, ,RGYAL CHEN SROG GTAD KYI SNGON 'GRO BSHAD PA'I MTSAMS SBYOR KHA SKONG BZHUGS SO,,
, ,'O MAR GYUR NAM MKHA'I (SOGS NAS,) LAS BZHI'I 'PHRIN LAS KYI ROL BA RNO MYUR THOG RGOD DRAG BO LTAR GYI MTHU STOBS NUS PA GZHAN LAS CHES CHER 'PHAGS PA BSTAN SRUNG CHEN PO RDO RJE SHUGS LDAN RTZAL ZHES YONGS SU GRAGS PA, (ZHES PA YAN RDO RJE 'CHANG PHA BONG KHA BA'I GSUNG SROG GTAD KYI CHO GA SNYING GI RGYA CAN LTAR LA, DE NAS,) 'DI NYID YIN CING, CHOS SKYONG CHEN PO 'DI NYID NI, RAB 'BYAMS NGAG GI DBANG POS MDZAD PA'I 'DI'I BYUNG TSUL BRJOD PA PAD DKAR CHUN PO SOGS LAS GSUNGS BA LTAR, THA MAL BA'I LHA KLU RGYAL BTZAN SOGS 'BYUNG PO YI DVAGS DANG 'GONG PO'I RIS SU GTOGS PA'I 'JIG RTEN DREGS PA RANG DGA' BA DANG MI 'DRA BAR, 'JAM MGON TZONG KHA PA CHEN PO'I SPYAN SNGAR RJE 'DUL BA 'DZIN PA GRAGS PA RGYAL MTSAN DU GYUR PA'I TSE THUGS DAM JI LTAR BCAS PA BZHIN, 'GRO BA'I DON DU RJE RGYAL PA GNYIS PA'I BSTAN LA LOG PAR 'KHU BA MTHA' DAG TSAR GCOD PA'I PHYIR SNYING RJE DANG SMON LAM GYI DBANG GIS BSAM BZHIN DU DRAG PO'I SKUR BSTAN PA ZHIG STE, RJE 'DUL BA 'DZIN PA'I SKYE SPRUL 'KHRUL MED DU YONGS SU GRAGS PA DGA' LDAN KHRI THOG BCO LNGA PA PAn CHEN BSOD NAMS GRAGS PA, DE'I SPRUL SKU BSOD NAMS YE SHES DBANG PO, DE'I SPRUL SKU NGAG DBANG BSOD NAMS DGE LEGS, DE'I SKU SKYE SPRUL SKU GRAGS PA RGYAL MTSAN TE DE NYID DREGS
, ,PA'I GZUGS BZUNG BA YIN LA, /KA/ DE YANG PAn CHEN BSOD GRAGS KYI SKU DUS SU DREGS BA'I SDE DPON PE HAR GYIS DENG SANG 'JIG RTEN 'DIR BSTAN PA DRI MA MED PA DANG, BSTAN 'DZIN GYI SKYES BU LUNG RTOGS YON TAN GYIS MNGON PAR MTHO BA JI 'DRA ZHIG SNYAM DU 'DZAM GLING KUN TU MYAL BA NA, RGYAL BSTAN RNAM PAR DAG PA RJE TZONG KHA PA CHEN PO'I BSTAN PA LAS GZHAN MED PAR MTHONG ZHING, BSTAN 'DZIN GYI DBUS NA PAn CHEN BSOD NAMS GRAGS PA NYID LAS LUNG DANG RTOGS PA'I YON TAN GYI TSOGS KYIS MNGON PAR MTHO BA GZHAN MA RNYED CING PAn CHEN NYID SA LA GNAS PA'I SEMS DPA' CHEN PO RTOGS PA MTHON POR BYON PA ZHIG YIN PAR SHES NAS PAn CHEN GYI DRUNG DU SONG STE, NGAS 'DZAM GLING KUN TU MYUL YANG BSTAN PA RNAM PAR DAG PA BSRE BSLAD MA ZHUGS PA RJE BLA MA'I BSTAN PA LAS GZHAN DU MI 'DUG CING, BSTAN 'DZIN GYI SKYES BU YANG KHYED LAS RTOGS BA MTHO BA GZHAN MA RNYED PAS SEMS DPA' CHEN PO KHYED KYIS RJE BLA MA'I BSTAN PA BSTAN 'DZIN DANG BCAS PA LA GNOD CING 'TSE BA MTHA' DAG TSAR GCOD PA DANG, DE NYID 'DZIN SKYONG SPEL BA'I PHYIR DU ZHI RGYAS DBANG DRAG GI THABS MKHAS KYI MDZAD PA BSTAN DU GSOL, BDAG GIS KYANG DE'I GROGS CI NUS SU BGYI'O, ,ZHES KHA BLANGS SHING, NGA NI SNGON SLOB DPON CHEN PO MTSO SKYES RDO RJE'I SPYAN SNGAR DE NYID KYI
