BDAN GNYIS DBYER MED DU SBYOR BA'I SBYOR RGYU GNYIS KYANG SHES PA YIN NO, ,RDO RJE'I SKU NI GANG THOB NA NAM MKHA' JI SRID BAR SKU'I RIGS 'DRA MI 'CHAD PAR BZHUGS PA'I DON TE, MA DAG PA'I SGYU MA LA NI RJES MTHUN PA'I MTSAN NYID TSANG LA, DAG PA'I SGYU MA'I SKU THOB NAS NI MTSAN NYID DE KUN TSANG BA YIN NO, ,DA LTA'I GANG ZAG LA RMI LAM GYI DPES SGYU LUS KYI GNAD NGES PAR BYED PA NI SPYOD BSDUS LAS GSUNGS LA, DE MA SHES NA 'PHAGS SKOR GYI GZHUNG GANG DU'ANG DE BZHIN DU GSAL BAR BSHAD PA MED PAS, SGYU LUS KYI GNAD MI RNYED PAS DE'I DON GDON MI ZA BAR BTZAL BAR BYA'O, ,RDO RJE SEMS DPA' RANG NYID DE, ,ZHES PA DRUG GIS NI, GTZO BOR SGYU LUS THOB PA'I GANG ZAG GIS RANG NYID RDO RJE SEMS DPAR BLTA BA DANG DE NYID BSGRUB CING DE NYID MCHOD PAR BSTAN LA, DE MA THOB PAS KYANG SLAR DE DANG RJES SU MTHUN PA'I MOS PA BYA BA'ANG SHAS PAR BYA'O, ,DE NAS SNGAGS DANG ZHES PA BZHIS SNGAGS DANG PHYAG RGYA DANG DKYIL
'KHOR DANG SBYIN SREG DANG GTOR MA'I BYA BA THAMS CAD SGYU MA BZHIN DU BYA BAR GSUNGS PA'ANG GTZO BO'I DON SNGAR BSHAD PA BZHIN YIN LA, BSKYED RIM PAS DE DAG BYED PA'ANG 'DIS STON DU RUNG BAS DE LA SBYOR NA SPYI DON GYI SGYU MA DANG SBYAR RO, ,SEMS DBEN MAN CHAD KYI RDZOGS RIM PA LA NI SGYU LUS KYI GO BA TZAM GYI YID BYED DANG SBYAR TE, 'OG MA RNAMS LA'ANG SHES PAR BYA'O, ,ZHI BA DANG NI ZHES PA BZHIS ZHI RGYAS SOGS KYI LAS BSGRUB PA RNAMS 'JA' TSON BZHIN DU BYA BAR GSUNGS SO, ,DE NAS, SGEG SOGS ZHES PA BZHIS NYAmS DGU DANG GLU DANG ROL MO DANG GAR LA SOGS PA DANG 'DOD PA'I SGYU RTZAL RE BZHI SOGS LA 'JUG PA'ANG CHU ZLA BZHIN DU BYA BAR BSTAN TO, ,DE NAS GZUGS LA SOGS PA ZHES PA BZHIS DBANG PO YUL LA 'JUG PA THAMS CAD SGYU MA BZHIN DU BRTAG PAR GSUNGS TE, DE LTAR DPE SO SOR SBYAR BA'ANG NGES PA MIN GYI PHAN TSUN MTSON PA'I DON NO, ,DE NAS 'DIR NI ZHES PA BZHIS GANG DMIGS PA THAMS CAD SGYU MA BZHIN DU LTA BAR GSUNGS PA DANG, DE NAS GANG GIS ZHES PA BZHIS DE LTAR BLTA BA GTZO BO YIN PAR GSUNGS ZHES GSUNGS TE, DE NI RDO RJE MKHA' 'GRO LAS GSUNGS SO, ,MTHONG BA NYID DANG ZHES PA BZHIS DE KHO NAR DMIGS PA MED PA DANG, KUN RDZOB TU SGYU MA LTA BUR DMIGS PAR GSUNGS ZHES BSHAD DO, ,'DI THAMS CAD LA DBU MA DANG THUN MONG BA'I SGYU MA'I DON YID LA BYED PA NI GZHIR BZHAG TU GO BAR BYA'O, ,DBANG PO GANG DANG GANG LAM 'GYUR, ,'GRO BA DE DE'I RANG BZHIN DU, ,MNYAM PAR MA BZHAG SBYOR BA YIS, ,SANGS RGYAS KUN DANG MNYAM PAR SBYOR, ,ZHES GSUNGS TE, MTHONG THOS LA SOGS PA'I GANG SHAR THAMS
