` ,,NGED KYIS BYAS PA'I RDO RJE 'JIGS BYED KYI SGRUB THABS LA, KHYED KYIS DGAG PA BZHI BYAS 'DUG PA'I ZHAL GYI SKABS SU, SLOB DPON LA L'I TA'I RO LANGS BRGYAD BSKOR GYI SGRUB THABS SU, GA-YAS KYI RVA YI ZHAL GSUM NI, ,DANG PO MTHING KA GA-YAS DMAR PO, ,GA-YON SER SHIN TU KHROS PA'O, ,DE BZHIN GA-YON GYI RTZA BA'I ZHAL, ,DKAR PO DUD KHA DE BZHIN DU, ,NAG PO SHIN TU KHROS PA'O, ,ZHES PA'I RVA GA-YAS PA'I DBUS MA DANG, ,GA-YON PA'I DBUS MA LA'ANG RTZA ZHAL DU BYAS TE, DE DAG RIM PA BZHIN DU SNGON PO DANG, DKAR POR 'CHAD CING DE DAG LA ZHAL DANG POR GSUNGS MOD, 'ON KYANG LA L'I TA'I ZHE DGU MA'I SGRUB THABS SU, RVA RTZA NA NI ZHAL GSUM STE,
GA-YAS KYI DANG PO'I ZHAL NI SNGO, ,DE YI GA-YAS DMAR SER PO DANG, ,GA-YON PA'I RVA RTZA'I ZHAL GSUM NI, ,DKAR DANG DUD KHA NAG PO'O, ,ZHES PA 'DIS SNGA MA LA GNOD DO, ,GA-YAS DMAR ZHES PA'I GA-YAS THOG MA'I GSAL BYED YIN PAS, DE'I GA-YAS SU SER PO 'ONG BAR BSHAD PA DANG, 'DI DAG TU DKAR DANG DUNG KHA NAG PO ZHES RIM PA BZHIN BSHAD PAS SO, ,RO LANGS BRGYAD BSKOR 'DI MA GTOGS GZHAN RGYUD DANG SGRUB THABS GANG DU 'ANG GA-YAS GA-YON GYI BAR MA LA RTZA ZHAL BYAS PA'I THA SNYAD YE MA BYUNG ZHING, GAL TE SLOB DPON 'DI DE LTAR BZHED NA 'DI AU RGYAN GYI YUL NAS RGYUD LEN PA PO DNGOS YIN PAS 'PHAGS YUL DU TSUL 'DI LTAR 'CHAD PA'I RJES 'BRANG MANG DU 'ONG RIGS PA LAS GANG YANG MA BYUNG BAS 'DI NI CHES THE TSOM ZA BAR SNANG NGO, ,'O NA GA-YON SER SHIN TU KHROS PA'O, ,DE BZHIN GA-YON GYI RTZA BA'I ZHAL, ZHES SOGS JI LTAR 'THAD CE NA, SNGA MA NI 'GYUR 'PHYUGS PA YIN LA, PHYI MA NI YI GE NYAMS PA STE, DE YANG S'A BYA TA ZHES PA GA-YON DANG CIG SHOS GNYIS LA 'JUG PA'I 'DI CIG SHOS TE, DANG PO MTHING KHA DANG GA-YAS DMAR PO DNGOS SU SMOS PAS, CIG SHOS SER PO LAS 'OS MED PAS SO, ,DES NA COG GRU SHES RAB BLA MA'I 'GYUR SKYON TE, DANG PO MTHING KHA GA-YAS DMAR PO, ,CIG SHOS SER ZHING KHRO BA'O, ,ZHES GDON NA, GNYIS PA NI RVA RTZA'I ZHAL RTZA ZHAL DU SHOR BA STE, ,ZHE DGU MA'I SGRUB THABS SU, ,RVA RTZA NA NI ZHAL GSUM STE, ,GA-YAS KYI DANG PO'I ZHAL NI SNGO, ,ZHES DANG GA-YON PA'I RVA RTZA'I ZHAL GSUM NI, ZHES SOGS 'BYUNG BAS, 'DI LA THE TSOM MED DO, ,MKHAS PA'I LEGS BSHAD
, ,NOR BU'I TSOGS NANG DU, ,SKYON GYI MCHING BU CUNG ZAD SRID PA STE, ,ZHES DPE DANG BCAS PAS BSGRUBS 'DUG PA 'DI LA LAN BRJOD PAR BYA STE, DE YI GA-YAS DMAR SER PO DANG, ZHES PA'I GA-YAS THOG MA'I GSAL BYED YIN PAS SER PO GA-YAS SU 'ONG BAS, DES GA-YON SER POR BSHAD PA LA GNOD CES PA DANG, S'A BYA TA'I SKAD DOD GA-YON DANG CIG SHOS GNYIS KA LA 'JUG PA YIN LA, DE YANG DANG PO MTHING KHA GA-YAS DMAR PO, ,CIG SHOS SER