BSTAN PA BSRUNG ZHING SKYONG BAR BKA' BSGOS, GNYER DU GTAD, KHAS BLANGS, DAM BCAS PA YIN PAS DE'I DBANG GIS DNGOS SU RJE BLA MA'I BSTAN PA LA CHES CHER BYED NUS BA MI 'DUG PAS KHYED KYIS DON DE THUGS LA DGONGS SHIG ,CES BSKUL ZHING, RJES SU SPRUL SKU GRAGS PA RGYAL MTSAN GYI SKABS KYANG DGE LDAN BSTAN SRUNG DREGS PA'I THU POR BZHENGS RAN NO ZHES YANG YANG BSKUL BA DANG, PAn CHEN BSOD NAMS GRAGS PA SKU ZHING DU GSHEGS NAS DGA' LDAN DU RGYAL BA BYAMS PA MGON PO 'KHOR BCAS DANG LHAN CIG TU THEG PA CHEN PO'I CHOS KYI BKA' BGRO PA MDZAD CING BZHUGS PA'I BKOD PA 'ON RGYAL SRAS SKU PHRENG DANG PO RGYAL SRAS SHES RAB 'PHEL BA'I SKU SKYE'I THUGS NYAMS LA GZIGS PAS SKU SKYE NYID NAS 'GRO BA'I DON DU SKU'I SKYE BA BZHES PAR GSOL BA BTAB PAS, RJE 'DI'I ZHAL NAS RNAM PA BLTA, ZHES ZHAL GYIS BZHES PA YANG BSTAN SRUNG DREGS PA'I RNAM PAR STON PA'I BRDA NYID DU NGES PA DANG, RJES SU SPRUL SKU GRAGS PA RGYAL MTSAN YANG LUGS GNYIS KYI 'PHRIN LAS RMAD DU BYUNG BAS DE LA GZHAN GYIS PHRAG DOG PAS THUGS MA RANGS PA'I MUR GLO BUR GSHEGS RKYEN DRAG PO'I MTSAMS SBYOR CI RIGS PA LA BRTEN NAS SNGON GYI THUGS DAM GNYAN PO RJES SU BSKYANGS PA SKABS SU BABS PAR DGONGS TE, SNANG SRID DREGS LDAN YONGS KYI SPYI BOR DRAG SHUL 'PHRIN LAS GNYAN MYUR NUS STOBS MI BZAD PA'I RDO RJE'I RTZE BRGYA 'BAR BA CI DGAR 'GOD LA MNGA' DBANG SGYUR BA'I SRID GSUM SROG BDAG DGE LDAN BSTAN SRUNG DGRA LHA'I RGYAL PO NYID KYI SKU'I RNAM PAR BSAM BZHIN DU BZHENGS
, ,SHING; /1/ DE'I TSE ZLA BA GCIG TZAM NAS 'BRAS SPUNGS GZIM KHANG GONG DU DE GA NYID KYI DGONGS RDZOGS DNGUL GDUNG NANG NAS TZID SGRA 'BYIN PA SOGS BYUNG BAS DNGUL GDUNG GZIM KHANG BCAS BSHIGS, SHING CHA RNAMS CHU LA BSKYUR BA DOL CHU MIG DKAR MOR CHAGS PAS DER GNAS NAS RE ZHIG PAR DU DOL RGYAL ZHES GRAGS, KUN GZIGS LNGA PA CHEN POS GRUB MTHA' GSAR RNYING THAMS CAD 'DZIN SKYONG SPEL BAR MDZAD PAS, CHOS SKYONG CHEN PO 'DIS SNGON GYI THUGS SMON GYI DBANG GIS 'JAM MGON BLA MA'I RING LUGS DRI MA MED PAR BSRUNG ZHING SKYONG BA'I PHYIR, RGYAL DBANG MCHOG LA SHIN TU 'JIGS SU RUNG BA'I RNAM 'GYUR SNA TSOGS STON PA'I GZIGS SNANG BYUNG BA NA, RGYAL DBANG NYID NAS THABS SNA TSOGS GNANG YANG PHAN PA CHER MA BYUNG BA'I TSE, SA SKYA RIN PO CHER 'DI'I ZLOG THABS BYED DGOS KYI BKA' PHEBS PAS, SA SKYA PA'I MTHU STOBS NUS PA'I DBANG PHYUG DU MAS MNAN BSREGS 'PHANGS GSUM MANG DU MDZAD DE 'GA' ZHIG RTAGS THON PA BYUNG YANG, CHOS SKYONG 'DI NYID LA CUNG ZAD TZAM YANG GNOD THUB PA MA BYUNG BA'I SKABS, GNAS CHUNG CHOS SKYONG CHEN POS 'DI LA SUS KYANG MTHO 'TSAM BYED MI NYAN, RDO RJE SHUGS LDAN RTZAL BYA BA DE YIN ZHES MTSAN GYI MNGA' GSOL KYANG MDZAD, SA SKYA PA RNAMS KYIS GTOR ZOR 'PHANGS BA'I GTOR MA TSUR LOG PA DANG, GNOD PA YANG CHER BYUNG, DBUS GTZANG GANG DU'ANG MNGON SUM GYI MTSAN MAS THAMS CAD SKRAG STE RANG DBANG MA 'DUS PA'I MU NAS, SA CHEN BSOD
