` ,,AOm BDE LEGS SU GYUR CIG ,BLA NA MED PA'I RIN PO CHE GSUM GYI GTAM GYI SBYOR BA ZHES BYA BA, RJE BTZUN BLA MA 'JAM PA'I DBYANGS KYI ZHABS KYI PADMO LA GUS PAS SKYABS SU MCHI'O RAB BRTAN DAD PAS RGYAL BA'I RJES 'JUG CING, ,MNGON PAR SBYOR BA MI DMAN RNAM DPYOD KYIS, ,THUB PA'I GSUNG LAS SNYING PO LEN 'DOD LA, ,RIN CHEN GTAM GYI SBYOR BA SGROG 'DOD PAS, ,GANG GI THUGS RJE'I GZEGS MA'I CHA SHAS TZAM, ,YID LA ZHUGS PA YIS KYANG RTZOL MED PAR, ,TSIG GI MCHOG SBYIN STER MDZAD 'JAM PA'I DBYANGS, ,DE LA 'DUD DO RE BA 'BRAS LDAN MDZOD, ,SRID PA'I PHUN TSOGS G-YO BA GLOG GI GAR, ,LANG TSO MI SDOD RGYUG PA'I RI GZAR CHU, ,DE LTAR RTOGS NAS BLO GROS TSAN PO 'GAS, ,BDAG GIS RIG GNAS GANG LA SBYANGS SNYAM NA, ,RIGS LAM PHRA MO PHYED PA'I RNAM DPYOD DANG, ,GZHUNG LUGS GDAMS PAR SHAR BA'I NYAMS LEN DANG, ,TSIG SBYOR TSUL LA MKHAS PA'I NGAG GI DPAL, ,SA STENG 'DI NA RIN CHEN RNAM GSUM SNANG, ,'DI NI SHIN TU DKON ZHING 'DOD PA 'JO, ,RMAD DU BYUNG BA'I DGA' BA RGYAS BYED PAS, ,RIN PO CHE ZHES MKHAS PA RNAMS LA GRAGS, ,MKHAS PA'I YID 'PHROG RIN CHEN GZHAN YOD MIN, ,SMRA BA'I KHYU MCHOG 'PHAGS PA YAB SRAS DANG, ,LOG SMRA TSAR GCOD PHYOGS GLANG GRAGS PA LAS, ,LEd
PAR 'ONGS PA'I RIGS LAM BDUD RTZI'I CHUS, ,BLO MIG DRI MA YANG YANG MA BKRUS NA, ,SHIN TU ZAB GNAS MTHONG BA SMOS CI DGOS, ,RAGS PA'I LUNG DON LA YANG DPYOD PA NA, ,PHAL CHER LOG PAR RTOG PA 'PHEL 'GYUR ZHING, ,GAL TE YANG DAG DAM BCA' TZAM ZHIG GIS, NGES PA RNYED KYANG SGRUB DANG SUN 'BYIN GYI, ,TSAD MA'I STOBS KYIS THE TSOM MCHOD PHYIR, ,'DAM LA BTAB PA'I PHUR PA BZHIN 'GYUR BAS, ,YANG DAG BAG CHAGS BRTAN PO 'JOG MI NUS, ,'DI NA RIGS GZHUNG GNYIS LA RAB SBYANGS KYANG, ,SHAR DU 'GRO 'DOD NUB TU BGROD PA DANG; ;ZLA 'OD PHOG PAS YI DRAGS SREG PA BZHIN, ,RIGS GZHUNG NYID LA BRTEN PA'I LOG RTOG GIS, ,BLO MIG YANG DANG YANG DU BSLAD PA'I MTHUS, ,'DI PHYI'I DGE LEGS KUN 'JOMS YUN RING DU, ,YANG DAG LTA LAS PHYIR PHYOGS 'GYUR BA'I RGYU, ,CHES CHER BRTAN PO GSOG PA MANG DU SNANG, ,DE PHYIR BLO GROS PHRA ZHING MDZANGS PA DANG, ,KU SHA'I RTZE LTAR MA GYUR DE SRID DU, ,NGEMS MI SLA BAR RIGS PA'I GZHUNG LUGS LA, ,MKHAS PA'I BSHES LA BSTEN TE LEGS PAR SBYANG, ,DE LTAR BLO GROS MIG NI BYE BA DES, ,RGYAL BAS THEG PA MCHOG GI ZAB MO'I DON, ,RNAM RIG TZAM DANG NGO BO NYID MED TSUL, ,RNAM GNYIS GSUNGS PA'I DGONGS PA RNYED PAR 'GYUR, ,DE NAS MI PHAM CHOS RJE KLU SGRUB DANG, ,THOGS MED MCHED LA SOGS PA'I SHING RTA'I SROL, ,DRI MED GZHUNG MANG RNAMS LA SBYANGS PA NA, ,RGYA CHE'I GTAM GYIS DANG PO'I LAS CAN RNAMS, ,DA LTA NYID NAS SANGS RGYAS SA YI BAR, ,LEGS PAR 'KHRID PA'I ZAB MO'I GDAMS PA LA, ,NANG BYAN TSUD PAS BKA' DANG DGONGS 'GREL KUN, ,GDAMS PA'I MCHOG TU SHAR LA MKHAS PA ZER, ,LHAG MA NI TZO'I 'DON PA LTA BU DANG,