ZHING KHRO BA'O, ,ZHES BSGYUR RGYU YIN PAS, DANG PO MTHING KHA GA-YAS DMAR PO DNGOS SU SMOS PAS CIG SHOS, SER PO LAS 'OS MED PA'O, ,ZHES PA DRI SHIN TU MI RIGS TE, ,CIG SHOS SU BSGYUR PA YIN DU CHUG KYANG, DANG PO MTHING KHA GA-YAS DMAR PO, ,ZHES 'BYUNG BA SOR 'JOG PAR YANG SNANG LA, DE LTAR BYA YANG DGOS PAS DE'I TSE, CIG SHOS ZHES PA GA-YAS PA'I CIG SHOS YIN PAS GA-YON PA YIN GYI, MTHING KHA DANG DMAR PO'I CIG SHOS SER PO'O, ,ZHES 'CHAD PA NI CHER MA 'BREL TE, DPER NA RKYEN LAS SKYES DANG CIG SHOS DANG, ZHES PA'I CIG SHOS RKYEN LAS MA SKYES PA YIN PA BZHIN TE, YONGS SU GRAGS PA'I SNGA MA'I LDOG ZLA LA CIG SHOS SU 'CHAD PA GZHUNG LUGS PA SPYI'I LUGS SO, ,DE YI GA-YAS DMAR SER PO DANG, ZHES ZHAL DMAR PO LA DE'I GA-YAS ZHES 'BYUNG BAS, DMAR PO'I 'OG TU BYUNG BA'I SER PO LA YANG, GA-YAS ZHES PA SBYAR DGOS PA'I NGES PA MED DE, DE 'DRA'I RIGS LA THOG MA'I GSAL BYED YIN MIN GNYIS KA YOD PA'I PHYIR DANG, 'DIR SMOS PA THOG MA'I GSAL BYED YIN PA DA DUNG BSGRUB DGOS PA'I
PHYIR RO, ,SHIN TU MI GSAL BA'I ZHE DGU MA'I LUNG, DE YI GA-YAS DKAR SER PO DANG, ZHES PA'I SER PO ZHES PA'I LUNG GIS, GA-YON SER ZHES PA 'GOG NA, GA-YON PA SER POR SHIN TU GSAL BAR BSHAD PA KHUNGS SU BYAS NAS ZHE DGU MA'I 'GYUR MA DAG PAR BSGRUBS NA LAN CI YOD, DES NA DE GNYIS 'GYUR LA KHAG 'JIG ? MI DGOS TE, ZHE DGU MA'I SER PO ZHES PA, GA-YON SER ZHES PA DANG MTHUN PAR BSHAD PA LA GNOD PA MED PA'I PHYIR RO, ,YANG DKAR DANG DUNG KHA NAG PO ZHES RIM PA BZHIN DU BSHAD PAS GNOD PAR SMRA BA YANG MI 'THAD DE, DPER NA MDOR BYAS LAS, RNAM SNANG GI ZHAL GSUM 'CHAD PA NA, DKAR DANG GNAG DANG DMAR BA'I ZHAL, ZHES DANG PO DKAR PO DANG, GNYIS PA NAG PO DANG, GSUM PA DMAR POR RIM PA BZHIN DU BSHAD KYANG, DE GSUM DKAR PO NAS BZUNG STE GA-YAS GA-YON GANG RUNG GCIG LA MTHAR CHAGS SU SGRIG MI DGOS SHING, DANG PO ZHAL DBUS MA DANG, GNYIS PA GA-YAS ZHAL DANG, GSUM PA GA-YON ZHAL LA BYA DGOS PA BZHIN TE, SGRUB THABS DER DE 'DRA BA MANG NGO, ,DE BZHIN DU LA LA'I TA'I SGRUB THABS CHUNG BA LAS, DBUS DANG SHAR DANG LHO DANG NUB, DE BZHIN STENG GI KHRA BO RNAMS, MTHING DANG DKAR PO DMAR PO DANG, DE LTAR SNGON PO DKAR DANG DMAR, ZHES RIM PA BZHIN BSHAD KYANG DE RNAMS DBUS DANG GA-YAS DANG GA-YON GYI ZHAL GYI RIM PA YIN NO, ,DES NA RTOG BDUN LAS DANG PO SNGON PO, GNYIS PA DMAR PO, GSUM PA SER PO ZHES PA DANG, DANG PO DKAR PO, GNYIS PA DUD KHA, GSUM PA NAG PO ZHES RIM PA BZHIN DU BSHAD PA DANG, DE GSUM RIM PA BZHIN DBUS