NAMS RIN CHEN GYIS SA SKYAR GSUNG NGAG RIN PO CHE TSOGS BSHAD DU GNANG SKABS MTSAN MO RDO CHAR 'BEBS PA DANG, SKYE BO 'GA' ZHIG LA CHO 'PHRUL SNA TSOGS PA BSTAN, SA CHEN GYI MNAL LAM DU SA SKYA'I PHUN GLING RTZE CHEN LHA KHANG GI 'GAG NA BAN GZUGS MIG MANG PO YOD PA ZHIG SHAR BAS KHYED SU YIN GSUNGS PA LA DGE LDAN PA'I DAM SRI KHO YIN ZER BA ZHIG BYUNG BA GONG DKAR DAM PA BLO GROS DBANG PHYUG LA DE'I GNAS TSUL GSOL BAS, GONG DKAR BA'I ZHAL NAS, DENG SANG DBUS PHYOGS NA'ANG DOL RGYAL ZHES KUN GYIS MI THUB PA ZHIG 'DUG PAS GDAN SA CHEN PO NAS SDANG SHAG MA GNANG BAR SKU ZHABS RIN PO CHE NAS GSOL MCHOD GSUNG RTZOM GNANG, LHA KHANG LTA BU ZHIG SKYED LHAS SOGS SU MDZAD NA DE KA LEGS PA YONG 'GRO ZHES GSUNGS PA BZHIN, SA CHEN NAS RGYAL GSOL LOG 'DREN TSAR GCOD GSUNG BRTZAMS MDZAD, SKYED LHAS RGYAL MKHAR DE BTAB, SPYAN GZIGS DKOR CHA SOGS DNGOS PO MNANGS CHEN 'GA' RE DER 'BUL BAR MDZAD PA SKYE BO ZHIG GIS BRKUS PAS MI DE KHRAG SKYUGS NAS SHI BA DANG, YANG, SPRUL SKU GRAGS PA RGYAL MTSAN NYID BSTAN SRUNG GNYAN PO 'DI'I SKUR BZHENGS PA'I SKABS RGYAL DBANG LNGA PA CHEN PO DANG, DGA' GDONG SNGAGS RAM PA RNAM GNYIS KYIS RDO RJE SLOB DPON MDZAD DE RNAM RGYAL GRVA TSANG GI SGRUB KHAG GNYIS DANG, RDO RJE BRAG DANG SMIN GROL GLING SO SO NAS RIG 'DZIN RNAM GNYIS KYIS SLOB DPON MDZAD NAS BDE YANGS SHAR DU CHOS SKYONG 'DI LA SBYIN SREG GI LAS SBYOR GNANG STE SBYIN
, ,SREG TU PHEBS KHA RANG LA, KHA CIG GIS BSE KHRAB PAS GROGS MDZAD NAS SBYIN SREG TU MA THEBS ZHES KYANG ZER, GANG LTAR SBYIN SREG GNANG NAS MI RING BAR RNAM RGYAL GRVA TSANG GI GRVA PA MANG POR CHOS SKYONG 'DI'I 'TSUB LHONG SHIN TU CHE ZHING, MTSAMS KHAG PA RNAMS YOD SAR, DGONG MO MAR ME'I 'OD LA GZUGS MI MTHONG BA'I LAG PA CHEN POS MAR ME SGRIB PA DANG, GSOD PA, CHAB GSENG DU 'GRO MKHAN DANG, BAN GZUGS BONG BU'I MGO CAN ZLA GAM GYON PA THUG PA, SKAS MGO'I SKAS RU MI NAG RGYA LU CHAS SU 'KHRUL NAS GA-YANG LA BSKYUR GRABS BYED PA, STENG SKYON GYIS GRVA PA MANG PO GRONGS PA DANG, 'GA' ZHIG LA ZHUGS TE NAD PA YIN KHUL GYIS RTZA BSTAN PA SOGS CHO 'PHRUL SNA TSOGS PA MANG DU BYUNG ZHING, RMOR CHEN KUN DGA' LHUN GRUB KYIS KYANG KHONG RANG GI THUGS NANG DAG PA THAMS CAD LA DENG SANG DUS BABS YIN PAS RGYAL PO CHEN PO 'DI GA BSTEN DGOS ZHES CHE BRJOD BSAM GYIS MI KHYAB PA MDZAD DE KHYAB GDAL GANG CHER BSTEN DU 'JUG PA GNANG BA DANG, DER MA ZAD, SPRUL SKU GRAGS PA RGYAL MTSAN NYID KYANG GSANG BA'I RNAM THAR SOGS LAS BYUNG BA LTAR BLA MA YI DAM SANGS RGYAS BYANG SEMS MANG PO'I ZHAL GZIGS SHING LUNG BSTAN PA DANG, THUGS DA MA TING NGE 'DZIN GYI DAG PA'I RNAM ROL 'BYAMS SU KLAS SHING, SPANGS RTOGS KYI YON TAN RGYA MTSO LTA BU'I GO 'PHANG MTHON POR GSHEGS BAS NA, PHYIS SU RGYAL MCHOG LNGA PA CHEN POS KYANG DOL GYI CHU MIG DKAR MOR RGYAL KHANG GSAR BZHENGS DANG 'BREL SPYAN GZIGS DKOR CHA SOGS