, ,CAD SGYU MA BZHIN DU BLTA BAR SNGAR GSUNGS MOD KYANG, 'DI NI RLUNG SEMS TZAM GYI LUS DANG, RLUNG SEMS TZAM GYI RNAM 'PHRUL DU SHES PAR BYAS PA DE NYID SANGS RGYAS KUN GYI BDAG NYID RDO RJE 'CHANG DANG MNYAM PAR SBYOR BA STE DE GNYIS DBYER MI PHYED PA'I SKUR BLTA BA'O, ,MNYAM PAR MA BZHAG SBYOR BA YIS, ,ZHES PA 'DI LA MI MNYAM BZHAG PA'I RNAL 'BYOR GYIS ZHES RGYUD GZHAN DU GSUNGS SHING, DE'I DON BDE STONG DBYER MED KYI BYANG CHUB KYI SEMS NI MI MNYAM PA YIN LA, DE LA BZHAG PA NI THAMS CAD DER MOS PA LA BSHAD PA'ANG YOD PAS, MNYAM PAR MA BZHAG PA RJES THOB TZAM LA BSHAD DGOS PA'I NGES PA MED DO, ,RNAL 'BYOR MA BZHI ZHAL SBYOR BA'I RGYUD LAS KYANG, GANG GANG DBANG PO'I LAM NYID DU, ,'GYUR BA DE DE RANG BZHIN GYIS, ,'DOD PA KUN LA LONGS SPYOD PAS, ,SANGS RGYAS KUN GYI RANG BZHIN 'THOB, ,CES KYANG GSUNGS SO, ,KUN TU NI KHYIM MAM DGON PA RU'O, ,KUN NAS NI PHYOGS THAMS CAD DU'O, ,THAMS CAD NI 'JIG RTEN GSUM GYI RANG BZHIN NO, ,BDAG NYID NI BDUN RANG GIS SO, ,RTAG TU NI DUS THAMS CAD DU'O, ,RNAM PA KUN NI 'DIR MA BSHAD PA KUN GYI RANG BZHIN NO, ,SANGS RGYAS KUN BDAG NI PHUNG PO LNGA'I RANG BZHIN SANGS RGYAS KYI NGO BO SGYU MA LTA BUR MTHONG BA YIN NO, ,DE JI LTA BU YIN NA, DNGOS GRUB NI CIG CAR RAM GO LDOG PA'I RIM PAS 'GRUB KYI RNAL 'BYOR BZHI LA SOGS PA'I RIM PAS MIN ZHES LAKshMIS BSHAD DE, GZHUNG YANG KUN TU KUN NAS THAMS CAD DANG, ,BDAG NYID RTAG TU RNAM PA KUN, ,SANGS RGYAS KUN BDAG DNGOS GRUB NI, ,RANG NYID KYIS NI DE MTHONG 'GYUR, ,ZHES 'DON NO, ,SGYU
LUS THOB PA'I PHAN YON NI, GTZO BO ZHES PA BZHIS GSHEGS BZHUGS KYI GNAS DANG ZAS GOS SOGS NAM MKHA' LAS RNYED PA DANG, SKAD CIG GIS RNYED PAR BSTAN TE, NAM MKHA' LAS ZHES PA 'OD GSAL LAS RNYED PA DANG, NAM MKHA' MDZOD KYI TING NGE 'DZIN GYIS RNYED PA'I BSHAD PA GNYIS LAKshM'IS SO, ,SRID PA ZHES PA BZHI'I DANG PO NI RANG BZHIN DANG SNANG BA'I MTSAN NYID CAN GYI 'KHOR BA'I RANG BZHIN SHES PA DANG, 'GRO NA RAB MCHOG STON PAR 'GYUR GYI DON NI 'GRO BA'I NANG NA RAB MCHOG TU GYUR PA KHYAB 'JUG DANG LHA CHEN PO SOGS KYI STON PAR 'GYUR BAR LAKshM'IS BSHAD LA, CHAG GIS, RAB MCHOG 'GRO LA STON PAR 'GYUR, ,ZHES BSGYUR RO, JI LTAR ZHES PA BZHIS STON PA BZHIN DU GZHAN PHAN LA 'JUG PAR BSHAD DE, SNA TSOGS YE SHES RJES