, ,DANG GA-YAS GA-YON GYI ZHAL DU BYED PA LA GNOD PA CUNG ZAD KYANG MED DO, ,NGED KYIS RVA GNYIS KYI RTZA BA'I ZHAL GSUM TSAN GNYIS, DBUS DANG GA-YAS GA-YON GYI ZHAL DU BYED PA LA, SGRUB THABS CHUNG BA'I LUNG DRANGS BA NI, BOD SNGA MA KHA CIG DANG PO GNYIS PA GSUM PA'I GRANGS LA 'KHRUL NAS MDUN NAS RGYAB PHYOGS SU GSUM GSUM MTHAR CHAGS SU BYED PA DANG, YANG KHA CIG MA HE'I ZHAL GYI STENG DU ZHAL GZHAN GNYIS BRTZEGS PA LA DPAG NAS, GA-YAS GA-YON GYI ZHAL GSUM GSUM YANG, RVA GNYIS KYI NANG DU BRTZEGS NAS BYED PA NOR PAR BSTAN PA'I PHYIR YIN LA, NGED KYI SGRUB THABS SU DBUS MA GNYIS RTZA ZHAL DU BYED PA DANG 'BYED PA GANG GI YANG BSHAD PA MA BYAS PAS, KHYED KYIS ZHAL SNGON PO DANG DKAR PO RTZA ZHAL YIN PA KHEGS SU CHUG KYANG NGED KYI SGRUB THABS LA NI CI YANG MI GNOD DO, ,DE LTAR RGYUD LAS DANG PO SNGON PO SOGS SU BSHAD PA LA DOGS PA'I GNAS YOD PA, GSAL BAR LA LA'I TAS DBUS DANG GA-YAS GA-YON GYI ZHAL DU BSHAD PA YIN NO, ,KHYED RANG GIS DPYAD PA DE LTAR BYED PA'I LUGS LA'ANG DE BZHIN GA-YON PA'I RTZA BA'I ZHAL, DANG PO DKAR PO ZHES PA'I DON, RVA'I RTZA BA'I ZHAL DU BYA DGOS PA'I KHUNGS SU SGRUB THABS CHA BA DRANGS NA MDZES KYI YI GE NYAMS PAR 'CHAD PA DANG, GZHUNG CHUNG BAS RTZA ZHAL DU BSTAN PAR 'CHAD PA LEGS PAR MA MTHONG NGO, ,DBUS MA'I ZHAL GCIG LA GA-YAS GA-YON GYI ZHAL GNYIS GNYIS BYUNG BAS DBUS ZHAL LA RTZA ZHAL DU BSHAD PA YIN ZHES 'CHAD PA'I BSHAD PA CUNG ZAD BYA RGYU 'DUG NA YANG KHYED GSUNG BA LTAR GZHUNG DE'I DON
SGRUB THABS CHAB DANG SPRAGS NAS, RVA'I RTZA BA'I ZHAL DU BYAS NA 'GRIG TSABS CHE'O, ,LHA GCIG LA YANG DE 'DRA BA'I DBUS ZHAL MANG PO BYUNG YANG MI 'GAL TE, ZHAL BCU GCIG PA BZHIN NO, ,RO LANGS BRGYAD BSKOR 'DI MA GTOGS PA GA-YAS GA-YON GYI BAR MA LA RTZA ZHAL DU BYAS PA MA BYUNG ZHING, SLOB DPON 'DI DE LTAR BZHED NA 'DI RGYUD GDAN 'DREN MKHAN YIN PAS, DE LTAR 'CHAD PA'I RJES 'BRANG MANG DU 'ONG DGOS PA LAS, GANG YANG MA BYUNG BAS 'DI NI CHES THE TSOM MO, ,ZHES PA'I THE TSOM MO, ,ZHES PA LA SGRUB THABS NI SLOB DPON DES MDZAD PAR KHYED RANG GIS KYANG MDZAD 'DUG PAS DE LA ZER SA MED LA, DANG PO GNYIS RTZA ZHAL YIN PA 'GOGS PAR SNANG BAS, DE LA'ANG KHYED RANG LA THE TSOM CHEN PO YOD PA'I LUGS MIN MCHI, ZHAL GYI 'GROS DE LTAR BZHED NA 'DI'I RJES 'BRANGS MANG DU 'ONG RIGS PA LAS MI SNANG ZHES PA, BOD NA 'DUG PA'I 'DI RGYA GZHUNG GI SGRUB THABS LA MDZAD DGOS PAS, DE LA YANG RTAGS DE MA NGAS PA YIN TE, LA LA'I TA'I SGRUB THABS CHE CHUNG GNYIS JI BZHIN DU LHA ZHE DGU MA DANG, LHA DGU'I SGRUB THABS PHYOGS 'DI'I RGYA GZHUNG GZHAN LA MI SNANG BA'I PHYIR DANG, ZHE DGU MAR 'JAM DBYANGS SU BSKYED NAS BGEGS GZHOM PAR GSUNGS PA JI BZHIN PA DANG, RO LANGS BRGYAD BSKOR GYI BSHAD PA JI BZHIN DU, KHRO BCU BSGOM PA PHYOGS 'DI'I RGYA GZHUNG GZHAN LA MI SNANG BA'I PHYIR RO, ,ZHAL GYI RNAM GZHAG LA DPYAD PA BYAS PA'I LAN BSHAD ZIN TO, ,PHYAG MTSAN 'DZIN PA'I SKABS SU LA LA'I TA'I SGRUB THABS CHUNG BAR PHYAG DANG PO GNYIS KYIS GLANG LPAGS 'DZIN PAR BSHAD LA, DE'I RJES SU 'BRANGS TE, SHR'I BHA DRA DANG MANYDZ'A NAS KYANG DE BZHIN DU BSHAD, DPAL 'DZIN GYIS PHYAG DANG PO GNYIS KYIS GRI THONG DANG GSUM PA DANG