'BUL BAR MDZAD CING, LNGA PA CHEN PO NYID KYI SKU DUS SU, GZHUNG GI SKU 'KHOR RJE DRUNG ZHIG LA MIG MTHONG GI RDZAS DANG, SGRIB ZHVA BCAS GNANG NAS DOL RGYAL GYI DRUNG DU YI GE ZHIG 'BUL DU GTONG BA GNANG ZHING, DES KYANG DE PHYOGS SU PHYIN PA NA DOL RGYAL GYI PHO BRANG LHA'I GZHAL MED KHANG LA 'GRAN PA LTA BUR MTHONG ZHING SGO'I GA-YAS GA-YON DU AA TZA R+YA 'JIGS SU RUNG BA GNYIS KYIS MI GTONG BA LA RJE DRUNG DES SGRIB ZHVA GYON NAS NANG DU PHYIN TE JI LTAR BYED PA BLTAS PA NA, GZHAL YAS KHANG SHIN TU YID DU 'ONG BDE'I DBUS SU KHRI MTHON PO ZHIG GI STENG DU, DGE SLONG GI RNAM PA CAN CHOS GOS RNAM GSUM GSOL ZHING, MDUN DU MAndAL BSHAMS PA 'OD KYI RANG BZHIN CAN TSUL KHRIMS KYI DRI NGAD 'THUL BA ZHIG BZHUGS 'DUG PA LA PHYI ROL NAS MI MA YIN 'JIGS SU RUNG BA MANG PO 'ONGS NAS YUL 'DI'I MNGA' NAS NGED TSO LA GNOD PA CHEN PO BYED 'DUG PAS 'DI TSO LA GNOD PA GCIG BYED DGOS PA 'DUG CES LAN MANG PO ZHUS PA LA, SNYING RJE, DE 'DRA MI RUNG ZHES NAN GYIS BKAGS KYANG SLAR 'ONGS NAS YANG YANG ZHUS PAR, 'O NA YUL DE PHYOGS SU 'DI GTOR ZHES YUNGS KAR SBAR BA GANG GNANG BA MI MA YIN DE RNAMS KYIS DE PHYOGS SU GTOR BAS YUL DE'I LO TOG THAMS CAD SER PAS BCOM STE RMEG MED PAR BYAS SHING, DE NAS SKU 'KHOR DES 'DI SKYABS MGON LNGA PAS PHUL ZHES NGED GTONG BA GNANG BYUNG ZHES YI GE PHUL BAS PHYAG GIS BZHES TE DBU THOG TU REG, LEGS PAR GZIGS PA'I GNAS TSUL SKYABS MGON MCHOG LA DES TSUR YONGS TE ZHUS PA SOGS ZHI RGYAS DBANG DRAG GI
, ,'PHRIN LAS GYI KHYAD PAR MTHA' YAS SHING, //2// MDOR NA BSTAN SRUNG CHEN PO 'DI NYID NI, NGES PA'I DON DU PAn CHEN BSOD NAMS GRAGS PA DANG, 'DUL 'DZIN GRAGS PA RGYAL MTSAN, 'JAM MGON SA PAndI TA, GRUB CHEN BIRWA PA, RJE BTZUN 'JAM DPAL DPA' BO LA SOGS PA SNYIGS MA'I DUS 'DIR 'JAM PA'I DBYANGS NYID KYI BSTAN PA BSRUNG BA'I PHYIR DU BSTAN SRUNG DREGS PA'I SKUR BZHENGS PA DANG, LHAG PAR //KHA// PAn CHEN BSOD NAMS GRAGS PA NI BU STON RIN CHEN GRUB KYI SKU'I SKYE BAR YONGS SU GRAGS SHING, BU STON RIN PO CHE NI KHA CHE PAn CHEN SH'AKYA SHR'I'I SKU'I YANG SRID DU YONGS 'DZIN PAndI TA YE SHES RGYAL MTSAN GYIS BU STON GYI RNAM THAR LAS GSUNGS LA, KHA CHE PAn CHEN NI, KHRO PHU LO TZ'A BA BYAMS PA'I DPAL GYIS, BYA KAR DRANG SRONG AO RGYAN ZHING SKYONG DANG, ,SING+GHA GLING NAS DGRA BCOM GYIS BSTAN LTAR, ,MA BYON SANGS RGYAS GSUM PAR 'TSANG RGYA