SU SDUD PA NI SNANG BA'I YE SHES SGYU LUS KYIS SDUD PA LA 'CHAD DO, ,RDO RJE SEMS DPA' ZHES PA BZHIS BSGRUB PAR MI BYA BA CI YANG MED PA DANG, BDE CHEN PHYAG RGYA CHEN PO 'GRUB PAR GSUNGS TE, BDE CHEN GSAL BAR BYED PA'I PHYAG RGYA KHAMS GSUM GYI BUD MED KYI DBANG DU 'GYUR BA LA 'CHAD DO, ,LAS DANG ZHES PA BZHIS NI LAS NYON DANG LUS DANG BYED PA PO DANG LAS KYI 'BRAS BU THAMS CAD SMIG RGYU SOGS DANG MTSUNGS PAR BSTAN TE, DON BSDUS PA'O, ,SGYU MA LTA BU MA RNYED PA'I SKYON NI, 'DI 'DRA'I TING 'DZIN MA SHES PAS, ZHES PA NAS, DE DAG SGYU MA'I RNAM 'PHRUL LO, ,ZHES PAS BSTAN NO, ,THA MA NI CHAG GIS, DE RNAMS SGYU MA'I SMAN GYIS 'TSO, ,ZHES BSGYUR RO, ,LTA BA NGAN PA'I NAD BSKYED TSUL NI, BDAG BYIN BRLAB PA ZHES PA BZHIS BSTAN TO, ,RTAG PAR LTA BA'I DBANG GIS PHYIR
, ,LDOG PA NI, THEG PA THUN MONG BA'I SGYU MA MA SHES PA'I SKYON YANG YIN LA, GZHAN YANG DE MA SHES NA 'KHOR BA'I BAG CHAGS MA LUS PA SBYONG MI NUS PAS RTAG PAR LTA BAS 'KHOR BA LA GNAS PA ZHES PA'I THA SNYAD BYA'O, ,CHAD LTA'I DBANG GIS PHYIR LDOG PA NI, 'DI MA SHES NA GZUGS KYI SKU MTHAR THUG MI 'GRUB PAS, ZHI BA'I MTHAR LHUNG BAS GZUGS SKU CHAD PA'I SKYON NO, ,GSUM PA NI, MCHOD PA ZHES PA BZHI'I SNGA MA GNYIS KYIS MCHOD TSUL DANG, PHYI MA GNYIS KYIS DE'I PHAN YON BSTAN NO, ,DE NAS BZHIS BLA MA MCHOD PAS MA BYAS PA'I BSOD NAMS DANG, DKA' THUB MED CES BSTAN NO, ,DE NYID MI ZAD CES PA BZHIS SHIN TU CHUNG BA NAS SHIN TU CHE BA'I ZANG ZING THAMS CAD KYIS MCHOD PAR BSTAN TO, ,SLOB DPON GYIS NI ZHES PA BZHIS SLOB MA LA SLOB DPON DRIN CHE TSUL STON NO, ,BZHI PA LA GNYIS LAS, SNOD MIN NI, GANG ZHIG CES PA BZHIS BSTAN TE, NGA RGYAL CHE BA, LAM GYI RIM PA YANG DAG PA RNAMS SUN 'BYIN PA, DE KHO NA NYID KYI CHOS LA MI GUS PA LA MI BSTAN ZHES PA'O, ,SNOD DU RUNG BA NI, BLA MA LA GUS, ZHES PA BZHIS GSUNGS TE, BLA MA LA GUS PA, RDZUN SPANGS PA, RNAM PAR MKHAS PA NI BLO GROS CHE BA'O, ,RNAM PAR DBEN ZHING ZHES BSGYUR BA LTAR NA NYES SPYOD RAGS PAS DBEN PA'O, ,RGYUD GCIG PA NI, BRTAN PA'O, ,LAN CIG THOS PA JI SRID 'TSO'I BAR DU MI BRJED PA LA KHA CIG GIS BSHAD DO, ,KHAS BLANGS PA'I DAM TSIG DANG SPYOD PA RNAMS BSRUNG BA LA BSTAN PAR BYAS NA 'BRAS BU DANG LDAN NO, ,GSUM PA MJUG GI DON NI, BDAG BYIN GYIS BRLAB PA ZHES SOGS KYIS GSUNGS TE YONGS SU GRUB PA'O, ,BDAG BYIN GYIS BRLAB PA'I RIM PA BSHAD ZIN TO, ,SARBA MANGGA LAm,