, ,BZHI PAS GLANG LPAGS 'DZIN PAR BSHAD, DE BZHIN DU SO NA SHR'I DANG RDO RJE GRUB PA'I 'GREL PAR YANG BSHAD PA RNAMS LAS, 'DIR RGYUD KYI DGONGS PA NI PHYAG SO BZHI'I DANG POS GRI GUG 'DZIN PA YIN TE, RTOG PA DANG POR DKYIL 'KHOR GYI LHA SNAM LA PHYAG MTSAN RNAMS RIM PA BZHIN 'GOD PA'I 'GO GRI GUG NAS BRTZAMS PAS SO, ,RVA SKYO ZHANG GSUM MAL LO TZ'A BA STE, BOD YUL DU MTHONG BA BRGYUD PA'I MAN NGAG DANG LDAN PA PAndI TA MKHAS PA LA LEGS PAR GTUGS PA'I BKA' SROL BZHI CHAR GYIS KYANG PHYAG SO BZHI'I DANG POR GRI GUG BKOD PAS SO, ,'GREL PA DANG SGRUB THABS KYI TSIG ZIN TZAM LA NGES PA MI SNANG STE, ZHI BA'I YE SHES KYIS GA-YAS ZHAL GSUM RVA CAN DU BSHAD PA DANG, DZNY'A NA KA RAS STAG LPAGS CAN DU BSHAD KYANG, ZHAL DANG PO MA HE ZHES DANG, GCER BU MDOG NAG PO ZHES SOGS RTOG BDUN DANG KHA SBYOR GYI RGYUD DANG 'GAL BA LTA BU'O, ,ZHES PHYAG DANG PO GNYIS KYIS GLANG LPAGS 'DZIN PA 'GOG PA LA LAN BRJOD PAR BYA STE, LA LA'I TAS PHYAG DANG PO GNYIS KYIS GLANG LPAGS 'DZIN PAR BSHAD PA YANG DRANGS SHING SLOB DPON 'DI AYON NAS RGYUD LEN PA BO DNGOS YIN PAS PHYOGS 'DI LA TSAD MAR GYUR PAR BYED BZHIN DU, PHYAG DANG PO GNYIS KYIS GLANG LPAGS 'DZIN PA MIN ZHES 'GOG PA 'DI, DE'I DGONGS PA 'DI YIN ZHES KYANG MA BZHAG 'DUG PAS, DGONGS PA GZHAN MED NA NI KHAS BLANGS PA DANG 'GAL LA, DGONGS PA GZHAN YOD NA'ANG BSHAD DGOS TE RNYED PAR MI NUS SO, ,DKYIL 'KHOR GYI LHA SNAM LA PHYAG MTSAN 'GOD PA'I 'GO GRI GUG NAS BRTZAMS PA'I PHYIR ZHES PA'I RTAGS NI SHIN TU YANG MA NGES TE, DE
LTA YIN NA DKYIL 'KHOR LA PHYAG MTSAN 'GAD PA'I DANG PO SHAR DU MGO BO ZHES RGYUD DANG ZHE DGU MA GNYIS KAR GSUNGS PAS PHYAG DANG POS MGO BO 'DZIN DGOS PAR 'GYUR BA DANG, DKYIL 'KHOR GYI LHA SNAM LA PHYAG MTSAN BKOD PA DANG, PHYAG RNAMS KYIS PHYAG MTSAN 'DZIN PA'I GO RIM MI MTHUN PA DU MA 'DUG PA'I PHYIR DANG, KHYAD PAR GLANG LPAGS 'PHAN RTZE GSUM PA'I 'OG RDO RJE THO BA'I SNGA ROL DU BKOD PA'ANG MI 'THAD PAR 'GYUR LA, LHA SNAM LA PHYAG MTSAN THA MAR ME THAB BKOD PAS DE PHYAG THA MAS 'DZIN DGOS PAR 'GYUR RO, ,BOD KYI BLA MAS RGYA GAR BA LA MNYAN PA'I 'GA' YAR ZHAL MTHUN DU BYUNG BAS, THAMS CAD LA DE KHO NA LTAR YIN PA'I KHYAB PA KHYOD RANG GIS KYANG MI BZHED DGOS PAS DE RTAGS SU BKOD NAS