ZHING, ,'DI 'OG DGA' LDAN GSHEGS LA GSOL BA 'DEBS, ,ZHES GSUNGS PA DANG MTHUN PAR YONGS 'DZIN RIN PO CHES 'DUL BA'I CHOS 'BYUNG LAS KYANG GSAL BAR GSUNGS BA LTAR BYAMS PA NAS BRTZIS PA'I MA BYON SANGS RGYAS GSUM PA DE BZHIN GSHEGS PA RAB GSAL RGYAL POR MNGON PAR RDZOGS PAR 'TSANG RGYA BA'I MDZAD PA STON PA DANG, DE BZHIN GSHEGS PA DES DANG POR THUGS BSKYED PA NAS BZUNGS TE, SANGS RGYAS PA'I TSE 'KHOR DANG SKU TSE, DAM PA'I CHOS YUN JI TZAM GNAS PA TSUN CHAD MDO SDE BSKAL BA BZANG POR GSUNGS PA LAS SHES SHING, DE'I PHYIR SAR GNAS KYI SEMS DPA'
CHEN PO'I RGYAL SRAS SPYOD PA'I THABS MKHAS KYI SGYU 'PHRUL MA NGES PA NAM MKHA' RAB 'BYAMS SU SPRO DANG SDUD PA'I BYED POR YID CHES RNYED NA 'JAM DPAL ZHI KHRO RANG BSTAN BSRUNG PA'I PHYIR DU DRAG RTZAL SRUNG MA'I RNAM PAR SHAR BA LA KHUNGS DANG 'BREL BA'I NGES SHES YANG DAG PAR 'DREN PAR BYED LA, DE LTAR RGYAL DANG RGYAL BA'I SRAS KYI MDZAD PA PHAL GYI BLO YUL LAS 'DAS PAS NA, SO SKYE THUN MONG BA'I SNANG NGOR DREGS PA'I GZUGS BZUNG BAR YANG SNGON GYI THUGS SMON GYI DBANG GIS RJE RGYAL PA GNYIS PA'I MDO SNGAGS BSHAD SGRUB KYI BSTAN PA TSANG LA DRI MA MED PA GANG NA YOD PA DER TZANDAN DRI DANG 'GROGS PA BZHIN DU BSTEN CING MCHOD PA LA MA BLTOS PAR YANG BSRUNG ZHING SKYOB PAR MDZAD LA, ZHVA SER GYI BSTAN PA LA LOG PAR SPYOD PA'I 'GRO BA MCHOG DMAN KUN LA DRAG PO'I CHAD PA THOG LTAR 'BEB PA LA 'PHRIN LAS KYI SHUGS SHIN TU MYUR ZHING, DRAG SHUL SHIN TU CHE BAS NA, RANG PHYOGS KYI SER SKYA MCHOG DMAN MANG PO ZHIG KYANG RJE'I RING LUGS GSER SBYANGS BTZOM LTA BU 'DI NYID KYIS GO MCHOD PAR GZHAN PHYOGS PA'I LTA GRUB 'KHRUL PA LAS KYANG NYID 'KHRUL MU 'BYAM DU SONG BA'I LAM LOG LAM GOL GYI GRUB MTHA' MYUR MYUR MO DANG, ZAB ZAB MOR GRAGS PA MANG PO ZHIG BSRE BSLAD BYAS PA LA BRTEN NAS BSTAN SRUNG GNYAN PO 'DIS RANG GZUGS DNGOS SU BSTAN PA DANG, KHRO GTUM 'JIGS SHING RNGAMS PA'I RNAM 'GYUR MI BZAD PA'I CHO 'PHRUL SNA TSOGS PAS KHA CIG SMYO ZHING 'PHOG PA DANG, LA LA KHONG KHRAG 'DREN CING GLO BUR DU TSE'I DUS BYED PA, 'GA'
, ,ZHIG MI 'DOD PA'I NGAN LTAS CI RIGS PAS DPAL 'BYOR 'DU LONGS RIGS RGYUD DANG BCAS PA LTAG CHU CHAD PA'I RDZING BU LTAR RIM BZHIN RJES SHUL MED PAR BTANG PA DANG, SKYE BA'I PHRENG BA GZHAN MA 'GAR YANG CI BYAS LAM DU RGYU DKA' BA SOGS MNGON SUM DU BYUNG BA DANG 'BYUNG 'GYUR MANG PO MTHONG THOS KYI YUL DU GYUR PA LTAR LAGS PAS BLO BZANG RGYAL BA'I BSTAN PA GRUB MTHA' CHAL CHOL GZHAN GYIS BSRE BSLAD MED PAR 'DZIN PA SHIN TU GAL CHE ZHING, BSTAN SRUNG GNYAN PO 'DI TSUL BZHIN BSTEN NA, ZHVA SER GYI RING LUGS DRI MA MED PA 'DI NYID BSTEN CING MCHOD PA'I DGE LDAN GYI BSTAN PA 'DZIN PA'I DPON SLOB DGE 'DUN GYI