, ,CHU MED KHRON PA RI MO'I MAR ME BZHIN, ,CI PHYIR ZHE NA MKHAS PA'I MCHOG RNAMS KYIS, ,GZHUNG RNAMS NYAMS LEN SHES PHYIR BRTZAMS PHYIR RO, ,KYE MA'O SKYE DGU'I DON GNYIS 'GRUB PA NI, ,RNAM DAG GZHUNG LUGS DAG LA MA BRTEN MIN, ,DE LA BRTEN PA'ANG SGRA TZAM LHUR LEN PAS, ,'DAS PAR BYAS NAS DE LAS BSLUS PA GANG, ,CHUS KHYER 'GA' ZHIG SKOM PAS SHI BA BZHIN, ,MANG DU THOS KYANG CHOS KYIS PHONGS PA NI, ,GZHUNG LUGS GDAMS PAR SHAR BA MED PAS NONGS, ,DE PHYIR GANG BSLABS GDAMS PAR SHAR BA GCES, ,DE LTAR DON GYI GNAD RNAMS MA 'PHYUGS NA, ,TSIG SBYOR DMAN NA NYES PA CHUNG MOD KYANG, ,RGYAL BA NYID KYIS GSUNG RAB BSNGAGS PA NA, ,DON BZANG BA DANG TSIG 'BRU BZANG PO ZHES, ,GSUNGS SHING SHIN TU DKAR BA'I KHANG BZANG LA'ANG, ,BSIL ZER BYED PA'I 'OD KYIS BYUGS PA BZHIN, ,DON BZANG PA LA'ANG YID 'PHROG TSIG SBYOR GYIS, ,SPRAS PAR GYUR NA CHES CHER MDZES PAR 'GYUR, ,DMAR SER CAN DANG RGYAL BA'I LHAS BKOD PA, ,PRiTTA DANG NI DZ'A TI ZHES BYA BA'I, ,SDEB SBYOR JI BZHIN BOD SKAD LA MED KYANG, ,TSIGS BCAD LHUG PA GNYIS KA SPEL BA'I LUS, ,DON DANG TSIG GI RGYAN LA SOGS PA YI, ,MDZES BYED RGYAN GYIS SPUD PA'I TSIG SBYOR TSUL, ,SNYAN DANG GAS GZHUNG BZHIN LEGS PAR SBYAR BA NA, ,BLO GSAL RNAMS LA DGA' BA RGYAS PAR BYED, ,DE LTAR RIN CHEN RNAM PA GSUM GA'I YANG, ,RTZA BA DAM PA THEG MCHOG DGE BA'I BSHES, ,'DIS MA ZIN NA SKYE BA DU MAR YANG, ,NGAL BRGYAS 'BAD KYANG RTOGS PAR MI 'GYUR PA, ,BSHES DES ZIN NA TSE GCIG NYID LA YANG, ,BDE BLAG NYID DU NGES PA STER BA'I PHYIR, ,TSE RABS KUN TU BSHES GNYEN DAM PA YIS, ,RJES SU 'DZIN DANG ZIN PA'I
THABS LA 'BAD, ,THAR 'DOD BLO GROS CAN GYI 'JUG NGOGS MCHOG ,RIN CHEN GTAM GYI SBYOR BA 'DIR 'BAD LAS, ,BYUNG BA'I BSOD NAMS DE YIS 'GRO BA KUN, ,BSHES GNYEN DAM PA'I MGON DANG 'BRAL MED SHOG ,DE BSTEN PA LAS BLO MIG DAG GYUR TE, ,RGYAL BA'I LUGS BZANG JI BZHIN RTOGS PA DANG, ,RTAGS MA THAG TU NYAMS SU LEN PA DANG, ,DE LTAR SGRUB LA BAR CHAD MED PAR SHOG ,MA RTOGS 'GRO LA BRTZE BAS THOG MAR NI, ,ZANG ZING SBYOR BAS DGA' BAR BYAS PA'I MTHAR, ,DON BZANG TSIG LEGS SNYAN PAR SMRA BA YIS, ,BSKUL BAS BZANG PO'I SPYOD LA 'GOD PAR SHOG ,CES BLA NA MED PA'I RIN PO CHE GSUM GYI GTAM GYI SBYOR BA ZHES BYA BA MANG DU THOS PA'I DGE SLONG SPONG BA PA SHAR TZONG KHA PA BLO BZANG GRAGS PA'I DPAL GYIS 'BROG RI BO CHE DGE LDAN RNAM PAR RGYAL BA'I GLING DU SBYAR BA'I YI GE PA NI DKA' BZHI PA RIN CHEN DPAL LO, ,'DIS KYANG BSTAN PA RIN PO CHE PHYOGS KUN NAS RGYAS PAR BYED NUS PAR GYUR CIG,