DON DE KHO NA LTAR SGRUB PA'ANG MA NGES LA KHYAD PAR DU PAndI TA ZHI BA'I YE SHES DANG DZNYA' NA KA RA LA NOR PA BZUNG BAS NI PAndI TA LA DNGOS SU MNYAN PA'I KHA MTHUN GYI RTAGS MA NGES PA CHEN POR SONG LA, PAndI TA MKHAS PA ZHES PAS KYANG BOD KYI RVA LA SOGS PAS MNYAN PA'I PAndI TA RNAMS, PAndI TA MA NGES PA DE DAG LAS MKHAS PAR 'JOG MI NUS SO, ,KHO BO CIG GIS NI RANG GIS PHYAG DANG PO LA GNYIS SU PHYE BA DANG, DE LTAR BSHAD PA'I RGYA GAR BA GZHAN YANG YOD CES PA'I DON YIN GYI, DE DAG GIS BSHAD PA'I PHYIR CES SGRUB BYED DU MI SMRA BAS MI GNOD DO, ,DES NA RTOG BDUN DANG, SAMBHU tIR, PHYAG GA-YAS GA-YON GYI DANG PO GNYIS KYIS GRI THOD 'DZIN PA DANG, GA-YAS GA-YON GYI PHYAG BCU DRUG PA GNYIS KYIS PHYAG MTSAN 'DZIN TSUL RDZOGS PAR BSHAD PA'I MJUG TU, PHYAG GNYIS KYIS GLANG PO CHE'I BGAS PA RLON PA 'DZIN PA'O, ,ZHES PA MA GTOGS PA PHYAG DE GNYIS DANG PO DANG THA MA GANG YIN MA BSHAD DO,, 'DI
, ,LA ZHE DGU MAR PHYAG NI SUM CU RTZA BZHI STE, GNYIS KYIS GLANG PO'I PAGS RLON 'DZIN, GA-YAS KYI DANG PO GRI GUG 'CHANG ZHES RGYUD NA 'OG NA YOD PA DANG POR BTON LA, SGRUB THABS CHUNG BAR YANG, GA-YAS GA-YON DANG PO'I PHYAG GNYIS KYIS, GLANG CHEN LPAGS PA RLON PA BSNAMS, ,GRI GUG BHI DHI P'A LA DANG, ZHES GLANG LPAGS 'DZIN PA GNYIS DANG POR 'DON PA SNGAR BZHIN BSHAD DE, DE YANG PHYAG DANG PO GNYIS KYIS 'DZIN PA BSHAD DE, 'O NA 'DI ZHE DGU MAR PHYAG GA-YAS GA-YON GYI DANG PO GNYIS KYIS GRI THOD 'DZIN PAR BSHAD PA, RGYUD GNYIS LAS KYANG DE BZHIN DU GSUNGS PA MI 'GAL BA NI DGOS PAS DE'I BSHAD TSUL JI LTAR BYED SNYAM NA 'GAL BA MED DE, GLANG LPAGS GA-YAS GA-YON GYI DANG PO GNYIS KYIS 'DZIN PAR BSHAD PA'I DANG PO NI, SUM CU SO BZHI'I DNAG PO YIN TE, ZHE DGU MA SNGAR DRANGS PA LAS SHES LA, GRI THONG GA-YAS GA-YON GYI DANG PO GNYIS KYIS 'DZIN PAR BSHAD PA'I RGYUD KYI DGONGS PA NI, SUM CU SO GNYIS KYI DANG PO LA DGONGS PA'I PHYIR RO, ,DPAL 'DZIN GYIS DE DANG CUNG MI 'DRA BAR BSHAD KYANG 'DIR NI LA LA'I TA'I LUGS GTZO BOR BZUNG BA'I LUGS SO, ,DE LTAR YIN KYANG GCIG KHO NA BZUNG NAS GZHAN 'GOG MI NYAN TE, GNYIS KA'ANG GRUB CHEN GYI GZHUNG NAS 'BYUNG BA'I PHYIR TE, DPER NA GRUB CHEN L'U AI PA'I BDE MCHOG GI SGRUB THABS CHE BA PHYAG DANG PO GNYIS KYI 'OG MA GNYIS KYIS GLANG LPAGS 'DZIN PAR BSHAD LA, DPA' BO GCIG PA'I SGRUB THABS SU GA-YAS GA-YON GYI DRUG PA GNYIS KYIS GLANG PO CHE'I PAGS PA 'DZIN PA ZHES BSHAD PA BZHIN NO, ,GZHAN YANG RDO RJE 'JIGS BYED KYI ZHABS 'OG GI SROG CHAGS RNAMS LA'ANG, GZHUNG