SDE DANG BCAS PAR SNYING NYE ZHING, LAS BZHI'I 'PHRIN LAS SGRUB PA LA DGOS 'DOD STZOL BA'I YID BZHIN GYI NOR BU DANG MTSUNGS PA SOGS 'PHRAL DANG YUN GYI DGOS PA KHYAD PAR CAN MANG DU YOD, ,'DI NYID KYI SKU'I RNAM 'GYUR YANG RAB BYUNG BSE THEB CAN RTA NAG LA CHIBS PA DANG, 'BUG LA CHIBS PA SOGS MANG ZHING, RDO RJE SHUGS LDAN DNGOS NI KHRO BO KHYUNG ZHON RAL GRI TZITTA 'DZIN PA DE YIN PAR GSUNGS LA, SA CHEN KUN BLO'I 'DUL 'DZIN MCHOD CHOG PHUN TSOGS 'DOD 'KHYIL NA 'DUL 'DZIN SPRUL GZHI'I RGYAL POR MDZAD PA'ANG DON DANG GNAS PAR MA ZAD, BSTAN SRUNG GNYAN PO 'DI NYID 'JIGS BYED DREGS PA'I ZOL DU SHAR BA'I DRAG PO'I MTHAR THUG YIN PAS, DGOS PA'I GTZO BO 'JAM MGON BLA MA'I RING LUGS DRI MA MED PA 'DZIN PA ZHIG BYUNG NA, CHOS SKYONG 'DI
BSTEN CING MTSAD PA TZAM GYIS DGOS PA 'GRUB CING, DE LTAR MED PAR GTZO BO YANG DRAG POR RBAD NA DGOS PA LHAG PO GANG YANG MI 'GRUB PA'I STENG DU, SHIN TU BKA' GNYAN CHES SHING, RTZUB DRAGS PA'I NYEN KA 'BYUNG BAR KHYAB BDAG 'KHOR LO'I MGON PO RDO RJE 'CHANG PHA BONG KHA PAS DNGOS SU GSUNG BA'I RGYUN LTAR, DA LAM 'DIR YANG RANG LUGS RJE DE NYID KYIS SPRUL GZHI 'DUL 'DZIN GTZO BOR MDZAD PA'I DBANG CHOG LTAR 'BUL BA LA, DE LTAR 'JIG RTEN 'DAS KYANG 'JIG RTEN DREGS PA'I ZOL 'CHANG DGE LDAN BSTAN SRUNG DGRA LHA'I RGYAL PO, BDUD KYI SDE 'JOMS PA LA THOGS PA MED PA'I RDO RJE'I SHUGS 'CHANG BA BSTAN SRUNG CHEN PO RGYAL CHEN RDO RJE SHUGS LDAN RTZAL ZHES YONGS SU GRAGS PA 'DI NYID KYI SROG GTAD SNGA SOR BLA MA RIN CHEN DBANG RGYAL GYI YIG CHA'I STENG NAS GNANG SROL YOD 'DUG KYANG, DUS PHYIS RJES GNANG GI RGYUN LTA CI, YIG CHA TZAM YANG MTHONG THOS KYI YUL DU RNYED DKA' BAR GYUR PA NA, BSTAN SRUNG CHEN PO NYID NAS, NGES PA DON GYI ZUNG 'JUG GRUB PA'I 'KHOR LOS SGYUR BSKYABS MCHOG RDO RJE 'CHANG PHA BONG KHA PA BDE CHEN SNYING PO DPAL BZANG POR, 'JIGS BYED DBANG GIS SMIN PA'I SLOB MA LA, ,SKU GSUNG THUGS KYI BYIN RLABS THOB PAR 'GYUR, ,CES SOGS KYI BRDA TSIG MDONG GSOL DU 'BUL GNANG MDZAD PA DANG CHABS CIG TU RGYAL CHEN RIGS LNGA'I RJES CHOG GSAR RTZOM GYIS GZHAN LA SPEL DGOS PA'I BSKUL MA YANG YANG MDZAD PA LA BRTEN NAS RJE RANG GI THUGS NYAMS DANG BSTUN PA'I YIG CHA'I SA BON 'GA' RE MDZAD DE DAM PA RE ZUNG LA CHIG BRGYUD DU STZAL,
, ,DE LTA NA'ANG RJE 'DI NYID NI, SNGON RING MO ZHIG NAS TSOGS GNYIS KYI GOMS PA YONGS SU RDZOGS PAS SKU TSE 'DI NYID LA'ANG DAG PA YE SHES KYI ROL PA 'BYAMS SU KLAS, DANG POR GRUB MTHA' RIS MED KYI CHOS SKOR LA GSAN BSAM BSGOM PA RGYA CHER MDZAD CING, DE YANG DPER NA, STON PA SH'AKYA'I RGYAL POS BYANG CHUB CHEN PO'I GO 'PHANG 'GRO BA'I DON DU MNGON DU MDZAD KYANG, ZHING 'DIR CHOS KYI 'KHOR LO BSKOR TE 'GRO DON