KHUNGS THUB RNAMS SU MI MTHUN PA MANG DU BSHAD PA YIN PAS, GLANG LPAGS 'DZIN TSUL KHO NAR MA ZAD DO, ,PHYAG MTSAN LA DPYAD PA BYAS PA'I LAN BSHAD ZIN TO, ,SRUNG 'KHOR GYI SKABS SU KHYED KYI YIG CHUNG LAS, DPAL 'DZIN LA LA'I TA'I ZHE DGU MA, ZHI BA'I YE SHES SOGS KYIS, THUN MONG GI SRUNG 'KHOR YANG MI SGOM PAR RGYU'I 'JAM DBYANGS GLEGS BAM RAL GRI CAN BSKYED PA, LA LA'I TAS RAL GRI DANG SDIGS MDZUB CAN DANG, AA BHA Y'ASA RDO RJE DRIL BU 'DZIN PA SKYED DO, ,SHR'I BHA DRA DZNY'A NA KA RA SOGS KYIS THUN MONG GI SRUNG 'KHOR TZAM ZHIG BSHAD LA, RNYOG MED LHA DANG LA LA'I TA'I RO LANGS BRGYAD BSKOR DU THUN MONG MA YIN PA'I SRUNG 'KHOR KHRO BO ZHAL GSUM PHYAG DRUG PA PHYAG MTSAN RNAMS MI GSAL ZHING, KHRAGS 'KHRUGS SU GYUR PA'I SRUNG 'KHOR RGYUD GZHAN NAS 'BYUNG BA'I PHUR BU 'DEBS PA SOGS MED PA'I 'OL SPYI TZAM ZHIG 'BYUNG YANG, RGYUD 'DIR SRUNG 'KHOR GYI DON LHA GTZO BO NYID BSGOMS PAS 'GRUB PA LA DGONGS NAS, RGYA BOD KYI MKHAS GRUB RNAMS KYIS SRUNG 'KHOR MED PA DANG, THUN MONG GI SRUNG 'KHOR TZAM LA BRTEN PA'O, ,DE YANG SLOB DPON MI BSKYOD PA'I 'GREL PAR, RGYUD 'DIR NI MNGON SPYOD GTZO BOR BYAS PA YIN PAS, GDUG PA RNAMS RAB TU 'THOR BAR BYED CES DANG, PHRA KHOG BSLANG GI 'GREL PAR, KHRO BO KHAMS GSUM RNAM RGYAL GYI RGYUD DRANGS PAR, KHRO BO GSHIN RJE GSHED MTHONG NAS, ,KHRO BO GZHAN NI THAMS CAD KYI, ,THAMS CAD THAMS CAD LAG CHA SHOR, ,CES PAS 'DIR THUN MONG MA YIN PA'I SRUNG 'KHOR GAL MI CHE'O, ,ZHES 'BYUNG BA'I LAN BRJOD PAR BYA STE, RGYUD 'DIR LHA GTZO BO NYID BSGOMS PAS SRUNG 'KHOR GYI DGOS PA 'GRUB PAS THUN MONG MA
, ,YIN PA'I SRUNG 'KHOR GAL MI CHE ZHES PA LTAR YIN NA, LA LA'I TA'I LUGS LA'ANG DE LTAR 'GYUR BAS, DE'I GZHUNG LAS SNGON DU SRUNG 'KHOR THUN MONG MA YIN PA BSGOM PAR BSHAD PA MI DGOS BZHIN DU BSHAD PAR 'GYUR BAS GZHUNG RTZOM PA LA MI MKHAS PAR 'GYUR BA DANG SLOB DPON GZHAN GYIS KYANG SRUNG 'KHOR THUN MONG MA YIN PA SGOM PAR LA L'I TAS BSHAD PA'I RJES SU 'BRANG DGOS PA LAS, MA 'BRANGS PA DE DAG GI SKYON DU 'GYUR BAR 'DOD DGOS TE, SNGAR PHYAG MTSAN LA DPYAD PA'I SKABS SU KHYED RANG GIS MDZAD PA BZHIN NO, ,LHA GTZO BO'I GNAD KYIS SRUNG 'KHOR THUN MONG MA YIN PA MA BSGOMS KYANG CHOG CES PA NI, GTZO BO LA DRAG PO'I NYAMS RDZOGS PAR YOD PA LAS MI 'DA' LA, DE LA NI SNGON DU SRUNG 'KHOR BSGOM PA DU MA ZHIG 'DUG LA, RGYU MTSAN DE NI SRUNG 'KHOR THUN MONG BA LA'ANG MTSUNGS PA'I PHYIR DANG, GSANG 'DUS 'PHAGS LUGS LTA BU DKYIL 'KHOR RGYAL MCHOG GI DUS SU, KHRO BO BCU BSGOM PA LA YANG SNGON DU KHRO BO BCU'I SRUNG 'KHOR BSGOM PAR GSUNGS PA LA PHYI MAS CHOG PAS SNGA MA MI DGOS SO ZHES PAR 'GYUR BAS MA NGES SO, ,DES NA KYI RDOR DANG GUR LTA BU'I RTZA BSHAD SBYAR BA'I SGRUB THABS LA YANG GUR NAS BSHAD PA LTAR GYI SRUNG 'KHOR THUN MONG MA YIN PA'ANG BSGOM PA DANG, THUN MONG BA TZAM BSGOM PA GNYIS KA MA GSUNGS PAS, DKYIL 'KHOR DE'I GTZO BO LA DRAG NYAMS RDZOGS MA RDZOGS KYI SGO NAS MIN GYI, GANG ZAG GI RIM PA DANG BSTUN NAS GSUNGS PAS, GAL TSE MI CHE YANG GTZO
BO'I LHA DRAG MI DRAG SGRA MI GTZO'I SGOM PA PO'I GANG ZAG GI DBANG GIS 'JAG PAR SNANG NGO, ,SRUNG 'KHOR LA DPYAD PA'I LAN BSHAD ZIN TO, ,RGYAN LA DPYAD PA'I SKABS SU KHYED KYI YIG CHUNG LAS, 'DI'I RGYUD 'GREL SGRUB THABS GANG DU YANG RUS PA'I RGYAN DRUG YE MI GSAL TE SPYIR SPRUL RGYAN BYUNG NA RUS RGYAN MI 'ONG BAR MNGON TE, GANG SPRUL RGYAN GSAL BAR BYUNG BA LA RUS PA'I RGYAN YE MI 'BYUNG BAS KHYAB, DPER NA 'KHOR CHEN BZHIN, DGRA 'JIGS GSHED DMAR SOGS LA'ANG SPRUL RGYAN BYUNG NGO, ,ZHES BYA BA 'GAL BA DMIGS PA'I GTAN TSIGS SO, ,ZHES PA 'DI NI BDAG GI BSAM PA'O, ,MGON PO'I SKU 'GA' LA GNYIS KA BYUNG BA NI BOD DAG GIS BYAS LA, MTSO SKYES KYI LA LAR BYUNG BA YI GE NYAMS PA'O, ,'ON KYANG RVA SKYO SOGS BOD KYI MKHAS PA DU MAS MDZAD PA'I SNYAN BRGYUD YOD PA'ANG SRID DO ZHES PA'I LAN BRJOD PAR BYA STE, SPRUL RGYAN GSAL BAR BYUNG BA LA RUS RGYAN MI 'ONG BAS KHYAB, DPER NA 'KHOR CHEN BZHIN DGRA 'JIGS GSHED DMAR SOGS LA'ANG SPRUL RGYAN BYUNG NGO, , ZHES PA'I GTAN TSIGS 'DI LA, MA GRUB PA'I RTAGS MIN PA DANG, MTHUN PHYOGS LA MTHONG BAS 'GAL RTAGS MIN MOD KYI, RTAGS YANG DAG THAMS CAD KYI TSUL SGRUB PA'I GAL CHE SHOS NI MA NGES PA SPONG BA YIN LA, DE YANG SPRUL RGYAN GSAL BAR BYUNG BA DANG, RUS RGYAN YOD PA GNYIS GZHI MTHUN SRID PA LA GNOD PA STON DGOS PA LA 'DIR DE MA BSTAN CING STON PAR MI NUS TE, DE GNYIS GZHI MTHUN BSHAD PA'I GZHUNG KHUNGS THUB DU MA ZHIG MTHONG BA'I PHYIR RO, ,DE YANG MNGON BRJOD
, ,KYI KHRO BCU'I SKABS LAS, THAMS CAD ZHAL GSUM PHYAG DRUG PA, ,NA RA'I RUS PA'I RGYAN GYIS BRGYAN, ,ZHES DANG STAG GI PAGS PA GOS SU MAN BAS, ,SBRUL GYI RGYAN GYIS RNAM PAR BRGYAN, ,ZHES KHRO BO RNAMS LA RUS RGYAN DANG SBRUL RGYAN GSAL BAR BSHAD DO, ,MNGON BRJOD 'BROG MI DANG LO CHUNG GIS BSGYUR BA LAS, RUS RGYAN NI GSAL LA, PHYI MA'I SKABS SU 'JIGS PA'I PHRENG BA'I RGYAN CAN TE, DES NI BDAG NYID RGYAN DU BYAS, ZHES 'JIGS PA'I PHRENG BA'I RGYAN ZHES PA NI SBRUL RGYAN YIN TE, MI THUB ZLA BAS MNGON BRJOD BZHIN DU KHRO BCU BSHAD PA'I SGRUB THABS BDUD RTZI 'DZAG PA LAS, STAG GI PAGS PA'I NA BZA' MNABS, SBRUL GYI RGYAN GYIS 'JIGS MDZAD PA'O, ,ZHES BSHAD LA, RUS RGYAN NI DER YANG GSAL BAR BSHAD DO, ,L'A BA PA'I BDE MCHOG RTZA RGYUD KYI 'GREL PAR, MNGON BRJOD LA BRTEN NAS KHRO BCU BSHAD PA'I SKABS LAS KYANG, KHRO BO THAMS CAD KYANG SKRA KHAM PA GYEN DU 'BAR ZHING, SMIN MA GNYER BA'I