MDZAD PA THUN MONG GDUL BYA'I SNANG NGOR LHA'I DBANG PO CHANGS PA SOGS KYIS BSKUL BA'I RKYEN LA BRTEN PA LTAR, RJE 'DI NYID KYANG MDO SNGAGS YONGS RDZOGS KYI BSTAN PA TSANG LA MA NOR BA DAR ZHING RGYAS PAR MDZAD PA'I THUGS BSKYED RLABS PO CHE'I MTHU GRUB PA DUS LAS YOL BAR GYUR NA RGYAL BA'I BSTAN PA DRI MA MED PA NYAMS PA'I RKYEN DU 'GYUR BA LA DGONGS TE, DGE LDAN THUN MONG MIN PA'I BSTAN SRUNG SPRUL BA'I CHOS SKYONG CHEN PO 'DI NYID KYIS DNGOS NYAMS CI RIGS PAR THABS MKHAS KYI SGYU 'PHRUL SNA TSOGS PAS DGE LDAN LTA GRUB RNAM THAR GTZANG MA SNGON GYI THUGS BSKYED LTAR RJES SU BSKYANG DGOS PA'I GSAL 'DEBS BSKUL MA SHUGS DRAG PO YANG NAS YANG DU MDZAD PA NA, RJE BTZUN BLA MA RDO RJE 'CHANG NYID NAS KYANG SNGON GYI THUGS DAM BTZAN PO RJES SU DRAN PA BDAG GIR MDZAD, DE NAS BZUNGS TE MNYAM MED DGA' LDAN PA'I RING LUGS DRI MA MED PA 'DI NYID GRUB MTHA' CHAL CHOL GZHAN GYI BSRE BSLAD MED PAR 'DZIN CING SPEL BAR DGYES BZHIN ZHAL GYIS BZHES, BSTAN SRUNG GNYAN PO 'DI NYID SRUNG MA'I
THU BOR MNGA' GSOL NAS SKU LUS DANG GRIB MA BZHIN DU 'GROGS TE RNAM BZHI'I 'PHRIN LAS THUGS KYI BZHED PA BZHIN SGRUB PAR BKA' BSGOS GNYER DU GTAD DE CHOS SKYONG BRAN BZHIN BKOL, SKU TSE MDZAD PA DANG BCAS PA'I BZHED DGONGS LHUN GYIS GRUB CING, BLO BZANG RGYAL PA GNYIS PA'I BSTAN LA BLO BZANG RGYAL BA RANG NYID SLAR BYON PA LTA BU'I MKHAS BTZUN BZANG GSUM, 'CHAD RTZOD RTZOM GSUM, LTA SGOM SPYOD GSUM GYI MDZAD PA RMAD DU BYUNG BAS NUB PHYOGS DZ'A TI'I DRI BSUNG 'THUL BA NAS SHAR PHYOGS RGYA MTSO'I MTHAR THUG GI BAR RJE 'DI NYID KYI SLOB MA YANG SLOB DANG BCAS PAS KHYAB CING, THUB BSTAN DRI MA MED PAS 'DZAM GLING YANGS PA'I KHYON LA MNGA' BSGYUR BA'I 'PHRIN LAS KYI BKA' BABS, DE LTAR THUB BSTAN YONGS RDZOGS KYI BDAG POR BZHENGS TE, NGES PA'I DON DU NYAMS RTOGS KYI GO 'PHANG MTHON POR GSHEGS NAS, RAB 'BYAMS DKYIL 'KHOR RGYA MTSO'I GTZO BOR GYUR TE, GSANG BA GSUM GYI SGYU 'PHRUL MKHA' KHYAB KYI ZHING DU SPRO ZHING SDUD PA'I MDZAD PA'I KHYAD PAR MTHA' YAS KYANG, 'DUL BA'I BCAS RKYANG PHRA MO TSUN LA'ANG KHYAD GSOD MI MDZAD PAR YON TAN THAMS CAD BUM NANG GI MAR ME BZHIN DU SBA BA JO BO BKA' GDAMS GSAR RNYING GI RNAM THAR GTZANG MA PHYAG BZHES SU BSTAR BA LAS, LHA MTHONG 'DRE MTHONG DANG MNGON SHES GRUB RTAGS PHRA MA RER RTOGS PA'I YON TAN CHEN POR KHAS 'CHE BA'I ZOG BRDZUN GYIS DAD LDAN GYI MGO BO MGAL ME LTAR BSKOR BA LA GZHAN DON DU BRLOMS PA DENG DUS KYI BSTAN 'DZIN
, ,DU GRAGS PA PHAL MO CHE LTAR LTAS NGAN RGYAN DU NGOM PA'I NGAN SPYOD KYI DRI TZAM YANG MI MNGA' BAS NA, 'DIR YANG RJE NYID KYI DAG PA'I GZIGS NGOR SHAR BA'I YIG CHA'I SA BON TZAM LA THUGS YID MA RTON PAR, SNYIGS DUS KYI NGES PA DON GYI GRUB MCHOG KHYAB BDAG STAG PHU BA PADMA BADZRA DPAL BZANG POR RGYU MTSAN ZHIB GSOL DANG BCAS TE GSOL 'DEBS NAN TAN DU MDZAD PAR, GRUB BA'I DBANG PHYUG STAG PHU BA DE NYID KYI GSUNG LAS, RTAG TU 'KHRUL YANG NYID 'KHRUL BAG CHAGS BSDEBS, ,BLA MA'I BKA' BZHIN GSOL BA BTAB PA'I MOD, ,YID DGA'I ZHING SLEBS PADMA'I NGAD LDAN DRUNG, ,'DOD DON GSOL BAS DGYES ZHAL 'DZUM BAG BCAS, ,GSUNG SKYES SEMS DPA' CHEN POR DGONGS PA GTAD, ,R'A DZ'A GDONG LNGA'I KHRI GSEB NAS DRANGS TE, ,MNGAG GZHUG GTAD PA BLA MA'I GSUNG DANG MTHUN, ,MI 'DRA'I KHYAD PAR CUNG ZAD KHA BSKANGS TE, ,PADMA'I MING GIS DGA' BA'I TSAL DU BKOD, ,DGE BAS BLA MA'I SKU TSE MDZAD 'PHRIN RGYAS, ,BU SLOB SEMS MTHUN CHOS 'BYOR BDE DAGS 'TSO, ,KHYAD PAR 'JAM MGON RING LUGS RGYAS GYUR CIG ,CES GSUNGS PA LTAR RJE STAG LUB CHEN PO NYID DAG PA YE SHES KYI GZIGS NGOR DGA' LDAN YID DGA' CHOS 'DZIN DU BEBS NAS, RJE BLA MA DGE SLONG PADMA'I NGAD LDAN GYI TSUL DU MJAL BA LA GSOL BA 'DEBS PAR MDZAD PA'I TSE, 'JAM MGON TZONG KHA BA CHEN POS RJE 'DUL BA 'DZIN PA GRAGS PA RGYAL MTSAN LA SPYAN GYIS GZIGS SHING DGONGS PA GTAD PA NA,
'DUL 'DZIN PA DE NYID KYIS NGO BO GCIG LA LDOG PA THA DAD PA'I TSUL DU BSTAN SRUNG SPRUL PA'I RGYAL CHEN RIGS LNGA 'JAM MGON BLA MA'I BZHUGS KHRI'I GSEB NAS SPYAN DRANGS TE SNGAGS GTAD ZAB MO STZAL BA'I BLA MA YAB SRAS NYI ZLA LTA BU RNAM GNYIS KYI DAG SNANG NYE BRGYUD CHU BO ZUNG 'BREL THUN MONG MA YIN PA JI LTAR BYUNG BA BZHIN, BYIN RLABS KYI BRGYUD PA MA NYAMS, DAM SEL GYIS BAR MA BCAD, CHOS BRGYUD KYI BSRE BSLAD MA ZHUGS PAR BDAG GI BLA MA'I DRUNG NAS LEGS PAR THOB PA RGYAL CHEN BRAN BZHIN 'KHOL BA'I BYIN RLABS KYI TSAN KHA GZHAN LAS KHYAD PAR DU 'PHAGS PA 'DI NYID 'BUL BA LA, (ZHES PA MAN GZHUNG LTAR RO, CUNG ZAD BSDUS PAR SPRON GONG GI AANG KI //1// RTAGS NAS //2// RTAGS LA 'GRO ZHING, DE LAS KYANG BSDUS PA BYED NA //KA// RTAGS NAS //KHA// RTAGS LA 'GRO BA'I RGYAS BSDUS BYA TSUL SBYOR SHES DGOS, 'DI NI, PHA BLA MA RDO RJE 'CHANG DE NYID KYI GSUNG GI STENG NAS RGYAL CHEN SROG GTAD BYED SKABS SNGON 'GRO'I LO RGYUS MTSAMS SBYOR KHA SKONG DANG, KHA BSGYUR BYA DGOS RNAMS MKHYEN LDAN RNAMS LA MI MKHO YANG, RMONGS RTUL SLOB DPON GYI RES SU BAB BA BDAG 'DRA'I RIGS LA MKHO BAR BSAMS TE BLA MA'I GSUNG GI ZHABS 'DEGS KYI TSUL DU KHRI BYANG SBRUL MING PAS BKOD PA STE, YI GE PA YANG BLA MA RDO RJE 'CHANG GI ZHABS PAD YUN DU BSNYEN PA'I DRUNG YIG 'DAN MA BLO BZANG RDO RJES BGYIS PA DGE LEGS 'PHEL,,) ` DAD DAM MTSUNGS MED LHA KLU DGA' TSAL BAS, ,YON SBYAR MTHUN RKYEN 'PEL TSAD BLA MA YIS, ,TSE RABS 'BRAL MED MNYES BZHIN RJES 'DZIN CING, ,ZUNG 'JUG RDO RJE 'CHANG DBANG MYUR THOB SHOG , ,,