KHRO GNYER RNAM PAR GTZIGS PA'I ZHAL CAN, THUNG ZHING GSUS PA 'PHYANG BA, SPYAN GSUM PA DMAR ZHING ZLUM PA, MGO BO'I PHRENG BAS DO SHAL BYAS SHING, MI RUS KYI RGYAN GYIS KLUBS PA, MTHA' YAS SNGON PO'I RGYAN GYIS SPYI GTZUG GI NOR BU BYAS SHING, 'JOG PO DMAR PO'I 'OD 'GYING BAS RNA CHA'O, ,PADMA CHEN PO DKAR POS DO SHAL BYAS PAS BRGYAN CING, STOBS KYI RGYU LJANG KHUS NI MCHOD PHYIR THOGS BYAS PA'O, ,DUNG SKYONG SER POS NI LAG GDUB BYAS PA'O, ,RIGS LDAN SNA TSOGS KYI MDOG GIS DPUNG RGYAN DU YANG DAG
PAR BTAGS PA'O, ,PADMA DKAR POS NI SKA RAGS SU BYAS PA'O, ,NOR RGYAS KYI BU MDOG PADMA'I RTZA BA 'DRA BAS RKANG GDUB BYAS PA'O, ,ZHES SBRUL RGYAN BRGYAD DANG RUS RGYAN GNYIS KA GSAL BAR GSUNGS LA, LHA SBAS KYI BDE MCHOG RTZA RGYUD KYI 'GREL PAR YANG YAB PA DANG MTHUN PAR 'BYUNG BAS, RUS PA DANG SBRUL GYI RGYAN GNYIS KAS LHA GCIG LA BRGYAN PA LA 'GAL BA GTAN MED PAS, DE GNYIS BYUNG BA LA YI GE NYAMS PA DANG RTOG BZO YIN SNYAM DU MI BZUNG NGO, ,GZHAN YANG GTZUG RGYAN LA SOGS PA BRGYAD PO SPRUL LA BYAS NA, RNA RKYAN SOGS RIGS MI 'DRA BA GNYIS GNYIS MI DGOS PAS SPRUL RGYAN TSANG BAR BYUNG BA LA RUS RGYAN MI DGOS SAM SNYAM PA'I DOGS PA 'BYUNG SA YOD PAS DE'I DOGS PA BCAD DGOS MOD KYANG 'JIGS BYED LA NI DE'I DOGS PA YANG MED DE, ,MI GA-YO BA'I RTOG PA'I RGYAL PO LAS, ,KHRO BO MI GA-YO BA LA RUS PA DANG RIN PO CHE DANG SBRUL RGYAN GSUM GA BSHAD PA'ANG SNANG MOD KYANG MA BRIS SO, ,DING SANG BSTAN PA 'GRIB PA LA SHIN TU NYE BAR SONG BAS SNGON GYI DAM PA RNAMS BZHIN DU PHYOGS RES MI TSIM PAR GZHUNG LUGS KUN LA 'DRIS PAR BYED CING, DE YANG RANG RANG GI GONG 'OG BSGRIGS PA'I DPYAD PA DAG PO BYED MKHAN SHIN TU DKON PA DANG, KHYAD PAR SNGAGS PHYOGS LA DE CHES SHIN TU DKON PAR SONG 'DUG PAS, PHYOGS MTHONG TZAM DANG, DE YANG GANG BSGRIGS PA'I DPYAD PA MA DAG PAR KHA TSON GCOD PA SKYON PAR GDA' NA'ANG, DAM PA KHYED GZHUNG LUGS KUN LA SBYONG ZHING, DE DANG RJES SU MTHUN PA'I DPYAD PA MDZAD PAR YOD GDA' BA LA, KHYED KYIS DPYAD PA BYAS PA'I GZHI BDAG GIS SGRUB THABS
, ,SU BKOD PA RNAMS LA'ANG 'DI LTA BU'I KHUNGS DANG DPYAD PA BYAS YOD DO ZHES SMRAS PA YIN GYI, GZHAN DU NA, SLOB DPON RGYAL PO SRAS GRAGS PA'I BSHES GNYEN GYIS, DON DKA' BA LA BDAG 'DRA'I BLO, 'KHRUL MI SRID PA MA YIN PAS, CI STE MIN NA GZHAN DU GYIS, ZHES GSUNGS PA LTAR YIN PAS, BLO DANG LDAN PA RNAMS KYI KUN DKRIGS DAM PA'I 'DZIN PA DOR TE, LEGS PAR DPYAD NAS BSTAN PA RIN PO CHE YONGS SU DAG PAR BYA'O, ,'DI NI SA BZANG PA LO TZ'A BA NGAG DBANG GIS BRGAL BRTAG GI YI GE PHUL BA'I LAN DU, RJE THAMS CAD MKHYEN PA TZONG KHA PA CHEN PO'I ZHAL SNGA NAS GNANG BA'O,,